ချစ်ရသူ​တစ်ဦး ယေဟောဝါ​ကို ကျောခိုင်း​သွား သောအခါ

မာ့ခ်​နှင့် လူ​ဝိစ္စ​တို့သည် ယေဟောဝါသက်သေ​များ​ဖြစ်​ကြသည်။ * ခရစ်ယာန်​မိဘများ​ပြုလုပ်​ဖို့ သမ္မာကျမ်းစာ​တိုက်တွန်း​ထား​သည့်​အတိုင်း သူတို့၏​သားသမီး​များ​အား မေတ္တာ​ရှိ​ရှိ၊ ဂရုတစိုက်​နှင့် ကျမ်းစာ​သင်ပေးခဲ့​ကြသည်။ (သု. ၂၂:၆; ၂ တိမောသေ ၃:၁၅) ဝမ်းနည်းစရာမှာ၊ အရွယ်ရောက်​လာ​ကြသည်​နှင့်​အမျှ သူတို့၏​သားသမီး​တချို့​သည် ယေဟောဝါ​ကို ဆက်​မကိုးကွယ်​ကြ​တော့​ချေ။ “ဝိညာဉ်​ရေး​ကနေ လမ်းလွဲ​သွား​ကြ​တဲ့​ကလေး​တွေ​အတွက် ကျွန်မ​တော်တော်လေး စိတ်မကောင်း​ဖြစ်​မိတယ်။ နေ့စဉ် စိတ်​ထဲမှာ နာကျင်မှု​ခံစား​နေရ​တာ​ကို ဘယ်လို​လို့ ဟန်ဆောင်​နိုင်​မှာ​လဲ။ တခြား​သူတွေ သူတို့​သားတွေ​အကြောင်း​ပြော​တဲ့​အခါ ကျွန်မ​ရင်ထဲမှာ​ဆို့နင့်​လာပြီး မျက်ရည်တွေ​ကို မနည်း​ထိန်း​ရတယ်” ဟု​လူ​ဝိစ္စ​ပြောပြ​သည်။

မှန်ပါသည်၊ လူတစ်ယောက်​သည် ယေဟောဝါ​နှင့် သမ္မာကျမ်းစာ​တွင် ဖော်ပြ​ထား​သည့်​အသက်တာ​လမ်းစဉ်​ကို ကျောခိုင်း​သွားသော​အခါ တည်ကြည်သော​မိသားစုဝင်​များ အလွန်​စိတ်ထိခိုက်မှု​ခံစားရ​သည်​မှာ ဖြစ်ရိုးဖြစ်စဉ်​ပင်။ “ညီမလေး​ကို ကျွန်မ​အရမ်းချစ်တယ်။ ယေဟောဝါ​ဆီ သူ​ပြန်လာ​ဖို့​အတွက်​ဆိုရင် ကျွန်မ​ဘာ​မဆို​လုပ်မယ်” ဟု​အိုင်​ရင်း​ပြော​သည်။ မောင်လေး​ဖြစ်သူ​သည် ကိုယ်ကျင့်တရား​ဖောက်ပြန်​သည့်​လမ်းစဉ်​လိုက်​ကာ ယေဟောဝါ​ကို ကျောခိုင်း​သွားသော​အခါ အစ်မ​ဖြစ်သူ မာ​ရီး​ယာ​က ဤသို့​ပြောပြ​သည်– “ဒီလို​ဖြစ်​သွားတာ ကျွန်မ​အတွက် တော်တော်လေး​ခံရ​ခက်တယ်၊ ဘာလို့လဲ​ဆိုတော့ သူဟာ တခြား​အရာ​တွေ​နဲ့​ပတ်သက်​ရင် ကျွန်မ​အတွက် တကယ်​ကောင်း​တဲ့​မောင်လေး​တစ်ယောက်​ဖြစ်တယ်။ မိသားစု​မိတ်​ဆုံ​စားပွဲ​တွေ လုပ်တဲ့​အချိန်​မှာ အထူးသဖြင့် သူ့ကို​သတိ​ရတယ်။”

အဘယ်ကြောင့် အလွန်​ခံရ​ခက်​သနည်း

ကလေး​တစ်ဦး သို့​မဟုတ် ချစ်ရသူ​တစ်ဦး ဝိညာဉ်ရေးတွင်​ပျောက်ဆုံး​သွားခြင်းက အဘယ်ကြောင့် ခရစ်ယာန်​ဆွေမျိုး​များ​ကို ထိုသို့​သော​စိတ်​ဆင်းရဲမှု ဖြစ်စေ​သနည်း။ အကြောင်း​မှာ ယေဟောဝါ​အပေါ် ဆက်၍​တည်ကြည်သူ​တို့​သာ မြေကြီး​ပရဒိသု​တွင် ထာဝစဉ်​အသက်ရှင်​ရမည်ဟု သမ္မာကျမ်းစာ​က ကတိပေး​ထား​ကြောင်း သူတို့​သိထား​သောကြောင့် ဖြစ်သည်။ (ဆာလံ ၃၇:၂၉; ၂ ပေတရု ၃:၁၃; ဗျာ. ၂၁:၃-၅) သူတို့သည် ထို​ကောင်းချီး​များ​ကို သူတို့၏​အိမ်ထောင်ဖက်၊ သားသမီး၊ မိဘ၊ မောင်နှမ​များနှင့် မြေး​များ​ကိုလည်း မျှဝေ​ခံစား​စေ​လို​ကြသည်။ ယေဟောဝါ​ကို စွန့်ခွာ​သွား​ကြသော မိမိတို့​ချစ်​မြတ်နိုးသူ​တို့သည် ထို​ကောင်းချီး​များ ခံစားရ​တော့​မည်​မဟုတ်​ကြောင်း စဉ်းစား​လိုက်​သောအခါ မည်မျှ​စိတ်​နာကြည်း​စ​ရာ​ကောင်း​မည်​ဖြစ်​ခြင်း! မိမိတို့၏​လက်ရှိ​အသက်တာ​နှင့်​ပတ်သက်​၍ စဉ်းစား​လျှင်​ပင် ယေဟောဝါ​၏​ပညတ်​များနှင့် မူများ​သည် မိမိတို့​အကျိုးအတွက်​ဖြစ်​ကြောင်း ခရစ်ယာန်​များ သိထားကြသည်။ ထို့​ကြောင့် ခရစ်ယာန်​များသည် မိမိတို့​ချစ်ရသူ​တို့​က ထိုသို့​သော​လမ်းစဉ်​ကို လိုက်သွား​သည့်​အတွက် ခါးသီး​သော​အကျိုးဆက်များ ရိတ်သိမ်း​ရမည်ကို သိ​သော ကြောင့် ဝမ်းနည်း​ကြသည်။—ဟေရှာယ ၄၈:၁၇၊ ၁၈; ဂလာတိ ၆:၇၊ ၈။

ထိုသို့​သော​အဖြစ်မျိုး မည်သည့်​အခါ​မျှ မကြုံဖူး​သော အချို့​သူတို့​အတွက် ယင်း​သို့​ယူကျုံး​မရ​ဖြစ်စေ​သည်ကို နားလည်​ရန် ခက်​ပေမည်။ ယင်း​ခံစားချက်​က ဘဝ​ကဏ္ဍ​တိုင်း​နီးပါး​အပေါ် သက်ရောက်မှု​ရှိ​နိုင်​သည်။ “ခရစ်ယာန်​အစည်းအဝေးတွေ တက်တာ၊ မိဘတွေ သူတို့​သားသမီးတွေ​နဲ့​ရယ်မော​စကားပြော နေကြ​တာ​ကို မြင်ရ​တဲ့​အခါ ပို​ပြီး​စိတ်မကောင်း​ဖြစ်လာ​တယ်။ ပျော်ရွှင်စရာ​ကောင်း​တဲ့​အချိန်​အခါ​တွေ​မှာ ချစ်ရသူ​တစ်ယောက်​မရှိတဲ့​အတွက် စိတ်​ညှိုးငယ်​ခဲ့​ရတယ်” ဟု​လူ​ဝိစ္စ​က ပြော​သည်။ ခရစ်ယာန်​အကြီးအကဲ​တစ်ဦး​သည် သူ၏​မယားပါ​သမီး​က သူတို့နှင့်​အဆက်အသွယ်​မ​လုပ်​တော့​သည့် လေးနှစ်တာ​ကာလ​ကို ပြန်ပြောင်း​အောက်မေ့​သည်။ သူ ဤသို့​ပြောပြ​၏– “‘ပျော်ရွှင်ဖွယ်​အချိန်​လေး​တွေ’ မှာ​တောင် ဝမ်းနည်းစရာ ဖြစ်သွား​တတ်တယ်။ ကျွန်တော့်​ဇနီး​ကို လက်ဆောင်​တစ်ခုခု​ပေး​ခဲ့ရင် ဒါမှ​မဟုတ် စ​နေ​တနင်္ဂနွေ​လို​ရက်​တွေ​မှာ သူ့ကို ပျော်စရာ​ကောင်း​တဲ့​တစ်​နေရာ​ရာ​ကို ခေါ်သွား​ခဲ့ရင်​လည်း ကျွန်တော်​တို့​ဒီလို​ပျော်​နေချိန်မှာ သူ့​သမီး​မပါ​တာ​ကို စဉ်းစား​ပြီး ငို​နေ​တော့​တာ​ပဲ။”

ထိုသို့​သော​ခရစ်ယာန်​များသည် အမူ​ပို​လွန်းနေ​ခြင်း​လော။ ထိုသို့​ယူမှတ်​စ​ရာ​မလိုပါ။ အမှန်​သော်၊ လူသည် ဘုရားသခင့်​ပုံသဏ္ဌာန်​နှင့်​အညီ ဖန်ဆင်း​ခံရ​သောကြောင့် သူတို့သည် ယေဟောဝါ​၏​အရည်အချင်းများ​ကို အတိုင်းအတာ​တစ်ခု​ထိ ထင်ဟပ်ပြ​နေခြင်း​ဖြစ်​ပေမည်။ (ကမ္ဘာဦး ၁:၂၆၊ ၂၇) ယင်းက အဘယ်အရာကို ဆိုလို​သနည်း။ စဉ်းစား​ကြည့်​ပါ၊ မိမိလူ​မျိုး​တော်​ဣသရေလလူ​တို့သည် ယေဟောဝါ​ကို ပုန်ကန်​သောအခါ ကိုယ်တော်​မည်သို့​ခံစား​ခဲ့​သနည်း။ ဆာလံ ၇၈:၃၈-၄၁ အရ ယေဟောဝါ​စိတ်တော်​နာ​သည်ကို ကျွန်ုပ်​တို့​သိရ​သည်။ သို့​တိုင် ကိုယ်တော်​သည် သူတို့ကို စိတ်ရှည်​စွာ သတိပေး​ဆုံးမ​ခဲ့​ပြီး နောင်တ​ရ​ကြောင်း တင်ပြ​လာသော​အခါ ကြိမ်ဖန်​များစွာ ခွင့်လွှတ်​ခဲ့​သည်။ ယေဟောဝါ​သည် ‘ကိုယ်တိုင်​ဖန်ဆင်း​တော်​မူ​သော​အရာ’ ကို သနားခြင်း​စိတ်​ရှိ​တော်​မူ​ပြီး သူတို့ကို အလွယ်တကူ လျစ်လျူ​မ​ရှု​ခဲ့​ပါ။ (ယောဘ ၁၄:၁၅; ယောန ၄:၁၀၊ ၁၁) ကိုယ်တော်​သည် လူသား တို့​တွင် ထိုသို့​သော​သံယောဇဉ်​တွယ်​မိ​နိုင်​သည့် အစွမ်းအစ​ကို ထည့်သွင်း​တော်​မူ​ပြီး မိသားစုဝင်​များ​၏​မေတ္တာ​နှောင်ကြိုး​သည် ပို​၍​ခိုင်မြဲ​နေနိုင်​သည်။ ထို့​ကြောင့် လူသည် မိမိတို့​ချစ်​မြတ်နိုး​ရသော​ဆွေမျိုး​တစ်ယောက် ဝိညာဉ်ရေးတွင် ပျောက်ဆုံး​သွား​သည့်​အခါ ဝမ်းနည်း​ကြေကွဲ​ကြ​မည်​မှာ အံ့ဩစရာ​မဟုတ်ပါ​လေ။

စင်စစ်၊ ချစ်ရသူ​တစ်ဦး ဝိညာဉ်ရေးတွင် ပျောက်ဆုံး​သွားခြင်း​သည် စစ်မှန်သော​ကိုးကွယ်​သူတို့​အပေါ် ကျရောက်​လာ​သည့် အခက်ခဲဆုံး​စမ်းသပ်မှု​များ​အနက် တစ်ခု​အပါအဝင်​ဖြစ်သည်။ (တမန်​တော် ၁၄:၂၂) ယေရှု​က မိမိ၏​သတင်းတရားကို လက်ခံခြင်း​သည် အချို့​သော​မိသားစု​အတွင်း ပြိုကွဲမှု​ဖြစ်လာ​နိုင်​ကြောင်း ပြော​ခဲ့​သည်။ (မဿဲ ၁၀:၃၄-၃၈) ယင်းသည် သမ္မာကျမ်းစာ​သတင်းတရား​ကိုယ်နှိုက်​ကြောင့် မိသားစု​ပြိုကွဲ​ရခြင်း​မဟုတ်ပါ။ ယင်းအစား၊ မယုံကြည်​သူ သို့​မဟုတ် တည်ကြည်မှု​မရှိသော​မိသားစုဝင်​များ​က ခရစ်ယာန်​လမ်းစဉ်​ကို ငြင်းပယ်၊ စွန့်လွှတ် သို့​မဟုတ် ဆန့်ကျင်ခြင်း​ပင်​ဖြစ်သော​ကြောင့် ယင်း​သို့​ပြိုကွဲ​သွားခြင်း​ဖြစ်သည်။ သို့သော်၊ ယေဟောဝါ​သည် မိမိ​အပေါ်​တည်ကြည်သူ​တို့​ရင်ဆိုင်​ရသည့် စမ်းသပ်မှု​များ​ကို မဖြေရှင်း​ဘဲ စွန့်ပစ်​ထား​မည်​မဟုတ်သောကြောင့် ကျွန်ုပ်​တို့​ဝမ်းသာ​နိုင်​ကြသည်။ ယခု​ပင် သင်သည် မိမိ​ချစ်ရသူ​တစ်ဦး​ကို ဝိညာဉ်​ရေး​အရ ဆုံးရှုံး​သွားသော​ကြောင့် ဝမ်းနည်း​ကြေကွဲ​နေ​မည်​ဆိုလျှင် ထို​ကြေကွဲမှု​ကို ခံနိုင်​ရန်​နှင့် ပျော်ရွှင်​ပြီး ကျေနပ်​ရောင့်ရဲမှု​ကို ရှာတွေ့နိုင်​ရန် အဘယ်​သမ္မာကျမ်းစာ​မူများ​က သင့်​အား ကူညီ​ပေး​နိုင်​သနည်း။

ဖြေရှင်း​နည်း

“ကိုယ်ကို​ဆောက်​တည်လျက် . . . ဘုရားသခင်​၏​ချစ်ခြင်း​မေတ္တာ​၌ ကိုယ်ကို​စောင့်ရှောက်​၍​နေကြ​လော့။” (ယုဒ ၂၀၊ ၂၁၊ သမ္မာ) တစ်စုံတစ်ရာ​သော​အခြေအနေ​ပေါ်​မူတည်ပြီး ယေဟောဝါ​၏​အမှုတော်ထမ်း​ဆောင်ခြင်း​မှ ရပ်တန့်​သွားသော​မိသားစုဝင်​တစ်ဦး​ကို ကူညီ​ပေး​ရန် ဤ​အချိန်တွင် အဘယ်အရာမျှ လုပ်ပေး​၍​မရ ဖြစ်​နိုင်​သည်။ သို့သော် ဆက်၍​တည်ကြည်​နေသော အခြား​မိသားစုဝင်​များ​အပြင် ကိုယ့်​ကိုယ်ကို​ပါ တည်ဆောက်​နိုင်​ပြီး တည်​လည်း​တည်ဆောက်​သင့်​သည်။ မိမိ​သား​သုံးယောက်​အနက် နှစ်ယောက်​က အမှန်တရားကို စွန့်ခွာ​သွား​သည့်​အဖြစ်​နှင့် ကြုံတွေ့​ရသူ ဗရော့​နီ​ကာ​က ဤသို့​ပြော​သည်– “ကျွန်မ​တို့​ရဲ့​ဝိညာဉ်​ရေး​အခြေအနေ ဆက်​ပြီး​ခိုင်မြဲ​နေ​စေမယ်​ဆိုရင် ဒါဟာ သား​နှစ်ယောက် အသိတရား​ပြန်​ရလာတဲ့​အခါ သူတို့ကို ပြန်​ကြိုဆို​နိုင်​ဖို့ အကောင်းဆုံး​အခြေအနေ​မှာ ရှိနေတာ​ဖြစ်​လိမ့်မယ်။ ဖြုန်းတီး​တဲ့​သားရဲ့​ဖခင်​ဟာ သူ့​သားကို ပြန်​လက်ခံနိုင်တဲ့ အခြေအနေ​တစ်ခု​မှာ မရှိခဲ့ဘူး​ဆိုရင် သား​ဖြစ်သူဟာ ဘယ်​ရောက် နေ​မလဲ​ဆို​တဲ့ ကြင်နာ​မှု​ရှိတဲ့​အကြံပေး​ချက်​ကို ကျွန်မ​နဲ့ ကျွန်မ​ခင်ပွန်း ရရှိခဲ့​ပါ​တယ်။”

သင့်ကို​သင် ခိုင်မြဲ​သော​အခြေအနေ​၌​ရှိနေ​စေဖို့ ဝိညာဉ်​ရေး​လှုပ်ရှားမှုများ​တွင် ပါဝင်​လုပ်ဆောင်ပါ​လေ။ ယင်း​တွင် လေးနက်​သော​ကျမ်းစာ​လေ့လာမှု အစီအစဉ်​တစ်ခု​ထား​ရှိ​ခြင်း​နှင့် ခရစ်ယာန်​အစည်းအဝေး​များ တက်ရောက်ခြင်း​တို့ ပါဝင်​မည်​ဖြစ်သည်။ အခြေအနေ​ခွင့်ပြု​သရွေ့ အသင်းတော်​ရှိ​အခြား​သူတို့ကို ကူညီ​ပေး​နိုင်​ရန် ကိုယ့်​ကိုယ်ကို အသုံးတော်ခံ​ပါ​လေ။ အစပိုင်း​တွင် ထိုသို့​သော​လုပ်ဆောင်မှုများ​သည် ခက်ခဲ​မည်​မှာ​မှန်​၏။ ဗရော့​နီ​ကာ ဤသို့​ပြန်​ပြော​သည်– “ကျွန်မ​စိတ်​ထဲမှာ ဦးဆုံး​ပေါ်​လာတာ​က ဒဏ်ရာ​ရထားတဲ့​တိရစ္ဆာန်​တစ်ကောင်​လို​ပဲ တစ်ယောက်တည်း သီးခြားနေ​ချင်​တယ်။ ဒါပေမဲ့ ကျွန်မ​ခင်ပွန်း​က ကျွန်မ​တို့​ရဲ့​ကောင်း​တဲ့​ဝိညာဉ်​ရေး​လုပ်ရိုးလုပ်စဉ်​ကို ဆက်​လုပ်ဖို့ အလေးအနက်​ပြော​တယ်။ အစည်းအဝေးတွေ​သွား​ဖြစ်အောင် သူ​အသေအချာ​စီစဉ်​တယ်။ စည်းဝေးကြီး​တက်​ဖို့ အချိန်​ရောက်လာတဲ့​အခါ အဲဒီ​စည်းဝေးကြီး​ကို​သွားပြီး လူတွေနဲ့​တွေ့ဆုံ​ဖို့ ခွန်အား​အများကြီး လိုအပ်​ခဲ့​တယ်။ ဒါပေမဲ့​လည်း အစီအစဉ်​က ကျွန်မ​တို့ကို ယေဟောဝါ​ထံ ပို​ပြီး​ချဉ်းကပ်​စေ​ခဲ့​တယ်။ ဆက်​တည်ကြည်​နေတဲ့ ကျွန်မ​တို့​ရဲ့​သားလည်း အဲဒီ​စည်းဝေးကြီး​ကနေ အထူးသဖြင့် တည်ဆောက်မှု​ရရှိခဲ့တယ်။”

အစောပိုင်း​တွင် ဖော်ပြ​ထားသော မာ​ရီး​ယာ​က လယ်ကွင်း​ဓမ္မ​အမှု​တွင် အလုပ်​များနေ​ခြင်း​သည် အထူးသဖြင့် အကူအညီ​ဖြစ်စေ​ခဲ့​ကြောင်း​တွေ့ရှိ​ပြီး လောလောဆယ်တွင် သူသည် သမ္မာကျမ်းစာ​အကြောင်း သင်ယူ​ရန် လူ​လေးယောက်ကို ကူညီ​ပေး​လျက်​ရှိသည်။ ထပ်တူ​ပင် လော်ရာ ဤသို့​ပြော​သည်– “က​နေ့​ထိ ကျွန်မ​နေ့တိုင်း​ငို​နေပေမဲ့၊ ကလေး​တွေ​ကို​ပြုစု​ပျိုးထောင်​ရာ​မှာ အောင်မြင်မှု​ရရှိကြ​တဲ့ တချို့​မိဘတွေရဲ့​အဖြစ်မျိုး ကျွန်မ​မှာ​မရှိပေမဲ့ ဒီ​နောက်ဆုံး​နေ့ရက်​တွေ​မှာ မိသားစု​တွေ​ကို ကူညီ​ပေး​နိုင်​တဲ့ သမ္မာကျမ်းစာ​ရဲ့​ပြည့်ဝ​စုံလင်​တဲ့​သတင်းတရား ကျွန်မ​မှာ​အမှန်​ရှိနေတဲ့​အတွက် ယေဟောဝါ​ကို ကျေးဇူး​တင်​တယ်။” အသင်းတော်ကို​စွန့်ခွာ​သွား​ကြသော အရွယ်ရောက်​သားသမီး​များ​၏ မိဘ​ဖြစ်သူ ကဲ​န်​နှင့် အယ်လင်​နာ​တို့သည် ဘုရား သခင့်​နိုင်ငံတော်​ကြေညာ​သူများ ပို​၍​လိုအပ်​သည့်​နေရာသို့ ပြောင်းရွှေ့​ရန် မိမိတို့၏​အခြေအနေ​များ​ကို စီစဉ်​ခဲ့​ကြ​ပြီး အချိန်ပြည့်​ခရစ်ယာန်​ဓမ္မ​အမှု​တွင် ပါဝင်​ခဲ့​ကြသည်။ ယင်းက ကိစ္စရပ်​များ​ကို အရှိအတိုင်း ရှုမြင်​တတ်​ရန်​နှင့် ဝမ်းနည်းခြင်း​၏​ဝါးမျို​မှု​ကို​မခံရ​ရန် သူတို့ကို အကူအညီ​ဖြစ်စေ​ခဲ့​သည်။

မျှော်လင့်ချက်ကို မစွန့်​လွှတ်​နှင့်။ မေတ္တာသည် “ခပ်သိမ်း​သော​အရာ​ကို မျှော်လင့်​တတ်၏။” (၁ ကောရိန္သု ၁၃:၇) အထက်တွင် ဖော်ပြ​ထားသော ကန်​က ဤသို့​ပြော​သည်– “ကျွန်တော်​တို့​ရဲ့​ကလေး​တွေ သမ္မာတရား​လမ်းစဉ်​ကို စွန့်ခွာ​သွား​ကြ​တဲ့​အခါ ဒါဟာ သူတို့​သေသွား​ပြီ​လို့ ကျွန်တော်​ခံစား​ခဲ့​ရတယ်။ ဒါပေမဲ့ ကျွန်တော့်​ရဲ့​ညီမ​သေ​ပြီး​တဲ့​နောက်​မှာ​တော့ ကျွန်တော့်​အမြင်​ပြောင်း​သွားခဲ့တယ်။ ကျွန်တော့်​ကလေး​တွေ​ဟာ ပကတိ​သေ​သွားတာ​မဟုတ်ဘဲ ယေဟောဝါ​ဆီ သူတို့​ပြန်လာ​ဖို့ ကိုယ်တော်​လမ်းဖွင့်​ထား​ဆဲ​ဖြစ်​တဲ့​အတွက် ကျွန်တော်​ကျေးဇူး​တင်​တယ်။” အမှန်ပင်၊ သမ္မာတရား​ကို ကျောခိုင်း​သွား​သူများစွာ​တို့သည် နောက်ဆုံး​တွင် အမှန်တကယ်​ပြန်လာ​ကြ​ကြောင်း တွေ့ကြုံမှု​များ​က ဖော်ပြ​သည်။—လုကာ ၁၅:၁၁-၂၄။

ကိုယ့်​ကိုယ်ကို​အပြစ်တင်​ခြင်း​ကို တွန်းလှန်​ပါ။ အထူးသဖြင့် အတိတ်ကို ပြန်​လှန်လှော​တတ်သော မိဘများသည် အချို့​သော​အခြေအနေ​များ​ကို တစ်မျိုး​တစ်​မည်​မကိုင်တွယ်​ခဲ့​မိ​၍ နောင်တ​ရခဲ့​ကြသည်။ သို့ရာတွင် ယေဇကျေလ ၁၈:၂၀ ၌ အဓိက​ပေါ်လွင်​သော​အချက်​မှာ ယေဟောဝါ​သည် မိဘကို​မဟုတ်ဘဲ မိမိ၏​မှားယွင်းသော​ရွေးချယ်မှု​အတွက် တာဝန်​ရှိသော​ပြစ်မှား​သူကို ပြောနေခြင်း​ဖြစ်သည်။ မိမိတို့​သားသမီး​များ​ကို နည်းလမ်း​မှန်​ဖြင့် ပြုစု​ပျိုးထောင်​ရန် မိဘတို့​တာဝန်​နှင့်​ပတ်သက်​သည့် အချက်အလက်​များစွာကို နယပုံပြင်​ကျမ်း​တွင် ဖော်ပြ​ထား​သော်လည်း မိဘ​စကား​နားထောင်​ရန်​နှင့် သူတို့ကို​နာခံ​ရန်​ဟူသော လူငယ်များ​ကို​ပေး​သော ဆုံးမ​စကား​သည် မိဘများ​ကို ပေး​သော​အကြံပေး​ချက်​ထက် လေးဆ​ကျော်​ပါဝင်ခြင်း​မှာ စိတ်ဝင်စားစရာ​ပင်။ မှန်ပါသည်၊ မိမိတို့၏​မစုံလင်​သော​မိဘများ​၏ သမ္မာကျမ်းစာ​ပေါ် အခြေခံ​သည့်​လေ့ကျင့်ပေး​မှု​ကို တုံ့ပြန်​ရန် သားသမီး​များ​တွင် တာဝန်​ရှိသည်။ ထို​အချိန်​က သင်တို့​တတ်နိုင်​သမျှ​ကို လုပ်ဆောင်ခဲ့​ကြ​ပေမည်။ သို့​တိုင်၊ အမှား​တစ်ခုခု​လုပ်မိပြီး ယင်း​တို့သည် တကယ်​ပင် သင်တို့၏​အပြစ်​ဖြစ်သည်ဟု ခံစားရ​လျှင်​ပင် သင်၏​အမှား​များ​ကြောင့် သင်​ချစ်ရသူ​တစ်ဦး သမ္မာတရား​မှ ထွက်သွား​သည်​ဟု ယူမှတ်​စ​ရာ​မလိုပါ။ မည်သို့​ပင်​ဖြစ်ပါစေ၊ “တကယ်လို့​သာ” ဟု​ပြန်​ပြောနေခြင်း​ဖြင့် အဘယ်​အကျိုး​မျှ​မရရှိ​နိုင်​ပေ။ သင်တို့​အမှား​များ​မှ သင်ခန်းစာ​ယူပြီး ယင်း​တို့ကို​ထပ်​မ​လုပ်မိ​ရန် စိတ်​ဆုံးဖြတ်​ကာ ခွင့်လွှတ်​မှု​အတွက် ယေဟောဝါ​ထံ​ဆုတောင်း​ပါ။ (ဆာလံ ၁၀၃:၈-၁၄; ဟေရှာယ ၅၅:၇) ယင်း​နောက် အတိတ်ကို​မဟုတ်၊ အနာဂတ်​ကို မျှော်ကြည့်​ပါ။

အခြားသူများ​အပေါ် သည်းခံ​တတ်​ပါ။ အချို့​သူတို့သည် ထိုသို့​သော​အတွေ့အကြုံ​မရှိ​ဖူး​ပါ​က သင်တို့ကို​မည်သို့​အားပေး​ရမည်၊ နှစ်သိမ့်​ရမည်ကို အတိအကျ​သိဖို့ ခက်ခဲ​ပေမည်။ ၎င်း​အပြင်၊ အားပေးခြင်း​နှင့် နှစ်သိမ့်​ပေးခြင်း​အပေါ် လူတို့၏​အမြင်ချင်း​လည်း ခြားနား​ကြသည်။ ယင်းကြောင့် အချို့​သူတို့သည် သင်တို့ကို ဝမ်းနည်း​စေသော​အရာများ​ပြော​မိ​ပါ​က ကောလောသဲ ၃:၁၃ တွင်​တွေ့ရ​သော တမန်​တော်​ပေါလု​၏ အကြံပေး​ချက်​ကို လက်တွေ့​ကျင့်သုံး​ပါ။ ယင်း​ကျမ်းချက်​တွင် ဤသို့​ဆို​ထား​သည်– “တစ်ယောက်​၌​တစ်ယောက် အပြစ်တင်စရာ​အခွင့်​ရှိလျှင် အချင်းချင်း​သည်းခံ၍ အပြစ်ကို​လွှတ်​ကြလော့။”

ဆုံးမ​ပဲ့ပြင်​မှု​အတွက် ယေဟောဝါ​၏​အစီအစဉ်ကို လေးစားပါ။ သင့်​ဆွေမျိုး​သည် အသင်းတော်​ထံ​မှ ဆုံးမ​ပဲ့ပြင်​မှု​ခံ​ခဲ့​ရသည်​ရှိ​သော် ယင်းသည် ယေဟောဝါ​၏​အစီအစဉ် တစ်စိတ်​တစ်ပိုင်း​ဖြစ်​ကြောင်း​နှင့် အမှား​ပြုသူ​အပါအဝင် ကျွန်ုပ်​တို့အားလုံး​ကို ကိုယ်တော်​အလွန်​စိတ်ဝင်စားခြင်း​ဖြစ်​ကြောင်း သတိရပါ။ (ဟေဗြဲ ၁၂:၁၁) ထို့​ကြောင့် ပါဝင်​ပတ်သက်သော​အကြီးအကဲ​များ သို့​မဟုတ် သူတို့​ချ​ခဲ့​သော​ဆုံးဖြတ်ချက်​များနှင့်​ပတ်သက်​၍ အပြစ်ရှာ​ခြင်း​ကို တွန်းလှန်​ပါ။ ယေဟောဝါ​၏​အစီအစဉ်များ​ကို ဆန့်ကျင်ခြင်း​သည် ဝမ်းနည်းခြင်း​ကို​သာ ထပ်​ဖြစ်စေ​နိုင်သော​ကြောင့် အရာရာကို ယေဟောဝါ​၏​နည်းလမ်း​အတိုင်း လုပ်ဆောင်ခြင်း​မှ အကောင်းဆုံး​အကျိုး​ရလဒ်များ ထွက်ပေါ်​လာ​သည်ကို သတိရပါ။

အီဂျစ်​ပြည်​မှ ဣသရေလလူ​တို့​လွတ်မြောက်​လာပြီး​နောက် မောရှေ​သည် တရားသူကြီး​အဖြစ် အမြဲ​အမှုထမ်းဆောင်​ခဲ့​သည်။ (ထွက်မြောက်ရာ ၁၈:၁၃-၁၆) တစ်ယောက်ယောက်​အတွက် ဆုံးဖြတ်​လိုက်​သော တရား​စီရင်မှု​တစ်ခု​သည် တစ်ဖက်​လူကို ထိခိုက်​စေ​လေ့​ရှိသောကြောင့် မောရှေ၏​ဆုံးဖြတ်ချက်​များ​အပေါ် အချို့​လူ​တို့ မကျေနပ်​ကြသည်​ကို စဉ်းစား​ရန် မခက်ခဲ​လှ​ပါ။ မောရှေ၏​တရား​စီရင်မှု​များ မှား​သည်​ဟု​ဆို​ခြင်း​က သူ၏​ဦးဆောင်မှု​ကို ဆန့်ကျင်​ပုန်ကန်​ရန် အချို့​သူတို့ကို ဖြစ်စေ​နိုင်​သည်။ သို့သော် မိမိ​လူမျိုးတော်ကို ဦးဆောင်လမ်းပြ​ရန် မောရှေ​ကို ယေဟောဝါ​အသုံးပြု​သည်၊ မောရှေ​ကို​မဟုတ်ဘဲ၊ ဆန့်ကျင်​ပုန်ကန်​သူတို့နှင့် သူတို့ကို ထောက်ခံ​အားပေးခဲ့​သူတို့ကို ကိုယ်တော်​ဒဏ်ပေး​ခဲ့​သည်။ (တောလည်ရာ ၁၆:၃၁-၃၅) ယနေ့​အချိန်တွင် သီအိုကရက်တစ်​အခွင့်အာဏာ​နှင့်​အညီ လုပ်ဆောင်​သူတို့ ၏​ဆုံးဖြတ်ချက်​များ​ကို ရိုသေ​လေးစား​ပြီး ယင်း​နှင့်​အညီ​ပူးပေါင်း​လုပ်ဆောင်ရန် ကြိုးစား​ခြင်း​အားဖြင့် ကျွန်ုပ်​တို့​သင်ခန်းစာယူ​နိုင်​သည်။

ယင်း​အချက်​နှင့်​ပတ်သက်​၍ ဒီလို​ရက်စ်​သည် သူ့​သမီးကို အသင်းတော်​မှ​ဆုံးမ​ပဲ့ပြင်​သောအခါ မျှတသော​အမြင်​ထိန်းသိမ်း​ရန် သူ့​အတွက်​ခက်ခဲ​ကြောင်း ပြန်​ပြော​သည်– “ကျွန်မ​ကို ကူညီ​ပေး​ခဲ့​တာ​က ယေဟောဝါ​ရဲ့​အစီအစဉ်တွေ​နဲ့​ပတ်သက်ပြီး အကျိုးသင့်အကြောင်းသင့်​ရှိ​ခြင်း​ကို သုံးသပ်​ထား​တဲ့​ဆောင်းပါး​တွေ​ကို အထပ်ထပ်​အခါခါ​ပြန်ဖတ်​ခြင်း​ပဲ ဖြစ်တယ်။ ကျွန်မ​ကို ခံနိုင်ရည်​ရှိစေဖို့​နဲ့ ယေဟောဝါ​အမှုတော်ကို ဆက်​ထမ်းဆောင်​စေနိုင်​ဖို့ အကူအညီ​ပေး​တဲ့ ဟောပြောချက်​တွေ၊ ဆောင်းပါး​တွေ​ကနေ အကြောင်းအရာတွေကို အထူး​မှတ်စု​စာအုပ်​တစ်အုပ်​ထဲမှာ ကျွန်မ​ရေးမှတ်​ထား​တယ်။” ယင်းက နောက်ထပ်​အရေးကြီးသော​ဖြေရှင်းခြင်း​သို့ ကူး​ပြောင်း​စေ​သည်။

သင့်​ခံစားချက်​များ​ကို ရင်ဖွင့်ပါ။ သင်​ယုံကြည်​စိတ်ချ​သော မိတ်ဆွေ​တစ်ဦး သို့​မဟုတ် နှစ်ဦး​ထံ ရင်ဖွင့်​ပြောဆိုခြင်း​သည်လည်း အကူအညီ​ဖြစ်စေ​နိုင်​ကြောင်း တွေ့ရှိ​ပေမည်။ ထိုသို့​ရင်ဖွင့်​ရာ​တွင် အပြုသဘောထား​ဆက်​ရှိ​နိုင်​ရန် သင့်ကို ကူညီ​ပေး​မည့်​မိတ်ဆွေများ​ကို ရွေးချယ်​ပါ။ ဆုတောင်းခြင်း​ဖြင့် ယေဟောဝါ​ထံ “စိတ်နှလုံး​ကို​ဖွင့်ပြ” ခြင်း​သည် အထိရောက်ဆုံး​ဖြစ်​မည်​မှာ သေချာ​သည်။ * (ဆာလံ ၆၂:၇၊ ၈) အဘယ်ကြောင့်​နည်း။ ကိုယ်တော်​သည် သင့်​ခံစားချက်​၏​အတိမ်အနက်​ကို အပြည့်အဝ​နားလည်​ထားသော​ကြောင့် ဖြစ်သည်။ ဥပမာ၊ ထိုသို့​သော​နာကြည်းဖွယ်​စိတ်​ခံစားမှု​ကို တွေ့ကြုံ​ရသည်မှာ မတရား​ဟု ခံစား​မိ​ပေမည်။ မည်သို့​ပင်​ဖြစ်စေ၊ ယေဟောဝါ​ကို သင် ကျောခိုင်း​နေခြင်း​မဟုတ်။ သင့်​ခံစားချက်​များ​ကို ယေဟောဝါ​ထံ ရင်ဖွင့်​ကာ အခြေအနေ​ကို စိတ်​နာကြည်း​စ​ရာ​အဖြစ် မ​ရှုမြင်​ရန် ကူညီ​ပေး​ဖို့ ဆုတောင်း​ပါ။—ဆာလံ ၃၇:၅။

အချိန်​ကုန်လွန်​လာ​သည်​နှင့်​အမျှ၊ သင့်​ခံစားချက်​များ​ကို ပို​၍​ထိန်းချုပ်​တတ်လာ​လိမ့်​မည်။ ထို​အတောအတွင်း ကောင်းကင်​ခမည်းတော်​ထံ​မှ ကောင်းချီး​ရ​ရန် သင့်​ကြိုးစား​အားထုတ်မှုကို လက်လျှော့​အရှုံးမပေး​နှင့်၊ ထို​အားထုတ်မှု​များသည် အချည်းနှီး​ဖြစ်သည်ဟု မည်သည့်​အခါ​မျှ မခံစား​ပါ​နှင့်။ (ဂလာတိ ၆:၉) ယေဟောဝါ​ကို ကျွန်ုပ်​တို့​ကျောခိုင်း​သွား​သည့်​တိုင် ပြဿနာ​များ​ရှိနေဆဲ ဖြစ်သည်​ကို သတိရပါ။ တစ်ဖက်​တွင်​မူ ကိုယ်တော့်​အပေါ် ကျွန်ုပ်​တို့​ဆက်၍​တည်ကြည်​ပါ​က ကျွန်ုပ်​တို့​ရင်ဆိုင်​ရသော စုံစမ်းမှု​များ​ဖြေရှင်းရန်​ကိုယ်တော့်​အကူအညီကို ရရှိနိုင်​သည်။ ထို့​ကြောင့် ယေဟောဝါ​သည် သင့်​အခြေအနေ​မှန်​ကို နားလည်​ပေး​ပြီး အချိန်တန်​လိုအပ်သော​ခွန်အား​ကို သင့်​အား ဆက်၍​ပေး​တော်​မူ​လိမ့်​မည်။—၂ ကောရိန္သု ၄:၇; ဖိလိပ္ပိ ၄:၁၃; ဟေဗြဲ ၄:၁၆။

[အောက်ခြေ​မှတ်ချက်များ]

[စာမျက်နှာ ၁၉ ပါ လေးထောင့်ကွက်]

မည်သို့​ဖြေရှင်း​နိုင်​ပုံ

◆ “ကိုယ်ကို​ဆောက်​တည်လျက် . . . ဘုရားသခင်​၏​ချစ်ခြင်း​မေတ္တာ​၌ ကိုယ်ကို​စောင့်ရှောက်​၍​နေကြ​လော့။” —ယုဒ ၂၀၊ ၂၁။

◆ မျှော်လင့်ချက်ကို မစွန့်​လွှတ်​နှင့်။—၁ ကောရိန္သု ၁၃:၇။

◆ ကိုယ့်​ကိုယ်ကို​အပြစ်တင်​ခြင်း​ကို တွန်းလှန်​ပါ။—ယေဇကျေလ ၁၈:၂၀။

◆ အခြားသူများ​အပေါ် သည်းခံ​တတ်​ပါ။ —ကောလောသဲ ၃:၁၃။

◆ ဆုံးမ​ပဲ့ပြင်​မှု​အတွက် ယေဟောဝါ​၏​အစီအစဉ်ကို လေးစားပါ။—ဟေဗြဲ ၁၂:၁၁။

◆ သင့်​ခံစားချက်​များ​ကို ရင်ဖွင့်ပါ။—ဆာလံ ၆၂:၇၊ ၈။

[စာမျက်နှာ ၂၁ ပါ လေးထောင့်ကွက်/ရုပ်ပုံ]

ယေဟောဝါ​ကို သင် ကျောခိုင်း​ခဲ့ သလော

မည်သည့်​အကြောင်းကြောင့်​ပင်​ဖြစ်ပါစေ ထိုသို့​ကျောခိုင်း​ခဲ့​ပါ​က ယေဟောဝါ​နှင့် သင့်​ဆက်ဆံ​ရေး၊ သင့်​ထာဝရ​မျှော်လင့်ချက်များ​သည် အန္တရာယ်​ရှိ​နေသည်။ ယေဟောဝါ​ထံ ပြန်လာ​ရန် ကြံရွယ်​ပေမည်။ ယင်း​အတိုင်း ယခု ကြိုးစား​အားထုတ်​နေပါသလော။ သို့​မဟုတ် “အချိန်တန်” မှ ဟု​ဆို​ကာ ယင်းကို ရွှေ့ဆိုင်း​လိုက်​သလော။ အာမဂေဒုန်​၏​မိုးသက်မုန်တိုင်း​တိမ်တိုက်ကြီး​သည် အလျင်အမြန်​ချဉ်းကပ်​၍ လာ​နေသည်​ကို သတိရပါ။ ထို့​အပြင် ဤ​အစီအစဉ်​စနစ်​အောက်​ရှိ ဘဝ​အသက်တာသည် တိုတောင်း​ပြီး မသေချာ​မရေရာ​ဖြစ်နေ​သည်။ မနက်ဖြန်​အထိ အသက်ရှင်​မည်၊ မ​ရှင်​မည်​ကို မသိနိုင်။ (ဆာလံ ၁၀၂:၃; ယာကုပ် ၄:၁၃၊ ၁၄) ရောဂါ​ကျွမ်း​နေပြီ​ဟု သိလိုက်ရ​သည့် လူတစ်ယောက်က ဤသို့​ပြော​ခဲ့​သည်– “အချိန်ပြည့်​အဖြစ် ယေဟောဝါ​အမှုတော် ထမ်းဆောင်​နေတဲ့​အချိန်​မှာ ဒီ​ရောဂါ​ကို ကျွန်တော်​ရခဲ့တဲ့​အတွက် ရှက်ကြောက်​ဖုံးကွယ်​စ​ရာ​မလိုဘူး။ တကယ်​နှစ်သိမ့်မှု ခံစားရ​ပါ​တယ်။” အကယ်၍ “ယေဟောဝါ​ဆီ တစ်နေ့​ပြန်လာ​မယ်” ဟု​ပြော​နေစဉ်​တွင် ထို​ရောဂါ​ရခဲ့​ပါ​က သူ​မည်သို့​ခံစားရ​မည်​ကို စဉ်းစား​ကြည့်​ပါ​လေ။ သင်သည် ယေဟောဝါ​ကို ကျောခိုင်း​ခဲ့​သူ​ဖြစ်ပါ​က ကိုယ်တော့်​ထံ​ပြန်လှည့်​လာရန် ယခု​အချိန်​သည် အကောင်းဆုံး​ဖြစ်သည်။

[စာမျက်နှာ ၁၈ ပါ ရုပ်ပုံများ]

ဝိညာဉ်​ရေး​လှုပ်ရှားမှုများ​တွင် ပါဝင်​လုပ်ဆောင်ခြင်းက မှန်ကန်သော​ရှုမြင်ပုံ ဆက်​ထိန်းသိမ်း​နိုင်​ရန် ကူညီ​ပေး​နိုင်