“ငါ​တို့သည် မေရှိယကို တွေ့​ကြပြီ”

“ငါ​တို့သည် မေရှိယကို​တွေ့ကြပြီ။” “မောရှေ​သည် ပညတ္တိကျမ်း​၌​လည်းကောင်း၊ ပရောဖက်​တို့သည် သူတို့​ကျမ်း​၌​လည်းကောင်း အကြောင်းပြု၍​ရေးထား​သော​သူ . . . ကို ငါ​တို့သည်​တွေ့​ကြပြီ။” ပထမ​ရာစု​မှ သစ္စာရှိ​ဂျူး​နှစ်ဦး​က ဤ​အံ့ဖွယ်​စကား​များ​ကို ပြောဆို​ခဲ့​ကြသည်။ နောက်ဆုံး​တွင် မျှော်လင့်​ထားသော မေရှိယ​ရောက်ရှိ​လာ​ခဲ့ပြီ။ ယင်းကို သူတို့ ယုံကြည်​စိတ်ချ​ခဲ့​ကြ​၏!—ယောဟန် ၁:၃၅-၄၅။

ထို​အချိန်​က သမိုင်း​နှင့်​ဘာသာရေး နောက်ခံ​ကို သုံးသပ်ကြည့်​ပါ​က သူတို့၏ ယုံကြည်​စိတ်ချမှု​မှာ သာ၍​အဓိပ္ပာယ်​ရှိသည်။ လွတ်မြောက်​စေမည်​ဟု​ဆို​သူများစွာ​သည် ကြွေးကြော်​သံ၊ ကတိပြု​ချက်​တို့​နှင့်အတူ ပေါ်လာ​သော်လည်း ထို​သူတို့သည် ဂျူး​များ​အား ရောမတို့​၏​ထမ်းပိုး​အောက်​မှ မ​ကယ်နုတ်​ပေး​နိုင်​သည့်​အခါ လူတို့၏​မျှော်လင့်ချက်များ​မှာ ပျက်ပြား​သွားခဲ့​ရ၏။—တမန်​တော် ၅:၃၄-၃၇။

သို့သော် ထို​ဂျူး​နှစ်ဦး​ဖြစ်သော အန္ဒြေ​နှင့် ဖိလိပ္ပု​တို့သည် စစ်မှန်သော​မေရှိယကို​တွေ့ခဲ့​ပြီ​ဟူ​သည့် သူတို့၏ ယုံကြည်​စိတ်ချမှု​ကို လုံးလုံး​သံသယ​မဝင်​ခဲ့​ကြ​ပါ။ ယင်းအစား နောက်ပိုင်း​နှစ်များ​တွင် ထို​သူ​ပြုလုပ်​သော အံ့ဖွယ်အမှု​များ​ကို သူတို့​ကိုယ်တိုင်​တွေ့ မြင်ကြ​ရသောအခါ မေရှိယ​နှင့်​ပတ်သက်​၍ ကြို​ဟောထား​ရာ​များ ပြည့်စုံ​လာ​ခြင်း​ဖြစ်​ကြောင်း သူတို့​ပို​၍ ယုံကြည်​စိတ်ချ​လာ​ကြ​လေ​သည်။

သူတို့​နှစ်ဦး​နှင့် အခြားသူများ​စွာ​သည် ထို​သူအား မေရှိယ​အတုအယောင်​တစ်ဦး သို့​မဟုတ် စိတ်ပျက်ဖွယ်​အယောင်ဆောင်​သူ​တစ်ဦး​အဖြစ် မယူမှတ်​ဘဲ အဘယ်ကြောင့် ယုံကြည်ခဲ့​ကြ​သနည်း။ သူသည် စစ်မှန်သော​မေရှိယ​ဖြစ်​ကြောင်း သိသာ​ထင်ရှား​သည့် အထောက်အထား​များ​ကား အဘယ်နည်း။

သမိုင်း​မှတ်တမ်းအရ အန္ဒြေ​နှင့်​ဖိလိပ္ပုသည် ယခင်​က လက်သမား​ဖြစ်သူ နာဇရက်​မြို့သား ယေရှု​အား ကြာမြင့်စွာ​စောင့်စား​ခဲ့​ရသည့် ကတိထားရာ​မေရှိယ​အဖြစ် ဖော်ပြ​ခဲ့​ကြသည်။ (ယောဟန် ၁:၄၅) ထို​ခေတ်​မှ စေ့စပ်​သေချာ​သော သမိုင်း​ပညာရှင်​လုကာ​က မေရှိယ​ကြွလာခြင်း​သည် “ကဲသာ​ဘုရင်​တိဗေရိ နန်းစံ​တစ်ဆယ့်​ငါး​နှစ်​တွင်” ဖြစ်​ကြောင်း ဖော်ပြ​သည်။ (လုကာ ၃:၁-၃) တိဗေရိ နန်းစံ ၁၅ နှစ်​မြောက်​သည် အေဒီ ၂၈ စက်တင်ဘာ​တွင်​စတင်​ပြီး အေဒီ ၂၉ စက်တင်ဘာ​တွင် ကုန်ဆုံး​သည်။ ထို​အချိန်တွင် ဂျူး​များသည် မေရှိယ​ရောက်ရှိခြင်း​ကို “မျှော်လင့်” နေသည်​ဟု လုကာ​ထပ်ဆင့်​ဖော်ပြ​၏။ (လုကာ ၃:၁၅) ထို​အချိန်တွင်​ရောက်မည်​ဟု အဘယ်ကြောင့် မျှော်လင့်​နေကြ​သနည်း။ ကျွန်ုပ်​တို့​သိရှိ​ကြ​ရမည်။

မေရှိယ​ဆိုင်ရာ အထောက်အထား​များ

မေရှိယ​၏​အခန်းကဏ္ဍ​သည် အရေးကြီး​သဖြင့် ဖန်ဆင်း​ရှင်​ယေဟောဝါ​သည် နိုးကြား​တည်ကြည်သူ​များ ကတိထားရာ​မေရှိယကို ခွဲခြား​သိမြင်​နိုင်​ရန် တိကျ​သည့်​သဲလွန်စ​များ ပေး​ထား​မည်​မှာ ကျိုးကြောင်း​ဆီလျော်​ပါ​သည်။ အဘယ်ကြောင့်​နည်း။ အကြောင်း​မှာ ဤနည်းဖြင့် သတိရှိ​နိုးကြား​သူများ​သည် အခြားသူများ​စွာ​ကဲ့သို့ အယောင်ဆောင်​များ​၏ လှည့်ဖြားခြင်း​ကို​ခံရ​မည် မဟုတ်​ချေ။

သံတမန်​တစ်ဦး​သည် အခြား​နိုင်ငံ​တွင် တာဝန်​ခန့်အပ်​ခံရ​ပါ​က မိမိ​ခန့်အပ်​ခံရ​ကြောင်းကို​အတည်ပြု​ရန် အထောက်အထား​များ တင်ပြ​ရ၏။ အလားတူ၊ ယေဟောဝါ​သည် မေရှိယ​ပြည့်မီ​ရမည့် သတ်မှတ်ချက်​များ​ကို ကြိုတင်​ရေးမှတ်​ထားပြီး​ဖြစ်သည်။ ထို့​ကြောင့် ထို “ကိုယ်စားလှယ်​ချုပ်” ရောက်လာသော​အခါ မိမိ​မည်သူ​မည်ဝါ​ဖြစ်​ကြောင်း ထောက်ခံ​ပေး​မည့် အထောက်အထား​များနှင့်​တကွ ရောက်လာ​သကဲ့သို့​ဖြစ်​ပေမည်။—ဟေဗြဲ ၁၂: ၂၊ က​ဘ။

စစ်မှန်​သည့်​မေရှိယ ပြည့်မီ​ရမည့် အရည်အချင်းများ​ကို ရာစုနှစ်များစွာ​ကတည်းက ကြိုတင်​ရေးသား​ထားသော သမ္မာကျမ်းစာ ပရောဖက်ပြုချက်​များ​တွင် တွေ့ရှိ​ရသည်။ ယင်း​တို့​က မေရှိယ​ကြွလာခြင်း၊ ခရစ်ယာန်​ဓမ္မ​အမှုဆောင်ခြင်း၊ အခြားသူများ​လက်​တွင် ဝေဒနာ​ခံစား​ရခြင်း​နှင့် ကိုယ်တော်​ကြုံတွေ့ရမည့် သေခြင်း​တို့​အကြောင်း အသေးစိတ်​တိကျ​စွာ ကြို​ဟောခဲ့​သည်။ ကိုယ်တော်​၏​ထမြောက်ခြင်း၊ ဘုရားသခင့်​လက်ယာတော်​ဘက်​သို့ ချီးမြှောက်ခံ​ရခြင်း​နှင့် နောက်ဆုံး​တွင် ကိုယ်တော်​၏ အနာဂတ်​နိုင်ငံတော် ဆောင်ကြဉ်း​ပေး​မည့် ကောင်းချီး​များ​ကိုလည်း ယုံကြည်​စိတ်ချ​ရသော ထို​ပရောဖက်ပြုချက်​များ​က ကြို​ဟောထား​ကြောင်း​သိရ​၍ အကျိုးရှိ​ပေမည်။ ဤ​နည်း​အားဖြင့် လူတစ်ဦး​တည်း​ကို​သာ ခွဲခြား​ဖော်ပြ​နိုင်သော လက်ဗွေ​ရာ​နှင့်​တူ​သည့် ထူးခြားသော​ပုံစံ​ကို သမ္မာကျမ်းစာ​ပရောဖက်ပြုချက်​များ​က ဖော်ပြ​သည်။

အေဒီ ၂၉ တွင် ယေရှု ပေါ်လာ​သောအခါ မေရှိယ​ဆိုင်ရာ ပရောဖက်ပြုချက်​အားလုံး ထို​အချိန်တွင် မပြည့်စုံခဲ့​ပေ။ ဥပမာ၊ ကိုယ်တော်​မသေဆုံး​သေး​၍ မထမြောက်​သေး​ချေ။ သို့သော် အန္ဒြေ၊ ဖိလိပ္ပု​နှင့် အခြားသူများ​စွာ​တို့သည် ယေရှု၏ သွန်သင်ချက်​များနှင့် လုပ်ဆောင်ခဲ့​ရာ​များ​ကြောင့် ကိုယ်တော်​ကို ယုံကြည်ခဲ့​ကြသည်။ ကိုယ်တော်​သည် မေရှိယ​အစစ်အမှန်​ဖြစ်​ကြောင်း သက်သေထူ​သော အထောက်အထား​များစွာကို သူတို့​တွေ့မြင်​ခဲ့​ကြ​၏။ ထို​အချိန်တွင် သင်​အသက်ရှင်ခဲ့​မည်​ဆိုလျှင် ယင်း​အထောက်အထား​များ​ကို ကိုယ်တိုင်​ကိုယ်​ကျ အမြင်​ကျယ်ကျယ်​ဖြင့် စဉ်းစား​သုံးသပ်​မည်​ဆိုပါ​က ယေရှုသည် မေရှိယ​ဖြစ်​ကြောင်း သင်လည်း ယုံကြည်​စိတ်ချ​ပေ​လိမ့်​မည်။

ပေါင်းစပ်​ရုပ်လုံး

ထိုသို့​ကောက်ချက်​ချရန် အဘယ်အရာက သင့်ကို ကူညီ​ပေး​မည်​နည်း။ ရာစုနှစ်များ​တစ်လျှောက်​တွင် သမ္မာကျမ်းစာ​ပရောဖက်​များ​က မေရှိယ​ပြည့်မီ​ရမည့် သတ်မှတ်ချက်​များ​ကို တိတိကျကျ​ကြို​ဟောခဲ့​ရာ ကိုယ်တော်​အား မမှား​မ​ယွင်း ခွဲခြား​သိရှိ​စေ​သည်။ ပရောဖက်​များ​က ရာစုနှစ်များ​တစ်လျှောက် ထို​အသေးစိတ်​အချက်အလက်​များ​ကို ဖော်ပြ​ထား​သည့်​အတွက် မေရှိယ​နှင့်​ဆိုင်သော​ရုပ်လုံး​သည် တဖြည်းဖြည်း​ပေါ်လာ​လေ​သည်။ ဟင်နရီ အိပ်ခ်ျ. ဟေ​လီ ဤသို့​မှတ်ချက်ချ​ခဲ့​၏– “တစ်ဦး​နှင့်​တစ်ဦး တစ်ခါမျှ​လည်း​မမြင်ဖူး၊ အဆက်အသွယ်​လည်း​မရှိသော တိုင်းပြည်​အသီးသီး​မှ လူ​တစ်စု​သည် အခန်း​တစ်ခန်း​ထဲ ဝင်လာ​ကြ​ပြီး ၎င်း​တို့​ထု​ထား​သည့် ပန်းပုရုပ်​၏ အစိတ်အပိုင်း​တစ်ပိုင်းစီ​ကို ချထား​လိုက်​ကြသည် ဆိုပါစို့။ ယင်း​အစိတ်အပိုင်း​များ​ကို အတူ​ပေါင်းစပ်​လိုက်​သောအခါ ပြည့်စုံသော​လူရုပ်​တစ်ရုပ် ပေါ်လာ​လျှင် ယင်းသည် တစ်စုံ​တစ်ယောက်​က ရုပ်ပုံ​တစ်​ပုံ​ကို အသေးစိတ်​ရေးဆွဲ​ပြီး တစ်ပိုင်းစီ​ကို လူ​အသီးသီး​ထံ ပို့ပေး​ခြင်း​ဖြစ်သည်ဟု ကောက်ချက်​ချ​မည် မဟုတ်လော။” ထို့နောက် သူ​ဤသို့​မေး​သည်– “ယေရှု​မကြွလာမီ ခေတ်​ကာလ​များ​တစ်လျှောက် ရာစုနှစ်​အသီးသီး​တွင်  စာရေးသူ​အသီးသီး​စုစည်း​ခဲ့​သည့်  ယေရှု​ဘဝ​နှင့်​လုပ်ဆောင်မှု​အကြောင်း အံ့ဖွယ်​ပေါင်းစပ်မှု​က လူ့​ထက်သာ​လွန်​သော ဉာဏ်ကြီးရှင်​တစ်ပါး ထို​ရေးသား​မှု​ကို ကြီးကြပ်​ခဲ့​ကြောင်း ဖော်ပြ​သည်မဟုတ်​လော။ ယင်းကို ဟေ​လီ​က “ခေတ်​များ​တစ်လျှောက် အံ့ဖွယ်အမှု” ဟု​ကောက်ချက်​ချ​ခဲ့​သည်။

ယင်း “အံ့ဖွယ်အမှု” သည် သမ္မာကျမ်းစာ​၏ ပထမ​စာစောင်​တွင် အစပြု​ခဲ့​သည်။ ကမ္ဘာဦးကျမ်း​၏ ကျမ်း​ရေးသူက မေရှိယ​၏​အခန်းကဏ္ဍကို ညွှန်ပြ​သော ဦးဆုံး​သမ္မာကျမ်းစာ ပရောဖက်ပြုချက်​ကို ဖော်ပြ​သည့်​အပြင် မေရှိယ​သည် အာဗြဟံ​၏​မျိုးနွယ်​မှ ဆင်းသက်လာ​မည်​ဖြစ်​ကြောင်း မှတ်တမ်းတင်​ခဲ့​သည်။ (ကမ္ဘာဦး ၃:၁၅; ၂၂:၁၅-၁၈) နောက်​သဲလွန်စ​တစ်ခု​က မေရှိယ​သည် ယုဒ​မျိုးနွယ်​မှ​ဆင်းသက်​မည်​ဖြစ်​ကြောင်း ဖော်ပြ​သည်။ (ကမ္ဘာဦး ၄၉:၁၀) မေရှိယ​သည် မောရှေ​ထက်​သာ၍​ကြီးမြတ်သော ပြောရေးဆိုခွင့်​ရှိသူ၊ ကယ်တင်ရှင် ဖြစ်​လိမ့်​မည်​ဟု ဣသရေလ​လူမျိုး​တို့အား မောရှေ​မှ​တစ်ဆင့် ဘုရားသခင် မိန့်တော်မူ​ခဲ့​သည်။—တရားဟောရာ ၁၈:၁၈။

ဘုရင်​ဒါဝိဒ်​အချိန်တွင် မေရှိယ​သည် ဒါဝိဒ်​၏​နန်း​မွေ​ခံ​ဖြစ်​ကြောင်း​နှင့် သူ၏​နိုင်ငံတော်​သည် “အစဉ်အမြဲ​တည်” လိမ့်​မည်​ဖြစ်​ကြောင်း ပရောဖက်ပြုချက်​က ဖော်ပြ​သည်။ (၂ ဓမ္မ​ရာဇဝင် ၇:၁၃-၁၆) မေရှိယ​သည် ဒါဝိဒ်​၏​မြို့တော် ဗက်လင်မြို့​တွင် မွေးဖွား​မည်​ဖြစ်​ကြောင်း မိက္ခာကျမ်း​က ဖော်ပြ​သည်။ (မိက္ခာ ၅:၂) ကိုယ်တော်​သည် အပျိုကညာ​မှ မွေးဖွား​လာ​မည်​ဟု ဟေရှာယ ကြိုဟော​၏။ (ဟေရှာယ ၇:၁၄) ကိုယ်တော်​ကြွလာခြင်း​ကို ဧလိယ​ကဲ့သို့​သော​သူ​တစ်ဦး ကြွေးကြော်​မည်​ဖြစ်​ကြောင်း ပရောဖက်​မာလခိ ကြိုဟော​သည်။—မာလခိ ၄:၅၊ ၆။

မေရှိယ​နှင့်​ပတ်သက်သော ထပ်ဆင့်​အသေးစိတ်​အချက်​တစ်ချက်​ကို ဒံယေလကျမ်း​တွင် ဖော်ပြ​ထား​သည်။ မေရှိယ​ပေါ်ထွန်း​မည့်​နှစ်ကို အတိအကျ​ညွှန်ပြ​ရာ​တွင် ပရောဖက်ပြုချက်​က ဤသို့​ဆို​၏– “ထို့​ကြောင့် ယေရုရှလင်​မြို့ကို တစ်ဖန်​တည်ထောင်​ပြုစု​စေခြင်း​ငှာ အမိန့်တော်​ရှိသည်​နေ့​မှ​စ၍ ခရစ်တော်​သခင်၏​လက်ထက်​တိုင်အောင် ခု​နစ်​သီတင်း​နှင့် ခြောက်​ဆယ့်နှစ်​သီတင်း ကြာ​လိမ့်​မည်​ဟု သိမှတ်​နားလည်​လော့။ အနှောင့်အယှက်​ခံ​ရသော​ကာလ​၌ မြို့​လမ်းကို တစ်ဖန်​တည်ထောင် ပြုစု​ရမည်ဟု စီရင်​ဆုံးဖြတ်ခြင်း​ရှိ၏။”—ဒံယေလ ၉:၂၅။

ပါးရှား​ဘုရင် အာတဇေရဇ်​သည် မိမိ​နန်းစံ ၂၀ နှစ်​မြောက်​တွင် ယေရုရှလင်​မြို့ကို ပြန်လည်​တည်ဆောက်​ရန် “အမိန့်တော်” ထုတ်ပြန်ခဲ့​သည်။ သူ၏ နန်းစံချိန်​သည် ဘီစီ ၄၇၄ တွင်​စတင်​ခဲ့​ရာ နန်းစံ ၂၀ နှစ်​မြောက်​သည် ဘီစီ ၄၅၅ ဖြစ်​ရ​ပေမည်။ (နေဟမိ ၂:၁-၈) ထို့​ကြောင့် ပရောဖက်ပြုချက်​ဆိုင်ရာ ၆၉ (၆၂ အပေါင်း ၇) သီတင်း​သည် ယေရုရှလင်​မြို့ ပြန်လည်​တည်ဆောက်​ရန် အမိန့်ထုတ်​ပြန်​ချိန်​နှင့် မေရှိယ​ပေါ်ထွန်း​ချိန်​၏ ကြားကာလ​ဖြစ်​ပေမည်။ ပကတိ ၆၉ သီတင်းပတ်​သည် ရက်ပေါင်း ၄၈၃ ရက်​နှင့်​ညီမျှ​ပြီး နှစ်နှစ်​ပင်မ​ပြည့်​ချေ။ သို့သော် “တစ်ရက်​ကို တစ်နှစ်​ထား​၍” ဟူသော ပရောဖက်ပြုချက်​ဆိုင်ရာ စည်းမျဉ်း​အရ မေရှိယ​သည် နောင် ၄၈၃ နှစ်​ဖြစ်သော အေဒီ ၂၉ တွင် ပေါ်ထွန်း​ရမည်​ဖြစ်သည်။—တောလည်ရာ ၁၄:၃၄။ *

ဒံယေလ ၉:၂၅ ပါ ထပ်ဆင့်​အသေးစိတ်​အချက်များ​ကို ယေဟောဝါသက်သေ​များ ထုတ်ဝေ​သော ဒံယေလ​၏​ပရောဖက်ပြုချက်​ကို ဂရုပြု​လော့ စာအုပ်၊ စာမျက်နှာ ၁၈၆-၁၉၆ တွင်​ရှု။

အခြား​နှစ်များ​တွင် မေရှိယ​ဟု​ဆို​သူများစွာ ပေါ်လာ​ခဲ့​သော်လည်း အေဒီ ၂၉ တွင် နာဇရက်​မြို့သား ယေရှု ကမ္ဘာ့​ဇာတ်ခုံ​တွင် ပေါ်လာ​ခဲ့​သည်။ (လုကာ ၃:၁၊ ၂) ထို​နှစ်​တွင်​ပင် ယေရှုသည် နှစ်ခြင်း​ဆရာ​ယောဟန်ထံ ကြွလာ​ပြီး ရေ​တွင်​နှစ်ခြင်း​ခံယူ​ခဲ့​သည်။ ထို​အချိန်တွင် ယေရှုသည် မေရှိယ​အဖြစ် သန့်ရှင်းသော​ဝိညာဉ်တော်ဖြင့် ဘိသိက်ပေး​ခံရ​သည်။ နောက်ပိုင်း​တွင် ကြို​ဟောထား​သည့် ဧလိယ​ကဲ့သို့​သော​ရှေ့ပြေး​ဖြစ်သူ ယောဟန်​သည် အန္ဒြေ​နှင့် အခြား​တပည့်​တစ်ဦး​ကို ယေရှု​နှင့်​မိတ်ဆက်​ပေး​ချိန်​၌ “ဤ​လောက​၏​အပြစ်ကို​ဆောင်​သွားသော ဘုရားသခင်​၏​သိုးသငယ်” ဟု​ကိုယ်တော်​အား ခေါ်ဆို​ခဲ့​၏။—ယောဟန် ၁:၂၉; လုကာ ၁:၁၃-၁၇; ၃:၂၁-၂၃။

ဆွေစဉ်မျိုးဆက်​စာရင်း​နှင့် မေရှိယ​၏​အမှတ်အသား

မှုတ်သွင်းခံ ပရောဖက်ပြုချက်​များ​က မေရှိယ​အား ဂျူး​မိသားစု​အချို့​နှင့် ဆက်စပ်​ဖော်ပြ​ခဲ့​သည်။ ထို့​ကြောင့် အရာခပ်သိမ်း​သိမြင်​နိုင်သော ဖန်ဆင်း​ရှင်​သည် မေရှိယ​၏ ဆွေစဉ်မျိုးဆက်​ကို ဆန်းစစ်​နိုင်​ဖို့ ဆွေစဉ်မျိုးဆက်​မှတ်တမ်းများ ရရှိနိုင်​သည့်​အချိန်တွင် မေရှိယ​ပေါ်ထွန်း​စေရန် စီစဉ်​မည်​မှာ အထူး​လျော်​ကန်​ပါ​သည်။

မက်ကလင်းတော့​ခ်​နှင့် စထရောင်း​တို့၏ စွယ်စုံ​ကျမ်း က ဤသို့​ဆို​၏– “ဂျူး​မျိုးနွယ်များ​နှင့် မိသားစု​များ​၏ ဆွေစဉ်မျိုးဆက်​မှတ်တမ်းများ​သည် ယေရုရှလင်​ပျက်စီး​ချိန် [အေဒီ ၇၀] တွင် ပျောက်ဆုံး​သွား​ကြောင်း သေချာ​သလော​က်​ဖြစ်​ပြီး ယင်း​အချိန်​မတိုင်မီ​အထိ ရှိနေသေး​သည်။” မဿဲ​နှင့်​လုကာ​သည် ၎င်းတို့၏ ခရစ်ဝင်​ကျမ်း​များ​ကို အေဒီ ၇၀ မတိုင်မီ​က ရေးသားခဲ့​ကြောင်း ထင်ရှား​သည်။ ထို့​ကြောင့် ယေရှု၏​ဆွေစဉ်မျိုးဆက်​ကို သူတို့​ရေးသား​ဖော်ပြ​ရာ​တွင် ထို​မှတ်တမ်းများ​ကို သူတို့​စစ်ဆေး​ကြည့်​နိုင်​ခဲ့​ကြ​မည်။ (မဿဲ ၁:၁-၁၆; လုကာ ၃:၂၃-၃၈) အထူးသဖြင့် ဤ​အရေးကြီး​လှ​သည့်​ကိစ္စ​မျိုး​တွင် သူတို့နှင့် တစ်ခေတ်​တည်း​သားများ​သည် ယေရှု၏ ဆွေစဉ်မျိုးဆက်​ကို ကိုယ်တိုင်​ဆန်းစစ်​လို​မည်​မှာ သေချာ​ပါ​သည်။

ယေရှု​၌​ပြည့်စုံခြင်း​သည် တိုက်ဆိုင်မှု​လော

သို့​တိုင် မေရှိယ​ဆိုင်ရာ ပရောဖက်ပြုချက်​များ ယေရှု​၌​ပြည့်စုံခြင်း​သည် တိုက်ဆိုင်မှု​မျှ​သာ​လော။ ကျမ်း​ပညာရှင်​တစ်ဦး​ကို လူတွေ့မေးမြန်း​ရာ ဤသို့​ဖြေဆို​ခဲ့​၏– “တိုက်ဆိုင်မှု​မဖြစ်​နိုင်ဘူး။ မဖြစ်​နိုင်​စ​ရာ​အလားအလာ​ရဲ့ ကိန်း​ဂဏန်း​က ကြီးမား​လွန်း​တဲ့​အတွက် တိုက်ဆိုင်မှု​မဖြစ်​နိုင်ဘူး။ လူတစ်ယောက်က သင်္ချာ​နည်းနဲ့​တွက်ချက်​ကြည့်​လိုက်တဲ့အခါ ပရောဖက်ပြုချက်​ရှစ်ခု ပြည့်စုံ​နိုင်​ဖို့ အလားအလာ​က ဘီလီယံ သန်း​တစ်​ရာ​ပုံ​မှာ တစ်​ပုံ​ပဲ ဖြစ်​နိုင်​ခြေ​ရှိတယ်လို့ အဖြေ​ထွက်တယ်။” ယင်းကို ဥပမာ​ပြ​ရန် သူ​ဤသို့​ဆက်​ဖော်ပြ​သည်။ “ငွေ​ဒ င်္ဂါး​ပြား ဘီလီယံ သန်း​တ​ရာ​ကို တက္ကဆက်​ပြည်နယ် [စတုရန်း​မိုင်​ပေါင်း ၂၆၆,၈၀၇] မှာ​ဖြန့်​ချ​လိုက်ရင် အဲဒီ​ပြည်နယ်​တစ်ခုလုံး​ကို ဖုံးလွှမ်း​သွား​နိုင်​ပြီး ထု​နှစ်​ပေ​ရှိ​လိမ့်မယ်။ အဲဒီ​ငွေ​ဒ င်္ဂါး​ပြား​တွေ​ထဲ​က တစ်ပြား​ကို မှတ်သား​ထားပြီး မမြင်နိုင်​အောင် မျက်စိ​ကို​ပိတ်​ထား​တဲ့ လူတစ်ယောက်ကို ရှာ​ခိုင်း​မယ်​ဆိုရင် ရှာတွေ့နိုင်​ခြေ ဘယ်လောက်​ရှိမလဲ။” ထို့နောက် သူက “[မေရှိယ​ဆိုင်ရာ] ပရောဖက်ပြုချက်​တွေ​ထဲ​က ရှစ်ခု​လောက်​ကိုပဲ တစ်ယောက်ယောက်​က ပြည့်စုံ​စေနိုင်​ဖို့​ဆိုတာ ဒီ​အချိုးအစား​အတိုင်း​ပါ​ပဲ” ဟု​ပြောဆို​ခဲ့​သည်။

သို့​တိုင် ယေရှုသည် ဓမ္မ​အမှုဆောင်ချိန် သုံးနှစ်ခွဲ​အတွင်း ရှစ်ခု​ထက်မက​သော သမ္မာကျမ်းစာ ပရောဖက်ပြုချက်​များစွာကို ပြည့်စုံ​စေ​ခဲ့​သည်။ အတိုင်း​ထက်​အလွန်​များသော ဤ​အထောက်အထား​များ​ကို ထောက်ရှု၍ ထို​ကျမ်း​ပညာရှင်​က “ဒါတွေကို ပြည့်စုံ​စေနိုင်​တာ သမိုင်း​တစ်လျှောက်​မှာ ယေရှု​တစ်ယောက်ပဲ ရှိတယ်” ဟု ကောက်ချက်​ချ​ခဲ့​သည်။

မေရှိယ “ကြွလာခြင်း”

ရှင်း​နေသည်​မှာ နာဇရက်​မြို့သား ယေရှုသည် အေဒီ ၂၉ တွင် မေရှိယ​အဖြစ် ရောက်ရှိ​လာ​ခဲ့​ခြင်း​ဖြစ်သည်။ ထို​အချိန်​က ကိုယ်တော်​သည် နှိမ့်ချသော၊ ဝေဒနာ​ခံစား​ရသော ရွေးနုတ်ရှင်​အဖြစ် ကြွလာ​ခဲ့​သည်။ ဂျူး​အများစု​နှင့် ကိုယ်တော်​၏ နောက်လိုက်​များ​ပင် မျှော်လင့်​ခဲ့​ပုံ​ရှိသည့်အတိုင်း ရောမတို့​၏ ဖိနှိပ်မှု​ထမ်းပိုး​ကို ဖယ်ရှား​ပေး​ရန် အောင်နိုင်​သည့်​ရှင်ဘုရင်​တစ်ပါး​အဖြစ် ကိုယ်တော် ကြွလာ​ခဲ့​သည်မဟုတ်​ပါ။ (ဟေရှာယ အခန်းကြီး ၅၃; ဇာခရိ ၉:၉; တမန်​တော် ၁:၆-၈) သို့သော် အနာဂတ်​တွင် ကိုယ်တော်​သည် တန်ခိုး​နှင့် ကြီးစွာ​သော​အခွင့်အာဏာဖြင့် ကြွလာ​မည်​ဟု ကြို​ဟောထား​သည်။—ဒံယေလ ၂:၄၄၊ ၄၅; ၇:၁၃၊ ၁၄။

သမ္မာကျမ်းစာ ပရောဖက်ပြုချက်​များ​ကို သေချာ​စွာ​လေ့လာ​ကြည့်​ခြင်း​က ပထမ​ရာစု​တွင် မေရှိယ​ကြွလာ​ခဲ့​ပြီး ကိုယ်တော် ပြန်​ကြွလာ​ရဦး​မည်​ကို ကမ္ဘာ​တစ်ဝန်း​မှ ဆင်ခြင်​ဉာဏ်​ရှိသူတို့​အား ယုံကြည်​စိတ်ချ​စေ​သည်။ ကြို​ဟောထား​သည့် ထို​ပြန်​ကြွလာခြင်း၊ ကိုယ်တော်​စတင် “ရောက်ရှိခြင်း” သည် ၁၉၁၄ ခုနှစ်​တွင်​ဖြစ်​ကြောင်း အထောက်အထား​များ​က သက်သေထူ​၏။ * (မဿဲ ၂၄:၃-၁၄) ထို​နှစ်​တွင် ယေရှုသည် ဘုရားသခင့်​နိုင်ငံတော်​ဘုရင်​အဖြစ် ကောင်းကင်​တွင် မျက်မြင်မရ​နည်းဖြင့် နန်းထိုင်​တော်​မူ​ခဲ့​သည်။ မကြာမီ ကိုယ်တော်​သည် ဧဒင်​တွင်​ဖြစ်​ခဲ့​သော ပုန်ကန်မှု​၏​ဆိုးကျိုး​များ​ကို ကမ္ဘာ​ပေါ်​မှ ပယ်ရှင်း​တော်​မူ​မည်။ ကိုယ်တော်​အား “ဤ​လောက​၏ အပြစ်ကို​ဆောင်​သွား” သော ကတိထားရာ​မျိုးနွယ်တော် မေရှိယ​အဖြစ် ယုံကြည်​ကြောင်း​တင်ပြ​သူအား​လုံး​သည် ကိုယ်တော်​၏ အနှစ်​တစ်ထောင်​အုပ်ချုပ်မှု​အောက် ကောင်းချီး​ခံစား​ကြ​ရ​လိမ့်​မည်။—ယောဟန် ၁:၂၉; ဗျာဒိတ် ၂၁:၃၊ ၄။

[အောက်ခြေ​မှတ်ချက်များ]

 [စာမျက်နှာ ၆၊ ၇ ပါ ပုံကြမ်း/ ရုပ်ပုံများ]

ဘီစီ ၄၅၅၊ “ယေရုရှလင်​မြို့ကို တစ်ဖန်​တည်ထောင် . . . စေခြင်း​ငှာ အမိန့်တော်​ရှိသည်”

အေဒီ ၂၉ ၊မေရှိယ​ရောက်ရှိ​လာ

နှစ်ပေါင်း ၄၈၃ (ပရောဖက်ပြုချက်​ဆိုင်ရာ ၆၉ သီတင်း)—ဒံယေလ ၉:၂၅

၁၉၁၄ ခုနှစ်၊ ကောင်းကင်​တွင်  မေရှိယ​နန်းထိုင်

မကြာမီ မေရှိယ​သည် ဆိုးယုတ်မှု​များ​ကို အဆုံးတိုင်  စေပြီး ကမ္ဘာ​ကို ပရဒိသု​ဖြစ်စေ​တော်​မူ​မည်