ဘာသာခြားစကားပြော အသင်းတော်တွင် အမှုဆောင်ခြင်း
ဘာသာခြားစကားပြော အသင်းတော်တွင် အမှုဆောင်ခြင်း
တမန်တော်ယောဟန်က “မြေကြီးပေါ်မှာနေသောသူတည်းဟူသော အသီးအသီးဘာသာစကားကိုပြောသော လူအမျိုးအနွယ်ခပ်သိမ်းတို့အား ထာဝရဧဝံဂေလိတရားကိုဟောရသော ကောင်းကင်တမန်တစ်ပါး . . . ကောင်းကင်အလယ်၌ပျံဝဲလျက်ရှိသည်ကို ငါမြင်၏” ဟုရေးသားခဲ့သည်။ (ဗျာ. ၁၄:၆) ဤပရောဖက်ပြုချက်အဆင်းအာရုံ ပြည့်စုံချက်အနေနှင့် ဘုရားသခင့်နိုင်ငံတော်သတင်းကောင်းကို ဘာသာစကားအမျိုးမျိုးဖြင့် ကမ္ဘာတစ်ဝန်း ဟောပြောလျက်ရှိသည်။ ယင်းဘာသာစကားများစွာကို မိမိတို့၏နေရင်းပြည်နှင့် ဝေးလံသောဒေသတွင် နေထိုင်သူများ ပြောဆိုကြသည်။ သူတို့သည်လည်း ဘာသာခြားစကားကို သင်ယူခဲ့သည့် ဇွဲရှိသောသက်သေခံများထံမှ သတင်းကောင်းကြားရသည်။
သင်သည် ဘာသာခြားစကားပြောအသင်းတော်တွင် အမှုဆောင်နေသူတစ်ဦးလော။ သို့မဟုတ် ထိုသို့လုပ်ဆောင်ရန် စဉ်းစားနေသလော။ သင့်ကြိုးစားအားထုတ်မှုများ အောင်မြင်ရန် ကိုယ်ကျိုးစွန့်စိတ်ဓာတ်နှင့် သဘောထားမှန်လိုအပ်သည်။ သင့်ပန်းတိုင်မှာ သမ္မာကျမ်းစာမှ အမှန်တရားကို အခြားသူများသိရှိလာဖို့ ကူညီပေးရန်ဖြစ်သောကြောင့် သင်၌ အကောင်းဆုံးလှုံ့ဆော်မှုဖြစ်သည့် ဘုရားသခင်နှင့် အိမ်နီးချင်းကိုချစ်သောမေတ္တာရှိနေသည်။ (မဿဲ ၂၂:၃၇-၃၉; ၁ ကောရိန္သု ၁၃:၁) အခြားသူများ ဘုရားသခင်ကို သိလာရန် ကူညီပေးလိုသည့်ဆန္ဒသည် လူမျိုးခြားများနှင့် ပေါင်းသင်းခြင်း၊ သူတို့၏အစားအစာနှင့် ယဉ်ကျေးမှုတို့ကို သဘောကျနှစ်သက်ခြင်းထက် ပို၍ပြင်းပြသောလှုံ့ဆော်မှုဖြစ်သည်။ ဘာသာခြားစကားသင်ယူလိုစိတ် ပြင်းပြနေသလော။ ထိုသို့ဆိုလျှင် တော်မှန်သောအမြင်ရှိခြင်းက အထောက်အကူပြုသည်။ ဂျပန်စကား သင်ယူခဲ့သူ ဂျိမ်းစ်က “ဘာသာစကားရဲ့ လွှမ်းမိုးမှုကိုမခံနဲ့” ဟုဆိုသည်။ သင့်ရှေ့မှအခြားသူများစွာ အောင်မြင်ခဲ့ကြောင်း သိထားခြင်းက အားမလျှော့ရန်နှင့် အပြုသဘောထားဆက်ရှိနေရန် ကူညီနိုင်သည်။ သို့ဖြစ်လျှင် ဘာသာစကားအသစ်တစ်ခုကို သင်မည်သို့သင်ယူနိုင်သနည်း။ ထိုဘာသာစကားပြောအသင်းတော်နှင့် လိုက်လျောညီထွေရှိနိုင်ရန် အဘယ်အရာက ထောက်ကူပေးမည်နည်း။ ဝိညာဉ်ရေးသန်စွမ်းနေရန် သင်အဘယ်အရာပြုလုပ်ရမည်နည်း။
ဘာသာစကားကို စတင်ကြိုးစားသင်ယူခြင်း
ဘာသာစကားကို သင်ယူနိုင်သည့် နည်းလမ်းများစွာရှိသည်။ သင်တန်းသားများနှင့် ဆရာများ၏ အကြိုက်များမှာလည်း မတူကြချေ။ သို့သော် သင်တန်းသားအများစုအတွက် ဆရာကောင်းတစ်ဦးသင်ကြားသော အတန်းများတက်ခြင်းက အတတ်မြန်စေပြီး သင်ယူရပိုလွယ်ကူစေသည်။ သင်ယူနေသော ဘာသာစကားဖြင့်ထုတ်ဝေထားသည့် သမ္မာကျမ်းစာနှင့် ကျမ်းစာအခြေပြုစာပေများကိုဖတ်ခြင်း၊ ရရှိနိုင်သောတိတ်ခွေများ နားထောင်ခြင်းတို့က သင့်ဝေါဟာရများကို တိုးတက်လာစေပြီး သီအိုကရက်တစ်အသုံးအနှုန်းများကို ပိုသိလာစေသည်။ သင့်လျော်သော ရေဒီယို၊ တီဗွီနှင့် ဗီဒီယိုအစီအစဉ်များကလည်း ဘာသာစကားနှင့်ယဉ်ကျေးမှု၏ သဘောသဘာဝကို သိရှိစေသည်။ သင်ယူလေ့လာချိန်နှင့်ပတ်သက်၍ နေ့စဉ်အနည်းငယ်သင်ယူခြင်းသည် တစ်ခါတစ်ရံမှ ပျင်းရိငြီးငွေ့ဖွယ် အချိန်ကြာကြာသင်ယူခြင်းထက် ပိုထိရောက်မှုရှိသည်။
ဘာသာစကားတစ်ခုကို သင်ယူခြင်းသည် ရေကူးသင်ခြင်းနှင့်တူသည်။ စာအုပ်ဖတ်ရုံနှင့် ရေကူးတတ်မည်မဟုတ်။ ရေထဲဆင်းပြီး ယက်ကန်ကူးခတ်ရပေမည်။ ဘာသာစကားတစ်ခုသင်ယူခြင်းလည်း ထိုနည်းလည်းကောင်းပင်။ လေ့လာမှုတစ်ခုတည်းဖြင့်ဆိုပါက တတ်ခဲသည်။ ဖြစ်နိုင်သည့်အခါတိုင်း လူတို့ပြောရာများကို နားထောင်ခြင်း၊ သူတို့နှင့်ရောနှောခြင်းနှင့် စကားပြောခြင်းတို့ဖြင့် အပြန်အလှန်ဆက်သွယ်ရန် လိုအပ်သည်။ ခရစ်ယာန်လုပ်ဆောင်မှုများသည် ထိုသို့ပြုလုပ်နိုင်ရန် အကောင်းဆုံးအနေအထားပင်ဖြစ်သည်။ သင်ယူခဲ့ရာများကို လယ်ကွင်းတွင် ချက်ချင်းအသုံးပြုနိုင်သည်။ တရုတ်စကားသင်ယူနေသူ မီဒိုရီက “အဲလိုလုပ်တာ ထိတ်လန့်စရာကောင်းတယ်လို့ထင်ရပေမဲ့ ကျွန်မတို့ သက်သေခံတွေ ခက်ခက်ခဲခဲ ကြိုးစားနေကြတယ်ဆိုတာကို အိမ်ရှင်တွေသိလာနိုင်မယ်။ အဲဒါက သူတို့ရဲ့စိတ်နှလုံးကို လှုံ့ဆော်ပေးနိုင်တယ်။ သူတို့ရဲ့စကားနဲ့ ‘တွေ့ရတာဝမ်းသာပါတယ်’ လို့ပြောလိုက်ရုံနဲ့ သူတို့မျက်လုံးတွေ တောက်ပလာတာ တွေ့နိုင်တယ်” ဟုဆိုသည်။
ခရစ်ယာန်အစည်းအဝေးများလည်း အလွန်အကူအညီဖြစ်စေသည်။ အစည်းအဝေးတိုင်းတွင် အနည်းဆုံး မှတ်ချက်တစ်ခုပေးရန် ကြိုးစားပါ။ အစပိုင်းတွင် အလွန်ထိတ်လန့်စရာကောင်းပုံရသော်လည်း မစိုးရိမ်ပါနှင့်။ ညီအစ်ကိုညီအစ်မများက သင့်ကို အောင်မြင်စေလိုသည်။ ကိုရီးယားစကားသင်နေသူ မော်နီဖာက “အစည်းအဝေးတိုင်းမှာ ကျွန်မဘေးနားထိုင်ပေးတဲ့ ညီအစ်မကို အရမ်းကျေးဇူးတင်တယ်။ သူက တချို့စကားလုံးတွေရဲ့ အဓိပ္ပာယ်ကို ရေးချပေးတယ်။ သူ့ရဲ့နွေးထွေးမှု၊ စိတ်ရှည်ရှည်နဲ့ထောက်မပေးမှုက တကယ်အကူအညီဖြစ်စေတယ်” ဟုပြောခဲ့သည်။ သင့်ဝေါဟာရတိုးတက်လာသည်နှင့် ဘာသာစကားအသစ်ဖြင့် တွေးတောတတ်လာမည်။ စကားလုံးတိုင်းကို သင့်စိတ်တွင်ဘာသာပြန်ကြည့်နေမည့်အစား စကားစုများဖြင့် ပြောလိုရာကို ချက်ချင်းပြောလာနိုင်ပေမည်။
ဘာသာစကားနှင့်ဆိုင်သည့် သင့်ပထမဆုံး ပန်းတိုင်မှာ “နားလည်လွယ်သောစကားကို” ပြောဆိုရန်ဖြစ်သင့်သည်။ (၁ ကောရိန္သု ၁၄:၈-၁၁) လူတို့က သည်းခံနားထောင်ပေးမည်ဖြစ်သော်လည်း အမှားများနှင့် သိသိသာသာလွဲမှားသောအသံထွက်များသည် သင့်သတင်းတရားကို နားထောင်ခြင်းမှ အာရုံလွဲသွားစေနိုင်သည်။ အစကတည်းက မှန်ကန်သောအသံထွက်နှင့် သဒ္ဒါတို့ကို အာရုံစိုက်ခြင်းက အမှားကိုအကျင့်ပါမသွားစေရန် အကူအညီဖြစ်စေမည်။ ဆွာဟီလီစကားကိုသင်ယူနေသူ မာ့ခ်က “သင့်ရဲ့အဆိုးရွားဆုံးအမှားတွေကို ပြင်ပေးဖို့ ဘာသာစကား ကောင်းကောင်းပြောတတ်သူတွေကို အကူအညီတောင်းပြီး အဲလိုလုပ်ပေးတဲ့အတွက် သူတို့ကို ကျေးဇူးတင်ပါ” ဟုပြောခဲ့သည်။ မှန်ပါသည်၊ ဤနည်းဖြင့် သင့်အားကူညီပေးသူတို့၏ အချိန်နှင့်ခွန်အားကို ထောက်စာပေးပါ။ သင်ရေးထားရာကို စစ်ဆေးပေးဖို့ အခြားသူတစ်ဦးဦးအား တောင်းဆိုနိုင်သော်လည်း ဟောပြောချက်များနှင့် မှတ်ချက်များကို သင်သိထားသော သို့မဟုတ် ကြည့်ထားသောစကားလုံးများသုံးပြီး ပြင်ဆင်ရန်ကြိုးစားပါ။ ယင်းက အတတ်မြန်စေပြီး ယုံကြည်စိတ်ချမှုဖြင့် ပြောဆိုရန်ကူညီပေးသည်။
တိုးတက်နေပါ
မော်နီဖာက “ကျွန်မလုပ်ခဲ့တဲ့အလုပ်တွေထဲမှာ ဘာသာခြားစကားသင်ယူခြင်းက အခက်ဆုံးပဲ။ ဆက်မသင်ချင်တော့တဲ့အခါတွေ ရှိခဲ့ဖူးတယ်။ ဒါပေမဲ့ ကျမ်းစာလေ့လာနေတဲ့သူဟာ နက်နဲတဲ့ဝိညာဉ်ရေးအမှန်တရားတွေကို ကျွန်မပြောတဲ့ ရိုးရှင်းတဲ့ကိုရီးယားစကားနဲ့ နားထောင်ချင်တယ်ဆိုတာနဲ့ ကျွန်မ နည်းနည်းလေးတိုးတက်တာကို တွေ့တဲ့အခါ ညီအစ်ကိုတွေပျော်ရွှင်တာကို ပြန်သတိရတယ်” ဟုပြောခဲ့သည်။ အဓိကအချက်မှာ လွယ်လွယ်နှင့် အရှုံးမပေးရန်ဖြစ်သည်။ သင့်ပန်းတိုင်မှာ အခြားသူများကို အသက်ကယ်ကျမ်းစာအမှန်တရား သင်ပေးနိုင်ရန်ဖြစ်သည်။ (၁ ကောရိန္သု ၂:၁၀) ထို့ကြောင့် ဘာသာခြားစကားနှင့် ကျမ်းစာသင်ပေးနိုင်ရန် လေ့လာဆည်းပူးရာတွင် အာရုံစိုက်မှုနှင့် ရေရှည်ကြိုးစားအားထုတ်မှုတို့ လိုအပ်သည်။ ဆက်လက်သင်ယူနေစဉ် သင့်တိုးတက်မှုကို အခြားသူများနှင့် မလျော်မကန် နှိုင်းယှဉ်ခြင်းကိုရှောင်ပါ။ ဘာသာခြားစကားသင်ယူသူများသည် တစ်ဦးနှင့်တစ်ဦး တိုးတက်နှုန်းနှင့် တိုးတက်နည်းများမတူကြပေ။ သို့သော် သင့်တိုးတက်မှုကို သတိပြုခြင်းက အကူအညီဖြစ်စေသည်။ (ဂလာတိ ၆:၄) တရုတ်စကားသင်ယူနေသူ ဂျူးန်က “ဘာသာစကားတစ်ခုသင်ယူခြင်းဟာ လှေကားပေါ်တက်နေသလိုပဲ။ ကိုယ့်ကိုယ်ကို မတိုးတက်ဘူးလို့ပဲ ထင်ရပေမဲ့ တကယ်တိုးတက်နေတယ်ဆိုတာ ရုတ်တရက်သိလာတယ်” ဟုကောက်ချက်ချခဲ့သည်။
ဘာသာစကားအသစ်သင်ယူခြင်းသည် တစ်သက်တာလုံး ဆက်လုပ်သွားရမည့်အရာဖြစ်သည်။ ထို့ကြောင့် ပြီးပြည့်စုံရန် မမျှော်လင့်ဘဲ ပျော်ရွှင်စွာခရီးဆက်ပါ။ (ဆာလံ ၁၀၀:၂) အမှားများကို ရှောင်၍ရမည်မဟုတ်ပါ။ ယင်းတို့သည် သင်ယူခြင်း၏ တစ်စိတ်တစ်ပိုင်းဖြစ်သည်။ အီတလီစကားသင်ယူသူ ခရစ်ယာန်တစ်ဦး စဟောပြောသောအခါ အိမ်ရှင်အား “ဘဝရဲ့တံမြက်စည်းကို သိသလား” ဟုမေးခဲ့သည်။ သူပြောလိုရာမှာ “ဘဝရဲ့ရည်ရွယ်ချက်” ဖြစ်သည်။ ပိုလန်စကားသင်နေသူ သက်သေခံတစ်ဦးကလည်း အသင်းတော်ကို သီချင်းဆိုရန် ဖိတ်ခေါ်ရမည့်အစား ခွေးဆိုရန်ဖိတ်ခေါ်ခဲ့သည်။ တရုတ်စကားသင်ယူနေသူတစ်ဦးသည် အသံအနိမ့်အမြင့် အနည်းငယ်လွဲရုံနှင့် ပရိသတ်အား ယေရှု၏ရွေးနုတ်ဖိုးအစား ယေရှု၏စာအုပ်စင်ကို ယုံကြည်ရန် အားပေးခဲ့သည်။ အကျိုးမှာ အမှားပြင်လိုက်သောစကားလုံးများကို မမေ့တော့ချေ။
အသင်းတော်နှင့်အတူ လုပ်ဆောင်ခြင်း
လူများ ကွဲပြားခြားနားနေကြသည်မှာ ဘာသာစကားတစ်ခုတည်းကြောင့်မဟုတ်ပေ။ ယဉ်ကျေးမှု၊ လူမျိုးနှင့် နိုင်ငံကွဲပြားမှုတို့က လူတို့ကို ပို၍ကွဲပြားစေသည်။ သို့သော် ယင်းတို့မှာ ကျော်လွှား၍မရသော အတားအဆီးများ မဟုတ်ပေ။ ဥရောပရှိ တရုတ်စကားပြော ဘာသာရေးအုပ်စုများကို လေ့လာသည့် ကျွမ်းကျင်သူတစ်ဦးက ယေဟောဝါသက်သေများကို “လူမျိုးပေါင်းစုံအဖွဲ့အစည်း” ဟုဆိုခဲ့သည်။ သူက သက်သေခံများအလယ်တွင် “လူမျိုးသည် အဓိကမကျပါ။ ဘာသာစကားသည် ဘုရားသခင့်နှုတ်မြွက်စကားတော်ကို နားလည်စေသည့် အသုံးခံတစ်ခုမျှဖြစ်သည်” ဟုကောက်ချက်ချခဲ့သည်။ မှန်ပါသည်၊ ကျမ်းစာမူများကို လက်တွေ့ကျင့်သုံးခြင်းက စစ်မှန်သောခရစ်ယာန်များအား လူမျိုးရေးအတားအဆီးများကို ကျော်လွှားနိုင်ရန် ထောက်ကူပေးသည်။ လူသစ်ဝတ်ဆင်ထားသူတို့တွင် ‘ဟေလသလူမရှိ၊ ယုဒလူမရှိ၊ နိုင်ငံခြားသားမရှိ’ ချေ။—ကောလောသဲ ၃:၁၀၊ ၁၁။
ထို့ကြောင့် အသင်းတော်ရှိသူတိုင်းသည် စည်းလုံးမှုရှိရန် လုပ်ဆောင်သင့်သည်။ ယင်းသို့ဖြစ်နိုင်ရန် စဉ်းစားတွေးခေါ်ပုံ၊ ခံစားပုံနှင့် လုပ်ကိုင်ပုံနည်းလမ်းအသစ်များကို လိုလိုလားလားလက်ခံရန် လိုအပ်သည်။ တစ်ဦးစီ၏ အကြိုက်များကို တရားလွန် အာရုံမစိုက်ခြင်းဖြင့် လူမျိုးနှင့်နိုင်ငံကွဲပြားမှုများကြောင့် စိတ်ဝမ်းကွဲပြားမှုများမဖြစ်အောင် တားဆီးနိုင်မည်ဖြစ်သည်။ (၁ ကောရိန္သု ၁:၁၀; ၉:၁၉-၂၃) ယဉ်ကျေးမှုအားလုံး၏ အကောင်းဆုံးအပိုင်းများကို ကိုယ်တွေ့ခံစားကြည့်ပါ။ ကိုယ်ကျိုးမရှာသည့်မေတ္တာသည် ကောင်းမွန်သောဆက်ဆံရေးနှင့် စစ်မှန်သောစည်းလုံးမှု၏သော့ချက်ဖြစ်သည်ကို မမေ့ပါနှင့်။
ဘာသာခြားစကားပြော အသင်းတော်အများစုသည် ကျမ်းစာမူများကို မကြာသေးမီကမှ စတင်လေ့လာခဲ့သူအချို့နှင့် ဘာသာစကားအသစ်ကို သင်ယူနေသူများစွာပါဝင်သော အုပ်စုလေးဖြင့် အစပြုကြသည်။ ထို့ကြောင့် နားလည်မှုလွဲခြင်းသည် တည်ထောင်ပြီးသား အသင်းတော်ကြီးများတွင်ထက် ထိုကဲ့သို့သောအုပ်စုငယ်လေးများတွင် ပိုအဖြစ်များနိုင်သည်။ ထို့ကြောင့် ရင့်ကျက်သောခရစ်ယာန်များသည် အသင်းတော်တွင် ငြိမ်သက်မှုရှိဖို့ကြိုးစားသင့်သည်။ အပြောအဆိုနှင့်အပြုအမူအားဖြင့် မေတ္တာနှင့်ကြင်နာမှုပြခြင်းသည် လူသစ်များ ဝိညာဉ်ရေးဘက်သန်စွမ်းလာရန် အကျိုးပြုသောဝန်းကျင်ကို ဖြစ်ပေါ်စေနိုင်သည်။
ဘာသာခြားစကားပြောအသင်းတော်တွင် ကူညီပေးရန် စေတနာ့ဝန်ထမ်းသူများသည်လည်း အခြားသူများထံမှ မျှော်လင့်ရာတွင် မျှတမှုရှိသင့်သည်။ ထိုသို့သောအသင်းတော်တွင် အကြီးအကဲဖြစ်သူ ရစ်က် ဤသို့ပြောခဲ့သည်– “လူသစ်တချို့ဟာ ဒေသခံဘာသာစကားပြော အသင်းတော်မှာရှိတဲ့သူတွေလောက် ဖွဲ့စည်းမှုဆိုင်ရာနည်းတွေနဲ့ ကောင်းကောင်းလေ့ကျင့်မခံခဲ့ရတာ ဖြစ်နိုင်တယ်။ အဲဒီအရည်အချင်းတွေမရှိပေမဲ့ မေတ္တာနဲ့စိတ်အားထက်သန်မှုတော့ ရှိကြတယ်။ စိတ်ဝင်စားသူအများကြီးလည်း အမှန်တရားထဲဝင်လာနေကြတယ်။” အသင်းတော်ဆိုင်ရာ လုပ်ဆောင်မှုများတွင် မှန်မှန်ပါဝင်ခြင်းနှင့် အတတ်နိုင်ဆုံး သင့်ကိုယ်ကို ပေးဆပ်ခြင်းတို့ဖြင့် ဘာသာစကားသင်ယူနေရင်းနှင့်ပင် အသင်းတော်ကို အကျိုးပြုနိုင်ပါသည်။ အတူတကွလုပ်ဆောင်ခြင်းဖြင့် အသင်းတော်၏ဝိညာဉ်ရေး တိုးတက်ရန် အားလုံးကူညီပေးနိုင်ကြသည်။
ဝိညာဉ်ခွန်အား ဆက်ရှိနေခြင်း
မိခင်တစ်ဦး သူ၏ကလေးအား မှတ်ချက်ပြင်ပေးနေသည်ကို ဘာသာခြားစကားပြောသည့် အသင်းတော်မှ လူသစ်ညီအစ်ကိုတစ်ဦး ကြားမိသည်။ ကလေးက “အဖြေကိုဒီထက်တိုလို့မရဘူးလား အမေ” ဟုတောင်းဆိုသည်။ “မရဘူး။ တိုတဲ့အဖြေတွေကို ဒီစကားသင်နေတဲ့သူတွေအတွက် ချန်ထားပေးရမယ်” ဟုမိခင်ကပြန်ပြောသည်။
နှစ်၊ လချီ၍ ကောင်းမွန်စွာ ပြောဆိုဆက်သွယ်မှုမပြုနိုင်ခြင်းသည် လူကြီးတစ်ဦးအတွက် စိတ်ပိုင်း၊ စိတ်လှုပ်ရှားမှုပိုင်းနှင့် ဝိညာဉ်ရေးပိုင်းတွင် အားနည်းလာနိုင်သည်။ ယခု စပိန်စကားကို ကျွမ်းကျင်စွာပြောတတ်နေသူ ဂျဲနက်တ်က “ကျွန်မရဲ့ကန့်သတ်ချက်တွေကြောင့် လွယ်လွယ်နဲ့စိတ်ဓာတ်ကျခဲ့တယ်” ဟုဆိုသည်။ အင်္ဂလိပ်စကားသင်ယူခဲ့သူ ဟီရိုကိုကလည်း ‘ရပ်ကွက်က ခွေးတွေ၊ ကြောင်တွေတောင် အင်္ဂလိပ်စကားကို ငါ့ထက်ပိုနားလည်သေးတယ်’ ဟုတွေးမိကြောင်း အမှတ်ရသည်။ ကယ်သီက “စပိန်စကားပြောအသင်းတော်ကို ကျွန်မ ပြောင်းသွားတုန်းက ကျမ်းစာသင်အံမှုအများကြီးရှိရာကနေ တစ်ခုမှမရှိတော့တဲ့အဖြစ်ရောက်သွားပြီး ပြန်လည်ပတ်မှုတွေနဲ့ပြည့်နေတဲ့ မှတ်စုစာအုပ်မှာလည်း ဘာမှမရှိတော့ဘူး။ ကျွန်မ ဘာမှမလုပ်ဘူးလို့ပဲ ခံစားရတယ်” ဟုပြောပြသည်။
ထိုသို့သောအချိန်မျိုးတွင် အပြုသဘောထားလိုအပ်သည်။ ဟီရိုကိုက သူစိတ်ဓာတ်ကျလာချိန်၌ “တခြားသူတွေလုပ်နိုင်ရင် ငါလည်းလုပ်နိုင်ရမယ်” ဟုစဉ်းစားခဲ့သည်။ ကယ်သီက “ကောင်းကောင်းတိုးတက်နေပြီး အသင်းတော်မှာ အလုပ်အများကြီးလုပ်နေတဲ့ ကျွန်မခင်ပွန်းကိုကြည့်ပြီး သူ့ဆီကနေ အားယူတယ်။ လုပ်စရာအလုပ် အများကြီးရှိတာမှန်ပေမဲ့ ဟောပြောခြင်းနဲ့သွန်သင်ခြင်းလုပ်ငန်းအတွက် စွမ်းရည်တွေ တဖြည်းဖြည်းရှိလာပြီး အဲဒါက ကျွန်မကို ပျော်ရွှင်စေတယ်” ဟုဆိုသည်။ သူ၏ခင်ပွန်းဖြစ်သူ ဂျဲ့ဖ်က “ကြေညာချက်နဲ့ အကြီးအကဲအစည်းအဝေးမှာ ဘာပြောနေမှန်းမသိတာက စိတ်ပျက်စရာပဲ။ ရိုးသားမှုနဲ့ နှိမ့်ချမှုရှိဖို့လိုပြီး အသေးစိတ်ပြန်မေးတဲ့အခါ ညီအစ်ကိုတွေကလည်း ဝမ်းပန်းတသာ ကူညီပေးကြတယ်” ဟုထပ်လောင်းပြောပြသည်။
ဘာသာခြားစကားပြောအသင်းတော်တွင် အမှုဆောင်စဉ် ဝိညာဉ်ရေးတွင်အားမနည်းစေဖို့ သင့်ဝိညာဉ်ရေးကျန်းမာမှုကို ဦးစားပေးရန် မပျက်ကွက်ပါနှင့်။ (မဿဲ ၅:၃) ပေါ်တူဂီလယ်ကွင်းတွင် နှစ်ပေါင်းများစွာအမှုဆောင်ခဲ့သူ ကာဇူယူကီက “ဝိညာဉ်ရေးအာဟာရ အလုံအလောက်ရရှိနေဖို့ အရေးကြီးတယ်။ ဒါကြောင့် အစည်းအဝေးတွေအတွက် ဂျပန်စကားနဲ့ရော ပေါ်တူဂီစကားနဲ့ပါ မိသားစုလိုက် ပြင်ဆင်လေ့လာတယ်” ဟုဆိုသည်။ တချို့ဆိုလျှင် မိမိတို့ဘာသာစကားဖြင့်ကျင်းပသော အစည်းအဝေးများကို အခါအားလျော်စွာ တက်ကြသည်။ ထို့ပြင် လုံလောက်စွာ အနားယူရန်လည်း လိုအပ်သည်။—မာကု ၆:၃၁။
ကုန်ကျစရိတ်ကို တွက်ချက်ခြင်း
ဘာသာခြားစကားပြော အသင်းတော်တစ်ခုသို့ ပြောင်းရွှေ့ရန် သင်စဉ်းစားနေပါက ထိုသို့ပြုလုပ်ခြင်း၏ ကုန်ကျစရိတ်ကို တွက်ချက်ရမည်။ (လုကာ ၁၄:၂၈) ဤကိစ္စတွင် ထည့်စဉ်းစားရမည့် အရေးကြီးဆုံးကဏ္ဍတစ်ခုမှာ သင့်ဝိညာဉ်ရေး၊ ယေဟောဝါနှင့် သင့်ဆက်ဆံရေးတို့ဖြစ်သည်။ သင့်အခြေအနေအကြောင်း ဆုတောင်းပြောပြပါ။ သင့်အိမ်ထောင်ဖက်နှင့် သားသမီးများကို ထည့်စဉ်းစားပါ။ သင့်ကိုယ်ကို ဤသို့မေးပါ– ‘ဒီရေရှည်စီမံကိန်းကိုလက်ခံဖို့ အခြေအနေပေးသလား။ အဲဒီလိုလုပ်နိုင်တဲ့ ဝိညာဉ်ရေးနဲ့ စိတ်ဓာတ်ရေး သန်စွမ်းမှုရှိသလား။’ သင်နှင့် သင့်မိသားစု၏ ဝိညာဉ်ရေးအတွက် အကောင်းဆုံးဖြစ်မည့်အရာကို ပြုလုပ်ခြင်းက ပညာရှိလမ်းစဉ်ဖြစ်သည်။ ဘုရားသခင့်နိုင်ငံတော်သတင်းကောင်း ကြေညာသူတစ်ဦးအနေနှင့် သင့်တွင် လုပ်ကိုင်စရာများစွာရှိပြီး မည်သည့်နေရာ၌ပင် အမှုဆောင်ပါစေ ပျော်ရွှင်မှုများစွာရရှိပါလိမ့်မည်။
ဘာသာခြားစကားပြောအသင်းတော်တွင် အမှုဆောင်နိုင်သူများအတွက် ကောင်းချီးများစွာရှိသည်။ ခင်ပွန်းသည်နှင့်အတူ စပိန်စကားပြောအသင်းတော်သို့ ပြောင်းရွှေ့သွားသူ ဘာဘရာက “အဲဒါက ကျွန်မဘဝရဲ့ အပျော်ဆုံးအတွေ့အကြုံတွေထဲက တစ်ခုပါပဲ။ ကျမ်းစာအမှန်တရားကို အစကနေပြန်သင်နေရ သလိုပဲ။ အထူးသဖြင့် နိုင်ငံရပ်ခြားမှာ ခရစ်ယာန်သာသနာပြုမလုပ်နိုင်တဲ့ ကျွန်မတို့အတွက် ဒီအခွင့်ထူးရတာ ကျေးဇူးအများကြီးတင်ပါတယ်” ဟုဆိုသည်။
အသက်အရွယ်စုံမှ ထောင်နှင့်ချီသောသာမန်လူများသည် ကမ္ဘာတစ်ဝန်းတွင် နိုင်ငံတော်သတင်းကောင်း တိုးတက်ပြန့်ပွားရန် ဘာသာစကားအသစ်သင်ယူသည့် စိန်ခေါ်ချက်ကို လက်ခံလျက်ရှိသည်။ သင်သည် ထိုသူတို့အဝင်ဖြစ်ပါက ထိုသို့ပြုလုပ်ရန် လှုံ့ဆော်ပေးသည့်သင့်စိတ်ကို ဖြူစင်စွာထားပြီး အပြုသဘာထားရှိပါ။ ယင်းတို့ထက် သင့်ကြိုးပမ်းအားထုတ်မှုများ အောင်မြင်ရန် ယေဟောဝါကို ယုံကြည်ကိုးစားပါ။—၂ ကောရိန္သု ၄:၇။
[စာမျက်နှာ ၁၈ ပါ ရုပ်ပုံ]
ဆရာကောင်းတစ်ဦးသင်ကြားသော ဘာသာစကားသင်တန်းများတက်ခြင်းက အတတ်မြန်စေပြီး သင်ယူရပိုလွယ်ကူစေသည်
[စာမျက်နှာ ၂၀ ပါ ရုပ်ပုံ]
နိုင်ငံခြားဘာသာစကားတစ်ခု သင်ယူနေစဉ်သင့်ဝိညာဉ်ရေးကျန်းမာမှုကို မထိခိုက်စေပါနှင့်