ယေဟောဝါအား တွေ့ရှိရန်ကိုယ်တော်ကူညီပေးခဲ့
ဘဝအတ္ထုပ္ပတ္တိ
ယေဟောဝါအား တွေ့ရှိရန်ကိုယ်တော်ကူညီပေးခဲ့
ဖလောရဲန့်စ် ကလာ့ခ် ပြောပြသည်
အသည်းအသန်ဖြစ်နေတဲ့ ကျွန်မခင်ပွန်းရဲ့လက်ကိုကိုင်ပြီး သူပြန်ကျန်းမာလာစေဖို့ အင်္ဂလီကန်တစ်ယောက်အနေနဲ့ ဘုရားသခင်ဆီ ကျွန်မဆုတောင်းခဲ့တယ်။ ပြီးတော့ သူသာပြန်ကျန်းမာခဲ့ရင် ဘုရားသခင်ကို ကျွန်မတွေ့အောင်ရှာမယ်။ အဲဒီအခါ ကိုယ်တော်ရဲ့ပိုင်ဆိုင်ရာဖြစ်စေမယ်လို့ ကျွန်မကတိပြုလိုက်တယ်။
ဖလောရဲန့်စ် ချူလင်းဆိုတဲ့ ကျွန်မကို ၁၉၃၇၊ စက်တင်ဘာ ၁၈ ရက်မှာ အနောက်သြစတြေးလျရဲ့ ဝေးခေါင်တဲ့ ကင်ဘာလီကုန်းပြင်မြင့်က အဘော်ရီဂျင်နယ်လ် အွန်ဘာဂူရီရပ်ကွက်မှာ မွေးဖွားခဲ့တယ်။
အပူအပင်ကင်းပြီး ပျော်စရာကောင်းတဲ့ အဲဒီကလေးဘဝကို ကျွန်မအမှတ်ရနေဆဲပါ။ ဘုရားသခင်အကြောင်း ပြီးတော့ သမ္မာကျမ်းစာနဲ့ပတ်သက်တဲ့ အခြေခံအကြောင်းတချို့ကို ချာ့ခ်ျခရစ်ယာန်သာသနာပြုအဖွဲ့ဆီက ကျွန်မသိရှိရပေမဲ့ ခရစ်ယာန်မူတွေကို သင်ပေးခဲ့တာကတော့ ကျွန်မရဲ့အမေပဲ။ ကျွန်မကို ကျမ်းစာမှန်မှန်ဖတ်ပြတဲ့အတွက် ငယ်ငယ်လေးကထဲက ဝိညာဉ်ရေးရာတွေကို ကျွန်မချစ်မြတ်နိုးခဲ့တယ်။ ပြီးတော့ ချာ့ခ်ျခရစ်ယာန်သာသနာပြုဖြစ်တဲ့ ကျွန်မရဲ့အဒေါ်တစ်ယောက်ကိုလည်း ကျွန်မသိပ်အားကျမိတာ။ သူ့ခြေရာနင်းချင်ခဲ့တယ်။
အရင်က ဖောရက်စ် ရေးဗားမစ်ရှင်လို့ခေါ်တဲ့ ကျွန်မတို့ရပ်ကွက်မှာ မူလတန်းကျောင်းပဲရှိခဲ့တယ်။ မနက်ပိုင်း နှစ်နာရီပဲ ကျွန်မကျောင်းတက်ခဲ့ရတယ်။ အဲဒါကြောင့် ကျွန်မရဲ့ပညာရေးအဆင့်ဟာ အရမ်းနိမ့်တဲ့အတွက် အဖေက စိတ်ပူလာတယ်။ သူ့သားသမီးတွေကို ပညာတတ်စေချင်တဲ့အတွက် အွန်ဘာဂူရီကနေ ဝင်ဒမ်မြို့ကို ပြောင်းရွှေ့ဖို့ အဖေဆုံးဖြတ်လိုက်တယ်။ အဲဒီကနေပြောင်းရွှေ့တဲ့နေ့ဟာ ကျွန်မအတွက် တကယ်ဝမ်းနည်းရတဲ့နေ့ဖြစ်ပေမဲ့ ဝင်ဒမ်မြို့ရောက်တော့ နောက်လေးနှစ်လုံးလုံး ၁၉၄၉ ကနေ ၁၉၅၂ ခုနှစ်အထိ တစ်နေကုန် ကျောင်းတက်နိုင်ခဲ့တယ်။ ဒီလိုပညာသင်ကြားနိုင်အောင် စီစဉ်ပေးခဲ့တဲ့အဖေ့ကို ကျွန်မသိပ်ကျေးဇူးတင်တာပဲ။
အမေက ဒေသန္တရဆရာဝန်ဆီမှာ အလုပ်လုပ်တယ်။ ကျွန်မအသက် ၁၅ နှစ်မှာ ကျောင်းထွက်တော့ အဲဒီဆရာဝန်က ဝင်ဒမ်ဆေးရုံမှာ သူနာပြုအဖြစ် အလုပ်လုပ်မလားလို့မေးတော့ ဝမ်းသာအားရလက်ခံလိုက်တယ်။ အဲဒီတုန်းက အလုပ်အကိုင်အရမ်းရှားတာ။
သိပ်မကြာခင်မှာ မျက်နှာဖြူတစ်ယောက်ဖြစ်တဲ့ မွေးမြူရေးခြံလုပ်သား အဲလက်ခ်နဲ့ ကျွန်မဆုံတွေ့ခဲ့တယ်။ ၁၉၆၄ ခုနှစ်မှာ ကျွန်မမှန်မှန်သွားနေကျ အင်္ဂလီကန်ချာ့ခ်ျရှိတဲ့ ဒါဘီမြို့မှာ ကျွန်မတို့လက်ထပ်ခဲ့ကြတယ်။ တစ်နေ့ကျတော့ ကျွန်မတို့အိမ်ကို ယေဟောဝါသက်သေတွေရောက်လာတယ်။ ကျွန်မလုံးဝစိတ်မဝင်စားဘူး နောက်တစ်ခါ မလာပါနဲ့လို့ သူတို့ကို ပြောဖြစ်အောင်ပြောလိုက်တယ်။ ဒါပေမဲ့လည်း ဘုရားသခင်မှာ ယေဟောဝါဆိုတဲ့ ကိုယ်ပိုင်နာမတော်ရှိတယ်လို့ သူတို့ပြောခဲ့တာကို ကျွန်မစိတ်ဝင်စားမိတယ်။
“ကိုယ့်ဘာသာကိုယ် ဆုမတောင်းတတ်ဘူးလား”
၁၉၆၅ ခုနှစ်မှာ ကျွန်မဘဝဟာ အတော်လေးခက်ခဲလာတယ်။ ကျွန်မရဲ့ခင်ပွန်းမြင်းပေါ်ကကျတာ နှစ်ခါ၊ ကားတိုက်မှုဖြစ်လို့တစ်ခါကြောင့် ဒဏ်ရာတွေရခဲ့တယ်။ သက်သာလာလို့ အလုပ်ပြန်လုပ်နိုင်ခဲ့တယ်။ ဒါပေမဲ့ သိပ်မကြာပါဘူး မြင်းပေါ်က ပြုတ်ကျပြန်ရော။ ဒီတစ်ခါ သူ့ရဲ့ခေါင်းမှာ ဒဏ်ရာပြင်းပြင်းထန်ထန်ရသွားတယ်။ ကျွန်မဆေးရုံရောက်တဲ့အခါ ဆရာဝန်က မျှော်လင့်ချက်မရှိတော့ဘူးလို့ပြောတော့ ကျွန်မဝမ်းနည်း ပက်လက်ဖြစ်သွားတယ်။ သူနာပြုဆရာမတစ်ယောက်က ဒေသခံ ခရစ်ယာန်ဘုန်းကြီးကို ကျွန်မဆီလာကူညီပေးဖို့ပြောတော့ သူက “အခုမအားသေးဘူး။ မနက်ဖြန်မှလာမယ်” လို့ပြောတယ်။
ခရစ်ယာန်ဘုန်းကြီးကို ကျွန်မနဲ့အတူ ဆုတောင်းစေချင်တဲ့အကြောင်း ခရစ်ယာန်သီလရှင်တစ်ပါးကို ပြောပြမိတော့ သူက “ရှင် ဘယ်လိုဖြစ်နေတာလဲ။ ကိုယ့်ဘာသာကိုယ် ဆုမတောင်းတတ်ဘူးလား” လို့ပြောတယ်။ ဒါနဲ့ ချာ့ခ်ျထဲကရုပ်ပုံတွေဆီမှာ ကူညီပေးပါလို့ ကျွန်မဆုတောင်းတော့လည်း ဘာအကူအညီမှ မရခဲ့ဘူး။ ကျွန်မရဲ့ခင်ပွန်း ဒီတောင်ကို ကျော်နိုင်မယ့်ပုံမရှိဘူး။ ဒါနဲ့ ‘သူသာသေသွားရင် ငါဘယ်လိုလုပ်ရပါ့မလဲ’ လို့စဉ်းစားမိတယ်။ အဲဒီအပြင် ကျွန်မရဲ့ကလေးသုံးယောက်ဖြစ်တဲ့ ခရစ္စတင်း၊ နာနက်ထ်နဲ့ ဂျက်ဖရီတို့အတွက်လည်း တွေးပူမိတယ်။ အဖေမရှိဘဲ သူတို့ဘယ်လို စခန်းသွားကြမှာလဲစသည်ဖြင့်ပေါ့။ တော်ပါသေးရဲ့၊ သုံးရက်ကြာတော့ ကျွန်မခင်ပွန်းပြန်သတိလည်လာပြီး ၁၉၆၆၊ ဒီဇင်ဘာလ ၆ ရက်နေ့မှာ ဆေးရုံဆင်းနိုင်တယ်။
သူအတော်လေး ပြန်ထူထူထောင်ထောင် ရှိလာပေမဲ့ ဦးနှောက်မှာ ထိခိုက်ဒဏ်ရာရသွားလို့ မေ့လျော့တတ်တဲ့အပြင် အခုဆိုရင် ခက်ထန်ကြမ်းတမ်းလာပြီး စိတ်အပြောင်းအလဲ မြန်လာတတ်တယ်။ ကလေးတွေနဲ့ပေါင်းရခက်ပြီး လူကြီးတွေလို သူတို့မနေတတ်တဲ့အခါ တအားစိတ်ဆိုးလာတတ်တယ်။ သူ့ကို ကြည့်ရှုပြုစုရတာလည်း မလွယ်ဘူး။ သူ့အတွက် ကျွန်မပဲ အစစအရာရာလုပ်ပေးနေရတယ်။ အရေးအဖတ်တောင် ပြန်သင်ပေးရတယ်။ သူ့ကိုကြည့်ရှုပြုစုရ၊ အိမ်မှုကိစ္စတွေကိုလည်း လျစ်လျူရှုလို့မရနဲ့ နောက်ဆုံးတော့ ကျွန်မ စိတ်ပန်းလူပန်းဖြစ်လာတော့တယ်။ ကျွန်မရဲ့ခင်ပွန်း မတော်တဆထိခိုက်မှုဖြစ်ပြီး ခုနစ်နှစ်ကြာတော့ ကျွန်မရဲ့ကျန်းမာရေးအတွက် ခဏလောက်ခွဲနေဖို့ ဆုံးဖြတ်ခဲ့ကြတယ်။
ဒါနဲ့ ကလေးတွေကိုခေါ်ပြီး တောင်ဘက်ပိုင်းမှာရှိတဲ့ ပါ့သ်မြို့ကို ကျွန်မပြောင်းရွှေ့နေထိုင်ခဲ့တယ်။ မပြောင်းခင်မှာ အနောက်သြစတြေးလျ၊ ကူနူနူရာမြို့လေးမှာနေတဲ့ ကျွန်မရဲ့ညီမလေးဟာ ယေဟောဝါသက်သေတွေနဲ့ ကျမ်းစာလေ့လာနေမှန်းသိလိုက်ရတယ်။ မြေကြီးပရဒိသုအကြောင်း ကျမ်းစာကတိတော်ကို ပုံဖော်ထားတဲ့ ထာဝရအသက်သို့ပို့ဆောင်သော သမ္မာတရား * စာအုပ်ထဲက ရုပ်ပုံတစ်ပုံကို သူပြတယ်။ ပြီးတော့ ဘုရားသခင်မှာ ယေဟောဝါဆိုတဲ့ နာမတော်ရှိတဲ့အကြောင်း အဲဒီစာအုပ်ထဲကနေ သူပြတော့ ကျွန်မစိတ်ဝင်စားသွားတယ်။ ကျွန်မရဲ့ချာ့ခ်ျမှာ ဒီအကြောင်းကို တစ်ခါမှမကြားဖူးတဲ့အတွက် ပါ့သ်မြို့မှာအခြေကျတာနဲ့ ယေဟောဝါသက်သေတွေဆီ ဖုန်းဆက်မယ်လို့ ဆုံးဖြတ်လိုက်တယ်။
ဒါပေမဲ့လည်း တကယ်တမ်း သူတို့နဲ့ဆက်သွယ်ဖို့ ကျွန်မတွန့်ဆုတ်နေတယ်။ တစ်ညနေခင်းမှာ တံခါးခေါင်းလောင်းမြည်လို့ ကျွန်မသားက သွားကြည့်ပြီး “မေမေဖုန်းဆက်မယ်ဆိုတဲ့လူတွေ ရောက်နေတယ်” လို့ပြန်ပြေးလာပြောတယ်။ နည်းနည်းအံ့အားသင့်သွားတာနဲ့ ကျွန်မက “ငါမရှိဘူးလို့ပြောလိုက်” လို့ပြောခိုင်းတော့ သားက “မေမေပဲ လိမ်မပြောရဘူးဆို” လို့ပြန်ပြောတယ်။ အောင့်သက်သက်နဲ့ ကျွန်မ တံခါးသွားဖွင့်ပေးလိုက်တယ်။ ဧည့်သည်တွေကို ကျွန်မကြိုဆိုတဲ့အခါ သူတို့က ကျွန်မကို ကြောင်ပြီးကြည့်နေကြတာ သတိထားမိတယ်။ တကယ်တော့ ပြောင်းသွားတဲ့ အရင်အိမ်ငှားဆီကို သူတို့လာကြတာ။ ဒါပေမဲ့လည်း သူတို့ကို အိမ်ထဲဖိတ်ခေါ်လိုက်ပြီး မေးခွန်းတွေ တရစပ်မေးလိုက်တာ ကျမ်းစာထဲက စိတ်ကျေနပ်စရာကောင်းတဲ့အဖြေတွေ ရခဲ့တယ်။
နောက်တစ်ပတ်မှာ ထာဝရအသက်သို့ပို့ဆောင်သော သမ္မာတရားစာအုပ်ကိုသုံးပြီး သက်သေခံတွေနဲ့ ကျွန်မကျမ်းစာမှန်မှန်စလေ့လာတော့တယ်။ ဒီလိုလေ့လာတဲ့အခါ ဝိညာဉ်ရေးရာတွေကို ချစ်မြတ်နိုးစိတ် ပြန်ပေါ်လာတယ်။ နှစ်ပတ်ကြာတော့ ခရစ်တော်ယေရှုရဲ့သေခြင်း အောက်မေ့ရာပွဲကို တက်ရောက်ခဲ့တယ်။ တနင်္ဂနွေအစည်းအဝေးတိုင်းကို စတက်ကြည့်ပြီး မကြာခင်မှာ ကြားရက်မှာကျင်းပတဲ့ အစည်းအဝေးတွေကိုပါ ကျွန်မတက်နေပြီလေ။ အဲဒီအပြင် ကျွန်မသင်ယူနေတဲ့အရာတွေကိုလည်း တခြားသူတွေကို ပြန်ပြောပြတယ်။ ကျမ်းစာအမှန်တရားကို တခြားသူတွေသိအောင် ကူညီပေးတာက ကျွန်မရဲ့စိတ်ဓာတ်ကိုမြှင့်တင်ပေးပြီး စိတ်လှုပ်ရှားမှုပိုင်းအတွက်လည်း အကျိုးရှိတာကို ကျွန်မသတိပြုမိတယ်။ အဲဒီနောက် ခြောက်လကြာတော့ ပါ့သ်မြို့ ခရိုင်စည်းဝေးကြီးမှာ ကျွန်မနှစ်ခြင်းခံခဲ့တယ်။
ဝိညာဉ်ရေးမှာ တိုးတက်လာတာနဲ့ပဲ “မိန်းမသည်လည်း မယုံကြည်သောခင်ပွန်းရှိ၍၊ ထိုခင်ပွန်းသည် မိမိမယားနှင့်နေခြင်းငှာအလိုရှိလျှင် မကွာစေနှင့်” ဆိုတဲ့ ၁ ကောရိန္သု ၇:၁၃ မှာ ပါတဲ့ ကျမ်းစာမူအပါအဝင် အိမ်ထောင်ရေးနဲ့ပတ်သက်တဲ့ ယေဟောဝါရဲ့အမြင်ကို ကျွန်မ ပိုနားလည်လာတယ်။ အဲဒီကျမ်းချက်ကြောင့် အဲလက်ခ်ဆီပြန်သွားဖို့ ကျွန်မတိုက်တွန်းခံခဲ့ရတယ်။
ဒါဘီသို့ ပြန်ရောက်ခြင်း
ကျွန်မရဲ့ခင်ပွန်းနဲ့ ငါးနှစ်ကျော်ခွဲနေပြီးတဲ့နောက် ၁၉၇၉၊ ဇွန်လ ၂၁ ရက်နေ့မှာ ဒါဘီမြို့ကို ကျွန်မပြန်ရောက်လာတယ်။ သူဘယ်လိုများ တုံ့ပြန်မလဲလို့ စိုးရိမ်နေတာ။ ကျွန်မကိုဝမ်းမြောက်ဝမ်းသာပြန်လက်ခံလို့ အံ့အားသင့်မိတယ်။ ဒါပေမဲ့ ကျွန်မ ယေဟောဝါသက်သေတစ်ယောက်ဖြစ်သွားတာကို သူသိပ်သဘောမကျဘူး။ ဒါနဲ့ ပါ့သ်မြို့ကို မသွားခင် ကျွန်မတက်နေကျ သူ့ချာ့ခ်ျကိုလိုက်တက်ဖို့ ပြောလှာတယ်။ ကျွန်မ မလိုက်နိုင်တဲ့အကြောင်း သူ့ကိုရှင်းပြတယ်။ ခရစ်ယာန်ဇနီးကောင်းတစ်ယောက်ဖြစ်ဖို့၊ သူ့ရဲ့ဦးစီးမှုကို လေးစားဖို့ ကျွန်မအတတ်နိုင်ဆုံးကြိုးစားခဲ့တယ်။ ယေဟောဝါအကြောင်း၊ အနာဂတ်နဲ့ပတ်သက်တဲ့ ကိုယ်တော့်ကတိတော်တွေအကြောင်း ပြောစမ်းကြည့်ပေမဲ့ စိတ်မဝင်စားဘူး။
ကြာလာတော့ ကျွန်မရဲ့ဘဝပုံစံသစ်ကို အဲလက်ခ်လက်ခံလာရုံမကဘူး စည်းဝေးကြီးတွေ၊ စည်းဝေးပွဲတွေနဲ့ ပတ်စဉ်အစည်းအဝေးတွေကို ကျွန်မတက်နိုင်ရအောင် ပိုက်ဆံထုတ်ပေးတယ်။ ခရစ်ယာန်ဓမ္မအမှုမှာအသုံးပြုဖို့ ကားဝယ်ပေးလို့ သူ့ကို အရမ်းကျေးဇူးတင်တာပဲ။ ဩစတြေးလျရဲ့ ဒီဝေးခေါင်တဲ့ဒေသမှာ ကားဟာ တကယ်တန်ဖိုးရှိတာ။ ကျွန်မတို့အိမ်မှာ တိုက်နယ်ကြီးကြပ်မှူးနဲ့ ညီအစ်ကို၊ ညီအစ်မတွေပါ တစ်ညနှစ်ည လာတည်းတတ်တယ်။ အဲဒါကြောင့် သက်သေခံအတော်များများကို အဲလက်ခ်သိကျွမ်းလာပြီး သူတို့နဲ့ပေါင်းသင်းရတာ သူပျော်ပုံရတယ်။
ယေဇကျေလကဲ့သို့ ခံစားရ
ညီအစ်ကို၊ ညီအစ်မတွေ အလည်လာတဲ့အခါ ကျွန်မပျော်ရပေမဲ့ အခက်အခဲတစ်ခုတော့ ကြုံရတယ်။ ဒါဘီမြို့မှာ သက်သေခံဆိုလို့ ကျွန်မတစ်ယောက်ပဲရှိတာ။ အနီးဆုံးအသင်းတော်က ၁၃၅ မိုင်ဝေးတဲ့ ဘရွန်းမြို့မှာရှိတယ်။ ဒါကြောင့် သတင်းကောင်းကိုဖြန့်ဖို့ အတတ်နိုင်ဆုံးကြိုးစားမယ်လို့ ဆုံးဖြတ်လိုက်တယ်။ ယေဟောဝါရဲ့အကူအညီနဲ့ အစီအစဉ်လုပ်ပြီး တစ်အိမ်မှတစ်အိမ် တစ်ယောတ်တည်း စသက်သေခံတယ်။ ဒီလိုလုပ်ရတာ လွယ်တော့မလွယ်ဘူး၊ ဒါပေမဲ့ “ငါ့ကိုခွန်အားနှင့်ပြည့်စုံစေတော်မူသော ခရစ်တော်အားဖြင့် ခပ်သိမ်းသောအမှုတို့ကို ငါတတ်စွမ်းနိုင်၏” ဆိုတဲ့ တမန်တော်ပေါလုရဲ့စကားကို အမြဲသတိရတယ်။—ဖိလိပ္ပိ ၄:၁၃။
အထူးသဖြင့် အဘော်ရီဂျင်နီလူမျိုးချင်းတွေကြား ကျွန်မသက်သေခံတာကို ဒေသခံဓမ္မဆရာတွေက မကြိုက်ကြဘူး။ ကျွန်မကို ခြိမ်းခြောက်ဖို့နဲ့ ဆက်မဟောနိုင်ဖို့ ကြိုးစားကြတယ်။ ဒါပေမဲ့လည်း သူတို့အတိုက်အခံလုပ်လေ ဆက်ဟောဖို့ ကျွန်မရဲ့စိတ်ဆုံးဖြတ်ချက် ခိုင်မာလာလေပဲ။ ယေဟောဝါရဲ့အကူအညီရဖို့လည်း မှန်မှန်ဆုတောင်းတယ်။ ယေဇကျေလကိုမိန့်မှာခဲ့တဲ့ ဒီအားပေးစကားကို မကြာမကြာ ပြန်သတိရတယ်– “သူတို့မျက်နှာတစ်ဖက်၌ သင်၏မျက်နှာကိုလည်းကောင်း၊ သူတို့နဖူးတစ်ဖက်၌ သင်၏နဖူးကိုလည်းကောင်း ငါခိုင်ခံ့စေပြီ။ သင်၏နဖူးကို ကျောက်ထက်မက စိန်ထက်သာ၍ ခိုင်မာစေပြီ။ သူတို့သည် ပုန်ကန်တတ်သောအမျိုးဖြစ်၍ သင်သည်မကြောက်နှင့်။ သူတို့မျက်နှာရည်ကြောင့် စိတ်မပျက်နှင့်။”—ယေဇကျေလ ၃:၈၊ ၉။
ချာ့ခ်ျခရစ်ယာန်အုပ်စုက လူနှစ်ယောက် ကျွန်မဈေးဝယ်တဲ့အခါ ခဏခဏ ရစ်သီရစ်သီလာလုပ်ကြတယ်။ တခြားဈေးဝယ်သူတွေ အာရုံစိုက်လာစေဖို့ လေသံကျယ်ကျယ်နဲ့ ကျွန်မကို လှောင်ပြောင်ကြတယ်။ သူတို့ကို ကျွန်မဂရုမစိုက်ဘူး။ တစ်ခါတော့ စိတ်ဝင်စားတဲ့အမျိုးသမီးတစ်ယောက်ဆီ ကျွန်မပြန်လည်ပတ်နေတုန်း ဒေသခံချာ့ခ်ျက တရားဟောဆရာတစ်ယောက်က ကျွန်မကို ယေရှုကို မယုံကြည်သူလို့ စွပ်စွဲတယ်။ ကျွန်မလက်ထဲက ကျမ်းစာကိုဆွဲလု၊ ကျွန်မမျက်နှာရှေ့ ယမ်းလိုက်ပြီး လက်ထဲ ပြန်ထိုးထည့်ပေးတယ်။ သူ့မျက်လုံးကို စိုက်ကြည့်ပြီး အေးအေးဆေးဆေး ခိုင်ခိုင်မာမာနဲ့ ယောဟန် ၃:၁၆ ကိုကိုးကားပြီး ယေရှုကို ကျွန်မယုံကြည်တဲ့အကြောင်းပြောလိုက်တယ်။ ယုံကြည်စိတ်ချမှုအပြည့်နဲ့ ကျွန်မပြန်ဖြေတာကို သူအံ့အားသင့်ပြီး ဘာမှမပြောဘဲ ထွက်သွားတော့တယ်။
ဒါဘီမြို့နယ်မှာရှိတဲ့ အဘော်ရီဂျင်နီတွေကို ဟောပြောရတာ သိပ်ပျော်တာပဲ။ ဒေသခံခရစ်ယာန်ဘုန်းကြီးတစ်ပါးက ရပ်ကွက်တစ်ခုကလူတွေဆီ ကျွန်မသွားမဟောနိုင်ရအောင် ကြိုးစားတားဆီးသေးတယ်၊ ဒါပေမဲ့ သူပြောင်းရွှေ့သွားရတယ်။ အဲဒါကြောင့် အဲဒီရပ်ကွက်ကလူတွေဆီသွားပြီး ကျမ်းစာသတင်းတရားဟောပြောနိုင်ခဲ့တယ်။ ကျွန်မရဲ့အဒေါ်လို ခရစ်ယာန်သာသနာပြုဖြစ်ချင်ခဲ့တာ အခုတော့ ကျမ်းစာအကြောင်း လူတွေသိလာရအောင် ကူညီပေးနေတဲ့ ခရစ်ယာန်သာသနာပြုအလုပ်ကို ကျွန်မလုပ်နေရပြီလေ။ အဘော်ရီဂျင်နီအတော်များများလည်း သတင်းတရားကို လက်ခံကြတဲ့အတွက် ကျမ်းစာသင်အံမှုအများကြီး စနိုင်ခဲ့တယ်။
ဝိညာဉ်ရေးလိုအပ်ချက်ကို သိမြင်ခြင်း
ငါးနှစ်လုံးလုံး ဒါဘီမြို့မှာ ယေဟောဝါသက်သေဆိုလို့ ကျွန်မတစ်ယောက်တည်းပဲရှိတယ်။ ယုံကြည်ခြင်းတူတဲ့သူတွေနဲ့ အစည်းအဝေးတွေ မှန်မှန်မတက်ရတဲ့အတွက် ဝိညာဉ်ရေးမှာ အားရှိနေဖို့ခက်တယ်။ တစ်ခါတော့ ကျွန်မအရမ်းစိတ်ဓာတ်ကျတာနဲ့ ကားမောင်းထွက်သွားလိုက်တယ်။ ညနေစောင်းမှအိမ်ပြန်ရောက်တဲ့အခါ ညီအစ်မတစ်ယောက်နဲ့ သူ့ကလေး ခုနစ်ယောက်က ကျွန်မကိုစောင့်မျှော်နေကြတယ်။ မိုင်အတော်ဝေးတဲ့ ဘရွန်းအသင်းတော်ကနေ သူတို့လာပြီး ကျွန်မအတွက်စာအုပ်စာတမ်းတွေ ယူလာပေးတယ်။ အဲဒီအချိန်ကစပြီး ဘက်တီဘာတာဖီးလ်ဆိုတဲ့ ဒီညီအစ်မဟာ ဒါဘီမြို့ကို တစ်လတစ်ခါလာပြီး စနေတနင်္ဂနွေနှစ်ရက် ကျွန်မအိမ်မှာတည်းပြီး အမှုဆောင်အတူထွက်၊ ကင်းမျှော်စင် အတူလေ့လာကြဖို့ စီစဉ်ခဲ့တယ်။ ကျွန်မလည်း ဘရွန်းမြို့ကို တစ်လတစ်ခါသွားလည်တယ်။
ဘရွန်းမြို့က ညီအစ်ကိုတွေက တော်တော်လေးကူညီပေးကြပါတယ်။ တစ်ခါတလေ ဒါဘီမြို့ကိုလာပြီး ကျွန်မနဲ့အတူ လယ်ကွင်းလုပ်ငန်းမှာ ပါဝင်ကြတယ်။ ဒါဘီမြို့ကို ဖြတ်သွားဖြတ်လာလုပ်တဲ့အခါတိုင်း ကျွန်မဆီဝင်ပြီး အမှုဆောင်ကူထွက်ပေးကြဖို့ တခြားမြို့က ညီအစ်ကို၊ ညီအစ်မတွေကိုလည်း သူတို့တိုက်တွန်းအားပေးကြတယ်။ ခရီးသွားလာတဲ့ ညီအစ်ကိုညီအစ်မတွေကလည်း ကျွန်မအတွက် လူထုဟောပြောချက်တိတ်ခွေတွေ ယူလာပေးကြတယ်။ တချို့ဆိုရင် ကျွန်မနဲ့အတူ ကင်းမျှော်စင်လေ့လာတယ်။ ဒီလိုခဏတစ်ဖြုတ် အလည်လာကြတာ ကျွန်မအတွက် တကယ်အားရှိစရာပဲ။
အကူအညီထပ်ရလာ
နှစ်အတော်ကြာ အနောက်သြစတြေးလျ တောင်ဘက်ပိုင်းက အငြိမ်းစားမောင်နှံစုံ အာသာနဲ့ မေရီဝေးလစ္စတို့က အေးမြတဲ့ရာသီရောက်တိုင်း သုံးလလုံးလုံး ကျွန်မဆီလာနေပြီး အားပေးကူညီတယ်။ ညီအစ်ကိုဝေးလစ္စက အစည်းအဝေးတွေကို ကိုင်ပြီး လယ်ကွင်းလုပ်ငန်းမှာ ဦးဆောင်ပေးတယ်။ ပိုပြီးဝေးခေါင်တဲ့ ကင်ဘာလီကုန်းပြင်မြင့်မှာရှိတဲ့ မွေးမြူရေးခြံ (ကျွဲ နွားခြံကြီး) တွေကို ကျွန်မတို့ ရောက်အောင်သွားကြတယ်။ ညီအစ်ကိုနဲ့ ညီအစ်မဝေးလစ္စတို့ ပြန်သွားတိုင်း ကျွန်မစိတ်ထဲမှာ ဟာတာတာဖြစ်ရတယ်။
နောက်ဆုံး ၁၉၈၃ အကုန်ပိုင်းမှာ ဒါဘီမြို့ကို သားလေးယောက်ရှိတဲ့ ဒယ်နီနဲ့ ဒနီးစ် စတာဂျန် မိသားစုပြောင်းရွှေ့လာမယ်ဆိုတဲ့ သတင်းကောင်းကြားလိုက်ရတယ်။ သူတို့ရောက်လာပြီးနောက် အစည်းအဝေးတွေ မှန်မှန်ကျင်းပနိုင်တယ်။ လယ်ကွင်းလုပ်ငန်းမှာလည်း အတူတူပါဝင်နိုင်ကြတယ်။ ၂၀၀၁ ခုနှစ်မှာ အသင်းတော်တစ်ခုဖွဲ့စည်းခဲ့တယ်။ အခုဆိုရင် ဒါဘီမြို့မှာ ကျွန်မတို့ရဲ့ဝိညာဉ်ရေးကို ဂရုစိုက်တဲ့ အကြီးအကဲနှစ်ယောက်နဲ့ ဓမ္မအမှုထမ်းတစ်ယောက်ရှိပြီး ဘုရားသခင့်နိုင်ငံတော်ကြေညာသူ ၂၄ ယောက်ရှိတဲ့ တက်ကြွတဲ့အသင်းတော်လေးတစ်ခု ရှိနေပြီ။ တစ်ခါတလေ အစည်းအဝေးတက်သူ ၃၀ နီးပါးရှိတယ်။
နောက်ကြောင်းကိုပြန်ကြည့်ရင် ယေဟောဝါကို ဝတ်ပြုကိုးကွယ်နိုင်ဖို့ ကိုယ်တော်ကူညီပေးခဲ့တဲ့အတွက် သိပ်အားရတာပဲ။ ကျွန်မရဲ့ခင်ပွန်းက အခုထိ ကျွန်မရဲ့ယုံကြည်ချက်ကို လက်မခံသေးပေမဲ့ တခြားနည်းတွေနဲ့ ကျွန်မကို ဆက်ထောက်ပံ့ပေးနေပါတယ်။ ကျွန်မရဲ့သမီးနှစ်ယောက်၊ မြေးနှစ်ယောက်နဲ့ တူမတစ်ယောက် အားလုံးငါးယောက် နှစ်ခြင်းခံပြီးတဲ့ သက်သေခံတွေဖြစ်နေကြပြီ။ အဲ့ဒီအပြင် ဆွေမျိုးတချို့က ယေဟောဝါသက်သေတွေနဲ့ ကျမ်းစာလေ့လာနေကြတယ်။
ယေဟောဝါကို ရှာတွေ့အောင် ကျွန်မကို ကိုယ်တော်ကူညီပေးခဲ့တဲ့အတွက် တကယ်ကျေးဇူးတင်တယ်။ အစဉ်ထာဝရ ကိုယ်တော်ရဲ့ပိုင်ဆိုင်ရာဖြစ်ဖို့ ကျွန်မစိတ်ပိုင်းဖြတ်ထားပါတယ်။—ဆာလံ ၆၅:၂။
[အောက်ခြေမှတ်ချက်]
^ အပိုဒ်၊ 14 ယေဟောဝါသက်သေများ ထုတ်ဝေခဲ့၊ ယခု ပုံမနှိပ်တော့ပါ။
[စာမျက်နှာ ၁၅ ပါ မြေပုံ/ ရုပ်ပုံများ]
(ကားချပ်အပြည့်အစုံကို စာစောင်တွင်ကြည့်ပါ)
ဩစတြေးလျ
ဝင်ဒမ်
ကင်ဘာလီ ကုန်းပြင်မြင့်
ဒါဘီ
ဘရွန်း
ပါ့သ်
[Credit Lines]
Kangaroo and lyrebird: Lydekker; koala: Meyers
[စာမျက်နှာ ၁၄ ပါ ရုပ်ပုံ]
ဝင်ဒမ်ဆေးရုံတွင် ၁၉၅၃ ခုနှစ်၌ သူနာပြုလုပ်စဉ်က
[စာမျက်နှာ ၁၅ ပါ ရုပ်ပုံ]
၂၀၀၅ ခုနှစ်၊ ဒါဘီအသင်းတော်