ရာဇဝင်ချုပ်ဒုတိယစောင်မှ ပေါ်လွင်ချက်များ
ယေဟောဝါ၏နှုတ်မြွက်စကားတော်သည် အသက်ရှင်၏
ရာဇဝင်ချုပ်ဒုတိယစောင်မှ ပေါ်လွင်ချက်များ
ရာဇဝင်ချုပ်ဒုတိယစောင်သည် ဣသရေလနိုင်ငံကို ဘုရင်ရှောလမုန် အုပ်စိုးခြင်းအကြောင်းဖြင့် အစပြုထားသည်။ ဤစာစောင်သည် ဗာဗုလုန်ရှိ ပြည်နှင်ခံဂျူးများကိုပြောသော ပါးရှားဘုရင်ကုရု၏ အောက်ပါစကားများဖြင့် နိဂုံးချုပ်ထားသည်– ‘ယုဒပြည်၊ ယေရုရှလင်မြို့၌ အိမ်တော်ကို ငါတည်ဆောက်ရမည်အကြောင်း [ယေဟောဝါ] မှာထားတော်မူပြီ။ သင်တို့တွင် မိမိဘုရားသခင်၏လူ မည်သူမဆို ထိုသူနှင့်အတူ မိမိဘုရားသခင်ရှိတော်မူပါစေသော။ ယုဒပြည် ယေရုရှလင်မြို့သို့တက်သွားစေ။’ (၂ ရာဇဝင်ချုပ် ၃၆:၂၃၊ သမ္မာ) ဤကျမ်းကို ယဇ်ပုရောဟိတ်ဧဇရက ဘီ.စီ.အီး. ၄၆၀ တွင် ရေးသားပြီးစီးခဲ့ကာ ယင်းတွင် ဘီ.စီ.အီး. ၁၀၃၇ မှ ဘီ.စီ.အီး. ၅၃၇ ခုနှစ်အတွင်း ဖြစ်ပျက်ခဲ့ရာများကို ဖော်ပြထားသည်။
ကုရုမင်းသည် ဂျူးများကို ယေရုရှလင်မြို့သို့ပြန်ခွင့်နှင့် ထိုတွင် ယေဟောဝါ၏ဝတ်ပြုရေး ပြန်လည်တည်ထောင်ခွင့် ပေးခဲ့သည်။ သို့သော် နှစ်ပေါင်းများစွာ ဗာဗုလုန်သုံ့ပန်းဖြစ်ခဲ့ခြင်းက သူတို့ကို အကြီးအကျယ် ထိခိုက်နစ်နာစေသည်။ ပြည်တော်ပြန်များသည် သူတို့နိုင်ငံ၏သမိုင်းကြောင်းကို မသိတော့ချေ။ ရာဇဝင်ချုပ်ဒုတိယစောင်သည် ဒါဝိဒ်မင်းမျိုးမှ ဆင်းသက်လာသောဘုရင်များ၏ အုပ်ချုပ်မှုအောက်ရှိ အဖြစ်အပျက်များကို အကျဉ်းချုပ် ရုပ်လုံးဖော်ထားသည်။ စစ်မှန်သောဘုရားသခင်ကို နာခံခြင်း၏ကောင်းချီးများနှင့် မနာခံခြင်း၏ဆိုးကျိုးများကို ပေါ်လွင်စေသောကြောင့် ထိုဇာတ်ကြောင်းကို ကျွန်ုပ်တို့လည်း စိတ်ဝင်စားသင့်သည်။
ဘုရင်တစ်ပါး ယေဟောဝါအိမ်တော် တည်ဆောက်
ယေဟောဝါသည် ဘုရင်ရှောလမုန် စိတ်အားထက်သန်စွာ တောင်းလျှောက်သော ဉာဏ်ပညာနှင့် အသိပညာအပြင် ချမ်းသာကြွယ်ဝမှု၊ ဂုဏ်အသရေကိုလည်း ပေးတော်မူခဲ့သည်။ ဘုရင်သည် ယေရုရှလင်မြို့တွင် ယေဟောဝါအတွက် ခမ်းနားထည်ဝါလှသောအိမ်တော် ဆောက်လုပ်၍ လူများ “ဝမ်းမြောက်ရွှင်လန်း” ကြသည်။ (၂ ရာဇဝင်ချုပ် ၇:၁၀) ရှောလမုန်သည် “မြေကြီးပေါ်မှာရှိသမျှသော ရှင်ဘုရင်တို့ထက် ပညာနှင့်စည်းစိမ်အားဖြင့်လွန်ကဲ၏။”—၂ ရာဇဝင်ချုပ် ၉:၂၂။
ရှောလမုန်သည် ဣသရေလနိုင်ငံကို အနှစ် ၄၀ စိုးစံပြီးနောက် ‘ဘိုးဘေးတို့နှင့်အိပ်ပျော်၍ သားတော်ရောဗောင်သည် ခမည်းတော်အရာ၌နန်းထိုင်၏။’ (၂ ရာဇဝင်ချုပ် ၉:၃၁) စစ်မှန်သောဝတ်ပြုရေးမှ ရှောလမုန် သွေဖည်သွားခြင်းကို ဧဇရမဖော်ပြခဲ့ပါ။ အီဂျစ်ပြည်မှမြင်းများကို ပညာမဲ့စွာသိမ်းယူခြင်းနှင့် ဖာရောဘုရင်၏သမီးတော်အား ထိမ်းမြားခြင်းတို့ကိုသာ အပြစ်တင် ဖော်ပြထားသည်။ ထို့ကြောင့် ဧဇရသည် ဤမှတ်တမ်းကို အပြုသဘောဘက်မှ ဖော်ပြထားသည်။
ကျမ်းစာမေးခွန်းများ အဖြေ–
၂:၁၄—ဤတွင်ဖော်ပြထားသော လက်မှုပညာရှင်၏မျိုးရိုးသည် ၃ ဓမ္မရာဇဝင် ၇:၁၄ တွင်ဖော်ပြထားရာနှင့် အဘယ့်ကြောင့်မတူညီသနည်း။ လက်မှုပညာရှင်၏မိခင်သည် ဒန်အမျိုးဖြစ်သည်။ သို့သော်နဿလိအမျိုးသားတစ်ဦးကို ထိမ်းမြားခဲ့သောကြောင့် ဓမ္မရာဇဝင်တတိယစောင်တွင် သူ့ကို “နဿလိအမျိုး မုဆိုးမ” ဟုခေါ်ထားသည်။ ခင်ပွန်းသေဆုံးပြီးနောက် တုရုအမျိုးသားတစ်ဦးကို ထိမ်းမြားခဲ့ရာ အဆိုပါလက်မှုပညာရှင်မှာ ထိုသူတို့၏သားဖြစ်သည်။
၂:၁၈; ၈:၁၀—ဤအခန်းငယ်များတွင် အမှုကိုကြည့်ရှုစီရင်သောသူနှင့် အမှုတော်ထမ်းများကိုအုပ်သော မှူးမတ်ကြီး အဖြစ်ဆောင်ရွက်သည့် အမှုထမ်းများ၏အရေအတွက်မှာ ၃,၆၀၀ နှင့် ၂၅၀ ဟုဖော်ပြပြီး ၃ ဓမ္မရာဇဝင် ၅:၁၆; ၉:၁၃ အရ သူတို့၏အရေအတွက်မှာ ၃,၃၀၀ နှင့် ၅၅၀ ဖြစ်သည်။ အဘယ့်ကြောင့် အရေအတွက်ကွာခြားရသနည်း။ အမှုထမ်းများ၏ ရာထူးအဆင့် မတူသောကြောင့် ကွာခြားပုံရသည်။ ဖြစ်နိုင်သည်မှာ ရာဇဝင်ချုပ်ဒုတိယစောင်သည် တစ်ပါးအမျိုးသားအမှုထမ်း ၃,၆၀၀၊ ဣသရေလအမှုထမ်း ၂၅၀ ဟုခွဲခြားခဲ့ပြီး ဓမ္မရာဇဝင်တတိယစောင်မူ အမှုကိုကြည့်ရှုစီရင်သောသူ ၃,၃၀၀၊ ရာထူးပိုကြီးသောမှူးမတ်ကြီး ၅၅၀ ဟုခွဲခြားခဲ့ခြင်းဖြစ်ပေမည်။ မည်သို့ပင်ဆိုစေ အမှုတော်ထမ်းများအဖြစ်ထမ်းဆောင်သူတို့၏ စုစုပေါင်းအရေအတွက်မှာ ၃,၈၅၀ ယောက်ဖြစ်သည်။
၄:၂-၄—ကြေးဝါရေကန်၏အောက်ခြေကို ဆောက်လုပ်ရာတွင် အဘယ့်ကြောင့် နွားရုပ်များကို ထည့်သွင်းအသုံးပြုရသနည်း။ သမ္မာကျမ်းစာတွင် နွားသည် အစွမ်းခွန်အားကို ကိုယ်စားပြုသည်။ (ယေဇကျေလ ၁:၁၀; ဗျာ. ၄:၆၊ ၇) တန် ၃၀ လေးသော “ရေကန်” ကြီးကို ထောက်မထားရန် ကြေးနွားရုပ် ၁၂ ကောင်ကိုရွေးချယ်ခြင်းမှာ သင့်တော်လှသည်။ ဤရည်ရွယ်ချက်ဖြင့် နွားရုပ်များကိုပြုလုပ်ခြင်းသည် ဝတ်ပြုရန်အတွက် အရာဝတ္ထုများပြုလုပ်ခြင်းကို တားမြစ်သည့် ဒုတိယပညတ်ကို ချိုးဖောက်ရာမကျပေ။—ထွက်မြောက်ရာ ၂၀:၄၊ ၅။
၄:၅—ကြေးဝါရေကန်သည် ရေမည်မျှဆံ့သနည်း။ ရေကန်သည် ရေဗတ်သုံးထောင် သို့မဟုတ် ရေဂါလံ ၁၇,၄၀၀ ဆံ့သည်။ သို့သော် ပုံမှန်အနေနှင့် ရေကန်၏ သုံးပုံနှစ်ပုံကိုသာ ရေဖြည့်သည်။ ထို့ကြောင့် ဓမ္မရာဇဝင်တတိယစောင် ၇:၂၆ က “ရေဗတ်နှစ်ထောင်ဝင်၏” ဟုဖော်ပြထားသည်။
၅:၄၊ ၅၊ ၁၀—တဲတော်မှ အဘယ်ပစ္စည်းကို ရှောလမုန်၏ဝတ်ပြုရာအိမ်တော်တွင် ပြန်အသုံးပြုသနည်း။ ဝတ်ပြုရာတဲတော်မှ ပဋိညာဉ်သေတ္တာတစ်ခုတည်းကိုသာ ရှောလမုန်၏ဝတ်ပြုရာအိမ်တော်တွင် ထားရှိသည်။ ဝတ်ပြုရာအိမ်တော်တည်ဆောက်ပြီးနောက်ပိုင်း တဲတော်ကို ဂိဗောင်မြို့မှယေရုရှလင်မြို့သို့ သယ်ဆောင်သွားပြီး ထိုတွင် ထားရှိပုံရသည်။—၂ ရာဇဝင်ချုပ် ၁:၃၊ ၄။
ကျွန်ုပ်တို့အတွက် သင်ခန်းစာများ–
၁:၁၁၊ ၁၂။ ယေဟောဝါထံ ရှောလမုန်၏တောင်းလျှောက်မှုက ဉာဏ်ပညာနှင့်အသိပညာကို သူအလွန်ရယူလိုကြောင်း ဖော်ပြသည်။ ကျွန်ုပ်တို့၏ ဆုတောင်းချက်များသည် ကျွန်ုပ်တို့၏နှလုံးထဲရှိရာကို အမှန်တကယ်ဖော်ပြသည်။ ထို့ကြောင့် ဆုတောင်းချက်တွင် ပါဝင်ရာများကို အသေအချာဆန်းစစ်ခြင်းက ပညာရှိရာရောက်သည်။
၆:၄-၆။ ယေဟောဝါ၏ချစ်ခင်ကြင်နာမှုနှင့် ကောင်းမြတ်မှုကို အလွန်တန်ဖိုးထားလေးမြတ်ခြင်းက ကိုယ်တော့်ကို ချစ်မြတ်နိုးမှု၊ ကျေးဇူးတင်လေးမြတ်မှုတို့ဖြင့် ချီးမွမ်းရန် ကျွန်ုပ်တို့ကို လှုံ့ဆော်ပေးသင့်သည်။
၆:၁၈-၂၁။ မည်သည့်အဆောက်အအုံကမျှ ဘုရားသခင်ကို မဆံ့မခံနိုင်သော်လည်း ဝတ်ပြုရာအိမ်တော်သည် ယေဟောဝါအားဝတ်ပြုရေး၏ဗဟိုဖြစ်သည်။ ယနေ့ ယေဟောဝါသက်သေများ၏ ဘုရားသခင့်နိုင်ငံတော်ခန်းမများသည် စစ်မှန်သောဝတ်ပြုရေး၏ဗဟိုဖြစ်သည်။
၆:၁၉၊ ၂၂၊ ၃၂။ ယေဟောဝါသည် ဘုရင်မှအစ တိုင်းပြည်ရှိ အနိမ့်ကျဆုံးသူအပါအဝင် တိုင်းတစ်ပါးသားများ၏ စိတ်ရင်းမှန်ဖြင့်တောင်းလျှောက်သော ဆုတောင်းချက်များကို နားညောင်းတော်မူသည်။ *—ဆာလံ ၆၅:၂။
ဒါဝိဒ်မျိုးရိုးမှ မင်းဆက်များ
စည်းလုံးသောဣသရေလနိုင်ငံသည် မြောက်ပိုင်းဆယ်နွယ်နိုင်ငံ၊ ယုဒနှင့်ဗင်ယာမိန်အမျိုး၏ တောင်ပိုင်းနှစ်နွယ်နိုင်ငံအဖြစ် နှစ်ခြမ်းကွဲသွားသည်။ ဣသရေလနိုင်ငံတစ်ဝန်းရှိ ယဇ်ပုရောဟိတ်များနှင့် လေဝိသားများသည် လူမျိုးရေးစိတ်ဓာတ်ထက် နိုင်ငံတော်ပဋိညာဉ်ကို ဆက်တည်ကြည်ကြပြီး ရှောလမုန်၏သားရောဗောင်ဘက် ရပ်တည်ခဲ့ကြသည်။ ဝတ်ပြုရာအိမ်တော်ဆောက်လုပ်ပြီးစီးပြီး အနှစ် ၃၀ ကျော်အတွင်း ယင်း၏ဘဏ္ဍာများ တိုက်ခိုက်လုယက်ခြင်းခံခဲ့ရသည်။
ရောဗောင်နောက်ပိုင်း ဘုရင် ၁၉ ပါးအနက် ၅ ပါးမှာတည်ကြည်ပြီး ၃ ပါးမှာ အစပိုင်းတွင်တည်ကြည်သော်လည်း နောက်ပိုင်း * ယေဟောဝါကို ယုံကြည်ကိုးစားခဲ့သော ဘုရင်ငါးပါး၏ လုပ်ဆောင်မှုများကို အလေးပေးဖော်ပြထားသည်။ ဟေဇကိ၏ ဝတ်ပြုရာအိမ်တော်လုပ်ငန်းများကို ပြန်လည်သက်ဝင်လှုပ်ရှားလာစေခြင်းနှင့် ပသခါပွဲအတွက် ယောရှိပြင်ဆင်ခြင်းတို့က ယေရုရှလင်တွင် ယေဟောဝါ၏ဝတ်ပြုရေးကို ပြန်လည်တည်ထောင်လိုသောဂျူးများအတွက် အလွန်အားပေးမှုဖြစ်ခဲ့ပေမည်။
မတည်ကြည်တော့ပေ။ တစ်ပါးမှာမူ သူ၏မှားယွင်းသောလမ်းစဉ်မှ ပြန်လှည့်လာခဲ့သည်။ ကျန်ဘုရင်များမှာ ယေဟောဝါရှေ့တော်၌ မကောင်းမှုပြုခဲ့ကြသည်။ကျမ်းစာမေးခွန်းများ အဖြေ–
၁၃:၅—“ဆားနှင့်ယှဉ်သောပဋိညာဉ်” ဟူသည့် အသုံးအနှုန်းက အဘယ်အရာကိုဆိုလိုသနည်း။ ဆားသည် မပုပ်မသိုးအောင် ထိန်းသိမ်းနိုင်သည့်ဂုဏ်သတ္တိကြောင့် မပြောင်းမလဲတည်မြဲခြင်း၏ အမှတ်လက္ခဏာဖြစ်လာခဲ့သည်။ ထို့ကြောင့် “ဆားနှင့်ယှဉ်သောပဋိညာဉ်” သည် တည်မြဲသောသဘောတူညီမှုကို ဆိုလိုသည်။
၁၄:၂-၅—ဘုရင်အာသသည် “မြင့်သောအရပ်” အားလုံးကို ဖယ်ရှားခဲ့သလော။ ဖယ်ရှားခဲ့ပုံမရပါ။ အာသသည် မှားယွင်းသောဝတ်ပြုရေးနှင့် ဆက်နွှယ်နေသည့် မြင့်သောအရပ်တို့ကိုသာ ဖယ်ရှားခဲ့ပြီး ယေဟောဝါအား ဝတ်ပြုသည့်နေရာများကိုမူ မဖယ်ရှားခဲ့ပါ။ အာသစိုးစံချိန်နှောင်းပိုင်းတွင် မြင့်သောအရပ်များကို ထပ်၍ ဆောက်လုပ်ခဲ့ခြင်းလည်းဖြစ်နိုင်သည်။ ယင်းတို့ကို သူ၏သားတော်ယောရှဖတ်က ဖယ်ရှားခဲ့သည်။ အမှန်မှာ ယောရှဖတ်အုပ်စိုးချိန်အတွင်း၌ပင် မြင့်သောအရပ်များသည် အကုန်အစင်ပျောက်ကွယ်မသွားခဲ့ပါ။—၂ ရာဇဝင်ချုပ် ၁၇:၅၊ ၆; ၂၀:၃၁-၃၃။
၁၅:၉; ၃၄:၆—ဣသရေလနိုင်ငံ နှစ်ခြမ်းကွဲသွားခြင်းနှင့်ပတ်သက်ပြီး ရှိမောင်အမျိုး၏ရပ်တည်ချက်ကား အဘယ်နည်း။ ရှိမောင်အမျိုး၏အမွေမြေသည် ယုဒနယ်အတွင်း၌ ရှိသောကြောင့် ပထဝီအနေအထားအရ ယုဒနှင့်ဗင်ယာမိန်နိုင်ငံအတွင်းတွင် ရှိသည်။ (ယောရှု ၁၉:၁) သို့သော် ဘာသာရေးနှင့်နိုင်ငံရေးအရ မြောက်ပိုင်းနိုင်ငံနှင့် ပူးပေါင်းခဲ့သည်။ (၃ ဓမ္မရာဇဝင် ၁၁:၃၀-၃၃; ၁၂:၂၀-၂၄) ထို့ကြောင့် ရှိမောင်အမျိုးကို ဆယ်နွယ်နိုင်ငံဝင်အဖြစ် ထည့်တွက်ကြသည်။
၁၆:၁၃၊ ၁၄—ဘုရင်အာသကို မီးဖြင့် သင်္ဂြိုဟ်ခြင်းလော။ မဟုတ်ပါ။ “အလွန်ကြီးသောမီးရှို့ပွဲ” သည် ဘုရင်အာသကို မီးသင်္ဂြိုဟ်ခြင်းမဟုတ်ဘဲ နံ့သာပေါင်းမီးရှို့ခြင်းဖြစ်သည်။—အောက်ခြေမှတ်ချက်။
၃၅:၃—ယောရှိသည် သန့်ရှင်းသောသေတ္တာတော်ကို အဘယ်မှရသနည်း။ ဆိုးသွမ်းသောဘုရင်တစ်ပါးပါးက သေတ္တာတော်ကို ပြောင်းရွှေ့ခဲ့ခြင်းလော၊ သို့မဟုတ် ယောရှိသည် ဝတ်ပြုရာအိမ်တော် အကြီးအကျယ်ပြုပြင်ချိန်အတွင်း လုံခြုံစိတ်ချရရန် ယင်းကို တခြားနေရာသို့ ပြောင်းရွှေ့လိုက်ခြင်းလောဟူသည်ကို သမ္မာကျမ်းစာတွင် ဖော်ပြမထားပါ။ ရှောလမုန်လက်ထက်နောက်ပိုင်း သေတ္တာတော်နှင့်ပတ်သက်ပြီး သမ္မာကျမ်းစာဖော်ပြသည့် တစ်ခုတည်းသောသမိုင်းမှတ်တမ်းမှာ ယင်းကို ဝတ်ပြုရာအိမ်တော်သို့ ယောရှိ ယူဆောင်လာခြင်းပင်ဖြစ်သည်။
ကျွန်ုပ်တို့အတွက် သင်ခန်းစာများ–
၁၃:၁၃-၁၈; ၁၄:၁၁၊ ၁၂; ၃၂:၉-၂၃။ ယေဟောဝါကို မှီခိုအားထားခြင်းနှင့်ပတ်သက်သည့် အလွန်ကောင်းသောသင်ခန်းစာပါတကား။
၁၆:၁-၅၊ ၇; ၁၈:၁-၃၊ ၂၈-၃၂; ၂၁:၄-၆; ၂၂:၁၀-၁၂; ၂၈:၁၆-၂၂။ တိုင်းတစ်ပါးသားများ သို့မဟုတ် မယုံကြည်သူများနှင့် မိတ်ဖွဲ့ခြင်းသည် ကြေကွဲဖွယ်ဆိုးကျိုးများကို ခံစားရစေသည်။ လောကနှင့် မလိုအပ်ဘဲ မပတ်သက်ခြင်းက ပညာရှိရာရောက်သည်။—ယောဟန် ၁၇:၁၄၊ ၁၆; ယာကုပ် ၄:၄။
၁၆:၇-၁၂; ၂၆:၁၆-၂၁; ၃၂:၂၅၊ ၂၆။ မာနထောင်လွှားမှုက ဘုရင်အာသ၏ဘဝနှောင်းပိုင်းတွင် ဆိုးသွမ်းစွာပြုမူစေသည်။ မာနထောင်လွှားသောစိတ်က ဩဇိမင်းကို ကျဆုံးစေခဲ့သည်။ ဟေဇကိသည် မိမိ၏ဘဏ္ဍာများကို ဗာဗုလုန်သံတမန်များအား ပညာမဲ့စွာနှင့် မာနထောင်လွှားစွာ ပြသခဲ့သည်။ (ဟေရှာယ ၃၉:၁-၇) “မာနသည် ပျက်စီးခြင်းအရင် ထောင်လွှားသောသဘောသည် ရှုတ်ချခြင်းအရင်၌ နေရာကျတတ်၏” ဟုသမ္မာကျမ်းစာက သတိပေးသည်။—သု. ၁၆:၁၈။
၁၆:၉။ ယေဟောဝါသည် မိမိဘက်၌ စုံလင်သောစေတနာစိတ်ရှိသူများကို ကူညီပြီး သူတို့အတွက် မိမိ၏တန်ခိုးတော်ကို အသုံးပြုလိုတော်မူသည်။
၁၈:၁၂၊ ၁၃၊ ၂၃၊ ၂၄၊ ၂၇။ ကျွန်ုပ်တို့သည် ယေဟောဝါနှင့် ကိုယ်တော့်ရည်ရွယ်တော်မူချက်များအကြောင်း ပြောဆိုရာတွင် မိက္ခာကဲ့သို့ ရဲစွမ်းသတ္တိရှိသင့်သည်။
၁၉:၁-၃။ ယေဟောဝါ အမျက်ထွက်အောင် ကျွန်ုပ်တို့ တစ်ခါတစ်ရံ ပြုလုပ်မိသောအခါများ၌ပင် ကိုယ်တော်သည် ကျွန်ုပ်တို့၏ကောင်းကွက်ကို ရှာတော်မူသည်။
၂၀:၁-၂၈။ ယေဟောဝါထံမှ လမ်းညွှန်မှုရရန် ကိုယ်တော်ကို နှိမ့်ချစွာရှာသောအခါ ကိုယ်တော်အတွေ့ခံလိမ့်မည်ကို ကျွန်ုပ်တို့ယုံကြည်စိတ်ချနိုင်သည်။—သု. ၁၅:၂၉။
၂၀:၁၇။ ယေဟောဝါ၏ “ကယ်တင်တော်မူခြင်းကျေးဇူး” ကိုတွေ့မြင်နိုင်ရန် ကျွန်ုပ်တို့သည် ဘုရားသခင့်နိုင်ငံတော်ကို တက်ကြွစွာထောက်ခံရေးတွင် “နေရာယူ [ကဘ]” ရမည်။ ကိစ္စရပ်များကို ကျွန်ုပ်တို့ကိုယ်တိုင် ကိုင်တွယ်ဖြေရှင်းမည့်အစား ယေဟောဝါကို လုံးလုံးလျားလျား ယုံကြည်ကိုးစားလျက် “တည်ကြည်စွာမတ်တတ်နေ” ရမည်။
၂၄:၁၇-၁၉; ၂၅:၁၄။ ရုပ်ပုံကိုးကွယ်ခြင်းသည် ယောရှနှင့်အာမဇိအတွက် ကျော့ကွင်းဖြစ်ခဲ့သည်။ ယနေ့လည်း ရုပ်ပုံကိုးကွယ်ခြင်းသည် လှည့်ဖြားတတ်ပြီး အထူးသဖြင့် ယင်း၏ မသိသာသောပုံစံတစ်မျိုးဖြစ်သည့် လိုဘကြီးခြင်း၊ မျိုးချစ်စိတ်ဓာတ်တို့နှင့် ပတ်သက်လာလျှင်ဖြစ်သည်။—ကောလောသဲ ၃:၅; ဗျာ. ၁၃:၄။
၃၂:၆၊ ၇။ ကျွန်ုပ်တို့လည်း “ဘုရားသခင် ပြင်ဆင်တော်မူသောလက်နက်စုံကို ဝတ်ဆောင်” ၍ ဝိညာဉ်ရေးစစ်ပွဲ ဆက်လက်ဆင်နွှဲနေစဉ် အားယူ၍ရဲရင့်ခြင်းရှိရမည်။—ဧဖက် ၆:၁၁-၁၈။
၃၃:၂-၉၊ ၁၂၊ ၁၃၊ ၁၅၊ ၁၆။ လူတစ်ဦးသည် မှားယွင်းသောလမ်းစဉ်ကို ကျောခိုင်းစွန့်ခွာခြင်းနှင့် မှန်ရာကိုပြုလုပ်ရန် ကြိုးစားတိုက်လှန်ခြင်းဖြင့် စစ်မှန်သောနောင်တကို တင်ပြသည်။ လူတစ်ဦးသည် ဘုရင် မနာရှေကဲ့သို့ ဆိုးသွမ်းခဲ့သူပင်ဖြစ်ပါစေ သူ၏နောင်တစစ်ပေါ်မူတည်ပြီး ယေဟောဝါ၏သနားကြင်နာမှုကို ရနိုင်သည်။
၃၄:၂-၃။ ကလေးဘဝ၏ ဆိုးရွားသော မည်သည့်အခြေအနေမျိုးမဆိုသည် ဘုရားသခင်ကိုသိရှိခြင်းနှင့် ကိုယ်တော့်အလိုတော်ဆောင်ခြင်းအတွက် အတားအဆီးမဖြစ်သင့်ပေ။ ယောရှိ ကလေးဘဝက သူ့ကိုလွှမ်းမိုးခဲ့သော အပြုသဘောသြဇာမှာ အဘိုးဖြစ်သူမနာရှေ၏ နောင်တတရားဖြစ်ပုံရသည်။ ယောရှိအား မည်သည့်အပြုသဘောသြဇာ လွှမ်းမိုးခဲ့ပါစေ ယင်းတို့သည် နောက်ဆုံး ရလဒ်ကောင်းများ ဖြစ်ထွန်းခဲ့သည်။ ကျွန်ုပ်တို့တွင်လည်း ယင်းသို့ ဖြစ်နိုင်ပါသည်။
၃၆:၁၅-၁၇။ ယေဟောဝါသည် သနားကြင်နာပြီး စိတ်ရှည်တော်မူသည်။ သို့သော် ကိုယ်တော်၏သနားကြင်နာမှုနှင့် စိတ်ရှည်မှုတို့မှာ အကန့်အသတ်မဲ့မဟုတ်ချေ။ ဤအစီအစဉ်စနစ်ဆိုးကို ယေဟောဝါ အဆုံးတိုင်စေသည့်အခါ ကပ်ကျော်လွတ်မြောက်လိုပါက ဘုရားသခင့်နိုင်ငံတော်သတင်းကို တလိုတလားတုံ့ပြန်ရမည်။
၃၆:၁၇၊ ၂၂၊ ၂၃ (သမ္မာ)။ ယေဟောဝါ၏နှုတ်ထွက်စကားတော်သည် အမြဲပြည့်စုံမှန်ကန်တော်မူသည်။—၃ ဓမ္မရာဇဝင် ၉:၇၊ ၈; ယေရမိ ၂၅:၉-၁၁။
စာအုပ်တစ်အုပ်က လုပ်ဆောင်ရန် စေ့ဆော်ပေး
‘ယောရှိမင်းသည်လည်း ရွံရှာဖွယ်သောအရာရှိသမျှတို့ကို ဣသရေလအမျိုးသားပိုင်သော ပြည်အရပ်ရပ်တို့မှပယ်ရှား၍ ဣသရေလပြည်၌ နေသောသူအပေါင်းတို့သည် မိမိတို့ဘုရားသခင်ကို ဝတ်ပြုရမည်အကြောင်း စီရင်တော်မူ၏’ ဟု ရာဇဝင်ချုပ်ဒုတိယစောင် ၃၄:၃၃ ကဖော်ပြသည်။ အဘယ်အရာက ယောရှိမင်းအား ထိုသို့လုပ်ဆောင်ရန် စေ့ဆော်ပေးသနည်း။ စာရေးတော်ရှာဖန်သည် အသစ်ရှာဖွေတွေ့ရှိသော ယေဟောဝါ၏ပညတ်တော်စာအုပ်ကို ယောရှိမင်းထံယူလာသောအခါ ဘုရင်က ယင်းကို ကျယ်လောင်စွာဖတ်စေသည်။ ကြားရသောအရာက ယောရှိ၏စိတ်ကို အလွန်ထိမိရာ သူ၏ဘဝတစ်လျှောက်လုံး စစ်မှန်သောဝတ်ပြုရေးကို ထက်သန်စွာ မြှင့်တင်ခဲ့သည်။
ဘုရားသခင့်စကားတော်ကို ဖတ်ရှုခြင်းနှင့် ဖတ်ရှုရာကို တွေးတောဆင်ခြင်ခြင်းက ကျွန်ုပ်တို့အပေါ် အလွန်အကျိုးသက်ရောက်သည်။ ဒါဝိဒ်မျိုးရိုးမှဘုရင်များ၏ မှတ်တမ်းကို တွေးတောဆင်ခြင်ခြင်းက ယေဟောဝါအား ယုံကြည်ကိုးစားခဲ့သူများကို အတုယူစေကာ မကိုးစားခဲ့သူများ၏ အကျင့်ကိုရှောင်ရန် ကျွန်ုပ်တို့အား တွန်းအားပေးသည် မဟုတ်လော။ ရာဇဝင်ချုပ်ဒုတိယစောင်သည် စစ်မှန်သောဘုရားသခင်ကို အကြွင်းမဲ့ဆည်းကပ်ဝတ်ပြုရန်နှင့် ကိုယ်တော်ကို ဆက်တည်ကြည်ရန် ကျွန်ုပ်တို့ကို လှုံ့ဆော်ပေးသည်။ ယင်း၏သတင်းစကားမှာ အမှန်တကယ်အသက်ရှင်ပြီး တန်ခိုးနှင့်ပြုပြင်တတ်သည်။—ဟေဗြဲ ၄:၁၂။
[အောက်ခြေမှတ်ချက်များ]
^ အပိုဒ်၊ 9 ဝတ်ပြုရာအိမ်တော် အပ်နှံခြင်းနှင့်ပတ်သက်သောမေးခွန်းများ၊ ဤအခါသမယတွင် ရှောလမုန်၏ဆုတောင်းချက်မှ အခြားသင်ခန်းစာများကို ၂၀၀၅၊ ဇူလိုင် ၁ ရက်ထုတ် ကင်းမျှော်စင် စာမျက်နှာ ၂၈-၃၁ တွင်ရှု။
^ အပိုဒ်၊ 11 ယုဒဘုရင်များ၏ ဆွေစဉ်မျိုးဆက်စာရင်းကို ၂၀၀၅၊ ဩဂုတ် ၁ ရက်ထုတ် ကင်းမျှော်စင် စာမျက်နှာ ၁၂ တွင်ရှု။
[စာမျက်နှာ ၁၈ ပါ ရုပ်ပုံ]
ကြေးဝါရေကန်၏အောက်ခြေတွင် နွားရုပ်အသုံးပြုထားခြင်းမှာ အဘယ့်ကြောင့် သင့်လျော်ကြောင်း သင်သိပါသလော
[စာမျက်နှာ ၂၁ ပါ ရုပ်ပုံများ]
ယောရှိသည် ကလေးဘဝကကူညီထောက်မမှု အနည်းငယ်သာရခဲ့သော်လည်း ယေဟောဝါအပေါ် တည်ကြည်သူအဖြစ် ကြီးပြင်းလာခဲ့သည်