ယူဂန္ဓာနိုင်ငံရှိ တိုင်းရင်းသားပေါင်းစုံကြား တိုးပွားမှု
ယူဂန္ဓာနိုင်ငံရှိ တိုင်းရင်းသားပေါင်းစုံကြား တိုးပွားမှု
ယူဂန္ဓာနိုင်ငံသည် အာဖရိကတိုက်အရှေ့ပိုင်းရှိ ရစ်ဖ်ချိုင့်ဝှမ်းကြီးနှစ်ခုကြားနှင့် အီကွေတာကိုခွလျက်တည်ရှိပြီး ထူးထူးခြားခြား သာယာလှပသောနိုင်ငံဖြစ်သည်။ မြေမျက်နှာသွင်ပြင် အမျိုးမျိုးရှိပြီး သစ်ပင်ပန်းပင်များနှင့် စိတ်ဝင်စားဖွယ်တိရစ္ဆာန်များ မျိုးပေါင်းစုံလင်လှသည်။ ကြီးမားကျယ်ပြန့်လှသော အာဖရိကကုန်းပြင်မြင့်ပေါ်တွင် တည်ရှိသောကြောင့် ရာသီဥတုမျှတပြီး မိုင်ပေါင်းရာချီဆက်သွားသည့် လှပသောတောင်ကြောများရှိသည်။
ဧရိယာကျဉ်းကျဉ်းလေးတွင် ရေခဲပြင်နှင့် အပူပိုင်းဒေသ နှစ်ခုစလုံးရှိသည့်နိုင်ငံ အနည်းငယ်သာရှိရာ ယင်းတို့တွင် ယူဂန္ဓာပါဝင်သည်။ ယင်း၏အနောက်ဘက်တွင် နှင်းဖုံးနေသောတောင်ထိပ်များရှိသည့် ရိုဝမ်ဇိုရီခေါ် လတောင်ကြောနှင့် အရှေ့ဘက်တွင် အပူပိုင်းမိုးနည်းရပ်ဝန်းဒေသရှိသည်။ ယူဂန္ဓာနိုင်ငံ၏ မြေပြန့်ဒေသတွင် ဆင်များ၊ ကျွဲများနှင့် ခြင်္သေ့များကို တွေ့နိုင်သည်။ တောင်များနှင့် တောနက်ကြီးများသည် ဂေါ်ရီလာမျောက်ဝံများ၊ ချင်ပန်ဇီမျောက်များနှင့် ငှက်မျိုးစိတ်ပေါင်း ၁,၀၀၀ ကျော်တို့၏ ကွန်းခိုရာဖြစ်သည်။ အာဖရိကတိုက်ရှိ နိုင်ငံအများစုသည် မိုးခေါင်ပြီး အစာရေစာရှားပါးသော်လည်း ယူဂန္ဓာနိုင်ငံမှာမူ ကမ္ဘာ့ဒုတိယအကြီးဆုံး ရေချိုအိုင်ဖြစ်သော ဝိတိုရိယအိုင်အပါအဝင် မြစ်ချောင်းအင်းအိုင် များစွာရှိသည်။ ဝိတိုရိယအိုင်၏ မြောက်ဘက်စွန်းပိုင်းသည် နိုင်းလ်မြစ် မြစ်ဖျားခံရာဖြစ်သည်။ ဗြိတိသျှနိုင်ငံ့ခေါင်းဆောင် ဝင်စတန်ချာချီလ်က ထိုနိုင်ငံကို “အာဖရိကပုလဲ” ဟုခေါ်ခဲ့ခြင်းမှာ အံ့အားသင့်စရာမဟုတ်ပေ။
ယနေ့ ထို“ပုလဲ”တောက်ပနေ
သို့သော် ယူဂန္ဓာနိုင်ငံ၏ ဆွဲဆောင်မှုအဖြစ်ဆုံးမှာ ဖော်ရွေပျူငှာဧည့်ဝတ်ကျေပွန်သော တိုင်းရင်းသားများဖြစ်သည်။ ထိုအမည်ခံ “ခရစ်ယာန်” နိုင်ငံကို လူမျိုးစုနှင့်ယဉ်ကျေးမှုပေါင်းစုံ စုဆုံရာနိုင်ငံဟုခေါ်နိုင်သည်။ ယနေ့ထိတိုင်လည်း အဆိုပါတိုင်းရင်းသားများကို သူတို့၏ ဓလေ့ထုံးစံနှင့်ဝတ်စုံများဖြင့် ခွဲခြားသိရှိနိုင်သည်။
ကမ္ဘာမြေတစ်ခွင် ငြိမ်သက်မှုရှိမည့်အချိန်နှင့်ပတ်သက်သော သမ္မာကျမ်းစာပါသတင်းကောင်းကို ယူဂန္ဓာနိုင်ငံရှိလူတို့ တဖြည်းဖြည်း တုံ့ပြန်လာနေကြသည်။ (ဆာလံ ၃၇:၁၁; ဗျာ. ၂၁:၄) ဂရိတ်ဗြိတိန်နိုင်ငံနှင့် အကျယ်အဝန်းတူသော အဆိုပါနိုင်ငံရှိ လူအပေါင်းထံ ထိုသတင်းတရားရောက်ရှိရန်မှာ စိန်ခေါ်ချက်ဖြစ်သည်။
၁၉၅၅ ခုနှစ်၌ ဒေသခံတစ်ဦးသည် အပ်နှံထားသော ယေဟောဝါသက်သေတစ်ဦးအဖြစ် ဝိတိုရိယအိုင်တွင် ပထမဦးဆုံး နှစ်ခြင်းခံခဲ့သည်။ ထိုသေးငယ်သောအစဖြစ်သည့် “သူငယ်တစ်ယောက်” မှ နောက်ဆုံး ၁၉၉၂ ခုနှစ်တွင် တစ်ထောင်အထိ တိုးများလာလေသည်။ ထိုအချိန်မှစ၍ တိုးတက်လျက်ရှိသည်။ ယင်းက ‘ငါယေဟောဝါသည် အချိန်ရောက်လျှင် ထိုအမှုကို နှိုးဆော်မည်’ ဟူသော ဘုရားသခင်၏ ကတိစကားအတိုင်းပင်။—ဟေရှာယ ၆၀:၂၂။
ဘာသာစကား အတားအဆီးများကို ကျော်လွှားခြင်း
အင်္ဂလိပ်စကားသည် ရုံးသုံးစကားဖြစ်ပြီး နေရာအနှံ့၊ အထူးသဖြင့် ပညာရေးတွင် အသုံးများသော်လည်း ယူဂန္ဓာလူမျိုးအများစု၏ မိခင်ဘာသာစကားမဟုတ်ပါ။ ထို့ကြောင့် လူများထံ သတင်းကောင်းရောက်ရှိရန် ယေဟောဝါသက်သေများ ကြိုးပမ်းရာတွင် အခြားအဓိကဘာသာစကားများကိုလည်း ထည့်တွက်ပေးရသည်။ နိုင်ငံ့လူဦးရေ ၂၅ သန်း၏ ၈၀ ရာခိုင်နှုန်းကျော်သည် ရွာများ သို့မဟုတ် မြို့ငယ်များတွင် နေထိုင်ကြသောကြောင့် ထိုသို့ထည့်တွက်ပေးဖို့လိုသည်။ သူတို့သည် များသောအားဖြင့် သူတို့၏ မိခင်ဘာသာစကားဖြင့် နေ့စဉ်ပြောဆိုဆက်သွယ်ကြသည်။ ထိုဘာသာစကားအုပ်စုများထံ ရောက်ရှိပြီး သူတို့၏ ဝိညာဉ်ရေးလိုအပ်ရာများကို ဖြည့်ဆည်းပေးနိုင်ရန် အကြီးအကျယ် ကြိုးစားအားထုတ်ကြရမည်။
သို့သော် ယေဟောဝါသက်သေများသည် သူတို့၏မိခင်ဘာသာစကားနှင့် သက်သေခံခြင်းဖြင့်၊ ဘာသာစကားအမျိုးမျိုးနှင့် ကျမ်းစာ,စာပေများကို ပြင်ဆင်ပေးခြင်းဖြင့် အဆိုပါလိုအပ်ရာများကို ဖြည့်ဆည်းပေးရန် ကြိုးစားနေကြသည်။ မြို့တော်ကမ်ပါလာရှိ ဌာနခွဲရုံးမှ ဘာသာပြန်အဖွဲ့သည် အာခိုလီ၊ လူကိုန်းဇို၊ လူဂန္ဓာနှင့် ရူယန်ကိုရီစသည့် ဘာသာစကားလေးမျိုးဖြင့် စာပေများကို ပြန်ဆိုနေကြသည်။ ထို့ပြင် နိုင်ငံတစ်ဝန်းတွင် ဘာသာစကားအမျိုးမျိုးဖြင့် ကျင်းပသော ခရစ်ယာန်စည်းဝေးပွဲများတွင် တက်ရောက်သူတို့သည် ယေဟောဝါသက်သေများ၏ အရေအတွက်ထက် နှစ်ဆကျော်ရှိသည်။ ယင်းက ဘာသာစကားအမျိုးမျိုးပြောဆိုသော အုပ်စုများထံ ရောက်ရှိရန် ကြိုးပမ်းအားထုတ်မှုများသည် ဝိညာဉ်ရေးအရ အလျင်အမြန် တိုးပွားစေကြောင်း အထင်အရှားဖော်ပြသည်။ သို့သော် ယင်းတစ်ခုတည်းကြောင့်သာ တိုးပွားခြင်း မဟုတ်ပါ။
လုပ်ငန်းတော်ကို ရှေ့ဆောင်များ ဦးဆောင်
အသင်းတော်များသည် သီးခြားရပ်ကွက်များကို ရောက်ရှိရန် နှစ်စဉ် သုံးလကြာကင်ပိန်းတွင် ဝမ်းမြောက်ဝမ်းသာ ပါဝင်ကြသည်။ (တမန်တော် ၁၆:၉) တိုးများလာသော ဇွဲရှိသည့် လူငယ်ရှေ့ဆောင်များ သို့မဟုတ် အချိန်ပြည့်ဧဝံဂေလိဟောပြောသူများသည် ထိုလုပ်ငန်းကို ဦးဆောင်ဦးရွက်ပြုနေကြသည်။ သူတို့သည် သတင်းကောင်းကို တစ်ခါမျှမကြားဖူးသည့် ဝေးခေါင်သောဒေသများသို့ ခရီးဆန့်ကြသည်။
သက်သေခံနှစ်ဦးသည် ယူဂန္ဓာအနောက်ပိုင်းရှိ ဘူရှန်ယီမြို့ငယ်တွင် အထူးရှေ့ဆောင်များအဖြစ် သုံးလ တာဝန်ခန့်အပ်ခံရသည်။ ထိုဒေသရှိ တစ်ဦးတည်းသောသက်သေခံနှင့်အတူ သူတို့ဟောပြောကြပြီး ခရစ်ယာန်အစည်းအဝေးများကို ကျင်းပခဲ့ကြသည်။ ရှေ့ဆောင်နှစ်ဦးသည် တစ်လအတွင်း လူပေါင်း ၄၀ နှင့် ပုံမှန်ကျမ်းစာဆွေးနွေးခဲ့ပြီး ၁၇ ဦးမှာ ယေဟောဝါသက်သေများ၏ အစည်းအဝေးများကို တက်ရောက်နေကြပြီ။ ရှေ့ဆောင်များ ဤသို့ပြန်ပြောပြသည်– “ကျွန်ုပ်တို့ ထံမှ ဘုရားသခင် အဘယ်အရာတောင်းဆိုတော်မူသနည်း * ဘရို ရှာရထားတဲ့သူတွေက ရက်အနည်းငယ်ကြာတော့ မေးခွန်းရဲ့အဖြေတွေကို စာအုပ်ထဲမှာရေးပြီး လာပြကြတယ်။ သူတို့ရဲ့အဖြေတွေ မှန်မမှန် သိချင်ကြတယ်။” ယနေ့ ထိုမြို့တွင် ကိုယ်ပိုင်နိုင်ငံတော်ခန်းမနှင့် အသင်းတော်တစ်ခုရှိနေပြီ။
ရှေ့ဆောင်နှစ်ဦးသည် သတင်းကောင်း မဟောဖူးသော ယူဂန္ဓာအနောက်ပိုင်းဒေသသို့ ခရီးဆန့်ခဲ့ကြသည်။ သူတို့ ဤသို့ရေးသည်– “ကျမ်းစာအမှန်တရားကို လူတွေ တကယ်ဆာငတ်နေကြတယ်။ ကျွန်တော်တို့ရောက်နေတဲ့ သုံးလအတွင်း ကျမ်းစာသင်အံမှု ၈၆ ခုကျင်းပနိုင်ခဲ့တယ်။” မကြာမီ ထိုဒေသတွင် သက်သေခံအုပ်စုတစ်စုကို စနစ်တကျဖွဲ့စည်းခဲ့သည်။
လယ်ကွင်းမှ ဇွဲရှိသော အခြားလုပ်ဆောင်သူများ
ဇွဲရှိသောရှေ့ဆောင်များတွင် နှစ်ပေါင်းများစွာ အမှုဆောင်ခဲ့သူများ ပါဝင်သည်။ ပက်ထရစ်သည် ယေဟောဝါသက်သေတစ်ဦးမဖြစ်လာမီ ယူဂန္ဓာအစိုးရ အီဒီ အာမင်၏ လေတပ်ဘင်ခရာအဖွဲ့တွင် ကလယ်ရီနက်တီးမှုတ်သူဖြစ်သည်။ ၁၉၈၃ ခုနှစ်၌ ပက်ထရစ် နှစ်ခြင်းခံခဲ့ပြီး နောက်ခြောက်လအကြာတွင် အချိန်ပြည့်အမှုဆောင်တစ်ဦးဖြစ်လာသည်။ ယနေ့ သူသည် နယ်လှည့်ကြီးကြပ်မှူးတစ်ဦးဖြစ်ပြီး အသင်းတော်များကို လည်ပတ်အားပေးလျက်ရှိသည်။
မာဂရက်သည် ၁၉၆၂ ခုနှစ်တွင် နှစ်ခြင်းခံခဲ့သည်။ အသက် ၇၅ နှစ်ကျော်ပြီဖြစ်ပြီး တင်ပါးဆုံအရိုးကြောင့် ပေါ့ပေါ့ပါးပါး မသွားနိုင်တော့သော်လည်း အိမ်နီးချင်းများကို ကျမ်းစာအခြေပြုမျှော်လင့်ချက်အကြောင်း ဝေမျှရာတွင် တစ်လလျှင် နာရီပေါင်း ၇၀ ခန့် အသုံးပြုလျက်ရှိသည်။ သူသည် အိမ်အပြင်ဘက်ရှိ ခုံတန်းပေါ် စာပေစာတမ်းများ တင်ထားပြီး ငြိမ်းချမ်းသောကမ္ဘာသစ်နှင့်ပတ်သက်သော သတင်းကောင်း နားထောင်လိုသည့် ဖြတ်သန်းသွားသူများကို စဟောပြောသည်။
ဆိုင်မန်သည် ယူဂန္ဓာအရှေ့ပိုင်းမှ လယ်သမားတစ်ဦးဖြစ်ပြီး အမှန်တရားကိုရှာဖွေခဲ့သည်မှာ ၁၆ နှစ်တိုင်ရှိပြီဖြစ်ပြီး ၁၉၉၅ ခုနှစ်တွင် ယေဟောဝါသက်သေများ ထုတ်ဝေသောစာပေစာတမ်းအချို့ ရရှိလိုက်သည်။ ဖတ်ရှုရသောအရာကြောင့် ဘုရားသခင့်နိုင်ငံတော်၊ ကမ္ဘာမြေနှင့်ပတ်သက်သော ယေဟောဝါ၏ ထူးမြတ်လှသော ရည်ရွယ်ချက်အကြောင်း ပိုသိလိုခဲ့သည်။ ဆိုင်မန်နေထိုင်သော ကာမူလီမြို့တွင် သက်သေခံတစ်ဦးမျှမရှိသောကြောင့် သူတို့ကိုရှာဖွေရန် ကမ်ပါလာသို့ ၈၅ မိုင်ခရီးနှင်ခဲ့သည်။ ယနေ့ သူ၏ရွာတွင် အသင်းတော်တစ်ခုရှိနေပြီ။
“ကျွန်တော်တို့ ဒီမှာရှိနေမယ်”
အာဖရိကရှိအခြားဒေသများမှာကဲ့သို့ ဘာသာရေးအုပ်စုတစ်စုတွင် သင့်တော်သောဝတ်ပြုရာနေရာရှိသင့်သည်ဟု လူများစွာက ယူမှတ်ကြသည်။ ယေဟောဝါသက်သေများ၏ အသင်းတော်အချို့တွင် သင့်တော်သော ဘုရားသခင့်နိုင်ငံတော်ခန်းမတစ်လုံး ဆောက်လုပ်ရန် ငွေမရှိသောကြောင့် ယင်းသည် သူတို့အတွက် မဖြစ်နိုင်ပုံရသည်။ ၁၉၉၉ ခုနှစ်နှောင်းပိုင်း ကမ္ဘာတစ်ခွင် ဘုရားသခင့်နိုင်ငံတော်ခန်းမ ဆောက်လုပ်ရေးအစီအစဉ်ကို အရှိန်အဟုန်တိုးမြှင့်ခဲ့ရာ ညီအစ်ကိုများ မဖော်ပြနိုင်လောက်အောင် ကျေးဇူးတင်လေးမြတ်ခဲ့ကြသည်။ နောက်ငါးနှစ်အတွင်း ယူဂန္ဓာတွင် ဘုရားသခင့်နိုင်ငံတော်ခန်းမသစ် အလုံးပေါင်း ၄၀ ပြီးစီးခဲ့သည်။ ယနေ့ အသင်းတော်အားလုံးနီးပါးတွင် ရိုးရှင်းသောပုံစံဖြင့် ကိုယ်ပိုင်နိုင်ငံတော်ခန်းမ ရှိနေပြီ။ ယင်းသည် ဒေသခံများအား “ကျွန်တော်တို့ ဒီမှာရှိနေမယ်” ဟုအသိပေးလိုက်သည့်နှယ်ဖြစ်သည်။ ယင်းကြောင့်လည်း တိုးတက်လာခဲ့သည်။
ယူဂန္ဓာမြောက်ပိုင်းရှိ အသင်းတော်ငယ်တစ်ခုသည် အရိပ်ရသောသရက်ပင်များအောက်တွင် အစည်းအဝေးများ ကျင်းပခဲ့ကြသည်။ မြေကွက်ရသောအခါ အလျင်အမြန် လုပ်ငန်းစခဲ့ကြသည်။ ဆောက်လုပ်ရေးညီအစ်ကိုများသည် ဒေသခံသက်သေခံများနှင့်အတူ ဘုရားသခင့်နိုင်ငံတော်ခန်းမတစ်လုံး စတင်ဆောက်လုပ်ကြသည်။ ထိုဒေသရှိ အထင်ကရ နိုင်ငံရေးသမားဟောင်းတစ်ဦးသည် အထင်ကြီးလေးစားသွားရာ ဘုရားသခင့်နိုင်ငံတော်ခန်းမပြီးသည့်အထိ သူ၏ဂိုဒေါင်တွင် အစည်းအဝေးများကျင်းပရန် ကမ်းလှမ်းခဲ့သည်။ ဆောက်လုပ်ရေးညီအစ်ကိုတစ်ဦးနှင့်လည်း ကျမ်းစာသင်အံမှုပြုခဲ့သည်။ ယခု သူသည် နှစ်ခြင်းခံပြီးသော ထက်သန်သည့်ကြေညာသူတစ်ဦးဖြစ်နေပြီး လှပသောနိုင်ငံတော်ခန်းမအသစ်တွင် ယေဟောဝါကို ပျော်ရွှင်စွာဝတ်ပြုနေပြီ။
နိုင်ငံအရှေ့တောင်ပိုင်းရှိ ဘုရားသခင့်နိုင်ငံတော်ခန်းမဆောက်လုပ်ရေး စီမံကိန်းတစ်ခုတွင် ဒေသခံပန်းရန်ဆရာတစ်ဦးသည် ညီအစ်ကိုများ၏ ဖော်ရွေမှု၊ မေတ္တာနှင့် ပူးပေါင်းဆောင်ရွက်သည့်စိတ်ဓာတ်တို့ကို အလွန်အထင်ကြီးလေးစားသွားပြီး စေတနာ့ဝန်ထမ်းအဖြစ် လာရောက်ကူညီခဲ့သည်။ စီမံကိန်းပြီးခါနီးတွင် နောက်တစ်နေ့မနက်၌ပြုလုပ်မည့် အပ်နှံပွဲအတွက် အသင့်ဖြစ်နိုင်ရန် ခန်းမလက်စသတ်ခြင်းအလုပ်ကို တစ်ညလုံး လုပ်ခဲ့သည်။ သူဤသို့မှတ်ချက်ချသည်– “ခင်ဗျားတို့က အပြောနဲ့မဟုတ်ဘဲ လက်တွေ့ချစ်တဲ့သူတွေပဲ။”
အခက်အခဲများကြား တိုးပွားမည့် အလားအလာ
ယူဂန္ဓာရှိ ရပ်ကွက်သစ်များတွင် ဟောပြောနေကြသောကြောင့် သက်သေခံများ ပုံမှန်တိုးများလာပြီး စိတ်ဝင်စားသူများစွာလည်း အသင်းတော်နှင့် ပူးပေါင်းလာနေကြသည်။ သို့သော် ယူဂန္ဓာနိုင်ငံအတွင်းသို့ တဖွဲဖွဲ ဝင်ရောက်လာနေသော များပြားလှသည့် ဒုက္ခသည်များကို ဟောပြောရန် အရေးတကြီးလိုအပ်နေသည်။ အိမ်နီးချင်းနိုင်ငံများတွင်ဖြစ်သော ပြည်တွင်းစစ်များက ယေဟောဝါ၏လူမျိုးကိုလည်း ထိခိုက်ခဲ့သည်။ ဒုက္ခသည်စခန်းများရှိ သက်သေခံများသည် ယေဟောဝါကို အလွန်ယုံကြည်ကိုးစားကြောင်း ဖော်ပြခဲ့ကြသည်။ အိမ်နီးချင်းနိုင်ငံတစ်နိုင်ငံတွင် သက်သေခံများကို ပိတ်ပင်ခဲ့စဉ်က သူတို့ကို ညှဉ်းပန်းနှိပ်စက်ခဲ့သူ အစိုးရအရာရှိဟောင်းတစ်ဦးသည် သက်သောင့်သက်သာဇိမ်ကျကျ နေလာခဲ့သူဖြစ်သည်။ ဒုက္ခသည်စခန်းတစ်ခုတွင် သက်သေခံများနှင့် ကျမ်းစာလေ့လာပြီးနောက် သူဤသို့ကောက်ချက်ချခဲ့သည်– “ဒီလောကမှာ ချမ်းသာပြီး ရာထူးရာခံရှိတာဟာ တကယ့်တန်ဖိုးအစစ်အမှန်မဟုတ်ဘူး။ အခု ကျွန်တော် ဆင်းရဲပြီး မကျန်းမာပေမဲ့ ကျွန်တော့်ဘဝက ဟိုးအရင်ကထက် အများကြီးပိုကောင်းတယ်။ ယေဟောဝါကိုသိပြီး ကိုယ်တော့်ထံ ဆုတောင်းရတဲ့အခွင့်ထူးကို ကျေးဇူးတင်လေးမြတ်တယ်။ အနာဂတ်နဲ့ပတ်သက်ပြီး ခိုင်မာတဲ့မျှော်လင့်ချက်ရှိတဲ့အတွက် ဒီနေ့ခေတ် ပြဿနာတွေကို ဘာကြောင့်ခံနိုင်ရည်ရှိရမယ်ဆိုတာ ကျွန်တော်သိတယ်။ ဒါကြောင့် အရင်က တစ်ခါမှမခံစားခဲ့ရဖူးတဲ့ စိတ်ငြိမ်သက်မှုခံစားနေရတယ်။”
မြေသြဇာကောင်းသော ယူဂန္ဓာမြေနှင့်ပတ်သက်၍ တုတ်တစ်ချောင်းကို ညနေချိန်တွင် ထိုးစိုက်ထားမည်ဆိုလျှင် နံနက်ရောက်သောအခါ အမြစ်ပေါက်လိမ့်မည်ဟူသော ဆိုရိုးစကားရှိ၏။ ထိုနိုင်ငံ၏ ဝိညာဉ်ရေးတိုးတက်မှုကြောင့် ဝိညာဉ်ရေးမြေလည်း အလွန်မြေသြဇာကောင်းကြောင်း ကောက်ချက်ချနိုင်သည်။ ယူဂန္ဓာရှိ တိုင်းရင်းသားများ ယေဟောဝါဘုရားသခင်၏ နိုင်ငံတော်အကြောင်း သိရှိလာရန် ကိုယ်တော် အချိန်ပေးထားသည့်အတွက် ကျွန်ုပ်တို့ ကျေးဇူးတင်နိုင်သည်။ ယေရှုသည် ဘုရားသခင့်နိုင်ငံတော်၏အဖိုးတန်မှုကို “အလွန်အဖိုးထိုက်သောပုလဲ” နှင့် ခိုင်းနှိုင်းခဲ့ပြီး ယူဂန္ဓာတွင် ယင်းကို သိရှိလာသူ များသည်ထက်များလာနေပြီ။—မဿဲ ၁၃:၄၅၊ ၄၆။
[အောက်ခြေမှတ်ချက်]
^ အပိုဒ်၊ 13 ယေဟောဝါသက်သေများ ထုတ်ဝေသည်။
[စာမျက်နှာ ၈ ပါ ရုပ်ပုံ
(ကားချပ်အပြည့်အစုံကို စာစောင်တွင်ကြည့်ပါ)
ဆူဒန်
ယူဂန္ဓာ
နိုင်းလ်မြစ်
ကာမူလီ
တိုရိုရို
ကမ်ပါလာ
ဘူရှန်ယီ
ဝိတိုရိယအိုင်
ကင်ညာ
တန်ဇန်းနီးယား
ရဝမ်ဒါ
[စာမျက်နှာ ၉ ပါ ရုပ်ပုံ]
ထက်သန်သော ရှေ့ဆောင်ဓမ္မအမှုဆောင်များစွာထဲမှ သုံးဦး
[စာမျက်နှာ ၁၀ ပါ ရုပ်ပုံ]
ပက်ထရစ်
[စာမျက်နှာ ၁၀ ပါ ရုပ်ပုံ]
မာဂရက်
[စာမျက်နှာ ၁၀ ပါ ရုပ်ပုံ]
ဆိုင်မန်
[စာမျက်နှာ ၁၀ ပါ ရုပ်ပုံ]
တိုရိုရိုမြို့တွင် ကျင်းပသော ခရိုင်စည်းဝေးကြီး
[Picture Credit Line on page 8]
Background: © Uganda Tourist Board