“လူမျိုးအပေါင်းတို့အား သက်သေဖြစ်”
“လူမျိုးအပေါင်းတို့အား သက်သေဖြစ်”
“သင်တို့သည် . . . မြေကြီးစွန်းတိုင်အောင် ငါ၏သက်သေဖြစ်ကြလိမ့်မည်။”—တမန်တော် ၁:၈။
၁။ တပည့်များသည် မဿဲ ၂၄:၁၄ တွင်မှတ်တမ်းတင်ထားသော ပရောဖက်ပြုချက်ကို အဘယ်အချိန်နှင့် အဘယ်နေရာတွင် ဦးဆုံးကြားခဲ့ကြသနည်း။
မဿဲ ၂၄:၁၄ တွင်မှတ်တမ်းတင်ထားသော ယေရှု၏စကားများကို ကျွန်ုပ်တို့မှအများစုသည် အလွတ်ရကြသည်။ ယင်းသည် အမှန်ပင် ထူးခြားဖွယ်ပရောဖက်ပြုချက်ပါတကား။ အဆိုပါစကားကို တပည့်များ ကြားခါစက သူတို့စိတ်ထဲ အဘယ်အရာပေါ်လာမည်ကို စဉ်းစားကြည့်ပါ။ အချိန်ကား အေဒီ ၃၃ ခုနှစ်ဖြစ်သည်။ တပည့်များသည် ယေရှုနှင့် သုံးနှစ်ခန့်နေခဲ့ကြပြီး ယခု ကိုယ်တော်နှင့်အတူ ယေရုရှလင်မြို့သို့ ရောက်လာကြ၏။ ကိုယ်တော်၏အံ့ဖွယ်အမှုများကို မြင်ပြီး ကိုယ်တော်၏သွန်သင်ချက်များကို ကြားခဲ့ကြသည်။ ယေရှုသွန်သင်ပေးသော တန်ဖိုးဖြတ်မရသည့်အမှန်တရားကို သူတို့ နှစ်သက်လက်ခံကြသကဲ့သို့ လူအားလုံး လက်ခံမည်မဟုတ်ကြောင်း သူတို့ ကောင်းစွာသဘောပေါက်ကြသည်။ ယေရှုတွင် တန်ခိုးအရှိန်အဝါကြီးသော ရန်သူများရှိ၏။
၂။ တပည့်များသည် အဘယ်အန္တရာယ်များနှင့် စိန်ခေါ်ချက်များကို ရင်ဆိုင်ကြရမည်နည်း။
၂ တပည့်လေးဦးသည် သံလွင်တောင်ပေါ်တွင် ယေရှုနှင့်အတူ ထိုင်နေပြီး မိမိတို့ နောင်တွင်ရင်ဆိုင်ရမည့် အန္တရာယ်များနှင့် စိန်ခေါ်ချက်များအကြောင်း ကိုယ်တော်မိန့်ဆိုရာများကို စူးစိုက်နားထောင်နေကြသည်။ ထိုအချိန်မတိုင်မီက ယေရှုသည် မိမိကွပ်မျက်ခံရတော့မည့်အကြောင်း သူတို့ကို မိန့်ဆိုခဲ့သည်။ (မဿဲ ၁၆:၂၁) သူတို့လည်း ရက်ရက်စက်စက် အတိုက်အခံပြုခံရမည်ကို ယခု ကိုယ်တော်ရှင်းပြ၏။ “လူများတို့သည် သင်တို့ကို ညှဉ်းဆဲခြင်း၊ အသေသတ်ခြင်းကိုခံစေခြင်းငှာ အပ်နှံကြလိမ့်မည်။ ငါ၏နာမကြောင့်လည်း ခပ်သိမ်းသောလူမျိုးတို့သည် သင်တို့ကို မုန်းကြလိမ့်မည်” ဟုကိုယ်တော်မိန့်ဆိုခဲ့သည်။ ထိုမျှမကသေးချေ။ ပရောဖက်အတုအယောင်များသည် လူများစွာကို လှည့်ဖြားကြလိမ့်မည်။ အချို့သည် ထိမိလဲသွားပြီး သစ္စာဖောက်ကာ အချင်းချင်းမုန်းကြလိမ့်မည်။ “အများသောသူတို့” သည် ဘုရားသခင်နှင့်သမ္မာကျမ်းစာကို ချစ်မြတ်နိုးစိတ် အေးစက်သွားစေကြမည်။—မဿဲ ၂၄:၉-၁၂။
၃။ မဿဲ ၂၄:၁၄ တွင်တွေ့ရသော ယေရှု၏စကားများသည် အဘယ်ကြောင့် အမှန်တကယ်ပင် မှင်တက်ဖွယ်ကောင်းသနည်း။
၃ ယေရှုသည် ဤသို့သောစိတ်ဓာတ်ကျစရာအခြေအနေများကို ဖော်ပြပြီးနောက် တပည့်များကို အံ့သြသွားစေသည့်စကား မိန့်ဆိုခဲ့သည်။ ကိုယ်တော်က ‘လူမျိုးအပေါင်းတို့အား သက်သေဖြစ်မည်အကြောင်း ဘုရားသခင့်နိုင်ငံတော်နှင့်ယှဉ်သော သတင်းကောင်းကို လောကနိုင်ငံအရပ်ရပ်ရှိသမျှတို့၌ ဟောရလိမ့်မည်။ သို့ပြီးမှ အဆုံးသည် ဖြစ်လတ္တံ့’ ဟုမိန့်ခဲ့သည်။ (မဿဲ ၂၄:၁၄) မှန်ပါသည်၊ ဣသရေလနိုင်ငံတွင် ယေရှုအစပြုခဲ့သော ‘အမှန်တရားဘက်၌ သက်သေခံ’ ခြင်းလုပ်ငန်းသည် ကမ္ဘာတစ်ဝန်း တိုးချဲ့သွားနေရမည်ဖြစ်သည်။ (ယောဟန် ၁၈:၃၇) အမှန်တကယ်ပင် မှင်တက်သွားစေသည့် ပရောဖက်ပြုချက်ပါတကား။ ထိုသက်သေခံခြင်းလုပ်ငန်းကို “နိုင်ငံအရပ်ရပ်ရှိသမျှ” သို့တိုးချဲ့ခြင်းသည် စိန်ခေါ်ချက်ဖြစ်ပေမည်။ ‘ခပ်သိမ်းသောလူမျိုးတို့၏မုန်းတီးမှု’ ကြားမှ ထိုသို့လုပ်ဆောင်ရခြင်းမှာ အံ့ဖွယ်အမှုအမှန်ဖြစ်၏။ ကြီးမားသောဤလုပ်ငန်း ဖြစ်မြောက်အောင်မြင်ခြင်းက ယေဟောဝါ၏ပိုင်သအုပ်စိုးမှုနှင့်တန်ခိုးသာမက မေတ္တာတော်၊ သက်ညှာမှုနှင့် သည်းခံမှုတို့ကိုပါ ထင်ရှားစေလိမ့်မည်။ ထို့ပြင် ကိုယ်တော့်ကျေးကျွန်များသည်လည်း မိမိတို့ယုံကြည်ခြင်းနှင့် ဆက်ကပ်ဝတ်ပြုမှုတို့ကို ဖော်ပြခွင့်ရရှိကြလိမ့်မည်။
၄။ သက်သေခံခြင်းလုပ်ငန်းကို ထမ်းဆောင်ရန် မည်သူတို့အား မိန့်မှာထားသနည်း။ ယေရှုသည် အဘယ်အားရှိစရာစကားကို မိန့်ဆိုခဲ့သနည်း။
၄ မိမိ၏တပည့်များသည် အလွန်အရေးကြီးသောလုပ်ငန်းကို ထမ်းဆောင်စရာရှိသည်ဟု အတိအလင်း ယေရှုဖော်ပြခဲ့သည်။ ကောင်းကင်သို့ မတက်ကြွမီ တပည့်များရှေ့ ကိုယ်ယောင်ထင်ရှားပြကာ ဤသို့မိန့်ဆို၏– “သင်တို့အပေါ်သို့ သန့်ရှင်းသောဝိညာဉ်တော်ဆင်းသက်သောအခါ သင်တို့သည် တန်ခိုးကိုခံရ၍ ယေရုရှလင်မြို့မှစသော ယုဒပြည်၊ ရှမာရိပြည်၊ မြေကြီးစွန်းတိုင်အောင် ငါ၏သက်သေ ဖြစ်ကြလိမ့်မည်။” (တမန်တော် ၁:၈) မကြာမီ အချို့သူများလည်း သူတို့နှင့်အတူ ပူးပေါင်းလာကြမည်ဖြစ်သည်။ သို့တိုင် တပည့်များ၏အရေအတွက် နည်းပေမည်။ ဘုရားသခင်၏တန်ခိုးကြီးသည့် သန့်ရှင်းသောဝိညာဉ်တော်သည် ကိုယ်တော်အပ်နှင်းထားသော ဤတာဝန်ကို ပြီးမြောက်စေနိုင်ကြောင်း သိရှိလိုက်ရသည့်အတွက် အားရှိစရာပင်။
၅။ တပည့်များသည် သက်သေခံခြင်းလုပ်ငန်းနှင့်ပတ်သက်၍ အဘယ်အရာကို မသိခဲ့ကြသနည်း။
၅ “လူမျိုးတကာတို့ကို” သတင်းကောင်းဟောပြောပြီး “တပည့်ဖြစ်စေ” ရမည်ဟု မိန့်မှာခံရကြောင်း တပည့်များသိရှိကြသည်။ (မဿဲ ၂၈:၁၉၊ ၂၀) သို့သော် အဘယ်အထိ နှံ့နှံ့စပ်စပ် သက်သေခံရမည်၊ အဘယ်အချိန်တွင် အဆုံးတိုင်မည်ကို သူတို့မသိကြချေ။ ကျွန်ုပ်တို့လည်း မသိကြချေ။ ထိုကိစ္စများကို ယေဟောဝါတစ်ပါးတည်းသာ ဆုံးဖြတ်ရမည်ဖြစ်သည်။ (မဿဲ ၂၄:၃၆) ယေဟောဝါ ကျေနပ်သည့်အထိ သက်သေခံပြီးသောအခါ ဤစနစ်ဆိုးကို အဆုံးတိုင်စေမည်။ ယေဟောဝါ ရည်ရွယ်ထားသည့်အတိုင်းအတာအထိ ဟောပြောခြင်းလုပ်ငန်းကို ဆောင်ရွက်ပြီးကြောင်း ထိုအခါမှသာ ခရစ်ယာန်များ သိမြင်လာကြမည်ဖြစ်သည်။ အဆိုပါကနဦးတပည့်များသည် ဤနောက်ဆုံးကာလတွင် သက်သေခံခြင်းလုပ်ငန်း ယခုလောက် ကျယ်ပြန့်လာမည်ကို အဘယ်နည်းနှင့်မျှ မမှန်းဆနိုင်ကြချေ။
ပထမရာစုတွင် သက်သေခံခြင်း
၆။ အေဒီ ၃၃ ခုနှစ်တွင် အဘယ်အရာဖြစ်ပျက်ခဲ့သနည်း။ ၎င်းနောက်မကြာမီ မည်သို့ဖြစ်လာသနည်း။
၆ ပထမရာစုတွင် ဘုရားသခင့်နိုင်ငံတော်ဟောပြောခြင်းနှင့် တပည့်ဖြစ်စေခြင်းလုပ်ငန်းသည် အံ့ဖွယ်ကောင်းလောက်အောင် တိုးတက်ခဲ့သည်။ အေဒီ ၃၃ ခုနှစ်၊ ပင်တေကုတ္တေပွဲနေ့တွင် တပည့် ၁၂၀ ခန့်သည် ယေရုရှလင်မြို့ရှိ အထက်ခန်းမတွင် စုဝေးရောက်ရှိနေကြသည်။ သူတို့အပေါ် ဘုရားသခင်၏သန့်ရှင်းသောဝိညာဉ်တော် သွန်းလောင်းခဲ့သည်။ တမန်တော်ပေတရုသည် ဤအံ့ဖွယ်အမှု၏ဆိုလိုချက်ကို အားတက်သရော ရှင်းပြခဲ့ရာ လူ ၃,၀၀၀ ခန့်သည် ယုံကြည်သူများဖြစ်လာပြီး နှစ်ခြင်းခံခဲ့ကြသည်။ ၎င်းသည် ပဏာမမျှသာရှိသေး၏။ ဘာသာရေးခေါင်းဆောင်များသည် သတင်းကောင်းဟောပြောခြင်း ရပ်တန့်သွားရန် ကြိုးစားခဲ့ကြသော်လည်း ‘ကယ်တင်ခြင်းသို့ရောက်သောသူတို့ကို နေ့စဉ်မပြတ် ဘုရားသခင်သည် သင်းဝင် [တပည့်များဖြစ်လာ] စေတော်မူ၏။’ မကြာမီ “အရေအတွက်အားဖြင့် လူငါးထောင်မျှလောက်” ရှိလာလေသည်။ ထို့နောက် “သခင်ဘုရား၌ ယုံကြည်သောယောက်ျား၊ မိန်းမအပေါင်းတို့သည်” တပည့်များဖြစ်လာကြ၏။—တမန်တော် ၂:၁-၄၊ ၈၊ ၁၄၊ ၄၁၊ ၄၇; ၄:၄; ၅:၁၄။
၇။ ကော်နေလိ ဘာသာပြောင်းဝင်လာခြင်းသည် အဘယ်ကြောင့် ထူးခြားသောအဖြစ်အပျက်ဖြစ်သနည်း။
၇ အေဒီ ၃၆ ခုနှစ်တွင် ထူးခြားသောအဖြစ်အပျက်နောက်တစ်ခုဖြစ်သည့် တစ်ပါးအမျိုးသား ကော်နေလိ ဘာသာပြောင်းပြီး နှစ်ခြင်းခံခဲ့သည်ကို တွေ့မြင်ရ၏။ ဘုရားသခင်ကို ချစ်ကြောက်ရိုသေသော ထိုသူထံသွားရန် တမန်တော်ပေတရုကို ညွှန်ကြားရာတွင် ‘လူမျိုးတကာတို့ကို တပည့်ဖြစ်စေ’ ပါဟူသော ယေရှု၏မိန့်မှာချက်သည် နိုင်ငံအရပ်ရပ်ရှိ ဂျူးတို့အတွက်သာမဟုတ်ကြောင်း ယေဟောဝါဖော်ပြလိုက်ခြင်းပင်။ (တမန်တော် ၁၀:၄၄၊ ၄၅) ဦးဆောင်နေသူများ မည်သို့တုံ့ပြန်ခဲ့ကြသနည်း။ သတင်းကောင်းသည် ဂျူးမဟုတ်သော တစ်ပါးအမျိုးသားများအတွက်လည်းဖြစ်ကြောင်း ယုဒပြည်ရှိ တမန်တော်များနှင့် အသက်ကြီးသူများ သိမြင်လာပြီးနောက် ဘုရားသခင်၏ဂုဏ်တော်ကို ချီးမွမ်းကြသည်။ (တမန်တော် ၁၁:၁၊ ၁၈) ထိုအချိန်အတွင်း ဟောပြောခြင်းလုပ်ငန်းသည် ဂျူးတို့စပ်ကြား တိုးတက်အောင်မြင်လျက်ရှိ၏။ နှစ်အနည်းငယ်အကြာ၊ ဖြစ်နိုင်ခြေ အေဒီ ၅၈ ခုနှစ်ခန့်တွင် တစ်ပါးအမျိုးသားယုံကြည်သူများအပြင် “ယုံကြည်သောယုဒလူ” သောင်းနှင့်ချီ၍လည်းရှိလာ၏။—တမန်တော် ၂၁:၂၀။
၈။ သတင်းကောင်းသည် လူတစ်ဦးစီအပေါ် မည်သို့အကျိုးသက်ရောက်သနည်း။
၈ ပထမရာစုခရစ်ယာန် အရေအတွက် တိုးများလာခြင်းက အားရစရာအမှန်ဖြစ်သော်လည်း ထိုအရေအတွက်များ ကိုယ်စားပြုသည့် လူတစ်ဦးစီကိုပါ ထည့်စဉ်းစားရန် ဘယ်တော့မျှ မမေ့ပါနှင့်။ သူတို့ကြားလိုက်ရသော ကျမ်းစာသတင်းတရားက အမှန်ပင်တန်ခိုးပါ၏။ (ဟေဗြဲ ၄:၁၂) ထိုသတင်းတရားက သက်ဝင်ယုံကြည်သူများ၏ အသက်တာကို အကြီးအကျယ် ပြောင်းလဲစေခဲ့သည်။ ထိုသူတို့သည် ကိုယ်ကျင့်တရား သန့်ရှင်းစေပြီး လူသစ်ကိုဝတ်ဆင်ကာ ဘုရားသခင်၏မိတ်ဆွေများ ဖြစ်လာကြ၏။ (ဧဖက် ၄:၂၂၊ ၂၃) ယနေ့လည်း ထိုနည်းတူပင်။ သတင်းကောင်းကို လက်ခံသူအားလုံး ထာဝစဉ်အသက်ရှင်နိုင်မည့် အံ့ချီးဖွယ်အလားအလာရှိကြသည်။—ယောဟန် ၃:၁၆။
ဘုရားသခင်၏ လုပ်ဖော်ဆောင်ဖက်များ
၉။ ကနဦးခရစ်ယာန်များသည် မိမိတို့ အဘယ်အခွင့်အရေးနှင့်တာဝန် ရရှိထားကြောင်း အသိအမှတ်ပြုခဲ့ကြသနည်း။
၉ ဖြစ်မြောက်ခဲ့ရာများသည် မိမိတို့ကြောင့်ဖြစ်သည်ဟု ကနဦးခရစ်ယာန်များ မဝင့်ကြွားခဲ့ကြချေ။ “သန့်ရှင်းသောဝိညာဉ်တော်၏တန်ခိုး” ဖြင့် မိမိတို့ ဓမ္မအမှုဆောင်နေသည်ကို သူတို့အသိအမှတ်ပြုကြသည်။ (ရောမ ၁၅:၁၃၊ ၁၉) ယေဟောဝါကြောင့် ဝိညာဉ်ရေးတိုးတက်နေခြင်းဖြစ်သည်။ တစ်ချိန်တည်းတွင် အဆိုပါခရစ်ယာန်များက မိမိတို့ “ဘုရားသခင်၏လုပ်ဖော်ဆောင်ဖက်” ဖြစ်ရခြင်းသည် အခွင့်အရေးတစ်ခုဖြစ်သကဲ့သို့ တာဝန်လည်းဖြစ်ကြောင်း သိရှိကြသည်။ (၁ ကောရိန္သု ၃:၆-၉၊ သမ္မာ) ထို့ကြောင့် ယေရှု၏သတိပေးဆုံးမချက်နှင့်အညီ မိမိတို့ရရှိထားသည့်လုပ်ငန်းတွင် အားကြိုးမာန်တက် လုပ်ဆောင်ခဲ့ကြ၏။—လုကာ ၁၃:၂၄။
၁၀။ ကနဦးခရစ်ယာန်အချို့သည် နိုင်ငံအရပ်ရပ်တွင် သက်သေခံရန် မည်သို့ကြိုးစားလုပ်ဆောင်ခဲ့ကြသနည်း။
၁၀ “တစ်ပါးအမျိုးသားတို့နှင့်ဆိုင်သော တမန်တော်” ပေါလုသည် မိုင်ထောင်နှင့်ချီ ကုန်းတစ်တန်၊ ရေတစ်တန် ခရီးထွက်ပြီး ရောမခရိုင် အာရှနယ်နှင့် ဂရိနိုင်ငံတို့တွင် အသင်းတော်များစွာကို တည်ထောင်ခဲ့၏။ (ရောမ ၁၁:၁၃) ထို့ပြင် ရောမအပြင် စပိန်နိုင်ငံ အထိပင် ခရီးထွက်ခဲ့ဖွယ်ရှိ၏။ ‘အရေဖျားလှီးခြင်းကိုခံသောသူတို့တွင် . . . သတင်းကောင်းကို’ ဟောပြောရန် တာဝန်အပ်နှင်းခံရသော တမန်တော်ပေတရုသည်လည်း ထိုအချိန်က ဂျူးများစွာနေထိုင်သည့် ဗာဗုလုန်သို့ ခရီးထွက်ခဲ့သည်။ (ဂလာတိ ၂:၇-၉; ၁ ပေတရု ၅:၁၃) သခင်ဘုရား၏အမှုတော်ကို ကြိုးစားလုပ်ဆောင်ကြသူများတွင် တရုဖဲနနှင့် တရုဖောသအစရှိသော အမျိုးသမီးများလည်းပါသည်။ ပေရသိအမည်ရှိသော အမျိုးသမီးတစ်ဦးလည်း “သခင်ဘုရား၏အမှုတော်ကိုကြိုးစား” လုပ်ဆောင်သည်ဟုဆို၏။—ရောမ ၁၆:၁၂။
၁၁။ တပည့်များ၏ကြိုးစားအားထုတ်မှုများကို ယေဟောဝါ မည်သို့ကောင်းချီးပေးခဲ့သနည်း။
၁၁ ယေဟောဝါသည် သူတို့နှင့် အခြားထက်သန်သော လုပ်ဖော်ဆောင်ဖက်များ၏ ကြိုးစားအားထုတ်မှုများကို ကြွယ်ဝစွာ ကောင်းချီးပေးတော်မူခဲ့သည်။ နိုင်ငံအရပ်ရပ်ရှိသမျှတို့၌ သက်သေခံရမည်ဟု ယေရှုကြိုဟောပြီး အနှစ် ၃၀ မပြည့်မီ ပေါလုက “ဧဝံဂေလိတရား”ကို “ကောင်းကင်အောက်၌ရှိသမျှသော ဝေနေယျသတ္တဝါတို့အား ဟောပြော” ခဲ့ပြီဟု ရေးသားခဲ့သည်။ (ကောလောသဲ ၁:၂၂၊ ၂၃) ထိုအချိန်က အဆုံးတိုင်ခဲ့သလော။ တစ်နည်းအားဖြင့် အဆုံးတိုင်ခဲ့သည်ဟု ဆို၍ရ၏။ ဝတ်ပြုရာအိမ်တော်နှင့်တကွ ယေရုရှလင်မြို့ကို ရောမစစ်တပ်များ ဖျက်ဆီးခဲ့ချိန် အေဒီ ၇၀ ပြည့်နှစ်တွင် ဂျူးအစီအစဉ်စနစ် အဆုံးတိုင်ခဲ့သည်။ သို့သော် စာတန်၏ကမ္ဘာ့အစီအစဉ်စနစ်ကို ယေဟောဝါမဖျက်ဆီးမီ သာ၍ကျယ်ကျယ်ပြန့်ပြန့် သက်သေခံဖို့လိုသေးကြောင်း ကိုယ်တော် စိတ်ပိုင်းဖြတ်ခဲ့သည်။
ယနေ့ သက်သေခံခြင်း
၁၂။ ကနဦးကျမ်းစာကျောင်းသားများသည် ဟောပြောရန် မိန့်မှာချက်ကို မည်သို့သဘောပေါက်ခဲ့ကြသနည်း။
၁၂ ဘာသာရေးအယူဖောက်ပြန်မှု အတန်ကြာလွှမ်းမိုးပြီးနောက် ၁၉ ရာစုနှောင်းပိုင်းတွင် စစ်မှန်သော ဝတ်ပြုရေးကို ပြန်လည်တည်ထောင်ခဲ့သည်။ ထိုအချိန်က ကျမ်းစာကျောင်းသားများဟု လူသိများခဲ့သော ယေဟောဝါသက်သေများသည် ကမ္ဘာတစ်ဝန်း တပည့်ဖြစ်စေပါဟူသော မိန့်မှာချက်ကို ကောင်းစွာသဘောပေါက်လာခဲ့ကြသည်။ (မဿဲ ၂၈:၁၉၊ ၂၀) ၁၉၁၄ ခုနှစ်တိုင်လေသော် ဟောပြောခြင်းလုပ်ငန်းတွင် တက်တက်ကြွကြွပါဝင်သူ ၅,၁၀၀ ခန့်ရှိပြီး ၆၈ နိုင်ငံသို့ သတင်းကောင်းရောက်ရှိနေသည်။ သို့သော် အဆိုပါကနဦးကျမ်းစာကျောင်းသားများသည် မဿဲ ၂၄:၁၄ ၏အဓိပ္ပာယ်အပြည့်အဝကို နားမလည်ခဲ့ကြချေ။ ၁၉ ရာစုနှောင်းပိုင်းတွင် ကျမ်းစာအသင်းများက သတင်းကောင်းပါရှိသော သမ္မာကျမ်းစာကို ဘာသာစကားများစွာဖြင့် ပြန်ဆိုပြီး ကမ္ဘာတစ်ဝန်းသို့ ပုံနှိပ်ထုတ်ဝေခဲ့၏။ ထို့ကြောင့် လူမျိုးအပေါင်းတို့အား သက်သေအဖြစ်ဟောပြောခဲ့ပြီဟု ကျမ်းစာကျောင်းသားများက ဆယ်စုနှစ်အနည်းငယ်ကြာ ယူမှတ်ခဲ့ကြသည်။
၁၃၊ ၁၄။ ၁၉၂၈ ခုနှစ်ထုတ် ကင်းမျှော်စင်တွင် ဘုရားသခင်၏အလိုတော်နှင့် ရည်ရွယ်တော်မူချက်နှင့်ပတ်သက်၍ အဘယ်ပိုမိုရှင်းလင်းသောနားလည်မှုကို ဖော်ပြထားသနည်း။
၁၃ ယေဟောဝါသည် မိမိ၏လူမျိုးအား မိမိ၏အလိုတော်နှင့် ရည်ရွယ်တော်မူချက်တို့ကို တဖြည်းဖြည်း ရှင်းလင်းစွာ သိနားလည်လာစေခဲ့သည်။ (သု. ၄:၁၈) ၁၉၂၈ ခုနှစ်၊ ဒီဇင်ဘာလ ၁ ရက်နေ့ထုတ် ကင်းမျှော်စင်က ဤသို့ဆိုခဲ့သည်– “သမ္မာကျမ်းစာကို ဖြန့်ဝေခြင်းက ကြိုပြောထားသော ဘုရားသခင့်နိုင်ငံတော်နှင့်ယှဉ်သော ဧဝံဂေလိတရား ဟောပြောခြင်း ပြီးပြီဟု ကျွန်ုပ်တို့ ပြောနိုင်သလော။ လုံးဝမပြောနိုင်ချေ။ ဤသို့သမ္မာကျမ်းစာကိုဖြန့်ချိသော်လည်း ကမ္ဘာပေါ်ရှိ ဘုရားသခင်၏သက်သေခံအုပ်စုငယ်သည် ဘုရားသခင်၏ [ရည်ရွယ်ချက်] ကိုရှင်းပြသော စာပေများပုံနှိပ်၍ အဆိုပါသမ္မာကျမ်းစာများ ဝေငှထားခဲ့သည့် အိမ်များထံ ပြန်လည်ပတ်ရန် လိုသေးသည်။ ထိုသို့မပြုလုပ်လျှင် ကျွန်ုပ်တို့ခေတ်တွင် မေရှိယနိုင်ငံတော် တည်ထောင်ကြောင်းကို လူတို့သိကြမည်မဟုတ်ချေ။”
၁၄ ထိုနေ့စွဲထုတ် ကင်းမျှော်စင်ကပင် ဤသို့ထပ်ဖော်ပြ၏– “၁၉၂၀ ပြည့်နှစ်တွင် . . . မဿဲ ၂၄:၁၄ ပါသခင့်ပရောဖက်ပြုချက်ကို ကျမ်းစာကျောင်းသားများ ရှင်းလင်းစွာ နားလည်လာခဲ့ကြသည်။ ကမ္ဘာတစ်ဝန်းရှိ တစ်ပါးအမျိုးသားများ သို့မဟုတ် လူမျိုးအားလုံးကို သက်သေအဖြစ် ဟောပြောရမည့် “ဧဝံဂေလိတရား” သည် မရောက်လာသေးသည့် ဘုရားသခင့်နိုင်ငံတော်နှင့်ယှဉ်သော ဧဝံဂေလိတရားမဟုတ်ဘဲ ကမ္ဘာပေါ်တွင် မေရှိယဘုရင် အုပ်စိုးနေပြီဖြစ်ကြောင်း တစ်နည်းအားဖြင့်ဖော်ပြသည့် ဧဝံဂေလိတရားဖြစ်သည်ကို ထိုအချိန်က သူတို့သိရှိလာကြ၏။”
၁၅။ ၁၉၂၀ ပြည့်လွန်နှစ်များမှစ၍ သက်သေခံခြင်းလုပ်ငန်းသည် မည်မျှကျယ်ပြန့်ခဲ့ပြီနည်း။
၁၅ ၁၉၂၀ ပြည့်လွန်နှစ်များမှ “သက်သေခံအုပ်စုငယ်” သည် တဖြည်းဖြည်း အုပ်စုကြီးဖြစ်လာ၏။ နောင်ဆယ်စုနှစ်များစွာတွင် “အခြားသိုး” မှ “လူအုပ်ကြီး” ကို ခွဲခြားသိရှိလာပြီး စတင်စုစည်းလာလေသည်။ (ယောဟန် ၁၀:၁၆; ဗျာ. ၇:၉) ယနေ့ နိုင်ငံပေါင်း ၂၃၅ နိုင်ငံတွင် သတင်းကောင်းကြွေးကြော်သူ ၆,၆၁၃,၉၅၀ ဦးရှိ၏။ တကယ့်ကို ထူးခြားလှသည့် ပရောဖက်ပြုချက် ပြည့်စုံမှုပါတကား။ ယခင်က ‘ဘုရားသခင့်နိုင်ငံတော်နှင့်ယှဉ်သော ဧဝံဂေလိတရား’ ကိုဤမျှကျယ်ကျယ်ပြန့်ပြန့် တစ်ခါမျှ မဟောပြောခဲ့ဖူးချေ။ ယခင်က ကမ္ဘာပေါ်တွင် ယေဟောဝါ၏သစ္စာရှိကျေးကျွန်များ ဤမျှလောက် မများခဲ့ဖူးချေ။
၁၆။ လွန်ခဲ့သော လုပ်ငန်းတော်နှစ်တွင် အဘယ်အရာပြီးမြောက်ခဲ့သနည်း။
၁၆ အဆိုပါသက်သေခံအုပ်စုကြီးသည် ၂၀၀၅ လုပ်ငန်းတော်နှစ်အတွင်း အလုပ်များခဲ့ကြသည်။ ၂၃၅ နိုင်ငံ၌ သတင်းကောင်းကြွေးကြော်ခြင်းလုပ်ငန်းတွင် နာရီပေါင်း တစ်ဘီလီယံကျော် အသုံးပြုခဲ့ကြပြီ။ ပြန်လည်ပတ်မှု သန်းနှင့်ချီ ပြုခဲ့ကြပြီ။ ကျမ်းစာသင်အံမှု သိန်းနှင့်ချီ၍ ကျင်းပခဲ့ကြပြီ။ သူတစ်ပါးကို ဘုရားသခင့်စကားတော် ပြောပြရန် သူတို့၏အချိန်နှင့် ဥစ္စာအင်ခွင်များကို စိတ်လိုကိုယ်လျောက် ပေးဆက်ခဲ့သော ယေဟောဝါသက်သေများက အဆိုပါလုပ်ငန်းကို ဆောင်ရွက်ခဲ့ကြသည်။ (မဿဲ ၁၀:၈) ယေဟောဝါသည် မိမိ၏တန်ခိုးကြီးမားသည့် သန့်ရှင်းသောဝိညာဉ်တော်အကူအညီဖြင့် မိမိ၏အလိုတော်ပြီးမြောက်စေရန် မိမိကျေးကျွန်များကို ဆက်၍ခွန်အားပေးလျက်ရှိသည်။—ဇာခရိ ၄:၆။
ဝီရိယစိုက်ထုတ်၍ သက်သေခံခြင်း
၁၇။ သတင်းကောင်းဟောပြောခြင်းနှင့်ပတ်သက်၍ ယေရှု၏စကားကို ယေဟောဝါ၏လူတို့ မည်သို့တုံ့ပြန်လျက်ရှိကြသနည်း။
၁၇ သတင်းကောင်းဟောပြောကြမည်ဟု ယေရှုမိန့်ဆိုခဲ့သည်မှာ အနှစ် ၂,၀၀၀ နီးပါးရှိပြီးဖြစ်သော်လည်း ဤလုပ်ငန်းတွင်ပါဝင်နေသော ဘုရားသခင့်လူတို့၏ စိတ်အားထက်သန်မှုသည် လျော့နည်းမသွားချေ။ ကောင်းမှုပြုရာတွင် ကျွန်ုပ်တို့ ခံနိုင်ရည်ရှိခြင်းဖြင့် ယေဟောဝါ၏မေတ္တာတော်၊ သက်ညှာမှုနှင့် သည်းခံမှုစသည့် အရည်အသွေးများကို ထင်ဟပ်ပြနေကြောင်း ကျွန်ုပ်တို့ သိရှိကြသည်။ ယေဟောဝါနည်းတူ ကျွန်ုပ်တို့သည်လည်း အဘယ်သူကိုမျှမပျက်စီးစေလိုဘဲ နောင်တယူပြောင်းလဲပြီး ကိုယ်တော်ထံ ပြန်လှည့်လည်လာစေလိုကြသည်။ (၂ ကောရိန္သု ၅:၁၈-၂၀; ၂ ပေတရု ၃:၉) ဘုရားသခင်၏ဝိညာဉ်တော်ဖြင့် စိတ်အားကြီးသော ယေဟောဝါသက်သေများသည် မြေကြီးစွန်းတိုင်အောင် သတင်းကောင်းကို ဇွဲနပဲနှင့် ဟောပြောနေကြသည်။ (ရောမ ၁၂:၁၁) ထို့ကြောင့် နေရာတကာမှလူတို့သည် အမှန်တရားကို လက်ခံပြီး ယေဟောဝါ၏မေတ္တာပါညွှန်ကြားမှုကို လိုက်လျှောက်လျက်ရှိကြသည်။ ပုံနမူနာအချို့ကို သုံးသပ်ကြည့်ပါ။
၁၈၊ ၁၉။ သတင်းကောင်းကို တလိုတလားလက်ခံသူအချို့၏ အဘယ်တွေ့ ကြုံမှုများကို သင်ဖော်ပြနိုင်သနည်း။
၁၈ ချားလ်စ်သည် ကင်ညာနိုင်ငံ အနောက်ပိုင်းမှ လယ်သမားတစ်ဦးဖြစ်သည်။ ၁၉၉၈ ခုနှစ်တွင် ဆေးရွက်ကြီးပေါင်ချိန် ၁၈,၀၀၀ ကျော်ရောင်းခဲ့ရာ အတော်ဆုံးဆေးရွက်ကြီးလယ်သမားဟူသော အမည်ဖြင့် ဂုဏ်ပြုလက်မှတ်ရရှိခဲ့သည်။ ထိုအချိန်တွင် သူသည် ကျမ်းစာစသင်နေပြီ။ မကြာမီ ဆေးရွက်ကြီးစိုက်ပျိုးခြင်းက ကိုယ်နှင့်စပ်ဆိုင်သူကိုချစ်ပါဟူသော ယေရှု၏မိန့်မှာချက်ကို ချိုးဖောက်ရာရောက်ကြောင်း သူသိရှိလာလေသည်။ (မဿဲ ၂၂:၃၉) ‘အတော်ဆုံးဆေးရွက်ကြီးလယ်သမား’ ဟူသည် အမှန်အားဖြင့် ‘အတော်ဆုံးလူသတ်သမား’ ဖြစ်ကြောင်း ချားလ်စ်သိရှိလာသည့်အခါ ဆေးရွက်ကြီးအပင်များကို အဆိပ်ဖျန်း၍ မျိုးတုံးပစ်လိုက်သည်။ သူသည် အပ်နှံပြီး နှစ်ခြင်းခံသည့်အထိ တိုးတက်လာကာ ယခု မှန်မှန်ရှေ့ဆောင်အနေနှင့်ရော၊ ဓမ္မအမှုထမ်းအနေနှင့်ပါ အမှုဆောင်လျက်ရှိသည်။
၁၉ ယေဟောဝါသည် ကမ္ဘာချီသက်သေခံခြင်းလုပ်ငန်းအားဖြင့် လူမျိုးများကို လှုပ်ခါလိုက်ရာ နှစ်သက်ဖွယ်သောအရာဖြစ်သည့် လူတို့ ဘုရားသခင့်အိမ်တော်သို့ ဝင်လာနေကြကြောင်း ထင်ရှားသည်။ (ဟဂ္ဂဲ ၂:၇) ပေါ်တူဂီနိုင်ငံတွင် နေထိုင်သော ပေသရိုသည် အသက် ၁၃ နှစ်အရွယ်တွင် ခရစ်ယာန်ဘုန်းကြီးဖြစ်ရန် ကျမ်းစာကျောင်းတက်ခဲ့သည်။ သူ၏ပန်းတိုင်မှာ ခရစ်ယာန်သာသနာပြုတစ်ဦးအဖြစ် ကျမ်းစာသင်ပေးရန်ဖြစ်သည်။ သို့သော် ကျမ်းစာကျောင်းတွင် သမ္မာကျမ်းစာကို စတိလောက်သာ သင်ပေးသောကြောင့် မကြာမီ ကျောင်းထွက်လိုက်၏။ ခြောက်နှစ်အကြာတွင် လစ္စဘန်တက္ကသိုလ်၌ စိတ်ပညာ ဆည်းပူးလေတော့သည်။ ယေဟောဝါသက်သေတစ်ဦးဖြစ်သူ အဒေါ်နှင့်နေထိုင်ခဲ့ရာ သူက ကျမ်းစာလေ့လာရန် အားပေးခဲ့သည်။ ထိုအချိန်တွင် ပေသရိုသည် ဘုရားသခင်တည်ရှိကြောင်း မသေချာမရေရာဖြစ်နေသောကြောင့် သမ္မာကျမ်းစာ လေ့လာရမည်၊ မလေ့လာရမည်ကို ဝေခွဲမရဖြစ်နေ၏။ ချီတုံချတုံဖြစ်နေရသည့်အကြောင်း စိတ်ပညာပါမောက္ခတစ်ဦးကို ပြောပြခဲ့ရာ ဝေခွဲမရဖြစ်နေသူသည် စိတ်ပညာအရ မိမိကိုယ်ကို ဖျက်ဆီးလိုစိတ် ဖြစ်ပေါ်လာတတ်သည်ဟု ထိုပါမောက္ခက ရှင်းပြ၏။ ထိုအခါ ပေသရိုသည် သမ္မာကျမ်းစာလေ့လာရန် ဆုံးဖြတ်လိုက်လေသည်။ မကြာမီက သူနှစ်ခြင်းခံလိုက်ပြီး ယခု သူကိုယ်တိုင် ကျမ်းစာသင်အံမှုများ ကျင်းပနေလေပြီ။
၂၀။ လူမျိုးတို့ကို ဤမျှကျယ်ကျယ်ပြန့်ပြန့် သက်သေခံခြင်းသည် အဘယ်ကြောင့် ဝမ်းမြောက်စရာဖြစ်သနည်း။
၂၀ လူမျိုးများကို အဘယ်အထိ သက်သေခံရမည်၊ အဘယ်အချိန်နာရီတွင် အဆုံးတိုင်မည်တို့ကို ကျွန်ပ်တို့မသိရှိကြသေးချေ။ သို့သော် မကြာမီ အဆုံးတိုင်တော့မည်ကိုသာ သိရှိထားကြ၏။ ဤမျှကျယ်ကျယ်ပြန့်ပြန့် သတင်းကောင်းဟောပြောနေခြင်းသည် လူ့အစိုးရများကို ဘုရားသခင့်နိုင်ငံတော် အစားထိုးတော့မည့်အချိန် နီးလာကြောင်း ဖော်ပြချက်တစ်ခုမျှသာဖြစ်သည့်အတွက် ကျွန်ုပ်တို့ ဝမ်းမြောက်ကြသည်။ (ဒံယေလ ၂:၄၄၊ ၄၅) အချိန်ကုန်လာသည်နှင့်အမျှ သန်းနှင့်ချီလူတို့သည် သတင်းကောင်းကို လက်ခံလာလျက်ရှိရာ ယင်းသည် ကျွန်ုပ်တို့၏ဘုရားသခင် ယေဟောဝါအား ချီးမွမ်းဂုဏ်တင်ရာရောက်သည်။ ဆက်သစ္စာရှိကြပြီး မိမိတို့၏ကမ္ဘာချီညီအစ်ကိုများနှင့်အတူ လူမျိုးအပေါင်းတို့အား သက်သေခံခြင်းလုပ်ငန်းတွင် ဆက်အလုပ်များနေကြရန် သန္နိဋ္ဌာန်ချနိုင်ကြပါစေ။ ထိုသို့ပြုခြင်းဖြင့် ကျွန်ုပ်တို့ရော၊ ကျွန်ုပ်တို့၏သတင်းစကားကို နားထောင်သူတို့ပါ ကယ်တင်ခြင်းရရှိပါလိမ့်မည်။—၁ တိမောသေ ၄:၁၆။
သင်မှတ်မိသလော
• မဿဲ ၂၄:၁၄ သည် အဘယ်ကြောင့် ဤမျှ ထူးခြားသည့် ပရောဖက်ပြုချက်တစ်ခု ဖြစ်သနည်း။
• ကနဦးခရစ်ယာန်များသည် ဟောပြောခြင်းတွင် မည်သို့ကြိုးစားအားထုတ်ခဲ့ကြသနည်း။ ရလဒ်ကား အဘယ်နည်း။
• ကျမ်းစာကျောင်းသားများသည် လူမျိုးအပေါင်းအား သက်သေခံရန် လိုအပ်ကြောင်း မည်သို့သဘောပေါက်လာခဲ့ ကြသနည်း။
• လွန်ခဲ့သောလုပ်ငန်းတော်နှစ်အတွင်း ယေဟောဝါလူတို့၏ဆောင်ရွက်မှုကို သုံးသပ်ရာ၌ အဘယ်အရာကို သင်,အားရသနည်း။
[လေ့လာရန်မေးခွန်းများ]
[စာမျက်နှာ ၂၉ ပါ မြေပုံ/ ရုပ်ပုံများ]
ပေါလုသည် သတင်းကောင်းဟောပြောရန် မိုင်ထောင်နှင့်ချီ၍ ကုန်းတစ်တန်၊ ရေတစ်တန် ခရီးထွက်ခဲ့
[စာမျက်နှာ ၂၈ ပါ ရုပ်ပုံ]
ကော်နေလိနှင့် သူ၏မိသားစုကို သက်သေခံရန် ပေတရုကို ယေဟောဝါ ညွှန်ကြားခဲ့