ကသောင်းကနင်းနိုင်သော ဤကာလတွင် ဘုရားသခင်နှင့်အတူ သွားလာလော့
ကသောင်းကနင်းနိုင်သော ဤကာလတွင် ဘုရားသခင်နှင့်အတူ သွားလာလော့
“ဧနောက်သည် ဘုရားသခင်နှင့်အတူ သွားလာ၏။ နောက်တစ်ဖန် သူသည်မရှိ။ အကြောင်းမူကား ဘုရားသခင် သိမ်းယူတော်မူသောကြောင့်တည်း။”—ကမ္ဘာဦး ၅:၂၄။
၁။ ကျွန်ုပ်တို့ခေတ်တွင် ကပ်ဆိုက်နေသည့် အသွင်အချို့ကား အဘယ်နည်း။
ကသောင်းကနင်းနိုင်သောကာလ။ ၁၉၁၄ ခုနှစ်တွင် မေရှိယနိုင်ငံတော် တည်ထောင်ပြီးကတည်းက လူတို့တွေ့ကြုံခဲ့ရသည့် ဆူပူသောင်းကျန်းသောနှစ်များကို အဆိုပါစကားများက ဖော်ညွှန်းလိုက်၏။ လူတို့သည် ထိုအချိန်ကတည်းက “နောက်ဆုံးသောနေ့ရက်များ” တွင်အသက်ရှင်နေကြရ၏။ အစာခေါင်းပါးခြင်း၊ ကာလနာများပြားခြင်း၊ ငလျင်လှုပ်ခြင်းနှင့် စစ်ဖြစ်ခြင်းအစရှိသော ကပ်ဘေးများသည် ဤမျှလောက် တစ်ခါမှမဆိုးဝါးခဲ့ဖူးချေ။ (၂ တိမောသေ ၃:၁၊ သမ; ဗျာ. ၆:၁-၈) ယေဟောဝါကို ဝတ်ပြုသူအားလုံးလည်း ခေတ်ကာလ၏ဆင်းရဲခက်ခဲမှုများနှင့် မရေရာ မသေချာမှုများကို အနည်းနှင့်အများ ကြုံတွေ့နေကြရ၏။ ၎င်းတို့တွင် စီးပွားရေးကျပ်တည်းမှု၊ နိုင်ငံရေးမငြိမ်သက်မှု၊ ရာဇဝတ်မှုနှင့် ဖျားနာမှုတို့ပါဝင်ပြီး ယင်းတို့က ဘဝကိုဆင်းရဲခက်ခဲစေသည်။
၂။ ယေဟောဝါကျေးကျွန်များသည် အဘယ်စိန်ခေါ်ချက်များကို ရင်ဆိုင်နေရကြသနည်း။
၂ ထို့ပြင် “ဘုရားသခင်၏ပညတ်တော်တို့ကိုကျင့်၍ ယေရှု၏သက်သေခံတော်မူချက်ကို စွဲလမ်းသော” ယေဟောဝါကျေးကျွန်များကို စာတန်တိုက်ခိုက်နေရာ သူတို့သည် ပြင်းထန်သောညှဉ်းပန်းနှိပ်စက်မှု တစ်မျိုးပြီးတစ်မျိုး ခံနေရရှာသည်။ (ဗျာ. ၁၂:၁၇) ကျွန်ုပ်တို့သည် ညှဉ်းပန်းနှိပ်စက်မှုကို တိုက်ရိုက်မခံရသော်လည်း ခရစ်ယာန်စစ်အားလုံးသည် စာတန်နှင့် လောကစိတ်ဓာတ်ကို တွန်းလှန်နေရကြ၏။ (ဧဖက် ၆:၁၂) အလုပ်ခွင်တွင်၊ ကျောင်းတွင်၊ အခြားမည်သည့်နေရာတွင်မဆို စစ်မှန်သောဝတ်ပြုရေးကို စိတ်မဝင်စားသူများနှင့် ကျွန်ုပ်တို့ ပေါင်းသင်းနေရကြ၍ ထိုစိတ်ဓာတ် လွှမ်းမိုးမခံဖို့ အမြဲသတိရှိနေရမည်။
လောကသားများနှင့်မဟုတ်ဘဲ ဘုရားသခင်နှင့်အတူ သွားလာလော့
၃၊ ၄။ ခရစ်ယာန်များသည် လောကသားများနှင့် မည်သို့ကွာခြားသနည်း။
၃ ပထမရာစုမှ ခရစ်ယာန်များသည်လည်း ဤလောကစိတ်ဓာတ်ကို တွန်းလှန်ခဲ့ကြ၍ ခရစ်ယာန်အသင်းတော်ပြင်ပရှိသူများနှင့် လုံးဝခြားနားခဲ့၏။ “ထိုကြောင့် ကြွင်းသောတစ်ပါးအမျိုးသားတို့သည် လျှပ်ပေါ်သောစိတ်နှင့်ကျင့်သည်နည်းတူ၊ သင်တို့သည် နောက်တစ်ဖန် မကျင့်မည်အကြောင်း သခင်ဘုရားအခွင့်နှင့် ငါမှာလိုက်၏။ ထိုသူတို့သည် ဉာဏ်အလင်းကွယ်သည်ဖြစ်၍ စိတ်နှလုံးမိုက်မဲသောအားဖြင့် အလျှင်းမသိသောကြောင့် ဘုရားသခင်၏အသက်နှင့် ကွာရှင်းလျက်ရှိကြ၏။ ဧဖက် ၄:၁၇-၁၉။
ထိုသူတို့သည် ရှက်ကြောက်ခြင်းမရှိ၊ တပ်မက်ခြင်းအလွန်ပြင်းသည်နှင့် ညစ်ညူးသောအကျင့်အမျိုးမျိုးကို ကြိုးစား၍ကျင့်လိုသောငှာ မိမိတို့ကို ကိလေသာလက်သို့ အပ်လိုက်ကြ၏” ဟူ၍ ပေါလုရေးသားပြီး ကွာခြားချက်ကို ဖော်ပြသည်။—၄ ပေါလုခေတ်နှင့်ကျွန်ုပ်တို့ခေတ်တွင်ပါ ဤလောကသည် ဝိညာဉ်ရေးအလင်းကွယ်ပျောက်နေပြီး ကိုယ်ကျင့်တရား ပျက်ပြားနေကြောင်း အဆိုပါစကားများက ရှင်းလင်းပြတ်သားစွာ ဖော်ပြလိုက်ခြင်းပင်။ ပထမရာစုမှာကဲ့သို့ ယနေ့ ခရစ်ယာန်များသည်လည်း လောကသားများကဲ့သို့ မကျင့်ကြချေ။ ယင်းအစား၊ ဘုရားသခင်နှင့်အတူ သွားလာရသည့် အခွင့်ထူးကြီးကို သူတို့ရရှိထားကြသည်။ သို့သော် နိမ့်ကျပြီး မစုံလင်သူများ ယေဟောဝါနှင့်အတူ သွားလာ၏ဟုဆိုခြင်းသည် ယုတ္တိတန်သလောဟု လူအချို့ သိလိုကြပေမည်။ သမ္မာကျမ်းစာကမူ သွားလာနိုင်သည်ဟုဆို၏။ ယေဟောဝါကလည်း ထိုသို့သွားလာစေလို၏။ ထို့ကြောင့် ပရောဖက်မိက္ခာက ‘တရားသဖြင့်ပြုခြင်း၊ ကရုဏာကိုနှစ်သက်ခြင်း၊ သင်၏ဘုရားသခင်နှင့်အတူ စိတ်နှိမ့်ချစွာ သွားလာခြင်းမှတစ်ပါး အဘယ်အရာကို ထာဝရဘုရားသခင် တောင်းတော်မူသနည်း’ ဟူ၍ ဘီ.စီ.အီး. ရှစ်ရာစုတွင် ရေးသားခဲ့သည်။—မိက္ခာ ၆:၈။
ဘုရားသခင်နှင့်အတူ မည်သို့နှင့် အဘယ်ကြောင့် သွားလာရ
၅။ မစုံလင်သူတစ်ဦးသည် ဘုရားသခင်နှင့်အတူ မည်သို့သွားလာနိုင်သနည်း။
၅ ကျွန်ုပ်တို့သည် အတိုင်းအဆမဲ့တန်ခိုးရှင်၊ မျက်မြင်မရ ဘုရားသခင်နှင့်အတူ မည်သို့သွားလာနိုင်သနည်း။ လူလူချင်း သွားလာပုံနှင့် မတူသည်မှာ ထင်ရှား၏။ သမ္မာကျမ်းစာအရ “သွားလာခြင်း” ဟူသည် “ဘဝလမ်းစဉ်အတိုင်း လျှောက်လှမ်းခြင်း” ဟုအဓိပ္ပာယ်ရနိုင်သည်။ * ဘုရားသခင်နှင့်အတူ သွားလာသူသည် ဘုရားသခင် ပြဋ္ဌာန်းထားသော၊ ကိုယ်တော်၏စိတ်တော်နှင့်တွေ့သော ဘဝလမ်းစဉ်အတိုင်း လျှောက်လှမ်းခြင်းဖြစ်သည်ဟု ကျွန်ုပ်တို့ နားလည်ရပါသည်။ ဤလမ်းစဉ်အတိုင်း လျှောက်လှမ်းခြင်းသည် ကျွန်ုပ်တို့ကို လောကသားများနှင့် ကွဲပြားခြားနားစေ၏။ ယင်းသည် ခရစ်ယာန်တစ်ဦး ရွေးချယ်အပ်သည့် တစ်ခုတည်းသောလမ်းစဉ်ဖြစ်၏။ အဘယ်ကြောင့်နည်း။ အကြောင်းများစွာရှိ၍ဖြစ်သည်။
၆၊ ၇။ ဘုရားသခင်နှင့်အတူ သွားလာခြင်းသည် အဘယ်ကြောင့် အကောင်းဆုံးလမ်းစဉ်ဖြစ်သနည်း။
၆ ဦးဆုံးအနေနှင့် ယေဟောဝါသည် ကျွန်ုပ်တို့၏ဖန်ဆင်းရှင်၊ အသက်၏ဇာစ်မြစ်ဖြစ်သည့်အပြင် ကျွန်ုပ်တို့ အသက်ဆက်နိုင်ရန် လိုအပ်ရာမှန်သမျှ ထောက်ပံ့ပေးရှင်လည်းဖြစ်တော်မူ၏။ (ဗျာ. ၄:၁၁) ထို့ကြောင့် ကိုယ်တော်တစ်ပါးတည်းသာ ကျွန်ုပ်တို့ မည်သို့လျှောက်လှမ်းရမည်ကို မိန့်ဆိုပိုင်ခွင့်ရှိ၏။ ထို့ပြင် ဘုရားသခင်နှင့်လျှောက်လှမ်းခြင်းသည် အကောင်းဆုံးလမ်းစဉ်ဖြစ်၏။ ယေဟောဝါသည် မိမိနှင့်လျှောက်လှမ်းသူများကို အပြစ်လွှတ်ပြီး စိတ်ချရသော ထာဝရအသက်မျှော်လင့်ချက်ကို ပေးသနားတော်မူသည်။ ကျွန်ုပ်တို့၏မေတ္တာရှင် ကောင်းကင်ခမည်းတော်သည် မိမိနှင့်အတူ လျှောက်လှမ်းသူများအား ပညာရှိအကြံပြုချက်ကိုလည်း ပေးသနားထား၏၊ သူတို့သည် မစုံလင်သူများဖြစ်ပြီး စာတန်အုပ်ချုပ်သော ဤလောကတွင် နေထိုင်ကြရသော်လည်း ယခုဘဝကို ယင်းအကြံပြုချက်က အောင်မြင်စေနိုင်၏။ (ယောဟန် ၃:၁၆; ၂ တိမောသေ ၃:၁၅၊ ၁၆; ၁ ယောဟန် ၁:၈; ၂:၂၅; ၅:၁၉) ဘုရားသခင်နှင့်အတူ သွားလာရသည့်အကြောင်း နောက်တစ်ခုမှာ ထိုသို့စိတ်လိုကိုယ်လျောက် ကျွန်ုပ်တို့ လျှောက်လှမ်းကြလျှင် အသင်းတော်တွင် ငြိမ်သက်မှုနှင့် စည်းလုံးမှုရှိစေ၍ဖြစ်သည်။—ကောလောသဲ ၃:၁၅၊ ၁၆။
၇ နောက်ဆုံးနှင့် အရေးကြီးဆုံးမှာ ဘုရားသခင်နှင့်အတူ လျှောက်လှမ်းသောအခါ ဧဒင်ဥယျာဉ်တွင်ဖြစ်ပေါ်ခဲ့သည့် ပိုင်သအုပ်စိုးမှုနှင့်ပတ်သက်၍ အလွန်အရေးကြီးကိစ္စတွင် ကျွန်ုပ်တို့ မည်သည့်ဘက်၌ရှိကြောင်း ဖော်ပြ၏။ (ကမ္ဘာဦး ၃:၁-၆) ယေဟောဝါဘက်တွင် အပြည့်အဝရှိကြောင်း ကျွန်ုပ်တို့၏ဘဝလမ်းစဉ်က ဖော်ပြပြီး ကိုယ်တော်တစ်ပါးတည်းသာလျှင် ပိုင်သအုပ်စိုးရှင်ဖြစ်ကြောင်း ကျွန်ုပ်တို့ သတ္တိရှိရှိ ကြွေးကြော်ကြသည်။ (ဆာလံ ၈၃:၁၈) သို့ဖြင့် ဘုရားသခင့်နာမတော်ကို ရိုသေလေးမြတ်ပြီး ကိုယ်တော်၏အလိုတော် ပြည့်စုံပါစေဟူသော ဆုတောင်းချက်နှင့်အညီ ကျွန်ုပ်တို့ လုပ်ဆောင်ရာကျမည်။ (မဿဲ ၆:၉၊ ၁၀) ဘုရားသခင်နှင့်အတူ သွားလာလိုသူများသည် တကယ့်ကို ပညာရှိလိုက်လေခြင်း။ ယေဟောဝါ “တစ်ဆူတည်းသာလျှင် ပညာနှင့်ပြည့်စုံတော်မူ” သောကြောင့် မိမိတို့ လမ်းမှန်ပေါ် သွားလာနေသည်ကို စိတ်ချနိုင်ကြ၏။ ကိုယ်တော်သည် ဘယ်တော့မျှ မမှားနိုင်ချေ။—ရောမ ၁၆:၂၇။
၈။ ဧနောက်နှင့်နောဧတို့ခေတ်သည် ကျွန်ုပ်တို့ခေတ်နှင့် မည်သို့ဆင်တူသနည်း။
၈ သို့သော် ဤမျှကသောင်းကနင်းနိုင်ပြီး ယေဟောဝါအား လူအများစု မကိုးကွယ်ကြသည့်အချိန်တွင် ခရစ်ယာန်ပီသစွာ မည်သို့နေထိုင်နိုင်မည်နည်း။ အလွန်ဆင်းရဲခက်ခဲသည့်ကာလတွင် သမာဓိစောင့်ထိန်းခဲ့ကြသည့် ရှေးသစ္စာရှိသူများ၏ဘဝကို စဉ်းစားသုံးသပ်ကြည့်လျှင် အဖြေရနိုင်ပါသည်။ ထိုသူတို့ထဲမှ နှစ်ဦးမှာ ဧနောက်နှင့် နောဧတို့ဖြစ်သည်။ သူတို့နှစ်ဦးစလုံးသည် ကျွန်ုပ်တို့ခေတ်နှင့် အလွန်ဆင်တူသည့်ခေတ်တွင် အသက်ရှင်ခဲ့ကြ၏။
ဆိုးသွမ်းမိုက်မဲမှုကို နေရာအနှံ့တွေ့ရ၏။ နောဧခေတ်တွင် မြေကြီးသည် အကြမ်းဖက်မှုနှင့် ကိုယ်ကျင့်တရားပျက်ပြားမှုတို့ဖြင့် ပြည့်နှက်ခဲ့သည်။ သို့တိုင် ဧနောက်နှင့် နောဧတို့သည် သူတို့ခေတ်၏ လောက စိတ်ဓာတ်ကို တွန်းလှန်ပြီး ယေဟောဝါနှင့်အတူ သွားလာခဲ့ကြသည်။ မည်သို့ တွန်းလှန်နိုင်ခဲ့ကြသနည်း။ အဆိုပါမေးခွန်း၏ အဖြေကိုရရှိရန် ဤဆောင်းပါးတွင် ဧနောက်၏ပုံသက်သေကို ဆွေးနွေးပြီး နောက်ဆောင်းပါးတွင် နောဧအကြောင်းကို သုံးသပ်ကြမည်။ကသောင်းကနင်းနိုင်သောကာလတွင် ဘုရားသခင်နှင့်အတူ ဧနောက်သွားလာခဲ့
၉။ ဧနောက်နှင့်ပတ်သက်၍ အဘယ်အချက်အလက်ရှိသနည်း။
၉ ဘုရားသခင်နှင့်အတူ သွားလာသူအဖြစ် သမ္မာကျမ်းစာတွင် ပထမဆုံးဖော်ပြခံရသူမှာ ဧနောက်ဖြစ်သည်။ “မသုရှလဖွားမြင်သောနောက် ဧနောက်သည် . . . ဘုရားသခင်နှင့်အတူသွားလာ” ၏ဟူ၍ သမ္မာကျမ်းစာကဆိုသည်။ (ကမ္ဘာဦး ၅:၂၂) ထို့နောက် ဧနောက်၏သက်တမ်းကိုဖော်ပြ၏။ သူ၏သက်တမ်းသည် ကျွန်ုပ်တို့၏သက်တမ်းထက် ပိုရှည်သော်လည်း ထိုခေတ်အတွက် တိုသည်။ သူ၏အသက်ကိုဖော်ပြပြီးနောက် မှတ်တမ်းက “ဧနောက်သည် ဘုရားသခင်နှင့်အတူသွားလာ၏။ နောက်တစ်ဖန် သူသည်မရှိ။ အကြောင်းမူကား ဘုရားသခင် သိမ်းယူတော်မူသောကြောင့်တည်း” ဟုဆို၏။ (ကမ္ဘာဦး ၅:၂၄) အတိုက်အခံပြုသူများက ဧနောက်ကို မသတ်မီ သူ့ကို ယေဟောဝါ သိမ်းယူသွားသည်မှာ ထင်ရှား၏။ (ဟေဗြဲ ၁၁:၅၊ ၁၃) ဧနောက်အကြောင်းကို အဆိုပါတိုတုတ်သောကျမ်းပိုဒ်များအပြင် သမ္မာကျမ်းစာတွင် အနည်းအကျဉ်းဖော်ပြထားရာများရှိသည်။ မည်သို့ပင်ဆိုစေ၊ ဧနောက်ခေတ်တွင် ကသောင်းကနင်းနိုင်ခဲ့ကြောင်း ကျွန်ုပ်တို့တွင်ရှိသည့် အချက်အလက်နှင့် တခြားကိုးကားချက်များမှ သိရှိရ၏။
၁၀၊ ၁၁။ (က) အာဒံနှင့်ဧဝတို့ ပုန်ကန်ပြီးနောက် ဖောက်ပြန်မှုသည် မည်သို့ပျံ့နှံ့သွားသနည်း။ (ခ) ဧနောက်သည် အဘယ်ပရောဖက်ပြုချက်ကို ဟောခဲ့သနည်း၊ လူတို့ မည်သို့တုံ့ပြန်ခဲ့ကြသနည်း။
၁၀ ဥပမာ၊ အာဒံအပြစ်ပြုပြီးနောက် လူ့မျိုးနွယ်တွင် ကိုယ်ကျင့်တရားပျက်ပြားမှု မည်သို့တစ်မုဟုတ်ချင်း ပျံ့နှံ့သွားသည်ကို သုံးသပ်ကြည့်ပါ။ အာဒံ၏သားဦး ကာဣနသည် သူ၏ညီအာဗေလကို သတ်ခဲ့ချိန်တွင် ပထမဆုံးလူသတ်သမားဖြစ်လာ၏။ (ကမ္ဘာဦး ၄:၈-၁၀) အာဗေလသည် အသေဆိုးနှင့်သေခဲ့ရပြီးနောက် အာဒံနှင့်ဧဝတို့သည် ရှေသအမည်ရှိ သားနောက်တစ်ဦးကို ဖွားမြင်ခဲ့သည်။ သူနှင့်ပတ်သက်၍ ကျွန်ုပ်တို့ဖတ်ရသည်မှာ “ရှေသသည်လည်း သားကိုရ၍ ဧနုတ်ဟူသောအမည်ဖြင့်မှည့်လေ၏။ ထိုကာလ၌ ယေဟောဝါ၏နာမတော်ကို ခေါ်စပြုကြလေသည်။” (ကမ္ဘာဦး ၄:၂၅၊ ၂၆၊ ကဘ) ဝမ်းနည်းစရာမှာ ထိုသူတို့သည် အယူဖောက်ပြန်သောနည်းဖြင့် “ယေဟောဝါ၏နာမတော်ကိုခေါ်” ကြခြင်းဖြစ်သည်။ * ဧနုတ်မွေးပြီး နှစ်များစွာအကြာတွင် ကာဣနမှဆင်းသက်လာသူ လာမက်သည် သူ၏ဇနီးနှစ်ဦးအတွက် သီချင်းတစ်ပုဒ်ရေးစပ်စဉ်က သူ့အား နာကျင်စေခဲ့သူ လူငယ်တစ်ဦးကို သတ်ခဲ့ကြောင်း ထည့်ရေးခဲ့သည်။ ထို့နောက် “ကာဣနသည် ခုနစ်ဆသောလက်စားချေခွင့်ကိုရလျှင် လာမက်သည် ခုနစ်ဆယ့်ခုနစ်ဆကိုပင်ရလိမ့်မည်” ဟူ၍ ရေးဖွဲ့ခဲ့သည်။—ကမ္ဘာဦး ၄:၁၀၊ ၁၉၊ ၂၃၊ ၂၄၊ သမ။
၁၁ ဧဒင်ဥယျာဉ်တွင် စာတန် စတင်လိုက်သော ဖောက်ပြန်မှုကြောင့် အာဒံ၏သားစဉ်မြေးဆက်များကြားတွင် တစ်မုဟုတ်ချင်း ဆိုးသွမ်းမှု ပျံ့နှံ့သွားခဲ့ကြောင်း အဆိုပါအကျဉ်းချုပ်အချက်အလက်များက ဖော်ပြ၏။ ထိုသို့သောလောကတွင် ဧနောက်သည် ယေဟောဝါ၏ပရောဖက်တစ်ဦးဖြစ်ခဲ့ပြီး သူဟောပြောခဲ့သော ပြင်းထန်သည့်စကားလုံးများသည် ယနေ့ထိ သက်ဆိုင်နေဆဲရှိ၏။ ဧနောက်က ‘ထာဝရဘုရားသခင်သည် ခပ်သိမ်းသောသူတို့ကို တရားစီရင်တော်မူ၍ မတရားသောသူတို့သည် မတရားသဖြင့်ပြုသော မကောင်းမှုရှိသမျှတို့၏အပြစ်ကိုလည်းကောင်း၊ မတရားသောလူဆိုးတို့သည် ဘုရားသခင်ကိုပြစ်မှား၍ပြောသော ကြမ်းတမ်းသောစကားရှိသမျှတို့၏အပြစ်ကိုလည်းကောင်း ဖော်ပြခြင်းငှာ အတိုင်းမသိများစွာသော မိမိသန့်ရှင်းသူတို့နှင့်တကွ ကြွလာတော်မူလိမ့်မည်’ ဟုပရောဖက်ပြု၍ဟောခဲ့ကြောင်း ယုဒက ဖော်ပြ၏။ (ယုဒ ၁၄၊ ၁၅) အဆိုပါစကားများသည် အာမဂေဒုန်၌ အပြီးသတ်ပြည့်စုံလိမ့်မည်။ (ဗျာ. ၁၆:၁၄၊ ၁၅) သို့တိုင် ဧနောက်ခေတ်၌ပင် ထိုပရောဖက်ပြုစကားများကို ကြားလိုက်၍ စိတ်အနှောင့်အယှက်ဖြစ်ခဲ့ကြသည့် “မတရားသောလူဆိုး” များစွာရှိမည်မှာ သေချာသည်။ ဧနောက်ကို သူတို့မသတ်မီ ယေဟောဝါ သိမ်းယူခဲ့ခြင်းသည် အမှန်ပင် မေတ္တာရှိပေသည်။
ဘုရားသခင်နှင့်အတူ ဧနောက်သွားလာနိုင်ရန် အဘယ်အကူအညီရရှိခဲ့သနည်း
၁၂။ ဧနောက်သည် သူ၏တစ်ခေတ်တည်းသားများနှင့် မည်သို့ကွာခြားသနည်း။
၁၂ ဧဒင်ဥယျာဉ်တွင် အာဒံနှင့်ဧဝတို့သည် စာတန်၏စကားကို နားထောင်ပြီး ယေဟောဝါအား ပုန်ကန်ခဲ့ကြသည်။ (ကမ္ဘာဦး ၃:၁-၆) သူတို့၏သား အာဗေလသည် သူတို့နှင့်မတူသည့်လမ်းစဉ်ကို လိုက်လျှောက်ခဲ့ရာ သူ့ကို ယေဟောဝါ နှစ်သက်အားရတော်မူခဲ့၏။ (ကမ္ဘာဦး ၄:၃၊ ၄) ဝမ်းနည်းစရာမှာ အာဒံ၏သားစဉ်မြေးဆက်အများစုသည် အာဗေလနှင့်မတူကြချေ။ သို့သော် နှစ်ပေါင်းများစွာအကြာတွင် သူနှင့်တူသည့် ဧနောက်ကို ဖွားမြင်ခဲ့သည်။ ဧနောက်နှင့် အာဒံ၏တခြားမျိုးဆက်များ မည်သို့ကွာခြားသနည်း။ တမန်တော်ပေါလုက “ဧနောက်သည် ယုံကြည်ခြင်းအားဖြင့် သေခြင်းနှင့်လွတ်၍ ဘဝပြောင်းရ၏။ ဘုရားသခင်သည် သူ့ကို ဘဝပြောင်းစေတော်မူသောကြောင့် သူသည် နောက်တစ်ဖန်မပေါ်မရှိ။ သူသည် ဘဝမပြောင်းမီ ဘုရားသခင်၏စိတ်တော်နှင့်တွေ့သောသူဖြစ်သည်ဟု သက်သေခံခြင်းကိုရလေ၏” ဟုရေးသားခဲ့ရာ ထိုမေးခွန်းကို ဖြေဆိုပေးခဲ့သည်။ (ဟေဗြဲ ၁၁:၅) ဧနောက်သည် ယုံကြည်ခြင်းတွင် စံပြဖြစ်ခဲ့ကြသော ‘အတိုင်းမသိများပြားသည့် [ခရစ်ယာန်ခေတ်မတိုင်မီက] သက်သေခံ’ များထဲမှ တစ်ဦးဖြစ်ခဲ့သည်။ (ဟေဗြဲ ၁၂:၁) ယနေ့ ကျွန်ုပ်တို့အများစု၏သက်တမ်းထက် သုံးဆပိုများသည့် အသက် ၃၀၀ ကျော်အသက်ရှင်ခဲ့သော ဧနောက်သည် သူ၏သက်တမ်းတစ်လျှောက်တွင် အမူအကျင့်ကောင်းကို ထိန်းသိမ်းထားနိုင်ခြင်းမှာ ယုံကြည်ခြင်းကြောင့်ဖြစ်၏။
၁၃။ ဧနောက်တွင် အဘယ်ယုံကြည်ချက်မျိုးရှိသနည်း။
၁၃ “ယုံကြည်ခြင်းသည် မျှော်လင့်ရာများ၌ စိတ်ချခြင်း၊ မျက်ကွယ်ရာများကို မျက်မှောက်ပြုခြင်းဖြစ်၏” ဟုရေး၍ ဧနောက်နှင့် တခြားသက်သေခံများ၏ ယုံကြည်ခြင်းကို ပေါလုဖော်ပြခဲ့သည်။ (ဟေဗြဲ ၁၁:၁၊ သမ) မှန်၏၊ ယုံကြည်ခြင်းသည် ကျွန်ုပ်တို့မျှော်လင့်ထားရာများ အမှန်တကယ်ဖြစ်လာမည်ဟု စိတ်ချစွာ စောင့်မျှော်ခြင်းဖြစ်သည်။ ကျွန်ုပ်တို့ဘဝတွင် အရေးကြီးဆုံးဟု ရှုမြင်သည့်အရာကို အကျိုးသက်ရောက်သည့်အထိ ပြင်းပြစွာ မျှော်လင့်နေခြင်းဖြစ်သည်။ ထိုသို့သောယုံကြည်ခြင်းက ဧနောက်ကို ဘုရားသခင်နှင့်အတူ သွားလာစေခဲ့သည်၊ သူ၏ဝန်ကျင်းရှိ လောကသားများမှာမူ ဘုရားသခင်နှင့်အတူ မသွားလာခဲ့ကြချေ။
၁၄။ ဧနောက်၏ယုံကြည်ခြင်းသည် အဘယ်တိကျမှန်ကန်သော အသိပညာအပေါ် အခြေပြုခဲ့သနည်း။
၁၄ စစ်မှန်သောယုံကြည်ခြင်းသည် တိကျမှန်ကန်သောအသိပညာအပေါ် အခြေပြု၏။ ဧနောက်တွင် အဘယ်အသိပညာရှိခဲ့သနည်း။ (ရောမ ၁၀:၁၄၊ ၁၇; ၁ တိမောသေ ၂:၄) ဧဒင်ဥယျာဉ်တွင် ဖြစ်ပျက်ခဲ့ရာများကို သူသိရှိမည်မှာ သေချာ၏။ ထို့ပြင် သူ၏လက်ထက်တွင် တည်ရှိနေသေးသော ဝင်ခွင့်မရတော့သည့် ဧဒင်ဥယျာဉ်တွင် အသက်တာသည် အဘယ်အခြေအနေမျိုးရှိခဲ့သည်ကိုလည်း သူကြားသိထားပေမည်။ (ကမ္ဘာဦး ၃:၂၃၊ ၂၄) ဘုရားသခင်သည် ကမ္ဘာမြေကို အာဒံ၏သားစဉ်မြေးဆက်များနှင့် ပြည့်စေလို၍ တစ်ကမ္ဘာလုံးကို မူလပရဒိသုကဲ့သို့ဖြစ်စေရန် ရည်ရွယ်တော်မူကြောင်းကိုလည်း သိရှိခဲ့သည်။ (ကမ္ဘာဦး ၁:၂၈) ၎င်းပြင် စာတန်၏ခေါင်းကိုကြိတ်ပြီး စာတန်၏လှည့်ဖြားမှုကြောင့် ဖြစ်ပေါ်လာသည့် ဆိုးကျိုးများကို ပယ်ဖျက်ပေးမည့် မျိုးနွယ်တော်ပေါ်ထွန်းလာမည်ဟူသော ယေဟောဝါ၏ကတိတော်ကိုလည်း ဧနောက် အမှန်စိတ်ဝင်စားခဲ့ပေမည်။ (ကမ္ဘာဦး ၃:၁၅) ဧနောက် ပရောဖက်ပြုခဲ့သောစကားများကပင် စာတန်၏မျိုးနွယ် ဖျက်ဆီးခံရမည်ဟု ကြိုဟောထား၏၊ ယင်းကို ယုဒကျမ်းတွင် မှတ်တမ်းတင်ထားသည်။ ဧနောက်တွင် ယုံကြည်ခြင်းရှိခဲ့ရာ သူသည် “ကိုယ်တော်ကို ကြိုးစား၍ရှာသောသူအား အကျိုးပေး” ရှင်ယေဟောဝါအား ကိုးကွယ်ခဲ့ခြင်းဖြစ်သည်။ (ဟေဗြဲ ၁၁:၆၊ သမ္မာ) ထို့ကြောင့် ကျွန်ုပ်တို့တွင်ရှိသည့် အသိပညာလောက် ဧနောက်တွင် မရှိခဲ့သော်လည်း သူ၏ယုံကြည်ခြင်းခိုင်ခံ့စေရန် သူ့မှာ အသိပညာအလုံအလောက်ရှိသည်။ သူသည် ဤသို့သောယုံကြည်ခြင်းမျိုးဖြင့် ကသောင်းကနင်းနိုင်သောကာလတွင် သမာဓိစောင့်ထိန်းနိုင်ခဲ့၏။
ဧနောက်၏ပုံသက်သေကို တုပလော့
၁၅၊ ၁၆။ ဧနောက်၏လမ်းစဉ်ကို ကျွန်ုပ်တို့ မည်သို့လိုက်လျှောက်နိုင်ကြသနည်း။
၁၅ ဧနောက်နည်းတူ ကျွန်ုပ်တို့သည် မျက်မှောက်ခေတ် ကသောင်းကနင်းနိုင်သောကာလတွင် ယေဟောဝါ၏အလိုတော်နှင့်တွေ့လိုကြလျှင် ဧနောက်၏ပုံသက်သေကို လိုက်လျှောက်သင့်သည်။ ယေဟောဝါနှင့် ကိုယ်တော်၏ရည်ရွယ်ချက်တို့နှင့်ပတ်သက်သည့် တိကျမှန်ကန်သော အသိပညာကို ဆည်းပူးပြီး စွဲမှတ်ထားဖို့လိုသည်။ သို့ရာတွင် ထို့ထက်မက ပြုလုပ်ဖို့လိုသေးသည်။ ကျွန်ုပ်တို့၏ဘဝလမ်းစဉ်ကို တိကျမှန်ကန်သောအသိပညာအား လမ်းညွှန်စေသင့်သည်။ (ဆာလံ ၁၁၉:၁၀၁; ၂ ပေတရု ၁:၁၉) ဘုရားသခင်စဉ်းစားတွေးခေါ်သကဲ့သို့ စဉ်းစားတွေးခေါ်ပြီး ကျွန်ုပ်တို့ပြုမူသမျှသည် ကိုယ်တော့်စိတ်တော်နှင့်တွေ့ဖို့လိုသည်။
၁၆ ဧနောက်ခေတ်တွင် ယေဟောဝါအား ဝတ်ပြုကိုးကွယ်သော တခြားသူများရှိမရှိ မှတ်တမ်းက မဖော်ပြသော်လည်း ဧနောက်သည် တစ်ဦးတည်း သို့မဟုတ် လူနည်းစုထဲတွင် တစ်ဦးဖြစ်နိုင်၏။ ကျွန်ုပ်တို့သည်လည်း ဤလောကတွင် လူနည်းစုသာဖြစ်ကြသော်လည်း ယင်းကြောင့် ကျွန်ုပ်တို့ စိတ်ပျက်အားလျော့မသွားပါ။ ကျွန်ုပ်တို့တစ်ဖက်၌ မည်သူပင်ရှိပါစေ၊ ကျွန်ုပ်တို့ဘက်တွင် ယေဟောဝါရှိပါလိမ့်မည်။ (ရောမ ၈:၃၁) ဘာသာတရားကင်းမဲ့သူများ မကြာမီ ဖျက်ဆီးခံရတော့မည်ကို ဧနောက် သတ္တိရှိရှိ သတိပေးခဲ့သည်။ ကျွန်ုပ်တို့သည်လည်း ကဲ့ရဲ့ပြောင်လှောင်မှု၊ ဆန့်ကျင်မှုနှင့် ညှဉ်းပန်းနှိပ်စက်မှုတို့ကြား ဘုရားသခင့်နိုင်ငံတော်သတင်းကောင်းကို သတ္တိရှိရှိ ဟောပြောနေကြပါသည်။ (မဿဲ ၂၄:၁၄) ဧနောက်သည် သူ၏တစ်ခေတ်တည်းသားများလောက် အသက်မရှည်ခဲ့ချေ။ သို့တိုင် သူသည် ထိုလောကမှအရာကို မမျှော်လင့်ဘဲ ထိုထက်သာ၍မြတ်သောအရာကို အာရုံစိုက်ခဲ့၏။ (ဟေဗြဲ ၁၁:၁၀၊ ၃၅) ကျွန်ုပ်တို့သည်လည်း ယေဟောဝါ၏ရည်ရွယ်ချက် ပြည့်စုံမည့်အချိန်ကို အာရုံစိုက်နေကြသည်။ ထို့ကြောင့် ဤလောကကို ကျွန်ုပ်တို့ အပြည့်အဝအသုံးမပြုကြချေ။ (၁ ကောရိန္သု ၇:၃၁) သို့ပြုမည့်အစား ကျွန်ုပ်တို့၏ခွန်အားနှင့် ဥစ္စာအင်ခွင်များကို ယေဟောဝါ၏လုပ်ငန်းတော်တွင် အသုံးပြုကြ၏။
၁၇။ ဧနောက်တွင် မရှိသည့် အဘယ်အသိပညာ ကျွန်ုပ်တို့တွင်ရှိသနည်း၊ သို့ဖြစ်၍ ကျွန်ုပ်တို့ အဘယ်အရာလုပ်ဆောင်သင့်သနည်း။
၁၇ ယေဟောဝါ ကတိထားရာ မျိုးနွယ်တော်သည် အချိန်တန်လျှင် ပေါ်ထွက်လာမည်ကို ဧနောက် ယုံကြည်စိတ်ချခဲ့သည်။ မျိုးနွယ်တော် ယေရှုခရစ် ပေါ်ထွက်လာပြီး ရွေးနုတ်ဖိုးပေးခဲ့သည့်အချိန်သည် ယခုဆိုလျှင် အနှစ် ၂၀၀၀ နီးပါးရှိခဲ့ပြီ၊ သို့ဖြင့် ဧနောက်ကဲ့သို့ ရှေးအချိန်က သစ္စာရှိခဲ့သောသက်သေများအပြင် ကျွန်ုပ်တို့လည်း ထာဝရအသက်ရခွင့်ရှိကြသည်။ ဘုရားသခင့်နိုင်ငံတော်ဘုရင်အဖြစ် ယခု စိုးစံလျက်ရှိသော ထိုမျိုးနွယ်တော်သည် စာတန်ကို ကောင်းကင်မှ ဤကမ္ဘာမြေကြီးပေါ်သို့ နှင်ချခဲ့ပြီဖြစ်သည့်အတွက် ကျွန်ုပ်တို့ဝန်းကျင်တွင် အလွန်ဆင်းရဲခက်ခဲနေရခြင်းဖြစ်သည်။ (ဗျာ. ၁၂:၁၂) မှန်၏၊ ဧနောက်တွင်ရှိခဲ့သည့် အသိပညာထက် ကျွန်ုပ်တို့တွင် ပိုရှိသည်။ သို့ဖြစ်၍ ဧနောက်နည်းတူ ခိုင်ခံ့သောယုံကြည်ခြင်းရှိကြပါစေ။ ဘုရားသခင်၏ကတိတော်များ ပြည့်စုံလာမည်ကို ကျွန်ုပ်တို့ယုံကြည်စိတ်ချသဖြင့် ကျွန်ုပ်တို့ပြုလေသမျှအပေါ် ဩဇာသက်ရောက်ပါစေ။ ကျွန်ုပ်တို့သည် ကသောင်းကနင်းနိုင်သောကာလတွင် အသက်ရှင်နေကြရသော်လည်း ဧနောက်ကဲ့သို့ ဘုရားသခင်နှင့်အတူ သွားလာကြပါစို့။
[အောက်ခြေမှတ်ချက်များ]
^ အပိုဒ်၊ 5 ၁၉၉၈၊ ဇန်နဝါရီ ၁၅ ရက်ထုတ် ကင်းမျှော်စင် စာမျက်နှာ ၁၃၊ ပိုဒ် ၂ ကိုရှု။
^ အပိုဒ်၊ 10 ဧနုတ်ခေတ်မတိုင်မီက ယေဟောဝါသည် အာဒံနှင့် စကားပြောဆိုခဲ့သည်။ အာဗေလသည် ယေဟောဝါနှစ်သက်သောယဇ်ကို ပူဇော်ခဲ့၏။ မနာလိုစိတ်ဖြင့် ကာဣန လူမသတ်မီက ဘုရားသခင်သည် သူနှင့်ပင် အဆက်အသွယ်ပြုခဲ့သည်။ ထို့ကြောင့် “ယေဟောဝါ၏နာမတော်ကိုခေါ်” စပြုကြခြင်းသည် စင်ကြယ်သောဝတ်ပြုရေးနှင့်အညီမဟုတ်ဘဲ အခြားတစ်နည်းဖြင့် ခေါ်ခြင်းဖြစ်ရမည်။
သင်မည်သို့ဖြေဆိုမည်နည်း
• ဘုရားသခင်နှင့်အတူ သွားလာခြင်းဟူသည် အဘယ်နည်း။
• ဘုရားသခင်နှင့်အတူ သွားလာခြင်းသည် အဘယ်ကြောင့် အကောင်းဆုံးလမ်းစဉ်ဖြစ်သနည်း။
• ဧနောက်သည် ကသောင်းကနင်းနိုင်သောကာလတွင် အသက်ရှင်နေထိုင်ရသည့်ကြား ဘုရားသခင်နှင့်အတူ မည်သို့သွားလာနိုင်ခဲ့သနည်း။
• ဧနောက်ကို ကျွန်ုပ်တို့ မည်သို့တုပနိုင်သနည်း။
[လေ့လာရန်မေးခွန်းများ]
[စာမျက်နှာ ၁၅ ပါ ရုပ်ပုံ]
ယုံကြည်ခြင်းအားဖြင့် “ဧနောက်သည် ဘုရားသခင်နှင့်အတူသွားလာ၏”
[စာမျက်နှာ ၁၇ ပါ ရုပ်ပုံ]
ယေဟောဝါ၏ကတိတော်များ အမှန်တကယ်ဖြစ်ပျက်လာမည်ကို ကျွန်ုပ်တို့ အခိုင်အမာယုံကြည်စိတ်ချ
[Picture Credit Lines on page 13]
ယာအစွန်မှ အမျိုးသမီး– FAO photo/B. Imevbore; collapsing building: San Hong R-C Picture Company