“ရှေးအကျဆုံး သမ္မာကျမ်းစာကိုးကားချက်များ”
“ရှေးအကျဆုံး သမ္မာကျမ်းစာကိုးကားချက်များ”
လွန်ခဲ့သော နှစ်ဆယ့်ငါးနှစ်က အစ္စရေးလူမျိုး ရှေးဟောင်းသုတေသနပညာရှင်များသည် အံ့သြဖွယ်ကောင်းသောအရာတစ်ခုကို ရှာဖွေတွေ့ ရှိခဲ့သည်။ ယေရုရှလင်မြို့ ဟိန္နုံတောင်ကြား၏ တောင်စောင်းများတွင်ရှိသော သင်္ချိုင်းဂူတစ်ခုအတွင်းတွင် သမ္မာကျမ်းစာမှ ကျမ်းချက်များရေးသားထားသည့် ငွေစာလိပ်နှစ်ခုကို တွေ့ ရှိခဲ့ကြသည်။ စာလိပ်များကို ဘီစီ ၆၀၇ ခုနှစ်၊ ယေရုရှလင်မြို့ကို ဗာဗုလုန်တို့မဖျက်ဆီးမီအချိန်က ဖြစ်သည်ဟု ရက်စွဲတပ်ခဲ့သည်။ ရေးထားသောစာများက တောလည်ရာ ၆:၂၄-၂၆ တွင်မှတ်တမ်းတင်ထားသော ကောင်းချီးများ၏တစ်စိတ်တစ်ပိုင်းကို ကိုးကားထားသည်။ စာလိပ်နှစ်ခုလုံးတွင် ဘုရားသခင်၏နာမတော် ယေဟောဝါကို အကြိမ်ကြိမ်သုံးထားသည်။ အက္ခရာတင်ထားသည့်စာသားများကို “ဟေဗြဲကျမ်းစာမှ စာပိုဒ်များအား မှတ်တမ်းတင်ထားသည့် ရှေးအကျဆုံးသောလက်ရာများ” အဖြစ်ဖော်ပြကြသည်။
သို့သော် ပညာရှင်အချို့က ထိုရက်စွဲကို သံသယရှိကြပြီး ယင်းစာလိပ်များကို ဘီစီ ဒုတိယရာစုတွင် ရေးသားခဲ့သည်ဟု အငြင်းပွားကြသည်။ ဤသို့သဘောထားကွဲလွဲရခြင်း အကြောင်းတစ်ခုမှာ သေးငယ်လှသောဤစာလိပ်များ၏ အချက်အလက်များကို အသေအချာဆန်းစစ်ရန် မဖြစ်နိုင်လောက်သည့်အထိ မူရင်းဓာတ်ပုံများ၏ အရည်အသွေးမကောင်းသောကြောင့်ဖြစ်သည်။ ရက်စွဲပြဿနာကိုဖြေရှင်းရန် ပညာရှင်အုပ်စုတစ်စုသည် လေ့လာမှုအသစ်ပြုလုပ်ခဲ့သည်။ သူတို့သည် စာလိပ်များ၏ ပုံရိပ်ပြတ်သားမှုနှုန်းအမြင့်ဆုံး ဒီဂျစ်တယ်ပုံများကိုထုတ်လုပ်ရန် နောက်ဆုံးပေါ် ဓာတ်ပုံပညာနှင့် ကွန်ပျူတာပုံရိပ်ဆိုင်ရာ နည်းပညာများကိုသုံးခဲ့ကြသည်။ လေ့လာဆန်းစစ်မှုအသစ်၏ အဖြေများကို မကြာမီက ထုတ်ပြန်ခဲ့သည်။ ပညာရှင်အုပ်စုသည် အဘယ်ကောက်ချက်ချနိုင်ခဲ့သနည်း။
ပထမဦးစွာ ပညာရှင်များက စာလိပ်ကိုတွေ့ ရှိခဲ့သောနေရာ၏ ရှေးဟောင်းသုတေသနဆိုင်ရာ အချက်အလက်များသည် ဗာဗုလုန်သို့ပြည်နှင်ဒဏ်မခံရမီကရက်စွဲကို ထောက်ခံကြောင်း ဖော်ပြသည်။ စာလုံးများ၏ပုံစံ၊ အရေးအသားပုံစံ၊ စာလုံးအနေအထား၊ စာလုံးများရေးသားထားသည့်အစဉ်နှင့် ဦးတည်ရာတို့ကိုကြည့်ပြီး ရက်စွဲတပ်ခြင်းဖြစ်သည့် ရှေးခေတ်အက္ခရာပညာဆိုင်ရာ ရှာဖွေတွေ့ ရှိချက်များကလည်း တူညီသောရက်စွဲဖြစ်သည့် ဘီစီ ခုနစ်ရာစုအဆုံးပိုင်းကိုသာ ဖော်ပြနေသည်။ နောက်ဆုံး စာလုံးပေါင်းသတ် ပုံကိုလေ့လာကြည့်ပြီး ထိုအုပ်စု ဤသို့ ကောက်ချက်ချသည်– “စာလိပ်ပါ စာလုံးပေါင်းသတ်ပုံဆိုင်ရာ အချက်အလက်များသည် စာလိပ်ကိုရက်စွဲတပ်ခြင်းနှင့်ပတ်သက်ပြီး ရှေးဟောင်းသုတေသနပညာနှင့် ရှေးခေတ်အက္ခရာပညာဆိုင်ရာ အထောက်အထားများနှင့် ကိုက်ညီသည်။”
အမေရိကန်ကျောင်းများ၏ အရှေ့တိုင်းသုတေသနလုပ်ငန်း သတင်းလွှာ ဂျာနယ်က ကာ တဲဖ်စ တဲဖ့်ဟိန္နုံကမ္ဗည်းစာ ဟုလည်းခေါ်သည့် ငွေစာလိပ်များအား လေ့လာခြင်းကို ဤသို့အကျုဉ်းချုံးဖော်ပြသည်– “ထို့ကြောင့် စာလိပ်ပေါ်တွင်တွေ့ ရှိရသော စာသားများသည် ရှေးအကျဆုံး သမ္မာကျမ်းစာကိုးကားချက်များဖြစ်သည်ဟူသည့် ပညာရှင်များ၏ကောက်ချက်ကို ကျွန်ုပ်တို့ ထောက်ခံပါသည်။”
[Picture Credit Lines on page 32]
Cave: Pictorial Archive (Near Eastern History) Est.; inscriptions: Photograph © Israel Museum, Jerusalem; courtesy of Israel Antiquities Authority