ဘုရားသခင်၏အလိုတော်နှင့် ညီသော ဆုံးဖြတ်ချက်များကို မည်သို့ ချနိုင်မည်နည်း
ဘုရားသခင်၏အလိုတော်နှင့် ညီသော ဆုံးဖြတ်ချက်များကို မည်သို့ ချနိုင်မည်နည်း
အမေရိကန်ပြည်ထောင်စုမှ အမျိုးသားတစ်ဦးသည် ဒေါ်လာ ၂၅,၀၀၀ တန် ချက်လက်မှတ်တစ်စောင်နှင့်အတူ ဘဏ်တစ်ခုသို့ ရောက်လာသည်။ ယင်းငွေကို ကာလရှည်အတိုးရအပ်ငွေအဖြစ် ဘဏ်တွင်အပ်နှံရန် ရည်ရွယ်ထားသည်။ သို့သော် ဘဏ်ဝန်ထမ်းတစ်ဦးက စတော့ဈေးကွက်သည် ရေရှည်တွင် အရှုံးမရှိကြောင်း အခိုင်အမာဆိုကာ ငွေကို ထိုတွင်ရင်းနှီးမြှုပ်နှံရန် အကြုံပြုသည်။ အမျိုးသားသည် အကြံပေးသည့်အတိုင်း လုပ်ဆောင်ရန် ဆုံးဖြတ်လိုက်သည်။ နောက်ပိုင်း မကြာမီတွင် သူ၏ရင်းနှီးမြှုပ်နှံမှု ငွေအတော်များများ ဆုံးရှုံးသွားလေသည်။
ပညာရှိဆုံးဖြတ်ချက်များ ချနိုင်ရန် မလွယ်ကူကြောင်း ယင်းဖြစ်ရပ်က ဖော်ပြသည်။ ကျွန်ုပ်တို့ နေ့စဉ်နှင့်အမျှချနေရသော ဆုံးဖြတ်ချက်များစွာနှင့်ပတ်သက်၍ကော မည်သို့နည်း။ ကျွန်ုပ်တို့ချလိုက်သော ဆုံးဖြတ်ချက်များသည် အောင်မြင်မှု သို့မဟုတ် ရှုံးနိမ့်မှုအပြင် အနှေးနှင့်အမြန် သေရေး၊ ရှင်ရေးကိုပင် ဖြစ်ပေါ်စေနိုင်သည်။ သို့ဆိုလျှင် ကျွန်ုပ်တို့သည် ပညာရှိဆုံးဖြတ်ချက်များချကြောင်း မည်သို့စိတ်ချနိုင်သနည်း။
‘ဤလမ်းသည် မှန်၏’
ကျွန်ုပ်တို့သည် နေ့စဉ်နှင့်အမျှ ဘာစားမည်၊ ဘာဝတ်မည်၊ အဘယ်နေရာသို့သွားမည်အစရှိသော ဆုံးဖြတ်ချက်များ ချနေရသည်။ အချို့ဆုံးဖြတ်ချက်များသည် အသေးအဖွဲဖြစ်ပုံရှိသော်လည်း ဝမ်းနည်းဖွယ်အကျိုးဆက်များ ဖြစ်ပေါ်စေနိုင်သည်။ ဥပမာ၊ ဦးဆုံးအကြိမ် ဆေးလိပ်သောက်ရန် ဆုံးဖြတ်လိုက်ခြင်းကြောင့် တစ်သက်တာလုံး ဆေးလိပ်စွဲသွားစေနိုင်သည်။ ထို့ ကြောင့် အသေးအဖွဲဟုထင်ရသော ဆုံးဖြတ်ချက်များကို လျှော့မတွက်သင့်ပေ။
အသေးအဖွဲဟုထင်ရသည့် ဆုံးဖြတ်ချက်များချသည့်အခါတွင်ပင် လမ်းညွှန်မှုအတွက် မည်သည့်နေရာတွင် ရှာဖွေနိုင်သနည်း။ ကျွန်ုပ်တို့သည် ခက်ခဲသောဆုံးဖြတ်ချက်များချရသည့်အခါ ယုံကြည်အားထားရသော အကြံဉာဏ်ပေးသူတစ်ဦး ရှိမည်ဆိုလျှင် အလွန်ကောင်းလှပေမည်။ ထိုအကြုံပေးပုဂ္ဂိုလ်မျိုးကို သင်ရှာတွေ့နိုင်ပါသည်။ မျက်မှောက်ခေတ်နှင့်အပ်စပ်မှုရှိသော ရှေးစာအုပ်တစ်အုပ်တွင် ဤသို့ဆို၏– “သင်သည် လက်ယာဘက်၊ လက်ဝဲဘက်သို့လမ်းလွဲလျှင် ‘ဤမည်သောလမ်းသည် မှန်၏။ ဤလမ်း၌သွားလော့’ ဟု သင့်နောက်၌ပြောသောစကားသံကို ကိုယ်နားနှင့်ကြားရလိမ့်မည်။” (ဟေရှာယ ၃၀:၂၁) ယင်းစကားများသည် မည်သူ့ထံမှနည်း။ ယင်းလမ်းညွှန်ချက်ကို ယုံကြည်အားထားနိုင်ကြောင်း မည်သို့စိတ်ချနိုင်သနည်း။
အဆိုပါအာမခံချက်ကို သမ္မာကျမ်းစာတွင်တွေ့ရှိရခြင်းဖြစ်ပြီး ယင်းကို သန်းနှင့်ချီသောသူတို့ လေ့လာနေကာ ဖန်ဆင်းရှင်ယေဟောဝါမှုတ်သွင်းသည်ဟု လက်ခံလာကြသည်။ (၂ တိမောသေ ၃:၁၆၊ ၁၇) ယေဟောဝါသည် ကျွန်ုပ်တို့ မည်သို့ဖန်ဆင်းခံရကြောင်း သိတော်မူသောကြောင့် အကောင်းဆုံးလမ်းညွှန်ချက်ကို ပေးနိုင်သည်။ ကိုယ်တော်သည် အနာဂတ်ကိုလည်း ကြိုသိမြင်နိုင်ပြီး “အဦးမှစ၍ အဆုံးတိုင်အောင်လည်းကောင်း၊ ရှေးကာလမှစ၍ မဖြစ်သေးသော အမှုအရာတို့ကိုလည်းကောင်း ဖော်ပြလျက် ‘ငါ့အကြံတည်လိမ့်မည်’ ” ဟုဆိုလေသည်။ (ဟေရှာယ ၄၆:၁၀) ဆာလံဆရာက ယေဟောဝါ၏နှုတ်မြွက်တော်ကို ယုံကြည်ကြောင်း ဤသို့ဖော်ပြခဲ့သည်– ‘နှုတ်မြွက်တော်သည် အကျွန်ုပ်ခြေရှေ့မှာ မီးခွက်ဖြစ်၍ အကျွန်ုပ်လမ်းခရီးကို လင်းစေပါ၏။’ (ဆာလံ ၁၁၉:၁၀၅) မှန်ပါသည်၊ မျက်မှောက်လောက၏ ရှုပ်ထွေးပွေလီလှသော အခြေအနေများကြား ကျွန်ုပ်တို့ လုံခြုံမှုရှိနေစေရန် ယေဟောဝါ မည်သို့လမ်းပြပေးနေသနည်း။ ဘုရားသခင့်အလိုတော်နှင့်ညီသော ဆုံးဖြတ်ချက်များကို မည်သို့ချနိုင်မည်နည်း။
ကျမ်းစာမူများကို လိုက်နာပါ
ယေဟောဝါဘုရားသခင်သည် ခရစ်ယာန်များ ပညာရှိဆုံးဖြတ်ချက်များချနိုင်ရန် ကိုယ်တော်၏မူများကို ပေးထားသည်။ ကျမ်းစာမူများကို သင်ယူလေ့လာခြင်း၊ လက်တွေ့ကျင့်သုံးခြင်းကို ဘာသာစကားအသစ်တစ်ခု သင်ယူကာ ပြောဆိုခြင်းနှင့် နှိုင်းယှဉ်နိုင်သည်။ သင်သည် ထိုဘာသာစကားကို ကျွမ်းကျင်လာပြီဆိုလျှင် ထိုဘာသာစကားပြောဆိုသူတစ်ဦး၏ စကားအမှားများကို သိလာနိုင်မည်။ ယင်းအမှားကို သဒ္ဒါနည်းကျကျ ထောက်ပြနိုင်မည်မဟုတ်သော်လည်း မှားနေကြောင်း သင်သိသည်။ သင်သည် ဘုရားသခင်၏မူများကို သိရှိကာ ကျင့်သုံးတတ်လာသည့်အခါ တစ်စုံတစ်ရာသောဆုံးဖြတ်ချက်သည် မှားနေကြောင်း၊ ဘုရားသခင့်မူများနှင့် ဆန့်ကျင်နေကြောင်း ပြောနိုင်မည်ဖြစ်သည်။
ဥပမာ၊ ဆံပင်ပုံစံရွေးချယ်ရာတွင် လူငယ်တစ်ဦးကြုံရနိုင်သည့် ဆုံးဖြတ်ချက်ကို သုံးသပ်ကြည့်ပါ။ ဆံပင်ပုံစံအကြောင်း ကျမ်းစာတွင် သတ်သတ်မှတ်မှတ်မိန့်မှာမထားပါ။ သို့သော် ကျမ်းစာမူတစ်ခုကို သုံးသပ်ကြည့်ပါ။ တမန်တော်ပေါလု ဤသို့ရေးခဲ့သည်– “မိန်းမတို့သည် ကျစ်သောဆံပင်၊ ရွှေတန်ဆာ၊ ကျောက်ပုလဲ အဖိုးထိုက်သောအဝတ်နှင့် ကိုယ်ကိုမဆင်ဘဲ၊ ရှက်ကြောက်ခြင်း၊ ဣန္ဒြေစောင့်ခြင်းအားဖြင့် လျောက်ပတ်သောအဝတ်နှင့်လည်းကောင်း၊ ဘုရားသခင်အား ရိုသေလေးမြတ်ခြင်းကို ဝန်ခံပြုစုသော မိန်းမဆင်သင့်သည်အတိုင်း ကောင်းသောအကျင့်နှင့်လည်းကောင်း ကိုယ်ကိုတန်ဆာဆင်စေခြင်းငှာ ငါအလိုရှိ၏။” (၁ တိမောသေ ၂:၉၊ ၁၀) ဤတွင် ပေါလုသည် အမျိုးသမီးများနှင့်ပတ်သက်၍ ရေးနေခြင်းဖြစ်သော်လည်း ယင်းမူသည် ကျားမ,မရွေးနှင့် သက်ဆိုင်သည်။ ယင်းမူကား အဘယ်နည်း။ ကျွန်ုပ်တို့၏အသွင်အပြင်သည် ဣန္ဒြေရှိပြီး ကောင်းသောသတိရှိသင့်သည်။ ထို့ကြောင့် လူငယ်တစ်ဦးသည် မိမိကိုယ်ကို ဤသို့မေးနိုင်သည်– ‘ငါ့ ရဲ့ဆံပင်ပုံစံက ခရစ်ယာန်တစ်ဦးအနေနဲ့ ဣန္ဒြေရှိကြောင်း ဖော်ပြနေရဲ့လား။’
လူငယ်တစ်ဦးသည် တပည့်ဖြစ်သူယာကုပ်၏ အောက်ပါစကားများမှ အကူညီဖြစ်စေသောအဘယ်မူကို ရယူနိုင်သနည်း။ ‘မတရားသောမေထုန်၌ မှီဝဲသောယောက်ျားမိန်းမတို့၊ လောကမိတ်သဟာယသည် ဘရားသခင်နှင့် ဆန့်ကျင်ဘက်ဖြစ်သည်ကို မသိကြသလော။ ဤလောကနှင့် မိတ်သဟာယဖွဲ့သောသူသည် ဘုရားသခင်၏ရန်သူ ဖြစ်၏။’ (ယာကုပ် ၄:၄) ခရစ်ယာန်များသည် ဘုရားသခင်၏ရန်သူဖြစ်သော လောကနှင့်မိတ်ဆွေဖြစ်ခြင်းကို မစဉ်းစားလိုကြချေ။ ရွယ်တူချင်းများကြိုက်နှစ်သက်သော ဆံပင်ပုံစံသည် သူ့အား ဘုရားသခင့်မိတ်ဆွေ သို့မဟုတ် လောက၏မိတ်ဆွေ ဖြစ်စေသလော။ ဆံပင်ပုံစံနှင့်ပတ်သက်ပြီး စဉ်းစားနေသော လူငယ်တစ်ဦးသည် ပညာရှိဆုံးဖြတ်ချက်ချရာတွင် ထိုကဲ့သို့သောကျမ်းစာမူကို အသုံးပြုနိုင်သည်။ ကျမ်းစာမူများသည် ဆုံးဖြတ်ချက်များချရာတွင် အမှန်ကူညီပေးသည်။ ကျွန်ုပ်တို့သည် ကျမ်းစာမူများကိုအခြေပြုပြီး ဆုံးဖြတ်တတ်သည့်အကျင့် ရှိနေပြီဆိုလျှင် ပညာရှိဆုံးဖြတ်ချက်များချရန် လွယ်ကူလာပြီး မလိုလားဖွယ်အကျိုးဆက်များကို ရှောင်ရှားနိုင်သည်။
သမ္မာကျမ်းစာတွင် မူများစွာ တွေ့ရှိနိုင်သည်။ ကျွန်ုပ်တို့၏အခြေအနေနှင့်ပတ်သက်၍ တိုက်ရိုက်ဖော်ပြထားသည့် ကျမ်းချက်ကို ရှာတွေ့ချင်မှ ရှာတွေ့ပေမည်။ သို့တိုင် လူအချို့သည် ဘုရားသခင့်လမ်းညွှန်ချက်ကို မည်သို့လိုက်နာခဲ့ပြီး အချို့မှာ ဘုရားသခင့်သတိပေးချက်ကို မည်သို့လျစ်လျူ ရှု ခဲ့ကြောင်း ဖတ်ရှုနိုင်သည်။ (ကမ္ဘာဦး ၄:၆၊ ၇၊ ၁၃-၁၆; တရားဟောရာ ၃၀:၁၅-၂၀; ၁ ကောရိန္သု ၁၀:၁၁) အဆိုပါမှတ်တမ်းများကို ဖတ်ရှုပြီး ထွက်ပေါ်လာသည့်ရလဒ်များကို သုံးသပ်ခြင်းဖြင့် ဘုရားသခင့်အလိုတော်နှင့်အညီ ဆုံးဖြတ်နိုင်ရန် ကူညီပေးမည့် ကျမ်းစာမူများကို သိမြင်လာပေမည်။
ဥပမာ၊ ယေရှုခရစ်နှင့် တမန်တော်ပေတရုပြောဆိုခဲ့သောစကားများကို သုံးသပ်ကြည့်ပါ။ ဗိမာန်တော်အခွန်တည်းဟူသော ဒိဒြမ္မကိုခံသောသူတို့သည် ပေတရုအား “သင်၏ဆရာသည် ဒိဒြမ္မကိုမပေးသလော” ဟုမေးမြန်း၏။ ပေတရုက “ပေးပါသည်” ဟုဖြေဆိုလေ၏။ ထို့နောက် မကြာမီ ယေရှုက “ရှင်ဘုရင်တို့သည် အဘယ်သူမှာ အခွန်ကိုခံကြသနည်း။ မိမိသားမှာခံကြသလော။ သူတစ်ပါးမှာခံကြသလော” ဟုပေတရုအား မေးတော်မူသည်။ ထိုအခါ ပေတရုက “သူတစ်ပါးမှာခံကြပါသည်” ဟုလျှောက်သော် ယေရှုက “သို့ ဖြစ်လျှင် သားမူကား လွတ်ရ၏။ သို့သော်လည်း ထိုသူတို့သည် ငါတို့ကြောင့် မမှားယွင်းမည်အကြောင်း အိုင်သို့သွား၍ ငါးမျှားကိုချလော့။ ရှေးဦးစွာရသောငါးကိုယူ၍ ပါးစပ်ကိုဖွင့်လျှင် သတာတဲတစ်ပြားကို တွေ့လိမ့်မည်။ ထိုငွေကိုယူ၍ ငါ့အဖို့နှင့် သင့်အဖို့ ထိုသူအားပေးလော့” ဟုမိန့်တော်မူ၏။ (မဿဲ ၁၇:၂၄-၂၇) ဤမှတ်တမ်းတွင် အဘယ်မူ ကို တွေ့နိုင်သနည်း။
ယေရှုသည် မေးခွန်းများဆက်တိုက်မေးခြင်းဖြင့် ပေတရု၏ စဉ်းစားဆင်ခြင်နိုင်စွမ်းကို လမ်းကြောင်းပေးခဲ့သည်။ ယေရှုသည် ဘုရားသခင်၏သားတော်အနေနှင့် အခွန်မှကင်းလွတ်သည်။ ယင်းအချက်ကို အစပိုင်းတွင် ပေတရု နားမလည်ခဲ့သော်လည်း ယင်းကိုနားလည်ရန် ယေရှု ကြင်နာစွာ ကူညီပေးခဲ့သည်။ ကျွန်ုပ်တို့လည်း ယေရှုကိုတုပသည့်အနေနှင့် အခြားသူတို့ အမှားပြုလုပ်မိသောအခါ သူတို့အမှားကို ထောက်ပြခြင်း သို့မဟုတ် အပြစ်တင်ခြင်းပြုမည့်အစား သနားကြင်နာစွာဆက်ဆံရန် ဆုံးဖြတ်နိုင်သည်။
အခွန်ပေးရခြင်းမှာ အခြားသူများကို ထိမိမလဲစေရန်ဖြစ်ကြောင်း ပေတရုသိရှိသွားပြီ။ ဤမှတ်တမ်းတွင် ကျွန်ုပ်တို့သင်ယူနိုင်သည့် နောက်ထပ်မူတစ်ခုရှိပါသည်။ ကျွန်ုပ်တို့လုပ်ပိုင်ခွင့်ထက် အခြားသူတို့၏ ကိုယ်ကိုကိုယ်သိသောစိတ်ကို ထောက်ထားခြင်းသည် ပို၍အရေးကြီးသည်ဟူ၍ ဖြစ်သည်။
အခြားသူတို့၏ကိုယ်ကိုကိုယ်သိသောစိတ်ကို လေးစားကြောင်းဖော်ပြသည့် ဆုံးဖြတ်ချက်များချရန် အဘယ်အရာက လှုံ့ဆော်ပေးသနည်း။ ကိုယ်နှင့်စပ်ဆိုင်သူကို ချစ်ခြင်းဖြစ်သည်။ ဘုရားသခင်အား စိတ်နှလုံးအကြွင်းမဲ့ချစ်ရမည်ဟူသော ပညတ်ပြီးလျှင် ကိုယ်နှင့်စပ်ဆိုင်သူကို ကိုယ်နှင့်အမျှချစ်ခြင်းဟူသောပညတ်သည် ဒုတိယအရေးကြီးဆုံးဖြစ်ကြောင်း ယေရှုသွန်သင်ခဲ့သည်။ (မဿဲ ၂၂:၃၉) သို့သော် ကျွန်ုပ်တို့သည် အတ္တဆန်သည့်လောကတွင် နေထိုင်ရပြီး ကျွန်ုပ်တို့၏အပြစ်ပြုလိုစိတ်က ကိုယ်ကျိုးရှာသည့်ဘက်သို့ တိမ်းညွတ်စေသည်။ ထို့ကြောင့် လူတစ်ဦးသည် ကိုယ်နှင့်စပ်ဆိုင်သူကို ကိုယ်နှင့်အမျှချစ်ရန် စိတ်နှလုံးကိုအသစ်ပြုပြင်ရမည်။—ရောမ ၁၂:၂။
လူများစွာသည် ယင်းသို့ ပြု ပြင်ပြောင်းလဲခဲ့ကြပြီး ကြီးလေးသောကိစ္စတွင်ဖြစ်စေ၊ အသေးအဖွဲကိစ္စတွင်ဖြစ်စေ ဆုံးဖြတ်ချက်ချသည့်အခါ အခြားသူများကို ထည့်တွက်စဉ်းစားခဲ့ကြသည်။ ပေါလု ဤသို့ရေးခဲ့သည်– “ညီအစ်ကိုတို့ သင်တို့သည် လွတ်ခြင်းအခွင့်ကိုရသောသူဖြစ်ကြ၏။ သို့သော်လည်း ဇာတိပကတိအားအခွင့်ကိုပေး၍ ထိုလွှတ်ခြင်းကို မသုံးကြနှင့်။ အချင်းချင်းချစ်၍ အမှုချင်းကို ဆောင်ရွက်ကြလော့။” (ဂလာတိ ၅:၁၃) ယင်းကို မည်သို့ပြုနိုင်မည်နည်း။ လူများ သမ္မာကျမ်းစာလေ့လာနိုင်ဖို့ အကူအညီပေးရန် တောမြို့လေးသို့ ပြောင်းရွှေ့လာသည့် အမျိုးသမီးငယ်တစ်ဦးကို သုံးသပ်ကြည့်ပါ။ သူသည် လူတို့နှင့်စကားပြောဆိုသည်နှင့်အမျှ သူ့အဝတ်အစားသည် မြို့ပြဖက်ရှင်အရ ဣန္ဒြေရှိသော်လည်း ဤဒေသတွင် လူအများပြောစရာဖြစ်နေကြောင်း သိရှိလာသည်။ သူ၏ဝတ်စားဖြီးလိမ်းပုံသည် ဣန္ဒြေရှိသော်သည်း ‘ဘုရားသခင်၏နှုတ်မြွက်တော်ကို ကဲ့ရဲ့ခြင်းနှင့်ကင်းလွတ်စိမ့်သောငှာ’ အရောင်ဖျော့ဖျော့ကိုဝတ်ဆင်ရန် ဆုံးဖြတ်ခဲ့သည်။—တိတု ၂:၄-၆။
သင်၏ဝတ်စားဖြီးလိမ်းပုံ သို့မဟုတ် သင့်အကြိုက်တို့နှင့်ပတ်သက်၍ ဆုံးဖြတ်စရာများပေါ်လာလျှင်ကော မည်သို့တုံ့ပြန်မည်နည်း။ ဆုံးဖြတ်ချက်ချတော့မည်ဆိုလျှင် အခြားသူများ၏ ကိုယ်ကိုကိုယ်သိသောစိတ်ကို ထည့်စဉ်းစားပါက ယေဟောဝါနှစ်သက်တော်မူမည်ဖြစ်ကြောင်း စိတ်ချနိုင်သည်။
ရေရှည်အတွက် ရှု မြင်တတ်ပါ
ဆုံးဖြတ်ချက်များချရာတွင် ကျမ်းစာမူများနှင့် အခြားသူတို့၏ ကိုယ်ကိုကိုယ်သိသောစိတ်အပြင် အဘယ်အရာကို ထည့်သွင်းသုံးသပ်သင့်သနည်း။ ခရစ်ယာန်တို့လျှောက်ရသည့်လမ်းသည် ခက်ခဲကြမ်းတမ်းပြီး ကျဉ်းမြောင်းသော်လည်း ဘုရားသခင်ချမှတ်ထားသည့် ကန့်သတ်ချက်အတွင်း လွတ်လပ်မှုများစွာရှိပါသည်။ (မဿဲ ၇:၁၃၊ ၁၄) ကျွန်ုပ်တို့၏ဆုံးဖြတ်ချက်သည် အနာဂတ်တွင် ဝိညာဉ်ရေး၊ စိတ်ဓာတ်ရေးနှင့် ကျန်းမာရေးပိုင်းကို မည်သို့ထိခိုက်စေနိုင်ကြောင်း သုံးသပ်ကြည့်ရန် လိုအပ်သည်။
သင်သည် အလုပ်တစ်ခုလက်ခံရန် စဉ်းစားနေသည်ဆိုပါစို့။ အလုပ်အမျိုးအစားမှာလည်း ကောင်းမွန်သင့်လျော်ပေမည်။ ခရစ်ယာန်အစည်းအဝေးများ၊ စည်းဝေးကြီးများ တက်ရောက်နိုင်သည်။ လစာမှာလည်း သင်မျှော်လင့်ထားသည်ထက် ပိုများနေသည်။ အလုပ်ရှင်က သင့်ကျွမ်းကျင်မှုကို အလွန်တန်ဖိုးထားပြီး ယင်းကို အပြည့်အဝအသုံးချစေလိုသည်။ ထို့ပြင် ထိုအလုပ်မျိုးကို သင်လည်း နှစ်သက်သည်။ ကမ်းလှမ်းချက်ကိုလက်မခံနိုင်စရာအကြောင်း ရှိပါမည်လော။ ထိုအလုပ်တွင် လုံးဝအာရုံနှစ်မြုပ်သွားမည်ကို ကြိုသိနေလျှင်ကော မည်သို့နည်း။ အချိန်ပိုဆင်းဖို့မလိုဟု သင့်အား ဆိုပေမည်။ သို့သော် အလုပ်ပြီးစီးရန် သင်လုပ်သင့်သည်ထက် အချိန်ပိုဆင်းလိုမည်လော။ အဆိုပါ အချိန်ပိုဆင်းခြင်းမျိုး မကြာခဏကြုံရနိုင်သလော။ ယင်းသည် သင့်မိသားစုအပြင် နောက်ဆုံးတွင် သင် လုံးဝမပျက်ကွက်သင့်သော ဝိညာဉ်ရေးလုပ်ဆောင်မှုများမှ သင့်ကို ဝေးကွာသွားစေနိုင်သလော။
ဂျင်မ်သည် သူ၏အလုပ်နှင့်ပတ်သက်၍ အရေးကြီးသော ဆုံးဖြတ်ချက်ချခဲ့ပုံကို သုံးသပ်ကြည့်ပါ။ သူသည် အလုပ်ကို မမောနိုင်မပန်းနိုင် ကြိုးစားလုပ်ဆောင်ကာ ရာထူးတက်ခဲ့သည်။ နောက်ဆုံးတွင် ကုမ္ပဏီ၏ အရှေ့တိုင်းရုံးခွဲတွင် ဦးဆောင်ညွှန်ကြားရေးမှူး၊ အမေရိကန်ပြည်ထောင်စုရုံးတွင် စီမံခန့်ခွဲရေးမှူးနှင့် ဥရောပရုံးတွင် ဒါရိုက်တာဘုတ်အဖွဲ့ ဝင်တစ်ဦးဖြစ်လာသည်။ သို့သော် ဂျပန်နိုင်ငံတွင် စီးပွားရေးကျဆင်းသည့်အခါ ငွေနှင့် ဩဇာအာဏာရှိရန် ကြိုးစားခြင်းသည် အချည်းနှီးဖြစ်ကြောင်း သိရှိသွားသည်။ သူပင်ပင်ပန်းပန်းရှာဖွေစုဆောင်းခဲ့သော ငွေများ ချက်ချင်းပျောက်ဆုံးသွားသည်။ သူ၏ဘဝ ဦးတည်ရာမဲ့ဖြစ်ခဲ့ရသည်။ “နောက်ဆယ်နှစ်လောက်ဆို ဘယ်လိုများဖြစ်နေမလဲ” ဟုသူ့ကိုယ်သူမေးခဲ့သည်။ သူ၏ဇနီးနှင့် သားသမီးတို့၏ဘဝသည် ပို၍အဓိပ္ပာယ်ပြည့်ဝကြောင်း သတိပြုမိလာသည်။ သူတို့သည် နှစ်များတစ်လျှောက် ယေဟောဝါသက်သေများနှင့် ပေါင်းသင်းခဲ့ကြသည်။ ဂျင်မ်လည်း သူ၏မိသားစုကဲ့သို့ ပျော်ရွှင်ကျေနပ်မှု ခံစားလိုသည်။ ထို့ကြောင့် သူသည် သမ္မာကျမ်းစာကို စတင်လေ့လာခဲ့သည်။
ဂျင်မ်၏ဘဝပုံစံက ခရစ်ယာန်တစ်ဦးအဖြစ် အဓိပ္ပာယ်ရှိသောအသက်တာရရှိရန် အဆီးအတားဖြစ်စေကြောင်း မကြာမီ သိမြင်လာသည်။ သူသည် အာရှ၊ အမေရိကန်ပြည်ထောင်စု၊ ဥရောပသို့ အမြဲခရီးထွက်နေရပြီး ကျမ်းစာလေ့လာရန်၊ ယုံကြည်သူချင်းများနှင့်ပေါင်းသင်းရန် အချိန်သိပ်မပေးနိုင်ခဲ့ပေ။ သူဆုံးဖြတ်ချက်ချရတော့မည်– ‘အနှစ် ၅၀ ကြာ နေထိုင်ခဲ့တဲ့ ဘဝမျိုးနဲ့ပဲ ဆက်သွားမလား။ ဒါမှမဟုတ် ဘဝလမ်းစဉ်အသစ်တစ်ခုကို လိုက်စားမလား။’ သူ့ဆုံးဖြတ်ချက်၏ ရေရှည်အကျိုးဆက်ကို ဆုတောင်းသုံးသပ်ပြီး ဝိညာဉ်ရေးရာအတွက် အချိန်ပေးနိုင်မည့်အလုပ်တစ်ခုမှလွဲ၍ ကျန်အလုပ်အားလုံးကို စွန့်လွှတ်ရန် ဆုံးဖြတ်ခဲ့သည်။ (၁ တိမောသေ ၆:၆-၈) သူ၏ဆုံးဖြတ်ချက်သည် သူ့ကို ပို၍ပျော်ရွှင်စေပြီး ခရစ်ယာန်လုပ်ဆောင်မှုများတွင် အလုပ်များနေစေသည်။
သင်၏ဆုံးဖြတ်ချက်များသည် ကြီးလေးသည်ဖြစ်စေ၊ အသေးအဖွဲဖြစ်စေ အရေးပါသည်။ ယနေ့ သင်၏ဆုံးဖြတ်ချက်တစ်ခုသည် အောင်မြင်ခြင်း သို့မဟုတ် ရှုံးနိမ့်ခြင်းအပြင် သင့်အနာဂတ်တွင် အသက်ရှင်ခြင်းနှင့် သေခြင်းကိုပင် ဖြစ်စေနိုင်သည်။ သင်သည် သမ္မာကျမ်းစာမူများ၊ အခြားသူတို့၏ ကိုယ်ကိုကိုယ်သိသောစိတ်နှင့် သင့်လုပ်ရပ်၏ ရေရှည်အကျိုးဆက်တို့ကို ထည့်သွင်းသုံးသပ်ပါက ပညာရှိဆုံးဖြတ်ချက်များ ချနိုင်မည်ဖြစ်သည်။ ဘုရားသခင်၏အလိုတော်နှင့်ညီသော ဆုံးဖြတ်ချက်များကို ချပါလေ။
[စာမျက်နှာ ၁၃ ပါ ရုပ်ပုံ]
အသေးအဖွဲဟု ထင်ရသော ဆုံးဖြတ်ချက်များက ဝမ်းနည်းဖွယ်အကျိုးဆက်များ ဖြစ်ပေါ်စေနိုင်
[စာမျက်နှာ ၁၄ ပါ ရုပ်ပုံ]
ပညာရှိစွာဆုံးဖြတ်နိုင်ရန် ကျမ်းစာမူများကသူ့ ကိုမည်သို့ ကူညီပေးနိုင် ခဲ့သနည်း
[စာမျက်နှာ ၁၅ ပါ ရုပ်ပုံ]
ယေရှုသည် ပေတရုအား ထောက်ထားကြင်နာစွာ ပြောဆိုခဲ့