‘ဆုတောင်းသံကို နားညောင်းတော်မူသောအရှင်’ ထံ ချဉ်းကပ်နိုင်ပုံ
‘ဆုတောင်းသံကို နားညောင်းတော်မူသောအရှင်’ ထံ ချဉ်းကပ်နိုင်ပုံ
‘ဆုတောင်းသံကို နားညောင်းတော်မူသောအရှင် ကိုယ်တော့်ထံသို့ လူအပေါင်းတို့သည် ချဉ်းကပ်ရကြပါလိမ့်မည်။’—ဆာလံ ၆၅:၂၊ သမ္မာ။
၁။ လူသားသည် မြေကြီးပေါ်ရှိ အခြားသတ္တဝါတို့နှင့်မတူဘဲ အဘယ်အရာတွင် ထူးခြားသနည်း။ ယင်းက အဘယ်အခွင့်အရေးရရန် လမ်းပွင့်သွားသနည်း။
မြေကြီးပေါ်ရှိ ထောင်သောင်းချီသော ဖန်ဆင်းခံသတ္တဝါအားလုံးထဲမှ လူသားများသာ ဖန်ဆင်းရှင်ကို ဝတ်ပြုနိုင်သည့်စွမ်းရည်ရှိသည်။ လူသားများသာ ဘုရားသခင်အား ဝတ်ပြုကိုးကွယ်ရန်လိုကြောင်း သိရှိကြပြီး ယင်းလိုအပ်မှုကို ဖြည့်ဆည်းလိုသည့် ဆန္ဒရှိကြသည်။ ယင်းက အလွန်ထူးမြတ်သော အခွင့်အရေးဖြစ်သည့် ကောင်းကင်ခမည်းတော်နှင့် ကျွန်ုပ်တို့နှစ်ကိုယ်ကြားဆက်ဆံရေးရှိရန် လမ်းပွင့်သွားစေသည်။
၂။ အပြစ်တရားက လူသားနှင့် ဖန်ဆင်းရှင်၏ ဆက်ဆံရေးအပေါ် အဘယ်ဆိုးကျိုးဖြစ်စေခဲ့သနည်း။
၂ ဘုရားသခင်သည် လူကို မိမိ၏ဖန်ဆင်းရှင်ထံ ချဉ်းကပ်နိုင်သည့်စွမ်းရည်ဖြင့် ဖန်ဆင်းခဲ့သည်။ အာဒံနှင့်ဧဝသည် အပြစ်မပါဘဲ ဖန်ဆင်းခံခဲ့ရသည်။ သို့ဖြစ်သောကြောင့် ကလေးငယ်တစ်ဦးသည် သူ၏ဖခင်ထံ လွတ်လွတ်လပ်လပ်ချဉ်းကပ်သကဲ့သို့ သူတို့သည် ဘုရားသခင်ထံ ချဉ်းကပ်နိုင်ခဲ့ကြသည်။ သို့သော် အပြစ်ကြောင့် ယင်းအခွင့်ထူး ဆုံးရှုံးခဲ့ရသည်။ အာဒံနှင့်ဧဝသည် ဘုရားသခင်အား မနာခံခဲ့၍ ကိုယ်တော်နှင့် ရင်းနှီးသောဆက်ဆံရေး ဆုံးရှုံးခဲ့ကြသည်။ (ကမ္ဘာဦး ၃:၈-၁၃၊ ၁၇-၂၄) ယင်းက အာဒံ၏ မစုံလင်သောသားမြေးများသည် ဘုရားသခင်နှင့်ဆက်ဆံရေး ဘယ်တော့မျှမရနိုင်တော့ဟု ဆိုလိုပါသလော။ မဆိုလိုပါ၊ သူတို့သည် လိုအပ်ချက်အချို့ကို ပြည့်မီမည်ဆိုလျှင် ယေဟောဝါထံချဉ်းကပ်ရန် ကိုယ်တော်ဆက်၍ ခွင့်ပြုတော်မူသည်။ ယင်းလိုအပ်ချက်များကား အဘယ်နည်း။
ဘုရားသခင်ထံချဉ်းကပ်ရန် လိုအပ်ချက်များ
၃။ အပြစ်သားဖြစ်သောလူသားတို့သည် ဘုရားသခင်ထံ မည်သို့ချဉ်းကပ်သင့်သနည်း။ ယင်းကို အဘယ်ပုံဥပမာက ဖော်ပြသနည်း။
၃ ဘုရားသခင်ထံချဉ်းကပ်လိုသော မစုံလင်သူလူသားတစ်ဦးထံမှ ကိုယ်တော် အဘယ်အရာတောင်းဆိုကြောင်း သိရှိရန် အာဒံ၏သားနှစ်ဦးပါဝင်သော အဖြစ်အပျက်တစ်ခုက အထောက်အကူပြုသည်။ ကာဣနနှင့် အာဗေလတို့သည် ဘုရားသခင်ထံ ပူဇော်ရာယဇ်များဆက်သခြင်းဖြင့် ကိုယ်တော်ထံချဉ်းကပ်ဖို့ အားထုတ်ခဲ့ကြသည်။ ဘုရားသခင်သည် အာဗေလ၏ပူဇော်သောယဇ်ကို လက်ခံခဲ့သော်လည်း ကာဣန၏ပူဇော်သောယဇ်ကိုကား ငြင်းပယ်ခဲ့၏။ (ကမ္ဘာဦး ၄:၃-၅) အဘယ်ကြောင့် ထိုသို့ဖြစ်ခဲ့သနည်း။ ဟေဗြဲ ၁၁:၄ တွင်ဤသို့ဆိုသည်– “အာဗေလသည် ကာဣနပူဇော်သောယဇ်ထက် သာ၍မြတ်သောယဇ်ကို ယုံကြည်ခြင်းအားဖြင့် ဘုရားသခင်အားပူဇော်၏။ ထိုသို့သောယဇ်ကိုပူဇော်၍ မိမိဖြောင့်မတ်သည်ဟု သက်သေခံတော်မူခြင်းကိုရလေ၏။” မှန်ပါသည်၊ ဘုရားသခင်ထံချဉ်းကပ်ရာတွင် ယုံကြည်ခြင်းသည် လိုအပ်ချက်တစ်ခုဖြစ်သည်။ ကာဣနအား ယေဟောဝါမိန့်တော်မူသည့်စကားတွင် နောက်ထပ်လိုအပ်ချက်တစ်ခုကို တွေ့ရသည်– “သင်သည် ကောင်းမွန်စွာပြုလျှင် အခွင့်မရလော။” မှန်၏၊ ကာဣနသည် ကောင်းသောအရာကို လုပ်ဆောင်ခဲ့မည်ဆိုလျှင် ဘုရားသခင်ထံ သူ၏ချဉ်းကပ်မှုကို ကိုယ်တော်လက်ခံခဲ့ပေမည်။ သို့သော် ကာဣနသည် ဘုရားသခင်၏ ဆုံးမစကားကို ငြင်းပယ်ကာ အာဗေလကိုသတ်ခဲ့သောကြောင့် နှင်ထုတ်ခံခဲ့ရသည်။ (ကမ္ဘာဦး ၄:၇-၁၂) ထို့ကြောင့် လူ့သမိုင်းအစပိုင်းမှ ယင်းအဖြစ်အပျက်က ကောင်းသောအရာကိုလုပ်ဆောင်ပြီး ယုံကြည်ခြင်းဖြင့် ဘုရားသခင်ထံချဉ်းကပ်ရန် အရေးကြီးကြောင်း အထူးပေါ်လွင်သည်။
၄။ ဘုရားသခင်ထံ ချဉ်းကပ်ရာတွင် အဘယ်အရာကို ကျွန်ုပ်တို့ အသိအမှတ်ပြုသင့်သနည်း။
၄ ကျွန်ုပ်တို့သည် ဘုရားသခင်ထံချဉ်းကပ်လိုလျှင် မိမိ၏အပြစ်ရှိသော အခြေအနေကို မဖြစ်မနေအသိအမှတ်ပြုဖို့လိုသည်။ လူသားအားလုံးသည် အပြစ်သားများဖြစ်ပြီး ယင်းအပြစ်က ဘုရားသခင်ထံချဉ်းကပ်ရန် အတားအဆီးတစ်ခုဖြစ်သည်။ ပရောဖက်ယေရမိက ဣသရေလလူမျိုးနှင့်ပတ်သက်၍ ဤသို့ရေးခဲ့၏– ‘အကျွန်ုပ်တို့သည် ပြစ်မှားပါပြီ။ အကျွန်ုပ်တို့ဆုတောင်းချက်သည် အထံတော်သို့မပေါက်နိုင်အောင် မိုးတိမ်ဖြင့် ကိုယ်ကိုကွယ်ကာတော်မူ၏။’ (မြည်တမ်းစကား ၃:၄၂၊ ၄၄) သို့ဖြစ်သည့်တိုင် လူ့သမိုင်းတစ်လျှောက်တွင် ဘုရားသခင်ကိုယုံကြည်ပြီး ကိုယ်တော်၏ပညတ်တော်များကို စောင့်ရှောက်ကြသည့် စိတ်သဘောထားမှန်ရှိသူတို့၏ ဆုတောင်းချဉ်းကပ်မှုများကို ကိုယ်တော် လိုလိုလားလားလက်ခံကြောင်း ဖော်ပြခဲ့သည်။ (ဆာလံ ၁၁၉:၁၄၅) ထိုသို့ဆုတောင်းချဉ်းကပ်သူများထဲတွင် မည်သူတို့ပါဝင်ကြသနည်း။ သူတို့၏ဆုတောင်းချက်များမှ ကျွန်ုပ်တို့အဘယ်အရာ သင်ယူနိုင်သနည်း။
၅၊ ၆။ ဘုရားသခင်ထံ အာဗြဟံ၏ချဉ်းကပ်ပုံမှ ကျွန်ုပ်တို့အဘယ်အရာ သင်ယူနိုင်သနည်း။
၅ ထိုသူတို့ထဲမှတစ်ဦးမှာ အာဗြဟံဖြစ်သည်။ ဘုရားသခင်သည် အာဗြဟံ၏ချဉ်းကပ်မှုကို လက်ခံခဲ့ပြီး ကိုယ်တော်က အာဗြဟံကို “ငါ့အဆွေ” ဟုခေါ်ခဲ့သည်။ (ဟေရှာယ ၄၁:၈) ဘုရားသခင်ထံ အာဗြဟံ၏ချဉ်းကပ်ပုံမှ ကျွန်ုပ်တို့ အဘယ်အရာ သင်ယူနိုင်သနည်း။ ဤတည်ကြည်သောဘိုးဘေးသည် အမွေခံအကြောင်းနှင့်ပတ်သက်၍ ယေဟောဝါအား ဤသို့မေးခဲ့သည်– “အကျွန်ုပ်သည် သားမရှိဘဲသွားရပါ၏။ . . . သို့ဖြစ်၍ အဘယ်ကျေးဇူးကို ပြုတော်မူပါမည်နည်းဟု လျှောက်ဆို၏။” (ကမ္ဘာဦး ၁၅:၂၊ ၃; ၁၇:၁၈) နောက်တစ်ကြိမ်တွင် ဆိုးသွမ်းသော သောဒုံနှင့်ဂေါမောရမြို့ကို ဘုရားသခင်ဖျက်ဆီးချိန်တွင် မည်သူကယ်လွတ်ခံရမည်နှင့်ပတ်သက်၍ သူ၏စိုးရိမ်ပူပန်မှုကို ဖော်ပြခဲ့သည်။ (ကမ္ဘာဦး ၁၈:၂၃-၃၃) အာဗြဟံသည် အခြားသူတို့အတွက်ပင် တိုးလျှိုးအသနားခံခဲ့သည်။ (ကမ္ဘာဦး ၂၀:၇၊ ၁၇) ထို့ပြင်၊ အာဗေလ၏ အဖြစ်အပျက်တွင်ကဲ့သို့ပင် အာဗြဟံသည် တစ်ခါတစ်ရံ ယေဟောဝါထံ ယဇ်ပူဇော်ခြင်းဖြင့် ဘုရားသခင်ထံချဉ်းကပ်ခဲ့သည်။—ကမ္ဘာဦး ၂၂:၉-၁၄။
၆ ထိုအဖြစ်အပျက်အားလုံးတွင် အာဗြဟံသည် ယေဟောဝါနှင့် လွတ်လွတ်လပ်လပ် ပြောဆိုခဲ့သည်။ သို့သော် သူ၏လွတ်လပ်စွာပြောဆိုခြင်းတွင် ဖန်ဆင်းရှင်ရှေ့ သူ၏အနေအထားကို နှိမ့်ချစွာရှုမြင်ခြင်းနှင့် ဒွန်တွဲခဲ့သည်။ ကမ္ဘာဦး ၁၈:၂၇ တွင်တွေ့ရသော ရိုသေလေးမြတ်မှုပါသည့် သူ၏စကားများကို သတိပြုကြည့်ပါ– ‘အကျွန်ုပ်သည် မြေမှုန့်နှင့်ပြာသက်သက်ဖြစ်သော်လည်း ဘုရားသခင်ကို ယခုလျှောက်မည်ဟု အားထုတ်ပါ၏။’ တုပရန် အလွန်ကောင်းသောသဘောထားပင်!
၇။ ဘိုးဘေးများသည် ယေဟောဝါထံ အဘယ်အရာများ ထည့်တောင်းခဲ့ကြသနည်း။
၇ ဘိုးဘေးများသည် ကိစ္စရပ်အမျိုးမျိုးနှင့်ပတ်သက်၍ ဆုတောင်းခဲ့ကြပြီး သူတို့၏ ဆုတောင်းချက်များကိုလည်း ယေဟောဝါနားညောင်းခဲ့သည်။ ယာကုပ်သည် ကတိပြုသည့်ပုံစံဖြင့် ဆုတောင်းခဲ့သည်။ ဘုရားသခင်၏အကူအညီကို တောင်းလျှောက်ပြီးနောက် သူဤသို့ အလေးအနက်ကတိပြုခဲ့သည်– “ပေးသနားတော်မူသမျှတို့ကို ဆယ်ဖို့တစ်ဖို့ ပူဇော်ပါမည်။” (ကမ္ဘာဦး ၂၈:၂၀-၂၂) နောက်ပိုင်း ယာကုပ်သည် သူ၏အစ်ကိုနှင့် ဆုံတွေ့ခါနီးတွင် မိမိအားကာကွယ်ပေးပါရန် ယေဟောဝါထံ ဤသို့တိုးလျှိုးအသနားခံခဲ့သည်– ‘အကျွန်ုပ်ကို အစ်ကိုဧသောလက်မှ ကယ်လွှတ်တော်မူမည်အကြောင်း ဆုတောင်းပါ၏။ အကျွန်ုပ် အလွန်စိုးရိမ်ပါ၏။’ (ကမ္ဘာဦး ၃၂:၉-၁၂) ဘိုးဘေးယောဘသည် သူ၏မိသားစုအတွက် ပူဇော်ရာယဇ်များဆက်သကာ ယေဟောဝါထံ ချဉ်းကပ်ခဲ့သည်။ ယောဘ၏ မိတ်ဆွေသုံးဦးသည် စကားအားဖြင့် ပြစ်မှားမိသောအခါ ယောဘသည် သူတို့အတွက် ဆုတောင်းပေးခဲ့ပြီး ‘ထာဝရဘုရားသခင်သည်လည်း ယောဘ၏မျက်နှာကို ထောက်’ ၍လက်ခံတော်မူခဲ့သည်။ (ယောဘ ၁:၅; ၄၂:၇-၉) ယင်းမှတ်တမ်းများက ယေဟောဝါထံ ကျွန်ုပ်တို့ဆုတောင်းရာတွင် အဘယ်အရာ ထည့်တောင်းနိုင်ကြောင်းသိရှိရန် အထောက်အကူပြုသည်။ ထို့ပြင် ယေဟောဝါထံ တော်လျော်သည့်သဘောထားဖြင့် ချဉ်းကပ်သူတို့၏ ဆုတောင်းချက်များကို ကိုယ်တော်နားညောင်းတော်မူကြောင်းကိုလည်း တွေ့ရှိရသည်။
ပညတ်ပဋိညာဉ်အောက်တွင်
၈။ ပညတ်ပဋိညာဉ်အောက်တွင် လူများကိုယ်စား ကိစ္စရပ်များကို ဘုရားသခင်ထံ မည်သို့တင်ပြခဲ့ကြသနည်း။
၈ ယေဟောဝါသည် ဣသရေလလူမျိုးကို အီဂျစ်ပြည်မှ ကယ်နုတ်ခဲ့ပြီးနောက် ကိုယ်တော်သည် သူတို့ကို ပညတ်ပဋိညာဉ်ပေးခဲ့သည်။ ခန့်အပ်ခံယဇ်ပုရောဟိတ်များမှတစ်ဆင့် ဘုရားသခင်ထံချဉ်းကပ်သည့်အစီအစဉ်ကို ပညတ်တရားတွင် ဖော်ပြခဲ့သည်။ လူများကိုယ်စားအမှုဆောင်ရန် လေဝိသားအချို့ကို ယဇ်ပုရောဟိတ်များအဖြစ် ခန့်အပ်ခဲ့သည်။ နိုင်ငံအတွင်း အရေးကြီးကိစ္စများ ပေါ်ပေါက်လာသည့်အခါ ဘုရင်တစ်ပါး၊ သို့မဟုတ် ပရောဖက်တစ်ပါးဖြစ်သော လူမျိုးတော်၏ကိုယ်စားလှယ်သည် ဘုရားသခင်ထံ ဆုတောင်းကာ ကိစ္စရပ်ကို တင်ပြခဲ့ကြသည်။ (၁ ဓမ္မရာဇဝင် ၈:၂၁၊ ၂၂; ၁၄:၃၆-၄၁; ယေရမိ ၄၂:၁-၃) ဥပမာ၊ ဝတ်ပြုရာအိမ်တော်အပ်နှံပွဲတွင် ဘုရင်ရှောလမုန်သည် ယေဟောဝါထံ လှိုက်လှိုက်လှဲလှဲ ဆုတောင်းချဉ်းကပ်ခဲ့သည်။ ယေဟောဝါသည် ဝတ်ပြုရာအိမ်တော်ကို ကိုယ်တော်၏ဘုန်းတော်နှင့်ပြည့်စေသည့်အပြင် “ဤအရပ်ဌာန၌ဆုတောင်းသောစကားကို ငါနားထောင်မည်” ဟုမိန့်တော်မူခြင်းဖြင့် ရှောလမုန်၏ ဆုတောင်းချက်ကို နားညောင်းကြောင်း ဖော်ပြခဲ့သည်။—၂ ရာဇဝင်ချုပ် ၆:၁၂–၇:၃၊ ၁၅။
၉။ သန့်ရှင်းရာဌာနတော်၌ ယေဟောဝါထံ သင့်လျော်သောချဉ်းကပ်မှုဖြစ်ရန် အဘယ်အရာလုပ်ဆောင်ဖို့ လိုသနည်း။
၉ သန့်ရှင်းရာဌာနတော်၌ယေဟောဝါထံချဉ်းကပ်ရာတွင် နှစ်သက်လက်ခံဖွယ်ဖြစ်ရန် လိုအပ်ချက်တစ်ခုကို ဣသရေလလူမျိုးအားပေးခဲ့သော ပညတ်တရားတွင် ထည့်သွင်းဖော်ပြခဲ့သည်။ ယင်းကားအဘယ်နည်း။ တိရစ္ဆာန်ပူဇော်ရာယဇ်များ ပူဇော်ခြင်းအပြင် နံနက်နှင့် ညနေတိုင်းတွင် ယဇ်ပုရောဟိတ်မင်းသည် ယေဟောဝါရှေ့တော်မှောက်၌ နံ့သာပေါင်းပူဇော်ရန် တောင်းဆိုခံရသည်။ နောက်ပိုင်းတွင် လက်ထောက်ယဇ်ပုရောဟိတ်များလည်း အပြစ်ဖြေရာနေ့မှလွဲ၍ အခြားနေ့များတွင် ယင်းတာဝန်ကို ဆောင်ရွက်ခဲ့ကြသည်။ ယဇ်ပုရောဟိတ်များသည် ယင်းတာဝန်ကို မဆောင်ရွက်ပါက သူတို့၏လုပ်ဆောင်မှုများကို ယေဟောဝါနှစ်သက်မည်မဟုတ်ပါ။—ထွက်မြောက်ရာ ၃၀:၇၊ ၈; ၂ ရာဇဝင်ချုပ် ၁၃:၁၁။
၁၀၊ ၁၁။ ယေဟောဝါသည် တစ်ဦးချင်းစီ၏ဆုတောင်းချက်များကို နားညောင်းကြောင်း အဘယ်အထောက်အထားရှိသနည်း။
၁၀ ရှေးဣသရေလနိုင်ငံတွင် ခန့်အပ်ခံကိုယ်စားလှယ်များမှတစ်ဆင့်သာ ဘုရားသခင်ထံ ချဉ်းကပ်ခဲ့ကြခြင်းလော။ မဟုတ်ပါ၊ ယေဟောဝါသည် တစ်ဦးချင်းစီ၏ ဆုတောင်းချက်များကိုလည်း နားညောင်းကြောင်း ကျမ်းစာကဖော်ပြသည်။ ဝတ်ပြုရာအိမ်တော်အပ်နှံပွဲ၌ ရှောလမုန်၏ဆုတောင်းချက်တွင် ဤသို့အသနားခံ တောင်းလျှောက်ခဲ့သည်– ‘ကိုယ်တော်၏လူ ဣသရေလအမျိုးသားအပေါင်းဖြစ်စေ၊ လူတစ်ဦးတစ်ယောက်ဖြစ်စေ မည်သူမဆို ဤအိမ်တော်သို့ မိမိတို့လက်ဝါးကိုဖြန့်၍ မည်သည့်အသနားခံခြင်းအားဖြင့် ဆုတောင်းလျှင်၊ ကျိန်းဝပ်တော်မူရာကောင်းကင်ဘုံ၌ နားညောင်းတော်မူပါ။’ (၂ ရာဇဝင်ချုပ် ၆:၂၉၊ ၃၀၊ သမ္မာ) နှစ်ခြင်းဆရာယောဟန်၏ဖခင် ဇာခရိသည် သန့်ရှင်းရာဌာနတော်၌ နံ့သာပေါင်းကို ပူဇော်နေချိန်တွင် ယဇ်ပုရောဟိတ်မဟုတ်သော ယေဟောဝါအားဝတ်ပြုကိုးကွယ်သူ လူများအပေါင်းတို့သည် “ပြင်၌ဆုတောင်းလျက်နေကြ၏” ဟု လုကာမှတ်တမ်း၌ ဖော်ပြထားသည်။ ရွှေယဇ်ပလ္လင်ပေါ် ယေဟောဝါထံ နံ့သာပေါင်းမီးရှို့ပူဇော်နေချိန်တွင် လူတို့သည် သန့်ရှင်းရာဌာနအပြင်တွင် စုရုံးကာ ဆုတောင်းသည့်ထုံးစံရှိလာခဲ့ပုံရသည်။—လုကာ ၁:၈-၁၀။
၁၁ ယေဟောဝါထံ တော်လျော်သည့်သဘောထားဖြင့် ချဉ်းကပ်သည့်အခါ ကိုယ်တော်သည် လူမျိုးတစ်မျိုးလုံးကိုယ်စား တောင်းလျှောက်ပေးသူများထံမှနှင့် တစ်ဦးချင်းစီသီးသန့်တောင်းလျှောက်သူ မည်သူမဆိုထံမှ အသနားခံချက်များကို နားညောင်းရန် လိုလိုလားလားရှိတော်မူသည်။ ယနေ့ ကျွန်ုပ်တို့သည် ပညတ်ပဋိညာဉ်အောက်တွင် မရှိတော့ပါ။ သို့သော် ရှေးဣသရေလလူမျိုး ဘုရားသခင်ထံချဉ်းကပ်ခဲ့သည့် နည်းလမ်းများမှ ဆုတောင်းခြင်းနှင့်ပတ်သက်၍ အရေးကြီးသည့် သင်ခန်းစာတချို့ကို သင်ယူနိုင်ပါသည်။
ခရစ်ယာန်အစီအစဉ်အောက် ဘုရားသခင်ထံချဉ်းကပ်နည်း
၁၂။ ယေဟောဝါထံချဉ်းကပ်ရန် ခရစ်ယာန်များအတွက် အဘယ်အစားထိုးအစီအစဉ်ရှိသနည်း။
၁၂ ယခု ကျွန်ုပ်တို့သည် ခရစ်ယာန်အစီအစဉ်အောက်တွင် ရှိကြသည်။ ဘုရားသခင့်လူမျိုးအားလုံးအတွက် ကိုယ်စားပြုဆောင်ရွက်ပေးသော ယဇ်ပုရောဟိတ်များရှိသည့် သို့မဟုတ် ဘုရားသခင်ထံဆုတောင်းရန် ကျွန်ုပ်တို့သွားရောက်နိုင်သည့် ပကတိဝတ်ပြုရာအိမ်တော်မရှိတော့ပါ။ သို့တိုင် ယေဟောဝါသည် ကျွန်ုပ်တို့ ကိုယ်တော်ထံချဉ်းကပ်ရန် အစီအစဉ်ပြုလုပ်ထားတော်မူ၏။ ယင်းကားအဘယ်နည်း။ ခရစ်တော်ကို ဘိသိက်ပေးပြီး ယဇ်ပုရောဟိတ်မင်းကြီးအဖြစ် ခန့်အပ်ချိန် အေဒီ ၂၉ တွင် ဝိညာဉ်ရေးဝတ်ပြုရာအိမ်တော် စတည်ရှိလာခဲ့သည်။ * ဤဝိညာဉ်ရေးဝတ်ပြုရာအိမ်တော်သည် အပြစ်ဖြေပေးသော ယေရှုခရစ်၏ပူဇော်ရာယဇ်ပေါ် အခြေခံ၍ ယေဟောဝါထံကိုးကွယ်ချဉ်းကပ်နိုင်သည့် အစီအစဉ်အသစ်ဖြစ်သည်။—ဟေဗြဲ ၉:၁၁၊ ၁၂။
၁၃။ ဆုတောင်းခြင်းနှင့်ပတ်သက်၍ ယေရုရှလင်ရှိဝတ်ပြုရာအိမ်တော်နှင့် ဝိညာဉ်ရေးဝတ်ပြုရာအိမ်တော်၏ ဆင်တူချက်တစ်ခုကို ဖော်ပြပါ။
၁၃ ယေရုရှလင်မြို့ရှိ ဝတ်ပြုရာအိမ်တော်၌ ဆုတောင်းခြင်းကိစ္စအပါအဝင် ယင်းအိမ်တော်၏ ကြန်အင်လက္ခဏာများသည် ဝိညာဉ်ရေးဝတ်ပြုရာအိမ်တော်၏ အစီအစဉ်များကို သင့်လျော်စွာပုံတင်ပြသည်။ (ဟေဗြဲ ၉:၁-၁၀) ဥပမာ၊ ဝတ်ပြုရာအိမ်တော် သန့်ရှင်းသောအခန်းရှိ ယဇ်ပလ္လင်ပေါ်တွင် နံနက်နှင့် ညနေတိုင်းပူဇော်သော နံ့သာပေါင်းသည် အဘယ်အရာကို ကိုယ်စားပြုသနည်း။ သမ္မာကျမ်းစာနောက်ဆုံးကျမ်းတွင် ‘သန့်ရှင်းသူတို့၏ ဆုတောင်းချက်တည်းဟူသော မီးရှို့ရာနံ့သာပေါင်း’ ဟုဖော်ပြထားသည်။ (ဗျာ. ၅:၈; ၈:၃၊ ၄) ဒါဝိဒ်သည် ဘုရားသခင့်ဝိညာဉ်တော်မှုတ်သွင်းခံရကာ ‘အကျွန်ုပ်၏ဆုတောင်းချက်သည် မီးရှို့သောနံ့သာပေါင်းကဲ့သို့ ပြင်ဆင်လျက်ရှိပါစေသော’ ဟုရေးသားခဲ့သည်။ (ဆာလံ ၁၄၁:၂) သို့ဖြစ်၍ ခရစ်ယာန်အစီအစဉ်တွင် မွှေးကြိုင်သောနံ့သာပေါင်းသည် နှစ်သက်ဖွယ်သောဆုတောင်းချက်များနှင့် ယေဟောဝါအား ချီးမွမ်းသည့်စကားများကို သင့်လျော်စွာပုံဆောင်သည်။—၁ သက်သာလောနိတ် ၃:၁၀။
၁၄၊ ၁၅။ (က) ဝိညာဉ်တော်ဖွားခရစ်ယာန်များ၊ (ခ) “အခြားသိုး” များ ယေဟောဝါထံ ချဉ်းကပ်မှုနှင့်ပတ်သက်၍ မည်သို့ပြောနိုင်သနည်း။
၁၄ ဤဝိညာဉ်ရေးဝတ်ပြုရာအိမ်တော်တွင်မည်သူတို့သည် ဘုရားသခင်ထံ ချဉ်းကပ်နိုင်ကြသနည်း။ ပကတိဝတ်ပြုရာအိမ်တော်တွင် ယဇ်ပုရောဟိတ်များနှင့် လေဝိသားတို့သည် အတွင်းရင်ပြင်တွင် အမှုထမ်းဆောင်ခွင့် ရရှိခဲ့ကြသော်လည်း ယဇ်ပုရောဟိတ်များသာ သန့်ရှင်းရာအခန်းသို့ ဝင်ခွင့်ရကြသည်။ ကောင်းကင်မျှော်လင့်ချက်ရှိသော ဝိညာဉ်တော်ဖွားခရစ်ယာန်များသည် အတွင်းရင်ပြင်နှင့် သန့်ရှင်းရာအခန်းတို့ဖြင့် ပုံတင်ပြနိုင်သော အထူးဝိညာဉ်ရေးအခြေအနေတွင် ပျော်မွေ့နေကြပြီး ယင်းအခြေအနေမှ ဘုရားသခင်ထံ ဆုတောင်း၊ ချီးမွမ်းနိုင်ကြသည်။
၁၅ မြေကြီးမျှော်လင့်ချက်ရှိသူ “အခြားသိုး” များကော အသို့နည်း။ (ယောဟန် ၁၀:၁၆) ပရောဖက်ဟေရှာယက “နောက်ဆုံးသောကာလ၌” ခပ်သိမ်းသောလူမျိုးတို့သည် ယေဟောဝါအား ဝတ်ပြုကိုးကွယ်လာကြလိမ့်မည်ဟု ဖော်ပြခဲ့သည်။ (ဟေရှာယ ၂:၂၊ ၃) “တစ်ပါးအမျိုးသားတို့” သည်လည်း ယေဟောဝါထံတော်သို့လာကြမည်ဟု ဖော်ပြ၏။ ‘ငါ၏ဆုတောင်းရာအိမ်၌ ဝမ်းမြောက်စေမည်’ ဟုမိန့်ဆိုခြင်းဖြင့် သူတို့၏ချဉ်းကပ်မှုကို ဘုရားသခင် လိုလိုလားလားလက်ခံတော်မူကြောင်း ဖော်ပြခဲ့သည်။ (ဟေရှာယ ၅၆:၆၊ ၇) “လူအမျိုးအနွယ်ခပ်သိမ်း” တို့အထဲမှထွက်လာသည့် ‘လူအုပ်ကြီး’ သည် ဝိညာဉ်ရေးဝတ်ပြုရာအိမ်တော်၏ အပြင်ရင်ပြင်တွင်ရပ်ကာ ဘုရားသခင်အား “နေ့ညမပြတ်” ဝတ်ပြုဆုတောင်းရန် စုဝေးနေကြကြောင်း ထပ်ဆင့်အသေးစိတ်အချက်များကို ဗျာ. ၇:၉-၁၅ တွင်ဖော်ပြထားသည်။ ယနေ့ ဘုရားသခင်၏ကျေးကျွန်အားလုံးသည် ယုံကြည်စိတ်ချမှုအပြည့်ဖြင့် ဘုရားသခင်ထံ လွတ်လွတ်လပ်လပ်ချဉ်းကပ်နိုင်ပြီး ယင်းတို့ကို ကိုယ်တော်နားညောင်းတော်မူသည် ဟူသည့်အသိစိတ်က အလွန်စိတ်သက်သာမှုဖြစ်စေသည်!
အဘယ်ဆုတောင်းချက်များကို နားညောင်းတော်မူသနည်း
၁၆။ အစောပိုင်းခရစ်ယာန်များထံမှ ဆုတောင်းခြင်းနှင့်ပတ်သက်၍ အဘယ်အရာ သင်ယူနိုင်သနည်း။
၁၆ အစောပိုင်းခရစ်ယာန်များသည် ဆုတောင်းခြင်းတွင် ထက်သန်သူများဖြစ်ကြသည်။ သူတို့ အဘယ်အရာများ တောင်းလျှောက်ခဲ့ကြသနည်း။ အဖွဲ့အစည်းတာဝန်များဆောင်ရွက်ဖို့ အမျိုးသားများကိုရွေးချယ်ရာတွင် လမ်းညွှန်ပေးပါရန် ခရစ်ယာန်အကြီးအကဲများ ဆုတောင်းခဲ့ကြသည်။ (တမန်တော် ၁:၂၄၊ ၂၅; ၆:၅၊ ၆) ဧပဖြသည် ယုံကြည်သူချင်းများအတွက် ဆုတောင်းပေးခဲ့၏။ (ကောလောသဲ ၄:၁၂) ယေရုရှလင်မြို့ရှိအသင်းသားများသည် ပေတရုထောင်ကျနေစဉ် သူ့အတွက် ဆုတောင်းပေးခဲ့ကြသည်။ (တမန်တော် ၁၂:၅) အစောပိုင်းခရစ်ယာန်များသည် ဆန့်ကျင်မှုကို ရဲရဲဝံ့ဝံ့ရင်ဆိုင်နိုင်ရန် ဘုရားသခင်ထံ ဤသို့တောင်းလျှောက်ခဲ့၏– ‘အိုထာဝရဘုရားသခင်၊ ယခုအခါ ထိုသူတို့၏ခြိမ်းခြောက်ခြင်းကို မှတ်တော်မူပါ။ ကိုယ်တော်၏ကျွန်တို့သည် နှုတ်မြွက်တော်ကို ရဲရင့်စွာဟောပြောပါမည်အကြောင်း ကယ်မသနားတော်မူပါ။’ (တမန်တော် ၄:၂၃-၃၀) တပည့်ဖြစ်သူယာကုပ်က ခရစ်ယာန်များ စုံစမ်းနှောင့်ယှက်မှုခံရချိန်တွင် ဘုရားသခင်ထံမှ ဉာဏ်ပညာတောင်းရန် အားပေးခဲ့သည်။ (ယာကုပ် ၁:၅) ယေဟောဝါထံ သင်အသနားခံရာတွင် ယင်းအချက်များကို ထည့်သွင်းတောင်းလျှောက်ပါသလော။
၁၇။ မည်သူတို့၏ ဆုတောင်းချက်များကို ယေဟောဝါလက်ခံတော်မူသနည်း။
၁၇ ဘုရားသခင်သည် ဆုတောင်းချက်အားလုံးကို နားညောင်းတော်မမူပါ။ သို့ဖြစ်လျှင် ကျွန်ုပ်တို့၏ ဆုတောင်းချက်သည် နားညောင်းခံရလိမ့်မည်ဟူသည့် ယုံကြည်စိတ်ချမှုဖြင့် မည်သို့ဆုတောင်းနိုင်သနည်း။ ရှေးအချိန်က ဘုရားသခင်အားတည်ကြည်သူတို့ စိတ်ရင်းမှန်၊ သဘောထားမှန်ဖြင့်ချဉ်းကပ်သည်ကို ကိုယ်တော်နားညောင်းခဲ့သည်။ ထိုသူတို့သည် ယုံကြည်ခြင်းရှိသူများဖြစ်ကြပြီး ယင်းယုံကြည်ခြင်းကို အလုပ်ဖြင့်တင်ပြခဲ့ကြသည်။ ယနေ့ ထိုနည်းအတိုင်း ယေဟောဝါထံချဉ်းကပ်သူတို့ကို ကိုယ်တော်နားညောင်းတော်မူမည်ဖြစ်ကြောင်း ကျွန်ုပ်တို့ ယုံကြည်စိတ်ချနိုင်သည်။
၁၈။ မိမိတို့၏ဆုတောင်းချက်များကို နားညောင်းတော်မူရန် ခရစ်ယာန်များ အဘယ်လိုအပ်ချက်ကို ပြည့်မီရမည်နည်း။
၁၈ ထပ်ဆင့်လိုအပ်ချက်တစ်ခု ရှိသေးသည်။ ယင်းကို တမန်တော်ပေါလုက ဤသို့ရှင်းပြခဲ့၏– ‘ခရစ်တော်အားဖြင့် ငါတို့သည် ခမည်းတော်ထံသို့ တိုးဝင်ရမည်အခွင့်ကိုရကြပြီ။’ (ဧဖက် ၂:၁၃၊ ၁၈) မှန်ပါသည်၊ ကျွန်ုပ်တို့သည် ယေရှုတစ်ပါးတည်းမှတစ်ဆင့် ခမည်းတော်ထံ လွတ်လွတ်လပ်လပ်ချဉ်းကပ်နိုင်ကြသည်။—ယောဟန် ၁၄:၆; ၁၅:၁၆; ၁၆:၂၃၊ ၂၄။
၁၉။ (က) ဣသရေလလူမျိုး ပူဇော်သောနံ့သာပေါင်းသည် အဘယ်အချိန်တွင် ယေဟောဝါအဖို့ ရွံရှာဖွယ်အနံ့ဖြစ်ခဲ့သနည်း။ (ခ) ကျွန်ုပ်တို့၏ဆုတောင်းချက်များသည် ယေဟောဝါရှေ့မှောက် မွှေးကြိုင်သောနံ့သာပေါင်းကဲ့သို့ဖြစ်ရန် မည်သို့သေချာစေနိုင်သနည်း။
၁၉ ဖော်ပြခဲ့ပြီးဖြစ်သည့်အတိုင်း ဣသရေလယဇ်ပုရောဟိတ်များပူဇော်သော နံ့သာပေါင်းသည် ဘုရားသခင့်တည်ကြည်သောကျေးကျွန်များ၏ နှစ်သက်လက်ခံဖွယ် ဆုတောင်းချက်များကို ပုံဆောင်သည်။ သို့ရာတွင် တစ်ခါတစ်ရံ ဣသရေလလူမျိုးပူဇော်သော နံ့သာပေါင်းသည် ယေဟောဝါအဖို့ ရွံရှာဖွယ်ရာဖြစ်ခဲ့သည်။ အကြောင်းမှာ ဣသရေလလူမျိုးသည် ဝတ်ပြုရာအိမ်တော်တွင် နံ့သာပေါင်းပူဇော်နေစဉ် တစ်ချိန်တည်းတွင် ရုပ်ပုံများကို ဦးချနေကြသောကြောင့် ဖြစ်သည်။ (ယေဇကျေလ ၈:၁၀၊ ၁၁) ယနေ့၊ ယေဟောဝါကို ဝတ်ပြုကိုးကွယ်ပါသည်ဟုဆိုပြီး တစ်ချိန်တည်းတွင် ကိုယ်တော့်ပညတ်များနှင့်ဆန့်ကျင်သော လုပ်ရပ်များကို လုပ်ဆောင်နေသူတို့၏ ဆုတောင်းချက်များသည် ဘုရားသခင်အဖို့ ရွံရှာဖွယ်အနံ့ကဲ့သို့ဖြစ်သည်။ (သု. ၁၅:၈) ထို့ကြောင့် ကျွန်ုပ်တို့၏ ဆုတောင်းချက်များသည် ဘုရားသခင်ရှေ့မှောက် မွှေးကြိုင်သောနံ့သာပေါင်းကဲ့သို့ဖြစ်ရန် ကျွန်ုပ်တို့၏အသက်တာကဏ္ဍအားလုံးကို သန့်ရှင်းစင်ကြယ်အောင် ဆက်ထိန်းသိမ်းထားကြစို့။ ယေဟောဝါ၏ဖြောင့်မတ်သောလမ်းတွင် လိုက်လျှောက်နေသူတို့၏ ဆုတောင်းချက်များကို ကိုယ်တော် နှစ်သက်တော်မူသည်။ (ယောဟန် ၉:၃၁) သို့ရာတွင် မေးခွန်းအချို့ ကျန်ရှိနေဆဲဖြစ်သည်။ ကျွန်ုပ်တို့ မည်သို့ဆုတောင်းသင့်သနည်း။ အဘယ်အရာ တောင်းလျှောက်နိုင်သနည်း။ ကျွန်ုပ်တို့၏ဆုတောင်းချက်များကို ဘုရားသခင် မည်သို့ဖြေကြားတော်မူသနည်း။ ဤမေးခွန်းများနှင့် အခြားမေးခွန်းများကို နောက်ဆောင်းပါးတွင် သုံးသပ်ကြမည်။
[အောက်ခြေမှတ်ချက်]
သင်ရှင်းပြနိုင်သလော
• မစုံလင်သောလူသားတို့သည် ဘုရားသခင်နှစ်သက်လက်ခံဖွယ်နည်းဖြင့် ကိုယ်တော့်ထံ မည်သို့ချဉ်းကပ်နိုင်သနည်း။
• ကျွန်ုပ်တို့ဆုတောင်းရာတွင် ဘိုးဘေးတို့ကို မည်သို့တုပနိုင်သနည်း။
• အစောပိုင်းခရစ်ယာန်များ၏ ဆုတောင်းချက်များမှ ကျွန်ုပ်တို့ အဘယ်အရာ သင်ယူနိုင်သနည်း။
• အဘယ်အချိန်တွင် ကျွန်ုပ်တို့၏ဆုတောင်းချက်များသည် ဘုရားသခင့်ရှေ့မှောက် မွှေးကြိုင်သောနံ့သာပေါင်းကဲ့သို့ဖြစ်သနည်း။
[လေ့လာရန်မေးခွန်းများ]
[စာမျက်နှာ ၂၃ ပါ ရုပ်ပုံ]
ဘုရားသခင်သည် အာဗေလ၏ပူဇော်သောယဇ်ကို လက်ခံပြီး ကာဣန၏ပူဇော်သောယဇ်ကို ငြင်းပယ်ခြင်းမှာ အဘယ်ကြောင့်နည်း
[စာမျက်နှာ ၂၄ ပါ ရုပ်ပုံ]
‘အကျွန်ုပ်သည် မြေမှုန့်နှင့် ပြာသက်သက်ဖြစ်ပါ၏’
[စာမျက်နှာ ၂၅ ပါ ရုပ်ပုံ]
“ပေးသနားတော်မူသမျှတို့ကို ဆယ်ဖို့တစ်ဖို့ ပူဇော်ပါမည်”
[စာမျက်နှာ ၂၆ ပါ ရုပ်ပုံ]
သင်၏ဆုတောင်းချက်များသည် ယေဟောဝါရှေ့မှောက် မွှေးကြိုင်သောနံ့သာပေါင်းကဲ့သို့ ဖြစ်ပါသလော