ဆာလံကျမ်းအပိုင်းငါးမှ ပေါ်လွင်ချက်များ
ယေဟောဝါ၏ နှုတ်မြွက်စကားတော်သည် အသက်ရှင်၏
ဆာလံကျမ်းအပိုင်းငါးမှ ပေါ်လွင်ချက်များ
သူဌေးသူကြွယ်များက ဤသို့ပြောပေမည်– “ကျွန်တော်မျိုးတို့၏သားများသည် အသက်ပျိုရွယ်ချိန်၌ သန်မာကြီးထွားလာသော အပင်ငယ်များကဲ့သို့ ဖြစ်ပါစေသော။ ကျွန်တော်မျိုးတို့၏သမီးများသည် နန်းတော်ထောင့်များတွင် အလှစိုက်ထူထားသော ခန့်ညားသည့်ကျောက်တိုင်များကဲ့သို့ ဖြစ်ပါစေသော။ ကျွန်တော်မျိုးတို့၏ ကျီများသည် . . . ပြည့်လျက်ရှိပါစေသော။ ကွင်းပြင်များရှိသိုးများသည် ထောင်ပေါင်းများစွာသောသိုးငယ်တို့ကို မွေးဖွားကြပါစေသော။” ထို့ပြင် ‘ဤသို့သောအခြေအနေ၌ရှိသူသည် မင်္ဂလာရှိပါ၏’ ဟုလည်းဆိုကြပေမည်။ သို့သော် ယင်းနှင့်ဆန့်ကျင်ကာ ဆာလံဆရာက ‘ထာဝရဘုရားကို ဘုရားသခင်အဖြစ်ကိုးကွယ်သောလူမျိုးသည် မင်္ဂလာရှိပါ၏’ ဟုဆိုထားသည်။ (ဆာလံ ၁၄၄:၁၂-၁၅၊ ခမ) ယင်းအချက်မှလွဲ၍ တခြားမရှိနိုင်ပါ။ ယေဟောဝါသည် ပျော်ရွှင်သောဘုရားသခင်ဖြစ်တော်မူပြီး ပျော်ရွှင်မှုသည် ကိုယ်တော်ကို ဝတ်ပြုကိုးကွယ်သူတို့၏ပိုင်ဆိုင်ရာဖြစ်သည်။ (၁ တိမောသေ ၁:၁၁၊ ကဘ) ဤအမှန်တရားကို ဘုရားသခင့်ဝိညာဉ်တော်ဖြင့် မှုတ်သွင်းခံရသည့်သီချင်းများတွင် နောက်ဆုံးအပိုင်းဖြစ်သော ဆာလံ ၁၀၇ မှ ၁၅၀ တွင် အထင်အရှားတွေ့ရသည်။
ဆာလံကျမ်းအပိုင်းငါးတွင်လည်း ယေဟောဝါ၏ချစ်ခင်ကြင်နာမှု၊ စစ်မှန်မှုနှင့် ကောင်းမြတ်မှုတို့အပါအဝင် ကိုယ်တော်၏သာလွန်ထူးကဲသော အရည်အသွေးများ ပေါ်လွင်သည်။ ဘုရားသခင်၏ကိုယ်ရည်ကိုယ်သွေးများကို ပို၍ထိုးထွင်းသိမြင်လာလေလေ ကိုယ်တော်ကို ပို၍ချစ်မြတ်နိုး၊ ပို၍ကြောက်ရွံ့လာလေလေဖြစ်သည်။ ယင်းက ကျွန်ုပ်တို့ကို ပျော်ရွှင်စေသည်။ ဤသည်မှာ ဆာလံကျမ်းအပိုင်းငါးတွင်တွေ့ရသည့် အလွန်အဖိုးတန်သော အကြောင်းအရာများဖြစ်သည်!—ဟေဗြဲ ၄:၁၂။
ယေဟောဝါ၏ချစ်ခင်ကြင်နာမှုကြောင့် ပျော်ရွှင်
ဗာဗုလုန်သုံ့ပန်းဘဝမှ ပြန်လာကြသော နယ်နှင်ခံဂျူးများက ‘လူသားတို့၌ပြုတော်မူသော ချစ်ခင်ကြင်နာမှုနှင့် အံ့ဖွယ်သောအမှုတော်တို့ကိုထောက်၍ ထာဝရဘုရားသခင်၏ဂုဏ်ကျေးဇူးတော်ကို ချီးမွမ်းကြစေ’ ဟုသီဆိုခဲ့ကြသည်။ (ဆာလံ ၁၀၇:၈၊ ၁၅၊ ၂၁၊ ၃၁) ယေဟောဝါအားချီးမွမ်းရာတွင် ဒါဝိဒ်က ‘ကိုယ်တော်၏စစ်မှန်မှုသည် မိုးတိမ်သို့မီပါ၏’ ဟုသီဆိုခဲ့သည်။ (ဆာလံ ၁၀၈:၄) တစ်ဆက်တည်းပါရှိသော သီချင်းစာပိုဒ်တွင် သူဤသို့ဆုတောင်းဖော်ပြ၏– ‘အကျွန်ုပ်၏ဘုရားသခင်ထာဝရဘုရား အကျွန်ုပ်ကိုမစတော်မူပါ။ ချစ်ခင်ကြင်နာမှုရှိသည်အတိုင်း ကယ်တင်တော်မူပါ။’ (ဆာလံ ၁၀၉:၁၈၊ ၁၉၊ ၂၆) ဆာလံ ၁၁၀ သည် မေရှိယအုပ်ချုပ်မှုနှင့်ဆိုင်သော ပရောဖက်ပြုချက်ဖြစ်သည်။ ‘ထာဝရဘုရားသခင်ကို ကြောက်ရွံ့သောသဘောသည် ပညာ၏အချုပ်အခြာဖြစ်၏’ ဟု ဆာလံ ၁၁၁:၁၀ တွင်ဖော်ပြထားသည်။ ဆာလံ ၁၁၂ အရ ‘ထာဝရဘုရားသခင်ကိုကြောက်ရွံ့ . . . သောသူသည် မင်္ဂလာရှိ၏။’—ဆာလံ ၁၁၂:၁။
ဆာလံ ၁၁၃ မှ ၁၁၈ ကို ဟာလဲဆာလံသီချင်းဟု ခေါ်ကြသည်။ အကြောင်းမှာ “ဟာလေလုယ” သို့မဟုတ် “ဂျားကိုချီးမွမ်းလော့” စကားလုံးကို အကြိမ်ကြိမ်အသုံးပြုထားသောကြောင့်ဖြစ်၏။ အစောပိုင်းနှုတ်တိုက်ထုံးတမ်းစဉ်လာများကို တတိယရာစုတွင် မှတ်တမ်းတင်ရေးသားခဲ့သည့် မစ်ရှ်နာကျမ်းအရ ယင်းဟာလဲသီချင်းကို ပသခါပွဲနှင့် ဂျူးတို့နှစ်စဉ်ကျင်းပသော ပွဲတော်သုံးခုတွင် သီဆိုခဲ့ကြသည်။ ဆာလံကျမ်းထဲတွင် အရှည်ဆုံးကျမ်းဖြစ်သော ဆာလံ ၁၁၉ ၌ ယေဟောဝါထုတ်ဆင့်တော်မူသော မိန့်မြွက်ချက် သို့မဟုတ် သတင်းစကားကို ချီးမွမ်းသီကျူးထားသည်။
ကျမ်းစာမေးခွန်းများအဖြေ–
၁၀၉:၂၃၊ [ကဘ]—“ကျွန်ုပ်သည် နေကျချိန်အရိပ်ကဲ့သို့ အဝေးသို့သွားရတော့မည်” ဟုဒါဝိဒ်ဆိုရာတွင် အဘယ်အရာကို ဆိုလိုသနည်း။ ဒါဝိဒ်က သူသေဆုံးမည့်အချိန် အလွန်နီးပြီဖြစ်ကြောင်း သူ၏ခံစားချက်ကို ကဗျာဆန်ဆန် ဖွဲ့နွဲ့ခဲ့ခြင်းဖြစ်သည်။—ဆာလံ ၁၀၂:၁၁။
၁၁၀:၁၊ ၂—“[ဒါဝိဒ်၏] သခင်” ယေရှုခရစ်သည် ဘုရားသခင်၏ လယ်ယာဘက်၌ထိုင်နေစဉ် အဘယ်အရာ လုပ်ဆောင်ခဲ့သနည်း။ ယေရှုရှင်ပြန်ထမြောက်ကာ ကောင်းကင်သို့တက်ကြွသွားပြီး ဘုရင်အဖြစ်စတင်အုပ်ချုပ်သည့် ၁၉၁၄ ခုနှစ်ရောက်သည်အထိ ဘုရားသခင်၏လက်ယာဘက်တွင် စောင့်ဆိုင်းနေခဲ့ရသည်။ ထိုအချိန်အတွင်း ယေရှုသည် ဝိညာဉ်တော်ဖွားများ၏ဟောပြောခြင်းနှင့် တပည့်ဖြစ်စေခြင်းလုပ်ငန်းကို ညွှန်ကြားပေးခြင်းအပြင် နိုင်ငံတော်တွင် မိမိနှင့်အတူအုပ်ချုပ်ရန် သူတို့ကိုပြင်ဆင်ခြင်းဖြင့် သူတို့ကိုအုပ်ချုပ်ခဲ့သည်။—မဿဲ ၂၄:၁၄; ၂၈:၁၈-၂၀; လုကာ ၂၂:၂၈-၃၀။
၁၁၀:၄—ယေဟောဝါသည် “နောက်တစ်ဖန် စိတ်ပြောင်းလဲခြင်းရှိတော်မမူ” ဘဲ အဘယ်အတွက် “ကျိန်ဆို” တော်မူသနည်း။ ဤကျိန်ဆိုချက်မှာ ဘုရင်နှင့်ယဇ်ပုရောဟိတ်မင်းကြီးအဖြစ် ထမ်းဆောင်မည့် ယေရှုခရစ်နှင့် ယေဟောဝါဖွဲ့သော ပဋိညာဉ်ဖြစ်သည်။—လုကာ ၂၂:၂၉၊ ၃၀။
၁၁၃:၃—ယေဟောဝါ၏နာမတော်ကို “နေထွက်ရာမှသည် နေဝင်ရာတိုင်အောင်” အဘယ်နည်းဖြင့် ချီးမွမ်းကြသနည်း။ ဤတွင် ဘုရားသခင်အား နေ့စဉ်ဝတ်ပြုကိုးကွယ်နေသည့် လူအုပ်စုတစ်ခုထက်မက ပို၍ပါဝင်ပတ်သက်သည်။ နေထွက်ရာအရှေ့အရပ်မှ နေဝင်ရာအနောက်အရပ်ထိတိုင် နေ၏အလင်းရောင်သည် ကမ္ဘာတစ်ခုလုံးကို ထွန်းလင်းစေသည်။ အလားတူပင် ယေဟောဝါကို ကမ္ဘာတစ်ဝန်းလုံးတွင် ချီးမွမ်းရန်ဖြစ်သည်။ စနစ်တကျ ဖွဲ့စည်းထားခြင်းမရှိပါက ထိုသို့ဖြစ်မြောက်နိုင်မည်မဟုတ်ပါ။ ယေဟောဝါသက်သေများအနေနှင့် ကျွန်ုပ်တို့သည် ဘုရားသခင်ကို ချီးမွမ်းရန်နှင့် ဘုရားသခင့်နိုင်ငံတော်သတင်းကို ထက်သန်စွာကြေညာရန်ဖြစ်သော နှစ်သက်မြတ်နိုးဖွယ်အခွင့်အရေး ရရှိထားကြသည်။
၁၁၆:၁၅—‘ထာဝရဘုရားသခင်ရှေ့တော်၌ မိမိသန့်ရှင်းသူတို့၏သေခြင်းအရာသည်’ မည်မျှ “အဖိုးကြီး” သနည်း။ ယေဟောဝါအား ဝတ်ပြုကိုးကွယ်သူများသည် ကိုယ်တော့်အဖို့ အလွန်တန်ဖိုးကြီးလှသောကြောင့် သူတို့တစ်ဖွဲ့လုံးသေခြင်းကို ဘုရားသခင်ခွင့်ပြုမည်မဟုတ်။ ယေဟောဝါခွင့်ပြုမည်ဆိုပါက ကိုယ်တော်၏ရန်သူများသည် ကိုယ်တော်ထက် ပို၍တန်ခိုးကြီးသယောင် ဖြစ်သွားစေမည်။ ထို့ပြင် ကမ္ဘာသစ်အုတ်မြစ်အဖြစ် မြေကြီးပေါ် မည်သူတစ်ဦးတစ်ယောက်မျှ ရှိတော့မည်မဟုတ်ချေ။
၁၁၉:၇၁—ဆင်းရဲခံရသောကျေးဇူးသည် မည်သို့အားဖြင့် အကျိုးကြီးနိုင်ပါသနည်း။ ဆင်းရဲခက်ခဲမှုက ယေဟောဝါအပေါ် ပို၍အပြည့်အဝကိုးစားရန်၊ ကိုယ်တော့်ထံ စိတ်အားထက်သန်စွာ ဆုတောင်းရန်၊ သမ္မာကျမ်းစာကို ပို၍လုံ့လဝီရိယရှိရှိလေ့လာပြီး လက်တွေ့ကျင့်သုံးရန် သင်ယူစေနိုင်သည်။ ထို့ပြင် ဆင်းရဲခံရသောအခါ ကျွန်ုပ်တို့၏တုံ့ပြန်ပုံမှ ပြုပြင်ရန်လိုသည့် ချွတ်ယွင်းချက်များကို တွေ့မြင်စေနိုင်သည်။ ဆင်းရဲခက်ခဲမှုကို ကျွန်ုပ်တို့အား ပြုပြင်ပေးသည့်အရာအဖြစ် သဘောထားမည်ဆိုပါက ယင်းသည် အကျိုးယုတ်စေသည့်အရာ ဖြစ်မည်မဟုတ်ပါ။
၁၁၉:၉၆—“ခပ်သိမ်းသောစုံလင်ခြင်း၏အဆုံး” ဟူသည် အဘယ်အရာကို ဆိုလိုသနည်း။ ဆာလံဆရာက စုံလင်ခြင်းအကြောင်းကို လူ့ရှုထောင့်မှ ပြောနေခြင်းဖြစ်သည်။ စုံလင်ခြင်းနှင့်ပတ်သက်သော လူ့ရှုမြင်ချက်သည် အကန့်အသတ်သာဖြစ်ကြောင်း သူစိတ်စွဲခဲ့ပုံရသည်။ ယင်းနှင့်ဆန့်ကျင်ကာ ဘုရားသခင့်ပညတ်မှာမူ ထိုသို့အကန့်အသတ်မရှိပါ။ ကိုယ်တော့်လမ်းညွှန်ချက်များသည် ဘဝအသက်တာကဏ္ဍအားလုံးနှင့် သက်ဆိုင်သည်။ သို့ဖြစ်၍ “ခပ်သိမ်းသောစုံလင်ခြင်းတွင်အကန့်အသတ်ရှိမှုကို အကျွန်ုပ်မြင်ပါ၏။ ကိုယ်တော်၏ပညတ်တော်များမူကား အကန့်အသတ်မဲ့ပါ၏” ဟုအပြည်ပြည်ဆိုင်ရာကျမ်းသစ် [လိပ်] တွင် ဖတ်ရသည်။
၁၁၉:၁၆၄—ဘုရားသခင်အား “တစ်ရက်လျှင် ခုနစ်ကြိမ်” ချီးမွမ်းခြင်းသည် အဘယ်အဓိပ္ပာယ်ရှိသနည်း။ ခုနစ်ဂဏန်းကို များသောအားဖြင့် ပြည့်စုံခြင်းအနေနှင့် ဖော်ပြကြသည်။ သို့ဖြစ်၍ ဆာလံဆရာက ယေဟောဝါသည် ချီးမွမ်းမှုအားလုံး ခံထိုက်သောအရှင်ဖြစ်ကြောင်း ဖော်ပြခြင်းဖြစ်သည်။
ကျွန်ုပ်တို့အတွက် သင်ခန်းစာ–
၁၀၇:၂၇-၃၁။ အာမဂေဒုန်ကျရောက်လာသောအခါ လောကဉာဏ်ပညာသည် “တိမ်မြုပ်” သွားမည်။ (ဗျာ. ၁၆:၁၄၊ ၁၆) ယင်းပညာသည် မည်သူ့ကိုမျှ ဖျက်ဆီးခြင်းဘေးမှ မကယ်လွတ်နိုင်ပါ။ ကယ်တင်ခြင်းရရန် ယေဟောဝါအား မျှော်ကိုးသူတို့သာလျှင် ‘လူသားတို့၌ပြုတော်မူသော ချစ်ခင်ကြင်နာမှုကိုထောက်၍ ထာဝရဘုရားသခင်၏ ဂုဏ်ကျေးဇူးတော်ကို ချီးမွမ်းကြ’ ရန်အသက်ရှင်လိမ့်မည်။
၁၀၉:၃၀၊ ၃၁; ၁၁၀:၅။ စစ်သားတစ်ဦးသည် ဒိုင်းလွှားကို ဘယ်လက်ဖြင့်ကိုင်သောကြောင့် ဓားကိုအသုံးပြုသော ညာလက်သည် ဒိုင်းလွှား၏အကာအကွယ်မှ လွတ်နေတတ်သည်။ ယေဟောဝါသည် ကိုယ်တော့်ကျေးကျွန်များအတွက် တိုက်ခိုက်ပေးရန် ပုံဆောင်သဘောဖြင့် “လက်ယာဘက်မှာ” ရှိတော်မူ၏။ သို့ဖြစ်၍ အကာအကွယ်နှင့် အကူအညီပေးမှုအတွက် ‘ထာဝရဘုရားသခင်၏ဂုဏ်ကျေးဇူးတော်ကို အလွန်ချီးမွမ်း’ ရန် အလွန်ကောင်းသောအကြောင်းရင်းပင်!
၁၁၃:၄-၉။ ယေဟောဝါသည် အလွန်မြင့်မြတ်တော်မူသောကြောင့် ‘ကောင်းကင်အရာတို့ကို ကြည့်ရှုတော်မူ’ ရန်အတွက်ပင် ကိုယ်ကိုနှိမ့်ချရတော်မူ၏။ သို့တိုင် ကိုယ်တော်သည် နိမ့်ကျသောသူ၊ ဆင်းရဲသောသူနှင့် မြုံသောမိန်းမတို့ကို သနားကြင်နာတော်မူ၏။ ပိုင်သအုပ်စိုးရှင်ယေဟောဝါသည် နှိမ့်ချသောစိတ်ရှိတော်မူပြီး ကိုယ်တော့်အားဝတ်ပြုကိုးကွယ်သူများကိုလည်း ထိုစိတ်သဘောထား ရှိစေလိုတော်မူ၏။—ယာကုပ် ၄:၆။
၁၁၄:၃-၇။ ယေဟောဝါသည် မိမိ၏လူမျိုးအတွက် ပင်လယ်နီတွင်၊ ယော်ဒန်မြစ်တွင်နှင့် သိနာတောင်တွင် ပြုလုပ်တော်မူခဲ့သော အံဖွယ်အမှုများကို သိရှိလာရခြင်းမှ ကျွန်ုပ်တို့အပေါ် နက်နက်ရှိုင်းရှိုင်း အကျိုးသက်ရောက်သင့်သည်။ “မြေကြီး” နှင့်ခိုင်းနှိုင်းခံရသော လူသားတို့သည် အရှင်၏မျက်နှာတော်ရှေ့တွင် ခန့်ညားကြောက်ရွံ့၊ ပုံဆောင်စကားအနေနှင့် “တုန်လှုပ်လျက်နေ” သင့်သည်။
၁၁၉:၉၇-၁၀၁၊ [ကဘ]။ ဘုရားသခင့်နှုတ်မြွက်တော်မှ ဉာဏ်ပညာကိုရရှိပြီး ထိုးထွင်းသိမြင်၊ နားလည်သဘောပေါက်ခြင်းဖြင့် ဝိညာဉ်ရေးအန္တရာယ်များမှ အကာအကွယ်ရစေသည်။
၁၁၉:၁၀၅။ ဘုရားသခင့်နှုတ်မြွက်တော်သည် ကျွန်ုပ်တို့ခြေရှေ့တွင် မီးခွက်ဖြစ်သောကြောင့် လောလောဆယ်ပြဿနာများကို ကိုင်တွယ်ဖြေရှင်းရန် အထောက်အကူပြုနိုင်သည်။ ထို့ပြင် အနာဂတ် နှင့်ပတ်သက်သော ဘုရားသခင့်ရည်ရွယ်ချက်ကို ကြိုဖော်ပြထားသောကြောင့် ကျွန်ုပ်တို့လမ်းခရီးအတွက် ပုံဆောင်အလင်းလည်းဖြစ်သည်။
အခက်အခဲများကြား ပျော်ရွှင်
ဆင်းရဲခက်ခဲသောအခြေအနေများကို ကျွန်ုပ်တို့ မည်သို့ရင်ဆိုင်နိုင်ပြီး ယင်းတို့ကို မည်သို့ကျော်လွှားနိုင်သနည်း။ ဤမေးခွန်းအတွက် ဆာလံ ၁၂၀ မှ ၁၃၄ တွင် ရှင်းလင်းသည့်အဖြေ ပါရှိသည်။ အကူအညီအတွက် ယေဟောဝါကိုမျှော်ကိုးခြင်းဖြင့် ကျွန်ုပ်တို့သည် အခက်အခဲကို ကျော်လွှားကြပြီး ကျွန်ုပ်တို့၏ရွှင်လန်းမှုကို ထိန်းသိမ်းထားကြသည်။ ဤဆာလံကျမ်းအပိုင်းကို အတက်သီချင်းဟုခေါ်သည်။ ယင်းကို နှစ်ပတ်လည်ပွဲတော်အတွက် ယေရုရှလင်မြို့သို့တက်သွားကြသော ဣသရေလလူမျိုးတို့ သီဆိုခဲ့ကြဟန်တူသည်။
ဆာလံ ၁၃၅ နှင့် ၁၃၆ တွင် ယေဟောဝါအား ကိုယ်တော်နှစ်သက်ရာ အဘယ်အရာကိုမဆို လုပ်ဆောင်သော အရှင်အဖြစ် သရုပ်ဖော်ထားသည်။ ယင်းက စွမ်းဆောင်နိုင်စွမ်းမရှိသော ရုပ်ပုံများနှင့် အလွန်ကွာခြားသည်။ ဆာလံ ၁၃၆ ကို ထပ်ကျော့သီဆိုသည့်သီချင်းအဖြစ် စပ်ဆိုထားသည်။ အခန်းငယ်၏ အပိုင်းတစ်ပိုင်းကို နောက်အခန်းငယ်တွင် ထပ်ကျော့သီဆိုခြင်းဖြစ်သည်။ ဆာလံ ၁၃၇ သည် ဇိအုန်မြို့တွင် ယေဟောဝါအားဝတ်ပြုလိုကြသော ဗာဗုလုန်ရောက် ဂျူးတို့၏ ဝမ်းနည်းမှုအခြေအနေကို ဖော်ပြသည်။ ဆာလံ ၁၃၈ မှ ၁၄၅ ကိုဒါဝိဒ်စပ်ဆိုခဲ့ခြင်းဖြစ်သည်။ သူသည် ‘ယေဟောဝါကို စိတ်နှလုံးအကြွင်းမဲ့ ချီးမွမ်း’ လိုခဲ့သည်။ အဘယ်ကြောင့်နည်း။ “အကျွန်ုပ်သည် ကြောက်မက်ဖွယ်သောလက္ခဏာ၊ ထူးဆန်းသောလက္ခဏာတို့နှင့်ပြည့်စုံ” သောကြောင့်ဖြစ်သည်။ (ဆာလံ ၁၃၈:၁; ၁၃၉:၁၄) ဆာလံ ၁၄၀ မှ ၁၄၄ သည် လူဆိုးများလက်မှ ကာကွယ်ပေးရန်၊ ဖြောင့်မတ်စွာဆုံးမပဲ့ပြင်ရန်၊ နှိပ်စက်ညှဉ်းပန်းသူများလက်မှ ကယ်နုတ်ရန်နှင့် အမူအကျင့်တို့တွင် လမ်းညွှန်ပေးရန် ဒါဝိဒ်၏ဆုတောင်းချက်များဖြစ်သည်။ ယေဟောဝါလူမျိုးတော်၏ ပျော်ရွှင်မှုကို ပေါ်လွင်အောင်ဖော်ပြထားသည်။ (ဆာလံ ၁၄၄:၁၅) ဘုရားသခင်၏ ကြီးမြတ်မှု၊ ကောင်းမြတ်မှုကို ပြန်သုံးသပ်ပြီးနောက် ဒါဝိဒ်ဤသို့ကြွေးကြော်၏– ‘ထာဝရဘုရားသခင်ကိုချီးမွမ်းလျက် ငါမြွက်ဆိုမည်။ ခပ်သိမ်းသောလူတို့သည် သန့်ရှင်းသောနာမတော်ကို ကမ္ဘာအဆက်ဆက်ကောင်းချီးပေးကြစေ။’—ဆာလံ ၁၄၅:၂၁။
ကျမ်းစာမေးခွန်းများအဖြေ–
၁၂၂:၃—ယေရုရှလင်မြို့သည် မည်သို့ “စေ့စပ်သောမြို့ကဲ့သို့တည်” ရှိခဲ့သနည်း။ ရှေးခေတ်မြို့များကဲ့သို့ပင် ယေရုရှလင်မြို့ရှိအိမ်များကို ဆက်စပ်ကာတည်ဆောက်ခဲ့ကြသည်။ စေ့စပ်ဖွဲ့စည်းထားသောမြို့ဖြစ်သောကြောင့် ခုခံကာကွယ်ဖို့ လွယ်ကူသည်။ ထို့ပြင် အိမ်များဆက်စပ်တည်ရှိနေခြင်းကြောင့် မြို့နေလူထုသည် အကူအညီနှင့် ကာကွယ်မှုအတွက် တစ်ဦးကိုတစ်ဦး မှီခိုနိုင်ကြသည်။ ယင်းက ဣသရေလ ၁၂ နွယ်တို့ ဝတ်ပြုရန်အတွက် အတူတကွသွားကြချိန်တွင် သူတို့၏ဝိညာဉ်ရေးစည်းလုံးမှုကို ပုံတင်ပြသည်။
၁၂၃:၂—ကျွန်တို့ မျှော်ကြည့်သည်ဟူသည့် ပုံဥပမာက အဘယ်အရာကို ဖော်ပြသနည်း။ ကျွန်နှင့် ကျွန်မတို့သည် သခင် သို့မဟုတ် သခင်မ၏လက်ကို မျှော်ကြည့်ရသည့် အကြောင်းရင်းနှစ်ခုရှိရသည်– သူတို့အဘယ်ဆန္ဒရှိကြောင်းသိရန်နှင့် ကာကွယ်မှု၊ ဘဝလိုအပ်ရာများရရှိရန်တို့ကြောင့်ဖြစ်သည်။ အလားတူပင် ကျွန်ုပ်တို့သည် ယေဟောဝါ၏အလိုတော်ကို သိရှိရန်နှင့် ကိုယ်တော်၏မျက်နှာသာရရှိရန် ကိုယ်တော်ကိုမျှော်ကိုးကြသည်။
၁၃၁:၁-၃—ဒါဝိဒ်သည် မည်သို့အားဖြင့် “အမိနို့နှင့်ကွာသောသူငယ်ကဲ့သို့ ကိုယ်စိတ်ကိုဖြေ၍ ငြိမ်းစေ” ခဲ့သနည်း။ နို့ကွာသောသူငယ်သည် မိခင်၏ရင်ခွင်တွင် နှစ်သိမ့်မှုနှင့် စိတ်ကျေနပ်မှုတွေ့ရန် သင်ယူသကဲ့သို့ ဒါဝိဒ်သည် “အမိနို့နှင့်ကွာသောသူငယ်ကဲ့သို့” စိတ်ကိုဖြေ၍ငြိမ်သက်မှုရစေရန် သင်ယူသိရှိခဲ့သည်။ မည်သို့အားဖြင့်နည်း။ စိတ်နေမမြင့်ခြင်း၊ မျက်နှာမမော်ခြင်း၊ ကိုယ်နှင့်မတန်သောအမှု၌ မကျင်လည်ခြင်းအားဖြင့်ဖြစ်သည်။ ထင်ပေါ်ကျော်ကြားရန် ကြိုးစားမည့်အစား ဒါဝိဒ်သည် မိမိ၏အကန့်အသတ်ဖြစ်မှုကို အမြဲအသိအမှတ်ပြုခဲ့ပြီး နှိမ့်ချမှုကို တင်ပြခဲ့သည်။ ကျွန်ုပ်တို့သည် အထူးသဖြင့် အသင်းတော်အခွင့်အရေးများကို လက်လှမ်းယူနေချိန်တွင် သူ၏သဘောထားကို အတုယူခြင်းသည် ပညာရှိရာရောက်သည်။
ကျွန်ုပ်တို့အတွက် သင်ခန်းစာ–
၁၂၀:၁၊ ၂၊ ၆၊ ၇။ အသရေရှုတ်ချသော၊ ထိခိုက်နာကြည်းစေသောစကားသည် အခြားသူများကို မခံမရပ်ဖြစ်စေနိုင်သည်။ ကျွန်ုပ်တို့၏လျှာကို ချုပ်တည်းခြင်းက “ငြိမ်သက်ခြင်းဘက်မှာနေ” ကြောင်း တင်ပြနိုင်သည့်နည်းဖြစ်သည်။
၁၂၀:၃၊ ၄။ ကျွန်ုပ်တို့သည် တစ်စုံတစ်ဦး၏ “လှည့်စားတတ်သောလျှာ” ကိုသည်းခံနေရသည်ဆိုပါက ယေဟောဝါသည် အချိန်တန် လျှင် ကိစ္စရပ်များကို ဖြေရှင်းပေးမည်ဖြစ်ကြောင်း သိရခြင်းမှ နှစ်သိမ့်မှုရရှိနိုင်ပါသည်။ အသရေရှုတ်ချသူများသည် “အားကြီးသောသူ” ၏လက်တော်ဖြင့် ဒဏ်ခတ်ခံရမည်။ ထိုသူတို့သည် “ရသမ်သစ်သားမီးခဲ” ဖြင့်တင်စားထားသော ယေဟောဝါ၏ မီးလျှံနှင့်တရားစီရင်ခြင်းကို ဧကန်မုချခံရကြမည်။
၁၂၇:၁၊ ၂။ ကျွန်ုပ်တို့၏ ကြိုးစားအားထုတ်မှုမှန်သမျှတွင် ယေဟောဝါ၏ လမ်းညွှန်မှုကို မျှော်ကိုးသင့်သည်။
၁၃၃:၁-၃။ ယေဟောဝါလူမျိုး၏ စည်းလုံးမှုသည် ငြိမ်သက်အေးချမ်း၊ အကျိုးဖြစ်ထွန်း၊ လန်းဆန်းမှုဖြစ်စေသည်။ ယင်းကို ကျွန်ုပ်တို့၏ အပြစ်ရှာခြင်း၊ ရန်တွေ့ခြင်း၊ ညည်းညူခြင်းတို့ဖြင့် မဖျက်ဆီးသင့်ပါ။
၁၃၇:၁၊ ၅၊ ၆။ ယေဟောဝါအားဝတ်ပြုကိုးကွယ်ကြသော နယ်နှင်ခံရသူတို့သည် ထိုအချိန်က မြေကြီးပေါ်ရှိ ဘုရားသခင့်အဖွဲ့အစည်းတည်ရှိရာ ဇိအုန်မြို့ကို စွဲလမ်းတမ်းတခဲ့ကြသည်။ ကျွန်ုပ်တို့ကော မည်သို့နည်း။ ယနေ့ ယေဟောဝါအသုံးပြုနေသော အဖွဲ့အစည်းကို တည်ကြည်မှုရှိရှိ တွယ်ကပ်နေပါသလော။
၁၃၈:၂ [သမ္မာ]။ ယေဟောဝါ၏နာမတော်ဖြင့် ကတိပြုရာအားလုံး ပြည့်စုံခြင်းသည် ကျွန်ုပ်တို့မျှော်လင့်သည့် အဘယ်အရာထက်မဆို သာလွန်မြင့်မြတ်သောကြောင့် ကိုယ်တော်သည် ‘နာမတော်ကို အရာခပ်သိမ်းထက် ချီးမြှောက်တော်မူ’ သည်။ ကျွန်ုပ်တို့ရှေ့တွင် အလွန်ထူးမြတ်သော အလားအလာရှိသည်။
၁၃၉:၁-၆၊ ၁၅၊ ၁၆။ ယေဟောဝါသည် ကျွန်ုပ်တို့၏လုပ်ဆောင်မှုများ၊ စဉ်းစားရာများ၊ ကျွန်ုပ်တို့ပြောမည့်စကားများကိုပင် သိတော်မူသည်။ ကိုယ်အင်္ဂါအစိတ်အပိုင်းများ သီးခြားမဖြစ်ပေါ်မီ ပဋိသန္ဓေတည်စအချိန်ကတည်းက ကျွန်ုပ်တို့ကို ကိုယ်တော်သိတော်မူ၏။ ကျွန်ုပ်တို့ တစ်ဦးချင်းစီကိုသိရှိတော်မူသော ကိုယ်တော်၏ဉာဏ်တော်သည် ကျွန်ုပ်တို့နားမလည်နိုင်လောက်အောင် “အံ့သြဖွယ်” ဖြစ်သည်။ ယေဟောဝါသည် ကျွန်ုပ်တို့ရင်ဆိုင်ကောင်းရင်ဆိုင်နိုင်ဖွယ်ရှိသည့် ဆင်းရဲခက်ခဲသောအခြေအနေကို သိသည်သာမက ယင်းသည် ကျွန်ုပ်တို့ကို မည်သို့ထိခိုက်ကြောင်းကိုပါ သိတော်မူကြောင်းသိရခြင်းက အလွန်နှစ်သိမ့်ဖွယ်ပင်!
၁၃၉:၇-၁၂။ ကျွန်ုပ်တို့သည် အဘယ်အရပ်သို့ပင်သွားပါစေ ဘုရားသခင် ခွန်အားမပေးနိုင်လောက်အောင် ဝေးလွန်းလှသည့်နေရာမရှိပါ။
၁၃၉:၁၇၊ ၁၈။ ယေဟောဝါနှင့်ပတ်သက်သော အသိပညာရှိခြင်းက ကျွန်ုပ်တို့ကို ပျော်မွေ့စေပါသလော။ (သု. ၂:၁၀) သို့ဖြစ်လျှင် ကျွန်ုပ်တို့သည် မကုန်မဆုံးနိုင်သော ပျော်ရွှင်မှု၏ရင်းမြစ်ကို ရှာတွေ့ပြီဖြစ်သည်။ ယေဟောဝါ၏ အကြံအစည်တော်တို့သည် “သဲလုံးနှင့်အမျှမက သာ၍များကြပါ၏။” ကိုယ်တော်အကြောင်းသင်ယူစရာ အစဉ်အမြဲရှိမည်ဖြစ်သည်။
၁၃၉:၂၃၊ ၂၄။ ကျွန်ုပ်တို့၏ အတွင်းလူကို ယေဟောဝါစစ်ဆေးတော်မူရန် အလိုရှိသင့်သည်။ မတော်လျော်သောအတွေးများ၊ ဆန္ဒများ၊ သဘောထားများဖြစ်သည့် “ဆိုးသောလမ်း” ၌ရှိမရှိသိရန်နှင့် ယင်းတို့ကို အမြစ်ပါမကျန် နုတ်ပစ်ရာတွင် အကူအညီရရန်အတွက် ဖြစ်သည်။
၁၄၃:၄-၇။ ကြီးမားသည့်အခက်အခဲများ ရင်ဆိုင်ရလျှင်ပင် မည်သို့ခံရပ်နိုင်သနည်း။ ဆာလံဆရာက သော့ချက်ကို ဖော်ပြ၏– ယေဟောဝါ၏လုပ်ရပ်များကို စဉ်းစားတွေးတောပါ၊ ကိုယ်တော်လုပ်ဆောင်မှုများကို ဆင်ခြင်ပါ၊ အကူအညီအတွက် ဆုတောင်းပါ။
“ဟာလေလုယ”
ဖော်ပြခဲ့ပြီးဖြစ်သော ဆာလံကျမ်းအပိုင်းလေးခုစလုံးကို ယေဟောဝါအား ချီးမွမ်းသည့် အသုံးအနှုန်းဖြင့် နိဂုံးချုပ်ဖော်ပြသည်။ (ဆာလံ ၄၁:၁၃; ၇၂:၁၉၊ ၂၀; ၈၉:၅၂; ၁၀၆:၄၈) နိဂုံးချုပ်အပိုင်းသည်လည်း အလားတူပင်ဖြစ်သည်။ ဆာလံ ၁၅၀:၆ တွင် ‘အသက်ရှိသောသူအပေါင်းတို့သည် ထာဝရဘုရားသခင်ကို ချီးမွမ်းကြစေ။ ဟာလေလုယ’ ဟုဖော်ပြထား၏။ ဘုရားသခင့်ကမ္ဘာသစ်တွင် ယင်းသို့အမှန်ပင် ဖြစ်လာမည်။
ကျွန်ုပ်တို့သည် ကောင်းချီးခံစားရမည့် ထိုအချိန်ကို မျှော်လင့်နေရင်း စစ်မှန်သောဘုရားသခင် ဘုန်းထင်ရှားစေရန်၊ ကိုယ်တော်၏နာမတော်ကို ချီးမွမ်းရန် အကြောင်းကောင်းများစွာရှိသည်။ ကျွန်ုပ်တို့သည် ယေဟောဝါကိုသိကြပြီး ကိုယ်တော်နှင့် ဆက်ဆံရေးကောင်းရှိကြသောကြောင့် ကျွန်ုပ်တို့ခံစားရမည့် ပျော်ရွှင်မှုကို စဉ်းစားကြည့်သည့်အခါ ကျေးဇူးတင်လေးမြတ်မှုဖြင့် ကိုယ်တော်အားချီးမွမ်းရန် လှုံ့ဆော်ခံရသည်မဟုတ်ပေလော။
[စာမျက်နှာ ၁၅ ပါ ရုပ်ပုံ]
ယေဟောဝါ၏ အံ့ဖွယ်လက်ရာများသည် အံ့မခန်းဖွယ်ဖြစ်၏
[စာမျက်နှာ ၁၆ ပါ ရုပ်ပုံ]
ယေဟောဝါ၏ အကြံအစည်တော်တို့သည် “သဲလုံးနှင့်အမျှမက သာ၍များကြပါ၏”