ယေဟောဝါ​ကို​ကြောက်ရွံ့​၍ ပျော်ရွှင်​လော့!

“ယေဟောဝါ​ကို​ကြောက်ရွံ့​သော​သူသည် ပျော်ရွှင်​၏။”—ဆာလံ ၁၁၂:၁၊ က​ဘ။

၁၊ ၂။ ယေဟောဝါ​ကို​ကြောက်ရွံ့​ခြင်း​က အဘယ်​အကျိုးပြု​သနည်း။

ပျော်ရွှင်မှု​ကို လွယ်လွယ်​နှင့်​မရနိုင်​ပါ။ စစ်မှန်သော​ပျော်ရွှင်မှု​ရနိုင်​ရန် ရွေးချယ်မှု​မှန်​ရမည်၊ မှန်ရာကို​လုပ်ဆောင်​ရမည်၊ အမှား​ကို​ရှောင်​ရမည်​ဖြစ်သည်။ ဖန်ဆင်း​ရှင်​ယေဟောဝါ​သည် အကောင်းဆုံး​ဘဝ​လမ်းစဉ်တွင် ကျွန်ုပ်​တို့​ပျော်မွေ့​စေနိုင်​ရန် သွန်သင်​ပေး​ဖို့ ကိုယ်တော်​၏​နှုတ်မြွက်တော် သမ္မာကျမ်းစာ​ကို​ပေး​ထား​သည်။ ယေဟောဝါ​၏​လမ်းညွှန်ချက်ကို ရှာဖွေ​ကာ ယင်းကို​လိုက်နာခြင်း​ဖြင့် ဘုရားသခင်​ကို​ကြောက်ရွံ့​ကြောင်း ဖော်ပြ​သည့်​အခါ အမှန်ပင် ကျေနပ်​ပျော်ရွှင်​နိုင်​မည်​ဖြစ်၏။—ဆာလံ ၂၃:၁; သု. ၁၄:၂၆။

^၂ ဘုရားသခင်​အား အမှန်တကယ်​ကြောက်ရွံ့​ခြင်း​က အမှား​ကို​ရှောင်၊ အမှန်​ကို သတ္တိရှိရှိ​လုပ်ဆောင်​စေ​ကြောင်း​ဖော်ပြ​သည့် ကျမ်းစာ​ခေတ်​နှင့် မျက်မှောက်ခေတ်​မှ ပုံ​န​မူနာ​များ​ကို ဤ​ဆောင်းပါး​တွင် သုံးသပ်ကြ​ပါ​မည်။ ဘုရားသခင်​ကို​ကြောက်ရွံ့​ခြင်း​က ဘုရင်​ဒါဝိဒ်​နည်းတူ လမ်းမှား​မှ ပြန်လှည့်​စေ​၍ ပျော်ရွှင်မှု​ပေး​နိုင်​သည်ကို သိရှိ​ကြ​ရမည်။ ထို့​ပြင် မိဘများ​အနေ​နှင့် သားသမီး​များ​ကို ယေဟောဝါ​အား​ကြောက်ရွံ့​ခြင်း အဖိုးတန်​အမွေ​ပေး​နိုင်​ကြောင်း သိရှိ​ရ​လိမ့်​မည်။ သမ္မာကျမ်းစာ​က  ဤသို့​အာမခံ​သည်– “ယေဟောဝါ​ကို​ကြောက်ရွံ့​သော​သူသည် ပျော်ရွှင်​၏။”—ဆာလံ ၁၁၂:၁၊ က​ဘ။

ပျော်ရွှင်မှု​ပြန်​ခံစား​ရခြင်း

၃။ ဒါဝိဒ်​ကို အပြစ်​လမ်းစဉ်​မှ အဘယ်အရာက ပြန်​လှည့်လာ​စေ​သနည်း။

^၃ ဒါဝိဒ်​သည် ဘုရားသခင်​ကို​ကြောက်ရွံ့​သင့်​သည်​အတိုင်း မကြောက်​မိ​သည့်​အတွက် အပြစ်​ကျူးလွန်​ခဲ့​ကြောင်း ရှေ့​ဆောင်းပါး​တွင်​ဆွေးနွေး​ခဲ့​သည့် ထူးခြားသော​ဖြစ်ရပ်​သုံးခု​မှ သိရှိ​ရသည်။ သို့ရာတွင် ယေဟောဝါ​၏​ဆုံးမမှု​ကို သူ​လက်ခံခဲ့​ပုံ​အရ အရင်းခံ​အားဖြင့် သူသည် ဘုရားသခင်​ကို​ကြောက်ရွံ့​သူ​ဖြစ်​ကြောင်း ဖော်ပြ​သည်။ ဒါဝိဒ်​သည် ဘုရားသခင်​ကို ကြည်ညို​လေးစား​သောကြောင့် အပြစ်ကို​ဝန်ခံ​ကာ လမ်းမှား​ကို​ပြင်​ပြီး ယေဟောဝါ​နှင့်​ဆက်ဆံ​ရေး ပြန်ကောင်း​လာရန် ကြိုးစား​လေ​သည်။ သူ့​အမှား​များ​ကြောင့် သူကိုယ်တိုင်​ရော အခြားသူများ​ပါ ထိခိုက်​နစ်နာ​ခဲ့​ရ​သော်လည်း နောင်တ​စစ်​တင်ပြသော​အခါ ယေဟောဝါ​ထံ​မှ ထောက်မမှု​နှင့်​ကောင်းချီး​များ​ရရှိခဲ့သည်။ ယနေ့ ကြီး​လေး​သော​အပြစ်​ကျူးလွန်​မိ​သည့် ခရစ်ယာန်​များ​အတွက် ဒါဝိဒ်​၏​ပုံ​နမူနာ​က ခွန်အား​ရှိစေ​မည်​မှာ သေချာ​သည်။

၄။ ဘုရားသခင်​ကို​ကြောက်ရွံ့​ခြင်း​က ပျော်ရွှင်မှု​ကို မည်သို့​ပြန်​ရစေ​နိုင်​သနည်း။

^၄ စော်​န​ယာ​၏​အဖြစ်ကို သုံးသပ်ကြည့်​ပါ။ * အချိန်ပြည့်​သတင်းကောင်း​ဟောပြောသူ​အဖြစ် အမှုဆောင်​နေသော စော်​န​ယာ​သည် အပေါင်းအသင်း​မှား​ပြီး ခရစ်ယာန်မဆန်​သော​အကျင့်​များ ပြုကျင့်​လာ​ရာ အသင်းတော်​မှ​နှင်ထုတ်​ခံ​ခဲ့​ရသည်။ သို့သော် သူ​အသိတရား​ပြန်​ရပြီး​နောက် ဘုရားသခင်​နှင့်​ဆက်ဆံ​ရေး​ကောင်းမွန်​လာရန် အတတ်နိုင်ဆုံး​ကြိုးစား​လေ​သည်။ အတန်​ကြာသော် သူ့ကို အသင်းတော်က ပြန်​လက်ခံခဲ့သည်။ ထိုသို့​ဖြစ်ပျက်​နေစဉ် စော်​န​ယာ​တွင် ယေဟောဝါ​၏​အမှုတော် ထမ်းဆောင်​လို​စိတ် ရှိ​မြဲ​ရှိ​နေသည်။ နောက်ဆုံး​၌ အချိန်ပြည့်​ရှေ့ဆောင်​လုပ်ငန်း​တွင် ပြန်ပါ​ဝင်​ခဲ့​သည်။ နောက်ပိုင်း ပုံသက်သေ​ကောင်းသော ခရစ်ယာန်​အကြီးအကဲ​တစ်ဦး​နှင့် သူ​လက်ထပ်​ပြီး ယခု အသင်းတော်တွင် ပျော်ရွှင်စွာ​အမှုဆောင်​နေကြ၏။ စော်​န​ယာ​သည် ခရစ်ယာန်​လမ်းစဉ်​မှ ခေတ္တ​သွေဖည်​သွား​သည်ကို နောင်တ​ရ​သော်လည်း ဘုရားသခင်​ကို​ကြောက်ရွံ့​စိတ် ရှိနေ​သောကြောင့် ပြန်​လှည့်လာ​ခဲ့​သည်ကို ဝမ်းသာ​မိ​သည်။

အပြစ်ပြု​မည့်​အစား အဆင်း​ရဲ​ခံ​ခြင်း

၅၊ ၆။ ဒါဝိဒ်​သည် ရှောလု​ကို နှစ်ကြိမ်​တိုင် အဘယ်​နည်းဖြင့် အသက်​ချမ်းသာပေး​ခဲ့​သနည်း။ အဘယ်ကြောင့်​နည်း။

^၅ ဘုရားသခင်​ကို​ကြောက်ရွံ့​စိတ်​ကြောင့် အစ​ကတည်းက အပြစ်​မပြုလျှင် သာ၍​ကောင်း​ပေ​သည်။ သို့​ဖြစ်​ကြောင်း ဒါဝိဒ်​၏​ဖြစ်ရပ်​က ဖော်ပြ​သည်။ တစ်ခါ​က ရှောလုသည် စစ်သည်​သုံး​ထောင်​နှင့် ဒါဝိဒ်​ကို​လိုက်လံ​ဖမ်းဆီး​နေရာ ဒါဝိဒ်​နှင့်​သူ၏​လူ​တို့ ပုန်းအောင်း​နေသည့် ဂူ​ထဲ​ရောက်လာ​သည်။ ဒါဝိဒ်​၏​လူများ​က ရှောလု​ကို​ကွပ်မျက်​ရန် တိုက်တွန်း​လေ​သည်။ ယေဟောဝါ​သည် ဒါဝိဒ်​၏​ရန်ဘက်​ကို သူ့​လက်ထဲ​အပ်​နေခြင်း မဟုတ်ပေ​လော​ဟု ယူမှတ်​စ​ရာ​ပင်။ ဒါဝိဒ်​မူ ရှောလု​ရှိရာသို့ တိတ်တဆိတ်​သွား​၍ အဝတ်စွန်း​ကို​ဖြတ်​ယူ​လေ​သည်။ ဘုရားသခင်​ကို​ကြောက်​သောကြောင့် ထိုသို့​ပြုလုပ်​မိ​သည့်​အတွက်​ပင် သူ​စိတ်​အနှောင့်အယှက်​ဖြစ်​ရသည်။ ထို့နောက် စိတ်​လှုပ်ရှား​နေကြ​သော သူ့​လူများ​ကို ဒါဝိဒ်က ‘ငါ့​အရှင်​သည် ထာဝရ​ဘုရားသခင်​အခွင့်​နှင့် ရှင်ဘုရင်​ဖြစ်သော​ကြောင့် ထို​အရှင်ကို​ထိခိုက်​ခြင်း​ငှာ ငါ​လက်​ဆန့်​သော​အမှုကို ထာဝရ​ဘုရားသခင် ဆီးတား​တော်​မူ​ပါစေ​သော’ ဟု​ဆို​လေ​သည်။ *—၁ ဓမ္မ​ရာဇဝင် ၂၄:၁-၇။

^၆ နောက်​တစ်ကြိမ်​တွင် ရှောလု​နှင့်​သူ့​လူတို့သည် ည​အချိန်​စခန်းချ​စဉ် သူတို့ကို ‘ကြီးစွာ​သော​အိပ်ခြင်း​ဖြင့် ထာဝရ​ဘုရားသခင် အိပ်​စေတော်မူ’ ၏။ ထို​အခါ ဒါဝိဒ်​နှင့် သူ၏​တူ သတ္တိ​ခဲ​အဘိရှဲ​သည် စခန်း​ထဲ​လျှိုဝင်​၍ ရှောလု​အိပ်​နေသော​နေရာ​အထိ သွား​ကြသည်။ အဘိရှဲ​က ရှောလု​ကို ပွဲချင်းပြီး​ကွပ်မျက်​လို​သည်။ ဒါဝိဒ်​မူ အဘိရှဲ​ကို​တားဆီး​ရန် ‘ထာဝရ​ဘုရားသခင်​အခွင့်​နှင့် ရှင်ဘုရင်​ဖြစ်သော​သူကို အဘယ်သူ​အပြစ်လွှတ်​လျက် ထိခိုက်​နိုင်​သနည်း’ ဟု​မေး​လေ​၏။—၁ ဓမ္မ​ရာဇဝင် ၂၆:၉၊ ၁၂။

၇။ အပြစ်​မပြုမိ​ရန် ဒါဝိဒ်​ကို အဘယ်အရာက တားဆီး​သနည်း။

^၇ ဒါဝိဒ်​သည် ရှောလု​ကို​ကွပ်မျက်​ရန် နှစ်ကြိမ်​အခွင့်​ရ​လျက်​နှင့် အဘယ်ကြောင့်​ထိုသို့​မပြု​သနည်း။ သူသည် ရှောလု​ထက် ယေဟောဝါ​ကို ပို​၍​ကြောက်​သောကြောင့်​ဖြစ်၏။ ဘုရားသခင်​ကို ဒါဝိဒ် အမှန်တကယ်​ကြောက်ရွံ့​သဖြင့် အပြစ်ပြု​မည့်​အစား အဆင်း​ရဲ​ခံရန် အသင့်​ရှိခဲ့​သည်။ (ဟေဗြဲ ၁၁:၂၅၊ ၂၆) ယေဟောဝါ​သည် ကိုယ်တော်​၏​လူမျိုး​နှင့် မိမိကို​ပါ ဂရုစိုက်​တော်​မူ​ကြောင်း ဒါဝိဒ် အပြည့်အဝ​ယုံကြည်​စိတ်ချ​သည်။ ဘုရားသခင်​ကို​နာခံ​၍ ယုံကြည်​ကိုးစား​မည်​ဆိုလျှင် ပျော်ရွှင်မှု​နှင့်​ကောင်းချီး​များစွာ ရရှိ​မည်၊ ကိုယ်တော်​ကို​ပစ်ပယ်​ပါ​က မျက်နှာသာ​ဆုံးရှုံး​မည်​ကို သူသိ​ရှိသည်။ (ဆာလံ ၆၅:၄) ထို့​ပြင် ဘုရားသခင်​သည် မိမိကို​ဘုရင်​ဖြစ်စေ​မည်၊ အချိန်တန်လျှင် ကိုယ်တော့်​နည်းလမ်း​အတိုင်း ရှောလု​ကို​ဖယ်ရှားပစ်​မည်​ဟူသော​ကတိတော်​နှင့်​အညီ ပြု​တော်​မူ​မည်​ကို သိထား​သည်။—၁ ဓမ္မ​ရာဇဝင် ၂၆:၁၀။

ဘုရားသခင်​ကို​ကြောက်ရွံ့​ခြင်း​က ပျော်ရွှင်​စေ

၈။ အခက်အခဲ​များ​ကြား ဒါဝိဒ်​ပြုမူ​ခဲ့​ပုံ​က အဘယ်​နည်းဖြင့် အတုယူ​စ​ရာ​ဖြစ်သနည်း။

^၈ ခရစ်ယာန်​များ​အနေ​နှင့် ကျွန်ုပ်​တို့သည် လှောင်ပြောင်​ကဲ့ရဲ့​ခြင်း၊ နှိပ်စက်​ညှဉ်းပန်း​ခြင်း​နှင့် အခြား​ပြဿနာ​များ ကြုံ​ရနိုင်​သည်။ (မဿဲ ၂၄:၉; ၂ ပေတရု ၃:၃) ဝတ်ပြုမှု​တူ​သူ​ချင်း​ကြောင့်​ပင် တစ်ခါတစ်ရံ အခက်အခဲ​များ​ကြုံတွေ့​နိုင်​သည်။ သို့သော် အရာခပ်သိမ်း​ကို ယေဟောဝါ​သိမြင်​တော်​မူ​သည်၊ ကျွန်ုပ်​တို့၏​ဆုတောင်းသံ​ကို နားညောင်း​တော်​မူ​သည်၊ အချိန်တန်လျှင် ကိစ္စရပ်​အားလုံး​ကို အလိုတော်နှင့်​အညီ​ဖြေရှင်း​ပေး​မည်​ကို ကျွန်ုပ်​တို့​သိရှိ​ထား​ကြသည်။ (ရောမ ၁၂:၁၇-၂၁; ဟေဗြဲ ၄:၁၆) ထို့ကြောင့် အတိုက်အခံပြု​သူများကို ကြောက်​မည့်​အစား ယေဟောဝါ​ကို​ကြောက်ရွံ့​ပြီး ကိုယ်တော့်​ကို​မျှော်ကိုး​ကြ​မည်။ ဒါဝိဒ်​ကဲ့သို့ ကျွန်ုပ်​တို့​လည်း လက်တုံ့ပြန်​မည်​မဟုတ်၊ အဆင်း​ရဲ​ခံရ​မည်​ကို​စိုးရိမ်​ပြီး ဖြောင့်မတ်​သော​မူများ​ကို အလျော့ပေးလိုက်လျော​မည်​လည်း မဟုတ်ပါ။ ဤ​သို့ပြုလျှင် အဆုံး​တွင် ပျော်ရွှင်​ရမည်။ သို့သော် မည်သို့​အားဖြင့်​နည်း။

၉။ ဘုရားသခင်​ကို​ကြောက်ရွံ့​ခြင်း​က နှိပ်စက်​ညှဉ်းပန်း​ခံရ​သည့်​ကြား​မှ ပျော်ရွှင်​စေနိုင်​ပုံ​ကို ဥပမာ​ပေး​ပါ။

^၉ အာဖရိက​မှ သက်တမ်းရင့်​ခရစ်ယာန်​သာသနာပြု​တစ်ဦး ဤသို့​ဆို​သည်– “ခရစ်ယာန်​ကြားနေ​မှု​ကြောင့် နိုင်ငံရေး​ပါတီ​ကတ်​မဝယ်​တဲ့ သားအမိ​အကြောင်း ကျွန်တော် စဉ်းစား​မိတယ်။ လူအုပ်​က သူတို့ကို ရိုင်းရိုင်းစိုင်းစိုင်း​ဆဲဆို​ပြီး မောင်းထုတ်တယ်။ အိမ်အပြန်မှာ ဆယ်ကျော်သက်​အရွယ်​သမီး​က ဘာကြောင့်​ဒီလို​ဖြစ်​ရသလဲ​ဆိုတာ​နားမလည်​ဘဲ ငို​နေ​တော့ သူ့​အမေက နှစ်သိမ့်​အားပေးတယ်။ အဲဒီတုန်းက သူတို့​ဝမ်းနည်း​နေကြ​ပေမဲ့ စိတ်​ကြည်လင်​တယ်။ ဘုရားသခင့်​စကား​ကို သူတို့​နားထောင်​ခဲ့လို့ နောက်ပိုင်း​မှ အရမ်းပျော်​ကြတယ်။ သူတို့​သာ ပါတီ​ကတ်​ဝယ်​ခဲ့ရင် လူအုပ်​က ပျော်မြူး​နေကြ​မှာ။ အအေး​တိုက်​ကြ​မယ်၊ ကခုန်​ပြီး အိမ်ပြန်​ပို့ပေး​ကြ​မယ်။ ဒါပေမဲ့ ဒီ​သားအမိ​က အလျှော့ပေး​လိုက်လျော​မိ​ခဲ့ရင် တော်​တော့်​ကို​စိတ်​ဆင်းရဲ​ကြ​မှာ။” ဘုရားသခင်​ကို သူတို့​ကြောက်ရွံ့​ခဲ့​ကြ​သဖြင့် ထို​အဖြစ်မျိုး​မကြုံ​ခဲ့​ပေ။

၁၀၊ ၁၁။ အမျိုးသမီး​တစ်ဦး​သည် ဘုရားသခင်​ကို​ကြောက်ရွံ့​သည့်​အတွက် အဘယ်​အကျိုး​ခံစားရ​သနည်း။

^၁၀ အသက်ကို တန်ဖိုး​ထား​လေးမြတ်မှု​နှင့်​ပတ်သက်​၍ စမ်းသပ်မှု​များ​ကြုံ​ရသည့်​အခါ  ဘုရားသခင်​ကို​ကြောက်ရွံ့​ကြောင်း တင်ပြခြင်း​သည် ပျော်ရွှင်​စေနိုင်​၏။ မေရီ​သည် တတိယ​ကိုယ်ဝန်​ကို​လွယ်​ထား​စဉ် ဆရာဝန်​က “ခင်ဗျား​ရဲ့​အခြေအနေ အတော်​ဆိုး​တာ​ပဲ။ ၂၄ နာရီ​အတွင်း သေ​နိုင်တယ်။ ကလေး​လည်း သေသွား​နိုင်တယ်။ ဒီ​ကလေး ပုံမှန်​ဖြစ်​မယ်​လို့ အာမ,မခံနိုင်​ဘူး” ဟု​ဆို​ကာ ကိုယ်ဝန်​ဖျက်​ချရန် တိုက်တွန်း​လေ​သည်။ မေရီ​သည် ယေဟောဝါသက်သေ​များနှင့် ကျမ်းစာ​လေ့လာ​နေ​၏။ နှစ်ခြင်း​တော့ မခံရ​သေး​ပေ။ “ဒါပေမဲ့ ယေဟောဝါ​ကို​ဝတ်ပြုဖို့ ကျွန်မ ဆုံးဖြတ်ထား​တယ်။ ဘာပဲ​ဖြစ်ဖြစ် ဘုရားသခင်​စကား​နားထောင်မယ်​လို့ ဆုံးဖြတ်ပြီး​သား” ဟု​သူ​ပြောပြ​သည်။—ထွက်မြောက်ရာ ၂၁:၂၂၊ ၂၃။

^၁၁ မေရီ​သည် ကိုယ်ဝန်ဆောင်​ချိန်​အတွင်း ကျမ်းစာ​လေ့လာခြင်း၊ မိသားစုကို​ပြုစု​ခြင်း​တို့​နှင့် အလွန်​အလုပ်​များနေ​၏။ နောက်ဆုံး မီးဖွား​လေ​တော့​သည်။ “ပထမ​ကလေး​နှစ်ယောက်​ထက် ဒီ​ကလေး​မွေး​ရတာ ခက်​ပေမဲ့ သိပ်​ကြီးကြီးမားမား​တော့ မဟုတ်ပါဘူး” ဟု​သူ​ပြော​သည်။ မေရီ​သည် ဘုရားသခင်​ကို​ကြောက်ရွံ့​သည့်​အတွက် ကိုယ်ကို​ကိုယ်​သိသောစိတ်​ကြည်လင်​နေပြီး မကြာမီ နှစ်ခြင်း​ခံ​လိုက်​လေ​သည်။ ထို​ကလေး​ကြီးပြင်း​လာသော​အခါ ဘုရားသခင်​ကို​ကြောက်ရွံ့​တတ်လာ​ပြီး ယခု ယေဟောဝါသက်သေ​များ​၏​ဌာနခွဲ​တစ်ခု​တွင် အမှုဆောင်​နေသည်။

ယေဟောဝါ​ကိုကိုး​စား၍ ခွန်အား​ယူ​လော့

၁၂။ ဘုရားသခင်​ကို​ကြောက်ရွံ့​သည့်​အတွက် ဒါဝိဒ် မည်သို့​ခွန်အား​ရရှိခဲ့​သနည်း။

^၁၂ ယေဟောဝါ​ကို ဒါဝိဒ်​ကြောက်ရွံ့​ခြင်း​က မကောင်းမှု​ရှောင်​စေ​ရုံ​ထက်မက သူ့ကို​အကျိုးပြု​သည်။ ခက်ခဲ​သော​အခြေအနေ​တွင် ပြတ်ပြတ်သားသား၊ ပညာရှိရှိ​လုပ်ဆောင်​စေ​ခဲ့​သည်။ ဒါဝိဒ်​နှင့်​သူ့​လူတို့သည် ရှောလု​၏​ရန်ကို​ရှောင်ရန် ဖိလိတ္တိ​ပြည်၊ ဇိကလတ်​ကျေးလက်​ပိုင်း​တွင် တစ်နှစ်​နှင့်​လေးလ​တိုင် ပုန်းခို​နေရ​သည်။ (၁ ဓမ္မ​ရာဇဝင် ၂၇:၅-၇) တစ်ခါ​က သူတို့​မရှိ​ခိုက် အာမလက်​လူတို့သည် မြို့ကို​မီးရှို့​၍ မယား​နှင့်​သားသမီး​များ၊ သိုး​နွား​များ​ကို သိမ်းယူ​သွား​၏။ ဒါဝိဒ်​နှင့်​သူ၏​လူများ ပြန်ရောက်​လာ၍ ထို​အဖြစ်အပျက်​ကို​မြင်​သည့်​အခါ ငိုကြွေး​လေ​သည်။ ဒါဝိဒ်​၏​လူတို့သည် ဝမ်းနည်း​ရာ​မှ စိတ်နာ​လာကြပြီး သူ့ကို​ခဲ​နှင့်​ပစ်​မည်​ဟုဆိုလေ၏။ ထို​အခါ ဒါဝိဒ်​သည် အလွန်​ဝမ်းနည်း​သော်လည်း စိတ်ပျက်​အားလျော့ခြင်း​မရှိ​ချေ။ (သု. ၂၄:၁၀) ယေဟောဝါ​ကို​ကြောက်ရွံ့​သောကြောင့် ကိုယ်တော်​ကို​သာ​ကိုး​စား၍ ခွန်အား​ယူ​လေ​သည်။ ထို့နောက် သူတို့သည် ဘုရားသခင်​၏​အကူအညီ​ဖြင့် အာမလက်​လူ​တို့ကို အမီလိုက်​တိုက်ခိုက်​ခဲ့​ကြ​ရာ အလုံးစုံ​တို့ကို ပြန်​သိမ်းပိုက်​နိုင်​လေ​သည်။—၁ ဓမ္မ​ရာဇဝင် ၃၀:၁-၂၀။

၁၃၊ ၁၄။ ဘုရားသခင်​ကို​ကြောက်ရွံ့​ခြင်း​က ခရစ်ယာန်​တစ်ဦး​အား မှန်ကန်​သည့်​ဆုံးဖြတ်ချက်​များ​ကို မည်သို့​ချ​စေ​သနည်း။

^၁၃ ယနေ့ ယေဟောဝါ​၏​ကျေးကျွန်​များသည် ကိုယ်တော်​ကိုကိုး​စား၍ သတ္တိ​ဖြင့် ပြတ်ပြတ်သားသား လုပ်ဆောင်​ရမည့်​အခြေအနေ​များ ကြုံတွေ့ကြ​ရသည်။ ဥပမာ​အနေ​နှင့် ခရစ္စတီး​နာ​၏​အဖြစ်ကို သုံးသပ်ကြည့်​ပါ။ သူသည် ငယ်​စဉ်​က ယေဟောဝါသက်သေ​များနှင့် ကျမ်းစာ​လေ့လာ​ခဲ့​ဖူး​သည်။ သို့သော် သူသည် စန္ဒရား​အကျော်အမော်​ဖြစ်​လို​၍ အတော်အတန်​ကြိုးစား​ခဲ့​ရာ များစွာ​တိုးတက်​နေ​၏။ ထို့​ပြင် ဟောပြောရန် ရှက်ကြောက်​သည့်​အတွက် နှစ်ခြင်း​ခံ​လိုက်​လျှင် ထမ်းဆောင်​ရမည့်​တာဝန်​များ​ကိုလည်း လက်မခံ​ရဲ​ပေ။ သမ္မာကျမ်းစာ​ကို ခရစ္စတီး​နာ ဆက်​လေ့လာ​သည်​နှင့်​အမျှ ယင်း​၏​အစွမ်းထက်​မှု​ကို ပိုမို​သိ​နားလည်​လာ​လေ​သည်။ သို့​နှင့် ယေဟောဝါ​ကို သူ​ကြောက်ရွံ့​တတ်လာ​ပြီး ကိုယ်တော့်​ကို စိတ်နှလုံး​အကြွင်းမဲ့၊ ဉာဏ်​ရှိသမျှ၊ အစွမ်း​သတ္တိ​ရှိသမျှ​နှင့်​ချစ်​စေ​လို​ကြောင်း သိလာ​သည်။ (မာကု ၁၂:၃၀) ထို့နောက် ယေဟောဝါ​ထံ​အပ်နှံ​ကာ နှစ်ခြင်း​ခံ​ခဲ့​သည်။

^၁၄ ဝိညာဉ်​ရေး​တိုးတက်လာ​ရန် ယေဟောဝါ​ထံ ခရစ္စတီး​နာ ဆုတောင်း​ခဲ့​သည်။ “စန္ဒရား​အကျော်အမော်​တစ်ယောက်​ဖြစ်​ရင် အမြဲ​ခရီးထွက်​နေ​ရမယ်။ တစ်နှစ်​ကို ဖျော်ဖြေပွဲ ၄၀၀ လောက်​တင်ဆက်​ဖို့​စာချုပ်​ချုပ်​ရမယ်ဆိုတာ​ကို ကျွန်မ​သိထားတယ်။ ဒါ​ကြောင့် ကိုယ့်​ဝမ်း​ကိုယ်​ကျောင်း​ရင်း အချိန်ပြည့်​ဟောပြောသူ​ဖြစ်​နိုင်​ဖို့ စန္ဒရား​နည်းပြ​ပဲ​လုပ်မယ်​လို့ ဆုံးဖြတ်​လိုက်တယ်” ဟု​သူ​ရှင်းပြသည်။ ထို​အချိန်​က ခရစ္စတီး​နာ​၏​နိုင်ငံ​ရှိ နာမည်ကြီး က​ဇာတ်ရုံ​တွင် သူ​ဖျော်ဖြေ​ရန် စာရင်း​သွင်း​ပြီး​သား​ဖြစ်နေ​သည်။ သို့​နှင့် သူ​ဤသို့​ပြော​ခဲ့​သည်– “ကျွန်မ​ရဲ့ ပွဲဦးထွက်​ဖျော်ဖြေမှု​က နောက်ဆုံး​ပိတ်​ဖျော်ဖြေပွဲ​ဖြစ်သွား​တယ်။” ယခု သူသည် ခရစ်ယာန်​အကြီးအကဲ​တစ်ဦး​နှင့်​လက်ထပ်​ထား​ကာ ယေဟောဝါသက်သေ​များ​၏​ဌာနခွဲ​တွင် အမှုဆောင်​လျက်​ရှိသည်။ ယေဟောဝါ​ထံ​မှ​ရရှိသော ခွန်အား​ဖြင့် မှန်ကန်​သည့်​ဆုံးဖြတ်ချက်​ချ​နိုင်​ပြီး ယခု သူ၏​အချိန်​နှင့်​ခွန်အား​ကို ကိုယ်တော့်​အမှုတော်​အတွက် အသုံးပြုနိုင်​ခြင်း​ကြောင့် ပျော်ရွှင်​နေသည်။

အဖိုးထိုက်​သော​အမွေ

၁၅။ ဒါဝိဒ်​သည် သားသမီး​များ​ကို အဘယ်​အမွေ​ပေး​လို​သနည်း။ ယင်းကို သူ​မည်သို့​ပြု​ခဲ့​သနည်း။

^၁၅ ‘အချင်း​သူငယ်​တို့ လာ​ကြလော့။ ငါ့​စကား​ကို နားထောင်​ကြလော့။ ထာဝရ​ဘုရားသခင်​ကို ကြောက်ရွံ့​ခြင်း​တရားကို သင်တို့အား ငါ​သွန်သင်​မည်’ ဟု​ဒါဝိဒ်​ရေးခဲ့​သည်။ (ဆာလံ ၃၄:၁၁) ဖခင်​တစ်ဦး​အနေ​နှင့် ဒါဝိဒ်​သည် သူ၏​သားသမီး​များ​ကို အဖိုးထိုက်​သော​အမွေ​ဖြစ်သည့် ယေဟောဝါ​အား အမှန်တကယ်​ကြောက်ရွံ့​ခြင်း​သဘောကို ပေး​လို​သည်။ ယေဟောဝါ​ကို မရ​မ​က​တောင်းဆို​တတ်သော၊ ကြောက်စရာ​ကောင်းသော၊ ပညတ်​ချိုးဖောက်​သူကို အပြစ်ပေး​ရန်​အသင့်ရှိ​သော​သူ​အဖြစ်​မဟုတ်ဘဲ ဂရုစိုက်​တတ်သော၊ ခွင့်လွှတ်​တတ်သော မေတ္တာရှင်​ဖခင်​တစ်ဦး​အဖြစ် အပြော​အားဖြင့်​ရော၊ အလုပ်​အားဖြင့်​ပါ သရုပ်ပေါ်​အောင် ဒါဝိဒ်​ဖော်ပြ​ခဲ့​သည်။ အမှား​များ​ကို မည်သူ မျက်ခြည်မပြတ်​စောင့်ကြည့်​နေ​မည်​နည်း​ဟု ဒါဝိဒ်​မေးခဲ့သည်။ ယေဟောဝါ​သည် အမှား​များ​ကို အမြဲ​စစ်ဆေး​မနေ​ကြောင်း သူ​ယုံကြည်​စိတ်ချ​၍ ဤသို့​ထပ်ဆင့်​ဆို​သည်– ‘မထင်ရှား​သော​အပြစ်​နှင့် အကျွန်ုပ်​ကို ကင်းစင်​စေပါ။’ ဒါဝိဒ်​သည် မိမိ​အတတ်နိုင်ဆုံး​ကြိုးစား​ပါ​က မိမိ၏​အပြောအဆို၊ အတွေးအခေါ်​တို့ကို ယေဟောဝါ နှစ်သက်​လက်ခံ​မည်​ဟု စိတ်ချ​သည်။—ဆာလံ ၁၉:၁၂၊ ၁၄။

၁၆၊ ၁၇။ သားသမီး​များ ယေဟောဝါ​ကို​ကြောက်​တတ်လာ​ရန် မိဘတို့ မည်သို့​သင်ပေး​နိုင်​သနည်း။

^၁၆ ယနေ့ မိဘများလည်း ဒါဝိဒ်​ကို အတုယူ​သင့်​သည်။ ယေဟောဝါသက်သေ​များ​၏​ဌာနခွဲ​တွင် မိမိ​ညီ​နှင့်အတူ​အမှုဆောင်​နေသော ရာ့ဖ်​က ဤသို့​ဆို​သည်– “အမှန်တရား​ထဲမှာ ကျွန်တော်​တို့​ပျော်ရွှင်​အောင် မိဘတွေ လေ့ကျင့်ပေး​ခဲ့​တယ်။ ကျွန်တော်​တို့​ငယ်ငယ်​တုန်း​က အသင်းတော်​အကြောင်း မိဘတွေ​ပြော​ကြ​ရင် ကျွန်တော်​တို့ကို​လည်း ဝင်​ပြော​ခွင့်​ပေး​တယ်။ ဒီလိုနဲ့ ကျွန်တော်​တို့​လည်း သူတို့​လို​ပဲ အမှန်တရားမှာ စိတ်​ထက်သန်​လာကြတယ်။ ယေဟောဝါ​ရဲ့​အမှုတော်ကို အကျိုးရှိရှိ​ထမ်းဆောင်​နိုင်တယ်​လို့ ကျွန်တော်​တို့ကို​သင်ပေးတယ်။ တကယ်​ပြော​ရ​ရင် ကြေညာသူ​နည်းတဲ့ နိုင်ငံ​တစ်နိုင်ငံ​မှာ ကျွန်တော်​တို့​မိသားစု နှစ်​နဲ့​ချီ​နေပြီး​တော့ အသင်းတော်​အသစ်တွေ ဖွင့်ပေး​ခဲ့​ကြတယ်။

^၁၇ “ကျွန်တော်​တို့ကို လမ်းမှန်​ပေါ်​ရပ်တည်​နေ​စေ​ခဲ့​တာ​က တင်းကျပ်​တဲ့​စည်းကမ်း​တွေ​မဟုတ်ဘဲ မိဘတွေရဲ့​ပုံသက်သေ​ဖြစ်တယ်။ မိဘတွေ​အတွက် ယေဟောဝါ​က တကယ့်​ပုဂ္ဂိုလ်​တစ်ပါး၊ တကယ့်ကို ကြင်နာ​ကောင်းမြတ်​တဲ့ ဘုရားသခင်​ဖြစ်တယ်။ ကျွန်တော်​တို့​မိဘတွေက ယေဟောဝါ​နဲ့​အကျွမ်းတဝင်​ရှိဖို့ ကြိုးစား​တယ်။ ကိုယ်တော့်​မျက်နှာသာ ရချင်ကြတယ်။ ဘုရားသခင်​ကို မိဘတွေက အမှန်တကယ်​ချစ်​ကြောက်​ရိုသေ​ကြ​လို့ ကျွန်တော်​တို့​လည်း အဲဒီလို​ဖြစ်လာ​ကြတယ်။ အမှား​လုပ်မိရင်​တောင် ကျွန်တော်​တို့ကို ယေဟောဝါ​ချစ်​နိုင်​တော့​မှာ​မဟုတ်ဘူးလို့ တစ်ခါ​မှ မခံစား​စေ​ခဲ့​ဘူး။ ဒေါသတကြီး​နဲ့ စည်းကမ်း​ထုတ်​တာ​မျိုး​လည်း မရှိခဲ့ဘူး။ အများအားဖြင့် ကျွန်တော်​တို့​နဲ့​အတူ​ထိုင်ပြီး အေးအေးဆေးဆေး ဆုံးမ​ကြတယ်။ အမေ​ဆိုရင် ကျွန်တော်​တို့​သဘောပေါက်​အောင် တစ်ခါ​တ​လေ မျက်ရည်ကျ​တဲ့​အထိ ဆုံးမ​ခဲ့​ဖူး​တယ်။ တကယ်လည်း ထိရောက်​တယ်။ ယေဟောဝါ​ကို​ကြောက်ရွံ့​တယ်​ဆိုတာ တကယ်​ကောင်းတယ်၊ ကိုယ်တော်​ရဲ့​သက်သေ​တစ်ဦး​ဖြစ်​ရတာ ဝန်ထုပ်ဝန်ပိုး​မဟုတ်ဘဲ ကျေနပ်​အားရစရာ​ဖြစ်တယ်​ဆိုတာ​ကို မိဘတွေက အပြောနဲ့ရော၊ အလုပ်နဲ့ပါ သင်ပေးခဲ့တယ်။”—၁ ယောဟန် ၅:၃။

၁၈။ စစ်မှန်သော​ဘုရားသခင်​ကို ကြောက်ရွံ့​ခြင်း​ကြောင့် အဘယ်အရာ​ရရှိ​မည်​နည်း။

^၁၈ “ဒါဝိဒ်​မြွက်ဆို​သော နောက်ဆုံး​စကား” မှာ ဤသို့​ဖြစ်၏– ‘လူ​တို့ကို​အုပ်စိုး​သော​သူသည် တရား​သဖြင့်​စီရင်၍ ဘုရားသခင်​ကို​ကြောက်ရွံ့​လျက် အုပ်စိုး​ရမည်။ နေ​ထွက်​သော နံနက်​အလင်းကဲ့သို့​ဖြစ်​ရ​လိမ့်​မည်။’ (၂ ဓမ္မ​ရာဇဝင် ၂၃:၁၊ ၃၊ ၄) ဒါဝိဒ်​၏​မင်းရိုက်ရာ​ကို​ဆက်ခံသူ သားတော်​ရှောလမုန်​သည် ဆိုလိုရင်း​ကို​သဘောပေါက်​သဖြင့် နာခံ​တတ်သော​နှလုံး​နှင့် “ကောင်း​မကောင်း​ကို ပိုင်းခြား​၍​သိတတ်သော​ဉာဏ်” ပေး​ပါ​ရန် ယေဟောဝါ​ထံ​ဆုတောင်း​ခဲ့​ခြင်း​ဖြစ်​မည်။ (၃ ဓမ္မ​ရာဇဝင် ၃:၉) ယေဟောဝါ​ကို​ကြောက်ရွံ့​ခြင်း​သည် ပညာရှိ​လမ်းစဉ်​ဖြစ်​ပြီး ပျော်ရွှင်မှု​ရှိစေ​ကြောင်း ရှောလမုန်​အသိအမှတ်ပြု​သည်။ နောက်ပိုင်း​တွင် သူ​ရေး​သည့်​ကျမ်း​တစ်ကျမ်း​ကို ဤသို့​နိဂုံး​ချုပ်​၏– “အချုပ်အခြာ​စကား​ဟူ​မူ​ကား ဘုရားသခင်​ကို​ကြောက်ရွံ့​၍ ပညတ်တော်​တို့ကို စောင့်ရှောက်​လော့။ ဤ​ရွေ့​ကား လူ​နှင့်​ဆိုင်သော အမှုအရာ​အလုံးစုံ​တို့ကို ချုပ်ခြာ​သတည်း။ အကြောင်း​မူ​ကား ဘုရားသခင်​သည် ခပ်သိမ်း​သော​ဝှက်ထားခြင်း​မှ​စ၍ အလုံးစုံသော​အမှု၊ ကောင်း​မကောင်း​ရှိသမျှ​တို့ကို စစ်ကြော​၍ တရား​သဖြင့် စီရင်တော်မူ​လတ္တံ့။” (ဒေ. ၁၂:၁၃၊ ၁၄) ထို​အကြံပေး​ချက်​ကို ကျွန်ုပ်​တို့​လိုက်နာပါ​က “စိတ်​နှိမ့်ချ​ခြင်း၊ ယေဟောဝါ​ကို​ကြောက်ရွံ့​ခြင်း​ကျေးဇူး​ကြောင့်” ဉာဏ်ပညာ​နှင့်​ပျော်ရွှင်မှု​သာမက “စည်းစိမ်၊ ဂုဏ်​အသရေ၊ အသက်” ကို​ပါ ရရှိပါ​လိမ့်​မည်။—သု. ၂၂:၄။

၁၉။ “ယေဟောဝါ​အား​ကြောက်ရွံ့​ခြင်း” ကို အဘယ်အရာက နားလည်​လာ​စေမည်​နည်း။

^၁၉ ကျေးကျွန်​စစ်​များသည် ယေဟောဝါ​ကို အမှန်တကယ်​ကြောက်ရွံ့​ပါ​က အကျိုး​ခံစားရ​ကြောင်း သမ္မာ​ကျမ်းစာ​ပါ​ပုံ​နမူနာ​များနှင့် မျက်မှောက်ခေတ်​တွေ့ကြုံမှု​များ​မှ ကျွန်ုပ်​တို့​သိရှိ​ခဲ့​ရ၏။ ထိုသို့​ကြောက်ရွံ့​လျှင် ကျွန်ုပ်​တို့၏​ကောင်းကင်​ခမည်းတော် မနှစ်သက်​ရာ​ကို ရှောင်​မည်​သာမက အတိုက်အခံပြု​သူများကို သတ္တိရှိရှိ​ရင်ဆိုင်​ဝံ့​မည်။ ထို့​ပြင် စမ်းသပ်မှု​နှင့်​အခက်အခဲ​များ​ကြား ကြံ့ကြံ့ခံ ရပ်တည်​နိုင်​ပါ​လိမ့်​မည်။ ထို့​ကြောင့် လူကြီးလူငယ်​မရွေး ကျွန်ုပ်​တို့အားလုံး သမ္မာကျမ်းစာ​ကို ဇွဲရှိ​ရှိ​လေ့လာခြင်း၊ သိရှိ​ခဲ့​ရာ​တို့ကို တွေးတော​ဆင်ခြင်ခြင်း၊ ခံစားချက်​အပြည့်​နှင့် မှန်မှန်​ဆုတောင်းခြင်း​တို့ကို​ပြု​၍ ယေဟောဝါ​ထံ ချဉ်းကပ်​ကြပါစို့။ ယင်း​သို့​ပြု​ပါ​က “ဘုရားသခင်​ကို​သိ​သော​ဉာဏ်” အပြင် ‘ထာဝရ​ဘုရားသခင်​ကို ကြောက်​သော​သဘော’ ကို​ပါ သိ​နားလည်​လာ​ပါ​လိမ့်​မည်။—သု. ၂:၁-၅။

[အောက်ခြေ​မှတ်ချက်များ]

သင်​ရှင်းပြ​နိုင်​သလော

ဘုရားသခင်​ကို​ကြောက်ရွံ့​ခြင်း​က

• ကြီး​လေး​သော​အပြစ်ပြု​မိ​သည့်​အခါ မည်သို့​နောင်တ​ယူ​ပြောင်းလဲ​စေနိုင်​သနည်း။

• စမ်းသပ်မှု​များနှင့် နှိပ်စက်​ညှဉ်းပန်းမှု​များ​ကြား​မှ မည်သို့​ပျော်ရွှင်​စေနိုင်​သနည်း။

• ကိုယ်တော်​၏​အလိုတော်ကို​ဆောင်ရန် မည်သို့​ခွန်​အားပေးနိုင်​သနည်း။

• ကျွန်ုပ်​တို့၏​သားသမီး​များ​အတွက် အဖိုးထိုက်​သော​အမွေ မည်သို့​ဖြစ်​နိုင်​သနည်း။

[လေ့လာ​ရန်​မေးခွန်းများ]

[စာမျက်နှာ ၂၆ ပါ ရုပ်ပုံ]

ဒါဝိဒ်​သည် ယေဟောဝါ​ကို​ကြောက်ရွံ့​သောကြောင့် ဘုရင်​ရှောလု​ကို အနာတရ​ဖြစ်အောင်​မပြု​ခဲ့

 [စာမျက်နှာ ၂၉ ပါ ရုပ်ပုံ]

သားသမီး​များ​အား မိဘတို့ပေး​နိုင်​သည့် အဖိုးထိုက်​အမွေ​မှာ​ဘုရားသခင်​အား​ကြောက်ရွံ့​တတ်​ရန် သင်ပေးခြင်း​ဖြစ်