“ငါသည် သင်တို့နှင့်အတူရှိ၏”
“ငါသည် သင်တို့နှင့်အတူရှိ၏”
‘ထာဝရဘုရားသခင်၏တမန်က “ငါသည် သင်တို့နှင့်အတူရှိ၏” ဟု ထာဝရဘုရားသခင် မိန့်တော်မူကြောင်းကိုဆင့်ဆိုလေ၏။’—ဟဂ္ဂဲ ၁:၁၃။
၁။ ကျွန်ုပ်တို့ခေတ်အတွက် အဘယ်ပရောဖက်ပြုချက်ဆိုင်ရာ ဆင်တူချက်များကို ယေရှုရည်ညွှန်းခဲ့သနည်း။
လူ့သမိုင်း၏ အလွန်အရေးကြီးသောအချိန်တွင် ကျွန်ုပ်တို့အသက်ရှင်နေကြရသည်။ ကျမ်းစာပရောဖက်ပြုချက် ပြည့်စုံချက်အရ ၁၉၁၄ ခုနှစ်မှစ၍ ‘သခင့်နေ့တော်’ အတွင်း၌ ကျွန်ုပ်တို့ ရောက်ရှိနေကြပြီဖြစ်သည်။ (ဗျာ. ၁:၁၀) နိုင်ငံတော်တန်ခိုးအာဏာနှင့်တကွ ‘လူသားရောက်ရှိချိန်’ ကို “နောဧလက်ထက်၊” “လောတလက်ထက်” တို့နှင့် ယေရှုနှိုင်းယှဉ်ဖော်ပြခဲ့သည်ကို သင်တို့ လေ့လာသိရှိခဲ့ပြီးဖြစ်သည်။ (မဿဲ ၂၄:၃၇-၃၉; လုကာ ၁၇:၂၆၊ ၂၈) သမ္မာကျမ်းစာက ယင်းတို့သည် ပရောဖက်ပြုချက်ဆိုင်ရာ ဆင်တူချက်များဖြစ်ကြောင်း ညွှန်ပြ၏။ သို့ရာတွင် ကျွန်ုပ်တို့ အလေးအနက်သုံးသပ်ရမည့် နောက်ထပ်ဆင်တူချက် ရှိပါသေးသည်။
၂။ ယေဟောဝါသည် ဟဂ္ဂဲနှင့် ဇာခရိတို့အား အဘယ်တာဝန်အပ်နှင်းခဲ့သနည်း။
၂ ဟေဗြဲပရောဖက်များဖြစ်ကြသည့် ဟဂ္ဂဲနှင့်ဇာခရိတို့ခေတ်က အခြေအနေကို သုံးသပ်ကြည့်ကြပါစို့။ ထိုတည်ကြည်သော ပရောဖက်နှစ်ပါးသည် ယနေ့ခေတ် ယေဟောဝါ၏လူမျိုးနှင့်သက်ဆိုင်သည့် အဘယ်ရှင်းလင်းသောသတင်းစကားများ ဖော်ပြခဲ့သနည်း။ ဟဂ္ဂဲနှင့် ဇာခရိတို့သည် ဗာဗုလုန်သုံ့ပန်းဘဝမှ ပြန်လာကြသည့် ဂျူးများအတွက် ‘ယေဟောဝါ၏တမန်’ များဖြစ်ကြသည်။ ဝတ်ပြုရာအိမ်တော် ပြန် လည်တည်ဆောက်ရာတွင် ဣသရေလလူမျိုးများအား ဘုရားသခင်ထောက်မပေးနေကြောင်း ယုံကြည်စိတ်ချလာအောင် သူတို့လုပ်ဆောင်ခဲ့ရသည်။ (ဟဂ္ဂဲ ၁:၁၃; ဇာခရိ ၄:၈၊ ၉) ဟဂ္ဂဲနှင့် ဇာခရိတို့ရေးသားခဲ့သည့် ကျမ်းစောင်များသည် တိုသော်လည်း ယင်းတို့သည် ‘ကျမ်းစာရှိသမျှသည် ဘုရားသခင်မှုတ်သွင်းတော်မူသောအားဖြင့်ဖြစ်၍ . . . သွန်သင်ပေးခြင်း၊ အပြစ်ကိုဖော်ပြခြင်း၊ ဖြောင့်မတ်စွာပြုပြင်ခြင်း၊ တရားကိုသွန်သင်ခြင်းကျေးဇူးများကို ပြုတတ်’ သည့် ကျမ်းစောင်များထဲတွင် ပါဝင်ပါသည်။—၂ တိမောသေ ၃:၁၆၊ ၁၇။
ယင်းတို့ကို ကျွန်ုပ်တို့အာရုံစိုက်သင့်
၃၊ ၄။ ဟဂ္ဂဲနှင့်ဇာခရိတို့၏ သတင်းစကားများကို ကျွန်ုပ်တို့အဘယ်ကြောင့် စိတ်ဝင်စားသင့်သနည်း။
၃ ဟဂ္ဂဲနှင့် ဇာခရိတို့၏ သတင်းစကားများသည် သူတို့ခေတ်မှ ဂျူးများကို အမှန်အကျိုးပြုခဲ့သည်။ သူတို့၏ပရောဖက်ပြုချက်များသည် ထိုအချိန်တွင် ပြည့်စုံခဲ့၏။ သို့ဆိုလျှင် ယနေ့ ကျွန်ုပ်တို့လည်း ဤကျမ်းနှစ်စောင်ကို အာရုံစိုက်သင့်သည်ဟု အဘယ်ကြောင့် အသေအချာပြောနိုင်သနည်း။ ဟေဗြဲ ၁၂:၂၆-၂၉ ၌သဲလွန်စတစ်ခု တွေ့ရပါသည်။ ထိုတွင် တမန်တော်ပေါလုသည် ဟဂ္ဂဲ ၂:၆ တွင်ပါရှိသော ဘုရားသခင် ‘မြေကြီးနှင့်ကောင်းကင်ကိုလှုပ်’ သည့်အကြောင်း ကိုးကားထားသည်။ ဤလှုပ်ခြင်းသည် နောက်ဆုံး “တိုင်းနိုင်ငံတို့၏ ရာဇပလ္လင်များကို မှောက်လှန်၍ အမျိုးမျိုးသောတိုင်းနိုင်ငံတန်ခိုးကို ဖျက်ဆီး” ခြင်းအထိဖြစ်ပါလိမ့်မည်။—ဟဂ္ဂဲ ၂:၂၂။
၄ ဟဂ္ဂဲကျမ်းကို ပေါလုကိုးကားပြီးနောက် “အမျိုးမျိုးသောတိုင်းနိုင်ငံ” များအပေါ် ဖြစ်ပျက်မည့်အရာနှင့် ဝိညာဉ်တော်ဖွားခရစ်ယာန်များ ပိုင်ဆိုင်ရမည့် မလှုပ်နိုင်သောနိုင်ငံ၏ သာလွန်ကောင်းမြတ်မှုတို့ကို ဖော်ပြခဲ့သည်။ (ဟေဗြဲ ၁၂:၂၈) ထို့ကြောင့် ဟဂ္ဂဲနှင့် ဇာခရိတို့၏ ပရောဖက်ပြုချက်များသည် ဟေဗြဲကျမ်းကို ရေးသားခဲ့သည့် ပထမရာစုနှစ်နောက်ပိုင်း အနာဂတ်တွင် ပြည့်စုံရဦးမည်ကို ပေါလု၏စကားမှ ကျွန်ုပ်တို့နားလည်နိုင်ပါသည်။ ယေရှုနှင့်အတူ မေရှိယနိုင်ငံတော်တွင် အမွေခံကြမည့် ဝိညာဉ်တော်ဖွားခရစ်ယာန် အကြွင်းအကျန်တို့သည် ယနေ့ထိ မြေကြီးပေါ်တွင် ရှိနေကြဆဲဖြစ်သည်။ သို့ဖြစ်၍ ဟဂ္ဂဲနှင့်ဇာခရိတို့တွင် ကျွန်ုပ်တို့ခေတ်နှင့်သက်ဆိုင်သည့် အရေးကြီးသည့်အချက် ရှိရမည်။
၅၊ ၆။ ဟဂ္ဂဲနှင့်ဇာခရိတို့အား ပရောဖက်ပြုစေသည့် ဖြစ်ရပ်များကား အဘယ်နည်း။
၅ ဧဇရကျမ်းတွင် သမိုင်းနောက်ခံတချို့ကို ဖော်ပြထားသည်။ ဘီစီ ၅၃၇ တွင် ဂျူးများ ဗာဗုလုန်သုံ့ပန်းဘဝမှ ပြန်လာပြီး ဘီစီ ၅၃၆ တွင် မြို့ဝန်ဇေရုဗဗေလနှင့် ယဇ်ပုရောဟိတ်မင်းကြီး ယောရှုတို့သည် ဝတ်ပြုရာအိမ်တော်အသစ် အုတ်မြစ်ချခြင်းကို ကြီးကြပ်ခဲ့ကြသည်။ (ဧဇရ ၃:၈-၁၃; ၅:၁) ယင်းသည် ရွှင်လန်းစရာအခါသမယ ဖြစ်ခဲ့သော်လည်း မကြာမီတွင် ဂျူးများ ကြောက်ရွံ့ထိတ်လန့်လာကြ၏။ ဧဇရ ၄:၄ အရ ရန်သူများဖြစ်သည့် “ပြည်သားတို့သည် ယုဒအမျိုးတို့ကို လက်အားလျော့စေ၍ တည်ဆောက်ခြင်းအမှုကို နှောင့်ယှက်” ခဲ့ကြသည်။ အထူးသဖြင့် ရှမာရိလူမျိုးများဖြစ်သော ရန်သူတို့သည် ဂျူးများအကြောင်း မဟုတ်မမှန် စွပ်စွဲခဲ့ကြ၏။ ထိုဆန့်ကျင်သူတို့သည် ဝတ်ပြုရာအိမ်တော်ဆောက်လုပ်ရေးလုပ်ငန်းကို ပိတ်ပင်ဖို့ ပါးရှားဘုရင်အား နားချခဲ့ကြသည်။—ဧဇရ ၄:၁၀-၂၁။
၆ ဝတ်ပြုရာအိမ်တော်လုပ်ငန်းနှင့်ပတ်သက်သည့် သူတို့၏စိတ်ထက်သန်မှုမှာ တဖြည်းဖြည်း လျော့နည်းလာခဲ့သည်။ ဂျူးများသည် ကိုယ်ရေးကိုယ်တာလိုက်စားမှုများဘက် လှည့်သွားကြသည်။ သို့နှင့် ဝတ်ပြုရာအိမ်တော်အုတ်မြစ်ချပြီး ၁၆ နှစ်အကြာ ဘီစီ ၅၂၀ တွင် ဝတ်ပြုရာအိမ်တော်လုပ်ငန်းကို ပြန်စကြဖို့ လူတို့အားနှိုးဆော်ရန် ဟဂ္ဂဲနှင့်ဇာခရိတို့ကို ယေဟောဝါစေလွှတ်တော်မူခဲ့သည်။ (ဟဂ္ဂဲ ၁:၁; ဇာခရိ ၁:၁) ဘုရားသခင့်တမန်များ၏ နှိုးဆော်မှုနှင့် ယေဟောဝါထောက်မကူညီကြောင်း ထင်ရှားသည့် အထောက်အထားများကြောင့် ဂျူးများသည် ဝတ်ပြုရာအိမ်တော်လုပ်ငန်းကို ပြန်စခဲ့ကြပြီး ဘီစီ ၅၁၅ တွင် လက်စသတ်ခဲ့သည်။—ဧဇရ ၆:၁၄၊ ၁၅။
၇။ ပရောဖက်ဟဂ္ဂဲနှင့်ဇာခရိတို့ခေတ်ရှိ အခြေအနေနှင့် မျက်မှောက်ခေတ်အခြေအနေတို့တွင် အဘယ်ဆင်တူချက်ရှိသနည်း။
၇ ဤအဖြစ်အပျက်အားလုံးသည် ကျွန်ုပ်တို့အတွက် အထူးအဓိပ္ပာယ်ရှိကြောင်း သင်သိပါသလော။ ‘ဘုရားသခင့်နိုင်ငံတော်နှင့်ယှဉ်သော သတင်းကောင်း’ ဟောပြောခြင်းနှင့်ဆက်နွှယ်သည့်လုပ်ငန်းတွင် ကျွန်ုပ်တို့ပါဝင်ကြသည်။ (မဿဲ ၂၄:၁၄) ယင်းလုပ်ငန်းကို ပထမကမ္ဘာစစ်နောက်ပိုင်းတွင် အထူးအလေးပေး၍ လုပ်ဆောင်ခဲ့ကြ၏။ ရှေးခေတ်ဂျူးများသည် ပကတိဗာဗုလုန်သုံ့ပန်းဘဝမှ လွတ်မြောက်ခဲ့ကြသကဲ့သို့ ယေဟောဝါ၏ မျက်မှောက်ခေတ်လူမျိုးလည်း ကမ္ဘာ့အယူမှား ဘာသာရေးအင်ပါယာဖြစ်သည့် မဟာဗာဗုလုန်သုံ့ပန်းဘဝမှ လွတ်မြောက်ခဲ့ကြသည်။ ဘုရားသခင်၏ ဝိညာဉ်တော်ဖွားများသည် ဟောပြောခြင်း၊ သွန်သင်ခြင်းနှင့် လူတို့အား စစ်မှန်သောဝတ်ပြုရေးဘက် လမ်းညွှန်ပေးခြင်းတို့တွင် ဝီရိယရှိရှိ လုပ်ဆောင်ခဲ့ကြသည်။ ထိုလုပ်ငန်းကို မကြုံစဖူးအတိုင်းအတာဖြင့် ယနေ့အထိ ဆက်လုပ်ဆောင်နေပြီး သင်လည်း ယင်းလုပ်ငန်းတွင် ပါဝင်နေပေမည်။ ဤစနစ်ဆိုး၏အဆုံး နီးကပ်နေပြီဖြစ်ရာ ယခုအချိန်သည် ယင်းလုပ်ငန်းကို လုပ်ဆောင်ရမည့်အချိန်ဖြစ်သည်။ လူ့ရေးရာများကို ယေဟောဝါ ကြားဝင်ဆောင်ရွက်ချိန်ဖြစ်သော ‘ကြီးစွာသောဆင်းရဲခြင်း’ ရောက်လာသည်အထိ ဘုရားသခင်ခန့်အပ်ထားသည့် ဤအလုပ်ကို ဆက်လုပ်ဆောင်သွားရမည်။ (မဿဲ ၂၄:၂၁) ယင်းက ဤကမ္ဘာမြေပေါ်မှ ဆိုးယုတ်မှုကိုပယ်ရှားပစ်ပြီး စစ်မှန်သောဝတ်ပြုရေးကို တည်ထောင်သွားပါလိမ့်မည်။
၈။ ကျွန်ုပ်တို့၏လုပ်ငန်းကို ဘုရားသခင် ထောက်မပေးနေကြောင်း မည်သို့ယုံကြည်စိတ်ချနိုင်သနည်း။
၈ ဟဂ္ဂဲနှင့်ဇာခရိတို့၏ ပရောဖက်ပြုဖော်ပြချက်အရ ကျွန်ုပ်တို့သည် ဤလုပ်ငန်းတွင် နှလုံးအကြွင်းမဲ့ပါဝင်ကြမည်ဆိုလျှင် ယေဟောဝါ၏ထောက်မမှုနှင့် ကောင်းချီးခံစားရမည်ကို စိတ်ချနိုင်ပါသည်။ လူတချို့က ဘုရားသခင့်ကျေးကျွန်များကို ဖိနှိပ်ရန်၊ ၎င်းတို့၏လုပ်ငန်းကို ပိတ်ပင်ရန် ကြိုးပမ်းကြလင့်ကစား မည်သည့်အုပ်ချုပ်ရေးကမျှ ဟောပြောခြင်းလုပ်ငန်း တိုးတက်နေမှုကို ရပ်တန့်သွားအောင် မတားဆီးနိုင်ခဲ့ချေ။ ပထမကမ္ဘာစစ်ပြီးကတည်းက ယနေ့အချိန်အထိ ဆယ်စုနှစ်များစွာ ဘုရားသခင့်နိုင်ငံတော်လုပ်ငန်းကို တိုးတက်စေခြင်းဖြင့် ယေဟောဝါကောင်းချီးပေးခဲ့ပုံကို စဉ်းစားကြည့်ပါ။ သို့သော် လုပ်ဆောင်စရာများစွာ ရှိနေပါသေးသည်။
၉။ ရှေးခေတ်က အဘယ်အခြေအနေကို ကျွန်ုပ်တို့ ဂရုပြုသင့်သနည်း။ အဘယ်ကြောင့်နည်း။
၉ ဟဂ္ဂဲနှင့်ဇာခရိတို့ထံမှ ကျွန်ုပ်တို့သင်ယူသိရှိရာသည် ဟောပြော၍ သွန်သင်ပေးပါဟူသော ဘုရားသခင့်အမိန့်တော်ကို ပို၍နာခံရန် မည်သို့လှုံ့ဆော်ပေးနိုင်သနည်း။ ဤကျမ်းစောင်နှစ်စောင်မှ ကျွန်ုပ်တို့ရရှိနိုင်မည့် သင်ခန်းစာတချို့ကို သတိပြုကြည့်ကြစို့။ ဥပမာ၊ ပြည်တော်ပြန်ဂျူးများ ဝတ်ပြုရာအိမ်တော် ပြန်တည်ဆောက်သည့်လုပ်ငန်းနှင့် ဆက်နွှယ်နေသည့် အသေးစိတ်အချက်အလက်တချို့ကို သုံးသပ်ကြည့်ကြစို့။ ဖော်ပြခဲ့သည့်အတိုင်း ဗာဗုလုန်မှ ယေရုရှလင်သို့ ပြန်လာကြသည့် ဂျူးများသည် ဝတ်ပြုရာအိမ်တော်လုပ်ငန်းတွင် မစွဲမြဲတော့ချေ။ အုတ်မြစ်ချပြီးနောက်တွင် လျော့ရိလျော့ရဲဖြစ်လာကြသည်။ သူတို့အကြားတွင် အဘယ်လွဲမှားသည့်အမြင် ရှိခဲ့ကြသနည်း။ ယင်းမှ ကျွန်ုပ်တို့ အဘယ်သင်ခန်းစာရနိုင်သနည်း။
မှန်ကန်သောအမြင်ရှိခြင်း
၁၀။ ဂျူးများသည် အဘယ်လွဲမှားသည့် အမြင်ရှိခဲ့ကြပြီး အဘယ်ရလဒ်ရခဲ့သနည်း။
၁၀ ပြည်တော်ပြန်ဂျူးများသည် “အချိန်မရောက်သေး” ဟု ပြောဆိုခဲ့ကြသည်။ (ဟဂ္ဂဲ ၁:၂) ဝတ်ပြုရာအိမ်တော်အုတ်မြစ်စချချိန်ဖြစ်သည့် ဘီစီ ၅၃၆ တွင် သူတို့သည် “အချိန်မရောက်သေး” ဟု မပြောဆိုခဲ့ကြချေ။ သို့သော် မကြာမီတွင် အိမ်နီးချင်းများ၏ ဆန့်ကျင်မှုနှင့် အုပ်ချုပ်သူတို့၏ ကြားဝင်စွက်ဖက်မှုတို့ကြောင့် သူတို့၏လုပ်ငန်းထိခိုက်လာခဲ့သည်။ ဂျူးများသည် မိမိတို့ကိုယ်ပိုင်အိမ်များနှင့် စည်းစိမ်ချမ်းသာတို့ကို ပို၍အလေးပေးလာကြသည်။ အဖိုးတန်သစ်များနှင့်ဆောက်လုပ်ထားသည့် ၎င်းတို့၏အိမ်များနှင့် မပြီးသေးသည့် ဝတ်ပြုရာအိမ်တော်၏ ကွာခြားမှုကို သတိပြုမိ၍ ယေဟောဝါက “သင်တို့သည် အမိုးနှစ်ထပ်နှင့်ပြည့်စုံသောအိမ်၌ နေချိန်ရှိလျက်ပင် အိမ်တော်ပျက်လျက်နေရမည်လော” ဟု မိန့်တော်မူခဲ့သည်။—ဟဂ္ဂဲ ၁:၄။
၁၁။ ယေဟောဝါသည် ဟဂ္ဂဲခေတ်မှ ဂျူးများကို အဘယ်ကြောင့် ဆုံးမတော်မူခဲ့ရသနည်း။
၁၁ မှန်ပါသည်။ ဂျူးတို့၏ဦးစားပေးရာများ ပြောင်းသွားလေပြီ။ ဘုရားသခင့်လူမျိုးသည် ဝတ်ပြုရာအိမ်တော်ဆောက်ရမည်ဟူသော ယေဟောဝါ၏ရည်ရွယ်တော်မူချက်ကို ဦးစားထားမည့်အစား သူတို့ကိုယ်တိုင်နှင့် သူတို့၏နေအိမ်များကိုသာ အာရုံစိုက်လာခဲ့ကြသည်။ ဘုရားသခင့်ဝတ်ပြုရာအိမ်တော်လုပ်ငန်းကို လျစ်လျူရှုခဲ့ကြသည်။ ဟဂ္ဂဲ ၁:၅ တွင် မှတ်တမ်းတင်ထားသည့် ယေဟောဝါ၏စကားတော်က “ကိုယ်ကျင့်သောအကျင့်တို့ကို ဆင်ခြင်ကြ” ရန် ဂျူးများကို အားပေးခဲ့သည်။ သူတို့လုပ်နေသည့်အရာကို ရပ်တန့်၍ ဆင်ခြင်ရန်၊ ဝတ်ပြုရာအိမ်တော်ဆောက်ခြင်းကို အသက်တာ၏ ဦးစားပေးနေရာတွင် မထားသည့်အတွက် သူတို့ဆုံးရှုံးခဲ့ရာများကို ဆန်းစစ်ကြည့်ရန် ယေဟောဝါမိန့်တော်မူ၏။
၁၂၊ ၁၃။ ဂျူးများ၏အခြေအနေကို ဟဂ္ဂဲ ၁:၆ က မည်သို့ဖော်ပြသနည်း။ ထိုအခန်းငယ်၏အဓိပ္ပာယ်ကား အဘယ်နည်း။
၁၂ သင်ထင်သည့်အတိုင်းပင် ဂျူးများ ဦးစားထားရမည့်အရာ လွဲမှားနေသည့်အတွက် ထိခိုက်နစ်နာခဲ့ကြသည်။ ဟဂ္ဂဲ ၁:၆ တွင် ဖော်ပြထားသည့် ဘုရားသခင့်ရှုမြင်ချက်ကို သတိပြုကြည့်ပါ– “သင်တို့သည် များစွာသောမျိုးစေ့ကို ကြဲသော်လည်း အသီးအနှံနည်းပါးရ၏။ စားရသော်လည်း ဝစွာမစားရကြ။ သောက်ရသော်လည်း ဝစွာမသောက်ရကြ။ အဝတ်ကိုဝတ်ရသော်လည်း နွေးစွာမဝတ်ရကြ။ အလုပ်လုပ်၍ အခကိုခံရသော်လည်း မလုံသောအိတ်ထဲမှာ သိုထားရကြ၏။”
၁၃ ဂျူးများသည် ဘုရားသခင် ပေးတော်မူသောနယ်မြေတွင် နေထိုင်ကြသော်လည်း ယင်းနယ်မြေသည် သူတို့အလိုရှိသလောက် မဖြစ်ထွန်းတော့ချေ။ တင်ကြိုသတိပေးခဲ့သည့်အတိုင်း ယေဟောဝါသည် သူတို့အပေါ် ကောင်းချီးမသွန်းလောင်းတော့ချေ။ (တရားဟောရာ ၂၈:၃၈-၄၈) ယေဟောဝါ၏ ကူညီထောက်မမှု မရတော့သည့်အတွက် ဂျူးများသည် မျိုးစေ့ကြဲသော်လည်း အနည်းငယ်သာ ရိတ်သိမ်းရသည်။ သူတို့သည် ဝဝလင်လင် မစားကြရတော့ချေ။ ကိုယ်တော်၏ကောင်းချီး မရရှိသည့်အတွက် နွေးထွေးသောအဝတ်အစားများကို မဝတ်ဆင်နိုင်ကြတော့ချေ။ အလုပ်လုပ်၍ရသောငွေသည် အိတ်ပေါက်နှင့်ဖားကောက်သကဲ့သို့ မည်သည့်အကျိုးမှမရှိတော့ချေ။ “သောက်ရသော်လည်း ဝစွာမသောက်ရကြ [“မမူးယစ်ရကြ၊” ကဘ]” ဟူသည့်ဖော်ပြချက်က အဘယ်အရာကိုဆိုလိုသနည်း။ မူးယစ်ခြင်းသည် ဘုရားသခင့်ကောင်းချီးဖြစ်သည်ဟု ဆိုလိုခြင်းမဟုတ်ချေ။ ကိုယ်တော်သည် မူးယစ်ခြင်းကို ပြစ်တင်ရှုတ်ချတော်မူ၏။ (၁ ဓမ္မရာဇဝင် ၂၅:၃၆; သု. ၂၃:၂၉-၃၅) သို့အစား အဆိုပါဖော်ပြချက်မှာ ဘုရားသခင့်ကောင်းချီးကို ဂျူးများမခံစားရဟူသော ရည်စောင်ချက်နောက်တစ်ခုဖြစ်ပါသည်။ သို့နှင့် သူတို့ဝိုင်လုပ်သောအခါ အလုံအလောက်မရတော့ချေ။ အကန့်အသတ်နှင့်သာရရှိသည့်အတွက် ယုဒသန်ကျမ်းက ဟဂ္ဂဲ ၁:၆ ကို “သောက်ရသော်လည်း ဝစွာမသောက်ရကြ” ဟု ပြန်ဆိုထားသည်။
၁၄၊ ၁၅။ ဟဂ္ဂဲ ၁:၆ မှ ကျွန်ုပ်တို့ အဘယ်သင်ခန်းစာရသနည်း။
၁၄ ဂျူးများထံမှ ကျွန်ုပ်တို့ရယူသင့်သည့် သင်ခန်းစာမှာ အိမ်ပုံစံများ၊ အိမ်အဆင်အပြင်များအကြောင်း မဟုတ်ချေ။ ပြည်နှင်ဒဏ်မခံရမီ ကြာမြင့်စွာက ဣသရေလပြည်တွင် “ဆင်စွယ်ဖြင့်ပြီးသောအိမ်” နှင့်နေ၍ “ဆင်စွယ်ခုတင်ပေါ်မှာအိပ်” စက်လဲလျောင်းကြသည့် ချမ်းသာကြွယ်ဝသူတို့ကို ပရောဖက်အာမုတ် ပြစ်တင်ဆုံးမခဲ့သည်။ (အာမုတ် ၃:၁၅; ၆:၄) မွမ်းမံပြင်ဆင်ထားသည့်အိမ်နှင့် အလှဆင်ထားသည့်ပရိဘောဂများမှာ မတည်တံ့ခဲ့ချေ။ ယင်းတို့ကို အောင်ပွဲရရန်သူများက သိမ်းယူသွားကြ၏။ သို့တိုင် အနှစ် ၇၀ ပြည်နှင်ဒဏ်ခံရပြီးနောက် နှစ်များစွာအကြာတွင်လည်း ဘုရားသခင့်လူမျိုးအတော်များများသည် ထိုဖြစ်ရပ်မှ သင်ခန်းစာမယူခဲ့ကြချေ။ ကျွန်ုပ်တို့ကော သင်ခန်းစာယူကြမည်လော။ ကျွန်ုပ်တို့တစ်ဦးစီ ဤသို့မေးခြင်းက သင့်လျော်လှပေသည်– ‘ငါ့အိမ်နဲ့အဆင်အပြင်တွေကို ငါဘယ်လောက်အထိ အလေးထားသလဲ။ အလုပ်အကိုင်ကောင်းရရှိနိုင်ပေမဲ့ နှစ်ပေါင်းများစွာ အချိန်ကုန်နိုင်ပြီး ဝတ်ပြုရေးရဲ့ အရေးပါတဲ့ကဏ္ဍတွေကို ထိခိုက်နိုင်တဲ့ ထပ်ဆင့်ပညာရေးဆည်းပူးခြင်း အစီအစဉ်ကော ဘယ်လိုလဲ။’—လုကာ ၁၂:၂၀၊ ၂၁; ၁ တိမောသေ ၆:၁၇-၁၉။
၁၅ ဟဂ္ဂဲ ၁:၆ ၌ ကျွန်ုပ်တို့ဖတ်ခဲ့ကြသည့်အတိုင်း ကျွန်ုပ်တို့အသက်တာတွင် ဘုရားသခင့်ကောင်းချီး ခံစားရဖို့လိုကြောင်း သတိပြုသင့်သည်။ ရှေးခေတ်မှ ဂျူးများသည် ဘုရားသခင့်ကောင်းချီး မခံစားခဲ့ရချေ။ သို့အစား ကြောက်မက်ဖွယ် ဆိုးကျိုးများသာ ခံစားလိုက်ရ၏။ ကျွန်ုပ်တို့တွင်လည်း ပစ္စည်းဥစ္စာ အမြောက်အမြားရှိသည်ဖြစ်စေ၊ မရှိသည်ဖြစ်စေ ယေဟောဝါ၏ကောင်းချီး မခံစားရပါက ဝိညာဉ်ရေးထိခိုက်မည်မှာ သေချာပါသည်။ (မဿဲ ၂၅:၃၄-၄၀; ၂ ကောရိန္သု ၉:၈-၁၂) သို့သော် ယေဟောဝါ၏ကောင်းချီးကို ကျွန်ုပ်တို့ မည်သို့ရယူခံစားနိုင်သနည်း။
ဝိညာဉ်တော်အားဖြင့် ယေဟောဝါကူညီ
၁၆-၁၈။ ရှေးခေတ်မှ အခြေအနေတွင် ဇာခရိ ၄:၆ ၏အဓိပ္ပာယ်ကား အဘယ်နည်း။
၁၆ ဟဂ္ဂဲ၏လုပ်ဖော်ဆောင်ဖက် ပရောဖက်ဇာခရိက ဘုရားသခင်ထံအပ်နှံထားသည့်လူမျိုးကို ပြန်၍လှုံ့ဆော်ကာ ကောင်းချီးပေးခဲ့သည့် ယေဟောဝါ၏နည်းလမ်းတော်များကို ပေါ်လွင်စေခဲ့သည်။ သင့်ကိုလည်း ကိုယ်တော်ကောင်းချီးပေးမည်ဟု ယင်းကဖော်ပြပါသည်။ ကျွန်ုပ်တို့ ဤသို့ဖတ်ရ၏– ‘ “ဤအမှုသည် ဗိုလ်ခြေအားဖြင့်မဟုတ်၊ အာဏာတန်ခိုးအားဖြင့်မဟုတ်၊ ငါ့ဝိညာဉ်အားဖြင့် ဖြစ်လိမ့်မည်” ဟု ကောင်းကင်ဗိုလ်ခြေအရှင် ထာဝရဘုရားသခင် မိန့်တော်မူ၏။’ (ဇာခရိ ၄:၆) ဤကျမ်းချက်ကိုးကားသည်ကို သင်မကြာခဏ ကြားဖူးမည်ဖြစ်သော်လည်း ယင်းကျမ်းချက်သည် ဟဂ္ဂဲနှင့်ဇာခရိတို့ခေတ်ရှိ ဂျူးများအတွက်ရော သင့်အတွက်ပါ အဘယ်အဓိပ္ပာယ်ရှိသနည်း။
၁၇ ဟဂ္ဂဲကျမ်းနှင့် ဇာခရိကျမ်းပါ မှုတ်သွင်းခံစကားများက ထိုခေတ်အတွက် အလွန်အကျိုးဖြစ်ထွန်းခဲ့သည်ကို ပြန်အမှတ်ရပါ။ ထိုပရောဖက်နှစ်ပါးသည် တည်ကြည်သောဂျူးများကို မည်သို့အားသစ်လောင်းပေးခဲ့သနည်း။ ဟဂ္ဂဲသည် ဘီစီ ၅၂၀၊ ဆဋ္ဌမလတွင် စတင်ပရောဖက်ပြုခဲ့၏။ ဇာခရိမူ ထိုနှစ် အဋ္ဌမလတွင် စ၍ပရောဖက်ပြုခဲ့သည်။ (ဇာခရိ ၁:၁) ဟဂ္ဂဲ ၂:၁၈ တွင် သင်ဖတ်ရသည့်အတိုင်း နဝမလတွင် ဝတ်ပြုရာအိမ်တော် အုတ်မြစ်ချခြင်းလုပ်ငန်းကို အင်တိုက်အားတိုက် ပြန်လည်လုပ်ဆောင်ခဲ့ကြသည်။ သို့နှင့် ဂျူးများသည် ပြန်လုပ်ဆောင်ရန် လှုံ့ဆော်ခံခဲ့ရပြီး ယေဟောဝါထောက်မမည်ကို ယုံကြည်စိတ်ချစွာဖြင့် ကိုယ်တော်အား နာခံခဲ့ကြသည်။ ဇာခရိ ၄:၆ ပါစကားများသည် ဘုရားသခင်၏ထောက်မမှုနှင့် ဆက်စပ်နေ၏။
၁၈ ဂျူးလူမျိုးတို့ ပြည်တော်ပြန်ကြသည့် ဘီစီ ၅၃၇ ၌ သူတို့တွင် စစ်တပ်ဟူ၍မရှိခဲ့ချေ။ သို့သော် ဗာဗုလုန်မှ အပြန်ခရီးလမ်းတွင် ယေဟောဝါသည် သူတို့ကို ကာကွယ်ပေးပြီး လမ်းပြတော်မူခဲ့သည်။ မကြာမီ ဝတ်ပြုရာအိမ်တော်အလုပ်ကို သူတို့စတင်သောအခါ ကိုယ်တော်၏ဝိညာဉ်တော်သည် ကိစ္စရပ်များကို ညွှန်ကြားခဲ့၏။ သူတို့သည် အလုပ်ကို စိတ်ရောကိုယ်ပါ ကြိုးစားပမ်းစား ပြန်လုပ်ဆောင်မည်ဆိုပါက ကိုယ်တော်သည် သန့်ရှင်းသောဝိညာဉ်တော်အားဖြင့် သူတို့ကို ထောက်မတော်မူမည်ဖြစ်သည်။
၁၉။ ဘုရားသခင့်ဝိညာဉ်တော်သည် အဘယ်အဖျက်အမှောင့်များကို နှိမ်နင်းလိုက်သနည်း။
၁၉ ဇာခရိသည် စိတ်အာရုံရှစ်ခုကို တစ်ခုပြီးတစ်ခု ဖော်ပြခြင်းအားဖြင့် ယေဟောဝါသည် ဝတ်ပြုရာအိမ်တော်လုပ်ငန်းကို ပြီးစီးသည့်အထိ တည်ကြည်စွာ လုပ်ဆောင်ခဲ့သော မိမိ၏လူမျိုးနှင့်အတူ ရှိတော်မူသည်ကို ယုံကြည်စိတ်ချစေခဲ့၏။ အခန်းကြီး ၃ တွင် မှတ်တမ်းတင်ထားသည့် စတုတ္ထမြောက်စိတ်အာရုံမှာ ဝတ်ပြုရာအိမ်တော်တည်ဆောက်သည့်အလုပ် ပြီးစီးရန် ဂျူးများကြိုးစားအားထုတ်နေသည်ကို စာတန်ကလည်း မနားမနေ ဆီးတားနေကြောင်း ဖော်ပြထားပါသည်။ (ဇာခရိ ၃:၁) ဝတ်ပြုရာအိမ်တော်သစ်ထဲတွင် ယဇ်ပုရောဟိတ်မင်းကြီး ယောရှုသည် လူများအကျိုးအတွက် အမှုထမ်းနေသည်ကို စာတန်နှစ်သက်မည်မဟုတ်ကြောင်း သေချာပါသည်။ ဂျူးများ ဝတ်ပြုရာအိမ်တော်ဆောက်လုပ်နေသည်ကို စာတန် အကြီးအကျယ်နှောင့်ယှက်ခဲ့သော်လည်း ယေဟောဝါ၏ဝိညာဉ်တော်က အနှောင့်အယှက်များကို ဖယ်ရှားပေးပြီး ဝတ်ပြုရာအိမ်တော်ဆောက်လုပ်ပြီးစီးသည့်အထိ ဂျူးများ ဆက်လုပ်ဆောင်နိုင်အောင် ခွန်အားပေးရာ၌ အဓိကပါဝင်ခဲ့သည်။
၂၀။ ဂျူးများ ဘုရားသခင့်အလိုတော်ထမ်းဆောင်နိုင်ရန် သန့်ရှင်းသောဝိညာဉ်တော်က မည်သို့ကူညီပေးခဲ့သနည်း။
၂၀ အဆိုပါလုပ်ငန်းကို အစိုးရအရာရှိများ၏ ဆန့်ကျင်ပိတ်ပင်မှုက မကျော်လွန်နိုင်သည့် အတားအဆီးတစ်ခု ဖြစ်ဟန်တူခဲ့သည်။ သို့တိုင် ဤ “တောင်” နှင့်တူသော အတားအဆီးသည် ဖယ်ရှားခံရပြီး “ညီသောအရပ်” ဖြစ်ရလိမ့်မည်ဟု ယေဟောဝါ ကတိပြုတော်မူခဲ့၏။ (ဇာခရိ ၄:၇) ထိုအတိုင်းဖြစ်ပျက်ခဲ့သည်။ ပထမမြောက် ဒါရိမင်းသည် ကုရုမင်းထုတ်ပြန်ခဲ့သည့် ဝတ်ပြုရာအိမ်တော်တည်ဆောက်ခွင့် မူရင်းအမိန့်စာကို ပြန်ရှာဖွေဖော်ထုတ်ခဲ့ပြီး ပိတ်ပင်မှုကို ဖျက်သိမ်းပေးခဲ့၏။ ထို့ပြင် ဂျူးလူမျိုးများ၏ ဆောက်လုပ်ရေးလုပ်ငန်းအတွက် ကုန်ကျစရိတ်ကို ဘဏ္ဍာတော်ထဲမှထုတ်ပေးရန် အမိန့်ထုတ်ပြန်ခဲ့သည်။ အခြေအနေမှာ အံ့သြဖွယ်ကောင်းလောက်အောင် ပြောင်းပြန်ဖြစ်ခဲ့သည်။ ဤသို့ဖြစ်စေရန် ဘုရားသခင့်ဝိညာဉ်တော်က ကြားဝင်လုပ်ဆောင်ခဲ့ခြင်းလော။ လုပ်ဆောင်ခဲ့ကြောင်းကို ကျွန်ုပ်တို့ ယုံကြည်စိတ်ချနိုင်ပါသည်။ ဘီစီ ၅၁၅၊ ပထမမြောက် ဒါရိမင်းနန်းစံ ဆဋ္ဌမနှစ်တွင် ဝတ်ပြုရာအိမ်တော်ဆောက်လုပ်ခြင်းကို လက်စသတ်ခဲ့လေသည်။—ဧဇရ ၆:၁၊ ၁၅။
၂၁။ (က) ရှေးအချိန်တွင် ဘုရားသခင်သည် “လူမျိုးအပေါင်းတို့ကို” မည်သို့ “လှုပ်” တော်မူခဲ့ပြီး ‘နှစ်သက်ဖွယ်သောအရာများ’ မည်သို့ထွက်ပေါ်လာသနည်း။ (ခ) မျက်မှောက်ခေတ်တွင် မည်သို့ပြည့်စုံခဲ့သနည်း။
၂၁ ဟဂ္ဂဲ ၂:၅ တွင် ပရောဖက်က သိနာတောင်၌ ဂျူးလူမျိုးများနှင့် ဘုရားသခင် ပဋိညာဉ်ဖွဲ့ခဲ့သည့်အကြောင်းကို ပြန်သတိပေးခဲ့သည်။ ထိုအချိန်တွင် “တစ်တောင်လုံး ပြင်းစွာလှုပ်” ခဲ့၏။ (ထွက်မြောက်ရာ ၁၉:၁၈) အခန်းငယ် ၆ နှင့် ၇ တွင် ဥပစာစကားဖြင့် ဖော်ပြထားသည့်အတိုင်း ယေဟောဝါသည် ဟဂ္ဂဲနှင့်ဇာခရိတို့ခေတ်တွင် နောက်ထပ်လှုပ်ခြင်းတစ်မျိုးကို ထပ်လှုပ်စေပါလိမ့်မည်။ ပါးရှန်းအင်ပါယာ၏ နိုင်ငံရေးအခြေအနေသည် မငြိမ်မသက်ဖြစ်လာပါလိမ့်မည်။ သို့သော် ဝတ်ပြုရာအိမ်တော်ဆောက်လုပ်ရေးလုပ်ငန်းသည် ပြီးစီးရမည်။ ဂျူးမဟုတ်သူများဖြစ်သော ‘လူမျိုးအပေါင်းမှ နှစ်သက်ဖွယ်သောအရာများ’ သည် အဆိုပါဝတ်ပြုကိုးကွယ်ရာနေရာ၌ ဂျူးလူမျိုးနှင့်အတူ ဘုရားသခင့်ဘုန်းတော်ကို ချီးမွမ်းကြမည်။ ကျွန်ုပ်တို့ခေတ်တွင် သာ၍ကြီးကျယ်သောနည်းမှာ ဘုရားသခင်သည် ခရစ်ယာန်ဟောပြောခြင်းဖြင့် ‘လူမျိုးအပေါင်းကိုလှုပ်ခဲ့’ ရာ ‘လူမျိုးအပေါင်းမှ နှစ်သက်ဖွယ်သောအရာများ’ သည် ဝိညာဉ်တော်ဖွားခရစ်ယာန် အကြွင်းအကျန်တို့နှင့်အတူ ဘုရားသခင်အား ဝတ်ပြုကိုးကွယ်လာလေပြီ။ ဝိညာဉ်တော်ဖွားများနှင့် အခြားသိုးတို့သည် ယခုအခါ ယေဟောဝါ၏အိမ်တော်ကို ဘုန်းတော်နှင့်ပြည့်စုံနေစေကြပါသည်။ အဆိုပါ စစ်မှန်သောဝတ်ပြုသူတို့သည် ‘ကောင်းကင်နှင့်မြေကြီးကို’ ယေဟောဝါ ‘လှုပ်ဦး’ မည့်အချိန်၊ တစ်နည်းအားဖြင့် တိုင်းနိုင်ငံတို့၏ရာဇပလ္လင်များကို မှောက်လှန်၍ အမျိုးမျိုးသောတိုင်းနိုင်ငံတန်ခိုးအား ဖျက်ဆီးမည့်အချိန်ကို ယုံကြည်ခြင်းဖြင့် စောင့်မျှော်နေကြပါသည်။—ဟဂ္ဂဲ ၂:၂၂။
၂၂။ တိုင်းနိုင်ငံတို့သည် မည်သို့ “လှုပ်” ခြင်းခံရကြသနည်း။ အဘယ်ရလဒ်ဖြင့်နည်း။ အဘယ်အရာဖြစ်ပျက်ရန် ကျန်သေးသနည်း။
၂၂ “ကောင်းကင်၊ မြေကြီး၊ ပင်လယ်၊ ကုန်း” တို့နှင့်ပုံဖော်ပြထားသည့် လူ့အင်အားစုအသီးသီးတွင် ဖရိုဖရဲဖြစ်နေကြောင်း ကျွန်ုပ်တို့ကို သတိပေးထားသည်။ အပြောင်းအလဲတစ်ခုမှာ စာတန်နှင့် သူ၏နတ်ဆိုးများသည် မြေကြီးဝန်းကျင်ကို ပစ်ချခံလိုက်ရသည်။ (ဗျာ. ၁၂:၇-၁၂) ထို့ပြင် ဘုရားသခင့်ဝိညာဉ်တော်ဖွားများ ဦးဆောင်နေကြသည့် ဟောပြောခြင်းလုပ်ငန်းသည် ဤအစီအစဉ်စနစ်၏ မြေကြီးဆိုင်ရာလူ့အင်အားစုများကို အမှန်ပင် လှုပ်ခါခဲ့လေသည်။ (ဗျာ. ၁၁:၁၈) သို့ဖြစ်လင့်ကစား လူမျိုးအပေါင်းမှ နှစ်သက်ဖွယ်သောအရာများဖြစ်သော ‘လူအုပ်ကြီး’ သည် ဝိညာဉ်ရေးဣသရေလလူမျိုးနှင့်အတူ ယေဟောဝါအားဝတ်ပြုရာတွင် ပူးပေါင်းလာခဲ့ကြသည်။ (ဗျာ. ၇:၉၊ ၁၀) မကြာမီ ဘုရားသခင်သည် အာမဂေဒုန်၌ တိုင်းနိုင်ငံတို့ကို လှုပ်တော့မည်ဟူသော သတင်းကောင်းကို ဝိညာဉ်တော်ဖွားခရစ်ယာန်များနှင့်အတူ လူအုပ်ကြီးက ဟောပြောနေကြပါသည်။ ဤဖြစ်ရပ်က ကမ္ဘာတစ်ခွင် စစ်မှန်သောဝတ်ပြုရေး လွှမ်းမိုးရန် လမ်းဖွင့်ပေးပါလိမ့်မည်။
သင်မှတ်မိသလော
• မည်သည့်အချိန်တွင်နှင့် မည်သို့သောအခြေအနေများတွင် ဟဂ္ဂဲနှင့်ဇာခရိတို့ အမှုဆောင်ခဲ့ကြသနည်း။
• ဟဂ္ဂဲနှင့် ဇာခရိတို့၏သတင်းစကားကို သင်မည်သို့ ကျင့်သုံးနိုင်သနည်း။
• ဇာခရိ ၄:၆ ပါစကားသည် သင့်အတွက် အဘယ်ကြောင့် အားရစရာဖြစ်သနည်း။
[လေ့လာရန်မေးခွန်းများ]
[စာမျက်နှာ ၂၀ ပါ ရုပ်ပုံ]
ကျွန်ုပ်တို့ကို ဘုရားသခင်ထောက်မနေကြောင်း ဟဂ္ဂဲကျမ်းနှင့် ဇာခရိကျမ်းတို့က စိတ်ချစေ
[စာမျက်နှာ ၂၃ ပါ ရုပ်ပုံ]
“သင်တို့သည် အမိုးနှစ်ထပ်နှင့်ပြည့်စုံသောအိမ်၌ နေချိန်ရှိလျက်ပင် အိမ်တော်ပျက်လျက်နေရမည်လော”
[စာမျက်နှာ ၂၄ ပါ ရုပ်ပုံ]
ယေဟောဝါ၏လူမျိုးသည် ‘လူမျိုးအပေါင်းမှ နှစ်သက်ဖွယ်သောအရာများ’ ထံအရောက်သွား၍ သတင်းကောင်းဝေမျှကြ