ယေဟောဝါ၏သည်းခံခြင်းကို တုပကြလော့
ယေဟောဝါ၏သည်းခံခြင်းကို တုပကြလော့
‘ထာဝရဘုရားသခင်သည် ကတိတော်အရာမှာ နှေးတော်မမူ။ . . . သည်းခံတော်မူ၏။’—၂ ပေတရု ၃:၉။
၁။ လူသားများကို ယေဟောဝါ ပေးသနားထားသော တုနှိုင်းမမီဆုကျေးဇူးကား အဘယ်နည်း။
အဘယ်သူမျှမပေးနိုင်သည့် အရာတစ်ခုကို ယေဟောဝါပေးသနားထားသည်။ အလွန်နှစ်သက်ဖွယ်ကောင်းပြီး အလွန်တန်ဖိုးကြီးသော ၎င်းအရာကို ဝယ်ယူ၍မရသည့်ပြင် ရသင့်ရထိုက်ရာလည်း မဟုတ်ချေ။ ကိုယ်တော်ပေးသနားသော ၎င်းအရာမှာ ထာဝရအသက်ဖြစ်ပြီး ကျွန်ုပ်တို့မှအများစုသည် မြေကြီးပရဒိသုတွင် ထာဝစဉ်နေထိုင်ကြရမည်။ (ယောဟန် ၃:၁၆) နှစ်သက်ကြည်နူးစရာပါတကား။ အလွန်ဝမ်းနည်းကြေကွဲစေသည့် ခိုက်ရန်ဖြစ်မှု၊ အကြမ်းဖက်မှု၊ ဆင်းရဲမှု၊ ရာဇဝတ်မှု၊ ဖျားနာမှုနှင့် သေခြင်းတို့ပင် ရှိတော့မည်မဟုတ်ချေ။ မေတ္တာနှင့်အုပ်ချုပ်မည့် ဘုရားသခင့်နိုင်ငံတော်တွင် အေးချမ်းသာယာ စည်းလုံးစွာ နေထိုင်ကြရတော့မည်။ အဆိုပါပရဒိသုကို ကျွန်ုပ်တို့ အလွန်တောင့်တလှပါ၏။—ဟေရှာယ ၉:၆၊ ၇; ဗျာ. ၂၁:၄၊ ၅။
၂။ ယေဟောဝါသည် စာတန်၏စနစ်ဆိုးကို အဘယ်ကြောင့် မဖျက်ဆီးသေးသနည်း။
၂ ယေဟောဝါကိုယ်တော်တိုင်လည်း ကမ္ဘာမြေပေါ် ပရဒိသုတည်ထောင်မည့်အချိန်ကို မျှော်လင့်စောင့်စားလျက်ရှိသည်။ ကိုယ်တော်သည် ဖြောင့်မတ်ခြင်းနှင့် တရားမျှတခြင်းကို နှစ်သက်တော်မူသောအရှင်ဖြစ်၍တည်း။ (ဆာလံ ၃၃:၅) မိမိ၏ဖြောင့်မတ်သောမူများကို ဂရုမစိုက်သော၊ မိမိ၏အခွင့်အာဏာကို မလေးမခန့်ပြုသော၊ မိမိ၏လူတို့ကို ညှဉ်းပန်းနှိပ်စက်သော ဤလောကကို ကိုယ်တော် မြင်ပြင်းကတ်တော်မူသည်။ သို့တိုင် စာတန်၏စနစ်ဆိုးကို ကိုယ်တော် မဖျက်ဆီးရသေးသော ခြေမြစ်ခိုင်လုံသည့် အကြောင်းများရှိ၏။ ထိုအကြောင်းများတွင် ကိုယ်တော်၏ပိုင်သအုပ်စိုးမှုနှင့်ဆက်နွှယ်နေသည့် အမှားအမှန်အရေးကိစ္စများပါဝင်သည်။ အဆိုပါအရေးကိစ္စများကို ဖြေရှင်းရာတွင် ယနေ့ လူအများ၌ မတွေ့ရှိရသော အထူးနှစ်သက်ဖွယ်အရည်အသွေးတစ်ခုဖြစ်သည့် သည်းခံခြင်းကို ယေဟောဝါတင်ပြတော်မူသည်။
၃။ (က) သမ္မာကျမ်းစာတွင် “သည်းခံခြင်း” ဟုပြန်ဆိုထားသော ဂရိနှင့်ဟေဗြဲစကားလုံးများ၏ အဓိပ္ပာယ်ကားအဘယ်နည်း။ (ခ) ယခု အဘယ်မေးခွန်းများကို သုံးသပ်ကြမည်နည်း။
၃ ကမ္ဘာသစ်ဘာသာပြန်ကျမ်းတွင် “သည်းခံခြင်း” ဟူ၍ သုံးကြိမ်ပြန်ဆိုထားသော ဂရိစကားလုံး တစ်လုံးရှိ၏။ စာသားအရ “စိတ်ရှည်ခြင်း” ဟုအဓိပ္ပာယ်ရှိသည်။ “သည်းခံခြင်း” အတွက် ဂရိနှင့်ဟေဗြဲစကားလုံး နှစ်ခုစလုံးတွင် ချုပ်တည်းခြင်းနှင့် အမျက်ထွက်နှေးခြင်းဟု သဘောဆောင်သည်။ ယေဟောဝါ သည်းခံနေခြင်းသည် ကျွန်ုပ်တို့ကို မည်သို့အကျိုးသက်ရောက်သနည်း။ ယေဟောဝါနှင့် ကိုယ်တော့်သစ္စာရှိကျေးကျွန်များ၏ သည်းခံခြင်းနှင့် ခံနိုင်ရည်ရှိခြင်းတို့မှ အဘယ်သင်ခန်းစာရရှိနိုင်သနည်း။ ယေဟောဝါ၏သည်းခံခြင်းသည် အကန့်အသတ်ရှိကြောင်း မည်သို့သိရှိရသနည်း။ ကြည့်ကြစို့။
ယေဟောဝါ၏သည်းခံခြင်းကို သုံးသပ်
၄။ ယေဟောဝါ၏သည်းခံခြင်းနှင့်ပတ်သက်၍ တမန်တော်ပေတရုက မည်သို့ရေးသားခဲ့သနည်း။
၄ ယေဟောဝါ၏သည်းခံခြင်းနှင့်ပတ်သက်၍ တမန်တော်ပေတရုက ဤသို့ရေးသားခဲ့သည်– ‘ချစ်သူတို့၊ ထာဝရဘုရားသခင်မှာ ကာလတစ်ရက်သည် အနှစ်တစ်ထောင်ကဲ့သို့လည်းကောင်း၊ အနှစ်တစ်ထောင်သည် တစ်ရက်ကဲ့သို့လည်းကောင်းဖြစ်သည်အရာတစ်ခုကို မမေ့လျော့ကြနှင့်။ လူအချို့တို့သည် နှေးခြင်းကိုမှတ်သည်အတိုင်း ထာဝရဘုရားသခင်သည် ကတိတော်အရာမှာ နှေးတော်မမူ။ ငါတို့တွင် အဘယ်သူမျှမပျက်စီးဘဲ ရှိသမျှတို့သည် နောင်တရစေခြင်းငှာ အလိုတော်ရှိ၍ ငါတို့ကို သည်းခံတော်မူ၏။’ (၂ ပေတရု ၃:၈၊ ၉) ယေဟောဝါ၏သည်းခံခြင်းကို နားလည်သဘောပေါက်နိုင်ရန် ဤတွင်ဖော်ပြထားသော အချက်နှစ်ချက်ကို ကျေးဇူးပြု၍ ဂရုစိုက်ပါ။
၅။ အချိန်ကို ယေဟောဝါ ရှုမြင်ပုံသည် ကိုယ်တော်၏လုပ်ရပ်များအပေါ် မည်သို့အကျိုးသက်ရောက်သနည်း။
၅ ပထမတစ်ချက်မှာ အချိန်ကို ကျွန်ုပ်တို့ရှုမြင်သကဲ့သို့ ယေဟောဝါ မရှုမြင်ခြင်းဖြစ်သည်။ ထာဝစဉ်အသက်ရှင်တော်မူသော ကိုယ်တော်အတွက် အနှစ်တစ်ထောင်သည် တစ်ရက်ကဲ့သို့ဖြစ်၏။ ကိုယ်တော်သည် အချိန်ကို မမှုသော်လည်း အရေးယူဆောင်ရွက်ရန် နှေးတော်မမူချေ။ အတိုင်းအဆမဲ့ဉာဏ်ပညာရှင် ယေဟောဝါသည် သက်ဆိုင်သူအားလုံး၏အကျိုးကို ဆောင်ရွက်ပေးရန် အကောင်းဆုံးအချိန်ကို အတိအကျ သိရှိတော်မူပြီး ထိုအချိန်ကို စိတ်ရှည်စွာ စောင့်ဆိုင်းလျက်ရှိ၏။ သို့သော် ထိုအချိန်မတိုင်မီ မိမိကျေးကျွန်များ ခံစားနေရသည့် ဆင်းရဲခက်ခဲမှုများကို ယေဟောဝါ မသိဟု မယူမှတ်သင့်ချေ။ ကိုယ်တော်သည် ‘သနားခြင်းကရုဏာ’ ရှိသောဘုရားသခင်ဖြစ်ပြီး ချစ်ခြင်းမေတ္တာ၏ပြယုဂ်ဖြစ်တော်မူသည်။ (လုကာ ၁:၇၈; ၁ ယောဟန် ၄:၈) ခေတ္တခွင့်ပြုထားသည့် ဆင်းရဲခက်ခဲမှုကြောင့် ဖြစ်ပေါ်လာသော ဆိုးကျိုးများကို ကိုယ်တော် လုံးဝပယ်ဖျက်ပေးနိုင်စွမ်းရှိတော်မူ၏။—ဆာလံ ၃၇:၁၀။
၆။ ဘုရားသခင်နှင့်ပတ်သက်ပြီး မည်သို့မယူမှတ်သင့်သနည်း။ အဘယ်ကြောင့်နည်း။
၆ မှန်ပါသည်၊ မျှော်လင့်တောင့်တရာတစ်ခုခုကို စောင့်မျှော်နေရခြင်းသည် မလွယ်ကူချေ။ (သု. ၁၃:၁၂) သို့ဖြစ်၍ လူတို့သည် မိမိတို့ကတိအတိုင်း ချက်ချင်းမပြုလုပ်လျှင် ပြုလုပ်ပေးတော့မည်မဟုတ်ဟု အခြားသူများ ယူမှတ်ပေမည်။ ဘုရားသခင်ကိုလည်း ထိုသို့ယူမှတ်ခြင်းသည် မိုက်မဲလိုက်လေခြင်း။ ဘုရားသခင်၏သည်းခံခြင်းကို နှေးကွေးခြင်းဟု ကျွန်ုပ်တို့ ယူမှတ်မည်ဆိုလျှင် တဖြည်းဖြည်းနှင့် သံသယဝင်လာပြီး စိတ်ဓာတ်ကျလာကာ ဝိညာဉ်ရေးတွင် ငိုက်မျဉ်းလာနိုင်သည်။ ထိုထက်ဆိုးသည်မှာ ရှေ့အခန်းငယ်တွင် ပေတရုသတိပေးခဲ့သည့်အတိုင်း ယုံကြည်ခြင်းကင်းမဲ့သော ပြက်ရယ်ပြုတတ်သူများ၏လှည့်စားမှုကို ခံရနိုင်ပေမည်။ သူတို့က “သခင်ဘုရားကြွလာမည်ဟူသော ကတိတော်သည် အဘယ်မှာရှိသနည်း။ ဘိုးဘေးများ အိပ်ပျော်သည်နောက် ခပ်သိမ်းသောအရာတို့သည် ဖန်ဆင်းစကဖြစ်သကဲ့သို့ ဖြစ်မြဲဖြစ်ကြ၏ဟုဆိုလျက် ကဲ့ရဲ့ခြင်းနှင့်တကွ ပေါ်လာကြလိမ့်မည်။”—၂ ပေတရု ၃:၄။
၇။ ယေဟောဝါ၏သည်းခံခြင်းနှင့် လူတို့ကို ကိုယ်တော် နောင်တရစေလိုခြင်းသည် မည်သို့ဆက်နွှယ်သနည်း။
၇ ပေတရု၏စကားများမှ သိရှိရသည့် ဒုတိယအချက်မှာ ယေဟောဝါသည် လူသားအားလုံးကို နောင်တရစေလို၍ သည်းခံတော်မူခြင်းဖြစ်သည်။ လမ်းဆိုးများမှ ခေါင်းမာမာနှင့် ပြန်မလှည့်လာသူများသည် ယေဟောဝါ၏ကွပ်မျက်ခြင်းကို ခံရလိမ့်မည်။ သို့သော် ဘုရားသခင်သည် လူဆိုးတစ်ဦး သေဒဏ်ခံရခြင်းကို နှစ်သက်တော်မမူချေ။ ယင်းအစား နောင်တယူပြောင်းလဲ၍ လမ်းဆိုးများမှ ပြန်လှည့်လာကာ ဆက်အသက်ရှင်စေလို၏။ (ယေဇကျေလ ၃၃:၁၁) ထို့ကြောင့် လူတို့အသက်ရှင်ဖို့ အခွင့်အရေးအလုံအလောက်ရရန် ကိုယ်တော် သည်းခံနေတော်မူပြီး ကမ္ဘာတစ်ခွင် သတင်းကောင်းဟောပြောနေစေသည်။
၈။ ရှေးဣသရေလလူမျိုးနှင့် ဘုရားသခင်ဆက်ဆံပုံတွင် ကိုယ်တော်၏သည်းခံခြင်းကို မည်သို့တွေ့ရှိနိုင်သနည်း။
၈ ရှေးဣသရေလလူမျိုးနှင့် ဘုရားသခင်ဆက်ဆံပုံတွင်လည်း ကိုယ်တော်၏သည်းခံခြင်းကို တွေ့မြင်ရ၏။ သူတို့၏မနာခံမှုကို ရာစုနှစ်နှင့်ချီပြီး သည်းခံတော်မူခဲ့၏။ ကိုယ်တော်၏ပရောဖက်များအားဖြင့် သူတို့ကို ထပ်ခါတလဲလဲ ဤသို့တိုက်တွန်းခဲ့သည်– ‘မကောင်းသောလမ်းတို့ကို ရှောင်ကြလော့။ ငါသည် သင်တို့ဘိုးဘေးတို့၌ထားသောတရား၊ ငါ့ကျွန်ပရောဖက်တို့ဖြင့် ပေးလိုက်သောတရားကို အကုန်အစင်ကျင့်၍ ငါ့စီရင်ထုံးဖွဲ့ချက်တို့ကို စောင့်ရှောက်ကြလော့။’ ရလဒ်ကားအဘယ်နည်း။ “သူတို့သည် နားမထောင်” ကြချေ။—၄ ဓမ္မရာဇဝင် ၁၇:၁၃၊ ၁၄။
၉။ ယေရှုသည် မိမိခမည်းတော်၏သည်းခံခြင်းကို မည်သို့ထင်ဟပ်ပြခဲ့သနည်း။
၉ နောက်ဆုံးတွင် ယေဟောဝါသည် မိမိ၏သားတော်ကို စေလွှတ်လိုက်သည်။ ထိုသားတော်သည် ဘုရားသခင်နှင့် မိတ်သဟာယဖွဲ့ရန် ဂျူးများကို အနူးအညွတ်တောင်းပန်ခဲ့သည်။ ယေရှုသည် မိမိခမည်းတော်၏သည်းခံခြင်းကို အပြည့်အဝထင်ဟပ်ပြခဲ့သည်။ မကြာမီ ကွပ်မျက်ခံရတော့မည်ကို သိရှိသော ယေရှုက ဤသို့ညည်းတွားခဲ့၏– “အိုယေရုရှလင်မြို့၊ ယေရုရှလင်မြို့ သင်သည် ပရောဖက်တို့ကို သတ်မြဲရှိ၏။ သင်ရှိရာသို့ စေလွှတ်သောသူကိုလည်း ကျောက်ခဲနှင့်ပစ်မြဲရှိ၏။ ကြက်မသည် မိမိသားငယ်တို့ကို အတောင်အောက်၌ စုရုံးသကဲ့သို့ သင်၏သားတို့ကို စုရုံးစေခြင်းငှာ ကြိမ်ဖန်များစွာ ငါအလိုရှိပြီ။ သင်မူကား အလိုမရှိ။” (မဿဲ ၂၃:၃၇) အဆိုပါရင်နင့်ဖွယ်စကားများမှာ တစ်ဦးတစ်ယောက်ကို အပြစ်ပေးရန် ဇောကပ်နေသော အကြင်နာတရားမဲ့သည့် တရားသူကြီး၏စကားမဟုတ်ဘဲ လူတို့ကို သည်းခံကာ မေတ္တာတရားထားရှိသည့် မိတ်ဆွေတစ်ဦး၏စကားများဖြစ်သည်။ ကောင်းကင်ခမည်းတော်နည်းတူ ယေရှုသည် လူတို့ကို နောင်တရစေလိုပြီး တရားစီရင်ခြင်းမှ လွတ်မြောက်စေလိုသည်။ အချို့သည် ယေရှု၏သတိပေးချက်များကို လက်ခံကြသောကြောင့် အေဒီ ၇၀ ပြည့်နှစ်တွင် ယေရုရှလင်မြို့အပေါ် ကျရောက်သော ကြောက်မက်ဖွယ်တရားစီရင်ချက်မှ လွတ်မြောက်ခဲ့သည်။—လုကာ ၂၁:၂၀-၂၂။
၁၀။ ဘုရားသခင်၏သည်းခံမှုသည် ကျွန်ုပ်တို့အတွက် အဘယ်နည်းဖြင့် အကျိုးရှိသနည်း။
၁၀ ဘုရားသခင်၏သည်းခံမှုသည် လက်ဖျားခါလောက်အောင် အံ့ဩစရာကောင်းသည်မဟုတ်လော။ လူတို့ ဤမျှလောက်နာမခံသည့်ကြားမှ ယေဟောဝါသည် ကျွန်ုပ်တို့တစ်ဦးစီနှင့် သန်းနှင့်ချီသောအခြားသူတို့ကို မိမိအကြောင်း သိရှိစေပြီး ကယ်တင်ခြင်းမျှော်လင့်ချက်ပေးထား၏။ ပေတရုက “ငါတို့သခင်ဘုရား သည်းခံတော်မူခြင်းသည် ကယ်တင်မည်အကြောင်းဖြစ်သည်ဟု မှတ်ကြလော့” ဟုခရစ်ယာန်ချင်းများထံ စာရေးခဲ့သည်။ (၂ ပေတရု ၃:၁၅) ယေဟောဝါ၏သည်းခံမှုကြောင့် ကျွန်ုပ်တို့ ကယ်တင်ခြင်းရနိုင်သည့် အခွင့်အရေးရှိလာ၍ ကျေးဇူးတင်ကြသည်မဟုတ်လော။ ယေဟောဝါ၏အမှုတော်ကို နေ့စဉ် ထမ်းဆောင်သည့်အခါ ကျွန်ုပ်တို့ကို ဆက်သည်းခံပေးတော်မူပါဟု ဆုတောင်းကြသည်မဟုတ်လော။—မဿဲ ၆:၁၂။
၁၁။ ယေဟောဝါ၏သည်းခံမှုကို သဘောပေါက်ခြင်းက ကျွန်ုပ်တို့အား အဘယ်အရာကို ပြုလုပ်စေသနည်း။
၁၁ ယေဟောဝါ သည်းခံရသည့်အကြောင်းကို ကျွန်ုပ်တို့ သဘောပေါက်လာလျှင် ကိုယ်တော်သည် ကတိတော်အရာမှာ နှေးတော်မူသည်ဟု ယူမှတ်မည်မဟုတ်ဘဲ ကယ်တင်တော်မူမည်ကိုသိပြီး စိတ်ရှည်ရှည်နှင့် စောင့်စားနေမည်။ (မြည်တမ်းစကား ၃:၂၆) ဘုရားသခင့်နိုင်ငံတော် လာပါစေဟု ဆုတောင်းနေကြစဉ် ထိုဆုတောင်းချက်ကို ဖြေကြားပေးရမည့်အကောင်းဆုံးအချိန်ကို ဘုရားသခင်သိရှိကြောင်း ကျွန်ုပ်တို့ ယုံကြည်စိတ်ချကြသည်။ ထို့ပြင် ကျွန်ုပ်တို့၏ညီအစ်ကိုများနှင့်လည်းကောင်း၊ ကျွန်ုပ်တို့ဟောပြောသောသူများနှင့်လည်းကောင်း ဆက်ဆံရာတွင် ဘုရားသခင်ရေးရာသည်းခံမှုကို ပြသခြင်းဖြင့် ယေဟာဝါအား တုပလိုကြ၏။ ကျွန်ုပ်တို့သည်လည်း မည်သူမျှ မပျက်စီးဘဲ နောင်တယူပြောင်းလဲလာကာ သူတို့ကို ထာဝရအသက်မျှော်လင့်ချက်ရရှိစေလိုကြသည်။—၁ တိမောသေ ၂:၃၊ ၄။
ပရောဖက်များ၏သည်းခံခြင်းကို သုံးသပ်
၁၂၊ ၁၃။ ယာကုပ် ၅:၁၀ အရ ပရောဖက်ဟေရှာယသည် သည်းခံမှုပြသရာတွင် မည်သို့အောင်မြင်ခဲ့သနည်း။
၁၂ ယေဟောဝါ၏သည်းခံမှုကို သုံးသပ်ခြင်းဖြင့် ကျွန်ုပ်တို့သည် ထိုအရည်အသွေးကို တန်ဖိုးထားလေးမြတ်လာပြီး ပျိုးထောင်နိုင်၏။ မစုံလင်သောလူသားများသည် သည်းခံခြင်းကို ပျိုးထောင်ရန် မလွယ်ကူသော်လည်း ယင်းကို ပျိုးထောင်နိုင်သည်။ ဘုရားသခင်၏ရှေးကျေးကျွန်များမှ ကျွန်ုပ်တို့ သင်ယူနိုင်သည်။ တပည့်ဖြစ်သူ ယာကုပ်က ဤသို့ရေးသားခဲ့သည်– ‘ငါ့ညီအစ်ကိုတို့၊ ထာဝရဘုရားသခင်၏နာမတော်ကို အမှီပြု၍ ဟောပြောသောပရောဖက်တို့သည် ဆင်းရဲခက်ခဲမှုတွေ့ခြင်း၊ သည်းခံခြင်း၏ပုံသက်သေကိုပြကြပြီဟု မှတ်ကြလော့။’ (ယာကုပ် ၅:၁၀) ကျွန်ုပ်တို့ ရင်ဆိုင်နေရသည့် အခက်အခဲများကိုပင် အခြားသူများ ရင်ဆိုင်ဖြေရှင်းခဲ့ကြောင်း သိရှိရခြင်းသည် စိတ်သက်သာရာရစေပြီး အားရှိစရာလည်းဖြစ်၏။
၁၃ ဥပမာ၊ ပရောဖက်ဟေရှာယသည် သူ၏တာဝန်ကို ထမ်းဆောင်ရာတွင် အမှန်ပင် သည်းခံခဲ့ရ၏။ ယေဟောဝါသည် ၎င်းနှင့်ပတ်သက်ပြီး ဤသို့မိန့်တော်မူခဲ့သည်– “ထိုလူမျိုးရှိရာသို့သွားပြီးလျှင် သင်တို့သည်ကြားလျက်ပင် အနက်ကိုနားမလည်ဘဲ ကြားကြလိမ့်မည်။ မြင်လျက်ပင် အာရုံမပြုဘဲ မြင်ကြလိမ့်မည်ဟုပြောလော့။ သူတို့မျက်စိမမြင်၊ နားမကြား၊ စိတ်နှလုံးမသိ၊ အကျင့်မပြောင်းလဲ၊ သူတို့အနာရောဂါကို ငါမငြိမ်းစေရသည်တိုင်အောင် သူတို့စိတ်နှလုံးကို မိုက်စေလော့။ သူတို့နားကိုလည်း ထိုင်းစေလော့။ သူတို့မျက်စိကိုလည်း ပိတ်လော့။” (ဟေရှာယ ၆:၉၊ ၁၀) ဟေရှာယသည် လူတို့မတုံ့ပြန်သည့်ကြားမှ ယေဟောဝါ၏သတိပေးချက်သတင်းတရားကို ၄၆ နှစ်တိုင် သည်းခံစိတ်ရှည်စွာ ကြေညာခဲ့လေ၏။ ထိုနည်းတူ၊ ကျွန်ုပ်တို့သည်လည်း သည်းခံမည်ဆိုလျှင် သတင်းကောင်းကို လူတို့ လက်မခံသည့်ကြားမှ ဟောပြောခြင်းလုပ်ငန်းတွင် ခံနိုင်ရည်ရှိနိုင်ကြမည်။
၁၄၊ ၁၅။ ဆင်းရဲခက်ခဲမှုများနှင့် စိတ်ဓာတ်ကျခြင်းကို ယေရမိအား အဘယ်အရာက ကျော်လွှားအောင်မြင်စေသနည်း။
၁၄ ပရောဖက်များသည် အမှုတော်ဆောင်သည့်အခါ လူတို့၏တုံ့ပြန်မှုကို မရရှိသည့်အပြင် ညှဉ်းပန်းနှိပ်စက်မှုကိုလည်း ခံခဲ့ကြရရှာသည်။ ယေရမိသည် ထိတ်တုံးခတ်ခံခဲ့ရသည်။ “လှောင်အိမ်” ထဲထည့်ထားခံခဲ့ရသည်။ မြေတွင်းထဲ ပစ်ချခံခဲ့ရသည်။ (ယေရမိ ၂၀:၂; ၃၇:၁၅; ၃၈:၆) သူကူညီပေးလိုသောသူများကပင် သူ့ကို ထိုသို့ညှဉ်းပန်းခဲ့ခြင်းဖြစ်သည်။ သို့တိုင် ယေရမိသည် စိတ်မနာကြည်းသည့်အပြင် လက်တုံ့လည်းမပြန်ခဲ့ချေ။ ဆယ်စုနှစ်များစွာ သည်းခံခဲ့၏။
၁၅ ညှဉ်းပန်းနှိပ်စက်မှုနှင့် ကဲ့ရဲ့ပြောင်လှောင်မှုတို့ကြောင့် ယေရမိ နှုတ်ပိတ်မသွားသကဲ့သို့ ယနေ့ ကျွန်ုပ်တို့လည်း ယင်းတို့ကြောင့် နှုတ်ပိတ်သွားခြင်းမရှိကြချေ။ မှန်ပါသည်၊ ကျွန်ုပ်တို့ တစ်ခါတစ်ရံ စိတ်ဓာတ်ကျပေမည်။ ယေရမိလည်း စိတ်ဓာတ်ကျခဲ့ဖူးသည်။ သူက ‘ထာဝရဘုရားသခင်၏နှုတ်မြွက်တော်သည် အကျွန်ုပ်၌ကဲ့ရဲ့ခြင်း၊ အစဉ်ပြက်ပြယ်ခြင်းကို ခံစရာအကြောင်းဖြစ်ပါ၏။ ထို့ကြောင့် ငါသည် နှုတ်မြွက်တော်ကို မကြားမပြော၊ နာမတော်ကို အမှီပြု၍ မဟောဘဲနေမည်ဟု သဘောထား’ သည်။ ထိုအခါ အဘယ်အရာဖြစ်ခဲ့သနည်း။ ယေရမိ မဟောဘဲနေခဲ့သလော။ သူက ‘ငါ့အရိုးတို့၌ချုပ်ထား၍ လောင်သောမီးကဲ့သို့ နှုတ်မြွက်တော်သည် ငါ့နှလုံး၌ဖြစ်သောကြောင့် အလွန်ငြီးငွေ့သဖြင့် အောင့်၍မနေနိုင်’ ဟုပြောဆို၏။ (ယေရမိ ၂၀:၈၊ ၉) လူတို့၏ကဲ့ရဲ့လှောင်ပြောင်မှုကို သူအာရုံစိုက်ခဲ့ချိန်က မပျော်နိုင်ကြောင်း သတိပြုပါ။ သို့သော် အရေးကြီးပြီး နှစ်လို့ဖွယ်ကောင်းသော သတင်းတရားကို သူပြန်အာရုံစိုက်သည့်အခါ တစ်ဖန်ပျော်ရွှင်လာလေ၏။ ထို့ပြင် ယေဟောဝါသည် “အားကြီးသောသူကဲ့သို့” ယေရမိဘက်၌ရှိသည့်အတွက် သူသည် ဘုရားသခင့်နှုတ်မြွက်တော်ကို စိတ်အားထက်သန်စွာ သတ္တိရှိရှိ ကြွေးကြော်နိုင်ရန် ခွန်အားပြန်ပြည့်လာလေ၏။—ယေရမိ ၂၀:၁၁။
၁၆။ သတင်းကောင်းဟောပြောခြင်းလုပ်ငန်းတွင် ကျွန်ုပ်တို့ မည်သို့ဆက်လက်အားရရွှင်လန်းနိုင်ကြသနည်း။
၁၆ ပရောဖက်ယေရမိသည် သူ၏လုပ်ငန်းတွင် ပျော်မွေ့ခဲ့သလော။ အမှန်ပင် ပျော်မွေ့ခဲ့၏။ ယေဟောဝါအား သူဤသို့လျှောက်ဆိုခဲ့သည်– ‘ယေဟောဝါဘုရားသခင် အကျွန်ုပ်တွေ့သော နှုတ်မြွက်တော်ကို ခံယူပါပြီ။ နှုတ်မြွက်တော်သည် အကျွန်ုပ် ဝမ်းမြောက်ရွှင်လန်းစရာအကြောင်းဖြစ်ပါ၏။ နာမတော်ဖြင့် အကျွန်ုပ်ကို ခေါ်ဝေါ်ပါ၏။’ (ယေရမိ ၁၅:၁၆) ယေရမိသည် စစ်မှန်သောဘုရားသခင်အား ကိုယ်စားပြုခွင့်နှင့် ကိုယ်တော်၏နှုတ်မြွက်တော်ကို ဟောပြောခွင့်ရရှိခြင်းတို့အတွက် ရွှင်လန်းအားရခဲ့သည်။ ကျွန်ုပ်တို့လည်း ရွှင်လန်းအားရနိုင်ကြပါသည်။ ထို့ပြင် ကမ္ဘာတစ်ဝန်းရှိ ဤမျှများပြားသောသူတို့သည် ဘုရားသခင့်နိုင်ငံတော်သတင်းတရားကို လက်ခံပြီး နောင်တယူပြောင်းလဲလာကာ ထာဝရအသက်လမ်းပေါ် လျှောက်လှမ်းနေကြသည်ကို တွေ့မြင်၍ ကောင်းကင်တမန်များ ဝမ်းသာသကဲ့သို့ ကျွန်ုပ်တို့လည်း အားရဝမ်းသာကြ၏။—လုကာ ၁၅:၁၀။
‘ယောဘ၏ခံနိုင်ရည်’
၁၇၊ ၁၈။ ယောဘသည် အဘယ်နည်းဖြင့် ခံရပ်ခဲ့သနည်း။ ရလဒ်ကားအဘယ်နည်း။
၁၇ တပည့်ဖြစ်သူယာကုပ်သည် ရှေးပရောဖက်များအကြောင်း ဖော်ပြပြီးနောက် ဤသို့ရေးသားခဲ့သည်– ‘ယောဘသည် ခံနိုင်ရည်ရှိကြောင်းကို သင်တို့ကြားရပြီ။ ထာဝရဘုရားသခင်သည် မိမိအမှုကို လက်စသတ်တော်မူရာမှာ အလွန်သနားစုံမက်တော်မူကြောင်းကိုလည်း သိမြင်ရကြပြီ။’ (ယာကုပ် ၅:၁၁၊ ကဘ) ဤတွင် “ခံနိုင်ရည်” ဟုပြန်ဆိုထားသော ဂရိစကားလုံးသည် ရှေ့အခန်းငယ်တွင် ယာကုပ်သုံးခဲ့သော “သည်းခံခြင်း” နှင့် အလားတူသောအဓိပ္ပာယ်ရှိ၏။ ကျမ်းပညာရှင်တစ်ဦးက အဆိုပါစကားလုံးနှစ်လုံး၏ ကွာခြားချက်ကို ထောက်ပြ၍ ဤသို့ရေးသားခဲ့သည်– “ရှေ့အခန်းငယ်ပါ စကားလုံးမှာ ကျွန်ုပ်တို့ကို လူများကဲ့ရဲ့ဆဲဆိုသည့်အခါ သည်းခံခြင်းကိုဆိုလိုပြီး နောက်အခန်းငယ်ပါ စကားလုံးမှာ ဆင်းရဲခက်ခဲသော အခြေအနေများကြားတွင် သတ္တိရှိရှိကြံ့ကြံ့ခံ ရပ်တည်ခြင်းကိုဆိုလို၏။”
၁၈ ယောဘသည် ရင်နင့်စရာကောင်းလောက်အောင် ဆင်းရဲခက်ခဲမှု ခံခဲ့ရရှာသည်။ သူ့စီးပွား ပျက်သွားသည်။ သားသမီးများ သေးဆုံးသွားသည်။ နာကျင်သောရောဂါ ခံစားရပြီး မိမိကို ယေဟောဝါ အပြစ်ပေးခြင်းဖြစ်သည်ဟု မဟုတ်မမှန်စွပ်စွဲခံခဲ့ရသည်။ ထိုစဉ်က ယောဘသည် ရေငုံနှုတ်ဆိတ်မနေဘဲ သူ၏အခြေအနေကို ညည်းတွားပြီး ဘုရားသခင်ထက် မိမိဖြောင့်မတ်သည်ဟုပင် သွယ်ဝိုက်ပြောဆိုခဲ့သည်။ (ယောဘ ၃၅:၂) သို့သော် သူသည် တစ်ခါမျှ ယုံကြည်ခြင်းမပျက်ခဲ့သည့်ပြင် သမာဓိကိုလည်း မချိုးဖျက်ခဲ့ချေ။ ဘုရားသခင်ကို ယောဘအပြစ်တင်လိမ့်မည်ဟု စာတန်ပြောသကဲ့သို့ ယောဘ မပြုခဲ့ချေ။ (ယောဘ ၁:၁၁၊ ၂၁) ရလဒ်ကားအဘယ်နည်း။ ယေဟောဝါသည် “ယောဘ၏ရှေ့ဖြစ်ဟန်ကို ကောင်းချီးပေးတော်မူသည်ထက် နောက်ဖြစ်ဟန်ကို သာ၍ကောင်းချီးပေးတော်မူ” သည်။ (ယောဘ ၄၂:၁၂) ယေဟောဝါသည် ယောဘကို ပြန်ကျန်းမာစေပြီး သူ၏စည်းစိမ်ဥစ္စာကို နှစ်ဆတိုးများစေသည်။ ချစ်မြတ်နိုးသူများနှင့်အတူ ပြည့်စုံကုံလုံသည့် ပျော်ရွှင်သောအသက်တာဖြင့် နေထိုင်စေခဲ့သည်။ ယောဘသည် သစ္စာရှိရှိခံရပ်ခဲ့ခြင်းကြောင့် ယေဟောဝါအား ပိုမိုသိကျွမ်းလာလေသည်။
၁၉။ ယောဘ၏ခံနိုင်ရည်မှ အဘယ်သင်ခန်းစာရသနည်း။
၁၉ ယောဘ၏ခံနိုင်ရည်မှ အဘယ်သင်ခန်းစာရရှိကြသနည်း။ ယောဘနည်းတူ၊ ကျွန်ုပ်တို့လည်း ဖျားနာမှု သို့မဟုတ် တခြားဆင်းရဲခက်ခဲမှုများ ခံကြရပေမည်။ ကျွန်ုပ်တို့ စမ်းသပ်ခံရဖို့ ယေဟောဝါ အဘယ်ကြောင့်ခွင့်ပြုသည်ကို အပြည့်အဝနားလည်ကြမည်မဟုတ်ပေ။ သို့တိုင် ကျွန်ုပ်တို့ သစ္စာစောင့်ထိန်းနေကြမည်ဆိုလျှင် ကောင်းချီးခံစားရမည်ဖြစ်ကြောင်း ယုံကြည်စိတ်ချနိုင်၏။ ယေဟောဝါသည် မိမိအား စိတ်ရင်းမှန်ဖြင့် ရှာဖွေသူများကို အကျိုးပေးမည်မှာ သေချာသည်။ (ဟေဗြဲ ၁၁:၆) ယေရှုက ‘အကြင်သူသည် အဆုံးတိုင်အောင် ခံနိုင်ရည်ရှိ၏။ ထိုသူသည် ကယ်တင်ခြင်းသို့ ရောက်လိမ့်မည်’ ဟုမိန့်ဆိုခဲ့သည်။—မဿဲ ၁၀:၂၂၊ ကဘ; ၂၄:၁၃၊ ကဘ။
‘ယေဟောဝါ၏နေ့ရက်သည် လာလိမ့်မည်’
၂၀။ ယေဟောဝါ၏နေ့ရက် လာလိမ့်မည်ကို အဘယ်ကြောင့် တပ်အပ်ပြောနိုင်ကြသနည်း။
၂၀ ယေဟောဝါသည် သည်းခံသော်လည်း တရားမျှတသည့်အတွက် လူဆိုးများကို အမြဲသည်းခံနေမည်မဟုတ်ချေ။ ကိုယ်တော်၏သည်းခံမှုသည် အတိုင်းအတာတစ်ခုအထိသာရှိ၏။ ပေတရုက ဤသို့ရေးသားခဲ့သည်– “[ဘုရားသခင်သည်] ရှေးလောကဓာတ်ကိုလည်း နှမြောတော်မမူ။” နောဧနှင့် သူ၏မိသားစုသည် အသက်ရှင်ကျန်ရစ်ခဲ့သော်လည်း ဘုရားသခင်အား မကိုးကွယ်သော လောကသားများသည် ရေလွှမ်းမိုး၍ ဖျက်ဆီးခံခဲ့ရသည်။ ယေဟောဝါသည် သောဒုံနှင့်ဂေါမောရမြို့သားများကိုလည်း ပြာပုံဖြစ်သွားသည့်အထိ တရားစီရင်ခဲ့သည်။ အဆိုပါတရားစီရင်ချက်များသည် ‘မတရားသောအကျင့်ကို ကျင့်အံ့သောသူတို့အတွက် ပုံသက်သေ’ ဖြစ်၏။ ယင်းကိုထောက်ပြီး ‘ယေဟောဝါ၏နေ့ရက်သည် လာလိမ့်မည်’ ကို ကျွန်ုပ်တို့ တပ်အပ်ပြောနိုင်ကြသည်။—၂ ပေတရု ၂:၅၊ ၆; ၃:၁၀။
၂၁။ ကျွန်ုပ်တို့၏သည်းခံမှုနှင့် ခံနိုင်ရည်ကို မည်သို့ပြသနိုင်သနည်း။ နောက်ဆောင်းပါးတွင် အဘယ်အကြောင်းအရာကို သုံးသပ်ကြမည်နည်း။
၂၁ သို့ဖြစ်၍ အချို့သူများ နောင်တယူပြောင်းလဲလာပြီး ကယ်တင်ခြင်းရနိုင်ရန် ကူညီပေးခြင်းဖြင့် ယေဟောဝါ၏သည်းခံမှုကို တုပကြစို့။ ကျွန်ုပ်တို့ ဟောပြောသော သတင်းကောင်းကို လက်မခံသည့်ကြားမှ သည်းခံဟောပြောခြင်းဖြင့် ပရောဖက်များကိုလည်း တုပကြစို့။ ထို့ပြင် ယောဘနည်းတူ စမ်းသပ်မှုများကို ခံရပ်ပြီး သမာဓိစောင့်ထိန်းကြမည်ဆိုလျှင် ယေဟောဝါသည် ကျွန်ုပ်တို့ကို ကောင်းချီးများစွာပေးမည်ဟု ယုံကြည်စိတ်ချနိုင်ကြပါသည်။ ယေဟောဝါသည် ကမ္ဘာတစ်ခွင်တွင် သတင်းကောင်းဟောပြောရန် မိမိလူတို့၏ကြိုးစားအားထုတ်မှုကို မည်သို့ကြွယ်ဝစွာကောင်းချီးပေးကြောင်း သဘောပေါက်သည့်အခါ ခရစ်ယာန်ဓမ္မအမှုတွင် ကျွန်ုပ်တို့ ပျော်ရွှင်ရန် အကြောင်းရင်းများစွာရှိ၏။ နောက်ဆောင်းပါးတွင် ယင်းကို တွေ့ရလိမ့်မည်။
သင်မှတ်မိသလော
• ယေဟောဝါသည် အဘယ်ကြောင့် သည်းခံတော်မူသနည်း။
• ပရောဖက်များ၏သည်းခံမှုမှ အဘယ် သင်ခန်းစာ ရရှိကြသနည်း။
• ယောဘသည် ခံနိုင်ရည်ကို မည်သို့ ပြသခဲ့သနည်း။ ရလဒ်ကားအဘယ်နည်း။
• ယေဟောဝါ၏သည်းခံမှုသည် အတိုင်းအတာ တစ်ခုထိသာရှိကြောင်း ကျွန်ုပ်တို့ မည်သို့ သိရှိရသနည်း။
[လေ့လာရန်မေးခွန်းများ]
[စာမျက်နှာ ၁၈ ပါ ရုပ်ပုံ]
ယေရှုသည် မိမိခမည်းတော် ၏သည်းခံမှုကို အပြည့်အဝ ထင်ဟပ်ပြခဲ့
[စာမျက်နှာ ၂၀ ပါ ရုပ်ပုံ]
ယေရမိ၏သည်းခံမှုကို ယေဟောဝါ မည်သို့ဆုချတော်မူခဲ့သနည်း
[စာမျက်နှာ ၂၁ ပါ ရုပ်ပုံ]
ယောဘ၏ခံနိုင်ရည်ကို ယေဟောဝါ မည်သို့ဆုချတော်မူခဲ့သနည်း