ဆင်းရဲဝေဒနာခံရသူကို ယေဟောဝါကယ်နုတ်
ဆင်းရဲဝေဒနာခံရသူကို ယေဟောဝါကယ်နုတ်
‘ဖြောင့်မတ်သောသူသည် များစွာသောဆင်းရဲကိုခံရသော်လည်း ထာဝရဘုရားသခင်သည် ခပ်သိမ်းသောဆင်းရဲထဲက ကယ်နုတ်တော်မူ၏။’—ဆာလံ ၃၄:၁၉။
၁၊ ၂။ သစ္စာရှိခရစ်ယာန်တစ်ဦး မည်သို့ခံစားခဲ့ရသနည်း။ ကျွန်ုပ်တို့လည်း အလားတူခံစားချက်မျိုး အဘယ်ကြောင့်ခံစားရဖွယ်ရှိသနည်း။
ကေကို *အမည်ရှိ အမျိုးသမီးငယ်တစ်ဦးသည် ယေဟောဝါသက်သေတစ်ဦးဖြစ်ခဲ့သည်မှာ အနှစ် ၂၀ ကျော်ကြာပြီဖြစ်သည်။ သူသည် အချိန်ပြည့် ဘုရားသခင့်နိုင်ငံတော်ကြွေးကြော်သူ သို့မဟုတ် မှန်မှန်ရှေ့ဆောင်တစ်ဦးအဖြစ် အတန်ကြာ အမှုဆောင်ခဲ့၏။ ယင်းအခွင့်ထူးကို သူအလွန်မြတ်နိုးသည်။ သို့သော် မကြာသေးမီက မျှော်လင့်ချက်မဲ့မှု၊ အထီးကျန်ဆန်မှုဟူသော ခံစားချက်များက ကေကို၏စိတ်ကို ဖိစီးလာခဲ့သည်။ “ကျွန်မ ငိုပဲငိုနေတော့တယ်” ဟုသူဆို၏။ ကေကိုသည် မိမိ၏အပျက်မြင်အတွေးအခေါ်ကို ကြိုးစားတွန်းလှန်ဖို့ ကိုယ်ပိုင်လေ့လာမှု များများပြုလုပ်သည်။ “အဲဒါတောင်မှ ကျွန်မရဲ့အတွေးအခေါ်ကို ပြောင်းလဲလို့မရသေးဘူး။ သေချင်စိတ်တောင်ပေါက်လာပြီ” ဟုသူက ဆိုရှာသည်။
၂ သင်ကော ထိုသို့ စိတ်ပျက်လက်ပျက် ဖြစ်ဖူးပါသလော။ ဘုရားသခင်ဝတ်၌မွေ့လျော်ခြင်းသည် “ယခုဘဝ၊ နောင်ဘဝနှင့်စပ်ဆိုင်သော ကတိတော်ကိုရသည်ဖြစ်” သောကြောင့် ယေဟောဝါသက်သေတစ်ဦးအနေနှင့် သင့်တွင် ဝမ်းမြောက်ရွှင်လန်းစရာအကြောင်း များစွာရှိသည်။ (၁ တိမောသေ ၄:၈) ယခုပင် သင်သည် ဝိညာဉ်ရေးပရဒိသု၌ မွေ့လျော်နေပါသည်။ သို့သော် ယင်းကြောင့် ဆင်းရဲဝေဒနာအမျိုးမျိုးမှ သင်အကာအကွယ်ရသည်ဟု ဆိုလိုပါသလော။ လုံးဝမဆိုလိုပါ။ ‘ဖြောင့်မတ်သောသူသည် များစွာသောဆင်းရဲကိုခံရ’ ၏ဟု ကျမ်းစာကဆိုသည်။ (ဆာလံ ၃၄:၁၉) ယင်းသည် အံ့ဩစရာမဟုတ်ချေ၊ အကြောင်းမှာ ‘တစ်လောကလုံးသည် စာတန်၏လက်၌ရှိ’ သောကြောင့်ဖြစ်သည်။ (၁ ယောဟန် ၅:၁၉၊ သမ္မာ) သို့နှင့် ယင်း၏အကျိုးသက်ရောက်မှုကို ကျွန်ုပ်တို့အားလုံး တစ်နည်းနည်းဖြင့် တွေ့ကြုံခံစားကြရခြင်းဖြစ်သည်။—ဧဖက် ၆:၁၂။
ဆင်းရဲဝေဒနာ၏ ဆိုးကျိုးများ
၃။ အလွန်စိတ်ဆင်းရဲခဲ့ကြသည့် ဘုရားသခင့်ကျေးကျွန်တို့အကြောင်း ကျမ်းစာသာဓကများကို ဖော်ပြပါ။
၃ ကြာရှည်စိတ်ဆင်းရဲနေခြင်းက ကျွန်ုပ်တို့ကို အမြင်မရှင်းဖြစ်စေနိုင်၏။ (သု. ၁၅:၁၅) ဖြောင့်မတ်သောယောဘကို သုံးသပ်ကြည့်ပါ။ ဆိုးရွားပြင်းထန်သောစမ်းသပ်မှုကို အလူးအလဲခံစားနေရရှာသည့် ယောဘ ဤသို့ဆိုခဲ့၏– “လူသည် မိန်းမဖွားသောသူဖြစ်သဖြင့် အသက်တို၍ . . . [“စိုးရိမ်ပူပန်မှု၊” ကဘ] နှင့်ပြည့်စုံပါ၏။” (ယောဘ ၁၄:၁) ယောဘ၏ရွှင်လန်းဝမ်းမြောက်မှု ဆိတ်သုဉ်းသွားခဲ့သည်။ မိမိကို ယေဟောဝါစွန့်ပစ်လိုက်ပြီဟုပင် သူအတန်ကြာ ယူမှတ်ခဲ့၏။ (ယောဘ ၂၉:၁-၅) ဘုရားသခင့်ကျေးကျွန်များတွင် ယောဘတစ်ဦးတည်းသာ ပြင်းထန်သောကိုယ်စိတ်ဆင်းရဲမှုကို ခံစားရသည်မဟုတ်ချေ။ ဟန္နသည် သားသမီးမရသဖြင့် “ညှိုးငယ်သောစိတ်” ရှိနေကြောင်း ကျမ်းစာကဆိုသည်။ (၁ ဓမ္မရာဇဝင် ၁:၉-၁၁) မိသားစုအခြေအနေကြောင့် အလွန်အမင်းစိတ်ဆင်းရဲနေသည့် ရေဗက္ကက “ကိုယ်အသက်ကို ငြီးငွေ့လှ၏” ဟုဆိုခဲ့သည်။ (ကမ္ဘာဦး ၂၇:၄၆) ဒါဝိဒ်သည် မိမိလုပ်ခဲ့သည့်အမှားများကို ပြန်ပြောင်းသတိရကာ ဤသို့ဆိုသည်– “တစ်နေ့လုံးပင် ပူဆွေးငိုယိုလျက်နေရပါ၏။” (ဆာလံ ၃၈:၆၊ ခမ) ခရစ်ယာန်ခေတ်မတိုင်မီက ဘုရားသခင်အားကြောက်ရွံ့သည့် အမျိုးသားနှင့်အမျိုးသမီးတို့သည် စိတ်ဆင်းရဲစရာကာလများကို ခါးစည်းခံခဲ့ကြကြောင်း ဤပုံနမူနာအချို့က ရှင်းရှင်းလင်းလင်း ဖော်ပြသည်။
၄။ မျက်မှောက်ခေတ်ခရစ်ယာန်များတွင် “စိတ်ငယ်သောသူတို့” ရှိနေခြင်းသည် အဘယ်ကြောင့် အံ့ဩစရာမဟုတ်သနည်း။
၄ ခရစ်ယာန်များကော အသို့နည်း။ “စိတ်ငယ်သောသူတို့ကို အားပေး” ပါဟု သက်သာလောနိတ်မြို့သားများကို မှာကြားရန်လိုကြောင်း တမန်တော်ပေါလု တွေ့ရှိခဲ့သည်။ (၁ သက်သာလောနိတ် ၅:၁၄) “စိတ်ငယ်သောသူတို့” ဟုပြန်ဆိုထားသော ဂရိစကားလုံးသည် “ဘဝ၏ဖိစီးမှုကို အခိုက်အတန့် ကြုံတွေ့ခံစားနေရသူ” များကိုဆိုလိုကြောင်း ရည်ညွှန်းစာအုပ်တစ်အုပ်တွင် ဖော်ပြထားသည်။ ကောရိန္သုအသင်းတော်ရှိ ဝိညာဉ်တော်ဖွားအချို့သည် စိတ်ဓာတ်ကျခဲ့ကြကြောင်း ပေါလု၏စကားများက ဖော်ပြသည်။ မျက်မှောက်ခေတ်ခရစ်ယာန်များတွင်လည်း စိတ်ငယ်နေသူတို့ ရှိကြပါသည်။ သို့သော် သူတို့သည် အဘယ်ကြောင့် စိတ်ပျက်အားလျော့ကြသနည်း။ ဖြစ်လေ့ဖြစ်ထရှိသည့် အကြောင်းရင်းသုံးရပ်ကို သုံးသပ်ကြည့်ကြစို့။
မစုံလင်မှုက ကျွန်ုပ်တို့ကို စိတ်ဆင်းရဲစေနိုင်
၅၊ ၆။ ရောမ ၇:၂၂-၂၅ မှ အဘယ်နှစ်သိမ့်မှုရရှိနိုင်သနည်း။
၅ “ရှက်ကြောက်စိတ်လုံးဝမရှိ” သည့် ဆိုးညစ်သူများနှင့်မတူဘဲ ခရစ်ယာန်စစ်များသည် မိမိတို့၏မစုံလင်မှုကြောင့် ဆင်းရဲငြိုငြင်ကြလေသည်။ (ဧဖက် ၄:၁၉၊ ခမ) သူတို့သည် ပေါလုဤသို့ရေးခဲ့သည့်အတိုင်း ခံစားကြရပေမည်– “ငါသည် အတွင်းလူအားဖြင့် ဘုရားသခင်၏ပညတ်တရားတော်ကို နှစ်သက်၏။ သို့သော်လည်း ငါ့ကိုယ်အင်္ဂါများ၌ရှိသော တရားတစ်ပါးသည် စိတ်ဝိညာဉ်တရားကို ဆိုင်ပြိုင်တိုက်လှန်သဖြင့် ငါ့ကိုယ်အင်္ဂါများ၌ရှိသော အပြစ်တရားလက်သို့ ငါ့ကို ဖမ်းသွားအပ်နှံသည်ကို ငါမြင်၏။” ထို့နောက် ပေါလုက “ငါသည် ငြိုငြင်သောသူဖြစ်ပါသည်တကား” ဟုဆိုခဲ့သည်။—ရောမ ၇:၂၂-၂၄။
၆ ပေါလုကဲ့သို့ သင်ခံစားရဖူးပါသလော။ မိမိ၏မစုံလင်မှုများကို ကောင်းစွာသတိပြုမိခြင်းက မမှားပါ၊ အကြောင်းမှာ ယင်းက အပြစ်၏ဆိုးရွားမှုကို စိတ်ထဲစွဲမှတ်စေနိုင်ပြီး မကောင်းမှုကိုရှောင်မည်ဟူသော သင်၏သန္နိဋ္ဌာန်ကို ခိုင်ခံ့စေနိုင်သောကြောင့်ဖြစ်သည်။ သို့သော် သင်သည် မိမိ၏မစုံလင်မှုကြောင့် အမြဲစိတ်ဆင်းရဲနေစရာမလိုပေ။ အစောပိုင်းတွင် ကိုးကားခဲ့သည့်အတိုင်း ပေါလုသည် စိတ်ဆင်းရဲမှုအကြောင်းပြောပြီးနောက် ဤသို့ဆက်ဆိုသည်– “ငါတို့သခင်ယေရှုခရစ်အားဖြင့် ကယ်လွှတ်တော်မူသော ဘုရားသခင်၏ကျေးဇူးတော် ကြီးလှပေ၏။” (ရောမ ၇:၂၅) ယေရှုသွန်းလောင်းခဲ့သည့် အသွေးတော်က မိမိကို အမွေရရှိထားသောအပြစ်မှ ကယ်လွှတ်ပေးနိုင်ခဲ့ကြောင်း ပေါလု ယုံကြည်စိတ်ချခဲ့သည်။—ရောမ ၅:၁၈။
၇။ အဘယ်အရာက လူတစ်ဦးကို ၎င်း၏အပြစ်ပြုလိုသည့် သဘောထားများကြောင့် စိတ်ဆင်းရဲမနေစေရန် ကူညီပေးနိုင်သနည်း။
၇ မစုံလင်မှုကြောင့် သင်စိတ်ဖိစီးခံနေရလျှင် တမန်တော်ယောဟန် ရေးသားခဲ့သည့် ဤစကားများမှ နှစ်သိမ့်မှုရယူပါလေ– “တစ်စုံတစ်ယောက်သောသူသည် အပြစ်ကိုပြုမိလျှင် ဖြောင့်မတ်တော်မူသောအရှင် ယေရှုခရစ်တည်းဟူသော အမှုဆောင်အရှင်သည် ငါတို့အဖို့ ခမည်းတော်ထံ၌ရှိတော်မူ၏။ ထိုအရှင်သည် ငါတို့၏အပြစ်မျှမက လောကသားအပေါင်းတို့၏ အပြစ်ဖြေရာအကြောင်း ဖြစ်တော်မူ၏။” (၁ ယောဟန် ၂:၁၊ ၂၊ သမ္မာ) သင်သည် အပြစ်ပြုလိုသည့်သဘောထားများကြောင့် စိတ်ဆင်းရဲနေရလျှင် ယေရှုသည် စုံလင်သူတို့အတွက်မဟုတ်ဘဲ အပြစ်သားများအတွက် အသေခံခဲ့ကြောင်းကို အမြဲသတိရပါ။ အမှန်မှာ ‘လူအပေါင်းတို့သည် အပြစ်ကိုပြု၍ ဘုရားသခင့်ရှေ့တော်၌ အသရေပျက်ကြပြီ။’—ရောမ ၃:၂၃။
၈၊ ၉။ မိမိကိုယ်ကိုအပြစ်တင်သည့် အတွေးအခေါ်များကို အဘယ်ကြောင့် ငြင်းပယ်သင့်သနည်း။
၈ သို့သော် သင်သည် အတိတ်က ကြီးလေးသောအပြစ်တစ်ခု ကျူးလွန်မိခဲ့သည်ဟု ဆိုကြပါစို့။ ယင်းကိစ္စနှင့်စပ်လျဉ်း၍ ယေဟောဝါထံ မကြာမကြာ ဆုတောင်းကာ ပြောပြမည်မှာ သေချာသည်။ ခရစ်ယာန်အကြီးအကဲများထံမှ ဝိညာဉ်ရေးအကူအညီ သင်ရရှိခဲ့သည်။ (ယာကုပ် ၅:၁၄၊ ၁၅) သင်သည် အမှန်ပင်နောင်တရပြီး အသင်းတော်ထဲ ပြန်ဝင်လာခဲ့သည်။ သို့မဟုတ် ဘုရားသခင့်အဖွဲ့အစည်းမှ တစ်ခဏဝေးကွာသွားသော်လည်း နောက်ပိုင်း သင်နောင်တရပြီး သန့်ရှင်းစင်ကြယ်သောအနေအထားကို ပြန်ရရှိခဲ့သည်။ မည်သို့ပင်ဖြစ်ပါစေ သင်၏အတိတ်ကအမှားသည် သင့်စိတ်ထဲပြန်ပေါ်လာရာ ယင်းအတွက် သင်စိတ်ဆင်းရဲနေနိုင်သည်။ ထိုသို့ဖြစ်မည်ဆိုလျှင် ယေဟောဝါသည် နောင်တစစ်နောင်တမှန်ရသူတို့ကို “အထူးသဖြင့်” ခွင့်လွှတ်တော်မူကြောင်း သတိရပါလေ။ (ဟေရှာယ ၅၅:၇) ထို့အပြင် ကိုယ်တော်သည် သင့်အား အဖတ်ဆယ်မရတော့သည့်အထိ အပြစ်ကြီးသည်ဟု မခံစားစေလိုပေ။ သင် ထိုသို့ခံစားနေရသည်ဆိုလျှင် စာတန်၏ရည်ရွယ်ချက် အထမြောက်သွားပေမည်။ (၂ ကောရိန္သု ၂:၇၊ ၁၀၊ ၁၁) စာတန်သည် အပြစ်စီရင်ခံထိုက်သည့်အတွက် ပြစ်ဒဏ်ခံရတော့မည်ဖြစ်သောကြောင့် သင်လည်း အလားတူစီရင်ခံထိုက်သည်ဟု သင့်ကိုခံစားရစေလိုသည်။ (ဗျာ. ၂၀:၁၀) သင်၏ယုံကြည်ခြင်းကို ဖျက်ဆီးရန် ဤသို့ကြံစည်နေသည့်စာတန်ကို အရှုံးမပေးလိုက်ပါနှင့်။ (ဧဖက် ၆:၁၁) အခြားကိစ္စများတွင်ကဲ့သို့ ဤကိစ္စတွင်လည်း ‘စာတန်ကို ဆီးတား’ ပါလေ။—၁ ပေတရု ၅:၉။
၉ ဗျာ. ကျမ်း ၁၂:၁၀ တွင် စာတန်ကို ဝိညာဉ်တော်ဖွားခရစ်ယာန်များဖြစ်သော ‘ငါတို့ညီအစ်ကိုများကို ဘုရားသခင့်ရှေ့တော်၌ နေ့ညမပြတ် အပြစ်တင်သောသူ’ ဟုခေါ်ဆိုထားသည်။ ထိုအခန်းငယ်ကို လေးလေးနက်နက် ဆင်ခြင်ကြည့်ခြင်းက ယေဟောဝါသည် သင့်ကို အပြစ်တင် စွပ်စွဲမည်မဟုတ်သော်လည်း ကိုယ့်ကိုယ်ကို အပြစ်တင်စွပ်စွဲနေမည်ဆိုလျှင် မတော်မတရားစွပ်စွဲသူ စာတန် ပျော်နေမည်ဖြစ်ကြောင်း သဘောပေါက်စေသည်။ (၁ ယောဟန် ၃:၁၉-၂၂) မိမိအမှားများကြောင့် လက်လျှော့အရှုံးပေးလိုစိတ် ပေါက်လာသည်အထိ အဘယ်ကြောင့် စိတ်မချမ်းမသာဖြစ်နေရသနည်း။ ဘုရားသခင်နှင့် သင်၏ရင်းနှီးသောဆက်ဆံရေးကို စာတန်ဖျက်ဆီးရန် ခွင့်မပြုလိုက်လေနှင့်။ ယေဟောဝါသည် “ချစ်သနားခြင်းမေတ္တာ . . . နှင့်ပြည့်စုံ၍ စိတ်ရှည်ခြင်း၊ ကျေးဇူးပြုခြင်း၊ သစ္စာစောင့်ခြင်းနှင့် ကြွယ်ဝတော်မူ” သည်ဟူသောအချက်ကို သင်မမြင်တော့အောင် စာတန်အား ဖုံးကွယ်ခွင့်မပြုလိုက်ပါနှင့်။—ထွက်မြောက်ရာ ၃၄:၆။
အကန့်အသတ်ဖြစ်မှုများကကျွန်ုပ်တို့ကို စိတ်အားငယ်စေနိုင်
၁၀။ ကျွန်ုပ်တို့၏အကန့်အသတ်ဖြစ်မှုများက အဘယ်နည်းများဖြင့် စိတ်ပျက်အားလျော့စေနိုင်သနည်း။
၁၀ မိမိတို့၏ အကန့်အသတ်ဖြစ်မှုများက ဘုရားသခင့်အမှုတော်ဆောင်ခြင်းကို ထိခိုက်စေသောကြောင့် ခရစ်ယာန်အချို့ စိတ်ဓာတ်ကျကြသည်။ သင်ကော ထိုသို့ခံစားရပါသလော။ အသည်းအသန်ဖျားနာခြင်း၊ အသက်အရွယ်ကြီးရင့်ခြင်း သို့မဟုတ် အခြားသောအခြေအနေများကြောင့် ခရစ်ယာန်ဓမ္မအမှုတွင် ယခင်ကလောက် များများမပါဝင်နိုင်ဘဲဖြစ်ပေမည်။ ခရစ်ယာန်များသည် အချိန်ကိုဝယ်ယူပြီး ဘုရားသခင့်အမှုတော်ကိုဆောင်ရန် အားပေးခံရကြ၏။ (ဧဖက် ၅:၁၅၊ ၁၆) သို့သော် အကန့်အသတ်ဖြစ်မှုများကြောင့် ခရစ်ယာန်ဓမ္မအမှုတွင် များများမပါဝင်နိုင်ပါက သင်စိတ်ပျက်ပါသလော။
၁၁။ ဂလာတိ ၆:၄ တွင် မှတ်တမ်းတင်ထားသည့် ပေါလု၏ဆုံးမစကားက ကျွန်ုပ်တို့အား မည်သို့အကျိုးပြုနိုင်သနည်း။
၁၁ သမ္မာကျမ်းစာက ကျွန်ုပ်တို့ကို “ပျင်းရိခြင်းနှင့်ကင်းလွတ်၍ ယုံကြည်ခြင်းနှင့်သည်းခံခြင်းအားဖြင့် ကတိတော်တို့ကို အမွေခံရသောသူတို့နည်းတူကျင့်” ကြရန် တိုက်တွန်းထား၏။ (ဟေဗြဲ ၆:၁၁၊ ၁၂) ကျွန်ုပ်တို့သည် ထိုသို့သောသူတို့၏ ပုံသက်သေကောင်းကို စစ်ဆေးပြီး သူတို့၏ယုံကြည်ခြင်းကို ကြိုးစားတုပကြမည်ဆိုလျှင် သူတို့နည်းတူ ကျင့်နိုင်ကြမည်ဖြစ်သည်။ သို့ရာတွင် အခြားသူတို့နှင့် မလိုလားအပ်စွာ နှိုင်းယှဉ်ပြီး ဘာမျှအသုံးမကျဟု မိမိကိုယ်ကို ကောက်ချက်ချမည်ဆိုလျှင် အကျိုးရှိမည်မဟုတ်ချေ။ ထို့ကြောင့် ကျွန်ုပ်တို့သည် ပေါလု၏ ဤဆုံးမစကားကို လိုက်နာကျင့်သုံးသင့်ပေသည်– “လူတိုင်းကိုယ်ပြုသောအမှုကို စစ်ကြောစေ။ သို့ပြုလျှင် . . . [“သူတစ်ပါးနှင့်မနှိုင်းယှဉ်၊” ကဘ] ဘဲ ကိုယ်၌သာ ဝါကြွားဝမ်းမြောက်စရာအကြောင်း ရှိလိမ့်မည်။”—ဂလာတိ ၆:၄။
၁၂။ ယေဟောဝါ၏အမှုတော်ဆောင်ရာတွင် ကျွန်ုပ်တို့အဘယ်ကြောင့် ရွှင်လန်းဝမ်းမြောက်နိုင်ကြသနည်း။
၁၂ ဆိုးရွားသော ကျန်းမာရေးပြဿနာကြောင့် ကန့်သတ်ခံရစေဦးတော့ ခရစ်ယာန်များတွင် ရွှင်လန်းဝမ်းမြောက်စရာ အကြောင်းကောင်းရှိပါသည်။ သမ္မာကျမ်းစာက ကျွန်ုပ်တို့အား ဤသို့စိတ်ချစေသည်– “သင်တို့၏အလုပ်မှစ၍ နာမတော်ကိုထောက်၍ပြသော သင်တို့၏မေတ္တာကို မေ့လျော့သည်တိုင်အောင် ဘုရားသခင်သည် ဖြောင့်မတ်ခြင်းကင်းတော်မူသည်မဟုတ်။” (ဟေဗြဲ ၆:၁၀၊ ကဘ) သင်မထိန်းချုပ်နိုင်သည့် အခြေအနေများကြောင့် ယခင်ကလောက် ယခုလုပ်ဆောင်နိုင်ချင်မှ လုပ်ဆောင်နိုင်ပေမည်။ သို့ရာတွင် ယေဟောဝါပေးသနားတော်မူသော အကူအညီဖြင့် သင်သည် တယ်လီဖုန်းဖြင့်သက်သေခံခြင်းနှင့် စာရေးခြင်းကဲ့သို့သော ခရစ်ယာန်ဓမ္မအမှုကဏ္ဍအချို့တွင် ပို၍အပြည့်အဝ ပါဝင်နိုင်ပေမည်။ သင်၏စိုးလ်အကြွင်းမဲ့ အမှုတော်ဆောင်ခြင်း၊ ကိုယ်တော်နှင့် လူသားချင်းတို့အပေါ် မေတ္တာပြခြင်းအတွက် ယေဟောဝါဘုရားသခင် ကောင်းချီးပေးတော်မူမည်ကို သင်ယုံကြည်စိတ်ချနိုင်သည်။—မဿဲ ၂၂:၃၆-၄၀။
“ခဲယဉ်းသောကာလ” က ကျွန်ုပ်တို့ကို စိတ်ပျက်စေနိုင်
၁၃၊ ၁၄။ (က) ဤ “ခဲယဉ်းသောကာလ” သည် ကျွန်ုပ်တို့ကို အဘယ်နည်းများဖြင့် ဆင်းရဲငြိုငြင်စေနိုင်သနည်း။ (ခ) မျက်မှောက်ခေတ်တွင် ပကတိကြင်နာစုံမက်မှုမရှိခြင်း မည်သို့ထင်ရှားနေသနည်း။
၁၃ ဘုရားသခင့်ဖြောင့်မတ်သော ကမ္ဘာသစ်အသက်တာကို ကျွန်ုပ်တို့စောင့်မျှော်ကြသော်လည်း လောလောဆယ်တွင်မူ ကိုင်တွယ်ဖြေရှင်းရခက်သည့် “ခဲယဉ်းသောကာလ” ၌ အသက်ရှင်နေထိုင်ကြသည်။ (၂ တိမောသေ ၃:၁) စိတ်ဆင်းရဲစရာကောင်းသည့် ဖြစ်ရပ်များက ကျွန်ုပ်တို့ကယ်နုတ်ခံရချိန်နီးပြီဖြစ်ကြောင်းကို ညွှန်ပြနေသည်ဟူသောအသိကြောင့် နှစ်သိမ့်မှုရရှိနိုင်ပါသည်။ သို့သော် ကျွန်ုပ်တို့ပတ်ပတ်လည်ရှိ အခြေအနေများက ကျွန်ုပ်တို့ကို ထိခိုက်နေသည်။ ဥပမာ၊ အလုပ်အကိုင်မရှိခြင်းက သင့်ကို မည်သို့ထိခိုက်နေသနည်း။ အလုပ်အကိုင် ရှားပါးကောင်း ရှားပါးပေမည်။ အချိန်ကုန်လွန်လာသည်နှင့်အမျှ မိမိ၏ဆိုးရွားလှသည့်အဖြစ်ကို ယေဟောဝါ မြင်မှမြင်ပါ၏လော သို့မဟုတ် မိမိ၏ဆုတောင်းချက်ကို ကိုယ်တော် နားညောင်းတော်မူပါ၏လောဟု သင်သိလိုပေမည်။ သို့မဟုတ် ခွဲခြားဆက်ဆံမှု၊ မတရားမှုတစ်မျိုးမျိုးကို သင်တွေ့ ကြုံခံစားရဖွယ်ရှိသည်။ သတင်းစာကို ဟိုဟိုသည်သည် လှန်လှောကြည့်သည့်အခါ၌ပင် ပတ်ဝန်းကျင်မှ အကျင့်လျော့ရဲသူတို့ကြောင့် “အလွန်စိတ်ပျက်လျက်နေသူ” ဖြောင့်မတ်သောလောတကဲ့သို့ သင်ခံစားရနိုင်သည်။—၂ ပေတရု ၂: ၇၊ ခမ။
၁၄ နောက်ဆုံးသောနေ့ရက်များနှင့်ပတ်သက်၍ ကျွန်ုပ်တို့လျစ်လျူရှု၍မရသည့် ထူးခြားသောလက္ခဏာတစ်ရပ် ရှိသေးသည်။ သမ္မာကျမ်းစာက လူအများစုသည် “ပကတိကြင်နာစုံမက်ခြင်းနှင့်ကင်း” ကြလိမ့်မည်ဟု ကြိုပြောခဲ့၏။ (၂ တိမောသေ ၃:၃) အိမ်ထောင်အများစုတွင် မိသားစုချစ်ခင်တွယ်တာမှု မရှိကြတော့ချေ။ အမှန်ဆိုရလျှင် “လူတို့သည် အခြားသူများထက် မိသားစုဝင်အချို့တို့၏ သတ်ဖြတ်ခြင်း၊ ကိုယ်ထိလက်ရောက် ထိပါးစော်ကားခြင်း၊ စိတ်ပိုင်း သို့မဟုတ် လိင်ဆိုင်ရာ မတော်မတရားပြုခြင်းတို့ကို ပို၍ခံရနိုင်ကြောင်း အထောက်အထားများက ဖော်ပြသည်။ မေတ္တာနှင့်လုံခြုံမှုရှိသည်ဟု ခံစားရသင့်သောနေရာသည် လူကြီးပိုင်းအချို့နှင့် ကလေးများအတွက်မူ အန္တရာယ်အရှိဆုံးနေရာ ဖြစ်နေသည်” ဟုအိမ်တွင်းအကြမ်းဖက်မှုစာအုပ်က ဆို၏။ မနှစ်မြို့ဖွယ်အိမ်တွင်းအခြေအနေတွင် ကြီးပြင်းခဲ့ရသူတို့သည် အရွယ်ရောက်လာသည့်အခါ စိုးရိမ်ပူပန်မှု၊ စိတ်ပျက်အားလျော့မှုတို့၏ ထိုးနှက်နှိပ်စက်မှုဒဏ်ကို ခံစားရနိုင်သည်။ သင်လည်း ထိုသို့ခံစားရမည်ဆိုလျှင် အသို့နည်း။
၁၅။ ယေဟောဝါ၏မေတ္တာတော်သည် အဘယ်လူသားထက်မဆို မည်သို့သာလွန်မြင့်မြတ်တော်မူသနည်း။
၁၅ ဆာလံဆရာဒါဝိဒ် ဤသို့သီကျူးဖော်ပြခဲ့၏– ‘ကိုယ်မိဘတို့သည် အကျွန်ုပ်ကိုစွန့်သော်လည်း ထာဝရဘုရားသခင်သည် အကျွန်ုပ်ကိုချီယူတော်မူမည်။’ (ဆာလံ ၂၇:၁၀) ယေဟောဝါ၏မေတ္တာတော်သည် မည်သည့် လူသားမိဘများ၏ မေတ္တာထက်မဆို သာလွန်ကြောင်းသိရခြင်းက အလွန်နှစ်သိမ့်မှုရပါသည်တကား။ မိဘတစ်ဦး၏ ငြင်းပယ်မှု၊ နှိပ်စက်မှု သို့မဟုတ် စွန့်ပစ်မှုကိုခံရခြင်းသည် နာကြည်းဖွယ်ကောင်းသော်လည်း ယင်းက သင့်ကို ယေဟောဝါ၏မေတ္တာတော်နှင့် မကွာစေနိုင်ပါ။ (ရောမ ၈:၃၈၊ ၃၉) ဘုရားသခင်သည် မိမိချစ်မြတ်နိုးသူတို့ကို ဆွဲဆောင်တော်မူကြောင်း သတိရပါ။ (ယောဟန် ၃:၁၆; ၆:၄၄) သင့်ကို လူတို့မည်သို့ပင် ပြုမူဆက်ဆံပါစေ ကောင်းကင်ခမည်းတော်သည် သင့်ကို ချစ်မြတ်နိုးတော်မူ၏။
စိတ်ပျက်အားလျော့မှုကို သက်သာစေသောလက်တွေ့ကျနည်းလမ်းများ
၁၆၊ ၁၇။ လူတစ်ဦးသည် စိတ်ပျက်အားလျော့သည့်အခါ မိမိ၏ဝိညာဉ်ရေးကို မည်သို့ခိုင်ခံ့စေနိုင်သနည်း။
၁၆ သင်သည် စိတ်ပျက်အားလျော့မှုကို လက်တွေ့ကျနည်းလမ်းများဖြင့် အောင်မြင်ကျော်လွှားနိုင်ပါသည်။ ဥပမာ၊ ခရစ်ယာန်လုပ်ငန်းဆောင်တာများတွင် အပြည့်အဝပါဝင်ခြင်းဖြင့်ဖြစ်၏။ အထူးသဖြင့် စိတ်ပျက်အားလျော့မှုက သင့်ကို လွှမ်းမိုးဖိစီးနေဟန်ရှိလျှင် သမ္မာကျမ်းစာကို ဖတ်ရှုဆင်ခြင်ပါ။ ဆာလံဆရာက ‘“ငါ့ခြေချော်လျက်ရှိသည်” ဟုအကျွန်ုပ်ဆိုသောအခါ အိုထာဝရဘုရားသခင် ကိုယ်တော်၏ကရုဏာသည် အကျွန်ုပ်ကိုထောက်မပါ၏။ အကျွန်ုပ်၏နှလုံးထဲမှာ စိတ်များပြားသောအခါ ကိုယ်တော်သည် သက်သာစေတော်မူသဖြင့် အကျွန်ုပ်၏ဝိညာဉ်သည် ရွှင်လန်းပါ၏’ ဟုသီကျူးခဲ့သည်။ (ဆာလံ ၉၄:၁၈၊ ၁၉) သမ္မာကျမ်းစာကိုမှန်မှန်ဖတ်ရှုခြင်းက သင့်စိတ်ကို သက်သာရာရစေသောစကားများ၊ အားပေးတည်ဆောက်မှုဖြစ်စေသော အတွေးအခေါ်များဖြင့် ပြည့်နေစေပါလိမ့်မည်။
၁၇ ဆုတောင်းခြင်းသည်လည်း အလွန်အရေးကြီး၏။ သင့်စိတ်ခံစားချက်များကို သင်အပြည့်အဝ မဖော်ပြတတ်သော်လည်း အဘယ်အရာကို ပြောဆိုလိုကြောင်း ယေဟောဝါသိတော်မူ၏။ (ရောမ ၈:၂၆၊ ၂၇) ဆာလံဆရာက ဤသို့အာမခံသည်– ‘ထမ်းရွက်ရသောဝန်ကို ထာဝရဘုရားသခင်၌ချထားလော့။ သင့်ကိုမစတော်မူမည်။ ဖြောင့်မတ်သောသူကို အစဉ်အမြဲလှုပ်ရှားစေတော်မမူရာ။’—ဆာလံ ၅၅:၂၂။
၁၈။ စိတ်ပျက်အားလျော့နေသူတစ်ဦးသည် မည်သည့်လက်တွေ့ကျ လုပ်ဆောင်မှုများကို လုပ်နိုင်သနည်း။
၁၈ လူအချို့သည် ဆေးဝါးဖြင့်ကုသဖို့လိုသော စိတ်ကျဝေဒနာ * ကြောင့် စိတ်ပျက်အားလျော့ကြ၏။ သင်လည်း ထိုသို့ခံစားနေရပါက “မြို့သားကလည်း ‘ငါနာသည်’ ဟုမဆိုရ” တော့သည့် ဘုရားသခင့်ကမ္ဘာသစ်ကို ကြိုးစားအာရုံစိုက်ကြည့်ပါလေ။ (ဟေရှာယ ၃၃:၂၄) ရံဖန်ရံခါစိတ်ညှိုးငယ်တတ်ခြင်းထက် ပို၍ အပျက်သဘောဝင်နေမည်ဆိုလျှင် သက်ဆိုင်ရာကျွမ်းကျင်ပညာရှင်တို့ထံ အကူအညီတောင်းခံခြင်းက ပညာရှိရာရောက်ပေမည်။ (မဿဲ ၉:၁၂) ထို့ပြင် ကိုယ့်ကျန်းမာရေးကိုယ် ဂရုစိုက်ရန်အရေးကြီးသည်။ ကျန်းမာရေးနှင့်ညီညွတ်သော အစားအသောက်များနှင့် ကာယလေ့ကျင့်ခန်းအချို့က အထောက်အကူပေးပေမည်။ အလုံအလောက်အနားယူဖို့ သေချာစေပါ။ ရုပ်မြင်သံကြားကို ညဉ့်နက်သည်အထိ မကြည့်ပါနှင့်။ ကိုယ်ရောစိတ်ပါ မောပန်းနွမ်းနယ်စေမည့် အပန်းဖြေမှုပုံစံများကို ရှောင်ကြဉ်ပါ။ ထို့ထက်ကား ဘုရားသခင်နှစ်သက်သည့် လုပ်ငန်းများကို ဆက်လက်လုပ်ဆောင်နေပါလေ။ “မျက်ရည်ရှိသမျှတို့ကို” ယေဟောဝါသုတ်ပေးမည့်အချိန် မရောက်သေးသော်လည်း ကိုယ်တော်သည် ကျွန်ုပ်တို့အား ခံနိုင်ရည်ပေးတော်မူပါလိမ့်မည်။—ဗျာ. ၂၁:၄; ၁ ကောရိန္သု ၁၀:၁၃။
ဘုရားသခင်၏ “တန်ခိုးကြီးသောလက်တော်အောက်၌” အသက်ရှင်နေထိုင်ခြင်း
၁၉။ ဆင်းရဲဝေဒနာခံရသူတို့ကို ယေဟောဝါ အဘယ်ကတိပြုတော်မူသနည်း။
၁၉ ဖြောင့်မတ်သောသူသည် များစွာသောဆင်းရဲကိုခံရသော်လည်း ယေဟောဝါသည် ‘ခပ်သိမ်းသောဆင်းရဲထဲက ကယ်နုတ်တော်မူ’ ကြောင်းသမ္မာကျမ်းစာက စိတ်ချစေသည်။ (ဆာလံ ၃၄:၁၉) ယင်းကို ဘုရားသခင် မည်သို့ပြုတော်မူသနည်း။ တမန်တော်ပေါလုသည် မိမိခံစားနေရသည့် “ကိုယ်၌စူးသောဆူး” မှကယ်နုတ်ပေးပါရန် ထပ်တလဲလဲ ဆုတောင်းခဲ့သောအခါ ယေဟောဝါက “ငါ့တန်ခိုးသည် အားနည်းခြင်းအဖြစ်၌ စုံလင်တတ်သည်” ဟုမိန့်တော်မူခဲ့သည်။ (၂ ကောရိန္သု ၁၂:၇-၉) ယေဟောဝါသည် ပေါလုအား အဘယ်ကတိပေးတော်မူခဲ့ပြီး သင့်အားလည်း အဘယ်ကတိပေးတော်မူသနည်း။ ချက်ချင်းကုသပေးမည်ဟုမဆိုဘဲ ခံနိုင်ရည်ပေးမည်ဟု ကိုယ်တော်ကတိပြုတော်မူ၏။
၂၀။ ကျွန်ုပ်တို့သည် စမ်းသပ်မှုများကြုံရလင့်ကစား ၁ ပေတရု ၅:၆၊ ၇က အဘယ်အရာကို စိတ်ချစေသနည်း။
၂၀ တမန်တော်ပေတရု ဤသို့ရေးသားခဲ့၏– “ကာလအချိန်တန်လျှင် ဘုရားသခင်သည် သင်တို့ကို ချီးမြှောက်တော်မူမည်အကြောင်း တန်ခိုးကြီးသောလက်တော်အောက်၌ ကိုယ်ကိုကိုယ်နှိမ့်ချကြလော့။ သင်တို့ကို သတိနှင့်ကြည့်ရှုတော်မူသောကြောင့် သင်တို့၌စိုးရိမ်ခြင်းအမှုရှိသမျှတို့ကို ကိုယ်တော်၌အပ်နှံကြလော့။” (၁ ပေတရု ၅:၆၊ ၇) ယေဟောဝါသည် သင့်ကို ဂရုစိုက်တော်မူသောကြောင့် သင့်ကို စွန့်ပစ်တော်မူမည်မဟုတ်ချေ။ သင်သည် စမ်းသပ်မှုများကြုံရလင့်ကစား သင့်ကို ကိုယ်တော်ထောက်မတော်မူမည်။ သစ္စာရှိခရစ်ယာန်များသည် ဘုရားသခင်၏ “တန်ခိုးကြီးသောလက်တော်အောက်၌” ရှိနေကြကြောင်းကို စိတ်ထဲစွဲမှတ်ထားပါလေ။ ယေဟောဝါ၏အမှုတော်ကို ကျွန်ုပ်တို့ထမ်းဆောင်နေသည်နှင့်အမျှ ကျွန်ုပ်တို့ခံနိုင်ရန် ကိုယ်တော်ခွန်အားပေးတော်မူ၏။ ကျွန်ုပ်တို့သည် ကိုယ်တော့်အပေါ် သစ္စာရှိနေမည်ဆိုလျှင် မည်သည့်အရာကမျှ ကျွန်ုပ်တို့၏ဝိညာဉ်ရေးကို အမြဲအန္တရာယ်ပြုနိုင်မည်မဟုတ်ချေ။ ထို့ကြောင့် ဆင်းရဲဝေဒနာခံရသူကို ယေဟောဝါ အမြဲကယ်နုတ်ပေးမည့်တစ်နေ့ကို မျှော်လင့်စောင့်စားကာ ကိုယ်တော်ကတိပြုထားသည့် ကမ္ဘာသစ်တွင် ထာဝရအသက်ရရန်အလို့ငှာ ကိုယ်တော့်အပေါ် ကျွန်ုပ်တို့သမာဓိစောင့်ထိန်းနိုင်ကြပါစေ။
[အောက်ခြေမှတ်ချက်]
^ အပိုဒ်၊ 1 အမည်ပြောင်းထားသည်။
^ အပိုဒ်၊ 18 ဆေးဝါးဖြင့်ကုသဖို့လိုသည့် စိတ်ကျဝေဒနာသည် စိတ်ပျက်အားလျော့ခြင်းထက် ပိုပြင်းထန်ကာ အဆက်မပြတ်ဖြစ်ပေါ်ခံစားနေရသည့် ရောဂါလက္ခဏာတစ်မျိုးဖြစ်၏။ ထပ်ဆင့်သိလိုပါက ၁၉၈၉ ခုနှစ် အောက်တိုဘာလ ၁၅ ရက်ထုတ်၊ စာမျက်နှာ ၂၁-၄; ၁၉၈၉ ခုနှစ် နိုဝင်ဘာလ ၁၅ ရက်ထုတ်၊ စာမျက်နှာ ၂၁-၄ နှင့် ၁၉၉၆ ခုနှစ် စက်တင်ဘာလ ၁ ရက်ထုတ်၊ စာမျက်နှာ ၃၀-၁ ကင်းမျှော်စင်တို့တွင်ရှု။
သင်မှတ်မိသလော
• ဆင်းရဲဝေဒနာသည် ယေဟောဝါ၏ကျေးကျွန်များကိုပင် အဘယ်ကြောင့်ထိခိုက်သနည်း။
• မည်သည့်အကြောင်းရင်းအချို့က ဘုရားသခင့်လူမျိုးအချို့ကို စိတ်ပျက်အားလျော့စေနိုင်သနည်း။
• ကျွန်ုပ်တို့၏စိုးရိမ်ပူပန်မှုများကို အောင်မြင်ကျော်လွှားနိုင်ရန် ယေဟောဝါ မည်သို့ကူညီမစတော်မူသနည်း။
• မည်သည့်နည်းဖြင့် ဘုရားသခင်၏ “တန်ခိုးကြီးသောလက်တော်အောက်၌” ကျွန်ုပ်တို့ရှိနေကြသနည်း။
[လေ့လာရန်မေးခွန်းများ]
[စာမျက်နှာ ၂၅ ပါ ရုပ်ပုံ]
ယေဟောဝါ၏လူမျိုးသည် စမ်းသပ်မှုများကြုံရလင့်ကစား ဝမ်းမြောက်ရွှင်လန်းရန်အကြောင်းရှိကြ
[စာမျက်နှာ ၂၈ ပါ ရုပ်ပုံ]
တယ်လီဖုန်းဖြင့်သက်သေခံခြင်းသည် ယေဟောဝါအား သင်၏အကောင်းဆုံးအရာကို ပေးနိုင်သည့်နည်းတစ်နည်းဖြစ်