ဘုရားသခင်အပေါ် သင့်ယုံကြည်ကိုးစားမှု မည်မျှခိုင်မာသနည်း
ဘုရားသခင်အပေါ် သင့်ယုံကြည်ကိုးစားမှု မည်မျှခိုင်မာသနည်း
“ဘုရားသခင်၏ နိုင်ငံတော် . . . ကို ရှေ့ဦးစွာရှာကြလော့။”—မဿဲ ၆:၃၃။
၁၊ ၂။ အလုပ်အကိုင်နှင့်ပတ်သက်၍ လူရွယ်တစ်ဦး အဘယ်သို့ပြုခဲ့သနည်း။ အဘယ်ကြောင့်နည်း။
လူရွယ်တစ်ဦးသည် မိမိ၏အသင်းတော်တွင် ပို၍အသုံးတော်ခံလိုသည်။ ခက်နေသည်မှာ သူ့အလုပ်ကြောင့် အသင်းတော်အစည်းအဝေးများကို မှန်မှန်မတက်နိုင်ချေ။ ယင်းကို သူမည်သို့ကိုင်တွယ်ဖြေရှင်းခဲ့သနည်း။ သူ့ဘဝကို ရိုးရှင်းစေခဲ့သည်။ အလုပ်မှထွက်လိုက်သည်။ အတန်ကြာသော် ခရစ်ယာန်လုပ်ဆောင်မှုများကို ပုံမှန်လုပ်ဆောင်စေနိုင်သော အလုပ်အကိုင်တစ်ခုရရှိခဲ့သည်။ ယနေ့ သူသည် ယခင်လောက် ဝင်ငွေမကောင်းသော်လည်း မိသားစု၏စားဝတ်နေရေးကို ဖူလုံစေနိုင်သည့်အပြင် အသင်းတော်၌ ပို၍အသုံးတော်ခံခွင့်ရရှိနေသည်။
၂ သူအဘယ်ကြောင့် ထိုသို့ပြုသည်ကို သင်နားလည်သလော။ သူ့အခြေအနေမျိုး၌ရှိလျှင် အသင်ကော ထိုသို့ပြုမည်လော။ “ဘုရားသခင်၏ နိုင်ငံတော်နှင့် ဖြောင့်မတ်ခြင်းတရားတော်ကို ရှေ့ဦးစွာရှာကြလော့။ နောက်မှ ထိုအရာများကိုထပ်၍ ပေးတော်မူလတ္တံ့” ဟူသော ယေရှု၏ကတိတော်ကို ယုံကြည်စိတ်ချကြောင်း မိမိတို့၏လုပ်ရပ်များဖြင့် တင်ပြနေသူခရစ်ယာန်များစွာရှိခြင်းက ချီးမွမ်းစရာပင်။ (မဿဲ ၆:၃၃) သူတို့သည် လုံခြုံမှုအတွက် ဤလောကကိုမဟုတ်ဘဲ ယေဟောဝါကို ယုံကြည်ကိုးစားကြသည်။—သု. ၃:၂၃၊ ၂၆။
၃။ ဘုရားသခင့်နိုင်ငံတော်ကို ရှေးဦးထားခြင်းသည် ယနေ့ လက်တွေ့ကျမကျ အချို့အဘယ်ကြောင့်သိလိုကြသနည်း။
၃ ဆင်းရဲခက်ခဲသည့်ကာလတွင် ကျွန်ုပ်တို့အသက်ရှင်နေသောကြောင့် ထိုလူရွယ်၏ဆုံးဖြတ်ချက်သည် အမြော်အမြင်ရှိရာရောက်ပါ၏လောဟု အချို့တွေးကြပေမည်။ ယနေ့ တစ်ခါနှင့်မျှမတူအောင် အချို့သူတို့ ချွတ်ခြုံကျနေစဉ် အခြားသူများမှာမူ အမြင့်မားဆုံးလူနေမှုအဆင့်တွင် နေထိုင်ကြသည်။ နွမ်းပါးသည့်နိုင်ငံများရှိ လူအများစုသည် ချောင်ချောင်လည်လည်နေထိုင်နိုင်မည့် မည်သည့်အခွင့်အရေးကိုမဆို လက်မလွတ်တမ်း ရယူကြပေမည်။ သို့သော် သူတို့ထက်ချမ်းသာသောနိုင်ငံများရှိသူများမှာမူ စီးပွားရေးတည်ငြိမ်မှုမရှိခြင်း၊ အလုပ်အကိုင်ဈေးကွက် အပြောင်းအလဲနှင့် ဖိခိုင်းတတ်သည့်အလုပ်ရှင်များကြောင့် မိမိတို့လူနေမှုအဆင့်အတန်းကို ဆက်ထိန်းရန် ဖိအားပေးခံနေကြရသည်။ ဝမ်းစာရှာခြင်းနှင့်ပတ်သက်သော ဖိစီးမှုကြောင့် အချို့သူတို့က ‘ခုချိန်မှာ ဘုရားသခင့်နိုင်ငံတော်ကို ရှေးဦးထားတာ လက်တွေ့ကျသေးရဲ့လား’ ဟုသိလိုပေမည်။ အဖြေရဖို့ ယေရှု၏မိန့်ခွန်းကို ကြားနာခဲ့သည့် ပရိသတ်အကြောင်း ပြန်သုံးသပ်ကြည့်ပါ။
“မစိုးရိမ်ကြနှင့်”
၄၊ ၅။ ဘုရားသခင့်လူမျိုးတော်သည် စားဝတ်နေရေးအတွက် အစိုးရိမ်လွန်ဖို့မလိုကြောင်း ယေရှုမည်သို့ဥပမာပေးဖော်ပြခဲ့သနည်း။
၄ နယ်မြေအသီးသီးမှလာသော လူစုလူဝေးကြီးကို ဂါလိလဲနယ်တွင် ယေရှုဟောပြောနေခြင်းဖြစ်သည်။ (မဿဲ ၄:၂၅) ထိုသူတို့တွင် ချမ်းသာကြွယ်ဝသူ အနည်းငယ်ပါနိုင်သော်လည်း အများစုမှာ ဆင်းရဲနွမ်းပါးသူများဖြစ်ကြသည်။ သို့သော် ယေရှုက စည်းစိမ်ရှာခြင်းအစား သာ၍အဖိုးထိုက်သော ဝိညာဉ်ရေးဘဏ္ဍာကို အဓိကထားဆည်းပူးရန် တိုက်တွန်းခဲ့သည်။ (မဿဲ ၆:၁၉-၂၁၊ ၂၄) “အဘယ်သို့စားသောက်ရမည်ဟု အသက်အဖို့ မစိုးရိမ်ကြနှင့်။ အဘယ်သို့ဝတ်ရမည်ဟု ကိုယ်အဖို့ မစိုးရိမ်ကြနှင့်။ အစာထက် အသက်မြတ်သည်မဟုတ်လော။ အဝတ်ထက် ကိုယ်မြတ်သည်မဟုတ်လော” ဟုကိုယ်တော်မိန့်ဆိုခဲ့သည်။—မဿဲ ၆:၂၅။
၅ ယေရှုစကားသည် နားထောင်နေသူများစွာအတွက် လက်တွေ့မကျပုံပေါ်ပေမည်။ အလုပ်မကြိုးစားပါက မိမိတို့မိသားစုများကို ထိခိုက်မည်ဖြစ်ကြောင်း သူတို့သိထားကြသည်။ သို့သော် ယေရှုက ငှက်များကို သတိရစေသည်။ ငှက်တို့သည် တစ်နေ့စာ တစ်နေ့စာရှာစားကြရသော်လည်း ၎င်းတို့ကို ယေဟောဝါ ကြည့်ရှုကျွေးမွေးတော်မူ၏။ ရှောလမုန်မင်းကြီး၏ဝတ်လုံထက် သာလွန်သည့် အလေ့ကျပေါက်သော ပန်းပင်များကို ယေဟောဝါအလှဆင်ထားပုံကိုလည်း ယေရှုသတိရစေခဲ့သည်။ ယေဟောဝါသည် ငှက်များနှင့် ပန်းများကို ဂရုစိုက်တော်မူလျှင် ကျွန်ုပ်တို့ကို ပို၍ပင်ဂရုစိုက်ပေမည်။ (မဿဲ ၆:၂၆-၃၀) ယေရှုမိန့်ဆိုခဲ့သည့်အတိုင်း ကျွန်ုပ်တို့၏အသက်နှင့်ခန္ဓာသည် အစားအစာနှင့် အဝတ်အစားတို့ထက် ပို၍အရေးကြီးသည်။ ကျွန်ုပ်တို့သည် ယေဟောဝါ၏အမှုတော်အတွက် မည်မည်ရရမလုပ်ဘဲ စားရန်၊ ဝတ်ရန်အတွက်သာ မြှုပ်နှံကြိုးစားနေမည်ဆိုလျှင် အဓိပ္ပာယ်မဲ့အသက်ရှင်နေခြင်းဖြစ်သည်။—ဒေ. ၁၂:၁၃။
မျှတသောအမြင်
၆။ (က) ခရစ်ယာန်များ၌ အဘယ်တာဝန်ရှိသနည်း။ (ခ) ခရစ်ယာန်များသည် မည်သူ့ကို လုံးလုံးယုံကြည်ကိုးစားကြသနည်း။
၆ နားထောင်သူများသည် အလုပ်မလုပ်တော့ဘဲ မိမိတို့မိသားစုကို ဘုရားသခင် တစ်နည်းနည်းဖြင့် ကျွေးမွေးမည်ဟု စောင့်နေရန် ယေရှု တိုက်တွန်းနေခြင်းမဟုတ်ပါ။ ငှက်များပင်လျှင် ကိုယ်တိုင်နှင့် သားငယ်များအတွက် အစာရှာကြရသည်။ ထို့ကြောင့် ခရစ်ယာန်များသည် အစာစားလိုပါက အလုပ်လုပ်ကြရမည်။ မိသားစုတာဝန်များကိုလည်း ထမ်းဆောင်ကြရမည်။ ခရစ်ယာန်အစေခံကျွန်များသည် မိမိတို့၏သခင်အတွက် ကြိုးစားပမ်းစား အလုပ်လုပ်ကြရမည်။ (၂ သက်သာလောနိတ် ၃:၁၀-၁၂; ၁ တိမောသေ ၅:၈; ၁ ပေတရု ၂:၁၈) တမန်တော်ပေါလုသည် တဲရှင်ချုပ်သူအဖြစ် ကိုယ့်ဝမ်းကိုယ်ကျောင်းခဲ့ရသည်။ (တမန်တော် ၁၈:၁-၄; ၁ သက်သာလောနိတ် ၂:၉) သို့သော် ဤခရစ်ယာန်များသည် ဘဝလုံခြုံမှုအတွက် လောကအလုပ်ကို အားမကိုးခဲ့ကြပါ။ ယေဟောဝါကို သူတို့ယုံကြည်ကိုးစားခဲ့ကြသည်။ ယင်းကြောင့် အခြားသူများ မခံစားရသော စိတ်ငြိမ်သက်မှုကို သူတို့ခံစားခဲ့ကြရသည်။ “ထာဝရဘုရား[သခင်]ကို ခိုလှုံသောသူတို့သည် မတုန်မလှုပ်၊ အစဉ်အမြဲတည်သော ဇိအုန်တောင်ကဲ့သို့ဖြစ်ကြ၏” ဟုဆာလံဆရာကဆို၏။—ဆာလံ ၁၂၅:၁။
၇။ ယေဟောဝါအား အခိုင်အမာ မယုံကြည်သူတစ်ဦးသည် မည်သည့်ရှုမြင်ချက်ရှိနိုင်သနည်း။
၇ ယေဟောဝါအား အခိုင်အမာမယုံကြည်သူများမူ တစ်မျိုးတွေးကြမည်။ လူအများစုက လုံခြုံမှုရှိရန် ချမ်းသာရမည်ဟု ယူမှတ်ကြသည်။ ထို့ကြောင့် အလုပ်ကောင်းကောင်းရနိုင်မည့် မျှော်လင့်ချက်ဖြင့် မိဘများက မိမိတို့သားသမီးများ အသက်ငယ်စဉ် အဆင့်မြင့်ပညာရေးကို ဆည်းပူးရန် တိုက်တွန်းကြသည်။ ဝမ်းနည်းစရာမှာ ထိုသို့ရင်းနှီးမြှုပ်နှံခြင်းသည် အကြီးအကျယ်နစ်နာဆုံးရှုံးစေကြောင်း ခရစ်ယာန်မိသားစုအချို့ တွေ့ရှိခဲ့ကြရပြီ။ အကြောင်းမှာ သူတို့၏သားသမီးများသည် ဝိညာဉ်ရေးအမြင်မရှိတော့ဘဲ ရုပ်ပစ္စည်းနောက် တကောက်ကောက်လိုက်ပါသွားကြ၍ဖြစ်သည်။
၈။ ခရစ်ယာန်များတွင် အဘယ်မျှတသောသဘောရှိသနည်း။
၈ ထို့ကြောင့် ယေရှု၏သွန်သင်ချက်သည် ပထမရာစုကကဲ့သို့ပင် ယနေ့တိုင် လက်တွေ့ကျသက်ဆိုင်ဆဲဖြစ်ကြောင်းကို အမြော်အမြင်ရှိခရစ်ယာန်များ သိရှိထားကြရာ မျှတသောအမြင်ရှိရန် သူတို့ကြိုးစားကြသည်။ ကျမ်းပေးတာဝန်များကျေပွန်စေရန် နာရီပေါင်းများစွာ ဝမ်းစာရှာအလုပ်လုပ်ကြရလျှင်ပင် အခြားကိစ္စများထက် သာ၍အရေးကြီးသော ဝိညာဉ်ရေးရာများကို မျက်ကွယ်ပြုသည့်အထိ ဘယ်တော့မျှမလုပ်ကြချေ။—ဒေ. ၇:၁၂။
‘ဘယ်သောအခါမျှ မစိုးရိမ်ကြနှင့်’
၉။ ယေဟောဝါအပေါ် လုံးလုံးယုံကြည်ကိုးစားသူများကို ယေရှုမည်သို့အားပေးသနည်း။
၉ ယေရှု၏တောင်ပေါ်တရားတော်ကို ကြားနာသူများအား ကိုယ်တော်ဤသို့တိုက်တွန်းခဲ့သည်– “အဘယ်သို့စားသောက်ရအံ့နည်း၊ အဘယ်သို့ဝတ်ရအံ့နည်းဟူ၍ မစိုးရိမ်ကြနှင့်။ ထိုအရာများကို [ပြင်] ပလူတို့သည် ရှာဖွေတတ်ကြ၏။ ထိုအရာများကို သင်တို့သည် အသုံးလိုကြောင်းကို ကောင်းကင်ဘုံ၌ရှိတော်မူသော သင်တို့အဘသည် သိတော်မူ၏။” (မဿဲ ၆:၃၁၊ ၃၂) အားရှိစရာစကားများပင်။ ယေဟောဝါအပေါ် ကျွန်ုပ်တို့အပြည့်အဝ ယုံကြည်ကိုးစားမည်ဆိုလျှင် ကိုယ်တော်သည် ထောက်မရန် အသင့်ရှိပါလိမ့်မည်။ သို့သော် ယေရှု၏စကားများသည် အလေးအနက်ဆင်ခြင်စရာဖြစ်သည်။ ရုပ်ပစ္စည်းများကို မက်မက်မောမောရှာဖွေမည်ဆိုလျှင် ကျွန်ုပ်တို့၏အတွေးအခေါ်သည် ခရစ်ယာန်စစ်မဟုတ်သူများကဲ့သို့ဖြစ်နေကြောင်း ယင်းတို့က သတိပေးသည်။
၁၀။ အကြံဉာဏ်ယူဖို့ ချဉ်းကပ်လာသောလုလင်၏ အစွဲလမ်းဆုံးအရာကို ယေရှုမည်သို့ဖော်ထုတ်ခဲ့သနည်း။
၁၀ တစ်ကြိမ်တွင် အလွန်ကြွယ်ဝသောလုလင်တစ်ဦးက ထာဝရအသက်ရရန် အဘယ်ကောင်းမှုပြုရပါမည်နည်းဟု ယေရှုကိုမေးမြန်းခဲ့သည်။ ယေရှုက ထိုအချိန်တွင် တရားဝင်ဆဲဖြစ်သော မောရှေပညတ်တရားအောက်ရှိ ပညတ်များကိုနာခံရန် သတိပေးခဲ့သည်။ ထိုလုလင်က ဤသို့အခိုင်အမာဆို၏– “ထိုပညတ်ရှိသမျှတို့ကို အကျွန်ုပ်သည် . . . စောင့်ရှောက်ပါပြီ။ အဘယ်အကျင့်လိုသေးသနည်း။” ယေရှု၏ ဤဖြေကြားချက်သည် လူအများအတွက် လက်တွေ့မကျပုံပေါ်ပေမည်– “သင်သည် စုံလင်ခြင်းသို့ရောက်လိုလျှင် သွားလော့။ ကိုယ်ဥစ္စာများကို ဆင်းရဲသောသူတို့အားပေးလော့။ ထိုသို့ပြုလျှင် ကောင်းကင်ဘုံ၌ ဘဏ္ဍာကိုရလိမ့်မည်။ သို့ပြီးမှ ငါ့နောက်သို့လိုက်လော့။” (မဿဲ ၁၉:၁၆-၂၁) ထိုလုလင်သည် သူ၏စည်းစိမ်ဥစ္စာများကို မစွန့်လွှတ်ချင်သောကြောင့် ဝမ်းနည်းစွာထွက်သွားလေ၏။ သူသည် ယေဟောဝါကို မည်မျှပင်ချစ်စေကာမူ စည်းစိမ်ဥစ္စာကိုချစ်သည့်စိတ်က ပိုများနေသည်။
၁၁၊ ၁၂။ (က) ရုပ်ပစ္စည်းနှင့်ပတ်သက်၍ အဘယ်စဉ်းစားဆင်ခြင်စရာစကားများကို ယေရှုမိန့်တော်မူခဲ့သနည်း။ (ခ) စည်းစိမ်ဥစ္စာသည် ယေဟောဝါအမှုထမ်းခြင်းကို မည်သို့တားဆီးနိုင်သနည်း။
၁၁ အဆိုပါဖြစ်ရပ်ကြောင့် မထင်မှတ်သောအကြောင်းတစ်ခုကို ယေရှုဤသို့ဖော်ထုတ်ပြသည်– “ငွေရတတ်သောသူသည် ကောင်းကင်နိုင်ငံတော်သို့ ဝင်ခဲလှ၏။ . . . ကုလားအုတ်သည် အပ်နဖားကိုလျှိုလွယ်၏။ ငွေရတတ်သောသူသည် ဘုရားသခင်နိုင်ငံတော်သို့ဝင်ခဲသည်။” (မဿဲ ၁၉:၂၃၊ ၂၄) ချမ်းသာကြွယ်ဝသူတစ်ဦးမျှ ဘုရားသခင့်နိုင်ငံတော်ကို အမွေခံရလိမ့်မည်မဟုတ်ဟု ယေရှုဆိုလိုခြင်းလော။ “ဘုရားသခင်သည် ခပ်သိမ်းသောအမှုကိုတတ်နိုင်သည်” ဟု ကိုယ်တော်ဆက်ပြောခဲ့သည်ဖြစ်ရာ ထိုသို့မဆိုလိုပါ။ (မဿဲ ၁၉:၂၅၊ ၂၆) အမှန်မှာ ယေဟောဝါ၏ကူညီမှုကြောင့် ထိုအချိန်က သူကြွယ်အချို့သည် ဝိညာဉ်တော်ဖွားခရစ်ယာန်များဖြစ်လာခဲ့ကြသည်။ (၁ တိမောသေ ၆:၁၇) မည်သို့ဆိုစေ ငွေရတတ်သူအများစုမှာ ဖြစ်မလာသောကြောင့် ယေရှုသည် ထိုစကားများကို သတိပေးချက်အဖြစ် မိန့်ဆိုခဲ့ခြင်းဖြစ်သည်။
၁၂ လူတစ်ဦးသည် ထိုကြွယ်ဝချမ်းသာသောလုလင်ကဲ့သို့ စည်းစိမ်ကိုတပ်မက်ပါက ယေဟောဝါအမှုတော်ကို စိတ်နှလုံးအကြွင်းမဲ့ထမ်းဆောင်ရန် တားဆီးခံရနိုင်သည်။ ကြွယ်ဝချမ်းသာသူကော “ငွေရတတ်ခြင်းငှာအလိုရှိသောသူ” ပါ ထိုသို့ဖြစ်နိုင်သည်။ (၁ တိမောသေ ၆:၉၊ ၁၀) ရုပ်ပစ္စည်းကို အားထားလွန်းသူသည် မိမိ၏ ‘ဝိညာဉ်ရေးလိုအပ်ချက်ကို သတိ’ မပြုမိသလောက် ဖြစ်လာနိုင်သည်။ (မဿဲ ၅:၃) သို့နှင့် ယေဟောဝါ၏အကူအညီ ရယူဖို့လိုသည်ဟုလည်း သူမထင်မှတ်တော့ပေ။ (တရားဟောရာ ၆:၁၀-၁၂) အသင်းတော်တွင် အထူးအရေးပေးခံလိုလာပေမည်။ (ယာကုပ် ၂:၁-၄) ထို့နောက် ယေဟောဝါ၏အမှုတော်ဆောင်ဖို့ထက် စည်းစိမ်ခံစားရန် အချိန်ကုန်ခံလာနိုင်သည်။
အမြင်မှန်မွေးမြူခြင်း
၁၃။ လောဒိကိမြို့သားများတွင် အဘယ်အမြင်မှားရှိခဲ့သနည်း။
၁၃ ပထမရာစုမှ လောဒိကိအသင်းတော်တွင် ရုပ်ပစ္စည်းအပေါ် အမြင်မှန်မရှိသူတစ်စု ရှိခဲ့သည်။ သူတို့ကို ယေရှုဤသို့မိန့်တော်မူ၏– “သင်ကလည်း၊ ငါသည်ဥစ္စာရတတ်၏။ ဘဏ္ဍာများကိုဆည်းပူးပြီ။ တစ်စုံတစ်ခုကိုမျှမလိုဟုပြောဆို၍၊ ကိုယ်တိုင်ပင်ပန်းခြင်း၊ သနားဖွယ်ဖြစ်ခြင်း၊ ဆင်းရဲခြင်း၊ မျက်စိကန်းခြင်း၊ အဝတ်အချည်းစည်းရှိခြင်းဖြစ်သည်ကို မသိပါတကား။” ဝိညာဉ်ရေးတွင် သနားစရာကောင်းသော ထိုအခြေအနေသို့ လောဒိကိမြို့သားများရောက်သွားရခြင်းမှာ သူတို့၏စည်းစိမ်ဥစ္စာကြောင့်မဟုတ်ပါ။ ယေဟောဝါအား ယုံကြည်ကိုးစားမည့်အစား စည်းစိမ်ဥစ္စာကို ယုံကြည်ကိုးစားခဲ့ကြသောကြောင့်ဖြစ်သည်။ ယင်းကြောင့် ဝိညာဉ်ရေးအရ မပူမအေးဖြစ်နေရာ ယေရှု၏ခံတွင်းမှ ‘ထွေးထုတ်’ ခံရလုပြီဖြစ်သည်။—ဗျာ. ၃:၁၄-၁၇။
၁၄။ ဟေဗြဲခရစ်ယာန်များသည် ပေါလု၏ချီးမွမ်းခြင်းကို အဘယ်ကြောင့်ရထိုက်သနည်း။
၁၄ တစ်ဖက်တွင်မူ နှိပ်စက်ညှဉ်းပန်းခံရချိန်တစ်လျှောက် ဟေဗြဲခရစ်ယာန်များ၏သဘောထားကို ပေါလုဤသို့ချီးမွမ်းခဲ့သည်– “သင်တို့သည် အကျဉ်းခံရသောသူတို့အတွက်ကြောင့် ကြင်နာသောစိတ်ရှိရသည်သာမက၊ ကိုယ်ပစ္စည်းဥစ္စာများကို သူတစ်ပါးလုယူဖျက်ဆီးသော်လည်း . . . သာ၍မြတ်သော အမြဲတည်သောဘဏ္ဍာရှိသည်ကိုသိ၍၊ လုယူဖျက်ဆီးခြင်းကို ဝမ်းမြောက်သောစိတ်နှင့်ဝန်ခံကြ၏။” (ဟေဗြဲ ၁၀:၃၄) အဆိုပါခရစ်ယာန်များသည် ရုပ်ပစ္စည်းများဆုံးရှုံးခြင်းကြောင့် အကြီးအကျယ်ဝမ်းနည်းပက်လက် မဖြစ်ခဲ့ကြချေ။ တန်ဖိုးအရှိဆုံးဖြစ်သည့် “သာ၍မြတ်သော အမြဲတည်သောဘဏ္ဍာ” ကို သူတို့ကိုင်စွဲထားသောကြောင့် ဆက်လက်ဝမ်းမြောက်နိုင်ခဲ့ကြသည်။ အဖိုးတန်ပုလဲတစ်လုံးအတွက် အရာရာကိုစွန့်လွှတ်ခဲ့သော ယေရှု၏ပုံဥပမာမှကုန်သည်ကဲ့သို့ မည်သည့်အရာကိုပင် စွန့်လွှတ်ရပါစေ ဘုရားသခင့်နိုင်ငံတော်မျှော်လင့်ချက်ကိုမူ မစွန့်လွှတ်မိဖို့ သူတို့စိတ်ပိုင်းဖြတ်ထားကြသည်။ (မဿဲ ၁၃:၄၅၊ ၄၆) ကောင်းမြတ်လှသည့် သဘောထားပင်။
၁၅။ လိုင်ဘေးရီးယားနိုင်ငံမှ ခရစ်ယာန်အမျိုးသမီးငယ်တစ်ဦး ဘုရားသခင့်နိုင်ငံတော်အကျိုးစီးပွားကို မည်သို့ရှေးဦးထားခဲ့သနည်း။
၁၅ ယနေ့ အလားတူသဘောထားမျိုး မွေးမြူနေကြသူ များစွာရှိ၏။ ဥပမာ၊ လိုင်ဘေးရီးယားနိုင်ငံမှ ခရစ်ယာန်အမျိုးသမီးငယ်တစ်ဦးသည် တက္ကသိုလ်တက်ရန် အခွင့်အရေးရရှိခဲ့သည်။ ထိုနိုင်ငံတွင် ဤသို့သောအခွင့်အရေးကို အနာဂတ်အတွက် အာမခံချက်ဖြစ်သည်ဟု ယူဆကြသည်။ သို့သော် သူသည် အချိန်ပြည့်ဧဝံဂေလိတရားဟောပြောသော ရှေ့ဆောင်တစ်ဦးဖြစ်ရာ ယာယီအထူးရှေ့ဆောင်အဖြစ်အမှုထမ်းရန် ဖိတ်ခေါ်ခံခဲ့ရသည်။ ဘုရားသခင့်နိုင်ငံတော်ကို ရှေးဦးထားပြီး အချိန်ပြည့်လုပ်ငန်း၌ ဆက်ပါဝင်ရန် သူရွေးချယ်ခဲ့သည်။ သူသည် တာဝန်ကျရာဒေသသို့သွားပြီး သုံးလအတွင်း ကျမ်းစာသင်အံမှု ၂၁ ခုစတင်ခဲ့သည်။ ဤညီအစ်မငယ်နှင့်တူသောသူ ထောင်ပေါင်းများစွာတို့သည် မိမိတို့ရရှိနိုင်သော အကျိုးအမြတ်များကို စွန့်လွှတ်သည့်အထိ ဘုရားသခင့်နိုင်ငံတော်ကို ရှေးဦးထားကြသည်။ ရုပ်ပစ္စည်းကို ဦးစားပေးသော ဤလောကတွင် ထိုသဘောထားမျိုးကို သူတို့မည်သို့ဆက်ထိန်းထားကြသနည်း။ အရည်အချင်းကောင်းများကို မွေးမြူထားကြခြင်းအားဖြင့်ဖြစ်သည်။ ထိုအရည်အချင်းတချို့ကို သုံးသပ်ကြည့်ကြစို့။
၁၆၊ ၁၇။ (က) ယေဟောဝါအား ယုံကြည်ကိုးစားနိုင်ရန် ကျိုးနွံမှုရှိဖို့ အဘယ်ကြောင့်အရေးကြီးသနည်း။ (ခ) ဘုရားသခင့်ကတိတော်များကို ယုံကြည်စိတ်ချသည့်သဘော အဘယ်ကြောင့်မွေးမြူသင့်သနည်း။
၁၆ ကျိုးနွံမှု– သမ္မာကျမ်းစာက ဤသို့ဆို၏– ‘ထာဝရဘုရားသခင်ကို စိတ်နှလုံးအကြွင်းမဲ့ကိုးစားလော့။ ကိုယ်ဉာဏ်ကိုအမှီမပြုနှင့်။ သွားလေရာရာ၌ ထာဝရဘုရားသခင်ကို မျက်မှောက်ပြုလော့။ သို့ပြုလျှင် သင်၏လမ်းခရီးတို့ကို ပဲ့ပြင်တော်မူမည်။ ငါသည် ပညာရှိ၏ဟု ကိုယ်ကိုမထင်နှင့်။’ (သု. ၃:၅-၇) တစ်ခါတစ်ရံ လမ်းစဉ်တစ်ခုကို လောကအမြင်မှကြည့်လျှင် လက်တွေ့ကျပုံပေါက်ပေမည်။ (ယေရမိ ၁၇:၉) သို့သော် စိတ်ရင်းမှန်သောခရစ်ယာန်တစ်ဦးသည် ယေဟောဝါ၏လမ်းညွှန်မှုကို မျှော်ကိုးသည်။ (ဆာလံ ၄၈:၁၄) အသင်းတော်ကိစ္စရပ်များတွင်၊ ပညာရေးတွင်၊ ဝမ်းစာရှာလုပ်ငန်းနှင့် အပန်းဖြေမှုအစရှိသည့် မည်သည့်ကိစ္စတွင်မဆို “သွားလေရာရာ၌” ယေဟောဝါ၏အကြံဉာဏ်ကို ကျိုးနွံစွာရှာကြံတတ်သည်။—ဆာလံ ၇၃:၂၄။
၁၇ ယေဟောဝါ၏ကတိတော်များကို ယုံကြည်စိတ်ချခြင်း– ပေါလုက “ဘုရားသခင့်အထံတော်သို့ချဉ်းကပ်သောသူသည် ဘုရားသခင်ရှိတော်မူသည်ကိုလည်းကောင်း၊ ကိုယ်တော်ကိုရှာသောသူအား အကျိုးပေးတော်မူသည်ကိုလည်းကောင်း ယုံကြည်ရမည်” ဟုဆိုခဲ့သည်။ (ဟေဗြဲ ၁၁:၆) ယေဟောဝါသည် မိမိ၏ကတိတော်များ ပြည့်စုံစေမည်ကို ကျွန်ုပ်တို့သံသယဖြစ်နေမည်ဆိုလျှင် ‘ဤလောကကို အပြည့်အဝသုံး’ သင့်သည်ဟု ကျွန်ုပ်တို့ယူမှတ်ပေမည်။ (၁ ကောရိန္သု ၇:၃၁) သို့သော် ကျွန်ုပ်တို့သည် ယုံကြည်ခြင်းခိုင်မာပါက ဘုရားသခင့်နိုင်ငံတော်ကို ရှေးဦးထားရန် စိတ်ပိုင်းဖြတ်ကြမည်။ ခိုင်မာသောယုံကြည်ခြင်း မည်သို့ဖြစ်ပေါ်လာနိုင်သနည်း။ မခြားမလပ်၊ နှလုံးပါပါဆုတောင်း၍ ကိုယ်ပိုင်လေ့လာမှု မှန်မှန်ပြုပြီး ယေဟောဝါထံချဉ်းကပ်ခြင်းအားဖြင့်ဖြစ်သည်။ (ဆာလံ ၁:၁-၃; ဖိလိပ္ပိ ၄:၆၊ ၇; ယာကုပ် ၄:၈) “ထာဝရဘုရား [သခင်] ကိုယ်တော်ကို အကျွန်ုပ်ကိုးစားပါ၏။ ကိုယ်တော်သည် အကျွန်ုပ်၏ဘုရားသခင်ဖြစ်တော်မူသည်ဟု အကျွန်ုပ်လျှောက်ဆိုပါ၏။ . . . ဆုကျေးဇူးတော်သည် အလွန်ကြီးလှပါ၏” ဟုဒါဝိဒ်မင်းနည်းတူ ကျွန်ုပ်တို့ဆုတောင်းနိုင်ကြသည်။—ဆာလံ ၃၁:၁၄၊ ၁၉။
၁၈၊ ၁၉။ (က) ဝီရိယရှိခြင်းက ယေဟောဝါအား ယုံကြည်ကိုးစားခြင်းကို မည်သို့တိုးပွားစေသနည်း။ (ခ) ခရစ်ယာန်တစ်ဦးသည် အဘယ်ကြောင့် ကိုယ်ကျိုးစွန့်ရန် အသင့်ရှိရမည်နည်း။
၁၈ ယေဟောဝါ၏အမှုတော်တွင် ဝီရိယရှိခြင်း– ပေါလုက “သင်တို့ရှိသမျှသည် . . . ထိုသို့သောလုံ့လဝီရိယကိုထုတ်၍၊ အဆုံးတိုင်အောင် ယုံမှားခြင်းနှင့်ကင်းသော မျှော်လင့်ခြင်းနှင့် ပြည့်စုံစေခြင်းငှာ ငါတို့သည်အလိုရှိကြ၏” ဟုရေးသားဖော်ပြကာ ယေဟောဝါ၏ကတိတော်များအပေါ် ယုံကြည်စိတ်ချခြင်းနှင့် ဝီရိယရှိခြင်းကို ဆက်စပ်ပေးခဲ့သည်။ (ဟေဗြဲ ၆:၁၁၊ ၁၂) ကျွန်ုပ်တို့သည် ယေဟောဝါ၏လုပ်ငန်းတော်၌ အလုပ်များနေမည်ဆိုလျှင် ကျွန်ုပ်တို့ကို ကိုယ်တော်ကူညီမစပေးပါလိမ့်မည်။ ထိုသို့ကူညီမစခံရသည့်အခါတိုင်း ကိုယ်တော်အား တိုး၍ယုံကြည်ကိုးစားလာပြီး “တည်ကြည်သောစိတ်နှင့်ပြည့်စုံ၍ မရွေ့လျော့မတိမ်းယိမ်း” သူများ ဖြစ်လာကြသည်။ (၁ ကောရိန္သု ၁၅:၅၈) ကျွန်ုပ်တို့၏ယုံကြည်ခြင်း တိုးပွားလာကာ မျှော်လင့်ချက်လည်း ပိုမိုခိုင်မာလာသည်။—ဧဖက် ၃:၁၆-၁၉။
၁၉ ကိုယ်ကျိုးစွန့်ရန် အသင့်ရှိခြင်း– ပေါလုသည် ယေရှုနောက်လိုက်ဖို့ အလားအလာကောင်းသော အလုပ်အကိုင်ကို စွန့်လွှတ်ခဲ့သည်။ ငွေရေးကြေးရေးအရ တစ်ခါတစ်ရံခက်ခဲသော်လည်း သူအရွေးမှန်ခဲ့ကြောင်း ထင်ရှားသည်။ (၁ ကောရိန္သု ၄:၁၁-၁၃) မိမိ၏ကျေးကျွန်များ စည်းစိမ်ရှိရှိနေရမည်ဟု ယေဟောဝါကတိမပြုထားသောကြောင့် တစ်ခါတစ်ရံ အခက်အခဲများကြုံကြရသည်။ ကျွန်ုပ်တို့၏ဘဝပုံစံကို ရိုးရှင်းစေပြီး ကိုယ်ကျိုးစွန့်ရန် အသင့်ရှိခြင်းတို့က ယေဟောဝါအမှုတော်ဆောင်ရန် ကျွန်ုပ်တို့၏သန္နိဋ္ဌာန်မည်မျှခိုင်မာကြောင်း သက်သေထူသည်။—၁ တိမောသေ ၆:၆-၈။
၂၀။ ဘုရားသခင့်နိုင်ငံတော်အကျိုးစီးပွားကို ရှေးဦးထားသူတစ်ဦးသည် သည်းခံမှုရှိရန် အဘယ်ကြောင့်အရေးကြီးသနည်း။
၂၀ သည်းခံခြင်း– တပည့်ဖြစ်သူယာကုပ်က ခရစ်ယာန်ရောင်းရင်းများကို ဤသို့တိုက်တွန်းခဲ့သည်– “ထိုကြောင့်၊ ညီအစ်ကိုတို့၊ သခင်ဘုရားကြွလာတော်မူသည်တိုင်အောင် သည်းခံလျက်စောင့်နေကြလော့။” (ယာကုပ် ၅:၇) အလွန်ဗျာများနေကြသည့် ဤလောကတွင် သည်းခံစိတ်ရှည်ဖို့ မလွယ်ကူပါ။ အဘယ်အရာကိုမဆို မြန်မြန်ဖြစ်ပျက်စေချင်ကြသည်။ သို့သော် ပေါလုက “ယုံကြည်ခြင်းနှင့် သည်းခံခြင်းအားဖြင့် ကတိတော်တို့ကို အမွေခံရသော” သူတို့ကိုတုပရန် တိုက်တွန်းထားသည်။ (ဟေဗြဲ ၆:၁၁၊ ၁၂) ယေဟောဝါအား စောင့်မျှော်လိုစိတ်ရှိပါ။ မြေကြီးပရဒိသုတွင်ရရှိမည့် ထာဝရအသက်သည် အမှန်ပင်စောင့်ရကျိုးနပ်ပါသည်။
၂၁။ (က) ကျွန်ုပ်တို့သည် ဘုရားသခင့်နိုင်ငံတော်အကျိုးစီးပွားကို ရှေးဦးထားသောအခါ အဘယ်အရာကို ဖော်ပြကြသနည်း။ (ခ) နောက်ဆောင်းပါးတွင် အဘယ်အကြောင်းသုံးသပ်မည်နည်း။
၂၁ ဘုရားသခင့်နိုင်ငံတော်ကို ရှေးဦးထားပါဟူသော ယေရှု၏သွန်သင်ချက်သည် အမှန်လက်တွေ့ကျပါသည်။ ထိုသို့ကျွန်ုပ်တို့ပြုကြသောအခါ ယေဟောဝါကို အမှန်ယုံကြည်ကိုးစားပြီး ခရစ်ယာန်တစ်ဦးအတွက် တစ်ခုတည်းသောစိတ်ချရသည့်လမ်းစဉ်ကို ရွေးချယ်ကြောင်း ဖော်ပြကြသည်။ သို့သော် “ဘုရားသခင်၏ . . . ဖြောင့်မတ်ခြင်းတရားတော်ကို ရှေ့ဦးစွာရှာ” နေကြဖို့လည်း ယေရှုသွန်သင်ခဲ့သည်။ ယနေ့ အဆိုပါအားပေးချက်သည် အဘယ်ကြောင့် အထူးလိုအပ်နေကြောင်း နောက်ဆောင်းပါးတွင် သုံးသပ်ပါမည်။
သင်ရှင်းပြနိုင်သလော
• ရုပ်ပစ္စည်းနှင့်ပတ်သက်၍ အဘယ်မျှတသောအမြင်ရှိရန် ယေရှုအားပေးခဲ့သနည်း။
• ကုလားအုတ်နှင့် အပ်နဖားအကြောင်း ယေရှု၏ပုံဥပမာမှ ကျွန်ုပ်တို့အဘယ်သင်ခန်းစာရသနည်း။
• အဘယ်ခရစ်ယာန်အရည်အချင်းများက ဘုရားသခင့်နိုင်ငံတော်ကို ရှေးဦးထားရန် ကူညီပေးမည်နည်း။
[လေ့လာရန်မေးခွန်းများ]
[စာမျက်နှာ ၂၁ ပါ ရုပ်ပုံ]
ယေရှု၏ပရိသတ် အများစုမှာဆင်းရဲနွမ်းပါးသူများဖြစ်
[စာမျက်နှာ ၂၃ ပါ ရုပ်ပုံ]
ချမ်းသာကြွယ်ဝသောလုလင်သည်ဘုရားသခင်ကိုချစ်သည်ထက်သူ၏စည်းစိမ်ဥစ္စာများကို ပိုချစ်ခဲ့
[စာမျက်နှာ ၂၃ ပါ ရုပ်ပုံ]
ယေရှု၏ပုံဥပမာမှ ကုန်သည်သည်အဖိုးထိုက်သောပုလဲတစ်လုံးအတွက် အရာရာကိုစွန့်လွှတ်ခဲ့
[စာမျက်နှာ ၂၄ ပါ ရုပ်ပုံ]
ယေဟောဝါ၏လုပ်ငန်းတော်၌အလုပ်များနေမည်ဆိုလျှင် ကျွန်ုပ်တို့ကိုကိုယ်တော်ကူညီမစပါလိမ့်မည်