မေတ္တာ၊ ယုံကြည်မှုနှင့် နာခံမှုတို့၏သက်သေ
မေတ္တာ၊ ယုံကြည်မှုနှင့် နာခံမှုတို့၏သက်သေ
နယူးယောက်မြို့၊ ဝေါလ်ကီးလ်ရှိ ကင်းမျှော်စင်ခြံတွင် ၂၀၀၅၊ မေလ ၁၆ ရက် နံနက်ခင်းမှာ ကြည်လင်အေးမြနေသည်။ အရုဏ်မတက်မီက ရွာထားသောမိုးကြောင့် ရိတ်ထားသောမြက်ခင်းနှင့် ပန်းခင်းတို့မှာ မိုးစက်လေးများဖြင့် တလက်လက်တောက်နေသည်။ ရေကန်စပ်အနီး ငြိမ်သက်နေသောရေပြင်ပေါ်တွင် ဘဲမကြီးတစ်ကောင်နှင့် ဘဲပေါက်လေးရှစ်ကောင်တို့မှာ ညင်သာစွာကူးခတ်နေကြသည်။ ယင်းတို့၏ သာယာလှပပုံတွင် ဧည့်သည်များ နစ်မျောနေကြသည်။ သူတို့သည် နံနက်ခင်း၏ တည်ငြိမ်အေးချမ်းမှုကို မဖျက်ဆီးလိုသည့်အလား တီးတိုးညင်သာစွာ စကားပြောဆိုနေကြသည်။
ဧည့်သည်များမှာ ကမ္ဘာတစ်ဝန်းရှိ နိုင်ငံပေါင်း ၄၈ နိုင်ငံမှ ယေဟောဝါသက်သေများဖြစ်ကြသည်။ သူတို့သည် ရှုခင်းအလှကိုခံစားရန် လာကြခြင်းမဟုတ်ပေ။ ဝေါလ်ကီးလ်ရှိ အမေရိကန်ဗေသလအဆောက်အအုံတွင် မကြာသေးမီကမှ ထပ်တိုးချဲ့လိုက်သော ကျယ်ဝန်းသည့် အုတ်နီရောင်အဆောက်အအုံအတွင်း ဖြစ်ပျက်နေရာကို စိတ်ဝင်စားကြသည်။ ထိုအဆောက်အအုံအတွင်းရှိ မြင်ကွင်းမှာ တိတ်ဆိတ်ငြိမ်သက်မနေသော်လည်း သူတို့ထပ်၍ အံ့သြရပြန်သည်။
ဧည့်သည်များသည် ရှုပ်ထွေးလှသည့် စက်ယန္တရားကို အပေါ်စီးမှ ကြည့်နေကြသည်။ ပုံနှိပ်စက်ကြီးငါးလုံးသည် ဘောလုံးကွင်း ကိုးကွင်းစာထက် ပိုကြီးသော ချောမွတ်ပြောင်လက်နေသည့် ကွန်ကရစ်ကြမ်းပြင်ပေါ်တွင် နေရာယူထားသည်။ ဤနေရာတွင်ပင် သမ္မာကျမ်းစာ၊ စာအုပ်နှင့် မဂ္ဂဇင်းများကို ပုံနှိပ်သည်။ တစ်လိပ်လျှင် ပေါင် ၃,၈၀၀ လေးသော စက္ကူလိပ်ကြီးများသည် အမြန်မောင်းနှင်နေသော ကုန်တင်ကားဘီးများကဲ့သို့ လည်ပတ်နေသည်။ ၁၄ မိုင်စီရှည်သော စက္ကူလိပ်များကို ပုံနှိပ်ရန် ၂၅ မိနစ်သာကြာသည်။ ဤအချိန်အတောအတွင်း ပုံနှိပ်စက်သည် မဂ္ဂဇင်းများအဖြစ်ခေါက်ချုပ်နိုင်ရန် မင်ကိုအခြောက်ခံပေးပြီး စာရွက်ကိုအအေးခံပေးသည်။ ပုံးများထဲထည့်ပြီး အသင်းတော်များသို့ တင်ပို့နိုင်ရန် ထိုမဂ္ဂဇင်းများသည် လူတစ်ရပ်ကျော်မြင့်သော ရွေ့လျားစက်ခါးပတ်တစ်လျှောက် လျင်မြန်စွာရွေ့လျားနေသည်။ အခြားစက်များမှာ စာအုပ်ဖောင်နံပါတ်များကို ပုံနှိပ်ပေးပြီး ဖောင်နံပါတ်ရိုက်ထားသော ယင်းစာချပ်များသည် ကြမ်းပြင်မှ မျက်နှာကြက်အမြင့်ရှိသော သိုလှောင်သည့်နေရာသို့ အချိန်တိုအတွင်း လျင်မြန်စွာ စုပုံရောက်ရှိသွားသည်။ ထို့နောက် ယင်းတို့ကို စာအုပ်ချုပ်ဌာနသို့ပို့သည်။ လုပ်ငန်းစဉ်တစ်ခုလုံး စည်းချက်ညီညီ၊ တိတိကျကျလုပ်ဆောင်ရန် ကွန်ပျူတာဖြင့် ထိန်းချုပ်ထားသည်။
ဧည့်သည်များသည် ပုံနှိပ်စက်ရုံမှ ထွက်လာပြီးနောက် စာအုပ်ချုပ်ဌာနသို့ လည်ပတ်ကြသည်။ ဤနေရာတွင် အဖုံးထူစာအုပ်များနှင့် အထူးချုပ် ကျမ်းစာအုပ်များကို တစ်ရက်လျှင်အုပ်ရေ ၅၀,၀၀၀ နှုန်းဖြင့် ထုတ်လုပ်လျက်ရှိသည်။ စာအုပ်ဖောင်နံပါတ်များကို အစဉ်လိုက်စီပြီး ချုပ်ကာ ဘေးသားများကိုညှိပေးသည်။ ထို့နောက် အဖုံးများနှင့်တွဲသည်။ အသင့်ချုပ်ပြီးသောစာအုပ်များကို ကတ်ထူပုံးများထဲထည့်ပေးသည်။ ပုံးများကို အလိုအလျောက်တံဆိပ်နှိပ်၊ လိပ်စာတပ်ပြီး သတ်မှတ်ထားသောစင်တွင် စုပုံရောက်ရှိလာသည်။ ထို့ပြင် အဖုံးပျော့စာအုပ်ချုပ်လိုင်းသည် တစ်ရက်လျှင် စာအုပ် ၁၀၀,၀၀၀ ခန့်ကို စုစည်းထုပ်ပိုးသည်။ ယင်းသည်လည်း မရေတွက်နိုင်သောမော်တာများ၊ ရွေ့လျားစက်ခါးပတ်များ၊ ခွေးသွားစိပ်ဘီးများ၊ ဘီးများနှင့် သားရေပြားများ ပါဝင်သော စက်ယန္တရားကမ္ဘာဖြစ်ပြီး ယင်းတို့အားလုံးသည် သမ္မာကျမ်းစာ,စာပေများ ထုတ်ဝေရန် အံ့ဖွယ်အမြန်နှုန်းဖြင့် လည်ပတ်နေသည်။
ပုံနှိပ်စက်များ အလွန်တိကျစွာ လည်ပတ်ခြင်း၊ မြန်နှုန်းအလွန်မြင့်ခြင်းနှင့် အလွန်ခေတ်မီခြင်းတို့သည် ခေတ်သစ်နည်းပညာ၏ အံ့ဖွယ်တစ်ခုဖြစ်သည်။ ယင်းသည် ဘုရားသခင့်လူမျိုးတော်၏ မေတ္တာ၊ ယုံကြည်မှုနှင့် နာခံမှုတို့၏ ထင်ရှားသောသက်သေဖြစ်သည်ကိုလည်း ကျွန်ုပ်တို့တွေ့ရမည်ဖြစ်သည်။ သို့သော် ပုံနှိပ်လုပ်ငန်းများကို ဘရွတ်ကလင်၊ နယူးယောက်မြို့မှ ဝေါလ်ကီးလ်သို့ အဘယ့်ကြောင့်ပြောင်းရွှေ့ခဲ့သနည်း။
အဓိကအကြောင်းရင်းမှာ တစ်နေရာတည်း၌ စုစည်းလုပ်ဆောင်ခြင်းဖြင့် ပုံနှိပ်ခြင်းနှင့် ထုပ်ပို့ခြင်းလုပ်ငန်းများကို ရိုးရှင်းလွယ်ကူစေရန်ဖြစ်သည်။ နှစ်နှင့်ချီ၍ စာအုပ်များကို ဘရွတ်ကလင်တွင် ပုံနှိပ်ထုပ်ပို့ကာ ဝေါလ်ကီးလ်တွင် မဂ္ဂဇင်းများကို ပုံနှိပ်ထုတ်ပို့သည်။ တစ်နေရာတည်းတွင် စုစည်းလိုက်ခြင်းက ဝန်ထမ်းအင်အားသက်သာစေပြီး လှူဒါန်းထားသော ရန်ပုံငွေများကို ချွေတာရာကျသည်။ ထို့ပြင် ဘရွတ်ကလင်ရှိစက်များမှာ သက်တမ်း ကြာနေပြီဖြစ်ရာ အမ်အေအဲန် ရိုးလန်း လစ်သိုမန် ပုံနှိပ်စက်သစ်နှစ်လုံးကို ဂျာမနီမှ ထပ်မှာယူခဲ့သည်။ ထိုစက်များသည် အလွန်ကြီးသောကြောင့် ဘရွတ်ကလင်ရှိစက်ရုံတွင် မဆံ့နိုင်ပေ။
လုပ်ငန်းကို ယေဟောဝါထောက်မ
ပုံနှိပ်လုပ်ငန်း၏ရည်ရွယ်ချက်မှာ ဘုရားသခင့်နိုင်ငံတော်သတင်းကောင်း ပို၍ ပျံ့နှံ့စေရန်ဖြစ်သည်။ ဤလုပ်ငန်းကို အစဦးကတည်းက ယေဟောဝါကောင်းချီးပေးကြောင်း သက်သေထင်ရှားခဲ့ပြီ။ ၁၈၇၉ ခုနှစ်မှ ၁၉၂၂ ခုနှစ်အတွင်း စီးပွားဖြစ်လုပ်ကိုင်သောပုံနှိပ်စက်ရုံများတွင် စာအုပ်များကို ပုံနှိပ်ခဲ့သည်။ ၁၉၂၂ ခုနှစ်တွင် အမှတ် ၁၈၊ ကန်ကော့ဒ်လမ်း၊ ဘရွတ်ကလင်တွင် ခြောက်ထပ်အဆောက်အအုံတစ်ခု ငှားရမ်းပြီး စာအုပ်များပုံနှိပ်ရန် စက်ပစ္စည်းများ ဝယ်ယူခဲ့သည်။ ထိုအချိန်တွင် အချို့သူတို့က ညီအစ်ကိုများ၏ လုပ်ဆောင်နိုင်စွမ်းကို သံသယဝင်ခဲ့ကြသည်။
ထိုသို့ သံသယဝင်သူတစ်ဦးမှာ ကျွန်ုပ်တို့၏ စာအုပ်အများစုကိုပုံနှိပ်ပေးသော ကုမ္ပဏီ၏ဥက္ကဋ္ဌဖြစ်သည်။ ကန်ကော့ဒ်လမ်းရှိ အဆောက်အအုံသို့လာလည်ပတ်စဉ် သူဤသို့ဆိုသည်– “ခင်ဗျားတို့မှာ တကယ့်ကောင်းတဲ့စက်တွေရှိတယ်။ ဒါပေမဲ့ အဲဒီစက်တွေကို ဘယ်လိုကိုင်တွယ်ရမယ်ဆိုတာ ခင်ဗျားတို့ တစ်ယောက်မှမသိကြဘူး။ ခြောက်လအတွင်း စက်တွေအတော်များများ ပျက်စီးကုန်မှာ။ အဲဒီအချိန်ကျမှ ပုံနှိပ်လုပ်ငန်းကို အမြဲလုပ်နေတဲ့ တကယ်ကျွမ်းကျင်သူတွေသာ ဒီလုပ်ငန်းကို လုပ်နိုင်တယ်ဆိုတာ ခင်ဗျားတို့ သိလိမ့်မယ်။”
ထိုအချိန်က ပုံနှိပ်စက်ရုံကြီးကြပ်မှူး ရောဘတ် ဂျေ. မာတင်က ဤသို့ဆိုသည်– “သူပြောတာ သဘာဝကျပါတယ်။ ဒါပေမဲ့ သူက ဘုရားသခင်ကို ဘေးချိတ်ထားတယ်။ ကျွန်တော်တို့နဲ့အတူ ကိုယ်တော်အမြဲရှိတဲ့အတွက် . . . သိပ်မကြာခင်မှာပဲ စာအုပ်တွေကို ပုံနှိပ်နိုင်ခဲ့တယ်။” နောက်အနှစ် ၈၀ အတွင်း ယေဟောဝါသက်သေများသည် ကိုယ်ပိုင်ပုံနှိပ်စက်ဖြင့် သန်းထောင်နှင့်ချီသော စာပေစာတမ်းများကို ပုံနှိပ်ခဲ့သည်။
ထို့နောက် ၂၀၀၂၊ အောက်တိုဘာ ၅ ရက်တွင် ပဲင်စီလ်ဘေးနီးယားရှိ ကင်းမျှော်စင် သမ္မာကျမ်းစာနှင့်ဝေစာအသင်း၏ နှစ်ပတ်လည်အစည်းအဝေး၌ အုပ်ချုပ်ရေးအဖွဲ့က အမေရိကန်ဌာနခွဲရှိ ပုံနှိပ်လုပ်ငန်းများကို ဝေါလ်ကီးလ်သို့ပြောင်းရွှေ့ရန် သဘောတူကြောင်း ကြေညာခဲ့သည်။ ပုံနှိပ်စက်အသစ်နှစ်လုံးကို ၂၀၀၄၊ ဖေဖော်ဝါရီတွင် အရောက်ပို့ပေးရန် မှာယူခဲ့သည်။ ထိုပုံနှိပ်စက်အသစ်များထားနိုင်ရန် ညီအစ်ကိုများသည် ၁၅ လအတွင်းတွင် ပုံနှိပ်စက်ရုံကို ဒီဇိုင်းဆွဲကာ တိုးချဲ့ပြီး အသင့်ဖြစ်နေစေရမည်။ ထို့ပြင် စာအုပ်ချုပ်စက်အသစ်နှင့် ထုပ်ပို့ခြင်းလုပ်ငန်းများအတွက် စက်တပ်ဆင်ခြင်းကို နောက်ထပ်ကိုးလအတွင်းတွင် ပြီးစီးစေရမည်ဖြစ်သည်။ ယင်းအလုပ်ချိန်ဇယားကို ကြားသောအခါ အချို့သူတို့က ဤအချိန်အတွင်း ပြီးစီးနိုင်မည်မဟုတ်ဟု စောဒကတက်ကြသည်။ သို့သော် ယေဟောဝါ၏ကောင်းချီးဖြင့် ပြီးမြောက်နိုင်မည်ကို ညီအစ်ကိုများသိကြသည်။
‘ပျော်ရွှင်စွာ ပူးပေါင်းဆောင်ရွက်လိုစိတ်’
ယေဟောဝါ၏လူမျိုးသည် မိမိတို့ကိုယ်ကို စေတနာစိတ်ဖြင့် ပေးဆက်ကြမည်ကို ညီအစ်ကိုများ သိသောကြောင့် စီမံကိန်းကိုစတင်ခဲ့ကြသည်။ (ဆာလံ ၁၁၀:၃) စီမံကိန်း၏ကြီးကျယ်မှုကြောင့် ဗေသလဆောက်လုပ်ရေးဌာနရှိ လုပ်သားအရေအတွက်ထက် ပို၍လိုအပ်သည်။ အမေရိကန်ပြည်ထောင်စုနှင့် ကနေဒါနိုင်ငံတို့မှ ဆောက်လုပ်ရေးတွင်ကျွမ်းကျင်သော ညီအစ်ကိုညီအစ်မ ၁,၀၀၀ ကျော်သည် တစ်ပတ်မှသုံးလအထိ ယာယီစေတနာ့ဝန်ထမ်းအစီအစဉ်တွင် ပါဝင်အမှုထမ်းကြသည်။ အပြည်ပြည်ဆိုင်ရာအမှုထမ်းများနှင့် စေတနာ့ဝန်ထမ်းအစီအစဉ်များမှ အခြားသူများလည်း စီမံကိန်းတွင်ပါဝင်ရန် ဖိတ်ခေါ်ခံရသည်။ ဒေသန္တရဆောက်လုပ်ရေးကော်မတီမှလည်း အကူအညီများစွာပေးခဲ့သည်။
လူများစွာသည် ဝေါလ်ကီးလ်စီမံကိန်းတွင် စေတနာ့ဝန်ထမ်းနိုင်ရန် ခရီးစရိတ်များစွာကုန်ကျပြီး လောကလုပ်ငန်းမှ ခွင့်ရက်ရှည်ယူခဲ့ရသည်။ သို့သော် သူတို့သည် ပျော်ရွှင်စွာ ကိုယ်ကျိုးစွန့်ခဲ့ကြသည်။ ဗေသလမိသားစုသည် ဤစေတနာ့ဝန်ထမ်းများအတွက် နေရာထိုင်ခင်းနှင့် အစားအစာပြင်ဆင်ပေးခြင်းဖြင့် စီမံကိန်းတွင် တစ်တပ်တစ်အားပါဝင်ခွင့်ရခဲ့ကြသည်။ ဘရွတ်ကလင်၊ ပက်တာစင်နှင့် ဝေါလ်ကီးလ်ရှိ ဗေသလမိသားစုဝင် ၅၃၅ ဦးကျော်တို့သည် သူတို့၏တစ်ပတ်အတွင်း ပုံမှန်တာဝန်များအပြင် စနေနေ့များတွင် စီမံကိန်း၌ လာရောက်စေတနာ့ဝန်ထမ်းကြသည်။ ဤသမိုင်းတွင်မည့် ကြိုးစားလုပ်ဆောင်မှုတွင် ယေဟောဝါလူမျိုးတော်၏ ထောက်ပံ့ကူညီမှု အောင်မြင်ရခြင်းမှာ စီမံကိန်းကို ယေဟောဝါထောက်မနေ၍သာဖြစ်သည်။
အခြားသူတို့မှာ ငွေကြေးလှူဒါန်းခဲ့ကြသည်။ ဥပမာ၊ ညီအစ်ကိုများသည် ကိုးနှစ်သမီး အက်ဘီထံမှ စာတစ်စောင်လက်ခံရရှိခဲ့သည်။ သူဤသို့ရေးသည်– “သိပ်ကောင်းတဲ့စာအုပ်တွေ ထုတ်ဝေပေးတဲ့အတွက် ကျွန်မ တကယ်ကျေးဇူးတင်တယ်။ မကြာခင် ကျွန်မ အဲဒီကို လာလည်မယ်။ နောက်နှစ်လို့ အဖေကပြောတယ်။ အဲဒီအချိန်ကျရင် ကျွန်မ ဘယ်သူလဲဆိုတာသိရအောင် ရင်ထိုးကတ်တစ်ခု တပ်ခဲ့မယ်။ ပုံနှိပ်စက်အသစ်အတွက် ဒေါ်လာ ၂၀ ထည့်ပေးလိုက်ပါတယ်။ ကျွန်မရဲ့မုန့်ဖိုးပါ၊ ဒါပေမဲ့ ညီအစ်ကိုတွေကို ပေးချင်တယ်။”
ညီအစ်မတစ်ဦးက ဤသို့ရေးသည်– “ကျွန်မကိုယ်တိုင်ထိုးထားတဲ့ လက်ထိုးဇာဦးထုပ်လေးတွေကို ကျေးဇူးပြုပြီး လက်ခံပေးပါ။ ဒီဦးထုပ်တွေကို ဝေါလ်ကီးလ် စီမံကိန်းမှာ အလုပ်လုပ်နေတဲ့ လုပ်သားတွေကို ပေးချင်ပါတယ်။ ပြက္ခဒိန်တစ်ခုမှာ ဒီနှစ်ဆောင်းရာသီ အရမ်းအေးမယ်လို့ ခန့်မှန်းထားတယ်။ မှန်,မမှန်တော့ မသိဘူး။ ဒါပေမဲ့ ဝေါလ်ကီးလ်မှာရှိတဲ့ အလုပ်အများစုက အပြင်ဘက်မှာလုပ်ရတာဆိုတော့ ညီအစ်ကိုညီအစ်မတွေရဲ့ခေါင်းကို နွေးနေစေချင်တယ်။ ကျွန်မမှာ ညီအစ်ကိုတွေလိုချင်တဲ့ ကျွမ်းကျင်မှုမျိုးမရှိပေမဲ့ ကျွန်မက ဇာထိုးတတ်တော့ တတ်နိုင်တာနဲ့ လှူဒါန်းဖို့ အဲဒီကျွမ်းကျင်မှုကိုအသုံးပြုမယ်လို့ ဆုံးဖြတ်လိုက်တယ်။” ယင်းစာနှင့်အတူ ဇာထိုးဦးထုပ် ၁၀၆ လုံး ထည့်ပေးလိုက်သည်။
ပုံနှိပ်စက်ရုံသည် အစီအစဉ်ဆွဲထားသည့်အတိုင်း ပြီးစီးခဲ့သည်။ ပုံနှိပ်စက်ရုံကြီးကြပ်ရေးမှူး ဂျွန် လာစန်က “တကယ့်ကို ပျော်ရွှင်တဲ့ ပူးပေါင်းဆောင်ရွက်လိုစိတ်ပါပဲ။ ဒီလုပ်ငန်းကို ယေဟောဝါ ထောက်မနေတယ်ဆိုတာ ဘယ်သူငြင်းဝံ့မှာလဲ။ စီမံကိန်းကြီးဟာ မြန်မြန်ဆန်ဆန်ပြီးသွားတယ်။ ၂၀၀၃၊ မေလတုန်းက ညီအစ်ကိုတွေ အဆောက်အအုံအုတ်မြစ်ချတာကို ရွှံ့ထဲမှာရပ်ကြည့်ခဲ့တာ ကျွန်တော်မှတ်မိသေးတယ်။ နောက်တစ်နှစ်မပြည့်ခင်မှာတော့ အဲဒီနေရာမှာပဲရပ်ပြီး ပုံနှိပ်စက်လည်ပတ်နေတာကို ကျွန်တော် ကြည့်ခဲ့ရတယ်” ဟုပြောပြသည်။
အပ်နှံပွဲအစီအစဉ်
၂၀၀၅၊ မေလ ၁၆၊ တနင်္လာနေ့တွင် လူနေအဆောက်အအုံသုံးခုနှင့်အတူ ပုံနှိပ်စက်ရုံအသစ်အပ်နှံပွဲကို ဝေါလ်ကီးလ်တွင် ကျင်းပခဲ့သည်။ အပ်နှံပွဲအစီအစဉ်ကို ပက်တာစင်၊ ဘရွတ်ကလင်နှင့် ကနေဒါရှိ ဗေသလအဆောက်အအုံများတွင် ဗီဒီယိုဖြင့်ချိတ်ဆက်ထားသည်။ စုစုပေါင်း ၆,၀၄၉ ဦးတက်ရောက်ခဲ့သည်။ ယေဟောဝါသက်သေများ၏ အုပ်ချုပ်ရေးအဖွဲ့ဝင် သီအိုဒေါရ် ဂျဲရက်စ်က သဘာပတိအဖြစ် ဆောင်ရွက်ပြီး ပုံနှိပ်လုပ်ငန်း၏သမိုင်းကို အကျဉ်းချုပ် ပြန်လည်သုံးသပ်သည်။ ဌာနခွဲကော်မတီဝင်ဖြစ်သူ ဂျွန် လာစန်နှင့် ဂျွန် ကီးကော့တ်တို့က လူတွေ့မေးမြန်းခန်းနှင့် ဗီဒီယိုတင်ဆက်မှုများဖြင့် အမေရိကန်ပြည်ထောင်စုရှိ ဆောက်လုပ်ရေးစီမံကိန်းနှင့် ပုံနှိပ်လုပ်ငန်းများ၏သမိုင်းကို ပြန်သုံးသပ်သည်။ အုပ်ချုပ်ရေးအဖွဲ့ဝင် ဂျွန် ဘားရ်က နိဂုံးချုပ်ဟောပြောချက်ပေးပြီး ပုံနှိပ်စက်ရုံအသစ်နှင့် လူနေအဆောက်အအုံသုံးခုကို ယေဟောဝါအားအပ်နှံခဲ့သည်။
နောက်တစ်ပတ်အတွင်းတွင် ပက်တာစင်နှင့်ဘရွတ်ကလင်မှ ဗေသလအိမ်သားများသည် အဆောက်အအုံအသစ်ကို လည်ပတ်ကြည့်ရှုခွင့်ရခဲ့ကြသည်။ စုစုပေါင်း ၅,၉၂၀ ဦး ဖြစ်သည်။
ပုံနှိပ်စက်အပေါ် ကျွန်ုပ်တို့၏အမြင်
အပ်နှံပွဲဟောပြောချက်တွင် ညီအစ်ကို ဂျွန် ဘားရ်က စက်များသည် အထင်ကြီးဖွယ်ကောင်းလှသော်လည်း ယင်းတို့သည် အဓိကမဟုတ်ဘဲ လူများသာအဓိကဖြစ်ကြောင်း ပရိသတ်ကို သတိပေးနှိုးဆော်ခဲ့သည်။ ကျွန်ုပ်တို့ပုံနှိပ်လိုက်သော စာပေစာတမ်းများသည် လူတို့၏အသက်တာအပေါ် များစွာအကျိုးသက်ရောက်မှုရှိသည်။
ပုံနှိပ်စက်အသစ်များသည် တစ်နာရီလျှင် ဝေစာတစ်သန်းပုံနှိပ်နိုင်သည်။ သို့သော် ဝေစာလေးတစ်စောင်သည် လူတစ်ဦး၏အသက်တာအပေါ် အလွန်အကျိုးသက်ရောက်သည်။ ဥပမာ၊ ၁၉၂၁ ခုနှစ်က တောင်အာဖရိကရှိ သံလမ်းထိန်းသိမ်းရေးအဖွဲ့တစ်ဖွဲ့သည် သံလမ်းတစ်လျှောက် အလုပ်လုပ်နေကြသည်။ ထိုအဖွဲ့ထဲမှ ခရစ္စတီးယန်းအမည်ရှိသော လူတစ်ဦးသည် သံလမ်းအောက်တွင်ညှပ်နေသည့် စာရွက်တစ်ရွက်ကို သတိထားမိလိုက်သည်။ ယင်းမှာ ကျွန်ုပ်တို့၏ဝေစာဖြစ်နေသည်။ ခရစ္စတီးယန်းသည် ထိုဝေစာကို စိတ်ဝင်တစားဖတ်ရှုသည်။ ထို့နောက် သားမက်ထံ သုတ်ခြေတင်ပြေးသွားပြီး “ဒီနေ့ ငါအမှန်တရားတွေ့ပြီ” ဟုအားတက်သရော ပြောပြလိုက်သည်။ များမကြာမီ သူတို့သည် ပိုမိုသိလိုသဖြင့် စာရေးဆက်သွယ်ရာ တောင်အာဖရိကဌာနခွဲရုံးက သမ္မာကျမ်းစာ,စာပေများ ထပ်ပို့ပေးလိုက်သည်။ ထိုသူနှစ်ယောက်တို့သည် လေ့လာပြီး နှစ်ခြင်းခံကာ အခြားသူများကို သမ္မာကျမ်းစာအမှန်တရား ဝေမျှခဲ့ကြသည်။ ရလဒ်အနေနှင့် လူများစွာ အမှန်တရားကို လက်ခံခဲ့သည်။ ၁၉၉၀ ပြည့်လွန်နှစ်များအစောပိုင်းမှစ၍ သူတို့၏သားမြေးတစ်ရာကျော်မှာ ယေဟောဝါသက်သေများဖြစ်နေကြပြီ။ ယင်းတို့အားလုံးမှာ လူတစ်ဦးတွေ့ရှိခဲ့သော သံလမ်းပေါ်မှဝေစာတစ်စောင်ကြောင့်ဖြစ်သည်။
ကျွန်ုပ်တို့ပုံနှိပ်လိုက်သော စာပေစာတမ်းများသည် လူများကို အမှန်တရားသိရှိစေပြီး ယင်းတွင် ဆက်တည်မြဲနေစေသည့်အပြင် ပို၍ဇွဲထက်သန်စေကာ ညီအစ်ကိုအသင်းအပင်းကို စည်းလုံးစေသည်ဟု ညီအစ်ကို ဘားရ်က ပြောသည်။ ယင်းတို့ထက် ကျွန်ုပ်တို့အားလုံးဝေငှနေသော စာပေစာတမ်းများသည် ယေဟောဝါဘုရားသခင်၏ ဘုန်းတော်ကို ထင်ရှားစေသည်။
ပုံနှိပ်စက်အပေါ် ယေဟောဝါ၏အမြင်
ညီအစ်ကို ဘားရ်က ပုံနှိပ်စက်ကို ယေဟောဝါမည်သို့ရှုမြင်ကြောင်းလည်း ပရိသတ်အား သုံးသပ်စေသည်။ ကိုယ်တော်သည် ထိုစက်များကို လုံးဝမှီခိုရသည်တော့မဟုတ်ပါ။ ကျောက်ခဲများကိုပင် သတင်းကောင်းဟောစေနိုင်သည်။ (လုကာ ၁၉:၄၀) ထို့ပြင် စက်များ၏ ရှုပ်ထွေးမှု၊ အရွယ်အစား၊ အမြန်နှုန်း၊ လုပ်ဆောင်နိုင်စွမ်းတို့ကို ယေဟောဝါအထင်မကြီးပါ။ အကြောင်းမှာ ကိုယ်တော်သည် စကြဝဠာကြီးကိုပင် ဖန်ဆင်းခဲ့၍ဖြစ်သည်။ (ဆာလံ ၁၄၇:၁၀၊ ၁၁) စာပေစာတမ်းများထုတ်ဝေရန် ပို၍အဆင့်မြင့်သောနည်းလမ်းများကို ယေဟောဝါ သိတော်မူသည်။ လူတို့ မတီထွင် မကြံဆရသေးသောနည်းလမ်းများ၊ လူတို့ စိတ်ပင်မကူးမိသောနည်းလမ်းများကို ကိုယ်တော် သိတော်မူသည်။ သို့ဆိုလျှင် ယေဟောဝါ အမှန်တန်ဖိုးထားသော အဘယ်အရာများကို မြင်တော်မူသနည်း။ ကိုယ်တော့်လူမျိုးတော်၏ တန်ဖိုးရှိအရည်အသွေးများဖြစ်သည့် မေတ္တာ၊ ယုံကြည်မှုနှင့် နာခံမှုတို့ကို ဤပုံနှိပ်စက်တွင် ကိုယ်တော် အမှန်တွေ့မြင်တော်မူသည်။
ညီအစ်ကို ဘားရ်သည် မေတ္တာ၏ကဏ္ဍကို ဤသို့ဥပမာပေး ဖော်ပြခဲ့သည်။ မိန်းကလေးတစ်ဦးသည် သူ့မိဘများအတွက် ကိတ်မုန့်ဖုတ်ပေးရာ မိဘများ ကြည်နူးကြပေမည်။ ကိတ်မုန့်အရသာမည်သို့ပင်ရှိပါစေ မိဘများ အမှန်တန်ဖိုးထားသည်မှာ ကလေး၏ရက်ရောသောအပြုအမူက ဖော်ပြနေသည့် မေတ္တာပင်ဖြစ်သည်။ ထိုနည်းတူ ယေဟောဝါသည် ပုံနှိပ်စက်သစ်ကိုကြည့်ရှုသောအခါ အဆောက်အအုံနှင့် စက်ယန္တရားထက် ကျော်၍မြင်တော်မူသည်။ ယင်းကို မိမိ၏နာမတော်ကိုထောက်၍ ပြသောမေတ္တာအဖြစ် ကိုယ်တော် ရှုမြင်တော်မူသည်။—ဟေဗြဲ ၆:၁၀။
ထို့ပြင် ယေဟောဝါသည် နောဧဆောက်ခဲ့သောသင်္ဘောကို သူ၏ယုံကြည်ခြင်းတင်ပြမှုအဖြစ် ရှုမြင်သကဲ့သို့ ဤပုံနှိပ်စက်ရုံကိုလည်း ကျွန်ုပ်တို့ယုံကြည်ခြင်း၏ ထင်ရှားသောသက်သေအဖြစ် ကိုယ်တော်ရှုမြင်တော်မူသည်။ အဘယ်အရာကို ယုံကြည်ခြင်းနည်း။ ယေဟောဝါကြိုဟောထားရာများ အမှန်တကယ်ဖြစ်ပျက်လာမည်ကို နောဧယုံကြည်ခဲ့သည်။ ကျွန်ုပ်တို့သည် နောက်ဆုံးကာလတွင် အသက်ရှင်နေကြောင်း၊ သတင်းကောင်းသည် ကမ္ဘာပေါ်တွင်ကြေညာနေသော အရေးကြီးဆုံးသတင်းဖြစ်ကြောင်း၊ ယင်းကို လူများကြားရန် အရေးတကြီးလိုအပ်နေကြောင်း ကျွန်ုပ်တို့ ယုံကြည်ကြသည်။ သမ္မာကျမ်းစာသတင်းစကားသည် လူ့အသက်ကို ကယ်တင်နိုင်ကြောင်း ကျွန်ုပ်တို့သိကြသည်။—ရောမ ၁၀:၁၃၊ ၁၄။
ဤပုံနှိပ်စက်တွင် ကျွန်ုပ်တို့၏ နာခံမှုတင်ပြခြင်းကိုလည်း ယေဟောဝါတွေ့မြင်သည်မှာ ယုံမှားဖွယ်မရှိချေ။ ကျွန်ုပ်တို့သိကြသည့်အတိုင်း အဆုံးမရောက်မီ သတင်းကောင်းကို ကမ္ဘာတစ်ဝန်းကြေညာရန် ကိုယ်တော် အလိုရှိသည်။ (မဿဲ ၂၄:၁၄) ယင်းတာဝန်ကျေပွန်ရေးတွင် ဤပုံနှိပ်စက်နှင့် ကမ္ဘာ့အခြားဒေသများရှိ စက်များသည် တစ်ခန်းတစ်ကဏ္ဍမှ ပါဝင်နေကြသည်။
ငွေကြေးလှူဒါန်းခြင်း၊ ဆောက်လုပ်ခြင်းနှင့် ထိုလုပ်ငန်းများကို လုပ်ကိုင်ဆောင်ရွက်ခြင်းတို့တွင် ထင်ဟပ်နေသည့် မေတ္တာ၊ ယုံကြည်မှုနှင့် နာခံမှုတို့သည် နားထောင်လိုသူများကို အမှန်တရားဆက်ကြေညာနေမည့် နေရာဒေသတိုင်းရှိ ယေဟောဝါလူမျိုးတော်၏ ဇွဲရှိရှိလုပ်ဆောင်မှုကိုလည်း ဖော်ကျူးနေပေသည်။
[စာမျက်နှာ ၁၁ ပါ လေးထောင့်ကွက်/ ရုပ်ပုံများ]
အမေရိကန်ပြည်ထောင်စုတွင် ပုံနှိပ်လုပ်ငန်းတိုးချဲ့ခြင်း
၁၉၂၀– အမှတ် ၃၅၊ မာတဲလ်ရိပ်သာလမ်း၊ ဘရွတ်ကလင်မြို့၌ မဂ္ဂဇင်းများကို ပထမဆုံးပတ်လည်ပုံနှိပ်စက်ဖြင့် ပုံနှိပ်ခဲ့သည်။
၁၉၂၂– ပုံနှိပ်စက်ရုံကို အမှတ်၁၈၊ ကန်ကော့ဒ်လမ်းရှိ ခြောက်ထပ်အဆောက်အအုံသို့ ပြောင်းရွှေ့ခဲ့သည်။ ယခုတိုင် စာအုပ်များကို ပုံနှိပ်နေဆဲဖြစ်သည်။
၁၉၂၇– ပုံနှိပ်စက်ရုံကို အမှတ် ၁၁၇၊ အာဒံလမ်း၌ ဆောက်လုပ်သော အဆောက်အအုံသစ်သို့ ပြောင်းရွှေ့ခဲ့သည်။
၁၉၄၉– တိုးချဲ့လိုက်သော ကိုးထပ်အဆောက်အအုံကြောင့် ပုံနှိပ်စက်ရုံအရွယ်အစားမှာ နှစ်ဆဖြစ်လာသည်။
၁၉၅၆– အမှတ် ၇၇၊ စဲန်းလမ်း၌ အဆောက်အအုံအသစ် ဆောက်လိုက်သောအခါ အာဒံလမ်းရှိ ပုံနှိပ်စက်ရုံအရွယ်အစားမှာ ထပ်၍နှစ်ဆဖြစ်လာသည်။
၁၉၆၇– ဆယ်ထပ်အဆောက်အအုံကို တည်ဆောက်လိုက်ပြီး ယင်းသည် မူလအဆောက်အအုံထက် ဆယ်ဆကြီးသော တစ်ခုနှင့်တစ်ခုဆက်သွယ်ထားသည့် ပုံနှိပ်စက်ရုံဖြစ်သည်။
၁၉၇၃– မဂ္ဂဇင်းကိုအဓိကပုံနှိပ်ရန် ဝေါလ်ကီးလ်၌ အရန်ပုံနှိပ်စက်ရုံဆောက်လုပ်ခဲ့သည်။
၂၀၀၄– ပုံနှိပ်ခြင်း၊ စာအုပ်ချုပ်ခြင်းနှင့် ထုပ်ပို့ခြင်းလုပ်ငန်းများအားလုံးကိုအမေရိကန်ပြည်ထောင်စု၊ ဝေါလ်ကီးလ်တွင် စုစည်းခဲ့သည်။