ကယ်တင်ခံရရန် သင် အသင့်ဖြစ်နေပြီလော

ဖွင့်ပါ

ကယ်တင်ခံရရန် သင် အသင့်ဖြစ်နေပြီလော

“ဤကာလအမျိုးတွင် သင်သည် ငါ့ရှေ့၌ဖြောင့်မတ်ကြောင်းကို ငါသိမြင်သည်ဖြစ်၍သင်၏အိမ်သူအိမ်သားအပေါင်းတို့နှင့်တကွ သင်္ဘောထဲသို့ဝင်ကြလော့။”—ကမ္ဘာဦး ၇:၁။

၁။ နောဧခေတ်တွင် ကယ်တင်ခံရရန် အဘယ်အရာကို ယေဟောဝါပြင်ဆင်ပေးတော်မူခဲ့သနည်း။

ယေဟောဝါသည် နောဧခေတ်မှ ‘ဘုရားသခင်ကိုမကိုးကွယ်သော လောကသားအပေါင်းတို့ကို ရေလွှမ်းမိုးစေတော်မူ’ ခဲ့သော်လည်း ကယ်တင်ခြင်းအတွက် အစီအစဉ်တစ်ခု ပြုလုပ်ပေးတော်မူခဲ့သည်။ (၂ ပေတရု ၂:၅) စစ်မှန်သောဘုရားသခင်သည် ဖြောင့်မတ်သောနောဧကို ကမ္ဘာချီရေလွှမ်းမိုးချိန်တစ်လျှောက် အသက်ဆက်နိုင်ရန် သင်္ဘောတစ်စင်းကို မည်သို့ဆောက်လုပ်ရမည်နှင့်ပတ်သက်၍ အသေးစိတ်ညွှန်ကြားခဲ့သည်။ (ကမ္ဘာဦး ၆:၁၄-၁၆) ယေဟောဝါ၏ နာခံမှုရှိသော ကျေးကျွန်တစ်ဦးဖြစ်သည့်အလျောက် နောဧသည် ‘မှာထားတော်မူသည်အတိုင်း ပြုခဲ့၏။’ ယနေ့ ကျွန်ုပ်တို့အသက်ရှင်နေရခြင်းမှာ တစ်စိတ်တစ်ဒေသအားဖြင့် နောဧ နာခံမှုရှိခဲ့ခြင်းကြောင့်ဖြစ်သည်။—ကမ္ဘာဦး ၆:၂၂။

၂၊ ၃။ (က) နောဧ၏လုပ်ဆောင်မှုကို သူနှင့်တစ်ခေတ်တည်းသားများက မည်သို့တုံ့ပြန်ခဲ့ကြသနည်း။ (ခ) မည်သည့်ယုံကြည်စိတ်ချမှုဖြင့် သင်္ဘောထဲသို့ နောဧဝင်ခဲ့သနည်း။

^၂သင်္ဘောဆောက်ခြင်းသည် သေးငယ်သောတာဝန်တစ်ခု မဟုတ်ပါ။ နောဧနှင့် သူ့မိသားစုလုပ်ဆောင်နေသည့်အရာကို လူများစွာက အလွန်အံ့သြခဲ့ကြပေမည်။ သို့သော် ကယ်တင်ခြင်းရရန် သင်္ဘောထဲဝင်ဖို့လိုသည်ကိုမူ သူတို့လက်မခံခဲ့ကြချေ။ နောက်ဆုံး ဆိုးသွမ်းသောလောကအပေါ် ဘုရားသခင်၏စိတ်ရှည်မှု ကုန်ဆုံးခဲ့သည်။—ကမ္ဘာဦး ၆:၃; ၁ ပေတရု ၃:၂၀။

^၃ယင်းကို နောဧနှင့်သူ့မိသားစုသည် ဆယ်စုနှစ်များစွာ အားသွန်ခွန်စိုက် ဆောက်လုပ်ပြီးနောက် ယေဟောဝါက နောဧကို “ဤကာလအမျိုးတွင် သင်သည် ငါ့ရှေ့၌ဖြောင့်မတ်ကြောင်းကို ငါသိမြင်သည်ဖြစ်၍ သင်၏အိမ်သူအိမ်သားအပေါင်းတို့နှင့်တကွ သင်္ဘောထဲသို့ဝင်ကြလော့” ဟုမိန့်တော်မူခဲ့သည်။ ယေဟောဝါ၏စကားကို ယုံကြည်စိတ်ချစွာဖြင့် “နောဧသည် မိမိသား၊ မယား၊ ချွေးမများနှင့်တကွ သင်္ဘောထဲသို့ဝင်” ခဲ့သည်။ ယေဟောဝါသည် မိမိအား ဝတ်ပြုကိုးကွယ်သူတို့ကို ကာကွယ်ရန် တံခါးကိုပိတ်ခဲ့သည်။ မြေကြီးပေါ်တွင် ရေလွှမ်းမိုးဘေးကျရောက်လာသောအခါ သင်္ဘောသည် ကယ်တင်ခြင်းအတွက် မှီခိုအားထားနိုင်သော ဘုရားသခင်ပြင်ဆင်ပေးသည့်အရာ ဖြစ်လာခဲ့သည်။—ကမ္ဘာဦး ၇:၁၊ ၇၊ ၁၀၊ ၁၆။

မျက်မှောက်ခေတ် ဆင်တူချက်များ

၄၊ ၅။ (က) ယေရှုသည် မိမိရောက်ရှိချိန်ကို အဘယ်အချိန်နှင့် နှိုင်းယှဉ်ခဲ့သနည်း။ (ခ) နောဧခေတ်နှင့် ကျွန်ုပ်တို့ခေတ်တွင် အဘယ်ဆင်တူချက်များရှိသနည်း။

^၄“လူသားသည် ကြွလာသောအခါ နောဧလက်ထက်၌ဖြစ်သကဲ့သို့ ဖြစ်လိမ့်မည်။” (မဿဲ ၂၄:၃၇) ဤစကားများဖြင့် ယေရှုသည် မိမိ၏မျက်မြင်မရရောက်ရှိချိန်နှင့် နောဧခေတ် ဆင်တူမည်ဖြစ်ကြောင်း ဖော်ပြခဲ့ပြီး ထိုသို့ပင်အမှန်ဖြစ်ခဲ့သည်။ အထူးသဖြင့် နောဧဟောခဲ့သော သတိပေးသတင်းစကားနှင့်ဆင်တူသည့် သတင်းကို ၁၉၁၉ ခုနှစ်မှစပြီး လူမျိုးအပေါင်းအား ကြေညာလာခဲ့သည်။ သူတို့၏တုံ့ပြန်ပုံသည် နောဧခေတ်မှလူတို့နှင့် ယေဘုယျအားဖြင့် ဆင်တူသည်။

^၅အကြမ်းဖက်မှုနှင့် ပြည့်နှက်နေသောလောကကို ကမ္ဘာချီရေလွှမ်းမိုးခြင်းဖြင့် ယေဟောဝါ အရေးယူတော်မူခဲ့သည်။ (ကမ္ဘာဦး ၆:၁၃) နောဧနှင့်မိသားစုသည် ထိုအကြမ်းဖက်မှုများတွင် မပါဝင်ဘဲ ငြိမ်းချမ်းစွာ သင်္ဘောဆောက်ခဲ့ကြောင်း တွေ့မြင်သူအားလုံးအတွက် သိသာထင်ရှားခဲ့သည်။ ဤတွင်လည်း ယနေ့ခေတ်နှင့် ဆင်တူချက်ကို တွေ့မြင်နိုင်သည်။ စိတ်ရင်းမှန်သူတို့သည် ယနေ့အချိန်တွင် “ဖြောင့်မတ်သောသူ၊ မဖြောင့်မတ်သောသူ၊ ဘုရားသခင်၏အမှုတော်ကိုဆောင်သောသူ၊ မဆောင်သောသူတို့ကို ပိုင်းခြား၍သိ” မြင်နိုင်ကြသည်။ (မာလခိ ၃:၁၈) ယေဟောဝါသက်သေများ၏ ရိုးသားမှု၊ ကြင်နာမှု၊ ငြိမ်သက်မှုနှင့် ဝီရိယရှိမှုတို့ကို ဘက်လိုက်မှုမရှိသူများက အထင်ကြီးပြီး ထိုအရည်အသွေးများကြောင့် လောကသားအများစုနှင့် ဘုရားသခင့်လူမျိုးကို ခွဲခြားသိရှိကြသည်။ သက်သေခံများသည် မည်သည့်အကြမ်းဖက်မှုမျိုးကိုမဆို ရှောင်ကြပြီး ယေဟောဝါ၏ဝိညာဉ်တော် လမ်းပြမှုကိုသာ ခံယူကြသည်။ ထို့ကြောင့် သူတို့သည် ငြိမ်သက်မှုကောင်းချီးခံစားကြရသည်။ ဖြောင့်မတ်သောလမ်းစဉ်ကိုလည်း လိုက်လျှောက်ကြသည်။—ဟေရှာယ ၆၀:၁၇။

၆၊ ၇။ (က) နောဧခေတ်မှလူများသည် အဘယ်အရာကို နားမလည်ခဲ့ကြသနည်း။ ယင်းသည် ယနေ့ခေတ်နှင့် မည်သို့ဆင်တူသနည်း။ (ခ) ယေဟောဝါသက်သေများသည် ထူးခြားသည်ဟုယူမှတ်ခံရကြောင်း မည်သည့်ဥပမာများက ဖော်ပြသနည်း။

^၆နောဧနှင့်တစ်ခေတ်တည်းသားများသည် နောဧတွင် ဘုရားသခင်၏ ကျောထောက်နောက်ခံမှုရှိကြောင်း၊ သူသည် ဘုရားသခင့်ညွှန်ကြားချက်အတိုင်း ပြုလုပ်နေကြောင်း နားမလည်ခဲ့ကြပေ။ ထို့ကြောင့် သူတို့သည် နောဧ၏ဟောပြောခြင်းကို အရေးတယူမရှိခဲ့၊ သတိပေးချက်အတိုင်းလည်း မလုပ်ဆောင်ခဲ့ကြချေ။ ယနေ့ခေတ်ကော။ ယေဟောဝါသက်သေများ၏ လုပ်ဆောင်မှုနှင့် အကျင့်အကြံကို လူများစွာ သဘောကျကြသော်လည်း အများစုမှာ သတင်းကောင်းနှင့် သမ္မာကျမ်းစာသတိပေးချက်များကို အရေးတယူမရှိကြချေ။ အိမ်နီးချင်းများ၊ အလုပ်ရှင်များ သို့မဟုတ် ဆွေမျိုးများသည် စစ်မှန်သောခရစ်ယာန်တို့၏ အရည်အသွေးကောင်းများကို ချီးမွမ်းပြောဆိုကြသော်လည်း “ယေဟောဝါသက်သေတွေဖြစ်နေတာတစ်ခုပဲ ပြောစရာရှိတယ်” ဟု ညည်းတွားကြသည်။ သက်သေခံများသည် ချစ်ခြင်း၊ ငြိမ်သက်ခြင်း၊ ကျေးဇူးပြုခြင်း၊ ကောင်းမြတ်ခြင်း၊ နူးညံ့သိမ်မွေ့ခြင်းနှင့် ချုပ်တည်းခြင်းကဲ့သို့သော အရည်အသွေးများ တင်ပြနေခြင်းမှာ ဘုရားသခင့်ဝိညာဉ်တော်၏ ဦးဆောင်မှုကြောင့်ဖြစ်ကြောင်း သူတို့ အရေးမထားကြချေ။ (ဂလာတိ ၅:၂၂-၂၅) ဤအရည်အသွေးကောင်းများကို သူတို့တင်ပြကြခြင်းကြောင့် သူတို့၏သတင်းစကားသည် ပို၍ယုံကြည်လက်ခံစရာဖြစ်သင့်သည်။

^၇ဥပမာ၊ ရုရှားနိုင်ငံတွင် ယေဟောဝါသက်သေများသည် ဘုရားသခင့်နိုင်ငံတော်ခန်းမတစ်လုံး ဆောက်နေကြသည်။ အလုပ်လုပ်နေသူတစ်ဦးနှင့် ရပ်စကားပြောနေသော အမျိုးသားတစ်ဦးက “ခင်ဗျားတို့ရဲ့ ဆောက်လုပ်ရေးလုပ်ငန်းခွင်က အတော်ထူးခြားတာပဲ! ဆေးလိပ်သောက်တဲ့သူတွေ၊ ဆဲဆိုတဲ့သူတွေနဲ့ မူးယစ်သောက်စားနေတဲ့သူ တစ်ယောက်မှမရှိဘူး” ဟုမှတ်ချက်ချပြီး “ဒါနဲ့ ခင်ဗျားကော ယေဟောဝါသက်သေတစ်ယောက်ပဲလား” ဟုမေးခဲ့သည်။ အလုပ်လုပ်နေသူက “မဟုတ်ဘူးလို့ ကျွန်တော်ပြောရင် ခင်ဗျားယုံမလား” ဟုမေးရာ သူက “လုံးဝမယုံဘူး” ဟုချက်ချင်းပြန်ဖြေခဲ့သည်။ အခြားရုရှားမြို့တစ်မြို့တွင် မြို့တော်ဝန်က ယေဟောဝါသက်သေများ ဘုရားသခင့်နိုင်ငံတော်ခန်းမအသစ်တစ်လုံး ဆောက်နေသည်ကိုမြင်သောအခါ အလွန်အထင်ကြီးလေးစားသွားသည်။ ဝတ်ပြုရေးအုပ်စုအားလုံး ထူးမခြားနားပါဟု တစ်ချိန်က မိမိယူမှတ်ခဲ့သော်လည်း စိတ်ရင်းမှန်ရှိ၍ ကိုယ်ကျိုးမရှာသော ယေဟောဝါသက်သေများ၏ လုပ်ဆောင်မှုကို တွေ့မြင်ပြီးနောက် ထိုသို့မယူမှတ်တော့ဟု သူပြောခဲ့သည်။ ယင်းတို့မှာ ယေဟောဝါ၏လူမျိုးသည် သမ္မာကျမ်းစာစံနှုန်းများကို မလိုက်နာသူတို့နှင့် ခြားနားကြောင်း ဖော်ပြသည့် ဥပမာနှစ်ခုမျှသာဖြစ်သည်။

၈။ ဆိုးသွမ်းသော ဤလောက၏အဆုံးမှ ကျွန်ုပ်တို့ ကယ်တင်ခံရရေးသည် အဘယ်အရာပေါ်မူတည်သနည်း။

^၈ကမ္ဘာချီရေလွှမ်းမိုးဘေးတွင် ပျက်စီးခဲ့သော “ရှေးလောက” ၏နောက်ဆုံးအချိန်ပိုင်းအတွင်း နောဧသည် “ဖြောင့်မတ်ခြင်းတရားကိုဟော” သည့် တည်ကြည်သူတစ်ဦးအဖြစ် အသက်ရှင်ခဲ့သည်။ (၂ ပေတရု ၂:၅) လက်ရှိအစီအစဉ်စနစ်၏ ဤနောက်ဆုံးနေ့ရက်များတွင် ယေဟောဝါလူမျိုးတော်သည် ဘုရားသခင်၏ဖြောင့်မတ်သောစံနှုန်းများကို အခြားသူများအား အသိပေးနေကြပြီး ကမ္ဘာသစ်အတွင်းသို့ ကယ်တင်ခံရနိုင်ခွင့် သတင်းကောင်းကို ကြေညာလျက်ရှိသည်။ (၂ ပေတရု ၃:၉-၁၃) နောဧနှင့် ဘုရားသခင်ကိုကြောက်ရွံ့သော သူ၏မိသားစုသည် သင်္ဘောဖြင့်ကယ်ဆယ်ခံရသကဲ့သို့ ယနေ့အချိန်တွင် လူတို့ကယ်တင်ခံရရေးသည် သူတို့၏ ယုံကြည်ခြင်းနှင့် ယေဟောဝါ၏ စကြဝဠာအဖွဲ့အစည်းမှ မြေကြီးဆိုင်ရာအပိုင်းနှင့် တည်ကြည်စွာပေါင်းသင်းခြင်းအပေါ် မူတည်ပါသည်။

ကယ်တင်ခံရရန် ယုံကြည်ခြင်းလိုအပ်

၉၊ ၁၀။ စာတန်၏အစီအစဉ်စနစ်အဆုံးမှ ကျွန်ုပ်တို့ကယ်တင်ခံရရန် ယုံကြည်ခြင်းသည် အဘယ်ကြောင့် မရှိမဖြစ်လိုအပ်သနည်း။

^၉စာတန်၏ဩဇာအောက်၌ရှိသော ဤလောကအပေါ် ကျရောက်လုနီးပြီဖြစ်သည့် ပျက်စီးခြင်းမှ ကယ်တင်ခံရရန် လူတစ်ဦး အဘယ်အရာပြုလုပ်ရမည်နည်း။ (၁ ယောဟန် ၅:၁၉) သူသည် ကာကွယ်မှုလိုအပ်ကြောင်း ဦးစွာအသိအမှတ်ပြုရမည်။ ထို့နောက် ယင်းကာကွယ်မှုကို ရယူရမည်။ နောဧခေတ်မှလူတို့သည် သူတို့၏ပုံမှန်လုပ်ငန်းဆောင်တာများနှင့် နေ့စဉ်လုံးပန်းနေကြပြီး ကျရောက်လာတော့မည့် ပျက်စီးခြင်းမှကာကွယ်ခံရရန် လိုအပ်သည်ဟု မယူဆခဲ့ကြချေ။ သူတို့တွင် ဘုရားသခင်အား ယုံကြည်ခြင်းလည်း မရှိကြချေ။

^၁၀နောဧနှင့်သူ့မိသားစုမူ ကာကွယ်ခံရရန်နှင့် ကယ်တင်ခံရရန် လိုအပ်မှုကို အသိအမှတ်ပြုခဲ့ကြသည်။ စကြဝဠာအကြွင်းမဲ့ပိုင်သအုပ်စိုးရှင် ယေဟောဝါကိုလည်း ယုံကြည်ကြောင်း တင်ပြခဲ့သည်။ တမန်တော်ပေါလုက “ယုံကြည်ခြင်းမရှိလျှင် [ယေဟောဝါ] ၏စိတ်တော်နှင့်မတွေ့နိုင်။ အကြောင်းမူကား၊ ဘုရားသခင့်အထံတော်သို့ ချဉ်းကပ်သောသူသည် ဘုရားသခင်ရှိတော်မူသည်ကိုလည်းကောင်း၊ ကိုယ်တော်ကိုရှာသောသူအား အကျိုးပေးတော်မူသည်ကိုလည်းကောင်း ယုံကြည်ရမည်” ဟုရေးသားခဲ့သည်။ ပေါလုက ဤသို့ထပ်ဆိုသည်– ‘နောဧသည် မမြင်သေးသောအမှုအရာတို့ကို ဖော်ပြသတိပေးခံရပြီးမှ ယုံကြည်ခြင်းအားဖြင့် ကြောက်ရွံ့သောစိတ်ရှိ၍ မိမိအိမ်သူအိမ်သားတို့ကို ကယ်တင်ခြင်းငှာ သင်္ဘောကိုတည်လေ၏။ ထိုယုံကြည်ခြင်းအားဖြင့် လောကီသားတို့ကိုအပြစ်တင်၍ ယုံကြည်ခြင်းနှင့်ယှဉ်သော ဖြောင့်မတ်ခြင်းကိုလည်း အမွေခံရ၏။’—ဟေဗြဲ ၁၁:၆၊ ၇။

၁၁။ အတိတ်က ယေဟောဝါ ကာကွယ်ပေးပုံမှ ကျွန်ုပ်တို့ အဘယ်အရာသင်ယူနိုင်သနည်း။

^၁၁ကျွန်ုပ်တို့သည် လက်ရှိဆိုးသွမ်းသောအစီအစဉ်စနစ် ဖျက်ဆီးခြင်းမှ ကယ်တင်ခံရရန် ယင်းစနစ်ဖျက်ဆီးခံရမည်ကို ယုံကြည်ရုံထက်မက ပြုလုပ်ရန် လိုအပ်သည်။ ကျွန်ုပ်တို့သည် ကယ်တင်ခြင်းအတွက် ဘုရားသခင်ပြင်ဆင်ပေးသည့်အရာများကို ယုံကြည်ကြောင်းတင်ပြပြီး ယင်းမှ အပြည့်အဝအကျိုးရယူရမည်။ မှန်ပါသည်၊ ကျွန်ုပ်တို့သည် ဘုရားသခင်၏သားတော် ယေရှုခရစ်၏ ရွေးဖိုးပူဇော်ရာယဇ်ကို ယုံကြည်ကြောင်း တင်ပြရန်လိုအပ်သည်။ (ယောဟန် ၃:၁၆၊ ၃၆) သို့သော် နောဧသင်္ဘောထဲတွင် ရှိနေသူများသာ ကမ္ဘာချီရေလွှမ်းမိုးခြင်းမှ လွတ်မြောက်ခဲ့သည်ကို သတိရသင့်သည်။ ထိုနည်းတူ ရှေးဣသရေလနိုင်ငံရှိ ခိုလှုံရာမြို့များသည် မရည်ရွယ်ဘဲလူသတ်မိသူတစ်ဦးအတွက် အကာအကွယ်ဖြစ်သည်။ သို့သော် သူသည် ယင်းမြို့သို့ ဦးစွာပြေးပြီး ယဇ်ပုရောဟိတ်မင်းကြီး သေဆုံးသည်အထိ ထိုတွင်နေထိုင်မှသာ ကာကွယ်ခံရမည်ဖြစ်သည်။ (တောလည်ရာ ၃၅:၁၁-၃၂) မောရှေအချိန်က အီဂျစ်ပြည်အပေါ်သို့ ကျရောက်သော ဆယ်ခုမြောက်ကပ်ဘေးတွင် အီဂျစ်လူမျိုးတို့၏သားဦးများ အသတ်ခံရသော်လည်း ဣသရေလလူတို့၏သားဦးများမူ လွတ်မြောက်ခဲ့သည်။ အဘယ်ကြောင့်နည်း။ မောရှေကို ယေဟောဝါ ဤသို့ညွှန်ကြားခဲ့သည်– “[ဣသရေလလူတို့သည် ပသခါ] သိုးသငယ်၏အသားကိုစားရသော အိမ်၏တံခါးထုပ်နှင့် တံခါးတိုင်နှစ်ဖက်၌၊ သိုးသငယ်၏အသွေးကိုယူ၍ ထိုးရမည်။ . . . နံနက်တိုင်အောင် အဘယ်သူမျှ မိမိအိမ်တံခါးပြင်သို့ မထွက်မသွားရ။” (ထွက်မြောက်ရာ ၁၂:၇၊ ၂၂) မည်သည့်ဣသရေလသားဦးက တံခါးတိုင်နှစ်ဖက်နှင့် တံခါးထုပ်တို့ကို သွေးသုတ်ထားသောအိမ်၏ အပြင်ဘက်သို့ သွားခြင်းဖြင့် ဘုရားသခင်ပေးသောထိုညွှန်ကြားချက်များကို လျစ်လျူရှုဝံ့ပါမည်နည်း။

၁၂။ ကျွန်ုပ်တို့တစ်ဦးစီသည် မိမိကိုယ်ကို အဘယ်မေးခွန်းမေးသင့်ပြီး အဘယ်ကြောင့်နည်း။

^၁၂ထို့ကြောင့် ကျွန်ုပ်တို့၏အခြေအနေကို အသေအချာသုံးသပ်သင့်ပေသည်။ ဝိညာဉ်ရေးအရ ကာကွယ်ပေးသည့် ယေဟောဝါ၏အစီအစဉ်အတွင်း ကျွန်ုပ်တို့ အမှန်တကယ်ရှိနေသလော။ ကြီးစွာသောဆင်းရဲခြင်း ကျရောက်လာသောအခါ ထိုသို့သောကာကွယ်မှုကို ရှာခဲ့သူတို့သည် မျက်ရည်ကျသည်အထိ ကျေးဇူးတင်ဝမ်းသာကြပါလိမ့်မည်။ အခြားသူတို့အတွက်မူ နာကျင်ကြေကွဲခြင်းနှင့် နောင်တမျက်ရည်များသာ ကျကြရပေမည်။

အဆင့်ဆင့် ပြုပြင်ပြောင်းလဲမှုများက ကျွန်ုပ်တို့ကို ပြင်ဆင်ပေး

၁၃။ (က) အဖွဲ့အစည်းဆိုင်ရာ ပြုပြင်ပြောင်းလဲမှုများက မည်သည့်ရည်ရွယ်ချက်ကို အထမြောက်စေသနည်း။ (ခ) အဆင့်ဆင့် ပြုပြင်ပြောင်းလဲမှုအချို့ကို ရှင်းပြပါ။

^၁၃ယေဟောဝါသည် ကိုယ်တော်၏ မြေကြီးဆိုင်ရာအဖွဲ့အစည်းတွင် အဆင့်ဆင့်ပြုပြင်ပြောင်းလဲမှုများကို ပြုလုပ်လာခဲ့သည်။ ယင်းတို့သည် ကျွန်ုပ်တို့၏ ဝိညာဉ်ရေးကိုကာကွယ်ပေးသည့် ကိုယ်တော်၏အစီအစဉ်ကို တင့်တယ်စေပြီး မြဲမြံခိုင်ခံ့စေကာ အားဖြည့်ပေးသည်။ ၁၈၇၀ ပြည့်လွန်နှစ်များမှ ၁၉၃၂ ခုနှစ်အထိ အကြီးအကဲများနှင့် သင်းထောက်များကို အသင်းသားများ၏မဲပေးစနစ်ဖြင့် ရွေးချယ်တင်မြှောက်ခဲ့သည်။ ၁၉၃၂ ခုနှစ်ရောက်သောအခါ ထိုရွေးချယ်ထားသော အကြီးအကဲများကို အသင်းတော်က ရွေးချယ်တင်မြှောက်သော လုပ်ငန်းတော်ကော်မတီဖြင့် အစားထိုးခဲ့ပြီး ထိုကော်မတီသည် ခန့်အပ်ထားသော လုပ်ငန်းတော်ဒါရိုက်တာကို ထောက်ကူပေးရန်ဖြစ်သည်။ ၁၉၃၈ ခုနှစ်အတွင်းတွင် အသင်းတော်ရှိအမှုထမ်းအားလုံးကို သီအိုကရက်တစ်နည်းဖြင့်ခန့်အပ်ရန် အစီအစဉ်များ ပြုလုပ်ခဲ့သည်။ ၁၉၇၂ ခုနှစ်မှစ၍ ယေဟောဝါသက်သေများ၏ အုပ်ချုပ်ရေးအဖွဲ့ ညွှန်ကြားမှုအောက်တွင် အသင်းတော်များသည် ထောက်ခံချက်များပေးပြီး ယင်းတို့ကို အုပ်ချုပ်ရေးအဖွဲ့က အတည်ပြုလက်ခံပါက ကြီးကြပ်မှူးများနှင့် ဓမ္မအမှုထမ်းများကို သီအိုကရက်တစ်နည်းဖြင့် ခန့်အပ်သည် ဟူသောစာများ ပြန်ပို့ပေးသည်။ နှစ်များတစ်လျှောက် အုပ်ချုပ်ရေးအဖွဲ့လုပ်ဆောင်ရသော ကဏ္ဍတိုးများလာပြီး ပြုပြင်ပြောင်းလဲမှုများက ယင်း၏လုပ်ဆောင်မှုများကို လွယ်ကူစေခဲ့သည်။

၁၄။ ၁၉၅၉ ခုနှစ်တွင် အဘယ်လေ့ကျင့်ရေးအစီအစဉ် အစပြုခဲ့သနည်း။

^၁၄၁၉၅၀ ပြည့်နှစ်တွင် ဆာလံ ၄၅:၁၆ ကို ဂရုတစိုက်သုံးသပ်ပြီး ဆက်လက်ပြုလုပ်သွားမည့် လေ့ကျင့်မှုအစီအစဉ်ကို အစပြုခဲ့သည်။ ယင်းအခန်းငယ်တွင် ဤသို့ဖတ်ရသည်– “ကိုယ်တော်၏အဘများကိုယ်စား သားများကိုရ၍ မြေကြီးတစ်ပြင်လုံးတွင် မင်းအရာ၌ ခန့်ထားတော်မူလိမ့်မည်။” ယခု အသင်းတော်ကိုဦးဆောင်နေသော အကြီးအကဲများသည် ယခုနှင့် အာမဂေဒုန်ပြီးနောက် သီအိုကရက်တစ်တာဝန်များအတွက် လေ့ကျင့်ခံနေကြရသည်။ (ဗျာ. ၁၆:၁၄၊ ၁၅) ၁၉၅၉ ခုနှစ်တွင် ဘုရားသခင့်နိုင်ငံတော်ဓမ္မအမှုကျောင်းကို အစပြုခဲ့သည်။ ထိုအချိန်တွင် အသင်းတော်အမှုထမ်းများဟု ထိုစဉ်ကခေါ်သည့် ဦးစီးကြီးကြပ်မှူးများအတွက် အဓိကထား၍ တစ်လကြာသည့် ညွှန်ကြားမှုသင်တန်းကို စီစဉ်ပေးခဲ့သည်။ ထိုကျောင်းသည် ယနေ့တိုင် ကြီးကြပ်မှူးများနှင့် ဓမ္မအမှုထမ်းများအားလုံးကိုပါ ညွှန်ကြားချက်ပေးသည့်ကျောင်းအဖြစ် တိုးချဲ့လာခဲ့သည်။ ထိုညီအစ်ကိုများက တစ်ဖန်၊ အသင်းတော်အသီးသီးရှိ သက်သေခံများကို ပြန်လေ့ကျင့်ပေးကြသည်။ ဤနည်းဖြင့် အသင်းတော်သားအားလုံးသည် ဝိညာဉ်ရေးအရထောက်မမှုနှင့် ဘုရားသခင့်နိုင်ငံတော်သတင်းကောင်း ကြေညာသူများအဖြစ် သူတို့၏ဓမ္မအမှုတွင် ပိုထိရောက်မှုရှိရန် ကူညီပေးမှုတို့ကို ရရှိကြသည်။—မာကု ၁၃:၁၀။

၁၅။ ခရစ်ယာန်အသင်းတော်၏ သန့်ရှင်းစင်ကြယ်မှုကို ထိန်းသိမ်းကာကွယ်သည့် နည်းနှစ်နည်းကား အဘယ်နည်း။

^၁၅ခရစ်ယာန်အသင်းတော်ဝင် ဖြစ်လိုသူတို့သည် သတ်မှတ်ထားသောတောင်းဆိုချက်များကို ပြည့်မီရမည်။ နောဧသင်္ဘောထဲသို့ ပြက်ရယ်ပြုသူများ ဝင်ခွင့်မရသကဲ့သို့ မျက်မှောက်ခေတ်ပြက်ရယ်ပြုသူများကိုလည်း အသင်းတော်က လက်မခံသည်မှာ ကျိုးကြောင်းဆီလျော်ပါသည်။ (၂ ပေတရု ၃:၃-၇) အထူးသဖြင့် ၁၉၅၂ ခုနှစ်မှစ၍ ယေဟောဝါသက်သေများသည် နောင်တမယူသောအပြစ်ပြုသူများကို နှင်ထုတ်ခြင်းဖြင့် အသင်းတော်ကို ကာကွယ်ပေးသည့် အစီအစဉ်ကို ပို၍ထောက်ခံလာခဲ့သည်။ မှန်ပါသည်၊ စစ်မှန်သောနောင်တရသည့် အပြစ်ပြုသူများ “သွားဖို့ရာ ဖြောင့်သောလမ်းတို့ကို ပြင်ဆင်” နိုင်ရန် သူတို့ကို မေတ္တာပါစွာ ကူညီပေးကြသည်။—ဟေဗြဲ ၁၂:၁၂၊ ၁၃; သု. ၂၈:၁၃; ဂလာတိ ၆:၁။

၁၆။ ယေဟောဝါလူမျိုးတော်၏ ဝိညာဉ်ရေးအခြေအနေကား အဘယ်နည်း။

^၁၆ယေဟောဝါလူမျိုးတော်၏ ဝိညာဉ်ရေးကြွယ်ဝသော အခြေအနေသည် မမျှော်လင့်ထားရာ သို့မဟုတ် မတော်တဆဖြစ်လာရာ မဟုတ်ပါ။ ပရောဖက်ဟေရှာယမှတစ်ဆင့် ယေဟောဝါ ဤသို့မိန့်ဆိုခဲ့သည်– “ငါ၏ကျွန်တို့သည် စားကြလိမ့်မည်။ သင်တို့မူကား မွတ်သိပ်ကြလိမ့်မည်။ ငါ၏ကျွန်တို့သည် သောက်ကြလိမ့်မည်။ သင်တို့မူကား ရေငတ်ကြလိမ့်မည်။ ငါ၏ကျွန်တို့သည် ဝမ်းမြောက်ကြလိမ့်မည်။ သင်တို့မူကား၊ ရှက်ကြောက်ကြလိမ့်မည်။ ငါ၏ကျွန်တို့သည် ရွှင်လန်းသောစိတ်နှင့် သီချင်းဆိုကြလိမ့်မည်။ သင်တို့မူကား ဝမ်းနည်းသောစိတ်နှင့် ငိုကြွေးကြလိမ့်မည်။ ကြေကွဲသောနှလုံးနှင့် ညည်းတွားမြည်တမ်းကြလိမ့်မည်။” (ဟေရှာယ ၆၅:၁၃၊ ၁၄) ယေဟောဝါသည် ကျွန်ုပ်တို့၏ဝိညာဉ်ရေး သန်စွမ်းနေစေရန် အာဟာရပြည့်သော အချိန်တန်ဝိညာဉ်အစာ အလျှံပယ်ကျွေးမွေးလျက်ရှိသည်။—မဿဲ ၂၄:၄၅။

ကယ်တင်ခံရရန် အသင့်ဖြစ်နေလော့

၁၇။ ကယ်တင်ခံရရန် အသင့်ဖြစ်နေဖို့ အဘယ်အရာက ကူညီပေးမည်နည်း။

^၁၇ယခုအချိန်သည် တစ်ခါနှင့်မျှမတူအောင် ‘မေတ္တာစိတ်ရှိစေရန်၊ ကောင်းသောအကျင့်ကိုကျင့်စေရန် တိုက်တွန်းနှိုးဆော်ရသောအခွင့်ကိုရှာ၍ အချင်းချင်းတစ်ယောက်ကိုတစ်ယောက် ထောက်စာကြည့်ရှုပြီး လူအချို့တို့၏ထုံးစံရှိသည်အတိုင်း အချင်းချင်းစည်းဝေးခြင်းအမှုကို မရှောင်မလွှဲဘဲ အချင်းချင်းတို့ကို တိုက်တွန်းနှိုးဆော်ကြ’ ရမည့်အချိန်ဖြစ်သည်။ (ဟေဗြဲ ၁၀:၂၃-၂၅) ယေဟောဝါသက်သေများ၏ အသင်းတော် ၉၈,၀၀၀ ကျော်မှတစ်ခုနှင့် နီးနီးကပ်ကပ်နေပြီး တက်ကြွစွာပေါင်းသင်းခြင်းက ကျွန်ုပ်တို့ကိုယ်တိုင်၏ ကယ်တင်ခြင်းအတွက် ပြင်ဆင်နေနိုင်ရန် ထောက်ကူပေးပါလိမ့်မည်။ ကျွန်ုပ်တို့သည် “လူသစ်” ကိုယူတင်ဝတ်ဆောင်ရန် ကြိုးစားကာ ကယ်တင်ခြင်းအတွက် ယေဟောဝါ၏ပြင်ဆင်ပေးချက်ကို အခြားသူများ သိလာအောင် စိတ်နှလုံးအကြွင်းမဲ့ အားသွန်ခွန်စိုက်ကူညီပေးကြရာတွင် ယုံကြည်သူချင်းတို့၏ ထောက်မမှုကို ရရှိကြပါလိမ့်မည်။—ဧဖက် ၄:၂၂-၂၄; ကောလောသဲ ၃:၉၊ ၁၀; ၁ တိမောသေ ၄:၁၆။

၁၈။ ခရစ်ယာန်အသင်းတော်နှင့် နီးနီးကပ်ကပ်နေရန် အဘယ်ကြောင့် သင်စိတ်ပိုင်းဖြတ်ထားသနည်း။

^၁၈စာတန်နှင့် သူ၏ဆိုးသွမ်းသောလောကသည် ခရစ်ယာန်အသင်းတော်မှ ကျွန်ုပ်တို့ ဝေးကွာသွားရန် အစွမ်းကုန်ကြိုးစားသွေးဆောင်လျက်ရှိသည်။ သို့သော် ကျွန်ုပ်တို့သည် အသင်းတော်၏အစိတ်အပိုင်း ဆက်ဖြစ်နေနိုင်ပြီး လက်ရှိဆိုးညစ်သောအစီအစဉ်စနစ်၏ အဆုံးမှ လွတ်မြောက်နိုင်ပါသည်။ ယေဟောဝါကိုချစ်သောမေတ္တာနှင့် ကိုယ်တော့်မေတ္တာပါအစီအစဉ်များအတွက် ကျေးဇူးတင်လေးမြတ်စိတ်က စာတန့်ကြိုးစားအားထုတ်မှုများကို ခုခံတွန်းလှန်ရန် ယခင်ကထက်ပို၍ခိုင်မာစွာ စိတ်ပိုင်းဖြတ်ထားဖို့ ကျွန်ုပ်တို့ကို လှုံ့ဆော်ပေးပါစေ။ လောလောဆယ် ခံစားနေရသည့် ကောင်းချီးများကို တွေးတောဆင်ခြင်ခြင်းက ကျွန်ုပ်တို့၏သန္နိဋ္ဌာန်ကို ခိုင်မာစေလိမ့်မည်။ ထိုကောင်းချီးအချို့ကို နောက်ဆောင်းပါးတွင် သုံးသပ်ပါမည်။

သင့်အဖြေများကား အဘယ်နည်း

• ကျွန်ုပ်တို့၏အချိန်သည် နောဧခေတ်နှင့် မည်သို့ဆင်တူသနည်း။

• ကယ်တင်ခံရရန် အဘယ်အရည်အသွေးသည် မရှိမဖြစ်လိုအပ်သနည်း။

• အဘယ် အဆင့်ဆင့်ပြုပြင်ပြောင်းလဲမှုများက ကျွန်ုပ်တို့ကို ကာကွယ်ပေးသည့် ယေဟောဝါ၏အစီအစဉ်ကို အားဖြည့်ပေးသနည်း။

• ကယ်တင်ခံရရန် ကျွန်ုပ်တို့ကိုယ်တိုင်ကိုယ်ကျ မည်သို့အသင့်ပြင်ဆင်နိုင်သနည်း။

[လေ့လာရန်မေးခွန်းများ]

[စာမျက်နှာ ၂၂ ပါ ရုပ်ပုံ]

နောဧနှင့်တစ်ခေတ်တည်းသားများသည်နောဧ၏သတင်းစကားကို အရေးတယူမရှိခဲ့ကြ

[စာမျက်နှာ ၂၃ ပါ ရုပ်ပုံ]

ဘုရားသခင်၏သတိပေးသတင်းစကားများကို အရေးတယူပြုထိုက်

[စာမျက်နှာ ၂၄ ပါ ရုပ်ပုံ]

ဘုရားသခင့်နိုင်ငံတော်ဓမ္မအမှုကျောင်းသည် အဘယ်ရည်ရွယ်ချက်ကို အထမြောက်စေသနည်း

[စာမျက်နှာ ၂၅ ပါ ရုပ်ပုံ]

ယခုအချိန်သည် ခရစ်ယာန်အသင်းတော်နှင့်နီးကပ်ကပ်နေရမည့်အချိန်ဖြစ်

ကင်းမျှော်စင်—လေ့လာရန် စာစောင်