ဆာလံကျမ်းအပိုင်းနှစ်မှ ပေါ်လွင်ချက်များ
ယေဟောဝါ၏နှုတ်မြွက်စကားတော်သည် အသက်ရှင်၏
ဆာလံကျမ်းအပိုင်းနှစ်မှ ပေါ်လွင်ချက်များ
ယေဟောဝါ၏ကျေးကျွန်များဖြစ်သော ကျွန်ုပ်တို့သည် စုံစမ်းနှောင့်ယှက်မှုနှင့် စမ်းသပ်မှုများ ကြုံတွေ့ရမည်ကို သိထားကြသည်။ ‘ယေရှုခရစ်၏တရားတော်နှင့်အညီ ဘုရားသခင်ဝတ်၌မွေ့လျော်၍နေခြင်းငှာ အလိုရှိသောသူအပေါင်းတို့သည် ညှဉ်းဆဲခြင်းကို ခံရကြလိမ့်မည်’ ဟုတမန်တော်ပေါလုရေးခဲ့၏။ (၂ တိမောသေ ၃:၁၂) စုံစမ်းနှောင့်ယှက်မှုနှင့် ညှဉ်းပန်းနှိပ်စက်မှုတို့ကို ခံရပ်နိုင်ရန် အဘယ်အရာက ကူညီပေးမည်နည်း။ ထိုသို့ခံရပ်ခြင်းဖြင့် ဘုရားသခင်အပေါ် သမာဓိစောင့်သိကြောင်း ဖော်ပြကြသည်။
ယင်းအကူအညီကို ဆာလံကျမ်းငါးပိုင်းမှ ဒုတိယပိုင်းတွင် ဖော်ပြထား၏။ ကျွန်ုပ်တို့သည် စမ်းသပ်မှုများကို အောင်မြင်စွာခံရပ်လိုလျှင် ယေဟောဝါအား အကြွင်းမဲ့ကိုးစား၍ ကယ်လွှတ်ခံရရန် ကိုယ်တော်အား စောင့်ဆိုင်းရမည်ဖြစ်ကြောင်း ဆာလံ ၄၂ မှ ၇၂ တွင် ဖော်ပြထားသည်။ ကျွန်ုပ်တို့အတွက် အလွန်အဖိုးထိုက်သော သင်ခန်းစာပေတည်း။ သမ္မာကျမ်းစာမှ ကျန်အပိုင်းများနည်းတူ ဆာလံအပိုင်းနှစ်တွင်ပါသော အကြောင်းအရာသည် ယနေ့အထိပင် “အသက်ရှင်၍ တန်ခိုးနှင့်ပြုပြင်တတ်၏။”—ဟေဗြဲ ၄:၁၂။
ယေဟောဝါသည် ကျွန်ုပ်တို့၏ ‘ခိုလှုံရာနှင့်ခွန်အား’
လေဝိသားတစ်ဦး ပြည်နှင်ခံဘဝရောက်နေသည်။ သူသည် ယေဟောဝါအားဝတ်ပြုရန် သန့်ရှင်းရာဌာနသို့ မသွားနိုင်သည့်အတွက် ဝမ်းနည်းလျက် မိမိကိုယ်ကို ဤသို့နှစ်သိမ့်သည်– “အို ငါ့ဝိညာဉ်၊ သင်သည် အဘယ်ကြောင့် ညှိုးငယ်သနည်း။ ငါ့အထဲမှာ အဘယ်ကြောင့် မငြိမ်မဝပ်ရှိသနည်း။ ဘုရားသခင်ကို မျှော်လင့်လျက်နေလော့။” (ဆာလံ ၄၂:၅၊ ၁၁; ၄၃:၅) ထပ်တလဲလဲပါသော ဤကျမ်းပိုဒ်သည် ဆာလံ ၄၂ နှင့် ၄၃ မှ လင်္ကာ ၃ ပိုဒ်ကို ကဗျာတစ်ပုဒ်ဖြစ်စေသည်။ ဆာလံ ၄၄ သည် ဟေဇကိမင်းလက်ထက် အာရှုရိတပ်၏ ခြိမ်းခြောက်ကျူးကျော်မှုကြောင့် သောကရောက်နေသည့် ယုဒလူမျိုးအတွက် အသနားခံချက်ဖြစ်သည်။
တော်ဝင်မင်္ဂလာဆောင်တေးသီချင်းဖြစ်သော ဆာလံ ၄၅ သည် မေရှိယဘုရင်နှင့်ဆိုင်သည့် ပရောဖက်ပြုချက်ဖြစ်၏။ နောက်ဆာလံ ၃ ပုဒ်က ယေဟောဝါသည် “ခိုလှုံရာဖြစ်၍ ခွန်အားပေး” သောအရှင်၊ “မြေကြီးတစ်ပြင်လုံးကိုအစိုးရသော မဟာမင်းကြီး” ဖြစ်သည်ဟု ပုံဖော်ထားသည်။ (ဆာလံ ၄၆:၁; ၄၇:၂; ၄၈:၃) “မိမိညီအစ်ကိုကို အဘယ်သူမျှ အလျှင်းမရွေးနိုင်” ကြောင်း ဆာလံ ၄၉ က ထိထိမိမိဖော်ပြထားသည်။ (ဆာလံ ၄၉:၇) ဆာလံဒုတိယပိုင်းမှ ပထမရှစ်ပုဒ်ကို ကောရသားများစပ်ဆိုပြီး ကိုးပုဒ်မြောက်ဖြစ်သော ဆာလံ ၅၀ ကို အာသပ်စပ်ဆိုခဲ့သည်ဟု ဆို၏။
ကျမ်းစာမေးခွန်းများအဖြေ–
၄၄:၁၉—“မြေခွေးနေရာအရပ်” ကား အဘယ်နည်း။ မြေခွေးစာဖြစ်သွားသော လူသေများရှိရာ စစ်မြေပြင်ကို ဆာလံဆရာ ရည်ညွှန်းနေခြင်းဖြစ်နိုင်၏။
၄၅:၁၃၊ ၁၄က—“ရှင်ဘုရင်ထံသို့ဆောင်ခဲ့ရ” သော “ရှင်ဘုရင်၏သမီးတော်” ကားမည်သူနည်း။ သူသည် ‘ထာဝရဘုရင်’ ယေဟောဝါဘုရားသခင်၏သမီးတော် ဖြစ်သည်။ (ဗျာ. ၁၅:၃) ထိုသမီးတော်သည် ၁၄၄,၀၀၀ ခရစ်ယာန်များနှင့် ဖွဲ့စည်းထားသော ဘုန်းထင်ရှားသည့်အသင်းတော်ကို ပုံဆောင်ပြီး ဝိညာဉ်တော်ဖွားသားသမီးအဖြစ် သူတို့ကို ယေဟောဝါ မွေးစားခဲ့သည်။ (ရောမ ၈:၁၆) “မိမိခင်ပွန်းဖို့တန်ဆာဆင်သော မင်္ဂလာဆောင်သတို့သမီးကဲ့သို့ ပြင်ဆင်” ထားသည့် ယေဟောဝါ၏ “သမီးတော်” ကို သတို့သားဖြစ်သူ မေရှိယဘုရင်ထံ ပို့ဆောင်ကြမည်ဖြစ်၏။—ဗျာ. ၂၁:၂။
၄၅:၁၄ခ၊ ၁၅—“အပျိုတော်များ” ကား မည်သူ့ကို ပုံဆောင်သနည်း။ သူတို့သည် ဝိညာဉ်တော်ဖွားအကြွင်းအကျန်နှင့် ပူးပေါင်းကူညီပေးနေသော စစ်မှန်သည့်ဝတ်ပြုသူ ‘လူအုပ်ကြီး’ ဖြစ်၏။ ကြီးစွာသောဆင်းရဲခြင်းအထဲက ထွက်မြောက်လာကြသည့်အတွက် ကောင်းကင်တွင် မေရှိယဘုရင်၏ မင်္ဂလာဆောင်ပွဲပြီးသော အခါ ဤသူတို့သည် မြေကြီးပေါ်တွင် ရှိနေကြသူများဖြစ်၏။ (ဗျာ. ၇:၉၊ ၁၃၊ ၁၄) ထိုအခါသမယတွင် သူတို့သည် “ဝမ်းမြောက်ရွှင်လန်း” နေကြလိမ့်မည်။
၄၅:၁၆—ရှင်ဘုရင်၏အဘများသည် အဘယ်နည်းဖြင့် သားများ ဖြစ်လာသနည်း။ ယေရှု မြေကြီးပေါ်ဖွားမြင်လာသည့်အခါ ကိုယ်တော်၌ မြေကြီးသား အဘများရှိခဲ့၏။ ကိုယ်တော်၏ အနှစ်တစ်ထောင်အုပ်စိုးချိန်အတွင်း သူတို့ကို သေရာမှ ရှင်ပြန်ထမြောက်စေခြင်းဖြင့် ထိုအဘများသည် ကိုယ်တော်၏သားများ ဖြစ်လာကြမည်။ သူတို့အနက် အချို့သည် “မြေကြီးတစ်ပြင်လုံးတွင် မင်းသား” အဖြစ် ခန့်အပ်ခံရကြလိမ့်မည်။
၅၀:၂—ယေရုရှလင်မြို့ကို “အသရေတင့်တယ်ခြင်းပြည့်စုံရာ” ဟုအဘယ်ကြောင့်ခေါ်သနည်း။ ထိုသို့ခေါ်ရခြင်းမှာ မြို့၏အင်္ဂါရပ်ကြောင့် မဟုတ်ပေ။ ယေဟောဝါသည် ယေရုရှလင်မြို့တွင် ဝတ်ပြုရာအိမ်တော်တည်ရှိစေ၍ ကိုယ်တော်၏ ခန့်အပ်ခံဘုရင်များ နန်းစိုက်ရာမြို့တော်ဖြစ်စေခြင်းကြောင့် ထိုမြို့တော်သည် ခန့်ညားထည်ဝါကာ အလွန်နှစ်လို့ဖွယ်ကောင်းရခြင်းဖြစ်၏။
ကျွန်ုပ်တို့အတွက် သင်ခန်းစာ–
၄၂:၁-၃။ ခြောက်သွေ့သောဒေသရှိ သမင်ဒရယ်သည် ရေငတ်သည့်နည်းတူ လေဝိသားသည် ယေဟောဝါကို အလွန်တောင့်တနေ၏။ သူသည် ယေဟောဝါအား ဝတ်ပြုရန် သန့်ရှင်းရာဌာနသို့ မရောက်နိုင်သည့်အတွက် အလွန်ဝမ်းနည်းနေရကား ‘သူ၏မျက်ရည်သည် နေ့ညမပြတ် သူ၏စားစရာဖြစ်’ ၍ ခံတွင်းပျက်နေသည်။ ကျွန်ုပ်တို့လည်း ယုံကြည်မှုတူသူချင်းတို့နှင့်အတူ ယေဟောဝါအား ဝတ်ပြုနေရခြင်းကို အလွန်တန်ဖိုးမထားသင့်ပေလော။
၄၂:၄၊ ၅၊ ၁၁; ၄၃:၃-၅။ ကျွန်ုပ်တို့မလွန်ဆန်နိုင်သော အကြောင်းတစ်ခုခုကြောင့် ခရစ်ယာန်အသင်းတော်နှင့် ခေတ္တဝေးကွာနေရလျှင်ပင် တစ်ချိန်ကပေါင်းသင်းခဲ့၍ ရရှိသောရွှင်လန်းမှုများကို အမှတ်ရနေခြင်းဖြင့် ကျွန်ုပ်တို့အားယူနိုင်သည်။ တစ်ကိုယ်တည်းဖြစ်နေရခြင်းကြောင့် အစပိုင်းတွင် အလွန်အားငယ်နေမည်ဖြစ်သော်လည်း ဘုရားသခင်သည် ကျွန်ုပ်တို့၏ခိုလှုံရာဖြစ်ပြီး စိတ်သက်သာမှုရရန် ကိုယ်တော်ကိုစောင့်မျှော်နေရမည်ဖြစ်ကြောင်း သတိရပေမည်။
၄၆:၁-၃။ အဘယ်ဘေးဆိုးပင် ကြုံတွေ့ရပါစေ၊ ယေဟောဝါသည် ကျွန်ုပ်တို့၏ ခိုလှုံရာနှင့် ခွန်အားဖြစ်တော်မူကြောင်း အမြဲစိတ်ချရမည်။
၅၀:၁၆-၁၉။ လိမ်လည်လှည့်စား၍ ဆိုးယုတ်သောအကျင့်ကို ကျင့်သောသူ မည်သူမဆိုသည် ဘုရားသခင်အား ကိုယ်စားပြုသူ မဖြစ်ထိုက်ပေ။
၅၀:၂၀။ သူတစ်ပါး၏အပြစ်အနာအဆာများကို ဖော်ထုတ်နေမည့်အစား ယင်းတို့ကို ဗွေမယူသင့်ပေ။—ကောလောသဲ ၃:၁၃။
“ငါ့ဝိညာဉ်သည် ဘုရားသခင်ရှေ့မှာ ငြိမ်ဝပ်စွာနေ”
ဤအပိုင်းသည် ဗေသရှေဘနှင့် ဒါဝိဒ်မှားယွင်းပြီးနောက်ပိုင်း ယေဟောဝါထံ သူလှိုက်လှိုက်လှဲလှဲတောင်းခဲ့သော ဆုတောင်းချက်ဖြင့် အစချီသည်။ ဆာလံ ၅၂ မှ ၅၇ သည် မိမိတို့ဝန်ကို ယေဟောဝါ၌ချထားပြီး ကယ်တင်ခြင်းရရန် ကိုယ်တော်အား စောင့်မျှော်နေသူများကို ကယ်လွှတ်တော်မူမည်ဖြစ်ကြောင်း ဖော်ပြသည်။ ဒါဝိဒ်သည် စိတ်သောကရောက်တိုင်း ယေဟောဝါအား မှီခိုအားထားခဲ့ကြောင်း ဆာလံ ၅၈-၆၄ ကဖော်ပြ၏။ သူဤသို့သီဆိုခဲ့သည်– “အကယ်စင်စစ် ငါ့ဝိညာဉ်သည် ဘုရားသခင်ရှေ့မှာ ငြိမ်ဝပ်စွာနေတတ်၏။ ငါမျှော်လင့်ခြင်းအကြောင်းသည် အထံတော်က သက်ရောက်ရ၏။”—ဆာလံ ၆၂:၅။
ကျွန်ုပ်တို့ကိုကယ်နုတ်မည့်အရှင်နှင့် ရင်းနှီးခြင်းက ကိုယ်တော့် “နာမတော်၏ဂုဏ်ကို သီချင်းဆို” စေသည်။ (ဆာလံ ၆၆:၂) ဆာလံ ၆၅ တွင် ယေဟောဝါအား ရက်ရောစွာပြုစုစီရင်သောအရှင်အဖြစ် ချီးမွမ်းထားသည်။ ဆာလံ ၆၇ နှင့် ၆၈ တွင် ကယ်တင်နိုင်သောဘုရားသခင်အဖြစ်၊ ဆာလံ ၇၀ နှင့် ၇၁ တွင် ကယ်နုတ်ရှင်အဖြစ် ဖော်ပြထားသည်။
ကျမ်းစာမေးခွန်းများအဖြေ–
၅၁:၁၂—မည်သူ၏ “စေတနာစိတ်” ဖြင့် ထောက်မမှုရရန် ဒါဝိဒ်တောင်းဆိုနေခြင်းဖြစ်သနည်း။ ယင်းက ယေဟောဝါဘုရားသခင်၏ အကူအညီပေးလိုသော စိတ်စေတနာ သို့မဟုတ် ကိုယ်တော်၏သန့်ရှင်းသောဝိညာဉ်တော်ကို ရည်ညွှန်းနေခြင်းမဟုတ်ဘဲ ဒါဝိဒ်၏စိတ်ဆန္ဒကိုပင် ရည်ညွှန်းနေခြင်းဖြစ်သည်။ မှန်ရာကိုလုပ်ဆောင်လိုစိတ် သွင်းပေးပါရန် ဘုရားသခင်အား တောင်းဆိုနေခြင်းဖြစ်၏။
၅၃:၁—ဘုရားသခင်မရှိဟု ထင်သောသူသည် မည်သို့ “မိုက်သောသူ” ဖြစ်သနည်း။ ဤတွင်ဖော်ပြသောမိုက်မဲခြင်းသည် ဉာဏ်တုံးခြင်းကို မဆိုလိုပါ။ အဆိုပါလူစားမျိုးသည် ကျင့်ဝတ်ဆိုင်ရာအသိတရားမဲ့သူဖြစ်ကြောင်း ဆာလံ ၅၃:၁-၄ တွင် ဖော်ပြထားသော ကိုယ်ကျင့်တရားပျက်ပြားခြင်း၏ အကျိုးဆက်များကိုထောက်၍ သိရှိနိုင်သည်။
၅၈:၃-၅—မတရားသောသူသည် အဘယ်နည်းဖြင့် မြွေနှင့်တူသနည်း။ သူတို့ပြောသောမုသာစကားသည် မြွေဆိပ်နှင့်တူပြီး အပြောခံရသူတို့၏နာမည်ကောင်းကို ပျက်စီးစေသည်။ ‘မိမိနားကိုပိတ်သော’ မြွေဆိုးနည်းတူ မတရားသောသူသည် လမ်းပြမှုကို မခံယူလို၊ ဆုံးမစကားကို နားမထောင်လိုကြချေ။
၅၈:၇—မတရားသောသူတို့သည် အဘယ်နည်းဖြင့် “စီးသောရေကဲ့သို့ ကွယ်ပျောက်ကြ” မည်နည်း။ ဒါဝိဒ်သည် ကတိထားရာပြည်၏ချိုင့်ဝှမ်းအချို့ရှိ ရေကို စဉ်းစားနေခြင်းဖြစ်နိုင်သည်။ ရေလွှမ်းမိုးဘေး ရုတ်တရက်ကျရောက်သောအခါ ထိုချိုင့်ဝှမ်းတွင် ရေကြီးလာမည်ဖြစ်သော်လည်း တစ်ခဏချင်း၌ ရေပြန်ကျသွားပေမည်။ ဤတွင် ဒါဝိဒ်က မတရားသောသူတို့ အလျင်အမြန်ပျက်စီးရေးအတွက် ဆုတောင်းနေခြင်းဖြစ်၏။
၆၈:၁၃—ချိုးငှက်အတောင်သည် ငွေနှင့် မည်သို့ မွမ်းမံပြီး အမွေးသည် နီသောရွှေနှင့် မည်သို့မွမ်းမံသနည်း။ မီးခိုးပြာရောင်ချိုးငှက်အချို့၏ အမွေးအတောင်သည် အရောင်ပြေးပြီး ရွှေရောင်နေခြည်အောက်တွင် သတ္တုရောင်လက်နေသည်။ ဒါဝိဒ်သည် တိုက်ပွဲမှပြန်လာကြသော အောင်ပွဲခံဣသရေလစစ်သည်များကို အရှိန်အဟုန်နှင့်ပျံသန်းနေသော အရောင်တောက်ပသည့် ချိုးငှက်နှင့် ခိုင်းနှိုင်းနေခြင်းဖြစ်ဖွယ်ရှိ၏။ ကျမ်းပညာရှင်အချို့၏အဆိုအရ ဤဖော်ပြချက်သည် လက်ရပစ္စည်းကဲ့သို့ စစ်အောင်ခြင်း အထိမ်းအမှတ်တစ်ခုလည်းဖြစ်နိုင်၏။ မည်သို့ဆိုစေ၊ ယေဟောဝါသည် မိမိလူမျိုးတော်ကို အောင်ပွဲများခံစေခဲ့ကြောင်း ဒါဝိဒ်ရည်ညွှန်းနေခြင်းဖြစ်၏။
၆၈:၁၈—‘လူ့အသွင် ဆုလာဘ်များ’ ကား မည်သူတို့နည်း။ ဤသူတို့သည် ကတိထားရာပြည်ကိုသိမ်းပိုက်ချိန်က ဖမ်းဆီးလာခဲ့သော သုံ့ပန်းများထဲမှ အမျိုးသားများဖြစ်၏။ နောက်ပိုင်းတွင် ထိုသူတို့သည် လေဝိသားတို့ကိုကူညီကြရသည်။—ဧဇရ ၈:၂၀။
၆၈:၃၀—“ကျူတောသားရဲကို ဆုံးမ” ရန် တောင်းဆိုခြင်းက အဘယ်အဓိပ္ပာယ်နည်း။ ယေဟောဝါလူမျိုးတော်၏ရန်သူများကို တောသားရဲနှင့်ခိုင်းနှိုင်းပြီး ထိုသူတို့ကိုပြစ်တင်ဆုံးမရန် သို့မဟုတ် သူတို့၏ဘေးပြုနိုင်စွမ်းကိုတားဆီးပေးရန် ဘုရားသခင်အား ဒါဝိဒ် တောင်းပန်နေခြင်းဖြစ်၏။
၆၉:၂၃—‘ရန်သူတို့၏ခါးသည် တုန်ပါစေ’ ဟုဆိုခြင်းက အဘယ်နည်း။ ခါးကြွက်သားများကိုအသုံးပြု၍ အလေးအပင်များ မ,တင်ခြင်း အစရှိသည့် အားစိုက်ရသောအလုပ်များကို ပြီးမြောက်စေနိုင်သည်။ ခါးမခိုင်ခြင်းက ခွန်အားမရှိခြင်းဖြစ်၏။ ဒါဝိဒ်က သူ၏ရန်သူများ ခွန်အားပျောက်ဆုံးပါစေဟုဆုတောင်း၏။
ကျွန်ုပ်တို့အတွက် သင်ခန်းစာ–
၅၁:၁-၄၊ ၁၇။ အပြစ်ကျူးလွန်မိခြင်းကြောင့် ယေဟောဝါနှင့်စိမ်းကားသွားစရာ မလိုပါ။ ကျွန်ုပ်တို့နောင်တရပါက ကိုယ်တော်၏ကရုဏာခံစားရမည်ဖြစ်ဟု စိတ်ချနိုင်သည်။
၅၁:၅၊ ၇-၁၀။ ကျွန်ုပ်တို့အပြစ်ကျူးလွန်မိပါက အမွေခံထားသောအပြစ်ကိုထောက်ပြ၍ ခွင့်လွှတ်တော်မူရန် ယေဟောဝါထံ အသနားခံနိုင်သည်။ ထို့ပြင် ကျွန်ုပ်တို့အား သန့်ရှင်းစေရန်၊ အခြေအနေပြန်လည်ကောင်းမွန်လာစေရန်၊ ကျွန်ုပ်တို့နှလုံးသားမှ အပြစ်ပြုလိုစိတ်ကို ဖယ်ရှားပေးပါရန်၊ မြဲမြံတည်ကြည်သောစိတ်ဓာတ်ရှိစေရန် ဆုတောင်းသင့်သည်။
၅၁:၁၈။ ဒါဝိဒ်၏အပြစ်များကြောင့် လူမျိုးတစ်မျိုးလုံး အကျိုးနည်းကြရတော့မည်ဖြစ်သည်။ ထို့ကြောင့် ဇိအုန်အပေါ် ဘုရားသခင်စေတနာထားရန် သူဆုတောင်းခဲ့သည်။ ကျွန်ုပ်တို့လည်း ကြီးလေးသောအပြစ် ကျူးလွန်မိလျှင် ယေဟောဝါ၏နာမတော် ရှုတ်ချခံရပြီး အသင်းတော်နာမည်ပျက်စေသည်။ သို့အတွက် ကျွန်ုပ်တို့ကြောင့် နာမည်ပျက်ရှိမည်ဆိုလျှင် ပြုပြင်ပေးပါရန် ဆုတောင်းဖို့ လိုသည်။
၅၂:၈။ ကျွန်ုပ်တို့သည် ဘုရားသခင်၏စကားကို နားထောင်ခြင်း၊ ကိုယ်တော်၏ဆုံးမစကားကို လိုလိုလားလားလက်ခံခြင်းဖြင့် ယေဟောဝါထံချဉ်းကပ်ကာ ကိုယ်တော့်လုပ်ငန်းတော်တွင် သီးပွင့်ဖြစ်ထွန်းနေပါက “ဘုရားသခင်၏အိမ်တော်၌ စိမ်းလန်းသောသံလွင်ပင်ကဲ့သို့” ဖြစ်နိုင်ကြသည်။—ဟေဗြဲ ၁၂:၅၊ ၆။
၅၅:၄၊ ၅၊ ၁၂-၁၄၊ ၁၆-၁၈။ ဒါဝိဒ်သည် သားတော်အဗရှလုံ၏ ပူးပေါင်းကြံစည်မှုနှင့် အကြံပေးသူအဟိသောဖေလ၏ သစ္စာဖောက်မှုတို့ကြောင့် အကြီးအကျယ်စိတ်ထိခိုက်ခဲ့သည်။ သို့သော် သူသည် ယေဟောဝါအပေါ် ဆက်၍ကိုးစားမြဲကိုးစား၏။ ကျွန်ုပ်တို့လည်း စိတ်ထိခိုက်စရာများကြောင့် ဘုရားသခင်အပေါ် ယုံကြည်ကိုးစားမှု လျော့မသွားသင့်ပေ။
၅၅:၂၂။ ထမ်းရွက်ရသောဝန်ကို ယေဟောဝါအပေါ် မည်သို့ချထားနိုင်မည်နည်း။ အောက်ပါတို့ကို လုပ်ဆောင်နိုင်သည်– (၁) ကျွန်ုပ်တို့၏စိုးရိမ်မှုများကို ဆုတောင်း၍ရင်ဖွင့်ခြင်း၊ (၂) လမ်းညွှန်မှုနှင့် ထောက်မမှုရရန် သမ္မာကျမ်းစာနှင့် ကိုယ်တော့်အဖွဲ့အစည်းကို အားထားခြင်း၊ (၃) အခြေအနေကောင်းမွန်လာစေရန် အတတ်နိုင်ဆုံးလုပ်ဆောင်ခြင်းတို့ဖြစ်၏။—သု. ၃:၅၊ ၆; ၁၁:၁၄; ၁၅:၂၂; ဖိလိပ္ပိ ၄:၆၊ ၇။
၅၆:၈။ ယေဟောဝါသည် ကျွန်ုပ်တို့၏အခြေအနေကိုသာမက ယင်းကြောင့်ခံရသောစိတ်ဒုက္ခကိုပါ သိတော်မူသည်။
၆၂:၁၁။ ယေဟောဝါသည် အဘယ်ပြင်ပတန်ခိုးစွမ်းအင်ကိုမျှ မှီခိုအားထားစရာ မလိုပေ။ ကိုယ်တော်တိုင်သည် တန်ခိုး၏ရင်းမြစ်ဖြစ်တော်မူသည်။ ‘ဘုရားသခင်၌ တန်ခိုးတော်ရှိ၏။’
၆၃:၃။ ဘုရားသခင်၏ “ကရုဏာတော်သည် အသက်ထက်သာ၍ကောင်း” ပေ၏။ အကြောင်းမှာ ကိုယ်တော်၏ကရုဏာသာ မခံစားရလျှင် ဘဝတွင် အဓိပ္ပာယ်မရှိပေ။ ထို့ကြောင့် ယေဟောဝါနှင့်မိတ်ဆွေဖွဲ့ထားခြင်းကား ပညာရှိရာရောက်သည်။
၆၃:၅။ တိတ်ဆိတ်၍ အနှောင့်အယှက်ကင်းသော ညအချိန်သည် တွေးတောဆင်ခြင်ရန် အကောင်းဆုံးအချိန်ဖြစ်၏။
၆၄:၂-၄။ သူတစ်ဖက်သားကိုထိခိုက်သော အတင်းအဖျင်းသည် အပြစ်မဲ့သူ၏နာမည်ကောင်းကို ပျက်စီးစေသည်။ ထိုသို့သောအတင်းအဖျင်းစကားကို လုံးဝနားမထောင်သင့်၊ သတင်းမဖြန့်သင့်ပေ။
၆၉:၄။ တစ်ခါတစ်ရံ ကျွန်ုပ်တို့တွင် အမှားမရှိဟုယူဆသည့်တိုင် သင့်မြတ်မှုရှိရေးအတွက် တောင်းပန်လိုက်ခြင်းဖြင့် “ပြန်ပေး” ပါက ပညာရှိရာရောက်သည်။
၇၀:၁-၅။ ကျွန်ုပ်တို့ အရေးတကြီးအကူအညီတောင်းခံသောအခါ ယေဟောဝါ နားညောင်းတော်မူ၏။ (၁ သက်သာလောနိတ် ၅:၁၇; ယာကုပ် ၁:၁၃; ၂ ပေတရု ၂:၉) ဘုရားသခင်သည် စမ်းသပ်မှုတစ်ခုကို ခွင့်ပြုသော်လည်း တစ်ချိန်တည်းတွင် ယင်းကို ကိုင်တွယ်ဖြေရှင်းတတ်ရန် ဉာဏ်ပညာပေးမည်။ ခံနိုင်ရည်ရှိရန် ခွန်အားလည်း ပေးတော်မူမည်။ ကိုယ်တော်သည် ကျွန်ုပ်တို့မခံရပ်နိုင်သော စုံစမ်းနှောင့်ယှက်မှုများကို ခွင့်ပြုတော်မမူပေ။—၁ ကောရိန္သု ၁၀:၁၃; ဟေဗြဲ ၁၀:၃၆; ယာကုပ် ၁:၅-၈။
၇၁:၅၊ ၁၇။ ဒါဝိဒ်သည် ဖိလိတ္တိလူ့ဘီလူးကြီး ဂေါလျတ်နှင့် ရင်ဆိုင်တိုက်ခိုက်ချိန်မတိုင်မီ ငယ်စဉ်ကပင် ယေဟောဝါအား ကိုးစားခြင်းဖြင့် ရဲစွမ်းသတ္တိနှင့်ခွန်အား မွေးမြူခဲ့သည်။ (၁ ဓမ္မရာဇဝင် ၁၇:၃၄-၃၇) လူငယ်များသည် မိမိတို့လုပ်ဆောင်လေသမျှတွင် ယေဟောဝါအား ကိုးစားသင့်သည်။
“မြေကြီးတစ်ပြင်လုံးသည် ဘုန်းတော်နှင့်ပြည့်ပါစေသတည်း”
ဆာလံဒုတိယပိုင်း၏ နောက်ဆုံးသီချင်းဖြစ်သော ဆာလံ ၇၂ သည် ရှောလမုန်၏အုပ်စိုးမှုအကြောင်းဖြစ်ပြီး မေရှိယအုပ်စိုးချိန်တွင် တည်ရှိမည့်အခြေအနေများကို ကြိုတင်ပုံဖော်သည်။ ထိုတွင်ပုံဖော်ထားသည့် ငြိမ်သက်မှုရှိခြင်း၊ ဖိနှိပ်မှုနှင့်ကြမ်းတမ်းမှုတို့ အဆုံးတိုင်ခြင်း၊ မြေကြီးပေါ် စပါးအလျှံပယ်ပေါများခြင်းတို့သည် အလွန်ကောင်းမွန်လိုက်လေခြင်း။ ထိုအရာများအပြင် ဘုရားသခင့်နိုင်ငံတော်ကောင်းချီးများကို ခံစားရမည့်သူတို့တွင် ကျွန်ုပ်တို့လည်း ပါဝင်မည်လော။ ဆာလံဆရာကဲ့သို့ ယေဟောဝါအား စောင့်မျှော်ကာ ကိုယ်တော်ကို ကျွန်ုပ်တို့၏ ခိုလှုံရာနှင့် ခွန်အား ဖြစ်စေကြမည်ဆိုလျှင် ယင်းကောင်းချီးများကို ခံစားနိုင်ပါမည်။
ဒါဝိဒ်၏ဆုတောင်းချက်များ ဤသို့အပြီးသတ်သည်– “အံ့ဖွယ်သောအမှုတို့ကို တစ်ပါးတည်းသာစီရင်တော်မူသော ထာဝရအရှင်ဘုရားသခင်၊ ဣသရေလအမျိုး၏ဘုရားသခင်သည် မင်္ဂလာရှိတော်မူစေသတည်း။ ဘုန်းကြီးသောနာမတော်သည်လည်း အစဉ်အမြဲ မင်္ဂလာရှိတော်မူစေသတည်း။ မြေကြီးတစ်ပြင်လုံးသည် ဘုန်းတော်နှင့်ပြည့်ပါစေသတည်း။ အာမင်နှင့်အာမင်။” (ဆာလံ ၇၂:၁၈-၂၀) ကျွန်ုပ်တို့လည်း ယေဟောဝါအား လှိုက်လှိုက်လှဲလှဲကောင်းချီးပေး၍ ကိုယ်တော်၏ဘုန်းကြီးသောနာမတော်ကို ချီးမွမ်းကြစို့လေ။
[စာမျက်နှာ ၉ ပါ ရုပ်ပုံ]
“ရှင်ဘုရင်၏သမီးတော်” သည်မည်သူ့ကိုပုံဆောင်ကြောင်း သင်သိသလော
[စာမျက်နှာ ၁၀၊ ၁၁ ပါ ရုပ်ပုံ]
ယေရုရှလင်မြို့ကို “အသရေတင့်တယ်ခြင်းပြည့်စုံရာ” ဟု အဘယ့်ကြောင့်ခေါ်ရကြောင်း သင်သိပါသလော