ဧသတာကျမ်းမှ ပေါ်လွင်ချက်များ
ယေဟောဝါ၏နှုတ်မြွက်စကားတော်သည် အသက်ရှင်၏
ဧသတာကျမ်းမှ ပေါ်လွင်ချက်များ
အကြံအစည်သည် လွယ်လွယ်နှင့် ပျက်နိုင်မည်မဟုတ်ချေ။ ဂျူးများကို သိမ်းရုံးသတ်ဖြတ်မည့်အစီအစဉ်သည် ထောင့်စေ့ကာ ပိရိလှသည်။ ကြိုတင်စီစဉ်ထားသည့်နေ့ရောက်လာလျှင် အိန္ဒိယမှ အီသီယိုးပီးယားအထိ ကျယ်ပြန့်သောအင်ပါယာ၌ နေထိုင်ကြသည့် ဂျူးတစ်ယောက်မကျန် မျိုးဖြုတ်ခံရတော့မည်။ ဤကား အကြံသမား၏ လျှို့ဝှက်ကြံစည်မှုဖြစ်သည်။ သို့သော် ကောင်းကင်ဘုံရှင် ဘုရားသခင်သည် မိမိရွေးကောက်ထားသောလူတို့ကို မည်သည့်အသက်အန္တရာယ်မျိုးမှမဆို ကယ်လွှတ်ပေးနိုင်သည်ဟူသော အရေးကြီးသည့်အချက်တစ်ချက်ကို သူသတိလက်လွတ်ဖြစ်သွားသည်။ ထိုကယ်လွှတ်မှုအကြောင်းကို ဧသတာကျမ်းတွင် မှတ်တမ်းတင်ထားသည်။
မော်ဒကဲအမည်ရှိ အသက်ကြီးသူ ဂျူးအမျိုးသားတစ်ဦးရေးသားခဲ့သော ဧသတာကျမ်းသည် ပါးရှားဘုရင် အာရွှေရုခေါ် ပထမမြောက်ဇခ်စိဇ်၏နန်းသက် ၁၈ နှစ်တာကာလကို ခြုံငုံဖော်ပြထားသည်။ မိမိ၏ကျေးကျွန်များသည် ကျယ်ပြန့်လှသောအင်ပါယာတစ်ခွင်တွင် ပြန့်ကျဲနေသော်လည်း သူတို့ရန်သူများ၏ အကောက်ကြံစည်မှုများမှ ယေဟောဝါ မည်သို့ကယ်လွှတ်ပေးကြောင်း အဆိုပါဇာတ်ကြောင်းက ဖော်ပြသည်။ ယနေ့ ထိုအသိပညာက ၂၃၅ နိုင်ငံတွင် မြင့်မြတ်သောလုပ်ငန်းတော်၌ ပါဝင်နေကြသော ယေဟောဝါလူတို့၏ယုံကြည်ခြင်းကို ခိုင်ခံ့စေသည်။ ထို့ပြင် ဧသတာကျမ်းတွင် ဖော်ပြထားသော ဇာတ်ကောင်များသည် ကျွန်ုပ်တို့ တုပထိုက်သည့်စံနမူနာရှင်များအပြင် ရှောင်ကြဉ်အပ်သူများလည်းပါသည်။ အမှန်ဆိုသော် ‘ဘုရားသခင့်နှုတ်မြွက်စကားတော်သည် အသက်ရှင်ခြင်း၊ တန်ခိုးနှင့်ပြုပြင်ခြင်းတို့နှင့်ပြည့်စုံ၏။’—ဟေဗြဲ ၄:၁၂။
မိဖုရား ကြားဝင်ဆောင်ရွက်ရ
ရှင်ဘုရင်အာရွှေရုသည် နန်းစံတတိယနှစ် (ဘီစီ ၄၉၃) တွင် တော်ဝင်စားသောက်ပွဲကြီးတစ်ခုကို ကျင်းပခဲ့သည်။ ရုပ်ရူပကာလှပမှုကြောင့် ကျော်ကြားခဲ့သော မိဖုရားဝါရှတိသည် ရှင်ဘုရင်၏ငြိုငြင်မှုကိုခံရကာ မိဖုရားအဖြစ်မှ ပယ်ရှားခံလိုက်ရသည်။ နိုင်ငံတွင်းရှိ အဆင်းလှသောအပျိုကညာအပေါင်းမှ ဂျူးအမျိုးသမီးဟဒဿကို ရွေးချယ်၍ ဝါရှတိအရာ၌ တင်မြှောက်လိုက်သည်။ ဝမ်းကွဲတော်စပ်သူ မော်ဒကဲ၏ညွှန်ကြားချက်အရ မိမိသည် ဂျူးလူမျိုးဖြစ်ကြောင်း မဖော်ပြဘဲ ဧသတာဟူသော ပါးရှားအမည်ကိုသာ သုံးလေသည်။
အတန်ကြာသော် ဟာမန်အမည်ရှိ မာနထောင်လွှားသူကို ဝန်ကြီးချုပ်ရာထူး အပ်နှင်းခဲ့သည်။ ဟာမန်သည် မော်ဒကဲက မိမိကို “ဦးမချ၊ ရှိမခိုး” သောကြောင့် အမျက်ထွက်ပြီး ပါးရှားအင်ပါယာရှိ ဂျူးအားလုံးကို မျိုးဖြုတ်သတ်ရန် ကြံစည်လေတော့သည်။ (ဧသတာ ၃:၂) ဟာမန်သည် အာရွှေရုကို အယုံသွင်းနိုင်ပြီး အဆိုပါမျိုးဖြုတ်သတ်ဖြတ်မှုအောင်မြင်ရန် ရှင်ဘုရင်၏အမိန့်တော်ကို ထုတ်ပြန်နိုင်ခဲ့သည်။ မော်ဒကဲသည် “ပြာနှင့်လူးလျက်၊ လျှော်တေအဝတ်ကိုဝတ်” လျက်နေ၏။ (ဧသတာ ၄:၁) ယခု ဧသတာ ကြားဝင်ဆောင်ရွက်ရတော့မည်။ သူသည် ရှင်ဘုရင်နှင့် ဝန်ကြီးချုပ်တို့ကို ဖိတ်ခေါ်၍ သီးသန့်စားသောက်ပွဲကြီး ခင်းကျင်းလေသည်။ သူတို့ ဝမ်းသာအားရ စားသောက်ကြစဉ် နောက်တစ်နေ့တွင်လည်း ကြွရောက်သုံးဆောင်ပါရန် ဧသတာ လျှောက်ဆို၏။ ဟာမန် ဝမ်းသာသော်လည်း မိမိကို မော်ဒကဲ မလေးမခန့်ပြုသောကြောင့် အလွန်အမျက်ထွက်နေသည်။ နောက်တစ်နေ့ စားသောက်ပွဲကြီးမတိုင်မီ မော်ဒကဲကိုကွပ်မျက်ရန် ဟာမန် အကောက်ကြံလေသည်။
ကျမ်းစာမေးခွန်းများ အဖြေ–
၁:၃-၅—စားသောက်ပွဲသည် ရက်ပေါင်းတစ်ရာရှစ်ဆယ်ကြာခဲ့သလော။ စားသောက်ပွဲသည် ထိုမျှကြာညောင်းသည်ဟု ကျမ်းချက်က မဖော်ပြချေ။ သို့သော် ရှင်ဘုရင်သည် မင်းမှုထမ်းများကို ရက်ပေါင်း ၁၈၀ ကြာ နိုင်ငံတော်၏ဘုန်းစည်းစိမ်နှင့် ဘုန်းအသရေကို ပြသတော်မူသည်။ ရှင်ဘုရင်သည် မိမိ၏အစီအစဉ်ကို အောင်မြင်စေနိုင်စွမ်းရှိကြောင်း စိတ်ချစေလို၍ အဆိုပါပွဲတွင် နိုင်ငံတော်ဘုန်းစည်းစိမ်များကို ပြသခြင်းဖြစ်နိုင်သည်။ ဤတွင် ရက်ပေါင်း ၁၈၀ စုဝေးပွဲပြီးနောက် ဆက်ကျင်းပသည့် ၇ ရက်စားသောက်ပွဲကို အခန်းငယ် ၃ နှင့် ၅ ကရည်ညွှန်းခြင်းဖြစ်နိုင်၏။
၁:၈—အဘယ်နည်းဖြင့် ‘စပျစ်ရည်သောက်ခြင်းအမှုကို တရားအတိုင်း လိုက်နာရန်နှင့်စပ်လျဉ်း၍ အဘယ်သူကိုမျှ အနိုင်အထက်မပြု’ ခဲ့သနည်း။ ဤအခါသမယတွင် ရှင်ဘုရင်အာရွှေရုသည် ဤသို့သောစုဝေးပွဲများတွင် တစ်စုံတစ်ခုသောပမာဏသာသောက်ရန် အချင်းချင်း သတိပေးသည့် ပါးရှားဓလေ့ရှိပုံရရာကို ခြွင်းချက်ထားခဲ့သည်။ “များသည်ဖြစ်စေ၊ နည်းသည်ဖြစ်စေ သူတို့စိတ်တိုင်းကျ သောက်နိုင်ကြသည်” ဟု ကိုးကားဖော်ပြချက်တစ်ခုကဆို၏။
၁:၁၀-၁၂—မိဖုရားဝါရှတိသည် ရှင်ဘုရင်ထံ အခစားဝင်ရန် အဘယ်ကြောင့် ငြင်းဆန်ခဲ့သနည်း။ မိဖုရားသည် ရှင်ဘုရင်၏ မူးယစ်နေသောဧည့်သည်များရှေ့တွင် အရှက်မရလိုသောကြောင့် အမိန့်တော်ကို ငြင်းဆန်ရခြင်းဖြစ်ကြောင်း ကျမ်းပညာရှင်အချို့ကဆိုသည်။ သို့မဟုတ် အဆိုပါအပြင်ပန်းအဆင်းလှသောမိဖုရားသည် အမှန်ပင် လက်အောက်မခံလို၍လည်း ဖြစ်နိုင်သည်။ သူ၏အကြောင်းပြချက်ကို သမ္မာကျမ်းစာက မဖော်ပြထားသော်လည်း ခင်ပွန်းကို နာခံခြင်းသည် အမှန်အရေးကြီးသည့်ကိစ္စတစ်ခုဖြစ်ပြီး ဝါရှတိ၏မကောင်းသောပုံသက်သေက ပါးရှားခရိုင်များရှိ ဇနီးသည်အားလုံးအပေါ် ဩဇာသက်ရောက်လိမ့်မည်ဟု ထိုခေတ်ပညာရှိများက ဆင်ခြင်ခဲ့ကြသည်။
၂:၁၄-၁၇—ဧသတာသည် ရှင်ဘုရင်နှင့် အကျင့်ပျက်လိင်ဆက်ဆံခဲ့သလော။ အဖြေမှာ မဟုတ်ပါ။ ရှင်ဘုရင်ထံ ဝင်ရသော တခြားအမျိုးသမီးများသည် နံနက်ချိန်တွင် ရှင်ဘုရင်၏နန်းတော်မိန်းမစိုး၊ “မောင်းမမိဿံအုပ်” စောင့်သော ဒုတိယမိန်းမဆောင်သို့ ပြန်သွားရသည်ဟု မှတ်တမ်းကဆိုသည်။ သို့ဖြင့် ရှင်ဘုရင်နှင့်အတူ ညကိုကုန်လွန်စေခဲ့သော အမျိုးသမီးများသည် မောင်းမမိဿံများ သို့မဟုတ် ဒုတိယမိဖုရားများ ဖြစ်လာကြသည်။ သို့သော် ဧသတာကို ရှင်ဘုရင်မြင်ပြီးနောက် မောင်းမမိဿံအဆောင်သို့ ပြန်မပို့ခဲ့ချေ။ ဧသတာကို အာရွှေရုထံ သွင်းသောအခါ “အခြားသောသမီးကညာအပေါင်းတို့ထက် ဧသတာသည် စိတ်တော်ကိုနူးညွတ်စေ၍ အထံတော်၌ မျက်နှာရသဖြင့် ရှင်ဘုရင်သည် အခြားသောမိန်းမတကာတို့ကို ချစ်သည်ထက် ဧသတာကို သာ၍ချစ်” သွားလေသည်။ (ဧသတာ ၂:၁၇) သူသည် အာရွှေရု၏ ‘မျက်နှာသာနှင့် ချစ်ခင်မှု’ ကိုမည်သို့ရရှိခဲ့သနည်း။ တခြားသူများ၏မျက်နှာသာကို ရရှိသကဲ့သို့ပင်ဖြစ်၏။ “ဧသတာသည် ဟေဂဲစိတ်နှင့်တွေ့၍ မျက်နှာရ” ခဲ့၏။ (ဧသတာ ၂:၈၊ ၉) ဟေဂဲသည် ဧသတာ၏အသွင်အပြင်နှင့် အရည်အသွေးကောင်းများကြောင့် မျက်နှာသာပေးခဲ့ခြင်းဖြစ်သည်။ မှန်ပါသည်၊ “ဧသတာကို တွေ့မြင်သမျှသောသူတို့သည် ချစ်တတ်ကြ၏။” (ဧသတာ ၂:၁၅) ထိုနည်းတူ ရှင်ဘုရင်သည် ဧသတာ၏အသွင်အပြင်နှင့်အရည်အသွေးတို့ကို သဘောကျကာ ချစ်ခင်မြတ်နိုးမိခြင်းဖြစ်သည်။
၃:၂; ၅:၉—မော်ဒကဲသည် ဟာမန်ကို အဘယ်ကြောင့် ဦးမချခဲ့သနည်း။ ဣသရေလလူတို့အတွက် ရာထူးကြီးမြင့်သူကို ဦးညွတ်ခြင်းသည် မမှားချေ။ သို့သော် ဟာမန်ကိစ္စတွင် ထို့ထက်မက ပါဝင်ပတ်သက်နေသည်။ ဟာမန်သည် အာဂတ်လူမျိုးဖြစ်ပြီး အာမလက်လူမျိုးလည်းဖြစ်နိုင်သည်။ ယေဟောဝါသည် အာမလက်လူမျိုးကို သုတ်သင်ပယ်ရှင်းရန် သတ်မှတ်ထားပြီးဖြစ်သည်။ (တရားဟောရာ ၂၅:၁၉) ထို့ကြောင့် ဟာမန်ကို ဦးချခြင်းသည် မော်ဒကဲအတွက် ယေဟောဝါအပေါ် သစ္စာမဲ့ရာကျသွားပေလိမ့်မည်။ ထို့ကြောင့် သူသည် ဂျူးလူမျိုးဖြစ်ကြောင်း ဖော်ပြပြီး လုံးဝဦးမချခဲ့ချေ။—ဧသတာ ၃:၃၊ ၄။
ကျွန်ုပ်တို့အတွက် သင်ခန်းစာများ–
၂:၁၀၊ ၂၀; ၄:၁၂-၁၅။ ဧသတာသည် ယေဟောဝါအား ကိုးကွယ်သည့် ရင့်ကျက်သူထံမှ ညွှန်ကြားချက်နှင့် အကြံဉာဏ်ကို လက်ခံခဲ့သည်။ “[ကျွန်ုပ်တို့] ကိုအုပ်သောသူတို့၏စကားကို နားထောင်၍ နှိမ့်ချလျက်နေ” ခြင်းသည် ပညာရှိရာရောက်၏။—ဟေဗြဲ ၁၃:၁၇။
၂:၁၁; ၄:၅။ ကျွန်ုပ်တို့သည် “ကိုယ်အမှုအရာကိုသာ မရှုမမှတ်ဘဲ သူ့အမှုအရာကို အချင်းချင်း ရှုမှတ်” သင့်သည်။—ဖိလိပ္ပိ ၂:၄။
၂:၁၅။ ဧသတာသည် ဟေဂဲစီရင်သောအရာမှတစ်ပါး အဘယ်လက်ဝတ်ရတနာ သို့မဟုတ် အဝတ်အစားကောင်းကိုမျှ မတောင်းဘဲ ကျိုးနွံမှုနှင့် ချုပ်တည်းမှု ပြသခဲ့သည်။ ယင်းသည် ဧသတာအား ရှင်ဘုရင်၏မျက်နှာသာကိုရစေသော “နူးညံ့ငြိမ်သက်ခြင်းသဘောတည်းဟူသော မဖောက်ပြန်မပျက်စီးတတ်သော တန်ဆာဆင်ခြင်းရှိသော စိတ်နှလုံး၏အတွင်းလူဖြစ်” သည်။—၁ ပေတရု ၃:၄။
၂:၂၁-၂၃။ ‘အစိုးရသောမင်းအာဏာစက်၏အုပ်စိုးခြင်းကို ဝန်ခံ’ ခြင်းတွင် ဧသတာနှင့် မော်ဒကဲတို့သည် စံနမူနာရှင်များဖြစ်ကြ၏။—ရောမ ၁၃:၁။
၃:၄။ ဧသတာသည် မိမိမည်သူမည်ဝါဖြစ်ကြောင်း မဖော်ပြသကဲ့သို့ အချို့သောအခြေအနေမျိုးတွင် ကျွန်ုပ်တို့လည်း မဖော်ပြခြင်းသည် ပညာရှိရာရောက်၏။ သို့သော် ယေဟောဝါ၏ပိုင်သအုပ်စိုးမှုနှင့် ကျွန်ုပ်တို့၏သမာဓိအစရှိသော အရေးကြီးကိစ္စများနှင့်ပတ်သက်၍ ရပ်တည်ဖို့လိုလာသည့်အခါ ကျွန်ုပ်တို့သည် ယေဟောဝါသက်သေများဖြစ်ကြောင်း ဖော်ပြရန် ကြောက်ရွံ့မည်မဟုတ်ချေ။
၄:၃။ စမ်းသပ်မှုများ ရင်ဆိုင်ရသည့်အခါ ခွန်အားနှင့် ဉာဏ်ပညာပေးသနားပါရန် ယေဟောဝါထံ ဆုတောင်းသင့်သည်။
၄:၆-၈။ မော်ဒကဲသည် ဟာမန်၏အကောက်ကြံမှုကြောင့် ဖြစ်ပေါ်လာသော ခြိမ်းခြောက်မှုကို တရားဥပဒေအရ ဖြေရှင်းရန် ကြိုးစားခဲ့သည်။—ဖိလိပ္ပိ ၁:၇။
၄:၁၄။ ယေဟောဝါအပေါ် မော်ဒကဲ၏ယုံကြည်စိတ်ချမှုသည် စံပြုလောက်ပေသည်။
၄:၁၅။ ဧသတာသည် ယေဟောဝါအား ကိုးစားမှုအပြည့်ဖြင့် အသတ်ခံရနိုင်သည့် အခြေအနေတစ်ခုကို သစ္စာရှိရှိ၊ သတ္တိရှိရှိ ရင်ဆိုင်ခဲ့သည်။ မိမိကိုယ်ကိုမဟုတ်ဘဲ ယေဟောဝါကို ကိုးစားတတ်ရန် ကျွန်ုပ်တို့ သင်ယူဖို့ အရေးကြီး၏။
၅:၆-၈။ ဧသတာသည် အာရွှေရု၏မျက်နှာသာကိုရရှိနိုင်ရန် ဒုတိယအကြိမ် စားသောက်ပွဲသို့ ဖိတ်ခေါ်ခဲ့သည်။ သူသည် ပညာသတိရှိရှိနှင့်လုပ်ဆောင်သကဲ့သို့ ကျွန်ုပ်တို့လည်း ထို့အတူပြုလုပ်သင့်သည်။—သု. ၁၄:၁၅။
အဖြစ်အပျက်များ တစ်ခုပြီးတစ်ခု ပြောင်းပြန်ဖြစ်သွားခြင်း
အဖြစ်အပျက်များမှာ ပြောင်းပြန်ဖြစ်ကုန်၏။ မော်ဒကဲအတွက်ပြုလုပ်ထားသော လည်ဆွဲချတိုင်ပေါ်တွင် ဟာမန်ကိုယ်တိုင် လည်ဆွဲချခံရပြီး ကွပ်မျက်ခံရမည့်သူသည် ဝန်ကြီးချုပ်ဖြစ်လာလေသည်။ ဂျူးများကို သိမ်းရုံးသတ်ဖြတ်မှုအစီအစဉ်သည် မည်သို့ဖြစ်သွားသနည်း။ ယင်းသည်လည်း လုံးလုံးပြောင်းပြန်ဖြစ်သွား၏။
သစ္စာရှိသောဧသတာသည် တစ်ဖန်ပြောဆိုပြန်၏။ မိမိ၌ အသက်အန္တရာယ်ရှိနေ၍ ဟာမန်၏အကောက်ကြံမှုကို ပယ်ဖျက်ပေးနိုင်သည့် နည်းလမ်းတစ်မျိုးမျိုးရှာပေးပါရန် ရှင်ဘုရင်၏ရှေ့မှောက် လျှောက်တင်လေ၏။ အဘယ်အရာပြုလုပ်ရမည်ကို ဧသတာ ၁၀:၃။
အာရွှေရု သိရှိတော်မူ၏။ နောက်ဆုံးတွင် သိမ်းရုံးသတ်ဖြတ်မည့်နေ့ ရောက်လာသည့်အခါ ဂျူးများကိုမဟုတ်ဘဲ သူတို့ကိုအန္တရာယ်ပြုမည့်သူများကို ကွပ်မျက်လိုက်သည်။ မော်ဒကဲသည် အဆိုပါကြီးစွာသောကယ်လွှတ်မှုကို အမှတ်ရစေရန် နှစ်စဉ်နှစ်တိုင်း ပုရပွဲနေ့ကို ကျင်းပရန် မိန့်မှာခဲ့သည်။ ရှင်ဘုရင်အာရွှေရုပြီးလျှင် ဒုတိယမင်းဖြစ်သော မော်ဒကဲသည် “မိမိအမျိုး၏အကျိုးစီးပွားကိုပြုစုလျက် အမျိုးသားချင်းအပေါင်းတို့အား မင်္ဂလာစကားကိုသာပြော” ဆိုလေသည်။—ကျမ်းစာမေးခွန်းများ အဖြေ–
၇:၄—ဂျူးများကို မျိုးဖြုတ်သတ်ခြင်းသည် “ရှင်ဘုရင်အကျိုးနည်းခြင်း” မည်သို့ဖြစ်နိုင်သနည်း။ ဂျူးများကို ကျွန်အဖြစ် ရောင်းချရန်ဖြစ်နိုင်ခြေကို လိမ္မာပါးနပ်စွာ ဧသတာ ထောက်ပြခြင်းဖြင့် သူတို့ကိုဖျက်ဆီးပစ်မည်ဆိုပါက ရှင်ဘုရင်အား အကျိုးနည်းစေမည်ကို အလေးပေးပြောဆိုခဲ့သည်။ ဂျူးများကို ကျွန်အဖြစ် ရောင်းချရန် ဟာမန်စီစဉ်ခဲ့မည်ဆိုလျှင် ဘုရင့်ဘဏ္ဍာတိုက်အတွက် ရရှိမည့်ငွေပမာဏသည် ဟာမန် ပေးမည်ဟုကတိပြုထားသည့် ငွေအခွက် ၁၀၀,၀၀၀ ထက်ပိုများပေလိမ့်မည်။ ထို့ပြင် လျှို့ဝှက်ကြံစည်မှု အထမြောက်ခဲ့လျှင် မိဖုရားကိုလည်း ဆုံးရှုံးသွားနိုင်သည်။
၇:၈—မင်းမှုထမ်းများသည် ဟာမန်၏မျက်နှာကို အဘယ်ကြောင့် ဖုံးခဲ့ကြသနည်း။ ယင်းသည် အရှက်တကွဲအကျိုးနည်းခြင်း သို့မဟုတ် ဖျက်ဆီးခံရတော့မည့်အခြေအနေဆိုးကို ဖော်ပြရာရောက်ပေမည်။ ကိုးကားဖော်ပြချက်တစ်ခုအရ “ရှေးလူတို့သည် တစ်ခါတစ်ရံ ကွပ်မျက်ခံရတော့မည့်သူ၏ခေါင်းကို ဖုံးတတ်ကြ၏။”
၈:၁၇—အဘယ်နည်းဖြင့် “ပြည်သူပြည်သားအများတို့သည် . . . ယုဒဘာသာကိုဝင်ကြ” သနည်း။ ထုတ်ပြန်လိုက်သောအမိန့်သည် ဂျူးတို့ဘက်တွင် ဘုရားသခင်ရှိကြောင်း သာဓကတစ်ခုဖြစ်သည်ဟု ယူမှတ်ကာ ပါးရှန်းလူအများ ဂျူးဘာသာသို့ဝင်လာကြသည်။ ယင်းမူသည် ဇာခရိကျမ်းတွင်တွေ့ရှိရသည့် ပရောဖက်ပြုချက်ပြည့်စုံမှု၌ ပေါ်လွင်ထင်ရှား၏။ ယင်းက ဤသို့ဖော်ပြသည်– “ဘာသာအသီးအသီးကိုပြောတတ်သော လူအမျိုးမျိုးတို့တွင် တစ်ကျိပ်သောလူတို့သည် ယုဒလူဖြစ်သောသူ၏အဝတ်စွန်းကိုကိုင်လျက် ‘ဘုရားသခင်သည် သင်နှင့်အတူရှိတော်မူသည်ဟု အကျွန်ုပ်တို့သည် ကြားသိ၍ သင်တို့နှင့်အတူလိုက်ပါမည်’ ဟုဆိုကြလိမ့်မည်။”—ဇာခရိ ၈:၂၃။
၉:၁၀၊ ၁၅၊ ၁၆—အမိန့်အရ ဥစ္စာပစ္စည်းများကို သိမ်းယူခွင့်ရှိသော်လည်း ဂျူးများသည် အဘယ်ကြောင့်မသိမ်းယူကြသနည်း။ သူတို့၏ရည်ရွယ်ချက်မှာ ကိုယ်ကျိုးစီးပွားအတွက်မဟုတ်ဘဲ မိမိတို့အသက်ကို ကာကွယ်ရန်သာဖြစ်ကြောင်း ထင်ရှားသည်။
ကျွန်ုပ်တို့အတွက် သင်ခန်းစာများ–
၆:၆-၁၀။ “မာနသည် ပျက်စီးခြင်းအရင်၊ ထောင်လွှားသောသဘောသည် ရှုတ်ချခြင်းအရင်၌ နေရာကျတတ်၏။”—သု. ၁၆:၁၈။
၇:၃၊ ၄။ ညှဉ်းပန်းနှိပ်စက်ခံရနိုင်သော်လည်း ကျွန်ုပ်တို့သည် ယေဟောဝါသက်သေများဖြစ်ကြောင်း ဖော်ပြရဲသလော။
၈:၃-၆။ အတိုက်အခံပြုသူများ၏ရန်မှ အကာအကွယ်ရရှိရန် အစိုးရအာဏာပိုင်များထံတွင် သို့မဟုတ် တရားရုံးများတွင် အယူခံဝင်နိုင်သည်၊ အယူခံဝင်သင့်သည်။
၈:၅။ မိမိလူမျိုးကို မျိုးဖြုတ်သတ်ရန် အမိန့်ထုတ်ပြန်လိုက်သည့်အတွက် ရှင်ဘုရင်တွင် တာဝန်ရှိကြောင်း ဧသတာ တိုက်ရိုက်မပြောခဲ့ချေ။ ထိုနည်းတူ ကျွန်ုပ်တို့သည်လည်း အထက်အရာရှိများကို သက်သေခံရာတွင် လိမ္မာပါးနပ်မှုရှိဖို့လိုသည်။
၉:၂၂။ ကျွန်ုပ်တို့ထဲမှ ဆင်းရဲနွမ်းပါးသူများကို မမေ့သင့်ချေ။—ဂလာတိ ၂:၁၀။
ယေဟောဝါ “ကယ်တင်” မည်
ဧသတာ မိဖုရားဖြစ်ရခြင်းမှာ ဘုရားသခင့်ရည်ရွယ်ချက်ဖြစ်ကြောင်း မော်ဒကဲ ဖော်ပြခဲ့သည်။ ဂျူးများသည် ခြိမ်းခြောက်ခံရသောအခါ အစာရှောင်ပြီး အကူအညီအတွက် ဆုတောင်းကြသည်။ မိဖုရားသည် ဘုရင်အမိန့်မရဘဲ ဘုရင်ရှေ့မှောက်သို့ အခစားဝင်တိုင်း ကြည်ကြည်ဖြူဖြူ ကြိုဆိုခံရသည်။ သေရေးရှင်ရေးဖြစ်နေသောအချိန်၌ ရှင်ဘုရင်သည် အိပ်မပျော်နိုင်ခဲ့ချေ။ မှန်ပါသည်၊ ယေဟောဝါသည် မိမိလူမျိုး၏အကျိုးအတွက် စနစ်တကျလုပ်ဆောင်ကြောင်း ဧသတာကျမ်းက ဖော်ပြသည်။
စိတ်လှုပ်ရှားဖွယ်ကောင်းသော ဧသတာမှတ်တမ်းသည် “အမှုကုန်ရသည်ကာလ” တွင်နေထိုင်နေကြသော ကျွန်ုပ်တို့အတွက် အထူးအားရှိစရာမှတ်တမ်းဖြစ်သည်။ (ဒံယေလ ၁၂:၄) နောက်ဆုံးကာလ၏ အဆုံးပိုင်းဖြစ်သည့် ဤကာလတွင် မာဂေါဂပြည်သား ဂေါဂမင်း စာတန်သည် ယေဟောဝါ၏လူတို့ကို မီးကုန်ယမ်းကုန်တိုက်ခိုက်ပါတော့မည်။ သူ၏ရည်ရွယ်ချက်မှာ စစ်မှန်သောဝတ်ပြုသူများကို အစတုံးပစ်ရန်ဖြစ်သည်။ သို့သော် ဧသတာခေတ်ကဲ့သို့ပင် ယေဟောဝါသည် မိမိအားဝတ်ပြုသူများကို “ကယ်တင်” မည်ဖြစ်သည်။—ယေဇကျေလ ၃၈:၁၆-၂၃; ဧသတာ ၄:၁၄။
[စာမျက်နှာ ၁၀ ပါ ရုပ်ပုံ]
ဧသတာနှင့်မော်ဒကဲတို့သည် အာရွှေရုရှေ့မှောက်သို့ အခစားဝင်