သမ္မာကျမ်းစာကို သဘောပေါက်နားလည်ခြင်း ပျော်ရွှင်ကျေနပ်မှု ပေးသောအရာ

ဖွင့်ပါ

သမ္မာကျမ်းစာတွင် ဘုရားသခင်ထံမှ အဖိုးထိုက်အမှန်တရားများ ပါရှိသည်။ ယင်းသည် ဘဝရည်ရွယ်ချက်အကြောင်း၊ လူ့ဆင်းရဲခက်ခဲမှုများရှိရသည့်အကြောင်းရင်းနှင့် လူသားတို့၏အနာဂတ်အကြောင်း ဖော်ပြပေးသည်။ ပျော်ရွှင်မှုကို မည်သို့ရရှိနိုင်ကြောင်း၊ မည်သို့မိတ်ဆွေဖွဲ့နိုင်ကြောင်း၊ ပြဿနာများကို အောင်မြင်စွာ မည်သို့ဖြေရှင်းနိုင်ကြောင်း သွန်သင်ပေးသည်။ ထို့ထက်ကား ကျွန်ုပ်တို့၏ဖန်ဆင်းရှင် ကောင်းကင်ခမည်းတော် ယေဟောဝါအကြောင်း သိရှိစေသည်။ အဆိုပါအသိပညာများက ကျွန်ုပ်တို့အား ပျော် ရွှင်စေကာ ဘဝကိုအဓိပ္ပာယ်ရှိစေသည်။

သမ္မာကျမ်းစာတွင် ဘုရားသခင်အကြောင်း ဆည်းပူးလေ့လာခြင်းကို အစာစားခြင်းနှင့် ခိုင်းနှိုင်းထား၏။ “လူသည် မုန့်အားဖြင့်သာ အသက်ကိုမွေးရမည်မဟုတ်။ ဘုရားသခင်မိန့်တော်မူသမျှအားဖြင့် အသက်ကိုမွေးရမည်” ဟုယေရှုမိန့်ဆိုခဲ့သည်။ (မဿဲ ၄:၄; ဟေဗြဲ ၅:၁၂-၁၄) ကျွန်ုပ်တို့အသက်ဆက်နိုင်ရန် အာဟာရရှိသောအစာကို နေ့စဉ်စားသုံးရသကဲ့သို့ ထာဝရအသက်ပေးမည်ဟူသော ဘုရားသခင့်ကတိတော်မှ အကျိုးခံစားနိုင်ရန် သမ္မာကျမ်းစာကို မှန်မှန်ဖတ်ရှုဖို့လိုသည်။

အစာစားခြင်းကို ကျွန်ုပ်တို့နှစ်သက်ရခြင်းမှာ ကျွန်ုပ်တို့ ဖန်ဆင်းခံရပုံကြောင့်နှင့် ယင်းသည် အခြေခံလိုအပ်ရာကို ဖြည့်ဆည်းပေးသောကြောင့်ဖြစ်၏။ သို့ရာတွင် ပျော်ရွှင်မှုရလိုပါက ဖြည့်ဆည်းပေးရမည့် အခြေခံလိုအပ်ချက် နောက်တစ်ခုရှိသည်။ “ဝိညာဉ်ရေးတွင် လိုလျက်နေကြောင်း သတိပြုမိသူများသည် ပျော်ရွှင်ကြ၏” ဟုယေရှုမိန့်ဆိုခဲ့သည်။ (မဿဲ ၅:၃၊ ကဘ) သမ္မာကျမ်းစာကို သဘောပေါက်နားလည်ခြင်းဖြင့် အဆိုပါလိုအပ်ချက်ကို ဖြည့်ဆည်းပေးနိုင်သောကြောင့် ကျွန်ုပ်တို့ ပျော်ရွှင်မှုရနိုင်ပါသည်။

အချို့သူတို့အတွက် သမ္မာကျမ်းစာကိုနားလည်ရန် ခက်ခဲသည်မှာ မှန်ပါသည်။ ဥပမာ၊ သင်နှင့်အကျွမ်းတဝင်မရှိသော ထုံးစံများ သို့မဟုတ် တင်စားဖော်ပြချက်များပါသည့် ကျမ်းချက်များကို နားလည်နိုင်ရန် အကူအညီလိုပေမည်။ ထို့ပြင် အခြားကျမ်းချက်များနှင့် ယှဉ်ကြည့်မှသာ နားလည်နိုင်မည့် ပုံဆောင်စကားဖြင့်ရေးထားသော ပရောဖက်ပြုချက်များပါရှိသည်။ (ဒံယေလ ၇:၁-၇; ဗျာ. ၁၃:၁၊ ၂) သို့ဖြစ်သည့်တိုင် သင်သည် သမ္မာကျမ်းစာကို အမှန်သဘောပေါက် နားလည်လာနိုင်ပါသည်။ ယင်းသို့ဖြစ်ကြောင်း မည်သို့စိတ်ချနိုင်သနည်း။

လူတိုင်းကို ပျော်ရွှင်စေသောအရာ

သမ္မာကျမ်းစာသည် ဘုရားသခင့်နှုတ်မြွက်တော်ဖြစ်၏။ ထိုတွင် ဘုရားသခင်၏အလိုတော်ကို ဖော်ပြထားသည်။ နားလည်ရန်ခက်သော သို့မဟုတ် အဆင့်မြင့်ပညာတတ်များသာ သဘောပေါက်နိုင်သော စာအုပ်ကို ဘုရားသခင်ပေးပါမည်လော။ ပေးမည်မဟုတ်ပါ။ ယေဟောဝါသည် ဤမျှ အကြင်နာမဲ့သူ မဟုတ်ချေ။ “သင်တို့တွင် အဘဖြစ်သောသူ၌ သားသည် မုန့်ကိုတောင်းလျှင် အဘသည် ကျောက်ကိုပေးမည်လော။ ငါးကိုတောင်းလျှင် ငါးအစား၌ မြွေကိုပေးမည်လော။ ဥကိုတောင်းလျှင် ကင်းမြီးကောက်ကိုပေးမည်လော။ သင်တို့သည် အဆိုးဖြစ်လျက်ပင် ကိုယ်သားတို့အား ကောင်းသောအရာကိုပေးတတ်လျှင် ထိုမျှမက ကောင်းကင်ဘုံ၌ရှိတော်မူသော သင်တို့အဘသည် ဆုတောင်းသောသူတို့အား သန့်ရှင်းသောဝိညာဉ်တော်ကို သာ၍ပေးတော်မူမည်မဟုတ်လော” ဟု ယေရှုခရစ်မိန့်ဆိုခဲ့၏။ (လုကာ ၁၁:၁၁-၁၃) သို့ဖြစ်၍ သင်သည် သမ္မာကျမ်းစာကို နားလည်နိုင်ကြောင်း၊ ဘုရားသခင်အား စိတ်ရင်းမှန်ဖြင့်ဆုတောင်းလျှင် ကိုယ်တော်၏နှုတ်မြွက်တော်ကို နားလည်စေရန် ကူညီပေးမည်ဖြစ်ကြောင်း စိတ်ချနိုင်ပါသည်။ အမှန်မှာ သမ္မာကျမ်းစာ၏ အခြေခံသွန်သင်ချက်များကို ကလေးသူငယ်များပင် သဘောပေါက်နားလည်နိုင်သည်။—၂ တိမောသေ ၃:၁၅။

သမ္မာကျမ်းစာကိုနားလည်နိုင်ရန် ကြိုးစားအားထုတ်ရမည်ဖြစ်သော်လည်း ထိုသို့ပြုခြင်းက သင့်အား အလွန်အကျိုးပြုကာ ခွန်အားရှိစေနိုင်သည်။ ယေရှုသည် ရှင်ပြန်ထမြောက်ပြီးနောက် တပည့်နှစ်ဦးရှေ့ ကိုယ်ယောင်ထင်ရှားပြကာ ကျမ်းစာပရောဖက်ပြုချက်များအကြောင်း ပြောပြခဲ့သည်။ ယင်းနှင့်ပတ်သက်၍ လုကာ၏မှတ်တမ်းက ဤသို့ဆိုသည်– “မောရှေ၏ကျမ်းစာမှစ၍ ပရောဖက်တို့၏ကျမ်းစာများ၌ ကိုယ်တော်ကိုရည်မှတ်၍ ရေးထားသမျှသော ကျမ်းစာချက်အနက်ကို ရှင်းလင်းစွာဖော်ပြတော်မူ၏။” ရလဒ်ကားအဘယ်နည်း။ တပည့်များသည် ထိုညနေ၌ပင် မိမိတို့သိရှိခဲ့ရာကို ပြန်တွေးတောကာ “လမ်းခရီး၌ ငါတို့နှင့်ဟောပြော၍ ကျမ်းစာအနက်ကို ဖွင့်ပြတော်မူသောအခါ ငါတို့စိတ်နှလုံးသည် ယိုဖိတ်မတတ်ဖြစ်သည်မဟုတ်လော” ဟုအချင်းချင်းပြောဆိုကြ၏။ (လုကာ ၂၄:၁၃-၃၂) သမ္မာကျမ်းစာကို သဘောပေါက်နားလည်ခြင်းဖြင့် ဘုရားသခင့်ကတိတော်များအပေါ် ယုံကြည်ခြင်းခိုင်ခံ့လာပြီး အနာဂတ်ကို အပြုသဘောရှိရှိ ရှုမြင်စေသောကြောင့် သူတို့ပျော်ရွှင်ခဲ့ကြ၏။

သမ္မာကျမ်းစာကို သိနားလည်လာခြင်းသည် ငြီးငွေ့ဖွယ်ဖြစ်မည့်အစား စိတ်ဝင်စားဖွယ်ဖြစ်ကာ အကျိုးဖြစ်ထွန်းစေပြီး အရသာရှိသောအစာကို စားလိုက်ရ၍ စိတ်ကျေနပ်သွားသကဲ့သို့ဖြစ်စေ၏။ ထိုသို့နားလည်လာနိုင်ရန် အဘယ်အရာလုပ်ဆောင်ရမည်နည်း။ “ဘုရားသခင်ကိုသိသောဉာဏ်” ၌ မည်သို့ပျော်မွေ့နိုင်ကြောင်း နောက်ဆောင်းပါးက ဖော်ပြပါမည်။—သု. ၂:၁-၅။

[စာမျက်နှာ ၄ ပါ ရုပ်ပုံ]

မေတ္တာရှိဖခင်တစ်ဦးကဲ့သို့ပင် ယေဟောဝါသည် သမ္မာကျမ်းစာကို ကျွန်ုပ်တို့ နားလည်နိုင်ရန် သန့် ရှင်းသောဝိညာဉ်တော် ပေးသနား

ကင်းမျှော်စင်—လေ့လာရန် စာစောင်