နောက်ဆုံးတော့ ကျွန်မတို့မိသားစုစည်းလုံးပြီ!
ဘဝအတ္တုပ္ပတ္တိ
နောက်ဆုံးတော့ ကျွန်မတို့မိသားစုစည်းလုံးပြီ!
စူမီကို ဟီရာနို ပြောပြသည်
အကောင်းဆုံးဘဝလမ်းစဉ်ကို ကျွန်မတွေ့ ခဲ့ပြီး ကျွန်မအမျိုးသားကိုလည်း ကျွန်မနဲ့အတူ လိုက်စေချင်တယ်။ အဲဒီလိုဖြစ်လာဖို့ လေးဆယ့်နှစ်,နှစ် ကြာခဲ့တယ်။
ကျွန်မ အသက် ၂၁ နှစ်အရွယ်ဖြစ်တဲ့ ၁၉၅၁ ခုနှစ်မှာ ကျွန်မတို့လက်ထပ်ခဲ့ကြတယ်။ လေးနှစ်အတွင်း သားလေးနှစ်ယောက်ရခဲ့ပြီး ကျွန်မဘဝမှာ အရာရာအဆင်ပြေနေတဲ့ပုံပဲ။
၁၉၅၇ ခုနှစ်ရဲ့ နေ့တစ်နေ့မှာ ကျွန်မရဲ့အစ်မက ယေဟောဝါသက်သေ သာသနာပြုတစ်ယောက် သူ့ဆီလည်ပတ်ခဲ့တဲ့အကြောင်း ပြောပြတယ်။ ကျွန်မရဲ့ညီမဟာ ဗုဒ္ဓဘာသာဝင်တစ်ယောက်ဖြစ်ပေမဲ့ အဲဒီသာသနာပြုနဲ့ ကျမ်းစာစလေ့လာပြီး ကျွန်မကိုလည်း ကျမ်းစာလေ့လာဖို့အားပေးတယ်။ ကျွန်မက ပရိုတက်စတင့်ချာ့ခ်ျတစ်ခုမှာ တက်ရောက်နေပေမဲ့ ယေဟောဝါသက်သေတွေရဲ့အမှားကို ထောက်ပြနိုင်မယ်ထင်လို့ ကျွန်မ သဘောတူလိုက်တယ်။
မကြာခင်မှာ ကျွန်မ ကျမ်းစာအကြောင်း ဘာမှမသိပါလားဆိုတာ ကိုယ့်ကိုယ်ကိုသိလာတယ်။ “ယေဟောဝါဆိုတာ ဘယ်သူလဲ” လို့ ခရစ်ယာန်သာသနာပြုကို ကျွန်မမေးလိုက်တယ်။ ကျွန်မရဲ့ချာ့ခ်ျမှာ ဒီနာမည်သုံးတာ တစ်ခါမှမကြားဖူးဘူး။ ခရစ်ယာန်သာသနာပြုဖြစ်တဲ့ ဒယ်ဖနီကွခ်က ယေဟောဝါဟာ အတိုင်းအဆမဲ့တန်ခိုးရှင်ဘုရားသခင်ရဲ့ နာမည်ဆိုတာ ရှင်းရှင်းလင်းလင်းဖော်ပြထားတဲ့ ဟေရှာယ ၄၂:၈ ကိုဖွင့်ပြတယ်။ ဒယ်ဖနီက ကျွန်မရဲ့မေးခွန်းအားလုံးကို ကျမ်းစာနဲ့ဖြေဆိုပေးခဲ့တယ်။
ဓမ္မဆရာကို အဲဒီမေးခွန်းတွေကိုပဲ ကျွန်မမေးခဲ့တယ်။ သူက “မေးခွန်းမေးတာ အပြစ်ရှိတယ်။ ခင်ဗျားကို ပြောပြတာတွေကို ယုံသာယုံလိုက်ပါ” ဆိုပြီး ကျွန်မကို ပြောတယ်။ မေးခွန်းမေးတယ်ဆိုတာ အပြစ်ရှိတယ်လို့ ကျွန်မ,မခံစားရပေမဲ့ ခြောက်လကြာတဲ့အထိ တနင်္ဂနွေနေ့ မနက်တိုင်းချာ့ခ်ျကိုသွားပြီး ညနေပိုင်းကျတော့ ယေဟောဝါသက်သေတွေရဲ့အစည်းအဝေးတွေကို သွားတက်ခဲ့တယ်။
ကျွန်မရဲ့အိမ်ထောင်အပေါ် သက်ရောက်မှု
သမ္မာကျမ်းစာကနေ လေ့လာခဲ့တဲ့အရာတွေကြောင့် ကျွန်မစိတ်လှုပ်ရှားပြီး ကျွန်မရဲ့ခင်ပွန်း ကာဇူဟီကို,ကို ပြန်ပြောပြလေ့ရှိတယ်။ လေ့လာမှုနဲ့ အစည်းအဝေးပြီးတိုင်း ကျွန်မသင်ယူခဲ့တဲ့အရာကို သူ့ကို ပြောပြတယ်။ အကျိုးဆက်အနေနဲ့ ကျွန်မတို့နှစ်ယောက်ကြားဆက်ဆံရေး အေးစက်စက်ဖြစ်လာတယ်။ သူက ကျွန်မကို ယေဟောဝါသက်သေတစ်ယောက် မဖြစ်စေချင်ဘူး။ ဒါပေမဲ့ ကျမ်းစာလေ့လာရတာ သိပ်ကျေနပ်စရာကောင်းတဲ့အတွက် ကျွန်မဆက်လေ့လာပြီး ယေဟောဝါသက်သေတွေနဲ့ ပေါင်းသင်းခဲ့တယ်။
အစည်းအဝေးတွေရှိတဲ့ညမှာဆိုရင် အစည်းအဝေးမသွားခင် ကျွန်မခင်ပွန်းအကြိုက်ဆုံးဟင်းတွေကို ချက်ပေးခဲ့ပေမဲ့ သူက အပြင်မှာပဲထွက်စားတတ်တယ်။ အစည်းအဝေးပြီးလို့ ကျွန်မအိမ်ရောက်တဲ့အခါ သူစိတ်ဆိုးပြီး စကားမပြောတော့ဘူး။ နှစ်ရက်၊ သုံးရက်ကြာပြီးတဲ့နောက် စိတ်ဆိုးပြေသွားပေမဲ့ နောက်အစည်းအဝေးချိန်ပြန်ရောက်လာတော့ သူစိတ်ဆိုးပြန်ရော။
ဒီအတောအတွင်း ကျွန်မ တီဘီရောဂါဖြစ်လာတယ်။ ကျွန်မခင်ပွန်းရဲ့ မိသားစုဝင်တချို့က ဒီရောဂါနဲ့သေဆုံးသွားတဲ့အတွက် သူအရမ်းစိုးရိမ်ခဲ့တယ်။ ဒါကြောင့် ကျွန်မနေကောင်းလာတဲ့အခါ ကြိုက်တာလုပ်နိုင်တယ်လို့ ပြောတယ်။ ပတ်စဉ်အစည်းအဝေးတက်တာကို မကန့်ကွက်ဖို့ ကျွန်မတောင်းဆိုတော့ သူလက်ခံလိုက်တယ်။
ကျွန်မပြန်နေကောင်းလာဖို့ ခြောက်လကြာခဲ့တယ်၊ အဲဒီအတောအတွင်း ကျမ်းစာကို အာရုံစူးစိုက်လေ့လာခဲ့တယ်။ ယေဟောဝါသက်သေတွေရဲ့သွန်သင်ချက်ထဲမှာ မှားယွင်းတဲ့အချက်တွေကို ကျွန်မရှာဖွေခဲ့တယ်။ အမှားတစ်ချက်လေးတွေ့မယ်ဆိုရင် ကျမ်းစာသင်အံမှုရပ်လိုက်မယ်လို့ စဉ်းစားခဲ့တယ်။ ဒါပေမဲ့တစ်ခုမှ မတွေ့ခဲ့ဘူး။အဲဒီအစား ပရိုတက်စတင့်ချာ့ခ်ျရဲ့အမှားတွေက ပိုလို့တောင် ထင်ရှားလာတယ်။ ယေဟောဝါရဲ့မေတ္တာတော်နဲ့ တရားမျှတမှုကို သိနားလည်လာပြီး ကိုယ်တော့်ဥပဒေနဲ့အညီ အသက်ရှင်နေထိုင်ခြင်းရဲ့ အကျိုးကျေးဇူးကိုလည်း မြင်တွေ့ခဲ့ရတယ်။
နေကောင်းလာပြီးတဲ့နောက် ကျွန်မခင်ပွန်းက သူ့ကတိအတိုင်းပဲ ကျွန်မအစည်းအဝေးတွေသွားတာကို မဆန့်ကျင်တော့ဘူး။ ဝိညာဉ်ရေးမှာ တိုးတက်လာပြီး ၁၉၅၈၊ မေလမှာ ယေဟောဝါသက်သေတစ်ယောက်အဖြစ် ကျွန်မနှစ်ခြင်းခံလိုက်တယ်။ စစ်မှန်တဲ့ဘုရားသခင်ကို ကျွန်မကိုးကွယ်သလို ကျွန်မရဲ့မိသားစုကိုလည်း ကိုးကွယ်စေချင်လိုက်တာ။
ကလေးတွေကို ဝိညာဉ်ရေးမှာကူညီပေး
ကျွန်မသားလေးတွေဟာ အစည်းအဝေးတွေ၊ ဟောပြောခြင်းလုပ်ငန်းတွေမှာ ကျွန်မနဲ့အတူ အမြဲလိုက်နေပေမဲ့ တကယ်တော့ သူတို့ဟာ ကျမ်းစာအသိပညာမှာ တိုးတက်နေတာကို တချို့အဖြစ်အပျက်တွေကနေ ကျွန်မသိမြင်ခဲ့ရတယ်။ တစ်နေ့မှာ ကျွန်မရဲ့ခြောက်နှစ်သား မာစာဟီကိုဟာ အိမ်အပြင်မှာ ကစားနေတုန်း အသံကျယ်ကြီးတစ်ခု ကြားလိုက်ရပြီး တစ်ယောက်ယောက် ငယ်သံပါအောင်အော်တာကိုလည်း ကြားရတယ်။ အိမ်နီးချင်းတစ်ယောက် ကျွန်မအိမ်ထဲကို အပြေးဝင်လာပြီး ကျွန်မသား ကားတိုက်ခံရတယ်လို့ စိုးရိမ်တကြီးနဲ့ပြောတယ်။ သူ သေများသေသွားပြီလား။ ကျွန်မ အိမ်ပြင်ဘက်ကို အပြေးထွက်လာရင်း စိတ်ငြိမ်ငြိမ်ထားနိုင်အောင် ကြိုးစားခဲ့တယ်။ မြင်မကောင်းအောင် ဖြစ်သွားတဲ့ သူ့ရဲ့စက်ဘီးကို တွေ့တဲ့အခါ ကျွန်မတုန်လှုပ်သွားပေမဲ့ နည်းနည်းပဲဒဏ်ရာရပြီး ကျွန်မဆီကို သူလျှောက်လာတာကိုတွေ့ခဲ့ရတယ်။ ကျွန်မကို ဖက်တွယ်ပြီး “အမေ၊ ယေဟောဝါက သားကို ကယ်လိုက်တာ၊ ဟုတ်တယ်မဟုတ်လား” ဆိုပြီးပြောတယ်။ သားမသေတာကို မြင်ရလို့ရယ်၊ သားပြောတဲ့စကားလေးတွေ ကြားရလို့ရယ် ကျွန်မ မျက်ရည်ကျခဲ့တယ်။
တစ်နေ့မှာ အမှုဆောင်ထွက်နေတုန်း အဘိုးကြီးတစ်ယောက်ကို ကျွန်မတို့တွေ့ခဲ့တယ်။ သူက “ကလေးကို ဘာဖြစ်လို့ ဒီလိုအတင်းလုပ်ခိုင်းရတာလဲ။ သနားဖို့ကောင်းလိုက်တာ” လို့ အော်ပြောတယ်။ ကျွန်မပြန်မပြောခင်မှာ ရှစ်နှစ်သား တိုမိုယိုရှီက “ဘိုးဘိုး၊ အမေက အတင်းခိုင်းတာမဟုတ်ပါဘူး။ ယေဟောဝါအမှုတော်ကို ကျွန်တော်ကိုယ်တိုင်က လုပ်ချင်လို့ပါ” လို့ပြန်ပြောလိုက်တယ်။ အဘိုးအိုခမျာ ကြောင်တောင်တောင်ဖြစ်သွားပြီး ဘာမှပြန်မပြောနိုင်တော့ဘူး။
ကျွန်မရဲ့သားတွေဟာ ဝိညာဉ်ရေးအရ ဖတဆိုးလေးတွေဖြစ်ကြတယ်။ ဒါကြောင့် ကျွန်မကိုယ်တိုင် သင်ယူစရာအများကြီးရှိသေးပေမဲ့ သူတို့ကို ကျမ်းစာအမှန်တရားသင်ပေးခဲ့တယ်။ ချစ်ခြင်းမေတ္တာ၊ ယုံကြည်ခြင်း၊ စိတ်ထက်သန်မှုတွေကို ကျွန်မကိုယ်တိုင်ပြုစုပျိုးထောင်ပြီး ပုံသက်သေကောင်းတင်ပြဖို့ ကြိုးစားခဲ့ရတယ်။ ကလေးတွေရှေ့မှာ နေ့တိုင်း ယေဟောဝါဆီဆုတောင်းတယ်။ ကျွန်မရဲ့ဟောပြောခြင်းလုပ်ငန်းတွေ့ကြုံမှုတွေကို သူတို့ကို ပြန်ပြောပြတယ်။ အဲဒါက သူတို့အတွက် ခွန်အားဖြစ်ခဲ့တယ်။ ရှေ့ဆောင် ဒါမှမဟုတ် ယေဟောဝါသက်သေတွေရဲ့ အချိန်ပြည့်အမှုဆောင်အဖြစ် ဘာကြောင့်လုပ်ရသလဲလို့ နောက်ပိုင်းမှာ သူတို့ကို ပြန်မေးကြည့်တော့ “ရှေ့ဆောင်လုပ်ငန်းမှာ အမေပျော်နေတာကို မြင်ရတော့ သားတို့လည်း ပျော်ချင်တာပေါ့” လို့ပြန်ဖြေခဲ့ကြတယ်။
သူတို့အဖေနဲ့ပတ်သက်ပြီး ဒါမှမဟုတ် အသင်းတော်မှာရှိတဲ့ တခြားတစ်ယောက်ယောက်နဲ့ပတ်သက်ပြီး ဝေဖန်တဲ့စကားတွေမပြောမိဖို့ ကျွန်မတော်တော်လေးဂရုစိုက်ခဲ့ရတယ်။ အပျက်သဘောဆောင်တဲ့ စကားတွေပြောခြင်းက ကျွန်မကလေးတွေအပေါ် အကျိုးယုတ်စေမယ်ဆိုတာကို ကျွန်မကောင်းကောင်းသိလို့ပါပဲ။ အပြောခံရတဲ့သူရော ပြောတဲ့လူကိုပါ သူတို့လေးစားနိုင်တော့မှာမဟုတ်ဘူး။
တိုးတက်ဖို့ အခက်အခဲတွေကိုအောင်မြင်ကျော်လွှား
၁၉၆၃ ခုနှစ်မှာ ကျွန်မခင်ပွန်းရဲ့အလုပ်ကြောင့် ကျွန်မတို့ တရုတ် (တိုင်ပေ)ကို ပြောင်းရွှေ့ခဲ့ကြတယ်။ အဲဒီမှာရှိတဲ့ ဂျပန်လူမျိုးတွေကို ဟောပြောမယ်ဆိုရင် ပြဿနာတွေတက်လာမယ်လို့ သူကပြောတယ်။ ကျွန်မတို့ ဂျပန်ကို ပြန်ပို့ခံရမှာဖြစ်ပြီး အဲဒါက သူ့ကုမ္ပဏီအတွက် အခက်အခဲဖြစ်နိုင်တယ်။ ဒါကြောင့် ကျွန်မတို့ကို သက်သေခံတွေနဲ့ မပေါင်းစေချင်ဘူး။
အစည်းအဝေးအားလုံးကို တရုတ်စကားနဲ့ကျင်းပတဲ့ တရုတ်(တိုင်ပေ) မှာ သက်သေခံတွေက ကျွန်မတို့ကို လှိုက်လှိုက်လှဲလှဲကြိုဆိုကြတယ်။ ဂျပန်တွေကိုမဟုတ်ဘဲ တရုတ်လူမျိုးတွေကို သက်သေခံနိုင်ဖို့အတွက် တရုတ်စကားကို လေ့လာမယ်လို့ ကျွန်မဆုံးဖြတ်လိုက်တယ်။ အဲလိုနည်းအားဖြင့် ကျွန်မခင်ပွန်းပြောခဲ့တဲ့ ပြဿနာတွေကို ရှောင်နိုင်မှာဖြစ်တယ်။
တရုတ်(တိုင်ပေ)မှာရှိတဲ့ သက်သေခံတွေနဲ့ ကျွန်မတို့ရဲ့ရင်းနှီးမှုက ကျွန်မတို့အတွက် အားပေးမှုဖြစ်စေခဲ့တယ်။ ခရစ်ယာန်သာသနာပြုဇနီးမောင်နှံဖြစ်တဲ့ ဟာဗေးနဲ့ ကက်သီလိုဂန်တို့က ကျွန်မတို့ကို အများကြီးအကူအညီပေးခဲ့ကြတယ်။ ညီအစ်ကိုလိုဂန်ဟာ ကျွန်မသားတွေရဲ့ ဝိညာဉ်ရေးဖခင်ဖြစ်လာခဲ့တယ်။ ယေဟောဝါရဲ့အမှုတော်ထမ်းဆောင်ခြင်းဟာ ပျော်ရွှင်မှုမဲ့တဲ့၊ စည်းကမ်းတင်းကျပ်လွန်းတဲ့ အသက်တာမဟုတ်ဘူးဆိုတာကို ကလေးတွေနားလည်အောင် သူပြောပြခဲ့တယ်။ တရုတ်(တိုင်ပေ)မှာ ကျွန်မတို့နေထိုင်ခဲ့ချိန်မှာ သားတွေ ယေဟောဝါရဲ့အမှုတော်ထမ်းဆောင်ဖို့ ဆုံးဖြတ်ခဲ့ကြတာဖြစ်မယ်လို့ ကျွန်မယုံတယ်။
တိုမိုယိုရှိနဲ့ မာစာဟီကိုတို့ဟာ တရုတ်(တိုင်ပေ)မှာရှိတဲ့ အမေရိကန်ကျောင်းမှာ တက်ကြပြီး တရုတ်စာအပြင် အင်္ဂလိပ်စာကိုပါ သင်ယူခဲ့ကြတယ်။ စစ်မှန်တဲ့ဘုရားသခင် ယေဟောဝါရဲ့ဓမ္မအမှုဆောင်များအဖြစ် နောက်နောင်အမှုထမ်းဖို့အတွက် အဲဒီပညာရေးက သူတို့ကို အသင့်ဖြစ်စေခဲ့ပါတယ်။ ကျွန်မတို့အတွက် အခက်အခဲတွေဖြစ်လာနိုင်မယ်လို့ ထင်ပေမဲ့ ကောင်းချီးတွေအများကြီးခံစားခဲ့ရတဲ့အတွက် ယေဟောဝါကို အရမ်းကျေးဇူးတင်တယ်။ တရုတ်(တိုင်ပေ)မှာ အမှတ်ရစရာကောင်းတဲ့ သုံးနှစ်ခွဲကြာနေပြီးတဲ့နောက် ကျွန်မတို့မိသားစုဟာ ဂျပန်ကို ပြန်ခဲ့ကြတယ်။
သားတွေဟာ အခုဆိုရင် ဆယ်ကျော်သက်အရွယ်တွေ ဖြစ်လာကြတဲ့အတွက် လွတ်လွတ်လပ်လပ်နေချင်လာကြတယ်။ ကျမ်းစာမူတွေနဲ့ပတ်သက်ပြီး နာရီတော်တော်ကြာ သူတို့နဲ့အတူ ကျိုးကြောင်းဆင်ခြင်ခဲ့တယ်၊ အဲဒီခက်ခဲတဲ့အချိန်တစ်လျှောက် ယေဟောဝါက သူတို့ကို ကူညီပေးခဲ့တယ်။ အထက်တန်းကျောင်းပြီးတဲ့အခါ တိုမိုယိုရှီဟာ ရှေ့ဆောင်ဖြစ်လာတယ်။ သူ့ရဲ့ရှေ့ဆောင်သက်တမ်း အစောပိုင်းနှစ်တွေအတွင်းမှာပဲ လူလေးယောက်ကို အပ်နှံနှစ်ခြင်းခံတဲ့အထိ ကူညီပေးနိုင်ခဲ့တယ်။ မာစာဟီကိုလည်းပဲ သူ့အစ်ကိုရဲ့ခြေရာကိုလိုက်ပြီး အလယ်တန်းကျောင်းပြီးတဲ့နောက်မှာ ရှေ့ဆောင်လုပ်တယ်။ သူ့ရဲ့ရှေ့ဆောင်သက်တမ်းလေးနှစ်အတွင်းမှာပဲ လူလေးယောက်ကို သက်သေခံဖြစ်လာဖို့ ကူညီပေးခဲ့တယ်။
ယေဟောဝါက ကလေးတွေကို ပိုပြီးကောင်းချီးပေးခဲ့တယ်။ ကျမ်းစာအမှန်တရားသိလာအောင် ကျွန်မကူညီပေးခဲ့တဲ့ အမျိုးသမီးတစ်ယောက်ရဲ့ ခင်ပွန်းကို တိုမိုယိုရှီက ကျမ်းစာပြန်သင်ပေးခဲ့တယ်။ သူတို့ရဲ့သမီးနှစ်ယောက်လည်း သက်သေခံတွေဖြစ်လာကြတယ်။ နောက်ပိုင်းမှာ တိုမိုယိုရှီက သမီးကြီး နိုဘူကိုနဲ့လက်ထပ်လိုက်ပြီး မာစာဟီကိုက သမီးငယ် မာစာကိုနဲ့လက်ထပ်လိုက်တယ်။ အခုတော့ တိုမိုယိုရှီနဲ့ နိုဘူကိုတို့ဟာ နယူးယောက်၊ ဘရွတ်ကလင်မှာရှိတဲ့ ယေဟောဝါသက်သေတွေရဲ့ ကမ္ဘာ့ဌာနချုပ်မှာ အမှုဆောင်နေကြတယ်။ မာစာဟီကိုနဲ့ မာစာကိုတို့ကျတော့ ပါရာဂွေးနိုင်ငံမှာ ခရစ်ယာန်သာသနာပြုများအဖြစ် အမှုထမ်းဆောင်နေကြတယ်။
ကျွန်မခင်ပွန်းတဖြည်းဖြည်းပြောင်းလဲလာ
ကျွန်မခင်ပွန်းဟာ အဲဒီနှစ်တွေအတွင်းမှာ ကျွန်မတို့ရဲ့ယုံကြည်ခြင်းကို လက်မခံပေမဲ့ သူပြောင်းလဲလာတဲ့ လက္ခဏာလေးတွေကို ကျွန်မတို့မြင်တွေ့လာတယ်။ တခြားလူတွေက ကျွန်မရဲ့ယုံကြည်ခြင်းနဲ့ပတ်သက်ပြီး တိုက်ခိုက်ပြောလာတဲ့အခါ သူက ကျွန်မဘက်ကနေ ခုခံပြောဆိုပေးပြီး ကျမ်းစာအမှန်တရားတွေကို ကောင်းကောင်းနားမလည်ပေမဲ့ တကယ်ထောက်ခံခဲ့တယ်။ အကူအညီလိုအပ်တဲ့ သက်သေခံတွေကို ကာယရေးထောက်ပံ့ပေးခဲ့တယ်။ ကျွန်မတို့ရဲ့သားတစ်ယောက် လက်ထပ်ပွဲတုန်းက သူဒီလိုမိန့်ခွန်းတိုလေးပြောခဲ့တယ်– “လူတွေကို နည်းမှန်လမ်းမှန်နဲ့အသက်ရှင်ဖို့ သွန်သင်ပေးခြင်းဟာ ရှိသမျှလုပ်ငန်းတွေထဲမှာ အကောင်းဆုံးလုပ်ငန်း၊ အခက်ခဲဆုံးလုပ်ငန်းလည်းဖြစ်တယ်။ ကျွန်တော့်သားတွေနဲ့ သူတို့ဇနီးတွေက အဲဒီအခက်ခဲဆုံးလမ်းစဉ်ကို အသက်မွေးလုပ်ငန်းအဖြစ် ရွေးချယ်ခဲ့ကြတယ်။ ကျေးဇူးပြု၍ သူတို့ကို ကူညီပေးကြပါ။” အဲဒီလိုမျိုးစကားတွေပြောလာတဲ့အတွက် သူလည်း ကျွန်မတို့နဲ့အတူ ယေဟောဝါကို ကိုးကွယ်လာမယ်လို့ ကျွန်မထင်ခဲ့မိတယ်။
ကျွန်မတို့အိမ်မှာ ယုံကြည်သူချင်းသက်သေခံတွေနဲ့ ပေါင်းသင်းမှုလုပ်ဖို့ ကျွန်မစီစဉ်ခဲ့တယ်။ ကာဇူဟီကို,ကို ခရစ်တော်ရဲ့သေခြင်းသတိရအောက်မေ့ပွဲအပြင် ခရစ်ယာန်အစည်းအဝေးတွေနဲ့ စည်းဝေးကြီးတွေကို ကျွန်မခေါ်သွားခဲ့တယ်။ အလုပ်အားတဲ့အချိန်မှာတော့ စိတ်မပါပေမဲ့ အစည်းအဝေးတွေကို လိုက်တက်လေ့ရှိပါတယ်။ သူကျမ်းစာလေ့လာချင်မှာပါလို့ ကျွန်မအကြိမ်ကြိမ်ခံစားမိတဲ့အတွက် ခရစ်ယာန်အကြီးအကဲတွေ အိမ်ကိုလာဖို့ ဖိတ်ခေါ်လိုက်တယ်။ ဒါပေမဲ့ သူမလေ့လာချင်ဘူး။ ဘာများဖြစ်နေလို့လဲဆိုပြီး ကျွန်မစဉ်းစားမိတယ်။
တမန်တော်ပေတရုရဲ့စကား ကျွန်မခေါင်းထဲရောက်လာတယ်– ‘မိန်းမတို့၊ ကိုယ်ခင်ပွန်း၏အုပ်စိုးခြင်းကိုဝန်ခံကြလော့။ သို့ပြု၍၊ နှုတ်မြွက်စကားတော်ကိုနားမထောင်သော ယောက်ျားအချို့ရှိလျှင် ထိုသူတို့သည် တရားမနာသော်လည်း သင်တို့၏ကြောက်ရွံ့ခြင်းနှင့် စင်ကြယ်သောအကျင့်တို့ကိုထောက်ရှု၍ မိမိမယား၏အကျင့်အားဖြင့် သွေးဆောင်လျက် အတူပါမည်အကြောင်းရှိ၏။’ (၁ ပေတရု ၃:၁၊ ၂) အဲဒီအကြံပေးချက်အတိုင်း ကျွန်မအမြဲမလိုက်လျှောက်ခဲ့ဘူးဆိုတာ ကျွန်မသိလာတယ်။ အဲဒီအကြံပေးချက်ကို ပိုပြီးပြည့်ပြည့်စုံစုံလိုက်လျှောက်နိုင်ဖို့ ကျွန်မရဲ့ဝိညာဉ်ရေးစိတ်ဓာတ်ကို တိုးတက်စေဖို့လိုအပ်တယ်။
ဝိညာဉ်ရေးလူ ပိုပီသလာဖို့ဆိုတဲ့ ရည်ရွယ်ချက်နဲ့ ၁၉၇၀ ပြည့်နှစ်မှာ ကျွန်မရှေ့ဆောင်လုပ်ခဲ့တယ်။ ဆယ်နှစ်၊ နောက် အနှစ် ၂၀ ကုန်လွန်ခဲ့ပြီ။ ဒါပေမဲ့ ကျွန်မအမျိုးသားဟာ ဝိညာဉ်ရေးဘက်မှာ ဘာအပြောင်းအလဲမှ မရှိခဲ့ဘူး။ ကျမ်းစာသင်သားတစ်ယောက်က ဒီလိုမျိုးပြောခဲ့ဖူးတယ်– “မင်းရဲ့လင်ယောက်ျားကိုတောင် မကူညီနိုင်ဘူးဆိုရင် တခြားသူတွေကို ကူညီဖို့ဆိုတာ မလွယ်လှဘူး။” အဲဒီစကားက ကျွန်မကို စိတ်ဓာတ်ကျစေပေမဲ့ ကျွန်မအရှုံးမပေးခဲ့ဘူး။
၁၉၈၀ ပြည့်လွန်နှစ်နှောင်းပိုင်းမှာ ကျွန်မတို့ရဲ့မိဘတွေဟာ အိုမင်းမစွမ်းဖြစ်လာကြပြီ။ သူတို့ကို ကြည့်ရှုစောင့်ရှောက်တဲ့အပြင် ကျွန်မရဲ့တခြားတာဝန်တွေကို ကျေပွန်အောင်လုပ်ရတဲ့အတွက် ပင်ပန်းပြီး စိတ်ဖိစီးမှုများနေတယ်။ ယေဟောဝါအပေါ်ကျွန်မရဲ့ယုံကြည်ခြင်းကို သူတို့အားလုံးက နှစ်ပေါင်းများစွာ ဆန့်ကျင်တိုက်ခိုက်ကြပေမဲ့ ကျွန်မအတတ်နိုင်ဆုံး သူတို့ကို ချစ်ကြောင်းပြဖို့ ကြိုးစားခဲ့တယ်။ ၉၆ နှစ်အရွယ်ရှိတဲ့ ကျွန်မရဲ့အမေမသေဆုံးမီလေးမှာ ကျွန်မကို “ဆူမီကို၊ အမေ ပြန်ထမြောက်လာမယ်ဆိုရင် သမီးရဲ့ဘာသာထဲဝင်မယ်” ဆိုပြီးပြောတယ်။ ကျွန်မရဲ့ကြိုးစားအားထုတ်မှုတွေဟာ အလဟဿမဖြစ်ခဲ့ဖူးဆိုတာ ကျွန်မသိတယ်။
ကျွန်မတို့ရဲ့မိဘတွေအပေါ် ကျွန်မရဲ့ကြိုးစားလုပ်ဆောင်မှုအားလုံးကို ကျွန်မအမျိုးသားက သတိထားမိခဲ့တယ်။ အဲဒါကို လေးမြတ်တန်ဖိုးထားကြောင်း တင်ပြတဲ့အနေနဲ့ အစည်းအဝေးတွေကို ပုံမှန်တက်ရောက်စပြုလာတယ်။ နှစ်ပေါင်းများစွာ အဲဒီလိုတက်ရောက်ခဲ့ပေမဲ့ စစ်မှန်တဲ့ဝိညာဉ်ရေးတိုးတက်မှု မရှိဘူး။ သူပျော်ပျော်ရွှင်ရွှင်ရှိနိုင်အောင် ကျွန်မဆက်ကြိုးစားခဲ့တယ်။ သူ့သူငယ်ချင်းတွေနဲ့ နိုင်ငံခြားစီးပွားရေးလုပ်ဖော်ဆောင်ဖက်တွေကိုပါ ကျွန်မတို့အိမ်မှာ ထမင်းစားဖို့ ဖိတ်ခေါ်ခဲ့တယ်။ သူနဲ့အတူ ကျွန်မအပန်းဖြေခဲ့တယ်။ ရှေ့ဆောင်တွေအတွက် နာရီတောင်းဆိုချက် လျှော့ချလိုက်တဲ့အခါ သူ့အတွက် ကျွန်မအချိန်ပိုပေးနိုင်ခဲ့တယ်။
အငြိမ်းစားယူခြင်းက ပြောင်းလဲမှုတစ်ခုဖြစ်စေ
၁၉၉၃ ခုနှစ်မှာ ကျွန်မအမျိုးသား အငြိမ်းစားယူလိုက်တယ်။ အခုတော့ ကျမ်းစာလေ့လာဖို့ သူအချိန်ရတော့မှာပဲလို့ ကျွန်မထင်တယ်။ အချိန်အားမှပဲ ဘုရားသခင်ကို ကိုးကွယ်တာဟာ ကြည်ညိုကိုင်းရှိုင်းမှုမရှိရာရောက်တယ်လို့ သူပြောတယ်။ အဲ့ဒီအစား သူ့နှလုံးက လှုံ့ဆော်လာတဲ့အခါကျမှ ဘုရားသခင်ကို ကိုးကွယ်ပါ့မယ်လို့ သူပြောတယ်။ ကျွန်မလည်း သူ့ကို အတင်းမခိုင်းချင်ဘူး။
တစ်နေ့တော့ ကာဇူဟီကိုက ကျွန်မရဲ့ကျန်တဲ့အသက်တာကို သူနဲ့ အချိန်ပြည့်နေပေးဖို့ တောင်းဆိုတယ်။ အဲဒါက ကျွန်မကို တုန်လှုပ်သွားစေခဲ့တယ်။ ဘာကြောင့်လဲဆိုတော့ ကျွန်မသူ့ကိုလက်ထပ်ကတည်းက သူ့အတွက် လုပ်ပေးနိုင်သမျှ အားလုံးလုပ်ပေးခဲ့တာပဲ။ သူပျော်ရွှင်အောင် ကျွန်မအတတ်နိုင်ဆုံးကြိုးစားတယ်။ ဒါပေမဲ့ သူ့ထက် ယေဟောဝါကို ကျွန်မ အချိန်ပိုပေးတယ်လို့ သူခံစားခဲ့တယ်။ အဲဒီအကြောင်းကို ခဏစဉ်းစားပြီးတဲ့နောက် အခု ကျွန်မလုပ်တာထက်ပိုပြီး မလုပ်နိုင်တော့ဘူး။ ဒါပေမဲ့ ကျွန်မလုပ်သလို သူလည်းလုပ်လာမယ်ဆိုရင် နှစ်အနည်းငယ်မဟုတ်ဘဲ ထာဝစဉ်တည်တံ့တဲ့ ပျော်ရွှင်စရာဘဝသစ်ကို နှစ်ယောက်အတူ စတင်နိုင်မယ်လို့ သူ့ကို ကျွန်မပြောလိုက်တယ်။ ကျွန်မအမျိုးသားက ရက်တော်တော်ကြာအထိ မတုံ့ပြန်ဘဲနေခဲ့တယ်။ နောက်ဆုံးတော့ သူက ဒီလိုမေးလာတယ်– “ဒါဆိုရင် မင်းငါ့ကို ကျမ်းစာသင်ပေးမလား။” အဲဒီစကားကို စဉ်းစားတိုင်း ကျွန်မရဲ့နှလုံးဟာ ခုန်နေဆဲပါ။
အစပိုင်းမှာတော့ ကျွန်မအမျိုးသားနဲ့ ခရစ်ယာန်အကြီးအကဲတစ်ဦး ကျမ်းစာသင်ဖို့ စီစဉ်ပေးခဲ့တယ်၊ ဒါပေမဲ့ သူက “မင်းကလွဲလို့ တခြားဘယ်သူနဲ့မှ မသင်ဘူး” လို့ပြောတယ်။ ဒါကြောင့် နေ့တိုင်း ကျွန်မတို့ကျမ်းစာလေ့လာခဲ့ကြတယ်။ တရုတ်စကားပြောအသင်းတော်မှာ ကျွန်မနေလာခဲ့တဲ့အတွက်ကြောင့်ရယ်၊ ကျွန်မခင်ပွန်းက အဲဒီဘာသာစကားကို ကောင်းစွာပြောတတ်တာကြောင့်ရယ် တရုတ်စကားနဲ့ပဲ ကျွန်မတို့လေ့လာမှုလုပ်ခဲ့ကြတယ်။ တစ်နှစ်မပြည့်ခင်မှာ ကျမ်းစာတစ်အုပ်လုံးကိုလည်းပြီးအောင် ကျွန်မတို့အတူတကွ ဖတ်ခဲ့ကြတယ်။
အဲဒီအတောအတွင်း တရုတ်စကားပြောအသင်းတော်မှာရှိတဲ့ အကြီးအကဲတစ်ဦးနဲ့ သူ့ဇနီးတို့က ကျွန်မတို့ဇနီးမောင်နှံကို စိတ်ဝင်စားမှုပြခဲ့ကြတယ်။ သူတို့ဟာ ကျွန်မတို့ရဲ့ကလေးတွေထက် အသက်ငယ်ပေမဲ့ ကျွန်မတို့ရဲ့မိတ်ဆွေစစ်တွေ ဖြစ်လာခဲ့တယ်။ တခြားသက်သေခံတွေလည်း ကျွန်မအမျိုးသားအပေါ် အထူးစိတ်ဝင်စားမှုပြခဲ့ကြတယ်။ ကျွန်မတို့ကို ဧည့်ဝတ်ကျေပွန်ခဲ့ကြပြီး ကာဇူဟီကို,ကို သူတို့ရဲ့ဖခင်လိုပဲ ရင်းရင်းနှီးနှီးနဲ့ ပြောဆိုဆက်ဆံကြတယ်။ အဲဒါကသူ့ကို အရမ်းပျော်စေခဲ့တယ်။
တစ်နေ့တော့ အသင်းတော်က မင်္ဂလာဆောင်ပွဲတစ်ခုအတွက် ကျွန်မခင်ပွန်းနာမည်နဲ့ ဖိတ်စာတစ်စောင် ရောက်လာတယ်။ မိသားစုဦးခေါင်းအဖြစ် အဲဒီလိုအလေးဂရုပြုခံရခြင်းက သူ့နှလုံးကို နက်နက်ရှိုင်းရှိုင်းထိမိစေခဲ့တယ်။ သူတက်ရောက်ဖို့ ဆုံးဖြတ်လိုက်တယ်။ မကြာမီမှာ သူဟာ သက်သေခံတွေနဲ့ ရင်းရင်းနှီးနှီးရှိလာပြီး ခရစ်ယာန်အကြီးအကဲတစ်ဦးနဲ့ ကျမ်းစာလေ့လာတော့တယ်။ သူ့ရဲ့ကျမ်းစာလေ့လာမှု၊ အစည်းအဝေးတက်ရောက်ခြင်းနဲ့ အသင်းတော်ကိုချစ်မြတ်နိုးတဲ့စိတ်က ဝိညာဉ်ရေးမှာ ကောင်းစွာတိုးတက်မှုရှိလာဖို့ အကူအညီဖြစ်စေခဲ့တယ်။
နောက်ဆုံးတော့ စည်းလုံးတဲ့မိသားစုဖြစ်လာ
၂၀၀၀ ပြည့်နှစ်၊ ဒီဇင်ဘာလမှာ ကျွန်မအမျိုးသားဟာ ယေဟောဝါဆီမှာ အပ်နှံနှစ်ခြင်းယူလိုက်တယ်။ ကျွန်မသားတွေနဲ့ သူတို့ရဲ့ဇနီးတွေဟာ ဒီခေတ်သစ် “အံ့ဖွယ်” ကိုတွေ့ဖို့ အဝေးကြီးကနေ လာခဲ့ကြတယ်။ ဒီလိုဖြစ်လာဖို့ ၄၂ နှစ်ကြာခဲ့ပေမဲ့ နောက်ဆုံးမှာတော့ ကျွန်မတို့ဟာ စည်းလုံးတဲ့မိသားစုဖြစ်လာခဲ့တယ်။
အခုတော့ ကျွန်မတို့နှစ်ယောက်ဟာ တစ်နေ့တာအတွက် ကျမ်းချက်တစ်ချက်ကို မနက်တိုင်းဆွေးနွေးသုံးသပ်ပြီး ကျမ်းစာကို အတူတကွဖတ်ကြတယ်။ ဝိညာဉ်ရေးအကြောင်းတွေကို နေ့တိုင်းပြောဆိုပြီး ဝိညာဉ်ရေးလုပ်ဆောင်မှုတွေမှာ ပါဝင်ကြတဲ့အတွက် ပျော်ရွှင်ခဲ့ကြတယ်။ အခု ကျွန်မအမျိုးသားဟာ အသင်းတော်မှာ ဓမ္မအမှုထမ်းတစ်ဦးဖြစ်ပြီး မကြာခင်ကမှ တရုတ်ဘာသာစကားနဲ့ လူထုဟောပြောချက်ပေးခဲ့တယ်။ ကျွန်မတို့ အတူတကွပေါင်းစည်းလာအောင် ကူညီပေးတဲ့အတွက် ယေဟောဝါကို ကျေးဇူးတင်တယ်။ ကျွန်မ ချစ်မြတ်နိုးရတဲ့မိသားစု၊ မိတ်ဆွေတွေနဲ့အတူ ကိုယ်တော့်နာမတော်နဲ့ ပိုင်သအုပ်စိုးမှုကို ထာဝရစဉ်ထောက်ခံနေဖို့ ကျွန်မမျှော်လင့်တယ်။
[စာမျက်နှာ ၁၃ ပါ မြေပုံ]
(ကားချပ်အပြည့်အစုံကို စာစောင်တွင်ကြည့်ပါ)
တရုတ်
ကိုရီးယား ဒီမိုကရက်တစ် ပြည်သူ့သမ္မတနိုင်ငံ
ကိုရီးယား သမ္မတနိုင်ငံ
ဂျပန်ပင်လယ်
ဂျပန်
တိုကျို
အရှေ့ တရုတ်ပင်လယ်
တရုတ် (တိုင်ပေ)
ထိုင်ပေ
[စာမျက်နှာ ၁၂ ပါ ရုပ်ပုံ]
ကျွန်မနှစ်ခြင်းခံတဲ့ ၁၉၅၈ ခုနှစ်မှာ မိသားစုနဲ့အတူ
[စာမျက်နှာ ၁၃ ပါ ရုပ်ပုံ]
ကျွန်မတို့ တိုကျိုကနေ ထိုင်ပေကို ပြောင်းရွှေ့တဲ့အခါ ဟာဗီးနဲ့ကက်သီလိုဂန်တို့လို သူငယ်ချင်းတွေအားဖြင့် ဝိညာဉ်ရေးခွန်အားရရှိခဲ့ကြတယ်
[စာမျက်နှာ ၁၅ ပါ ရုပ်ပုံ]
ယနေ့ ကျွန်မရဲ့မိသားစုဟာ စစ်မှန်တဲ့ဝတ်ပြုရေးမှာ စည်းလုံးခဲ့ပြီ