‘ကောင်းကျိုး​ချမ်းသာ​၏ ဝမ်းမြောက်စရာ​သတင်းကို ကြား​ပြော​ခြင်း’

‘ကောင်းကျိုး​ချမ်းသာ​၏ ဝမ်းမြောက်စရာ​သတင်းကို ကြား​ပြော​သော​သူ . . . ၏​ခြေ​တို့သည် တောင်ပေါ်​မှာ အလွန်​တင့်တယ်လှ​စွ​တကား။’—ဟေရှာယ ၅၂:၇။

၁၊ ၂။ (က) အဘယ်​ကြောက်မက်​ဖွယ်​ရာ​များ နေ့စဉ် ဖြစ်ပျက်​နေသနည်း။ (ခ) သတင်းဆိုး​များ အမြဲ​ကြားနေ​ရခြင်း​ကို လူအများ မည်သို့​တုံ့ပြန်​ကြ​သနည်း။

ယနေ့ ကမ္ဘာ​တစ်ဝန်း​မှ​လူတို့သည် မိမိတို့ကို သတင်းဆိုး​များ​ဖုံးလွှမ်း​နေသည်​ဟု ခံစား​ကြ​ရ၏။ ရေဒီယို​ဖွင့်လိုက်​သည်​နှင့် ကမ္ဘာ​ကို ခြိမ်းခြောက်​နေသော သေစေနိုင်​သည့် ရောဂါဆိုး​များ​အကြောင်း ထိတ်လန့်စရာ​သတင်း​များ ကြား​ရ၏။ ရုပ်မြင်သံကြား​သတင်း​ကြည့်​လျှင် ငတ်ပြတ်​ပြီး ငိုယို​အစာ​တောင်း​နေကြ​သည့် ကလေး​သူငယ်​များ​၏​ရုပ်​ပုံလွှာ​တို့ကို မေ့ပျောက်​၍​မရအောင် မြင်တွေ့ရ​၏။ သတင်းစာ​ကောက်​ကိုင်​လိုက်​သည့်​အခါ အဆောက်အအုံ​များ​ကို ဗုံးကြဲ​ဖျက်ဆီး၊ အပြစ်မဲ့​လူကြီးလူငယ်​တို့အား အစုလိုက်​အပြုံလိုက်​သတ်ပစ်​နေ​မှုများ​ကို ဖတ်​ရ၏။

^၂ မှန်ပါသည်၊ ထိတ်လန့်စရာ​များ နေ့စဉ်​နေ့တိုင်း ဖြစ်ပျက်​နေ​၏။ ဤ​လောက​၏​အဆင်းသဏ္ဌာန်​သည် အဆိုး​ဘက်​သို့ တကယ်​ပင် ရွေ့သွား​နေ​လေ​ပြီ။ (၁ ကောရိန္သု ၇:၃၁) တစ်ခါတစ်ရံ ဤ​လောက​တစ်ခုလုံး​ကို “မီး​ဝါးမျို” တော့​မည့်​ပုံ​ရှိကြောင်း အနောက်​ဥရောပ သတင်း​မဂ္ဂဇင်း​တစ်စောင်​က ဝေဖန်​သည်။ ထို့​ကြောင့် စိတ်သောက​ရောက်နေ​သူ​အရေအတွက် တိုးများ​လာ​နေသည်​မှာ အံ့ဩစရာ​မဟုတ်ပေ! အမေရိကန်​ပြည်ထောင်စု​မှ ရုပ်မြင်သံကြား​သတင်း​နှင့်​ပတ်သက်သော ဆန်းစစ်ချက်​တစ်ခု​တွင် လူတစ်ဦး​က ‘ကျွန်တော် သတင်း​ကြည့်​ပြီး​ရင် စိတ်ပျက်​သွားတယ်။ သတင်းဆိုး​တွေ​ချည်း​ပဲ။ မခံမရပ်​နိုင်အောင် စိတ်ဖိစီး​ခံရ​တယ်’ ဟု​ဆို​ခြင်း​သည် လူ​သန်းပေါင်း​များစွာ​၏ ခံစားချက်​ဖြစ်​မည်​မှာ သေချာ​ပါ​သည်။

လူတိုင်း​ကြား​လို​သည့်​သတင်း

၃။ (က) အဘယ်​သတင်းကောင်းကို သမ္မာကျမ်းစာ​ကြွေးကြော်​သနည်း။ (ခ) ဘုရားသခင့်​နိုင်ငံတော်​သတင်းကောင်းကို သင်​အဘယ်ကြောင့် တန်ဖိုး​ထား​ရသနည်း။

^၃ စိတ်မချ​မ်း​သာ​စ​ရာ ဤ​လောကတွင် သတင်းကောင်း ကြား​နိုင်​မည်​လော။ ကြား​နိုင်​ပါ​သည်! သမ္မာကျမ်းစာ​က သတင်းကောင်း​ကြွေးကြော်​ထား​ကြောင်း သိရှိ​ရခြင်း​သည် အားတက်စရာ​ပင်။ ထို​သတင်းမှာ ဖျားနာ​မှု၊ အစာ​ခေါင်းပါး​မှု၊ ရာဇဝတ်မှု၊ စစ်မှု​နှင့် ရက်စက်​ကြမ်းကြုတ်မှု​အားလုံး​ကို ဘုရားသခင့်​နိုင်ငံတော်​က ဖယ်ရှား​ပေး​တော့​မည်​ဟူ၍​ဖြစ်သည်။ (ဆာလံ ၄၆:၉; ၇၂:၁၂) ယင်းသည် လူတိုင်း​ကြား​ဖို့​လို​သည့် သတင်း​မဟုတ်ပေ​လော။ ကြား​ဖို့​လို​သည်​ဟု ယေဟောဝါသက်သေ​များ​က ယူဆကြ​၏။ ထို့​ကြောင့် သူတို့သည် လူမျိုးအပေါင်း​တို့အား ဘုရားသခင့်​နိုင်ငံတော်​သတင်းကောင်း ကြိုးစား​ပြောပြ​နေကြ​သည်ကို နေရာအနှံ့ လူသိ​များ​ကြသည်။—မဿဲ ၂၄:၁၄။

၄။ ဤ​ဆောင်းပါး​နှင့် နောက်​ဆောင်းပါး​တွင် ကျွန်ုပ်​တို့၏​ခရစ်ယာန်​ဓမ္မ​အမှု​နှင့်​စပ်လျဉ်း၍ အဘယ်​ကဏ္ဍ​များ​ကို သုံးသပ်​မည်​နည်း။

^၄ သို့သော် တုံ့ပြန်မှု​မရှိသည့် နယ်မြေ​များ​၌​ပင် ဤ​သတင်းကောင်းကို ဟောပြော​ရာ​တွင် ကျေနပ်မှု​ရှိ​ရှိ၊ အဓိပ္ပာယ်ရှိရှိ အဘယ်​သို့​ဆက်​ပါဝင်​နိုင်​မည်​နည်း။ (လုကာ ၈:၁၅) ဟောပြောခြင်း​လုပ်ငန်း​၏ အရေးပါသည့် ကဏ္ဍ​သုံးရပ်​ကို အကျဉ်းချုပ်​သုံးသပ်ခြင်းက အကူအညီ​ဖြစ်စေ​မည်​မှာ သေချာ​သည်။ ကျွန်ုပ်​တို့​ဆန်းစစ်​ကြည့်​နိုင်​ကြသည်​မှာ (၁) ကျွန်ုပ်​တို့၏​ရည်ရွယ်ချက်များ သို့​မဟုတ် အဘယ်ကြောင့်​ဟော​ရ​ကြောင်း၊ (၂) ကျွန်ုပ်​တို့၏​သတင်းတရား သို့​မဟုတ် အဘယ်​အကြောင်း​ဟော​ကြောင်း၊ (၃) ကျွန်ုပ်​တို့၏​နည်း​စနစ်​များ သို့​မဟုတ် မည်သို့​ဟောပြော​ကြောင်း​တို့​ဖြစ်သည်။ ကျွန်ုပ်​တို့၏​ရည်ရွယ်ချက် မှန်ကန်​မည်၊ သတင်းတရားကို ရှင်းရှင်းလင်းလင်း​ဖြစ်စေ​မည်၊ နည်း​စနစ်​များ​ကို ထိရောက်​စေမည်​ဆိုလျှင် အကောင်းဆုံး​သတင်း​ဖြစ်သည့် ဘုရားသခင့်​နိုင်ငံတော်​သတင်းကောင်းကို လူအမျိုးမျိုး​အား ကြားနာ​ခွင့်​ရရှိစေ​ပေမည်။ *

သတင်းကောင်း​ဟောပြောခြင်း​တွင် ကျွန်ုပ်​တို့​အဘယ်ကြောင့်​ပါဝင်​ကြောင်း

၅။ (က) အားလုံး​တို့​ထက် အဘယ်အရာက ခရစ်ယာန်​ဓမ္မ​အမှု​တွင်​ပါဝင်​ရန် ကျွန်ုပ်​တို့ကို လှုံ့ဆော်​သနည်း။ (ခ) ဟောပြောပါ​ဟူသော ကျမ်းစာ​မိန့်မှာချက်ကို ကျွန်ုပ်​တို့​နာခံခြင်း​သည် ဘုရားသခင်​အား​ချစ်​ရာ​ရောက်​သည်​ဟု အဘယ်ကြောင့်​ပြော​နိုင်​သနည်း။

^၅ ပထမ​ဆုံး​ကဏ္ဍ​ဖြစ်သည့် ကျွန်ုပ်​တို့၏​ရည်ရွယ်ချက်ကို သုံးသပ်ကြည့်​ကြ​စို့။ သတင်းကောင်းကို ကျွန်ုပ်​တို့ အဘယ်ကြောင့်​ဟောပြောကြ​သနည်း။ ယေရှု​ဟောခဲ့​သော​အကြောင်းကြောင့်​ပင် ဖြစ်၏။ ကိုယ်တော်​က “ငါသည် ခမည်းတော်​ကို​ချစ်​သည်” ဟု မိန့်ဆိုခဲ့​၏။ (ယောဟန် ၁၄:၃၁; ဆာလံ ၄၀:၈) ထို့​ထက်​ကား ဘုရားသခင်​အား​ချစ်​သည့်​မေတ္တာက ကျွန်ုပ်​တို့ကို ဟောပြောရန် လှုံ့ဆော်ပေး​သောကြောင့်​တည်း။ (မဿဲ ၂၂:၃၇၊ ၃၈) သမ္မာကျမ်းစာ​က “ပညတ်တော်​တို့ကို​စောင့်​ခြင်း​အရာ​သည် ဘုရားသခင်​ကို​ချစ်​ရာ​ရောက်​၏” ဟု​ဆို​ကာ ဘုရားသခင်​အား​ချစ်​သည့်​မေတ္တာ​နှင့် ကျွန်ုပ်​တို့၏​ခရစ်ယာန်​ဓမ္မ​အမှုကို ချိတ်ဆက်​ပေး​သည်။ (၁ ယောဟန် ၅:၃; ယောဟန် ၁၄:၂၁) ဘုရားသခင့်​ပညတ်တော်​များ​တွင် ‘သွား​၍ တပည့်​ဖြစ်စေ​ပါ’ ဟူ​သည့်​ပညတ် ပါဝင်​ပါသလော။ (မဿဲ ၂၈:၁၉) ပါဝင်​ပါ​သည်။ ထိုစကား​များ​ကို ယေရှု​မိန့်ဆိုခဲ့​သော်လည်း အမှန်​မှာ ယေဟောဝါ​ထံ​မှ အစပြု​ခဲ့​၏။ မည်သို့​အားဖြင့်​နည်း။ ယေရှု​က “ငါသည် ကိုယ်​အလိုအလျောက် အဘယ်​အမှုကို​မျှ​မပြု​ဘဲ ငါ့​ခမည်းတော်​သည် ငါ့​အား နည်း​ပေး​တော်​မူ​သည်​အတိုင်း ငါ​ဟောပြော​သည်” ဟု ရှင်းပြ​ခဲ့​၏။ (ယောဟန် ၈:၂၈; မဿဲ ၁၇:၅) ထို့​ကြောင့် ဟောပြောပါ​ဟူသော​ပညတ်​ကို လိုက်လျှောက်ခြင်း​အားဖြင့် ယေဟောဝါ​အား ကျွန်ုပ်​တို့​ချစ်​ကြောင်း ဖော်ပြ​ကြသည်။

၆။ ဘုရားသခင်​အား​ချစ်​သည့်​မေတ္တာသည် အဘယ်​နည်းများဖြင့် ဟောပြောရန် လှုံ့ဆော်ပေး​သနည်း။

^၆ ထို့​အပြင် ယေဟောဝါ​အား ဆန့်ကျင်​တိုက်ခိုက်​နေသည့် စာတန်​၏​လိမ်ညာမှု​များ​ကို ကျွန်ုပ်​တို့​တိုက်ဖျက်​လို​ကြ​ရာ ကိုယ်တော်​အား​ချစ်​သည့်​မေတ္တာက ကျွန်ုပ်​တို့ကို ဟောပြောရန် လှုံ့ဆော်ပေး​သည်။ (၂ ကောရိန္သု ၄:၄) စာတန်​သည် ဘုရားသခင့်​အုပ်ချုပ်မှု​၏ တော်မှန်​ဖြောင့်မတ်မှု​ကို သံသယဝင်​စေ​ခဲ့​၏။ (ကမ္ဘာဦး ၃:၁-၅) ယေဟောဝါသက်သေ​များ​အနေ​နှင့် စာတန်​၏​အပုပ်ချ​စကား​များ​ကို ဖော်ထုတ်ခြင်း​နှင့် ဘုရားသခင့်​နာမတော်​ကို လူအပေါင်း​ရှေ့ သန့်ရှင်း​မြင့်မြတ်​စေခြင်း​တို့​တွင် ကျွန်ုပ်​တို့​ပါဝင်​လို​ကြသည်။ (ဟေရှာယ ၄၃:၁၀-၁၂) ထို့​အပြင် ကျွန်ုပ်​တို့သည် ယေဟောဝါ​၏​အရည်အသွေး​တော်​များနှင့် နည်းလမ်းတော်​များ​ကို သိရှိ​လာ​ကြ​သဖြင့် ခရစ်ယာန်​ဓမ္မ​အမှု​တွင် ပါဝင်​နေကြ၏။ ဘုရားသခင်​နှင့်​တရင်းတနှီး​ရှိလာပြီး အခြား​သူတို့ကို ကိုယ်တော်​အကြောင်း ပြောပြ​လို​စိတ်​ပြင်းပြ​လာ​ကြ​၏။ အမှန်​ဆို​ရ​လျှင် ယေဟောဝါ​၏​ကောင်းမြတ်​မှု​နှင့် ကိုယ်တော်​၏​ဖြောင့်မှန်​သော နည်းလမ်းတော်​များသည် ကျွန်ုပ်​တို့ကို ရွှင်လန်း​ဝမ်းမြောက်​စေ​လွန်း​သဖြင့် ကိုယ်တော့်​အကြောင်း မပြော​ဘဲ​မနေနိုင်​ကြ​ချေ။ (ဆာလံ ၁၄၅:၇-၁၂) ကိုယ်တော်​အား ချီးမွမ်း​ထောမနာပြု​ပြီး ကိုယ်တော်​၏ “ဂုဏ်​ကျေးဇူးတော်​များ” ကို နားထောင်​မည့်​သူတို့အား ကြား​ပြော​ရန် ကျွန်ုပ်​တို့​စေ့ဆော်​ခံရ​ကြသည်။—၁ ပေတရု ၂:၉; ဟေရှာယ ၄၃:၂၁။

၇။ ဘုရားသခင်​အား​ချစ်​မြတ်နိုးသည့်​အပြင် အခြား​အဘယ်​အရေးကြီးသော​အကြောင်းရင်း​ကြောင့် ဟောပြောခြင်း​လုပ်ငန်း​တွင် ကျွန်ုပ်​တို့​ပါဝင်​ကြ​သနည်း။

^၇ ခရစ်ယာန်​ဓမ္မ​အမှု​တွင် ဆက်​ပါဝင်​ရသည့် နောက်ထပ်​အရေးကြီးသော​အကြောင်းရင်း​တစ်ခု ရှိပါ​သေး​သည်။ ယင်း​ကား တရ​စပ်ကြား​နေရ​သည့် သတင်းဆိုး​များ​ကြောင့် ဖိစီးမှု​ခံစား​နေရသူ​များ၊ အကြောင်း​တစ်ခု​မဟုတ်​တစ်ခု​ကြောင့် ဆင်းရဲ​ဝေဒနာ​ခံစား​နေရသူ​တို့အား စိတ်ရင်းမှန်​နှင့် သက်သာရာ​ရ​စေလို၍​ဖြစ်သည်။ ဤသို့​ပြု​ရာ​တွင် ယေရှုကို ကျွန်ုပ်​တို့​ကြိုးစား​တုပ​နေကြ၏။ ဥပမာ​အနေ​နှင့် မာကု​ကျမ်း​ အခန်းကြီး ၆ တွင် ဖော်ပြ​ထား​ရာ​ကို ကြည့်​ကြ​စို့။

၈။ လူ​တို့​အပေါ် ယေရှု၏​စိတ်ထား​ကို မာကု​ကျမ်း​ အခန်းကြီး ၆ ပါ​မှတ်တမ်းက အဘယ်​သို့​ဖော်ပြ​သနည်း။

^၈ ဟောပြောခြင်း​ကင်ပိန်း​မှ တမန်​တော်​များ​ပြန်လာ​ကြ​ပြီး သူတို့​မြင်ခဲ့၊ ကြား​ခဲ့​သမျှ​ကို ယေရှု​အား ပြန်​ပြောပြ​ကြ​၏။ တမန်​တော်​များ မောပန်း​နွမ်း​နယ်​နေကြ​သည်ကို ယေရှု​သတိပြုမိ​ကာ မိမိ​နှင့်အတူ “ငြိမ်သက်​စွာ​နေ” ဖို့ မိန့်ဆို​သည်။ သို့​နှင့် သူတို့သည် လှေ​စီး​၍ တိတ်ဆိတ်​ရာ​အရပ်သို့ ထွက်သွား​ခဲ့​ကြသည်။ သို့သော် လူတို့သည် ကမ်းခြေ​တစ်လျှောက် ပြေး​လိုက်​လာကြပြီး မကြာမီ​ပင် သူတို့ကို မီ​သွား​၏။ ယေရှု အဘယ်အရာ​ပြု​ခဲ့​သနည်း။ “လူများ​အပေါင်း​တို့ကို တွေ့မြင်​တော်​မူလျှင် ထို​သူတို့သည် ထိန်း​သူ​မရှိ၊ ပစ်ထား​သော​သိုး​ကဲ့သို့​ဖြစ်​ကြသည်​ကို သနားခြင်း​စိတ်တော်​ရှိ၍ များစွာသော​ဆုံးမ[စကား]ကို ပေး​တော်​မူ​၏” ဟု မှတ်တမ်းက​ဆို​သည်။ (မာကု ၆:၃၁-၃၄) ယေရှုသည် မောပန်း​နေ​သော်လည်း လူ​တို့ကို​သနား​သည့်​အတွက် သတင်းကောင်း ဆက်​ဟောခဲ့​သည်။ ဤ​လူများ​ကို ယေရှု​သနား​ကြင်နာ​ခဲ့​ကြောင်း ရှင်းနေပါသည်။

၉။ ဟောပြော​ရသည့်​ရည်ရွယ်ချက်​အမှန်​နှင့်​စပ်လျဉ်း၍ မာကု​ အခန်းကြီး ၆ ပါ​မှတ်တမ်း​မှ ကျွန်ုပ်​တို့ အဘယ်​သင်ခန်းစာ​ရရှိ​သနည်း။

^၉ ဤ​မှတ်တမ်း​မှ ကျွန်ုပ်​တို့ အဘယ်အရာ​သိရှိ​ရသနည်း။ ခရစ်ယာန်​များ​အနေ​နှင့် ကျွန်ုပ်​တို့သည် သတင်းကောင်း​ဟောပြောခြင်း​နှင့် တပည့်​ဖြစ်စေ​ခြင်း​တာဝန်​ကို ရရှိ​ထား​ကြသည်။ ‘လူအပေါင်း ကယ်တင်​ခံရ​ရန်’ ဘုရားသခင်​အလိုတော်​ရှိသည့်​အတွက် သတင်းကောင်း​ကြေညာ​ရန်​တာဝန်​သည် ကျွန်ုပ်​တို့၏​တာဝန်ဖြစ်​ကြောင်း အသိအမှတ်ပြု​ကြ​၏။ (၁ တိမောသေ ၂:၄) သို့ရာတွင် ကျွန်ုပ်​တို့၏​ခရစ်ယာန်​ဓမ္မ​အမှုကို တာဝန်​သိ​သိ​နှင့်​သာမက သနား​ကြင်နာ​မှု​ရှိ​ရှိ လုပ်ဆောင်ကြ​သည်။ ယေရှု​ကဲ့သို့ လူ​တို့ကို သနား​ကြင်နာ​မည်​ဆိုလျှင် ကျွန်ုပ်​တို့​တတ်နိုင်​သရွေ့ ကြိုးစား​ပြီး သတင်းကောင်း​ဆက်​ဟော​ကြ​ပါ​လိမ့်​မည်။ (မဿဲ ၂၂:၃၉) ခရစ်ယာန်​ဓမ္မ​အမှု​တွင် အဆိုပါ​ရည်ရွယ်ချက်​မှန်​များ​ဖြင့် ပါဝင်​လျှင် သတင်းကောင်းကို မပြတ်​ဟောပြောကြ​ပါ​လိမ့်​မည်။

ကျွန်ုပ်​တို့၏​သတင်းတရား—ဘုရားသခင့်​နိုင်ငံတော်​သတင်းကောင်း

၁၀၊ ၁၁။ (က) ကျွန်ုပ်​တို့​ဟောပြောနေကြ​သည့် သတင်းတရားကို ဟေရှာယ မည်သို့​ဖော်ပြ​သနည်း။ (ခ) ကောင်းကျိုး​ချမ်းသာ​၏ ဝမ်းမြောက်စရာ​သတင်းကို ယေရှု မည်သို့​ထင်ရှားစေ​ခဲ့​သနည်း၊ ယေရှု၏​ပုံသက်သေ​ကို မျက်မှောက်ခေတ် ဘုရားသခင့်​ကျေးကျွန်​များ မည်သို့​လိုက်လျှောက်​ခဲ့​ကြပြီ​နည်း။

^၁၀ ကျွန်ုပ်​တို့​ခရစ်ယာန်​ဓမ္မ​အမှု​၏ ဒုတိယ​ကဏ္ဍ​ဖြစ်သည့် ကျွန်ုပ်​တို့၏​သတင်းတရား​ကား အဘယ်နည်း။ အဘယ်​အကြောင်းကို ကျွန်ုပ်​တို့​ဟောပြောကြ​သနည်း။ ကျွန်ုပ်​တို့​ဟောပြောနေ​သည့် သတင်းတရား​အကြောင်း ပရောဖက်​ဟေရှာယ​က ဤသို့​လှလှပပ ဖော်ပြ​ပေး​သည်– “ငြိမ်သက်ခြင်း​၏ ဝမ်းမြောက်စရာ​သတင်းကို ကြား​ပြော​သော​သူ၊ ကယ်တင်ခြင်း​ကောင်းကျိုး​ချမ်းသာ​၏ ဝမ်းမြောက်စရာ​သတင်းကို ကြား​ပြော​သော​သူ၊ ‘သင်၏​ဘုရားသခင် စိုးစံ​တော်​မူ​၏’ ဟု ဇိအုန်​မြို့​အား​ပြော​သော​သူ၏​ခြေ​တို့သည် တောင်ပေါ်​မှာ အလွန်​တင့်တယ်လှ​စွ​တကား!”—ဟေရှာယ ၅၂:၇။

^၁၁ “သင်၏​ဘုရားသခင် စိုးစံ​တော်​မူ​၏” ဟူသော ဤ​ကျမ်းချက်​ပါ အဓိက​စာသား​သည် ကျွန်ုပ်​တို့​ကြေညာ​ရမည့် သတင်းတရား​ဖြစ်သည့် ဘုရားသခင့်​နိုင်ငံတော်​သတင်းကောင်းကို အမှတ်ရ​စေ​သည်။ (မာကု ၁၃:၁၀) ထို့​အပြင် ကျွန်ုပ်​တို့​သတင်းတရား​၏​ဆိုလိုရင်း​ကို ဤ​အခန်းငယ်​က ဖော်ပြ​ပေး​ကြောင်းကို​လည်း သတိပြုပါ။ “ကယ်တင်ခြင်း၊” “ဝမ်းမြောက်စရာ​သတင်း၊” “ငြိမ်သက်ခြင်း” နှင့် “ကောင်းကျိုး​ချမ်းသာ” အစ​ရှိသည့်​အသုံးအနှုန်း​များ​ကို ဟေရှာယ​အသုံးပြု​ထား​သည်။ ဟေရှာယ​ခေတ်​နောက်ပိုင်း ရာစုနှစ်များစွာ​အကြာ စီ.အီး. ပထမ​ရာစု​တွင် ယေရှု​ခရစ်​သည် လာ​လတ္တံ့​သော ဘုရားသခင့်​နိုင်ငံတော်​ဖြစ်သည့် ကောင်းကျိုး​ချမ်းသာ​သတင်းကို ဇွဲရှိ​ရှိ​ကြေညာ​ခဲ့​ခြင်း ပုံသက်သေ​ကို ထူးခြား​ပေါ်လွင်​စွာ ပြသ​ခဲ့​ခြင်း​ဖြင့် အဆိုပါ​ပရောဖက်ပြုချက်​ကို ပြည့်စုံ​စေ​ခဲ့​သည်။ (လုကာ ၄:၄၃) မျက်မှောက်ခေတ်တွင် အထူးသဖြင့် ၁၉၁၉ ခုနှစ်​ကတည်းက ယေဟောဝါသက်သေ​တို့သည် တည်ထောင်​ပြီး​ဖြစ်သည့် ဘုရားသခင့်​နိုင်ငံတော်​နှင့် ယင်း​နိုင်ငံတော်​က​ဆောင်ကြဉ်း​ပေး​မည့် ကောင်းချီး​များနှင့်​ပတ်သက်သော သတင်းကောင်းကို ဇွဲရှိ​ရှိ​ကြေညာ​ကြ​ခြင်း​ဖြင့် ယေရှု၏​ပုံသက်သေ​ကို တုပ​နေကြပါ​သည်။

၁၂။ ဘုရားသခင့်​နိုင်ငံတော်​သတင်းကောင်းကို လက်ခံသူ​တို့​အပေါ် အဘယ်​အကျိုး​သက်ရောက်​သနည်း။

^၁၂ ဤ​ဘုရားသခင့်​နိုင်ငံတော်​သတင်းကောင်းကို လက်ခံသူ​တို့​အပေါ် အဆိုပါ​သတင်းတရား​က အဘယ်​အကျိုး​သက်ရောက်​သနည်း။ ယေရှု​အချိန်​က​ကဲ့သို့​ပင် ယခု​လည်း သတင်းကောင်းသည် မျှော်လင့်ချက်​နှင့် နှစ်သိမ့်မှု​ရရှိစေ​သည်။ (ရောမ ၁၂:၁၂; ၁၅:၄) စိတ်နှလုံး​ရိုး​ဖြောင့်​သူတို့သည် ပိုမို​ကောင်းမွန်​သည့်​အချိန် ရောက်လာ​တော့​မည်​ဖြစ်​ကြောင်း ယုံကြည်​စ​ရာ ခိုင်လုံ​သည့်​အကြောင်းရင်း​များ​ရှိသည်​ကို သိလာ​ကြ​သဖြင့် မျှော်လင့်ချက်​ရှိ၏။ (မဿဲ ၆:၉၊ ၁၀; ၂ ပေတရု ၃:၁၃) ဤ​မျှော်လင့်ချက်​က ဘုရားသခင်​အား​ကြောက်ရွံ့​သူတို့ကို အပြုသဘော​ရှိ​ရှုမြင်ချက် ဆက်​ထိန်း​စေ​သည်။ ဆာလံဆရာ​က သူတို့သည် “မကောင်းသော​သတင်းကို မကြောက်” ဟု ဆို​သည်။—ဆာလံ ၁၁၂:၁၊ ၇။

“နှလုံး​ကြေကွဲ​သော​သူတို့၏​အနာ​ကို စည်း” ပေး​မည့် သတင်းတရား

၁၃။ သတင်းကောင်း​လက်ခံသူ​တို့ ရရှိ​မည့် လတ်တလော​ကောင်းချီး​များ​ကို ပရောဖက်​ဟေရှာယ မည်သို့​ဖော်ပြ​ပေး​သနည်း။

^၁၃ ကျွန်ုပ်​တို့​ဟောပြော​သည့် သတင်းကောင်းသည် နားထောင်သူ​တို့အား နှစ်သိမ့်မှု​နှင့် ကောင်းချီး​များ​ကို လတ်တလော​ရရှိစေ​သည်။ မည်သို့​အားဖြင့်​နည်း။ ကောင်းချီး​အချို့​ကို ပရောဖက်​ဟေရှာယ​က ဤသို့​ကြိုတင် ဖော်ပြ​ထား​သည်– ‘အကြွင်းမဲ့​ပိုင်သ​အုပ်စိုးရှင် ယေဟောဝါ​၏​ဝိညာဉ်တော်သည် ငါ့​အပေါ်မှာ​တည်​တော်​မူ​၏။ အကြောင်း​မူ​ကား ဆင်းရဲသား​တို့အား ဝမ်းမြောက်စရာ​သတင်းကို ကြား​ပြော​စေခြင်း​ငှာ ငါ့ကို​ဘိသိက်ပေး​တော်​မူ​ပြီ။ နှလုံး​ကြေကွဲ​သော​သူတို့၏​အနာ​ကို စည်း​စေခြင်း​ငှာ​လည်းကောင်း၊ ဖမ်းသွား​ချုပ်​ထား​လျက်​ရှိသောသူ​တို့အား လွှတ်​ခြင်း​အကြောင်း​နှင့် အကျဉ်း​ခံ​လျက်​ရှိသောသူ​တို့အား ထောင်​တံခါးဖွင့်​ခြင်း​အကြောင်းကို ပြ​စေခြင်း​ငှာ​လည်းကောင်း၊ ထာဝရ​ဘုရားသခင်​၏​မင်္ဂလာ​နှစ်​နှင့် ငါ​တို့​ဘုရားသခင် အပြစ်ပေး​တော်​မူ​ရာ​နေ့ရက်​ကာလ​ကို ကြား​ပြော​စေခြင်း​ငှာ​လည်းကောင်း၊ စိတ်​မ​သာ​ညည်းတွား​သော​သူတို့အား နှစ်သိမ့်​စေခြင်း​ငှာ​လည်းကောင်း . . . ငါ့ကို​စေလွှတ်​တော်​မူ​ပြီ။’—ဟေရှာယ ၆၁:၁၊ ၂; လုကာ ၄:၁၆-၂၁။

၁၄။ (က) “နှလုံး​ကြေကွဲ​သော​သူတို့၏​အနာ​ကို စည်း​စေ” ဟူ​သည့်​အသုံးအနှုန်း​က ဘုရားသခင့်​နိုင်ငံတော်​သတင်းတရား​အကြောင်း အဘယ်အရာ​ဖော်ပြ​သနည်း။ (ခ) နှလုံး​ကြေကွဲ​သူများ​အတွက် ယေဟောဝါ​၏​စိုးရိမ်မကင်း​ဖြစ်မှု​ကို ကျွန်ုပ်​တို့​မည်သို့ ရောင်ပြန်ဟပ်​ကြ​သနည်း။

^၁၄ အဆိုပါ​ပရောဖက်ပြုချက်​အရ ယေရှုသည် သတင်းကောင်း​ဟောပြောခြင်း​အားဖြင့် “နှလုံး​ကြေကွဲ​သော​သူတို့၏​အနာ​ကို စည်း” ပေး​ပါ​လိမ့်​မည်။ အလွန်​ထိမိ​သည့် ပုံဖော်ချက်​ကို ဟေရှာယ​အသုံးပြု​ခဲ့​သည်​တကား! ကျမ်းစာ​အဘိဓာန်​တစ်ခု​အရ “စည်း” ဟူ၍ ပြန်ဆို​ထားသော ဟေဗြဲ​စကားလုံး​သည် “ပတ်တီး ‘စည်းပေး​ခြင်း’ အတွက် အသုံးပြုလေ့​ရှိရာ ဒဏ်ရာ​ရသူ​ကို ဆေး​ထည့်​ပေးခြင်း၊ ကုသ​ပေးခြင်း​တွင် အသုံးပြုလေ့​ရှိသည်။” စာနာ​တတ်သော​သူနာပြု​တစ်ဦး​သည် ပတ်တီး သို့​မဟုတ် စိုစွတ်​သည့်​အဝတ်​ပျော့​ကို ဒဏ်ရာ​အပေါ် ဖိ​ပြီး အသေအချာ​ပတ်တီး​စည်းပေး​တတ်​သည်။ ထို​နည်း​ထပ်တူ စာနာ​တတ်သော ကြေညာသူ​များသည် ဘုရားသခင့်​နိုင်ငံတော်​သတင်းတရားကို ဟောပြော​သည့်​အခါ တစ်နည်း​နည်းဖြင့် ဆင်းရဲ​ဝေဒနာ​ခံစား​နေရ​သော သတင်းတရား​လက်ခံသူ​တို့ကို ကူညီ​ထောက်မ​ပေး​တတ်ကြ​သည်။ အကူအညီ​လိုအပ်​နေသူတို့​ကို ဤသို့​ထောက်မ​ပေးခြင်း​ဖြင့် ယေဟောဝါ​၏​စိုးရိမ်မကင်း​ဖြစ်မှု​ကို သူတို့​ရောင်ပြန်ဟပ်​ကြသည်။ (ယေဇကျေလ ၃၄:၁၅၊ ၁၆) ဘုရားသခင်​နှင့်​စပ်လျဉ်း၍ ဆာလံဆရာ​က “နှလုံး​ကြေကွဲ​သော​သူတို့ကို နှစ်သိမ့်​စေ​၍ သူတို့​ဒဏ်ချက်​များ​ကို ပတ်​စည်း​တော်​မူ​၏” ဟု ဖော်ပြ​ခဲ့​သည်။—ဆာလံ ၁၄၇:၃၊ သမ္မာ။

ဘုရားသခင့်​နိုင်ငံတော်​သတင်းတရား အကြောင်း​ထူး​စေ​ပုံ

၁၅၊ ၁၆။ ဘုရားသခင့်​နိုင်ငံတော်​သတင်းတရားသည် အကူအညီ​လိုအပ်​နေ​သူများကို မည်သို့​ထောက်ပံ့​၍ ခွန်အား​ပေး​ကြောင်း အဘယ်​ဘဝ​ဖြစ်ရပ်မှန် ပုံ​နမူနာ​များ​ရှိ​သနည်း။

^၁၅ ဘုရားသခင့်​နိုင်ငံတော်​သတင်းတရားသည် နှလုံး​ကြေကွဲ​နေသူတို့​ကို အမှန်တကယ်​ပင် ထောက်ကူ​၍ ခွန်အား​ပေး​နိုင်​ကြောင်း ဘဝ​ဖြစ်ရပ်မှန် ပုံ​နမူနာ​မြောက်မြားစွာ​က ဖော်ပြ​သည်။ တောင်​အမေရိက​မှ အသက်မရှင်​လို​တော့​သည့် သက်ကြီးရွယ်အို အော်​ရီ​အန်း​နာ​ကို သုံးသပ်ကြည့်​ပါ။ ယေဟောဝါသက်သေ​တစ်ဦး​သည် အော်​ရီ​အန်း​နာ​ထံ စတင်​လည်ပတ်​ကာ သမ္မာကျမ်းစာ​နှင့် ကျွန်ုပ်​၏​ကျမ်းစာ​ပုံပြင်​စာအုပ်​ကို သူ့​အား ဖတ်ပြ​လေ့​ရှိသည်။ * အစပိုင်း​တွင် စိတ်ဓာတ်ကျ​နေသည့် အဆိုပါ​အမျိုးသမီး​သည် အိပ်ရာပေါ် မျက်စိမှိတ်​လှဲလျောင်း​ရင်း တစ်ခါ​တစ်ခါ သက်ပြင်းချ​၍ ကျမ်းစာ​ဖတ်ပြ​သည်ကို နားထောင်​နေ​၏။ သို့သော် များ​မကြာမီ ကျမ်းစာ​ဖတ်ပြ​နေစဉ် အိပ်ရာ​တွင် ကြိုးစား​ထိုင်​လေ​သည်။ နောက်ပိုင်း​တွင် ဧည့်​ခန်း​ရှိ ကုလားထိုင်​တစ်လုံး​ပေါ်​ထိုင်​လျက် ကျမ်းစာ​သင်ပေး​သူ၏​အ​လာ​ကို စောင့်မျှော်​နေ​လေ​၏။ ထို့နောက် အဆိုပါ​အမျိုးသမီး​သည် ဘုရားသခင့်​နိုင်ငံတော်​ခန်းမ​ရှိ ခရစ်ယာန်​အစည်းအဝေး​များ​ကို စတက်​လာ​သည်။ ထို​အစည်းအဝေးများမှ သိရှိ​ခဲ့​ရာ​တို့သည် သူ့​အတွက် အားပေးမှု​ဖြစ်လာ​ရာ သူ့​အိမ်ရှေ့ ဖြတ်သန်း​သွားလာ​သူ​တိုင်း​ကို ကျမ်းစာ,စာပေ​များ စတင်​ဝေငှ​လေ​တော့​၏။ မကြာမီ အသက် ၉၃ နှစ်အရွယ်​တွင် အော်​ရီ​အန်း​နာ​သည် ယေဟောဝါသက်သေ​တစ်ဦး​အဖြစ် နှစ်ခြင်း​ခံ​လိုက်​သည်။ ဘုရားသခင့်​နိုင်ငံတော်​သတင်းတရား​က သူ့​အား အသက်ရှင်​လို​စိတ် ပြန်​ရှိလာ​စေ​ခဲ့​၏။—သု. ၁၅:၃၀; ၁၆:၂၄။

^၁၆ ဘုရားသခင့်​နိုင်ငံတော်​သတင်းတရားသည် နာမကျန်း​မှု​ကြောင့် သေလုနီးပါး​ဖြစ်နေ​သူတို့ကို​ပင် အထူးတလည်​ထောက်မ​ပေး​သည်။ အနောက်​ဥရောပ​မှ မာ​ရီး​အာ​၏​ပုံ​နမူနာကို သုံးသပ်ကြည့်​ပါ။ အဆိုပါ​အမျိုးသမီး​သည် ရောဂါ​ကျွမ်း​နေပြီ​ဖြစ်​ရာ မျှော်လင့်ချက် လုံးလုံး​မရှိတော့​ချေ။ ယေဟောဝါသက်သေ​များ သူ့​ထံ​ရောက်ရှိ​လာချိန်​တွင် သူသည် အလွန်​စိတ်ပျက်​အားငယ်​နေ​ရှာ​၏။ သို့ရာတွင် ဘုရားသခင့်​ရည်ရွယ်ချက်များ​ကို သိရှိ​လိုက်​သည့်​အခါ သူ၏​ဘဝ​သည် အဓိပ္ပာယ်​ပြန်​ရှိလာ​သည်။ ယေဟောဝါသက်သေ​တစ်ဦး​အဖြစ် သူ​နှစ်ခြင်း​ခံ​လိုက်ပြီး ဟောပြောခြင်း​လုပ်ငန်း​တွင် တက်တက်ကြွကြွ ပါဝင်​လာ​လေ​သည်။ သူ့​ဘဝ၏​နောက်ဆုံး​နှစ်နှစ်​အတွင်း မျှော်လင့်ချက်​နှင့် ရွှင်လန်း​အားရ​မှု​တို့​ကြောင့် သူ၏​မျက်လုံး​များ ဝင်းလက်​တောက်ပ​နေ​၏။ ရှင်ပြန်ထမြောက်​မည်​ဟူသော ခိုင်မာ​သည့်​မျှော်လင့်ချက်​ဖြင့် မာ​ရီး​အာ ကွယ်လွန်​သွားခဲ့သည်။—ရောမ ၈:၃၈၊ ၃၉။

၁၇။ (က) ဘုရားသခင့်​နိုင်ငံတော်​သတင်းတရားသည် လက်ခံ​နာယူ​သူတို့၏​ဘဝကို မည်သို့​ထူးခြား​စေ​ခဲ့ပြီ​နည်း။ (ခ) ယေဟောဝါ​သည် “နှိမ့်ချသော​သူအပေါင်း​တို့ကို ကြွပင့်​တော်​မူ” နိုင်​ကြောင်း အဘယ်​နည်းများဖြင့် အသင်​ကိုယ်တိုင် တွေ့ကြုံ​ခံစား​ခဲ့​ရပြီ​နည်း။

^၁၇ ဘုရားသခင့်​နိုင်ငံတော်​သတင်းတရားသည် ကျမ်းစာ​အမှန်တရား​များ​ကို တောင့်တ​နေသူတို့​၏​ဘဝကို ထူးခြား​စေနိုင်​ကြောင်း အဆိုပါ​မှတ်တမ်းများ​က သက်သေထူ​သည်။ ချစ်​မြတ်နိုး​ရသူ​တစ်ဦး ဆုံးပါး​သွား​၍ ဝမ်းနည်းပူဆွေး​နေသူတို့​သည် ရှင်ပြန်ထမြောက်ခြင်း​မျှော်လင့်ချက်​အကြောင်း သိရှိ​လာသော​အခါ အားအင်​အသစ်​ရရှိ​ကြသည်။ (၁ သက်သာလောနိတ် ၄:၁၃) မိသားစုကို ရှာကျွေး​ရန် ဆင်းဆင်းရဲရဲ​နှင့် ရုန်းကန်​နေရသူ​တို့သည် ယေဟောဝါ​အပေါ် တည်ကြည်​ကြ​မည်​ဆိုလျှင် သူတို့ကို ကိုယ်တော်​ဘယ်တော့​မျှ စွန့်​တော်​မ​မူ​ကြောင်း သိရှိ​လာ​သည့်​အခါ အားရှိပြီး ရဲရင့်​လာ​ကြ​၏။ (ဆာလံ ၃၇:၂၈) စိတ်ကျ​ဝေဒနာ​ခံစား​နေရသူ​တို့သည် ယေဟောဝါ​၏​ကူညီ​မစမှု​ဖြင့် လိုအပ်​သည့်​ခွန်အား တဖြည်းဖြည်း​ရရှိ​လာ​ကြသည်၊ အချို့​သော​သူတို့မှာ​မူ ထို​နာမကျန်း​မှု​ကို အောင်မြင်​ကျော်လွှား​နိုင်​ခဲ့​ကြ​၏။ (ဆာလံ ၄၀:၁၊ ၂) ယေဟောဝါ​သည် သမ္မာကျမ်းစာ​၏​တန်ခိုးတော်​အားဖြင့် ယခု​ပင် “နှိမ့်ချသော​သူအပေါင်း​တို့ကို ကြွပင့်​တော်​မူ​၏။” (ဆာလံ ၁၄၅:၁၄) ဘုရားသခင့်​နိုင်ငံတော်​သတင်းကောင်းသည် ကျွန်ုပ်​တို့​ရပ်ကွက်​နှင့် ခရစ်ယာန်​အသင်းတော်​ရှိ ကျိုးပဲ့​ကြေမွ​သော​နှလုံး​ပိုင်ရှင်​တို့ကို မည်သို့​နှစ်သိမ့်မှု​ပေး​ခဲ့​ကြောင်း သိရှိ​ရသည့်​အခါ ယနေ့ ရှိသမျှ​တို့​တွင် အကောင်းဆုံး​သတင်းကို ကျွန်ုပ်​တို့​ရရှိ​ထား​ကြောင်း မကြာခဏ အမှတ်​ရစေပါ​သည်!—ဆာလံ ၅၁:၁၇။

‘သူတို့​အတွက် ဘုရားသခင်​ထံ​ဆုတောင်း​ပေးခြင်း’

၁၈။ သတင်းကောင်းကို ဂျူး​များ ငြင်းပယ်​ခဲ့​ကြ​သည့်​အတွက် ပေါလု​မည်သို့​ဖြစ်​ခဲ့​သနည်း၊ အဘယ်ကြောင့်​နည်း။

^၁၈ ကျွန်ုပ်​တို့၏​သတင်းတရားသည် အကောင်းဆုံး​ဖြစ်​သော်​ငြား​လည်း လူအများ​က ယင်းကို ငြင်းပယ်​ကြ​၏။ ယင်းကြောင့် ကျွန်ုပ်​တို့ မည်သို့​ဖြစ်​နိုင်​သနည်း။ တမန်​တော်​ပေါလု​ကဲ့သို့ ဖြစ်​နိုင်​ပါ​သည်။ သူသည် ဂျူး​များ​ကို ဟောပြောလေ့​ရှိသော်လည်း ကယ်တင်ခြင်း​သတင်းကို အများစုက ငြင်းပယ်​ခဲ့​ကြ​၏။ သူတို့၏​ငြင်းပယ်မှု​ကြောင့် ပေါလု အကြီးအကျယ်​စိတ်ထိခိုက်​ခဲ့​သည်။ သူက “ငါသည် အလွန်​ဝမ်းနည်းခြင်း​ရှိ၏။ စိတ်နှလုံး​ထဲ​၌ မခြားမလပ်​ပူပန်ခြင်း​ဝေဒနာ​ရှိ၏” ဟု ဝန်ခံခဲ့​၏။ (ရောမ ၉:၂) ပေါလု​သည် မိမိ​ဟောပြောခဲ့သည့် ဂျူး​တို့ကို အလွန်​သနား​၏။ သတင်းကောင်းကို သူတို့​ငြင်းပယ်​ကြ​သဖြင့် သူ​ဝမ်းနည်း​ခဲ့​သည်။

၁၉။ (က) ရံဖန်ရံခါ ကျွန်ုပ်​တို့​စိတ်ဓာတ်ကျ​ကောင်း​ကျ​ကြ​မည်​ကို အဘယ်ကြောင့် နားလည်​နိုင်​သနည်း။ (ခ) ဟောပြောခြင်း​လုပ်ငန်း​ကို ဆက်လုပ်​ဆောင်ရန် ပေါလု​ကို အဘယ်အရာက ကူညီပေး​ခဲ့​သနည်း။

^၁၉ ကျွန်ုပ်​တို့​လည်း သနား​စာနာစိတ်​ကြောင့် သတင်းကောင်း​ဟောပြော​ကြသည်။ သို့​ဖြစ်၍ ဘုရားသခင့်​နိုင်ငံတော်​သတင်းတရားကို လူအများ ငြင်းပယ်​ကြသောအခါ စိတ်ဓာတ်ကျ​ကောင်း​ကျ​မည်​ကို နားလည်​နိုင်​ပါ​သည်။ ဤသို့​တုံ့ပြန်​ခြင်း​က ကျွန်ုပ်​တို့​ဟောပြော​လိုက်​သူတို့၏ ဝိညာဉ်​ရေး​အကျိုးကို အမှန်တကယ်​လိုလား​ကြောင်း ဖော်ပြ​သည်။ သို့ရာတွင် တမန်​တော်​ပေါလု​၏​ပုံ​နမူနာကို သတိရ​သင့်​သည်။ သူ၏​ဟောပြောခြင်း​လုပ်ငန်း​ကို ဆက်လုပ်​ဆောင်ရန် အဘယ်အရာက သူ့ကို​ကူညီပေး​ခဲ့​သနည်း။ သတင်းကောင်းကို ဂျူး​အများ လက်မခံ​ငြင်းပယ်​ခဲ့​ခြင်း​က သူ့​အား ဝမ်းနည်း​စေ​ခဲ့​သော်လည်း သူတို့ကို​ကူညီ​၍​မရ​ဟု တွေးတော​ကာ ဂျူး​အားလုံး​ကို ပေါလု​လက်မလျှော့​ခဲ့​ပေ။ ခရစ်တော်​အား​လက်ခံ​မည့်​သူ အချို့​ရှိ​မည်​ဟု သူ​မျှော်လင့်​နေသည်။ သို့​နှင့် ဂျူး​တစ်ဦးချင်း​စီ​နှင့်​ပတ်သက်​၍ သူ၏​ခံစားချက်​ကို ဤသို့​ရေးသား​ဖော်ပြ​လေ​သည်– ‘သူတို့သည် ကယ်တင်​တော်​မူ​ခြင်း​သို့​ရောက်​စေခြင်း​ငှာ ငါ​၌​စိတ်​စေတနာ​ရှိ၍ သူတို့​အတွက် ဘုရားသခင်​ထံ​ဆုတောင်း​လေ့​ရှိ၏။’—ရောမ ၁၀:၁၊ သမ္မာ။

၂၀၊ ၂၁။ (က) ကျွန်ုပ်​တို့၏​ခရစ်ယာန်​ဓမ္မ​အမှု​နှင့်​ပတ်သက်​၍ ပေါလု​၏​ပုံသက်သေ​ကို မည်သို့​တုပ​နိုင်​သနည်း။ (ခ) ခရစ်ယာန်​ဓမ္မ​အမှု​၏ အဘယ်​ကဏ္ဍ​ကို နောက်​ဆောင်းပါး​တွင် သုံးသပ်​သွား​မည်​နည်း။

^၂၀ ပေါလု မီး​မောင်း​ထိုး​ပြ​ခဲ့​သည့် အရာ​နှစ်ခု​ကို သတိပြုပါ။ သူ၏​စိတ်ဆန္ဒ​မှာ လူ​အချို့​ကို ကယ်တင်ခြင်း​ရ​စေလို၍​ဖြစ်​ပြီး ထို​အတွက် ဘုရားသခင်​ထံ သူ​ဆုတောင်းပေး​ခဲ့​ခြင်း​ဖြစ်သည်။ ယနေ့ ပေါလု​၏ ပုံသက်သေ​ကို ကျွန်ုပ်​တို့​အတုယူ​ကြ​၏။ သတင်းကောင်းကို တလိုတလား​ရှိ​ကောင်း​ရှိ​မည့်​သူ မည်​သူ့ကို​မဆို ရှာတွေ့​လို​သည့် စိတ်ဆန္ဒ ကျွန်ုပ်​တို့​၌​လည်း​ရှိကြသည်။ ထိုသို့​သော​သူများကို ရှာတွေ့​ပြီး ကယ်တင်ခြင်း​သို့​ပို့ဆောင်​ပေး​မည့် လမ်းကြောင်း​ပေါ် သူတို့​လိုက်လျှောက်​နေဖို့ ကူညီပေး​နိုင်​ရန် ယေဟောဝါ​ထံ ကျွန်ုပ်​တို့​ဆက်​ဆုတောင်း​ကြသည်။—သု. ၁၁:၃၀; ယေဇကျေလ ၃၃:၁၁; ယောဟန် ၆:၄၄။

^၂၁ သို့ရာတွင်၊ လူများ​နိုင်​သလော​က်​များစွာ​ထံ ဘုရားသခင့်​နိုင်ငံတော်​သတင်းတရား ရောက်ရှိ​ဖို့ ကျွန်ုပ်​တို့​ဟောပြော​ရသည့် အကြောင်းရင်း​နှင့် အကြောင်းအရာ​တို့ကို​သာမက ကျွန်ုပ်​တို့​ဟောပြောပုံ​ကို​ပါ အထူး​ဂရုစိုက်​သင့်​ပေ​သည်။ ဤ​အကြောင်းအရာကို နောက်​ဆောင်းပါး​တွင် သုံးသပ်​သွားပါ​မည်။

[အောက်ခြေ​မှတ်ချက်များ]

 သင်​အဘယ်အရာ​သင်ယူ​ခဲ့ပြီ​နည်း

• အဘယ်​အကြောင်းရင်း​များ​ကြောင့် ခရစ်ယာန်​ဓမ္မ​အမှု​တွင် ကျွန်ုပ်​တို့​ပါဝင်​ကြ​သနည်း။

• ကျွန်ုပ်​တို့​ဟောပြောကြ​သည့် အဓိက​သတင်းတရား​ကား အဘယ်နည်း။

• ဘုရားသခင့်​နိုင်ငံတော်​သတင်းတရားကို လက်ခံသူ​တို့သည် အဘယ်​ကောင်းချီး​များ ခံစားရ​သနည်း။

• ခရစ်ယာန်​ဓမ္မ​အမှု​တွင် ကျွန်ုပ်​တို့​ဆက်​ပါဝင်​နိုင်​ရန် အဘယ်အရာက ကူညီပေး​မည်​နည်း။

 [လေ့လာ​ရန်​မေးခွန်းများ]

 [စာမျက်နှာ ၁၈ ပါ ရုပ်ပုံများ]

ဘုရားသခင့်​နိုင်ငံတော်​သတင်းတရားသည် နှလုံး​ကြေကွဲ​နေသူတို့​ကို ခွန်အား​ပေး

[စာမျက်နှာ ၂၀ ပါ ရုပ်ပုံများ]

ဆုတောင်းခြင်း​က ကျွန်ုပ်​တို့ကို ခရစ်ယာန်​ဓမ္မ​အမှု​တွင် ခံနိုင်ရည်​ရှိ​ရန် ကူညီပေး