ဘုရားသခင်၏ကမ္ဘာသစ်တွင် စစ်မှန်သော ကြွယ်ဝမှု
ဘုရားသခင်၏ကမ္ဘာသစ်တွင် စစ်မှန်သော ကြွယ်ဝမှု
ခရစ်ယာန်အိမ်ထောင်ဦးစီးဖြစ်သူ ဒေးဗစ်သည် * အမေရိကန်ပြည်ထောင်စုသို့ ပြောင်းရွှေ့ခဲ့ပြီး မိမိ၏ လုပ်ရပ်မှန်ကန်သည်ဟု ယုံကြည်ထားသည်။ သားမယားကို ချန်ရစ် မထားလိုသော်လည်း မိမိတွင် ငွေများများရှိမှသာ ၎င်းတို့၏ဘဝကို တိုးတက်ကောင်းစားစေနိုင်မည်ဟု တထစ်ချယူဆ ထားသည်။ သို့နှင့် နယူးယောက်မှ ဆွေမျိုးများ၏ဖိတ်ခေါ်ချက်ကို သူလက်ခံလိုက်ပြီး မကြာမီ ထိုတွင်အလုပ်ရလေသည်။
သို့သော် အချိန်ကုန်လွန်လာသည်နှင့်အမျှ ဒေးဗစ်၏အပြုသဘောထား ပျောက်ဆုံးစဖြစ်လာသည်။ ဝိညာဉ်ရေးလုပ်ဆောင်မှုများအတွက် အချိန်မပေးနိုင်သလောက် ဖြစ်နေပြီ။ တစ်ချိန်တွင် ဘုရားသခင်အား ယုံကြည်ကိုးစားမှု ပျောက်ဆုံးလုနီးပါးဖြစ်ခဲ့သည်။ အကျင့်ပျက်ပြားရန် သွေးဆောင်ခံမိပြီးမှ သူ၏အခြေအနေမှန်ကို သဘောပေါက်သွားလေသည်။ ချမ်းသာကြွယ်ဝဖို့ကိုသာ အာရုံစိုက်ခဲ့ခြင်းက သူ့အား အရေးပါသောအရာမှန်သမျှမှ တဖြည်းဖြည်းဝေးကွာသွားစေနေသည်။ သူ,မပြောင်းလဲလျှင် မဖြစ်တော့ချေ။
ဒေးဗစ်နည်းတူ ဘဝတိုးတက်ကောင်းစားရေးအတွက် ဆင်းရဲသောနိုင်ငံများမှ လူများစွာသည် တိုင်းတစ်ပါးသို့ နှစ်စဉ်ပြောင်းရွှေ့နေကြသည်။ ဤသူတို့၏ဝိညာဉ်ရေးသည် အများအားဖြင့် အကြီးအကျယ်ကျရှုံးသွားသည်။ ‘ချမ်းသာကြွယ်ဝဖို့ကြိုးစားနေတဲ့ ခရစ်ယာန်တစ်ဦးဟာ ဘုရားသခင်ရှေ့မှာကော ချမ်းသာနိုင်ပါ့မလား’ ဟုအချို့သိလိုကြသည်။ နာမည်ကြီးစာရေးဆရာများနှင့် ဘာသာရေးခေါင်းဆောင်များက ချမ်းသာနိုင်ပါသည်ဟုဆိုကြ၏။ သို့သော် ဒေးဗစ်နှင့်အခြားသူတို့ သိရှိလာကြသည့်အတိုင်း တစ်ခုကိုလက်လွှတ်ဆုံးရှုံးခံမှ အခြားတစ်ခုကို ရရှိနိုင်မည်ဖြစ်သည်။—လုကာ ၁၈:၂၄။
ငွေကိုယ်နှိုက်သည် မဆိုးပါ
ငွေသည် လူတို့၏တီထွင်မှုတစ်ခုဖြစ်၏။ အခြားတီထွင်မှုများနည်းတူ ငွေကိုယ်နှိုက်သည် မဆိုးပါ။ အမှန်အားဖြင့် ယင်းသည် ဖလှယ်ရေးပစ္စည်းတစ်ခုမျှသာဖြစ်၏။ ယင်းကို တော်မှန်စွာအသုံးပြုလျှင် အကျိုးရှိ၏။ ဥပမာ၊ အထူးသဖြင့် နွမ်းပါးမှုနှင့်ဆက်နွှယ်နေသော ပြဿနာများကိုဖြေရှင်းရာတွင် သမ္မာကျမ်းစာအသိအမှတ်ပြုသည်အတိုင်း “ငွေသည် ကွယ်ကာတတ်၏။” (ဒေ. ၇:၁၂) ယုတ်စွအဆုံး အချို့သူတို့အတွက် “ငွေမူကား အရာရာကိုနိုင်” ပုံရှိသည်။—ဒေ. ၁၀:၁၉။
သမ္မာကျမ်းစာက ပျင်းရိခြင်းကို ပြစ်တင်ရှုတ်ချပြီး အလုပ်ကြိုးစားရန် တိုက်တွန်းထားသည်။ ကျွန်ုပ်တို့သည် ကိုယ့်မိသားစုကို ထောက်ပံ့ကျွေးမွေးကြရမည်။ ငွေအနည်းငယ်ပိုလျှံမည်ဆိုလျှင် “ဆင်းရဲသောသူအား ပေးကမ်းဝေငှ” စရာရှိမည်ဖြစ်သည်။ (ဧဖက် ၄:၂၈; ၁ တိမောသေ ၅:၈) ထို့ပြင် ခြိုးခြံစွာနေခြင်းကို အားပေးမည့်အစား မိမိတို့၏ပိုင်ဆိုင်ရာများကို သုံးစွဲကြရန် သမ္မာကျမ်းစာတိုက်တွန်းထားသည်။ “[ကျွန်ုပ်တို့၏] အဖို့ကိုခံ၍” ကြိုးစားလုပ်ဆောင်မှု၏အကျိုးကို ခံစားပါဟုဆိုသည်။ (ဒေ. ၅:၁၈-၂၀) ချမ်းသာကြွယ်ဝသော သစ္စာရှိအမျိုးသား၊ အမျိုးသမီးများစွာအကြောင်း သမ္မာကျမ်းစာဖော်ပြထားသည်။
ချမ်းသာကြွယ်ဝသော သစ္စာရှိအမျိုးသား၊ အမျိုးသမီးများ
ဘုရားသခင်၏သစ္စာရှိကျေးကျွန် အာဗြဟံသည် သိုးနွားအုပ်ကြီး၊ ရွှေငွေများစွာအပြင် ရာနှင့်ချီသောအစေခံကျွန်များ ရှိခဲ့သည်။ (ကမ္ဘာဦး ၁၂:၅; ၁၃:၂၊ ၆၊ ၇) ဖြောင့်မတ်သူယောဘလည်း ခြံမွေးတိရစ္ဆာန်၊ အစေခံကျွန်များနှင့် ရွှေငွေဥစ္စာရှိကာ အတော်အတန်ချမ်းသာကြွယ်ဝခဲ့သည်။ (ယောဘ ၁:၃; ၄၂:၁၁၊ ၁၂) ယခုခေတ်စံနှုန်းအရပင် ဤပုဂ္ဂိုလ်များသည် သူကြွယ်များဖြစ်ကြပြီး ဘုရားသခင့်ရှေ့တော်တွင်လည်း ချမ်းသာကြွယ်ဝသူများဖြစ်ခဲ့ကြသည်။
တမန်တော်ပေါလုက အာဗြဟံအား ‘ယုံကြည်ခြင်းရှိသူအပေါင်းတို့၏အဘ’ ဟုခေါ်ဆိုခဲ့သည်။ အာဗြဟံသည် တွန့်တိုသူမဟုတ်သကဲ့သို့ စည်းစိမ်တပ်မက်လွန်းသူလည်း မဟုတ်ချေ။ (ရောမ ၄:၁၁; ကမ္ဘာဦး ၁၃:၉; ၁၈:၁-၈) ယောဘကိုလည်း ဘုရားသခင်ကိုယ်တော်တိုင်က “စုံလင်ဖြောင့်မတ်သောသူ” ဟုဖော်ပြခဲ့သည်။ (ယောဘ ၁:၈) ယောဘသည် ဆင်းရဲသားများကိုကူညီရန် အမြဲအသင့်ရှိခဲ့၏။ (ယောဘ ၂၉:၁၂-၁၆) အာဗြဟံနှင့်ယောဘတို့သည် မိမိတို့စည်းစိမ်ကို ကိုးစားမည့်အစား ဘုရားသခင်အား ကိုးစားခဲ့ကြသည်။—ကမ္ဘာဦး ၁၄:၂၂-၂၄; ယောဘ ၁:၂၁၊ ၂၂; ရောမ ၄:၉-၁၂။
နောက်ထပ်နမူနာတစ်ခုမှာ ဘုရင်ရှောလမုန်ဖြစ်၏။ ရှောလမုန်သည် ယေရုရှလင်မြို့ရှိ ဘုရားသခင်၏ထီးနန်းကိုအမွေခံရသူအဖြစ် ဉာဏ်ပညာသာမက ကြွယ်ဝသည့်ဥစ္စာစည်းစိမ်နှင့် ဂုဏ်အသရေကိုပါ အပ်နှင်းခံခဲ့ရသည်။ (၃ ဓမ္မရာဇဝင် ၃:၄-၁၄) သူ၏အသက်တာတွင် အများအားဖြင့် သစ္စာရှိခဲ့သည်။ သို့သော် အသက်ကြီးပိုင်းတွင် ရှောလမုန်၏ ‘စိတ်နှလုံးတော်သည် မိမိဘုရားသခင်ရှေ့တော်၌ စုံလင်ခြင်းမရှိတော့ပေ။’ (၃ ဓမ္မရာဇဝင် ၁၁:၁-၈) အမှန်မှာ သူ၏ဝမ်းနည်းဖွယ်အတွေ့အကြုံက ရုပ်ပစ္စည်းကြွယ်ဝခြင်း၌ ထောင်ချောက်များရှိကြောင်း ဖော်ပြသည်။ ၎င်းတို့မှအချို့ကို သုံးသပ်ကြည့်ကြစို့။
ရုပ်ပစ္စည်းကြွယ်ဝခြင်း၏ ထောင်ချောက်များ
အန္တရာယ်အရှိဆုံးမှာ ငွေကိုတပ်မက်ခြင်းနှင့် ငွေဖြင့်ဝယ်ယူနိုင်သည့်အရာများကို တပ်မက်ခြင်းတို့ဖြစ်၏။ ချမ်းသာကြွယ်ဝခြင်းက လူအချို့ကို မရောင့်ရဲနိုင်သည့် လောဘတက်လာစေသည်။ ရှောလမုန်နန်းစံချိန်အစပိုင်းတွင် လူတချို့၌ ထိုဆန္ဒရှိကြောင်း သူသတိပြုမိကာ ဤသို့ရေးသားခဲ့၏– ‘ငွေကိုတပ်မက်သောသူသည် ငွေနှင့်အလိုဆန္ဒမပြေနိုင်။ စည်းစိမ်ကိုတပ်မက်သောသူသည် စည်းစိမ်တိုးပွားသော်လည်း မရောင့်ရဲနိုင်။ ထိုအမှုအရာသည်လည်း အချည်းနှီးဖြစ်၏။’ (ဒေ. ၅:၁၀) နောက်ပိုင်းတွင် ယေရှုနှင့်ပေါလုသည်လည်း ထိုစဉ်းလဲသောတပ်မက်မှုအကြောင်း ခရစ်ယာန်များကို သတိပေးခဲ့သည်။—မာကု ၄:၁၈၊ ၁၉; ၂ တိမောသေ ၃:၂။
ငွေကို တစ်စုံတစ်ရာဖြစ်မြောက်ရေးအတွက်သာမဟုတ်တော့ဘဲ အဓိကထားလာသောအခါ လိမ်လည်ရန်၊ ခိုးရန်၊ သစ္စာဖောက်ရန်အပါအဝင် အကျင့်ပျက်ပြားရန် သွေးဆောင်ခံရလျှင် မလွန်ဆန်နိုင်တော့ပေ။ ခရစ်တော်၏တမန်တော်တစ်ဦးဖြစ်သူ ယုဒရှကာရုတ်သည် ငွေ ၃၀ ဖြင့် မိမိသခင်အား သစ္စာဖောက်အပ်နှံခဲ့သည်။ (မာကု ၁၄:၁၁; ယောဟန် ၁၂:၆) ငွေကို အလွန်အကျွံတပ်မက်လာသူအချို့သည် ဘုရားသခင့်အစား ငွေကိုကိုးကွယ်သည့်အထိပင် ဖြစ်သွား၏။ (၁ တိမောသေ ၆:၁၀) ထို့ကြောင့် ခရစ်ယာန်များသည် ငွေများများရှာရခြင်း၏ အဓိကရည်ရွယ်ချက် အမြဲမှန်ကန်ဖို့ လိုသည်။—ဟေဗြဲ ၁၃:၅။
ဥစ္စာရှာသည့်အခါ မသိသာမထင်ရှားသည့်အန္တရာယ်များစွာ ကြုံနိုင်စရာအကြောင်းရှိသည်။ ဦးဆုံးအနေနှင့် အလွန်ချမ်းသာကြွယ်ဝလာသောအခါ မိမိကိုယ်ကိုသာ ကိုးစားစိတ်ပေါ်လာတတ်သည်။ ထို့ကြောင့် ယေရှုသည် “စည်းစိမ်ဥစ္စာ၏လှည့်စားခြင်း” အကြောင်းမိန့်ဆိုရာတွင် ယင်းကိုထည့်သွင်းဖော်ပြခဲ့သည်။ (မဿဲ ၁၃:၂၂) အလားတူပင် ကျမ်းရေးသူ ယာကုပ်က စီးပွားရေးအစီအစဉ်များဆွဲသည့်အခါ ဘုရားသခင်အား ဘေးချိတ်မထားရန် ခရစ်ယာန်များကို သတိပေးခဲ့သည်။ (ယာကုပ် ၄:၁၃-၁၆) ငွေရှိသူတို့အတွက် ငွေသည် အတော်အတန် လွတ်လပ်မှုပေးပုံရသောကြောင့် ဘုရားသခင်ကိုကိုးစားသည်ထက် ငွေကိုကိုးစားခြင်းအန္တရာယ် အမြဲရှိသည်။—သု. ၃၀:၇-၉; တမန်တော် ၈:၁၈-၂၄။
ဒုတိယအနေနှင့် အစောပိုင်းတွင်ဖော်ပြခဲ့သော ဒေးဗစ်တွေ့ရှိလာသည်မှာ ဥစ္စာရှာခြင်းအတွက် အချိန်နှင့်ခွန်အား များစွာစိုက်ထုတ်ရသဖြင့် ဝိညာဉ်ရေးလုပ်ဆောင်မှုများမှ တဖြည်းဖြည်း သူဝေးကွာသွားခဲ့ခြင်းဖြစ်သည်။ (လုကာ ၁၂:၁၃-၂၁) ချမ်းသာသူတို့သည် မိမိတို့ငွေကို အပျော်အပါးနှင့်ကိုယ်ရေးကိုယ်တာအတွက် အဓိကထားအသုံးပြုရန် မပြတ်သွေးဆောင်ခံနေကြရသည်။
ရှောလမုန်သည် ဝိညာဉ်ရေးကျဆင်းသွားရခြင်းမှာ ဉာဏ်ထိုင်းသွားသည်အထိ စည်းစိမ်ယစ်ခဲ့သောကြောင့် ဖြစ်နိုင်မည်လော။ (လုကာ ၂၁:၃၄) တစ်ပါးအမျိုးသမီးများကို မယူရန် ဘုရားသခင်တားမြစ်ထားကြောင်း သူကောင်းစွာသိထားသည်။ သို့တိုင် မောင်းမမိဿံတစ်ထောင်အထိ သူသိမ်းယူခဲ့သည်။ (တရားဟောရာ ၇:၃) တိုင်းတစ်ပါးဇနီးများ၏ မျက်နှာသာကိုရလို၍ ယုံကြည်ခြင်းရောနှောခဲ့သည်။ အစောပိုင်းတွင်ဖော်ပြထားသည့်အတိုင်း ရှောလမုန်၏စိတ်နှလုံးသည် ယေဟောဝါထံတော်မှ တဖြည်းဖြည်းဝေးကွာသွားခဲ့သည်။
‘သင်တို့သည် ဘုရားသခင်၏အစေကိုလည်းကောင်း၊ လောကစည်းစိမ်အစေကိုလည်းကောင်း မခံနိုင်ကြ’ ဟူသောယေရှု၏အကြံပေးချက် မှန်ကန်ကြောင်း ဤနမူနာများက ရှင်းလင်းစွာဖော်ပြသည်။ (မဿဲ ၆:၂၄) သို့ဆိုလျှင် ယခုလူအများရင်ဆိုင်နေကြရသည့် စီးပွားရေးပြဿနာများကို ခရစ်ယာန်တစ်ဦး မည်သို့ အောင်မြင်စွာဖြေရှင်းနိုင်မည်နည်း။ ထိုထက်ကား ရှေ့ရေး ပိုမိုကောင်းမွန်လာရန် အဘယ်မျှော်လင့်ချက်ရှိသနည်း။
ရှေ့တွင်ရှိမည့် စစ်မှန်သောကြွယ်ဝမှု
ဘိုးဘေးအာဗြဟံနှင့် ယောဘတို့အပြင် ဣသရေလလူမျိုးနှင့်မတူဘဲ ယေရှု၏နောက်လိုက်များသည် ‘လူမျိုးတကာတို့ကို တပည့်ဖြစ်စေ’ ရမည့်တာဝန်ရရှိထားကြသည်။ (မဿဲ ၂၈:၁၉၊ ၂၀) သူတို့တာဝန်ကျေပွန်ရန် လောကရေးရာတွင် အသုံးပြုမည့်အချိန်နှင့်ခွန်အားကို ဤအတွက်အသုံးပြုရန် လိုပေမည်။ ထို့ကြောင့် အောင်မြင်မှုရရှိရန် “ဘုရားသခင်၏နိုင်ငံတော်နှင့် ဖြောင့်မတ်ခြင်းတရားတော်ကို ရှေးဦးစွာရှာကြလော့။ နောက်မှ ထိုအရာများကိုထပ်၍ ပေးတော်မူလတ္တံ့” ဟူသော ယေရှု၏မှာကြားချက်အတိုင်း လုပ်ဆောင်ရန်ဖြစ်သည်။—မဿဲ ၆:၃၃။
ဒေးဗစ်သည် မိသားစုနှင့်ဝိညာဉ်ရေးကိုပါ ဆုံးရှုံးလုနီးပါးဖြစ်ပြီးနောက် ဘဝလမ်းကြောင်းမှန်ပေါ် ပြန်ရောက်လာသည်။ ဒေးဗစ်သည် ကျမ်းစာလေ့လာခြင်း၊ ဆုတောင်းခြင်းနှင့် ခရစ်ယာန်အမှုဆောင်ခြင်းတို့ကို ဘဝတွင် ပြန်၍ဦးစားပေးခဲ့ရာ ယေရှုကတိထားသည့်အတိုင်း အခြားကိစ္စများလည်း အဆင်ပြေသွားလေသည်။ သူ့မိသားစုနှင့်ဆက်ဆံရေးလည်း တဖြည်းဖြည်းပြန်ကောင်းလာသည့်အတွက် ပျော်ရွှင်မှုနှင့်ရောင့်ရဲမှု ပြန်ရှိလာသည်။ သို့သော် ယခုအထိ သူအလုပ်ကြိုးစားနေရဆဲဖြစ်၏။ သူသည် နေ့ချင်းညချင်းကြီးပွားမလာပါ။ သူ၏အထိနာသည့်အတွေ့အကြုံမှ အဖိုးတန်သင်ခန်းစာများ ရရှိခဲ့သည်။
အမေရိကန်သို့ပြောင်းရွှေ့ခဲ့ခြင်းသည် ပညာရှိ၏လောဟု ဒေးဗစ်စဉ်းစားမိပြီး နောက်နောင် ဆုံးဖြတ်ချက်များချသည့်အခါ ငွေကို ဘယ်သောအခါမျှ အဓိကမထားတော့ဟု စိတ်ပိုင်းဖြတ်ခဲ့သည်။ ဘဝတွင် ငွေဖြင့်ဝယ်၍မရသော အဖိုးအထိုက်ဆုံးအရာများမှာ သာယာသောအိမ်ထောင်၊ မိတ်ဆွေကောင်းများ၊ ဘုရားသခင်နှင့်ကောင်းသောဆက်ဆံရေးတို့ဖြစ်ကြောင်း ယခု သူသဘောပေါက်လေပြီ။ (သု. ၁၇:၁၇; ၂၄:၂၇; ဟေရှာယ ၅၅:၁၊ ၂) မှန်ပါသည်၊ ကိုယ်ကျင့်တရားကောင်းခြင်းသည် ရုပ်ပစ္စည်းကြွယ်ဝခြင်းထက် များစွာအဖိုးထိုက်သည်။ (သု. ၁၉:၁; ၂၂:၁) ယခု ဒေးဗစ်သည် မိသားစုနှင့်အတူ ဦးစားပေးသင့်ရာများကို ဦးစားပေးရန် စိတ်ပိုင်းဖြတ်ထားလေသည်။—ဖိလိပ္ပိ ၁:၉။
လူတို့သည် ကိုယ်ကျင့်တရားကောင်းသော ကြွယ်ဝချမ်းသာသည့် လူ့အဖွဲ့အစည်းတစ်ခုတည်ထောင်ရန် ကြိုးစားခဲ့ကြသော်လည်း မအောင်မြင်ပါ။ သို့သော် ကျွန်ုပ်တို့ပျော်ရွှင်ကျေနပ်စွာ အသက်ရှင်နေထိုင်နိုင်ရန် လိုအပ်သောရုပ်ပစ္စည်းနှင့် ဝိညာဉ်ရေးကြွယ်ဝမှုကို ဘုရားသခင်၏နိုင်ငံတော်က ဆောင်ကြဉ်းပေးမည်ဟု ကိုယ်တော်ကတိထားတော်မူသည်။ (ဆာလံ ၇၂:၁၆; ဟေရှာယ ၆၅:၂၁-၂၃) စစ်မှန်သောကြွယ်ဝမှုသည် ဝိညာဉ်ရေးကောင်းခြင်းအပေါ်မူတည်ကြောင်း ယေရှုသွန်သင်ပေးခဲ့သည်။ (မဿဲ ၅:၃) ထို့ကြောင့် ကျွန်ုပ်တို့ ဆင်းရဲသည်ဖြစ်စေ၊ ချမ်းသာသည်ဖြစ်စေ ယခုအချိန်တွင် ဝိညာဉ်ရေးကိုဦးစားပေးခြင်းက လာလတ္တံ့သော ဘုရားသခင့်ကမ္ဘာသစ်တွင်နေထိုင်ရန် အသင့်ပြင်ဆင်နိုင်သည့် အကောင်းဆုံးနည်းလမ်းဖြစ်သည်။ (၁ တိမောသေ ၆:၁၇-၁၉) ထိုကမ္ဘာသည် ရုပ်ပစ္စည်းရော ဝိညာဉ်ရေးတွင်ပါ ချမ်းသာကြွယ်ဝသော လူ့ဘောင်တစ်ခုဖြစ်မည်မှာ သေချာသည်။
[အောက်ခြေမှတ်ချက်]
^ အပိုဒ်၊ 2 နာမည်ပြောင်းထားသည်။
[စာမျက်နှာ ၅ ပါ ရုပ်ပုံများ]
ယောဘသည် မိမိ၏စည်းစိမ်ကို မကိုးစားဘဲ ယေဟောဝါအားကိုးစားခဲ့
[စာမျက်နှာ ၇ ပါ ရုပ်ပုံများ]
ဘဝတွင် အဖိုးအထိုက်ဆုံးအရာများကို ငွေဖြင့်မဝယ်ယူနိုင်