ယေဟောဝါအဖွဲ့အစည်း၏ ကောင်းမြတ်မှုကို အာရုံပြုလော့
ယေဟောဝါအဖွဲ့အစည်း၏ ကောင်းမြတ်မှုကို အာရုံပြုလော့
“အိမ်တော်၏ကောင်းမြတ်သောအရာများနှင့် အကျွန်ုပ်တို့သည် ရောင့်ရဲကြပါလိမ့်မည်။”—ဆာလံ ၆၅:၄၊ သမ္မာ။
၁၊ ၂။ (က) ဝတ်ပြုရာအိမ်တော်ဆိုင်ရာ အစီအစဉ်များသည် ဘုရားသခင့်လူမျိုးတော်အပေါ် အဘယ်အကျိုးသက်ရောက်မည်နည်း။ (ခ) ဒါဝိဒ်သည် ဝတ်ပြုရာအိမ်တော်ဆောက်လုပ်ရေးအတွက် အဘယ်ပြင်ဆင်မှုများ ပြုလုပ်ခဲ့သနည်း။
ရှေးခေတ်ဣသရေလနိုင်ငံမှ ဒါဝိဒ်သည် ဟေဗြဲကျမ်းစာစောင်များ၌ ဖော်ပြထားသော အထင်ရှားဆုံးပုဂ္ဂိုလ်တို့တွင် တစ်ဦးပါဝင်သည်။ သိုးထိန်းလည်းဖြစ်၊ ဂီတပညာရှင်လည်းဖြစ်၊ ပရောဖက်လည်းဖြစ်သော ဤရှင်ဘုရင်သည် ယေဟောဝါဘုရားသခင်ကို အကြွင်းမဲ့ယုံကြည်ကိုးစားခဲ့သည်။ ဒါဝိဒ်သည် ယေဟောဝါနှင့် အလွန်ရင်းနှီးကျွမ်းဝင်သော ဆက်ဆံရေးရှိသောကြောင့် ဘုရားသခင်အတွက် အိမ်တော်ဆောက်လုပ်ပေးလိုစိတ် ပြင်းပြခဲ့သည်။ ထိုအိမ်တော်သည် ဣသရေလနိုင်ငံတွင် စစ်မှန်သောဝတ်ပြုရေး၏ဗဟို ဖြစ်လာပါလိမ့်မည်။ ၎င်းဝတ်ပြုရာအိမ်တော်ဆိုင်ရာ အစီအစဉ်များသည် ဘုရားသခင့်လူမျိုးတော်ကို ပျော်ရွှင်မှုသာမက ကောင်းချီးများပါရရှိစေမည်ဖြစ်ကြောင်း ဒါဝိဒ်သိထားသည်။ ထို့ကြောင့် ဒါဝိဒ်ဤသို့သီဆိုခဲ့၏– “တံတိုင်းတော်အတွင်း၌နေစေခြင်းငှာ ကိုယ်တော် [ယေဟောဝါ] ရွေးချယ်၍ ချဉ်းကပ်စေတော်မူသောသူသည် မင်္ဂလာရှိပါ၏။ သန့်ရှင်းသော . . . အိမ်တော်၏ကောင်းမြတ်သောအရာများနှင့် အကျွန်ုပ်တို့သည် ရောင့်ရဲကြပါလိမ့်မည်။”—ဆာလံ ၆၅:၄၊ သမ္မာ။
၂ ဒါဝိဒ်သည် ယေဟောဝါ၏အိမ်တော်ဆောက်လုပ်ခြင်းကို ကြီးကြပ်ခွင့် မရရှိခဲ့ပါ။ ထိုအခွင့်ထူးကို သူ၏သားရှောလမုန် ရရှိမည်ဖြစ်သည်။ သူကိုယ်တိုင် အလွန်လိုချင်သောအခွင့်ထူးကို အခြားသူတစ်ဦးရရှိသည့်အတွက် ဒါဝိဒ်ညည်းညူခြင်းမပြုခဲ့ချေ။ သူအဓိကထားသည်မှာ ဝတ်ပြုရာအိမ်တော် ဆောက်ဖြစ်ဖို့ဖြစ်သည်။ ယေဟောဝါထံတော်မှ သူရရှိထားသော ဗိသုကာပုံစံများကို ရှောလမုန်အား ပေးအပ်လိုက်ခြင်းဖြင့် ဆောက်လုပ်ရေးစီမံကိန်းကို စိတ်နှလုံးအကြွင်းမဲ့ ထောက်မခဲ့သည်။ ထို့ပြင် ဒါဝိဒ်သည် ဝတ်ပြုရာအိမ်တော်တွင် အမှုတော်ထမ်းသည့် ထောင်နှင့်ချီသော လေဝိသားများကို တာဝန်ခွဲပေးပြီး အိမ်တော်ဆောက်လုပ်ခြင်းအတွက် ရွှေငွေမြောက်မြားစွာ လှူဒါန်းခဲ့သည်။—၁ ရာဇဝင်ချုပ် ၁၇:၁၊ ၄၊ ၁၁၊ ၁၂; ၂၃:၃-၆; ၂၈:၁၁၊ ၁၂; ၂၉:၁-၅။
၃။ ဘုရားသခင့်ကျေးကျွန်များသည် စစ်မှန်သောဝတ်ပြုရေးဆိုင်ရာ အစီအစဉ်များကို မည်သို့သဘောထားကြသနည်း။
၃ ဣသရေလလူမျိုးမှ သစ္စာရှိသူတို့သည် ဘုရားသခင့်အိမ်တော်၌ပြုလုပ်သော စစ်မှန်သောဝတ်ပြုရေးအစီအစဉ်များကို အားပေးထောက်ခံခဲ့ကြသည်။ ယေဟောဝါ၏ မျက်မှောက်ခေတ် ကျေးကျွန်များအနေနှင့် ကျွန်ုပ်တို့လည်း ကိုယ်တော့်အဖွဲ့အစည်းမြေကြီးဆိုင်ရာအပိုင်း၏ ဝတ်ပြုရေးအစီအစဉ်များကို ဝိုင်းဝန်းထောက်ခံကြသည်။ ဤနည်းဖြင့် ကျွန်ုပ်တို့တွင် ဒါဝိဒ်၏စိတ်သဘောထားရှိကြောင်း တင်ပြကြသည်။ ညည်းညူပြစ်တင်တတ်သည့် သဘောထားမျိုး မဟုတ်ပေ။ ယင်းအစား ဘုရားသခင့်အဖွဲ့အစည်း၏ ကောင်းမြတ်မှုကို ကျွန်ုပ်တို့အာရုံစိုက်ကြသည်။ ကျွန်ုပ်တို့အမှန်ပင် ကျေးဇူးတင်ရမည့် ကောင်းမြတ်ရာများအကြောင်း သင်စဉ်းစားဖူးသလော။ အချို့ကို သုံးသပ်ကြည့်ကြစို့။
ဦးဆောင်နေသူများရှိသည့်အတွက် ကျေးဇူးတင်ခြင်း
၄၊ ၅။ (က) ‘သစ္စာနှင့် သတိပညာရှိသောကျွန်’ သည် မည်သို့တာဝန်ကျေပွန်သနည်း။ (ခ) သက်သေခံအချို့သည် သူတို့ရရှိသောဝိညာဉ်အစာနှင့်ပတ်သက်၍ မည်သို့သဘောထားကြသနည်း။
၄ မြေကြီးပေါ်ရှိ ယေရှုခရစ်၏ဥစ္စာများအပေါ် ‘သစ္စာနှင့် သတိပညာရှိသောကျွန်’ ကို ကိုယ်တော်အအုပ်အချုပ်ခန့်ထားသည့်အတွက် ကျေးဇူးတင်စရာအကြောင်းရှိသည်။ ဝိညာဉ်တော်ဖွားခရစ်ယာန်များဖြင့် ဖွဲ့စည်းထားသော ဤကျွန်အတန်းအစားသည် သတင်းကောင်းဟောပြောခြင်း၊ ဝတ်ပြုစည်းဝေးပွဲများ စီစဉ်ခြင်းနှင့် ကျမ်းစာအခြေပြု စာပေစာတမ်းများကို ဘာသာစကား ၄၀၀ ကျော်ဖြင့် ထုတ်ဝေခြင်းတို့ကို ဦးဆောင်ဦးရွက်ပြုနေသည်။ ကမ္ဘာတစ်ဝန်းမှ သန်းနှင့်ချီသောသူတို့သည် ဤအချိန်တန်ဝိညာဉ်အစာကို ကျေးဇူးတင်စွာ စားသုံးနေကြသည်။ (မဿဲ ၂၄:၄၅-၄၇) ယင်းအစာနှင့်ပတ်သက်၍ ညည်းညူစရာအကြောင်း လုံးဝမရှိပါ။
၅ ယေဟောဝါ၏ သက်ကြီးရွယ်အို သက်သေခံတစ်ဦးဖြစ်သူ အဲလ်ဖီသည် ဤကျွန်အတန်းအစား၏ စာပေစာတမ်းများပါ ဝိညာဉ်ရေးရာသွန်သင်ချက်ကို နှစ်ပေါင်းများစွာ လက်တွေ့ကျင့်သုံးခဲ့ရာ နှစ်သိမ့်မှုသာမက ထောက်မမှုပါရခဲ့သောကြောင့် အလွန်ကျေးဇူးတင်စွာဖြင့် “ကျွန်မအတွက် ယေဟောဝါရဲ့အဖွဲ့အစည်း မရှိလို့ကို မဖြစ်ဘူး” ဟုစာရေးပြောဆိုခဲ့သည်။ ပီတာနှင့် အမ်ဂတ်တို့လည်း ဆယ်စုနှစ်ချီ၍ ဘုရားသခင့်ကျေးကျွန်များဖြစ်ခဲ့ကြပြီ။ အမ်ဂတ်သည် “မေတ္တာရှေ့ရှု ပြုစုစောင့်ရှောက်သော ယေဟောဝါအဖွဲ့အစည်း” ၏ပြင်ဆင်ပေးချက်များကို ကျေးဇူးတင်ကြောင်းပြောသည်။ အဆိုပါစာအုပ်စာတမ်းများတွင် အမြင်အာရုံ၊ အကြားအာရုံချို့တဲ့နေသူများစသည့် အထူးအကူအညီလိုအပ်သူတို့အတွက် စာပေများလည်းပါဝင်သည်။
၆၊ ၇။ (က) ကမ္ဘာတစ်ဝန်းရှိ အသင်းတော်များ၏လုပ်ဆောင်မှုကို မည်သို့ကြီးကြပ်သနည်း။ (ခ) ယေဟောဝါ၏ မြေကြီးဆိုင်ရာအဖွဲ့အစည်းအကြောင်း မည်သို့ပြောဆိုခဲ့ကြပြီနည်း။
၆ နယူးယောက်၊ ဘရွတ်ကလင်ရှိ ယေဟောဝါသက်သေများ၏ ကမ္ဘာ့ဌာနချုပ်တွင် အမှုထမ်းနေကြသော ဝိညာဉ်တော်ဖွားအမျိုးသားများအထဲမှ အချို့ဖြင့် ဖွဲ့စည်းထားသည့် အုပ်ချုပ်ရေးအဖွဲ့သည် ‘သစ္စာရှိကျွန်’ ကိုကိုယ်စားပြုသည်။ ကမ္ဘာတစ်ဝန်းရှိ အသင်းတော်ပေါင်း ၉၈,၀၀၀ ကျော်၏ လုပ်ဆောင်မှုကို ကြီးကြပ်ပေးသော ဌာနခွဲရုံးများ၌ အမှုထမ်းကြသည့် ယေဟောဝါ၏ အတွေ့အကြုံရင့်ကျက်သော ကျေးကျွန်များကို ထိုအုပ်ချုပ်ရေးအဖွဲ့က ခန့်အပ်သည်။ ကျမ်းစာသတ်မှတ်ချက်များကို ပြည့်မီသော အမျိုးသားများအား အဆိုပါအသင်းတော်များတွင် အကြီးအကဲများနှင့် ဓမ္မအမှုထမ်းများအဖြစ် ခန့်အပ်သည်။ (၁ တိမောသေ ၃:၁-၉၊ ၁၂၊ ၁၃) အကြီးအကဲများသည် ဘုရားသခင့်သိုးတော်စုကို မေတ္တာဖြင့် ဦးစီးထိန်းကျောင်းပေးကြသည်။ အဆိုပါသိုးတော်စုအဝင်ဖြစ်ရခြင်း၊ ‘ညီအစ်ကိုများအသင်းအပင်း’ တွင် ချစ်ခင်ကြင်နာမှုနှင့် စည်းလုံးမှုခံစားရခြင်းတို့သည် တကယ့်ကောင်းချီးပင်!—၁ ပေတရု ၂:၁၇; ၅:၂၊ ၃။
၇ ညည်းညူမြည်တမ်းကြမည့်အစား အကြီးအကဲများ၏ မေတ္တာပါလမ်းညွှန်မှုရရှိသည့်အတွက် ကျေးဇူးတင်ကြသူများစွာရှိသည်။ သာဓကအနေနှင့်၊ အသက် ၃၀ ကျော် ခရစ်ယာန်ဇနီးသည်တစ်ဦးဖြစ်သူ ဘဲဂစ်ထ်အကြောင်း သုံးသပ်ကြည့်ပါ။ ဆယ်ကျော်သက်ဘဝတွင် သူသည် အပေါင်းအသင်းမှားပြီး အပြစ်ကျူးလွန်မိမတတ်ဖြစ်ခဲ့သည်။ သို့သော် အကြီးအကဲများ၏ ရှင်းလင်းပြတ်သားသော ကျမ်းစာသွန်သင်ချက်နှင့် ယုံကြည်မှုတူသူချင်းများ၏ ထောက်မမှုကြောင့် အန္တရာယ်ကျရောက်တော့မည့်အခြေအနေမှ လွတ်မြောက်ခဲ့သည်။ ယခု ဘဲဂစ်ထ် မည်သို့ခံစားရသနည်း။ “ယေဟောဝါရဲ့ အဖွဲ့အစည်းထဲမှာ အခုထိ ကျွန်မရှိနေသေးတဲ့အတွက် ကျေးဇူးတင်လို့မဆုံးဘူး” ဟုသူဆိုသည်။ အသက် ၁၇ နှစ်အရွယ် အန်ဒရေးရက်စ်က “ယေဟောဝါရဲ့အဖွဲ့အစည်းဟာ ကမ္ဘာပေါ်မှာ အကောင်းဆုံးအဖွဲ့အစည်းပါပဲ” ဟုဆို၏။ ယေဟောဝါအဖွဲ့အစည်း မြေကြီးဆိုင်ရာအပိုင်း၏ ကောင်းမြတ်မှုအတွက် ကျေးဇူးမတင်သင့်ပေလော။
ဦးဆောင်နေသူများသည် မစုံလင်သူများဖြစ်
၈၊ ၉။ ဒါဝိဒ်၏ တစ်ခေတ်တည်းသားအချို့သည် မည်သို့ပြုမူခဲ့ကြသနည်း။ သူတို့၏အပြုအမူကို ဒါဝိဒ် မည်သို့တုံ့ပြန်ခဲ့သနည်း။
၈ မှန်ပါသည်၊ စစ်မှန်သောဝတ်ပြုရေးကို ဦးဆောင်ပေးရန် ခန့်အပ်ခံရသူများသည် မစုံလင်ကြချေ။ သူတို့အားလုံး မှားတတ်ကြသည်။ အချို့ဆိုလျှင် သူတို့မနည်းထိန်းနေရသော အားနည်းချက်များ ရှိသည်။ ယင်းကြောင့် ကျွန်ုပ်တို့ စိတ်အနှောင့်အယှက်ဖြစ်စရာလိုသလော။ မလိုပါ။ ရှေးဣသရေလနိုင်ငံတွင် တာဝန်ကြီးကြီးမားမား အပ်နှင်းခံရသူများပင်လျှင် ကြီးလေးသောအမှားများ ကျူးလွန်ခဲ့ကြသည်။ ဥပမာ၊ လူငယ်ဒါဝိဒ်သည် စိတ်ညစ်နေသော ရှောလုမင်း စိတ်သက်သာမှုရစေရန် တီးမှုတ်ဖျော်ဖြေပေးခဲ့ရသည်။ နောက်ပိုင်းတွင် ရှောလုက ဒါဝိဒ်ကိုသတ်ဖို့ ကြိုးစားလေရာ သူ့ခမျာ ထွက်ပြေးတိမ်းရှောင်နေခဲ့ရသည်။—၁ ဓမ္မရာဇဝင် ၁၆:၁၄-၂၃; ၁၈:၁၀-၁၂; ၁၉:၁၈; ၂၀:၃၂၊ ၃၃; ၂၂:၁-၅။
၉ ဣသရေလလူမျိုးမှ အခြားသူများလည်း သစ္စာဖောက်ခဲ့ကြသည်။ ဥပမာ၊ ဒါဝိဒ်၏စစ်ဗိုလ်ချုပ် ယွာဘသည် ရှောလု၏ဆွေမျိုးအာဗနာကို အသေသတ်ခဲ့သည်။ အဗရှလုံသည် သူ့ခမည်းတော်ဒါဝိဒ်၏ မင်းအရိုက်အရာကိုရဖို့ ပူးပေါင်းကြံစည်ခဲ့သည်။ ဒါဝိဒ်၏လူယုံ အကြံပေးအရာရှိ အဟိသောဖေလသည် သူ့ကိုသစ္စာဖောက်ခဲ့သည်။ (၂ ဓမ္မရာဇဝင် ၃:၂၂-၃၀; ၁၅:၁-၁၇၊ ၃၁; ၁၆:၁၅၊ ၂၁) သို့သော် ဒါဝိဒ်သည် စိတ်နာကြည်းစွာ ညည်းညူသူဖြစ်မလာပေ။ စစ်မှန်သောဝတ်ပြုရေးကိုလည်း စွန့်ခွာရန်မကြံစည်ဘဲ ဆင်းရဲခက်ခဲမှုများကြား ယေဟောဝါကိုတွယ်ကပ်နေ၍ ရှောလုကြောင့် ထွက်ပြေးခဲ့ရစဉ် သူ၌ရှိသော စိတ်သဘောထားကို ဆက်ထိန်းထားသည်။ ထိုအချိန်တွင် ဒါဝိဒ်ဤသို့သီဆိုခဲ့၏– “အိုဘုရားသခင် အကျွန်ုပ်ကိုသနားတော်မူပါ။ သနားတော်မူပါ။ ကိုယ်တော်၌ အကျွန်ုပ်ခိုလှုံပါ၏။ ဖျက်ဆီးခြင်းဘေး လွန်သွားသည်တိုင်အောင် အတောင်တော်အရိပ်၌ခိုလှုံပါ၏။”—ဆာလံ ၅၇:၁၊ သမ္မာ။
၁၀၊ ၁၁။ ဂတ်ထရုအမည်ရှိ ခရစ်ယာန်တစ်ဦး ငယ်ရွယ်စဉ်က အဘယ်အရာတွေ့ကြုံခဲ့ရသနည်း။ ယုံကြည်မှုတူသူချင်းများ၏ ချွတ်ချော်မှုများနှင့်ပတ်သက်၍ သူမည်သို့ပြောဆိုသနည်း။
၁၀ ယနေ့ ဘုရားသခင့်အဖွဲ့အစည်းအတွင်း သစ္စာမဲ့သူများရှိသည်ဟု ကျွန်ုပ်တို့တစ်ယောက်မှ ညည်းညူစရာအကြောင်းမရှိပါ။ ယေဟောဝါဖြစ်စေ၊ ကောင်းကင်တမန်များဖြစ်စေ၊ ဝိညာဉ်ရေးစိတ်ဓာတ်ရှိသိုးထိန်းများဖြစ်စေ သစ္စာဖောက်သူ၊ ဆိုးညစ်သူများကို ခရစ်ယာန်အသင်းတော်အတွင်းရှိနေရန် ခွင့်ပြုမည်မဟုတ်ပါ။ မည်သို့ဆိုစေ ကျွန်ုပ်တို့အားလုံး ကိုယ်ကိုယ်တိုင်နှင့် ဝတ်ပြုမှုတူသူချင်းများ၏ မစုံလင်မှုကို အမြဲကြုံနေကြရသည်။
၁၁ ယေဟောဝါကို ဝတ်ပြုသည်မှာ သက်တမ်းကြာခဲ့ပြီဖြစ်သော ဂတ်ထရုသည် လုံမပျိုဘဝတွင် အချိန်ပြည့် ဘုရားသခင့်နိုင်ငံတော်ကြွေးကြော်သူတစ်ဦး ဖြစ်ယောင်ဆောင်သည်ဟု တလွဲစွပ်စွဲခံခဲ့ရသည်။ ထိုအခါ သူမည်သို့တုံ့ပြန်ခဲ့သနည်း။ ထိုသို့စွပ်စွဲခံရသည့်အတွက် ဂတ်ထရု ညည်းတွားခဲ့သလော။ မညည်းခဲ့ပါ။ အသက် ၉၁ နှစ်ရှိချိန် ၂၀၀၃ ခုနှစ်၌ သူ,မသေဆုံးမီလေးတွင် သူ့ဘဝနောက်ကြောင်းကို ပြန်ပြောင်းသုံးသပ်ပြီး ဤသို့ရှင်းပြခဲ့၏– “မှားတတ်ကြတဲ့ မစုံလင်သူ လူသားတွေကို ယေဟောဝါအသုံးပြုပြီး ကိုယ်တော်ရဲ့လုပ်ငန်းကို ညွှန်ကြားနေတယ်ဆိုတာကို အဲဒီအဖြစ်အပျက်နဲ့ နောက်ပိုင်းအဖြစ်အပျက်တွေက ကျွန်မကိုသိရှိစေတယ်။” ဝတ်ပြုမှုတူသူချင်းများ၏ မစုံလင်မှုကြောင့် အခက်အခဲကြုံရသည့်အခါ ဂတ်ထရုသည် ယေဟောဝါထံ ရင်ဖွင့်ဆုတောင်းလေသည်။
၁၂။ (က) ပထမရာစုမှ ခရစ်ယာန်အချို့သည် အဘယ်နည်းဖြင့် ပုံသက်သေမကောင်းခဲ့ကြသနည်း။ (ခ) အဘယ်အရာကို တွေးတောဆင်ခြင်သင့်သနည်း။
၁၂ သစ္စာနှံခရစ်ယာန်များပင် မစုံလင်သူများဖြစ်သောကြောင့် ခန့်အပ်ခံကျေးကျွန်တစ်ဦး အပြစ်ပြုမိသည့်အခါ ‘ပြုလေသမျှ၌ ညည်းညူခြင်းမရှိဘဲ’ ဆက်၍ပြုကြပါစို့။ (ဖိလိပ္ပိ ၂:၁၄) ကျွန်ုပ်တို့သည် ပထမရာစု ခရစ်ယာန်အသင်းတော်မှ လူအချို့၏ မကောင်းသောပုံသက်သေကို လိုက်မည်ဆိုလျှင် အလွန်ဝမ်းနည်းစရာပင်! တပည့်ဖြစ်သူ ယုဒ၏အဆိုအရ ထိုခေတ်မှ ဆရာအတုအယောင်တို့သည် “အာဏာစက်ကိုပယ်လျက်၊ ဘုန်းတန်ခိုးကြီးသောသူတို့ကို ကဲ့ရဲ့” နေကြသည်။ ထိုမျှမက သူတို့သည် “မြည်တမ်း၍အပြစ်တင်တတ်သောသူ၊” မိမိဘဝအခြေအနေကို ညည်းညူနေတတ်သူများ ဖြစ်ကြ၏။ (ယုဒ ၈၊ ၁၆) ကျွန်ုပ်တို့မူ ညည်းညူပြစ်တင်တတ်သူတို့၏ လမ်းစဉ်ကိုမလိုက်ဘဲ ‘သစ္စာရှိကျွန်’ မှတစ်ဆင့်ရရှိသော ကောင်းမြတ်ရာများကို စေ့စေ့ဆင်ခြင်သုံးသပ်ကြပါစို့။ ယေဟောဝါအဖွဲ့အစည်း၏ ကောင်းမြတ်မှုကို တန်ဖိုးထားလေးမြတ်ပြီး ‘ပြုလေသမျှ၌ ညည်းညူခြင်းမရှိဘဲ ပြုကြ’ ပါစို့။
“ထိုစကားသည်အလွန်ခက်လှ၏”
၁၃။ ယေရှုခရစ်၏သွန်သင်ချက်အချို့ကို လူအချို့ မည်သို့တုံ့ပြန်ခဲ့ကြသနည်း။
၁၃ ပထမရာစုမှ အချို့သူတို့သည် ခန့်အပ်ခံကျေးကျွန်များကို မကျေမနပ်ဖြစ်ပြီး ညည်းညူပြစ်တင်ခဲ့ကြသည့်နည်းတူ ယေရှု၏သွန်သင်ချက်များကို ကဲ့ရဲ့ပြစ်တင်သူများလည်းရှိခဲ့သည်။ ယောဟန် ၆:၄၈-၆၉ တွင် မှတ်တမ်းတင်ထားသည့်အတိုင်း ယေရှုက “ငါ၏အသားကိုစား၍ ငါ၏အသွေးကိုလည်းသောက်သောသူသည် ထာဝရအသက်ကိုရ၏” မိန့်တော်မူ၏။ ထိုစကားကိုကြားသောအခါ ‘တပည့်အများတို့က ထိုစကားသည်အလွန်ခက်လှ၏။ အဘယ်သူနားခံနိုင်မည်နည်းဟု ဆိုကြ၏။’ ‘ထိုသို့ တပည့်များ ညည်းညူကြသည်ကို’ ယေရှုသိတော်မူ၏။ ‘ထိုအခါမှစ၍ တပည့်အများတို့သည် ကိုယ်တော်နှင့်မပေါင်းဖော်ဘဲ ဆုတ်သွားကြ၏။’ သို့သော် တပည့်အားလုံး မညည်းညူပါ။ တမန်တော် ၁၂ ပါးကို ယေရှုက “သင်တို့သည်လည်း ထွက်သွားခြင်းငှာအလိုရှိကြသလော” ဟုမေးမြန်းချိန်၌ မည်သို့ဖြစ်ပျက်ခဲ့သည်ကို သတိပြုပါ။ တမန်တော်ပေတရုက “သခင်၊ အကျွန်ုပ်တို့သည် အဘယ်သူထံသို့ သွားရပါမည်နည်း။ ထာဝရအသက်နှင့်ယှဉ်သောစကားသည် ကိုယ်တော်၌တည်ပါ၏။ ကိုယ်တော်သည် ခရစ်တော်တည်းဟူသော အသက်ရှင်တော်မူသော ဘုရားသခင်၏သားတော်ဖြစ်တော်မူသည်ကို အကျွန်ုပ်တို့ယုံကြည်သိမှတ်ကြပါသည်” ဟုဖြေဆိုခဲ့၏။
၁၄၊ ၁၅။ (က) အချို့သူတို့သည် ခရစ်ယာန်သွန်သင်ချက်အချို့ကို အဘယ်ကြောင့် မကျေမနပ်ဖြစ်လာသနည်း။ (ခ) အေမယ်နူဝယ်လ်၏အဖြစ်အပျက်မှ ကျွန်ုပ်တို့ အဘယ်အရာသိရှိရသနည်း။
၁၄ မျက်မှောက်ခေတ်တွင် ဘုရားသခင့်လူမျိုးတော်မှ လူအနည်းငယ်သည် ခရစ်ယာန်သွန်သင်ချက်အချို့ကို မကျေမနပ်ဖြစ်လာပြီး ယေဟောဝါ၏မြေကြီးဆိုင်ရာအဖွဲ့အစည်းကို အပြစ်တင်လာကြသည်။ အဘယ်ကြောင့် ဤသို့ဖြစ်ရသနည်း။ အများအားဖြင့် ကိစ္စရပ်များကို ယေဟောဝါကိုင်တွယ်ပုံကို နားမလည်သောကြောင့်ဖြစ်သည်။ ဖန်ဆင်းရှင်သည် မိမိလူတို့အား အမှန်တရားကို အဆင့်ဆင့်ဖော်ပြတော်မူ၏။ ထို့ကြောင့် ကျမ်းစာအသိပညာနှင့်ပတ်သက်သော နားလည်ပုံကို မကြာမကြာ အလိုက်သင့်ပြုပြင်ပြောင်းလဲပေးရမည်။ ဤသို့သောပြုပြင်ပြောင်းလဲမှုများကို ယေဟောဝါ၏လူမျိုးတော် အများစုက ဝမ်းသာအားရ လက်ခံကြပါသည်။ သို့သော် လူအနည်းငယ်မှာမူ ‘လွန်ကျူးစွာ ဖြောင့်မတ်’ လာပြီး ထိုပြုပြင်ပြောင်းလဲမှုများကို မကျေမနပ်ဖြစ်လာကြခြင်းမှာ မာန်မာနစိတ်ကြောင့်ဖြစ်ပေမည်။ (ဒေ. ၇:၁၆) အချို့ဆိုလျှင် လွတ်လပ်စွာတွေးခေါ်လိုခြင်းထောင်ချောက်ထဲ ကျရောက်သွားကြသည်။ မည်သို့ပင်ဖြစ်ပါစေ ထိုသို့ညည်းညူမြည်တမ်းခြင်းသည် အန္တရာယ်ရှိ၏။ အကြောင်းမှာ ကျွန်ုပ်တို့ကို ဤလောကနှင့် ယင်း၏လမ်းစဉ်များသို့ ပြန်ရောက်သွားစေနိုင်၏။
၁၅ သာဓကအနေနှင့် သက်သေခံတစ်ဦးဖြစ်သူ အေမယ်နူဝယ်လ်သည် ‘သစ္စာနှင့်သတိပညာရှိသောကျွန်’ ၏စာပေစာတမ်းများပါ အကြောင်းအချို့ကို အပြစ်ရှာလေသည်။ (မဿဲ ၂၄:၄၅) သို့ဖြင့် ခရစ်ယာန်စာပေများကို ဆက်မဖတ်တော့ချေ။ နောက်ဆုံးတွင် ယေဟောဝါသက်သေတစ်ဦး မဖြစ်လိုတော့ကြောင်း ဒေသခံအကြီးအကဲများကို သူပြောလိုက်သည်။ သို့သော် များမကြာမီပင် ယေဟောဝါအဖွဲ့အစည်း၏သွန်သင်ချက်များသည် မှန်ကန်ကြောင်း အေမယ်နူဝယ်လ် သိမြင်လာသည်။ ထိုအခါ သက်သေခံများနှင့် ပြန်ဆက်သွယ်ကာ သူ၏အမှားကို ဝန်ခံပြီးနောက် ယေဟောဝါသက်သေတစ်ဦး ပြန်ဖြစ်လာသည်။ သို့ဖြင့်ပျော်ရွှင်သူတစ်ဦး ပြန်ဖြစ်လာလေသည်။
၁၆။ ခရစ်ယာန်သွန်သင်ချက်အချို့ကို သံသယဝင်လာပါက မည်သို့ပြုနိုင်သနည်း။
၁၆ ယေဟောဝါ၏လူမျိုး ခံယူထားကြသည့် သွန်သင်ချက်အချို့ကို ကျွန်ုပ်တို့ သံသယဖြစ်လာသည့်အတွက် ညည်းညူချင်စိတ်ပေါ်လာလျှင်ကော။ သို့ဖြစ်လျှင် စိတ်ရှည်စွာ စောင့်ဆိုင်းပါ။ ‘သစ္စာရှိကျွန်’ သည် ကျွန်ုပ်တို့၏ အမေးများအတွက် အဖြေပါသောဆောင်းပါးများ နောက်ဆုံးတွင် ထုတ်ဝေပေးသည့်အခါ သံသယကင်းရှင်းသွားပေလိမ့်မည်။ ထို့ပြင် ခရစ်ယာန်အကြီးအကဲများ၏ အကူအညီကိုတောင်းခံခြင်းသည် ပညာရှိရာရောက်သည်။ (ယုဒ ၂၂၊ ၂၃) ဆုတောင်းခြင်း၊ ကိုယ်ပိုင်လေ့လာမှုပြုလုပ်ခြင်း၊ ဝိညာဉ်ရေးစိတ်ထားရှိသော ယုံကြည်သူချင်းများနှင့် ပေါင်းသင်းခြင်းတို့သည် သံသယကင်းရှင်းစေသည်။ ထို့ပြင် ယုံကြည်ခြင်းခိုင်ခံ့စေသော ကျမ်းစာအမှန်တရားများကို ယေဟောဝါ၏ဆက်သွယ်ရေးလမ်းကြောင်းမှ သိရှိလာသည့်အတွက် ကျေးဇူးတင်စိတ်တိုးများလာစေနိုင်သည်။
အပြုသဘော ဆက်ရှိစေပါ
၁၇၊ ၁၈။ ညည်းညူမြည်တမ်းမည့်အစား အဘယ်သဘောထားရှိသင့်သနည်း။ အဘယ်ကြောင့်နည်း။
၁၇ မစုံလင်သူလူသားများ၌ အပြစ်ပြုလိုသည့်သဘောရှိနေသည်မှာ မငြင်းသာပေ။ အချို့သူတို့ဆိုလျှင် အကြောင်းမဲ့ညည်းညူမြည်တမ်းလိုစိတ် အမြစ်စွဲနေနိုင်သည်။ (ကမ္ဘာဦး ၈:၂၁; ရောမ ၅:၁၂) သို့သော် ကျွန်ုပ်တို့တွင် ညည်းညူမြည်တမ်းသည့်အကျင့်ရှိနေပါက ယေဟောဝါဘုရားသခင်နှင့် ကျွန်ုပ်တို့၏ဆက်ဆံရေးကို ထိခိုက်စေမည်။ ထို့ကြောင့် ညည်းညူမြည်တမ်းလိုစိတ် ရှိရှိသမျှကို ထိန်းချုပ်ထားဖို့လိုသည်။
၁၈ ကျွန်ုပ်တို့သည် အသင်းတော်ကိစ္စများကို ညည်းညူပြောဆိုနေမည့်အစား အပြုသဘောဆက်ရှိပြီး ကျွန်ုပ်တို့အား အလုပ်များနေစေသော၊ ပျော်ရွှင်စေသော၊ ရိုသေလေးစားစေသော၊ ဟန်ချက်ညီစေပြီး ယုံကြည်ခြင်း ကျန်းခံ့စေသောအလုပ်များကို ပုံမှန်လုပ်ဆောင်နေလျှင် ကောင်းသည်။ (၁ ကောရိန္သု ၁၅:၅၈; တိတု ၂:၁-၅) ယေဟောဝါသည် မိမိအဖွဲ့အစည်းကို ကောင်းစွာကြီးကြပ်ကွပ်ကဲနေတော်မူ၏။ ယေရှုသည်လည်း ပထမရာစု၌ကဲ့သို့ပင် အသင်းတော်တစ်ခုစီတွင် အဘယ်အရာဖြစ်ပျက်နေကြောင်း သိရှိတော်မူ၏။ (ဗျာ. ၁:၁၀၊ ၁၁) ဘုရားသခင်ကိုလည်းကောင်း၊ အသင်းတော်၏ဦးခေါင်းဖြစ်သော ခရစ်တော်ကိုလည်းကောင်း စိတ်ရှည်စွာစောင့်ဆိုင်းပါ။ တာဝန်ရှိသိုးထိန်းများသည် လိုအပ်သည်များကို ပြုပြင်တည့်မတ်ပေးပါလိမ့်မည်။—ဆာလံ ၄၃:၅; ကောလောသဲ ၁:၁၈; တိတု ၁:၅။
၁၉။ မေရှိယနိုင်ငံတော်သည် လူ့ရေးရာများကို အပြည့်အဝထိန်းချုပ်ချိန်မရောက်မချင်း အဘယ်အရာကို ကျွန်ုပ်တို့ အာရုံစိုက်သင့်သနည်း။
၁၉ ဤအစီအစဉ်စနစ်ဆိုးသည် မကြာမီ အဆုံးတိုင်တော့မည်။ မေရှိယနိုင်ငံတော်သည် လူ့ရေးရာများကို အပြည့်အဝထိန်းချုပ်ပါလိမ့်မည်။ ထိုအချိန်မရောက်မချင်း ကျွန်ုပ်တို့တစ်ဦးစီသည် အပြုသဘောဆက်ရှိနေဖို့ အလွန်အရေးကြီးလိုက်လေခြင်း! ထိုသဘောထားသည် ယုံကြည်မှုတူသူချင်းတို့၏ အမှားများကို အာရုံစိုက်စေမည့်အစား သူတို့၏ကောင်းကွက်များကို သိမြင်စေပါလိမ့်မည်။ သူတို့၏အရည်အသွေးကောင်းများကို အာရုံစိုက်ခြင်းဖြင့် ကျွန်ုပ်တို့ ပျော်ရွှင်နိုင်ကြမည်။ ညည်းညူမြည်တမ်းပြီး စိတ်ပန်းလူပန်းဖြစ်နေမည့်အစား ဝိညာဉ်ခွန်အားရရှိပြီး တည်ဆောက်မှုဖြစ်စေပါလိမ့်မည်။
၂၀။ အပြုသဘောရှိခြင်းဖြင့် အဘယ်ကောင်းချီးများ ခံစားနိုင်မည်နည်း။
၂၀ အပြုသဘောရှိခြင်းသည် ယေဟောဝါအဖွဲ့အစည်း၏ မြေကြီးဆိုင်ရာအပိုင်းနှင့် ပူးပေါင်းရခြင်းကြောင့် ကျွန်ုပ်တို့ ကောင်းချီးများစွာခံစားရသည်ကိုလည်း အသိအမှတ်ပြုစေပါလိမ့်မည်။ ဤအဖွဲ့အစည်းတစ်ခုတည်းသာ စကြဝဠာပိုင်သအုပ်စိုးရှင်ကို သစ္စာစောင့်သိရိုသေသည်။ ထိုအဖြစ်မှန်ကိုလည်းကောင်း၊ တစ်ဆူတည်းသော စစ်မှန်သည့်ဘုရားသခင် ယေဟောဝါအား ဝတ်ပြုကိုးကွယ်ရသည့် အခွင့်ထူးကိုလည်းကောင်း သင်မည်သို့သဘောထားသနည်း။ ‘ဆုတောင်းခြင်းကို နားညောင်းတော်မူသောအရှင် ကိုယ်တော့်ထံသို့ လူအပေါင်းတို့သည် ချဉ်းကပ်ရကြပါလိမ့်မည်။ တံတိုင်းတော်အတွင်း၌နေစေခြင်းငှာ ကိုယ်တော်ရွေးချယ်၍ ချဉ်းကပ်စေတော်မူသောသူသည် မင်္ဂလာရှိပါ၏။ သန့်ရှင်းသော အိမ်တော်၏ကောင်းမြတ်သောအရာများနှင့် အကျွန်ုပ်တို့သည် ရောင့်ရဲကြပါလိမ့်မည်’ ဟုသီဆိုခဲ့သူ ဆာလံဆရာဒါဝိဒ်၏စိတ်ထားမျိုး သင်၌ရှိပါလေစေ။—ဆာလံ ၆၅:၂၊ ၄၊ သမ္မာ။
သင်မှတ်မိသလော။
• အသင်းတော်တွင် ဦးစီးဦးဆောင်နေသူများ ရှိသည့်အတွက် အဘယ်ကြောင့် ကျေးဇူးတင်သင့်သနည်း။
• ဦးစီးဦးဆောင်သောညီအစ်ကိုများ အမှားပြုမိသည့်အခါ ကျွန်ုပ်တို့ မည်သို့တုံ့ပြန်သင့်သနည်း။
• ကျမ်းစာအသိပညာ သဘောပေါက်ပုံကို ပြုပြင်ပြောင်းလဲသည့်အခါ ယင်းကို ကျွန်ုပ်တို့ မည်သို့ရှုမြင်သင့်သနည်း။
• ခရစ်ယာန်တစ်ဦး သံသယစိတ်ဝင်လာပါက မည်သို့ပြုနိုင်သနည်း။
[လေ့လာရန်မေးခွန်းများ]
[စာမျက်နှာ ၂၀ ပါ ရုပ်ပုံ]
ဒါဝိဒ်သည် ရှောလမုန်ကို ဝတ်ပြုရာအိမ်တော်ဆောက်လုပ်ရေး အစီအစဉ်များပေးပြီး စစ်မှန်သောဝတ်ပြုရေးကို စိတ်နှလုံးအကြွင်းမဲ့ ထောက်ခံခဲ့
[စာမျက်နှာ ၂၃ ပါ ရုပ်ပုံ]
ခရစ်ယာန်အကြီးအကဲများသည် ဝိညာဉ်ရေးအကူအညီကို ဝမ်းသာအားရပေးကြ