စစ်မှန်သောနှိမ့်ချမှုကို မွေးမြူလော့
စစ်မှန်သောနှိမ့်ချမှုကို မွေးမြူလော့
“နှိမ့်ချလျက်ရှိသောသူတို့ကို ကိုယ်တော်သည် . . . ကယ်တင်တော်မူ၏။”—၂ ဓမ္မရာဇဝင် ၂၂:၂၈။
၁၊ ၂။ ကမ္ဘာ့အုပ်စိုးရှင်များတွင် အဘယ်တူညီချက်ရှိကြသနည်း။
အီဂျစ်နိုင်ငံရှိ ပိရမစ်များက ထိုနိုင်ငံကို တစ်ချိန်ကအုပ်စိုးခဲ့သူများအကြောင်း သက်သေထူသည်။ အခြားသမိုင်းဝင်ပုဂ္ဂိုလ်များမှာ အာရှုရိရှင်ဘုရင် သနာခရိပ်၊ ဂရိနိုင်ငံမှ မဟာအလက်ဇန္ဒား၊ ရောမနိုင်ငံမှ ဂျူးလီးယပ်စ်ဆီဇာတို့ဖြစ်ကြသည်။ အဆိုပါအုပ်စိုးရှင်များတွင် တူညီသောအချက် တစ်ချက်ရှိသည်။ သူတို့သည် အမှန်တကယ်နှိမ့်ချသူများဖြစ်သည်ဟု နာမည်မရခဲ့ကြပါ။—မဿဲ ၂၀:၂၅၊ ၂၆။
၂ အထက်ပါအုပ်စိုးရှင်များသည် ၎င်းတို့နိုင်ငံရှိ နှစ်သိမ့်မှုလိုနေသော အခြေအနေနိမ့်ကျသည့် ပြည်သားများထံ သွားရောက်လိမ့်မည်ဟု တွေးကြည့်နိုင်မည်လော။ မဖြစ်နိုင်ချေ။ စိတ်နှလုံးကြေကွဲနေသော မြို့သားများကို နှစ်သိမ့်အားပေးဖို့ဆင်းရဲနုံချာလှသည့် နေအိမ်များသို့ သွားရောက်လိမ့်မည်ဟုလည်း တွေးကြည့်နိုင်မည်မဟုတ်ပါ။ သာမညလူတန်းစားများအပေါ် ၎င်းတို့သဘောထားသည် စကြဝဠာကို အကြွင်းမဲ့ပိုင်သအုပ်စိုးရှင် ယေဟောဝါဘုရားသခင်၏သဘောထားနှင့် ကွာခြားလိုက်လေခြင်း။
နှိမ့်ချမှုဆိုင်ရာ အကြီးမြတ်ဆုံးပုံနမူနာရှင်
၃။ အကြွင်းမဲ့ပိုင်သအုပ်စိုးရှင်သည် မိမိ၏လက်အောက်လူသားများကို မည်သို့ဆက်ဆံတော်မူသနည်း။
၃ ယေဟောဝါရှင်သည် စစ်၍မကုန်နိုင်အောင် ကြီးမြတ်လှသော်လည်း “စုံလင်သောစေတနာစိတ်ရှိသောသူတို့ဘက်၌ ခိုင်ခံ့စွာနေခြင်းငှာ မြေကြီးတစ်ပြင်လုံးကို အနှံ့အပြားကြည့်ရှုလျက်ရှိတော်မူ၏။” (၂ ရာဇဝင်ချုပ် ၁၆:၉) စမ်းသပ်မှုအမျိုးမျိုး ကြုံရသောကြောင့် စိတ်နှလုံးကြေကွဲနေသော နှိမ့်ချသည့်ဝတ်ပြုသူများကို ကိုယ်တော်ရှာတွေ့သောအခါ အဘယ်အရာလုပ်ဆောင်တော်မူသနည်း။ ကိုယ်တော်သည် “စိတ်နှိမ့်ချသောသူနှင့် နှလုံးကြေကွဲသောသူတို့၏စိတ်ဝိညာဉ် အသက်ရှင်စေခြင်းငှာ” သန့်ရှင်းသောဝိညာဉ်တော်အားဖြင့် သူတို့နှင့်အတူနေတော်မူ၏။ (ဟေရှာယ ၅၇:၁၅) သို့ဖြင့် ပြန်လည်တက်ကြွလာသော ဝတ်ပြုသူများသည် ကိုယ်တော်၏အမှုတော်ကို ရွှင်လန်းစွာ ပြန်ထမ်းဆောင်နိုင်ကြသည်။ ဘုရားသခင်သည် နှိမ့်ချလိုက်လေခြင်း။
၄၊ ၅။ (က) ဘုရားသခင်၏ အုပ်ချုပ်ပုံနည်းလမ်းနှင့်ပတ်သက်၍ ဆာလံဆရာ မည်သို့ခံစားခဲ့ရသနည်း။ (ခ) ဘုရားသခင်သည် “ဆင်းရဲသောသူကို” ကူညီရန် “မတူမတန်နှိမ့်ချ” ခြင်းဟူသည် အဘယ်အရာကို ဆိုလိုသနည်း။
၄ အပြစ်ရှိသောလူသားတို့ကို ကူညီရန် အကြွင်းမဲ့ပိုင်သအုပ်စိုးရှင် ဘုရားသခင်လောက် နှိမ့်ချနိုင်သူ စကြဝဠာတွင်မရှိပေ။ ဆာလံဆရာ ဤသို့ရေးသားနိုင်ခဲ့သည်– ‘ထာဝရဘုရားသခင်သည် လူမျိုးတကာတို့အပေါ်၌လည်းကောင်း၊ ဘုန်းတော်သည် ကောင်းကင်အပေါ်၌လည်းကောင်း မြင့်တော်မူ၏။ ကိုယ်ကိုချီးမြှင့်၍ ကျိန်းဝပ်တော်မူသော်လည်း ကိုယ်ကိုနှိမ့်ချ၍ [“မတူမတန်နှိမ့်ချ၍၊” ကဘ] ကောင်းကင်အရာနှင့် မြေကြီးအရာတို့ကို ကြည့်ရှုတော်မူသော ငါတို့၏ဘုရားသခင်နှင့် အဘယ်သူတူသနည်း။ ဆင်းရဲသောသူကို မြေမှုန့်ထဲကကြွလျက် ငတ်မွတ်သောသူကို နောက်ချေးပုံထဲက ချီးမြှောက်တော်မူသည်။’—ဆာလံ ၁၁၃:၄-၇။
၅ “မတူမတန်နှိမ့်ချ” ဟူသောစကားလုံးကို သတိပြုပါ။ ယင်းစကားလုံးသည် လူသားတို့အတွက်မူ မကောင်းသည့်သဘောဆောင်ပြီး ‘ကိုယ့်ထက်နိမ့်သူ သို့မဟုတ် ကိုယ့်လောက်အခွင့်မသာသူတစ်ဦးအား အထက်စီးနှင့်ဆက်ဆံခြင်း’ ဖြစ်၏။ သန့်ရှင်းစင်ကြယ်ပြီး “ထောင်လွှားစော်ကား” ခြင်းကင်းသော ယေဟောဝါဘုရားသခင်တွင် အဆိုပါသဘောထား လုံးဝမရှိသောကြောင့် ကိုယ်တော်အား ထောင်လွှားစော်ကားသည်ဟု မဆိုနိုင်ပေ။ (မာကု ၇:၂၂၊ ၂၃) သို့သော် “မတူမတန်နှိမ့်ချ” ဟူသည့်စကားလုံးက အောက်တန်းစားအဆင့်အထိ ကိုယ့်ကိုယ်ကိုနှိမ့်ချခြင်း သို့မဟုတ် ရာထူးအဆင့်၊ ဂုဏ်အသရေနိမ့်သူတစ်ဦးနှင့် တန်းတူ ဆက်ဆံခြင်းဟူသည့် သဘောလည်းဆောင်သည်။ ထို့ကြောင့် ဆာလံ ၁၁၃:၆ ကို ကျမ်းစာအချို့က ဘုရားသခင်သည် ကိုယ့်ကိုယ်ကိုနှိမ့်ချတော်မူသည်ဟု ဘာသာပြန်ဆိုကြသည်။ ထိုသို့ပြန်ဆိုခြင်းက ကိုယ်တော်အား ဝတ်ပြုသော မစုံလင်သူလူသားတို့၏ လိုအပ်ရာများကို မေတ္တာဖြင့် ဂရုစိုက်ပေးသနားတော်မူသည့် နှိမ့်ချသောဘုရားသခင်၏ ပုံသဏ္ဌာန်တော်ကို ကောင်းစွာမြင်ယောင်စေသည်တကား။—၂ ဓမ္မရာဇဝင် ၂၂:၃၆။
ယေရှု အဘယ်ကြောင့်နှိမ့်ချခဲ့
၆။ ယေဟောဝါ၏နှိမ့်ချမှုကိုဖော်ပြသည့် အကြီးမားဆုံးလုပ်ရပ်ကား အဘယ်နည်း။
၆ နှိမ့်ချမှုနှင့် မေတ္တာတင်ပြရာတွင် ဘုရားသခင်၏အကြီးမြတ်ဆုံးလုပ်ရပ်မှာ လူသားတို့ ကယ်တင်ခြင်းရရန် မိမိချစ်မြတ်နိုး လှသောသားဦးကို မြေကြီးပေါ်စေလွှတ်ကာ လူသားတစ်ဦးအဖြစ်ဖွားမြင်၍ ကြီးပြင်းလာစေခြင်းဖြစ်သည်။ (ယောဟန် ၃:၁၆) ယေရှုသည် ကောင်းကင်ခမည်းတော်အကြောင်း အမှန်တရားကို သွန်သင်ပေးပြီး “ဤလောက၏အပြစ်ကို ဆောင်သွား” ရန် စုံလင်သောလူသားအသက်ကို စွန့်တော်မူခဲ့သည်။ (ယောဟန် ၁:၂၉; ၁၈:၃၇) ယေရှုသည် နှိမ့်ချခြင်းအပါအဝင် ယေဟောဝါ၏အရည်အသွေးများကို အပြည့်အဝတုပကာ ဘုရားသခင်တောင်းဆိုရာကို တလိုတလားလုပ်ဆောင်ခဲ့သည်။ ယင်းသည် ဘုရားသခင်၏ဖန်ဆင်းခံ သက်ရှိတစ်ဦး တင်ပြခဲ့သည့် နှိမ့်ချမှုနှင့်မေတ္တာဆိုင်ရာ အကြီးမြတ်ဆုံးပုံနမူနာဖြစ်သည်။ ယေရှု၏နှိမ့်ချမှုကို လူတိုင်း မလေးမြတ်ကြပါ။ ကိုယ်တော့်အား “ယုတ်မာသောသူ” ဟုပင် ရန်သူများယူမှတ်ခဲ့ကြသည်။ (ဒံယေလ ၄:၁၇) မည်သို့ပင်ဖြစ်စေ၊ တမန်တော်ပေါလုက မိမိ၏ယုံကြည်သူချင်းများသည် အချင်းချင်းဆက်ဆံရာတွင် ယေရှုနည်းတူ နှိမ့်ချသင့်သည်ဟု အသိအမှတ်ပြုခဲ့သည်။—၁ ကောရိန္သု ၁၁:၁; ဖိလိပ္ပိ ၂:၃၊ ၄။
၇၊ ၈။ (က) ယေရှုသည် နှိမ့်ချမှုကို မည်သို့သင်ယူခဲ့သနည်း။ (ခ) ယေရှုသည် တပည့်ဖြစ်လာမည့်သူများကို မည်သို့ဖိတ်ခေါ်ထားသနည်း။
၇ ယေရှု၏ထူးခြားသောပုံသက်သေကို ပေါလု ဤသို့အလေးပေးဖော်ပြခဲ့၏–“ယေရှုခရစ်၌ရှိသော ထိုစိတ်သဘောကို သင်တို့၌လည်းရှိစေကြလော့။ ထိုသခင်သည် ဘုရားသခင်၏သဏ္ဌာန်တော်နှင့် ပြည့်စုံတော်မူသည်ဖြစ်၍ ဘုရားသခင်နှင့်ပြိုင်သောအမှုကို လုယူခြင်းအမှုဟူ၍ မထင်မမှတ်လျက်ပင် မိမိအသရေကိုစွန့်၍ အစေခံကျွန်၏သဏ္ဌာန်ကို ယူဆောင်လျက် လူကဲ့သို့သောအဖြစ်၌ ဖွားမြင်ခြင်းကိုခံတော်မူ၏။ ထိုသို့ လူ၏ဂုဏ်အင်္ဂါလက္ခဏာနှင့်ပြည့်စုံလျက် အသေခံခြင်းသာမဟုတ်၊ လက်ဝါးကပ်တိုင်မှာ အသေခံခြင်းတိုင်အောင် အစေကျွန်ခံ၍ ကိုယ်ကိုကိုယ်နှိမ့်ချတော်မူ၏။”—ဖိလိပ္ပိ ၂:၅-၈။
၈ အချို့က ‘နှိမ့်ချမှုကို ယေရှု ဘယ်လိုသင်ယူခဲ့သလဲ’ ဟုမေးပေမည်။ အရာခပ်သိမ်းကိုဖန်ဆင်းရာ အတိုင်းမသိကာလတစ်လျှောက် ‘ကျွမ်းကျင်လုပ်သား’ အဖြစ် ယေရှုအမှုဆောင်စဉ် ကောင်းကင်ခမည်းတော်နှင့် ရင်းရင်းနှီးနှီးပေါင်းသင်းခဲ့ရခြင်း အကျိုးတစ်ခုဖြစ်သည်။ (သု. ၈:၃၀၊ ကဘ) ဧဒင်တွင် ပုန်ကန်မှုဖြစ်ပြီးနောက် ဘုရားသခင်၏သားဦးသည် အပြစ်သားများနှင့် ကိုယ်တော်ဆက်ဆံပုံကို သိမြင်ခွင့်ရခဲ့သည်။ သို့ဖြစ်၍ ယေရှုသည် ကမ္ဘာပေါ်ရှိခဲ့စဉ်က ခမည်းတော်နည်းတူ နှိမ့်ချမှုတင်ပြပြီး ဤသို့ဖိတ်ခေါ်ခဲ့သည်– “ငါ့ထမ်းပိုးကိုတင်၍ ထမ်းကြလော့။ ငါ့ထံ၌ နည်းခံကြလော့။ ငါသည် နူးညံ့သိမ်မွေ့နှိမ့်ချသော စိတ်သဘောရှိ၏။ သင်တို့စိတ်နှလုံးသည် သက်သာခြင်းကိုရလိမ့်မည်။”—မဿဲ ၁၁:၂၉; ယောဟန် ၁၄:၉။
၉။ (က) ကလေးများတွင် ချစ်ခင်စရာကောင်းသော အဘယ်အရာကို ယေရှုတွေ့မြင်ခဲ့သနည်း။ (ခ) ယေရှုသည် ကလေးတစ်ဦးကိုအသုံးပြု၍ အဘယ်သင်ခန်းစာပေးခဲ့သနည်း။
၉ ယေရှုသည် စစ်မှန်သည့်နှိမ့်ချစိတ်ရှိသောကြောင့် ကလေးများပင် ကိုယ်တော်ကို ကြောက်မည့်အစား ခင်တွယ်ကြ၏။ ကိုယ်တော်လည်း ကလေးများကို ချစ်ခင်တွယ်တာကြောင်းပြကာ သူတို့ကိုအရေးစိုက်ခဲ့သည်။ (မာကု ၁၀:၁၃-၁၆) ယေရှုသည် ကလေးများကို အဘယ်ကြောင့် စိတ်ဝင်စားပြီး ချစ်ခင်ခဲ့ရသနည်း။ လူကြီးများဖြစ်နေသည့် ကိုယ်တော်၏တပည့်အချို့ တစ်ခါတစ်ရံမတင်ပြကြသော နှစ်လို့ဖွယ်အရည်အသွေးများ ထိုကလေးတို့တွင်ရှိ၍ဖြစ်သည်။ ကလေးများသည် လူကြီးတို့အား ကိုယ့်ထက်သာသည်ဟု ရှုမြင်တတ်ကြသည်မှာ လူအများသိဖြစ်သည်။ ထိုသို့ဖြစ်ကြောင်း သူတို့မေးသည့် မေးခွန်းများစွာက ဖော်ပြသည်။ လူကြီးများနှင့်စာလျှင် ကလေးတို့သည် သွန်သင်ရပိုလွယ်ကူသည်။ လူကြီးများလောက် မာနမကြီးတတ်ကြပါ။ တစ်ခါက ယေရှုသည် ကလေးတစ်ဦးကိုခေါ်ကာ တပည့်များကို ဤသို့မိန့်ဆိုခဲ့၏– “ငါအမှန်ဆိုသည်ကား၊ သင်တို့သည် ပြောင်းလဲ၍ သူငယ်ကဲ့သို့မဖြစ်လျှင် ကောင်းကင်နိုင်ငံတော်သို့ မရောက်ရကြ။” ထို့နောက် ကိုယ်တော်က “အကြင်သူသည် ဤသူငယ်ကဲ့သို့ မိမိကိုမိမိနှိမ့်ချအံ့၊ ထိုသူသည် ကောင်းကင်နိုင်ငံတော်၌ သာ၍ကြီးမြတ်လိမ့်မည်” ဟုဆက်မိန့်ဆိုသည်။ (မဿဲ ၁၈:၃၊ ၄) “ကိုယ်ကိုကိုယ်ချီးမြှောက်သောသူမည်သည်ကား နှိမ့်ချခြင်းသို့ရောက်လတ္တံ့။ ကိုယ်ကိုကိုယ်နှိမ့်ချသောသူမည်သည်ကား ချီးမြှောက်ခြင်းသို့ရောက်လတ္တံ့” ဟူသောစည်းမျဉ်းကို ယေရှုချမှတ်ခဲ့သည်။—လုကာ ၁၄:၁၁; ၁၈:၁၄; မဿဲ ၂၃:၁၂။
၁၀။ အဘယ်မေးခွန်းများကို ကျွန်ုပ်တို့သုံးသပ်ကြမည်နည်း။
၁၀ ယင်းအမှန်တရားကြောင့် အရေးကြီးသည့်မေးခွန်းများ ပေါ်ပေါက်လာသည်။ ကျွန်ုပ်တို့ထာဝရအသက်ရနိုင်ရေးသည် စစ်မှန်သောနှိမ့်ချမှု တင်ပြခြင်းအပေါ် တစ်စိတ်တစ်ဒေသမူတည်သည်မှန်သော်လည်း ခရစ်ယာန်များ နှိမ့်ချမှုတင်ပြဖို့ တစ်ခါတစ်ရံ အဘယ်ကြောင့်ခက်ခဲရသနည်း။ မာန်မာနကိုချိုးနှိမ်ကာ နှိမ့်ချမှုပြ၍ စမ်းသပ်မှုများကိုရင်ဆိုင်ရန် အဘယ်ကြောင့်ခက်ခဲရသနည်း။ စစ်မှန်သောနှိမ့်ချမှု မွေးမြူရာတွင် အောင်မြင်ရန် အဘယ်အရာက အကူအညီပေးမည်နည်း။—ယာကုပ် ၄:၆၊ ၁၀။
နှိမ့်ချမှုရှိရန် အဘယ်ကြောင့် ခက်ခဲရကြောင်း
၁၁။ နှိမ့်ချမှုရှိရန် ကြိုးစားနေရခြင်းသည် အဘယ်ကြောင့် အံ့ဩစရာမဟုတ်သနည်း။
၁၁ သင်သည် နှိမ့်ချမှုရှိဖို့ ကြိုးစားနေရပါက သင်တစ်ဦးတည်း မဟုတ်ပါ။ ၁၉၂၀ ပြည့်နှစ်က ဤမဂ္ဂဇင်းတွင် နှိမ့်ချမှုရှိဖို့လိုသည့် ကျမ်းစာအကြံပြုချက်အကြောင်း ဤသို့ဆွေးနွေးတင်ပြခဲ့သည်– “နှိမ့်ချမှုကို သခင်အရှင် အလွန်တန်ဖိုးထားကြောင်း ကျွန်ုပ်တို့ သိမြင်လာသည်နှင့်အမျှ တပည့်စစ်တပည့်မှန်အားလုံး ယင်းအရည်အသွေးကို နေ့စဉ်တင်ပြရန် အားပေးခံရသင့်သည်။” ထို့နောက် ဤသို့ပွင့်လင်းစွာဝန်ခံထားသည်– “ယင်းကျမ်းစာဆုံးမစကားများ ရှိလျက်ပင် လူ့သဘာဝသည် မည်မျှအထိ မူမမှန်သနည်းဟူမူ နှိမ့်ချခြင်းနှင့်ပတ်သက်လျှင် သခင့်လူမျိုးဖြစ်လာပြီး သခင့်လမ်းစဉ်ကိုလိုက်သူတို့သည် အခြားအရာတို့ထက် ဤကိစ္စတွင် အခက်အခဲပိုတွေ့ကြောင်း၊ ပိုတွန်းလှန်ရကြောင်း တွေ့ရှိရသည်။” ခရစ်ယာန်စစ်များသည် နှိမ့်ချမှုရှိရန် ကြိုးစားအားထုတ်ရသည့်အကြောင်းတစ်ရပ်ကို ယင်းကဖော်ပြသည်။ ကျွန်ုပ်တို့၏အပြစ်ရှိလူ့သဘာဝအရ အလွန်အကျွံ ချီးမွမ်းခံလိုသောကြောင့်ဖြစ်သည်။ ယင်းသို့ဖြစ်ရခြင်းမှာ ကျွန်ုပ်တို့သည် တစ်ကိုယ်ကောင်းဆန်သည့် အပြစ်သားမောင်နှံ အာဒံနှင့်ဧဝတို့၏ သားစဉ်မြေးဆက် ဖြစ်နေကြခြင်းကြောင့်တည်း။—ရောမ ၅:၁၂။
၁၂၊ ၁၃။ (က) ခရစ်ယာန်များ နှိမ့်ချမှုမတင်ပြနိုင်ရန် ဤလောက,က မည်သို့တားဆီးသနည်း။ (ခ) နှိမ့်ချမှုမွေးမြူရန် ကြိုးစားရာ၌ ပိုမိုခက်ခဲစေရန် မည်သူလုပ်ဆောင်နေသနည်း။
၁၂ နှိမ့်ချမှုပြဖို့ခက်ခဲရသည့် နောက်အကြောင်းရင်းတစ်ခုမှာ သူတစ်ပါးထက်သာရန် အားပေးအားမြှောက်ပြုနေသူတို့ ဝန်းကျင်တွင် အသက်ရှင်နေကြရ၍ဖြစ်၏။ ဤလောက၏အဓိကရည်မှန်းချက်များတွင် “ကိုယ်ကာယတပ်မက်ခြင်း၊ မျက်စိတပ်မက်ခြင်း” ကိုပြေစေခြင်းနှင့် ‘လောကစည်းစိမ်၌ဝါကြွားခြင်း’ တို့ပါဝင်သည်။ (၁ ယောဟန် ၂:၁၆) အဆိုပါလောကလိုအင်ဆန္ဒ၏ လွှမ်းမိုးမှုကိုခံမည့်အစား ယေရှု၏တပည့်များသည် မျက်စိကိုရိုးရှင်းစေကာ ဘုရားသခင့်အလိုတော်ဆောင်ခြင်းအပေါ် အာရုံစိုက်သင့်သည်။—မဿဲ ၆:၂၂-၂၄၊ ၃၁-၃၃; ၁ ယောဟန် ၂:၁၇။
၁၃ နှိမ့်ချစိတ်မွေးမြူကာ ယင်းကိုတင်ပြဖို့ ခက်ခဲရသည့် တတိယအကြောင်းရင်းမှာ ထောင်လွှားမှု၏ပင်ရင်း စာတန်သည် ဤကမ္ဘာကိုအုပ်စိုးနေသောကြောင့်ဖြစ်၏။ (၂ ကောရိန္သု ၄:၄; ၁ တိမောသေ ၃:၆) စာတန်သည် မိမိ၏ဉာဉ်ဆိုးများ တိုးပွားပျံ့နှံ့အောင် လှုံ့ဆော်နေသည်။ ဥပမာ၊ စာတန်သည် ယေရှုအား ‘တိုင်းနိုင်ငံနှင့် ထိုတိုင်းနိုင်ငံတို့၏ဘုန်းစည်းစိမ်’ ပေးမည်ဟုကမ်းလှမ်းကာ မိမိကို ကိုယ်တော်ဝတ်ပြုစေရန် ကြိုးစားခဲ့သည်။ နှိမ့်ချမှုအမြဲရှိသောယေရှုသည် စာတန်ကမ်းလှမ်းရာကို ခပ်ပြတ်ပြတ်ငြင်းပယ်ခဲ့သည်။ (မဿဲ ၄:၈၊ ၁၀) အလားတူပင်၊ ခရစ်ယာန်များကိုလည်း ဘုန်းအသရေရှိသူများဖြစ်လိုကြရန် စာတန်သွေးဆောင်နေသည်။ သို့သော် နှိမ့်ချသောခရစ်ယာန်များမူ ယေရှု၏ပုံသက်သေကိုတုပကာ ယေဟောဝါအား ဂုဏ်တင်ချီးမွမ်းကြသည်။—မဿဲ ၄:၈၊ ၁၀။
စစ်မှန်သောနှိမ့်ချမှု မွေးမြူ၍ တင်ပြခြင်း
၁၄။ ဟန်ဆောင်နှိမ့်ချခြင်းဟူသည် အဘယ်နည်း။
၁၄ ကောလောသဲအသင်းတော်ထံ တမန်တော်ပေါလု စာရေးသည့်အခါ လူတို့အထင်ကြီးစေရန် ဟန်ဆောင်နှိမ့်ချခြင်းဟု သူဖော်ပြခဲ့သော သဘောထားမရှိစေရန် သတိပေးခဲ့သည်။ ဟန်ဆောင်နှိမ့်ချသူများသည် ဝိညာဉ်ရေးကောင်းသူများမဟုတ်ချေ။ အမှန်မှာ သူတို့သည် မာန်မာနထောင်လွှားသူများဖြစ်ကြ၏။ (ကောလောသဲ ၂:၁၈) ထိုသို့ဟန်ဆောင်နှိမ့်ချသူတို့အကြောင်း ယေရှုဖော်ပြခဲ့သည်။ ဖာရိရှဲများ၏ ဟိတ်ဟန်ထုတ်ဆုတောင်းခြင်း၊ လူမြင်ကောင်းအောင် ညှိုးငယ်သောမျက်နှာထားဖြင့် အစာရှောင်ခြင်းအကျင့်တို့ကို ယေရှုပြစ်တင်ရှုတ်ချခဲ့သည်။ သို့ဖြစ်၍ ကျွန်ုပ်တို့၏ကိုယ်ပိုင်ဆုတောင်းချက်များကို ဘုရားသခင်တန်ဖိုးထားစေလိုလျှင် နှိမ့်ချစွာတောင်းလျှောက်သင့်သည်။—မဿဲ ၆:၅၊ ၆၊ ၁၆။
၁၅။ (က) နှိမ့်ချမှုအမြဲရှိရန် အဘယ်အရာပြုလုပ်နိုင်သနည်း။ (ခ) နှိမ့်ချခြင်းဆိုင်ရာ ပုံနမူနာကောင်းအချို့ကား အဘယ်နည်း။
၁၅ ခရစ်ယာန်များသည် နှိမ့်ချမှု၏ အကောင်းဆုံးပုံနမူနာရှင်များဖြစ်ကြသော ယေဟောဝါဘုရားသခင်နှင့် ယေရှုခရစ်တို့ကို အမြဲသတိရနေခြင်းဖြင့် စစ်မှန်သောနှိမ့်ချမှုကို အမြဲမွေးမြူရန် အကူအညီရကြသည်။ ဤသို့ပြုခြင်းတွင် ကျမ်းစာနှင့် ‘သစ္စာနှင့်သတိပညာရှိကျွန်’ ပြင်ဆင်ပေးသော ကျမ်းစာလေ့လာမှုအထောက်အကူပြုစာပေများကို ပုံမှန်လေ့လာခြင်းပါဝင်သည်။ (မဿဲ ၂၄:၄၅) ခရစ်ယာန်ကြီးကြပ်မှူးများသည် ‘ညီအစ်ကိုတို့ကို မထီမဲ့မြင်ပြု၍ မာနထောင်လွှားခြင်း’ မရှိကြရန် ထိုသို့လေ့လာဖို့ အလွန်အရေးကြီး၏။ (တရားဟောရာ ၁၇:၁၉၊ ၂၀; ၁ ပေတရု ၅:၁-၃) နှိမ့်ချသောကြောင့် ကောင်းချီးခံစားခဲ့ရသည့် ရုသ၊ ဟန္န၊ ဧလိရှဗက်နှင့် အခြားပုဂ္ဂိုလ်များစွာ၏ပုံနမူနာကို သုံးသပ်ကြည့်ပါ။ (ရုသ ၁:၁၆၊ ၁၇; ၁ ဓမ္မရာဇဝင် ၁:၁၁၊ ၂၀; လုကာ ၁:၄၁-၄၃) ဒါဝိဒ်၊ ယောရှိ၊ နှစ်ခြင်းဆရာယောဟန်နှင့် တမန်တော်ပေါလုတို့ကဲ့သို့ နှိမ့်ချမှုရှိခဲ့သော ထင်ပေါ်ကျော်ကြားသူများ၏ ပုံနမူနာကောင်းများကိုလည်း စဉ်းစားကြည့်ပါ။ (၂ ရာဇဝင်ချုပ် ၃၄:၁၊ ၂၊ ၁၉၊ ၂၆-၂၈; ဆာလံ ၁၃၁:၁; ယောဟန် ၁:၂၆၊ ၂၇; ၃:၂၆-၃၀; တမန်တော် ၂၁:၂၀-၂၆; ၁ ကောရိန္သု ၁၅:၉) မျက်မှောက်ခေတ် ခရစ်ယာန်အသင်းတော်တွင်တွေ့ရသော နှိမ့်ချမှုရှိသူများ၏ ပုံနမူနာများလည်း ရှိပါသေးသည်။ ထိုပုံနမူနာများကို တွေးတောဆင်ခြင်ခြင်းဖြင့် ခရစ်ယာန်စစ်များသည် “အချင်းချင်း တစ်ယောက်အောက်တစ်ယောက် နှိမ့်ချလျက်နေ” နိုင်ကြပါလိမ့်မည်။—၁ ပေတရု ၅:၅။
၁၆။ ခရစ်ယာန်အမှုဆောင်လုပ်ငန်းက နှိမ့်ချမှုရှိရန် မည်သို့ကူညီပေးသနည်း။
၁၆ ခရစ်ယာန်အမှုဆောင်လုပ်ငန်းတွင် မှန်မှန်ပါဝင်ခြင်းကလည်း နှိမ့်ချမှုရှိစေသည်။ အိမ်များနှင့် အခြားနေရာများတွင် တွေ့ရှိသောသူစိမ်းတို့အား ဘုရားသခင့်နိုင်ငံတော်သတင်းဟောပြောသောအခါ နှိမ့်ချစိတ်က ထိရောက်မှုရှိစေသည်။ အထူးသဖြင့် အိမ်ရှင်တို့က သတင်းတရားကိုကြားကြားချင်း အရေးမစိုက်၊ ရိုင်းစိုင်းစွာတုံ့ပြန်ကြသောအခါဖြစ်သည်။ ကျွန်ုပ်တို့၏ယုံကြည်ချက်များကို မေးမြန်းစစ်ဆေးလာကြသောအခါ “နူးညံ့သောသဘော၊ ကြောက်ရွံ့သောသဘောနှင့်” ပြန်ဖြေဆိုနိုင်ရန် နှိမ့်ချမှုက အကူအညီပေးပါလိမ့်မည်။ (၁ ပေတရု ၃:၁၅) ဘုရားသခင်၏ နှိမ့်ချမှုရှိသောကျေးကျွန်များသည် ဒေသအသစ်များသို့ပြောင်းရွှေ့ပြီး ယဉ်ကျေးမှုနှင့် လူနေမှုအဆင့်အတန်းမတူသူများကို အကူအညီပေးခဲ့ကြပြီ။ အဆိုပါအမှုဆောင်များသည် သတင်းကောင်းဟောပြောခြင်းကို ထိရောက်စေမည့် ဘာသာစကားအသစ်ကို ခက်ခက်ခဲခဲသင်ယူကြရာတွင် နှိမ့်ချမှုတင်ပြကြရပေမည်။ တကယ်ချီးမွမ်းထိုက်ပေစွ။—မဿဲ ၂၈:၁၉၊ ၂၀။
၁၇။ အဘယ်ခရစ်ယာန်တာဝန်များကို နှိမ့်ချမှုဖြင့်ထမ်းဆောင်ရန် လိုသနည်း။
၁၇ မိမိအကျိုးထက် သူတစ်ပါးအကျိုးကို နှိမ့်ချစွာဖြင့် ဦးစားပေးသယ်ပိုးကာ ခရစ်ယာန်တာဝန်များကို ကျေပွန်ခဲ့ကြသူများစွာရှိသည်။ ဥပမာ၊ ခရစ်ယာန်ဖခင်တစ်ဦးသည် သားသမီးများကို ထိရောက်စွာ ကျမ်းစာသင်ပေးဖို့ ကြိုတင်ပြင်ဆင်နိုင်ရန် အချိန်ယူရပေမည်။ ထိုသို့ပြုရန် နှိမ့်ချမှုလိုသည်။ သားသမီးများသည်လည်း မစုံလင်သောမိဘတို့ကို ရိုသေလေးစားစွာ နာခံမှုပြရန် နှိမ့်ချမှုရှိရပေမည်။ (ဧဖက် ၆:၁-၄) မယုံကြည်သူခင်ပွန်းရှိသည့် ဇနီးများလည်း “ကြောက်ရွံ့ခြင်းနှင့် စင်ကြယ်သောအကျင့်” ဖြင့် မိမိတို့အိမ်ထောင်ဖက်များအား အမှန်တရားကိုနှစ်သက်လာစေရန် ကြိုးစားကြသည့်အခါ အောက်ကျို့ကြရ၏။ (၁ ပေတရု ၃:၁၊ ၂) နာမကျန်းဖြစ်နေသော ဇရာအိုမိဘများကို မေတ္တာဖြင့် ဂရုစိုက်စောင့်ရှောက်ပေးရာတွင်လည်း နှိမ့်ချမှုနှင့်အနစ်နာခံစိတ်တို့သည် များစွာအထောက်အကူဖြစ်သည်။—၁ တိမောသေ ၅:၄။
နှိမ့်ချမှုက ပြဿနာများ ပြေလည်စေ
၁၈။ နှိမ့်ချမှုက ပြဿနာကို မည်သို့ပြေလည်စေနိုင်သနည်း။
၁၈ ဘုရားသခင်၏ လူသားကျေးကျွန်အားလုံးသည် မစုံလင်ကြချေ။ (ယာကုပ် ၃:၂) တစ်ခါတစ်ရံ ခရစ်ယာန်နှစ်ဦးစပ်ကြား စိတ်ဝမ်းကွဲခြင်း၊ နားလည်မှုလွဲခြင်းတို့ ဖြစ်ပေါ်တတ်သည်။ တစ်ဦးကိုတစ်ဦး မကျေမနပ်ဖြစ်စရာ ခိုင်လုံသောအကြောင်းရှိပေမည်။ သို့သော် ဤအကြံပြုချက်ကို လိုက်နာခြင်းဖြင့် ပြဿနာပြေလည်သွားလေ့ရှိသည်– “တစ်ယောက်၌တစ်ယောက် အပြစ်တင်စရာအခွင့်ရှိလျှင် အချင်းချင်းသည်းခံ၍ အပြစ်ကိုလွှတ်ကြလော့။ ယေဟောဝါသည် သင်တို့၏အပြစ်ကို လွှတ်တော်မူသကဲ့သို့ ထိုနည်းတူပြုကြလော့။” (ကောလောသဲ ၃:၁၃၊ ကဘ) ယင်းအကြံပြုချက်အတိုင်းလိုက်နာဖို့ မလွယ်ကူသည်မှာ မှန်သော်လည်း နှိမ့်ချစိတ်ရှိပါက ယင်းကိုလိုက်နာနိုင်သည်။
၁၉။ ကျွန်ုပ်တို့ကို စိတ်ထိခိုက်စေသူတစ်ဦးထံ ချဉ်းကပ်၍ စကားပြောဆိုတော့မည်ဆိုလျှင် အဘယ်အရာကို စိတ်စွဲမှတ်ထားသင့်သနည်း။
၁၉ တစ်ခါတစ်ရံ အပြစ်တင်စရာအကြောင်းမှာ ခိုင်လုံလွန်းလှ၍ လျစ်လျူရှုရန်မဖြစ်နိုင်ဟု ခရစ်ယာန်တစ်ဦး ယူဆပေမည်။ သို့ဖြစ်လျှင် ပြစ်မှားသည်ဟု မိမိယူဆထားသူထံ ပြန်လည်သင့်မြတ်လိုစိတ်ဖြင့် ချဉ်းကပ်နိုင်ရန် နှိမ့်ချမှုက ကူညီပေးမည်။ (မဿဲ ၁၈:၁၅) တစ်ခါတစ်ရံ ခရစ်ယာန်ချင်း ပြဿနာမပြေလည်နိုင်သည့် အကြောင်းရင်းတစ်ခုမှာ တစ်ဦးဦး သို့မဟုတ် နှစ်ဦးစလုံးက မိမိမှားပါသည်ဟု မဝန်ခံလိုသည်အထိ မာနကြီးလွန်းခြင်းဖြစ်သည်။ သို့မဟုတ် ပြန်လည်သင့်မြတ်မှုရှိရန် အစပြုလုပ်ဆောင်သူက ကိုယ်သာမှန်သည်ဟူသည့်သဘော၊ အပြစ်ရှာလိုသည့်သဘောဖြင့် ချဉ်းကပ်သောကြောင့် ဖြစ်ပေမည်။ သို့သော် စစ်မှန်သောနှိမ့်ချစိတ်က သဘောထားကွဲလွဲမှုများစွာကို ပြေလည်စေရန် အထောက်အကူများစွာပြုနိုင်၏။
၂၀၊ ၂၁။ နှိမ့်ချမှုရှိရန် အကောင်းဆုံးအကူအညီတစ်ခုကား အဘယ်နည်း။
၂၀ နှိမ့်ချစိတ်မွေးမြူရာတွင် ဘုရားသခင်နှင့် ဝိညာဉ်တော်အကူအညီရရှိရန် ဆုတောင်းခြင်းသည် အဓိကဖြစ်သည်။ ဘုရားသခင်သည် စိတ်နှိမ့်ချသူတို့အား သန့်ရှင်းသောဝိညာဉ်တော်ပေးခြင်းအပါအဝင် မခံစားထိုက်သောကြင်နာမှု ပြတော်မူကြောင်း သတိရပါလေ။ (ယာကုပ် ၄:၆) ထိုကြောင့် ယုံကြည်သူချင်းတစ်ဦးနှင့် သင်စိတ်ဝမ်းကွဲနေမည်ဆိုလျှင် သင့်ဘက်မှ မည်သည့်အမှားကိုမဆို နှိမ့်ချစွာဝန်ခံနိုင်ရန် ယေဟောဝါထံ ဆုတောင်းပါ။ သင့်ကိုစိတ်နာစေသော ပြစ်မှားသူက “တောင်းပန်ပါတယ်” ဟုစိတ်ရင်းမှန်နှင့်ပြောလာသောအခါ နှိမ့်ချစွာခွင့်လွှတ်လိုက်ပါ။ ထိုသို့ပြုရန်ခက်ခဲလျှင် အရိုးစွဲနေသည့် မာနစိတ်ကိုချိုးနှိမ်နိုင်ရန် ယေဟောဝါထံ အကူအညီတောင်းခံပါလေ။
၂၁ နှိမ့်ချခြင်း၏အကျိုးကျေးဇူးများကို သိနားလည်ထားခြင်းက ယင်းအဖိုးထိုက်အရည်အသွေးကို မွေးမြူ၍ ဆက်ထိန်းသိမ်းထားနိုင်ရန် လှုံ့ဆော်ပေးပါလိမ့်မည်။ ထိုသို့ပြုနိုင်ရန် ယေဟောဝါဘုရားသခင်နှင့် ယေရှုခရစ်တို့ ပြသခဲ့သော အလွန်ကောင်းမွန်သည့်ပုံနမူနာများကို တုပနိုင်ကြသည်။ ‘စိတ်နှိမ့်ချခြင်း၊ ထာဝရဘုရားသခင်ကို ကြောက်ရွံ့ခြင်းကျေးဇူးကြောင့် စည်းစိမ်၊ ဂုဏ်အသရေ၊ အသက်ကိုရတတ်၏’ ဟုဘုရားသခင်အာမခံတော်မူသည်ကို မမေ့ကြစို့နှင့်။—သု. ၂၂:၄။
တွေးတောဆင်ခြင်ရန် အချက်များ
• နှိမ့်ချမှုပြရာတွင် အကောင်းဆုံးပုံနမူနာရှင်များကားမည်သူတို့နည်း။
• နှိမ့်ချမှုမွေးမြူရန် အဘယ်ကြောင့်ခက်ခဲသနည်း။
• နှိမ့်ချမှုရှိရန် အဘယ်အရာများက အကူအညီပေးသနည်း။
• အမြဲနှိမ့်ချနေရန် အဘယ်ကြောင့် အလွန်အရေးကြီးသနည်း။
[လေ့လာရန်မေးခွန်းများ]
[စာမျက်နှာ ၂၆ ပါ ရုပ်ပုံ]
ယေရှုသည် အမှန်တကယ်နှိမ့်ချမှုရှိ
[စာမျက်နှာ ၂၈ ပါ ရုပ်ပုံ]
ဤလောကသည် အခြားသူများထက်သာအောင်ကြိုးစားရန် လူတို့ကို အားပေးနေ
[Credit Line]
WHO photo by L. Almasi/K. Hemzǒ
[စာမျက်နှာ ၂၉ ပါ ရုပ်ပုံ]
အမှုဆောင်လုပ်ငန်းတွင်သူစိမ်းများထံချဉ်းကပ်ရန် နှိမ့်ချမှုက အကူအညီပေး
[စာမျက်နှာ ၃၀ ပါ ရုပ်ပုံ]
ကျွန်ုပ်တို့သည် စိတ်ဝမ်းကွဲမှုများကို မေတ္တာနှင့် နှိမ့်ချစွာဖုံးအုပ်ခြင်းဖြင့် ဖြေရှင်းနိုင်
[စာမျက်နှာ ၃၁ ပါ ရုပ်ပုံ]
ခရစ်ယာန်များသည် နည်းလမ်းများစွာဖြင့်နှိမ့်ချမှုပြကြ