‘အသက်ရှင်မည်အကြောင်း အသက်ကို ရွေးယူလော့’
‘အသက်ရှင်မည်အကြောင်း အသက်ကို ရွေးယူလော့’
‘အသက်ရှင်ခြင်း သေခြင်း ကောင်းချီးပေးခြင်း ကျိန်ခြင်းတို့ကို သင့်ရှေ့၌ ငါထားသည်။ . . . အသက်ရှင်မည်အကြောင်း . . . အသက်တရားကို ရွေးယူလော့။’—တရားဟောရာ ၃၀:၁၉၊ ၂၀။
၁၊ ၂။ လူသည် ဘုရားသခင်၏ပုံသဏ္ဌာန်တော်နှင့်အညီ အဘယ်နည်းများဖြင့် ဖန်ဆင်းခံရသနည်း။
“ငါတို့ပုံသဏ္ဌာန်နှင့် တညီတသဏ္ဌာန်တည်း လူကို ဖန်ဆင်းကြစို့။” ဘုရားသခင်၏အဆိုပါမိန့်ဆိုချက်ကို သမ္မာကျမ်းစာ၏ပထမဆုံးအခန်းကြီးတွင် မှတ်တမ်းတင်ထားသည်။ သို့နှင့် “ဘုရားသခင်သည် မိမိပုံသဏ္ဌာန်နှင့်အညီ လူကိုဖန်ဆင်းတော်မူ၏” ဟု ကမ္ဘာဦး ၁:၂၆၊ ၂၇ ကဖော်ပြသည်။ သို့ဖြစ်၍ ကနဦးလူသားသည် ကမ္ဘာပေါ်ရှိ အခြားသတ္တဝါအားလုံးနှင့် မတူခြင်းဖြစ်သည်။ သူသည် ဖန်ဆင်းရှင်နှင့်တူပြီး ကျိုးကြောင်းဆင်ခြင်ရာတွင်လည်းကောင်း ချစ်ခြင်း တရားမျှတခြင်း ဉာဏ်ပညာနှင့် တန်ခိုးတို့ကို ဖော်ပြရာတွင်လည်းကောင်း ဘုရားသခင်၏စိတ်သဘောတော်ကို ထင်ဟပ်ပြနိုင်သည်။ မိမိကိုအကျိုးပြုပြီး ကောင်းကင်ခမည်းတော်၏အလိုတော်နှင့်တွေ့နိုင်မည့် ဆုံးဖြတ်ချက်များချနိုင်ရန် ကိုယ်ကိုကိုယ်သိသောစိတ်လည်း သူ့တွင်ရှိ၏။ (ရောမ ၂:၁၅) အချုပ်ဆိုရလျှင် အာဒံတွင် လွတ်လပ်စွာလုပ်ပိုင်ခွင့်ရှိသည်။ ယေဟောဝါသည် မိမိ၏လက်ရာ မြေကြီးသား၏တည်ဆောက်ပုံနှင့်စပ်လျဉ်း၍ “အလွန်ကောင်းသည်” ဟုမိန့်ဆိုခဲ့၏။—ကမ္ဘာဦး ၁:၃၁; ဆာလံ ၉၅:၆။
၂ အာဒံ၏သားစဉ်မြေးဆက်များဖြစ်ကြသော ကျွန်ုပ်တို့သည်လည်း ဘုရားသခင်၏ပုံသဏ္ဌာန်တော်နှင့်အညီ ဖန်ဆင်းခံရသည်။ သို့သော် ကျွန်ုပ်တို့တွင် အမှန်ပင် ရွေးချယ်ခွင့်ရှိသလော။ ရှိပါသည်။ ယေဟောဝါသည် အဘယ်အရာဖြစ်ပျက်လာမည်ကို ကြိုသိရှိနိုင်သော်လည်း ကျွန်ုပ်တို့တစ်ဦးစီ၏လုပ်ရပ်များနှင့် နောက်ဆုံးရလဒ်ကို တင်ကူးသတ်မှတ်ထားခြင်းမရှိချေ။ ကိုယ်တော်၏မြေကြီးသားသမီးများကို ဘယ်တော့မျှ တင်ကူးသတ်မှတ်ထားမည်မဟုတ်ချေ။ ဆုံးဖြတ်ချက်အမှန်ချနိုင်ရန် လွတ်လပ်စွာလုပ်ပိုင်ခွင့်ကို အသုံးပြုခြင်း၏ အရေးပါမှုကို နားလည်ဖို့ ဣသရေလလူမျိုးမှ ဦးစွာ သင်ခန်းစာယူကြစို့။—ရောမ ၁၅:၄။
ဣသရေလလူတို့ လွတ်လပ်စွာရွေးချယ်ပိုင်ခွင့်ရှိ
၃။ ပညတ်တော်ဆယ်ပါး၏ ပထမပညတ်ကား အဘယ်နည်း။ သစ္စာရှိဣသရေလလူတို့သည် ၎င်းပညတ်ကို နာခံရန် မည်သို့ရွေးချယ်ခဲ့ကြသနည်း။
၃ ‘ငါသည် သင့်ကို ကျွန်ခံနေရာ အဲဂုတ္တုပြည်မှ ကယ်နုတ်ဆောင်ယူခဲ့ပြီးသော သင်၏ဘုရားသခင် ယေဟောဝါဖြစ်၏’ ဟုဣသရေလလူတို့ကို ယေဟောဝါမိန့်ဆိုခဲ့သည်။ (တရားဟောရာ ၅:၆) ဘီစီ ၁၅၁၃ ခုနှစ်တွင် ဣသရေလလူမျိုးသည် အီဂျစ်ကျွန်သပေါက်အဖြစ်မှ အံ့ဖွယ်နည်းဖြင့် ကယ်နုတ်ခံခဲ့ရသောကြောင့် အဆိုပါစကားများကို သံသယဖြစ်စရာအကြောင်းမရှိချေ။ ပညတ်တော်ဆယ်ပါး၏ ပထမပညတ်တွင် ပြောရေးဆိုခွင့်ရှိသူ မောရှေမှတစ်ဆင့် ယေဟောဝါက ‘ငါမှတစ်ပါး အခြားသောဘုရားသခင်ကို မကိုးကွယ်နှင့်’ ဟုမိန့်ဆိုခဲ့၏။ (ထွက်မြောက်ရာ ၂၀:၁၊ ၃) ထိုအချိန်က ဣသရေလလူမျိုးသည် ၎င်းပညတ်ကို နာခံရန် ရွေးချယ်ခဲ့ကြသည်။ သို့ဖြင့် သူတို့သည် ယေဟောဝါအား စိတ်လိုကိုယ်လျောက် အကြွင်းမဲ့ဆည်းကပ်ဝတ်ပြုခဲ့ကြ၏။—ထွက်မြောက်ရာ ၂၀:၅; တောလည်ရာ ၂၅:၁၁။
၄။ (က) မောရှေသည် ဣသရေလလူမျိုးကို အဘယ်ရွေးချယ်မှုပြုရန် ဖော်ပြခဲ့သနည်း။ (ခ) ယနေ့ ကျွန်ုပ်တို့ အဘယ်ရွေးချယ်မှုပြုကြရမည်နည်း။
၄ နောက်နှစ်ပေါင်း ၄၀ ခန့်အကြာတွင် ဣသရေလလူမျိုးဆက် နောက်တစ်ဆက်အား သူတို့ရွေးချယ်ပြုလုပ်ရမည့်အမှုအကြောင်း မောရှေ အတိအလင်းသတိပေးခဲ့သည်။ “အသက်ရှင်ခြင်း သေခြင်း ကောင်းချီးပေးခြင်း ကျိန်ခြင်းတို့ကို သင့်ရှေ့၌ ငါထားသည်ဟု သင့်တစ်ဖက်၌ ကောင်းကင်မြေကြီးကို ငါတိုင်တည်၏။ သို့ဖြစ်၍ သင်နှင့်သင့်အမျိုးအနွယ်သည် အသက်ရှင်မည်အကြောင်း . . . အသက်တရားကို ရွေးယူလော့” ဟုပြောဆိုခဲ့သည်။ (တရားဟောရာ ၃၀:၁၉၊ ၂၀) ထိုနည်းတူ ယနေ့လည်း ကျွန်ုပ်တို့ ရွေးချယ်ပြုမူနိုင်သည်။ ထာဝရအသက်ကိုရှုမျှော်၍ ယေဟောဝါအား သစ္စာရှိစွာဝတ်ပြုရန် သို့မဟုတ် ကိုယ်တော်၏စကားကိုနားမထောင်ခြင်း ဆိုးကျိုးများခံစားရရန် ရွေးချယ်နိုင်ကြသည်။ ရွေးချယ်မှုမတူသော လူနှစ်မျိုးနှစ်စား၏ ပုံနမူနာကို သုံးသပ်ကြည့်ပါ။
၅၊ ၆။ ယောရှုသည် အဘယ်အရာရွေးချယ်ခဲ့သနည်း။ အဘယ်အကျိုးရလဒ်ရရှိခဲ့သနည်း။
၅ ဘီစီ ၁၄၇၃ ခုနှစ်တွင် ယောရှုသည် ဣသရေလလူတို့ကို ကတိထားရာပြည်သို့ ဦးဆောင်၍ခေါ်သွားသည်။ သူမသေမီ ဣသရေလလူမျိုးတစ်မျိုးလုံးကို ဤသို့ပြတ်ပြတ်သားသားတိုက်တွန်းခဲ့သည်– ‘ထာဝရဘုရားသခင်အား ဝတ်မပြုကောင်းဟု သင်တို့ထင်လျှင် မြစ်ကြီးတစ်ဖက်၌ ဘိုးဘေးတို့ဝတ်ပြုသောနတ်ဘုရား သင်တို့နေရာ အာမောရိပြည်သားတို့၏နတ်ဘုရားများတွင် အဘယ်မည်သောနတ်ဘုရားတို့အား ဝတ်ပြုမည်အရာကို ယနေ့ ရွေးကြလော့။’ ထို့နောက် သူ၏မိသားစုနှင့်ပတ်သက်၍ သူက ‘ငါနှင့်ငါ့အိမ်သားဖြစ်လျှင် ယေဟောဝါကိုသာ ဝတ်ပြုမည်’ ဟုဆိုသည်။—ယောရှု ၂၄:၁၅။
၆ အစောပိုင်းတွင် ယေဟောဝါက အားယူ၍ ရဲရင့်ခြင်းရှိလော့ဟု ယောရှုကို အားပေးခဲ့ပြီး ဘုရားသခင်၏ပညတ်တော်ကို လိုက်လျှောက်ခြင်းလမ်းမှ သွေဖည်မသွားရန် မိန့်မှာခဲ့သည်။ ယောရှုသည် ပညတ္တိကျမ်းစာကို နေ့ညမပြတ်ဖတ်ရွတ်ခြင်းအားဖြင့် အကြံထမြောက်မည်ဖြစ်သည်။ (ယောရှု ၁:၇၊ ၈) ထိုအတိုင်းလည်း ဖြစ်ပျက်ခဲ့၏။ ယောရှု၏ရွေးချယ်မှုက ကောင်းချီးများ ခံစားရရန် ဖြစ်စေခဲ့သည်။ ‘ထာဝရဘုရားသခင်သည် ဣသရေလအမျိုးအဖို့ မိန့်တော်မူသော ကောင်းကျိုးတစ်စုံတစ်ပါးမျှမလျော့ ရှိသမျှတို့သည် ပြည့်စုံကြ၏’ ဟု ယောရှုဖော်ပြခဲ့သည်။—ယောရှု ၂၁:၄၅။
၇။ ဟေရှာယခေတ်က ဣသရေလလူအချို့သည် အဘယ်ရွေးချယ်မှုကို ပြုခဲ့ကြသနည်း။ ရလဒ်ကား အဘယ်နည်း။
၇ နောက်အနှစ် ၇၀၀ ခန့်ကြာသောအခါ ၎င်းနှင့်ခြားနားသည့်အခြေအနေမျိုးကို ဣသရေလပြည်တွင် တွေ့ရှိခဲ့ရ၏။ ယင်းကို သုံးသပ်ကြည့်ပါ။ ထိုအချိန်၌ ဣသရေလလူတို့သည် အယူမှားဓလေ့ထုံးစံများကို လိုက်လျှောက်နေကြ၏။ ဥပမာ နှစ်၏နောက်ဆုံးနေ့ရက်တွင် အရသာစုံလင်လှသော အစားအစာနှင့် ဝိုင်ချိုတို့ကို လူတို့ ဝိုင်းဖွဲ့စားသောက်လေ့ရှိကြသည်။ ၎င်းသည် မိသားစုမိတ်ဆုံစားပွဲမျှသာမဟုတ်ဘဲ အယူမှားနတ်ဘုရားနှစ်ပါးကို ဂုဏ်ပြုသည့် ဘာသာရေးအခမ်းအနားတစ်ခုဖြစ်သည်။ အဆိုပါသစ္စာမဲ့မှုအပေါ် ဘုရားသခင်၏အမြင်ကို ပရောဖက်ဟေရှာယက ဤသို့မှတ်တမ်းတင်ခဲ့သည်– ‘သင်တို့မူကား ထာဝရဘုရားသခင်ကို စွန့်ပစ်သောသူ ငါ၏သန့်ရှင်းသောတောင်ကို မေ့လျော့သောသူ ဂါဒနတ်ဘုရားရှေ့မှာ စားပွဲကိုခင်း၍ မေနိနတ်ဘုရားအား သွန်းလောင်းရာပူဇော်ရာယဇ်ကို ပြင်သောသူဖြစ်ကြ၏။’ တစ်နှစ်တာ၏သီးနှံဖြစ်ထွန်းမှုသည် ယေဟောဝါ၏ကောင်းချီးကြောင့်မဟုတ်ဘဲ ‘ဂါဒနတ်ဘုရား’ နှင့် ‘မေနိနတ်ဘုရား’ တို့၏ မျက်နှာသာကြောင့်ဖြစ်သည်ဟု သူတို့ယူမှတ်ကြသည်။ အမှန်မှာ သူတို့၏ပုန်ကန်မှုလမ်းစဉ်နှင့် လမ်းမှားကို တမင်တကာ ရွေးချယ်မှုတို့ကြောင့် ဆိုးကျိုးများ ခံစားခဲ့ကြရ၏။ “သင်တို့ကို ငါရေတွက်၍ ဓား၌အပ်မည်။ ရှိသမျှတို့သည် အသေသတ်ခြင်းကိုခံရအောင် ဦးချရကြလိမ့်မည်။ အကြောင်းမူကား သင်တို့သည် ငါခေါ်သောအခါ မထူးကြ။ ငါပြောသောအခါ နားမထောင်ကြ။ ငါ့မျက်မှောက်၌ မကောင်းသောအကျင့်ကိုကျင့်ကြ၏။ ငါမနှစ်သက်သောအရာကို ရွေးယူကြ၏။” (ဟေရှာယ ၆၅:၁၁၊ ၁၂) သူတို့၏ပညာမဲ့သောရွေးချယ်မှုကြောင့် ဖျက်ဆီးခံကြရ၏။ ဂါဒဘုရားနှင့် မေနိနတ်ဘုရားတို့သည် သူတို့ကို မကာကွယ်ပေးနိုင်ခဲ့ကြချေ။
မှန်ကန်စွာရွေးချယ်ခြင်း
၈။ တရားဟောရာ ၃၀:၂၀ အရ မှန်ကန်စွာရွေးချယ်ခြင်းတွင် အဘယ်အရာပါဝင်သနည်း။
၈ မောရှေသည် အသက်ကို ရွေးချယ်ရန် ဣသရေလလူမျိုးကို တိုက်တွန်းစဉ်က သူတို့လှမ်းသင့်သည့် ခြေလှမ်းသုံးလှမ်းကို ဤသို့ဖော်ပြခဲ့သည်– ‘သင်၏ဘုရားသခင် ယေဟောဝါကိုချစ်၍ စကားတော်ကို နားထောင်ပြီး ဆည်းကပ်မှီဝဲရမည်။’ (တရားဟောရာ ၃၀:၂၀) မှန်ကန်စွာရွေးချယ်နိုင်ရန် အချက်တစ်ချက်စီကို ဆန်းစစ်ကြည့်ကြစို့။
၉။ ယေဟောဝါကို ချစ်ကြောင်း မည်သို့ဖော်ပြနိုင်သနည်း။
၉ ကျွန်ုပ်တို့၏ဘုရားသခင် ယေဟောဝါကို ချစ်ခြင်းဖြင့်– ယေဟောဝါကို ကျွန်ုပ်တို့ ချစ်ကြသောကြောင့် ကိုယ်တော့်အား ဝတ်ပြုကိုးကွယ်ရန် ရွေးချယ်ကြခြင်းဖြစ်သည်။ ကျွန်ုပ်တို့သည် ဣသရေလခေတ်က သတိပေးပုံနမူနာများကို အလေးဂရုပြုပြီး ကိုယ်ကျင့်တရားပျက်ပြားစေသည့် သွေးဆောင်မှုအားလုံးကို ငြင်းပယ်ကာ ဤလောက၏ရုပ်ပစ္စည်းလိုက်စားမှုထောင်ချောက်ထဲ သက်ဆင်းမိစေနိုင်သည့် ဘဝပုံစံများကို ရှောင်ရှားကြ၏။ (၁ ကောရိန္သု ၁၀:၁၁; ၁ တိမောသေ ၆:၆-၁၀) ယေဟောဝါကို ဆည်းကပ်မှီဝဲပြီး ကိုယ်တော်၏စည်းမျဉ်းဥပဒေများကိုလည်း စောင့်ထိန်းကြသည်။ (ယောရှု ၂၃:၈; ဆာလံ ၁၁၉:၅၊ ၈) ကတိထားရာပြည်ထဲ ဣသရေလလူတို့မဝင်မီ မောရှေက သူတို့ကို ဤသို့တိုက်တွန်းခဲ့သည်– ‘သင်တို့သည် သွား၍ဝင်စားသောပြည်၌ ကျင့်စရာဖို့ ငါ၏ဘုရားသခင် ယေဟောဝါမှာထားတော်မူသည်အတိုင်း စီရင်ထုံးဖွဲ့တော်မူချက်တို့ကို သင်တို့အား ငါသွန်သင်ပြီ။ သို့ဖြစ်၍ ထိုပညတ်တရားတို့ကို ကျင့်စောင့်ကြလော့။ သို့ပြုလျှင် ထိုပညတ်တရားရှိသမျှတို့ကို ကြားရသောလူမျိုးများရှေ့မှာ သင်တို့၏ဉာဏ်ပညာသည် ထင်ရှားလိမ့်မည်။’ (တရားဟောရာ ၄:၅၊ ၆) ကျွန်ုပ်တို့၏ဘဝတွင် ယေဟောဝါ၏အလိုတော်ကို ရှေးဦးထားခြင်းဖြင့် ယေဟောဝါအားချစ်ကြောင်း ဖော်ပြရမည့်အချိန်သည် ယခုအချိန်ပင်ဖြစ်၏။ ထိုသို့ပြုရန် ကျွန်ုပ်တို့ ရွေးချယ်ကြမည်ဆိုလျှင် ဧကန်မုချ ကောင်းချီးခံစားကြရမည်။—မဿဲ ၆:၃၃။
၁၀-၁၂။ နောဧခေတ်က အဖြစ်အပျက်များကို သုံးသပ်ကြည့်ခြင်းအားဖြင့် အဘယ်သင်ခန်းစာများ ရရှိကြသနည်း။
၁၀ ဘုရားသခင်၏စကားတော်ကို နားထောင်ခြင်းဖြင့်– နောဧသည် “ဖြောင့်မတ်ခြင်းတရားကို ဟောသော” သူဖြစ်၏။ (၂ ပေတရု ၂:၅) ရေလွှမ်းမိုးခြင်းမတိုင်မီက လောကသားများသည် အာရုံပျံ့လွင့်နေပြီး နောဧ၏သတိပေးချက်များကို သတိမမူခဲ့ကြချေ။ ရလဒ်ကားအဘယ်နည်း။ ‘ရေလွှမ်းမိုးခြင်းရောက်သဖြင့် လူခပ်သိမ်းတို့သည် သုတ်သင်ပယ်ရှင်းခံခဲ့ရ၏။’ “လူသားကြွလာ” ချိန် ကျွန်ုပ်တို့ခေတ်တွင်လည်း ထိုနည်းတူဖြစ်ပျက်လိမ့်မည်ဟု ယေရှု သတိပေးခဲ့သည်။ နောဧခေတ်က အဖြစ်အပျက်သည် ယနေ့ ဘုရားသခင်၏သတင်းတရားကို အရေးမစိုက်ကြသူများအတွက် ပြင်းထန်သောသတိပေးချက်ဖြစ်သည်။—မဿဲ ၂၄:၃၉။
၁၁ ဘုရားသခင်၏မျက်မှောက်ခေတ်ကျေးကျွန်များ ကြေညာနေသော ဘုရားသခင့်သတိပေးချက်များကို ကဲ့ရဲ့လှောင်ပြောင်သူများသည် ထိုသတိပေးချက်များကို အရေးမစိုက်လျှင် အဘယ်ရလဒ်ဖြစ်ပေါ်လာမည်ကို သိထားသင့်သည်။ ထိုသို့ကဲ့ရဲ့လှောင်ပြောင်သူများနှင့်စပ်လျဉ်း၍ တမန်တော်ပေတရုက ဤသို့ဆိုသည်– ‘ရှေးကာလ၌ မိုးကောင်းကင်ကိုလည်းကောင်း ရေထဲကထွက်၍ ရေဖြင့်တည်သောမြေကြီးကိုလည်းကောင်း ဘုရားသခင်၏နှုတ်မြွက်စကားတော်သည် ဖြစ်စေတော်မူကြောင်းနှင့် ဖြစ်ဖူးသောလောကဓာတ်ကို ထိုသို့အားဖြင့် ရေနှင့်လွှမ်းမြှုပ်၍ ဖျက်ဆီးကြောင်းကို ထိုသူတို့သည် မှတ်မိချင်သောစိတ်မရှိကြ။ ယခုရှိသောမိုးကောင်းကင်နှင့် မြေကြီးမူကား တရားဆုံးဖြတ်၍ မကောင်းသောသူတို့ကို ဖျက်ဆီးသောနေ့ရက်တိုင်အောင် ထိုနှုတ်မြွက်စကားတော်အားဖြင့် သိုထားလျက်ရှိ၍ မီးရှို့ခြင်းအဖို့အလိုငှာ နေရစ်သတည်း။’—၂ ပေတရု ၃:၃-၇။
၁၂ နောဧနှင့် သူ၏မိသားစုသည် ထိုသူများနှင့်ခြားနားစွာ ရွေးချယ်ခဲ့ကြသည်။ ‘နောဧသည် မမြင်သေးသောအမှုအရာတို့ကို ဖော်ပြသော အနာဂတ်မိန့်မြွက်ချက်များကို ခံရပြီးမှ ယုံကြည်ခြင်းအားဖြင့် ကြောက်ရွံ့သောစိတ်ရှိ၍ သင်္ဘောကိုတည်လေ၏။’ သတိပေးချက်ကို နောဧအလေးဂရုပြုခဲ့သောကြောင့် သူ၏မိသားစုသည် ကယ်တင်ခြင်းရရှိခဲ့၏။ (ဟေဗြဲ ၁၁:၇) ကျွန်ုပ်တို့လည်း ဘုရားသခင်၏စကားကို အလျင်အမြန်ကြားနာပြီး ဂရုစိုက်လိုက်လျှောက်ကြစို့လေ။—ယာကုပ် ၁:၁၉၊ ၂၂-၂၅။
၁၃၊ ၁၄။ (က) ‘ယေဟောဝါအား ဆည်းကပ်မှီဝဲ’ ရန်အဘယ်ကြောင့် အရေးကြီးသနည်း။ (ခ) ‘ကျွန်ုပ်တို့၏အိုးထိန်းရှင်’ ယေဟောဝါ၏ပုံသွင်းမှုကို မည်သို့ခံယူသင့်သနည်း။
၁၃ ယေဟောဝါအား ဆည်းကပ်မှီဝဲခြင်းဖြင့်– ‘အသက်ရှင်စေမည့် အသက်တရားကို ရွေးယူ’ ရန်ကျွန်ုပ်တို့သည် ယေဟောဝါကို ချစ်ပြီး စကားတော်ကို နားထောင်ရမည်သာမက ‘ယေဟောဝါအား ဆည်းကပ်မှီဝဲ’ ကာ ကိုယ်တော်၏အလိုတော်ကို တစိုက်မတ်မတ်လုပ်ဆောင်ရမည်။ “သင်တို့သည် တည်ကြည်သောအားဖြင့် ကယ်တင်ခြင်းသို့ရောက်ကြလော့” ဟုယေရှုမိန့်ဆိုခဲ့သည်။ (လုကာ ၂၁:၁၉) ယင်းနှင့်ပတ်သက်၍ ကျွန်ုပ်တို့၏ရွေးချယ်မှုသည် ကျွန်ုပ်တို့၏နှလုံးအခြေအနေကို ဖော်ပြသည်။ “အစဉ်မပြတ်ကြောက်ရွံ့သောသူသည် မင်္ဂလာရှိ၏။ မိမိစိတ်နှလုံးကို ခိုင်မာစေသောသူမူကား ဘေးဥပဒ်နှင့်တွေ့လိမ့်မည်” ဟု နယပုံပြင် ၂၈:၁၄ ကဖော်ပြသည်။ ရှေးအီဂျစ်ရှင်ဘုရင်ဖာရောသည် ယင်း၏သာဓကတစ်ခုဖြစ်သည်။ အီဂျစ်ပြည်တွင် ကပ်ဘေးဆယ်ပါး တစ်ခုပြီးတစ်ခု ကျရောက်စဉ် ဖာရောသည် ဘုရားသခင်ကို ကြောက်ရွံ့
မည့်အစား နှလုံးခိုင်မာလာခဲ့သည်။ ယေဟောဝါသည် မာနကြီးသောရှင်ဘုရင် ဖာရောကို မနာခံသည့်လမ်းစဉ်သို့ မတွန်းပို့ဘဲ ရွေးချယ်ခွင့်ပေးခဲ့သည်။ မည်သို့ဆိုစေ ယေဟောဝါ၏အလိုတော် ပြီးပြည့်စုံခဲ့ကြောင်း ဖာရောနှင့်ပတ်သက်၍ ကိုယ်တော်၏ရှုမြင်ပုံကို တမန်တော်ပေါလု ဤသို့ဖော်ပြ၏– “ငါ့တန်ခိုးကို သင်၌ ငါပြခြင်းငှာလည်းကောင်း ငါ့နာမကို မြေကြီးတစ်ပြင်လုံးတွင် ကျော်စောစေခြင်းငှာလည်းကောင်း သင့်ကို ချီးမြှောက်ခဲ့ပြီ။”—ရောမ ၉:၁၇။
၁၄ ဖာရောလက်အောက်မှ ဣသရေလလူမျိုး လွတ်မြောက်လာပြီး နှစ်ပေါင်းများစွာအကြာတွင် ပရောဖက်ဟေရှာယက ဤသို့ပြောဆိုခဲ့သည်– ‘အိုထာဝရဘုရားသခင် ကိုယ်တော်သည် အကျွန်ုပ်တို့အဘဖြစ်တော်မူ၏။ အကျွန်ုပ်တို့သည် အိုးမြေဖြစ်ပါ၏။ ကိုယ်တော်သည် အကျွန်ုပ်တို့၏အိုးထိန်းဖြစ်တော်မူ၏။ အကျွန်ုပ်တို့ရှိသမျှသည် လက်တော်နှင့် ဖန်ဆင်းသောအရာဖြစ်ပါ၏။’ (ဟေရှာယ ၆၄:၈) ကျွန်ုပ်တို့သည် သမ္မာကျမ်းစာကို ကိုယ်ပိုင်လေ့လာမှုပြုပြီး လက်တွေ့ကျင့်သုံးခြင်းအားဖြင့် ယေဟောဝါ၏ပုံသွင်းမှုကို ခံယူသောအခါ လူသစ်ကို တဖြည်းဖြည်း ယူတင်ဝတ်ဆင်လာကြ၏။ ထိုအခါ ကျွန်ုပ်တို့သည် ပို၍သိမ်မွေ့ပျော့ပျောင်းလာရာ ကိုယ်တော်အား သစ္စာရှိစွာ ဆည်းကပ်မှီဝဲရန် သာ၍လွယ်ကူလာသည်။ ထိုသို့ဆည်းကပ်ရခြင်းမှာ ယေဟောဝါ၏မျက်နှာသာတော် ရလိုသောကြောင့်ဖြစ်သည်။—ဧဖက် ၄:၂၃၊ ၂၄; ကောလောသဲ ၃:၈-၁၀။
‘ထိုအရာတို့ကို သွန်သင်ကြရမည်’
၁၅။ တရားဟောရာ ၄:၉ အရ မောရှေသည် ဣသရေလလူမျိုး ထမ်းဆောင်ရမည့် အဘယ်တာဝန်နှစ်မျိုးနှစ်စားအကြောင်း သတိပေးခဲ့သနည်း။
၁၅ မောရှေသည် ကတိထားရာပြည်ထဲဝင်ရန် စုဝေးနေသော ဣသရေလလူမျိုးကို ဤသို့ပြောဆိုခဲ့သည်– “ကိုယ်တိုင်မြင်သောအမှုအရာတို့ကို မမေ့မလျော့။ နောက်တစ်သက်လုံး နှလုံးသွင်းနိုင်မည်အကြောင်း ကိုယ်ကိုကိုယ်သတိပြုကြလော့။ ကိုယ်စိတ်နှလုံးကို ကြိုးစား၍ စောင့်ရှောက်ကြလော့။ ထိုအရာတို့ကို သားမြေးတို့အားလည်း သွန်သင်ကြလော့။” (တရားဟောရာ ၄:၉) သူတို့အမွေခံရတော့မည့် ထိုပြည်တွင် ယေဟောဝါ၏ကောင်းချီး ခံစားရပြီး ကြီးပွားရန် သူတို့၏ဘုရားသခင် ယေဟောဝါ၏ရှေ့မှောက်တော်တွင် ထမ်းဆောင်ရမည့်တာဝန် နှစ်မျိုးနှစ်စားရှိသည်။ သူတို့တွေ့မြင်ခဲ့သော ယေဟောဝါ၏အံ့ဖွယ်အမှုများကို အမြဲသတိရနေပြီး နောင်လာနောက်သားများကို သွန်သင်ပေးကြရမည်ဖြစ်သည်။ ယနေ့ ဘုရားသခင့်လူမျိုးအနေနှင့် ကျွန်ုပ်တို့သည် ‘အသက်ရှင်ရန် အသက်တရားကို ရွေးချယ်’ လိုလျှင် ထိုနည်းတူပြုလုပ်ကြရမည်။ ကျွန်ုပ်တို့အကျိုးအတွက် ယေဟောဝါပြုလုပ်ပေးခဲ့သည့် အဘယ်အရာများကို တွေ့မြင်ခဲ့ကြပြီနည်း။
၁၆၊ ၁၇။ (က) ဂိလဒ်ကျောင်းဆင်း ခရစ်ယာန်သာသနာပြုများသည် ဘုရားသခင့်နိုင်ငံတော်ဟောပြောခြင်းလုပ်ငန်းတွင် အဘယ်အရာများ ပြီးမြောက်စေခဲ့ကြသနည်း။ (ခ) မဆုတ်မနစ်ဇွဲရှိကြသည့် မည်သူတို့ကို သင်သိသနည်း။
၁၆ ကျွန်ုပ်တို့၏ဟောပြောခြင်းနှင့် တပည့်ဖြစ်စေခြင်းလုပ်ငန်းအပေါ် ယေဟောဝါ ကောင်းချီးပေးနေပုံကို တွေ့မြင်ရသည့်အခါ ကျွန်ုပ်တို့ ဝမ်းသာပီတိဖြစ်ကြသည်။ ၁၉၄၃ ခုနှစ်တွင် ဂိလဒ် ကင်းမျှော်စင် သမ္မာကျမ်းစာကျောင်း ဖွင့်ပြီးကတည်းက ခရစ်ယာန်သာသနာပြုများသည် နိုင်ငံများစွာတွင် တပည့်ဖြစ်စေခြင်းလုပ်ငန်းကို ဦးစီးဦးဆောင်ခဲ့ကြသည်။ ဤကျောင်းမှ ကျောင်းသားဟောင်းများသည် ယခု အသက်အရွယ်အိုမင်းနေကြပြီး ကျန်းမာရေးချို့တဲ့နေကြသော်လည်း ယနေ့ထိတိုင် ဘုရားသခင့်နိုင်ငံတော်သတင်းကို စိတ်ထက်သန်စွာ ဟောပြောနေကြဆဲပင်။ ပုံသက်သေကောင်းသူတစ်ဦးမှာ ၁၉၄၄ ခုနှစ်က ဂိလဒ်ကျောင်းဆင်းဖြစ်သူ မေရီ အိုလ်ဆင်ဖြစ်သည်။ သူသည် ဦးဆုံး ယူရုဂွေးနိုင်ငံ ထို့နောက် ကိုလံဘီယာ ယခု ပွာတီရီကိုအစရှိသော နိုင်ငံများတွင် ခရစ်ယာန်သာသနာပြုခဲ့သည်။ ညီအစ်မအိုလ်ဆင်သည် ဇရာထောင်းမှုကြောင့် အကန့်အသတ်သာလုပ်ဆောင်နိုင်သော်လည်း ဟောပြောခြင်းအပေါ် သူ၏စိတ်ထက်သန်မှု မလျော့နည်းသေးချေ။ စပိန်ဘာသာစကား တတ်ထားသည့်အတွက် ဒေသခံကြေညာသူများနှင့်အတူ လယ်ကွင်းဓမ္မမှုတွင် အပတ်စဉ်ပါဝင်ရန် အချိန်ဇယားဆွဲထား၏။
၁၇ ၁၉၄၇ ခုနှစ်က ဂိလဒ်ကျောင်းဆင်းခဲ့သူ ယခု မုဆိုးမဖြစ်နေရှာသော နန်စီ ပေါ်တာသည် ဗဟားမားစ်ကျွန်းစုတွင် အမှုဆောင်နေဆဲရှိသည်။ သူသည်လည်း ဟောပြောခြင်းလုပ်ငန်းတွင် အလုပ်များနေသော ခရစ်ယာန်သာသနာပြုတစ်ဦးဖြစ်သည်။ ညီအစ်မပေါ်တာက “အခြားသူတွေကို ကျမ်းစာအမှန်တရားသင်ပေးရတာ အရမ်းပျော်စရာကောင်းတယ်။ အဲ့ဒီဝိညာဉ်ရေးလုပ်ရိုးလုပ်စဉ်ကြောင့် ကျွန်မဘဝဟာ စည်းစနစ်ရှိပြီး တည်ငြိမ်နေတာ” ဟုသူ၏ဘဝအတ္ထုပ္ပတ္တိတွင် ဖော်ပြခဲ့သည်။ * ညီအစ်မပေါ်တာနှင့် တခြားသစ္စာရှိကျေးကျွန်များသည် သူတို့၏ အတိတ်ကို ပြန်ပြောင်းကြည့်လိုက်လျှင် ယေဟောဝါ ပြုလုပ်ပေးခဲ့သမျှကို သူတို့မမေ့နိုင်ကြချေ။ ကျွန်ုပ်တို့ကော အသို့နည်း။ ကျွန်ုပ်တို့အရပ်ဒေသတွင် ဘုရားသခင့်နိုင်ငံတော်လုပ်ငန်းအပေါ် ယေဟောဝါ ကောင်းချီးပေးခဲ့ပုံကို ကျေးဇူးတင်လေးမြတ်ကြသလော။—ဆာလံ ၆၈:၁၁။
၁၈။ ခရစ်ယာန်သာသနာပြုများ၏ ဘဝအတ္ထုပ္ပတ္တိများကို ဖတ်ရှုခြင်းမှ အဘယ်သင်ခန်းစာရရှိနိုင်သနည်း။
၁၈ အဆိုပါသက်တမ်းကြာအမှုဆောင်များ ထမ်းဆောင်ခဲ့သမျှနှင့် ထမ်းဆောင်နေဆဲရှိ အရာများကို ကျွန်ုပ်တို့ အလွန်အားရကြသည်။ သူတို့၏ဘဝအတ္ထုပ္ပတ္တိများက ကျွန်ုပ်တို့ကို အားရှိစေသည်။ အကြောင်းမှာ အဆိုပါသစ္စာရှိသူများအတွက် ယေဟောဝါ ပြုလုပ်ပေးခဲ့ရာများကို ကျွန်ုပ်တို့သိရှိရသောအခါ ယေဟောဝါ၏အမှုတော်ကို ထမ်းဆောင်ချင်စိတ် ပိုခိုင်မာလာစေသောကြောင့်ဖြစ်သည်။ ကင်းမျှော်စင်တွင်ပါသည့် ဤအားရှိစရာမှတ်တမ်းများကို မှန်မှန်ဖတ်ရှုပြီး တွေးတောဆင်ခြင်ဖူးသလော။
၁၉။ ခရစ်ယာန်မိဘများသည် ကင်းမျှော်စင်တွင် ဖော်ပြထားသော ဘဝအတ္ထုပ္ပတ္တိများကို မည်သို့ကောင်းစွာအသုံးချနိုင်သနည်း။
၁၉ မိမိတို့အတွက် ယေဟောဝါပြုလုပ်ပေးခဲ့သမျှကို မမေ့လျော့ဘဲ တစ်သက်လုံး နှလုံးသွင်းထားရန် ဣသရေလလူတို့ကို မောရှေ သတိပေးသည်။ ထို့နောက် ဤသို့ထပ်ဆင့်ပြောဆိုသည်– “ထိုအရာတို့ကို သားမြေးတို့အားလည်း သွန်သင်ကြလော့။” (တရားဟောရာ ၄:၉) ဘဝအတ္ထုပ္ပတ္တိများသည် အထူးစိတ်ဝင်စားစရာကောင်း၏။ လူငယ်များသည် စံနမူနာကောင်းသူများအကြောင်း သိထားဖို့လိုအပ်သည်။ တစ်ကိုယ်ရေညီအစ်မများသည် ကင်းမျှော်စင်တွင် ဖော်ပြထားသော သစ္စာရှိပြီး ပုံသက်သေကောင်းသည့် သက်ကြီးအိုရွယ်ညီအစ်မများ၏ ဘဝအတ္ထုပ္ပတ္တိများမှ သင်ခန်းစာယူနိုင်ကြသည်။ မိမိတို့၏ဇာတိမြေရှိ ဘာသာခြားစကားပြောရပ်ကွက်တွင် အမှုဆောင်ခွင့်ရသော ညီအစ်ကို ညီအစ်မများသည် သတင်းကောင်းဟောပြောခြင်းလုပ်ငန်းတွင် အလုပ်များနေကြသည်။ ခရစ်ယာန်မိဘတို့ သင်တို့၏သားသမီးများအား အချိန်ပြည့်လုပ်ငန်းတော်တွင် ပါဝင်လိုစိတ်ရှိလာစေရန် သစ္စာရှိဂိလဒ်ကျောင်းဆင်းများနှင့် အခြားသူများ၏ တွေ့ကြုံမှုတို့ကို ပြောပြပါလေ။
၂၀။ “အသက်တရားကို ရွေးယူ” ရန် အဘယ်အရာပြုလုပ်ရမည်နည်း။
၂၀ သို့ဖြစ်၍ ကျွန်ုပ်တို့တစ်ဦးစီသည် “အသက်တရားကို” မည်သို့ “ရွေးချယ်” နိုင်ကြသနည်း။ ယေဟောဝါအား ကျွန်ုပ်တို့ချစ်ကြောင်း ဖော်ပြရန် အလွန်ထူးမြတ်သော ဆုကျေးဇူးဖြစ်သည့် လွတ်လပ်စွာလုပ်ပိုင်ခွင့်ကို အသုံးပြုခြင်းအားဖြင့်ဖြစ်သည်။ ထို့ပြင် ကိုယ်တော်၏အမှုတော်ဆောင်ခွင့် ရရှိထားသရွေ့ကာလပတ်လုံး အမှုတော်တွင် အတတ်နိုင်ဆုံးပါဝင်ခြင်းအားဖြင့်ဖြစ်သည်။ အကြောင်းမှာ မောရှေဆိုသည့်အတိုင်း ယေဟောဝါသည် ကျွန်ုပ်တို့ကို “အသက်ရှင်ခြင်းအကျိုး အသက်တာရှည်ခြင်းအကျိုးကို ပေးတော်မူသော” ကြောင့်ဖြစ်၏။—တရားဟောရာ ၃၀:၁၉၊ ၂၀။
[အောက်ခြေမှတ်ချက်များ]
^ အပိုဒ်၊ 17 ၂၀၀၁ ဇွန် ၁ ရက်ထုတ် ကင်းမျှော်စင် စာမျက်နှာ ၂၃-၇ တွင်ဖော်ပြထားသော “ကြေကွဲဖွယ်ဆုံးရှုံးမှုကြား ရွှင်လန်းပြီး ကျေးဇူးတင်” ဆောင်းပါးကိုရှု။
[လေ့လာရန်မေးခွန်းများ]
သင်မှတ်မိသလော
• ကျွန်ုပ်တို့သုံးသပ်ခဲ့သည့် ရွေးချယ်မှုမတူသော ပုံနမူနာများမှ အဘယ်သင်ခန်းစာ ရရှိခဲ့ကြသနည်း။
• ကျွန်ုပ်တို့သည် “အသက်တရားကို ရွေးယူ” ရန် အဘယ်ခြေလှမ်းများ လှမ်းရမည်နည်း။
• အဘယ်တာဝန်နှစ်မျိုးနှစ်စားကို ကျွန်ုပ်တို့
ထမ်းဆောင်ကြရန် တိုက်တွန်းထားသနည်း။
[စာမျက်နှာ ၂၆ ပါ ရုပ်ပုံ]
“အသက်ရှင်ခြင်း သေခြင်း . . . တို့ကို သင့်ရှေ့၌ ငါထားသည်”
[စာမျက်နှာ ၂၉ ပါ ရုပ်ပုံ]
နောဧနှင့် သူ၏မိသားစုသည် ဘုရားသခင်၏စကားကိုနားထောင်သောကြောင့် ကယ်တင်ခြင်းရရှိခဲ့
[စာမျက်နှာ ၃၀ ပါ ရုပ်ပုံ]
မေရီ အိုလ်ဆင်
[စာမျက်နှာ ၃၀ ပါ ရုပ်ပုံ]
နန်စီ ပေါ်တာ