‘ကိုယ်တော်၏ သတိပေးနှိုးဆော်ချက်တို့သည် အကျွန်ုပ်နှစ်သက်ရာဖြစ်ပါ၏’
‘ကိုယ်တော်၏ သတိပေးနှိုးဆော်ချက်တို့သည် အကျွန်ုပ်နှစ်သက်ရာဖြစ်ပါ၏’
‘ကျမ်းစာ၌ အထက်ကရေးထားသမျှသည် ငါတို့ကို ဆုံးမသွန်သင်ရန် ရေးထားသတည်း။’—ရောမ ၁၅:၄။
၁။ ယေဟောဝါသည် ကျွန်ုပ်တို့အတွက် သတိပေးနှိုးဆော်ချက်များကို မည်သို့ပြင်ဆင်ပေးတော်မူသနည်း၊ ယင်းတို့ကို ကျွန်ုပ်တို့ အဘယ်ကြောင့်လိုအပ်သနည်း။
ယေဟောဝါသည် ဤခဲယဉ်းကျပ်တည်းသည့်ကာလ၏ ဖိစီးမှုများကို မိမိလူမျိုးတော် ကိုင်တွယ်ဖြေရှင်းနိုင်စေရန် သတိပေးနှိုးဆော်ချက်များ ပြင်ဆင်ပေးတော်မူ၏။ အဆိုပါသတိပေးနှိုးဆော်ချက်အချို့သည် ကိုယ်ပိုင်ကျမ်းစာဖတ်ရှုနေစဉ် ပေါ်လာပြီး အချို့မှာ ခရစ်ယာန်အစည်းအဝေးများတွင်ကြားရသည့် အချက်အလက်များ သို့မဟုတ် မှတ်ချက်များအားဖြင့်ဖြစ်သည်။ ထိုအခါသမယများတွင် ကျွန်ုပ်တို့ဖတ်ရှုရာ သို့မဟုတ် ကြားသိရာအများစုသည် ကျွန်ုပ်တို့အတွက် အသစ်အဆန်းမဟုတ်ချေ။ အလားတူအချက်အလက်များကို ယခင်က ကျွန်ုပ်တို့ ဆင်ခြင်သုံးသပ်ခဲ့ကြပြီးဖြစ်ပေမည်။ သို့သော် ကျွန်ုပ်တို့သည် မေ့လျော့တတ်ကြသူများဖြစ်ရာ ယေဟောဝါ၏ရည်ရွယ်တော်မူချက်များ၊ တရားတော်များ၊ လမ်းညွှန်ချက်များနှင့်စပ်လျဉ်း၍ အမြဲမပြတ် သတိပေးခံနေရဖို့လိုသည်။ ဘုရားသခင့်သတိပေးနှိုးဆော်ချက်များကို ကျွန်ုပ်တို့ တန်ဖိုးထားလေးမြတ်သင့်၏။ ၎င်းတို့သည် ဘုရားသခင့်အလိုတော်နှင့်အညီ အသက်ရှင်သင့်သည့်အကြောင်းများကို အာရုံပြုနိုင်ရန် ကျွန်ုပ်တို့ကို အားပေးသည်။ သို့ဖြစ်၍ ဆာလံဆရာက ယေဟောဝါထံ ဤသို့တေးသီကျူးခဲ့သည်– ‘ကိုယ်တော်၏ သတိပေးနှိုးဆော်ချက်တို့သည် အကျွန်ုပ်နှစ်သက်ရာဖြစ်ပါ၏။’—ဆာလံ ၁၁၉:၂၄၊ ကဘ။
၂၊ ၃။ (က) ယေဟောဝါသည် ကျမ်းစာဇာတ်ကောင်များ၏ ဘဝဖြစ်ရပ်မှန်မှတ်တမ်းများကို ကျွန်ုပ်တို့ခေတ်အထိ အဘယ်ကြောင့် ထားရှိတော်မူသနည်း။ (ခ) ဤဆောင်းပါးတွင် အဘယ်ကျမ်းစာမှတ်တမ်းများကို ဆွေးနွေးသုံးသပ်မည်နည်း။
၂ သမ္မာကျမ်းစာသည် လွန်ခဲ့သောရာစုနှစ်ပေါင်းများစွာက ရေးသားခဲ့သည့်စာအုပ်ဖြစ်သော်လည်း အလွန်တန်ခိုးပါသည်။ (ဟေဗြဲ ၄:၁၂) ယင်းသည် ကျမ်းစာဇာတ်ကောင်များ၏ ဘဝဖြစ်ရပ်မှန်များကို ဖော်ပြပေး၏။ သမ္မာကျမ်းစာခေတ်မှစ၍ ဓလေ့ထုံးတမ်းများနှင့် ရှုထောင့်များသည် အပြောင်းလဲကြီးပြောင်းလဲခဲ့သော်လည်း ကျွန်ုပ်တို့ရင်ဆိုင်ကြရသည့် ပြဿနာများမှာ ထိုခေတ်ကလူတို့ ရင်ဆိုင်ကြုံတွေ့ခဲ့ရာများနှင့် အများအားဖြင့် တူကြသည်။ သမ္မာကျမ်းစာတွင် ကျွန်ုပ်တို့အကျိုးအတွက် ဖော်ပြထားသည့် အဖြစ်အပျက်များမှာ ယေဟောဝါကို ချစ်မြတ်နိုးပြီး ဆိုးဝါးသည့်အခြေအနေများကြားမှ ကိုယ်တော်၏အမှုတော်ကို သစ္စာရှိရှိထမ်းဆောင်ခဲ့ကြသူတို့၏ ဖြစ်ရပ်မှန်ဇာတ်လမ်းများဖြစ်ရာ ကျွန်ုပ်တို့၏စိတ်နှလုံးကို ထိမိစေသည်။ အချို့မှတ်တမ်းများကမူ ဘုရားသခင်မုန်းတီးတော်မူသည့် အမူအကျင့်ကို ဖော်ပြပေးသည်။ ယေဟောဝါသည် မိမိလူမျိုးတော်၏ ဘဝဖြစ်ရပ်မှန် အကောင်းအဆိုးဟူသမျှကို သတိပေးနှိုးဆော်ချက်များအဖြစ် ကျမ်းစာ၌ ထည့်သွင်းဖော်ပြထားတော်မူသည်။ တမန်တော်ပေါလု ဤသို့ရေးသားခဲ့သည့်အတိုင်းပင်ဖြစ်၏– ‘ငါတို့သည် ကျမ်းစာ၌ပါသော သည်းခံခြင်း၊ သက်သာခြင်းအကြောင်းများကို အမှီပြု၍ မျှော်လင့်ရသောအခွင့်ရှိစေခြင်းငှာ ကျမ်းစာ၌ အထက်ကရေးထားသမျှသည် ငါတို့ကို ဆုံးမသွန်သင်ရန် ရေးထားသတည်း။’—ရောမ ၁၅:၄။
၃ ရှောလုကို ဒါဝိဒ်ဆက်ဆံပုံ၊ အာနနိနှင့် ရှဖိရေတို့၏မှတ်တမ်း၊ ပေါတိဖာ၏မယားနှင့် ယောသပ်ကျင့်ကြံပြုမူပုံဟူသော ကျမ်းစာမှတ်တမ်းသုံးခုကို အာရုံစိုက်ကြပါစို့။ ယင်းဖြစ်ရပ်မှန်တစ်ခုစီက ကျွန်ုပ်တို့အား အဖိုးတန်သင်ခန်းစာများ ပေးသည်။
ဘုရားသခင့်အစီအစဉ်များအပေါ်သစ္စာစောင့်သိခြင်း
၄၊ ၅။ (က) ရှောလုမင်းနှင့် ဒါဝိဒ်တို့စပ်ကြား အဘယ်အခြေအနေရှိခဲ့သနည်း။ (ခ) ရှောလု၏ရန်ငြိုးကို ဒါဝိဒ် မည်သို့တုံ့ပြန်ခဲ့သနည်း။
၄ ဘုရင်ရှောလုသည် ယေဟောဝါအပေါ် သစ္စာမဲ့ခဲ့သဖြင့် ကိုယ်တော်၏လူမျိုးအပေါ် မအုပ်စိုးထိုက်တော့ချေ။ ထို့ကြောင့် သူ့ကိုပယ်ရှားကာ ဒါဝိဒ်အား ဣသရေလမင်းလောင်းအဖြစ်ခန့်အပ်ရန် ပရောဖက်ရှမွေလကို ဘုရားသခင်ညွှန်ကြားတော်မူခဲ့သည်။ စစ်သူရဲတစ်ဦးအနေဖြင့် ဒါဝိဒ်သည် ထူးခြားပြောင်မြောက်သောစွမ်းရည်ကို ဖော်ပြခဲ့သဖြင့် လူအများ၏ချီးမွမ်းခြင်းကိုခံရသောအခါ ရှောလုက သူ့ကို ပြိုင်ဘက်တစ်ဦးအဖြစ် ရှုမြင်လေတော့သည်။ ရှောလုသည် ဒါဝိဒ်ကိုသတ်ရန် အကြိမ်ကြိမ်ကြိုးစားခဲ့၏။ ယေဟောဝါသည် ဒါဝိဒ်နှင့်အတူရှိသောကြောင့် သူအသက်အန္တရာယ်ကြုံရတိုင်း လွတ်မြောက်ခဲ့သည်။—၁ ဓမ္မရာဇဝင် ၁၈:၆-၁၂၊ ၂၅; ၁၉:၁၀၊ ၁၁။
၅ ဒါဝိဒ်သည် နှစ်အတော်ကြာ ထွက်ပြေးတိမ်းရှောင်နေခဲ့ရ၏။ ဒါဝိဒ်သည် ရှောလုကိုသတ်ရန် အခွင့်အရေးပေါ်လာသည့်အခါ သူ၏လူတို့က ယေဟောဝါသည် ရန်သူကို သူ့လက်ထဲအပ်နှင်းသည်ဟုဆိုကာ သတ်ဖို့တိုက်တွန်းခဲ့ကြသည်။ သို့သော် ဒါဝိဒ်က ငြင်းဆန်ခဲ့၏။ ယေဟောဝါအပေါ် သစ္စာစောင့်သိခြင်းနှင့် ဘုရားသခင့်လူမျိုး၏ ခန့်အပ်ခံဘုရင်ဖြစ်သော ရှောလု၏ရာထူးကို လေးစားခြင်းတို့က သူ့ကို ယင်းသို့ငြင်းဆန်စေခဲ့သည်။ ယေဟောဝါသည် ရှောလုကို ဣသရေလဘုရင်အဖြစ် ခန့်အပ်တော်မူခဲ့သည်မဟုတ်ပေလော။ သို့ဖြစ်၍ အချိန်တန်လျှင် ရှောလုကို ယေဟောဝါဖယ်ရှားပစ်ပါလိမ့်မည်။ ကြားဝင်လုပ်ဆောင်ခြင်းသည် မိမိ၏အလုပ်မဟုတ်ကြောင်း ဒါဝိဒ်ဆင်ခြင်ခဲ့၏။ ဒါဝိဒ်သည် ရှောလု၏ရန်ငြိုးပြေစေရန် အတတ်နိုင်ဆုံး ကြိုးစားလုပ်ဆောင်ပြီးနောက် ဤသို့ကောက်ချက်ချလိုက်၏– ‘ထာဝရဘုရားသခင်သည် သူ့ကို ဒဏ်ခတ်တော်မူမည်။ သို့မဟုတ် သူသေချိန်ရောက်လိမ့်မည်။ သို့မဟုတ် စစ်တိုက်ရာ၌ အသက်ဆုံးလိမ့်မည်။ ထာဝရဘုရားသခင်ခန့်အပ်ထားသူကို ငါမထိခိုက်မည်အကြောင်း ထာဝရဘုရားသခင် ဆီးတားတော်မူပါစေသော။’—၁ ဓမ္မရာဇဝင် ၂၄:၃-၁၅; ၂၆:၇-၂၀။
၆။ ဒါဝိဒ်နှင့် ရှောလုတို့၏ဇာတ်လမ်းသည် ကျွန်ုပ်တို့အတွက် စိတ်ဝင်စားစရာ အဘယ်ကြောင့်ဖြစ်သနည်း။
၆ ဤမှတ်တမ်းတွင် အရေးပါသည့် သင်ခန်းစာတစ်ရပ် ပါရှိ၏။ ခရစ်ယာန်အသင်းတော်တွင် အဘယ်ကြောင့် ပြဿနာအချို့ ပေါ်ပေါက်ရကြောင်း သင်တွေးဖူးပါသလော။ တစ်ဦးတစ်ယောက်၏အပြုအမူက မလျော်ကန်ဘဲ ဖြစ်နေနိုင်သည်။ သူ၏အမူအကျင့်က အမှားကြီးမဟုတ်သော်လည်း ယင်းကြောင့် သင်စိတ်အနှောင့်အယှက်ဖြစ်နေသည်။ သင်မည်သို့ တုံ့ပြန်သင့်သနည်း။ သင်သည် အဆိုပါခရစ်ယာန်ညီအစ်ကို၏အကျိုးကိုလိုလားကာ ယေဟောဝါအပေါ် သစ္စာစောင့်သိလိုသောကြောင့် ပြန်လည်သင့်မြတ်လိုသည့် ရည်ရွယ်ချက်ဖြင့် သူ့ကို ကြင်နာစွာ ချဉ်းကပ်စကားပြောရန် ဆုံးဖြတ်ပေမည်။ သို့သော် ပြဿနာဆက်ရှိနေသေးလျှင်ကော အသို့နည်း။ အတတ်နိုင်ဆုံး သင်လုပ်ဆောင်ပြီးနောက် ယင်းကိစ္စကို ယေဟောဝါ၏လက်တော်၌ အပ်လိုပေမည်။ ဒါဝိဒ် ထိုအတိုင်း ပြုခဲ့သည်။
၇။ ကျွန်ုပ်တို့သည် မတရားမှု သို့မဟုတ် စိတ်စွန်းကွက်မှုကို တွေ့ ကြုံခံစားရလျှင် ဒါဝိဒ်ကိုတုပသည့်အနေဖြင့် မည်သို့တုံ့ပြန်သင့်သနည်း။
၇ လူမှုရေးမမျှတမှု သို့မဟုတ် ဘာသာရေးစိတ်စွန်းကွက်မှုဆိုင်ရာ ပြဿနာများကို သင်ကြုံကောင်းကြုံနေရမည်။ ဤအချိန်တွင်လည်း သင်ဘာမျှမတတ်နိုင်ဘဲ ဖြစ်နေမည်။ ယင်းသို့သောအခြေအနေကို ခံရပ်ဖို့ အလွန်အခက်တွေ့နိုင်သော်လည်း မတရားမှုကို ဒါဝိဒ်တုံ့ပြန်ခဲ့ပုံက ကျွန်ုပ်တို့အား သင်ခန်းစာပေးပါသည်။ ဒါဝိဒ်၏ဆာလံသီချင်းများမှာ ရှောလု၏လက်မှ ဘုရားသခင်ကယ်လွှတ်ပါရန် ထက်သန်သည့် ဆုတောင်းချက်များဖြစ်ရုံမျှမက ယေဟောဝါအပေါ် သစ္စာစောင့်သိပြီး ဘုရားသခင့်နာမတော် ဘုန်းထင်ရှားစေရေးကို သူစိတ်ဝင်စားကြောင်း ထိမိသည့် ဖော်ပြချက်လည်းဖြစ်သည်။ (ဆာလံ ၁၈:၁-၆၊ ၂၅-၂၇၊ ၃၀-၃၂၊ ၄၈-၅၀; ၅၇:၁-၁၁) ဒါဝိဒ်သည် ရှောလု၏မလိုတမာဆက်ဆံမှုကို နှစ်ပေါင်းများစွာ ခံခဲ့ရသော်လည်း ယေဟောဝါအပေါ် ဆက်၍သစ္စာစောင့်သိခဲ့သည်။ ကျွန်ုပ်တို့လည်း မတရားမှုများကြုံရပါစေ၊ အခြားသူများ အဘယ်အရာပင် လုပ်ဆောင်နေပါစေ ယေဟောဝါနှင့် ကိုယ်တော့်အဖွဲ့အစည်းအပေါ် ဆက်၍သစ္စာရှိသင့်ပေသည်။ အခြေအနေကို ယေဟောဝါကောင်းစွာသိကြောင်း ကျွန်ုပ်တို့စိတ်ချနိုင်ကြသည်။—ဆာလံ ၈၆:၂။
၈။ ယေဟောဝါအပေါ် မိမိတို့၏သစ္စာစောင့်သိမှု စမ်းသပ်ခံရသောအခါ မိုဇမ်ဘစ်နိုင်ငံရှိ ယေဟောဝါသက်သေများ မည်သို့တုံ့ပြန်ခဲ့ကြသနည်း။
၈ စမ်းသပ်ရာကာလ၌ ယေဟောဝါကို သစ္စာရှိရှိ စွဲကပ်ကြသူအချို့တွင် မိုဇမ်ဘစ်နိုင်ငံရှိ ခရစ်ယာန်များသည် မျက်မှောက်ခေတ်ပုံနမူနာတစ်ရပ်ဖြစ်သည်။ ၁၉၈၄ ခုနှစ်တွင် တော်လှန်ရေးလှုပ်ရှားမှုအဖွဲ့တစ်ဖွဲ့မှ လက်နက်ကိုင်တပ်သားများသည် ညီအစ်ကိုများနေထိုင်ရာ ကျေးရွာများသို့ ကြိမ်ဖန်များစွာ ဝင်ရောက်ကာ လုယက်သတ်ဖြတ်၍ နေအိမ်များကို မီးရှို့ ကြသည်။ အဆိုပါခရစ်ယာန်စစ်များသည် မိမိတို့ကိုယ်ကို မကာကွယ်နိုင်သည့်အခြေအနေ၌ရောက်နေဟန်ရှိသည်။ အဆိုပါဒေသတွင် နေထိုင်သူတို့သည် စစ်ရေးလှုပ်ရှားမှုတွင်ပါဝင်ရန် သို့မဟုတ် အဆိုပါလှုပ်ရှားမှုကို တစ်နည်းနည်းဖြင့် ထောက်ပံ့ရန် အတင်းအကျပ်ပြုခံခဲ့ကြရသည်။ ယေဟောဝါသက်သေများကမူ အဆိုပါလှုပ်ရှားမှုတွင်ပါဝင်ခြင်းသည် မိမိတို့၏ ခရစ်ယာန်ကြားနေရပ်တည်ချက်နှင့် မအပ်စပ်ဟု ယူမှတ်ခဲ့ကြ၏။ မပါဝင်ဖို့ သူတို့ငြင်းဆန်ခဲ့ကြသောအခါ သူတို့ကို ဒေါသထွက်ကြသည်။ ကသောင်း ကနင်းနိုင်သည့် ထိုကာလတွင် သက်သေခံအယောက် ၃၀ ထက်မနည်း အသတ်ခံလိုက်ရသော်လည်း အဆိုပါအသက်အန္တရာယ်ခြိမ်းခြောက်မှုက ဘုရားသခင့်လူမျိုး၏ သစ္စာစောင့်သိမှုကို မချိုးဖျက်နိုင်ခဲ့ချေ။ * သူတို့သည် ဒါဝိဒ်နည်းတူ မတရားမှုများကိုခံရပ်ခဲ့ကြရာ နောက်ဆုံးတွင် အောင်ပွဲဆင်ခဲ့ကြလေသည်။
သတိပေးပုံနမူနာတစ်ရပ်
၉၊ ၁၀။ (က) ကျမ်းစာပုံနမူနာအချို့မှ ကျွန်ုပ်တို့ မည်သို့အကျိုးရယူနိုင်သနည်း။ (ခ) အာနနိနှင့် ရှဖိရေတို့၏လုပ်ရပ်မည်သို့မှားသနည်း။
၉ ကျမ်းစာပါပုဂ္ဂိုလ်အချို့သည် ရှောင်ကြဉ်ရမည့် အမူအကျင့်နှင့်ပတ်သက်သည့် သတိပေးပုံနမူနာများကို တင်ပြခဲ့ကြသည်။ အမှန်မှာ ကျမ်းစာတွင် ဘုရားသခင့်ကျေးကျွန်များ၌ပင် အမှားပြု၍ ဆိုးကျိုးခံစားလိုက်ရသူတို့၏မှတ်တမ်းများ ပါရှိသည်။ (၂ ကောရိန္သု ၁၀:၁၁) ထိုသို့သောမှတ်တမ်းတစ်ခုမှာ ပထမရာစုတွင် ယေရုရှလင်မြို့ရှိ ခရစ်ယာန်အသင်းတော်သားများဖြစ်ကြသော အာနနိနှင့် ရှဖိရေ၏မှတ်တမ်းဖြစ်သည်။
၁၀ အေဒီ ၃၃ ပင်တေကုတ္တေပွဲပြီးနောက်၊ တမန်တော်များနှင့်ပေါင်းသင်းရန် ယေရုရှလင်မြို့တွင် ကျန်ရစ်ခဲ့ကြသော ယုံကြည်ခါစလူသစ်များသည် ရုပ်ပိုင်းဆိုင်ရာထောက်မမှု လိုအပ်လာခဲ့သည်။ အသင်းတော်သားအချို့သည် မိမိတို့ပိုင်ဆိုင်ရာများကို ရောင်းချခြင်းဖြင့် လိုအပ်နေသူမှန်သမျှကို ကူညီပေးခဲ့ကြသည်။ (တမန်တော် ၂:၄၁-၄၅) အာနနိနှင့် ရှဖိရေလည်း လယ်ကွက်တစ်ကွက်ကို ရောင်းချပြီး ရောင်းရငွေမှ အချို့အဝက်ကို တမန်တော်များထံ ယူဆောင်လာကာ ယင်းသည် သူတို့ရရှိသည့် ရောင်းရငွေအားလုံးဖြစ်ကြောင်းဆိုလေ၏။ သူတို့ပေးလိုသရွေ့ ပေးနိုင်ကြသည်။ သို့သော်လည်း အာနနိနှင့် ရှဖိရေတို့သည် သဘောထားမမှန်သည့်အပြင် မရိုးမသားပြုမူခဲ့ကြသည်။ သူတို့သည် အထင်ကြီးခံလိုပြီး အမှန်တကယ်လှူသည်ထက် ပိုလှူဒါန်းပုံဖမ်းခဲ့ကြသည်။ သန့်ရှင်းသောဝိညာဉ်တော်၏ လှုံ့ဆော်ပေးမှုကြောင့် တမန်တော်ပေတရုသည် သူတို့၏မရိုးသားမှုနှင့် အရေခြုံမှုကို ဖော်ထုတ်လိုက်ရာ သူတို့သည် ယေဟောဝါ၏ဒဏ်ခတ်မှုကြောင့် သေဆုံးသွားကြ၏။—တမန်တော် ၅:၁-၁၀။
၁၁၊ ၁၂။ (က) ရိုးသားခြင်းနှင့်ပတ်သက်သော သတိပေးနှိုးဆော်ချက်အချို့ကား အဘယ်နည်း။ (ခ) ရိုးသားခြင်းက အဘယ်အကျိုးကျေးဇူးများ ရရှိစေသနည်း။
၁၁ ကျွန်ုပ်တို့သည် လူအထင်ကြီးခံရရန် မရိုးမသားပြုမူဖို့ သွေးဆောင်ခံရလျှင် အာနနိနှင့် ရှဖိရေတို့၏ဖြစ်ရပ်က လေးနက်သည့် သတိပေးပုံနမူနာတစ်ရပ် ဖြစ်ပါစေ။ ကျွန်ုပ်တို့သည် လူလူချင်းကို လှည့်စား၍ရနိုင်သော်လည်း ယေဟောဝါကိုမူကား လှည့်စား၍မရနိုင်ချေ။ (ဟေဗြဲ ၄:၁၃) မဖြောင့်မတ်မှုမရှိတော့မည့် ကမ္ဘာပေါ်တွင် လိမ်လည်သူများအတွက် နေစရာရှိမည်မဟုတ်သောကြောင့် ကျွန်ုပ်တို့အချင်းချင်း တစ်ဦးအပေါ်တစ်ဦး ရိုးသားဖို့ သမ္မာကျမ်းစာက ထပ်ခါတလဲလဲ တိုက်တွန်းပါသည်။ (သု. ၁၄:၂; ဗျာ. ၂၁:၈; ၂၂:၁၅) ထိုသို့ဖြစ်ရသည့်အကြောင်းရင်းကို ရှင်းရှင်းလင်းလင်း သိထားသင့်၏။ မုသာမှန်သမျှကို အားပေးအားမြှောက်ပြုသူမှာ စာတန်ဖြစ်နေသောကြောင့်ပင်။—ယောဟန် ၈:၄၄။
၁၂ ရိုးရိုးသားသား အသက်ရှင်နေထိုင်ခြင်းသည် အကျိုးကျေးဇူးများစွာ ရရှိစေသည်။ ယင်းတို့မှာ ကြည်လင်သည့် ကိုယ်ကိုကိုယ်သိသောစိတ်နှင့် အခြားသူတို့၏ ယုံကြည်ကိုးစားမှုကို ရရှိခြင်းမှ ခံစားရသည့် အားရကျေနပ်မှုတို့ဖြစ်သည်။ ကိစ္စရပ်အတော်များများတွင် ခရစ်ယာန်များသည် ရိုးသားကြသည့်အတွက် အလုပ်အကိုင်ရရှိကြသည် သို့မဟုတ် အလုပ်မြဲခဲ့ကြသည်။ သို့သော် အရေးအပါဆုံး အကျိုးကျေးဇူးမှာ ရိုးသားခြင်းသည် အတိုင်းအဆမဲ့တန်ခိုးရှင် ဘုရားသခင်နှင့် မိတ်ဆွေဖြစ်ခွင့်ရခြင်းပင်ဖြစ်သည်။—ဆာလံ ၁၅: ၁၊ ၂။
ကိုယ်ကျင့်တရားစင်ကြယ်နေခြင်း
၁၃။ ယောသပ် အဘယ်အခြေအနေတွင် ရောက်ခဲ့သနည်း၊ သူမည်သို့တုံ့ပြန်ခဲ့သနည်း။
၁၃ ဘိုးဘေးယာကုပ်၏သား ယောသပ်သည် အသက် ၁၇ နှစ်အရွယ်တွင် ကျွန်အဖြစ်ရောင်းစားခံလိုက်ရ၏။ သူသည် အီဂျစ်နန်းတွင်းအရာရှိ ပေါတိဖာ၏အိမ်တွင် နေထိုင်စဉ် သခင့်မယား၏ အာရုံစိုက်မှုကို ခံနေရကြောင်း တဖြည်းဖြည်းရိပ်မိလာ၏။ အဆိုပါအမျိုးသမီးသည် ငယ်ရွယ်ချောမောသည့် ယောသပ်နှင့် လိင်ဆက်ဆံလိုသဖြင့် “ငါနှင့်အတူအိပ်ပါ” ဟူ၍ ယောသပ်ကို နေ့စဉ်ရက်ဆက် တိုက်တွန်းသွေးဆောင်ခဲ့သည်။ ယောသပ်သည် မိသားစုနှင့်ဝေးနေပြီး သူ့ကို မည်သူမျှမသိသည့် တိုင်းပြည်တွင် ရောက်နေသောကြောင့် ဤအမျိုးသမီးနှင့် လိင်ဖောက်ပြန်လျှင် မည်သူမျှသိမည်မဟုတ်ချေ။ သို့တစေ ပေါတိဖာ၏မယားက ယောသပ်ကို ဆွဲလားရမ်းလားလုပ်သောအခါ သူထွက်ပြေးခဲ့၏။—ကမ္ဘာဦး ၃၇:၂၊ ၁၈-၂၈; ၃၉:၁-၁၂။
၁၄၊ ၁၅။ (က) ယောသပ်၏ဇာတ်လမ်းသည် ကျွန်ုပ်တို့အတွက် အဘယ်ကြောင့် စိတ်ဝင်စားစရာဖြစ်သနည်း။ (ခ) ဘုရားသခင့်သတိပေးနှိုးဆော်ချက်များကို လိုက်နာခြင်းသည် ခရစ်ယာန်အမျိုးသမီးတစ်ဦးအတွက် အဘယ်ကြောင့် ကျေးဇူးတင်စရာဖြစ်ခဲ့သနည်း။
၁၄ ယောသပ်သည် ဘုရားသခင်အားကြောက်ရွံ့သည့် မိသားစုတွင် ကြီးပြင်းလာသူဖြစ်ရာ အိမ်ထောင်သည်မဟုတ်သူများ လိင်ဆက်ဆံခြင်းသည် မှားကြောင်း သူသိရှိထား၏။ “အပြစ်ကြီးသောဤအမှုကို ကျွန်တော်ပြု၍ ဘုရားသခင်ကို အဘယ်သို့ပြစ်မှားနိုင်သနည်း” ဟူ၍ သူမေးခဲ့သည်။ ဧဒင်ဥယျာဉ်တွင် လူသားများအတွက် ဘုရားသခင်ချမှတ်ခဲ့သည့် စံနှုန်းဖြစ်သော တစ်လင်တစ်မယားစနစ်ကို သူသိရှိထားခြင်းကြောင့် ထိုသို့ဆုံးဖြတ်နိုင်ခြင်းဖြစ်ပေမည်။ (ကမ္ဘာဦး ၂:၂၄) ယနေ့ ဘုရားသခင့်လူမျိုးသည် ထိုအခြေအနေအပေါ် ယောသပ်တုံ့ပြန်ပုံကို ဆင်ခြင်သုံးသပ်ကြခြင်းဖြင့် အကျိုးရရှိနိုင်ပါသည်။ လိင်ဆက်ဆံမှုနှင့်ပတ်သက်၍ လွတ်လပ်လွန်းသည့်အမြင်ရှိသော ဒေသအချို့၌ အကျင့်ယိုယွင်းမှုတွင်ပါဝင်ရန် ငြင်းဆန်ကြသူ လူငယ်လူရွယ်များကို ရွယ်တူချင်းများက ပြောင်လှောင်သရော်ကြသည်။ အိမ်ထောင်ရေးဖောက်ပြန်ကြခြင်းမှာလည်း အဆန်းမဟုတ်တော့ချေ။ ထို့ကြောင့် ယောသပ်၏ဖြစ်ရပ်သည် ကျွန်ုပ်တို့အတွက် အခန့်သင့်သတိပေးနှိုးဆော်ချက်ဖြစ်၏။ ဘုရားသခင့်စံနှုန်းတွင် မတရားမေထုန်နှင့် သူ့သားအိမ်ရာပြစ်မှားခြင်းတို့သည် အပြစ်များဖြစ်နေဆဲပင်။ (ဟေဗြဲ ၁၃:၄) တရားမဝင်လိင်ဆက်ဆံရန် ဖိအားပေးမှုကို မလွန်ဆန်နိုင်ခဲ့ကြသူများစွာက ထိုသို့မပြုရန် ခိုင်လုံသောအကြောင်းရင်းရှိကြောင်း သဘောတူကြသည်။ မလိုလားအပ်သောဆိုးကျိုးများတွင် အရှက်တကွဲဖြစ်ခြင်း၊ ကိုယ်ကိုကိုယ်သိစိတ် မကြည်လင်ခြင်း၊ မနာလိုဝန်တိုခြင်း၊ ကိုယ်ဝန်ရခြင်းနှင့် လိင်ဆိုင်ရာကူးစက်ရောဂါများ ပါဝင်ပေမည်။ သမ္မာကျမ်းစာက ကျွန်ုပ်တို့အား သတိပေးထားသည့်အတိုင်း မတရားမေထုန်ကျူးလွန်သူတစ်ဦးသည် “မိမိကိုယ်ကိုပင် ပြစ်မှား” ၏။—၁ ကောရိန္သု ၅:၉-၁၂; ၆:၁၈; သု. ၆:၂၃-၂၉၊ ၃၂။
၁၅ ယေဟောဝါသက်သေတစ်ဦးဖြစ်သော တစ်ကိုယ်ရေညီအစ်မ ဂျဲနီ *တွင် ဘုရားသခင့်သတိပေးနှိုးဆော်ချက်များအတွက် ကျေးဇူးတင်စရာအကြောင်းရှိ၏။ အလုပ်ခွင်တွင် ရုပ်ရည်ချောမောသော လုပ်ဖော်ဆောင်ဖက်တစ်ဦးက သူ့ကို ချစ်ကြိုက်ကြောင်းပြ၏။ ဂျဲနီက မတုံ့ပြန်သောအခါ သူသည် ချစ်ကြိုက်သည့်အမူအရာကို တိုး၍ပြလာသည်။ “ဆန့်ကျင်ဘက်လိင်ရှင်တစ်ယောက်က ကိုယ့်ကို စိတ်ဝင်စားတဲ့အခါ ဂုဏ်ယူတတ်ကြတဲ့အတွက် ကိုယ်ကျင့်တရားစင်ကြယ်နေဖို့ ကျွန်မ အတော်ကိုကြိုးစားအားထုတ်ခဲ့ရတယ်” ဟု သူဝန်ခံသည်။ သို့သော် အဆိုပါအမျိုးသားသည် သူနှင့်လိင်ဆက်ဆံခဲ့သည့် အမျိုးသမီးများစာရင်းတွင် မိမိကိုထည့်သွင်းဖို့ ကြိုးစားနေခြင်းသာဖြစ်ကြောင်း ဂျဲနီသိရှိသွားသည်။ မတွန်းလှန်နိုင်တော့ဟု သူခံစားရသည့်အခါ ယေဟောဝါအပေါ် သစ္စာစောင့်သိဖို့ ကူညီပေးပါရန် အသနားခံခဲ့၏။ သမ္မာကျမ်းစာနှင့် ခရစ်ယာန်စာပေများတွင် ရှာဖွေလေ့လာသည့်အခါ သူသိရှိခဲ့ရာများသည် သတိနှင့်နေရန် လှုံ့ဆော်ပေးသည့် သတိပေးချက်များနှင့်တူကြောင်း ဂျဲနီတွေ့ရှိခဲ့သည်။ အဆိုပါသတိပေးချက်များအနက်တစ်ခုမှာ ယောသပ်နှင့် ပေါတိဖာမယား၏ဇာတ်လမ်းဖြစ်သည်။ “ယေဟောဝါကို ကျွန်မဘယ်လောက်ချစ်ကြောင်း ကိုယ့်ကိုယ်ကို သတိပေးနေသရွေ့ ဒီမကောင်းမှုကြီးကို ကျူးလွန်ပြီး ကိုယ်တော့်ကို ပြစ်မှားမိမှာကို စိုးရိမ်စရာမလိုဘူး” ဟု သူကဆိုသည်။
ဘုရားသခင့်သတိပေးနှိုးဆော်ချက်များကို လိုက်နာလော့
၁၆။ သမ္မာကျမ်းစာပါပုဂ္ဂိုလ်များ၏ ဘဝအသက်တာများအကြောင်း ပြန်လည်သုံးသပ်ပြီး စဉ်းစားဆင်ခြင်ခြင်းမှ ကျွန်ုပ်တို့ မည်သို့အကျိုးရနိုင်ကြသနည်း။
၁၆ ယေဟောဝါသည် သမ္မာကျမ်းစာတွင် ကျွန်ုပ်တို့အတွက် မှတ်တမ်းအချို့ ထားရှိပေးရသည့်အကြောင်းရင်းကို သိနားလည်ရန်ကြိုးစားခြင်းဖြင့် ကိုယ်တော်၏စံနှုန်းများကို ကျွန်ုပ်တို့အားလုံး တိုး၍တန်ဖိုးထားလေးမြတ်နိုင်ကြပါသည်။ ယင်းတို့က အဘယ်အရာ သွန်သင်ပေးသနည်း။ ကျမ်းစာဇာတ်ကောင်များ၏ အဘယ်အရည်အသွေးများ သို့မဟုတ် အဘယ်သဘောထားများကို ကျွန်ုပ်တို့တုပဖို့ သို့မဟုတ် ရှောင်ကြဉ်ဖို့လိုသနည်း။ သမ္မာကျမ်းစာတွင် ရာနှင့်ချီသောပုဂ္ဂိုလ်တို့၏အကြောင်းကို ဖော်ပြပေးထားသည်။ ဘုရားသခင့်သွန်သင်ချက်ကို နှစ်သက်မြတ်နိုးသူအားလုံးသည် ယေဟောဝါ အသေအချာ ထိန်းသိမ်းပေးထားတော်မူသည့် ပုံနမူနာများမှ ရရှိနိုင်သော သင်ခန်းစာများအပါအဝင် အသက်ပေးဉာဏ်ပညာကို တောင့်တသည့်စိတ် မွေးမြူခြင်းမှ အကျိုးရရှိနိုင်ကြပါသည်။ ကျွန်ုပ်တို့ သင်ခန်းစာတစ်ခုခုယူနိုင်သည့် ယင်းသို့သောပုဂ္ဂိုလ်တို့၏ ဇာတ်လမ်းများကို ဤမဂ္ဂဇင်းတွင် မကြာခဏ ဖော်ပြပေးသည်။ အဆိုပါဆောင်းပါးများကို အချိန်ယူ၍ ပြန်လည်သုံးသပ်ကြည့်ပါလေ။
၁၇။ ယေဟောဝါ၏သတိပေးနှိုးဆော်ချက်များကို သင်မည်သို့သဘောထားသနည်း၊ အဘယ်ကြောင့်နည်း။
၁၇ ယေဟောဝါ၏အလိုတော်ဆောင်ရန် အားထုတ်ကြသူတို့ကို မေတ္တာပါစွာ ကိုယ်တော်စိတ်ဝင်စားတော်မူသည့်အတွက် ကျွန်ုပ်တို့ အလွန်ကျေးဇူးတင်နိုင်ကြသည်။ ကျမ်းစာပါ အမျိုးသား၊ အမျိုးသမီးများသည် စုံလင်သူများမဟုတ်သကဲ့သို့ ကျွန်ုပ်တို့လည်း မစုံလင်ကြချေ။ သို့ရာတွင် သူတို့၏လုပ်ရပ်များအကြောင်း မှတ်တမ်းတင်ထားခြင်းက ကျွန်ုပ်တို့အတွက် အလွန်တန်ဖိုးရှိသည်။ ယေဟောဝါ၏ သတိပေးနှိုးဆော်ချက်များကို လိုက်နာခြင်းအားဖြင့် ကျွန်ုပ်တို့သည် ကြီးလေးသောအမှားများမပြုမိရန် ရှောင်ကြဉ်နိုင်ကြသည်။ ဖြောင့်မတ်ခြင်းတရားအတိုင်း လိုက်လျှောက်ခဲ့ကြသူတို့၏ ပုံနမူနာကောင်းများကိုလည်း ကျွန်ုပ်တို့ အတုယူနိုင်ကြသည်။ ထိုသို့ပြုကြမည်ဆိုလျှင် ဆာလံဆရာနည်းတူ ဤသို့ကျူးဧနိုင်ကြပါလိမ့်မည်– ‘ယေဟောဝါ၏ သတိပေးနှိုးဆော်ချက်တို့ကိုစောင့်၍ ကိုယ်တော်ကို စိတ်နှလုံးအကြွင်းမဲ့ရှာသောသူတို့သည် ပျော်ရွှင်ကြ၏။ . . . ကိုယ်တော်၏သတိပေးနှိုးဆော်ချက်တို့ကို အကျွန်ုပ်ဝိညာဉ်သည် စောင့်ပါ၏။ အလွန်နှစ်သက်ပါ၏။’—ဆာလံ ၁၁၉:၂၊ ၁၆၇၊ ကဘ။
[အောက်ခြေမှတ်ချက်]
^ အပိုဒ်၊ 15 နာမည်ပြောင်းထားသည်။
သင်မည်သို့ဖြေဆိုမည်နည်း
• ရှောလုအပေါ်ထားရှိသည့် ဒါဝိဒ်၏စိတ်သဘောမှ ကျွန်ုပ်တို့ အဘယ်အရာသင်ယူနိုင်သနည်း။
• အာနနိနှင့် ရှဖိရေတို့၏မှတ်တမ်းက ကျွန်ုပ်တို့ကိုအဘယ်အရာသင်ပေးသနည်း။
• ယောသပ်၏ ဖြစ်ရပ်မှန်ဇာတ်လမ်းသည် မျက်မှောက်ခေတ်အတွက် အဘယ်ကြောင့် အထူးစိတ်ဝင်စားစရာဖြစ်သနည်း။
[လေ့လာရန်မေးခွန်းများ]
နာမည်ပြောင်းထားသည်။
[စာမျက်နှာ ၂၆ ပါ ရုပ်ပုံ]
ရှောလုကိုသတ်ရန် ဒါဝိဒ်အဘယ်ကြောင့် ငြင်းဆိုသနည်း
[စာမျက်နှာ ၂၇ ပါ ရုပ်ပုံ]
အာနနိနှင့် ရှဖိရေတို့ ၏မှတ်တမ်းမှ ကျွန်ုပ်တို့ အဘယ်သင်ခန်းစာရသနည်း
[စာမျက်နှာ ၂၈ ပါ ရုပ်ပုံ]
ယောသပ်သည် လိင်ဖောက်ပြားမှုကို အဘယ်ကြောင့် ငြင်းဆန်နိုင်ခဲ့သနည်း