လူမျိုးအပေါင်းမှလူတို့အတွက် သတင်းကောင်း
လူမျိုးအပေါင်းမှလူတို့အတွက် သတင်းကောင်း
“သင်တို့သည် . . . မြေကြီးစွန်းတိုင်အောင် ငါ၏သက်သေဖြစ်ကြလိမ့်မည်။”—တမန်တော် ၁:၈။
၁။ ကျမ်းစာသွန်သင်သူများအနေနှင့် အဘယ်အရာကို ကျွန်ုပ်တို့ဂရုပြုကြပြီး အဘယ်ကြောင့်နည်း။
ဆရာသမားကောင်းတို့သည် ကျောင်းသားများအား အဘယ်အရာပြောပြရမည်ကိုသာမက အဘယ်သို့ပြောပြရမည်ကိုပါ အထူးဂရုစိုက်ကြ၏။ ကျမ်းစာအမှန်တရား သွန်သင်ပေးသူများအနေနှင့် ကျွန်ုပ်တို့လည်း ထပ်တူပင်ပြုသည်။ ဟောပြောသည့် သတင်းတရားနှင့် အသုံးပြုကြသည့် နည်းစနစ်တို့ကို ကျွန်ုပ်တို့ဂရုပြုကြသည်။ ကျွန်ုပ်တို့၏သတင်းတရားဖြစ်သော ဘုရားသခင့်နိုင်ငံတော်သတင်းကောင်းသည် မပြောင်းလဲသော်လည်း ကျွန်ုပ်တို့၏နည်းစနစ်များကိုမူ အလိုက်သင့်ပြုပြင်ပြောင်းလဲကြသည်။ အဘယ်ကြောင့်နည်း။ ဖြစ်နိုင်သရွေ့ လူများများထံ သတင်းကောင်းရောက်ရှိစေဖို့ဖြစ်၏။
၂။ ကျွန်ုပ်တို့၏ဟောပြောပုံနည်းစနစ်များကို အလိုက်သင့်ပြောင်းလဲသည့်အခါ မည်သူ့ကို အတုယူနေခြင်းဖြစ်သနည်း။
၂ ကျွန်ုပ်တို့၏ဟောပြောပုံနည်းစနစ်များကို အလိုက်သင့်ပြောင်းလဲခြင်းအားဖြင့် ဘုရားသခင့်ရှေးခေတ်ကျေးကျွန်များကို အတုယူကြ၏။ သာဓကအနေနှင့် တမန်တော်ပေါလုကို သုံးသပ်ကြည့်ပါ။ သူဤသို့ဆိုခဲ့သည်– “ယုဒလူတို့၌ ယုဒလူကဲ့သို့ဖြစ်၏။ . . . ပညတ်တရားမဲ့သောသူတို့၌ ပညတ်တရားမဲ့သောသူကဲ့သို့ဖြစ်၏။ အားနည်းသောသူတို့ကိုရခြင်းအလို့ငှာ အားနည်းသောသူတို့၌ အားနည်းသောသူကဲ့သို့ဖြစ်၏။ အချို့သောသူတို့ကို တစ်စုံတစ်ရာသောအမှုအရာအားဖြင့် ကယ်တင်ခြင်းအလို့ငှာ ခပ်သိမ်းသောသူတို့၌ ခပ်သိမ်းသောအရာဖြစ်၏။” (၁ ကောရိန္သု ၉:၁၉-၂၃) အခြေအနေအလိုက် ပြုပြင်ပြောင်းလဲခဲ့သော ပေါလု၏ဟောပြောပုံနည်းစနစ်သည် ထိရောက်ခဲ့သည်။ ကျွန်ုပ်တို့လည်း ကျွန်ုပ်တို့၏တင်ဆက်ပုံတို့ကို အလိုက်သင့်ပြုပြင်ပေးမည်ဆိုလျှင် ထိရောက်မှုရှိပါလိမ့်မည်။
“မြေကြီးစွန်း” တိုင်
၃။ (က) ကျွန်ုပ်တို့၏ဟောပြောခြင်းလုပ်ငန်းတွင် အဘယ်စိန်ခေါ်ချက်ကို ရင်ဆိုင်ကြရသနည်း။ (ခ) ဟေရှာယ ၄၅:၂၂ ပါစကားများ ယနေ့ မည်သို့ပြည့်စုံလျက်ရှိသနည်း။
၃ သတင်းကောင်းဟောပြောသူတို့ ရင်ဆိုင်ရသည့် အဓိကစိန်ခေါ်ချက်တစ်ခုမှာ ‘လောကနိုင်ငံအရပ်ရပ်ရှိသမျှ’ ဟူသည့် နယ်မြေအကျယ်အဝန်းဖြစ်လေသည်။ (မဿဲ ၂၄:၁၄) လွန်ခဲ့သောရာစုနှစ်အတွင်း ယေဟောဝါ၏ကျေးကျွန်များစွာသည် နိုင်ငံသစ်များသို့သွားရောက်၍ သတင်းကောင်းကို ကြိုးစားကြဲဖြန့်ခဲ့ကြသည်။ ရလဒ်ကား အဘယ်နည်း။ အံ့သြဖွယ်ကောင်းလောက်အောင် ကမ္ဘာတစ်ဝန်း ပျံ့နှံ့သွားသည်။ ၂၀ ရာစုအစပိုင်း၌ နိုင်ငံတချို့တွင်သာ ဟောပြောခဲ့ကြသော်လည်း လက်ရှိအချိန်တွင် ယေဟောဝါသက်သေများသည် နိုင်ငံပေါင်း ၂၃၅ နိုင်ငံ၌ တက်ကြွစွာ အမှုဆောင်လျက်ရှိကြသည်! ဘုရားသခင့်နိုင်ငံတော်သတင်းကောင်းကို “မြေကြီးစွန်း” တိုင် အမှန်တကယ်ကြွေးကြော်လျက်နေလေပြီ။—ဟေရှာယ ၄၅:၂၂။
၄၊ ၅။ (က) သတင်းကောင်းပျံ့နှံ့ရေးတွင် မည်သူများသည် အရေးပါသူများဖြစ်ခဲ့ကြသနည်း။ (ခ) ဌာနခွဲရုံးတချို့သည် ဌာနခွဲနယ်မြေတွင် အမှုဆောင်နေကြသည့် တိုင်းတစ်ပါးမှရောက်လာကြသူတို့အကြောင်း အဘယ်သို့ဆိုခဲ့ကြသနည်း။
၄ ဤကဲ့သို့တိုးတက်လာမှု၏ အကြောင်းရင်းများကား အဘယ်နည်း။ အကြောင်းရင်းများစွာရှိပါသည်။ ကင်းမျှော်စင်သမ္မာကျမ်းစာ ဂိလဒ်ကျောင်းတွင် သင်တန်းတက်ခဲ့သော ခရစ်ယာန်သာသနာပြုများနှင့် မကြာသေးမီက ဓမ္မအမှုထမ်းကျောင်းဆင်း ၂၀,၀၀၀ ကျော်တို့သည် များစွာအထောက်အကူပြုခဲ့ကြပြီ။ ထို့ပြင် ဘုရားသခင့်နိုင်ငံတော်ကြေညာသူ သာ၍လိုအပ်သော နိုင်ငံများသို့ မိမိတို့၏ကိုယ်ပိုင်အသုံးစရိတ်ဖြင့် ပြောင်းရွှေ့နေထိုင်ခဲ့ကြသော သက်သေခံများစွာသည်လည်း ထိုနည်းအတိုင်းပင်။ ဤသို့ကိုယ်ကျိုးစွန့်ကြသော ခရစ်ယာန်အမျိုးသားအမျိုးသမီး၊ ကြီးကြီးငယ်ငယ်၊ ပျိုပျိုအိုအိုတို့သည် ကမ္ဘာမြေအနှံ့ ဘုရားသခင့်နိုင်ငံတော်သတင်းတရား ဟောပြောခြင်းတွင် အလွန်အရေးပါသူများဖြစ်လာကြ၏။ (ဆာလံ ၁၁၀:၃; ရောမ ၁၀:၁၈) သူတို့ကို များစွာ တန်ဖိုးထားလေးမြတ်ရ၏။ ဌာနခွဲနယ်မြေအတွင်း အကူအညီသာ၍လိုအပ်သောနေရာများတွင် အမှုဆောင်နေကြသည့် တိုင်းတစ်ပါးမှရောက်လာသူတို့၏အကြောင်းကို ဌာနခွဲရုံးတချို့ မည်သို့စာရေးပြောပြသည်ကို သတိပြုပါ။
၅ “ဤချစ်ဖွယ်ကောင်းသော သက်သေခံများသည် သီးခြားအုပ်စုဒေသများတွင် ဟောပြောခြင်းကိုဦးဆောင်၍ အသင်းတော်အသစ်များတည်ရန် ကူညီပေးကြပြီး ဒေသခံညီအစ်ကိုညီအစ်မများ၏ ဝိညာဉ်ရေးကို ရှင်သန်ကြီးထွားစေကြသည်။” (အီကွေဒေါ) “ဤတွင်အမှုဆောင်နေကြသည့် ရာနှင့်ချီသောတိုင်းတစ်ပါးသားများသည် ပြန်လည်ထွက်ခွာသွားကြမည်ဆိုပါက အသင်းတော်များ၏ ခိုင်ခံ့မြဲမြံမှု ထိခိုက်သွားပေလိမ့်မည်။ ကျွန်ုပ်တို့နှင့်အတူ သူတို့ရှိနေကြခြင်းသည် ကောင်းချီးတစ်ရပ်ဖြစ်ပေသည်။” (ဒိုမီနီကန်သမ္မတနိုင်ငံ) “ကျွန်ုပ်တို့၏အသင်းတော်အများစုတွင် ညီအစ်မအများအပြားရှိကာ တစ်ခါတစ်ရံ ၇၀ ရာခိုင်နှုန်းအထိရှိသည်။ (ဆာလံ ၆၈:၁၁) သူတို့အများစုမှာ အမှန်တရားတွင် လူသစ်များဖြစ်ကြသော်လည်း အခြားနိုင်ငံများမှ ရောက်လာကြသည့် တစ်ကိုယ်ရေရှေ့ဆောင်ညီအစ်မများက ထိုလူသစ်များကို လေ့ကျင့်ပေးခြင်းဖြင့် အဖိုးမဖြတ်နိုင်သော အကူအညီဖြစ်စေသည်။ တိုင်းတစ်ပါးမှရောက်လာကြသည့် ဤညီအစ်မများသည် ကျွန်ုပ်တို့အတွက် ဆုကျေးဇူးအစစ်အမှန်ပင်!” (အရှေ့ပိုင်းဥရောပနိုင်ငံတစ်နိုင်ငံ) အခြားနိုင်ငံတစ်နိုင်ငံတွင် သွားအမှုဆောင်ဖို့ သင်စဉ်းစားဖူးပါသလော။ *—တမန်တော် ၁၆:၉၊ ၁၀။
“ဘာသာစကားအသီးသီးကိုပြောတတ်သော လူအမျိုးမျိုးတို့တွင် တစ်ကျိပ်သောလူတို့”
၆။ ကျွန်ုပ်တို့၏ဟောပြောခြင်းလုပ်ငန်းရှိ ဘာသာစကားအခက်အခဲကို ဇာခရိ ၈:၂၃ က မည်သို့ဖော်ပြသနည်း။
၆ နောက်စိန်ခေါ်ချက်ကြီးတစ်ခုမှာ ကမ္ဘာပေါ်တွင် ဘာသာစကားအမျိုးမျိုး ပြောဆိုနေကြခြင်းဖြစ်သည်။ သမ္မာကျမ်းစာက ဤသို့တင်ကူးဟောထား၏– “ထိုကာလ၌ ဘာသာစကားအသီးသီးကိုပြောတတ်သော လူအမျိုးမျိုးတို့တွင် တစ်ကျိပ်သောလူတို့သည် ယုဒလူဖြစ်သောသူ၏ အဝတ်စွန်းကိုကိုင်လျက် ‘ဘုရားသခင်သည် သင်တို့နှင့်အတူရှိတော်မူသည်ဟု အကျွန်ုပ်တို့သည် ကြားသိ၍ သင်တို့နှင့်အတူလိုက်ပါမည်’ ဟု ဆိုကြလိမ့်မည်။” (ဇာခရိ ၈:၂၃) ဤပရောဖက်ပြုချက်၏ ခေတ်သစ်ပြည့်စုံချက်တွင် တစ်ကျိပ်သောလူတို့သည် ဗျာ. ၇:၉ တွင် ပရောဖက်ပြုထားသည့် လူအုပ်ကြီးကို ကိုယ်စားပြုပါသည်။ သို့ရာတွင် ဇာခရိ၏ပရောဖက်ပြုချက်အရ “တစ်ကျိပ်သောလူတို့” သည် လူမျိုးအပေါင်းမှသာမကဘဲ “ဘာသာစကားအသီးသီးကိုပြောတတ်သော လူအမျိုးမျိုးတို့” အထဲမှလည်း ထွက်ပေါ်လာမည်ဖြစ်သည်။ အဆိုပါပရောဖက်ပြုချက်၏ အရေးကြီးသည့် ဤအသေးစိတ်ပြည့်စုံချက်ကို ကျွန်ုပ်တို့ တွေ့မြင်နေရပြီလော။ အမှန်ပင် တွေ့မြင်နေရပါပြီ။
၇။ “ဘာသာစကားအသီးသီးကိုပြောတတ်သော” လူမျိုးတို့ထံ သတင်းကောင်းရောက်ရှိနေပြီဖြစ်ကြောင်း အဘယ်အချက်အလက်များက ဖော်ပြသနည်း။
၇ အချက်အလက်တချို့ကို သုံးသပ်ကြည့်ပါ။ လွန်ခဲ့သောအနှစ်ငါးဆယ်က ကျွန်ုပ်တို့၏စာပေကို ဘာသာစကား ၉၀ ဖြင့် ထုတ်ဝေခဲ့၏။ ယနေ့တွင်မူ ဘာသာစကားပေါင်း ၄၀၀ ကျော်ဖြင့် တိုး၍ထုတ်ဝေနေပြီ။ ‘သစ္စာနှင့်သတိပညာရှိသောကျွန်’ သည် လူအနည်းငယ်မျှသာပြောဆိုကြသည့် ဘာသာစကားအချို့အတွက်ပင် စာပေများကို အတတ်နိုင်ဆုံးထုတ်ဝေပေးခဲ့ပြီ။ (မဿဲ ၂၄:၄၅) ဥပမာ၊ ကျမ်းစာ,စာပေများကို ဂရင်းလန်ဘာသာစကား (လူပေါင်း ၄၇,၀၀၀ ပြောဆိုကြ)၊ ပါလောင်းဘာသာစကား (လူပေါင်း ၁၅,၀၀၀ ပြောဆိုကြ) နှင့် ယပ်ပီးဘာသာစကား (ပြောဆိုသည့်လူ ၇,၀၀၀ ပင်မရှိ) တို့ဖြင့် ယခု ရရှိနိုင်ပြီဖြစ်သည်။
အခွင့်အရေးအသစ်ရရှိစေမည့် “အလွန်ကြီးစွာသောတံခါး”
၈၊ ၉။ “အလွန်ကြီးစွာသောတံခါး” တစ်ခုသည် ကျွန်ုပ်တို့အတွက် အဘယ်သို့ပွင့်လာပြီနည်း၊ သက်သေခံထောင်သောင်းမကသည် မည်သို့တုံ့ပြန်ခဲ့ကြပြီနည်း။
၈ သို့သော် ယနေ့ ဘာသာစကားအမျိုးမျိုးပြောသည့်လူတို့ထံ သတင်းကောင်းဟောပြောဖို့ တိုင်းတစ်ပါးသို့ သွားစရာမလိုတော့ပေ။ မကြာသေးမီနှစ်များတွင် စီးပွားရေးဖွံ့ဖြိုးတိုးတက်သောနိုင်ငံများသို့ သန်းနှင့်ချီ၍ရောက်လာကြသည့် ပြောင်းရွှေ့လာသူများနှင့် ခိုလှုံသူများကြောင့် နိုင်ငံခြားဘာသာစကားပြောရပ်ကွက်များစွာ ပေါ်ပေါက်လာလေပြီ။ သာဓကအနေနှင့်၊ ပြင်သစ်နိုင်ငံ၊ ပါရီမြို့တွင် ဘာသာစကား ၁၀၀ ခန့် ပြောဆိုနေကြ၏။ ကနေဒါနိုင်ငံ၊ တိုရွန်တိုမြို့တွင် ဘာသာစကား ၁၂၅မျိုး; အင်္ဂလန်နိုင်ငံ၊ လန်ဒန်မြို့တွင် ဘာသာစကား ၃၀၀ ကျော် ပြောဆိုနေကြ၏! အသင်းတော်ရပ်ကွက်များစွာတွင် တိုင်းတစ်ပါးသားများ နေထိုင်ကြသောကြောင့် လူမျိုးအပေါင်းကို သတင်းကောင်းပြောဖို့ အခွင့်အရေးအသစ်ရရှိစေသည့် “အလွန်ကြီးစွာသောတံခါး” ပွင့်နေပြီ။—၁ ကောရိန္သု ၁၆:၉။
၉ ထောင်သောင်းမကသော သက်သေခံတို့သည် ဘာသာခြားစကားကိုသင်ယူ၍ လူမျိုးအပေါင်းကို သတင်းကောင်းဟောပြောလျက်ရှိ၏။ သက်သေခံအများစုအတွက်မူ ထိုသို့ပြုရန် ခက်ခဲပေမည်; သို့တိုင် ရွှေ့ပြောင်းလာသူများနှင့် ခိုလှုံသူများကို ကျမ်းစာအမှန်တရားသိရှိလာစေရန် ကူညီပေးရ၍ ရရှိသည့်ရွှင်လန်းဝမ်းမြောက်မှုက ကြိုးစားရကျိုးနပ်ပေသည်။ မကြာသေးမီနှစ်တစ်နှစ်အတွင်း အနောက်ဥရောပနိုင်ငံတစ်နိုင်ငံ၌ ကျင်းပခဲ့သည့် ခရိုင်စည်းဝေးကြီးများတွင် နှစ်ခြင်းခံသူအားလုံးအနက် ၄၀ ရာခိုင်နှုန်းနီးပါးမှာ တိုင်းတစ်ပါးမှဖြစ်ကြ၏။
၁၀။ လူမျိုးအပေါင်းမှလူတို့အတွက် သတင်းကောင်း စာအုပ်ငယ်ကို သင်မည်သို့အသုံးပြုခဲ့ပြီနည်း။ (စာမျက်နှာ ၂၆ ရှိ “လူမျိုးအပေါင်းမှလူတို့အတွက် သတင်းကောင်း စာအုပ်ငယ်၏ ထူးခြားချက်များ” လေးထောင့်ကွက်ကိုရှု။)
၁၀ ကျွန်ုပ်တို့အများစုကို နိုင်ငံခြားဘာသာစကားသင်ယူရန် အခြေအနေမပေးသည်မှာမှန်၏။ သို့ဖြစ်သည့်တိုင် အသစ်စက်စက်ထုတ်ဝေလိုက်သည့် လူမျိုးအပေါင်းမှလူတို့အတွက် သတင်းကောင်း * စာအုပ်ငယ်ကို ကောင်းစွာအသုံးချခြင်းအားဖြင့် ပြောင်းရွှေ့လာသူများကို ကျွန်ုပ်တို့ဟောပြောနိုင်ကြသည်၊ ထိုတွင် နှစ်လို့ဖွယ်ကျမ်းစာသတင်းတရားကို ဘာသာစကားမျိုးစုံဖြင့် တင်ဆက်ထား၏။ (ယောဟန် ၄:၃၇) ဤစာအုပ်ငယ်ကို ခရစ်ယာန်ဓမ္မအမှုတွင် သင်အသုံးပြုနေပါသလော။
သတင်းကောင်းကို လူတို့မတုံ့ပြန်ကြသည့်အခါ
၁၁။ နယ်မြေတချို့တွင် နောက်ထပ်အဘယ်စိန်ခေါ်ချက်ကို ရင်ဆိုင်ကြရသနည်း။
၁၁ ကမ္ဘာမြေပေါ်တွင် စာတန်၏သြဇာကြီးထွားလာသည်နှင့်အမျှ အခြားစိန်ခေါ်ချက်တစ်ခုမှာ သတင်းကောင်းကို မတုံ့ပြန်သည့်ရပ်ကွက်များ အတွေ့ရများလာခြင်းဖြစ်သည်။ ထိုသို့သောအခြေအနေဖြစ်လာမည်ဟု ယေရှုကြိုပြောထားသောကြောင့် ယင်းကို ကျွန်ုပ်တို့မအံ့သြကြပါ။ ကျွန်ုပ်တို့ခေတ်နှင့်စပ်လျဉ်း၍ ကိုယ်တော်က “အများသောသူတို့၏ချစ်ခြင်းမေတ္တာသည် ခေါင်းပါးလိမ့်မည်” ဟု မိန့်ဆိုခဲ့သည်။ (မဿဲ ၂၄:၁၂) လူအများသည် ဘုရားသခင်အားယုံကြည်ခြင်း၊ သမ္မာကျမ်းစာကို ရိုသေလေးမြတ်ခြင်း မရှိကြတော့ချေ။ (၂ ပေတရု ၃:၃၊ ၄) ထို့ကြောင့် ကမ္ဘာ့နိုင်ငံတချို့တွင် ခရစ်တော်၏နောက်လိုက်အသစ်များ ဖြစ်လာသူ မရှိသလောက်ပင်။ သို့ရာတွင် ထိုသို့တုံ့ပြန်မှုမရှိသည့်ရပ်ကွက်များတွင် တည်ကြည်စွာအမှုဆောင်နေကြသော ကျွန်ုပ်တို့ချစ်ရသည့် ခရစ်ယာန်ညီအစ်ကိုညီအစ်မများ၏ လုပ်ဆောင်မှုများမှာ အချည်းနှီးဖြစ်သွားသည်ဟူ၍ကား မဆိုလိုပါ။ (ဟေဗြဲ ၆:၁၀) ထိုသို့ အဘယ်ကြောင့်မဟုတ်ရသနည်း။ အောက်ပါတို့ကို သုံးသပ်ကြည့်ပါ။
၁၂။ ဟောပြောခြင်းလုပ်ငန်း၏ ရည်ရွယ်ချက်နှစ်ခုကား အဘယ်နည်း။
၁၂ ဟောပြောခြင်းလုပ်ငန်း၏ အဓိကရည်ရွယ်ချက်နှစ်ခုကို မဿဲခရစ်ဝင်ကျမ်းက မီးမောင်းထိုးပြသည်။ တစ်ခုမှာ ကျွန်ုပ်တို့သည် ‘လူမျိုးတကာတို့ကို တပည့်ဖြစ်စေ’ ရမည်ဖြစ်၏။ (မဿဲ ၂၈:၁၉) အခြားတစ်ခုမှာ ဘုရားသခင့်နိုင်ငံတော်သတင်းတရားသည် “သက်သေ” ဖြစ်၏။ (မဿဲ ၂၄:၁၄) အဆိုပါရည်ရွယ်ချက် နှစ်ခုစလုံး အရေးကြီးသော်လည်း ဒုတိယတစ်ခုက အထူးအဓိပ္ပာယ်ရှိသည်။ အဘယ်ကြောင့်နည်း။
၁၃၊ ၁၄။ (က) ခရစ်တော်ရောက်ရှိနေခြင်းနိမိတ်တွင် ထူးခြားသည့်လက္ခဏာတစ်ရပ်ကား အဘယ်နည်း။ (ခ) အထူးသဖြင့် တုံ့ပြန်မှုနည်းသည့်ရပ်ကွက်များတွင် ဟောပြောသည့်အခါ အဘယ်အရာကို စိတ်စွဲမှတ်ထားသင့်သနည်း။
၁၃ ယေရှုအား တမန်တော်များမေးခဲ့သည့်မေးခွန်းကို ကျမ်းရေးသူ မဿဲက ဤသို့မှတ်တမ်းတင်ထားသည်– ‘ကိုယ်တော်သည်ကြွလာ၍ ဤကမ္ဘာကုန်သောနိမိတ်သည် အဘယ်နိမိတ်ဖြစ်မည်ကို အမိန့်ရှိတော်မူပါ။’ (မဿဲ ၂၄:၃) အဆိုပါနိမိတ်လက္ခဏာအနက် အထူးခြားဆုံးနိမိတ်တစ်ခုမှာ ကမ္ဘာချီဟောပြောခြင်းလုပ်ငန်းဖြစ်လိမ့်မည်ဟု ယေရှုပြန်ဖြေဆိုခဲ့သည်။ တပည့်ဖြစ်စေခြင်းအကြောင်း ကိုယ်တော်ပြောနေခြင်းလော။ မဟုတ်ပါ။ ကိုယ်တော်က ‘လူမျိုးအပေါင်းတို့အား သက်သေဖြစ်မည်အကြောင်း နိုင်ငံတော်နှင့်ယှဉ်သောသတင်းကောင်းကို လောကနိုင်ငံအရပ်ရပ်ရှိသမျှတို့၌ ဟောရလိမ့်မည်’ ဟု မိန့်ဆိုခဲ့၏။ (မဿဲ ၂၄:၁၄) သို့နှင့် ဘုရားသခင့်နိုင်ငံတော်ဟောပြောခြင်းလုပ်ငန်းကိုယ်နှိုက်က အရေးကြီးနိမိတ်လက္ခဏာတစ်ရပ်ဖြစ်မည်ဟု ယေရှုဖော်ပြခဲ့၏။
၁၄ ထို့ကြောင့် ဘုရားသခင့်နိုင်ငံတော်သတင်းကောင်းကို ကျွန်ုပ်တို့ဟောပြောသည့်အခါ တပည့်များ အမြဲမဖြစ်လာစေနိုင်သည့်တိုင် “သက်သေ” ဖြစ်စေနိုင်ကြောင်း သတိရကြသည်။ လူတို့မည်သို့ပင် တုံ့ပြန်နေပါစေ ကျွန်ုပ်တို့၏လုပ်ဆောင်ချက်ကို သူတို့သိရှိကြသဖြင့် ယေရှု၏ပရောဖက်ပြုချက်ကို ပြည့်စုံစေသည်။ (ဟေရှာယ ၅၂:၇; ဗျာ. ၁၄:၆၊ ၇) အနောက်ဥရောပမှ သက်သေခံလူငယ်တစ်ဦးဖြစ်သူ ဂျောရ်ဒီက ဤသို့ဆိုသည်– “မဿဲ ၂၄:၁၄ ပြည့်စုံချက်မှာ ကျွန်တော်လည်း အသုံးတော်ခံရတယ်လို့ သိရတဲ့အတွက် အရမ်းပျော်တယ်။” (၂ ကောရိန္သု ၂:၁၅-၁၇) အသင်လည်း ထပ်တူခံစားရပေမည်။
ကျွန်ုပ်တို့၏သတင်းတရား ဆန့်ကျင်ခံရသည့်အခါ
၁၅။ (က) မိမိ၏နောက်လိုက်များကို အဘယ်အရာနှင့်ပတ်သက်၍ ယေရှုတင်ကြိုသတိပေးခဲ့သနည်း။ (ခ) ဆန့်ကျင်မှုကြား အဘယ်အရာက ကျွန်ုပ်တို့ကို ဟောပြောစေသနည်း။
၁၅ ဆိုးရွားသောအခြေအနေများသည် ဘုရားသခင့်နိုင်ငံတော်သတင်းကောင်းဟောပြောရေးတွင် စိန်ခေါ်ချက်နောက်တစ်ခုဖြစ်၏။ မိမိနောက်လိုက်များကို ယေရှု ဤသို့တင်ကြိုသတိပေးခဲ့သည်– “ငါ၏နာမကြောင့်လည်း ခပ်သိမ်းသောလူမျိုးတို့သည် သင်တို့ကို မုန်းကြလိမ့်မည်။” (မဿဲ ၂၄:၉) အစောပိုင်းခရစ်ယာန်များနည်းတူ ယနေ့ ယေရှု၏နောက်လိုက်များလည်း မုန်းတီးခံရ၊ ဆန့်ကျင်ခံရကြပြီး နှိပ်စက်ညှဉ်းပန်းခံရကြပြီ။ (တမန်တော် ၅:၁၇၊ ၁၈၊ ၄၀; ၂ တိမောသေ ၃:၁၂; ဗျာ. ၁၂:၁၂၊ ၁၇) နိုင်ငံတချို့တွင် သက်သေခံများသည် လောလောဆယ်၌ပင် အစိုးရ၏ပိတ်ပင်တားမြစ်ခြင်းကို ခံနေရ၏။ သို့ဖြစ်သည့်တိုင် ထိုနိုင်ငံများရှိ ခရစ်ယာန်စစ်များသည် ဘုရားသခင့်စကားကို နားထောင်၍ ဘုရားသခင့်နိုင်ငံတော်သတင်းကောင်းကို ဆက်ဟောပြောနေကြပါသည်။ (အာမုတ် ၃:၈; တမန်တော် ၅:၂၉; ၁ ပေတရု ၂:၂၁) သူတို့ကိုရော ကမ္ဘာတစ်ဝန်းရှိ အခြားသက်သေခံအားလုံးကိုပါ အဘယ်အရာက ထိုသို့ပြုစေသနည်း။ ယေဟောဝါသည် သန့်ရှင်းသောဝိညာဉ်တော်အားဖြင့် သူတို့ကိုခွန်အားပေးတော်မူသည်။—ဇာခရိ ၄:၆; ဧဖက် ၃:၁၆; ၂ တိမောသေ ၄:၁၇။
၁၆။ ဟောပြောခြင်းလုပ်ငန်းနှင့် ဘုရားသခင့်ဝိညာဉ်တော်ဆက်စပ်မှုရှိကြောင်းကို ယေရှုမည်သို့ဖော်ပြခဲ့သနည်း။
၁၆ ဘုရားသခင့်ဝိညာဉ်တော်နှင့် ဟောပြောခြင်းလုပ်ငန်းသည် ဆက်စပ်နေကြောင်း မိမိနောက်လိုက်များအား ယေရှု ဤသို့အလေးပေးပြောကြားခဲ့သည်– “သင်တို့အပေါ်သို့ သန့်ရှင်းသောဝိညာဉ်တော်ဆင်းသက်သောအခါ သင်တို့သည် တန်ခိုးကိုခံရ၍ . . . မြေကြီးစွန်းတိုင်အောင် ငါ၏သက်သေဖြစ်ကြလိမ့်မည်။” (တမန်တော် ၁:၈; ဗျာ. ၂၂:၁၇) ဤကျမ်းချက်ပါ အဖြစ်အပျက်အစီအစဉ်သည် အရေးပါ၏။ တပည့်နောက်လိုက်များသည် သန့်ရှင်းသောဝိညာဉ်တော်ကို ဦးဆုံးရကြပြီး ကမ္ဘာချီသက်သေခံခြင်းလုပ်ငန်းကို ဆောင်ရွက်ခဲ့ကြသည်။ ဘုရားသခင့်ဝိညာဉ်တော်၏ အကူအညီဖြင့်သာ “လူမျိုးအပေါင်းတို့အားသက်သေ” ခံခြင်းတွင် ခံနိုင်ရည်ရှိရန် ခွန်အားရှိကြမည်ဖြစ်သည်။ (မဿဲ ၂၄:၁၃၊ ၁၄; ဟေရှာယ ၆၁:၁၊ ၂) ထို့ကြောင့် ယေရှုက အဆိုပါသန့်ရှင်းသောဝိညာဉ်တော်ကို ‘ထောက်မသူ’ ဟုရည်ညွှန်းခြင်းသည် သင့်လျော်လှ၏။ (ယောဟန် ၁၅:၂၆) ဘုရားသခင့်ဝိညာဉ်တော်သည် မိမိ၏တပည့်နောက်လိုက်များကို သွန်သင်ပေးကာ လမ်းညွှန်ပေးမည်ဟု ကိုယ်တော်မိန့်ဆိုခဲ့သည်။—ယောဟန် ၁၄:၁၆၊ ၂၆; ၁၆:၁၃။
၁၇။ အပြင်းအထန်ဆန့်ကျင်ခံရသည့်အခါ သန့်ရှင်းသောဝိညာဉ်တော်သည် ကျွန်ုပ်တို့ကို မည်သို့ထောက်မကူညီပေးသနည်း။
၁၇ မျက်မှောက်ခေတ်တွင် သတင်းကောင်းဟောပြောခြင်းကို အပြင်းအထန် ဆန့်ကျင်ကြသည့်အခါ ဘုရားသခင့်ဝိညာဉ်တော်က အဘယ်နည်းများဖြင့် ကူညီပေးသနည်း။ ဘုရားသခင့်ဝိညာဉ်တော်သည် ကျွန်ုပ်တို့ကို ခွန်အားပေးကာ ကျွန်ုပ်တို့အား နှိပ်စက်ညှဉ်းပန်းသူတို့ကို ဆီးတားသည်။ ယင်းကိုပုံဥပမာပြရန် ဘုရင်ရှောလု၏ဘဝအဖြစ်အပျက်တစ်ခုကို သုံးသပ်ကြည့်ပါ။
ဘုရားသခင့်ဝိညာဉ်တော်၏ ဆီးတားခြင်းကိုခံရ
၁၈။ (က) ရှောလုသည် မည်သို့အကြီးအကျယ်ပြောင်းလဲသွားသနည်း။ (ခ) ဒါဝိဒ်ကိုနှိပ်ကွပ်ဖို့ အဘယ်နည်းလမ်းများကို ရှောလုအသုံးပြုခဲ့သနည်း။
၁၈ ဣသရေလနိုင်ငံ၏ ပထမဦးဆုံးရှင်ဘုရင်အဖြစ် ရှောလုအစကောင်းခဲ့သော်လည်း နောက်ပိုင်းတွင် ယေဟောဝါ၏စကားကို နားမထောင်သူဖြစ်လာ၏။ (၁ ဓမ္မရာဇဝင် ၁၀:၁၊ ၂၄; ၁၁:၁၄၊ ၁၅; ၁၅:၁၇-၂၃) သို့နှင့် အဆိုပါရှင်ဘုရင်သည် ဘုရားသခင့်ဝိညာဉ်တော်၏ကူညီထောက်မမှုကို မရရှိတော့ချေ။ ရှင်ဘုရင်အရာကိုဆက်ခံဖို့ ဘိသိက်ပေးခံရပြီး ယခု ဘုရားသခင့်ဝိညာဉ်တော်၏ထောက်မမှုရရှိနေသူ ဒါဝိဒ်ကို ရှောလု အလွန်ဒေါသထွက်လာ၏။ (၁ ဓမ္မရာဇဝင် ၁၆:၁၊ ၁၃၊ ၁၄) ဒါဝိဒ်ခမျာ ခုခံနိုင်စွမ်းမရှိသည့်သားကောင်ပမာ ဖြစ်နေပုံရ၏။ အမှန်မှာ ဒါဝိဒ်လက်ထဲတွင် စောင်းတစ်ခုသာရှိ၏၊ ရှောလုမှာမူ လှံတိုကို ကိုင်ထား၏။ သို့နှင့် တစ်နေ့ ဒါဝိဒ်စောင်းတီးနေစဉ် ရှောလုသည် “‘ဒါဝိဒ်ကို ထရံနားမှာထိုးမည်’ ဟု အကြံရှိသည်အတိုင်း လှံတိုကိုထိုးပစ်သော်လည်း ဒါဝိဒ်သည် အထံတော်မှ နှစ်ကြိမ်ရှောင်လွှဲလေ၏။” (၁ ဓမ္မရာဇဝင် ၁၈:၁၀၊ ၁၁) ထို့နောက် ရှောလုသည် ဒါဝိဒ်၏မိတ်ဆွေဖြစ်သော သားယောနသန်၏စကားကို နားထောင်၍ ‘ထာဝရဘုရားသခင်အသက်ရှင်တော်မူသည့်အတိုင်း [ဒါဝိဒ်] သည် အသေမခံရ’ ဟု ကျိန်ဆိုလေ၏။ တစ်ဖန် ရှောလုသည် “[ဒါဝိဒ်]ကို လှံတိုနှင့် ထရံနားမှာထိုးစမ်း” ပြန်၏။ သို့ရာတွင် ဒါဝိဒ်သည် “အထံတော်မှရှောင်ပြေးသဖြင့် လှံတိုသည် ထရံကိုစူးလျက်နေ၏။” ဒါဝိဒ်ထွက်ပြေးသွားသော်လည်း ရှောလုက လိုက်လံဖမ်းဆီးလေသည်။ ထိုသို့သေရေးရှင်ရေးဖြစ်နေသည့်အချိန်တွင် ဘုရားသခင့်ဝိညာဉ်တော်သည် ရှောလုကို ဆီးတားလေသည်။ အဘယ်နည်းဖြင့်နည်း။—၁ ဓမ္မရာဇဝင် ၁၉:၆၊ ၁၀။
၁၉။ ဘုရားသခင့်ဝိညာဉ်တော်သည် ဒါဝိဒ်အား မည်သို့ကာကွယ်ပေးခဲ့သနည်း။
၁၉ ပရောဖက်ရှမွေလထံ ဒါဝိဒ်ထွက်ပြေးသွားခဲ့သော်လည်း ရှောလုသည် ဒါဝိဒ်ကိုဖမ်းဆီးဖို့ မိမိလူများကို စေလွှတ်လိုက်သည်။ သို့ရာတွင် ဒါဝိဒ်ပုန်းခိုသည့်နေရာသို့ သူတို့ရောက်ရှိသွားသည့်အခါ “ဘုရားသခင်၏ဝိညာဉ်တော်သည် ရှောလု၏တမန်တို့အပေါ်မှာသက်ရောက်၍ သူတို့သည်လည်း ပရောဖက်ပြုရကြ၏။” ဘုရားသခင့်ဝိညာဉ်တော်လွှမ်းမိုးမှုကို အကြီးအကျယ်ခံလိုက်ရသဖြင့် သူတို့ပြုလုပ်ရမည့်ကိစ္စကို လုံးဝမေ့လျော့သွားကြသည်။ ထိုအခါ ရှောလုသည် ဒါဝိဒ်ကိုခေါ်ဆောင်လာဖို့ နောက်ထပ်နှစ်ကြိမ် လူကိုစေလွှတ်ပြန်သော်လည်း ထိုအတိုင်း ထပ်ဖြစ်ပျက်ခဲ့၏။ နောက်ဆုံး ဒါဝိဒ်ထံ ဘုရင်ရှောလုကိုယ်တိုင်သွားသော်လည်း ဘုရားသခင့်ဝိညာဉ်တော်ကို သူမတားဆီးနိုင်ခဲ့ပေ။ အမှန်ဆိုရလျှင် သန့်ရှင်းသောဝိညာဉ်တော်က သူ့ကို “တစ်နေ့နှင့်တစ်ည” မလှုပ်မယှက် ငြိမ်နေစေခဲ့ရာ ဒါဝိဒ်အား ထွက်ပြေးဖို့အချိန် အလုံအလောက်ရစေသည်။—၁ ဓမ္မရာဇဝင် ၁၉: ၂၀-၂၄။
၂၀။ ဒါဝိဒ်ကို ရှောလုနှိပ်ကွပ်သည့်မှတ်တမ်းမှ အဘယ်သင်ခန်းစာရနိုင်သနည်း။
၂၀ ရှောလုနှင့်ဒါဝိဒ်တို့၏ ဤမှတ်တမ်းက ဘုရားသခင့်ကျေးကျွန်များကို နှိပ်စက်ညှဉ်းပန်းသူများသည် ဘုရားသခင့်ဝိညာဉ်တော်၏ ဆီးတားခြင်းကိုခံရသည့်အခါ မအောင်မြင်နိုင်ကြောင်း အားရှိစရာသင်ခန်းစာပေးသည်။ (ဆာလံ ၄၆:၁၁; ၁၂၅:၂) ဒါဝိဒ်သည် ဣသရေလနိုင်ငံကိုအုပ်စိုးရမည်ဟု ယေဟောဝါရည်စူးထား၏။ ယင်းကို မည်သူမျှ ပြောင်းလဲနိုင်မည်မဟုတ်။ ကျွန်ုပ်တို့ခေတ်နှင့်ပတ်သက်၍ ‘ဘုရားသခင့်နိုင်ငံတော်နှင့်ယှဉ်သော သတင်းကောင်းကို ဟောရလိမ့်မည်’ ဟု ယေဟောဝါရည်ရွယ်ထားပြီဖြစ်သည်။ ယင်းကို မည်သူကမျှ ရပ်တန့်စေနိုင်မည်မဟုတ်ချေ။—တမန်တော် ၅:၄၀၊ ၄၂။
၂၁။ (က) မျက်မှောက်ခေတ်တွင် ဆန့်ကျင်သူတချို့သည် မည်သို့ပြုမူကြသနည်း။ (ခ) အဘယ်အရာကို ကျွန်ုပ်တို့ယုံကြည်စိတ်ချကြသနည်း။
၂၁ [ခရစ်ယာန်]ဘာသာရေးနှင့်နိုင်ငံရေး ခေါင်းဆောင်တချို့သည် ကျွန်ုပ်တို့ကိုနှောင့်ယှက်ဟန့်တားရန် လိမ်ညာပြောဆိုကြကာ အကြမ်းပတမ်းပင် ပြုခဲ့ကြသည်။ သို့သော် ယေဟောဝါသည် ဒါဝိဒ်ကို ဝိညာဉ်ရေးအရ ကာကွယ်ပေးခဲ့သည့်နည်းတူ မျက်မှောက်ခေတ်မိမိလူမျိုးကို ကိုယ်တော်ကာကွယ်ပေးပါလိမ့်မည်။ (မာလခိ ၃:၆) ထို့ကြောင့် ဒါဝိဒ်ကဲ့သို့ ကျွန်ုပ်တို့လည်း ယုံကြည်စိတ်ချစွာ ဤသို့ပြောဆိုကြသည်– “ငါသည် ဘုရားသခင်ကိုခိုလှုံသည်ဖြစ်၍ ကြောက်စရာမရှိ။ လူသည် ငါ၌ အဘယ်သို့ပြုနိုင်သနည်း။” (ဆာလံ ၅၆:၁၁; ၁၂၁:၁-၈; ရောမ ၈:၃၁) လူမျိုးအပေါင်းတို့အား ဘုရားသခင့်နိုင်ငံတော်နှင့်ယှဉ်သော သတင်းကောင်းကို ဟောပြောပါဟု ဘုရားသခင်စေခိုင်းသည့်တာဝန်ကို ကျွန်ုပ်တို့လုပ်ဆောင်စဉ် ယေဟောဝါ၏အကူအညီဖြင့် စိန်ခေါ်ချက်မှန်သမျှကို ဆက်လက်ရင်ဆိုင်သွားနိုင်ပါစေ။
[အောက်ခြေမှတ်ချက်များ]
^ အပိုဒ်၊ 5 စာမျက်နှာ ၂၂ ရှိ “ကျေနပ်မှုအပြည့်ရ” လေးထောင့်ကွက်ကိုရှု။
^ အပိုဒ်၊ 10 ယေဟောဝါသက်သေများထုတ်ဝေသည်။
သင်မှတ်မိသလော
• ကျွန်ုပ်တို့၏ဟောပြောပုံနည်းစနစ်များကို အဘယ်ကြောင့် အလိုက်သင့်ပြောင်းလဲကြသနည်း။
• အဘယ်အခွင့်အရေးသစ်များဆီသို့ ဦးတည်သည့် “အလွန်ကြီးစွာသောတံခါး” ပွင့်နေပြီနည်း။
• ကျွန်ုပ်တို့၏ဟောပြောခြင်းလုပ်ငန်းကြောင့် တုံ့ပြန်မှုနည်းသည့် ရပ်ကွက်များတွင်ပင် အဘယ်အရာပြီးမြောက်နေသနည်း။
• ဘုရားသခင့်နိုင်ငံတော်သတင်းကောင်း ဟောပြောခြင်းကို ဆန့်ကျင်သူများ အဘယ်ကြောင့် မဟန့်တားနိုင်ကြသနည်း။
[လေ့လာရန်မေးခွန်းများ]
[စာမျက်နှာ ၂၂ ပါ လေးထောင့်ကွက်]
ကျေနပ်မှုအပြည့်ရ
“ယေဟောဝါရဲ့အမှုတော်ကို ပျော်ပျော်ရွှင်ရွှင်နဲ့ စည်းလုံးညီညာစွာ ထမ်းဆောင်နေ။” ယင်းက စပိန်နိုင်ငံမှ ဘိုလီးဗီးယားနိုင်ငံသို့ ပြောင်းရွှေ့သွားသည့် မိသားစုတစ်စုကို ဖော်ညွှန်းပေသည်။ အဆိုပါ မိသားစုမှ သားတစ်ဦးသည် ထိုနိုင်ငံရှိ သီးခြားအုပ်စုတစ်စုကို အကူအညီပေးရန် ထွက်ခွာသွားခဲ့၏။ မြင်သာသည့် သူ၏ရွှင်လန်းဝမ်းမြောက်မှုက မိဘနှစ်ပါးကို စွဲမှတ်သွားစေရာ မကြာမီ အသက် ၁၄ နှစ်မှ ၂၅ နှစ်အရွယ်အထိရှိ သားယောက်ျားလေးဦးအပါအဝင် မိသားစုတစ်စုလုံး ထိုနိုင်ငံတွင် အမှုဆောင်နေလေတော့သည်။ သား ယောက်ျားသုံးဦးမှာ ယခု ရှေ့ဆောင်လုပ်နေကြပြီး ထိုနိုင်ငံသို့ ဦးဆုံးပြောင်းရွှေ့ခဲ့သည့် သားမှာမူ မကြာသေးမီက ဓမ္မအမှုသင်တန်းကျောင်းကို တက်ရောက်ခဲ့လေသည်။
အရှေ့ဥရောပတွင် အမှုဆောင်နေသည့် ကနေဒါနိုင်ငံမှ အသက် ၃၀ ရှိ အင်ဂျလစ်ကာက “စိန်ခေါ်ချက်တွေကတော့ အများကြီးပဲ၊ ဒါပေမဲ့ ခရစ်ယာန်ဓမ္မအမှုမှာ လူတွေကို ကူညီပေးရလို့ စိတ်ကျေနပ်မှုရခဲ့တယ်။ ဒါ့အပြင် ဒေသခံသက်သေခံတွေက သူတို့ကို လာကူညီပေးတဲ့အတွက် ကျေးဇူးတင်ကြောင်း ကျွန်မကိုပြောကြလို့ ပီတိဖြစ်ရတယ်” ဟုဆို၏။
“ကျင့်ယူရမယ့် ဓလေ့ထုံးစံတွေက အများကြီးပဲ။ ဒါပေမဲ့ ကျွန်မတို့တာဝန်ကျတဲ့နေရာမှာ စွဲစွဲမြဲမြဲအမှုဆောင်ခဲ့ကြတဲ့အတွက် အခုဆိုရင် ကျမ်းစာသင်သား ခုနစ်ယောက် အစည်းအဝေးတွေ တက်နေပြီ” ဟု ဒိုမီနီကန်သမ္မတနိုင်ငံတွင် အမှုဆောင်နေကြသည့် အမေရိကန်ပြည်ထောင်စုမှ အသက် ၃၀ နီးပါးအရွယ်ရှိ အန်းနာနှင့် လော်ရာ ညီအစ်မအရင်းနှစ်ဦးက ပြန်ပြောပြ၏။ ဤညီအစ်မနှစ်ဦး၏အကူအညီဖြင့် အသင်းတော်မရှိသည့်မြို့တစ်မြို့တွင် ဘုရားသခင့်နိုင်ငံတော်ကြေညာသူအဖွဲ့တစ်ဖွဲ့ ဖွဲ့စည်းနိုင်ခဲ့သည်။
အသက် ၃၀ နီးပါးရှိ ညီအစ်မတစ်ဦးဖြစ်သူ လော်ရာသည် တိုင်းတစ်ပါးတွင် အမှုဆောင်နေသည်မှာ လေးနှစ်ကျော်ပြီ။ “ကျွန်မရဲ့ဘဝကို တမင် ရိုးရိုးလေးပဲထားတယ်။ ရိုးရိုးကုပ်ကုပ်နေတာဟာ ဆင်းရဲလို့မဟုတ်ဘဲ အဲ့ဒီလိုနေထိုင်ဖို့ တမင်ရွေးချယ်တာ၊ ကောင်းတဲ့သတိရှိတာလို့ ကြေညာသူတွေကို သဘောပေါက်စေတယ်။ သူတစ်ပါးကို အထူးသဖြင့် လူငယ်တွေကို ကူညီပေးနိုင်ခြင်းက ကျွန်မအတွက်တော့ ဝေးမြေရပ်ခြားလယ်ကွင်းမှာ အမှုဆောင်ရတဲ့ တကယ့်အခက်အခဲတွေကို ထေပေးနိုင်တဲ့ ရွှင်လန်းမှုတစ်ခုပါပဲ။ ဒီမှာကျွန်မအမှုဆောင်နေတာကို ဘယ်ဘဝမျိုးနဲ့မှ မလဲဘူး၊ ယေဟောဝါခွင့်ပြုသ၍ ဒီမှာ ကျွန်မနေမယ်။”
[စာမျက်နှာ ၂၆ ပါ လေးထောင့်ကွက်/ ရုပ်ပုံ]
လူမျိုးအပေါင်းမှလူတို့အတွက် သတင်းကောင်းစာအုပ်ငယ်၏ ထူးခြားချက်များ
လူမျိုးအပေါင်းမှလူတို့အတွက် သတင်းကောင်းစာအုပ်ငယ်တွင် ဘာသာစကား ၉၂ မျိုးဖြင့် တစ်မျက်နှာစာ သတင်းတရားပါရှိသည်။ သတင်းတရားကို လူတစ်ဦးပြောပြနေဟန်ဖြင့် ရေးသားထား၏။ ထို့ကြောင့် အိမ်ရှင်သည် သတင်းတရားကို ဖတ်ကြည့်လိုက်သောအခါ သူ့ကို သင်စကားပြောဆိုနေသည့်အလားဖြစ်သည်။ အဆိုပါစာအုပ်ငယ်သည် ထူးခြားသော အခြားနည်းများဖြင့်လည်း အထောက်အကူပြုသည်–
အတွင်းမျက်နှာဖုံးတွင် ကမ္ဘာ့မြေပုံကို ဖော်ပြထားသည်။ အိမ်ရှင်နှင့် ခင်မင်ရင်းနှီးလာစေရန် ဤမြေပုံကိုအသုံးပြုပါ။ မိမိနေထိုင်သည့်နိုင်ငံကို သင်ထောက်ပြနိုင်သည်၊ ထို့နောက် သူ အဘယ်ကလာသည်ကို သင်သိလိုကြောင်း အရိပ်အမြွက်ပြနိုင်ပေသည်။ ဤနည်းဖြင့် သူ့အကြောင်းကိုသိလာနိုင်ပြီး ရင်းရင်းနှီးနှီး၊ သက်သောင့်သက်သာဆက်ဆံလာနိုင်ပေမည်။
စာအုပ်ငယ်၏နိဒါန်းတွင် ကျွန်ုပ်တို့နားမလည်သည့် ဘာသာစကားပြောသူတို့ကို ကျွန်ုပ်တို့ထိထိရောက်ရောက်ကူညီပေးနိုင်ရန် လုပ်ဆောင်သင့်သည့် အချက်အတော်များများကို ဖော်ပြထားသည်။ ကျေးဇူးပြု၍ ထိုအချက်များကို အသေအချာဖတ်ပြီး အသိစိတ်ရှိရှိ အသုံးပြုပါလေ။
မာတိကာတွင် ဘာသာစကားများကိုသာမက ယင်းတို့၏သင်္ကေတကိုပါ ဖော်ပြပေးထားသည်။ ယင်းက ဝေစာများနှင့် ဘာသာစကားအမျိုးမျိုးဖြင့် ပုံနှိပ်ထုတ်ဝေထားသည့် အခြားစာပေများ၏ ဘာသာစကားသင်္ကေတများကို ခွဲခြားသိနိုင်စေသည်။ ဤနည်းဖြင့် စာပေတစ်ခုသည် အဘယ်ဘာသာစကားဖြင့်ဖြစ်သည်ကို အလွယ်တကူ သိရှိနိုင်ပါသည်။
[ရုပ်ပုံ]
သင်သည် ဤစာအုပ်ငယ်ကို ခရစ်ယာန်ဓမ္မအမှုတွင် အသုံးပြုနေပါသလော
[စာမျက်နှာ ၂၃ ပါ ရုပ်ပုံများ]
ကျွန်ုပ်တို့၏ ကျမ်းစာစာပေများကို ဘာသာစကားပေါင်း ၄၀၀ ကျော်ဖြင့် ယခုရရှိနိုင်
ဂါနာ
လပ်လန်း (ဆွီဒင်)
ဖိလစ်ပိုင်
[စာမျက်နှာ ၂၄၊ ၂၅ ပါ ရုပ်ပုံများ]
ဘုရားသခင့်နိုင်ငံတော်ကြေညာသူ သာ၍လိုအပ်သောဒေသတွင် သင်အမှုဆောင်နိုင်ပါမည်လော
အီကွေဒေါ
ဒိုမီနီကန်သမ္မတနိုင်ငံ