‘ယေဟောဝါသည် စစ်မှုကိုပိုင်တော်မူ၏’
“လူ၏စကားထက် ဘုရားသခင်၏စကားတော်ကို နားထောင်သင့်ပါ၏”
‘ယေဟောဝါသည် စစ်မှုကိုပိုင်တော်မူ၏’
ရန်ဘက်စစ်တပ်နှစ်တပ်သည် တောင်ကြားတစ်ခု၏ တစ်ဖက်တစ်ချက်မှ မျက်နှာချင်းဆိုင်လျက်ရှိသည်။ ဣသရေလလူတို့သည် ဖိလိတ္တိစစ်သူရဲကြီး ဂေါလျတ်၏စော်ကားမှုခံနေရပြီး ကြောက်ရွံ့တုန်လှုပ်နေကြသည်မှာ ရက်ပေါင်း ၄၀ ရှိနေပြီ။—၁ ဓမ္မရာဇဝင် ၁၇:၁-၄၊ ၁၆။
ဂေါလျတ်သည် ဣသရေလလူတို့ကို ဤသို့အော်ဟစ်၍ စိန်ခေါ်လိုက်သည်– “လူတစ်ယောက်ကို ရွေးကောက်၍ ငါနှင့်တိုက်ခြင်းငှာ လာပါစေ။ သူသည် ငါ့ကိုတိုက်၍ သတ်နိုင်လျှင် ငါတို့ သည် သင်တို့၏ကျွန်ခံမည်။ သို့မဟုတ် ထိုသူကို ငါနိုင်၍သတ်လျှင် သင်တို့ သည် ငါတို့ ၏ကျွန်ခံ၍ ငါတို့အမှုကို ဆောင်ရွက်ရကြမည်။ . . . ဣသရေလဗိုလ်ခြေတို့ ကို ယနေ့ ငါကြိမ်းပ၏။ လူချင်းတိုက်စေခြင်းငှာ လူတစ်ယောက်ကို ပေးကြလော့။”—၁ ဓမ္မရာဇဝင် ၁၇:၈-၁၀။
ရှေးအချိန်က စစ်တပ်တစ်တပ်လုံးကိုယ်စား တစ်ဦးချင်းထွက်တိုက်လေ့ရှိသည်။ ထို့နောက် အနိုင်ရသူ၏တပ်ဖွဲ့က အောင်ပွဲခံလေတော့သည်။ သို့သော် ယခု ဣသရေလလူတို့ကို စိန်ခေါ်နေသူသည် သာမန်စစ်သားတစ်ဦး မဟုတ်ချေ။ သူသည် မိုက်ရိုင်း၊ ထွားကျိုင်းသည့် ရန်သူကြီးတစ်ဦးဖြစ်၏။ သို့သော် ယေဟောဝါလူမျိုး၏တပ်ကို ဂေါလျတ် မထီမဲ့မြင်ပြုခြင်းက သူ့သေတွင်း သူတူးလိုက်ခြင်းပင်ဖြစ်သည်။
ဤမည်ကား စစ်ပွဲတစ် ပွဲမျှမဟုတ်ပါ။ ယေဟောဝါနှင့် ဖိလိတ္တိလူတို့နတ်ဘုရားများ၏ ယှဉ်ပြိုင်ပွဲဖြစ်သည်။ ဣသရေလရှင်ဘုရင်ရှောလုသည် မိမိ၏စစ်တပ်ကို ရဲရင့်စွာဦးဆောင်ပြီး ဘုရားသခင့်ရန်သူတို့ကို တိုက်မည့်အစား ကြောက်ဒူးတုန်လျက်ရှိနေသည်။—၁ ဓမ္မရာဇဝင် ၁၇:၁၁။
ယေဟောဝါကို ကိုးစားသော လူငယ်တစ်ဦး
ဤသို့ဖြစ်နေစဉ် လူငယ်တစ်ဦးသည် ရှောလုစစ်တပ်တွင် စစ်မှုထမ်းနေသော သူ၏အစ်ကိုတို့ထံ ရောက်လာ၏။ ထိုလူငယ်၏အမည်မှာ ဒါဝိဒ်ဖြစ်ပြီး သူသည် ဣသရေလမင်းလျာဖြစ်သည်။ ဂေါလျတ်၏စကားကို သူကြားသောအခါ ဤသို့မေးလိုက်သည်– “အသက်ရှင်တော်မူသော ဘုရားသခင်၏ ဗိုလ်ခြေတို့ကို ကြိမ်းပရမည်အကြောင်း အရေဖျားလှီးခြင်းကိုမခံသော ထိုဖိလိတ္တိလူသည် အဘယ်သို့သောသူဖြစ်သနည်း။” (၁ ဓမ္မရာဇဝင် ၁၇:၂၆) ဒါဝိဒ်၏အမြင်တွင် ဂေါလျတ်သည် ဖိလိတ္တိလူတို့နှင့် ၎င်းတို့ ၏နတ်ဘုရားများ၏ ကိုယ်စားလှယ်မျှဖြစ်သည်။ ထိုအခါ သူသည် ထွက်သင့်ထွက်ထိုက်သောဒေါသဖြင့် ယေဟောဝါနှင့် ဣသရေလလူတို့ ဘက် ရပ်တည်ပြီး ဤအယူမှားလူ့ဘီလူးကြီးကို တိုက်ခိုက်လို၏။ သို့သော် ဘုရင်ရှောလုက ဒါဝိဒ်ကို ‘သင်သည် ထိုဖိလိတ္တိလူကို သွား၍မတိုက်နိုင်။ သင်သည် ငယ်ရွယ်သေး၏’ ဟုဆိုသည်။—၁ ဓမ္မရာဇဝင် ၁၇:၃၃။
ရှောလုနှင့်ဒါဝိဒ်တို့၏ ရှုမြင်ပုံချင်း ကွာခြားလိုက်လေစွ။ ကြမ်းကြုတ်သောလူ့ဘီလူးကြီးကို တိုက်ခိုက်လိုသည့် ဒါဝိဒ်ကို သိုးကျောင်းသားကလေးအဖြစ်သာ ရှောလုရှုမြင်၏။ ဒါဝိဒ်မှာမူ ဂေါလျတ်ကို အကြွင်းမဲ့ပိုင်သအုပ်စိုးရှင် ယေဟောဝါအား အန်တုနေသူအဖြစ် ရှုမြင်သည်။ ဘုရားသခင်သည် မိမိနာမတော်နှင့် လူမျိုးတော်အား ကဲ့ရဲ့ရှုတ်ချမှုကို အရေးမယူဘဲနေတော်မူမည်မဟုတ်ဟု ဒါဝိဒ်ယုံကြည်စိတ်ချ၍ သတ္တိရှိခြင်းဖြစ်သည်။ ဂေါလျတ်သည် မိမိခွန်အားကို အားကိုးသော်လည်း ဒါဝိဒ်မှာမူ ထိုအခြေအနေကို ယေဟောဝါ၏ရှု ထောင့်မှကြည့်၍ ကိုယ်တော်အား ယုံ ကြည်ကိုးစား၏။
‘ယေဟောဝါ၏ နာမတော်ပါလျက်သင်ရှိရာသို့ လာ၏’
ဒါဝိဒ်၏ယုံကြည်ခြင်းသည် ခြေမြစ်ခိုင်လုံလှ၏။ တစ်ချိန်က ဘုရားသခင်သည် သူ၏သိုးများကို ဝက်ဝံနှင့် ခြင်္သေ့ရန်မှ ကယ်နုတ်ဖို့ကူညီပေးခဲ့ကြောင်းမှတ်မိ၏။ ယခုအခါလည်း ဤကြောက်မက်ဖွယ်ကောင်းသော ဖိလိတ္တိရန်သူကြီးနှင့် တိုက်ခိုက်ချိန်တွင် မိမိကို ယေဟောဝါကူညီပေးမည်ဟု ဤသိုးကျောင်းသားလေး ယုံကြည်စိတ်ချ၏။ (၁ ဓမ္မရာဇဝင် ၁၇:၃၄-၃၇) သို့ဖြစ်၍ ဒါဝိဒ်သည် လောက်လွှဲတစ်လက်၊ ကျောက်ခဲငါးလုံးနှင့်သာ ဂေါလျတ်ကိုတိုက်ရန် ထွက်သွားလေသည်။
လူငယ်ဒါဝိဒ်သည် ယေဟောဝါပေးသည့် ခွန်အားဖြင့် မဖြစ်နိုင်ပုံပေါက်သော ဤအမှုကို ပြုလေတော့သည်။ ဖိလိတ္တိလူကို သတ္တိရှိရှိ ဤသို့ ပြောလိုက်သည်– ‘သင်သည် ဓား၊ လှံ၊ ကိဒုန်ပါလျက် ငါ့ထံသို့လာ၏။ ငါသည် သင်ကြိမ်းပသော ဣသရေလဗိုလ်ခြေတို့၏ဘုရားသခင်၊ ကောင်းကင်ဗိုလ်ခြေအရှင် ယေဟောဝါ၏နာမတော်ပါလျက် သင်ရှိရာသို့လာ၏။ ယေဟောဝါသည် သင့်ကို ငါ့လက်၌ ယနေ့အပ်တော်မူသဖြင့် . . . ဣသရေလအမျိုး၌ ဘုရားသခင်ရှိတော်မူသည်ကို မြေကြီးသားအပေါင်းတို့သည် သိရကြလိမ့်မည်။ ယေဟောဝါသည် ဓား၊ လှံအားဖြင့် ကယ်တင်တော်မမူကြောင်းကို ဤပရိသတ်အပေါင်းတို့သည် သိရကြလိမ့်မည်။ အကြောင်းမူကား ယေဟောဝါသည် စစ်မှုကိုပိုင်တော်မူ၏။’—၁ ဓမ္မရာဇဝင် ၁၇:၄၅-၄၇။
ရလဒ်ကားအဘယ်နည်း။ မှုတ်သွင်းခံမှတ်တမ်းက ဤသို့ဆိုသည်– “ဒါဝိဒ်သည် လောက်လွှဲနှင့်ကျောက်တစ်လုံးအားဖြင့် နိုင်လျက် ထိခိုက်၍သတ်လေ၏။ ထိုအခါ ဒါဝိဒ်သည် ဓားမပါ။” (၁ ဓမ္မရာဇဝင် ၁၇:၅၀၊ ၅၁) သူ့လက်ထဲတွင် ဓားမပါသော်လည်း ယေဟောဝါဘုရားသခင်၏ အားကြီးသောထောက်မမှု သူ၌ရှိသည်။ *
ထိုယှဉ်ပြိုင်ပွဲတွင် ယေဟောဝါကို ဒါဝိဒ် အားကိုးလိုက်ခြင်းသည် မှန်ကန်ကြောင်း ထင်ရှားသည်။ လူကို ကြောက်ရွံ့ခြင်းနှင့် ယေဟောဝါ၏ကယ်တင်ခြင်းတန်ခိုးတော်ကို အားကိုးခြင်းအကြောင်းကိစ္စပေါ်လာ၍ တစ်ခုမဟုတ်တစ်ခု ရွေးရမည်ဆိုလျှင် ဤသို့ရွေးချယ်ပြုလုပ်ရမည်မှာ ရှင်းနေပါသည်– “လူ၏စကားထက် ဘုရားသခင်၏စကားတော်ကို နားထောင်သင့်ပါ၏။” (တမန်တော် ၅:၂၉) ထို့ပြင် ခက်ခဲသောအခြေအနေများကို ယေဟောဝါဘုရားသခင်၏ရှုထောင့်မှ ကြည့်မြင်ကြသောအခါ စိုးရိမ်စရာပြဿနာများကိုပင် ကျွန်ုပ်တို့မျှမျှတတရှုမြင်နိုင်ကြမည်။
[အောက်ခြေမှတ်ချက်]
^ အပိုဒ်၊ 13 ယေဟောဝါသက်သေများ၏ ၂၀၀၆ ပြက္ခဒိန်၊ မေ/ဇွန်ကိုရှု။
[စာမျက်နှာ ၉ ပါ လေးထောင့်ကွက်/ ရုပ်ပုံ]
ဂေါလျတ်သည် မည်မျှထွားကျိုင်းသနည်း
၁ ဓမ္မရာဇဝင် ၁၇:၄-၇ ပါမှတ်တမ်းအရ ဂေါလျတ်၏အရပ်အမောင်းမှာ ခြောက်တောင်ကျော်ဖြစ်သည်။ သို့ဖြင့် ကိုးပေကျော်မည်။ ထိုဖိလိတ္တိလူ၏ကြေးဝါချပ်အင်္ကျီက သူ၏ကိုယ်လုံးကိုယ်ပေါက်နှင့် ခွန်အားကို ဖော်ပြသည်။ ထိုချပ်အင်္ကျီ၏အလေးချိန်မှာ ၁၂၆ ပေါင်ရှိ၏။ သူ၏လှံရိုးသည် ရက်မနှင့်တူပြီး လှံသွားမှာ ၁၅ ပေါင်ခန့်လေး၏။ စဉ်းစားကြည့်ပါ၊ ဂေါလျတ်၏ချပ်ဝတ်တန်ဆာပင်လျှင် ဒါဝိဒ်၏ကိုယ်အလေးချိန်ထက် ပိုလေးနေပုံရှိသည်။