ခရစ်တော်ဘုရင်၏အမှုတော်ကို သစ္စာရှိစွာထမ်းဆောင်ခြင်း
ခရစ်တော်ဘုရင်၏အမှုတော်ကို သစ္စာရှိစွာထမ်းဆောင်ခြင်း
“အရပ်ရပ်တို့၌နေ၍ အသီးသီးအခြားခြားသော ဘာသာစကားကိုပြောသော လူမျိုးတကာတို့ကို အုပ်စိုးစေခြင်းငှာ ထိုသူသည် နိုင်ငံနှင့်တကွ အာဏာစက်တန်ခိုးကိုရ၏။”—ဒံယေလ ၇:၁၄။
၁၊ ၂။ ခရစ်တော်သည် အေဒီ ၃၃ တွင် ဘုရားသခင့်နိုင်ငံတော်တန်ခိုးအာဏာကို အပြည့်အဝမရသေးကြောင်း ကျွန်ုပ်တို့ မည်သို့သိရှိကြသနည်း။
အဘယ်အုပ်စိုးရှင်သည် မိမိလက်အောက်ခံပြည်သားများအတွက် အသက်စွန့်ပြီး တစ်ဖန်ပြန်အသက်ရှင်ကာ ဘုရင်အဖြစ် အုပ်စိုးနိုင်မည်နည်း။ အဘယ်ရှင်ဘုရင်သည် မြေကြီးပေါ်တွင်နေ၍ လက်အောက်ခံပြည်သားများ မိမိကို ယုံကြည်ကိုးစားကာ သစ္စာစောင့်သိစေရန် လုပ်ဆောင်ပြီးနောက် ကောင်းကင်မှ အုပ်စိုးနိုင်မည်နည်း။ ဤအရာနှင့် အခြားသောအရာများကို တတ်စွမ်းနိုင်သည့် တစ်ပါးတည်းသောပုဂ္ဂိုလ်မှာ ယေရှုခရစ်ပင်ဖြစ်သည်။ (လုကာ ၁:၃၂၊ ၃၃) ခရစ်တော်သေဆုံး၍ ရှင်ပြန်ထမြောက်ပြီး ကောင်းကင်သို့တက်သွားသည့်နောက် အေဒီ ၃၃ ပင်တေကုတ္တေပွဲနေ့တွင် ဘုရားသခင်သည် “အသင်းတော်အဖို့အလိုငှာ သူ့ကို အလုံးစုံတို့၏အချုပ်အခြာ ဦးခေါင်းဖြစ်စေတော်မူ၏။” (ဧဖက် ၁:၂၀-၂၂; တမန်တော် ၂:၃၂-၃၆) ဤနည်းဖြင့် ခရစ်တော်သည် အကန့်အသတ်နှင့် စတင်အုပ်စိုးနေပြီဖြစ်သည်။ ကိုယ်တော်၏ ဦးဆုံးလက်အောက်ခံပြည်သားတို့မှာ “ဘုရားသခင်၏ဣသရေလအမျိုး” ဖြစ်သော ဝိညာဉ်ရေးဣသရေလဖြင့် ဖွဲ့စည်းထားသည့် ဝိညာဉ်တော်ဖွား ခရစ်ယာန်များဖြစ်ကြသည်။—ဂလာတိ ၆:၁၆; ကောလောသဲ ၁:၁၃။
၂ အေဒီ ၃၃၊ ပင်တေကုတ္တေပွဲပြီးနောက် အနှစ် ၃၀ နီးပါးကြာသော် တမန်တော်ပေါလုက ခရစ်တော်သည် ဘုရားသခင့်နိုင်ငံတော်တန်ခိုးကို အပြည့်အဝမရသေးသော်လည်း ‘ဘုရားသခင်၏လက်ယာတော်ဘက်၌ ထိုင်၍ မိမိရန်သူတို့ကို မိမိခြေတင်ရာမချမထားမီတိုင်အောင် မျှော်လင့်လျက်နေတော်မူ’ ကြောင်း ထောက်ခံခဲ့သည်။ (ဟေဗြဲ ၁၀:၁၂၊ ၁၃) ထို့နောက် အေဒီ ပထမရာစုအဆုံးတိုင်လေသော် စကြဝဠာအကြွင်းမဲ့ပိုင်သအုပ်စိုးရှင် ယေဟောဝါသည် ခရစ်တော်ယေရှုအား တည်ထောင်ခါစ ကောင်းကင်နိုင်ငံတော်၏ ရှင်ဘုရင်အဖြစ် တင်မြှောက်သည့် စိတ်အာရုံတစ်ခုကို သက်ကြီးရွယ်အို တမန်တော်ယောဟန် ကြိုမြင်ခဲ့သည်။ (ဗျာ. ၁၁:၁၅; ၁၂:၁-၅) ကျွန်ုပ်တို့ခေတ်အမြင်မှကြည့်လျှင် ခရစ်တော်သည် ၁၉၁၄ ခုနှစ် *တွင် ကောင်းကင်၌ မေရှိယဘုရင်အဖြစ် စတင်အုပ်စိုးခဲ့ကြောင်း ထောက်ခံသည့် မငြင်းနိုင်သော သက်သေအထောက်အထားကို ပြန်သုံးသပ်နိုင်ကြသည်။
၃။ (က) ဘုရားသခင့်နိုင်ငံတော်သတင်းကောင်းသည် ၁၉၁၄ ခုနှစ်ကတည်းက အဘယ်သို့သောကဏ္ဍသစ်တစ်ခု ဖြစ်ခဲ့ပြီနည်း။ (ခ) ကိုယ့်ကိုယ်ကို အဘယ်မေးခွန်းများ မေးနိုင်ကြသနည်း။
၃ မှန်ပါသည်၊ ၁၉၁၄ ခုနှစ်ကတည်းက ဘုရားသခင့်နိုင်ငံတော်သတင်းကောင်းသည် စိတ်လှုပ်ရှားစရာကဏ္ဍသစ်တစ်ခု ဖြစ်ခဲ့ပြီ။ ခရစ်တော်သည် ဘုရားသခင့်ကောင်းကင်နိုင်ငံတော်၏ ရှင်ဘုရင်အဖြစ် “[မိမိ] ရန်သူတို့၏အလယ်၌” တက်ကြွစွာ အုပ်စိုးလျက်ရှိသည်။ (ဆာလံ ၁၁၀:၁၊ ၂; မဿဲ ၂၄:၁၄; ဗျာ. ၁၂:၇-၁၂) ထို့ပြင် ကိုယ်တော်၏ သစ္စာရှိလက်အောက်ခံပြည်သားများသည် လူ့သမိုင်း၌ ပြိုင်ဘက်ကင်းသည့် ကမ္ဘာချီကျမ်းစာပညာပေးအစီအစဉ်တွင် ပါဝင်လုပ်ဆောင်ခြင်းဖြင့် ကိုယ်တော်၏အခွင့်အာဏာကို ထက်သန်စွာ ထောက်ခံနေကြသည်။ (ဒံယေလ ၇:၁၃၊ ၁၄; မဿဲ ၂၈:၁၈) ဘုရားသခင့် “နိုင်ငံတော်သားများ” ဖြစ်ကြသော ဝိညာဉ်တော်ဖွားခရစ်ယာန်တို့သည် ‘ခရစ်တော်၏သံအမတ်’ များအဖြစ် အမှုဆောင်ကြသည်။ သူတို့ကို ဘုရားသခင့်နိုင်ငံတော်၏ သံတမန်များအဖြစ် အမှုဆောင်ကြသည့် တိုးပွားနေသော ခရစ်တော်၏ “အခြားသိုး” က သစ္စာရှိရှိ ထောက်မပေးကြသည်။ (မဿဲ ၁၃:၃၈; ၂ ကောရိန္သု ၅:၂၀; ယောဟန် ၁၀:၁၆) သို့တိုင် ကျွန်ုပ်တို့တစ်ဦးစီအနေနှင့် ခရစ်တော်၏အခွင့်အာဏာကို အမှန်တကယ် အသိအမှတ်ပြုမပြု ဆန်းစစ်ဖို့လိုအပ်သည်။ ကိုယ်တော်ကို ကျွန်ုပ်တို့ စွဲစွဲမြဲမြဲ သစ္စာရှိကြသလော။ ကောင်းကင်မှအုပ်စိုးသည့် ရှင်ဘုရင်တစ်ပါးကို ကျွန်ုပ်တို့သစ္စာစောင့်သိကြောင်း မည်သို့ဖော်ပြနိုင်ကြသနည်း။ ခရစ်တော်အပေါ် ကျွန်ုပ်တို့သစ္စာစောင့်သိရသည့် အကြောင်းရင်းများကို ဦးစွာသုံးသပ်ကြည့်ကြပါစို့။
သစ္စာစောင့်သိရန် လှုံ့ဆော်ပေးသည့် ရှင်ဘုရင်တစ်ပါး
၄။ ယေရှုသည် မြေကြီးပေါ် ဓမ္မအမှုဆောင်စဉ် မင်းလောင်းတစ်ပါးအနေဖြင့် အဘယ်အရာလုပ်ဆောင်ခဲ့သနည်း။
၄ ကျွန်ုပ်တို့သည် ခရစ်တော်လုပ်ဆောင်ခဲ့ရာကိုသာမက ကိုယ်တော်၏ထင်ရှားသောအရည်အသွေးများကို ကျေးဇူးတင်လေးမြတ်၍ ကိုယ်တော့်အပေါ် သစ္စာစောင့်သိကြသည်။ (၁ ပေတရု ၁:၈) မြေကြီးပေါ်ရှိစဉ် မင်းလောင်းယေရှုသည် ဘုရားသခင်သတ်မှတ်ထားချိန်တွင် ကမ္ဘာတစ်ဝန်းလုံးကို အုပ်စိုးသည့်အခါ လုပ်ဆောင်ပေးမည့်အရာကို အနည်းအကျဉ်း ပြသသွားခဲ့သည်။ ဆာငတ်နေသူတို့ကို ကိုယ်တော်ကျွေးမွေးခဲ့၏။ ဖျားနာသူ၊ မျက်စိမမြင်သူ၊ ကိုယ်အင်္ဂါချို့တဲ့သူ၊ နားမကြားသူနှင့် ဆွံ့အနေသူတို့ကို ကိုယ်တော်ကုသပေးခဲ့၏။ လူသေအချို့ကိုပင် အသက်ပြန်ရှင်စေခဲ့သည်။ (မဿဲ ၁၅:၃၀၊ ၃၁; လုကာ ၇:၁၁-၁၆; ယောဟန် ၆:၅-၁၃) ယေရှု၏မြေကြီးအသက်တာအကြောင်း ကောင်းစွာသိထားမည်ဆိုလျှင် မြေကြီး၏အနာဂတ်အုပ်စိုးရှင်အဖြစ် ကိုယ်တော်၏အရည်အသွေးများကို ကျွန်ုပ်တို့သိကျွမ်းလာမည်။ ယင်းတို့အထဲတွင် ကိုယ်ကျိုးစွန့်မေတ္တာသည် အထင်ရှားဆုံးဖြစ်သည်။ (မာကု ၁:၄၀-၄၅) ယင်းနှင့်ဆက်စပ်၍ နပိုလီယံ ဘိုနာပတ်က ဤသို့ဆိုခဲ့၏– “အလက်ဇန္ဒြား၊ ဆီဇာ၊ ရှားလမိန်းနှင့် ကျွန်ုပ်ကိုယ်တိုင်သည် အင်ပါယာများ တည်ထောင်ခဲ့ကြသည်။ သို့သော် မည်သည့်အရာအပေါ်အခြေပြု၍ ကျွန်ုပ်တို့အောင်မြင်ခဲ့ကြသနည်း။ ဩဇာအာဏာအပေါ်ဖြစ်၏။ ယေရှုခရစ်တစ်ပါးတည်းသာ မေတ္တာကိုအခြေခံ၍ သူ၏နိုင်ငံတော်ကို တည်ထောင်ခဲ့ပြီး ယနေ့တွင် လူသန်းပေါင်းများစွာသည် ကိုယ်တော်အတွက် အသက်ပေးလိုကြသည်။”
၅။ ယေရှု၏ကိုယ်ရည်ကိုယ်သွေးသည် အဘယ်ကြောင့် အလွန်ဆွဲဆောင်မှုဖြစ်ခဲ့သနည်း။
၅ ယေရှုသည် နူးညံ့သိမ်မွေ့ ပြီး စိတ်နှိမ့်ချသူဖြစ်ရာ ဝန်လေး၍ စိတ်ပင်ပန်းနေသူတို့သည် ကိုယ်တော်၏ တည်ဆောက်မှုဖြစ်စေသော သွန်သင်ချက်များနှင့် ကြင်နာတတ်သည့် ကိုယ်ရည်ကိုယ်သွေးကြောင့် လန်းဆန်းမှုရခဲ့ကြသည်။ (မဿဲ ၁၁:၂၈-၃၀) ကလေးသူငယ်များပင် ကိုယ်တော်နှင့်အတူနေရသည်ကို သက်သောင့်သက်သာရှိသည်။ စိတ်နှိမ့်ချ၍ အမြော်အမြင်ရှိသူတို့သည် ကိုယ်တော်၏တပည့်များ ဖြစ်လာကြသည်။ (မဿဲ ၄:၁၈-၂၂; မာကု ၁၀:၁၃-၁၆) ကိုယ်တော်သည် ထောက်ထားစာနာပြီး တလေးတစားဆက်ဆံတတ်သဖြင့် ဘုရားသခင်အားကြောက်ရွံ့သော အမျိုးသမီးများပင် ကိုယ်တော်အပေါ် သစ္စာစောင့်သိခဲ့ကြသည်။ အမျိုးသမီးတချို့မှာမူ ကိုယ်တော်အမှုဆောင်စဉ် ကိုယ်တော်အားကျွေးမွေးပြုစုရန် မိမိတို့၏အချိန်၊ ခွန်အားနှင့် ရုပ်စ္စည်းများ ပေးဆက်ခဲ့ကြသည်။—လုကာ ၈:၁-၃။
၆။ လာဇရုသေဆုံးသွားသောအခါ စာနာသနားစိတ်ကို ယေရှုမည်သို့ပြသခဲ့သနည်း။
၆ ခရစ်တော်သည် အချစ်ဆုံးမိတ်ဆွေလာဇရု သေဆုံးသွားသောအခါ စာနာသနားစိတ်ပြခဲ့သည်။ မာရိနှင့်မာသတို့ ဝမ်းနည်းပူဆွေးနေသောကြောင့် ကိုယ်တော်အလွန်စိတ်ထိခိုက်သွားပြီး ဝမ်းနည်းပူဆွေးမှုကို မထိန်းနိုင်ဘဲ “မျက်ရည်ကျတော်မူ၏။” ကိုယ်တော်သည် မကြာမီ လာဇရုအား အသက်ပြန်ရှင်စေမည်ကို သိထားသည့်တိုင် ဝမ်းနည်းကြေကွဲမှုကြောင့် “စိတ်ပူပန်ခြင်းရှိ” ၏။ ထို့နောက် မေတ္တာနှင့် သနားကြင်နာမှုတို့၏ လှုံ့ဆော်မှုကြောင့် ယေရှုသည် ဘုရားသခင်ပေးထားသော အခွင့်အာဏာကိုအသုံးပြု၍ လာဇရုအား သေခြင်းမှ အသက်ပြန်ရှင်စေခဲ့သည်။—ယောဟန် ၁၁:၁၁-၁၅၊ ၃၃-၃၅၊ ၃၈-၄၄။
၇။ ကျွန်ုပ်တို့၏သစ္စာစောင့်သိမှုကို ယေရှုအဘယ်ကြောင့် ရထိုက်သနည်း။ (စာမျက်နှာ ၃၁ ရှိ လေးထောင့်ကွက်ကိုလည်းရှု။)
၇ ယေရှုသည် မှန်ကန်ရာကို ချစ်မြတ်နိုးပြီး အရေခြုံမှုနှင့် ဆိုးယုတ်မှုကို ရွံမုန်းသောကြောင့် ကျွန်ုပ်တို့ကြည်ညိုလေးစားကြရသည်။ ကိုယ်တော်သည် လိုဘကြီးသည့် ကုန်သည်များကို ဝတ်ပြုရာအိမ်တော်မှ နှစ်ကြိမ်တိုင်တိုင် သတ္တိရှိရှိမောင်းထုတ်ခဲ့သည်။ (မဿဲ ၂၁:၁၂၊ ၁၃; ယောဟန် ၂:၁၄-၁၇) ထို့ပြင် ကိုယ်တော်သည် လူသားတစ်ဦးအနေနှင့် မြေကြီးပေါ်ရှိစဉ် ဆင်းရဲခြင်းမျိုးစုံ ကြုံတွေ့ခဲ့ရရာ ကျွန်ုပ်တို့ရင်ဆိုင်နေရသည့် ပြဿနာများနှင့် စိတ်ဖိစီးမှုများကို ကိုယ်ချင်းစာပေးတတ်သည်။ (ဟေဗြဲ ၅:၇-၉) မုန်းတီးမှုနှင့် မတရားမှုတို့ကြောင့် ဆိုးရွားစွာထိခိုက်ခံနေရသူတို့၏ ခံစားချက်ကိုလည်း ကိုယ်တော်နားလည်ခဲ့၏။ (ယောဟန် ၅:၁၅-၁၈; ၁၁:၅၃၊ ၅၄; ၁၈:၃၈–၁၉:၁၆) ခမည်းတော်၏အလိုတော်ကို ပြီးမြောက်စေရန်နှင့် မိမိ၏လက်အောက်ခံများ ထာဝရအသက်ရရန် ရက်စက်စွာ သတ်ပစ်ခြင်းကို သတ္တိရှိရှိ ခံရပ်ခဲ့သည်။ (ယောဟန် ၃:၁၆) ခရစ်တော်၏ ဤအရည်အသွေးများက သင့်အား ကိုယ်တော်၏အမှုတော်ကို သစ္စာရှိရှိထမ်းဆောင်ဖို့ လှုံ့ဆော်ပေးသည်မဟုတ်လော။ (ဟေဗြဲ ၁၃:၈; ဗျာ. ၅:၆-၁၀) သို့သော် ခရစ်တော်ဘုရင်၏ လက်အောက်ခံများဖြစ်ဖို့ အဘယ်အရာလိုသေးသနည်း။
လက်အောက်ခံတစ်ဦးဖြစ်ရန် အရည်အချင်းပြည့်မီခြင်း
၈။ ခရစ်တော်၏ လက်အောက်ခံများအား အဘယ်အရာတောင်းဆိုထားသနည်း။
၈ ဤနှိုင်းယှဉ်ချက်ကို စဉ်းစားကြည့်ပါ။ နိုင်ငံတစ်နိုင်ငံ၏ နိုင်ငံသားတစ်ဦးဖြစ်ရန် အခြေခံသတ်မှတ်ချက်တချို့ကို ပြည့်မီဖို့လိုအပ်သည်။ နိုင်ငံသားဖြစ်လာမည့်သူတို့သည် အမူအကျင့်ကောင်းပြီး သတ်မှတ်ထားသော ကျန်းမာရေးစံချိန်စံညွှန်းကို ပြည့်မီဖို့လိုပေမည်။ အလားတူ၊ ခရစ်တော်၏ လက်အောက်ခံများသည် မြင့်မားသောကျင့်ဝတ်စံနှုန်းများ စောင့်ထိန်းပြီး ဝိညာဉ်ရေးကျန်းခံ့ရန်လိုသည်။—၁ ကောရိန္သု ၆:၉-၁၁; ဂလာတိ ၅:၁၉-၂၃။
၉။ ခရစ်တော်အား ကျွန်ုပ်တို့သစ္စာစောင့်သိကြောင်း မည်သို့ပြသနိုင်ကြသနည်း။
၉ ယေရှုခရစ်သည် မိမိ၏လက်အောက်ခံများအား ကိုယ်တော်နှင့် ကိုယ်တော့်နိုင်ငံတော်ကို သစ္စာစောင့်သိရန်လည်း တော်မှန်စွာတောင်းဆိုတော်မူ၏။ မြေကြီးပေါ်တွင် မင်းလောင်းအဖြစ် ကိုယ်တော်အသက်ရှင်ခဲ့စဉ်က သွန်သင်ခဲ့ရာတို့နှင့်အညီ အသက်ရှင်နေထိုင်ခြင်းအားဖြင့် သစ္စာစောင့်သိကြောင်း သူတို့ပြသကြသည်။ ဥပမာ၊ ထိုသူတို့သည် စည်းစိမ်ဥစ္စာပိုင်ဆိုင်ဖို့ထက် ဘုရားသခင့်နိုင်ငံတော်အကျိုးစီးပွားနှင့် ကိုယ်တော့်အလိုတော်ကို ရှေးဦးထားကြသည်။ (မဿဲ ၆:၃၁-၃၄) ထို့ပြင် သူတို့သည် အခက်ခဲဆုံးအခြေအနေများ ကြုံရသည့်တိုင် ခရစ်တော်၏ကိုယ်ရည်ကိုယ်သွေးကို ထက်သန်စွာ ရောင်ပြန်ဟပ်ကြသည်။ (၁ ပေတရု ၂:၂၁-၂၃) ခရစ်တော်၏လက်အောက်ခံများသည် ကိုယ်တိုင်အစပြု၍ အခြားသူတို့ကို ကောင်းမှုပြုခြင်းအားဖြင့် ကိုယ်တော်၏ပုံသက်သေကို တုပကြသည်။—မဿဲ ၇:၁၂; ယောဟန် ၁၃:၃-၁၇။
၁၀။ (က) မိသားစုတွင်နှင့် (ခ) အသင်းတော်တွင် ခရစ်တော်အပေါ်သစ္စာစောင့်သိကြောင်း မည်သို့ပြသနိုင်ကြသနည်း။
၁၀ ယေရှု၏နောက်လိုက်များသည် မိသားစုတွင် ကိုယ်တော်၏အရည်အသွေးများကို တင်ပြခြင်းဖြင့်လည်း ကိုယ်တော်အား သစ္စာစောင့်သိကြောင်းပြကြသည်။ ဥပမာ၊ လင်ယောက်ျားများသည် မိမိတို့၏ဇနီးသည်နှင့် သားသမီးများကို ဆက်ဆံရာတွင် ခရစ်တော်ကိုတုပခြင်းဖြင့် မိမိတို့၏ကောင်းကင်ဘုရင်ကို သစ္စာစောင့်သိကြောင်းပြကြသည်။ (ဧဖက် ၅:၂၅၊ ၂၈-၃၀; ၆:၄; ၁ ပေတရု ၃:၇) ဇနီးသည်တို့သည် စင်ကြယ်သောအကျင့်နှင့် “နူးညံ့ငြိမ်သက်ခြင်းသဘော” တင်ပြခြင်းအားဖြင့် ခရစ်တော်ကို သစ္စာစောင့်သိကြောင်းပြကြသည်။ (၁ ပေတရု ၃:၁-၄ ; ဧဖက် ၅:၂၂-၂၄) သားသမီးများကလည်း နာခံမှုဆိုင်ရာ ခရစ်တော်၏ပုံသက်သေကို လိုက်လျှောက်ခြင်းအားဖြင့် ကိုယ်တော့်အပေါ် သစ္စာစောင့်သိကြ၏။ ကိုယ်တော်၏မိဘများသည် စုံလင်သူများမဟုတ်ကြသော်လည်း ယေရှုငယ်ရွယ်စဉ်က သူတို့ကို လက်အောက်ခံခဲ့၏။ (လုကာ ၂:၅၁၊ ၅၂; ဧဖက် ၆:၁) ခရစ်တော်၏လက်အောက်ခံတို့သည် “စိတ်ကြင်နာခြင်း၊ ညီအစ်ကိုချင်းကဲ့သို့ချစ်ခြင်း၊ သနားစုံမက်ခြင်း” တို့ပြခြင်းဖြင့် ကိုယ်တော့်ကို သစ္စာရှိစွာ တုပကြသည်။ သူတို့သည် ခရစ်တော်နည်းတူ စိတ်နှိမ့်ချကာ ရန်တုံ့မမူဖို့ ကြိုးစားကြသည်။—၁ ပေတရု ၃:၈၊ ၉; ၁ ကောရိန္သု ၁၁:၁။
တရားအတိုင်း လိုက်နာသည့် လက်အောက်ခံများ
၁၁။ ခရစ်တော်၏လက်အောက်ခံတို့သည် အဘယ်ပညတ်များကို လိုက်နာကြသနည်း။
၁၁ နိုင်ငံတစ်နိုင်ငံ၏ နိုင်ငံသားဖြစ်လိုသူတို့သည် ထိုနိုင်ငံ၏ဥပဒေများကို လိုက်နာရမည်ဖြစ်သကဲ့သို့ ခရစ်တော်၏လက်အောက်ခံများလည်း ယေရှုမိန့်မှာခဲ့ရာ၊ သွန်သင်ခဲ့ရာမှန်သမျှနှင့်အညီ အသက်ရှင်နေထိုင်ခြင်းဖြင့် “ခရစ်တော်၏တရား” ကို လိုက်နာကြသည်။ (ဂလာတိ ၆:၂) အထူးသဖြင့် သူတို့သည် မေတ္တာဆိုင်ရာ “ရွှေပညတ်” အတိုင်း သစ္စာရှိရှိနေထိုင်ကြသည်။ (ယာကုပ် ၂:၈) ဤပညတ်များတွင် အဘယ်အရာပါဝင်သနည်း။
၁၂၊ ၁၃။ “ခရစ်တော်၏တရား” ကို ကျွန်ုပ်တို့မည်သို့ သစ္စာရှိစွာလိုက်နာကြသနည်း။
၁၂ ခရစ်တော်၏လက်အောက်ခံတို့သည် မစုံလင်မှုများ၊ ချို့တဲ့အားနည်းချက်များနှင့် မကင်းကြချေ။ (ရောမ ၃:၂၃) သို့ဖြစ်၍ သူတို့သည် “ညီအစ်ကိုများကို ချစ်ယောင်မဆောင်” ဘဲ “အချင်းချင်း အားကြီးသောချစ်ခြင်းမေတ္တာရှိကြ” ရန် ယင်းမေတ္တာကို ဆက်၍ပျိုးထောင်နေဖို့လိုသည်။ (၁ ပေတရု ၁:၂၂) “တစ်ယောက်နှင့်တစ်ယောက် အပြစ်တင်စရာအခွင့်ရှိလျှင်” ခရစ်ယာန်တို့သည် “အချင်းချင်းသည်းခံ၍ အပြစ်ကိုလွှတ်ကြ” ခြင်းအားဖြင့် ခရစ်တော်၏တရားကို သစ္စာရှိစွာ ကျင့်သုံးကြသည်။ ဤပညတ်ကို လိုက်နာခြင်းက သူတို့အား မစုံလင်မှုများကို လျစ်လျူရှုစေပြီး အချင်းချင်းချစ်ကြရန် အကြောင်းများရှာတွေ့စေသည်။ “စုံလင်ခြင်းအဖွဲ့အစည်းတည်းဟူသော” ချစ်ခြင်းမေတ္တာကို ယူတင်ဝတ်ဆောင်ကာ ကျွန်ုပ်တို့၏ မေတ္တာပြည့်ဝသောရှင်ဘုရင်ကို သစ္စာရှိစွာ လက်အောက်ခံကြသူတို့နှင့်အတူ ရှိနေရခြင်းကို သင်လေးမြတ်သည်မဟုတ်လော။—ကောလောသဲ ၃:၁၃၊ ၁၄။
၁၃ ထို့ပြင် ပုံသက်သေအဖြစ်ပြခဲ့သည့် မိမိ၏မေတ္တာသည် လူသားအချင်းချင်း တင်ပြကြသည့် မေတ္တာထက် ပို၍ကြီးမြတ်ကြောင်း ယေရှုရှင်းပြခဲ့၏။ (ယောဟန် ၁၃:၃၄၊ ၃၅) ကျွန်ုပ်တို့ကိုချစ်သောသူတို့အားသာ ချစ်တုံ့ပြန်မည်ဆိုလျှင် ကျွန်ုပ်တို့ မည်သို့မျှ “ထူးခြား” မည်မဟုတ်ချေ။ ဤတွင် ကျွန်ုပ်တို့၏မေတ္တာသည် မပြည့်စုံ၊ ချို့တဲ့နေပါလိမ့်မည်။ မိမိတို့အား မုန်းတီး၍ ညှဉ်းဆဲသူတို့ကိုပင် မူအပေါ်အခြေပြုသော မေတ္တာပြခြင်းဖြင့် ခမည်းတော်၏မေတ္တာတော်ကို တုပကြရန် ယေရှုတိုက်တွန်းခဲ့သည်။ (မဿဲ ၅:၄၆-၄၈) ဤမေတ္တာသည် ဘုရားသခင့်နိုင်ငံတော်ကို လက်အောက်ခံသူတို့အား ၎င်းတို့၏အဓိကလုပ်ငန်းအပေါ် သစ္စာစောင့်သိနေရန်လည်း လှုံ့ဆော်ပေး၏။ ထိုလုပ်ငန်းကား အဘယ်နည်း။
သစ္စာစောင့်သိမှု စမ်းသပ်ခံရ
၁၄။ ဟောပြောခြင်းလုပ်ငန်းသည် အဘယ်ကြောင့် အလွန်အရေးကြီးသနည်း။
၁၄ ဘုရားသခင့်နိုင်ငံတော်ကို လက်အောက်ခံသူတို့သည် အရေးတကြီးလုပ်ငန်းဖြစ်သော “ဘုရားသခင်၏နိုင်ငံတော်အကြောင်းကို သက်သေခံ” နေကြသည်။ (တမန်တော် ၂၈:၂၃) မေရှိယနိုင်ငံတော်သည် ယေဟောဝါ၏ စကြဝဠာအကြွင်းမဲ့ပိုင်သအုပ်စိုးမှုကို သံသယကင်းရှင်းစေမည်ဖြစ်သောကြောင့် ထိုသို့လုပ်ဆောင်ဖို့ အလွန်အရေးကြီးသည်။ (၁ ကောရိန္သု ၁၅:၂၄-၂၈) ကျွန်ုပ်တို့ သတင်းကောင်းဟောပြောသည့်အခါ ကြားနာသူတို့အား ဘုရားသခင့်နိုင်ငံတော်၏ လက်အောက်ခံများဖြစ်ခွင့်ရစေသည်။ ထို့ပြင် သတင်းတရားကို တုံ့ပြန်ပုံအပေါ်မူတည်၍ လူသားများကို ခရစ်တော်ဘုရင် တရားစီရင်မည်။ (မဿဲ ၂၄:၁၄; ၂ သက်သာလောနိတ် ၁:၆-၁၀) သို့ဖြစ်၍ ခရစ်တော်အား ကျွန်ုပ်တို့သစ္စာစောင့်သိကြောင်းပြနိုင်သည့် အဓိကနည်းမှာ အခြားသူတို့အား ဘုရားသခင့်နိုင်ငံတော်အကြောင်း ဟောပြောပါဟူသော ကိုယ်တော်၏မိန့်မှာချက်ကို နာခံခြင်းအားဖြင့်ဖြစ်သည်။—မဿဲ ၂၈:၁၈-၂၀။
၁၅။ ခရစ်ယာန်တို့၏ သစ္စာစောင့်သိမှုသည် အဘယ်ကြောင့် စမ်းသပ်ခံနေရသနည်း။
၁၅ စာတန်သည် ဟောပြောခြင်းလုပ်ငန်းကို အစွမ်းကုန်ဆန့်ကျင်သကဲ့သို့ လူ့အုပ်စိုးရှင်တို့ကလည်း ခရစ်တော်၏ ဘုရားသခင်ပေးအခွင့်အာဏာကို အသိအမှတ်မပြုကြချေ။ (ဆာလံ ၂:၁-၃၊ ၆-၈) သို့နှင့် မိမိ၏နောက်လိုက်များအား ယေရှုက “ကျွန်သည် မိမိသခင်ထက် သာ၍ကြီးမြတ်သည်မဟုတ် . . .။ သူတို့သည် ငါ့ကိုညှဉ်းဆဲလျှင် သင်တို့ကို ညှဉ်းဆဲကြလိမ့်မည်” ဟုသတိပေးခဲ့သည်။ (ယောဟန် ၁၅:၂၀) ထို့ကြောင့် ခရစ်တော်၏နောက်လိုက်များသည် ဝိညာဉ်ရေးတိုက်ပွဲတွင် ပါဝင်ဆင်နွှဲနေရပြီး သူတို့၏သစ္စာစောင့်သိမှုမှာ စမ်းသပ်ခံနေရသည်။—၂ ကောရိန္သု ၁၀:၃-၅; ဧဖက် ၆:၁၀-၁၂။
၁၆။ ဘုရားသခင့်နိုင်ငံတော်၏ လက်အောက်ခံများသည် “ဘုရားသခင်၏ဥစ္စာကို” ဘုရားသခင်အား မည်သို့ “ဆက်ပေးကြ” သနည်း။
၁၆ သို့သော် ဘုရားသခင့်နိုင်ငံတော်၏ လက်အောက်ခံတို့သည် လူ့အာဏာပိုင်များကို မခန့်လေးစားမပြုဘဲ မိမိတို့၏မျက်မြင်မရ ရှင်ဘုရင်ကို သစ္စာစောင့်သိကြသည်။ (တိတု ၃:၁၊ ၂) ယေရှုက “ကဲသာဘုရင်၏ဥစ္စာကို ကဲသာဘုရင်အား ဆက်ပေးကြလော့။ ဘုရားသခင်၏ဥစ္စာကိုကား ဘုရားသခင်အား ဆက်ပေးကြလော့” ဟုမိန့်ဆိုခဲ့၏။ (မာကု ၁၂:၁၃-၁၇) သို့ဖြစ်၍ ခရစ်တော်၏လက်အောက်ခံတို့သည် ဘုရားသခင့်ဥပဒေများနှင့်မဆန့်ကျင်သော အစိုးရဥပဒေများကို လိုက်နာကြသည်။ (ရောမ ၁၃:၁-၇) သို့သော် ဂျူးအထက်တရားရုံးသည် ယေရှု၏တပည့်များကို မဟောပြောရန် အမိန့်ပေးခြင်းဖြင့် ဘုရားသခင့်ဥပဒေများကို ဆန့်ကျင်သောအခါ ယေရှု၏နောက်လိုက်များက “လူ၏စကားထက် ဘုရားသခင်၏စကားတော်ကို နားထောင်” ရမည်ဖြစ်ကြောင်း အခိုင်အမာနှင့် တလေးတစား ပြောဆိုခဲ့ကြသည်။—တမန်တော် ၁:၈; ၅:၂၇-၃၂။
၁၇။ ကျွန်ုပ်တို့သည် သစ္စာစောင့်သိမှုဆိုင်ရာ စမ်းသပ်မှုများကို ရဲစွမ်းသတ္တိဖြင့် အဘယ်ကြောင့် ရင်ဆိုင်နိုင်ကြသနည်း။
၁၇ ခရစ်တော်၏လက်အောက်ခံများသည် နှိပ်စက်ညှဉ်းပန်းခံရသည့်အခါ မိမိတို့၏ရှင်ဘုရင်အပေါ် ဆက်သစ္စာစောင့်သိရန် ရဲစွမ်းသတ္တိရှိဖို့လိုသည်။ သို့သော် ယေရှု ဤသို့မိန့်ဆိုခဲ့၏– ‘ငါ့ကြောင့် သင်တို့ကို ကဲ့ရဲ့ညှဉ်းဆဲ၍ မမှန်ဘဲလျက် အပြစ်တကာတင်ကြသောအခါ သင်တို့သည် ပျော်ရွှင်ကြ၏။ ဝမ်းမြောက်ရွှင်မြူးခြင်းရှိကြလော့။ အကြောင်းမူကား၊ ကောင်းကင်ဘုံ၌ သင်တို့၏အကျိုးသည် ကြီးလှပေ၏။’ (မဿဲ ၅:၁၁၊ ၁၂) ခရစ်တော်၏ အစောပိုင်းနောက်လိုက်များသည် အဆိုပါစကားများမှန်ကန်ကြောင်း တွေ့ကြုံခဲ့ရသည်။ ဘုရားသခင့်နိုင်ငံတော်အကြောင်း ဆက်ဟောပြောသည့်အတွက် အပြင်းအထန်ရိုက်နှက်ခံရသည့်တိုင် ‘သခင်ယေရှု၏နာမကြောင့် မိမိတို့သည် အရှက်ကွဲခြင်းကို ခံထိုက်ကြသည်ဟု မှတ်တော်မူသောကြောင့် ဝမ်းမြောက်သောစိတ်ရှိ၍ . . . ဝတ်ပြုရာအိမ်တော်၌လည်းကောင်း၊ အိမ်၌လည်းကောင်း နေ့တိုင်းအစဉ် ဆုံးမသွန်သင်လျက် ယေရှုသည် ခရစ်တော်ဖြစ်၏ဟူ၍ ဧဝံဂေလိတရားကို မပြတ်ဟောပြောလျက်နေကြ၏။’ (တမန်တော် ၅:၄၁၊ ၄၂) သင်သည် အခက်အခဲများ၊ ဖျားနာမှု၊ ချစ်မြတ်နိုးရသူဆုံးပါးမှု သို့မဟုတ် ဆန့်ကျင်မှုကိုခံရပ်ပြီး ထပ်တူသစ္စာစောင့်သိမည်ဆိုလျှင် ချီးမွမ်းခံထိုက်ပါသည်။—ရောမ ၅:၃-၅; ဟေဗြဲ ၁၃:၆။
၁၈။ ပုန္တိပိလတ်အား ယေရှုပြောသည့်စကားက အဘယ်အရာကို ဖော်ပြသနည်း။
၁၈ ယေရှုသည် ဘုရင်အဖြစ်ခန့်အပ်မခံရမီက ရောမမြို့ဝန် ပုန္တိပိလတ်ကို ဤသို့ရှင်းပြခဲ့သည်– “ငါ၏နိုင်ငံသည် ဤလောကနှင့်မစပ်ဆိုင်။ ငါ၏နိုင်ငံသည် ဤလောကနှင့်စပ်ဆိုင်လျှင် ငါသည် ယုဒလူတို့လက်သို့ မရောက်စေခြင်းငှာ ငါ၏လူတို့သည် တိုက်လှန်ကြလိမ့်မည်။ ယခုမူကား ငါ၏နိုင်ငံသည် ဤဒေသအရပ်နှင့်မစပ်ဆိုင်။” (ယောဟန် ၁၈:၃၆) ထို့ကြောင့် ကောင်းကင်နိုင်ငံတော်၏ လက်အောက်ခံများသည် မည်သူ့ကိုမျှ လက်နက်ကိုင်၍မတော်လှန်သကဲ့သို့ မည်သည့်လူ့ပဋိပက္ခတွင်မျှ မပါဝင်ကြချေ။ ‘ငြိမ်သက်ခြင်းမင်းသား’ အပေါ် သစ္စာစောင့်သိလျက် သူတို့သည် သဘောထားကွဲလွဲနေသော လောကရေးရာများတွင် လုံးလုံးကြားနေကြသည်။—ဟေရှာယ ၂:၂-၄; ၉:၆၊ သမ္မာ၊ ၇။
သစ္စာရှိလက်အောက်ခံများအတွက် တည်မြဲသောဆုကျေးဇူးများ
၁၉။ ခရစ်တော်၏လက်အောက်ခံများသည် အနာဂတ်ကို ယုံကြည်စိတ်ချစွာ အဘယ်ကြောင့် စောင့်မျှော်နိုင်ကြသနည်း။
၁၉ “ဘုရင်တို့၏ဘုရင်” ဖြစ်သော ခရစ်တော်၏ သစ္စာရှိလက်အောက်ခံများသည် အနာဂတ်ကို ယုံကြည်စိတ်ချစွာ စောင့်မျှော်ကြသည်။ ထို့ပြင် မကြာမီ ကိုယ်တော်၏နိုင်ငံတော်တန်ခိုးအာဏာသည် မြေကြီးပေါ်သက်ရောက်တော့မည်ကို စိတ်အားထက်သန်စွာ သူတို့စောင့်မျှော်ကြသည်။ (ဗျာ. ၁၉:၁၁–၂၀:၃; မဿဲ ၂၄:၃၀) ဘုရားသခင့် “နိုင်ငံတော်သား” များဖြစ်ကြသော ဝိညာဉ်တော်ဖွား သစ္စာရှိအကြွင်းအကျန်သည် ကောင်းကင်တွင် ခရစ်တော်နှင့်အတူ ရှင်ဘုရင်များအဖြစ်စိုးစံရမည့် မိမိတို့၏အဖိုးတန်အမွေကိုခံယူရန် မျှော်လင့်စောင့်စားကြသည်။ (မဿဲ ၁၃:၃၈; လုကာ ၁၂:၃၂) ခရစ်တော်၏ သစ္စာရှိ “အခြားသိုး” ကလည်း “ငါ့ခမည်းတော်ထံ ကောင်းချီးမင်္ဂလာကိုခံသောသူတို့ ကမ္ဘာဦးကပင် သင်တို့အဖို့ ပြင်ဆင်သောနိုင်ငံကို လာ၍အမွေခံကြလော့” ဟူသည့် မိမိတို့ရှင်ဘုရင်၏ကြေညာချက်ကို စိတ်အားထက်သန်စွာ စောင့်မျှော်ကြသည်။ (ယောဟန် ၁၀:၁၆; မဿဲ ၂၅:၃၄) သို့ဖြစ်၍ ဘုရားသခင့်နိုင်ငံတော်၏ လက်အောက်ခံများအားလုံး ခရစ်တော်ဘုရင်၏အမှုတော်ကို သစ္စာရှိစွာ ဆက်ထမ်းဆောင်ဖို့ သန္နိဋ္ဌာန်ချနိုင်ကြပါစေ။
[အောက်ခြေမှတ်ချက်]
^ အပိုဒ်၊ 2 ယေဟောဝါသက်သေများထုတ်ဝေသည့် ကျမ်းစာဖြင့် ကျိုးကြောင်းဆင်ခြင်ခြင်း၊ စာမျက်နှာ ၃၃၇-၉ ရှိ “ယေဟောဝါသက်သေများက ၁၉၁၄ တွင် ဘုရားသခင့်နိုင်ငံတော်တည်ထောင်ခဲ့ပြီဟု အဘယ်ကြောင့်ဆိုကြသနည်း” ကိုရှု။
သင်ရှင်းပြနိုင်သလော
• ခရစ်တော်သည် ကျွန်ုပ်တို့၏သစ္စာစောင့်သိမှုကို အဘယ်ကြောင့်ရထိုက်သနည်း။
• ခရစ်တော်၏လက်အောက်ခံများသည် ကိုယ်တော်အား သစ္စာစောင့်သိကြောင်း မည်သို့ပြသကြသနည်း။
• ခရစ်တော်ဘုရင်အပေါ် ကျွန်ုပ်တို့ အဘယ်ကြောင့် သစ္စာစောင့်သိလိုကြသနည်း။
[လေ့လာရန်မေးခွန်းများ]
[စာမျက်နှာ ၃၁ ပါ လေးထောင့်ကွက်]
ခရစ်တော်၏ ထင်ရှားသောအခြားအရည်အသွေးများ
မျက်နှာမလိုက်မှု—ယောဟန် ၄:၇-၃၀။
သနားကြင်နာမှု—မဿဲ ၉:၃၅-၃၈; ၁၂:၁၈-၂၁; မာကု ၆:၃၀-၃၄။
ကိုယ်ကျိုးစွန့်မေတ္တာ—ယောဟန် ၁၃:၁; ၁၅:၁၂-၁၅။
သစ္စာစောင့်သိမှု—မဿဲ ၄:၁-၁၁; ၂၈:၂၀; မာကု ၁၁:၁၅-၁၈။
စာနာထောက်ထားမှု—မာကု ၇:၃၂-၃၅; လုကာ ၇:၁၁-၁၅; ဟေဗြဲ ၄:၁၅၊ ၁၆။
အကျိုးသင့်အကြောင်းသင့်ရှိမှု—မဿဲ ၁၅:၂၁-၂၈။
[စာမျက်နှာ ၂၉ ပါ ရုပ်ပုံ]
ကျွန်ုပ်တို့သည် အချင်းချင်းချစ်ခြင်းဖြင့် “ခရစ်တော်၏တရား” ကို သစ္စာရှိစွာ နာခံကြ
[စာမျက်နှာ ၃၁ ပါ ရုပ်ပုံ]
ခရစ်တော်၏အမှုတော်ကို သစ္စာရှိစွာထမ်းဆောင်ရန် ကိုယ်တော်၏အရည်အသွေးများက သင့်ကို လှုံ့ဆော်ပေးသလော