တွေးတောဆင်ခြင်ခြင်းကို ပျော်ရွှင်စရာဖြစ်စေပါ
တွေးတောဆင်ခြင်ခြင်းကို ပျော်ရွှင်စရာဖြစ်စေပါ
တွေးတောဆင်ခြင်ခြင်းသည် လူအချို့အတွက် ထိတ်လန့်စရာဖြစ်ရခြင်းမှာ ယင်းကို အကြီးအကျယ်အာရုံစိုက်ရသော ခက်ခဲသည့်အလုပ်ကြီးတစ်ခုအဖြစ် သူတို့သဘောထားကြသောကြောင့်ဖြစ်သည်။ တွေးတောဆင်ခြင်ခြင်းသည် အရေးကြီးကြောင်း ဖတ်ရှုရတိုင်း ထိုသို့မပြုသူများ စိတ်မလုံမလဲဖြစ်ကြပေမည်။ (ဖိလိပ္ပိ ၄:၈) သို့ရာတွင် ကျွန်ုပ်တို့သင်ယူသိရှိခဲ့သော ယေဟောဝါနှင့်ပတ်သက်သည့်အကြောင်း၊ ကိုယ်တော်၏ နှစ်လို့ဖွယ်အရည်အသွေးများ၊ စိုးရွံ့ဖွယ်အောင်မြင်ပြီးမြောက်မှုများ၊ တောင်းဆိုချက်များ၊ ကောင်းမြတ်လှသော ရည်ရွယ်ချက်စသည့် အမှန်တရားတို့ကို အချိန်ကုန်ခံ တွေးတောဆင်ခြင်ခြင်းသည် ပျော်ရွှင်ကျေနပ်စရာဖြစ်နိုင်ပြီး ထိုသို့လည်းဖြစ်သင့်သည်။ အဘယ်ကြောင့်နည်း။
ယေဟောဝါဘုရားသခင်သည် စကြဝဠာတွင် အမြင့်မြတ်ဆုံးပိုင်သအုပ်စိုးရှင်ဖြစ်တော်မူပြီး မိမိ၏မဟာရည်ရွယ်ချက် ပြည့်စုံရေးအတွက် အလုပ်များလျက်ရှိသည်။ (ယောဟန် ၅:၁၇) ထိုသို့လုပ်ဆောင်နေသည့်ကြားမှ မိမိအားဝတ်ပြုသူတစ်ဦးစီ၏ တွေးတောဆင်ခြင်မှုများကို ကိုယ်တော်အာရုံစိုက်တော်မူသည်။ ယင်းကို ဆာလံဆရာဒါဝိဒ် သိရှိထားရာ ဘုရားသခင့်မှုတ်သွင်းမှုဖြင့် အောက်ပါအတိုင်း ရေးသားခဲ့သည်– “အိုထာဝရဘုရားသခင် ကိုယ်တော်သည် အကျွန်ုပ်ကိုစစ်ကြော၍ သိတော်မူ၏။ အကျွန်ုပ်ထိုင်ခြင်း၊ ထခြင်းအရာတို့ကိုသိတော်မူ၏။ အကျွန်ုပ်အကြံအစည်တို့ကို အဝေးကပင် နားလည်တော်မူ၏။”—ဆာလံ ၁၃၉:၁၊ ၂။
ဆာလံဆရာ၏အဆိုပါစကားများကို အချို့သူတို့က အစပိုင်းတွင် ‘ဘုရားသခင်ဟာ ဟိုးအဝေးကြီးမှာရှိနေပေမဲ့ ငါ့ရဲ့မကောင်းတဲ့အတွေး မှန်သမျှကို သိတယ်ဆိုတာ ဟုတ်ပါ့မလား’ ဟု အပျက်သဘောဖြင့် တွေးမိပေမည်။ ထိုသို့အသိအမှတ်ပြုခြင်းသည် အကျိုးရှိသည်။ သို့ဖြင့် မှားယွင်းသည့်အတွေးအခေါ်များကို ချိုးနှိမ်နိုင်ရန် အကူအညီရပြီး ထိုသို့တွေးခေါ်မိသည့်အခါတွင်လည်း ဝန်ချတောင်းပန်စေနိုင်သည်။ ယေရှု၏ရွေးနုတ်ဖိုးပူဇော်ရာယဇ်ကို အခြေပြု၍ ဘုရားသခင်ခွင့်လွှတ်လိမ့်မည်ဟု ယုံကြည်စိတ်ချနိုင်၏။ (၁ ယောဟန် ၁:၈၊ ၉; ၂:၁၊ ၂) တစ်ကြိမ်တည်းတွင် ယေဟောဝါသည် မိမိအား ဝတ်ပြုသူများကို အပြုသဘောပါပါဆန်းစစ်ကြောင်း သတိရသင့်သည်။ ကျွန်ုပ်တို့သည် ကျေးဇူးတင်စိတ်ဖြင့် ကိုယ်တော့်အကြောင်း တွေးတောဆင်ခြင်နေသည်ကို ကိုယ်တော် သိတော်မူသည်။
“သန်းနဲ့ချီတဲ့ဝတ်ပြုသူတွေရဲ့ ကောင်းတဲ့အတွေးအခေါ်တိုင်းကို ယေဟောဝါ တကယ်ပဲသတိပြုမိရဲ့လား” ဟုသင်မေးပေမည်။ ကိုယ်တော် အမှန်ပင် သတိပြုသည်။ စာငှက်လေးများကိုပင် ယေဟောဝါဂရုစိုက်တော်မူကြောင်း ယေရှုမိန့်ဆိုပြီး “သင်တို့သည် စာငှက်အများတို့ထက် သာ၍မြတ်ကြ၏” ဟုဆက်ပြောခြင်းဖြင့် ကျွန်ုပ်တို့ကို ဘုရားသခင်ဂရုစိုက်ကြောင်း အလေးပေးဖော်ပြခဲ့သည်။ (လုကာ ၁၂:၆၊ ၇) စာငှက်များသည် ယေဟောဝါအကြောင်း မတွေးတောနိုင်ကြချေ။ ထိုစာငှက်များကို ဘုရားသခင် ဂရုစိုက်တော်မူလျှင် ကိုယ်တော့်အကြောင်း စဉ်းစားတွေးတောနိုင်သည့် ကျွန်ုပ်တို့တစ်ဦးစီကို သာ၍ပင် ဂရုစိုက်ကာ အားရကျေနပ်တော်မူမည်ဖြစ်ခြင်း။ ဒါဝိဒ်ကဲ့သို့ပင် ကျွန်ုပ်တို့လည်း ယုံကြည်စိတ်ချစွာဖြင့် ဤသို့တောင်းလျှောက်နိုင်ကြသည်– ‘အကျွန်ုပ်၏ . . . စိတ်နှလုံးအကြံအစည်သည် ရှေ့တော်၌ နှစ်သက်ဖွယ်ဖြစ်ပါစေသော။ အိုထာဝရဘုရားသခင် အကျွန်ုပ်၏ကျောက်၊ အကျွန်ုပ်ကိုရွေးနုတ်တော်မူသောဘုရားသခင်။’—ဆာလံ ၁၉:၁၄။
သစ္စာရှိစွာဝတ်ပြုသူများ၏ တွေးတောဆင်ခြင်မှုကို ယေဟောဝါ အမှန်ပင်အလေးထားတော်မူကြောင်း ပရောဖက်မာလခိ၏ မှုတ်သွင်းခံစကားကလည်း ထပ်ဆင့်သက်သေထူသည်။ ကျွန်ုပ်တို့ခေတ်နှင့်စပ်လျဉ်း၍ သူဤသို့ကြိုဟောခဲ့သည်– ‘ထိုအခါ ယေဟောဝါကိုကြောက်ရွံ့သောသူတို့သည် တစ်ယောက်ကိုတစ်ယောက်နှုတ်ဆက်၍ ပြောဆိုကြ၏။ ယေဟောဝါသည်လည်း နားထောင်၍ ကြားတော်မူ၏။ ယေဟောဝါကို ကြောက်ရွံ့၍ နာမတော်ကိုအောက်မေ့သောသူတို့အဖို့ ရှေ့တော်တွင် စာရင်း၌ မှတ်သားလျက်ရှိ၏။’ (မာလခိ ၃:၁၆) ယေဟောဝါအကြောင်း ကျွန်ုပ်တို့တွေးတောဆင်ခြင်သည့်အခါ ကိုယ်တော် “နားထောင်၍ ကြားတော်မူ” ကြောင်း သတိရနေခြင်းက ထိုသို့တွေးတောဆင်ခြင်ခြင်းကို ပျော်ရွှင်စရာ ဖြစ်စေနိုင်သည်။ ထို့ကြောင့် “ပြုတော်မူသမျှတို့ကိုဆင်ခြင်၍ စီရင်တော်မူသောအရာတို့ကို မြွက်ဆိုပါမည်” ဟူသည့် ဆာလံဆရာ၏စကားအတိုင်း ကျွန်ုပ်တို့ ပြောဆိုနိုင်ကြပါစေ။—ဆာလံ ၇၇:၁၂။