နေဟမိကျမ်းမှ ပေါ်လွင်ချက်များ
ယေဟောဝါ၏နှုတ်မြွက်စကားတော်သည် အသက်ရှင်၏
နေဟမိကျမ်းမှ ပေါ်လွင်ချက်များ
ဧဇရကျမ်းနိဂုံးပိုင်းမှ အဖြစ်အပျက်များ ဖြစ်ပျက်ပြီးသည်မှာ တစ်ဆယ့်နှစ်နှစ်လွန်ခဲ့ပြီ။ ယခု မေရှိယပေါ်ထွန်းမည့် သီတင်း ၇၀ ကို အစပျိုးပေးသည့် ဖြစ်ရပ်တည်းဟူသော “ယေရုရှလင်မြို့ကို တစ်ဖန်တည်ထောင်ပြုစုစေခြင်းငှာ အမိန့်တော်ရှိသည်နေ့” အစပြုပါတော့မည်။ (ဒံယေလ ၉:၂၄-၂၇) နေဟမိကျမ်းသည် ယေရုရှလင်မြို့ရိုးကို ဘုရားသခင့်လူမျိုးတော် ပြန်လည်တည်ဆောက်ခြင်းအကြောင်းနှင့်ဆိုင်သော ရာဇဝင်ကျမ်းဖြစ်၏။ ယင်းသည် ဘီစီ ၄၅၆ မှ ဘီစီ ၄၄၃ နောက်ပိုင်းအထိ၊ ၁၂ နှစ်ကျော်ကြာသော အရေးပါသည့်ကာလကို ငုံမိသည်။
မြို့ဝန်မင်းနေဟမိရေးသားခဲ့သော ဤကျမ်းသည် ယေဟောဝါကို လုံးဝမှီခိုအားထားပြီး မဆုတ်မနစ်လုပ်ဆောင်သည့်အခါ စစ်မှန်သောဝတ်ပြုရေး မြှင့်တင်ခံရပုံကိုဖော်ပြသည့် စိတ်လှုပ်ရှားဖွယ် မှတ်တမ်းတစ်ခုဖြစ်သည်။ ယေဟောဝါ၏အလိုတော်ဖြစ်မြောက်ရေးအတွက် ကိစ္စရပ်များကို ကိုယ်တော်လမ်းကြောင်းပေးပုံကိုလည်း ဤမှတ်တမ်းက ထင်ထင်ရှားရှားဖော်ပြသည်။ ခိုင်မာပြတ်သားပြီး သတ္တိရှိသောခေါင်းဆောင်တစ်ဦး၏ အတ္ထုပ္ပတ္တိလည်းဖြစ်သည်။ ‘ဘုရားသခင်၏နှုတ်မြွက်စကားတော်သည် အသက်ရှင်၍ တန်ခိုးနှင့်ပြုပြင်’ တတ်သည်ဖြစ်ရာ နေဟမိကျမ်းသည် စစ်မှန်သောဝတ်ပြုသူအားလုံးကို အဖိုးတန်သင်ခန်းစာများပေးသည်။—ဟေဗြဲ ၄:၁၂။
“မြို့ရိုးကို လက်စသတ်ကြ၏”
နေဟမိသည် ရှုရှန်နန်းတော်တွင် ဘုရင်အာတဇေရဇ် လောန်ဂင်မနပ်စ်၏ ကျွန်ယုံတော်တစ်ဦးဖြစ်သည်။ သူ၏လူမျိုးသည် “ကြီးစွာသောဆင်းရဲခြင်း၊ ကဲ့ရဲ့ခြင်းကို ခံရကြ၏။ ယေရုရှလင်မြို့ရိုးသည်ပြိုပျက်လျက်၊ မြို့တံခါးလည်း မီးလောင်၍ ကုန်ပြီ” ဟူသော သတင်းကိုကြားသော် အလွန်ဝမ်းနည်းကြေကွဲလေသည်။ ထိုအခါ လမ်းညွှန်မှုရဖို့ ဘုရားသခင်ထံ စိတ်ထက်သန်စွာ ဆုတောင်းလေ၏။ (နေဟမိ ၁:၃၊ ၄) မကြာမီပင် သူ၏ဝမ်းနည်းမှုကို ရှင်ဘုရင် သတိပြုမိသဖြင့် ယေရုရှလင်မြို့သို့သွားရန် အခွင့်အလမ်းပွင့်သွားသည်။
ယေရုရှလင်မြို့သို့ရောက်သော် နေဟမိသည် ညအမှောင်တွင် မြို့ရိုးကို ကြည့်ရှုစစ်ဆေးပြီး ပြန်လည်တည်ဆောက်ရန် မိမိ၏အစီအစဉ်ကို ဂျူးများအား အသိပေးလေသည်။ ဆောက်လုပ်ရေးစတင်သည်နှင့် အတိုက်အခံကြုံရလေ၏။ သို့သော် နေဟမိ၏ ရဲရင့်သောဦးဆောင်မှုကြောင့် “မြို့ရိုးကိုလက်စသတ်ကြ၏။”—နေဟမိ ၆:၁၅။
ကျမ်းစာမေးခွန်းများ အဖြေ–
၁:၁; ၂:၁—ဤအခန်းငယ်နှစ်ခုတွင်ဖော်ပြထားသော “နန်းစံနှစ်ဆယ်” ကို တစ်နှစ်တည်းမှ စရေတွက်ခြင်းလော။ မှန်ပါသည်။ အာတဇေရဇ်မင်းကြီးနန်းစံ နှစ်ဆယ်နှစ်မြောက်ဖြစ်သည်။ သို့သော် ရေတွက်ပုံချင်း မတူပါ။ အာတဇေရဇ်နန်းတက်သည့်နှစ်မှာ ဘီစီ ၄၇၅ ဖြစ်သည်ဟု သမိုင်းအထောက်အထားက ဖော်ပြသည်။ ဗာဗုလုန်ကျမ်းပညာရှင်များသည် ပါးရှားဘုရင်များနန်းစံသည့်ကာလကို နိသန်လ (မတ်/ဧပြီလ) မှနောက် နိသန်လအထိ ရေတွက်လေ့ရှိကြရာ အာတဇေရဇ်နန်းစတက်သည့်နှစ်မှာ ဘီစီ ၄၇၄၊ နိသန်လမှစတင်သည်။ ထို့ကြောင့် နေဟမိ ၂:၁ ပါ နန်းစံနှစ်ဆယ်သည် ဘီစီ ၄၅၅၊ နိသန်လမှ အစပြုသည်။ နေဟမိ ၁:၁ ပါ ခိသလုလ (နိုဝင်ဘာ/ဒီဇင်ဘာလ) သည် ယခင်နှစ် ဘီစီ ၄၅၆ ခုနှစ်၏ခိသလုလဖြစ်သည်။ အာတဇေရဇ်နန်းစံနှစ်ဆယ်နှစ်မြောက်၏ ခိသလုလဟုလည်း နေဟမိ ရည်ညွှန်းသည်။ ဤတွင် နေဟမိသည် မင်းကြီးနန်းဆက်ခံသည့်ရက်စွဲမှ ရေတွက်နေခြင်းဖြစ်ပေမည်။ နေဟမိသည် ယနေ့ဂျူးတို့အခေါ် လောကနှစ်မှ အချိန်စတွက်ခြင်းလည်းဖြစ်နိုင်သည်။ အဆိုပါလောကနှစ်သည် စက်တင်ဘာ/အောက်တိုဘာလနှင့်ညီသော တိရှရိလတွင် စတင်သည်။ မည်သို့ပင်ဖြစ်စေ ယေရုရှလင်မြို့ကိုပြန်လည်တည်ထောင်ရန် အမိန့်ရသည့်နှစ်မှာ ဘီစီ ၄၅၅ ခုနှစ်ဖြစ်သည်။
၄:၁၇၊ ၁၈—လက်တစ်ဖက်တည်းနှင့် မည်သို့ဆောက်လုပ်နိုင်ပါမည်နည်း။ ဝန်ထမ်းသူများအဖို့ ယင်းသည် ပြဿနာမဟုတ်ပါ။ ဝန်များကို သူတို့၏ဦးခေါင်း သို့မဟုတ် ပခုံးပေါ် ထမ်းထားပြီး လက်တစ်ဖက်နှင့် ထိန်းပေးပြီးနောက် အခြား “လက်တစ်ဖက်နှင့် လက်နက်ကိုကိုင်” နိုင်ကြပါသည်။ လက်နှစ်ဖက်နှင့်အလုပ်လုပ်ရသော ဆောက်လုပ်ရေးသမားများမူ “ခါး၌ဓားဆွဲလျက်တည်လုပ်ကြ၏။” သို့ဖြင့် ရန်သူတိုက်ခိုက်လာခဲ့သော် တိုက်ပွဲဝင်ဖို့ အသင့်ရှိနေကြသည်။
၅:၇—နေဟမိသည် အဘယ်နည်းဖြင့် ‘မှူးမတ်နှင့် မင်းအရာရှိတို့ကို အပြစ်တင်’ ခဲ့သနည်း။ ထိုသူတို့သည် မောရှေပညတ်ကိုချိုးဖောက်ပြီး ဂျူးအမျိုးသားချင်းများကို အတိုးကြီးစားနေကြသည်။ (ဝတ်ပြုရာ ၂၅:၃၆; တရားဟောရာ ၂၃:၁၉) အတိုးနှုန်းကိုလည်း မြှင့်ထားကြသည်။ လစဉ် တစ်ရာပုံတစ်ပုံ အတိုးယူလျှင်ပင် တစ်နှစ်လျှင် ၁၂ ရာခိုင်နှုန်းဖြစ်ပေမည်။ အခွန်ဆောင်ရခြင်းနှင့် အစာခေါင်းပါးခြင်းတို့ကြောင့် ဝန်ပိနေသူတို့အား ထိုသို့အမြတ်ထုတ်ခြင်းသည် ရက်စက်ရာရောက်သည်။ နေဟမိသည် ဘုရားသခင့်ပညတ်တော်ကိုထောက်ပြပြီး သူဌေးသူကြွယ်များကို ပဲ့ပြင်ဆုံးမကာ သူတို့၏အမှားကိုဖော်ထုတ်ခြင်းဖြင့် အပြစ်တင်ခဲ့သည်။
၆:၅—လျှို့ဝှက်စာများကို တံဆိပ်ခတ်ထားသောအိတ်ထဲ ထည့်လေ့ရှိရာ သမ္ဘာလတ်သည် “တံဆိပ်မခတ်သောစာ” ကို အဘယ်ကြောင့်ပို့ရသနည်း။ သမ္ဘာလတ်သည် စာတွင်ပါသော သူ၏စွပ်စွဲချက်များကို လူသိရှင်ကြားဖြစ်စေလို၍ အိတ်ဖွင့်ပေးစာ ပို့လိုက်ခြင်းဖြစ်နိုင်သည်။ ယင်းကြောင့် နေဟမိသည် အမျက်ဒေါသထွက်ပြီး သူ့အနေနှင့် ခုခံကာကွယ်ရန် ဆောက်လုပ်ရေးလုပ်ငန်းကိုရပ်နားထားလိမ့်မည်ဟု သူယူမှတ်ခဲ့ပေမည်။ သို့မဟုတ် စာတွင်ပါသောအကြောင်းအရာများကြောင့် ဂျူးတို့သည် ထိတ်လန့်သွားပြီး ဆောက်လုပ်ရေးလုပ်ငန်းကို လုံးလုံးရပ်တန့်ကြမည်ဟု သမ္ဘာလတ်ယူဆခဲ့ပေမည်။ သို့သော် နေဟမိသည် ကြောက်လန့်မသွားဘဲ တည်ငြိမ်စွာဖြင့် ဘုရားသခင်ပေးသည့်တာဝန်ကို ဆက်လုပ်ဆောင်ခဲ့သည်။
ကျွန်ုပ်တို့အတွက် သင်ခန်းစာ–
၁:၄; ၂:၄; ၄:၄၊ ၅။ အရေးကြုံလာသောအခါ သို့မဟုတ် အရေးကြီးဆုံးဖြတ်ချက်များ ချရမည့်အခါ ကျွန်ုပ်တို့သည် ‘ဆုတောင်းခြင်းအမှုကို အမြဲပြု’ ပြီး သီအိုကရက်တစ်ညွှန်ကြားမှုအတိုင်း ပြုမူဆောင်ရွက်သင့်သည်။—ရောမ ၁၂:၁၂။
၁:၁၁–၂:၈; ၄:၄၊ ၅၊ ၁၅၊ ၁၆; ၆:၁၆။ ယေဟောဝါသည် စိတ်ရင်းမှန်ဖြင့်တောင်းသော မိမိကျေးကျွန်များ၏ဆုတောင်းချက်များကို နားညောင်းတော်မူ၏။—ဆာလံ ၈၆:၆၊ ၇။
၁:၄; ၄:၁၉၊ ၂၀; ၆:၃၊ ၁၅။ နေဟမိသည် သနားကြင်နာတတ်သူဖြစ်သော်လည်း ဖြောင့်မတ်ခြင်းတရားအတွက် ခိုင်မာပြတ်သား၍ လုပ်ရဲကိုင်ရဲသူအဖြစ် ပုံသက်သေကောင်းပြခဲ့သည်။
၁:၁၁–၂:၃။ နေဟမိ ဝမ်းမြောက်ရသည့် အဓိကအကြောင်းရင်းမှာ ဖလားတော်ဝန်အဖြစ် ဂုဏ်ရှိသည့်ရာထူးရထားခြင်းကြောင့်မဟုတ်ဘဲ စစ်မှန်သောဝတ်ပြုရေး တိုးတက်စေခွင့်ရခြင်းကြောင့်ဖြစ်သည်။ ယေဟောဝါ၏ဝတ်ပြုရေးနှင့် ယင်းကို မြှင့်တင်ပေးသည့်အရာမှန်သမျှသည် ကျွန်ုပ်တို့အဓိကအလေးထားရာ၊ ကျွန်ုပ်တို့ကို ဝမ်းမြောက်စေသည့်အကြောင်း ဖြစ်သင့်သည်မဟုတ်လော။
၂:၄-၈။ မြို့ရိုးပြန်တည်ဆောက်ဖို့ နေဟမိကို ယေရုရှလင်မြို့သို့ ခရီးထွက်ခွင့်ပေးရန် အာတဇေရဇ်ကို ယေဟောဝါလှုံ့ဆော်ပေးခဲ့သည်။ ‘ရှင်ဘုရင်၏စိတ်နှလုံးသည် ရေချောင်းကဲ့သို့ဖြစ်၍ ယေဟောဝါ၏လက်တော်၌ရှိသဖြင့် အလိုတော်ရှိသည်အတိုင်း လှည့်စေတော်မူ၏’ ဟု နယပုံပြင် ၂၁:၁ ကဆိုသည်။
၃:၅၊ ၂၇။ စစ်မှန်သောဝတ်ပြုရေး အကျိုးအတွက် အလုပ်ကြမ်းလုပ်ရခြင်းကို အောက်ကျသည်ဟု “တေကောမင်းတို့” နည်းတူ မယူမှတ်သင့်ချေ။ ယင်းအစား အားသွန်ခွန်စိုက်လုပ်ဆောင်ခဲ့ကြသော တေကောမြို့သားများကို ကျွန်ုပ်တို့အတုယူနိုင်သည်။
၃:၁၀၊ ၂၃၊ ၂၈-၃၀။ အချို့သူတို့သည် ဘုရားသခင့်နိုင်ငံတော်ကြွေးကြော်သူများ လိုအပ်သောနေရာများသို့ ပြောင်းရွှေ့နိုင်ကြသော်လည်း ကျွန်ုပ်တို့အများစုမှာ မိမိတို့အရပ်ဒေသတွင်နေပြီး စစ်မှန်သောဝတ်ပြုရေးကို ထောက်ပံ့ကူညီပေးကြသည်။ ဘုရားသခင့်နိုင်ငံတော်ခန်းမ ဆောက်လုပ်ရေးလုပ်ငန်းနှင့် သဘာဝဘေးဒဏ် ကယ်ဆယ်ရေးလုပ်ငန်းများအပြင် အရေးအကြီးဆုံးမှာ ဘုရားသခင့်နိုင်ငံတော်သတင်း ဟောပြောခြင်းလုပ်ငန်းတွင် ပါဝင်ခြင်းဖြင့် ထိုသို့ပြုလုပ်နိုင်ကြသည်။
၄:၁၄။ အတိုက်အခံများကြုံရသည့်အခါ ကျွန်ုပ်တို့လည်း ‘ကြီးမြတ်၍ ကြောက်မက်ဖွယ်ဖြစ်တော်မူသော ဘုရားသခင်’ ကိုအောက်မေ့ခြင်းဖြင့် ကြောက်စိတ်ကို ပျောက်စေနိုင်သည်။
၅:၁၄-၁၉။ ခရစ်ယာန်ကြီးကြပ်မှူးများအတွက် နေဟမိသည် နှိမ့်ချခြင်း၊ တစ်ကိုယ်ကောင်းမဆန်ခြင်း၊ အမြော်အမြင်ရှိခြင်းတို့ တင်ပြရာတွင် အလွန်ကောင်းသောပုံသက်သေဖြစ်၏။ ဘုရားသခင့်ပညတ်တော်ကို မဖြစ်မနေ လိုက်နာစေခဲ့သော်လည်း သူ့ကိုယ်ကျိုးအတွက် အခြားသူများကို ပိုင်စိုးပိုင်နင်းမလုပ်ခဲ့ချေ။ ယင်းအစား ဖိနှိပ်ခံရသူများနှင့် နွမ်းပါးသူများကို သူစာနာထောက်ထားခဲ့သည်။ နေဟမိသည် ရက်ရောမှုတင်ပြရာတွင် ဘုရားသခင့်ကျေးကျွန်အားလုံးအတွက် ထူးခြားထင်ရှားသော ပုံသက်သေကောင်းဖြစ်သည်။
“အိုအကျွန်ုပ်၏ဘုရားသခင် ကျေးဇူးပြုပါမည်အကြောင်း အကျွန်ုပ်ကိုအောက်မေ့တော်မူပါ”
ယေရုရှလင်မြို့ရိုး လက်စသတ်ပြီးသည်နှင့် နေဟမိသည် မြို့တံခါးများကိုတပ်ဆင်ပြီး မြို့တော်လုံခြုံရေးအတွက် အစီအစဉ်များရေးဆွဲလေလည်။ ထို့နောက် ဆွေစဉ်မျိုးဆက်စာရင်းကောက်သည်။ လူများအပေါင်းတို့သည် လာ၍ “ရေတံခါးလမ်းတွင်စည်းဝေး” ကြသောအခါ မောရှေပညတ္တိကျမ်းစာကို ယဇ်ပုရောဟိတ်ဧဇရက ဖတ်ပြပြီး နေဟမိနှင့်လေဝိသားတို့က ပညတ်တရားတော်အကြောင်း ရှင်းပြကြသည်။ (နေဟမိ ၈:၁) သကေနေပွဲအကြောင်း သိလာသောအခါ ၎င်းပွဲတော်ကို ဝမ်းသာအားရ ကျင်းပကြလေသည်။
နောက်တစ်ကြိမ်စည်းဝေးကြပြန်၍ “ဣသရေလအမျိုးစစ်” ဖြစ်သောသူတို့သည် တစ်မျိုးသားလုံး၏အပြစ်ကို ဖော်ပြတောင်းပန်ကြပြီး လေဝိသားတို့က ဣသရေလလူမျိုးနှင့် ဘုရားသခင်ဆက်ဆံပုံများကို ပြန်လည်သုံးသပ်ကြကာ လူတို့က “ဘုရားသခင်၏တရားတော်အတိုင်း ကျင့်ပါမည်ဟူ၍” ကျိန်ဆိုကြသည်။ (နေဟမိ ၉:၁၊ ၂; ၁၀:၂၉) ယေရုရှလင်မြို့တွင် နေထိုင်သူဦးရေနည်းသောကြောင့် မြို့ပြင်တွင်နေထိုင်သူ ဆယ်ဦးအနက် တစ်ဦးကို မြို့ထဲတွင်ဝင်ရောက်နေထိုင်ရန် မဲစနစ်ဖြင့်ရွေးကြသည်။ ထို့နောက် မြို့ရိုးကို အခမ်းအနားဖြင့် ဖွင့်လှစ်ကြရာ “ယေရုရှလင်မြို့ဝမ်းမြောက်သံကို ဝေးသောအရပ်၌ ကြားရကြ၏။” (နေဟမိ ၁၂:၄၃) ယေရုရှလင်မြို့သို့ရောက်ပြီး တစ်ဆယ့်နှစ်နှစ်အကြာတွင် နေဟမိသည် သူ့တာဝန်ကိုထမ်းဆောင်ဖို့ အာတဇေရဇ်ထံ ပြန်သွားသည်။ မကြာမီ ဂျူးများကြား မသန့်ရှင်းမှုပေါ်လာပြန်သည်။ ယေရုရှလင်မြို့သို့ နေဟမိပြန်လာသောအခါ အခြေအနေကိုပြုပြင်တည့်မတ်ပေးဖို့ ချက်ချင်းအရေးယူလုပ်ဆောင်ခဲ့သည်။ သူကိုယ်တိုင်နှင့်ပတ်သက်၍မူ “အိုအကျွန်ုပ်၏ဘုရားသခင် ကျေးဇူးပြုပါမည်အကြောင်း အကျွန်ုပ်ကိုအောက်မေ့တော်မူပါ” ဟုနှိမ့်ချစွာ တောင်းလျှောက်လေသည်။—နေဟမိ ၁၃:၃၁။
ကျမ်းစာမေးခွန်းများ အဖြေ–
၇:၆-၆၇—ဇေရုဗဗေလနှင့်အတူ ယေရုရှလင်မြို့သို့ ပြန်လာသော အကြွင်းအကျန်များနှင့်ဆိုင်သည့် နေဟမိ၏စာရင်းသည် ဧဇရဖော်ပြသော အိမ်ထောင်စုတစ်ခုစီ၏စာရင်းနှင့် အဘယ်ကြောင့်မတူသနည်း။ (ဧဇရ ၂:၁-၆၅) ဧဇရနှင့်နေဟမိတို့သုံးသော မူလစာရင်းနှစ်ခုခြားနားသောကြောင့် ဖြစ်နိုင်သည်။ ဥပမာ၊ နေရင်းပြည်သို့ပြန်ရန် စာရင်းပေးသူအရေအတွက်နှင့် အမှန်တကယ်ပြန်သွားသူအရေအတွက် မတူခြင်းဖြစ်နိုင်သည်။ အစပိုင်းတွင် မိမိတို့မျိုးရိုးစာရင်းကို မဖော်ပြနိုင်သော်လည်း နောက်ပိုင်းမှဖော်ပြသော ဂျူးအချို့ရှိသောကြောင့် စာရင်းနှစ်ခုကွာရခြင်းလည်းဖြစ်နိုင်သည်။ မည်သို့ဆိုစေကာမူ မှတ်တမ်းနှစ်ခုစလုံးက ကျွန်များနှင့် သီချင်းသည်များအပြင် ကနဦးပြန်လာသူအရေအတွက်မှာ ၄၂,၃၆၀ ရှိသည်ဟုဆို၏။
၁၀:၃၄—လူတို့ထံမှ အဘယ်ကြောင့် ထင်းအလှူတောင်းသနည်း။ မောရှေပညတ်တွင် ထင်းပူဇော်ရာယဇ် ပေးရမည်ဟု ပညတ်မထားပါ။ လိုအပ်လာသောကြောင့် ထိုသို့တောင်းဆိုရခြင်းဖြစ်သည်။ ယဇ်ပလ္လင်ပေါ်တွင် ယဇ်များကိုပူဇော်ဖို့ ထင်းအတော်များများလိုအပ်ခဲ့သည်။ ဣသရေလလူမျိုးမဟုတ်သော ဝတ်ပြုရာအိမ်တော်ကျွန်များဖြစ်သည့် နက်သနင်များ အလုံအလောက်ရှိပုံမရချေ။ ထို့ကြောင့် ထင်းအလုံအလောက်ရှိနေစေဖို့ မဲချခဲ့ကြရသည်။
၁၃:၆—နေဟမိသည် မည်မျှကြာကြာ ယေရုရှလင်မြို့တွင် မရှိသနည်း။ “အင်တန်ကာလကြာပြီးမှ” နေဟမိသည် ယေရုရှလင်မြို့သို့ပြန်ရန် ရှင်ဘုရင်ထံတော်၌ အခွင့်တောင်းသည်ဟူ၍သာ သမ္မာကျမ်းစာကဖော်ပြသည်။ ထို့ကြောင့် သူမရှိသည့်အချိန် အတိအကျကိုသိဖို့ မဖြစ်နိုင်ပါ။ သို့သော် ယေရုရှလင်မြို့သို့ သူပြန်ရောက်လာသောအခါ ယဇ်ပုရောဟိတ်များကို ထောက်ပံ့ခြင်းမရှိသကဲ့သို့ ဥပုသ်ပညတ်ကိုလည်း လိုက်နာခြင်းမရှိကြောင်း နေဟမိတွေ့ရှိလေသည်။ လူများစွာသည် တိုင်းတစ်ပါးအမျိုးသမီးများနှင့် အိမ်ထောင်ကျပြီး သူတို့၏ကလေးများသည် ဂျူးဘာသာစကားကိုပင် မပြောတတ်တော့ချေ။ အခြေအနေ ဤမျှဆိုးနေသည်ဖြစ်ရာ နေဟမိမရှိသည့်ကာလ အတော်အတန်ကြာ၍ဖြစ်မည်။
၁၃:၂၅၊ ၂၈—နေဟမိသည် ဒုံရင်းအခြေအနေသို့ ပြန်ရောက်သွားသည့်ဂျူးများကို “အပြစ်တင်” သည့်အပြင် အခြားအဘယ်ပဲ့ပြင်သွန်သင်မှုများ ပြုခဲ့သနည်း။ နေဟမိသည် ဘုရားသခင့်ပညတ်တော်တွင်ပါသော ကျိန်ခြင်းများကိုရွတ်ပြပြီး သူတို့ကိုကဲ့ရဲ့သည်။ သူတို့ကို တရားစီရင်ဒဏ်ပေးပြီး “အချို့တို့ကိုရိုက်” ခဲ့သည်။ ကျင့်ဝတ်မစောင့်ထိန်းမှုကို ဒေါသထွက်ကြောင်းပြသည့်အနေနှင့် သူတို့၏ ‘ဆံပင်ကိုနုတ်’ ခဲ့သည်။ ဟောရနိလူ သမ္ဘာလတ်၏သမီးကို ထိမ်းမြားယူသော ယဇ်ပုရောဟိတ်မင်းဧလျာရှိပ်၏မြေးကိုလည်း သူနှင်ထုတ်ခဲ့သည်။
ကျွန်ုပ်တို့အတွက် သင်ခန်းစာများ–
၈:၈။ ဘုရားသခင့်နှုတ်မြွက်စကားတော်ကို သွန်သင်သူများအနေနှင့် ကျွန်ုပ်တို့သည် သမ္မာကျမ်းစာကို လူများနားလည်စေခြင်းငှာ ပီသစွာဖတ်ရွတ်ပြ၍ မှန်ကန်စွာ အနက်ပြန်လျက် သက်ဆိုင်ပုံကို ရှင်းပြခြင်းဖြင့် အဓိပ္ပာယ်ဖွင့်ပြကြသည်။
၈:၁၀။ မိမိ၏ဝိညာဉ်ရေးလိုအပ်ချက်ကိုသိရှိပြီး ယင်းကို ဖြည့်ဆည်းပေးခြင်း၊ သီအိုကရက်တစ်လမ်းညွှန်မှုကို လိုက်လျှောက်ခြင်းဖြင့် ‘ယေဟောဝါ၏ဝမ်းမြောက်ခြင်း’ ၌ပျော်မွေ့နိုင်ကြသည်။ ထို့ကြောင့် သမ္မာကျမ်းစာကို ဝီရိယရှိရှိလေ့လာခြင်း၊ ခရစ်ယာန်အစည်းအဝေးများကို မှန်မှန်တက်ရောက်ခြင်း၊ ဟောပြောခြင်းနှင့် တပည့်ဖြစ်စေခြင်းလုပ်ငန်းတွင် စိတ်ထက်သန်စွာပါဝင်ခြင်းတို့သည် အလွန်အရေးကြီးလှပေသည်။
၁၁:၂။ အမွေဥစ္စာများကိုထားရစ်ပြီး ယေရုရှလင်မြို့သို့ ပြောင်းရွှေ့နေထိုင်ခြင်းသည် အကုန်အကျရှိမည့်အပြင် အဆင်မပြေမှုများလည်း ရှိပေမည်။ စေတနာအလျောက် ထိုသို့ပြုခဲ့ကြသူများသည် ကိုယ်ကျိုးစွန့်စိတ်ဓာတ်ကို တင်ပြခဲ့ကြသည်။ ကျွန်ုပ်တို့လည်း စည်းဝေးကြီးများနှင့် အခြားအချိန်အခါများတွင် သူတစ်ပါးအကျိုးကို စေတနာဖြင့်ထမ်းဆောင်ခွင့်ရသည့်အခါ အလားတူစိတ်ဓာတ်မျိုး တင်ပြနိုင်ပါသည်။
၁၂:၃၁၊ ၃၈၊ ၄၀-၄၂။ သီချင်းဆိုခြင်းသည် ယေဟောဝါအား ကျေးဇူးတင်ချီးမွမ်းရန် နည်းလမ်းကောင်းတစ်ခုဖြစ်၏။ ထို့ကြောင့် ခရစ်ယာန်အစည်းအဝေးများတွင် စိတ်နှလုံးအပြည့်ဖြင့် သီဆိုသင့်သည်။
၁၃:၄-၃၁။ ကျွန်ုပ်တို့ဘဝထဲသို့ ရုပ်ဝါဒလိုက်စားခြင်း၊ အကျင့်ယိုယွင်းခြင်းနှင့် အယူဖောက်ပြန်ခြင်းတို့ တဖြည်းဖြည်းစိမ့်ဝင်မလာစေဖို့ သတိပြုကြရမည်။
၁၃:၂၂။ နေဟမိသည် ဘုရားသခင်အရှေ့ မိမိစာရင်းရှင်းရမည်ကို ကောင်းစွာသိရှိထားသည်။ ကျွန်ုပ်တို့လည်း ယေဟောဝါထံ စာရင်းရှင်းရမည်ကို သတိပြုကြရမည်။
ယေဟောဝါ၏ကောင်းချီး မရ၍မဖြစ်
‘ထာဝရဘုရားသခင်သည် အိမ်ကိုဆောက်တော်မမူလျှင် ဆောက်သောသူတို့သည် အချည်းနှီးလုပ်ဆောင်ကြ၏’ ဟု ဆာလံဆရာသီဆိုခဲ့သည်။ (ဆာလံ ၁၂၇:၁) အဆိုပါစကားများမှန်ကန်ကြောင်း နေဟမိကျမ်းက အလွန်တင့်တယ်လှပစွာ ပုံဖော်ပြပါသည်။
ကျွန်ုပ်တို့အတွက် သင်ခန်းစာမှာ ရှင်းနေပါသည်။ ကျွန်ုပ်တို့ လုပ်ဆောင်လေသမျှ၌ အောင်မြင်လိုလျှင် ယေဟောဝါ၏ကောင်းချီးရမှဖြစ်မည်။ ကျွန်ုပ်တို့၏ဘဝတွင် စစ်မှန်သောဝတ်ပြုရေးကို အဓိကမထားလျှင် ယေဟောဝါထံမှ ကောင်းချီးရနိုင်ပါမည်လော။ သို့ဖြစ်၍ နေဟမိကဲ့သို့ ယေဟောဝါ၏ဝတ်ပြုရေးနှင့် ယင်းတိုးတက်ရေးကို အဓိကထားကြပါစို့။
[စာမျက်နှာ ၈ ပါ ရုပ်ပုံ]
‘ရှင်ဘုရင်၏စိတ်နှလုံးသည်ရေချောင်းကဲ့သို့ဖြစ်၍ယေဟောဝါ၏လက်တော်၌ရှိ’
[စာမျက်နှာ ၉ ပါ ရုပ်ပုံ]
လုပ်ရဲကိုင်ရဲပြီး သနားကြင်နာတတ်သူ နေဟမိယေရုရှလင်မြို့သို့ရောက်လာ
[စာမျက်နှာ ၁၀၊ ၁၁ ပါ ရုပ်ပုံများ]
သမ္မာကျမ်းစာကို သင် ‘အဓိပ္ပာယ်ဖွင့်ပြ’တတ်သလော