မဲန္နနိုက်များ၏ သမ္မာကျမ်းစာအမှန်တရားရှာဖွေမှု
မဲန္နနိုက်များ၏ သမ္မာကျမ်းစာအမှန်တရားရှာဖွေမှု
နှစ်ထောင်ပြည့်နှစ် နိုဝင်ဘာလ၏ တစ်ခုသောနံနက်ခင်းတွင် ဘိုလီးဗီးယားနိုင်ငံရှိ ယေဟောဝါသက်သေသာသနာပြုအချို့သည် သူတို့နေအိမ်ပြတင်းပေါက်မှ အပြင်သို့ကြည့်လိုက်ရာ ရိုးရိုးလေးဝတ်ဆင်ထားသည့် အမျိုးသား၊ အမျိုးသမီးအုပ်စုတစ်စု ဂိတ်ဝတွင် စိုးရွံ့စွာရပ်နေသည်ကို တွေ့လိုက်သည်။ ခရစ်ယာန်သာသနာပြုများက ဂိတ်ပေါက်ကိုဖွင့်ပေးလိုက်သည်နှင့် ဧည့်သည်များပြောသော ပထမဆုံးစကားမှာ “သမ္မာကျမ်းစာထဲက အမှန်တရားကို ကျွန်တော်တို့ရှာဖွေချင်တယ်” ဟူ၍ဖြစ်သည်။ ဧည့်သည်များမှာ မဲန္နနိုက်များဖြစ်သည်။ အမျိုးသားများက အပေခံအပေါ်ရုံအင်္ကျီများဝတ်ထားပြီး အမျိုးသမီးများမှာ အနက်ရောင်ရှေ့ဖုံး ခါးစည်းများ ဝတ်ဆင်ထားကြကာ သူတို့အချင်းချင်း ဂျာမန်စကားပြောကြသည်။ သူတို့၏မျက်စိထဲတွင် စိုးရိမ်ကြောင့်ကြမှု အရိပ်အယောင်များထင်ဟပ်လျက်ရှိကာ နောက်တွင် တစ်ဦးဦးလိုက်လာသည့်အလား ကျီးကန်းတောင်းမှောက် ဖြစ်နေကြသည်။ သို့သော်လည်း သူတို့ အိမ်ထဲဝင်လာကြစဉ် လူငယ်တစ်ဦးက “ဘုရားသခင့်နာမတော်သုံးတဲ့ လူတွေကို ကျွန်တော်သိချင်တယ်” ဟုပြောလိုက်သည်။
ဧည့်သည်များသည် အိမ်ထဲတွင် အဆာပြေအစားအသောက်အနည်းငယ် သုံးဆောင်ပြီးနောက် စိတ်အေးလက်အေးဖြစ်သွားကြသည်။ သူတို့သည် ဝေးလံသီခေါင်သော လယ်သမားအုပ်စုမှ လာကြခြင်းဖြစ်သည်။ ထိုတွင် သူတို့သည် ကင်းမျှော်စင်မဂ္ဂဇင်းများကို စာတိုက်မှတစ်ဆင့် ခြောက်နှစ်တိုင် ရရှိလာခဲ့ကြသည်။ “ကမ္ဘာပေါ်မှာ ပရဒိသုတစ်ခုဖြစ်လာမယ်လို့ ကျွန်တော်တို့ဖတ်ရတယ်။ အဲဒါမှန်သလား” ဟု သူတို့မေးကြသည်။ သက်သေခံများက ကျမ်းစာဖြင့် အဖြေပေးကြသည်။ (ဟေရှာယ ၁၁:၉; လုကာ ၂၃:၄၃; ၂ ပေတရု ၃:၇၊ ၁၃; ဗျာ. ၂၁:၃၊ ၄) “တွေ့တယ်မဟုတ်လား၊ ကမ္ဘာပေါ်မှာ ပရဒိသုတစ်ခုဖြစ်လာမယ်ဆိုတာ တကယ်မှန်တယ်” ဟု လယ်သမားတစ်ဦးက အခြားသူများအားပြောသည်။ အခြားသူများကလည်း “ငါတို့တော့အမှန်တရားကို တွေ့ပြီထင်တယ်” ဟူ၍ပြောဆိုနေကြသည်။
မဲန္နနိုက်များကား မည်သူများနည်း။ သူတို့အဘယ်အရာကို ယုံကြည်ကြသနည်း။ ဤမေးခွန်းများကို ဖြေဆိုရန် ၁၆ ရာစုသို့ ကျွန်ုပ်တို့ပြန်သွားရမည်။
မဲန္နနိုက်များကား မည်သူများနည်း
ခရစ်နှစ် ၁၅၀၀ ပြည့်လွန်နှစ်များတွင် ဥရောပအများသုံးဘာသာစကားများနှင့် သမ္မာကျမ်းစာဘာသာပြန်ခြင်း၊ ပုံနှိပ်ခြင်းများ တစ်ဟုန်ထိုးတိုးတက်လာခြင်းကြောင့် ကျမ်းစာလေ့လာခြင်းအပေါ် စိတ်ဝင်စားမှုတိုးပွားလာကြသည်။ မာတင် လူသာနှင့် အခြားပြုပြင်ပြောင်းလဲရေးသမားများသည် ကက်သလစ်ချာ့ခ်ျ၏ သွန်သင်ချက်အတော်များများကို ငြင်းပယ်ခဲ့ကြသည်။ သို့တိုင် အသစ်ဖွဲ့စည်းထားသော ပရိုတက်စတင့်ချာ့ခ်ျသည် ကျမ်းစာနှင့်မညီသော အကျင့်ဓလေ့များစွာကိုလည်း စွဲကိုင်ထားဆဲဖြစ်သည်။ သာဓကအနေနှင့် မွေးကင်းစကလေးကို ချာ့ခ်ျအသင်းသားတစ်ဦးအဖြစ် နှစ်ခြင်းပေးရန် လူအများစုကမျှော်လင့်ကြသည်။ သို့သော် ကျမ်းစာအမှန်တရားရှာဖွေသူအချို့မူ လူတစ်ဦးသည် နှစ်ခြင်းမခံမီ အသိပညာနှင့်ယှဉ်သောဆုံးဖြတ်ချက်ချခြင်းဖြင့်သာ ခရစ်ယာန်အသင်းသားတစ်ဦးဖြစ်လာကြောင်း သိရှိလာကြသည်။ (မဿဲ ၂၈:၁၉၊ ၂၀) ဤယုံကြည်ချက်ခံယူထားကြသည့် ဇွဲရှိသောဟောပြောသူများသည် မြို့ရွာများတစ်လျှောက် ခရီးထွက်ကာ လူများကို ကျမ်းစာသင်ပေးပြီး အရွယ်ရောက်သူများကို နှစ်ခြင်းပေးခဲ့ကြသည်။ ထို့ကြောင့် သူတို့ကို “ပြန်လည်နှစ်ခြင်းခံသူများ” ဟုအဓိပ္ပာယ်ရှိသည့် ရှေးဦးနှစ်ခြင်းခရစ်ယာန်များဟု ခေါ်သည်။
အမှန်တရားရှာဖွေရာတွင် ရှေးဦးနှစ်ခြင်းခရစ်ယာန်များကို ဂရုပြုမိသူမှာ နယ်သာလန်မြောက်ပိုင်း ဝစ်တ်မာစန်ရွာမှ ကက်သလစ်ဘုန်းကြီး မန်နို ဆိုင်မန်စ်ဖြစ်သည်။ ၁၅၃၆ ခုနှစ်တွင် သူသည် ချာ့ခ်ျနှင့် လုံးဝအဆက်ဖြတ်လိုက်ပြီးနောက် ချာ့ခ်ျက သူ့ကို လိုက်လံဖမ်းဆီးတော့သည်။ ၁၅၄၂ ခုနှစ်တွင် [ခရစ်ယာန်] သာသနာစောင့်ရောမဘုရင် ပဉ္စမမြောက်ချားလ်စ်က မန်နိုကို ဖမ်းဆီးရမိသူအား ဂိလ်ဒါ ၁၀၀ ပေးမည်ဟု ကတိပြုခဲ့သည်။ သို့သော် မန်နိုသည် ရှေးဦးနှစ်ခြင်းခရစ်ယာန်အချို့ကိုစုစည်းကာ အသင်းတော်များဖွဲ့စည်းခဲ့သည်။ မကြာမီ သူနှင့်သူ့နောက်လိုက်များကို မန္နဲနိုက်များဟုခေါ်လာကြသည်။
ယနေ့ မဲန္နနိုက်များ
ခေတ်ရေစီးကြောင်းတစ်လျှောက် နှိပ်စက်ညှဉ်းပန်းခံလာရသောကြောင့် ထောင်နှင့်ချီသောမဲန္နနိုက်များသည် ဥရောပအနောက်ပိုင်းမှ မြောက်အမေရိကသို့ ထွက်ပြေးကြရသည်။ ထိုတွင် ကျမ်းစာအမှန်တရားကို ဆက်ရှာဖွေရန်နှင့် သိလာရာများကို အခြားသူများအား ဝေငှဖြန့်ဖြူးရန် သူတို့ အခွင့်အရေးရရှိကြသည်။ သို့သော် တိုးတက်သောကျမ်းစာလေ့လာမှုနှင့် လူများကိုဟောပြောရာတွင် သူတို့ဘိုးဘေးများ၌ရှိခဲ့သော တောက်လောင်သည့်ဇွဲမှာမူ အတော်များများ၌မရှိတော့ချေ။ အများစုမှာ သုံးပါးပေါင်းတစ်ဆူ၊ မသေနိုင်သောလူ့ဝိညာဉ်စိုးလ်နှင့် မီးငရဲတို့ကဲ့သို့သော ကျမ်းစာနှင့်မညီသည့် သွန်သင်ချက်အချို့ကို စွဲကိုင်ထားကြဆဲဖြစ်သည်။ (ဒေ. ၉:၅; ယေဇကျေလ ၁၈:၄; မာကု ၁၂:၂၉) ယနေ့ခေတ် မဲန္နနိုက်ခရစ်ယာန်သာသနာပြုလုပ်ငန်းသည် ဧဝံဂေလိဟောပြောခြင်းထက် ကျန်းမာရေးနှင့် လူမှုရေးဝန်ဆောင်မှုလုပ်ငန်းများကိုသာ ပို၍အာရုံစိုက်သည်။
ယခုအခါ ၆၅ နိုင်ငံတွင် မဲန္နနိုက် ၁,၃၀၀,၀၀၀ ခန့်ရှိသည်ဟု ခန့်မှန်းကြသည်။ သို့သော် လွန်ခဲ့သောရာစုနှစ်များက မန်နို ဆိုင်မန်စ်ကဲ့သို့ပင် မျက်မှောက်ခေတ်မဲန္နနိုက်တို့သည်လည်း မိမိတို့တွင် စည်းလုံးမှုမရှိသည့်အတွက် ညည်းညူနေကြသည်။ ပထမကမ္ဘာစစ်အတွင်းက ကမ္ဘာ့ပဋိပက္ခများနှင့်ပတ်သက်သည့် မတူညီသော ထင်မြင်ချက်များကြောင့် အကြီးအကျယ် သဘောထားကွဲပြားခဲ့ကြသည်။ မြောက်အမေရိကရှိ များစွာသောသူတို့သည် ကျမ်းစာအခြေခံသော အကြောင်းများကြောင့် စစ်မှုထမ်းရန်ငြင်းဆိုကြသည်။ သို့သော် မဲန္နနိုက်သမိုင်း၏နိဒါန်း စာအုပ်က “၁၉၁၄ ခုနှစ်ရောက်သော် အနောက်ဥရောပရှိ မဲန္နနိုက်ချာ့ခ်ျများ စစ်မှုထမ်းရန်ငြင်းဆိုခြင်းသည် သမိုင်းဖြစ်ရပ်တစ်ခုမျှသာ ဖြစ်တော့သည်” ဟုဆိုသည်။ ယနေ့ အချို့သောမဲန္နနိုက်အုပ်စုများသည် ခေတ်သစ်ပုံစံများကို အနည်းနှင့်အများ လက်ခံလာကြသည်။ အခြားသူများမူ မိမိတို့၏အင်္ကျီများတွင် ကြယ်သီးအစား ချိတ်နှင့်ကွင်းများကို အသုံးပြုဆဲဖြစ်ပြီး အမျိုးသားများ မုတ်ဆိတ်မွေးမရိတ်သင့်ဟု ယုံကြည်လက်ခံဆဲဖြစ်သည်။
အချို့မဲန္နနိုက်အုပ်စုများသည် ခေတ်သစ်ကမ္ဘာနှင့် တစ်သီးတခြားနေရန် စိတ်ပိုင်းဖြတ်ထားပြီး ဒေသခံအစိုးရများက မိမိတို့ကိုအနှောင့်အယှက်မပေး နေထိုင်ခွင့်ပြုသောနေရာများသို့ ပြောင်းရွှေ့နေထိုင်ကြသည်။ သာဓကအနေနှင့် ဘိုလီးဗီးယားတွင် ခန့်မှန်းခြေအားဖြင့် မဲန္နနိုက် ၃၈,၀၀၀ သည် အစွန်အဖျားဒေသများတွင် ပြုမူနေထိုင်ပုံဆိုင်ရာ မတူညီသောစည်းမျဉ်းကိုယ်စီရှိ အုပ်စုများဖွဲ့၍ နေထိုင်ကြသည်။ အချို့အုပ်စုများသည် မြင်းများနှင့်မြင်းလှည်းများကိုသာ သုံးခွင့်ပြုပြီး မော်တော်ကားများအသုံးပြုခြင်းကို တားမြစ်ထားကြသည်။ အချို့အုပ်စုများကမူ ရေဒီယို၊ တီဗွီနှင့် တေးသီချင်းများကို ပိတ်ပင်ထားကြသည်။ အချို့တို့သည် မိမိတို့နေထိုင်သောတိုင်းပြည်ရှိ ဘာသာစကား သင်ယူခြင်းကိုပင် တားမြစ်ထားကြသည်။ “တရားဟောဆရာက ကျွန်တော်တို့ကို သူ့လက်အောက်မှာ ဆက်ထိန်းချုပ်နိုင်ဖို့ စပိန်စကားသင်ခွင့်မပြုဘူး” ဟု အုပ်စုဝင်တစ်ဦးကပြောသည်။ လူများစွာသည် မိမိတို့အဖွဲ့အစည်းမှ နှင်ထုတ်ခံရမည်ကိုကြောက်ကာ ယင်းက သူတို့ကိုဖိစီးမှုဖြစ်စေသည်၊ ထိုသို့နှင်ထုတ်ခံရခြင်းသည် အပြင်လောကဘဝပုံစံဖြင့် မနေဖူးသူတစ်ဦးအဖို့ ထိတ်လန့်စရာအလားအလာဖြစ်သည်။
အမှန်တရားမျိုးစေ့ ကြဲခံရပုံ
ဤအခြေအနေများအောက်တွင် မဲန္နနိုက်လယ်သမား ယိုဟန်သည် သူ၏အိမ်နီးချင်းထံမှ ကင်းမျှော်စင်တစ်စောင် တွေ့ရှိခဲ့သည်။ ယိုဟန်၏မိသားစုသည် ကနေဒါမှမက္ကဆီကိုသို့၊ ထိုမှတစ်ဖန် ဘိုလီးဗီးယားသို့ ရွှေ့ပြောင်းနေထိုင်ခဲ့သည်။ သို့သော် ယိုဟန်သည် ကျမ်းစာအမှန်တရားရှာဖွေရာတွင် အကူအညီရယူလိုစိတ်အမြဲရှိခဲ့သည်။ ထိုမဂ္ဂဇင်းကို သူငှားခဲ့သည်။
နောက်ပိုင်း လယ်ယာထွက်ကုန်များ မြို့သို့သွားရောင်းစဉ် ဈေးတွင် ကင်းမျှော်စင်ဝေငှနေသည့် သက်သေခံတစ်ဦးကို ယိုဟန်တွေ့ရာ ထိုသူထံချဉ်းကပ်ခဲ့သည်။ ထိုသက်သေခံက ဂျာမန်စကားပြော ခရစ်ယာန်သာသနာပြုတစ်ဦးထံ လမ်းညွှန်ပေးလိုက်ရာ မကြာမီ ယိုဟန်သည် ဂျာမန်ဘာသာစကားဖြင့် ထုတ်ဝေသော ကင်းမျှော်စင်ကို စာတိုက်မှရရှိခဲ့သည်။ ကင်းမျှော်စင် စာစောင်တိုင်းကို အသေအချာလေ့လာပြီးနောက် နွမ်းဖတ်သွားသည်အထိ အုပ်စုတွင်းရှိ မိသားစုတစ်စုမှတစ်စုသို့ လက်ဆင့်ကမ်းခဲ့ကြသည်။ တစ်ခါတစ်ရံ မိသားစုများအတူစုရုံးပြီး ကိုးကားထားသောကျမ်းချက်များကိုဖတ်ကာ ညဉ့်နက်သန်းခေါင်အထိ ကင်းမျှော်စင်ကိုလေ့လာကြသည်။ ယေဟောဝါသက်သေများသည် ကမ္ဘာတစ်ဝန်းတွင် ဘုရားသခင့်အလိုတော်ကို စည်းလုံးစွာထမ်းရွက်နေသူများဖြစ်ကြောင်း ယိုဟန်ယုံကြည်စိတ်ချလာသည်။ သူမသေမီ သူ့ဇနီးနှင့်သားသမီးများအား “ကင်းမျှော်စင်ကိုအမြဲဖတ်ပါ။ အဲဒါက ကျမ်းစာကိုနားလည်သဘောပေါက်အောင် မင်းတို့ကိုကူညီလိမ့်မယ်” ဟုပြောခဲ့သည်။
ယိုဟန်၏မိသားစုဝင်အချို့သည် သမ္မာကျမ်းစာမှ မိမိတို့သင်ယူသိရှိလာရာများကို အိမ်နီးချင်းများအား စတင်ပြောပြကြသည်။ “ကမ္ဘာမြေကြီးက ပျက်စီးသွားမှာမဟုတ်ဘူး။ အဲဒီအစား ပရဒိသုတစ်ခုဖြစ်လာအောင် ဘုရားသခင်လုပ်ပေးလိမ့်မယ်။ ပြီးတော့ ဘုရားသခင်ဟာ လူတွေကို ငရဲထဲမှာဝေဒနာခံစားစေမှာမဟုတ်ဘူး” ဟု သူတို့ပြောသည်။ ဤကဲ့သို့သောစကားများသည် မကြာမီ ချာ့ခ်ျတရားဟောဆရာများ၏ နားသို့ရောက်သွားပြီး သူတို့က အကယ်၍ ဤသို့ဆက်ပြောနေလျှင် ယိုဟန်၏မိသားစုကို နှင်ထုတ်မည်ဟု ခြိမ်းခြောက်ခဲ့သည်။ နောက်ပိုင်း မဲန္နနိုက်ခေါင်းဆောင်များ၏ ဖိအားပေးမှုနှင့်ပတ်သက်သည့် မိသားစုဆွေးနွေးခန်းတစ်ခုတွင် လူငယ်တစ်ဦးက “ကျွန်တော်တို့ရဲ့ ချာ့ခ်ျခေါင်းဆောင်တွေနဲ့ ပတ်သက်ပြီး ကျွန်တော်တို့ ဘာလို့မြည်တမ်းပြောဆိုနေကြတယ်ဆိုတာ ကျွန်တော်နားမလည်နိုင်ဘူး။ စစ်မှန်တဲ့ဘာသာက ဘယ်ဟာလဲဆိုတာ ကျွန်တော်တို့သိတယ်၊ ဒါပေမဲ့ အဲဒါနဲ့ပတ်သက်လို့ ကျွန်တော်တို့ဘာမှမလုပ်သေးဘူး” ဟု ပြောခဲ့သည်။ ထိုစကားများက ထိုလူငယ်လေး၏ဖခင် နှလုံးကိုထိမိခဲ့သည်။ မကြာမီ ထိုမိသားစုမှဆယ်ယောက်တို့သည် ယေဟောဝါသက်သေများကို ရှာဖွေရန် တိတ်တဆိတ်ခရီးထွက်လာကြပြီး အစပိုင်းတွင်ဖော်ပြခဲ့သည့်အတိုင်း ခရစ်ယာန်သာသနာပြုများ၏ အိမ်သို့ရောက်လာကြသည်။
နောက်တစ်နေ့တွင် ခရစ်ယာန်သာသနာပြုများသည် ထိုအုပ်စုရှိ မိတ်ဆွေသစ်များထံ လည်ပတ်ခဲ့ကြသည်။ ခရစ်ယာန်သာသနာပြုများ၏ မော်တော်ကားသည် လမ်းမပေါ်တွင်မောင်းနှင်လာသည့် တစ်ခုတည်းသောစက်တပ်ယာဉ်ဖြစ်နေသည်။ သူတို့သည် မြင်းလှည်းများကို ဖြည်းညင်းစွာကျော်တက်စဉ် ဒေသခံများနှင့်သူတို့ တစ်ဦးကိုတစ်ဦး အပြန်အလှန်အကဲခတ်ကြည့်ရှုကြသည်။ မကြာမီ ခရစ်ယာန်သာသနာပြုများသည် မိသားစုနှစ်စုမှ မဲန္နနိုက်ဆယ်ဦးနှင့်အတူ စားပွဲတစ်ခုတွင် ထိုင်ကြသည်။
ထိုနေ့တွင် ထာဝရအသက်သို့ပို့ဆောင်သော အသိပညာစာအုပ်အခန်း ၁ ကို လေးနာရီကြာ လေ့လာကြသည်။ * အပိုဒ်တိုင်းတွင် လယ်သမားများသည် ထပ်ဆင့်ကျမ်းချက်များကို ဖွင့်ကြည့်ပြီး ထိုကျမ်းချက်များအတိုင်း သူတို့မှန်ကန်စွာလိုက်လျှောက်နေ,မနေ သိလိုခဲ့ကြသည်။ အုပ်စုကိုယ်စားပြုသူတစ်ဦးသည် နောက်ဆုံးတွင် စပိန်ဘာသာစကားဖြင့် အုပ်စုကိုယ်စားအဖြေမပေးမီ လယ်သမားများသည် ဂျာမနီမြောက်ပိုင်းဒေသသုံး ဂျာမန်စကားဖြင့်ဆွေးနွေးကြသည့်အတွက် လေ့လာရန်မေးခွန်းမေးပြီးတိုင်း မိနစ်အနည်းငယ်စောင့်ပေးရသည်။ ယင်းသည် မမေ့နိုင်သောနေ့ရက်ဖြစ်ခဲ့သည်၊ သို့သော် အခက်အခဲပြဿနာများက သူတို့ကိုဆီးကြိုနေသည်။ လွန်ခဲ့သောရာစုနှစ်ငါးခုနီးပါးက မန်နို ဆိုင်မန်စ် ကျမ်းစာအမှန်တရားစရှာဖွေစဉ်ကကဲ့သို့ ယခုသူတို့သည် စမ်းသပ်မှုများ ကြုံရပေဦးမည်။
အမှန်တရားကြောင့် စမ်းသပ်မှုများကြုံရ
ရက်အနည်းငယ်လွန်ပြီးနောက် ချာ့ခ်ျခေါင်းဆောင်များသည် ယိုဟန်၏မိသားစုအိမ်သို့လာပြီး စိတ်ဝင်စားသူများကို “ယေဟောဝါသက်သေတွေ မင်းတို့ဆီ လာနေတယ်လို့ ငါတို့ကြားရတယ်။ သူတို့လာရင် မောင်းထုတ်ရမယ်၊ ပြီးတော့ သူတို့စာပေတွေကို မီးရှို့ဖို့မပေးရင် မင်းတို့နှင်ထုတ်ခံရမယ်” ဟုရာဇသံပေးသွားသည်။ သက်သေခံများနှင့်သူတို့ တစ်ကြိမ်သာကျမ်းစာလေ့လာရသေးသည်၊ ထို့ကြောင့် ယင်းသည် ကျော်လွှားရန်ခက်ခဲသောစမ်းသပ်မှုဖြစ်သည်။
“ခင်ဗျားတို့ပြောသလို ကျွန်တော်တို့မလုပ်နိုင်ဘူး။ အဲဒီလူတွေက ကျွန်တော်တို့ကိုကျမ်းစာသင်ပေးဖို့ လာကြတာ” ဟု အိမ်ထောင်ဦးစီးတစ်ဦးက ပြန်ပြောသည်။ အုပ်စုခေါင်းဆောင်များ မည်သို့တုံ့ပြန်ကြသနည်း။ ကျမ်းစာလေ့လာသည့်အတွက် သူတို့ကိုနှင်ထုတ်ခဲ့သည်! ယင်းသည် အလွန်ရက်စက်သော ထိုးနှက်ချက် ဖြစ်ပေသည်။ အုပ်စုရှိဒိန်ခဲစက်ရုံမှလှည်းသည် မိသားစုတစ်စု၏အိမ်မှ နွားနို့ကိုမကောက်ဘဲ ကျော်သွားသည်၊ ယင်းသို့ပြုခြင်းက သူတို့၏အဓိကဝင်ငွေဝင်လမ်းကို ပိတ်ခြင်းဖြစ်သည်။ အိမ်ထောင်ဦးစီးတစ်ဦး အလုပ်ဖြုတ်ခံရသည်။ အခြားတစ်ဦးကိုမူ အုပ်စုစတိုးဆိုင်မှ ရိက္ခာများဝယ်ခွင့်မပေးချေ၊ သူ၏ဆယ်နှစ်အရွယ်သမီးလည်း ကျောင်းထုတ်ခံရသည်။ အိမ်နီးချင်းများသည် အိမ်တစ်အိမ်ကိုဝိုင်းလိုက်ပြီး လူငယ်တစ်ဦး၏ဇနီးသည်ကို ဆွဲထုတ်ကာ သူသည် နှင်ထုတ်ခံထားရသည့် ယောက်ျားနှင့် မပေါင်းသင်းနိုင်ဟုဆိုကြသည်။ ဤအရာများအားလုံးကြားမှ ကျမ်းစာလေ့လာသောမိသားစုများသည် သူတို့၏အမှန်တရားရှာဖွေမှုကို လက်မလျှော့ခဲ့ကြချေ။
ခရစ်ယာန်သာသနာပြုများသည် ကျမ်းစာလေ့လာမှုပြုလုပ်ရန် အပတ်စဉ်ခရီးရှည် မောင်းနှင်လာမြဲဖြစ်သည်။ ဤကျမ်းစာလေ့လာမှုများသည် မိသားစုများကို မည်မျှအားရှိစေလိုက်မည်ဖြစ်ခြင်း! မိသားစုဝင်အချို့သည် ကျမ်းစာလေ့လာသည့်နေရာသို့ရောက်ရှိနိုင်ရန် မြင်းနှင့်မြင်းလှည်းဖြင့် နှစ်နာရီကြာခရီးနှင်လာကြရသည်။ မိသားစုများက ခရစ်ယာန်သာသနာပြုတစ်ဦးအား ဆုတောင်းရန် ဦးဆုံးအကြိမ်ဖိတ်ခေါ်လိုက်ချိန်သည် စိတ်ထိခိုက်လှုပ်ရှားစရာကောင်းသောအချိန်ဖြစ်ခဲ့သည်။ ဤအုပ်စုများတွင် မဲန္နနိုက်များသည် တစ်ခါမျှအသံကျယ်ကျယ်ဖြင့် ဆုမတောင်းဖူးချေ၊ ထို့ကြောင့် သူတို့အတွက် တစ်ဦးဦးက ဆုတောင်းပေးသည်ကို သူတို့တစ်ခါမျှ မကြားဖူးကြချေ။ သူတို့ မျက်ရည်များဝဲလာကြသည်။ ထို့ပြင် ခရစ်ယာန်သာသနာပြုများက အသံသွင်းစက်တစ်လုံး ယူလာသောအခါ သူတို့၏သိချင်စိတ်ပြင်းပြမှုကို သင်မြင်ယောင်ကြည့်နိုင်သလော။ တေးသီချင်းနားထောင်ခြင်းကို သူတို့၏အုပ်စုတွင် တစ်ခါမျှခွင့်မပြုခဲ့ဖူးပေ။ သာယာနာပျော်ဖွယ်ကောင်းလှသော ဘုရားသခင့်နိုင်ငံတော်တေးသံသာများကို အလွန်နှစ်သက်ကြသဖြင့် လေ့လာမှုပြီးတိုင်း ဘုရားသခင့်နိုင်ငံတော်သီချင်းသီဆိုရန် သူတို့ဆုံးဖြတ်ထားကြသည်! သို့သော် မေးစရာမှာ သူတို့၏အခြေအနေသစ်တွင် သူတို့မည်သို့စခန်းသွားကြမည်နည်း။
ချစ်စရာကောင်းသော ညီအစ်ကိုအသင်းအပင်းကို ရှာတွေ့
သူတို့ကိုအုပ်စုမှ ဝိုင်းကြဉ်ထားခြင်းကြောင့် မိသားစုများသည် မိမိတို့ကိုယ်တိုင်ဒိန်ခဲလုပ်ရတော့သည်။ ခရစ်ယာန်သာသနာပြုများက ဖောက်သည်များရှာပေးကြသည်။ တောင်အမေရိကရှိ မဲန္နနိုက်အုပ်စုတွင်ကြီးလာသော မြောက်အမေရိကမှ သက်တမ်းကြာသက်သေခံတစ်ဦးသည် ဤမိသားစုများ၏ ဆိုးဝါးသောအခြေအနေကို ကြားလိုက်သည်။ အကူအညီပေးလိုစိတ်ပြင်းပြသောကြောင့် သူသည် တစ်ပတ်အတွင်းတွင် ဘိုလီးဗီးယားသို့သွား၍ ထိုမိသားစုထံလည်ပတ်ခဲ့သည်။ ဝိညာဉ်ရေးအားပေးမှုများအပြင် ဘုရားသခင့်နိုင်ငံတော်ခန်းမတွင် အစည်းအဝေးများတက်နိုင်ရန်နှင့် သူတို့၏လယ်ယာထွက်ကုန်များကို ဈေးသို့ပို့နိုင်ရန် ကိုယ်ပိုင်ကုန်တင်ကားငယ်တစ်စီး ဝယ်နိုင်သည်အထိ ကူညီပေးခဲ့သည်။
“အုပ်စုကနေ နှင်ထုတ်ခံရပြီးနောက်ပိုင်း ကျွန်တော်တို့တော်တော်ခက်ခဲခဲ့တယ်။ ဘုရားသခင့်နိုင်ငံတော်ခန်းမကို သွားတုန်းကတော့ ဝမ်းနည်းနေကြပေမဲ့ ပြန်လာတဲ့အခါ ဝမ်းသာရွှင်လန်းနေကြတယ်” ဟုမိသားစုဝင်တစ်ဦးပြောပြသည်။ သူတို့လိုအပ်သည့်အချိန်တွင် ဒေသခံသက်သေခံများက ထိထိရောက်ရောက် ထောက်မကူညီပေးခဲ့ကြသည်။ အချို့မှာ ဂျာမန်စကားသင်ယူကြသည်။ ဂျာမန်စကားပြောသက်သေခံအချို့သည် ဂျာမန်ဘာသာစကားဖြင့် အစည်းအဝေးများကျင်းပတတ်အောင် ကူညီပေးရန် ဥရောပမှ ဘိုလီးဗီးယားသို့ လာရောက်ခဲ့ကြသည်။ မကြာမီ မဲန္နနိုက်အုပ်စုမှ ၁၄ ဦးသည် အခြားသူများကို ဘုရားသခင့်နိုင်ငံတော်သတင်းကောင်း ဟောပြောနေကြပြီဖြစ်သည်။
ခရစ်ယာန်သာသနာပြုအိမ်သို့ ပထမအကြိမ်လည်ပတ်ပြီး တစ်နှစ်အတွင်း ၂၀၀၁ ခု၊ အောက်တိုဘာလ ၁၂ ရက်တွင် ယခင်ရှေးဦးနှစ်ခြင်းခရစ်ယာန်များမှ ၁၁ ဦးသည် ယေဟောဝါထံ သူတို့ကိုယ်ကိုဆက်ကပ်အပ်နှံခြင်း၏ အထိမ်းအမှတ်အဖြစ် ထပ်မံနှစ်ခြင်းခံခဲ့ကြသည်။ ထိုအချိန်မှစပြီး လူများစွာ နှစ်ခြင်းခံလာကြသည်။ နောက်ပိုင်းတွင် အမျိုးသားတစ်ဦးက “ကျမ်းစာထဲကအမှန်တရားတွေကို သိလာရတဲ့အတွက် လွတ်လပ်သွားတဲ့ကျွန်တွေလိုပဲ ကျွန်တော်တို့ခံစားရတယ်” ဟုပြောခဲ့သည်။ အခြားအမျိုးသားတစ်ဦးက “မဲန္နနိုက်အတော်များများက သူတို့ရဲ့အဖွဲ့အစည်းမှာ မေတ္တာမရှိတာကို ညည်းညူကြတယ်။ ဒါပေမဲ့ ယေဟောဝါသက်သေတွေက တစ်ဦးကိုတစ်ဦး စိတ်ဝင်စားတယ်။ သူတို့အလယ်မှာနေရတာ လုံခြုံတယ်လို့ခံစားရတယ်” ဟုပြောပြသည်။ သင်လည်း သမ္မာကျမ်းစာမှအမှန်တရားအကြောင်း ပို၍နားလည်ရန်ရှာဖွေနေပါက အခက်အခဲများကြုံတွေ့နိုင်စရာအကြောင်းရှိသည်။ သို့သော် ဤမိသားစုများကဲ့သို့ ယေဟောဝါ၏အကူအညီကိုရှာယူပြီး စွဲမြဲတည်ကြည်ခြင်းနှင့် ရဲစွမ်းသတ္တိတို့တင်ပြမည်ဆိုလျှင် သင်လည်း အောင်မြင်ပျော်ရွှင်ပါလိမ့်မည်။
[အောက်ခြေမှတ်ချက်]
^ အပိုဒ်၊ 17 ယေဟောဝါသက်သေများ ထုတ်ဝေသည်။
[စာမျက်နှာ ၂၅ ပါ ရုပ်ပုံ]
ကျမ်းစာ,စာပေများကိုဂျာမန်ဘာသာစကားဖြင့်ရရှိ၍ဝမ်းသာ
[စာမျက်နှာ ၂၆ ပါ ရုပ်ပုံ]
တေးသီချင်းများကို အမြဲတားမြစ်ထားခဲ့သော်လည်းယခု ကျမ်းစာလေ့လာပြီးတိုင်း သီချင်းဆိုနေကြ