ညည်းညူ“မြည်တမ်းခြင်း” မပြုကြနှင့်

ဖွင့်ပါ

ညည်းညူ“မြည်တမ်းခြင်း” မပြုကြနှင့်

“သင်တို့သည် ပြုလေသမျှတို့၌ မြည်တမ်းခြင်း၊ ငြင်းခုံခြင်းမရှိဘဲပြုကြလော့။”—ဖိလိပ္ပိ ၂:၁၄။

၁၊ ၂။ ဖိလိပ္ပိနှင့် ကောရိန္သုမြို့ရှိ ခရစ်ယာန်များကို တမန်တော်ပေါလု မည်သို့ဆုံးမခဲ့သနည်း။ အဘယ်ကြောင့်နည်း။

တမန်တော်ပေါလုသည် ဖိလိပ္ပိမြို့ရှိ ပထမရာစုခရစ်ယာန်အသင်းတော်ထံ ရေးပို့သော ဘုရားသခင့်မှုတ်သွင်းခံစာတွင် သူတို့ကို များစွာချီးမွမ်းခဲ့သည်။ ထိုမြို့တွင်ရှိသော ယုံကြည်မှုတူသူချင်းများ၏ ရက်ရောမှုနှင့် စိတ်ထက်သန်မှုကို အလွန်ချီးမွမ်းပြီး သူတို့ပြုသောကောင်းမှုများကြောင့် ဝမ်းသာကြောင်း ပြောခဲ့သည်။ သို့သော် “ပြုလေသမျှတို့၌ မြည်တမ်းခြင်း၊ ငြင်းခုံခြင်းမရှိဘဲပြုကြလော့” ဟု သူတို့ကို ပေါလုသတိပေးခဲ့၏။ (ဖိလိပ္ပိ ၂:၁၄) တမန်တော်သည် အဘယ်ကြောင့် ဤသို့သတိပေးဆုံးမခဲ့သနည်း။

^၂ညည်းညူမြည်တမ်းခြင်း၏အကျိုးဆက်ကို ပေါလုကြိုသိထားသည်။ ညည်းညူခြင်းသည် အန္တရာယ်ရှိကြောင်း အစောပိုင်းနှစ်အနည်းငယ်က ကောရိန္သုအသင်းတော်ကို သူသတိပေးခဲ့ဖူးသည်။ တောကန္တာရထဲလှည့်လည်စဉ် ဣသရေလလူမျိုးသည် ယေဟောဝါ၏အမျက်တော်ကို ကြိမ်ဖန်များစွာနှိုးဆွခဲ့ကြောင်း ပေါလုထောက်ပြသည်။ မည်သို့အားဖြင့်နည်း။ မကောင်းသောအရာတို့ကို တပ်မက်ခြင်း၊ အရုပ်ကိုးကွယ်ခြင်းနှင့် မတရားမေထုန်ပြုခြင်း၊ ယေဟောဝါအား စုံစမ်းခြင်းနှင့် ညည်းညူမြည်တမ်းခြင်းတို့ဖြင့်ဖြစ်သည်။ ထိုပုံနမူနာများမှ သင်ခန်းစာယူရန် ကောရိန္သုမြို့သားများကို ပေါလုစာရေး၍ ဤသို့တိုက်တွန်းခဲ့သည်– “ထိုသူအချို့တို့သည် မြည်တမ်းခြင်းကိုပြု၍ ဖျက်ဆီးသောသူ၏လက်ဖြင့် ပျက်စီးသကဲ့သို့မဟုတ်၊ မြည်တမ်းခြင်းကိုမပြုကြနှင့်။”—၁ ကောရိန္သု ၁၀:၆-၁၁။

၃။ ညည်းညူခြင်းကိစ္စသည် ယနေ့ အဘယ်ကြောင့် စိတ်ဝင်စားစရာ ဖြစ်သနည်း။

^၃ကျွန်ုပ်တို့သည် ယေဟောဝါ၏ မျက်မှောက်ခေတ်ကျေးကျွန်များအနေနှင့် ဖိလိပ္ပိအသင်းတော်သားများ၏ စိတ်ထားမျိုး တင်ပြကြသည်။ ကျွန်ုပ်တို့သည် စိတ်ထက်သန်စွာ ကောင်းမှုပြုကြပြီး အချင်းချင်းချစ်ကြသည်။ (ယောဟန် ၁၃:၃၄၊ ၃၅) သို့သော် ဘုရားသခင်၏လူမျိုးသည် ညည်းညူမြည်တမ်းခဲ့သောကြောင့် ဆိုးကျိုးများခံစားရသည်ကို ထောက်၍ “ပြုလေသမျှတို့၌ မြည်တမ်းခြင်း . . . မရှိဘဲပြုကြလော့” ဟူသော ဆုံးမစကားကို ကျွန်ုပ်တို့လိုက်နာသင့်သည်။ ကျမ်းစာတွင်ပါသည့် ညည်းညူသူများအကြောင်း ဦးဆုံး သုံးသပ်ကြည့်ကြစို့။ ထို့နောက် ညည်းညူခြင်းကြောင့် ဆိုးကျိုးများမခံစားရစေရန် ကျွန်ုပ်တို့ပြုလုပ်နိုင်ရာအချို့ကို သုံးသပ်ကြည့်ကြမည်။

ယေဟောဝါကို အပြစ်တင်၍ မြည်တမ်းသော ပရိသတ်ဆိုး

၄။ ဣသရေလလူမျိုးသည် တောကန္တာရတွင် မည်သို့ညည်းညူမြည်တမ်းခဲ့ကြသနည်း။

^၄သမ္မာကျမ်းစာတွင် ‘ညည်းညူမြည်တမ်းခြင်း၊ မြည်တွန်တောက်တီးခြင်း’ ဟု အဓိပ္ပာယ်ရှိသော ဟေဗြဲစကားလုံးကို တောကန္တာရထဲ ဣသရေလလူမျိုး အနှစ် ၄၀ လှည့်လည်စဉ်က ဖြစ်ရပ်များနှင့် ဆက်စပ်အသုံးပြုထားသည်။ ဣသရေလလူမျိုးသည် ရံဖန်ရံခါ အလိုမကျဖြစ်ပြီး ညည်းညူကြ၏။ သာဓကအနေနှင့် အီဂျစ်ပြည်ကျွန်ဘဝမှ လွတ်မြောက်လာပြီး အပတ်အနည်းငယ်အကြာတွင် “ဣသရေလအမျိုးသား ပရိသတ်အပေါင်းတို့က . . . မောရှေနှင့်အာရုန်ကို အပြစ်တင်၍ မြည်တမ်း . . . ကြ၏။” ဣသရေလလူမျိုးသည် အစားအစာနှင့်ပတ်သက်၍ မကျေမနပ်ဖြစ်ကြပြီး ‘ငါတို့သည် အဲဂုတ္တုပြည်၌ အမဲသားချက်သော အိုးကင်းနားမှာထိုင်၍ ဝစွာစားရသောအခါ ထာဝရဘုရားသခင်၏လက်တော်ဖြင့် သေလျှင်သာ၍ကောင်း၏။ ယခုမူကား ဤစည်းဝေးလျက်ရှိသောလူအပေါင်းတို့ကို ငတ်မွတ်ခြင်းအားဖြင့် သတ်လိုသောငှာ ဤတောအရပ်သို့ဆောင်ခဲ့ပြီတကား’ ဟုဆိုကြ၏။—ထွက်မြောက်ရာ ၁၆:၁-၃။

၅။ ဣသရေလလူမျိုးသည် အမှန်အားဖြင့် မည်သူ့ကို ပြစ်တင်ညည်းညူနေခြင်း ဖြစ်သနည်း။

^၅အမှန်မှာ ယေဟောဝါသည် ဣသရေလလူမျိုး တောထဲလှည့်လည်စဉ် သူတို့လိုအပ်သည့်အစာရေစာကို မေတ္တာဖြင့် ဖြည့်ဆည်းပေးခဲ့သည်။ ထိုလူမျိုးသည် တောထဲတွင် ငတ်ပြီးသေမည့်ဘေး တစ်ခါမျှမဆိုက်ခဲ့ရပါ။ သို့သော် သူတို့သည် မကျေနပ်၊ မရောင့်ရဲနိုင်ကြသဖြင့် မိမိတို့အဖြစ်ကို ပုံကြီးချဲ့ပြီး ညည်းညူကြခြင်းဖြစ်သည်။ မောရှေနှင့် အာရုန်ကို သူတို့ ပြစ်တင်ပြောဆိုနေကြသည်မှန်သော်လည်း သူတို့အမှန်တကယ် မကျေမချမ်းဖြစ်နေသည်မှာ မိမိကိုယ်တိုင်ကိုဖြစ်သည်ဟု ယေဟောဝါမြင်တော်မူ၏။ မောရှေက ‘သင်တို့သည် အပြစ်တင်လျက် မြည်တမ်းကြသောအသံကို ထာဝရဘုရားသခင် ကြားတော်မူပြီ။ ငါတို့သည် အဘယ်သို့သောသူဖြစ်သနည်း။ သင်တို့သည် အပြစ်တင်လျက် မြည်တမ်းကြသောစကားသည် ငါတို့ကိုမထိမခိုက်၊ ထာဝရဘုရားသခင်ကို ထိခိုက်သည်’ ဟု ဣသရေလလူမျိုးကို ဆိုလေ၏။—ထွက်မြောက်ရာ ၁၆:၄-၈။

၆၊ ၇။ တောလည်ရာ ၁၄:၁-၃ ဖော်ပြချက်အရ ဣသရေလလူမျိုး၏စိတ်သဘောထား မည်သို့ပြောင်းလဲသွားခဲ့သနည်း။

^၆ထိုသို့ဖြစ်ပြီးမကြာမီ ဣသရေလလူမျိုးသည် နောက်တစ်ဖန် ညည်းညူမြည်တမ်းကြပြန်သည်။ ကတိထားရာပြည်ကို ထောက်လှမ်းရန် အမျိုးသား ၁၂ ယောက်ကို မောရှေစေလွှတ်ခဲ့သည်။ ဆယ်ယောက်မှာ မကောင်းသတင်း သယ်ဆောင်လာကြသည်။ ရလဒ်ကား အဘယ်နည်း။ ‘ဣသရေလအမျိုးသားပရိသတ်အပေါင်းတို့သည် မောရှေနှင့်အာရုန်ကို အပြစ်တင်သောစကားနှင့် မြည်တမ်းလျက် ငါတို့သည် အဲဂုတ္တုပြည်၌မသေပါလေ။ ဤတော၌မသေပါလေ။ ငါတို့သည် ဓားဖြင့်သေ၍ သားမယားတို့သည် ရန်သူလက်သို့ရောက်စေခြင်းငှာ ထာဝရဘုရားသခင်သည် အဘယ်ကြောင့်ငါတို့ကို ဤအရပ် [ခါနာန်ပြည်] သို့ဆောင်ခဲ့တော်မူသနည်း။ အဲဂုတ္တုပြည်သို့ပြန်ကောင်းသည်မဟုတ်လော’ ဟုဆိုကြ၏။—တောလည်ရာ ၁၄:၁-၃။

^၇ဣသရေလလူတို့၏စိတ်ထား ပြောင်းလဲသွားလိုက်လေခြင်း။ အစပိုင်းတွင် အီဂျစ်ပြည်မှ သူတို့လွတ်မြောက်လာပြီး ပင်လယ်နီတွင် ကယ်နုတ်ခံရသည့်အတွက် ကျေးဇူးတင်စွာဖြင့် ယေဟောဝါအား ချီးမွမ်းသီချင်းဆိုခဲ့ကြသည်။ (ထွက်မြောက်ရာ ၁၅:၁-၂၁) သို့သော် တောထဲတွင် အဆင်မပြေမှုများကြုံရပြီး ခါနာန်လူမျိုးကို ကြောက်ရွံ့လာသည့်အခါ ကျေးဇူးတင်စိတ်ပျောက်ပြီး မကျေမနပ်ဖြစ်လာကြသည်။ လွတ်လပ်မှုရသည့်အတွက် ဘုရားသခင်အား ကျေးဇူးတင်မည့်အစား မိမိတို့ချို့ငဲ့ရသည်ဟု အမြင်မှားပြီး ကိုယ်တော်အား ပြစ်တင်ကြသည်။ ထို့ကြောင့် ညည်းညူခြင်းသည် ယေဟောဝါ၏ပြင်ဆင်ပေးချက်များကို ကျေးဇူးတင်လေးမြတ်စိတ်မရှိကြောင်း ထင်ရှားစေသည်။ ထို့ကြောင့် ကိုယ်တော်က “ငါ့ကိုအပြစ်တင်၍မြည်တမ်းသော ဤပရိသတ်ဆိုးတို့ကို အဘယ်မျှကာလပတ်လုံး ငါသည် သည်းခံရအံ့နည်း” ဟုမိန့်ဆိုခဲ့ခြင်းသည် အံ့အားသင့်စရာမဟုတ်ပေ။—တောလည်ရာ ၁၄:၂၇; ၂၁:၅။

ပထမရာစုတွင် ညည်းညူမြည်တမ်းခြင်း

၈၊ ၉။ ခရစ်ယာန်ဂရိကျမ်းစာစောင်များတွင် မှတ်တမ်းတင်ထားသော ညည်းညူမှုအကြောင်း ဖော်ပြပါ။

^၈အထက်ပါနမူနာများမှာ မိမိတို့၏မကျေနပ်မှုကို အုပ်စုလိုက် ထုတ်ဖော်ပြောဆိုခြင်းဖြစ်သည်။ ယေရှုခရစ်သည် အေဒီ ၃၂ ခုနှစ်တွင် တဲတော်ပွဲတက်ရောက်ဖို့ ယေရုရှလင်မြို့၌ရှိနေစဉ် လူအစုအဝေးတို့သည် ကိုယ်တော့်အကြောင်း တီးတိုးပြောဆိုနေကြ၏။ (ယောဟန် ၇:၁၂၊ ၁၃၊ ၃၂) အချို့က ကိုယ်တော်သည် သူတော်ကောင်းဖြစ်သည်၊ အချို့ကမူ သူတော်ကောင်းမဟုတ်ဟူ၍ တီးတိုးပြောဆိုလျက်နေကြ၏။

^၉နောက်တစ်ကြိမ်တွင် ယေရှုနှင့် တပည့်များသည် အခွန်ခံမဿဲလေဝိအိမ်တွင် ဧည့်သည်များအဖြစ် ရောက်ရှိနေကြ၏။ “ကျမ်းပြုဆရာနှင့် ဖာရိရှဲတို့က သင်တို့သည် အခွန်ခံသောသူ၊ ဆိုးသောသူတို့နှင့်အတူ အဘယ်ကြောင့်စားသောက်ကြသနည်းဟု တပည့်တော်တို့ကို ကဲ့ရဲ့အပြစ်တင်ကြ၏။” (လုကာ ၅:၂၇-၃၀) နောက်ပိုင်းလည်း ဂါလိလဲနယ်တွင် ကိုယ်တော်က “ငါသည် ကောင်းကင်ဘုံမှဆင်းသက်သောမုန့်ဖြစ်၏” ဟု မိန့်တော်မူသည်ကို ယုဒလူတို့ ညည်းညူကြ၏။ ယေရှု၏နောက်လိုက်အချို့ပင် ကိုယ်တော့်စကားကို မကျေမနပ်ဖြစ်ပြီး ညည်းညူလာကြသည်။—ယောဟန် ၆:၄၁၊ ၆၀၊ ၆၁။

၁၀၊ ၁၁။ ဂရိစကားပြောသောဂျူးများသည် အဘယ်ကြောင့် ညည်းညူခဲ့ကြသနည်း။ ထိုတိုင်တန်းချက်ကို ကိုင်တွယ်ဖြေရှင်းပုံမှ ခရစ်ယာန်အကြီးအကဲများ အဘယ်အရာသင်ယူနိုင်သနည်း။

^၁၀အေဒီ ၃၃ ခုနှစ်၊ ပင်တေကုတ္တေပွဲအပြီး မကြာမီတွင် ဖြစ်ပေါ်ခဲ့သော ညည်းညူမြည်တမ်းမှုတစ်ရပ်မူ အကျိုးဖြစ်ထွန်းခဲ့သည်။ ထိုအချိန်တွင် ဣသရေလနိုင်ငံပြင်ပမှလာကြသော ဘာသာဝင်လူသစ်များကို ယုဒနယ်ရှိ ယုံကြည်မှုတူသူချင်းများက ဧည့်ဝတ်ပြုနေကြသည်။ သို့သော် ထိုသို့ဝေမျှစားသုံးခြင်းနှင့်ပတ်သက်၍ ပြဿနာပေါ်ခဲ့ကြောင်း မှတ်တမ်းက ဤသို့ဆို၏– “နေ့ရက်အစဉ်အတိုင်း လုပ်ကျွေးသောအခါ ဟေလေနစ်အမျိုးမုဆိုးမတို့ကို မလုပ်မကျွေးဟု ထိုအမျိုးသားတို့သည် မြည်တမ်း၍ ဟေဗြဲလူတို့ကို အပြစ်တင်ကြ၏။”—တမန်တော် ၆:၁။

^၁၁ထိုသို့ညည်းညူသူတို့သည် တောထဲလှည့်လည်ခဲ့သော ဣသရေလလူမျိုးနှင့် မတူပါ။ ဂရိစကားပြောသော ထိုဂျူးများသည် ကိုယ်ကျိုးကြည့်ပြီး မကျေမနပ်ဖြစ်နေကြသည်မဟုတ်ပါ။ မုဆိုးမအချို့၏လိုအပ်ရာ မဖြည့်စွက်ပေးခြင်းကို ဂရုစိုက်စေလိုသောကြောင့်ဖြစ်သည်။ ထို့ပြင် ထိုညည်းညူသူတို့သည် ပြဿနာရှာသူများ မဟုတ်ကြပါ။ သူတို့သည် ယေဟောဝါကို ပြစ်တင်နေကြခြင်းလည်း မဟုတ်ပေ။ သူတို့၏ ခိုင်လုံသောမကျေနပ်ချက်ကို တိုက်ရိုက်တိုင်တန်းလိုက်ရာ တမန်တော်များက ချက်ချင်းအရေးယူဆောင်ရွက်ပေး၏။ တမန်တော်များသည် ခရစ်ယာန်အကြီးအကဲများအတွက် စံပြပင်! ဤဝိညာဉ်ရေးသိုးထိန်းများသည် “ဆင်းရဲသောသူ၏ အော်ဟစ်သံကိုမကြားလို၍ နားကိုပိတ်သောသူ” များမဖြစ်ရအောင် ဂရုစိုက်ကြသည်။—သု. ၂၁:၁၃; တမန်တော် ၆:၂-၆။

တဖြည်းဖြည်းတိုက်စားတတ်သောညည်းညူခြင်းကို သတိပြု

၁၂၊ ၁၃။ (က) ညည်းညူမြည်တမ်းခြင်း၏ အကျိုးဆက်များကို ဥပမာပေးရှင်းပြပါ။ (ခ) အဘယ်အရာက လူတစ်ဦးကို ညည်းညူမြည်တမ်းစေနိုင်သနည်း။

^၁၂ညည်းညူမြည်တမ်းခြင်းသည် ဘုရားသခင့်လူမျိုးတော်ကို များစွာပျက်စီးစေကြောင်း ကျွန်ုပ်တို့သုံးသပ်ခဲ့သည့် ကျမ်းစာပုံနမူနာအများက ဖော်ပြသည်။ ထို့ကြောင့် ယင်းသည် ယနေ့လည်း တဖြည်းဖြည်းတိုက်စားသွားနိုင်ကြောင်း အလေးအနက်စဉ်းစားသင့်သည်။ ယင်းကို ဤပုံဥပမာက နားလည်စေပေမည်။ သတ္တုအများသည် သံချေးတက်တတ်သောကြောင့် သံချေးစတက်နေသည်ကို ဂရုမစိုက်ပါက နောက်ဆုံး သုံးမရဘဲဖြစ်သွားနိုင်သည်။ စက်ပိုင်းချွတ်ယွင်းမှုကြောင့်မဟုတ်ဘဲ အန္တရာယ်ရှိသည့်အထိ ကားကိုယ်ထည် သံချေးတက်သွားသောကြောင့် မော်တော်ကားများစွာကို စွန့်ပစ်ကြရသည်။ ဤပုံဥပမာကို ညည်းညူမြည်တမ်းခြင်းနှင့် မည်သို့ဆက်စပ်ကြည့်နိုင်သနည်း။

^၁၃သတ္တုအချို့သည် သံချေးတက်လွယ်သည့်နည်းတူ မစုံလင်သူလူသားများသည် ညည်းညူတတ်သည့်ဝသီရှိကြ၏။ ကျွန်ုပ်တို့၌ ထိုအကျင့်ရှိမရှိ သတိပြုသင့်သည်။ ရေငွေ့နှင့် လေကြောင့် သံချေးမြန်မြန်တက်တတ်သကဲ့သို့ ဆင်းရဲခက်ခဲမှုများကြောင့် ပိုပြီးညည်းညူလာတတ်သည်။ စိတ်ဖိစီးခံနေရလျှင် အဆင်မပြေမှု အသေးအဖွဲလေးတစ်ခုသည် အကြီးအကျယ်မကျေနပ်စရာဖြစ်သွားနိုင်သည်။ ဤအစီအစဉ်စနစ်အဆုံးတွင် အခြေအနေများ ပိုဆိုးရွားလာနေသောကြောင့် ညည်းညူမြည်တမ်းစရာအကြောင်း တိုးများလာဖွယ်ရှိ၏။ (၂ တိမောသေ ၃:၁-၅) ထို့ကြောင့် ယေဟောဝါ၏ကျေးကျွန်တစ်ဦးသည် အခြားတစ်ဦးကို ပြစ်တင်ညည်းညူလာနိုင်သည်။ အကြောင်းရင်းမှာ တစ်ဦးတစ်ယောက်၏အားနည်းချက်များ၊ စွမ်းရည်များ သို့မဟုတ် လုပ်ငန်းတော်အခွင့်အရေးများကို မကျေမနပ်ဖြစ်ခြင်းစသည့် ကိစ္စလေးတစ်ခုမျှ ဖြစ်နိုင်သည်။

၁၄၊ ၁၅။ ညည်းညူမြည်တမ်းလိုစိတ်ကို အဘယ်ကြောင့် ထိန်းချုပ်သင့်သနည်း။

^၁၄မကျေနပ်စရာအကြောင်း မည်သို့ပင်ရှိပါစေ ညည်းညူလိုစိတ်ကို မထိန်းချုပ်ဘဲလွှတ်ထားပါက ကျွန်ုပ်တို့သည် မကျေနပ်နိုင်ဖြစ်ပြီး ညည်းညူသည့်အကျင့်ရှိသူ ဖြစ်သွားနိုင်သည်။ မှန်ပါသည်၊ ဝိညာဉ်ရေးကိုတိုက်စားတတ်သည့် ညည်းညူခြင်းကြောင့် ကျွန်ုပ်တို့ လုံးလုံးယိုယွင်းပျက်စီးသွားနိုင်၏။ တောထဲလှည့်လည်ရသည့်ဘဝကို ဣသရေလလူမျိုး ညည်းညူစဉ်က ယေဟောဝါကို အပြစ်တင်သည့်အထိဖြစ်ခဲ့ကြသည်။ (ထွက်မြောက်ရာ ၁၆:၈) ထိုသို့ကျွန်ုပ်တို့ ဘယ်သောအခါမျှ မဖြစ်ပါစေနှင့်။

^၁၅သံချေးတက်တတ်သည့်သတ္တုကို ခံဆေးသုတ်ထားပြီး သံချေးစားသည့်နေရာများကို အမြန်ဆုံးဂရုစိုက်ပြုပြင်ပေးခြင်းဖြင့် သံချေးဆက်မတက်နိုင်တော့။ ထိုနည်းထပ်တူ ကျွန်ုပ်တို့တွင် ညည်းညူတတ်သည့်ဝသီရှိကြောင်း သတိပြုမိသည်နှင့် ယင်းနှင့်ပတ်သက်၍ ဆုတောင်းလိုက်ပါက ထိန်းချုပ်နိုင်ပါသည်။ မည်သို့အားဖြင့်နည်း။

ယေဟောဝါ၏ရှုထောင့်မှ ကြည့်မြင်ပါ

၁၆။ ညည်းညူလိုစိတ်ပေါ်လာပါက ယင်းကို မည်သို့နိုင်နင်းမည်နည်း။

^၁၆ညည်းညူခြင်းက မိမိနှင့် မိမိပြဿနာများကိုသာ အာရုံစိုက်စေရာ ယေဟောဝါသက်သေများအနေနှင့် ရရှိထားသောကောင်းချီးများကို မျက်ကွယ်ပြုရာရောက်သည်။ ထို့ကြောင့် ညည်းညူလိုစိတ်ကိုနိုင်နင်းဖို့ အဆိုပါကောင်းချီးများကို အာရုံစိုက်နေရမည်။ ဥပမာ၊ ကျွန်ုပ်တို့တစ်ဦးစီသည် ယေဟောဝါ၏နာမတော်ကို ခံယူခွင့်ရရှိထားကြ၏။ (ဟေရှာယ ၄၃:၁၀) ကိုယ်တော်နှင့်ရင်းနှီးသောဆက်ဆံရေးရှိဖို့ ပြုစုပျိုးထောင်နိုင်ကြသည်၊ ‘ဆုတောင်းခြင်းကို နားထောင်တော်မူသောအရှင်’ ထံ ကျွန်ုပ်တို့အချိန်မရွေး စကားပြောဆိုနိုင်ကြသည်။ (ဆာလံ ၆၅:၂; ယာကုပ် ၄:၈) စကြဝဠာအကြွင်းမဲ့ပိုင်သအုပ်စိုးမှုအရေးကိစ္စကို သဘောပေါက်ပြီး ဘုရားသခင်အပေါ် သမာဓိစောင့်သိနိုင်သည့်အခွင့်ထူးရှိကြောင်း သိရ၍ ကျွန်ုပ်တို့၏ဘဝသည် အဓိပ္ပာယ်ရှိသည်။ (သု. ၂၇:၁၁) ဘုရားသခင့်နိုင်ငံတော်သတင်းကောင်း ဟောပြောခြင်းလုပ်ငန်းတွင် ကျွန်ုပ်တို့မှန်မှန် ပါဝင်နိုင်ကြသည်။ (မဿဲ ၂၄:၁၄) ယေရှုခရစ်၏ရွေးဖိုးပူဇော်ရာယဇ်ကို ယုံကြည်ခြင်းက ကိုယ်ကိုကိုယ်သိသောစိတ် ကြည်လင်စေနိုင်သည်။ (ယောဟန် ၃:၁၆) ကျွန်ုပ်တို့သည် မည်သည့်အခက်အခဲများကိုပင် ခံရပ်နေရပါစေ အဆိုပါကောင်းချီးများကို ခံစားနေကြရ၏။

၁၇။ ညည်းညူဖို့ အကြောင်းပေါ်လာလျှင်ပင် ကိစ္စရပ်များကို ယေဟောဝါ၏ရှုထောင့်မှ ကြည့်မြင်ရန် အဘယ်ကြောင့်ကြိုးစားသင့်သနည်း။

^၁၇ကိစ္စရပ်များကို ကျွန်ုပ်တို့၏အမြင်ဖြင့်မဟုတ်၊ ယေဟောဝါ၏ရှုထောင့်မှ ကြည့်မြင်ရန် ကြိုးစားကြပါစို့။ ‘အိုထာဝရဘုရားသခင် ကိုယ်တော်၏လမ်းတို့ကို အကျွန်ုပ်အားပြညွှန်၍ ခရီးတော်တို့ကို သွန်သင်တော်မူပါ” ဟုဆာလံဆရာဒါဝိဒ်သီဆိုခဲ့သည်။ (ဆာလံ ၂၅:၄) ညည်းညူစရာအကြောင်းရှိခဲ့လျှင် ယင်းကို ယေဟောဝါသတိမပြုမိဘဲမနေပါ။ ထိုကိစ္စရပ်ကို ကိုယ်တော်ချက်ချင်း ပြုပြင်တည့်မတ်ပေးနိုင်တော်မူ၏။ သို့ဖြစ်လျှင် ကိုယ်တော်သည် ဆင်းရဲခက်ခဲမှုကို တစ်ခါတစ်ရံ အဘယ်ကြောင့် ခွင့်ပြုထားသနည်း။ သည်းခံခြင်း၊ ခံနိုင်ရည်၊ ယုံကြည်ခြင်းနှင့် စိတ်ရှည်ခြင်းစသည့် အရည်အချင်းကောင်းများ တိုးပွားလာစေဖို့ဖြစ်နိုင်သည်။—ယာကုပ် ၁:၂-၄။

၁၈၊ ၁၉။ အခက်အခဲများကို မညည်းမညူခံရပ်ခြင်းကြောင့် ကျွန်ုပ်တို့ရရှိနိုင်သော အကျိုးကျေးဇူးများကို ဖော်ပြပါ။

^၁၈အဆင်မပြေမှုများရှိလျက်နှင့် မညည်းမညူ သည်းခံခြင်းက ကျွန်ုပ်တို့၏ ပင်ကိုအရည်အသွေးများကို တိုးတက်ကောင်းမွန်စေရုံမျှမက ကျွန်ုပ်တို့၏ပြုမူပုံကို အကဲခတ်နေသူများအတွက် စွဲမှတ်စရာဖြစ်သွားနိုင်သည်။ ၂၀၀၃ ခုနှစ်တွင် ဂျာမနီနိုင်ငံမှ ယေဟောဝါသက်သေတစ်စုသည် စည်းဝေးကြီးတက်ရန် ဟန်ဂေရီနိုင်ငံသို့ ဘတ်စကားဖြင့် သွားခဲ့ကြသည်။ ယာဉ်မောင်းဖြစ်သူမှာ သက်သေခံတစ်ဦးမဟုတ်သဖြင့် ဆယ်ရက်လုံးလုံး သူတို့နှင့်အတူမနေချင်ပေ။ သို့သော် ခရီးစဉ်အဆုံးတွင် သူ၏သဘောထား လုံးလုံးပြောင်းသွားသည်။ အဘယ်ကြောင့်နည်း။

^၁၉အဆိုပါခရီးစဉ်အတွင်း အဆင်မပြေမှု အတော်များများရှိခဲ့သော်လည်း သက်သေခံများသည် တစ်ခါမျှ မညည်းညူကြချေ။ ယင်းကြောင့် မိမိပို့ဆောင်ခဲ့ဖူးသမျှ ခရီးသည်တို့တွင် ဤအုပ်စုသည် အကောင်းဆုံးဖြစ်သည်ဟု ထိုယာဉ်မောင်းက ဆို၏။ မိမိအိမ်သို့ သက်သေခံများ နောက်တစ်ကြိမ်လာခဲ့လျှင် သူတို့ကို အိမ်ထဲခေါ်ဖိတ်ပြီး ကောင်းစွာနားထောင်ပါမည်ဟု သူကတိပေးခဲ့သည်။ “ပြုလေသမျှတို့၌ မြည်တမ်းခြင်း . . . မရှိ” ခဲ့သည့် ထိုခရီးသည်များ နာမည်ကောင်းရခဲ့၏။

ခွင့်လွှတ်ခြင်းက စည်းလုံးစေ

၂၀။ အချင်းချင်းကို အဘယ်ကြောင့်ခွင့်လွှတ်သင့်သနည်း။

^၂၀ယုံကြည်မှုတူသူချင်းတစ်ဦးနှင့်ပတ်သက်၍ ညည်းညူစရာအကြောင်း ရှိနေလျှင်ကော မည်သို့နည်း။ ကြီးလေးသောကိစ္စဖြစ်ပါက မဿဲ ၁၈:၁၅-၁၇ တွင် ယေရှုဖော်ပြခဲ့သောမူကို လက်တွေ့ကျင့်သုံးသင့်သည်။ သို့သော် မကျေနပ်မှုအများစုမှာ အသေးအဖွဲလေးမျှဖြစ်သောကြောင့် ထိုသို့ပြုဖို့ အမြဲမလိုအပ်ပါ။ ထိုအခြေအနေကို ခွင့်လွှတ်မှုပြဖို့ အခွင့်ကောင်းတစ်ခုအဖြစ် ရှုမြင်ကြည့်ပါလေ။ ပေါလု ဤသို့ရေးသားခဲ့သည်– ‘တစ်ယောက်၌တစ်ယောက် အပြစ်တင်စရာအခွင့်ရှိလျှင်၊ အချင်းချင်းသည်းခံ၍ အပြစ်ကိုလွှတ်ကြလော့။ ယေဟောဝါသည် သင်တို့၏အပြစ်ကိုလွှတ်တော်မူသကဲ့သို့ ထိုနည်းတူပြုကြလော့။ စုံလင်ခြင်းအဖွဲ့အစည်းတည်းဟူသော ချစ်ခြင်းမေတ္တာကို ထပ်၍ယူတင်ဝတ်ဆောင်ကြလော့။’ (ကောလောသဲ ၃:၁၃၊ ၁၄) ကျွန်ုပ်တို့ကို ယေဟောဝါ အပြစ်တင်စရာအကြောင်း များစွာရှိသည်မဟုတ်ပေလော။ သို့တိုင် ကျွန်ုပ်တို့ကို ကိုယ်တော်အကြိမ်ကြိမ် သနားကြင်နာစွာ ခွင့်လွှတ်တော်မူခဲ့ပြီ။ ယင်းကြောင့် ကျွန်ုပ်တို့လည်း ခွင့်လွှတ်လိုစိတ် အနည်းအကျဉ်း ရှိသင့်သည်မဟုတ်ပေလော။

၂၁။ ညည်းညူစကားကို ကြားနေရသူများ မည်သို့ဖြစ်သွားနိုင်သနည်း။

^၂၁မကျေနပ်စရာသည် မည်သို့ပင်ဖြစ်နေပါစေ ညည်းညူနေခြင်းဖြင့် ကိစ္စရပ်များ ပြေလည်သွားမည်မဟုတ်ပါ။ “ညည်းညူ” ဟုအဓိပ္ပာယ်ရသော ဟေဗြဲစကားလုံးသည် “ပြစ်တင်ကြိမ်းမောင်း” သည်ဟုလည်း အဓိပ္ပာယ်ရသည်။ အမြဲညည်းညူတတ်သူအနီးတွင် ကျွန်ုပ်တို့ အနေရခက်သဖြင့် သူ့ကို ဝေးဝေးရှောင်ကြသည်။ ကျွန်ုပ်တို့၏ညည်းညူမြည်တမ်းခြင်း၊ ပြစ်တင်ကြိမ်းမောင်းခြင်းကို ကြားနေရသူများလည်း ထို့အတူဖြစ်နိုင်သည်။ သင်၏ပြစ်တင်ကြိမ်းမောင်းသံကို သူတစ်ထူး နားစွင့်မည်ဖြစ်သော်လည်း သင့်ကို အထင်သေးသွားပေလိမ့်မည်။

၂၂။ ယေဟောဝါသက်သေများနှင့်ပတ်သက်၍ မိန်းမငယ်တစ်ဦး မည်သို့ဆိုသနည်း။

^၂၂ခွင့်လွှတ်တတ်သည့်သဘောသည် ယေဟောဝါ၏လူမျိုးတော် တန်ဖိုးထားမြတ်နိုးသည့် စည်းလုံးမှုကို တိုးပွားစေသည်။ (ဆာလံ ၁၃၃:၁-၃) ဥရောပနိုင်ငံတစ်ခုမှ အသက် ၁၇ နှစ်အရွယ် မိန်းမငယ်တစ်ဦးသည် ယေဟောဝါသက်သေများ၏ဌာနခွဲရုံးကို စာရေးပြီး သူတို့ကို ချီးမွမ်းစကားပြောခဲ့သည်။ သူက “တစ်ယောက်ကိုတစ်ယောက် မုန်းတီးကြ၊ လောဘကြီးကြ၊ သည်းမခံနိုင်ကြ၊ တစ်ကိုယ်ကောင်းဆန်ကြတာတွေကြောင့် စိတ်ဝမ်းမကွဲတဲ့အဖွဲ့ဆိုလို့ ဒီအဖွဲ့အစည်းတစ်ခုတည်းပဲရှိတယ်” ဟုပြောခဲ့သည်။

၂၃။ နောက်ဆောင်းပါး၌ အဘယ်အကြောင်း သုံးသပ်မည်နည်း။

^၂၃စစ်မှန်သောဘုရားသခင် ယေဟောဝါကို ဝတ်ပြုကိုးကွယ်သူများအနေနှင့် ကျွန်ုပ်တို့ရရှိထားကြသည့် ဝိညာဉ်ရေးရာကောင်းချီးများကို ကျေးဇူးတင်လေးမြတ်စိတ်က စည်းလုံးမှုတိုးပွားစေပြီး အခြားသူများအကြောင်း ညည်းညူပြောဆိုခြင်းကို ရှောင်စေသည်။ အန္တရာယ်ပိုများသော ညည်းညူမှုဖြစ်သည့် ယေဟောဝါ၏ မြေကြီးဆိုင်ရာအဖွဲ့အစည်းကို ပြစ်တင်ပြောဆိုခြင်း မပြုမိရန် ဘုရားသခင်နှစ်သက်သော အရည်အသွေးများက မည်သို့တားဆီးပေးနိုင်ကြောင်း နောက်ဆောင်းပါး၌ ဖော်ပြပါမည်။

သင်မှတ်မိသလော။

• ညည်းညူခြင်းတွင် အဘယ်အရာပါဝင်သနည်း။

• ညည်းညူခြင်း၏အကျိုးဆက်များကို မည်သို့ ဥပမာပေး ရှင်းပြမည်နည်း။

• ညည်းညူမြည်တမ်းလိုစိတ်ကို နိုင်နင်းရန် အဘယ်အရာက ကူညီပေးမည်နည်း။

• ခွင့်လွှတ်လိုစိတ်ရှိခြင်းသည် ညည်းညူမြည်တမ်းခြင်းမပြုရန် မည်သို့ကူညီပေးနိုင်သနည်း။

[လေ့လာရန်မေးခွန်းများ]

ဣသရေလလူမျိုးသည် အမှန်အားဖြင့် ယေဟောဝါကိုညည်းညူမြည်တမ်းခဲ့ကြ

ကိစ္စရပ်များကို ယေဟောဝါကဲ့သို့ သင်ရှုမြင်သလော

ခွင့်လွှတ်ခြင်းက ခရစ်ယာန်စည်းလုံးမှုကို တိုးပွားစေ

[စာမျက်နှာ ၁၄ ပါ ရုပ်ပုံ]

ဣသရေလလူမျိုးသည် အမှန်အားဖြင့် ယေဟောဝါကို ညည်းညူမြည်တမ်းခဲ့ကြ

[စာမျက်နှာ ၁၇ ပါ ရုပ်ပုံ]

ကိစ္စရပ်များကို ယေဟောဝါကဲ့သို့ သင်ရှုမြင်သလော

[စာမျက်နှာ ၁၈ ပါ ရုပ်ပုံ]

ခွင့်လွှတ်ခြင်းက ခရစ်ယာန် စည်းလုံးမှုကို တိုးပွားစေ

ကင်းမျှော်စင်—လေ့လာရန် စာစောင်