“အဦးမှစ၍ အဆုံးတိုင်အောင်” ယေဟောဝါဖော်ပြ
“အဦးမှစ၍ အဆုံးတိုင်အောင်” ယေဟောဝါဖော်ပြ
‘အဦးမှစ၍ အဆုံးတိုင်အောင်လည်းကောင်း၊ ရှေးကာလမှစ၍ မဖြစ်သေးသောအမှုအရာတို့ကိုလည်းကောင်းဖော်ပြတော်မူသောအရှင်ဖြစ်၏။’—ဟေရှာယ ၄၆:၁၀။
၁၊ ၂။ ဗာဗုလုန်ကျရှုံးခြင်းနှင့်ဆက်စပ်သည့် အဖြစ်အပျက်များနှင့်စပ်လျဉ်း၍ အဘယ်အရာက ထူးခြားသနည်း။ ယင်းအချက်က ယေဟောဝါအကြောင်း အဘယ်အရာဖော်ပြသနည်း။
ညအမှောင်ထုတွင် ရန်သူစစ်သားများသည် ခိုင်ခံ့သောဗာဗုလုန်မြို့ကြီးသို့ ဦးတည်၍ ဥဖရတ်မြစ်ကြမ်းပြင်အတိုင်း တိတ်တဆိတ် ချီတက်လာနေကြသည်။ မြို့ဝင်ပေါက်အနီးသို့ ရောက်လာသောအခါ သူတို့ အံ့အားသင့်သွားကြသည်။ ဗာဗုလုန်တံတိုင်းရှိ ဧရာမတံခါးရွက်နှစ်ရွက်သည် ပွင့်လျက်သားရှိ၏။ သို့နှင့် မြစ်ကြမ်းပြင်မှတက်၍ မြို့ထဲသို့ ဝင်သွားကြသည်။ ထိုမြို့သည် လျှပ်တစ်ပြက် ကျဆုံးသွားလေ၏။ သူတို့ခေါင်းဆောင်ကုရုသည် ထိုတိုင်းပြည်ကို ချက်ချင်းသိမ်းပိုက်ပြီး နောက်ပိုင်းတွင် ဣသရေလသုံ့ပန်းများကို လွှတ်ရန် အမိန့်ထုတ်ပြန်လိုက်သည်။ ထောင်နှင့်ချီသောပြည်နှင်ဒဏ်ခံရသူများသည် ဇာတိမြေသို့ ပြန်သွားပြီး ယေရုရှလင်မြို့တွင် ယေဟောဝါ၏ဝတ်ပြုရေးကို ပြန်လည်ထူထောင်ကြသည်။—၂ ရာဇဝင်ချုပ် ၃၆:၂၂၊ ၂၃; ဧဇရ ၁:၁-၄။
၂ ဘီစီ ၅၃၉-၅၃၇ ခုနှစ်က အဆိုပါအဖြစ်အပျက်များ မှန်ကန်ကြောင်း သမိုင်းပညာရှင်များ ယခု ထောက်ခံကြသည်။ ထူးခြားသည်မှာ ထိုအဖြစ်အပျက်များကို အနှစ် ၂၀၀ ခန့်ကတည်းက ကြိုသိထားခြင်းဖြစ်၏။ ယေဟောဝါသည် ဗာဗုလုန်ကျရှုံးခြင်းအကြောင်းကို မိမိ၏ပရောဖက်ဟေရှာယအား ထိုမျှကြာရှည်စွာ ကြိုတင်ဖော်ပြစေခဲ့သည်။ (ဟေရှာယ ၄၄:၂၄–၄၅:၇) ဗာဗုလုန်ကျရှုံးခြင်းနှင့်ဆက်စပ်သည့် အခြေအနေများကိုသာမက အနိုင်ယူသိမ်းပိုက်မည့် ခေါင်းဆောင်၏အမည်ကိုပါ ဘုရားသခင် ဖော်ပြခဲ့သည်။ * ထိုအချိန်က မိမိ၏သက်သေများဖြစ်သော ဣသရေလလူတို့ကို ယေဟောဝါ ဤသို့မိန့်ဆို၏– ‘ရှေးကာလ၌ဖြစ်ဖူးသော အမှုအရာတို့ကို အောက်မေ့ကြလော့။ ငါသည် ဘုရားသခင်ဖြစ်၏။ ငါမှတစ်ပါး အခြားသောဘုရားသခင်မရှိ။ အဦးမှစ၍ အဆုံးတိုင်အောင်လည်းကောင်း၊ ရှေးကာလမှစ၍ မဖြစ်သေးသောအမှုအရာတို့ကိုလည်းကောင်း ဖော်ပြ’ တော်မူသောအရှင်ဖြစ်၏။ (ဟေရှာယ ၄၆:၉၊ ၁၀က) ယေဟောဝါသည် ဖြစ်ပျက်လာမည့်အရာကို ကြိုသိနိုင်တော်မူသော ဘုရားသခင်ဖြစ်တော်မူ၏။
၃။ ယခု အဘယ်မေးခွန်းများ၏ အဖြေများကို သုံးသပ်ကြမည်နည်း။
၃ ဘုရားသခင်သည် အနာဂတ်အကြောင်း မည်မျှသိရှိထားသနည်း။ ကျွန်ုပ်တို့တစ်ဦးချင်းစီ ပြုလုပ်မည့်အရာကို ယေဟောဝါ ကြိုသိသလော။ ကျွန်ုပ်တို့၏အနာဂတ်ကို တင်ကြိုပြဋ္ဌာန်းထားသလော။ ဤဆောင်းပါးနှင့် နောက်ဆောင်းပါးတွင် အဆိုပါမေးခွန်းများအပြင် ယင်းတို့နှင့်ဆက်စပ်သည့် မေးခွန်းများ၏ ကျမ်းစာအဖြေများကို ကျွန်ုပ်တို့ သုံးသပ်ကြမည်။
ပရောဖက်ပြုရှင် ယေဟောဝါဘုရားသခင်
၄။ သမ္မာကျမ်းစာတွင် မှတ်တမ်းတင်ထားသည့် ပရောဖက်ပြုချက်များ၏ ရင်းမြစ်ကား မည်သူနည်း။
၄ အနာဂတ်ကို ကြိုသိနိုင်သော ယေဟောဝါသည် ကျမ်းစာခေတ်က မိမိကျေးကျွန်များအား ပရောဖက်ပြုချက်များစွာကို မှတ်တမ်းတင်စေခဲ့သည်။ ထို့ကြောင့် ယေဟောဝါသည် အဘယ်အရာကို ပြုလုပ်ရန် ရည်ရွယ်ထားကြောင်း ကျွန်ုပ်တို့ ကြိုတင်သိရှိခွင့်ရကြသည်။ ယေဟောဝါ ဤသို့မိန့်ဆို၏– “အရင်ဟောသောအရာတို့သည် ဖြစ်ကြပြီ။ အသစ်သောအရာတို့ကို ယခု ငါဟော၏။ မပေါ်လာမီ သင်တို့အား ငါပြနှင့်၏။” (ဟေရှာယ ၄၂:၉) ဘုရားသခင်၏လူတို့သည် အခွင့်ထူးလိုက်လေခြင်း။
၅။ ယေဟောဝါလုပ်ဆောင်မည့်အရာကို ကြိုသိရှိခြင်းနှင့်ဒွန်တွဲ၍ အဘယ်တာဝန်လိုက်ပါလာသနည်း။
၅ ပရောဖက်အာမုတ်က ကျွန်ုပ်တို့ကို ဤသို့စိတ်ချစေသည်– ‘အရှင်ထာဝရဘုရားသခင်သည် မိမိကျွန်ပရောဖက်တို့အား မဖော်မပြဘဲ အဘယ်အမှုကိုမျှ စီရင်တော်မမူ။’ ယင်းသို့ကြိုတင်သိရှိမှုနှင့်အတူ တာဝန်ပါ ဒွန်တွဲလိုက်ပါလာ၏။ အာမုတ် ဆက်အသုံးပြုလိုက်သည့် ထိမိပိုင်နိုင်သော ဤဥပမာကို သတိပြုပါ– “ခြင်္သေ့ဟောက်သောအခါ အဘယ်သူမျှ မကြောက်မလန့်ဘဲ နေလိမ့်မည်နည်း။” ခြင်္သေ့ဟောက်သံကြောင့် အနီးပတ်ဝန်းကျင်ရှိ လူနှင့်တိရစ္ဆာန်တို့ ချက်ချင်းတုံ့ပြန်တတ်သည့်အလား အာမုတ်ကဲ့သို့ပင် အခြားပရောဖက်များသည်လည်း ယေဟောဝါ၏မိန့်တော်မူချက်များကို ချက်ချင်းကြေညာခဲ့ကြသည်။ ‘အရှင်ထာဝရဘုရားသခင် မိန့်တော်မူသောအခါ အဘယ်သူသည် ပရောဖက်မပြုဘဲနေလိမ့်မည်နည်း။’—အာမုတ် ၃:၇၊ ၈။
ယေဟောဝါ၏ “စကား” တော်ဧကန်အမှန် ‘ပြည့်စုံမည်’
၆။ ဗာဗုလုန်ကျရှုံးခြင်းနှင့်စပ်လျဉ်း၍ ယေဟောဝါ၏ “အကြံ” သည် အဘယ်နည်းဖြင့် ဖြစ်မြောက်ခဲ့သနည်း။
၆ မိမိ၏ပရောဖက်ဟေရှာယမှတစ်ဆင့် ယေဟောဝါက “ငါ့အကြံတည်လိမ့်မည်။ ငါ့အလိုရှိသမျှကို ငါပြည့်စုံစေမည်” ဟုမိန့်ဆိုခဲ့သည်။ (ဟေရှာယ ၄၆:၁၀ခ) ဗာဗုလုန်နှင့်ပတ်သက်၍ ဘုရားသခင်၏ “အကြံ” ဖြစ်သည့် ကိုယ်တော့်အလိုတော် သို့မဟုတ် ရည်ရွယ်ချက်မှာ ပါရှားပြည်မှ ကုရုကို ခေါ်ထုတ်ပြီး ဗာဗုလုန်ကို ဝင်ရောက်သိမ်းပိုက်စေရန်ဖြစ်သည်။ ယေဟောဝါသည် ထိုရည်ရွယ်ချက်ကို ကြာမြင့်စွာကတည်းက တင်ကြိုမိန့်ဆိုခဲ့၏။ ဖော်ပြခဲ့သည့်အတိုင်း ဘီစီ ၅၃၉ ခုနှစ်တွင် ထိုသို့ပင်ဖြစ်ပျက်ခဲ့သည်။
၇။ ယေဟောဝါ၏ “စကား” တော် အမြဲပြည့်စုံသည်ကို အဘယ်ကြောင့် ယုံကြည်စိတ်ချနိုင်သနည်း။
၇ ဗာဗုလုန်ပြည်ကို ကုရုမသိမ်းပိုက်မီ လေးရာစုနီးပါးက ယုဒရှင်ဘုရင်ယောရှဖတ်သည် အမ္မုန်နှင့်မောဘ တပ်ပေါင်းစုနှင့် ရင်ဆိုင်ခဲ့ရသည်။ ထိုအခါ သူသည် ယုံကြည်စိတ်ချစွာ ဤသို့ဆုတောင်းခဲ့သည်– ‘ဘိုးဘေးတို့၏ဘုရားသခင် ယေဟောဝါ၊ ကိုယ်တော်သည် ကောင်းကင်ဘုံ၏အရှင် ဘုရားသခင်ဖြစ်တော်မူသည်မဟုတ်လော။ တစ်ပါးအမျိုးသားနေရာ တိုင်းနိုင်ငံရှိသမျှတို့ကို အစိုးရတော်မူသည်မဟုတ်လော။ အဘယ်သူမျှ မဆီးတားနိုင်အောင် ခွန်အားတန်ခိုးကြီးတော်မူသည်မဟုတ်လော။’ (၂ ရာဇဝင်ချုပ် ၂၀:၆) ဟေရှာယသည် ထိုနည်းတူယုံကြည်စိတ်ချကြောင်း ဤသို့ဖော်ပြခဲ့သည်– ‘ကောင်းကင်ဗိုလ်ခြေအရှင် ထာဝရဘုရားသခင်၏အကြံတော်ကို အဘယ်သူဖျက်လိမ့်မည်နည်း။ ဆန့်တော်မူသောလက်တော်ကို အဘယ်သူလှန်လိမ့်မည်နည်း။’ (ဟေရှာယ ၁၄:၂၇) ဗာဗုလုန်ရှင်ဘုရင် နေဗုခဒ်နေဇာ ရူးသွပ်ပြီးနောက် ပြန်ကောင်းလာချိန်တွင် ဤသို့နှိမ့်ချစွာ အသိအမှတ်ပြုခဲ့သည်– “[ဘုရားသခင်၏] လက်တော်ကို အဘယ်သူမျှ မဆီးတားနိုင်။ အဘယ်သို့ပြုသနည်းဟု ကိုယ်တော်ကို ဆိုနိုင်သောသူမရှိ။” (ဒံယေလ ၄:၃၅) မှန်ပါ၏၊ မိမိ၏လူတို့ကို ယေဟောဝါ ဤသို့အာမခံသည်– “ငါ၏ . . . စကားသည် . . . အကျိုးမရှိဘဲ ငါ့ထံသို့မပြန်ရ။ ငါ့အလိုကို ပြည့်စုံစေမည်။ ငါစေခိုင်းသောအမှု၌ အောင်လိမ့်မည်။” (ဟေရှာယ ၅၅:၁၁) ယေဟောဝါ၏ “စကား” တော်သည် အမြဲပင်ပြည့်စုံလာမည်ကို ကျွန်ုပ်တို့ လုံးလုံးလျားလျား ယုံကြည်စိတ်ချနိုင်ကြသည်။ ဘုရားသခင်၏ရည်ရွယ်တော်မူချက်သည် ဧကန်အမှန် ပြည့်စုံလာလိမ့်မည်။
ဘုရားသခင်၏ “ထာဝရအကြံတော်”
၈။ ဘုရားသခင်၏ “ထာဝရအကြံတော်” ကားအဘယ်နည်း။
၈ ဧဖက်ခရစ်ယာန်များထံ ရေးလိုက်သောစာတွင် တမန်တော်ပေါလုက ဘုရားသခင်၌ “ထာဝရအကြံတော်ရှိသည်” ဟုဖော်ပြထားသည်။ (ဧဖက် ၃:၁၁) ဘုရားသခင်သည် မိမိမည်သို့ပြုလုပ်မည်ကို အသေးစိတ်အစီအစဉ်ဆွဲရန် မလိုအပ်သောကြောင့် ယင်းသည် လုပ်ငန်းအစီအစဉ်တစ်ခုကို မဆိုလိုပေ။ ယင်းအစား၊ လူသားနှင့် ကမ္ဘာမြေအတွက် ယေဟောဝါ၏မူလရည်ရွယ်ချက်ကို အကောင်အထည်ဖော်ရန် ကိုယ်တော်၏ဆုံးဖြတ်ချက်ကို ရည်ညွှန်းခြင်းဖြစ်သည်။ (ကမ္ဘာဦး ၁:၂၈) ကိုယ်တော်၏ရည်ရွယ်ချက် ဧကန်အမှန်ဖြစ်လာခြင်းကို သဘောပေါက်နိုင်ရန် သမ္မာကျမ်းစာတွင် မှတ်တမ်းတင်ထားသော ပထမဦးဆုံး ပရောဖက်ပြုချက်ကို သုံးသပ်ကြည့်ပါ။
၉။ ကမ္ဘာဦး ၃:၁၅ သည် ဘုရားသခင်၏ရည်ရွယ်ချက်နှင့် မည်သို့ဆက်စပ်နေသနည်း။
၉ ကမ္ဘာဦး ၃:၁၅ ပါ ကတိတော်အရ အာဒံနှင့်ဧဝတို့ အပြစ်ပြုပြီးသည်နှင့် ယေဟောဝါသည် မိမိ၏ပုံဆောင်မိန်းမမှ မျိုးနွယ်တော် သို့မဟုတ် သားတော် မွေးဖွားစေရန် ဆုံးဖြတ်လိုက်၏။ မိမိ၏မိန်းမနှင့် စာတန်စပ်ကြား၊ သူတို့၏မျိုးနွယ်များစပ်ကြား ရန်ငြိုးရှိလာကြမည်ကိုလည်း ကြိုမြင်တော်မူသည်။ ယေဟောဝါသည် မိန်းမမျိုးနွယ်၏ဖနောင့်ကို ကြိတ်ခွင့်ပြုမည်ဖြစ်သော်လည်း မိမိသတ်မှတ်ထားသောအချိန်တွင် ထိုမျိုးနွယ်သည် မြွေတည်းဟူသော စာတန်၏ခေါင်းကို ကြိတ်လိမ့်မည်။ ထိုအတွင်း ရွေးချယ်ထားသော ဆွေစဉ်မျိုးဆက်မှ ကတိထားရာမေရှိယ ယေရှုပေါ်ထွန်းသည့်အထိ ယေဟောဝါ၏ရည်ရွယ်ချက် တဖြည်းဖြည်း အကောင်အထည်ပေါ်လာသည်။—လုကာ ၃:၁၅၊ ၂၃-၃၈; ဂလာတိ ၄:၄၊ ၅။
ယေဟောဝါ တင်ကြိုစီမံထားရာ
၁၀။ အာဒံနှင့်ဧဝတို့ အပြစ်ပြုရန် အစကတည်းက ယေဟောဝါ တင်ကြိုစီမံထားသလော။ ရှင်းပြပါ။
၁၀ ဘုရားသခင့်ရည်ရွယ်ချက်တွင် ယေရှု၏အခန်းကဏ္ဍနှင့်ပတ်သက်၍ တမန်တော်ပေတရုက ဤသို့ရေးသားခဲ့သည်– “ခရစ်တော်ကို ဤကမ္ဘာမတည်မရှိမီ ကြိုတင်မှတ်သား၍ထားတော်မူနှင့်သော်လည်း . . . သင်တို့အဖို့ ဤနောက်ဆုံးသောကာလ၌ ထင်ရှားတော်မူ၏။” (၁ ပေတရု ၁:၂၀၊ သမ္မာ) အာဒံနှင့်ဧဝတို့ အပြစ်ပြုလိမ့်မည်၊ ၎င်းနောက် ယေရှုခရစ်၏ရွေးနုတ်ဖိုးပူဇော်ရာယဇ် လိုအပ်လာလိမ့်မည်ဟု အစကတည်းက ယေဟောဝါ တင်ကြိုစီမံထားသလော။ မစီမံထားပါ။ ‘တည်ရှိ’ ဟုပြန်ဆိုသော ဂရိစကားလုံး၏စာသားအတိုင်း အဓိပ္ပာယ်မှာ “မျိုးနွယ်တော်ပေါ်ထွက်ခြင်း” ဖြစ်သည်။ အာဒံနှင့်ဧဝတို့ အပြစ်မပြုမီကပင် “မျိုးနွယ်တော် ပေါ်ထွက်” သလော။ တစ်နည်းအားဖြင့် ကိုယ်ဝန်ဆောင်ခြင်းရှိခဲ့သလော။ မရှိပါ။ အာဒံနှင့်ဧဝတို့သည် နာခံမှုမရှိသောလုပ်ရပ်ကို ပြုပြီးနောက်မှသာ သားဖွားခဲ့၏။ (ကမ္ဘာဦး ၄:၁) ထို့ကြောင့် ယေဟောဝါအား အာဒံနှင့်ဧဝတို့ ဖီဆန်ပြီး သားသမီးမထွန်းကားမီ “အမျိုးအနွယ်” ပေါ်ထွန်းရန် ကိုယ်တော် တင်ကြိုစီမံခဲ့ခြင်းဖြစ်သည်။ ယေရှု၏သေခြင်းနှင့် ရှင်ပြန်ထမြောက်ခြင်းတို့ကြောင့် မေတ္တာပါ ရွေးနုတ်ဖိုးအစီအစဉ် ဖြစ်မြောက်လာ၏။ ယင်းဖြင့် အမွေရထားသောအပြစ်နှင့် စာတန်၏ကြိုးပမ်းမှုအားလုံး ပယ်ဖျက်ခံရလိမ့်မည်။—မဿဲ ၂၀:၂၈; ဟေဗြဲ ၂:၁၄၊ ၁၅; ၁ ယောဟန် ၃:၈။
၁၁။ ယေဟောဝါသည် မိမိ၏ရည်ရွယ်တော်မူချက် အကောင်အထည်ပေါ်စေရန် အဘယ်ဖြစ်စဉ်ကို တင်ကြိုစီမံထားသနည်း။
၁၁ ဘုရားသခင်သည် မိမိ၏ရည်ရွယ်တော်မူချက် အကောင်အထည်ပေါ်စေရန် အခြားဖြစ်စဉ်တစ်ခုကိုလည်း တင်ကြိုစီမံထားသည်။ ဧဖက်မြို့သားများထံ ပေါလု ရေးခဲ့သောစာတွင် ယင်းကို ဤသို့ဖော်ပြထား၏– ဘုရားသခင်သည် “ကောင်းကင်ပေါ်၊ မြေကြီးပေါ်မှာရှိရှိသမျှတို့ကိုပေါင်း၍ ခရစ်တော်၌ ချုပ်ချာစေတော်မူလိမ့်သတည်း။” ထို့နောက် ပေါလုသည် ‘ကောင်းကင်ပေါ်ရှိ’ အရာများဖြစ်သည့် ခရစ်တော်နှင့်တွဲဖက်အမွေခံရန် ရွေးချယ်ခံရသူများကို ရည်ညွှန်း၍ ဤသို့ဆို၏– “မိမိစေတနာ၏အလိုတော်သို့လိုက်၍ အလုံးစုံတို့ကို စီရင်ပြုပြင်တော်မူတတ်သောသူ၏ ကြံစည်ခြင်းရှိသည်အတိုင်း ရှေးမဆွက ခွဲခန့်မှတ်သားတော်မူသည်။” (ဧဖက် ၁:၁၀၊ ၁၁) မှန်ပါသည်၊ ဘုရားသခင့်မိန်းမ၏အမျိုးအနွယ်တွင် အရေအတွက်ကန့်သတ်ထားသူများဖြင့် ဖွဲ့စည်းထားသည့် ဒုတိယအပိုင်းရှိရန်နှင့် ဤသူတို့သည် ရွေးနုတ်ဖိုးအကျိုးကျေးဇူးများကို ခရစ်တော်နှင့်အတူတွဲ၍ ဝေမျှပေးကြရန် ယေဟောဝါ တင်ကြိုစီမံထားတော်မူသည်။ (ရောမ ၈:၂၈-၃၀) တမန်တော်ပေတရုက ထိုသူတို့ကို “သန့်ရှင်းသောလူမျိုး” ဟုရည်ညွှန်းဖော်ပြ၏။ (၁ ပေတရု ၂:၉) တမန်တော်ယောဟန်သည် ခရစ်တော်နှင့်တွဲဖက်အမွေခံမည့်သူများ၏ အရေအတွက်မှာ ၁၄၄,၀၀၀ ဖြစ်မည်ဟု အဆင်းအာရုံတစ်ခုတွင် ကြားသိခွင့်ရခဲ့သည်။ (ဗျာ. ၇:၄-၈; ၁၄:၁၊ ၃) သူတို့သည် ရှင်ဘုရင်ဖြစ်သော ခရစ်တော်နှင့်အတူ “[ဘုရားသခင်၏] ဘုန်းတော်ကို ချီးမွမ်း” ကြ၏။—ဧဖက် ၁:၁၂-၁၄။
၁၂။ ၁၄၄,၀၀၀ မှတစ်ဦးစီကို တင်ကြိုခွဲခန့်မထားကြောင်း မည်သို့သိရသနည်း။
၁၂ ၁၄၄,၀၀၀ ကိုတင်ကြိုခန့်ခွဲထားခြင်းကြောင့် ဘုရားသခင်အား သစ္စာရှိစွာ ဝတ်ပြုရန် လူအချို့ကို တင်ကြိုသတ်မှတ်ထားသည်ဟု မဆိုလိုပါ။ အမှန်မှာ၊ ခရစ်ယာန်ဂရိကျမ်းစာစောင်များတွင်ပါရှိသည့် ဆုံးမစကားသည် အထူးသဖြင့် ဝိညာဉ်တော်ဖွားများအတွက်ဖြစ်သည်။ သူတို့ သမာဓိစောင့်ထိန်းကာ ကောင်းကင်ခေါ်တော်မူခြင်းနှင့်ထိုက်တန်ရန် လမ်းညွှန်ပေးပြီး ခွန်အားရှိစေဖို့ဖြစ်သည်။ (ဖိလိပ္ပိ ၂:၁၂; ၂ သက်သာလောနိတ် ၁:၅၊ ၁၁၊ ၁၂; ၂ ပေတရု ၁:၁၀၊ ၁၁) ၁၄၄,၀၀၀ သည် ယေဟောဝါ၏အလိုတော် ဆောင်ရွက်ရန် အရည်အချင်းပြည့်လိမ့်မည်ကို ကိုယ်တော် တင်ကြိုသိရှိတော်မူသည်။ ထိုဖိတ်ခေါ်ခံရသူတို့ နောက်ဆုံးတွင် မည်သူမည်ဝါဖြစ်မည်ဆိုသည်မှာ မည်သို့ အသက်ရှင်နေထိုင်မည်နှင့်ပတ်သက်၍ သူတို့တစ်ဦးစီ၏ရွေးချယ်မှုပေါ် မူတည်သည်။—မဿဲ ၂၄:၁၃။
ယေဟောဝါ တင်ကြိုသိရှိရာ
၁၃၊ ၁၄။ ယေဟောဝါသည် မိမိ၏တင်ကြိုသိမြင်နိုင်စွမ်းကို အဘယ်အရာနှင့်အညီ အသုံးပြုသနည်း။ အဘယ်ကြောင့်နည်း။
၁၃ ယေဟောဝါသည် ရည်ရွယ်ချက်ရှိသော ပရောဖက်ပြုရှင်ဖြစ်သဖြင့် မိမိ၏တင်ကြိုသိမြင်နိုင်စွမ်းကို မည်သို့အသုံးပြုသနည်း။ ဦးဆုံးအနေဖြင့် ဘုရားသခင်၏နည်းလမ်းတော်အားလုံးသည် ဖြောင့်မတ်မှန်ကန်၍ မေတ္တာပါကြောင်း ကျွန်ုပ်တို့ သိထားကြသည်။ အေဒီပထမရာစုတွင် ဟေဗြဲခရစ်ယာန်များထံ တမန်တော်ပေါလု စာရေးစဉ်က ‘ဘုရားသခင်အား မုသာမသုံးစေနိုင်သောအရာဖြစ်သည့် မဖောက်ပြန်မပြောင်းလဲနိုင်သောအရာနှစ်ပါး’ မှာ ဘုရားသခင်၏ကတိတော်နှင့် ကျိန်ဆိုခြင်းတို့ဖြစ်ကြောင်း အခိုင်အမာပြောဆိုခဲ့သည်။ (ဟေဗြဲ ၆:၁၇၊ ၁၈) တပည့်ဖြစ်သူ တိတုထံ ပေါလုရေးသည့်စာတွင်လည်း ဘုရားသခင်သည် “မုသာနှင့်ကင်းစင်” ကြောင်း ဖော်ပြခဲ့သည်။—တိတု ၁:၁။
၁၄ ထို့ပြင် ယေဟောဝါသည် အတိုင်းအဆမဲ့တန်ခိုးရှင်ဖြစ်သော်လည်း ဘယ်သောအခါမျှ မတရားသဖြင့် ပြုတော်မမူချေ။ ယေဟောဝါသည် ‘သစ္စာစောင့်သောဘုရားသခင်၊ အပြစ်ကင်းလွတ်၍ ဟုတ်မှန်ဖြောင့်မတ်သော ဘုရားသခင်ဖြစ်တော်မူ’ ကြောင်း မောရှေဖော်ပြခဲ့သည်။ (တရားဟောရာ ၃၂:၄) ယေဟောဝါ ပြုတော်မူသမျှသည် ကိုယ်တော်၏ အံ့ဖွယ်ကိုယ်ရည်ကိုယ်သွေးတော်နှင့် ကိုက်ညီ၏။ ကိုယ်တော်၏လုပ်ရပ်များသည် ကိုယ်တော်၏အဓိကအရည်အသွေးများဖြစ်သော ချစ်ခြင်း၊ ဉာဏ်ပညာ၊ တရားမျှတခြင်း၊ တန်ခိုးတော်တို့နှင့် တညီတည်းဖြစ်သည်။
၁၅၊ ၁၆။ ယေဟောဝါသည် ဧဒင်ဥယျာဉ်တွင် အာဒံကို အဘယ်ရွေးချယ်စရာများ ချပြထားသနည်း။
၁၅ ယင်းတို့သည် ဧဒင်ဥယျာဉ်တွင် ဖြစ်ပျက်ခဲ့သမျှနှင့် မည်သို့သက်ဆိုင်ကြောင်း သုံးသပ်ကြည့်ပါ။ ယေဟောဝါသည် မေတ္တာရှင်ဖခင်တစ်ဦးအနေနှင့် လူသားများလိုအပ်သမျှကို ပေးသနားထားတော်မူသည်။ အာဒံအား စဉ်းစားနိုင်ရန်၊ ဆင်ခြင်သုံးသပ်နိုင်ရန်နှင့် ကောက်ချက်ချနိုင်ရန်အစွမ်းသတ္တိ ပေးထားသည်။ ပင်ကိုအသိစိတ်ဖြင့် အသက်ရှင်လှုပ်ရှားလေ့ရှိသော တိရစ္ဆာန်များနှင့်မတူဘဲ အာဒံတွင် ရွေးချယ်နိုင်စွမ်းရှိ၏။ ထို့ကြောင့် အာဒံကိုဖန်ဆင်းပြီးနောက် ဘုရားသခင်သည် ကောင်းကင်ပလ္လင်ပေါ်မှ “မိမိဖန်ဆင်းသမျှသောအရာတို့ကို ကြည့်ရှုလျှင် အလွန်ကောင်းသည်ကို မြင်တော်မူ” ၏။—ကမ္ဘာဦး ၁:၂၆-၃၁; ၂ ပေတရု ၂:၁၂။
၁၆ ယေဟောဝါသည် “ကောင်းမကောင်းကို သိကျွမ်းရာအပင်” ၏အသီးကိုမစားရန် အာဒံကို ပညတ်ပေးသောအခါ သူအဘယ်အရာပြုလုပ်ရန် ဆုံးဖြတ်နိုင်ဖို့ လိုအပ်သည့်ညွှန်ကြားချက်ပါ ပေးခဲ့သည်။ တားမြစ်ထားသောအပင်၏အသီးမှလွဲ၍ “ဥယျာဉ်၌ရှိသမျှသောအပင်တို့၏အသီး” ကိုစားခွင့်ပြုသည်။ ထိုတားမြစ်ထားသောအသီးကိုစားလျှင် သေမည်ဟု သတိပေးခဲ့၏။ (ကမ္ဘာဦး ၂:၁၆၊ ၁၇) အာဒံ့အပြုအမူ၏ အကျိုးဆက်များကိုလည်း ဖော်ပြတော်မူသည်။ ယခု အာဒံ အဘယ်အရာပြုလုပ်မည်နည်း။
၁၇။ ယေဟောဝါသည် မိမိ၏တင်ကြိုသိနိုင်စွမ်းကို စိစစ်အသုံးပြုသည်ဟု အဘယ်ကြောင့် ဆိုနိုင်သနည်း။
၁၇ ယေဟောဝါတွင် အရာခပ်သိမ်းကို တင်ကြိုသိနိုင်စွမ်းရှိသော်လည်း ယင်းကိုအသုံးပြုပြီး အာဒံနှင့်ဧဝတို့ အဘယ်အရာပြုလုပ်မည်ကို ကြိုမကြည့်လိုခဲ့ပါ။ ထို့ကြောင့် ဤတွင်မေးစရာမှာ အနာဂတ်ကို ယေဟောဝါ ကြိုသိနိုင်သည်၊ မသိနိုင်သည့်ကိစ္စမဟုတ်ဘဲ ကြိုသိလိုစိတ်ရှိမရှိဖြစ်သည်။ ထို့ပြင် ယေဟောဝါသည် မေတ္တာရှင်ဖြစ်တော်မူသောကြောင့် ပုန်ကန်မှုနှင့် ယင်းကြောင့်ဖြစ်ပေါ်လာမည့် ဝမ်းနည်းဖွယ်ဆိုးကျိုးများကို တမင်တကာ ရက်ရက်စက်စက် တင်ကြိုစီမံလိမ့်မည်မဟုတ်ကြောင်း သေချာသည်။ (မဿဲ ၇:၁၁; ၁ ယောဟန် ၄:၈) သို့ဖြစ်၍ ယေဟောဝါသည် မိမိ၏တင်ကြိုသိနိုင်စွမ်းကို စိစစ်အသုံးပြုတော်မူ၏။
၁၈။ ယေဟောဝါသည် မိမိ၏တင်ကြိုသိမြင်နိုင်စွမ်းကို စိစစ်အသုံးပြုခြင်းက တစ်စုံတစ်ခုလိုနေ၍ အဘယ်ကြောင့်မဟုတ်သနည်း။
၁၈ ယေဟောဝါသည် မိမိ၏တင်ကြိုသိနိုင်စွမ်းကို စိစစ်အသုံးပြုရခြင်းက တစ်စုံတစ်ခု လိုနေ၍လော။ မဟုတ်ပါ။ ယေဟောဝါသည် “ကျောက်” ဖြစ်ပြီး ကိုယ်တော်၏ “အမှုတော်သည် စုံလင်” ၏ဟု မောရှေ ဖော်ပြခဲ့သည်။ လူသည် အပြစ်ပြုလုပ်၍ ယင်း၏ဆိုးကျိုးများခံရခြင်းမှာ ကိုယ်တော့်ကြောင့် မဟုတ်ချေ။ ယနေ့ ကျွန်ုပ်တို့အားလုံး ခံစားနေကြရသည့် ဆိုးကျိုးများသည် အာဒံ၏မနာခံမှုကြောင့်ဖြစ်သည်။ တမန်တော်ပေါလုက “အပြစ်တရားသည် တစ်ယောက်သောသူအားဖြင့် ဤလောကသို့ဝင်၍ အပြစ်တရားအားဖြင့် သေခြင်းတရားဝင်သည်နှင့်အညီ လူအပေါင်းတို့သည် အပြစ်ရှိသောကြောင့် သေခြင်းသို့ရောက်ရကြ၏” ဟူ၍ ရှင်းပြခဲ့သည်။—တရားဟောရာ ၃၂:၄၊ ၅၊ သမ္မာ; ရောမ ၅:၁၂; ယေရမိ ၁၀:၂၃။
၁၉။ နောက်ဆောင်းပါးတွင် အဘယ်မေးခွန်းများကို သုံးသပ်ကြမည်နည်း။
၁၉ ဆွေးနွေးခဲ့ပြီးသည့်အထိ မတရားသောအမှုကို ယေဟောဝါ မပြုကြောင်း သိရှိခဲ့ရပြီ။ (ဆာလံ ၃၃:၅) ယင်းအစား ယေဟောဝါ၏စွမ်းရည်များ၊ ကိုယ်ကျင့်တရားအရည်အသွေးများနှင့် စံနှုန်းများသည် ကိုယ်တော်၏ရည်ရွယ်ချက်ကိုဖြစ်မြောက်အောင်မြင်စေသည်။ (ရောမ ၈:၂၈) ပရောဖက်ပြုရှင် ယေဟောဝါဘုရားသခင်သည် “အဦးမှစ၍ အဆုံးတိုင်အောင်လည်းကောင်း၊ ရှေးကာလမှစ၍ မဖြစ်သေးသောအမှုအရာတို့ကိုလည်းကောင်း ဖော်ပြ” တော်မူ၏။ (ဟေရှာယ ၄၆:၉၊ ၁၀) ကိုယ်တော်သည် ကြိုတင်သိမြင်နိုင်စွမ်းကို စိစစ်အသုံးပြုကြောင်းကိုလည်း ကျွန်ုပ်တို့ သိရှိခဲ့ကြရပြီ။ ယင်းက ကျွန်ုပ်တို့နှင့် မည်သို့သက်ဆိုင်သနည်း။ ကျွန်ုပ်တို့၏ဆုံးဖြတ်ချက်များသည် ဘုရားသခင်၏မေတ္တာပါရည်ရွယ်ချက်နှင့် ကိုက်ညီမညီ မည်သို့သေချာသိနိုင်သနည်း။ ထိုသို့ပြုခြင်းဖြင့် အဘယ်ကောင်းချီးများကို ခံစားကြရမည်နည်း။ ဤမေးခွန်းများကို နောက်ဆောင်းပါးတွင် သုံးသပ်ကြပါမည်။
[အောက်ခြေမှတ်ချက်]
^ အပိုဒ်၊ 2 ယေဟောဝါသက်သေများ ထုတ်ဝေသော လူခပ်သိမ်းအတွက်စာအုပ်တစ်အုပ် ဘရိုရှာ စာမျက်နှာ ၂၈ ကိုရှု။
သင်ရှင်းပြနိုင်သလော
• ဘုရားသခင်၏ “စကား” တော်အမြဲ “ပြည့်စုံ” လာသည်ကို အဘယ်ရှေးပုံနမူနာများက ဖော်ပြသနည်း။
• ယေဟောဝါသည် မိမိ၏ “ထာဝရအကြံတော်” နှင့်စပ်လျဉ်း၍ အဘယ်အရာကို တင်ကြိုစီမံခန့်ခွဲခဲ့သနည်း။
• ယေဟောဝါသည် မိမိ၏တင်ကြိုသိမြင်နိုင်စွမ်းကို အဘယ်နည်းဖြင့်အသုံးပြုသနည်း။
[လေ့လာရန်မေးခွန်းများ]
ယောရှဖတ်သည် ယေဟောဝါကိုယုံကြည်ကိုးစားခဲ့
ယေရှု သေပြီး ရှင်ပြန်ထမြောက်မည်အကြောင်း ဘုရားသခင် တင်ကြိုမိန့်ဆိုခဲ့
အာဒံနှင့်ဧဝတို့ ပြုလုပ်မည့်အရာကို ယေဟောဝါ တင်ကြိုစီမံခန့်ခွဲထားသလော