‘ဘာသာစကားအမျိုးမျိုးပြောဆိုသူတို့’ သတင်းကောင်းကြားရ
‘ဘာသာစကားအမျိုးမျိုးပြောဆိုသူတို့’ သတင်းကောင်းကြားရ
‘ဘာသာအသီးအသီးကိုပြောဆိုသော လူအမျိုးမျိုးတို့တွင် တစ်ကျိပ်သောလူတို့က ဘုရားသခင်သည် သင်နှင့်အတူရှိတော်မူသည်ဟု အကျွန်ုပ်တို့သည်ကြားသိ၍ သင်တို့နှင့်အတူလိုက်ပါမည်ဟု ဆိုကြလိမ့်မည်။’—ဇာခရိ ၈:၂၃။
၁။ အပြည်ပြည်ဆိုင်ရာ ဘာသာစကားမျိုးစုံဖြင့် ခရစ်ယာန်ဟောပြောခြင်းလုပ်ငန်းအစပြုရန် အသင့်လျော်ဆုံး အခြေအနေနှင့် အချိန်အခါကို ယေဟောဝါမည်သို့ပြင်ဆင်ပေးခဲ့သနည်း။
အသင့်လျော်ဆုံး အခြေအနေနှင့် အချိန်အခါဖြစ်သည်။ စီ.အီး. ၃၃ ခုနှစ်၊ ပင်တေကုတ္တေပွဲနေ့ဖြစ်၏။ လွန်ခဲ့သောအပတ်များကတည်းက ရောမအင်ပါယာတစ်ခွင်ရှိ အနည်းဆုံး ဒေသ ၁၅ ခုနှင့် ထိုထက်မကသောနယ်မြေမှ ဂျူးများနှင့် ဘာသာပြောင်းဝင်လာသူတို့သည် ပသခါပွဲကျင်းပရန် ယေရုရှလင်မြို့သို့ စုရုံးရောက်ရှိလာကြသည်။ အဆိုပါနေ့တွင် သန့်ရှင်းသောဝိညာဉ်တော်နှင့်ပြည့်စုံသော သာမညလူတို့က အင်ပါယာတစ်ခွင်ပြောဆိုသည့် ဘာသာစကားမြောက်မြားစွာဖြင့် သတင်းကောင်းကြွေးကြော်နေကြသည်ကို လူထောင်ပေါင်းများစွာတို့သည် ရှေးခေတ်ဘေဘဲလ်ရဲတိုက်တွင်ကဲ့သို့ ရှုပ်ထွေးမှုမရှိဘဲ ကြားနာ၍ နားလည်သဘောပေါက်ခဲ့ကြသည်။ (တမန်တော် ၂:၁-၁၂) ထိုအခါသမယသည် ခရစ်ယာန်အသင်းတော် မွေးဖွားခြင်းနှင့် ယနေ့ထိတိုင် ဆောင်ရွက်နေဆဲဖြစ်သော အပြည်ပြည်ဆိုင်ရာ ဘာသာစကားမျိုးစုံဖြင့် ပညာပေးခြင်းလုပ်ငန်း၏အစတို့ကို မှတ်သားဖော်ပြသည်။
၂။ ယေရှု၏တပည့်များသည် စီ.အီး. ၃၃ ခုနှစ်၊ ပင်တေကုတ္တေပွဲနေ့တွင် စကားမတူကြသောပရိသတ်ကြီးကို မည်သို့ ‘အံ့အားသင့်’ စေခဲ့သနည်း။
၂ ယေရှု၏တပည့်များသည် ထိုခေတ်သုံး ဂရိဘာသာစကားကို ပြောဆိုနိုင်ဖွယ်ရှိသည်။ ဝတ်ပြုရာအိမ်တော်၌ပြောဆိုသော ဟေဗြဲဘာသာစကားကိုလည်း ပြောဆိုကြသည်။ သို့ရာတွင် သူတို့သည် ထိုပင်တေကုတ္တေပွဲနေ့တွင် စကားမတူသောပရိသတ်ကြီး၏ ဘာသာစကားများကို ပြောဆိုကာ ပရိသတ်ကို “အံ့ဩမိန်းမော” စေခဲ့ကြသည်။ အဘယ်အကျိုးရရှိခဲ့သနည်း။ အရေးအကြီးဆုံး အမှန်တရားများကို မိမိတို့၏မိခင်ဘာသာစကားဖြင့် ကြားရသောအခါ နားထောင်သူတို့ နှလုံးထိမိခဲ့ကြသည်။ ထိုနေ့အကုန်ပိုင်းတွင် တပည့်တော်အုပ်စုလေးသည် လူ ၃,၀၀၀ ကျော်သည့်အုပ်စုကြီးဖြစ်လာလေသည်။—တမန်တော် ၂:၃၇-၄၂။
၃၊ ၄။ တပည့်များသည် ယေရုရှလင်၊ ယုဒနှင့် ဂါလိလဲနယ်တို့မှ ပြောင်းရွှေ့သွားသောအခါ ဟောပြောခြင်းလုပ်ငန်း မည်သို့ကျယ်ပြန့်လာသနည်း။
၃ အဆိုပါဖြစ်ရပ်ဆန်းဖြစ်ပျက်ပြီး မကြာမီ ယေရုရှလင်မြို့တွင် နှိပ်စက်ညှဉ်းပန်းမှုလှိုင်းလုံးကြီး ကျရောက်လာရာ ‘အရပ်ရပ်သို့ကွဲပြားသောသူတို့သည် လှည့်လည်၍ သတင်းကောင်းကို ဟောပြောကြ၏။’ (တမန်တော် ၈:၁-၄) ဥပမာ၊ ဂရိဘာသာစကားပြောသူဖြစ်ပုံရသော ဧဝံဂေလိတရားဟောပြောသူ ဖိလိပ္ပုအကြောင်းကို တမန်တော်ကျမ်း အခန်းကြီး ၈ တွင် ဖတ်ရသည်။ ဖိလိပ္ပုသည် ရှမာရိလူမျိုးများကို သွားရောက်ဟောပြောခဲ့သည်။ ခရစ်တော်အကြောင်း သတင်းတရားကိုလက်ခံသည့် အဲသယောပိအမတ်ကိုလည်း သူဟောပြောခဲ့သည်။—တမန်တော် ၆:၁-၅; ၈:၅-၁၃၊ ၂၆-၄၀; ၂၁:၈၊ ၉။
၄ ခရစ်ယာန်များသည် ယေရုရှလင်၊ ယုဒနှင့် ဂါလိလဲနယ်နိမိတ်ပြင်ပသို့ ပြောင်းရွှေ့နေထိုင်သောအခါ လူမျိုးနှင့် ဘာသာစကားအသစ်ဆိုင်ရာ အတားအဆီးများကို ကြုံတွေ့ခဲ့ကြရသည်။ အချို့တို့သည် ဂျူးများကိုသာ သက်သေခံခဲ့ကြပေမည်။ သို့သော် တပည့်တစ်ဦးဖြစ်သော လုကာက ဤသို့မှတ်တမ်းတင်သည်– “ထိုသူအချို့တို့သည် ကုပရုပြည်သား၊ ကုရေနေပြည်သားဖြစ်၍ အန္တိအုတ်မြို့သို့သွားပြီးလျှင် သခင်ယေရှု၏အကြောင်းတည်းဟူသော ဧဝံဂေလိတရားကို ဟေလေနစ်လူတို့အားဟောပြောကြ၏။”—တမန်တော် ၁၁:၁၉-၂၁။
လူအားလုံးအတွက် မျက်နှာမလိုက်သော ဘုရားသခင်၏သတင်းစကား
၅။ သတင်းကောင်းနှင့်ပတ်သက်၍ ဖန်ဆင်းရှင်မျက်နှာမလိုက်ကြောင်း မည်သို့ထင်ရှားသနည်း။
၅ အဆိုပါတိုးတက်ဖြစ်ပေါ်မှုသည် ဘုရားသခင့်နည်းလမ်းတော်နှင့် ကိုက်ညီပါသည်။ မျက်နှာလိုက်ခြင်းသည် ကိုယ်တော်နှင့် ဆန့်ကျင်ဘက်ဖြစ်သည်။ လူမျိုးခြားတို့အား ရှုမြင်ပုံနှင့်ပတ်သက်၍ ယေဟောဝါ၏ပြုပြင်ပေးခြင်းခံရပြီးနောက် တမန်တော်ပေတရုသည် ကျေးဇူးတင်စွာ ဤသို့မှတ်ချက်ချခဲ့သည်– “အကယ်စင်စစ် ဘုရားသခင်သည် လူမျက်နှာကိုမှတ်တော်မမူ။ လူအမျိုးမျိုးတို့တွင် ဘုရားသခင်ကိုကြောက်ရွံ့၍ တရားသဖြင့်ကျင့်ဆောင်သောသူသည် အထံတော်၌မျက်နှာရသည်ကို ငါသိမြင်၏။” (တမန်တော် ၁၀:၃၄၊ ၃၅; ဆာလံ ၁၄၅:၉) ယခင်က ခရစ်ယာန်များကို နှိပ်စက်ညှဉ်းပန်းခဲ့သော တမန်တော်ပေါလုက “လူအပေါင်းတို့သည် ကယ်တင်ခြင်းသို့ရောက်၍ သမ္မာတရားကိုသိစေခြင်းငှာ ဘုရားသခင်အလိုတော်ရှိ၏” ဟုဆိုရာ၌ ဘုရားသခင်သည် ဘက်လိုက်ခြင်းကင်းတော်မူကြောင်း သူထပ်မံအတည်ပြုခြင်းဖြစ်သည်။ (၁ တိမောသေ ၂:၄) လိင်၊ လူမျိုး၊ နိုင်ငံသား၊ ဘာသာစကားမရွေး ဘုရားသခင့်နိုင်ငံတော်ကို မျှော်လင့်နိုင်ခြင်းက ဖန်ဆင်းရှင်မျက်နှာမလိုက်ကြောင်း ထင်ရှားစေသည်။
၆၊ ၇။ အဘယ်ကျမ်းစာပရောဖက်ပြုချက်များက အပြည်ပြည်ဆိုင်ရာ ဘာသာစကားမျိုးစုံဖြင့် သတင်းကောင်းပျံ့နှံ့မည့်အကြောင်း ကြိုဟောထားသနည်း။
၆ အပြည်ပြည်ဆိုင်ရာ ဤတိုးချဲ့မှုအကြောင်းကို ရာစုနှစ်များစွာက ကြိုဟောထားသည်။ ဒံယေလပရောဖက်ပြုချက်အရ “အရပ်ရပ်တို့၌နေ၍ အသီးသီးအခြားခြားသော ဘာသာစကားကိုပြောသော လူမျိုးတကာတို့ကိုအုပ်စိုးစေခြင်းငှာ ထိုသူ[ယေရှု]သည် နိုင်ငံနှင့်တကွ အာဏာစက်တန်ခိုးကိုရ၏။” (ဒံယေလ ၇:၁၄) ယေဟောဝါ၏နိုင်ငံတော်အကြောင်း သင်ဖတ်ရှုနိုင်ရန် ဤမဂ္ဂဇင်းကို ဘာသာစကားပေါင်း ၁၅၁ ဘာသာဖြင့် ကမ္ဘာတစ်ဝန်း ထုတ်ဝေဖြန့်ချိနေခြင်းက အဆိုပါကျမ်းစာပရောဖက်ပြုချက် ပြည့်စုံကြောင်း ပေါ်လွင်စေပါသည်။
၇ သမ္မာကျမ်းစာက အသက်ကယ်သတင်းတရားကို ဘာသာစကားအမျိုးမျိုးပြောသူတို့ ကြားနာရမည့်အချိန်အကြောင်း ကြိုဟောထားသည်။ စစ်မှန်သောဝတ်ပြုရေးက လူများစွာအား ဆွဲဆောင်မည့်ပုံကို ဇာခရိက ဤသို့ပရောဖက်ပြုခဲ့သည်– “ထိုကာလ၌ ဘာသာအသီးအသီးကိုပြောတတ်သော လူအမျိုးမျိုးတို့တွင် တစ်ကျိပ်သောလူတို့သည် ယုဒလူဖြစ်သောသူ [‘ဘုရားသခင့်ဣသရေလလူမျိုး’ ဝင်၊ ဝိညာဉ်တော်ဖွားခရစ်ယာန်] ၏အဝတ်စွန်းကိုကိုင်လျက် ဘုရားသခင်သည် သင်နှင့်အတူရှိတော်မူသည်ဟု အကျွန်ုပ်တို့သည်ကြားသိ၍ သင်တို့နှင့်အတူလိုက်ပါမည်ဟု ဆိုကြလိမ့်မည်။” (ဇာခရိ ၈:၂၃; ဂလာတိ ၆:၁၆) တမန်တော်ယောဟန်က စိတ်အာရုံတစ်ခု၌ သူမြင်တွေ့ခဲ့ရာကို ဤသို့ပြန်ပြောပြသည်– “အသီးအသီးဘာသာစကားကိုပြောသော လူအမျိုးအနွယ်ခပ်သိမ်းတို့အထဲမှထွက်၍၊ အဘယ်သူမျှမရေတွက်နိုင်သော လူများအပေါင်းတို့သည် ဖြူသောဝတ်လုံကိုဝတ်ဆင်လျက်၊ စွန်ပလွံခက်ကိုကိုင်လျက်၊ ပလ္လင်တော်ရှေ့ သိုးသငယ်ရှေ့မှာရပ်နေကြ၏။” (ဗျာ. ၇:၉) ထိုပရောဖက်ပြုချက်များ တကယ်ဖြစ်လာသည်ကို ကျွန်ုပ်တို့မြင်တွေ့နေရပေပြီ။
လူအမျိုးမျိုးထံရောက်ရှိခြင်း
၈။ အဘယ်မျက်မှောက်ခေတ် အဖြစ်သနစ်ကြောင့် ဟောပြောခြင်းလုပ်ငန်းတွင် ပြုပြင်ပြောင်းလဲစရာလိုလာသနည်း။
၈ မျက်မှောက်ခေတ်တွင် နိုင်ငံပြောင်းနေထိုင်သူ တိုးများလာသည်။ ကမ္ဘာလုံးဆိုင်ရာပေါင်းစပ်ဆောင်ရွက်မှုက ပြောင်းရွှေ့နေထိုင်သည့်ခေတ်ကို မွေးဖွားပေးလိုက်သည်။ စစ်ဖြစ်သောနယ်မြေနှင့် စီးပွားရေးကျဆင်းသည့်ဒေသများမှ လူများစွာတို့သည် ရုပ်ပိုင်းအရ အဆင်ပြေရန် တည်ငြိမ်မှုရှိသောဒေသသို့ ပြောင်းရွှေ့ခဲ့ကြသည်။ နိုင်ငံများစွာတွင် နိုင်ငံပြောင်းရွှေ့နေထိုင်သူများနှင့် ဒုက္ခသည်များ တလိမ့်လိမ့်ဝင်လာခြင်းကြောင့် ဘာသာခြားစကားပြောအုပ်စုများ ပေါ်ပေါက်လာသည်။ သာဓကအနေနှင့် ဖင်လန်နိုင်ငံတွင် ဘာသာစကား ၁၂၀ ကျော်ပြောဆိုကြသည်။ ဩစတြေးလျနိုင်ငံတွင် ဘာသာစကား ၂၀၀ ကျော်သည်။ အမေရိကန်ပြည်ထောင်စုမှ စဲန်ဒယေးဂိုးမြို့တစ်မြို့တည်း၌ပင် ဘာသာစကား ၁၀၀ ကျော်ကို ကြားနိုင်ပေသည်။
၉။ ကျွန်ုပ်တို့နယ်မြေရှိ ဘာသာခြားစကားပြောသူများအပေါ် မည်သို့ရှုမြင်သင့်သနည်း။
၉ ခရစ်ယာန်ဓမ္မအမှုဆောင်များဖြစ်သော ကျွန်ုပ်တို့အနေနှင့် ဘာသာခြားစကားပြောသူများရှိနေခြင်းသည် အမှုဆောင်လုပ်ငန်းအတွက် အဆီးအတားဖြစ်သည်ဟု ရှုမြင်သလော။ လုံးဝမမြင်ပါ။ ထိုသို့မြင်မည့်အစား ယင်းကို ‘ရိတ်ခြင်းအလိုငှာ လယ်ပြင်တို့သည် ဝင်းဝင်းရှိခြင်း၊’ တစ်နည်းအားဖြင့် အမှုဆောင်ရပ်ကွက် ကျယ်လာခြင်းဖြစ်သည်ဟု ယူမှတ်ကြသည်။ (ယောဟန် ၄:၃၅) မည်သည့်နိုင်ငံသားဖြစ်စေ၊ မည်သည့်ဘာသာစကားပြောဆိုသူဖြစ်စေ မိမိတို့၏ဝိညာဉ်ရေးလိုအပ်ချက်ကို သတိပြုမိသူများအား ကြည့်ရှုပြုစုရန် ကျွန်ုပ်တို့ကြိုးစားကြပါသည်။ (မဿဲ ၅:၃) ရလဒ်အနေနှင့် ‘အသီးအသီးဘာသာစကားကိုပြောသောသူ’ တို့မှ ခရစ်တော်၏တပည့်ဖြစ်လာသူအရေအတွက် နှစ်စဉ် တိုးများလာနေသည်။ (ဗျာ. ၁၄:၆) သာဓကအနေနှင့် ၂၀၀၄ ခု၊ ဩဂုတ်လတွင် ဂျာမနီနိုင်ငံရှိ ဟောပြောခြင်းလုပ်ငန်းကို ဘာသာစကား ၄၀ ဖြင့် ဆောင်ရွက်ခဲ့ကြသည်။ ထိုအချိန်တွင် လွန်ခဲ့သောဆယ်နှစ်က ဘာသာစကား ၁၈ မျိုးဖြင့်သာ သတင်းကောင်းဟောပြောခဲ့သော ဩစတြေးလျနိုင်ငံသည် ဘာသာစကား ၃၀ နီးပါးဖြင့် ဟောပြောနေပြီ။ ဂရိနိုင်ငံရှိ ယေဟောဝါသက်သေများသည် ဘာသာခြားစကားပြောသူ လူမျိုး ၂၀ ခန့်တို့ထံရောက်ရှိနေပြီ။ ကမ္ဘာတစ်ဝန်းရှိ ယေဟောဝါသက်သေ ၈၀ ရာခိုင်နှုန်းမျှသည် နိုင်ငံတကာသုံး အင်္ဂလိပ်ဘာသာစကားမဟုတ်ဘဲ အခြားဘာသာစကားတစ်မျိုးမျိုးကို ပြောဆိုကြသည်။
၁၀။ “လူမျိုးတကာ” မှလူတို့အား တပည့်ဖြစ်စေရာတွင် ကြေညာသူတစ်ဦးသည် အဘယ်အခန်းကဏ္ဍမှ ပါဝင်သနည်း။
၁၀ “လူမျိုးတကာတို့ကို ငါ့တပည့်ဖြစ်စေ” ပါဟူသော ယေရှု၏မိန့်မှာချက်သည် အမှန်ပင်ပြည့်စုံနေပါသည်။ (မဿဲ ၂၈:၁၉) ထိုမိန့်မှာချက်ကို စိတ်အားထက်သန်စွာ ထမ်းဆောင်နေကြသော ယေဟောဝါသက်သေများသည် ဘာသာစကား ၄၀၀ ကျော်ဖြင့် စာပေစာတမ်းများကိုထုတ်ဝေကာ နိုင်ငံပေါင်း ၂၃၅ နိုင်ငံ၌ တက်ကြွစွာအမှုဆောင်လျက်ရှိသည်။ လူတို့ထံသတင်းကောင်းရောက်ရှိဖို့ လိုအပ်သောပစ္စည်းများကို ယေဟောဝါ၏အဖွဲ့အစည်းက ထောက်ပံ့ပေးနေသော်လည်း ကျမ်းစာသတင်းတရားကို သူတို့နားအလည်ဆုံး ဘာသာစကားဖြင့် “လူအပေါင်း” ကြားသိစေရန် ဘုရားသခင့်နိုင်ငံတော်ကြေညာသူများက အစပြုလုပ်ဆောင်ရပေမည်။ (ယောဟန် ၁:၇) ဤသို့ စည်းစည်းလုံးလုံးကြိုးပမ်းကြခြင်းကြောင့် ဘာသာစကားအုပ်စုအမျိုးမျိုးမှ သန်းပေါင်းများစွာသောသူတို့သည် သတင်းကောင်းမှ အကျိုးခံစားနိုင်ကြသည်။ (ရောမ ၁၀:၁၄၊ ၁၅) ကျွန်ုပ်တို့ယောက်တိုင်း အလွန်အရေးပါသောအခန်းကဏ္ဍမှ ပါဝင်နေပါသည်။
အခက်အခဲကိုရင်ဆိုင်ခြင်း
၁၁၊ ၁၂။ (က) အဘယ်အခက်အခဲများ ကြုံတွေ့ရမည်နည်း၊ သန့်ရှင်းသောဝိညာဉ်တော်က မည်သို့ကူညီပေးသနည်း။ (ခ) သူတို့၏မိခင်ဘာသာစကားဖြင့် လူတို့ကိုဟောပြောခြင်းသည် အဘယ်ကြောင့်ပို၍ အကျိုးဖြစ်ထွန်းသနည်း။
၁၁ ယနေ့ ဘုရားသခင့်နိုင်ငံတော်ကြေညာသူများစွာတို့သည် ဘာသာခြားစကားကို သင်ယူလိုကြသော်လည်း ဘုရားသခင့်ဝိညာဉ်တော်၏ အံ့ဖွယ်ဆုကျေးဇူးများကို သူတို့မမျှော်ကိုးနိုင်ကြပါ။ (၁ ကောရိန္သု ၁၃:၈) ဘာသာစကားအသစ်တစ်မျိုးကို သင်ယူခြင်းသည် လုပ်ငန်းကြီးတစ်ခုဖြစ်နေသည်။ ဘာသာခြားစကားတစ်မျိုး တတ်မြောက်ထားသူများပင် နောက်ခံနှင့် ယဉ်ကျေးမှုမတူသော ယင်းဘာသာစကားပြောသူများ ကျမ်းစာသတင်းတရားကို နှစ်သက်လက်ခံလာစေရန် မိမိတို့၏စဉ်းစားပုံနှင့် ချဉ်းကပ်ပုံကို ပြုပြင်ပြောင်းလဲဖို့လိုကောင်းလိုမည်။ ထို့ပြင် နိုင်ငံပြောင်းရွှေ့ နေထိုင်ခါစသူများသည် အများအားဖြင့် ရှက်ကြောက်တတ်သောကြောင့် သူတို့စဉ်းစားတွေးခေါ်ပုံကို နားလည်ရန် အတော်ကြိုးပမ်းယူရမည်။
၁၂ သို့ရာတွင် ဘာသာခြားစကားပြောသူများကို ကြိုးစားကူညီပေးရာ၌ သန့်ရှင်းသောဝိညာဉ်တော်သည် ယေဟောဝါ၏ကျေးကျွန်များအလယ်တွင် အလုပ်လုပ်နေဆဲဖြစ်သည်။ (လုကာ ၁၁:၁၃) ဝိညာဉ်တော်သည် အံ့ဖွယ်နည်းဖြင့် ဘာသာစကားအမျိုးမျိုးပြောတတ်စေမည့်အစား ကျွန်ုပ်တို့နှင့်စကားမတူသူများအား ဆက်သွယ်လိုသောဆန္ဒကို ပြင်းပြစေနိုင်သည်။ (ဆာလံ ၁၄၃:၁၀) ကျမ်းစာသတင်းတရားကို လူတို့ကောင်းကောင်းမကျွမ်းသည့် ဘာသာစကားဖြင့် ဟောပြောသွန်သင်ခြင်းသည် သူတို့စိတ်ထဲ ရောက်ကောင်းရောက်နိုင်ပါသည်။ သို့သော် နားထောင်သူတို့၏နှလုံးကို ထိမိဖို့ဆိုလျှင် သူတို့၏အတွင်းအကျဆုံးဆန္ဒ၊ ရည်ရွယ်ချက်နှင့် မျှော်မှန်းချက်များကို ထိထိမိမိဖော်ပြနိုင်သော သူတို့၏မိခင်ဘာသာစကားဖြင့် ဟောပြောခြင်းက ပို၍ထိရောက်လေ့ရှိ၏။—လုကာ ၂၄:၃၂။
၁၃၊ ၁၄။ (က) ဘာသာခြားစကားဖြင့် အမှုဆောင်ရန် လူတချို့ကို အဘယ်အရာက လှုံ့ဆော်ပေးသနည်း။ (ခ) ကိုယ်ကျိုးစွန့်စိတ်ဓာတ်ကို မည်သို့တွေ့ရသနည်း။
၁၃ ကျမ်းစာအမှန်တရားအား လူတို့ကောင်းစွာတုံ့ပြန်ကြသည်ကို တွေ့မြင်ရသောအခါ ဘုရားသခင့်နိုင်ငံတော်ကြေညာသူများစွာတို့သည် နိုင်ငံခြားဘာသာစကားပြော လယ်ကွင်းတွင် အမှုဆောင်လာကြသည်။ မိမိတို့လုပ်ငန်းသည် သာ၍ခက်ခဲပြီး စိတ်ဝင်စားဖွယ်ကောင်းလာသောအခါ တက်ကြွလာသူများလည်းရှိသည်။ “ဥရောပအရှေ့ပိုင်းဒေသမှလာကြသူ အတော်များများမှာ အမှန်တရားကို ဆာငတ်နေကြသည်” ဟု ဥရောပတောင်ပိုင်းဒေသရှိ ယေဟောဝါသက်သေများ၏ ဌာနခွဲရုံးတစ်ခုက ဖော်ပြသည်။ ဤသို့ခံယူတတ်သူများကို ကူညီပေးရခြင်းသည် အလွန်ကျေနပ်စရာပင်။—ဟေရှာယ ၅၅:၁၊ ၂။
၁၄ သို့သော် ဤလုပ်ငန်းတွင် အကျိုးရှိရှိပါဝင်ရန် ဇွဲနှင့် ကိုယ်ကျိုးစွန့်စိတ်ဓာတ်ရှိဖို့လို၏။ (ဆာလံ ၁၁၀:၃) ဥပမာ၊ နိုင်ငံပြောင်းလာသည့် တရုတ်လူမျိုးအုပ်စုငယ်များ သမ္မာကျမ်းစာကို နားလည်စေဖို့ ဂျပန်သက်သေခံမိသားစု အတော်များများသည် မြို့ကြီးပြကြီးများရှိ အဆင်ပြေပြေနေနိုင်သော နေအိမ်များကိုစွန့်ကာ ဝေးခေါင်သည့်ဒေသများသို့ ပြောင်းရွှေ့ကြသည်။ အမေရိကန်ပြည်ထောင်စု အနောက်ဘက်ကမ်းရိုးတန်းမှ ကြေညာသူများသည် ဖိလစ်ပိုင်ရပ်ကွက်ရှိလူတို့နှင့် ကျမ်းစာသင်အံမှုများကျင်းပရန် ကားဖြင့် တစ်နာရီမှ နှစ်နာရီကြာခရီးကို မှန်မှန်သွားကြသည်။ နော်ဝေးနိုင်ငံမှ မောင်နှံစုံတစ်စုံသည် အာဖဂန်နစ္စတန်မှလာသော မိသားစုတစ်စုနှင့် ကျမ်းစာလေ့လာကြသည်။ သက်သေခံမောင်နှံက အင်္ဂလိပ်နှင့် နော်ဝေးဘာသာစကားဖြင့် ကျွန်ုပ်တို့ထံမှ ဘုရားသခင်အဘယ်အရာတောင်းဆိုတော်မူသနည်း *ဘရိုရှာကို အသုံးပြုသည်။ ထိုမိသားစုက သူတို့၏တိုင်းရင်းဘာသာစကားဒါရီနှင့် အတော်ပင်နီးစပ်သော ပါးရှားဘာသာစကားဖြင့် အပိုဒ်များကိုဖတ်သည်။ အင်္ဂလိပ်နှင့် နော်ဝေးဘာသာစကားဖြင့် သူတို့စကားပြောကြသည်။ ဤသို့သောကိုယ်ကျိုးစွန့်စိတ်ဓာတ်နှင့် အလိုက်သင့်ပြောင်းလဲနိုင်စွမ်းတို့ကြောင့် သတင်းကောင်းကို တိုင်းတစ်ပါးသားများ တုံ့ပြန်လာကာ အကျိုးကျေးဇူးများစွာ ဖြစ်ထွန်းခဲ့သည်။ *
၁၅။ ဘာသာစကားမျိုးစုံဖြင့် ဟောပြောခြင်းလုပ်ငန်းတွင် ကျွန်ုပ်တို့အားလုံး မည်သို့ပါဝင်နိုင်ကြသနည်း။
၁၅ ဘာသာစကားမျိုးစုံဖြင့် ဟောပြောသော ဤလုပ်ငန်းတွင် သင်ပါဝင်နိုင်မည်လော။ သင့်နယ်မြေတွင် မည်သည့်တိုင်းတစ်ပါးဘာသာစကားများကို အပြောများကြောင်း ဂရုပြုကြည့်ပါ။ ထို့နောက် ၎င်းဘာသာစကားများဖြင့် ထုတ်ဝေထားသော ဝေစာများနှင့် ဘရိုရှာများဆောင်ထားနိုင်သည်။ ၂၀၀၄ ခုနှစ်တွင် ထုတ်ဝေခဲ့သော လူမျိုးအပေါင်းမှလူတို့အတွက် သတင်းကောင်းစာအုပ်ငယ်သည် ရိုးရှင်း၍ အကျိုးဖြစ်ထွန်းစေသည့် သတင်းတရားကို ဘာသာစကားမျိုးစုံဖြင့် တင်ဆက်ထားရာ ဘုရားသခင့်နိုင်ငံတော်မျှော်လင့်ချက်ကို ပျံ့နှံ့စေရာတွင် အထောက်အကူပြုခဲ့ပြီ။—စာမျက်နှာ ၃၂ ပါ “လူမျိုးအပေါင်းမှလူတို့အတွက် သတင်းကောင်း” ဆောင်းပါးကိုရှု။
‘တိုင်းတစ်ပါးသားဧည့်သည်တို့ကို ချစ်ခြင်း’
၁၆။ ဘာသာခြားစကားပြောသူတို့ကို ကူညီပေးရာတွင် တာဝန်ရှိညီအစ်ကိုများသည် ကိုယ်ကျိုးမဖက်သော စိတ်ဝင်စားမှုကို မည်သို့တင်ပြနိုင်သနည်း။
၁၆ ဘာသာခြားစကားတစ်မျိုးကို ကျွန်ုပ်တို့တတ်သည်ဖြစ်စေ၊ မတတ်သည်ဖြစ်စေ ကျွန်ုပ်တို့အားလုံး မိမိတို့နယ်မြေရှိ တိုင်းတစ်ပါးသားများကို ဝိညာဉ်ရေးရာပညာပေးခြင်းဖြင့် ကူညီနိုင်ပါသည်။ ‘တိုင်းတစ်ပါးသားဧည့်သည်တို့ကို ချစ်’ ရန် မိမိ၏လူမျိုးတော်ကို ယေဟောဝါသွန်သင်ထားသည်။ (တရားဟောရာ ၁၀:၁၈၊ ၁၉) သာဓကအနေနှင့် မြောက်အမေရိကရှိ မြို့ကြီးတစ်မြို့တွင် အသင်းတော်ငါးခုသည် ဘုရားသခင့်နိုင်ငံတော်ခန်းမတစ်ခုတည်း၌ အစည်းအဝေးပြုလုပ်ကြသည်။ အခြားခန်းမများမှာကဲ့သို့ နှစ်စဉ် အစည်းအဝေးအချိန်များ အလှည့်ကျပြောင်းကြရာ တရုတ်အုပ်စုအစည်းအဝေးများမှာ တနင်္ဂနွေနေ့ညပိုင်းသို့ ရောက်သွားသည်။ ထိုသို့သာဆိုလျှင် စားသောက်ဆိုင်၌အလုပ်လုပ်သော နိုင်ငံပြောင်းလာသူများစွာတို့မှာ အစည်းအဝေးတက်နိုင်တော့မည်မဟုတ်။ ထို့ကြောင့် တရုတ်အုပ်စုအစည်းအဝေးများကို တနင်္ဂနွေနေ့စောစောပိုင်းတွင် ကျင်းပနိုင်ဖို့ အခြားအသင်းတော်များမှ အကြီးအကဲများက ကြင်နာစွာ ညှိနှိုင်းပြုပြင်ပေးခဲ့ကြသည်။
၁၇။ ဘာသာခြားစကားပြောအုပ်စုထံ ပြောင်းရွှေ့ကာ အကူအညီပေးရန် အချို့ဆုံးဖြတ်ကြခြင်းကို ကျွန်ုပ်တို့မည်သို့သဘောထားသင့်သနည်း။
၁၇ ဘာသာခြားစကားပြောအုပ်စုများထံ ပြောင်းရွှေ့ကာ သူတို့အား အကူအညီပေးလိုကြသော အရည်အချင်းနှင့် လုပ်ရည်ကိုင်ရည်ရှိညီအစ်ကို၊ ညီအစ်မများကို မေတ္တာရှိကြီးကြပ်မှူးများက အားပေးထောက်ခံကြပါသည်။ အတွေ့အကြုံများသော ဤကျမ်းစာသွန်သင်သူများကို သူတို့၏ဒေသခံအသင်းတော်က လွမ်းဆွတ်ကြမည်ဖြစ်သော်လည်း ကြီးကြပ်မှူးများသည် လုတ္တရနှင့် ဣကောနိမြို့မှ အကြီးအကဲများကဲ့သို့ သဘောပိုက်ကြသည်။ တိမောသေသည် မိမိတို့အသင်းတော်များကို အလွန်အကျိုးပြုသူဖြစ်သော်လည်း ပေါလုနှင့်အတူ တိမောသေလိုက်သွားမည်ကို ထိုအကြီးအကဲများက မတားကြချေ။ (တမန်တော် ၁၆:၁-၄) ထို့ပြင် ဟောပြောခြင်းလုပ်ငန်း၌ ဦးဆောင်နေသူတို့သည် တိုင်းတစ်ပါးသားတို့၏ စိတ်နေသဘောထား၊ ထုံးတမ်းစဉ်လာများ၊ အမူအကျင့်များကြောင့် တွန့်ဆုတ်မသွားကြချေ။ ယင်းအစား ကွဲပြားခြားနားမှုများကို လိုလိုလားလားလက်ခံကြပြီး သတင်းကောင်းဟောပြောနိုင်ရေးအတွက် ဆက်ဆံရေးလမ်းကြောင်းပွင့်ရန် ရှာကြံကြသည်။—၁ ကောရိန္သု ၉:၂၂၊ ၂၃။
၁၈။ ကျွန်ုပ်တို့အားလုံးအတွက် အဘယ်ဆောင်ရွက်စရာလုပ်ငန်းတံခါးကြီး ပွင့်လျက်ရှိသနည်း။
၁၈ ပရောဖက်ပြုထားသည့်အတိုင်းပင် သတင်းကောင်းကို ‘ဘာသာအသီးအသီးကိုပြောဆိုသော လူအမျိုးမျိုးတို့’ အား ဟောပြောနေပါသည်။ နိုင်ငံခြားဘာသာစကားပြော လယ်ကွင်းများတွင် တိုးတက်လာဦးမည့် အလားအလာကောင်းများ ရှိနေဆဲဖြစ်သည်။ လုပ်ရည်ကြံရည်ရှိ ထောင်ပေါင်းများစွာသော ကြေညာသူတို့သည် ဤ “ဆောင်ရွက်စရာလုပ်ငန်းတံခါးကြီး” ကို ဝင်ရောက်နေကြသည်။ (၁ ကောရိန္သု ၁၆:၉၊ ကဘ) သို့သော် အဆိုပါ နယ်မြေများကို ပြုစုပျိုးထောင်ရန် ထို့ထက်မကလိုအပ်ကြောင်း နောက်ဆောင်းပါးက ဖော်ပြပါမည်။
[အောက်ခြေမှတ်ချက်များ]
^ အပိုဒ်၊ 14 ယေဟောဝါသက်သေများထုတ်ဝေသည်။
^ အပိုဒ်၊ 14 အခြားပုံနမူနာများကို ကင်းမျှော်စင် ၂၀၀၄၊ ဧပြီ ၁ ရက်၊ စာမျက်နှာ ၂၄-၈ ပါ “သေးငယ်သောကိုယ်ကျိုးစွန့်ခြင်းက ကြွယ်ဝသောကောင်းချီးများရရှိစေ” ဆောင်းပါးတွင်ရှု။
သင်ရှင်းပြနိုင်သလော
• လူအပေါင်းကို မျက်နှာမလိုက်ခြင်းနှင့်ပတ်သက်၍ ယေဟောဝါအား ကျွန်ုပ်တို့မည်သို့တုပနိုင်သနည်း။
• ကျွန်ုပ်တို့နယ်မြေရှိ ဘာသာခြားစကားပြောသူများကို မည်သို့ရှုမြင်သင့်သနည်း။
• လူများကို သူတို့၏မိခင်ဘာသာစကားဖြင့် ဟောပြောခြင်းသည် အဘယ်ကြောင့်အကျိုးရှိသနည်း။
• ကျွန်ုပ်တို့တွင်ရှိသော တိုင်းတစ်ပါးသားများကို စိတ်ဝင်စားကြောင်း မည်သို့တင်ပြနိုင်သနည်း။
[လေ့လာရန်မေးခွန်းများ]
[စာမျက်နှာ ၂၃ ပါ ရုပ်ပုံ/ မြေပုံ]
(ကားချပ်အပြည့်အစုံကို စာစောင်တွင်ကြည့်ပါ)
ရောမ
ကရေတေကျွန်း
အာရှိပြည်
ဖြုဂိပြည်
ပံဖုလိပြည်
ပုန္တုပြည်
ကပ္ပဒေါကိ
မေသောပေါတာမိပြည်
မေဒိပြည်
ပါသိပြည်
ဧလံပြည်
အာရပ်ပြည်
လိဗုနယ်
အီဂျစ်ပြည်
ယုဒပြည်
ယေရုရှလင်မြို့
[Bodies of water]
မြေထဲပင်လယ်
ပင်လယ်နက်
ပင်လယ်နီ
ပါရှန်ပင်လယ်ကွေ့
[ရုပ်ပုံ]
စီ.အီး. ၃၃၊ ပင်တေကုတ္တေပွဲနေ့တွင် ရောမအင်ပါယာတစ်ခွင်ရှိ ဒေသ ၁၅ ခုနှင့် ထိုထက်မကသောနယ်မြေမှ လူတို့သည် မိမိတို့တိုင်းရင်းဘာသာစကားများဖြင့် သတင်းကောင်းကို ကြားကြရ
[စာမျက်နှာ ၂၄ ပါ ရုပ်ပုံများ]
တိုင်းတစ်ပါးသားများစွာတို့သည် ကျမ်းစာအမှန်တရားကို ကောင်းစွာတုံ့ပြန်ကြ
[စာမျက်နှာ ၂၅ ပါ ရုပ်ပုံ]
ဘာသာစကားငါးမျိုးဖြင့်ဖော်ပြထားသည့် ခန်းမဆိုင်းဘုတ်