လူငယ်တို့၊ ယေဟောဝါ​အား ဝတ်ပြု​ရန် ရွေး​ကြလော့

‘အဘယ်​မည်​သော​ဘုရားသခင်​တို့အား ဝတ်ပြု​မည်​အရာ​ကို ယနေ့ ရွေး​ကြလော့။’—ယောရှု ၂၄:၁၅။

၁၊ ၂။ အဘယ်​မှားယွင်းသော​နှစ်ခြင်း​မျိုးကို ခရစ်ယာန်ဘောင်​တွင် တွေ့ရှိ​ရသနည်း။

အေဒီ ဒုတိယ​ရာစုနှစ်​အကုန်ပိုင်း​တွင် စာရေး​ဆရာ​တာတူလျန်​က “ခရစ်တော်​ကို [ကလေး​များ] သိကျွမ်း​နိုင်ပြီ​ဆိုလျှင် ခရစ်ယာန်​ဖြစ်​ကြ​ပါစေ” ဟု​ရေးသားခဲ့​သည်။ သူ့​ခေတ်​က အယူဖောက်ပြန်​သော​ခရစ်ယာန်​ဘာသာ​တရား​တွင် အမြစ်စွဲ​နေသည့် နို့စို့အရွယ်​ကလေး​များ​အား နှစ်ခြင်း​ပေးခြင်း​ကို သူ​ကန့်ကွက်​နေခြင်း​ဖြစ်သည်။ တာတူလျန်​နှင့် သမ္မာကျမ်းစာ​တို့ကို ဆန့်ကျင်​၍ ချာ့ခ်ျ​ဖခင်​သြဂတ်စတင်း​က နှစ်ခြင်း​သည် မွေးရာပါ​အပြစ်ကို ဆေးကြော​ပေး​သည်၊ နှစ်ခြင်း​မခံ​ဘဲ​သေဆုံး​သွားသော နို့စို့​ကလေး​များ ငရဲ​၌​ပြစ်ဒဏ်​ခံရ​မည်​ဟု ဆို​ခဲ့​၏။ ထို​ယုံကြည်ချက်​ကြောင့် ကလေး​များ​ကို မြန်​နိုင်​သမျှ​မြန်မြန် နှစ်ခြင်း​ပေး​တတ်ကြ​သည်။

^၂ ခရစ်ယာန်ဘောင်​၏​ပင်မ​ချာ့ခ်ျ​များစွာ​သည် မွေးကင်းစ​ကလေး​များ​ကို နှစ်ခြင်း​ပေး​နေကြ​ဆဲ​ရှိသည်။ ထို့​ပြင် သမိုင်း​တစ်လျှောက် ခရစ်ယာန်​အမည်ခံ​နိုင်ငံ​များ​မှ အုပ်စိုးရှင်​များနှင့် ဘာသာရေး​ခေါင်းဆောင်​များသည် ဖမ်းဆီး​ရ​မိ​သော “အယူမှား​သူများ” ကို အတင်းအကျပ် နှစ်ခြင်း​ပေး​ကြသည်။ သို့သော် နို့စို့အရွယ်​ကလေး​အား နှစ်ခြင်း​ပေးခြင်း​နှင့် လူကြီး​များ​အား အနိုင်အထက်ပြု​၍ နှစ်ခြင်း​ပေးခြင်း​တို့ကို သမ္မာကျမ်းစာ​တွင် မ​တွေ့ရှိ​ရ​ချေ။

ယနေ့ စိတ်ဆန္ဒ​မပါဘဲ အပ်နှံခြင်း​မရှိ

၃၊ ၄။ အပ်နှံ​ထားသော​မိဘများ​၏ သားသမီး​များ​ကို အဘယ်အရာက စိတ်လို​ကိုယ်​လျောက် အပ်နှံသူ​ဖြစ်လာ​စေနိုင်​သနည်း။

^၃ မိဘ​တစ်ဦးတည်း​သာ သစ္စာရှိ​ခရစ်ယာန်​ဖြစ်​လင့်​ကစား ကလေးငယ်​များ​ကို စင်ကြယ်​သည်​ဟု ဘုရားသခင်​ယူမှတ်​ကြောင်း သမ္မာကျမ်းစာ​က ဖော်ပြ​၏။ (၁ ကောရိန္သု ၇:၁၄) ဤသို့​သောက​လေး​ငယ်​များသည် ယေဟောဝါ​၏​အပ်နှံ​ထားသော​ကျေးကျွန်​များ ဖြစ်သွား​သလော။ မဖြစ်​ပါ။ သို့သော် ယေဟောဝါ​ထံ အပ်နှံ​ထားသော​မိဘများ​၏​လက်အောက်​တွင် ကြီးပြင်း​လာ​ကြသော ကလေးငယ်​များသည် မိမိ​ဆန္ဒ​အရ ကိုယ်တော်​ထံ အပ်နှံ​နိုင်​သည့်​လေ့ကျင့်မှု​ကို ရရှိ​ကြသည်။ ပညာရှိ​ဘုရင်​ရှောလမုန်က ဤသို့​ရေးသားခဲ့​၏– “ငါ့​သား အဘ​၏​ပညတ်စကား​ကို နားထောင်​လော့။ အမိ​ပေး​သော​တရားကို မ​ပယ်​နှင့်။ . . . သင်သည် အခြား​သို့​သွားသော​အခါ ထို​ပညတ်တရား​သည် လမ်းပြ​လိမ့်​မည်။ အိပ်​သောအခါ သင့်ကို​စောင့်​လိမ့်​မည်။ နိုး​သောအခါ သင်​နှင့်​နှုတ်ဆက်​လိမ့်​မည်။ အကြောင်း​မူ​ကား ပညတ်တော်​သည် မီးခွက်​ဖြစ်၏။ တရားတော်​သည် အလင်း​ဖြစ်၏။ အပြစ်ကို​ပြ​တတ်သော[ဆုံးမ]စကား​သည် အသက်​လမ်း​ဖြစ်၏။”—သု. ၆:၂၀-၂၃။

^၄ ခရစ်ယာန်​မိဘများ​၏​လမ်းညွှန်မှုကို လူငယ်များ လိုက်နာ​ကြ​မည်​ဆိုလျှင် ကာကွယ်​မှု​ရနိုင်​သည်။ ရှောလမုန်ကလည်း ဤသို့​ဖော်ပြ​၏– “ပညာ​ရှိသော​သား​သည် အဘ​ဝမ်းမြောက်ခြင်း​အကြောင်း၊ မိုက်​သော​သား​မူ​ကား အမိ​ဝမ်းနည်းခြင်း​အကြောင်းကို ဖြစ်စေ​တတ်၏။” “ငါ့​သား ငါ့​စကား​ကို​နားထောင်​၍ ပညာရှိ​သဖြင့် ကိုယ်​စိတ်နှလုံး​ကို လမ်းမ​၌ ပဲ့ပြင်​လော့။” (သု. ၁၀:၁; ၂၃:၁၉) အသင်​လူငယ်တို့၊ မိဘ​၏​လေ့ကျင့်မှု​မှ အကျိုး​ရယူ​နိုင်​ရန် အကြံပြုချက်၊ ဆုံးမ​စကား​နှင့် ပဲ့ပြင်​မှု​တို့ကို တလိုတလား လက်ခံ​နာယူ​ရမည်။ သို့ဖြင့် သင်တို့သည် ပညာရှိ​အနေ​နှင့် မွေးဖွား​လာ​ခြင်း​မဟုတ်သော်လည်း “ပညာရှိ” ဖြစ်လာ​ပြီး “အသက်​လမ်း” အတိုင်း စိတ်လို​ကိုယ်​လျောက် လိုက်လျှောက်​နိုင်​ကြ​ပါ​သည်။

အလိုတော်နှင့်​ညီ​ခြင်း​ဟူသည် အဘယ်နည်း

၅။ ပေါလု​သည် သားသမီး​များနှင့် ဖခင်​များ​ကို အဘယ်​ဆုံးမ​စကားပြော​ခဲ့​သနည်း။

^၅ တမန်​တော်​ပေါလု​က ဤသို့​ရေးသားခဲ့​သည်– ‘သားသမီးတို့၊ သခင်​ဘုရား​၏​အလိုတော်နှင့်​အညီ မိဘ​စကား​ကို နားထောင်​ကြလော့။ မိဘ​စကား​ကို နားထောင်ခြင်း​အမှုသည် တရားသော​အမှု​ဖြစ်၏။ မိဘကို​ရိုသေ​စွာ​ပြု​လော့။ ဤ​ပညတ်တော်​ကား သင်သည် ပြည်တော်​၌​ကောင်း​စား၍ အသက်တာ​ရှည်​မည်​အကြောင်း​ဟူ၍ ကတိတော်​နှင့်​ဆိုင်သော ပထမ​ပညတ်​ဖြစ်၏။ အဘ​တို့၊ ကိုယ်​သားသမီးကို စိတ်ဆိုး​စေခြင်း​ငှာ မပြု​ကြ​နှင့်။ ဘုရားသခင်​၏​အလိုတော်နှင့်​ညီသော ဆုံးမ​သွန်သင်ခြင်း​ကို​ပြုလျက် ကျွေးမွေး​ကြလော့။’—ဧဖက် ၆:၁-၄။

၆၊ ၇။ ‘ယေဟောဝါ​၏​အလိုတော်နှင့်​အညီ’ သားသမီး​များ​ကို ပြုစု​ပျိုးထောင်​ခြင်း​တွင် အဘယ်အရာ​ပါဝင်​သနည်း။ ယင်းက မိဘများသည် သားသမီး​များ​ကို မတရား​ပြု​ရာ​ကျ​သည်​ဟု အဘယ်ကြောင့်​မဆိုလို​သနည်း။

^၆ ခရစ်ယာန်​မိဘများသည် သားသမီး​များ​ကို ‘ဘုရားသခင်​၏​အလိုတော်နှင့်​အညီ ဆုံးမ​သွန်သင်’ ၍​ပြုစု​ပျိုးထောင်​သည့်​အခါ သူတို့​အပေါ် မတရား​ပြု​ရာ​ကျ​သလော။ မကျ​ပါ။ မှန်ကန်​ပြီး ကိုယ်ကျင့်တရား​ကောင်းမွန်​စေ​သည်​ဟု ထင်မှတ်​ရာ​များ​ကို သားသမီး​များ​အား မိဘများ သွန်သင်ပေး​ရာ​တွင် အဘယ်သူ​က ပြစ်တင်​ဝေဖန်​နိုင်​သနည်း။ ဘုရားသခင်​မရှိ​ဟု သားသမီး​များ​ကို သွန်သင်ပေး​သည့် ဘာသာ​တရား​မဲ့​ဝါဒီ​များ​ကို အပြစ်မတင်​ကြ​ချေ။ သားသမီး​များ​ကို ကက်သလစ်​ယုံကြည်ချက် သွန်သင်ပေး​ရန် တာဝန်​ရှိသည်​ဟု ရိုမန်ကက်သလစ်​များ​က ယူမှတ်​ကြ​ပြီး ထိုသို့​ပြုခြင်း​အတွက် သူတို့ကိုလည်း အပြစ်မတင်​ကြ​ချေ။ ထို​နည်းတူ၊ ယေဟောဝါသက်သေ​များသည် အခြေခံ​အမှန်တရား​များ၊ ကိုယ်ကျင့်တရား​မူများ​နှင့်​ပတ်သက်​သည့် ယေဟောဝါ​၏​စဉ်းစား​တွေးခေါ်ပုံ​မျိုး မိမိတို့​သားသမီး​များ​တွင်​ရှိလာ​ရန် လေ့ကျင့်ပေး​ကြ​သည့်​အတွက် သားသမီး​များ​၏​စိတ်​ကို ချုပ်ကိုင်​ထား​သည်​ဟု သူတို့ကို မစွပ်စွဲ​သင့်​ချေ။

^၇ ဓမ္မသစ်​ကျမ်း​၏​ဘာသာရေးဆိုင်ရာ​အဘိဓာန်​၏​အဆို​အရ ဧဖက် ၆:၄ ပါ “အလိုတော်နှင့်​ညီသော” ဟု​ပြန်ဆို​ထားသော မူရင်း​ဂရိ​စကားလုံး​သည် “စိတ်ပိုင်း​ဆိုင်ရာ တည့်မတ်​ပေး​ရန်၊ အမှား ပြုပြင်ပေး​ရန်၊ ဝိညာဉ်​ရေး​စိတ်ထား​ရှိလာ​ရန် ကြိုးစား” သည့်​ဖြစ်​စဉ်​ကို ရည်ညွှန်း၏။ လူငယ်​တစ်ဦး​သည် ရွယ်တူချင်း​ဖိအား​ကြောင့် ရွယ်တူ​တို့​ကဲ့သို့ ပြုလုပ်​လို​စိတ်​ရှိသည့်​အတွက် မိဘ​၏​လေ့ကျင့်ပေး​မှု​ကို အာခံ​လျှင်​ကော အသို့နည်း။ သူ့ကို ဖျက်ဆီး​မည့်​သူ​မှာ မိဘများ​လော၊ ရွယ်တူချင်း​များ​လော။ မူးယစ်​ဆေး​သုံးစွဲ​ရန်၊ အရက်​အလွန်အကျွံ​သောက်​ရန်၊ အကျင့်ပျက်​ပြား​ရန် ရွယ်တူချင်း​များ​က ဖိအားပေး​နေလျှင် မိမိတို့​ကလေး​၏​စဉ်းစား​တွေးခေါ်ပုံ​ကို ပြုပြင်​ပြောင်းလဲ​ပြီး မကောင်းသော​အမူအကျင့်​၏​ဆိုးကျိုး​များ​ကို သဘောပေါက်​ရန် ကြိုးစား​ကူညီ​နေကြ​သည့် မိဘများ​ကို အပြစ်တင်​သင့်​သလော။

၈။ တိမောသေ​ကို ယုံကြည်သူ​ဖြစ်လာ​စေခြင်း​တွင် အဘယ်အရာ​ပါဝင်​သနည်း။

^၈ တမန်​တော်​ပေါလု​က လူငယ်​တိမောသေ​ကို ဤသို့​စာရေး​ခဲ့​၏– “သင်သည် အဘယ်သူ​ထံ​၌ နည်းခံ​ခဲ့​ပြီး​သည်ကို​လည်းကောင်း၊ ယေရှု​ခရစ်​ကို ယုံကြည်ခြင်း​အားဖြင့် ကယ်တင်ခြင်း​အ​လို့​ငှာ ပညာ​ကို​ပေး​နိုင်သော ဓမ္မ​ကျမ်းစာ​ကို ငယ်​သော​အရွယ်​မှ​စ၍ လေ့​ကျက်​သည်ကို​လည်းကောင်း သိမှတ်​သည်​နှင့် အထက်​က​သင်​၍ နှလုံး​သွင်း​မိ​သော​အယူဝါဒ​၌ တည်​နေလော့။” (၂ တိမောသေ ၃:၁၄၊ ၁၅) တိမောသေ​၏​မိခင်​နှင့်​အဘွား​တို့သည် တိမောသေ​အား ကလေး​ဘဝက​တည်း​က သမ္မာကျမ်းစာ​အသိပညာကို​အခြေခံ​ပြီး ဘုရားသခင်​အပေါ် သူ၏​ယုံကြည်ခြင်း​ခိုင်မြဲ​လာရန် သွန်သင်​ပေး​ခဲ့​ကြသည်။ (တမန်​တော် ၁၆:၁; ၂ တိမောသေ ၁:၅) နောက်ပိုင်း​တွင် သူတို့သည် ခရစ်ယာန်​များ​ဖြစ်လာ​ကြသောအခါ တိမောသေ​ကို ယုံကြည်သူ​ဖြစ်လာ​ရန် မတိုက်တွန်း​ခဲ့​သော်လည်း ကျမ်းစာ​အသိပညာ​ပေါ်​မူတည်ပြီး ကောင်းစွာ​ကျိုးကြောင်း​ဆင်ခြင်​ပြ​ခြင်း​ဖြင့် ယုံကြည်သူ​ဖြစ်လာ​စေ​သည်။

ယေဟောဝါ သင့်ကို ရွေးချယ်​စေ

၉။ (က) ယေဟောဝါ​သည် လူသားများ​ကို မည်သို့​ဂုဏ်တင်​ခဲ့​သနည်း။ အဘယ်​အတွက်​ကြောင့်​နည်း။ (ခ) ဘုရားသခင်​၏​တစ်ပါး​တည်း​သော​သားတော်​သည် ကိုယ်ပိုင်​လွတ်လပ်ခွင့်ကို မည်သို့​အသုံးပြု​ခဲ့​သနည်း။

^၉ ယေဟောဝါ​သည် မိမိ​အလိုကို​သာ​ဆောင်ရွက်​စေပြီး တခြား​လုပ်ပိုင်ခွင့်​မရှိစေရန် လူသားများ​ကို စက်ရုပ်​သဖွယ် ဖန်ဆင်း​နိုင်​သည်။ သို့သော် ထိုသို့​မဖန်ဆင်း​ဘဲ ကိုယ်ပိုင်​လွတ်လပ်ခွင့်​ပေး၍ ဂုဏ်တင်​ခဲ့​သည်။ ကျွန်ုပ်​တို့၏​ဘုရားသခင်​သည် စိတ်လို​ကိုယ်​လျောက် လက်အောက်ခံခြင်း​ကို အလိုတော်​ရှိ၏။ လူသားများ ကြီးငယ်မရွေး မိမိကို​ချစ်​သည့်​စိတ်ဖြင့် ဝတ်ပြု​နေကြ​သည်ကို တွေ့မြင်​ရ​၍ အားရ​နှစ်သက်​တော်​မူ​၏။ ယေဟောဝါ​၏​အလိုတော်ကို ချစ်​သည့်​စိတ်ဖြင့် လက်အောက်ခံ​သည့် အကောင်းဆုံး​စံနမူနာ​ရှင်​မှာ  ကိုယ်တော်​၏  တစ်ပါး​တည်း​သော​သားတော်​ဖြစ်သည်။ ထို​သားတော်​အကြောင်းကို ကိုယ်တော် ဤသို့​မိန့်တော်မူ​ခဲ့​သည်– “ဤ​သူ​ကား ငါ​နှစ်သက်​မြတ်နိုးရာ ငါ​၏​ချစ်​သား​ပေ​တည်း။” (မဿဲ ၃:၁၇) ဤ​သားဦး​က ခမည်းတော်​ကို ဤသို့​မိန့်ဆိုခဲ့​၏– “အကျွန်ုပ်၏​ဘုရားသခင် ကိုယ်တော်​၏​အလိုကို​ဆောင်​ရာ​၌ အကျွန်ုပ်သည် အားရ​ဝမ်းမြောက်​ပါ​၏။ ကိုယ်တော်​၏​တရားသည်​လည်း အကျွန်ုပ်​နှလုံး​ထဲမှာ​ရှိပါ၏။”—ဆာလံ ၄၀:၈; ဟေဗြဲ ၁၀:၉၊ ၁၀။

၁၀။ ယေဟောဝါ​နှစ်သက်သော  ဝတ်ပြု​ကိုးကွယ်​ခြင်း​၏  အခြေခံ​ကား အဘယ်နည်း။

^၁၀ ယေဟောဝါ​သည် မိမိ​သားတော်​၏​ညွှန်ကြားမှု​အောက်တွင် အမှုဆောင်​နေကြ​သူများ​ထံ​မှ​လည်း ထို​နည်းတူ စိတ်လို​ကိုယ်​လျောက် လက်အောက်ခံ​ရန် မျှော်လင့်​တော်​မူ​၏။ ဆာလံဆရာ​သည် ပရောဖက်ပြု​၍ ဤသို့​သီဆို​ခဲ့​သည်– “တန်ခိုးတော်​ပြ​သော​နေ့ရက်​ကာလ​၌ ကိုယ်တော်​၏​လူတို့သည် သန့်ရှင်းသော​တန်ဆာ​ကို​ဆင်​လျက် ကြည်ညို​သော​စေတနာ​စိတ်​ရှိ၍ လူပျို​တော်​တို့သည် နံနက်​ဝမ်း​ထဲ​က​ထွက်​သော ဆီးနှင်း​ကဲ့သို့​ဖြစ်​ကြ​ပါ​လိမ့်​မည်။” (ဆာလံ ၁၁၀:၃) ယေဟောဝါ​၏​ကောင်းကင်​မြေကြီးဆိုင်ရာ အဖွဲ့အစည်း​တစ်ရပ်လုံး​သည် ဘုရားသခင်​ကို ချစ်​သည့်​စိတ်ဖြင့် အလိုတော်အတိုင်း လက်အောက်ခံ​၍ အမှုဆောင်​နေကြ​သည်။

၁၁။ အပ်နှံ​ထားသော​မိဘများ​၏ လက်အောက်​တွင် ကြီးပြင်း​လာ​ကြသော လူငယ်များသည် အဘယ်​ရွေးချယ်မှု ပြုလုပ်​ရမည်​နည်း။

^၁၁ ထို့​ကြောင့် အသင်​လူငယ်တို့၊ သင်တို့၏​မိဘ​က​ဖြစ်စေ၊ အသင်းတော်​မှ ခရစ်ယာန်​အကြီးအကဲ​များ​က​ဖြစ်စေ သင့်ကို နှစ်ခြင်း​ခံရန် အတင်းအကျပ်​တိုက်တွန်း​မည်​မဟုတ်​ကြောင်း သဘောပေါက်​ထား​သင့်​သည်။ ယေဟောဝါ​ကို ဝတ်ပြုလို​ခြင်း​သည် သင့်​နှလုံးသား​မှ ဖြစ်ပေါ်​လာ​ရမည်။ ရှေးခေတ်​က ယောရှု​သည် ဣသရေလလူ​တို့ကို ဤသို့​ပြော​ခဲ့​သည်– ‘ထာဝရ​ဘုရားသခင်​ကို . . . ကြည်ဖြူ​ခြင်း၊ သစ္စာစောင့်ခြင်း​နှင့်​တကွ ဝတ်ပြု​ကြလော့။  . . .  အဘယ်​မည်​သော​ဘုရား​တို့အား ဝတ်ပြု​မည်​အရာ​ကို ယနေ့ ရွေး​ကြလော့။’ (ယောရှု ၂၄:၁၄-၂၂) ထို​နည်းတူ ယေဟောဝါ​ထံ အပ်နှံ​ပြီး ကိုယ်တော်​၏​အလိုတော်ကို ဆောင်ရွက်ရန် မိမိ၏​ဘဝကို ပေးဆက်ခြင်း​သည် သင့်ကိုယ်​ပိုင်​ရွေးချယ်မှု​ဖြစ်​ရမည်။

သင်၏​တာဝန်​ကို လက်ခံ​လော့

၁၂။ (က) မိဘများသည် သားသမီး​များ​ကို လေ့ကျင့်ပေး​နိုင်​သော်လည်း သူတို့​အတွက် အဘယ်အရာ မပြု​လုပ်ပေး​နိုင်​သနည်း။ (ခ) လူငယ်​တစ်ဦး​သည် မိမိ၏​ရွေးချယ်မှု​အတွက် အဘယ်​အချိန်၌ ယေဟောဝါ​ရှေ့တွင် တာဝန်​ယူရ​သနည်း။

^၁၂ မိဘများ​၏​သစ္စာရှိ​မှု​က အသင်​လူငယ်တို့​ကို  ကာကွယ်​မှု  မပေးနိုင်​တော့​သည့်​အချိန် ရောက်လာ​လိမ့်​မည်။ (၁ ကောရိန္သု ၇:၁၄) တပည့်​ဖြစ်သူ ယာကုပ်​က  ဤသို့​ရေးသားခဲ့​သည်– “ကောင်းသော​အကျင့်ကို​သိ​လျက် မကျင့်​ဘဲ​နေသော​သူသည် အပြစ်ရှိ​၏။” (ယာကုပ် ၄:၁၇) မိဘများ​က သားသမီး​များ​ကိုယ်စား ဘုရားသခင်​ကို ဝတ်မပြု​ပေး​နိုင်​သကဲ့သို့ သားသမီး​များ​က​လည်း မိဘများ​ကိုယ်စား ဝတ်မပြု​ပေး​နိုင်​ချေ။ (ယေဇကျေလ ၁၈:၂၀) သင်သည် ယေဟောဝါ​နှင့် ကိုယ်တော်​၏​ရည်ရွယ်ချက်များ​ကို သင်ယူ​နေပြီ​လော။ ယင်း​တို့ကို နားလည်​ပြီး ကိုယ်တော်​နှင့် နှစ်ကိုယ်ကြား​ဆက်ဆံ​ရေး စတင်​ထူထောင်​နိုင်​သည့်​အရွယ် ရောက်ပြီ​လော။ သို့​ဆိုလျှင် မိမိ​အား​ဝတ်ပြု​ကိုးကွယ်​ရန် ဆုံးဖြတ်ချက်​ချ​နိုင်ပြီ​ဟု သင့်ကို ဘုရားသခင် ယူမှတ်ခြင်း​က ယုတ္တိတန်​သည်မဟုတ်​လော။

၁၃။ နှစ်ခြင်း​မခံရ​သေး​သော​လူငယ်များသည် မိမိကိုယ်ကို အဘယ်​မေးခွန်းများ မေးသင့်​သနည်း။

^၁၃ သင်သည် ဘုရားသခင်​ကို​ကြောက်ရွံ့​သော မိဘများ​၏​လက်အောက်​တွင် ကြီးပြင်း​လာပြီး ခရစ်ယာန်​အစည်းအဝေး​များ တက်ရောက်​ကာ ဘုရားသခင့်​နိုင်ငံတော်​သတင်းကောင်း ဟောပြောခြင်း​တွင်​ပင် ပါဝင်​နေသည့် နှစ်ခြင်း​မခံရ​သေး​သော လူငယ်​တစ်ဦး​ဖြစ်သလော။ သို့​ဆိုလျှင် မိမိကိုယ်ကို ဤသို့​ရိုးသား​စွာ​မေးကြည့်ပါ– ‘ငါ ဘာကြောင့် စည်းဝေး​တက်၊ အမှုဆောင်ထွက်​နေရ​တာလဲ။ မိဘတွေက အတင်းအကျပ်​ခိုင်း​လို့လား၊ ဒါမှ​မဟုတ် ယေဟောဝါ​ရဲ့​စိတ်တော်​နဲ့​တွေ့ချင်​လို့လား။’ “ကောင်းမြတ်သော​အရာ၊ နှစ်သက်ဖွယ်သော​အရာ၊ စုံလင်သော​အရာ​တည်း​ဟူသော ဘုရားသခင်​အလိုတော်​ရှိသော​အရာ​သည် အဘယ်အရာ​ဖြစ်သည်​ကို” ကိုယ်တိုင် သင်ယူပြီး​ပြီ​လော။—ရောမ ၁၂:၂။

နှစ်ခြင်း​ခံရန် အဘယ်ကြောင့် အချိန်ဆွဲ​နေသနည်း

၁၄။ နှစ်ခြင်း​ခံရန် အကြောင်းမဲ့​အချိန်​မ​ဆွဲ​သင့်​ကြောင်း အဘယ်​ကျမ်းစာ​ပုံ​နမူနာ​များ​က ဖော်ပြ​သနည်း။

^၁၄ ‘အကျွန်ုပ်​ကို နှစ်ခြင်း​မခံ​စေခြင်း​ငှာ မည်သည့်​အကြောင်း ဆီးတား​ပါ​သနည်း။’ ဧဝံဂေလိတရား​ဟော​သူ ဖိလိပ္ပု​ကို အဆိုပါ​မေးခွန်းထုတ်​ခဲ့​သော အဲသယောပိ​လူက ယေရှုသည် မေရှိယ​ဖြစ်​ကြောင်း သိရှိ​ခါ​စ​ပင်​ရှိသေး​သည်။ သို့သော် အဲသယောပိ​လူ​တွင် ကျမ်းစာ​အသိပညာ အလုံအလောက်​ရှိပြီး ထို​အသိပညာက ယခု​မှ​စ၍ မိမိသည် ခရစ်ယာန်​အသင်းသား​တစ်ဦး​အဖြစ် ယေဟောဝါ​အား ဝတ်ပြု​ကိုးကွယ်​မည်​ဖြစ်​ကြောင်း လူသိရှင်ကြား​ကြေညာ​ရန် အချိန်​မ​ဆွဲ​သင့်​ဟူ​သည့်​အချက်​ကို သူ့​အား သဘောပေါက်​စေ​သည်။ ထိုသို့​ပြုလုပ်ခြင်း​က သူ့ကို အလွန်​ပျော်ရွှင်​စေ​ခဲ့​သည်။ (တမန်​တော် ၈:၂၆-၃၉) ထို​နည်းတူ၊ လုဒိ​အမည်​ရှိ အမျိုးသမီး​တစ်ဦး​သည် သူ၏​နှလုံးကို​ဖွင့်​၍ “ပေါလု​ဟောပြောသော​အရာ​ကို မှီဝဲ​ဆည်းကပ်” ပြီး သူနှင့်​သူ၏​အိမ်သူအိမ်သား​များသည် မဆိုင်းမတွ ‘နှစ်ခြင်း’ ခံ​ခဲ့​ကြသည်။ (တမန်​တော် ၁၆:၁၄၊ ၁၅) ထို​နည်းတူ၊ ဖိလိပ္ပိ​မြို့မှ ထောင်မှူး​သည် ‘ဘုရားသခင်​၏​တရားတော်’ နှင့်​ပတ်သက်​သည့် ပေါလု​နှင့်​သိလ​တို့၏​ဟောပြောချက်ကို နားထောင်ပြီး ‘ချက်ချင်း နှစ်ခြင်း​ခံ​လေ​၏။’ (တမန်​တော် ၁၆:၂၅-၃၄) ထို့​ကြောင့် သင်သည် ယေဟောဝါ၊ ကိုယ်တော်​၏​ရည်ရွယ်ချက်များ​နှင့်​ပတ်သက်​သည့် အခြေခံ​အသိပညာ​ရှိပြီး ကိုယ်တော်​၏​အလိုတော်ကို စိတ်ရင်းမှန်​ဖြင့် ထမ်းဆောင်​နေလျှင်၊ အသင်းတော်တွင် နာမည်​ကောင်း​ရှိ​ထားပြီး အစည်းအဝေး​များ​ကို မှန်မှန်​တက်​ကာ ဘုရားသခင့်​နိုင်ငံတော်​သတင်းကောင်း ဟောပြောခြင်း​တွင် မှန်မှန်​ပါဝင်​နေလျှင် နှစ်ခြင်း​ခံရန် အဘယ်ကြောင့် အချိန်ဆွဲ​နေရ​သနည်း။—မဿဲ ၂၈:၁၉၊ ၂၀။

၁၅၊ ၁၆။ (က) အဘယ်​လွဲမှား​သော​အကြောင်းပြချက်​က အချို့​လူငယ်များ​ကို နှစ်ခြင်း​ခံရန် အတားအဆီး​ဖြစ်စေ​နိုင်​သနည်း။ (ခ) အပ်နှံ​ပြီး နှစ်ခြင်း​ခံ​ခြင်း​သည် လူငယ်များ​အတွက် မည်သို့​အကာအကွယ်​ဖြစ်စေ​နိုင်​သနည်း။

^၁၅ သင် အမှား​ပြု​မိ​ပါ​က စာရင်း​ရှင်း​ရမည်​စိုး​၍ အဆိုပါ​အရေးကြီး​အဆင့်​ကို တက်လှမ်း​ရန် တွန့်ဆုတ်​နေခြင်း​လော။ သို့​ဆိုလျှင် ဤ​အချက်​ကို သုံးသပ်ကြည့်​ပါ– တစ်ချိန်ချိန်​တွင် ကားတိုက်မှု​ဖြစ်​မည်​စိုး​၍ လမ်းမ​ပေါ် မသွား​ဘဲ​နေ​မည်​လော။ နေ​မည်​မဟုတ်။ သင်သည် အရည်အချင်း​ပြည့်မီ​သူ​ဖြစ်​လျှင် နှစ်ခြင်း​ခံရန် မတွန့်​ဆုတ်​သင့်​ချေ။ ယေဟောဝါ​ထံ သင်၏​အသက်တာကို အပ်နှံ​ပြီး ကိုယ်တော်​၏​အလိုတော်ကို ထမ်းဆောင်​ရန် သဘောတူ​ထား​မည်​ဆိုလျှင် ယင်းက အမှား​ပြုလုပ်ခြင်း​ကို အစွမ်းကုန်​တွန်းလှန်​နိုင်​ရန် လှုံ့ဆော်ပေး​လိမ့်​မည်။ (ဖိလိပ္ပိ ၄:၁၃) လူငယ်တို့၊ နှစ်ခြင်း​ခံရန် အချိန်ဆွဲ​ထားခြင်း​ဖြင့် စာရင်း​ရှင်း​ရန်​မလို​တော့​ဟု ကျေးဇူးပြု​၍ မထင်​လိုက်ပါ​နှင့်။ သင်တို့သည် တာဝန်​ယူရ​နိုင်​သည့်​အရွယ်ရောက်​ချိန်​တွင် နှစ်ခြင်း​ခံ​သည်​ဖြစ်စေ၊ မခံ​သည်​ဖြစ်စေ သင်၏​အပြု​အမူ​အတွက် ယေဟောဝါ​နှင့် စာရင်း​ရှင်း​ရ​လိမ့်​မည်။—ရောမ ၁၄:၁၁၊ ၁၂။

^၁၆ ကမ္ဘာ​တစ်ဝန်း​ရှိ သက်သေခံ​များစွာ​သည် မိမိတို့​လူငယ်​ဘဝတွင် နှစ်ခြင်း​ခံရန် ဆုံးဖြတ်ချက်​ချ​ခြင်း​က အလွန်​အကျိုး​ရှိသည်​ဟု ယူမှတ်​ကြ​၏။ အနောက်​ဥရောပ​မှ ၂၃ နှစ်အရွယ် သက်သေခံ​တစ်ဦး၏​ပုံ​နမူနာကို သုံးသပ်ကြည့်​ပါ။ အသက် ၁၃ နှစ်​တွင် နှစ်ခြင်း​ခံ​လိုက်​သည့်​အတွက် “လူပျို​တို့၏​တပ်မက်​ခြင်း ကိ​လေ​သာ​စိတ်” မလွှမ်းမိုး​မိ​စေရန် သတိရှိ​စေ​ခဲ့​သည်​ဟု သူ​ပြောပြ​၏။ (၂ တိမောသေ ၂:၂၂) သူသည် လူငယ်​ဘဝက​တည်း​က အချိန်ပြည့်​အမှုဆောင်​တစ်ဦး​ဖြစ်​ဖို့ ပန်းတိုင်​ထားခဲ့​သည်။ ယနေ့ သူသည် ယေဟောဝါသက်သေ​များ​၏​ဌာနခွဲရုံး​တွင် ပျော်ရွှင်စွာ အမှုဆောင်​လျက်​ရှိသည်။ ယေဟောဝါ​ကို​ဝတ်ပြု​ရန် ရွေးချယ်​ကြသော အသင်​အပါအဝင် လူငယ်​အားလုံး ကောင်းချီး​များစွာ ခံစားရ​ကြ​ပါ​လိမ့်​မည်။

၁၇။ အဘယ်​ကဏ္ဍ​များ​တွင် ‘ဘုရားသခင်​၏​အလိုတော်‘ ရှိရာ​ကို ပိုင်းခြား​၍​သိမြင်ဖို့​လို​သနည်း။

^၁၇ အပ်နှံခြင်း​နှင့် နှစ်ခြင်း​ခံ​ခြင်း​တို့သည် ကျွန်ုပ်​တို့၏​ဘဝ​ကဏ္ဍ​တိုင်း​တွင် ယေဟောဝါ​၏​အလိုတော်ကို ထည့်တွက်​စဉ်းစား​ရသည့် အသက်တာ​၏​အစ​ဖြစ်သည်။ ကျွန်ုပ်​တို့၏​အပ်နှံမှု​နှင့်​အညီ လုပ်ဆောင်​ရာ​တွင် ‘အချိန်ကို​ဝယ်ယူ’ ဖို့​လို​သည်။ မည်သို့​အားဖြင့်​နည်း။ အကျိုးမရှိ​သော​အရာများ​တွင် ကုန်​သွား​မည့်​အချိန်ကို သမ္မာကျမ်းစာ လေးလေးနက်နက် လေ့လာ​ရန်၊ အစည်းအဝေး မှန်မှန်​တက်​ရန်၊ ‘ဘုရားသခင့်​နိုင်ငံတော်​သတင်းကောင်း’ ဟောပြောခြင်း​တွင် အတတ်နိုင်ဆုံး​ပါဝင်​ရန် အသုံးပြုခြင်း​အားဖြင့်​ဖြစ်သည်။ (ဧဖက် ၅:၁၅၊ ၁၆; မဿဲ ၂၄:၁၄) ယေဟောဝါ​ထံ အပ်နှံ​ပြီး ကိုယ်တော်​၏​အလိုတော်ကို ဆောင်ရွက်​လို​စိတ်​သည် ကျွန်ုပ်​တို့၏​အပန်းဖြေနည်း၊ စားသောက်​သည့်​ပုံစံ​နှင့် နားထောင်​သည့်​တေးဂီတ​အမျိုးအစား​အပါအဝင် ကျွန်ုပ်​တို့၏​ဘဝ​ကဏ္ဍအသီးသီး​အပေါ် အကျိုး​သက်ရောက်မှု​ရှိပါ​လိမ့်​မည်။ ထာဝရ​ကာလပတ်လုံး ပျော်ရွှင်​စေနိုင်​မည့် အပန်းဖြေနည်း​ကို ရွေးချယ်​ပါ​လေ။ ‘ဘုရားသခင်​၏​အလိုတော်’ ကို မဆန့်ကျင်​ဘဲ ပျော်ရွှင်​နိုင်​သည့်​နည်း​များစွာ​ရှိကြောင်း ပျော်ရွှင်​နေကြ​သော ထောင်နှင့်ချီ​သက်သေခံ​လူငယ်များ​က သင့်ကို ပြောပြ​ပါ​လိမ့်​မည်။—ဧဖက် ၅:၁၇-၁၉။

“သင်တို့​နှင့်အတူ​လိုက်ပါမည်”

၁၈။ လူငယ်များသည် မိမိတို့​ကိုယ်ကို အဘယ်​မေးခွန်းများ မေးသင့်​သနည်း။

^၁၈ ဘီစီ ၁၅၁၃ ခုနှစ်​မှ အေဒီ ၃၃ ခုနှစ်​အထိ မိမိကို​ဝတ်ပြု​ကိုးကွယ်​ပြီး မိမိ​အကြောင်း​သက်သေ​ခံရန် ရွေးချယ်​ထားသော မြေကြီး​အဖွဲ့အစည်း​တစ်ရပ် ယေဟောဝါ​တွင် ရှိခဲ့​သည်။ (ဟေရှာယ ၄၃:၁၂) ဣသရေလလူ​ငယ်​များသည် ထို​လူမျိုး​အဖြစ် မွေးဖွား​ခဲ့​ကြသည်။ ပင်တေကုတ္တေပွဲနေ့​ကတည်းက ယေဟောဝါ​တွင် ‘မိမိ​နာမ​အဖို့’ “လူမျိုး” သစ်​ဖြစ်သော ဝိညာဉ်​ရေး​ဣသရေလလူ​မျိုး​တစ်မျိုး ကမ္ဘာ​ပေါ်​၌ ရှိလာ​ခဲ့​သည်။ (၁ ပေတရု ၂:၉၊ ၁၀; တမန်​တော် ၁၅:၁၄; ဂလာတိ ၆:၁၆) ခရစ်တော်​သည် “ကောင်းသော​အကျင့်​ဘက်၌ စိတ်အားကြီး​၍ ပိုင်ထိုက်တော်မူ​သော​အမျိုး​ကို” သန့်ရှင်း​စင်ကြယ်​စေ​ခဲ့​သည်​ဟု တမန်​တော်​ပေါလု ဖော်ပြ​ခဲ့​၏။ (တိတု ၂:၁၄) အသင်​လူငယ်တို့​သည် ထို​လူမျိုး​အား ရှာတွေ့နိုင်​မည့်​နေရာကို မိမိတို့​ဘာသာ လွတ်လပ်​စွာ​ဆုံးဖြတ်​နိုင်​ကြသည်။ ယနေ့ မည်သူ​တို့သည် “သစ္စာစောင့်​၍ ဖြောင့်မတ်​သော​လူမျိုး​ဝင်” ဖြစ်​ကြ​သနည်း။ မည်သူ​တို့သည် ကျမ်းစာမူ​များနှင့်​အညီ အသက်ရှင်နေ​ထိုင်​ကြ​သနည်း။ မည်သူ​တို့သည် ယေဟောဝါ​၏ သစ္စာရှိ​သက်သေခံ​များ​အဖြစ် ပြုမူ​ကျင့်ကြံ​၍ လူသားများ​အတွက် တစ်ခု​တည်း​သော​မျှော်လင့်ချက်​အဖြစ် ဘုရားသခင့်​နိုင်ငံတော်​ကို ကြွေးကြော်​နေကြ​သနည်း။ (ဟေရှာယ ၂၆:၂-၄) ခရစ်ယာန်ဘောင်​ချာ့ခ်ျ​များနှင့် တခြား​ဘာသာ​တရား​များ​ကို ကြည့်​ပြီး သူတို့၏​အမူအကျင့်​နှင့် ဘုရားသခင်​၏​စစ်မှန်သော​ကျေးကျွန်​များ လိုက်နာ​ရမည့် ကျမ်းစာ​တောင်းဆိုချက်​များ​ကို နှိုင်းယှဉ်​ကြည့်​ပါ။

၁၉။ ကမ္ဘာ​ပေါ်​ရှိ သန်းနှင့်ချီ​သော​လူတို့သည် အဘယ်အရာကို ယုံကြည်​စိတ်ချ​လာ​သနည်း။

^၁၉ ယေဟောဝါသက်သေ​များ​၏ ဝိညာဉ်​တော်​ဖွား​အကြွင်းအကျန်​သည် အဆိုပါ “ဖြောင့်မတ်​သော​လူမျိုး” ဖြစ်​ကြောင်း လူငယ်များ​အပါအဝင် ကမ္ဘာ​တစ်ဝန်း​ရှိ သန်းနှင့်ချီ​သော​လူ​တို့ ယုံကြည်​စိတ်ချ​လာကြပြီ။ ဤ​ဝိညာဉ်​ရေး​ဣသရေလလူ​တို့ကို သူတို့ ဤသို့​ပြောဆို​ကြသည်– “ဘုရားသခင်​သည် သင်​နှင့်အတူ​ရှိ​တော်​မူ​သည်​ဟု အကျွန်ုပ်​တို့သည် ကြား​သိ၍ သင်တို့​နှင့်အတူ​လိုက်ပါမည်။” (ဇာခရိ ၈:၂၃) အသင်​လူငယ်တို့၊ ဘုရားသခင်​၏​လူမျိုးအလယ်တွင်​နေပြီး ယေဟောဝါ​၏​ကမ္ဘာသစ်​တွင် ထာဝစဉ်​အသက်ရှင်​မည့် “အသက်​တရားကို​ရွေးယူ” ကြလိမ့်မည်​ဟု ကျွန်ုပ်​တို့ အမှန်တကယ်​မျှော်လင့်​ပြီး ဆုတောင်းပေး​ပါ​သည်။—တရားဟောရာ ၃၀:၁၅-၂၀; ၂ ပေတရု ၃:၁၁-၁၃။

ပြန်လည်​သုံးသပ်ချက်

• အလိုတော်နှင့်​အညီ​ဟု​ဆို​ရာ​တွင် အဘယ်အရာ​ပါဝင်​သနည်း။

• ယေဟောဝါ​နှစ်သက်​သည့် ဝတ်ပြုမှု​ပုံစံ​ကား အဘယ်နည်း။

• အပ်နှံ​ထား​သည့်​မိဘများ​၏​လက်အောက်​တွင် ကြီးပြင်း​လာ​ကြသော လူငယ်​အားလုံး​သည် အဘယ်​ရွေးချယ်မှု ပြုလုပ်​ရမည်​နည်း။

• နှစ်ခြင်း​ခံရန် အဘယ်ကြောင့် အကြောင်းမဲ့​အချိန်​မ​ဆွဲ​သင့်​သနည်း။

[လေ့လာ​ရန်​မေးခွန်းများ]

[စာမျက်နှာ ၂၆ ပါ ရုပ်ပုံ]

သင်သည် မည်သူ​၏​စကား​ကို နားထောင်​မည်​နည်း

 [စာမျက်နှာ ၂၈ ပါ ရုပ်ပုံ]

အပ်နှံ​ပြီး နှစ်ခြင်း​ခံ​ခြင်း​သည် သင့်ကို မည်သို့ အကာအကွယ်​ဖြစ်စေ​နိုင်​သနည်း

 [စာမျက်နှာ ၂၉ ပါ ရုပ်ပုံ]

နှစ်ခြင်း​မခံရ​န် သင့်ကို​အဘယ်အရာက​တားဆီး​ထား​သနည်း