တိုး၍ထွန်းလင်းနေသောအလင်းတွင် လျှောက်လှမ်းခြင်း

ဖွင့်ပါ

တိုး၍ထွန်းလင်းနေသောအလင်းတွင် လျှောက်လှမ်းခြင်း

“ဖြောင့်မတ်သောသူတို့၏လမ်းသည် တက်သောအရုဏ်ကဲ့သို့ဖြစ်၍ နေထွက်သည်တိုင်အောင် တိုးပွားထွန်းလင်းတတ်၏။”—သု. ၄:၁၈။

၁၊ ၂။ ဘုရားသခင့်လူမျိုးတော်သည် ယေဟောဝါထံမှ တိုး၍ထွန်းလင်းလာသော ဝိညာဉ်ရေးအလင်းကြောင့် အဘယ်အရာကို တွေ့ ကြုံခံစားခဲ့ရသနည်း။

ညအမှောင်ထုအပေါ် ထွန်းလင်းလာသောနေ၏ အကျိုးသက်ရောက်မှုအကြောင်းကို အလင်း၏ပင်ရင်းဖြစ်တော်မူသော ယေဟောဝါဘုရားသခင်ထက် မည်သူသာ၍ဖော်ပြနိုင်ပါမည်နည်း။ (ဆာလံ ၃၆:၉) “နံနက်အလင်းသည် မြေကြီးစွန်းကိုကိုင်လျက် . . . မြေကြီးသည် တံဆိပ်ခတ်သကဲ့သို့ ပုံပေါ်၍ အဝတ်တန်ဆာဆင်သကဲ့သို့ရှိ၏” ဟု ဘုရားသခင်မိန့်တော်မူ၏။ (ယောဘ ၃၈:၁၂-၁၄) နေရောင် တိုး၍ထွန်းလင်းလာသောအခါ ကမ္ဘာ့သွင်ပြင်လက္ခဏာများသည် ရွှံ့စေးပေါ် တံဆိပ်တုံးထုလိုက်သကဲ့သို့ ရုပ်လုံးပေါ်လာကာ ပို၍သဲသဲကွဲကွဲ ထင်ရှားလာသည်။

^၂ယေဟောဝါသည် ဝိညာဉ်ရေးအလင်း၏ပင်ရင်းလည်း ဖြစ်တော်မူ၏။ (ဆာလံ ၄၃:၃) ဤလောကသည် အမှောင်ထုထဲရှိနေသော်လည်း စစ်မှန်သောဘုရားသခင်သည် မိမိလူမျိုးတော်အပေါ် အလင်းဆက်လက် ထွန်းလင်းပေးတော်မူ၏။ အဘယ်အကျိုးဖြစ်ထွန်းသနည်း။ သမ္မာကျမ်းစာက ဤသို့ဖြေဆိုသည်– “ဖြောင့်မတ်သောသူတို့၏လမ်းသည် တက်သောအရုဏ်ကဲ့သို့ဖြစ်၍ နေထွက်သည်တိုင်အောင် တိုးပွားထွန်းလင်းတတ်၏။” (သု. ၄:၁၈) ယေဟောဝါထံမှ တိုး၍ထွန်းလင်းလာသောအလင်းသည် ကိုယ်တော့်လူမျိုးအပေါ် ဆက်၍အလင်းဖြာပေးကာ အဖွဲ့အစည်းပိုင်း၊ အယူဝါဒပိုင်းနှင့် ကိုယ်ကျင့်တရားပိုင်းတို့တွင် တိုးတက်အောင် သန့်စင်ပေးသည်။

ဝိညာဉ်ရေးအလင်းက အဖွဲ့အစည်းဆိုင်ရာ တိုးတက်မှုများဖြစ်ပေါ်စေ

၃။ ဟေရှာယ ၆၀:၁၇ တွင် မည်သို့ကတိပြုထားသနည်း။

^၃ယေဟောဝါသည် ပရောဖက်ဟေရှာယမှတစ်ဆင့် ဤသို့ကြိုဟောတော်မူခဲ့၏– “ကြေးဝါအရာ၌ ရွှေကိုလည်းကောင်း၊ သံအရာ၌ ငွေကိုလည်းကောင်း၊ သစ်သားအရာ၌ ကြေးဝါကိုလည်းကောင်း၊ ကျောက်အရာ၌ သံကိုလည်းကောင်း ငါဆောင်ခဲ့မည်။” (ဟေရှာယ ၆၀:၁၇) အရည်အသွေးညံ့သော ပစ္စည်းတစ်ခုကို ပစ္စည်းကောင်းတစ်ခုဖြင့် အစားထိုးလိုက်သည့်အခါ ပိုမိုကောင်းမွန်လာသကဲ့သို့ ယေဟောဝါသက်သေများသည် “ဤစနစ်၏အဆုံး” သို့မဟုတ် ‘နောက်ဆုံးကာလ’ အတွင်း အဖွဲ့အစည်းဆိုင်ရာအစီအစဉ် တိုးတက်မှုများကို တွေ့ ကြုံနေကြရသည်။—မဿဲ ၂၄:၃၊ ကဘ; ၂ တိမောသေ ၃:၁။

၄။ ၁၉၁၉ ခုနှစ်တွင် အဘယ်အစီအစဉ် စတင်ခဲ့ပြီး ယင်းက အဘယ်အကျိုးဖြစ်ထွန်းစေခဲ့သနည်း။

^၄နောက်ဆုံးကာလ၏ အစောပိုင်းတွင် ကျမ်းစာကျောင်းသားများဟု ထိုစဉ်ကသိထားသည့် ယေဟောဝါသက်သေများ၏ အသင်းတော်များသည် အကြီးအကဲများနှင့် သင်းထောက်များကို ဒီမိုကရေစီစနစ်ဖြင့် ရွေးကောက်ခဲ့ကြ၏။ သို့သော် အကြီးအကဲတချို့တွင် ဧဝံဂေလိစိတ်ဓာတ်အစစ်အမှန် မရှိခဲ့ကြချေ။ တချို့သည် ဟောပြောခြင်းလုပ်ငန်းတွင် ကိုယ်တိုင်ပါဝင်လိုစိတ်မရှိသည့်အပြင် ပါဝင်နေသော တခြားသူများကိုလည်း စိတ်ဓာတ်ကျစေခဲ့သည်။ ထို့ကြောင့် ၁၉၁၉ ခုနှစ်၌ အသင်းတော်တိုင်းတွင် လုပ်ငန်းတော်ဒါရိုက်တာတစ်ဦးကို ရွေးချယ်ခန့်အပ်ခဲ့၏။ လုပ်ငန်းတော်ဒါရိုက်တာကို အသင်းတော်က ရွေးကောက်သည်မဟုတ်ဘဲ ဘုရားသခင့်လူမျိုးတော်၏ ဌာနခွဲရုံးက သီအိုကရက်တစ်နည်းဖြင့် ခန့်အပ်ခြင်းဖြစ်သည်။ လုပ်ငန်းတော်ဒါရိုက်တာ၏တာဝန်များမှာ ဟောပြောခြင်းလုပ်ငန်းကို စနစ်တကျဖွဲ့စည်းပေးခြင်း၊ နယ်မြေများ သတ်မှတ်ခွဲဝေပေးခြင်းနှင့် လယ်ကွင်းဓမ္မအမှုတွင်ပါဝင်ရန် အားပေးခြင်းတို့ဖြစ်သည်။ နောက်ပိုင်းနှစ်များတစ်လျှောက်တွင် ဘုရားသခင့်နိုင်ငံတော် ဟောပြောခြင်းလုပ်ငန်း၌ပါဝင်ရန် အကြီးအကျယ်အားပေးခံရသည်။

၅။ ၁၉၂၀ ပြည့်လွန်နှစ်များတွင် အဘယ်ပြုပြင်ပြောင်းလဲမှု ဖြစ်ပေါ်လာသနည်း။

^၅၁၉၂၂ ခုနှစ်၊ အမေရိကန်ပြည်ထောင်စု၊ အိုဟိုင်အိုပြည်နယ်၊ စီဒါပွိုင့်မြို့တွင်ကျင်းပသော ကျမ်းစာကျောင်းသားများ၏ စည်းဝေးကြီး၌ “ဘုရင်နှင့် သူ၏နိုင်ငံတော်ကို ကြေညာကြ၊ ကြေညာကြ၊ ကြေညာကြ” ဟူသော တိုက်တွန်းချက်ကြောင့် အသင်းတော်ရှိသူအားလုံး ထပ်ဆင့်ခွန်အားရရှိခဲ့ကြသည်။ ၁၉၂၇ ခုနှစ်ရောက်သော် တစ်အိမ်မှတစ်အိမ် ဟောပြောခြင်းလုပ်ငန်းတွင်ပါဝင်ရန် တနင်္ဂနွေနေ့ကို အသင့်တော်ဆုံးနေ့အဖြစ် သတ်မှတ်ခြင်းဖြင့် လယ်ကွင်းလုပ်ငန်းကို စနစ်တကျဖွဲ့စည်းခဲ့ကြသည်။ ထိုနေ့ကို အဘယ်ကြောင့်သတ်မှတ်ရသနည်း။ အကြောင်းမှာ တနင်္ဂနွေနေ့သည် လူအများစု၏ အလုပ်နားရက်ဖြစ်သောကြောင့်ဖြစ်၏။ ယနေ့ ယေဟောဝါသက်သေများသည် စနေ၊ တနင်္ဂနွေနေ့များနှင့် ညနေပိုင်းများကဲ့သို့သော အိမ်၌လူအများစု ရှိနိုင်မည့်အချိန်များတွင် လူတို့ထံ ကြိုးစားလည်ပတ်ခြင်းဖြင့် ထပ်တူသဘောထားကို ဖော်ပြကြသည်။

၆။ ၁၉၃၁ ခုနှစ်တွင် မည်သို့အဓိဋ္ဌာန်ပြုခဲ့ကြပြီး ယင်းက ဘုရားသခင့်နိုင်ငံတော် ကြွေးကြော်ခြင်းလုပ်ငန်းအပေါ် မည်သို့အကျိုးသက်ရောက်ခဲ့သနည်း။

^၆၁၉၃၁ ခုနှစ် ဇူလိုင်လ ၂၆ ရက်၊ တနင်္ဂနွေနေ့ မွန်းလွဲပိုင်းတွင် အမေရိကန်ပြည်ထောင်စု၊ အိုဟိုင်အိုပြည်နယ်၊ ကိုလံဘတ်စ်မြို့တွင်ကျင်းပသော စည်းဝေးကြီးတစ်ခု၌ အဓိဋ္ဌာန်တစ်ခုကို ဦးဆုံးအကြိမ်ပြု၍ ၎င်းနောက် ကမ္ဘာတစ်ဝန်းတွင် ပြုခဲ့ကြသောအခါ ဘုရားသခင့်နိုင်ငံတော် ကြွေးကြော်ခြင်းလုပ်ငန်းအတွက် အကြီးအကျယ်တွန်းအားဖြစ်ခဲ့၏။ အဆိုပါအဓိဋ္ဌာန် တစ်စိတ်တစ်ပိုင်းမှာ ဤသို့ဖြစ်သည်– “ကျွန်ုပ်တို့သည် ယေဟောဝါဘုရားသခင်၏ ကျေးကျွန်များဖြစ်ပြီး ကိုယ်တော်၏နာမတော်ဖြင့် လုပ်ငန်းတစ်ခုကို လုပ်ဆောင်ရန်၊ ပညတ်တော်ကိုနာခံကာ ယေရှုခရစ်ဟောပြောခဲ့သော သတင်းတရားကိုကြေညာရန်၊ ယေဟောဝါသည် စစ်မှန်ပြီး အတိုင်းအဆမဲ့တန်ခိုးရှင် ဘုရားသခင်ဖြစ်ကြောင်း လူတို့ကို အသိပေးကြရန်ဖြစ်သည်။ ထို့ကြောင့် ကျွန်ုပ်တို့သည် သခင်အရှင် ဘုရားသခင်ကိုယ်တော်တိုင် ဖော်ပြထားတော်မူသည့် နာမည်ကို ဝမ်းမြောက်ဝမ်းသာခံယူကာ ယေဟောဝါသက်သေများဟူသော အမည်ဖြင့် အခေါ်ခံလို၍ အသိခံလိုကြသည်။” (ဟေရှာယ ၄၃:၁၀) ထိုအမည်သစ်က ၎င်းအမည်ခံယူထားကြသူအားလုံး၏ အဓိကလုပ်ငန်းကို ရှင်းရှင်းလင်းလင်း ဖော်ပြပေးသည်တကား! ယေဟောဝါတွင် မိမိကျေးကျွန်အားလုံးကို ပေးအပ်စရာလုပ်ငန်း ရှိနေတော်မူ၏။ ယင်းကိုလက်ခံသူ အရေအတွက်မှာ အလွန်အားရစရာပင်!

၇။ ၁၉၃၂ ခုနှစ်တွင် အဘယ်ပြောင်းလဲမှုကို စတင်ပြုလုပ်ခဲ့သနည်း။ အဘယ်ကြောင့်နည်း။

^၇အကြီးအကဲများစွာသည် ဟောပြောခြင်းလုပ်ငန်းတွင် နှိမ့်ချစွာပါဝင်ခဲ့ကြသည်။ သို့သော် အချို့ဒေသရှိ မဲဖြင့်ရွေးကောက်ထားသော အကြီးအကဲများသည် အသင်းသူအသင်းသားတိုင်း လူအများရှေ့ အမှုတော်ဆောင်ခြင်းတွင် ပါဝင်သင့်သည်ဟူသော ခံယူချက်ကို ကန့်ကွက်ခဲ့ကြ၏။ သို့သော် ပြုပြင်ပြောင်းလဲမှုများ နောက်ထပ်ရှိဦးမည်ဖြစ်ပေသည်။ ၁၉၃၂ ခုနှစ်တွင် အသင်းတော်များ၌ အကြီးအကဲများနှင့် သင်းထောက်များကို မဲဖြင့်မရွေးကောက်ရတော့ကြောင်း ကင်းမျှော်စင်မှတစ်ဆင့် ညွှန်ကြားခဲ့၏။ ယင်းအစား လုပ်ငန်းတော်ကော်မတီကို ဖွဲ့စည်းရန် လူအများရှေ့ ဟောပြောခြင်းလုပ်ငန်းတွင် ပါဝင်ကြသော ဝိညာဉ်ရေးစိတ်ဓာတ်ရှိ အမျိုးသားများကို ရွေးကောက်ရမည်ဖြစ်သည်။ ခရစ်ယာန်ဓမ္မအမှုတွင် တက်တက်ကြွကြွ ပါဝင်သူတို့ကို ကြီးကြပ်ရေးတာဝန်အပ်နှင်းခဲ့ရာ လုပ်ငန်းတော်မှာ ဆက်လက်တိုးတက်လာလေသည်။

တိုး၍ထွန်းလင်းခြင်းက နောက်ထပ်တိုးတက်မှုများဖြစ်ပေါ်စေ

၈။ ၁၉၃၈ ခုနှစ်တွင် အဘယ်ပြုပြင်ပြောင်းလဲမှု ဖြစ်ပေါ်လာခဲ့သနည်း။

^၈အလင်းသည် “တိုးပွားထွန်းလင်း” နေ၏။ ၁၉၃၈ ခုနှစ်တွင် မဲဖြင့်ရွေးကောက်ခြင်းကို လုံးဝမပြုတော့ချေ။ ‘သစ္စာနှင့် သတိပညာရှိကျွန်’ ၏ကြီးကြပ်ညွှန်ကြားမှုအတိုင်း သီအိုကရက်တစ်နည်းဖြင့် အသင်းတော်အမှုထမ်းအားလုံးကို ခန့်အပ်ရတော့မည်ဖြစ်သည်။ (မဿဲ ၂၄:၄၅-၄၇) အဆိုပါပြောင်းလဲမှုကို ယေဟောဝါသက်သေများ၏ အသင်းတော်အားလုံးနီးပါး တလိုတလားလက်ခံခဲ့ကြရာ သက်သေခံခြင်းလုပ်ငန်းမှာ သီးပွင့်ဖြစ်ထွန်းလျက်ရှိသည်။

၉။ ၁၉၇၂ ခုနှစ်တွင် အဘယ်အစီအစဉ်ကို စတင်ပြုလုပ်ခဲ့ကြပြီး ယင်းသည် အဘယ်ကြောင့် တိုးတက်မှုတစ်ခုဖြစ်သနည်း။

^၉၁၉၇၂ ခုနှစ် အောက်တိုဘာလ ၁ ရက်နေ့မှစ၍ အသင်းတော်ကြီးကြပ်မှုနှင့်စပ်လျဉ်းသည့် နောက်ထပ်ပြုပြင်ပြောင်းလဲမှုတစ်ခု ရှိလာသည်။ ကမ္ဘာတစ်ဝန်းရှိ ယေဟောဝါသက်သေတို့၏ အသင်းတော်များတွင် အသင်းတော်အမှုထမ်း သို့မဟုတ် ကြီးကြပ်မှူးတစ်ဦးတည်းက ကွပ်ကဲမည့်အစား အကြီးအကဲအဖွဲ့က ကြီးကြပ်ကွပ်ကဲသည့်အစီအစဉ် စတင်ခဲ့၏။ ဤအစီအစဉ်အသစ်သည် ရင့်ကျက်သောအမျိုးသားများ အသင်းတော်ကို ဦးဆောင်ရာတွင် အရည်အချင်းပြည့်မီဖို့ ကြိုးစားကြရန် အားပေးမှုများစွာ ဖြစ်စေခဲ့သည်။ (၁ တိမောသေ ၃:၁-၇) ရလဒ်အနေနှင့် ညီအစ်ကိုများစွာသည် အသင်းတော်တာဝန်များ ထမ်းဆောင်ရာတွင် အတွေ့အကြုံရရှိလာလေသည်။ ကျမ်းစာအမှန်တရားကို လက်ခံခဲ့ကြသည့် လူသစ်များစွာအား ထိန်းကျောင်းရာတွင် သူတို့သည် အလွန်အဖိုးထိုက်သူများ ဖြစ်ခဲ့လေပြီ!

၁၀။ ၁၉၇၆ ခုနှစ်တွင် အဘယ်အစီအစဉ်ကို အကောင်အထည်ဖော်ခဲ့သနည်း။

^၁၀အုပ်ချုပ်ရေးအဖွဲ့ဝင်များကို ကော်မတီခြောက်ခုဖြင့် ဖွဲ့စည်းထားပြီး၊ ၁၉၇၆ ခုနှစ် ဇန်နဝါရီလ ၁ ရက်နေ့မှစ၍ အဖွဲ့အစည်းနှင့် ကမ္ဘာတစ်ဝန်းရှိ အသင်းတော်များ၏ လှုပ်ရှားဆောင်ရွက်မှုအားလုံးကို အဆိုပါကော်မတီများက ကြီးကြပ်ခဲ့သည်။ ဘုရားသခင့်နိုင်ငံတော်လုပ်ငန်း၏ ကဏ္ဍအသီးသီးကို “အကြံပေးနိုင်သောသူများစွာ” က ညွှန်ကြားပေးခဲ့သည့်အတွက် အလွန်အကျိုးဖြစ်ထွန်းခဲ့ပြီတကား!—သု. ၁၅:၂၂; ၂၄:၆။

၁၁။ ၁၉၉၂ ခုနှစ်တွင် အဘယ်ပြုပြင်ပြောင်းလဲမှုကို စတင်ပြုလုပ်ခဲ့သနည်း။ အဘယ်ကြောင့်နည်း။

^၁၁၁၉၉၂ ခုနှစ်တွင် နောက်ထပ်ပြုပြင်ပြောင်းလဲမှုတစ်ခု ရှိသေးသည်။ ယင်းသည် ဣသရေလလူမျိုးနှင့် အခြားသူများ ဗာဗုလုန်တွင်နယ်နှင်ခံဘဝမှ ပြန်လာပြီးနောက် အဖြစ်အပျက်များနှင့်ဆင်တူ၏။ ထိုစဉ်က ဝတ်ပြုရာအိမ်တော်တွင် အမှုထမ်းရန် လေဝိသား အလုံအလောက်မရှိခဲ့ချေ။ ထို့ကြောင့် ဣသရေလလူမျိုးမဟုတ်သည့် နက်သနင်များသည် လေဝိသားများကို အကူအညီများစွာ ပေးခွင့်ရခဲ့ကြသည်။ ထိုနည်းတူ တိုးများလာသော မြေကြီးဆိုင်ရာအကျိုးစီးပွားကို သစ္စာနှင့် သတိပညာရှိကျွန်အတန်းအစား ကြည့်ရှုစောင့်ရှောက်ရာတွင် အကူအညီပေးရန် ၁၉၉၂ ခုနှစ်တွင် “အခြားသိုး” မှတချို့သည် လုပ်ငန်းတော်တာဝန်များ ထပ်မံရရှိခဲ့ကြသည်။ သူတို့သည် အုပ်ချုပ်ရေးအဖွဲ့ကော်မတီများကို ကူညီပေးသူများအဖြစ် ခန့်အပ်ခံခဲ့ရ၏။—ယောဟန် ၁၀:၁၆။

၁၂။ ယေဟောဝါသည် ကျွန်ုပ်တို့၏ကြီးကြပ်မှူးများကို ငြိမ်သက်သောသဘောနှင့် မည်သို့ပြည့်စုံစေခဲ့ပြီနည်း။

^၁၂ယင်းတို့မှ အဘယ်အကျိုးဖြစ်ထွန်းခဲ့ပြီနည်း။ “သင်၏အရာရှိတို့ [“ကြီးကြပ်မှူးများ၊” ကဘ] ကို ငြိမ်သက်သောသဘော၊ အခွန်ခံတို့ကို ဖြောင့်မတ်သောသဘောနှင့် ပြည့်စုံစေမည်” ဟုယေဟောဝါမိန့်တော်မူ၏။ (ဟေရှာယ ၆၀:၁၇) ယနေ့ ယေဟောဝါ၏ကျေးကျွန်များအလယ်တွင် ‘ငြိမ်သက်မှု’ ရှိပြီး ‘ဖြောင့်မတ်ခြင်း’ ကို ချစ်မြတ်နိုးစိတ်သည် ဘုရားသခင်၏အမှုတော်ကို ထမ်းဆောင်ရန် သူတို့အား လှုံ့ဆော်ပေးသည့် စွမ်းအားဖြစ်လာလေသည်။ သူတို့သည် ဘုရားသခင့်နိုင်ငံတော်ဟောပြောခြင်းနှင့် တပည့်ဖြစ်စေခြင်းလုပ်ငန်းကို ထမ်းဆောင်ရန် စနစ်တကျရှိကြ၏။—မဿဲ ၂၄:၁၄; ၂၈:၁၉၊ ၂၀။

ယေဟောဝါသည် အယူဝါဒပိုင်းကို အလင်းဖြာပေး

၁၃။ ၁၉၂၀ ပြည့်လွန်နှစ်များတွင် ယေဟောဝါသည် မိမိလူမျိုးကို အယူဝါဒပိုင်းအရ မည်သို့အလင်းဖြာပေးတော်မူခဲ့သနည်း။

^၁၃ယေဟောဝါသည် မိမိလူမျိုးတော်ကို အယူဝါဒပိုင်းအရလည်း အဆင့်ဆင့်အလင်းဖြာပေးနေတော်မူ၏။ နမူနာတစ်ခုမှာ ဗျာ. ၁၂:၁-၉ ဖြစ်သည်။ အဆိုပါကျမ်းတွင် ကိုယ်ဝန်ရှိ၍ သားဖွားသော “မိန်းမ” တစ်ဦး၊ “နဂါး” တစ်ကောင်နှင့် “သားယောက်ျား” တစ်ဦးဟူသော ပုံဆောင်ဇာတ်ကောင်သုံးဦးကို ဖော်ပြထား၏။ ၎င်းတို့သည် မည်သူတို့ကို ကိုယ်စားပြုကြောင်း သင်သိပါသလော။ ၁၉၂၅ ခုနှစ် မတ်လ ၁ ရက်နေ့ထုတ် ကင်းမျှော်စင် [လိပ်] ပါ “နိုင်ငံတော်မွေးဖွားခြင်း” ဟူသောဆောင်းပါးတစ်ပုဒ်တွင် ၎င်းတို့ကို ခွဲခြားဖော်ပြထားသည်။ ထိုဆောင်းပါးက ဘုရားသခင့်လူမျိုးတော်အား ဘုရားသခင့်နိုင်ငံတော် မွေးဖွားခြင်းနှင့်ပတ်သက်သော ပရောဖက်ပြုချက်များကို ကောင်းစွာ သိနားလည်စေကာ ယေဟောဝါ၏အဖွဲ့အစည်းနှင့် စာတန့်အဖွဲ့အစည်းဟူ၍ သိသာထင်ရှားသော အဖွဲ့အစည်းနှစ်ခုရှိကြောင်း ထိုးထွင်းသိမြင်စေခဲ့၏။ ထို့နောက် ၁၉၂၇/၂၈ ခုနှစ်တွင် ခရစ္စမတ်ပွဲနှင့် မွေးနေ့ပွဲတို့သည် ကျမ်းစာနှင့်မညီကြောင်း ဘုရားသခင့်လူမျိုး သိမြင်လာကာ အဆိုပါပွဲများကို မကျင်းပကြတော့ချေ။

၁၄။ ၁၉၃၀ ပြည့်လွန်နှစ်များတွင် အဘယ်အယူဝါဒပိုင်းဆိုင်ရာ အမှန်တရားများကို ရှင်းလင်းဖော်ပြခဲ့သနည်း။

^၁၄၁၉၃၀ ပြည့်လွန်နှစ်များတွင် အယူဝါဒပိုင်းဆိုင်ရာ အမှန်တရားသုံးခုအပေါ် ထပ်ဆင့်အလင်းဖြာခဲ့၏။ ဗျာ. ၇:၉-၁၇ တွင် ဖော်ပြထားသည့် အုပ်စုကြီး သို့မဟုတ် ‘လူအုပ်ကြီး’ သည် ဘုရင်များ၊ ယဇ်ပုရောဟိတ်များအဖြစ် ခရစ်တော်နှင့်အတူစိုးစံကြမည့် ၁၄၄,၀၀၀ နှင့်မတူကြောင်း ကျမ်းစာကျောင်းသားများ သိရှိလာကြသည်မှာ နှစ်နှင့်ချီရှိလေပြီ။ (ဗျာ. ၅:၉၊ ၁၀; ၁၄:၁-၅) သို့ရာတွင် အဆိုပါအုပ်စုကြီးသည် မည်သူမည်ဝါဖြစ်ကြောင်း မသဲမကွဲဖြစ်နေဆဲပင်။ တိုး၍ထွန်းလင်းလာသော မိုးသောက်အလင်းသည် မထင်မရှားဖြစ်နေသည့် အရာဝတ္ထုများကို သဲသဲကွဲကွဲဖြစ်လာစေသကဲ့သို့ ၁၉၃၅ ခုနှစ်တွင် အုပ်စုကြီးသည် မြေကြီးပေါ် ထာဝစဉ်အသက်ရှင်ရန် မျှော်လင့်ချက်ဖြင့် ‘ကြီးစွာသောဆင်းရဲခြင်း’ ကို ကပ်ကျော်ကြမည့်သူများဖြစ်ကြောင်း ခွဲခြားသိမြင်လာစေခဲ့သည်။ ထိုနှစ်နှောင်းပိုင်းတွင် နိုင်ငံအတော်များများရှိ ယေဟောဝါသက်သေများ၏ ကျောင်းနေအရွယ် ကလေးသူငယ်များနှင့်သက်ဆိုင်သည့် ရှင်းလင်းချက်တစ်ရပ်ကို ကြားသိခဲ့ရသည်။ ကမ္ဘာတစ်ဝန်းတွင် မျိုးချစ်စိတ်ပြင်းထန်နေစဉ် အလံအလေးပြုခြင်းသည် အခမ်းအနားတစ်ခုမျှသာ မဟုတ်ကြောင်း သက်သေခံများ အသိအမှတ်ပြုလာကြသည်။ ခရစ်တော်သည် လက်ဝါးကပ်တိုင်ပေါ်တွင်မဟုတ်ဘဲ သစ်တိုင်ပေါ်တွင် သေဆုံးခဲ့သည်ဟူသော အယူဝါဒဆိုင်ရာ အမှန်တရားနောက်တစ်ခုကို နောက်တစ်နှစ်တွင် ရှင်းပြခဲ့၏။—တမန်တော် ၁၀:၃၉။

၁၅။ သွေး၏မြင့်မြတ်မှုကို မည်သည့်အချိန်တွင် မည်သို့အလေးပေးဖော်ပြခဲ့သနည်း။

^၁၅ဒုတိယကမ္ဘာစစ်ဖြစ်ပြီးသည်နှင့် ဒဏ်ရာရခဲ့သောစစ်သားများကို သွေးသွင်း၍ ကုသပေးခြင်းသည် စံကုထုံးဖြစ်လာသောအခါ သွေး၏မြင့်မြတ်မှုအကြောင်း အလင်းတိုး၍ထွန်းလင်းလာသည်။ ၁၉၄၅ ခုနှစ် ဇူလိုင်လ ၁ ရက်နေ့ထုတ် ကင်းမျှော်စင်က “ဖြောင့်မတ်သောကမ္ဘာသစ်တွင် ထာဝစဉ်အသက်ရှင်လိုကြသည့် ယေဟောဝါအား ဝတ်ပြုသူမှန်သမျှ သွေး၏မြင့်မြတ်မှုကို လေးစားရမည်၊ ဤအရေးကြီးကိစ္စနှင့်ပတ်သက်၍ ဘုရားသခင်၏ဖြောင့်မတ်သော စည်းမျဉ်းများကို လိုက်နာကြရမည်” ဟုတိုက်တွန်းခဲ့သည်။

၁၆။ ကမ္ဘာသစ်ဘာသာပြန် သမ္မာကျမ်းစာကို အဘယ်အချိန်တွင် ထုတ်ဝေခဲ့ပြီး ယင်း၏ထူးခြားချက်နှစ်ခုကား အဘယ်နည်း။

^၁၆၁၉၄၆ ခုနှစ်တွင် ခရစ်ယာန်ဘောင်၏ ထုံးတမ်းများအပေါ် အခြေပြုသည့် အယူဝါဒများနှင့်ကင်းစင်ပြီး နောက်ဆုံးပေါ်အသိပညာကို အသုံးပြုသည့် ဘာသာပြန်ကျမ်းအသစ်တစ်ခု လိုအပ်ကြောင်း သိမြင်လာခဲ့ကြသည်။ သို့နှင့် ထိုဘာသာပြန်ကျမ်းကို ၁၉၄၇ ခုနှစ် ဒီဇင်ဘာလတွင် စတင်ဘာသာပြန်ဆိုခဲ့၏။ ၁၉၅၀ ပြည့်နှစ်တွင် ကမ္ဘာသစ်ဘာသာပြန် ခရစ်ယာန်ဂရိကျမ်းစာကို အင်္ဂလိပ်ဘာသာဖြင့် ထုတ်ဝေလိုက်၏။ အင်္ဂလိပ်ဘာသာဖြင့် ပြန်ဆိုထားသော ဟေဗြဲကျမ်းစာကို ၁၉၅၃ ခုနှစ်မှစ၍ အတွဲငါးတွဲဖြင့် တစ်တွဲပြီးတစ်တွဲ ထုတ်ဝေခဲ့သည်။ ဘာသာပြန်စီမံကိန်း စတင်ပြီးနောက် ၁၂ နှစ်အကြာ ၁၉၆၀ ပြည့်နှစ်တွင် နောက်ဆုံးအတွဲကို ထုတ်ဝေနိုင်ခဲ့၏။ ကမ္ဘာသစ်ဘာသာပြန် သမ္မာကျမ်းစာ အပြည့်အစုံကို အတွဲတစ်တွဲတည်းဖြင့် ၁၉၆၁ ခုနှစ်တွင် ထုတ်ဝေနိုင်ခဲ့သည်။ ယခုအခါ ဘာသာစကားများစွာဖြင့် ရရှိနိုင်ပြီဖြစ်သော ဤဘာသာပြန်ကျမ်းတွင် ထူးခြားချက်တချို့ ပါရှိ၏။ ယင်းကျမ်းတွင် ဘုရားသခင့်နာမတော် ယေဟောဝါကို ပြန်လည်ထည့်သွင်းထား၏။ ထို့ပြင် မူရင်းကျမ်းစောင်များအတိုင်း ယင်းကို တိုက်ရိုက်ပြန်ဆိုထားခြင်းက ကျမ်းစာအမှန်တရားကို အဆက်မပြတ် တိုးသိနားလည်စေခဲ့သည်။

၁၇။ ၁၉၆၂ ခုနှစ်တွင် အဘယ်အလင်းဖြာခဲ့သနည်း။

^၁၇၁၉၆၂ ခုနှစ်တွင် ရောမ ၁၃:၁ ပါ “အစိုးရသောမင်းအာဏာစက်” အကြောင်းနှင့် ခရစ်ယာန်တစ်ဦးသည် ၎င်းတို့ကို အဘယ်အထိ လက်အောက်ခံရမည့်အကြောင်း ရှင်းပြခဲ့သည်။ ရောမ အခန်းကြီး ၁၃၊ တိတု ၃:၁၊ ၂ နှင့် ၁ ပေတရု ၂:၁၃၊ ၁၇ စသည့်ကျမ်းချက်များကို ခရေစေ့တွင်းကျ လေ့လာမှုပြုကြရာ “အစိုးရသောမင်းအာဏာစက်” ဟူသည့် အသုံးအနှုန်းသည် ယေဟောဝါဘုရားသခင်နှင့် ယေရှုခရစ်တို့ကို မရည်ညွှန်းဘဲ လူ့အစိုးရအာဏာပိုင်များကို ရည်ညွှန်းကြောင်း ရှင်းလင်းလာသည်။

၁၈။ ၁၉၈၀ ပြည့်လွန်နှစ်များတွင် ရှင်းလင်းလာသည့် အမှန်တရားအချို့ကား အဘယ်နည်း။

^၁၈နောက်ပိုင်းနှစ်များတွင် ဖြောင့်မတ်သူတို့၏လမ်းသည် လင်းသည်ထက်လင်းလာလေ၏။ ၁၉၈၅ ခုနှစ်တွင် “အသက်နှင့်ယှဉ်သော” ဖြောင့်မတ်ရာသို့ ရောက်ခြင်းအခွင့်၊ ဘုရားသခင့်မိတ်ဆွေအဖြစ် ဖြောင့်မတ်ရာသို့ ရောက်ခြင်းအခွင့်ဟူသည် အဘယ်အရာကိုဆိုလိုကြောင်း အလင်းထွန်းလင်းလာပြန်သည်။ (ရောမ ၅:၁၈; ယာကုပ် ၂:၂၃) ခရစ်ယာန်ယုဘိလ၏အဓိပ္ပာယ်ကို ၁၉၈၇ ခုနှစ်တွင် အသေးစိတ်ရှင်းပြခဲ့၏။

၁၉။ မကြာသေးမီနှစ်များတွင် ယေဟောဝါသည် မိမိလူမျိုးတော်အတွက် ဝိညာဉ်ရေးအလင်းကို မည်သို့တိုး၍ ထွန်းလင်းပေးတော်မူခဲ့သနည်း။

^၁၉၁၉၉၅ ခုနှစ်တွင် “သိုးနှင့်ဆိတ်” ခွဲခြားခြင်းကို ပို၍ရှင်းလင်းစွာ သဘောပေါက်လာ၏။ ပြည့်စုံနေပြီဖြစ်သည့် ယေဇကျေလ၏ ဝတ်ပြုရာအိမ်တော်စိတ်အာရုံအကြောင်းကို ၁၉၉၈ ခုနှစ်တွင် အသေးစိတ်ရှင်းပြခဲ့သည်။ ၁၉၉၉ ခုနှစ်တွင် ‘သန့်ရှင်းရာအရပ်၌ ရွံရှာဖွယ်အရာစိုက်နေခြင်း’ သည် မည်သည့်အချိန်တွင် မည်သို့ဖြစ်ပျက်လာကြောင်း ရှင်းလင်းဖော်ပြခဲ့သည်။ (မဿဲ ၂၄:၁၅၊ ၁၆; ၂၅:၃၂) ထို့နောက် ၂၀၀၂ ခုနှစ်တွင် ဘုရားသခင်အား ‘ဝိညာဉ်နှင့်လည်းကောင်း၊ အမှန်တရားနှင့်လည်းကောင်း’ ကိုးကွယ်ခြင်း၏အဓိပ္ပာယ်ကို ထပ်၍ထိုးထွင်းသိမြင်လာသည်။—ယောဟန် ၄:၂၄။

၂၀။ ဘုရားသခင့်လူမျိုးတော်သည် အခြားအဘယ်ကဏ္ဍတွင် ပြုပြင်ပြောင်းလဲလာသနည်း။

^၂၀အဖွဲ့အစည်းပိုင်းဆိုင်ရာနှင့် အယူဝါဒပိုင်းဆိုင်ရာ ပြုပြင်ပြောင်းလဲမှုများအပြင် ခရစ်ယာန်အမူအကျင့်နှင့်စပ်လျဉ်း၍လည်း ပြုပြင်ပြောင်းလဲမှုများရှိခဲ့သည်။ ဥပမာ၊ ၁၉၇၃ ခုနှစ်တွင် ဆေးလိပ်သောက်ခြင်းသည် “ကိုယ်ခန္ဓာ၏အညစ်အကြေး” တစ်ခုဖြစ်ကြောင်း သိမြင်လာကာ ယင်းကို ကြီးလေးသောအပြစ်အဖြစ် ရှုမြင်ခဲ့ကြသည်။ (၂ ကောရိန္သု ၇:၁) ဆယ်နှစ်ကြာပြီးနောက် ၁၉၈၄ ခုနှစ် ဇူလိုင်လ ၁၅ ရက်နေ့ထုတ် ကင်းမျှော်စင်က သေနတ်ကိုင်ဆောင်ခြင်းနှင့်ပတ်သက်၍ ကျွန်ုပ်တို့၏ရပ်တည်ချက်ကို ရှင်းပြခဲ့၏။ ယင်းတို့သည် ကျွန်ုပ်တို့ခေတ်တွင် တိုး၍ထွန်းလင်းနေသောအလင်းဆိုင်ရာ နမူနာတချို့မျှသာ ဖြစ်ပေသည်။

တိုး၍ထွန်းလင်းနေသောအလင်းတွင် ဆက်လက်လျှောက်လှမ်းနေလော့

၂၁။ အဘယ်သဘောထားရှိခြင်းက ကျွန်ုပ်တို့ကို တိုး၍ထွန်းလင်းနေသောအလင်းတွင် ဆက်လက်လျှောက်လှမ်းနေစေမည်နည်း။

^၂၁“ပြောင်းလဲမှုတစ်ခု ပေါ်ပေါက်လာတဲ့အခါ အဲ့ဒါကိုလက်ခံပြီး အလိုက်သင့်ပြုပြင်ပြောင်းလဲဖို့က ခက်တယ်” ဟု သက်တမ်းကြာ အကြီးအကဲတစ်ဦး ဝန်ခံ၏။ ဘုရားသခင့်နိုင်ငံတော် ကြွေးကြော်သူတစ်ဦး ဖြစ်လာခဲ့သည့် ၄၈ နှစ်အတွင်း သူတွေ့ ကြုံခဲ့ရသည့် ပြုပြင်မှုများစွာကို လက်ခံရန် အဘယ်အရာက သူ့အား ကူညီပေးခဲ့ပြီနည်း။ သူက ဤသို့ဖြေဆိုသည်– “သဘောထားမှန်ရှိဖို့ အရေးကြီးတယ်။ ပြုပြင်မှုကို လက်မခံဘူးဆိုရင် ရှေ့ကိုချီတက်နေတဲ့ အဖွဲ့အစည်းနဲ့ ရင်ပေါင်မတန်းနိုင်ဘဲ ကျန်နေခဲ့မယ်။ ပြောင်းလဲမှုတွေကို ကျွန်တော်လက်ခံဖို့ ခက်နေပြီဆိုရင် ‘သခင်၊ အကျွန်ုပ်တို့သည် အဘယ်သူထံသို့ သွားရပါမည်နည်း။ ထာဝရအသက်နှင့်ယှဉ်သောစကားသည် ကိုယ်တော်၌တည်ပါ၏’ လို့ ယေရှုကိုပြောခဲ့တဲ့ ပေတရုရဲ့စကားကို ပြန်ကြားယောင်လိုက်တယ်။ အဲ့ဒီနောက် ‘ငါ ဘယ်ကိုထွက်သွားမှာလဲ။ ဒီလောကရဲ့အမှောင်ထုထဲကိုလား’ လို့ကိုယ့်ကိုယ်ကိုမေးတယ်။ ဒီလိုနဲ့ ဘုရားသခင်ရဲ့အဖွဲ့အစည်းထဲမှာ မြဲနေဖို့ အကူအညီရတယ်။”—ယောဟန် ၆:၆၈။

၂၂။ အလင်းတွင် ကျွန်ုပ်တို့လျှောက်လှမ်းနေခြင်းမှ မည်သို့အကျိုးခံစားကြရသနည်း။

^၂၂ကျွန်ုပ်တို့ပတ်လည်ရှိ ဤလောကသည် အမှောင်ထုထဲ ကျရောက်နေ၏။ ယေဟောဝါသည် မိမိလူမျိုးတော်အပေါ် အလင်းဆက်လက် ထွန်းလင်းပေးနေသည်နှင့်အမျှ လူမျိုးတော်နှင့် လောကသားများ ပိုမိုကွာဟလျက်ရှိသည်။ ဤအလင်းက ကျွန်ုပ်တို့အတွက် အဘယ်အရာကို လုပ်ဆောင်ပေးသနည်း။ အမှောင်လမ်းတစ်လမ်းပေါ်ရှိ တွင်းတစ်တွင်းကို မီးထိုးပြခြင်းက ထိုတွင်းကို မဖယ်ရှားနိုင်သကဲ့သို့ ဘုရားသခင့်နှုတ်မြွက်စကားတော်မှ အလင်းသည် ကျရောက်နိုင်သည့် အန္တရာယ်များကို မဖယ်ရှားပေးပါ။ သို့သော် တိုး၍ထွန်းလင်းနေသောအလင်းတွင် ကျွန်ုပ်တို့ ဆက်လက်လျှောက်လှမ်းသွားနိုင်ရန် ဘုရားသခင့်နှုတ်မြွက်စကားတော်မှ အလင်းက ထိုအန္တရာယ်များကို ရှောင်ရှားနိုင်အောင် အမှန်ကူညီပေးသည်။ သို့ဖြစ်၍ ယေဟောဝါ၏ ပရောဖက်ပြုချက်ဆိုင်ရာစကားတော်ကို “မှောင်မိုက်အရပ်၌ ထွန်းလင်းသောဆီမီးကဲ့သို့မှတ်၍” ဆက်လက်အာရုံစိုက်ကြပါစို့လေ။—၂ ပေတရု ၁:၁၉။

သင်မှတ်မိသလော

• ယေဟောဝါသည် မိမိလူမျိုးတော်အတွက် အဖွဲ့အစည်းပိုင်းဆိုင်ရာ အဘယ်တိုးတက်မှုများကို ဖြစ်ပေါ်စေခဲ့သနည်း။

• တိုး၍ထွန်းလင်းသောအလင်းက အယူဝါဒပိုင်းဆိုင်ရာ အဘယ်ပြုပြင်ပြောင်းလဲမှုများကို ဖြစ်ပေါ်စေခဲ့သနည်း။

• အဘယ်ပြုပြင်ပြောင်းလဲမှုများကို အသင်ကိုယ်တိုင် တွေ့ မြင်ခဲ့ရပြီး ယင်းတို့ကိုလက်ခံရန် အဘယ်အရာက သင့်ကို ကူညီပေးခဲ့ပြီနည်း။

• တိုး၍ထွန်းလင်းနေသောအလင်းတွင် သင် အဘယ်ကြောင့် ဆက်လက်လျှောက်လှမ်းနေလိုသနည်း။

[လေ့လာရန်မေးခွန်းများ]

[စာမျက်နှာ ၂၇ ပါ ရုပ်ပုံ]

၁၉၂၂ ခုနှစ်၊ အိုဟိုင်အိုပြည်နယ်၊ စီဒါပွိုင့်မြို့တွင် ကျင်းပခဲ့သောစည်းဝေးကြီးက ကျမ်းစာကျောင်းသားများကို ဘုရားသခင့်လုပ်ငန်းလုပ်ဆောင်ရန် ခွန်အားရှိစေခဲ့

[စာမျက်နှာ ၂၉ ပါ ရုပ်ပုံ]

“ကမ္ဘာသစ်ဘာသာပြန် ခရစ်ယာန်ဂရိကျမ်းစာ” ကို ၁၉၅၀ ပြည့်နှစ်တွင် ထုတ်ဝေလိုက်ကြောင်းအဲန်. အိပ်ခ်ျ. နောရ် ကြေညာ

[Picture Credit Line on page 26]

ကင်းမျှော်စင်—လေ့လာရန် စာစောင်