ခရစ်ယာန်နှစ်ခြင်းအတွက် တောင်းဆိုချက်များကို ပြည့်မီခြင်း

ဖွင့်ပါ

ခရစ်ယာန်နှစ်ခြင်းအတွက် တောင်းဆိုချက်များကို ပြည့်မီခြင်း

‘အကျွန်ုပ်ကို နှစ်ခြင်းမခံစေခြင်းငှာ မည်သည့်အကြောင်းဆီးတားပါသနည်း။’—တမန်တော် ၈:၃၆။

၁၊ ၂။ ဖိလိပ္ပုသည် အဲသယောပိအမတ်နှင့် မည်သို့စကားစပြောခဲ့သနည်း။ ဤသူတွင် ဝိညာဉ်ရေးစိတ်ရှိကြောင်း အဘယ်အရာက ဖော်ပြသနည်း။

ယေရှုကွယ်လွန်ပြီး တစ်နှစ်၊ နှစ်နှစ်တွင် အစိုးရအရာရှိတစ်ဦးသည် ယေရုရှလင်မြို့မှ ဂါဇမြို့သို့သွားရာလမ်းပေါ် တောင်မျက်နှာဘက် ခရီးနှင်နေသည်။ မြင်းရထားသည် ပျင်းရိငြီးငွေ့ဖွယ် မိုင်တစ်ထောင်ခရီးကို ရှေ့ဆက်သွားရမည့်ပုံရှိသည်။ အဆိုပါစိတ်အားထက်သန်သူသည် ယေဟောဝါအား ဝတ်ပြုကိုးကွယ်ရန် အဲသယောပိပြည်မှ ယေရုရှလင်မြို့သို့ တောက်လျှောက် ခရီးနှင်လာခဲ့သည်။ ဝေးလံသောအပြန်ခရီးတွင် ဘုရားသခင့်စကားတော်ကို ဖတ်ရှုခြင်းဖြင့် သူ၏အချိန်ကို ပညာရှိစွာအသုံးပြုခဲ့၏။ ဤမျှ ယုံကြည်ခြင်းရှိသူပေတည်း။ ယေဟောဝါသည် ဤစိတ်ရင်းမှန်သူကို သတိပြုမိပြီး သူ့ကိုဟောပြောရန် တပည့်ဖြစ်သူဖိလိပ္ပုကို ကောင်းကင်တမန်မှတစ်ဆင့် ညွှန်ကြားခဲ့သည်။—တမန်တော် ၈:၂၆-၂၈။

^၂အဲသယောပိအမတ်သည် ထိုခေတ်ကထုံးစံအတိုင်း အသံကျယ်ကျယ်ဖြင့် စာဖတ်နေသောကြောင့် ဖိလိပ္ပုသည် သူနှင့် လွယ်လွယ်ကူကူ စကားစပြောနိုင်ခဲ့သည်။ ထို့ကြောင့် သူသည် ဟေရှာယကျမ်းလိပ်ကို ဖတ်နေကြောင်း ဖိလိပ္ပုကြားနိုင်ခဲ့ခြင်းဖြစ်သည်။ ဖိလိပ္ပုက “ဖတ်သောအရာကို နားလည်ပါ၏လော” ဟူ၍ ရိုးရှင်းသောမေးခွန်းဖြင့် သူ၏စိတ်ဝင်စားမှုကို နှိုးဆွလိုက်၏။ သို့နှင့် ဟေရှာယ ၅၃:၇၊ ၈ ကိုဆွေးနွေးဖြစ်ခဲ့ကြသည်။ နောက်ဆုံးတွင် ဖိလိပ္ပုသည် “ယေရှု၏အကြောင်းတည်းဟူသော ဧဝံဂေလိတရားကို ဟောလေ၏။”—တမန်တော် ၈:၂၉-၃၅။

၃၊ ၄။ (က) ဖိလိပ္ပုသည် အဲသယောပိအမတ်ကို အဘယ်ကြောင့် မဆိုင်းမတွ နှစ်ခြင်းပေးခဲ့သနည်း။ (ခ) ယခု အဘယ်မေးခွန်းများကို သုံးသပ်ကြမည်နည်း။

^၃မကြာမီ အဲသယောပိအမတ်သည် ဘုရားသခင်၏ရည်ရွယ်ချက်တွင် ယေရှုပါဝင်သည့်ကဏ္ဍအပြင် ခရစ်တော်၏ နှစ်ခြင်းခံပြီးသောတပည့် ဖြစ်ဖို့လိုကြောင်းကိုလည်း သဘောပေါက်ခဲ့သည်။ ရေအိုင်ကိုအခန့်သင့်တွေ့ရှိသောအခါ သူက ‘အကျွန်ုပ်ကို နှစ်ခြင်းမခံစေခြင်းငှာ မည်သည့်အကြောင်းဆီးတားပါသနည်း’ ဟုဖိလိပ္ပုကိုမေးလေသည်။ ၎င်းတို့သည် ထူးခြားသောအခြေအနေများဖြစ်၏။ ဤသူသည် ဂျူးဘာသာပြောင်းဝင်လာသူအနေနှင့် ဘုရားသခင်ကို ဝတ်ပြုကိုးကွယ်နှင့်သော ယုံကြည်ခြင်းရှိသူတစ်ဦးဖြစ်သည်။ သူသည် နှစ်ခြင်းခံရန် အခွင့်အရေးထပ်ရဖို့ အချိန်ကြာမြင့်စွာ စောင့်ရဖွယ်ရှိပေမည်။ ယင်းထက်ပို၍အရေးကြီးသည်မှာ ဤသူသည် ဘုရားသခင်တောင်းဆိုရာကို သဘောပေါက်ပြီး စိတ်နှလုံးအကြွင်းမဲ့ တုံ့ပြန်လိုခဲ့သည်။ ဖိလိပ္ပုသည် အဲသယောပိအမတ်၏တောင်းဆိုချက်ကို ဝမ်းသာအားရ သဘောတူလိုက်သည်။ သူနှစ်ခြင်းခံပြီးနောက် “ဝမ်းမြောက်ဝမ်းသာခြင်းနှင့် မိမိသွားရသောလမ်းကိုသွားလေ၏။” သူသည် သူ၏နိုင်ငံတွင် သတင်းကောင်းကို ထက်သန်စွာ ဟောပြောမည်မှာ သေချာ၏။—တမန်တော် ၈:၃၆-၃၉။

^၄အပ်နှံခြင်းနှင့် နှစ်ခြင်းတို့ကို ပေါ့ပေါ့ဆဆ သို့မဟုတ် အလျင်စလိုမပြုလုပ်သင့်သော်လည်း သမ္မာကျမ်းစာအမှန်တရားကို ကြားသိပြီး မကြာမီ နှစ်ခြင်းခံခဲ့ကြသည့် ဖြစ်ရပ်များရှိကြောင်း အဲသယောပိအမတ်၏ပုံနမူနာက ဖော်ပြ၏။ * သို့ဖြစ်၍ အောက်ပါမေးခွန်းများကို ဆင်ခြင်သုံးသပ်ခြင်းသည် လျောက်ပတ်ပေ၏– နှစ်ခြင်းခံရန် မည်သို့ပြင်ဆင်သင့်သနည်း။ အဘယ်အသက်အရွယ်တွင် နှစ်ခြင်းခံသင့်သနည်း။ နှစ်ခြင်းမခံမီ အဘယ်ဝိညာဉ်ရေးတိုးတက်မှုကို ထင်ရှားပြသင့်သနည်း။ ထို့ထက်ကား၊ ယေဟောဝါသည် မိမိ၏ကျေးကျွန်များကို နှစ်ခြင်းခံရန် အဘယ်ကြောင့် တောင်းဆိုတော်မူသနည်း။

လေးနက်သောကတိ

၅၊ ၆။ (က) ရှေးခေတ်က ဘုရားသခင်၏လူတို့သည် ယေဟောဝါ၏မေတ္တာတော်ကို မည်သို့တုံ့ပြန်ခဲ့ကြသနည်း။ (ခ) ကျွန်ုပ်တို့ နှစ်ခြင်းခံပြီးသည်နှင့် ဘုရားသခင်နှင့် အဘယ်ရင်းနှီးသောဆက်ဆံရေးကို ရရှိနိုင်သနည်း။

^၅ယေဟောဝါသည် ဣသရေလလူတို့ကို အီဂျစ်ပြည်မှ ကယ်လွှတ်ပြီးနောက် သူတို့ကို မိမိ၏ ‘အထူးပိုင်ဆိုင်ရာ’ အဖြစ်လက်ခံရန်၊ ချစ်မြတ်နိုးပြီး ကာကွယ်ပေးရန်၊ “သန့်ရှင်းသောလူမျိုး” အဖြစ်သတ်မှတ်ရန် ကမ်းလှမ်းခဲ့သည်။ သို့သော် သူတို့သည် အဆိုပါကောင်းချီးများကိုရရှိရန် ဘုရားသခင်၏မေတ္တာတော်ကို တိကျခိုင်မာသောနည်းဖြင့် တုံ့ပြန်ကြရမည်။ သူတို့သည် ‘ထာဝရဘုရားသခင် မိန့်တော်မူသမျှတို့ကို’ ပြုပါမည်ဟု သဘောတူကာ ကိုယ်တော်နှင့် ပဋိညာဉ်ဖွဲ့ ခြင်းဖြင့် တုံ့ပြန်ခဲ့ကြသည်။ (ထွက်မြောက်ရာ ၁၉:၄-၉) ပထမရာစုသို့ရောက်သောအခါ ယေရှုသည် လူမျိုးတကာတို့ကို တပည့်ဖြစ်စေရန်နှင့် မိမိသွန်သင်ချက်ကို သက်ဝင်ယုံကြည်သူများအား နှစ်ခြင်းပေးရန် နောက်လိုက်များအား မိန့်မှာခဲ့သည်။ ဘုရားသခင်နှင့် ကောင်းသောဆက်ဆံရေးရရှိရန် ယေရှုခရစ်ကိုယုံကြည်ပြီး နှစ်ခြင်းခံဖို့လိုသည်။—မဿဲ ၂၈:၁၉၊ ၂၀; တမန်တော် ၂:၃၈၊ ၄၁။

^၆ယေဟောဝါသည် မိမိအား ဝတ်ပြုပါမည်ဟု သစ္စာကတိပြုပြီး စောင့်ထိန်းသူများကို ကောင်းချီးပေးကြောင်း အဆိုပါကျမ်းစာမှတ်တမ်းများက ဖော်ပြ၏။ ခရစ်ယာန်များအတွက် အပ်နှံခြင်းနှင့်နှစ်ခြင်းသည် ယေဟောဝါ၏ကောင်းချီးရရှိစေသည့် အရေးပါသောခြေလှမ်းများဖြစ်သည်။ ကိုယ်တော်၏နည်းလမ်းများကို လိုက်လျှောက်ပြီး ကိုယ်တော်၏လမ်းညွှန်မှုကို ကြိုးစားရှာရန် ကျွန်ုပ်တို့ ဆုံးဖြတ်ထားကြသည်။ (ဆာလံ ၄၈:၁၄) ထို့ကြောင့် ယေဟောဝါသည် ပုံဆောင်သဘောအရ ကျွန်ုပ်တို့၏လက်ကို ကိုင်ဆွဲထားပြီး ကျွန်ုပ်တို့လျှောက်သင့်သည့်လမ်းကို ပို့ဆောင်လမ်းပြတော်မူ၏။—ဆာလံ ၇၃:၂၃; ဟေရှာယ ၃၀:၂၁; ၄၁:၁၀၊ ၁၃။

၇။ အပ်နှံခြင်းနှင့် နှစ်ခြင်းတို့သည် အဘယ်ကြောင့် ကိုယ်ပိုင်ဆုံးဖြတ်ချက်ဖြစ်ရမည်နည်း။

^၇အဆိုပါခြေလှမ်းများလှမ်းရန် ကျွန်ုပ်တို့ကို လှုံ့ဆော်ပေးသည့်အရာမှာ ယေဟောဝါကို ချစ်မြတ်နိုးပြီး ကိုယ်တော်၏အမှုတော်ကို ထမ်းဆောင်လိုစိတ်ဖြစ်သင့်သည်။ တစ်ဦးတစ်ယောက်က သင့်ကို ‘မင်းကျမ်းစာလေ့လာနေတာ အတော်ကြာပြီ’ ဟု ပြောဆို၍ဖြစ်စေ၊ သင့်မိတ်ဆွေများက နှစ်ခြင်းခံ၍ဖြစ်စေ နှစ်ခြင်းခံခြင်းမျိုး မဖြစ်သင့်ချေ။ အပ်နှံပြီး နှစ်ခြင်းခံရန် စဉ်းစားဖို့ မိဘများနှင့် ရင့်ကျက်သောခရစ်ယာန်အချို့ အားပေးတတ်ကြသည်။ တမန်တော်ပေတရုသည် ပင်တေကုတ္တေပွဲနေ့တွင် မိမိဟောပြောသောစကားကို ကြားနာသူတို့အား ‘နှစ်ခြင်းခံ’ ရန်တိုက်တွန်းခဲ့၏။ (တမန်တော် ၂:၃၈) သို့သော် ကျွန်ုပ်တို့၏အပ်နှံခြင်းသည် ကိုယ်ရေးကိုယ်တာကိစ္စဖြစ်ပြီး ကျွန်ုပ်တို့အတွက် မည်သူမျှ အပ်နှံမပေးနိုင်ချေ။ ဘုရားသခင့်အလိုတော်ဆောင်ရန် ကျွန်ုပ်တို့ကိုယ်တိုင် ဆုံးဖြတ်ချက်ချရမည်။—ဆာလံ ၄၀:၈။

နှစ်ခြင်းအတွက် အလုံအလောက် ပြင်ဆင်မှု

၈၊ ၉။ (က) သမ္မာကျမ်းစာအရ နို့စို့အရွယ်ကို နှစ်ခြင်းပေးခြင်းသည် အဘယ်ကြောင့် လက်မခံနိုင်ဖွယ်ဖြစ်သနည်း။ (ခ) လူငယ်များသည် နှစ်ခြင်းမခံမီ အဘယ်ဝိညာဉ်ရေးတိုးတက်မှု ပြုလုပ်သင့်သနည်း။

^၈ကလေးများတွင် အသိပညာပေါ်အခြေခံ၍ အပ်နှံနိုင်စွမ်းရှိသလော။ သမ္မာကျမ်းစာက နှစ်ခြင်းခံရမည့်အသက်အရွယ်ကို မဖော်ပြထားချေ။ သို့တိုင် နို့စို့ကလေးများသည် ယုံကြည်သူများမဖြစ်လာနိုင်၊ ယုံကြည်ခြင်းမတင်ပြနိုင်၊ ဘုရားသခင်ထံ အပ်နှံခြင်းမပြုနိုင်ကြပေ။ (တမန်တော် ၈:၁၂) ပထမရာစုခရစ်ယာန်များနှင့်ပတ်သက်၍ သမိုင်းပညာရှင် ဩဂတ်စ်တပ်စ် နီယန်းဒါးက ခရစ်ယာန်ဘာသာတရားနှင့် ချာ့ခ်ျတို့၏ အထွေထွေသမိုင်းစာအုပ်တွင် ဤသို့ဖော်ပြထားသည်– “အစပထမတွင် အရွယ်ရောက်သူတို့ကိုသာ နှစ်ခြင်းပေးခဲ့ကြသည်။ အကြောင်းမှာ နှစ်ခြင်းနှင့် ယုံကြည်ခြင်းတို့ အနီးကပ်ဆက်စပ်နေသည်ကို လူကြီးများသာ သဘောပေါက်သောကြောင့်ဖြစ်သည်။”

^၉လူငယ်များနှင့်စပ်လျဉ်း၍ အချို့သည် ငယ်ရွယ်စဉ်ကတည်းက ဝိညာဉ်ရေးရာများကို အတိုင်းအတာတစ်ခုအထိ သိနားလည်ပြီး အချို့မှာမူ အချိန်အတန်ကြာမှ သိနားလည်လာကြသည်။ သို့သော် လူငယ်တစ်ဦးသည် နှစ်ခြင်းမခံမီ လူကြီးများကဲ့သို့ပင် ယေဟောဝါနှင့် နှစ်ကိုယ်ကြားဆက်ဆံရေးရှိပြီး သမ္မာကျမ်းစာအခြေခံသဘောတရားများကို ကောင်းစွာသဘောပေါက်ကာ အပ်နှံခြင်းတွင် အဘယ်အရာပါဝင်ကြောင်း ရှင်းရှင်းလင်းလင်း နားလည်ထားသင့်သည်။

၁၀။ အပ်နှံခြင်းနှင့် နှစ်ခြင်းမတိုင်မီ အဘယ်ခြေလှမ်းများကို လှမ်းရမည်နည်း။

^၁၀ယေရှုသည် မိမိပေးသမျှသောပညတ်တို့ကို လူသစ်များအား သွန်သင်ပေးရန် တပည့်များကို ညွှန်ကြားခဲ့သည်။ (မဿဲ ၂၈:၂၀) ထို့ကြောင့် လူသစ်များသည် အမှန်တရားနှင့်ဆိုင်သည့် တိကျမှန်ကန်သောအသိပညာကို ဦးစွာ ဆည်းပူးဖို့လိုသည်။ သို့မှသာ ယေဟောဝါနှင့် သမ္မာကျမ်းစာအပေါ် သူတို့၏ယုံကြည်ခြင်းကို တိုးပွားစေနိုင်မည်။ (ရောမ ၁၀:၁၇; ၁ တိမောသေ ၂:၄; ဟေဗြဲ ၁၁:၆) ထို့ပြင် ကျမ်းစာအမှန်တရားသည် လူတစ်ဦး၏နှလုံးကိုထိမိသောအခါ ယင်းက သူ၏ဘဝလမ်းစဉ်ဟောင်းအတွက် နောင်တယူပြီး ပြောင်းလဲရန် လှုံ့ဆော်ပေးသည်။ (တမန်တော် ၃:၂၀) နောက်ဆုံးတွင် သူသည် ယေရှုမိန့်မှာခဲ့သည့်အတိုင်း ယေဟောဝါထံ အပ်နှံပြီး နှစ်ခြင်းခံလိုသည့်အဆင့်သို့ ရောက်လာသည်။

၁၁။ နှစ်ခြင်းမခံမီ ဟောပြောခြင်းလုပ်ငန်းတွင် မှန်မှန်ပါဝင်ခြင်းသည် အဘယ်ကြောင့် အရေးကြီးသနည်း။

^၁၁နှစ်ခြင်းမခံမီလှမ်းရမည့် အရေးကြီးသော နောက်ခြေလှမ်းမှာ ဘုရားသခင့်နိုင်ငံတော်သတင်းကောင်း ဟောပြောခြင်းတွင် ပါဝင်ခြင်းဖြစ်သည်။ ယင်းသည် ဤနောက်ဆုံးကာလတွင် မိမိလူတို့ကို ယေဟောဝါ ပေးအပ်ထားသော အရေးကြီးဆုံးလုပ်ငန်းဖြစ်သည်။ (မဿဲ ၂၄:၁၄) သို့ဖြစ်၍ နှစ်ခြင်းမခံရသေးသော ကြေညာသူများပင် မိမိတို့၏ယုံကြည်ခြင်းကို သူတစ်ပါးအား ပြောပြရသည့်အတွက် ပျော်ရွှင်နိုင်ကြသည်။ ဤလုပ်ငန်းတွင် သူတို့ပါဝင်ခြင်းက နှစ်ခြင်းခံပြီးနောက် လယ်ကွင်းဓမ္မအမှုတွင် မှန်မှန်နှင့် ထက်သန်စွာပါဝင်ရန်လည်း သူတို့ကို အသင့်ပြင်ဆင်ပေးသည်။—ရောမ ၁၀:၉၊ ၁၀၊ ၁၄၊ ၁၅။

သင့်ကို နှစ်ခြင်းမခံစေခြင်းငှာ တစ်စုံတစ်ရာက ဆီးတားသလော

၁၂။ လူအချို့ကို နှစ်ခြင်းမခံစေခြင်းငှာ အဘယ်အရာက ဆီးတားနိုင်သနည်း။

^၁၂အချို့သူများသည် နှစ်ခြင်းခံပြီးနောက် လိုက်ပါလာသည့်တာဝန်ကို လက်မခံလို၍ နှစ်ခြင်းမခံခြင်းဖြစ်ပေမည်။ ယေဟောဝါ၏စံနှုန်းများနှင့်အညီ နေထိုင်ရန် မိမိတို့ဘဝတွင် သိသာထင်ရှားသောပြောင်းလဲမှုများ ပြုလုပ်ရမည်ကို သူတို့သဘောပေါက်ကြသည်။ သို့မဟုတ် နှစ်ခြင်းခံပြီးနောက် ဘုရားသခင့်တောင်းဆိုချက်အတိုင်း နေထိုင်ရန် အခက်တွေ့မည်ကို စိုးရွံ့ကြပေမည်။ အချို့က “နောင်တစ်နေ့ အမှားလုပ်မိရင် အသင်းတော်က နှင်ထုတ်ခံရနိုင်တယ်” ဟုပင် ဆင်ခြင်ကြပေမည်။

၁၃။ ယေရှုခေတ်မှ အချို့သူများကို ယေရှု၏နောက်လိုက်များဖြစ်မလာရန် အဘယ်အရာက ဆီးတားခဲ့သနည်း။

^၁၃ယေရှုခေတ်တွင် လူတချို့သည် ကိုယ်ကျိုးရှာခြင်းနှင့် မိသားစုနှောင်ကြိုးများကို မိမိတို့အား ကိုယ်တော်၏တပည့်များဖြစ်မလာရန် အတားအဆီးဖြစ်ခွင့်ပြုလိုက်သည်။ ကျမ်းတတ်တစ်ဦးက ယေရှုကြွတော်မူရာအရပ်ရပ်သို့ လိုက်ပါမည်ဟု လျှောက်လေ၏။ သို့သော် ယေရှုက မိမိတွင် ခေါင်းချရာမျှမရှိသည့် အချိန်အခါများစွာရှိခဲ့ကြောင်း မိန့်ဆိုခဲ့သည်။ နားထောင်နေသူနောက်တစ်ဦးကို မိမိနောက်လိုက်ရန် ယေရှုဖိတ်ခေါ်သောအခါ ထိုသူက ဖခင်ကို ဦးစွာသွား၍ “သင်္ဂြိုဟ်” ရသောအခွင့်ကိုပေးတော်မူပါဟု လျှောက်လေသည်။ သူသည် ယေရှုနောက်လိုက်ခြင်းထက် အိမ်တွင်နေ၍ ဖခင်သေဆုံးသည့်အထိစောင့်ပြီး လိုအပ်လာပါက မိသားစုတာဝန်ထမ်းရန် ပိုလိုလားဖွယ်ရှိသည်။ နောက်ဆုံးတွင် တတိယလူက ယေရှုနောက်မလိုက်မီ မိမိ၏မိသားစုကို နှုတ်ဆက်ပါရစေဟု လျှောက်လေသည်။ ဤသို့အချိန်ဆွဲနေခြင်းကို “နောက်သို့လှည့်၍ကြည့်” ခြင်းနှင့်တူသည်ဟု ယေရှုဖော်ပြခဲ့သည်။ သို့ဖြစ်၍ ထိုသို့အချိန်ဆွဲလိုသူများသည် မိမိတို့၏ခရစ်ယာန်တာဝန်ကို ရှောင်လွှဲရန် အမြဲဆင်ခြေဆင်လက်ပေးတတ်ပုံရှိ၏။—လုကာ ၉:၅၇-၆၂။

၁၄။ (က) ပေတရု၊ အန္ဒြေ၊ ယာကုပ်နှင့် ယောဟန်တို့သည် လူကိုမျှားသောတံငါသည်များဖြစ်ရန် ယေရှုဖိတ်ခေါ်သည့်အခါ မည်သို့တုံ့ပြန်ခဲ့ကြသနည်း။ (ခ) ယေရှု၏ထမ်းပိုးကိုထမ်းရန် အဘယ်ကြောင့် မတွန့်ဆုတ်သင့်သနည်း။

^၁၄ပေတရု၊ အန္ဒြေ၊ ယာကုပ်နှင့် ယောဟန်တို့၏ပုံသက်သေမှာမူ အလွန်ကွာခြားသည်။ မိမိနောက်လိုက်ပြီး လူကိုမျှားသောတံငါသည်များဖြစ်ရန် ယေရှုဖိတ်ခေါ်သည့်အခါ သမ္မာကျမ်းစာက ဤသို့ဖော်ပြသည်– “ထိုသူတို့သည် ချက်ချင်းပိုက်ကွန်ကိုစွန့်ပစ်၍ နောက်တော်သို့လိုက်ကြ၏။” (မဿဲ ၄:၁၉-၂၂) သူတို့သည် ထိုသို့ချက်ချင်း ဆုံးဖြတ်လိုက်ခြင်းဖြင့် နောက်ပိုင်း ယေရှုဤသို့မိန့်ဆိုရာကို သူတို့ကိုယ်တိုင် ကြုံတွေ့ခဲ့ရသည်– “ငါ့ထမ်းပိုးကိုတင်၍ထမ်းကြလော့။ ငါ့ထံ၌နည်းခံကြလော့။ ငါသည် နူးညံ့သိမ်မွေ့နှိမ့်ချသော စိတ်သဘောရှိ၏။ သင်တို့စိတ်နှလုံးသည် သက်သာခြင်းကိုရလိမ့်မည်။ အကြောင်းမူကား ငါ့ထမ်းပိုးသည် ထမ်းလွယ်၏။ ငါ့ဝန်လည်းပေါ့၏။” (မဿဲ ၁၁:၂၉၊ ၃၀) နှစ်ခြင်းခံခြင်းနှင့်အတူ ထမ်းပိုးဖြစ်သောတာဝန် လိုက်ပါလာမည်ဖြစ်သော်လည်း ၎င်းသည် ကျွန်ုပ်တို့ကို အလွန်လန်းဆန်းစေမည့် ထမ်းလွယ်ပြီးပေါ့ပါးသော ထမ်းပိုးဖြစ်သည်ဟု ယေရှု အာမခံတော်မူ၏။

၁၅။ ဘုရားသခင်ထောက်မပေးမည်ကို ကျွန်ုပ်တို့ယုံကြည်စိတ်ချနိုင်ကြောင်း မောရှေနှင့် ယေရမိတို့၏ပုံနမူနာများက မည်သို့ဖော်ပြသနည်း။

^၁၅နှစ်ခြင်းနှင့်အတူ လိုက်ပါလာသည့်တာဝန်ကို ထမ်းဆောင်နိုင်မည်မဟုတ်ဟု ခံစားရခြင်းက သဘာဝကျပါသည်။ မောရှေနှင့် ယေရမိတို့သည် အစပိုင်းတွင် ယေဟောဝါပေးအပ်သောတာဝန်ကို ထမ်းဆောင်နိုင်မည်မဟုတ်ဟု ခံစားခဲ့ရသည်။ (ထွက်မြောက်ရာ ၃:၁၁; ယေရမိ ၁:၆) သူတို့ကို ဘုရားသခင် မည်သို့စိတ်ချစေခဲ့သနည်း။ ကိုယ်တော်က “ငါသည် သင့်ဘက်၌ရှိလိမ့်မည်” ဟုမောရှေကို မိန့်ဆိုခဲ့သည်။ “သင့်ကိုကယ်နုတ်ခြင်းငှာ သင်နှင့်အတူ ငါရှိသည်” ဟုယေရမိကို ကတိပြုခဲ့၏။ (ထွက်မြောက်ရာ ၃:၁၂; ယေရမိ ၁:၈) ကျွန်ုပ်တို့လည်း ဘုရားသခင်ထောက်မပေးမည်ကို ယုံကြည်စိတ်ချနိုင်သည်။ ဘုရားသခင်ကိုချစ်ပြီး ယုံကြည်ကိုးစားမည်ဆိုလျှင် ကျွန်ုပ်တို့၏အပ်နှံမှုနှင့်အညီ နေထိုင်နိုင်မနိုင်ကို သံသယရှိတော့မည်မဟုတ်ချေ။ “ချစ်ခြင်းမေတ္တာ၌ ကြောက်ရွံ့ခြင်းမရှိ။ . . . စုံလင်သောမေတ္တာသည် ကြောက်ရွံ့ခြင်းကို ပယ်ရှားတတ်၏” ဟုတမန်တော်ယောဟန် ရေးသားခဲ့သည်။ (၁ ယောဟန် ၄:၁၈၊ သမ္မာ) ကလေးငယ်တစ်ဦးသည် မိမိဘာသာလမ်းလျှောက်သည့်အခါ ကြောက်ရွံ့မည်ဖြစ်သော်လည်း ဖခင်၏လက်ကိုကိုင်၍လျှောက်ရသည့်အခါ ယုံကြည်စိတ်ချမှုရှိ၏။ ထိုနည်းတူ ယေဟောဝါကို စိတ်နှလုံးအကြွင်းမဲ့ကိုးစားလျှင် ကျွန်ုပ်တို့၏ “လမ်းခရီးတို့ကို ပဲ့ပြင်တော်မူမည်” ဟုကိုယ်တော် ကတိပြု၏။—သု. ၃:၅၊ ၆။

ဂုဏ်ယူဖွယ်အခါသမယ

၁၆။ နှစ်ခြင်းတွင် အဘယ်ကြောင့် ရေတွင် စုံးစုံးနှစ်မြှုပ်ခြင်းပါဝင်သနည်း။

^၁၆ခရစ်ယာန်နှစ်ခြင်း၏အရေးပါမှုကို ရှင်းပြသည့် ကျမ်းစာဆိုင်ရာဟောပြောချက်ပြီးမှ နှစ်ခြင်းပေးလေ့ရှိသည်။ ဤဟောပြောချက်၏နိဂုံးပိုင်းတွင် နှစ်ခြင်းခံမည့်သူများသည် နှစ်ခြင်းမေးခွန်းနှစ်ခုကိုဖြေဆို၍ သူတို့၏ယုံကြည်ခြင်းကို လူထုရှေ့တွင်ကြေညာရသည်။ (ရောမ ၁၀:၁၁; စာမျက်နှာ ၂၂ မှလေးထောင့်ကွက်ကိုရှု။) ထို့နောက် ယေရှုကိုယ်တော်တိုင် ပုံသက်သေပြခဲ့သည့်အတိုင်း နှစ်ခြင်းခံမည့်သူများကို ရေထဲတွင် နှစ်မြှုပ်ပေးကြသည်။ ယေရှုနှစ်ခြင်းခံပြီးနောက် “ရေမှပေါ်ထ” သို့မဟုတ် “ရေထဲကတက်ကြွ” သည်ဟု သမ္မာကျမ်းစာက ဖော်ပြ၏။ (မဿဲ ၃:၁၆; မာကု ၁:၁၀၊ သမ္မာ) နှစ်ခြင်းဆရာယောဟန်သည် ယေရှုကို ရေထဲတွင် စုံးစုံးနှစ်မြှုပ်ခဲ့ကြောင်း ထင်ရှား၏။ * စုံးစုံးနှစ်မြှုပ်လိုက်ခြင်းသည် ကျွန်ုပ်တို့၏ဘဝတွင် ထူးခြားသောပြောင်းလဲမှုဖြစ်သည့် ကျွန်ုပ်တို့၏ဘဝလမ်းစဉ်ဟောင်းကို သေဆုံးစေပြီး ဘုရားသခင်၏လုပ်ငန်းတော်တွင် ဘဝအသစ်စခြင်းကို ပုံဆောင်သည်။

၁၇။ နှစ်ခြင်းခံမည့်သူများနှင့် ရှုစားသူတို့သည် အဆိုပါသမယကို မည်သို့ဂုဏ်တင်နိုင်ကြသနည်း။

^၁၇နှစ်ခြင်းခံချိန်သည် အလွန်အရေးကြီးသည့်ပြင် ရွှင်လန်းဖွယ်အခါသမယလည်းဖြစ်၏။ ယေရှုသည် မိမိကို ယောဟန်နှစ်ခြင်းပေးချိန်တွင် ဆုတောင်းနေသည်ဟု သမ္မာကျမ်းစာကဖော်ပြ၏။ (လုကာ ၃:၂၁၊ ၂၂) ဤပုံနမူနာနှင့်အညီ ယနေ့ နှစ်ခြင်းခံမည့်သူများသည် လျောက်ပတ်သောအမူအကျင့်ကို ဖော်ပြသင့်သည်။ ကျွန်ုပ်တို့၏နေ့စဉ်အသက်တာတွင် ဣန္ဒြေရှိရှိဝတ်စားရန် သမ္မာကျမ်းစာက တိုက်တွန်းထားသောကြောင့် ကျွန်ုပ်တို့နှစ်ခြင်းခံသည့်နေ့တွင် ဤဆုံးမစကားကို သာ၍ပင် ဂရုစိုက်သင့်သည်။ (၁ တိမောသေ ၂:၉) ရှုစားသူများသည်လည်း နှစ်ခြင်းဟောပြောချက်ကို ဂရုတစိုက်နားထောင်ပြီး စနစ်တကျကြည့်ခြင်းဖြင့် လေးစားမှုတင်ပြနိုင်ကြသည်။—၁ ကောရိန္သု ၁၄:၄၀။

နှစ်ခြင်းခံပြီးသောတပည့်များ ရရှိသည့်ကောင်းချီးများ

၁၈၊ ၁၉။ နှစ်ခြင်းခံခြင်းကြောင့် အဘယ်အခွင့်ထူးများနှင့် ကောင်းချီးများကို ရရှိသနည်း။

^၁၈ကျွန်ုပ်တို့သည် ဘုရားသခင်ထံ အပ်နှံပြီး နှစ်ခြင်းခံလိုက်သည်နှင့် အထူးမိသားစုဝင်တစ်ဦးဖြစ်လာကြသည်။ ဦးစွာ၊ ယေဟောဝါသည် ကျွန်ုပ်တို့၏ခမည်းတော်နှင့် မိတ်ဆွေဖြစ်လာ၏။ နှစ်ခြင်းမခံမီက ကျွန်ုပ်တို့သည် ဘုရားသခင်နှင့် ကင်းကွာနေကြသော်လည်း ယခု မိတ်သဟာယဖွဲ့နိုင်ကြပြီ။ (၂ ကောရိန္သု ၅:၁၉; ကောလောသဲ ၁:၂၀) ခရစ်တော်၏ပူဇော်ရာယဇ်မှတစ်ဆင့် ဘုရားသခင်ထံ ကျွန်ုပ်တို့ချဉ်းကပ်ကြရာ ဘုရားသခင်ကလည်း ကျွန်ုပ်တို့ထံ ချဉ်းကပ်တော်မူ၏။ (ယာကုပ် ၄:၈) ယေဟောဝါသည် မိမိနာမတော်ကိုအသုံးပြုပြီး ခံယူထားသူတို့၏စကားသံကို အာရုံစိုက်နားထောင်ကြောင်း၊ သူတို့၏အမည်များကို ကိုယ်တော်၏အောက်မေ့ရာစာစောင်တွင် ရေးမှတ်ထားကြောင်း ပရောဖက်မာလခိက ဖော်ပြထားသည်။ ဘုရားသခင်က “ထိုသူတို့သည် . . . ငါပိုင်ထိုက်သောဘဏ္ဍာတော်ဖြစ်ကြလိမ့်မည်။ အဘ၏အမှုကိုဆောင်သောသားကို အဘနှမြောသကဲ့သို့ ထိုသူတို့ကို ငါနှမြောမည်” ဟုမိန့်ဆို၏။—မာလခိ ၃:၁၆-၁၈။

^၁၉နှစ်ခြင်းခံခြင်းက ကမ္ဘာချီညီအစ်ကိုအသင်းအပင်းဝင်တစ်ဦးလည်း ဖြစ်လာစေနိုင်သည်။ ကိုယ်ကျိုးစွန့်ခြင်းကြောင့် ခရစ်တော်၏တပည့်များ ရရှိမည့်ကောင်းချီးများကို တမန်တော်ပေတရု မေးသောအခါ ယေရှုက “အကြင်သူသည် ငါ၏နာမကြောင့် အိမ်၊ လယ်၊ ညီအစ်ကို၊ နှမ၊ မိဘ၊ သားမယားတည်းဟူသော တစ်ပါးပါးကိုစွန့်၏။ ထိုသူသည် အဆတစ်ရာသောအကျိုးကိုရ၍ ထာဝရအသက်ကို အမွေခံရလတ္တံ့” ဟုကတိပေးခဲ့သည်။ (မဿဲ ၁၉:၂၉) နှစ်အတန်ကြာပြီးနောက် ပေတရုသည် “ဤလောက၌” တိုးများလာသည့် “ညီအစ်ကိုအသင်းအပင်းတစ်ခုလုံး” အကြောင်းကို ရေးသားခဲ့သည်။ ပေတရုသည် မေတ္တာရှိညီအစ်ကိုအသင်းအပင်း၏ ထောက်မမှုနှင့် ကောင်းချီးများကို ကိုယ်တိုင်ခံစားခဲ့ရသကဲ့သို့ ကျွန်ုပ်တို့လည်း ခံစားနိုင်ပါသည်။—၁ ပေတရု ၂:၁၇၊ ကဘ; ၅:၉၊ သမ္မာ။

၂၀။ နှစ်ခြင်းခံခြင်းဖြင့် အဘယ်ထူးမြတ်လှသောအနာဂတ်ကို ရရှိစေသနည်း။

^၂၀ထို့ပြင် ယေရှုက မိမိနောက်လိုက်သူများသည် “ထာဝရအသက်ကို အမွေခံရ” မည်ဟု မိန့်ဆိုခဲ့သည်။ အပ်နှံပြီး နှစ်ခြင်းခံခြင်းဖြင့် ဘုရားသခင်၏ကမ္ဘာသစ်တွင်ရရှိမည့် ထာဝရအသက်ဖြစ်သော “မှန်သောအသက်ကိုဝင်စား” ခွင့်ရရှိနိုင်သည်။ (၁ တိမောသေ ၆:၁၉) မိမိကိုယ်တိုင်နှင့် မိသားစုအနာဂတ်အတွက် အဘယ်သာ၍ကောင်းသောအုတ်မြစ်ကို တည်ဆောက်နိုင်ပါဦးမည်နည်း။ အဆိုပါထူးမြတ်လှသောအနာဂတ်သည် ကျွန်ုပ်တို့အား ‘ကိုယ်ဆိုင်သောဘုရားသခင် ယေဟောဝါ၏နာမတော်ကို ကာလအစဉ်အမြဲ ခိုလှုံလျက်ကျင့်’ စေနိုင်ပါလိမ့်မည်။—မိက္ခာ ၄:၅။

[အောက်ခြေမှတ်ချက်များ]

^ အပိုဒ်၊ 4 ပင်တေကုတ္တေပွဲနေ့တွင် ပေတရု၏ဟောပြောချက်ကို နားထောင်ခဲ့ကြသော ဂျူးလူမျိုးနှင့် ဘာသာပြောင်းဝင်လာသူ သုံးထောင်တို့သည် ထိုနည်းတူ မဆိုင်းမတွ နှစ်ခြင်းခံခဲ့ကြသည်။ အဲသယောပိအမတ်ကဲ့သို့ သူတို့သည် သမ္မာကျမ်းစာ၏အခြေခံသွန်သင်ချက်များနှင့် မူများကို သိနှင့်ပြီးသားဖြစ်သည်။—တမန်တော် ၂:၃၇-၄၁။

^ အပိုဒ်၊ 16 ဗိုင်း၏ဓမ္မသစ်ကျမ်းစကားလုံးများဆိုင်ရာ ရှင်းလင်းဖော်ပြချက်အဘိဓာန်အရ ဂရိစကားလုံး ဗတ်တစ္စမာ (နှစ်ခြင်း) ဟူသည် “နှစ်ခြင်း၊ မြုပ်ခြင်းနှင့် ပြန်ပေါ်လာခြင်းဖြစ်စဉ်များ” ကိုဆိုလိုသည်။

သင်ရှင်းပြနိုင်သလော

• ကျွန်ုပ်တို့သည် ယေဟောဝါ၏မေတ္တာတော်ကို မည်သို့နှင့် အဘယ်ကြောင့် တုံ့ပြန်သင့်သနည်း။

• နှစ်ခြင်းမခံမီ အဘယ်ဝိညာဉ်ရေးတိုးတက်မှု ပြုလုပ်သင့်သနည်း။

• တာဝန်ပျက်ကွက်မည်ကိုစိုးရွံ့ခြင်း သို့မဟုတ် တာဝန်ကိုလက်မခံလိုခြင်းက ကျွန်ုပ်တို့ကို နှစ်ခြင်းမခံစေရန် အဘယ်ကြောင့် အတားအဆီးဖြစ်ခွင့် မပြုသင့်သနည်း။

• ယေရှုခရစ်၏ နှစ်ခြင်းခံပြီးသောတပည့်များသည် အဘယ်ထူးမြတ်သော ကောင်းချီးများကို ခံစားရနိုင်သနည်း။

[လေ့လာရန်မေးခွန်းများ]

[စာမျက်နှာ ၂၆ ပါ ရုပ်ပုံ]

‘အကျွန်ုပ်ကို နှစ်ခြင်းမခံစေခြင်းငှာ မည်သည့်အကြောင်း ဆီးတားပါသနည်း’

[စာမျက်နှာ ၂၉ ပါ ရုပ်ပုံ]

နှစ်ခြင်းခံချိန်သည် အလွန်အရေးကြီးသည့်ပြင် ရွှင်လန်းဖွယ်အခါသမယလည်းဖြစ်

ကင်းမျှော်စင်—လေ့လာရန် စာစောင်