ခရစ္စမတ်အချိန်အခါ အဓိကအလေးထားရာကား အဘယ်နည်း
ခရစ္စမတ်အချိန်အခါ အဓိကအလေးထားရာကား အဘယ်နည်း
သန်းပေါင်းများစွာသောသူတို့အတွက် ပွဲတော်ရာသီသည် မိသားစုများ၊ မိတ်ဆွေများ အတူရှိချိန်၊ မေတ္တာနှောင်ကြိုး ပြန်လည်ခိုင်မြဲစေချိန်ဖြစ်သည်။ အခြားသူများစွာမူ ယေရှုခရစ် ဖွားမြင်ခြင်းနှင့် လူသားတို့အား ကယ်တင်ခြင်းဆိုင်ရာ ကိုယ်တော့်အခန်းကဏ္ဍကို သုံးသပ်ချိန်ဖြစ်သည်။ နိုင်ငံများစွာနှင့်မတူဘဲ ရုရှားတွင် ခရစ္စမတ်ပွဲကို အမြဲပင် လွတ်လွတ်လပ်လပ် ကျင်းပခွင့်မရှိချေ။ ရာစုနှစ်များစွာတစ်လျှောက် ရုရှားသြသဒေါက်စ်ချာ့ခ်ျသည် ခရစ္စမတ်ပွဲကို လူသိရှင်ကြားကျင်းပခဲ့ကြသော်လည်း ၂၀ ရာစု၏နှစ်အများစုတွင် ထိုသို့ကျင်းပခွင့် မရခဲ့ချေ။ အဘယ်ကြောင့် ထိုသို့ ပြောင်းလဲခဲ့ရသနည်း။
၁၉၁၇ ခုနှစ်တွင် ဗော်ရှီဗစ်ကွန်မြူနစ်တော်လှန်ရေး ပြီးဆုံးသည်နှင့် ဆိုဗီယက်အာဏာရှင်များသည် တစ်နိုင်ငံလုံးတွင် ခက်ထန်သောဘုရားသခင်မဲ့ဝါဒကို ကျင့်သုံးခဲ့သည်။ ခရစ္စမတ်ပွဲတော်ရာသီသည် ယင်းနှင့်ဆက်နွှယ်ရာများနှင့်အတူ မနှစ်မြို့ဖွယ်ရာဖြစ်လာသည်။ နိုင်ငံတော်က ခရစ္စမတ်နှင့် နှစ်သစ်ကူးပွဲတော်နှစ်ခုစလုံးကို ဆန့်ကျင်သည့်ဝါဒ စတင်ဖြန့်ခဲ့သည်။ ခရစ္စမတ်သစ်ပင်နှင့် ဒယက် မရို့ဇ် သို့မဟုတ် စဲန်တာကလော့စ်နှင့်အဓိပ္ပာယ်တူသည့် ရုရှား ဘိုးဘိုးနှင်းဖြူ ကဲ့သို့သော ပွဲတော်ရာသီ၏ ဒေသခံအထိမ်းအမှတ်များကို ဗြောင်ဗြောင်တင်းတင်းပင် ရှုတ်ချခဲ့ကြသည်။
၁၉၃၅ ခုနှစ်တွင် ရုရှားလူမျိုးများ ပွဲတော်ရာသီကျင်းပပုံမှာ လုံးလုံးပြောင်းလဲသွားသည်။ ဆိုဗီယက်အာဏာရှင်များက ဘိုးဘိုးနှင်းဖြူနှင့် ခရစ္စမတ်သစ်ပင်သုံးခြင်း၊ နှစ်သစ်ကူးပွဲကျင်းပခြင်းကို ပြန်ခွင့်ပြုခဲ့သော်လည်း သိသိသာသာကွဲပြားသောနည်းဖြင့်ဖြစ်သည်။ ဘိုးဘိုးနှင်းဖြူသည် လက်ဆောင်များကို ခရစ္စမတ်နေ့တွင်မဟုတ်ဘဲ နှစ်သစ်ကူးနေ့တွင် ယူလာမည်ဟုဆိုသည်။ ထိုနည်းတူ ခရစ္စမတ်သစ်ပင် မဟုတ်တော့ဘဲ နှစ်သစ်ကူးသစ်ပင် ဖြစ်ရမည်။ ဤသို့ဖြင့် ဆိုဗီယက်ပြည်ထောင်စုတွင် ပြောင်းလဲမှုကြီးတစ်ရပ်ဖြစ်ခဲ့သည်။ အမှန်မှာ ခရစ္စမတ်ပွဲကို နှစ်သစ်ကူးပွဲနှင့် အစားထိုးလိုက်ခြင်းဖြစ်သည်။
ခရစ္စမတ်ရာသီသည် ဘာသာရေးရည်ရွယ်ချက်ကင်းမဲ့သည့် လောကပွဲတော်အခါသမယ လုံးလုံးဖြစ်လာလေသည်။ နှစ်သစ်ကူးသစ်ပင်ကို ဘာသာရေးအဆင်တန်ဆာဖြင့်မဟုတ်ဘဲ ဆိုဗီယက်ပြည်ထောင်စု၏ တိုးတက်မှုကိုရုပ်လုံးဖော်သည့် လောကအဆင်တန်ဆာဖြင့် အလှဆင်ကြသည်။ ရုရှားဂျာနယ် ဗက်ခရုဇ် ဇဗီယက်တာ (ကမ္ဘာတစ်လွှား) ကဤသို့ရှင်းပြသည်– “ဆိုဗီယက်ခေတ်၏ နှစ်များတစ်လျှောက် နှစ်သစ်ကူးသစ်ပင်အလှဆင်ခြင်းကို ကြည့်ခြင်းဖြင့် ကွန်မြူနစ်အဖွဲ့အစည်း တည်ထောင်ခြင်း၏သမိုင်းကို ပြန်ခြေရာခံမိစေနိုင်သည်။ ထုတ်နေကျကုန်ပစ္စည်းဖြစ်သော ယုန်၊ ရေခဲချောင်း၊ ပေါင်မုန့်လုံးနှင့်အတူ တံစဉ်များ၊ တူများနှင့် လယ်ထွန်စက်များပုံစံဖြင့် အဆင်တန်ဆာများကို ထုတ်လုပ်ခဲ့ကြသည်။ နောက်ပိုင်းတွင် ယင်းတို့ကို သတ္တုတွင်းအလုပ်သမားများနှင့် ဆိုဗီယက်အာကာသယာဉ်မှူးများ၊ ရေနံတူးစင်များ၊ ဒုံးပျံများနှင့် လကမ္ဘာသုံးယာဉ်ပုံများဖြင့် အစားထိုးခဲ့ကြသည်။”
ခရစ္စမတ်နေ့ကော အသို့နည်း။ ယင်းကို လုံးဝအသိအမှတ်မပြုကြတော့ချေ။ ယင်းအစား ဆိုဗီယက်အာဏာရှင်များက ထိုနေ့ကို သာမန်အလုပ်တက်နေ့အဖြစ် သတ်မှတ်လိုက်သည်။ ခရစ္စမတ်ဘာသာရေးပွဲနေ့ကို ကျင်းပလိုသူများသည် နိုင်ငံတော်၏မနှစ်သက်မှုနှင့် ဆိုးကျိုးများကြုံတွေ့ရနိုင်သည့် အန္တရာယ်များကြားမှ အလွန်သတိကြီးစွာဖြင့် ကျင်းပခဲ့ကြသည်။ မှန်ပါသည်၊ ၂၀ ရာစု ရုရှားနိုင်ငံတွင် ပွဲတော်ရာသီ၏ အဓိကအလေးထားရာများသည် ဘာသာရေးထုံးတမ်းမှ လောကပွဲလမ်းသို့ ပြောင်းလဲခဲ့လေပြီ။
မကြာသေးမီက အပြောင်းအလဲ
၁၉၉၁ ခုနှစ်တွင် ဆိုဗီယက်ပြည်ထောင်စု ပြိုကွဲသွားပြီး လူများ ပိုလွတ်လပ်လာကြသည်။ ဘုရားသခင်မဲ့ဝါဒ ပျောက်ကွယ်သွားသည်။ အသစ်တည်ထောင်ဖွဲ့စည်းလိုက်သော အာဏာပိုင်နိုင်ငံများက ချာ့ခ်ျနှင့် နိုင်ငံတော်ကို ခွဲခြားထားခြင်းဖြင့် သာ၍လောကဆန်လာသည်။ ဘာသာတရားကိုင်းရှိုင်းသူများက ယခု မိမိတို့၏ဘာသာရေး ယုံကြည်ချက်များကို လိုက်စားနိုင်ပြီဟု ယူမှတ်ကြသည်။ ထိုသို့ပြုရန် နည်းလမ်းတစ်ခုမှာ ခရစ္စမတ်ဘာသာရေးပွဲနေ့ကျင်းပခြင်းဟု ဆင်ခြင်ခဲ့ကြသည်။ သို့ရာတွင် မကြာမီပင် ထိုသူတို့မှာ အလွန်စိတ်ပျက်ကြရသည်။ အဘယ်ကြောင့်နည်း။
ပွဲနေ့အခါသမယသည် တစ်နှစ်ပြီးတစ်နှစ် ပို၍စီးပွားရေးဆန်လာသောကြောင့်ဖြစ်သည်။ မှန်ပါသည်၊ အနောက်နိုင်ငံများတွင်ကဲ့သို့ ခရစ္စမတ်ရာသီသည် ကုန်ပစ္စည်းထုတ်လုပ်သူများ၊ လက်ကားရောင်းဝယ်သူများနှင့် ကုန်သည်များ အမြတ်အစွန်းရရန် အကောင်းဆုံးနည်းလမ်းတစ်ခု ဖြစ်လာသည်။ စတိုးဆိုင်မျက်နှာစာများတွင် ခရစ္စမတ်အဆင်တန်ဆာများကို ပေါ်ပေါ်ထင်ထင် ခင်းကျင်းထားကြသည်။ ယခင်က ရုရှားတွင် မရှိခဲ့သော အနောက်တိုင်းပုံစံ ခရစ္စမတ်တေးသံနှင့် ဓမ္မသီချင်းသံများသည် ဈေးဆိုင်များတွင် ပျံ့လွင့်နေ၏။ ဈေးရောင်းသူများသည် ခရစ္စမတ်အဆင်တန်ဆာများထည့်ထားသော အိတ်ကြီးများသယ်ဆောင်ကာ ၎င်းတို့ကုန်ပစ္စည်းများကို မြို့ပတ်ရထားများနှင့် အခြားသယ်ယူပို့ဆောင်ရေးယာဉ်များပေါ်တွင် ရောင်းချကြသည်။ ယင်းတို့သည် ရုရှားတွင် ယခု သင်တွေ့မြင်နေရသည့် အရာဖြစ်သည်။
ယင်းသို့သော စီးပွားရေးအမြတ်ထုတ်မှုကို အပြစ်မမြင်သူများပင် ပွဲတော်ရာသီ၏ အခြားအကြောင်းတစ်ခုကြောင့် စိတ်အနှောင့်အယှက်ဖြစ်နိုင်သည်။ ယင်းမှာ အရက်အလွဲသုံးခြင်းနှင့် ယင်း၏ဆိုးရွားသောအကျိုးဆက်များဖြစ်သည်။ မော်စကိုဆေးရုံတစ်ခုရှိ အရေးပေါ်ဌာနမှ ဆရာဝန်တစ်ဦးက ဤသို့ရှင်းပြသည်– “ဆရာဝန်တွေအတွက်ကတော့ နှစ်သစ်ကူးပွဲရဲ့အဓိပ္ပာယ်ဟာ အများအားဖြင့် အိမ်တွင်းအကြမ်းဖက်မှု၊ အရက်မူးသမားတွေရဲ့ရန်ပွဲတွေနဲ့ မတော်တဆယာဉ်တိုက်မှုတွေကြောင့်ဖြစ်တဲ့ ထိခိုက်ဒဏ်ရာကစလို့ ဓားဒဏ်ရာ၊ သေနတ်ဒဏ်ရာအထိ အနာတရဖြစ်တာကို ဆိုလိုတယ်။” ရုရှားသိပ္ပံပညာတက္ကသိုလ်၏ ရုံးခွဲတစ်ခုမှ အကြီးတန်းသိပ္ပံပညာရှင်တစ်ဦးက ဤသို့ပြောသည်– “အရက်ကြောင့်သေဆုံးသူအရေအတွက် တစ်ရှိန်ထိုးတက်လာတယ်။ ၂၀၀၀ ပြည့်နှစ်ကစပြီး သိသိသာသာမြင့်တက်လာတယ်။ ကိုယ့်ကိုယ်ကိုသတ်သေမှုနဲ့ လူသတ်မှုနှုန်းတွေလည်း မြင့်တက်လာတယ်။”
ဝမ်းနည်းစရာမှာ ရုရှား ပွဲတော်ရာသီအတွင်းတွေ့ရသည့် အဆိုပါအပြုအမူများသည် နောက်အကြောင်းတစ်ခုကြောင့် ပိုမိုဆိုးရွားလာသည်။ အီဇ်ဗက်စ်တီယာ သတင်းစာက “ရုရှားများ ခရစ္စမတ်နှစ်ကြိမ်ကျင်းပကြ” ခေါင်းစီးအောက်၌ ဤသို့ရေးသားဖော်ပြသည်– “ရုရှား ၁၀ ဦးလျှင် ၁ ဦးခန့်သည် ခရစ္စမတ်နှစ်ကြိမ်ကျင်းပကြသည်။ ရုရှားလူထုအမြင်နှင့် ဈေးကွက်သုတေသန စောင့်ကြပ်စစ်ဆေးရေးဌာန၏ စစ်ဆေးမှုက သက်သေပြသည့်အတိုင်း ဖြေဆိုသူ၏ ၈ ရာခိုင်နှုန်းသည် ကက်သလစ်ခရစ္စမတ် ပြက္ခဒိန်အရ ဒီဇင်ဘာ ၂၄ ရက်နှင့် ဩသဒေါက်စ်ပြက္ခဒိန်အရ ဇန်နဝါရီ ၇ ရက်နေ့တွင် ခရစ္စမတ်အကြိုညချမ်းကျင်းပကြကြောင်း ဝန်ခံကြသည်။ . . . အချို့အတွက် ယင်းသည် ခရစ္စမတ်၏ ဘာသာရေးအဓိပ္ပာယ်က အဓိကမဟုတ်ဘဲ ကျင်းပခွင့်ရခြင်းက အဓိကဖြစ်ကြောင်း ထင်ရှားသည်။” *
လက်ရှိကျင်းပပုံသည် ခရစ်တော်အား အမှန်ဂုဏ်တင်သလော
ရှင်းနေသည်မှာ ပွဲတော်ရာသီသည် ဘာသာတရားမဲ့သော အမူအကျင့်များစွာနှင့် ဒွန်တွဲနေ၏။ ယင်းတို့ကြောင့် စိတ်အနှောင့်အယှက်ဖြစ်သူအချို့က ပွဲတော်များကို ဘုရားသခင်နှင့် ခရစ်တော်အား လေးစားသည့်သဘောဖြင့် ကျင်းပသင့်သည်ဟု ယူဆကြပေမည်။ ဘုရားသခင့်နှစ်သက်မှု ရလိုသည့်ဆန္ဒရှိခြင်းသည် ချီးကျူးစရာဖြစ်သည်။ သို့သော် ခရစ္စမတ်ရာသီကို ဘုရားသခင်နှင့် ခရစ်တော် အမှန်နှစ်သက်ပါသလော။ ယင်း၏ဇာစ်မြစ်ကို သုံးသပ်ကြည့်ကြစို့။
သာဓကအနေနှင့် ခရစ္စမတ်အပေါ် ဆိုဗီယက်တို့၏သဘောထားကို လူတစ်ဦး မည်သို့ပင်ရှုမြင်ပါစေ မဟာဆိုဗီယက်စွယ်စုံကျမ်း၌ ဖော်ပြထားသည့် အောက်ပါ သမိုင်းဆိုင်ရာအချက်အလက်များကို စောဒကတက်ဖို့ ခက်ပေမည်– “ခရစ္စမတ်သည် . . . ခရစ်ယာန်ခေတ်မတိုင်မီက အထူးသဖြင့် စိုက်ပျိုးရေးသမားများအလယ် ပျံ့နှံ့နေသည့် ‘သေခြင်းနှင့် ရှင်ခြင်း’ ဘုရားသခင်များကို ကိုးကွယ်ခြင်းမှ မြစ်ဖျားခံသည်။ ထိုသူတို့သည် ဆောင်းယဉ်စွန်းချိန်ကို အများအားဖြင့် ဒီဇင်ဘာ ၂၁-၂၅ ရက်အဖြစ် ကန့်သတ်ထားပြီး သဘာဝတရားကို ပြန်လည်နိုးထအသက်ဝင်စေသော ကယ်တင်ရှင်ဘုရားသခင် ‘ဖွားမြင်ခြင်း’ ကို ထိုအချိန်တွင် နှစ်စဉ်ကျင်းပခဲ့ကြသည်။”
စွယ်စုံကျမ်းက တိတိကျကျထောက်ပြထားသည်ကို သင်တွေ့ပေမည်– “ပထမရာစုခရစ်ယာန်ဘာသာသည် ခရစ္စမတ်ပွဲကို မကျင်းပကြချေ။ . . . စတုတ္ထရာစုအလယ်ပိုင်းမှစ၍ ခရစ်ယာန်ဘာသာသည် ဆောင်းယဉ်စွန်းချိန်တွင်ကျင်းပသည့် မိသရကိုးကွယ်မှုကို ခရစ္စမတ်ပွဲအဖြစ် ပြောင်းလဲလက်ခံခဲ့ကြသည်။ ရောမဘာသာရေးအဖွဲ့အစည်းများက ခရစ္စမတ်ပွဲကို အစပြုကျင်းပခဲ့ကြသည်။ ဒသမရာစုတွင် ခရစ္စမတ်ပွဲသည် ခရစ်ယာန်ဘာသာနှင့်အတူ ရုရှားအထိပျံ့နှံ့လာသည်။ ထိုတွင် ခရစ္စမတ်ပွဲသည် ဘိုးဘေးများ၏ဝိညာဉ်ကိုဂုဏ်ပြုသည့် ရှေးဆလာဗ်လူမျိုးများ၏ ဆောင်းရာသီပွဲတော်နှင့် ရောနှောလာသည်။”
‘ဒီဇင်ဘာလ ၂၅ ရက်မှာ ယေရှုဖွားမြင်တာနဲ့ပတ်သက်ပြီး ဘုရားသခင့်နှုတ်မြွက်တော် သမ္မာကျမ်းစာက ဘာပြောထားသလဲ’ ဟု သင်မေးပေမည်။ အမှန်ဆိုသော် ကျမ်းစာက ယေရှု၏မွေးနေ့ကို အတိအကျမဖော်ပြထားချေ။ ယင်းအကြောင်း ယေရှုကိုယ်တိုင်ပြောခဲ့သော မှတ်တမ်းလည်းမရှိချေ။ ယင်းပွဲနေ့ကို ကျင်းပရန်ညွှန်ကြားသည်ဆိုသည်မှာ သာ၍ပင်မဖြစ်နိုင်ချေ။ သို့ရာတွင် ယေရှုမွေးဖွားချိန်ကိုသိနိုင်ရန် ကျမ်းစာက ကျွန်ုပ်တို့ကို အကူအညီပေးသည်။
မဿဲခရစ်ဝင်ကျမ်း အခန်းကြီး ၂၆ နှင့် ၂၇ အရ ယေရှုသည် စီ.အီး. ၃၃၊ မတ်လ ၃၁ ရက်နေ့တွင်အစပြုသည့် ဂျူးပသခါပွဲနေ့နှောင်းပိုင်းဖြစ်သော နိသန်လ ၁၄ ရက်တွင် အသတ်ခံရသည်။ ယေရှုသည် အသက် ၃၀ ခန့်တွင် နှစ်ခြင်းခံပြီး ခရစ်ယာန်ဓမ္မအမှုအစပြုကြောင်း လုကာခရစ်ဝင်ကျမ်းမှ သိရသည်။ (လုကာ ၃:၂၁-၂၃) အမှုဆောင်ချိန်သည် သုံးနှစ်ခွဲကြာခဲ့သည်။ ထို့ကြောင့် ယေရှုသေဆုံးချိန်တွင် အသက် သုံးဆယ့်သုံးနှစ်ခွဲခန့်ရှိမည်။ စီ.အီး. ၃၃ အောက်တိုဘာ ၁ ရက်ခန့်တွင် ကိုယ်တော် အသက် ၃၄ နှစ်ပြည့်မည်ဖြစ်သည်။ ယေရှုမွေးဖွားချိန်၌ သိုးထိန်းများသည် “ညအခါ တောအရပ်၌တည်းခိုလျက်၊ မိမိသိုးစုကိုစောင့်နေကြ” ကြောင်း လုကာမှတ်တမ်းတင်ထားသည်။ (လုကာ ၂:၈) ချမ်းအေးလှသော ဒီဇင်ဘာလတွင် ဗက်လင်မြို့ဝန်းကျင်၌ နှင်းများကျသောကြောင့် သိုးထိန်းများသည် သိုးအုပ်နှင့်အတူ အပြင်တွင်ရှိကြမည်မဟုတ်ချေ။ သို့သော် အထောက်အထားအရ ယေရှုဖွားမြင်ချိန်ဖြစ်သည့် အောက်တိုဘာ ၁ ရက်ခန့်တွင်မူ သိုးအုပ်နှင့်အတူ အပြင်တွင်ရှိနေနိုင်သည်။
နှစ်သစ်ကူးပွဲကျင်းပခြင်းနှင့် ပတ်သက်၍ကော။ ကျွန်ုပ်တို့တွေ့ခဲ့သည့်အတိုင်း ယင်းပွဲသည် ကိုယ်ကျင့်တရားပျက်ပြားမှုများနှင့် ပြည့်နေသည်။ ယင်းကို လောကပွဲအဖြစ် အသွင်ပြောင်းလိုက်သော်လည်း ဇာစ်မြစ်မှာမူ သံသယဖြစ်ဖွယ်ရှိသည်။
ပွဲတော်ရာသီနှင့်ဆက်စပ်နေသည့် ဖြစ်ရပ်များကိုထောက်သော် ဤရာသီ၏ အကြောင်းရင်းမှာ ယေရှုသာလျှင် အဓိကပါ ဟူသောဆောင်ပုဒ်သည် အဓိပ္ပာယ်မရှိတော့ပေ။ ခရစ္စမတ်ရာသီနှင့်ဆက်စပ်နေသည့် စီးပွားရေးအမြတ်ထုတ်မှုနှင့် စိတ်ပျက်ဖွယ်အမူအကျင့်များကြောင့်ဖြစ်စေ၊ မနှစ်မြို့ဖွယ် အယူမှားဇာစ်မြစ်များကြောင့်ဖြစ်စေ စိတ်အနှောင့်အယှက်ဖြစ်နေလျှင် စိတ်ဓာတ်မကျပါနှင့်။ ဘုရားသခင်အား ထိုက်သင့်စွာရိုသေလေးစားမှုပြ၍ ခရစ်တော်အား ဂုဏ်တင်ကာ တစ်ချိန်တည်းတွင် မိသားစုနှောင်ကြိုးကိုခိုင်မြဲစေနိုင်သော သင့်တော်သည့်နည်းလမ်းရှိပါသည်။
ဘုရားသခင်နှင့် ခရစ်တော်အားဂုဏ်တင်ရန် သာ၍ကောင်းသောနည်း
ယေရှုခရစ်သည် “မိမိအသက်ကိုစွန့်၍ လူများကိုရွေးခြင်းငှာ” ကြွလာသည်ဟု သမ္မာကျမ်းစာကဆိုသည်။ (မဿဲ ၂၀:၂၈) ကိုယ်တော်သည် ကျွန်ုပ်တို့အပြစ်အတွက် တလိုတလားအသေခံခဲ့သည်။ အချို့က ခရစ္စမတ်ရာသီအတွင်းတွင် ခရစ်တော်အားဂုဏ်တင်နိုင်သည်ဟု ယူဆကြပေမည်။ သို့သော် တွေ့ခဲ့ရသည့်အတိုင်း ခရစ္စမတ်နှင့် နှစ်သစ်ကူးပွဲသည် ခရစ်တော်နှင့် မသက်ဆိုင်သည့်အပြင် ယင်းတို့သည် အယူမှားပွဲများမှဆင်းသက်လာသည်။ အချို့သူတို့အတွက် ခရစ္စမတ်ရာသီသည် နှစ်သက်ဖွယ်ဖြစ်သော်လည်း ဗြောင်ဗြောင်တင်းတင်း စီးပွားရေးအမြတ်ထုတ်မှုများကို အထင်အရှားတွေ့ရသည်။ ထို့ပြင် ခရစ္စမတ်ရာသီသည် ဘုရားသခင်နှင့် ခရစ်တော်၏စိတ်တော်နှင့်မတွေ့သော ရှက်ဖွယ်ရာအမူအကျင့်များနှင့် ဆက်နွှယ်နေကြောင်း ဝန်ခံရမည်။
ဘုရားသခင့်စိတ်တော်နှင့် တွေ့လိုသူတစ်ဦးအနေနှင့် မည်သို့တုံ့ပြန်သင့်သနည်း။ လူ့ထုံးတမ်းစဉ်လာများသည် ဘာသာရေးကိုင်းရှိုင်းစိတ်ကို ဖြည့်ဆည်းပေးသော်လည်း ကျမ်းစာနှင့်ဆန့်ကျင်နေသည်။ ထို့ကြောင့် ယင်းတို့ကို စွဲကိုင်ထားမည့်အစား စိတ်ရင်းမှန်သူတစ်ဦးသည် ဘုရားသခင်နှင့်ခရစ်တော်အား ဂုဏ်တင်သည့် မှန်ကန်သောနည်းလမ်းကို ရှာဖွေပေလိမ့်မည်။ ထိုမှန်ကန်သောနည်းလမ်းကား အဘယ်နည်း။ အဘယ်အရာ လုပ်ဆောင်သင့်သနည်း။
ခရစ်တော်ကိုယ်တော်တိုင် ဤသို့ဆိုသည်– “ထာဝရအသက်ဟူမူကား၊ မှန်သောဘုရားသခင် . . . ဖြစ်တော်မူသော ကိုယ်တော်ကိုလည်းကောင်း၊ စေလွှတ်တော်မူသော ယေရှုခရစ်ကိုလည်းကောင်း သိကျွမ်းခြင်းတည်း။” (ယောဟန် ၁၇:၃) မှန်ပါသည်၊ စိတ်ရင်းမှန်သူတစ်ဦးသည် ဘုရားသခင်နှင့် ခရစ်တော်အား ဂုဏ်တင်သည့် တိကျမှန်ကန်သောအသိပညာကို ရှာဖွေဆည်းပူးသည်။ ထိုအသိပညာကို သတ်မှတ်ထားသော အချိန်ကာလတစ်ခုတွင်သာမဟုတ်ဘဲ နေ့စဉ်ဘဝအသက်တာတွင် ကျင့်သုံးသည်။ ထိုသို့ စိတ်ရင်းမှန်နှင့်ကြိုးစားအားထုတ်မှုကို ဘုရားသခင်နှစ်သက်တော်မူ၍ ယင်းက ထာဝရအသက် ရရှိစေနိုင်သည်။
သင့်မိသားစုကို ဘုရားသခင်နှင့် ခရစ်တော်အား ကျမ်းစာပါနည်းလမ်းအတိုင်း ဂုဏ်တင်သူများအဝင် ဖြစ်စေလိုသလော။ ယေဟောဝါသက်သေများသည် ကမ္ဘာတစ်ဝန်းရှိ သန်းနှင့်ချီသောမိသားစုများအား သမ္မာကျမ်းစာမှ အသက်နှင့်ဆိုင်သော အသိပညာရရှိရန် ကူညီပေးခဲ့ကြပြီ။ သင့်ဒေသရှိ ယေဟောဝါသက်သေများနှင့် ဆက်သွယ်ရန် သို့မဟုတ် ဤမဂ္ဂဇင်း၏ စာမျက်နှာ ၂ ပါ သင့်လျော်ရာလိပ်စာသို့ စာရေးရန် လှိုက်လှဲစွာဖိတ်ခေါ်ပါသည်။
[အောက်ခြေမှတ်ချက်]
^ အပိုဒ်၊ 11 ၁၉၁၇ အောက်တိုဘာ တော်လှန်ရေးမတိုင်မီက ရုရှားတွင် ဂျူလီယန်ပြက္ခဒိန်ဟောင်းကို အသုံးပြုခဲ့သော်လည်း နိုင်ငံအများတွင် ဂရေဂိုရီယန် ပြက္ခဒိန်ကို ပြောင်းသုံးခဲ့ကြပြီဖြစ်သည်။ ၁၉၁၇ ခုနှစ်က ဂျူလီယန်ပြက္ခဒိန်သည် ဂရေဂိုရီယန်ပြက္ခဒိန်ထက် ၁၃ ရက်နောက်ကျသည်။ တော်လှန်ရေးပြီးနောက် ဆိုဗီယက်တွင် ဂရေဂိုရီယန်ပြက္ခဒိန် ပြောင်းသုံးရာ ရုရှားသည် ကမ္ဘာ့ကျန်ဒေသများနှင့် တညီတည်းဖြစ်လာသည်။ သို့ရာတွင် ဩသဒေါက်စ်ချာ့ခ်ျက ဂျူလီယန်ပြက္ခဒိန်ကို “ခေတ်ဟောင်း” ပြက္ခဒိန်အဖြစ် သတ်မှတ်ကာ ယင်းအတိုင်း ပွဲတော်များကို ကျင်းပသည်။ ရုရှား၌ ဇန်နဝါရီ ၇ ရက်နေ့တွင် ခရစ္စမတ်ကျင်းပကြောင်း သင်ကြားဖူးပေမည်။ သို့သော် ဂရေဂိုရီယန်ပြက္ခဒိန်၌ ဇန်နဝါရီ ၇ ရက်သည် ဂျူလီယန်ပြက္ခဒိန်၌ ဒီဇင်ဘာ ၂၅ ရက်ဖြစ်ကြောင်း သတိရပါ။ ထို့ကြောင့် ရုရှားလူမျိုးများသည် ၎င်းတို့၏ ပွဲတော်ကို အောက်ပါအတိုင်းကျင်းပကြသည်– ဒီဇင်ဘာ ၂၅ ရက် အနောက်တိုင်းခရစ္စမတ်၊ ဇန်နဝါရီ ၁ ရက် လောကီနှစ်သစ်ကူး၊ ဇန်နဝါရီ ၇ ရက် ဩသဒေါက်စ်ခရစ္စမတ်၊ ဇန်နဝါရီ ၁၄ ရက် ခေတ်ဟောင်းပုံစံ နှစ်သစ်ကူး။
[စာမျက်နှာ ၇ ပါ လေးထောင့်ကွက်/ ရုပ်ပုံ]
နှစ်သစ်ကူးပွဲ၏ဇာစ်မြစ်များ
ဂျော်ဂျီယန် ဩသဒေါက်စ်ဘုန်းကြီးတစ်ပါး၏ ပြောကြားချက်
“နှစ်သစ်ကူးပွဲနေ့သည် ရှေးရောမတို့၏ အယူမှားပွဲနေ့များစွာမှ ဆင်းသက်လာသည်။ ဇန်နဝါရီ ၁ ရက်နေ့သည် အယူမှားနတ်ဘုရား ဂျေးနပ်စ်အတွက် ရည်စူးကျင်းပသည့်ပွဲနေ့ဖြစ်ပြီး ဇန်နဝါရီလဟူသည် သူ၏အမည်မှ ဆင်းသက်လာခြင်းဖြစ်သည်။ ဂျေးနပ်စ်ပုံတွင် ဆန့်ကျင်ဘက်အရပ်သို့ မျက်နှာမူနေသော မျက်နှာနှစ်ခုရှိကာ ယင်းက သူသည် အတိတ်နှင့် ပစ္စုပ္ပန်ကို သိမြင်သည်ဟုဆိုလိုသည်။ ပျော်ရွှင်ရယ်မော၍ အစားအသောက်အလျှံပယ်ဖြင့် ဇန်နဝါရီ ၁ ရက်နေ့ကို အစပြုသူမည်သူမဆိုသည် တစ်နှစ်ပတ်လုံး ပျော်ရွှင်ခြင်းနှင့် ကောင်းကျိုးချမ်းသာခံစားရလိမ့်မည်ဟု အဆိုရှိသည်။ ကျွန်ုပ်တို့ဒေသရှိသူများ ကျင်းပသည့် နှစ်သစ်ကူးပွဲများတွင် အလားတူအယူသီးမှု ပါဝင်သည်။ . . . အချို့သောအယူမှားပွဲနေ့များတွင် လူတို့သည် ရုပ်ပုံရှေ့သို့ ပူဇော်ရာများကို ယူဆောင်လာကြသည်။ အချို့သူတို့သည် အကျင့်ပျက်အပျော်ကြူးပွဲများ၊ အိမ်ထောင်ရေးဖောက်ပြန်ခြင်းနှင့် မတရားမေထုန်ပြုခြင်းတို့ကြောင့် နာမည်ပျက်သူများဖြစ်သည်။ ဂျေးနပ်စ်ပွဲနေ့ကဲ့သို့ အခြားအခါသမယများတွင် အလွန်အကျွံသောက်စားမူးယစ်ခြင်းနှင့် မသန့်ရှင်းသောအကျင့်မျိုးစုံ ပြုကျင့်ကြသည်။ လွန်ခဲ့သောနှစ်များက ကျွန်ုပ်တို့ကိုယ်တိုင် နှစ်သစ်ကူးပွဲကျင်းပခဲ့ပုံကို သတိရမည်ဆိုလျှင် အယူမှားပွဲလမ်းများ၌ ကျွန်ုပ်တို့အားလုံးပါဝင်ခဲ့သည်ကို ဝန်ခံရပေမည်။”—ဂျော်ဂျီယန်သတင်းစာ။
[စာမျက်နှာ ၆ ပါ ရုပ်ပုံ]
ခရစ်ယာန်ဘောင်သည် မိသရကိုးကွယ်မှုပုံစံကို ဆက်ခံခဲ့
[Credit Line]
Museum Wiesbaden
[စာမျက်နှာ ၇ ပါ ရုပ်ပုံ]
ချမ်းအေးလှသော ဒီဇင်ဘာလတွင် သိုးထိန်းများသည် သိုးအုပ်နှင့်အတူ အပြင်တွင်မရှိကြ