ကောင်းမှု​ကို​ ဆိုးသွမ်းမှု ဝိုင်းရံ​နေ

ယနေ့​လောကတွင် မိမိတို့​ကိုယ်ကို တလိုတလား​ ပေးဆက်​မည့်​သူ မရှိသလောက် ဖြစ်ပုံရ​သည်။ သို့သော် အချို့​မူ သူတစ်ပါး​၏​ ကောင်းကျိုး​ကို တစ်နည်း​နည်းဖြင့် သယ်ပိုး​ရန် “ထူးထူးခြားခြား​ လုပ်ဆောင်” လို​စိတ်​ ရှိနေဆဲ​ပင်။ လူများစွာ​သည် အလှူဒါန​ အသင်းအဖွဲ့​များ​သို့ နှစ်စဉ် ဒေါ်လာ​ဘီလီယံ​နှင့်​ချီ လှူဒါန်း​ကြသည်။ ဥပမာ၊ ၂၀၀၂ ခုနှစ်​တွင် ဗြိတိန်​နိုင်ငံ​ရှိ လှူဒါန်း​ထောက်ပံ့ရေး​ အသင်းအဖွဲ့​များသည် အလှူငွေ အမေရိကန်​ဒေါ်လာ ၁၃ ဘီလီယံ​အထိ လက်ခံ​ရရှိခဲ့​၏။ ၁၉၉၉ ခုနှစ်​မှ​စ၍ ပရဟိတ​ ဒါ​န​ရှင်​ဆယ်ဦး​က လိုအပ်​နေ​သူများကို​ ကူညီ​ရန် အမေရိကန်​ဒေါ်လာ ၃၈ ဘီလီယံ​ကျော် လှူဒါန်းခဲ့​ကြသည် သို့​မဟုတ် လှူဒါန်း​မည်​ဟု ကတိပြု​ခဲ့​ကြသည်။

စေတနာ​ရှင်​များ လုပ်ဆောင်ခဲ့​ကြ​သည့် ကောင်းမှု​တချို့​တွင် ဝင်ငွေ​နည်းသော​ မိသားစု​များ​ကို ဆေး​ကုသ​စရိတ်​ ပေးခြင်း၊ ကြင်ဖော်​မဲ့​ မိဘတို့​၏​ သားသမီး​များ​ကို ပညာပေး​လမ်းညွှန်​ခြင်း၊ ဖွံ့ဖြိုး​ဆဲ​နိုင်ငံ​များ​တွင် ကာကွယ်​ဆေး ထိုး​ပေး​ရေး​ အစီအစဉ်​အတွက် ငွေကြေး​ပံ့ပိုး​ခြင်း၊ ဆင်းရဲ​သည့်​ ကလေး​များ​ကို ကိုယ်ပိုင်​စာအုပ်​အသစ် ပေးကမ်း​ခြင်း၊ နွမ်းပါး​သော​ နိုင်ငံ​များ​ရှိ လယ်သမား​တို့ကို မွေးမြူရေး​ တိရစ္ဆာန်​များ ပေးကမ်း​ခြင်း၊ သဘာဝ ဘေးဒဏ်​ခံရ​သူများ​အတွက် ကယ်ဆယ်​ရေး​ပစ္စည်း​ ပေးကမ်း​ခြင်း​ ပါဝင်​သည်။

လူတို့သည် သူတစ်ပါး​၏​ ကောင်းကျိုး​ကို သယ်ပိုး​နိုင်စွမ်း​ ရှိကြောင်း အထက်ပါ​အချက်များ​က ဖော်ပြ​နေပါ​သည်။ ဝမ်းနည်းစရာမှာ ပြော​မပြ​နိုင်​လောက်​အောင် ဆိုးသွမ်း​လှ​သည့် လုပ်ရပ်များ​ကို ကျူးလွန်​နေ​သူများ​လည်း ရှိနေခြင်း​ ဖြစ်သည်။

ဆိုးသွမ်းမှု​ တိုးများ​လာ

ဒုတိယ​ ကမ္ဘာ​စစ်​ ပြီး​ချိန်​မှ​စ၍ မျိုး​ဖြုတ်​သတ်ဖြတ်မှု​များ၊ နိုင်ငံရေး​ သွေးထိုး​လှုံ့ဆော်မှု​ကြောင့် အစုလိုက်​ အပြုံလိုက်​ သတ်ဖြတ်မှု​များ​အကြောင်း မှတ်တမ်း​တင်ထား​သည့် ဖြစ်ရပ် ၅၀ နီးပါး​ ရှိ​လေ​သည်။ “ယင်း​ဖြစ်ရပ်​များ​တွင် အရပ်သား အနည်းဆုံး ၁၂ သန်း​နှင့် အများဆုံး ၂၂ သန်း​ သေဆုံး​ခဲ့​ရပြီး ၁၉၄၅ ခုနှစ်​မှ​စ၍ ဖြစ်ပွား​ခဲ့​သော ပြည်တွင်းစစ်​နှင့် အပြည်ပြည်ဆိုင်ရာ​ စစ်ပွဲ​များ​တွင် သေဆုံး​ခဲ့​သူများ​ထက် ပို​များနေ​သည်” ဟု​ အမေရိကန်​ နိုင်ငံရေး​သိပ္ပံ​စာစောင် က ဖော်ပြ​သည်။

၂၀ ရာစု​အလယ်​နှောင်းပိုင်း​အတွင်း ကမ္ဘောဒီးယား​နိုင်ငံ​တွင် နိုင်ငံရေး​ကြောင့် လူ ၂.၂ သန်း​ကျော် သေဆုံး​ခဲ့​ရသည်။ ရဝမ်ဒါ​တွင် လူမျိုးရေး​ မုန်းတီးမှု​ကြောင့် အမျိုးသား၊ အမျိုးသမီးနှင့် ကလေး ၈၀၀,၀၀၀ ကျော်​ သေဆုံး​ခဲ့​ရသည်။ ဘော့စနီးယား​တွင် ဘာသာရေး​နှင့်​ နိုင်ငံရေး​၏ သွေးထိုးမှုကြောင့် လူ ၂၀၀,၀၀၀ ကျော် သေဆုံး​ခဲ့​ရသည်။

မကြာသေး​ခင်​က​ ဖြစ်​ခဲ့​သော ဆိုးသွမ်းမှု​ လုပ်ရပ်များ​ကို ရည်ညွှန်း​၍ ကုလသမဂ္ဂ​၏​ အထွေထွေ​ အတွင်းရေးမှူး​ချုပ်​က ၂၀၀၄ ခုနှစ်​တွင် ဤသို့​ဆို​သည်– “ကျွန်ုပ်​တို့​ သိ​ကြ​သည့်​အတိုင်း အီရတ်​နိုင်ငံသား​များသည် ရက်ရက်စက်စက် သိမ်း​ရုံး​သတ်ဖြတ်​ခံ​နေရ​သည်။ ကယ်ဆယ်​ရေး​ လုပ်သားများ၊ စာနယ်ဇင်း​သမားများ​နှင့် အရပ်သား​များသည် ဓား​စာ​ခံ​အဖြစ် ဖမ်းဆီး​ခံရ​ကာ ရက်စက်​စွာ​ သတ်ဖြတ်​ခံ​ခဲ့​ရသည်။ တစ်ချိန်တည်း​တွင် အီရတ်​အကျဉ်းသား​များသည် လူ​မဆန်​စွာ ပြုမူ​ဆက်ဆံ​ခံ​နေရ​၏။ ဒါ​ဖာ​နယ်မြေ​တွင် လူအားလုံး အိုး​ပစ်​အိမ်​ပစ်​ ထွက်ပြေး​ခဲ့​ရပြီး သူတို့​နေအိမ်များ ဖျက်ဆီး​ခံရ​သည်၊ တစ်ချိန်တည်း​တွင် မုဒိမ်းကျင့်​ခြင်း​ကို တမင်တကာ နည်း​ပရိယာယ်​အဖြစ်​ သုံး​ကြသည်။ ယူဂန္ဓာ​နိုင်ငံ​မြောက်ပိုင်း​တွင် ကလေး​များစွာ​သည် ကိုယ်​အင်္ဂါ​ ဖြတ်တောက်​ခံရ​ကာ ပြော​မပြ​နိုင်​လောက်​အောင် ရက်စက်​စွာ​ ပြုမူ​ရန် ဖိအား​ပေး​ခံရ​ကြသည်။ ဘတ်စလန်​မြို့တွင် ကလေး​များစွာ ဓား​စာ​ခံ​အဖြစ် ဖမ်းဆီး​ခံရ​ကာ ရက်ရက်စက်စက် သတ်ဖြတ်​ခံ​ခဲ့​ရသည်။”

ဖွံ့ဖြိုးပြီး​နိုင်ငံ​များ​တွင်​ပင် မုန်းတီးမှု​ကြောင့်​ ဖြစ်ပွား​သည့် ရာဇဝတ်မှု​များ တဖြည်းဖြည်း တိုးများ​လာပုံ​ရသည်။ ဥပမာ၊ ၂၀၀၄ ခုနှစ်​တွင် ထုတ်ပြန်​သော အင်​ဒီ​ပန်​ဒန့်​ သတင်းစာ​က ဗြိတိန်​နိုင်ငံ​တွင် “လူမျိုးရေး​ တိုက်ခိုက်မှု​ကြောင့် သေဆုံး​သူ​ အရေအတွက်​သည် လွန်ခဲ့သော​ ဆယ်စုနှစ်​က​ထက် ဆယ့်တစ်ဆ​ တိုးများ​လာ​နေကြောင်း” ဖော်ပြ​သည်။

ကောင်းကျိုး​သယ်ပိုး​နိုင်စွမ်း​ရှိသော လူတို့သည် အဘယ်ကြောင့် ဤမျှ​ ဆိုးသွမ်း​သည့်​ လုပ်ရပ်များ ကျူးလွန်​နေကြ​သနည်း။ ဆိုးသွမ်းမှု​များ ပပျောက်​သွားပါ​မည်​လော။ နောက်​ဆောင်းပါး​တွင် ဖော်ပြ​ထား​သည့်​အတိုင်း သမ္မာကျမ်းစာ​က ဤ​စိတ်ရှုပ်​စရာ​ မေးခွန်းများ​အတွက် ကျေနပ်ဖွယ်​အဖြေ​များ ပေး​ထား​ပါ​သည်။

 [Picture Credit Line on page 2]

COVER: Mark Edwards/Still Pictures/Peter Arnold, Inc.