သမာဓိရှိစွာ လျှောက်လှမ်းခြင်းမှရသည့် ရွှင်လန်းမှုများ
သမာဓိရှိစွာ လျှောက်လှမ်းခြင်းမှရသည့် ရွှင်လန်းမှုများ
‘ထာဝရဘုရားသခင်၏ကောင်းချီးမင်္ဂလာသည် စည်းစိမ်ကိုဖြစ်စေတတ်၏။ ထိုစည်းစိမ်နှင့်လည်းဝမ်းနည်းခြင်းအကြောင်းကို ရောနှောတော်မမူ။’—သု. ၁၀:၂၂။
၁၊ ၂။ အနာဂတ်ကို အဘယ်ကြောင့် အလွန်အမင်းအာရုံမစိုက်သင့်သနည်း။
“အနာဂတ်ကို အာရုံစိုက်လွန်းခြင်း . . . က ကျွန်ုပ်တို့၏လက်ရှိအခြေအနေကို ပျော်မွေ့နိုင်ရန် အတားအဆီးဖြစ်စေသည်” ဟု အမေရိကန် အတွေးအခေါ်ပညာရှင်တစ်ဦးက ဆိုသည်။ ယင်းသည် လူကြီးဘဝအခွင့်အရေးများကို အာရုံစိုက်လွန်း၍ ကလေးဘဝကုန်ဆုံးသွားချိန်အထိ ကလေးဘဝ၏ ကောင်းကျိုးများကို မမြင်တော့သော ကလေးများအတွက် မှန်ကန်သည်။
၂ ယေဟောဝါအား ဝတ်ပြုသူများပင် တစ်ခါတစ်ရံ ထိုသို့တွေးခေါ်တတ်ကြသည်။ အဘယ်အရာ ဖြစ်လာနိုင်သည်ကို သုံးသပ်ကြည့်ပါ။ မြေကြီးပေါ်တွင် ပရဒိသုဖြစ်ပေါ်စေမည်ဟူသည့် ဘုရားသခင့်ကတိတော် ပြည့်စုံလာမည့်အချိန်ကို ကျွန်ုပ်တို့ တောင့်တကြသည်။ ဖျားနာခြင်း၊ အိုမင်းခြင်း၊ နာကျင်ခြင်းနှင့် ဆင်းရဲခက်ခဲခြင်းတို့ လွတ်ကင်းသည့် အသက်တာကို စိတ်ထက်သန်စွာ စောင့်မျှော်နေကြသည်။ ထိုအရာများကို မျှော်လင့်ခြင်းသည် ကောင်းသော်လည်း လောလောဆယ်ခံစားနေရသည့် ဝိညာဉ်ရေးကောင်းချီးများကို မမြင်နိုင်တော့သည်အထိ အနာဂတ်တွင်ရမည့် ရုပ်ပိုင်းဆိုင်ရာကောင်းချီးများကိုသာ အာရုံစိုက်လွန်းပါက အဘယ်အရာဖြစ်လာမည်နည်း။ အလွန်ဝမ်းနည်းစရာပင်! ကျွန်ုပ်တို့ မျှော်လင့်သောအရာသည် ထင်ထားသည်ထက် ပို၍ဖင့်နွှဲသောကြောင့် လွယ်လင့်တကူ စိတ်ဓာတ်ကျလာနိုင်ပြီး စိတ်နှလုံးပူပန်လာနိုင်သည်။ (သု. ၁၃:၁၂) ဘဝပြဿနာများနှင့် အခက်အခဲများသည် ကျွန်ုပ်တို့ကို စိတ်ပျက်အားလျော့ခြင်း သို့မဟုတ် ကိုယ့်ကိုယ်ကိုသနားခြင်း ကျော့ကွင်းထဲ ကျရောက်သွားစေနိုင်သည်။ ကျွန်ုပ်တို့သည် ခက်ခဲသောအခြေအနေများကို ရင်ဆိုင်ဖြေရှင်းမည့်အစား ညည်းညူသည့်သဘောထားများ ဝင်လာနိုင်သည်။ ကျွန်ုပ်တို့ခံစားနေရသည့် လောလောဆယ်ကောင်းချီးများကို ကျေးဇူးတင်စိတ်ဖြင့် တွေးတောဆင်ခြင်လျှင် ယင်းတို့အားလုံးကို ရှောင်ရှားနိုင်သည်။
၃။ ဤဆောင်းပါးတွင် အဘယ်အကြောင်းကို ကျွန်ုပ်တို့ အာရုံစိုက်သုံးသပ်မည်နည်း။
၃ နယပုံပြင် ၁၀:၂၂ တွင် ‘ထာဝရဘုရားသခင်၏ ကောင်းချီးမင်္ဂလာသည် စည်းစိမ်ကိုဖြစ်စေတတ်၏။ ထိုစည်းစိမ်နှင့်လည်း ဝမ်းနည်းခြင်းအကြောင်းကို ရောနှောတော်မမူ’ ဟုဖော်ပြထားသည်။ ယေဟောဝါ၏ မျက်မှောက်ခေတ်ကျေးကျွန်များ ခံစားနေရသည့် ဝိညာဉ်ရေးကြွယ်ဝမှု အခြေအနေသည် ဝမ်းမြောက်ဖွယ်ကောင်းချီးတစ်ခု မဟုတ်ပေလော။ ကျွန်ုပ်တို့၏ ဝိညာဉ်ရေးကြွယ်ဝမှု ကဏ္ဍအချို့ကို သုံးသပ်ပြီး ကျွန်ုပ်တို့တစ်ဦးစီအတွက် အဘယ်အဓိပ္ပာယ်ရှိကြောင်း ကြည့်ကြစို့။ သမာဓိရှိစွာလျှောက်လှမ်းသည့် ဖြောင့်မတ်သောသူအပေါ် ယေဟောဝါ သွန်းလောင်းသည့် ကောင်းချီးများအကြောင်း အချိန်ယူသုံးသပ်ခြင်းက ကျွန်ုပ်တို့၏ ကောင်းကင်ခမည်းတော်ကို ရွှင်လန်းစွာ ဆက်ဝတ်ပြုသွားဟူသော ကျွန်ုပ်တို့၏သန္နိဋ္ဌာန်ကို အမှန်ပင်ခိုင်မာစေပါလိမ့်မည်။—သု. ၂၀:၇၊ ကဘ။
ယခုပင် ‘စည်းစိမ်ကိုဖြစ်စေတတ်သော ကောင်းချီးများ’
၄၊ ၅။ အဘယ်ကျမ်းစာသွန်သင်ချက်ကို သင်အထူးနှစ်ခြိုက်သနည်း။ အဘယ်ကြောင့်နည်း။
၄ သမ္မာကျမ်းစာ သွန်သင်ချက်များနှင့်ပတ်သက်သော တိကျမှန်ကန်သည့် အသိပညာရှိခြင်း။ ခရစ်ယာန်ဘောင်ဘာသာရေးများသည် များသောအားဖြင့် ကျမ်းစာကို ယုံကြည်သည်ဟု ဆိုကြသည်။ သို့သော် ယင်း၏သွန်သင်ချက်များကိုမူ လက်မခံကြပါ။ ဘာသာတူသူ အဖွဲ့ဝင်များပင် သမ္မာကျမ်းစာ အမှန်တကယ် သွန်သင်ရာနှင့်ပတ်သက်သည့် အမြင်သဘောထားများ ကွဲပြားတတ်ကြသည်။ ယေဟောဝါကျေးကျွန်များ၏အခြေအနေနှင့် ကွာခြားလိုက်လေခြင်း! ကျွန်ုပ်တို့၏ နိုင်ငံ၊ ယဉ်ကျေးမှု၊ လူမျိုးစုနောက်ခံမည်သို့ပင်ရှိပါစေ ကျွန်ုပ်တို့သည် အမည်နာမဖြင့်သိသော ဘုရားသခင်ကို ကိုးကွယ်ကြသည်။ ကိုယ်တော်သည် လျှို့ဝှက်နက်နဲသည့် သုံးပါးပေါင်းတစ်ဆူဘုရားတစ်ပါးမဟုတ်ပေ။ (တရားဟောရာ ၆:၄; ဆာလံ ၈၃:၁၈; မာကု ၁၂:၂၉) ဘုရားသခင်၏ စကြဝဠာအကြွင်းမဲ့ပိုင်သအုပ်စိုးမှုနှင့်ပတ်သက်သည့် အဓိကအရေးကိစ္စသည် မကြာမီ ဖြေရှင်းခံရတော့မည်ဖြစ်ကြောင်း၊ ကိုယ်တော်အား သမာဓိစောင့်သိခြင်းဖြင့် ကျွန်ုပ်တို့တစ်ဦးစီသည် ထိုအရေးကိစ္စတွင် ပါဝင်နေကြောင်းလည်း ကျွန်ုပ်တို့သိကြသည်။ သေခြင်းနှင့်ပတ်သက်သည့် အမှန်တရားကို ကျွန်ုပ်တို့သိပြီး လူသားများကို ငရဲတွင်ညှဉ်းပန်းသည် သို့မဟုတ် ငရဲကလေးသို့ပို့သည်ဟု ဆိုကြသည့်ဘုရားသခင်ကို ကြောက်လန့်ခြင်းမှ လွတ်ကင်းကြသည်။—ဒေ. ၉:၅၊ ၁၀။
၅ ထို့ပြင် ကျွန်ုပ်တို့သည် ယုတ္တိမရှိသော ဆင့်ကဲဖြစ်စဉ်ကြောင့် ဖြစ်တည်လာခြင်းမဟုတ်ကြောင်း သိရခြင်းက အလွန်ဝမ်းသာစရာပင်! ဘုရားသခင်သည် ကျွန်ုပ်တို့ကို ကိုယ်တော်၏ပုံသဏ္ဌာန်တော်နှင့်အညီ ဖန်ဆင်းခဲ့ခြင်းဖြစ်သည်။ (ကမ္ဘာဦး ၁:၂၆; မာလခိ ၂:၁၀) ဆာလံဆရာက သူ၏ဘုရားသခင်နှင့်ပတ်သက်၍ ဤသို့သီဆိုခဲ့သည်– “အကျွန်ုပ်သည် ကြောက်မက်ဖွယ်သောလက္ခဏာ၊ ထူးဆန်းသောလက္ခဏာတို့နှင့် ပြည့်စုံသည်ဖြစ်၍ ကိုယ်တော်ကို ချီးမွမ်းပါမည်။ ပြုပြင်တော်မူသောအမှုတို့သည် အံ့သြဖွယ်ဖြစ်ကြောင်းကို အကျွန်ုပ်၏စိတ်ဝိညာဉ်သည် အမှန်သိပါ၏။”—ဆာလံ ၁၃၉:၁၄။
၆၊ ၇။ သင့်အသက်တာတွင်ဖြစ်စေ၊ သင်သိသည့်အခြားသူများ၏ အသက်တာတွင်ဖြစ်စေ အဘယ်ပြောင်းလဲမှုများက ကောင်းချီးတစ်ခု ဖြစ်ခဲ့ပြီနည်း။
၆ အန္တရာယ်ရှိသည့် အလေ့အထနှင့် အကျင့်အကြံများမှ လွတ်ကင်းခြင်း။ ဆေးလိပ်သောက်ခြင်း၊ သေသောက်ကြူးခြင်းနှင့် လိင်ကိစ္စရှုပ်ပွေခြင်းတို့၏အန္တရာယ်များအကြောင်း သတင်းမီဒီယာများတွင် အကြီးအကျယ်သတိပေးသော်လည်း ယင်းတို့ကို မလိုက်နာသည်က များသည်။ သို့သော် ဘုရားသခင်သည် အဆိုပါအကျင့်များကို ပြစ်တင်ထားကြောင်း၊ ယင်းတို့ကိုပြုကျင့်ပါက ကိုယ်တော်စိတ်ထိခိုက်ကြောင်း စိတ်ရင်းမှန်သူတစ်ဦး သိရှိသောအခါ မည်သို့ဖြစ်လာသနည်း။ သူ၏ဘဝတွင် ထိုအကျင့်တို့ကို ရပ်တန်းကရပ်ရန် လှုံ့ဆော်ခံရသည်။ (ဟေရှာယ ၆၃:၁၀; ၁ ကောရိန္သု ၆:၉၊ ၁၀; ၂ ကောရိန္သု ၇:၁; ဧဖက် ၄:၃၀) သူသည် ဘုရားသခင်၏စိတ်တော်နှင့်တွေ့ရန် အဓိကကြိုးစားနေခြင်းဖြစ်သော်လည်း ထပ်ဆင့်အကျိုးကျေးဇူးများဖြစ်သည့် ကျန်းမာရေးကောင်းခြင်းနှင့် စိတ်ငြိမ်သက်ခြင်းတို့ကိုပါ ခံစားရသည်။
၇ လူများစွာအတွက် အကျင့်ဆိုးများကို စွန့်လွှတ်ရန် အလွန်ခက်ခဲသည်။ သို့တိုင် သောင်းနှင့်ချီသောသူများသည် နှစ်စဉ် ထိုသို့ပြုလုပ်လျက်ရှိသည်။ သူတို့သည် ယေဟောဝါထံ အပ်နှံပြီး ရေတွင်နှစ်ခြင်းခံခြင်းဖြင့် ဘုရားသခင် မနှစ်သက်သောအကျင့်များကို မိမိတို့ဘဝမှ ထုတ်ပစ်လိုက်ပြီဖြစ်ကြောင်း လူသိရှင်ကြားကြေညာကြသည်။ ယင်းသည် ကျွန်ုပ်တို့အားလုံးအတွက် အလွန်အားရှိစရာပင်! အပြစ်ရှိ၍ ထိခိုက်နစ်နာစေသောအကျင့်အကြံများ၏ ကျွန်ဖြစ်ခြင်းမှ လွတ်ကင်းနေရန် ကျွန်ုပ်တို့၏သန္နိဋ္ဌာန် ပိုခိုင်မာလာသည်။
၈။ အဘယ်ကျမ်းစာအခြေပြုသွန်သင်ချက်က ပျော်ရွှင်သောမိသားစုဘဝအတွက် အထောက်အကူပြုသနည်း။
၈ ပျော်ရွှင်ဖွယ်မိသားစုဘဝကို ပိုင်ဆိုင်နိုင်ခြင်း။ နိုင်ငံများစွာတွင် မိသားစုနှောင်ကြိုးမှာ ချည့်နဲ့လျက်ရှိသည်။ အိမ်ထောင်များစွာသည် ကွာရှင်းခြင်းဖြင့် အဆုံးသတ်နေကြပြီး အပြစ်မဲ့ကလေးများကို စိတ်အနာတရဖြစ်ကျန်နေစေကြသည်။ ဥရောပနိုင်ငံအချို့တွင် ကြင်ဖော်မဲ့မိဘရှိမိသားစုများသည် အိမ်ထောင်စုအားလုံး၏ ၂၀ ရာခိုင်နှုန်းနီးပါးရှိလာသည်။ ယေဟောဝါသည် မိသားစုဘဝနှင့်ပတ်သက်၍ သမာဓိရှိစွာလျှောက်လှမ်းနိုင်ရန် ကျွန်ုပ်တို့ကို မည်သို့ထောက်ကူပေးလျက်ရှိသနည်း။ ကျေးဇူးပြု၍ ဧဖက် ၅:၂၂–၆:၄ ကိုဖတ်ပြီး ဘုရားသခင့်နှုတ်မြွက်တော်က ခင်ပွန်းများ၊ ဇနီးများနှင့် သားသမီးများကို ပေးထားသည့် ကောင်းမွန်လှသောသွန်သင်ချက်ကို မှတ်သားပါ။ ထိုအချက်နှင့် သမ္မာကျမ်းစာ၏အခြားနေရာများတွင် ဖော်ပြထားသော သွန်သင်ချက်များကို လက်တွေ့ကျင့်သုံးခြင်းက အိမ်ထောင်နှောင်ကြိုးကို အမှန်ခိုင်မြဲစေပြီး သားသမီးများကို ကောင်းစွာပြုစုပျိုးထောင်နိုင်ရန် မိဘများကို ကူညီပေးကာ ပျော်ရွှင်သောမိသားစုဘဝ တည်ဆောက်ရန် အထောက်အကူပြုသည်။ ယင်းသည် ဝမ်းမြောက်ဖွယ်ကောင်းချီးတစ်ရပ် မဟုတ်ပေလော။
၉၊ ၁၀။ အနာဂတ်ကို ကျွန်ုပ်တို့ရှုမြင်ပုံသည် လောကမှလူများနှင့် မည်သို့ခြားနားသနည်း။
၉ ကမ္ဘာ့ပြဿနာများ မကြာမီ ပြေရှင်းတော့မည်ကို ယုံကြည်စိတ်ချမှုရှိခြင်း။ သိပ္ပံနှင့်နည်းပညာဆိုင်ရာ ကျွမ်းကျင်မှုများနှင့် အချို့သောခေါင်းဆောင်များ၏ စိတ်ရင်းမှန်သောကြိုးပမ်းမှုများရှိနေလျက်နှင့် လက်ရှိအသက်တာရှိ ကြီးလေးသောပြဿနာများကို မဖြေရှင်းနိုင်သေးပေ။ ကမ္ဘာ့စီးပွားရေးဖိုရမ်ကို တည်ထောင်ခဲ့သူ ကလော့စ် ရွှပ်ဘ်က “ကမ္ဘာကြီးရင်ဆိုင်နေရသော ပြဿနာများအရေအတွက်သည် တိုးများလာလျက်ရှိပြီး ယင်းတို့ကို ဖြေရှင်းရန် ရရှိသည့်အချိန်မှာမူ နည်းသည်ထက်နည်းလာနေသည်” ဟု မကြာသေးမီက မှတ်ချက်ချခဲ့သည်။ “နိုင်ငံအားလုံးကို ထိခိုက်နေသည့် အန္တရာယ်များဖြစ်သော အကြမ်းဖက်မှု၊ ဝန်းကျင်ပျက်ပြားမှုနှင့် စီးပွားရေးမတည်ငြိမ်မှု” တို့အကြောင်း သူပြောခဲ့သည်။ ရွှပ်ဘ်က ဤသို့နိဂုံးချုပ်ခဲ့သည်– “ကမ္ဘာကြီးရင်ဆိုင်နေရသော အဖြစ်မှန်များအတွက် လူတို့သည် ယခင်ကထက် ယခုပို၍ ပူးပေါင်းဆောင်ရွက်ရန်နှင့် အလျင်အမြန် ဆုံးဖြတ်လုပ်ကိုင်ရန် လိုအပ်နေသည်။” ၂၁ ရာစုသည် ရှေ့သို့ရွေ့လျားနေသည်နှင့်အမျှ လူသားတို့၏ အနာဂတ် ခြုံငုံအလားအလာမှာ စိတ်ပျက်ဖွယ်ဖြစ်နေဆဲပင်။
၁၀ ယေဟောဝါသည် လူတို့၏ပြဿနာအားလုံးကို ဖြေရှင်းနိုင်သည့် ဘုရားသခင့်မေရှိယနိုင်ငံတော်အစီအစဉ်ကို ဖွဲ့စည်းတည်ထောင်တော်မူခဲ့ကြောင်း သိရသည်မှာ အလွန်စိတ်ချမ်းသာစရာပင်။ ယင်းအားဖြင့် စစ်မှန်သောဘုရားသခင်သည် “စစ်မှုကိုငြိမ်းစေတော်မူ” မည်ဖြစ်ပြီး ငြိမ်သက်ခြင်း “ချမ်းသာများပြား” စေတော်မူလိမ့်မည်။ (ဆာလံ ၄၆:၉; ၇၂:၇) ခန့်အပ်ခံဘုရင်ယေရှုခရစ်သည် ‘နွမ်းပါးသူ၊ ခိုကိုးရာမရှိသောသူနှင့် ဆင်းရဲသူကို ညှဉ်းဆဲခြင်းနှင့် ကြမ်းကြုတ်ခြင်း၏လက်မှ ရွေးနုတ်တော်မူ’ လိမ့်မည်။ (ဆာလံ ၇၂:၁၂-၁၄၊ သမ္မာ) မေရှိယနိုင်ငံတော်အုပ်စိုးမှုအောက်တွင် အစာရှားပါးမှုများ ရှိတော့မည်မဟုတ်ပေ။ (ဆာလံ ၇၂:၁၆) ယေဟောဝါသည် “[ကျွန်ုပ်] တို့၏မျက်စိ၌ မျက်ရည်ရှိသမျှတို့ကို သုတ်တော်မူမည်။ နောက်တစ်ဖန် သေဘေးမရှိရ။ စိတ်မသာညည်းတွားခြင်း၊ အော်ဟစ်ခြင်း၊ ပင်ပန်းခြင်းလည်းမရှိရ။ အကြောင်းမူကား၊ ရှေးဖြစ်ဖူးသောအရာတို့သည် ရွေ့သွားကြပြီ။” (ဗျာ. ၂၁:၄) ထိုဘုရားသခင့်နိုင်ငံတော်သည် ကောင်းကင်တွင်တည်ထောင်ပြီးဖြစ်ကာ မကြာမီ ကမ္ဘာပေါ်ရှိပြဿနာအားလုံးကို ဖြေရှင်းရန် လိုအပ်သောအရေးယူဆောင်ရွက်မှုများ ပြုလုပ်တော်မူမည်။—ဒံယေလ ၂:၄၄၊ ၄၅; ဗျာ. ၁၁:၁၅။
၁၁၊ ၁၂။ (က) သာယာမှုနောက်လိုက်ခြင်းက တည်မြဲသောပျော်ရွှင်မှု ရရှိစေသလော။ ရှင်းပြပါ။ (ခ) အဘယ်အရာက စစ်မှန်သောပျော်ရွှင်မှု ရရှိစေသနည်း။
၁၁ အဘယ်အရာက စစ်မှန်သောပျော်ရွှင်မှုရရှိစေကြောင်း သိရှိခြင်း။ စစ်မှန်သောပျော်ရွှင်မှုကို အဘယ်အရာက အမှန်တကယ် ရရှိစေသနည်း။ စိတ်ပညာရှင်တစ်ဦးက ပျော်ရွှင်မှုတွင် သာယာမှု၊ ပါဝင်ပတ်သက်မှု (အလုပ်နှင့် မိသားစုအရေးကိစ္စကဲ့သို့သော တာဝန်များတွင် ပါဝင်လုပ်ဆောင်ခြင်း)၊ ရည်ရွယ်ချက် (ကိုယ်ကျိုးထက် သူတစ်ပါးအကျိုးအတွက် အဓိကထားလုပ်ဆောင်ခြင်း) ဟူသော အပိုင်းသုံးပိုင်းပါဝင်သည်ဟုဆိုသည်။ ထိုသုံးခုထဲတွင် သာယာမှုကို အရေးမပါဆုံးစာရင်းတွင်ထည့်ပြီး သူဤသို့ဆိုသည်– “ယင်းသည် မှတ်သားဖွယ်ပင်။ အကြောင်းမှာ လူများစွာသည် ဘဝတွင် သာယာမှုကို အဓိကထားကြသောကြောင့်ဖြစ်သည်။” ထိုကိစ္စနှင့်ပတ်သက်သည့် သမ္မာကျမ်းစာရှုထောင့်ကား အဘယ်နည်း။
၁၂ ရှေးဣသရေလရှင်ဘုရင် ရှောလမုန်က ဤသို့ဆိုသည်– ‘ငါသည် ကိုယ်စိတ်နှလုံးထဲမှာပြောသည်ကား “လာပါ။ ရွှင်လန်းခြင်းအားဖြင့် သင့်ကိုငါစုံစမ်းမည်။ သို့ဖြစ်၍ ကာမဂုဏ်၌ပျော်မွေ့လော့” ဟုဆိုရာတွင် ထိုအမှုအရာသည်လည်း အချည်းနှီးဖြစ်လေ၏။ ရယ်မောခြင်းကို “သင်သည်အရူးဖြစ်၏” ဟူ၍လည်းကောင်း၊ ရွှင်လန်းခြင်းကို “အဘယ်ကြောင့် ဤသို့ပြုသနည်း” ဟူ၍လည်းကောင်း ငါဆိုရ၏။’ (ဒေ. ၂:၁၊ ၂) သမ္မာကျမ်းစာက သာယာမှုမှရသော ပျော်ရွှင်မှုမှာ ခဏသာတည်သည်ဟုဆိုသည်။ အလုပ်တွင် ပါဝင်လုပ်ဆောင်မှုနှင့်ပတ်သက်၍ကော။ ဘုရားသခင့်နိုင်ငံတော်သတင်းကောင်း ဟောပြောခြင်းနှင့် တပည့်ဖြစ်စေခြင်းလုပ်ငန်းသည် ကျွန်ုပ်တို့ ပါဝင်လုပ်ဆောင်နိုင်သည့် အဓိပ္ပာယ်အရှိဆုံးအလုပ်ဖြစ်သည်။ (မဿဲ ၂၄:၁၄; ၂၈:၁၉၊ ၂၀) သမ္မာကျမ်းစာတွင်ပါရှိသည့် အသက်ကယ်သတင်းကို အခြားသူများအား ဝေမျှခြင်းဖြင့် ကျွန်ုပ်တို့သည် မိမိကိုယ်တိုင်နှင့် နားထောင်သူတို့ကိုပါ ကယ်တင်နိုင်သည့်လုပ်ငန်းတွင် ပါဝင်နေကြသည်။ (၁ တိမောသေ ၄:၁၆) “ဘုရားသခင်၏လုပ်ဖော်ဆောင်ဖက်” များအနေနှင့် ‘ခံယူခြင်းအရာထက် ပေးကမ်းခြင်းအရာသည် ပို၍ပျော်ရွှင်မှုရှိ’ ကြောင်း ကျွန်ုပ်တို့တွေ့ကြုံခံစားရသည်။ (၁ ကောရိန္သု ၃:၉၊ သမ္မာ; တမန်တော် ၂၀:၃၅၊ သမ္မာ) ယင်းအလုပ်သည် ကျွန်ုပ်တို့၏ဘဝကို ပိုအဓိပ္ပာယ်ရှိစေပြီး ဖန်ဆင်းရှင်အား ကဲ့ရဲ့သူ စာတန်ကို ချေပနိုင်စေသည်။ (သု. ၂၇:၁၁) ဘုရားသခင်ဝတ်၌မွေ့လျော်ခြင်းသည် စစ်မှန်ပြီးတည်မြဲသော ပျော်ရွှင်မှုရရှိစေကြောင်း ယေဟောဝါ အမှန်တကယ်ပြသတော်မူခဲ့ပြီ။—၁ တိမောသေ ၄:၈။
၁၃။ (က) သီအိုကရက်တစ်ဓမ္မအမှုကျောင်းသည် အဘယ်နည်းဖြင့် ကျွန်ုပ်တို့ကို ရွှင်လန်းဝမ်းမြောက်စေသည့် ကောင်းချီးတစ်ရပ်ဖြစ်သနည်း။ (ခ) သီအိုကရက်တစ်ဓမ္မအမှုကျောင်းမှ သင်မည်သို့အကျိုးရခဲ့ပြီနည်း။
၁၃ အရေးပါပြီး ထိရောက်မှုရှိသည့် လေ့ကျင့်ရေးအစီအစဉ်ရှိခြင်း။ ဂေရ်ဟာ့ထ်သည် ယေဟောဝါသက်သေများ၏အသင်းတော်တစ်ခုတွင် အကြီးအကဲတစ်ဦးအဖြစ် အမှုဆောင်နေသည်။ သူ၏လူငယ်ဘဝအကြောင်း ဤသို့ပြန်ပြောသည်– “လူငယ်တစ်ယောက်အနေနဲ့ စကားပြောတဲ့အခါ အခက်အခဲအများကြီးရှိခဲ့တယ်။ စိတ်ဖိစီးလာပြီဆိုရင် သဲသဲကွဲကွဲမပြောနိုင်တော့တဲ့အပြင် ထစ်ထစ်ငေါ့ငေါ့လည်းဖြစ်လာတယ်။ ဒါကြောင့် ကိုယ့်ကိုယ်ကို နိမ့်ကျသိမ်ဖျင်းတယ်လို့ခံစားရပြီး စိတ်ဓာတ်ကျလာတယ်။ ကျွန်တော့်မိဘတွေက စကားပြောပြုပြင်လေ့ကျင့်ပေးတဲ့သင်တန်းတက်ဖို့ စီစဉ်ပေးပေမဲ့ အရာမထင်ပါဘူး။ ကျွန်တော့်ပြဿနာက ခန္ဓာပိုင်းဆိုင်ရာမဟုတ်ဘဲ စိတ်ပိုင်းဆိုင်ရာပြဿနာဖြစ်တယ်။ ဒါပေမဲ့ ယေဟောဝါရဲ့ အံ့ဖွယ်ပြင်ဆင်ပေးချက်တစ်ခုဖြစ်တဲ့ သီအိုကရက်တစ်ဓမ္မအမှုကျောင်းရှိတယ်။ အဲ့ဒီကျောင်းတက်လိုက်လို့ ကျွန်တော်သတ္တိရှိလာတယ်။ သိရှိလာတာတွေကို လက်တွေ့ကျင့်သုံးဖို့ အစွမ်းကုန်ကြိုးစားတယ်။ အဲ့ဒါက တကယ်ထိရောက်မှုရှိတယ်။ စကားကို ရှင်းရှင်းလင်းလင်း ပြောနိုင်လာတယ်၊ စိတ်ဓာတ်လည်းမကျတော့ဘူး၊ ဓမ္မအမှုမှာလည်း ပိုရဲလာတယ်။ အခုဆို လူထုဟောပြောချက်တွေတောင် ပေးနေတယ်။ ဒီကျောင်းက ကျွန်တော့်ဘဝအရည်အသွေးကို တိုးတက်စေတဲ့အတွက် ယေဟောဝါကို သိပ်ကျေးဇူးတင်တယ်။” ယေဟောဝါ၏လုပ်ငန်းတော်ကို ထမ်းဆောင်နိုင်ရန် ကိုယ်တော်လေ့ကျင့်ပေးမှုကြောင့် မရွှင်လန်းသင့်ပေလော။
၁၄၊ ၁၅။ စိတ်သောကရောက်နေချိန်များတွင် အဘယ်အကူအညီကို အသင့်ရရှိနိုင်သနည်း။ ဥပမာပေးပါ။
၁၄ ယေဟောဝါနှင့် ရင်းနှီးသောဆက်ဆံရေးရှိခြင်းနှင့် အပြည်ပြည်ဆိုင်ရာ ညီအစ်ကိုအသင်းအပင်း၏ ထောက်မမှုရရှိခြင်း။ ဂျာမနီနိုင်ငံတွင်နေထိုင်သော ကာထရီန်သည် အရှေ့တောင်အာရှတွင် ဖြစ်သွားသည့် ပြင်းထန်သောငလျင်နှင့် ဆူနာမီ၏ဆိုးကျိုးများကို ကြားရသောကြောင့် အလွန်ထိတ်လန့်တုန်လှုပ်ခဲ့သည်။ ယင်းသို့ဖြစ်ချိန်တွင် သမီးဖြစ်သူသည် ထိုင်းနိုင်ငံသို့ လည်ပတ်ရောက်ရှိနေသည်။ သမီးအသက်ရှင်နေဆဲလော သို့မဟုတ် ထိခိုက်ဒဏ်ရာရသူ၊ သေဆုံးသူများတွင် ပါဝင်သလောဟူသည်ကို ၃၂ နာရီတိုင် သတင်းမရရှိခဲ့ပါ။ နောက်ဆုံး သမီးဖြစ်သူ အန္တရာယ်ကင်းကြောင်း ဖုန်းဆက်ပြောခံရသောအခါမှ အလွန်စိတ်သက်သာရာရခဲ့သည်။
၁၅ စိုးရိမ်စိတ်ဖိစီးသည့် ထိုအချိန်များတစ်လျှောက် ကာထရီန်ကို အဘယ်အရာက ထောက်ကူပေးခဲ့သနည်း။ သူဤသို့ရေးခဲ့သည်– “အဲ့ဒီအချိန်တစ်လျှောက်လုံးနီးပါး ယေဟောဝါဆီ ကျွန်မ ဆုတောင်းခဲ့တယ်။ အဲ့ဒါက ကျွန်မကို ဘယ်လောက်တောင် ခွန်အားနဲ့စိတ်ငြိမ်သက်မှုပေးတယ်ဆိုတာ ခဏခဏသတိပြုမိတယ်။ အဲ့ဒီအပြင် ချစ်ခင်စရာကောင်းတဲ့ ဝိညာဉ်ရေးညီအစ်ကိုတွေ ကျွန်မဆီရောက်လာပြီး အားပေးခဲ့ကြတယ်။” (ဖိလိပ္ပိ ၄:၆၊ ၇) ယေဟောဝါထံဆုတောင်းခြင်းနှင့် ဝိညာဉ်ရေးညီအစ်ကိုများ၏နှစ်သိမ့်မှုသာ မရှိဘဲ ဤစိတ်သောကရောက်ချိန်တစ်လျှောက်လုံးကို ဖြတ်သန်းရမည်ဆိုပါက သူ၏အခြေအနေ မည်မျှဆိုးလိုက်မည်ဖြစ်ခြင်း! ယေဟောဝါနှင့် ကိုယ်တော့်သားတော်နှင့် ရင်းနှီးသောဆက်ဆံရေးအပြင် ခရစ်ယာန်ညီအစ်ကိုအသင်းအပင်းနှင့် နီးကပ်သောပေါင်းသင်းမှုက တုနှိုင်းမမီသော ကောင်းချီးတစ်ရပ်ဖြစ်သည်။ ယင်းသည် အလွန်အဖိုးတန်သောကြောင့် ပေါ့ပေါ့တန်တန်သဘောမထားသင့်ပေ။
၁၆။ ရှင်ပြန်ထမြောက်ခြင်းမျှော်လင့်ချက်၏ အကျိုးကျေးဇူးကိုဖော်ပြသော တွေ့ကြုံမှုတစ်ခုကို ဖော်ပြပါ။
၁၆ ချစ်မြတ်နိုးရသော သေလွန်သူတို့နှင့် ပြန်လည်ဆုံဆည်းနိုင်သည့် မျှော်လင့်ချက်ရှိခြင်း။ (ယောဟန် ၅:၂၈၊ ၂၉) မာတီးယပ်စ်အမည်ရှိသော လူငယ်တစ်ဦးသည် ယေဟောဝါသက်သေတစ်ဦးအဖြစ် ကြီးပြင်းလာခဲ့သည်။ သို့သော် သူခံစားရသည့်ကောင်းချီးများကို လေးမြတ်မှုမရှိခြင်းကြောင့် ဆယ်ကျော်သက်အရွယ်တွင် ခရစ်ယာန်အသင်းတော်နှင့် တဖြည်းဖြည်းဝေးကွာသွားခဲ့သည်။ သူ ယခု ဤသို့ရေးသည်– “ကျွန်တော့်အဖေနဲ့ တစ်ခါမှ လေးလေးနက်နက် စကားမပြောဖူးဘူး။ နှစ်တွေတစ်လျှောက် ကိစ္စတော်တော်များများမှာ ကျွန်တော်တို့ သဘောထားမတိုက်ဆိုင်ဘူး။ ဒါတောင် ကျွန်တော့်ဘဝကို အဖေက အမြဲတမ်းအကောင်းဆုံးဖြစ်စေချင်တယ်။ အဖေ ကျွန်တော့်ကိုသိပ်ချစ်မှန်း အဲ့ဒီတုန်းက ကျွန်တော်အသိအမှတ်မပြုခဲ့ဘူး။ ဒီလိုနဲ့ ၁၉၉၆ ခုနှစ်မှာပေါ့။ အဖေဘေးနားမှာထိုင်၊ သူ့လက်ကိုကိုင်ပြီး ရှိုက်ကြီးတငင်ငိုရင်း ကျွန်တော်လုပ်ခဲ့တာတွေအားလုံးအတွက် အရမ်းစိတ်မကောင်းဖြစ်တယ်ဆိုတာနဲ့ အဖေ့ကို သိပ်ချစ်တယ်ဆိုတာကို ပြောပြခဲ့တယ်။ ဒါပေမဲ့ အဲဒီအချိန်မှာ အဖေနေမကောင်းဖြစ်ပြီး သတိလစ်နေလို့ ကျွန်တော်ပြောတာတွေကို သူမကြားတော့ဘူး။ မကြာပါဘူး၊ အဖေ ဆုံးသွားရှာတယ်။ အဖေ ထမြောက်လာချိန်မှာ ကျွန်တော်ရှိနေမယ်ဆိုရင် အရင်က ကျွန်တော်လုပ်ခဲ့တာတွေအတွက် ပြန်ပေးဆပ်နိုင်မှာ။ ပြီးတော့ အခုဆိုရင် ကျွန်တော်ဟာ အကြီးအကဲတစ်ယောက်အဖြစ် အမှုဆောင်နေပြီး ကျွန်တော်တို့ဇနီးမောင်နှံဟာ ရှေ့ဆောင်တွေအဖြစ်အမှုဆောင်ဖို့ အခွင့်ထူးရရှိထားတယ်ဆိုတာ အဖေသိရင် သိပ်ပျော်မှာ သေချာတယ်။” ရှင်ပြန်ထမြောက်ခြင်းမျှော်လင့်ချက်သည် ကျွန်ုပ်တို့အတွက် တကယ့်ကောင်းချီးတစ်ရပ်ပင်!
“ထိုစည်းစိမ်နှင့်လည်း ဝမ်းနည်းခြင်းအကြောင်းကိုရောနှောတော်မမူ”
၁၇။ ယေဟောဝါ၏ကောင်းချီးများကို ဆင်ခြင်သုံးသပ်ခြင်းက ကျွန်ုပ်တို့ကို အဘယ်အရာပြုလုပ်စေသနည်း။
၁၇ ကောင်းကင်ခမည်းတော်နှင့်ပတ်သက်၍ ယေရှု ဤသို့မိန့်ဆိုခဲ့သည်– “ကောင်းသောသူ မကောင်းသောသူတို့အပေါ်၌ ကိုယ်တော်၏နေကို ထွက်စေတော်မူ၏။ ဖြောင့်မတ်သောသူ မဖြောင့်မတ်သောသူတို့အပေါ်၌ မိုးကိုရွာစေတော်မူ၏။” (မဿဲ ၅:၄၅) ယေဟောဝါဘုရားသခင်သည် မဖြောင့်မတ်သောသူများနှင့် မကောင်းသောသူများကိုပင် ကောင်းချီးပေးသည်ဆိုလျှင် သမာဓိရှိသည့်လမ်းစဉ်တွင် လျှောက်လှမ်းနေသူများကို သာ၍ပေးတော်မူမည်မဟုတ်လော! ဆာလံ ၈၄:၁၁ တွင် “ထာဝရအရှင်ဘုရားသခင်သည် . . . ဖြောင့်မတ်စွာကျင့်သောသူတို့အား ကောင်းသောအရာကိုငြင်းတော်မမူ” ဟုဖော်ပြထားသည်။ ကိုယ်တော်ကို ချစ်သောသူတို့အတွက် ကိုယ်တော်ပြသသော အထူးဂရုစိုက်မှုနှင့် စိုးရိမ်မကင်းဖြစ်မှုတို့ကို ဆင်ခြင်သုံးသပ်သောအခါ ကျွန်ုပ်တို့၏နှလုံးသားသည် ကျေးဇူးတင်လေးမြတ်မှု၊ ဝမ်းသာရွှင်လန်းမှုတို့ဖြင့် ပြည့်နေပေသည်။
၁၈။ (က) ယေဟောဝါသည် ကိုယ်တော်၏ကောင်းချီးနှင့် ဝမ်းနည်းခြင်းကို ရောနှောတော်မမူကြောင်း မည်သို့ပြောနိုင်သနည်း။ (ခ) ဘုရားသခင်အပေါ် တည်ကြည်သူများစွာသည် အဘယ်ကြောင့် ဆင်းရဲခက်ခဲမှုများခံစားကြရသနည်း။
၁၈ ယေဟောဝါ၏လူမျိုးကို ဝိညာဉ်ရေးအရ ကြွယ်ဝစေသည်မှာ ‘ကိုယ်တော်၏ကောင်းချီးမင်္ဂလာ’ ပင်ဖြစ်သည်။ ယင်းနှင့် “ဝမ်းနည်းခြင်းအကြောင်းကို ရောနှောတော်” မူမည်မဟုတ်ကြောင်းကိုလည်း ကျွန်ုပ်တို့ ယုံကြည်စိတ်ချသည်။ (သု. ၁၀:၂၂) သို့ဆိုလျှင် ဘုရားသခင်သည် ကိုယ်တော်အပေါ် တည်ကြည်သူများကို အလွန်နာကျင်ကြေကွဲစေသည့် စမ်းသပ်မှုများနှင့် ခက်ခဲမှုများကို အဘယ်ကြောင့် ကျရောက်ခွင့်ပြုထားသနည်း။ ကျွန်ုပ်တို့သည် ခက်ခဲမှုများနှင့်ဆင်းရဲခြင်းဝေဒနာ ခံစားနေရခြင်းမှာ အောက်ပါ အကြောင်းရင်းသုံးခုကြောင့်ဖြစ်သည်။ (၁) ကျွန်ုပ်တို့ကိုယ်တိုင်၏ အပြစ်ပြုလိုသည့်ဆန္ဒ။ (ကမ္ဘာဦး ၆:၅; ၈:၂၁; ယာကုပ် ၁:၁၄၊ ၁၅) (၂) စာတန်နှင့်သူ၏နတ်ဆိုးများ။ (ဧဖက် ၆:၁၁၊ ၁၂) (၃) ဆိုးသွမ်းသည့်လောက။ (ယောဟန် ၁၅:၁၉) ယေဟောဝါသည် မကောင်းသောအရာများကို ကျွန်ုပ်တို့အပေါ် ကျရောက်ခွင့်ပြုသော်လည်း ယင်းတို့ကို ကိုယ်တော်ဖြစ်ပေါ်စေသည်မဟုတ်။ အမှန်မှာ “ကောင်းမြတ်စုံလင်သော ဆုကျေးဇူးရှိသမျှတို့သည် အလင်းတို့၏အဘထံတော်က သက်ရောက်သည်ဖြစ်၍ အထက်အရပ်မှလာကြ၏။” (ယာကုပ် ၁:၁၇) ယေဟောဝါသည် ကိုယ်တော်၏ကောင်းချီးများတွင် ဝမ်းနည်းခြင်းကို ရောနှောတော်မမူပါ။
၁၉။ သမာဓိရှိစွာလျှောက်လှမ်းသူတို့အတွက် အဘယ်အရာများ စောင့်ကြိုနေသနည်း။
၁၉ ဝိညာဉ်ရေးကြွယ်ဝမှုခံစားရခြင်းတွင် ဘုရားသခင်ထံချဉ်းကပ်ခြင်း အမြဲပါဝင်သည်။ ကျွန်ုပ်တို့သည် ကိုယ်တော်နှင့် ရင်းနှီးသောဆက်ဆံရေးကို ပြုစုပျိုးထောင်နေပါက ထာဝရအသက်ဖြစ်သည့် “မှန်သောအသက်ကို ဝင်စားလိုသောငှာ၊ နောင်ဘဝ၌ကောင်းသောဘဏ္ဍာကို မိမိတို့အဖို့ ဆည်းပူး” နေရာကျသည်။ (၁ တိမောသေ ၆:၁၂၊ ၁၇-၁၉) ကျွန်ုပ်တို့သည် ဘုရားသခင်၏အနာဂတ်ကမ္ဘာသစ်တွင် ဝိညာဉ်ရေးကောင်းချီးများအပြင် ရုပ်ပိုင်းဆိုင်ရာကောင်းချီးများကိုပါ ခံစားကြရမည်ဖြစ်သည်။ ထိုအချိန်တွင် ‘ယေဟောဝါ၏စကားတော်ကို နားထောင်’ သူအားလုံး မှန်သောအသက် ရရှိကြပေမည်။ (တရားဟောရာ ၂၈:၂) ထို့ကြောင့် ခိုင်မာသောစိတ်ပိုင်းဖြတ်ချက်ဖြင့် ဝမ်းမြောက်ရွှင်လန်းလျက် သမာဓိရှိစွာ ဆက်လျှောက်လှမ်းကြပါစို့။
သင်အဘယ်အရာ သိရှိခဲ့သနည်း
• အနာဂတ်ကို အာရုံစိုက်လွန်းခြင်းက အဘယ်ကြောင့် ပညာမဲ့ရာကျသနည်း။
• အဘယ်ကောင်းချီးများကို ကျွန်ုပ်တို့ ယခုခံစားနေရသနည်း။
• ဘုရားသခင်အပေါ် တည်ကြည်သောကျေးကျွန်များသည် အဘယ်ကြောင့် ဆင်းရဲခက်ခဲမှုများ ခံစားကြရသနည်း။
[လေ့လာရန်မေးခွန်းများ]