အစောပိုင်း ခရစ်ယာန်ဘာသာထွန်းကားခဲ့ဖူးသည့် နေရာတွင် တိုးချဲ့ခြင်း

ဖွင့်ပါ

မြေထဲပင်လယ်ထဲသို့ ထိုးထွက်နေသော ဘွတ်ဖိနပ်ပုံကျွန်းဆွယ် အီတလီနိုင်ငံသည် ကမ္ဘာကိုလွှမ်းမိုးခဲ့သည့် ဘာသာရေးနှင့် ယဉ်ကျေးမှုတို့ ထွန်းကားခဲ့သောနေရာဖြစ်၏။ ၎င်းသည် ရှုခင်းအဖုံဖုံ၏အလှ၊ နာမည်ကျော်အနုပညာလက်ရာများနှင့် အရသာရှိလှသော အစားအစာတို့ဖြင့် ကမ္ဘာလှည့်ခရီးသည်များစွာကို ဆွဲဆောင်ထားသည်။ ထို့ပြင် ယင်းသည် ကျမ်းစာပညာရေးထွန်းကားခဲ့သော နိုင်ငံလည်းဖြစ်၏။

စီ.အီး. ၃၃၊ ပင်တေကုတ္တေပွဲနေ့၌ ခရစ်ယာန်ဖြစ်လာသော ဂျူးများနှင့် ဘာသာပြောင်းဝင်လာသူတို့သည် ယေရုရှလင်မြို့မှ နေရင်းဒေသသို့ပြန်လာချိန်တွင် ထိုအချိန်က ကမ္ဘာ့အာဏာစက်၏မြို့တော် ရောမသို့ စစ်မှန်သောခရစ်ယာန်ဘာသာ ဦးဆုံးရောက်ရှိခဲ့ဟန်တူသည်။ တမန်တော်ပေါလုသည် စီ.အီး. ၅၉ ခုနှစ်ခန့်တွင် အီတလီသို့ ဦးဆုံးအကြိမ်လည်ပတ်ခဲ့သည်။ သူသည် ပင်လယ်နားရှိ ပေါတယောလိမြို့တွင် ယုံကြည်ချင်းတူသူ “ညီအစ်ကိုအချို့တို့ကိုတွေ့” ခဲ့သည်။—တမန်တော် ၂:၅-၁၁; ၂၈:၁၁-၁၆။

ယေရှုနှင့်တမန်တော်များ ကြိုပြောခဲ့သကဲ့သို့ စီ.အီး. ပထမရာစုအဆုံးပိုင်း မတိုင်မီလေးတွင် အယူဖောက်ပြန်သူများသည် စစ်မှန်သောခရစ်ယာန်ဘာသာမှ တဖြည်းဖြည်းသွေဖည်သွားကြသည်။ သို့သော် ဤအစီအစဉ်စနစ်ဆိုး၏ဆုံးခန်းမတိုင်မီတွင် အီတလီနိုင်ငံအပါအဝင် ကမ္ဘာတစ်ဝန်း သတင်းကောင်းဟောပြောခြင်းလုပ်ငန်းကို ယေရှု၏တပည့်စစ်များ ဦးစီးဦးဆောင်ခဲ့ကြ၏။—မဿဲ ၁၃:၃၆-၄၃; တမန်တော် ၂၀:၂၉၊ ၃၀; ၂ သက်သာလောနိတ် ၂:၃-၈; ၂ ပေတရု ၂:၁-၃။

စိတ်ပျက်ဖွယ်အစ

(ယနေ့ ယေဟောဝါသက်သေများဟု လူသိများသော) ကျမ်းစာကျောင်းသားများ၏ ကမ္ဘာချီဟောပြောခြင်းလုပ်ငန်းကို ဦးဆောင်နေသူ ချားလ်စ် တီ. ရပ်စယ်လ်သည် ၁၈၉၁ ခုနှစ်က အီတလီရှိမြို့များသို့ ဦးဆုံးအကြိမ်လည်ပတ်ခဲ့သည်။ “အီတလီမှာ ကျွန်တော်တို့ကို အားတက်စေမယ့်အရာ ဘာမှမတွေ့ရဘူး” ဟုဆိုကာ နောင်တွင် ဓမ္မအမှု၌ဖြစ်ထွန်းစရာမရှိကြောင်း ဝန်ခံခဲ့သည်။ ညီအစ်ကို ရပ်စယ်လ်သည် ၁၉၁၀ ပြည့်နှစ်၊ နွေဦးတွင် အီတလီသို့ပြန်လာကာ ရောမမြို့လယ်ရှိ အားကစားရုံတွင် ကျမ်းစာဟောပြောချက်တစ်ခု တင်ဆက်ခဲ့သည်။ ရလဒ်ကားအဘယ်နည်း။ “ခြုံကြည့်ရင် အဲ့ဒီအစည်းအဝေးဟာ အတော့်ကိုစိတ်ပျက်စရာပဲ” ဟုသူပြောခဲ့သည်။

အမှန်မှာ ဆယ်စုနှစ်အနည်းငယ်အတွင်း အီတလီရှိ သတင်းကောင်းဟောပြောခြင်းလုပ်ငန်း တိုးတက်မှုနှေးကွေးခဲ့ရခြင်းမှာ ဖက်ဆစ်အာဏာရှင်များက ယေဟောဝါသက်သေများကို နှိပ်စက်ညှဉ်းပန်းခဲ့ကြသောကြောင့်ဖြစ်၏။ ထိုကာလအတွင်း ယင်းနိုင်ငံတွင် ယေဟောဝါသက်သေ ၁၅၀ လောက်သာရှိပြီး ၎င်းတို့အများစုမှာ တိုင်းတစ်ပါးရှိ ဆွေမျိုး၊ မိတ်ဆွေတို့ထံမှ ကျမ်းစာအမှန်တရား သင်ယူသိရှိခဲ့သူများဖြစ်ကြသည်။

အကြီးအကျယ်တိုးတက်

ဒုတိယကမ္ဘာစစ်ပြီးနောက် ခရစ်ယာန်သာသနာပြုများစွာကို အီတလီနိုင်ငံသို့ စေလွှတ်ခဲ့သည်။ သို့သော် ဗက်တီကန်အုပ်ချုပ်သူများမှ ရာထူးကြီးသူတို့သည် ခရစ်ယာန်သာသနာပြုများကို မောင်းထုတ်ရန် အာဏာပိုင်တို့ထံ တောင်းဆိုခဲ့ကြောင်း အစိုးရမော်ကွန်းတိုက်ရှိ စာများက ဖော်ပြသည်။ အနည်းငယ်မှလွဲ၍ ခရစ်ယာန်သာသနာပြုအများစုမှာ နှင်ထုတ်ခံခဲ့ကြရသည်။

ထိုအဟန့်အတားများကြား အီတလီနိုင်ငံရှိလူများစွာသည် ယေဟောဝါ၏ဝတ်ပြုရေး “တောင်တော်” ပေါ်သို့ တဖွဲဖွဲစတက်လာကြသည်။ (ဟေရှာယ ၂:၂-၄) သက်သေခံအရေအတွက် တိုးတက်မှုသည် မှတ်သားဖွယ်ဖြစ်ခဲ့၏။ ၂၀၀၄ ခုနှစ်တွင် သတင်းကောင်းကြေညာသူ ၂၃၃,၅၂၇ ဦးအထိရှိခဲ့ရာ လူ ၂၄၈ ဦးလျှင် ၁ ဦးနှုန်းဖြစ်ပြီး ခရစ်တော်၏သေခြင်း အောက်မေ့ရာပွဲတော်ကို ၄၃၃,၂၄၂ ဦးတက်ရောက်ခဲ့ကြသည်။ ယေဟောဝါသက်သေများ၏အသင်းတော် ၃,၀၄၉ ခုသည် သက်သောင့်သက်သာရှိ ဘုရားသခင့်နိုင်ငံတော်ခန်းမများတွင် အစည်းအဝေးများကျင်းပနေကြသည်။ အထူးသဖြင့် မကြာမီက အချို့နေရာများတွင် သက်သေခံဦးရေ အတော်အတန်တိုးများလာခဲ့သည်။

ဘာသာစကားမျိုးစုံဖြင့် ဟောပြောခြင်း

အာဖရိက၊ အာရှ၊ အရှေ့ဥရောပတို့မှ လာရောက်နေထိုင်ကြသူများစွာသည် အလုပ်ရှာရန်၊ ဘဝတိုးတက်ရန်နှင့် အချို့သူတို့မူ ကြေကွဲဖွယ်အခြေအနေများမှ လွတ်မြောက်ရန် အီတလီနိုင်ငံသို့ ရောက်လာခဲ့ကြသည်။ ဤသန်းနှင့်ချီသူတို့ကို ဝိညာဉ်ရေးအရ မည်သို့ကူညီပေးနိုင်မည်နည်း။

အီတလီရှိ သက်သေခံများစွာသည် စင်ဟာလာ၊တဂါးလော့ဂ်၊ တရုတ်၊ ပန်ချာပီ၊ ဘင်္ဂါလီ၊ အာရဗစ်၊ အမ်ဟာရစ်နှင့် အယ်လ်ဘေးနီးယန်းအစရှိသော ခက်ခဲသည့်ဘာသာစကားမျိုးစုံကို သင်ယူရန် စိန်ခေါ်ချက်ကို လက်ခံခဲ့ကြပြီ။ ၂၀၀၁ ခုနှစ်မှစ၍ ထိုဘာသာခြားစကားများဖြင့် သက်သေခံနိုင်ရန် သင်ယူလိုသူတို့အတွက် ဘာသာစကားသင်တန်းများ ကျင်းပခဲ့သည်။ လွန်ခဲ့သောသုံးနှစ်အတွင်း သက်သေခံ ၃,၇၁၁ ဦးသည် ဘာသာစကား ၁၇ မျိုးဖြင့်ကျင်းပသော သင်တန်း ၇၉ ခုကို တက်ရောက်ခဲ့ကြသည်။ ထို့ကြောင့် ဘာသာစကား ၂၅ မျိုးဖြင့် အသင်းတော် ၁၄၆ ခုနှင့် အုပ်စု ၂၇၄ ခုတို့ကို ဖွဲ့စည်းနိုင်ခဲ့သည်။ သို့နှင့် စိတ်ရိုးမှန်သူများစွာသည် သတင်းကောင်းကြားနာရပြီး ကျမ်းစာကို စတင်လေ့လာနေကြသည်။ အကျိုးရလဒ်များမှာ အလွန်ထူးခြား၏။

ယေဟောဝါသက်သေအမှုဆောင်တစ်ဦးသည် အိန္ဒိယနိုင်ငံမှ မာလယာလမ်စကားပြောသူ ဂျော့ခ်ျအား ကျမ်းစာအကြောင်းပြောပြသည်။ ဂျော့ခ်ျသည် အလုပ်တွင် ကြီးလေးသောပြဿနာများကြုံနေရငြား ကျမ်းစာသင်အံမှုကို ဝမ်းသာအားရလက်ခံခဲ့၏။ ရက်အနည်းငယ်ကြာသော် ဂျော့ခ်ျ၏မိတ်ဆွေ ပန်ချာပီစကားပြောသူ အိန္ဒိယအမျိုးသား ဂျီးလ်သည် ဘုရားသခင့်နိုင်ငံတော်ခန်းမသို့ ရောက်လာရာ သူနှင့်လည်း ကျမ်းစာသင်အံမှုစနိုင်ခဲ့သည်။ ဂျီးလ်သည် တယ်လဂူစကားပြော အိန္ဒိယလူမျိုးဒေးဗစ်ကို သက်သေခံများနှင့်မိတ်ဆက်ပေးခဲ့ရာ မကြာမီ ဒေးဗစ်လည်း ကျမ်းစာစလေ့လာလေသည်။ နောက်အိန္ဒိယလူမျိုးဖြစ်သူ စန်နီနှင့်ရှူဘက်ရှ်တို့သည် ဒေးဗစ်နှင့်တစ်အိမ်တည်းတွင် နေထိုင်ကြ၏။ သူတို့နှစ်ဦးစလုံး ကျမ်းစာလေ့လာခဲ့ကြသည်။

အပတ်အနည်းငယ်ကြာသော် မာရသီစကားပြော အမျိုးသားတစ်ဦးက သက်သေခံများထံ ဖုန်းဆက်ကာ “ကျွန်တော်က ဂျော့ခ်ျရဲ့မိတ်ဆွေပါ။ ကျွန်တော့်ကို ကျမ်းစာသင်ပေးနိုင်မလား” ဟုပြောခဲ့၏။ ထို့ပြင် တမီလ်စကားပြောသူ စူမစ်တ်လည်း ကျမ်းစာလေ့လာလိုသည်။ နောက်ပိုင်းတွင် ဂျော့ခ်ျ၏မိတ်ဆွေနောက်တစ်ဦးက ဖုန်းဆက်ပြီး ကျမ်းစာသင်ပေးပါရန် တောင်းဆိုခဲ့သည်။ ထို့ပြင် ဂျော့ခ်ျသည် အခြားလူငယ်တစ်ဦးဖြစ်သော မဲ့ခ်စ်ကို ဘုရားသခင့်နိုင်ငံတော်ခန်းမသို့ ခေါ်လာခဲ့သည်။ ထိုသူလည်း ကျမ်းစာသင်ပေးဖို့ တောင်းဆိုသည်။ ယခုအချိန်အထိ ကျမ်းစာသင်အံမှုခြောက်ခု ကျင်းပနေကြပြီး နောက်ထပ်သင်အံမှုလေးခု ကျင်းပရန် အစီအစဉ်များပြုလုပ်နေကြသည်။ သူတို့သည် ထိုသင်အံမှုများတွင် ဟင်ဒီ၊ မာလယာလမ်၊ မာရသီ၊ ပန်ချာပီ၊ တမီလ်၊ တယ်လဂူနှင့် အူရ်ဒူဘာသာစကားဖြင့် စာပေများကို အသုံးပြုနေကြသော်သည်း အင်္ဂလိပ်စကားဖြင့် ပြောဆိုကြသည်။

နားမကြားသူများ သတင်းကောင်း “ကြားနာရ”

အီတလီနိုင်ငံတွင် နားမကြားသူ ၉၀,၀၀၀ ကျော်ရှိ၏။ ၁၉၇၀ ပြည့်လွန်နှစ်များအလယ်ပိုင်းတွင် သက်သေခံများသည် ထိုသူတို့အား ကျမ်းစာအမှန်တရားကို စတင်သွန်သင်ပေးခဲ့ကြသည်။ အစပိုင်း၌ ထိုလယ်ကွင်းတွင်ပါဝင်လိုသူ အမှုဆောင်ချင်းတို့အား နားမကြားသောသက်သေခံတချို့က အီတလီလက်ဟန်ပြဘာသာစကား (အိုင်အက်စ်အယ်လ်) ကို သင်ပေးခဲ့ကြသည်။ ထို့နောက် နားမကြားသူများစွာသည် သမ္မာကျမ်းစာကို စိတ်ဝင်စားလာကြသည်။ ယနေ့ အီတလီလက်ဟန်ပြဘာသာစကား အသုံးပြုသူ ၁,၄၀၀ ကျော်တို့သည် ခရစ်ယာန်အစည်းအဝေးများကို တက်ရောက်နေကြသည်။ အသင်းတော်ဆယ့်ငါးခုနှင့် အုပ်စု ၅၂ ခုတို့သည် အီတလီလက်ဟန်ပြဘာသာစကားဖြင့် အစည်းအဝေးများကို ကျင်းပနေကြသည်။

အစပိုင်းတွင် နားမကြားသူများအား ဟောပြောခြင်းကို ဆန္ဒရှိသူသက်သေခံအချို့ကသာ လုပ်ဆောင်ခဲ့ကြသည်။ သို့သော် ၁၉၇၈ ခုနှစ်တွင် ယေဟောဝါသက်သေများ၏ အီတလီဌာနခွဲရုံးက နားမကြားသူတို့အတွက် စည်းဝေးကြီးများ စတင်စီစဉ်ပေးခဲ့သည်။ မီလန်မြို့၌ကျင်းပမည့် အပြည်ပြည်ဆိုင်ရာစည်းဝေးကြီးတွင် နားမကြားသူများအတွက် အစီအစဉ်ရှိမည်ဖြစ်ကြောင်း ထိုနှစ်၏မေလတွင် ကြေညာခဲ့သည်။ ၁၉၇၉၊ ဖေဖော်ဝါရီလတွင် နားမကြားသူများအတွက် ဦးဆုံးတိုက်နယ်စည်းဝေးပွဲကို မီလန်မြို့ရှိ အစည်းအဝေးခန်းမ၌ ကျင်းပခဲ့သည်။

၎င်းနောက် ဌာနခွဲရုံးသည် နားမကြားသူတို့အား ဝိညာဉ်ရေးအစာကျွေးမွေးခြင်းကို အာရုံစိုက်သည့်အနေဖြင့် တိုးများလာသော ဧဝံဂေလိဟောပြောသူတို့အား ထိုဘာသာစကားကို ပိုမိုတတ်ကျွမ်းအောင် ကြိုးစားကြဖို့ အားပေးခဲ့သည်။ နားမကြားသူသက်သေခံများကို အမှုဆောင်လုပ်ငန်းတွင် လေ့ကျင့်ပေးရန်နှင့် ခရစ်ယာန်အစည်းအဝေးများ စီစဉ်ကျင်းပပေးရန် (အချိန်ပြည့်ဧဝံဂေလိဟောပြောသူ) အထူးရှေ့ဆောင်တို့ကို ၁၉၉၅ ခုနှစ်မှစ၍ အုပ်စုအချို့သို့ စေလွှတ်ခဲ့သည်။ အစီအစဉ်မြင်ကွင်း ပိုမိုကောင်းမွန်စေရန် အစည်းအဝေးခန်းမသုံးခုတွင် ခေတ်အမီဆုံးဗီဒီယိုစနစ် တပ်ဆင်ထားသည်။ နားမကြားသူတို့အတွက် ဝိညာဉ်ရေးအစာအဖြစ် ခရစ်ယာန်စာပေများကို ဗီဒီယိုခွေများဖြင့် ထုတ်ဝေထားပြီ။

သက်သေခံများသည် နားမကြားသူတို့၏ ဝိညာဉ်ရေးလိုအပ်ရာကို အရေးထားဖြည့်ဆည်းပေးနေကြောင်း အကဲခတ်သူများ သတိပြုမိကြသည်။ အီတလီနားမကြားအသင်းမှထုတ်ဝေသော ပီရိုးနှင့်ဆစ်နီမဂ္ဂဇင်းတွင် . . . ဘုန်းတော်ကြီးတစ်ဦး၏စာကို ဤသို့ကိုးကားဖော်ပြထား၏– “နားမကြားသူ၏လိုအပ်ရာများကို မပြတ်တမ်းဂရုစိုက်ရသည့်အတွက် နားပင်းခြင်းသည် စိတ်ကသိကအောက်ဖြစ်စေ၏။ ဥပမာ၊ ချာ့ခ်ျသို့ အခက်အခဲမရှိဘဲ သူ့ဘာသာသူရောက်လာသော်လည်း အခမ်းအနားပွဲတွင် ဖတ်ပြသမျှ၊ ထုတ်ဖော်ကြေညာသမျှ၊ သီချင်းဆိုသမျှတို့ကို ဘာသာပြန်ပေးမည့်သူ လိုပါသည်။ ဝမ်းနည်းစရာမှာ ချာ့ခ်ျက ထိုသို့မစွမ်းဆောင်ပေးနိုင်သေးကြောင်း၊ ဒေသန္တရချာ့ခ်ျမှာထက် ယေဟောဝါသက်သေတို့၏ ဘုရားသခင့်နိုင်ငံတော်ခန်းမများတွင် နားမကြားသူတို့ကို ပို၍အရေးစိုက်ကြကြောင်း ဂိုဏ်းချုပ်ကဝန်ခံသည်။”

အကျဉ်းသားများကို သတင်းကောင်းဟောပြော

လူတစ်ဦးသည် ထောင်ကျနေသော်လည်း လွတ်မြောက်ပြီဟုဆိုနိုင်မည်လော။ ဆိုနိုင်ပါသည်၊ အကြောင်းမှာ သမ္မာကျမ်းစာကို လက်ခံယုံကြည်ကာ မိမိတို့၏အသက်တာတွင် ကျင့်သုံးသူများအား “လွတ်” မြောက်ပေးနိုင်စွမ်းရှိ၏။ “ဖမ်းသွားချုပ်ထားလျက်ရှိသောသူတို့အား” ယေရှုကြွေးကြော်ခဲ့သောသတင်းသည် အပြစ်နှင့် မှားယွင်းသောဘာသာမှ လွတ်မြောက်စေသည်။ (ယောဟန် ၈:၃၂; လုကာ ၄:၁၆-၁၉) အီတလီရှိအကျဉ်းထောင်များတွင် ဟောပြောခြင်းဖြင့် အလွန်ကောင်းသောအကျိုးရလဒ်များ ရရှိနေကြသည်။ အစိုးရက ယေဟောဝါသက်သေအမှုဆောင် ၄၀၀ နီးပါးကို အကျဉ်းသားတို့ထံ ဝိညာဉ်ရေးထောက်မကူညီပေးရန် လည်ပတ်ခွင့်ပြုထားသည်။ ကက်သလစ်မဟုတ်သော အဖွဲ့အစည်းတို့တွင် ယေဟောဝါသက်သေများသည် ထိုတာဝန်ကိုယူရန် ခွင့်တောင်း၍ အခွင့်ရရှိခဲ့သည့် ဦးဆုံးအဖွဲ့ဖြစ်၏။

ကျမ်းစာသတင်းတရားသည် မထင်မမှတ်သောနည်းမျိုးစုံဖြင့် ပျံ့နှံ့နိုင်သည်။ အကျဉ်းသားတို့က ယေဟောဝါသက်သေများ၏ ကျမ်းစာပညာပေးလုပ်ငန်းအကြောင်း အကျဉ်းသားချင်းတို့အား ပြောပြကြသည်။ ထိုအဖော်တချို့က သက်သေခံအမှုဆောင်တစ်ဦးကို သူတို့ထံ လာရောက်လည်ပတ်ရန် တောင်းဆိုခဲ့ကြသည်။ သို့မဟုတ် ကျမ်းစာစလေ့လာနေသော သူတို့၏မိသားစုဝင်များက သက်သေခံများအား လာလည်ပတ်ရန်တောင်းဆိုဖို့ အကျဉ်းသားတို့ကို တိုက်တွန်းခဲ့ကြသည်။ လူသတ်မှုနှင့် အခြားရာဇဝတ်မှုကြီးများ ကျူးလွန်ခဲ့သည့်အတွက် တစ်သက်တစ်ကျွန်းထောင်ချခံရသော ထောင်သားအချို့က နောင်တရကာ မိမိတို့အသက်တာကို သိသိသာသာပြောင်းလဲခဲ့ကြပြီ။ ယင်းကြောင့် ယေဟောဝါဘုရားသခင်ထံ မိမိတို့ကိုယ်ကိုဆက်ကပ်အပ်နှံပြီး နှစ်ခြင်းခံရန် အသင့်ရှိနေကြသည်။

အကျဉ်းထောင်များစွာတွင် ကျမ်းစာအကြောင်း လူထုဟောပြောချက်များ ပေးရန်၊ ယေရှု၏သေခြင်းအောက်မေ့ရာပွဲတော် ကျင်းပရန်၊ ယေဟောဝါသက်သေများထုတ်ဝေထားသည့် ကျမ်းစာဆိုင်ရာဗီဒီယိုခွေများ ပြသရန် စီစဉ်ခဲ့ကြသည်။ ဤအစည်းအဝေးများကို အကျဉ်းသားများစွာ တက်ရောက်ကြသည်။

သက်သေခံများသည် အကျဉ်းသားတို့အား လက်တွေ့ကူညီနိုင်ရန် သူတို့အတွက် အကူအညီဖြစ်မည့် အကြောင်းအရာများပါရှိသော မဂ္ဂဇင်းများစွာ ဖြန့်ဝေပေးခဲ့ကြသည်။ အဆိုပါမဂ္ဂဇင်းတစ်စောင်မှာ “အကျဉ်းသားများ ပြုပြင်ပြောင်းလဲနိုင်မည်လော” [လိပ်] အကြောင်းကိုဆွေးနွေးထားသော ၂၀၀၁၊ မေ ၈ ရက်ထုတ် နိုးလော့!ဖြစ်၏။ ၂၀၀၃၊ ဧပြီ ၈ ရက်ထုတ်က “မိသားစုတွင် မူးယစ်ဆေးတလွဲသုံးခြင်း—ဘာလုပ်နိုင်မည်နည်း” [လိပ်] အကြောင်းကို သုံးသပ်ထားသည်။ အကျဉ်းသားတို့ကို ထိုမဂ္ဂဇင်းများစွာ ဝေငှခဲ့သည်။ ယင်းကြောင့် ကျမ်းစာသင်အံမှုရာနှင့်ချီ ကျင်းပနေကြသည်။ ထောင်စောင့်အချို့လည်း ကျမ်းစာသတင်းတရားကို စိတ်ဝင်စားကြသည်။

အာဏာပိုင်တို့၏ခွင့်ပြုချက်ရပြီးနောက် ကော့စတန်တီနိုအမည်ရှိ အကျဉ်းသားတစ်ဦးသည် စန်ရီမိုရှိ ဘုရားသခင့်နိုင်ငံတော်ခန်းမတစ်ခုတွင် ဒေသခံသက်သေခံ ၁၃၈ ဦး၏ရှေ့မှောက် နှစ်ခြင်းခံခဲ့သည်။ သူနှစ်ခြင်းခံပြီးနောက် “ကျွန်တော်ဟာ ချစ်ခင်ကြင်နာမှုနဲ့ လွှမ်းခြုံသလိုခံစားရတယ်” ဟုသူပြောခဲ့သည်။ ဒေသခံသတင်းစာတစ်စောင်တွင် ထောင်စောင့်တစ်ဦး၏စကားကို ဤသို့ဖော်ပြခဲ့၏– “ဒီခွင့်ပြုချက်ကို . . . ကျွန်တော်တို့ ဝမ်းသာအားရ ပေးခဲ့တယ်။ ထောင်သားတစ်ဦးရဲ့ လူမှုရေး၊ ပုဂ္ဂိုလ်ရေးနဲ့ ဝိညာဉ်ရေးကို ပြန်နာလန်ထူစေနိုင်တဲ့အရာမှန်သမျှ ပြုလုပ်ပေးသင့်တယ်။” ကျမ်းစာမှ တိကျမှန်ကန်သောအသိပညာက ကော့စတန်တီနို၏အသက်တာကို အကြီးအကျယ်ပြောင်းလဲစေခဲ့ရာ သူ၏ဇနီးနှင့်သမီးက သဘောကျစွဲမှတ်သွားပြီး ဤသို့ဆို၏– “သူပြောင်းလဲသွားတာကို ကျွန်မတို့ သိပ်ဂုဏ်ယူတာပဲ။ သူဟာ ကိုလူအေးဖြစ်လာပြီး ကျွန်မတို့ကို ပိုအရေးစိုက်လာတယ်။ သူ့ကို ပြန်ယုံကြည်စိတ်ချပြီး ရိုသေလေးစားလာတယ်။” သူတို့လည်း ကျမ်းစာစလေ့လာကြပြီး ခရစ်ယာန်အစည်းအဝေးများကိုလည်း တက်ရောက်နေကြသည်။

စာဂျိုသည် ခိုးမှု၊ ဓားပြတိုက်မှု၊ မူးယစ်ဆေးမှောင်ခိုကူးမှု၊ လူသတ်မှုတို့ကြောင့် ၂၀၂၄ ခုနှစ်အထိ ထောင်နန်းစံရမည့်သူဖြစ်၏။ သုံးနှစ်တိုင်တိုင် ကျမ်းစာလေ့လာကာ သူ့အသက်တာကို ပြောင်းလဲခဲ့ပြီးနောက် နှစ်ခြင်းခံဖို့ ဆုံးဖြတ်လိုက်သည်။ သူသည် အယ်လ်ဘာကျွန်းရှိ ပိုရ်တို အပ်စူရိုထောင်မှ ယေဟောဝါသက်သေတစ်ဦးအဖြစ် နှစ်ခြင်းခံခဲ့သော ၁၅ ယောက်မြောက် အကျဉ်းသားဖြစ်သည်။ ထောင်အားကစားကွင်းရှိ သယ်ယူရလွယ်သောရေကူးကန်တွင် သူနှစ်ခြင်းခံသည်ကို အကျဉ်းကျဖော်များစွာ ရှုစားခဲ့ကြ၏။

အနှစ် ၂၀ ထောင်ဒဏ်ချခံရသူ လီယိုနာဒိုသည် ပါမာမြို့ရှိ ဘုရားသခင့်နိုင်ငံတော်ခန်းမတွင် နှစ်ခြင်းခံရန် အထူးခွင့်ပြုချက်ရခဲ့သည်။ ဒေသခံသတင်းစာတစ်စောင်၏ တွေ့ဆုံမေးမြန်းခန်းတွင် လီယိုနာဒိုက “ယေဟောဝါသက်သေတစ်ဦးဖြစ်ဖို့ ကျွန်တော်ဆုံးဖြတ်လိုက်တာဟာ ထောင်မှောင်ရိပ်ထဲက ထွက်ပေါက်ရှာချင်လို့ မဟုတ်ဘူး၊ ဝိညာဉ်ရေးလိုအပ်ရာကို ဖြည့်ဆည်းချင်လို့ပါ” ဟုသူပြောခဲ့၏။ “ကျွန်တော့်အသက်တာဟာ အမှားအယွင်းတစ်ခုဖြစ်ခဲ့တယ်၊ ဒါပေမဲ့ အဲ့ဒါတွေကို အတိတ်မှာချန်ထားခဲ့ပြီ။ ကျွန်တော် နေ့ချင်းညချင်း ပြောင်းလဲသွားတာမဟုတ်ပေမဲ့ ပြောင်းလဲလာပါပြီ။ ဆက်ဖြောင့်မတ်နေဖို့ ကြိုးစားရမယ်” ဟုသူပြောခဲ့၏။

လူသတ်မှုကျူးလွန်သူ ဆဲလ်ဗာတောသည် စပိုလီတိုအထူးလုံခြုံရေးထောင်တွင် ရှိနေ၏။ ထောင်ထဲတွင် သူနှစ်ခြင်းခံခဲ့ရာ လူအတော်များများ စွဲမှတ်သွားကြသည်။ ၎င်းထောင်မှ ထောင်စောင့်က “ထောင်သားတွေနဲ့ လူ့အဖွဲ့အစည်းတစ်ရပ်လုံးကို အကျိုးပြုပြီး အမူအကျင့်ပိုကောင်းမွန်စေတဲ့ ရွေးချယ်မှုရဲ့ အရေးပါမှုကို အားပေးသင့်တယ်” ဟုပြောခဲ့၏။ ဆဲလ်ဗာတော၏ပြောင်းလဲမှုများကြောင့် ယခု သူ၏ဇနီးနှင့်သမီးတစ်ဦးသည် ယေဟောဝါသက်သေတို့၏အစည်းအဝေးများကို တက်ရောက်နေကြပြီ။ ဆဲလ်ဗာတော သက်သေခံခဲ့သော အကျဉ်းသားတစ်ဦးလည်း ယေဟောဝါထံဆက်ကပ်အပ်နှံသည့် ကျေးကျွန်တစ်ဦးအဖြစ် နှစ်ခြင်းခံခဲ့သည်။

အစောပိုင်းခရစ်ယာန်ဘာသာသည် အီတလီနိုင်ငံတွင် တိုးချဲ့ထွန်းကားခဲ့သည်။ (တမန်တော် ၂:၁၀; ရောမ ၁:၆၊ ၇) ဤခေတ်၏ ရိတ်သိမ်းချိန်တွင် ဝိညာဉ်ရေးကြီးထွားမှုနှင့် တိုးချဲ့မှုတို့သည် ပေါလုနှင့် သူ၏ခရစ်ယာန်ချင်းတို့ ပင်ပင်ပန်းပန်း သတင်းကောင်းဟောခဲ့သော ဒေသများ၌ပင် ဆက်ဖြစ်ထွန်းလျက်ရှိသည်။—တမန်တော် ၂၃:၁၁; ၂၈:၁၄-၁၆။

[စာမျက်နှာ ၁၃ ပါ မြေပုံ]

(ကားချပ်အပြည့်အစုံကို စာစောင်တွင်ကြည့်ပါ)

အီတလီ

ရောမ

[စာမျက်နှာ ၁၅ ပါ ရုပ်ပုံများ]

ရောမရှိ ဘီတုံတိုအစည်းအဝေးခန်းမနှင့် အီတလီ လက်ဟန်ပြဘာသာစကား အသင်းတော်

[စာမျက်နှာ ၁၆ ပါ ရုပ်ပုံ]

ကျမ်းစာအမှန်တရားအားဖြင့် အကျဉ်းသားများ ‘လွတ်မြောက်’ လာနေကြ

[စာမျက်နှာ ၁၇ ပါ ရုပ်ပုံများ]

တစ်ချိန်က ခရစ်ယာန်ဘာသာ ထွန်းကားခဲ့သည့်နေရာတွင် ဝိညာဉ်ရေးဘက် ဆက်တိုးပွားနေ

ကင်းမျှော်စင်—လေ့လာရန် စာစောင်