သင့်အတွက် အကျိုးပြုသော ဝတ်ပြုကိုးကွယ်မှု
သင့်အတွက် အကျိုးပြုသော ဝတ်ပြုကိုးကွယ်မှု
“အကျွန်ုပ်မူကား ဘုရားသခင့်ထံတော်သို့ချဉ်းကပ်၍ အကျိုးရှိပါ၏” ဟူ၍ ဆာလံဆရာအာသပ် ဖော်ပြခဲ့သည်။ သူသည် သက်သောင့်သက်သာရှိသောဘဝလိုက်စားရန် ဘုရားသခင်ကို ဂရုမမူသူတို့အား တုပခြင်းသည် ကောင်း၏ဟု ခေတ္တစဉ်းစားမိခဲ့သည်။ သို့သော် အာသပ်သည် ဘုရားသခင်ထံချဉ်းကပ်ခြင်း၏ အကျိုးကျေးဇူးများကို သုံးသပ်ပြီးနောက် ယင်းသည် သူ့အတွက် ကောင်းသည်ဟု ကောက်ချက်ချခဲ့သည်။ (ဆာလံ ၇၃:၂၊ ၃၊ ၁၂၊ ၂၈) ယနေ့ စစ်မှန်သောဝတ်ပြုကိုးကွယ်မှုသည် သင့်အတွက် ကောင်းသလော။ ယင်းက သင့်ကို မည်သို့အကျိုးပြုနိုင်သနည်း။
စစ်မှန်သောဘုရားသခင်ကို ကိုးကွယ်ခြင်းက ကိုယ့်ကိုယ်ကို အဓိကထားသည့်ဘဝလမ်းစဉ်ထက် သာ၍တန်ဖိုးရှိရာများပိုင်ဆိုင်ရန် သင့်ကို ကူညီပေးပါလိမ့်မည်။ ကျွန်ုပ်တို့ကို ‘မေတ္တာတော်အရှင်ဘုရားသခင်’ ဖန်ဆင်းထားသည့်ပုံစံကြောင့် ကျွန်ုပ်တို့စိတ်ဝင်စားရာများကိုသာ လိုက်စားမည်ဆိုလျှင်ပျော်ရွှင်မှု လုံးလုံးရှာတွေ့နိုင်မည်မဟုတ်ပေ။ (၂ ကောရိန္သု ၁၃:၁၁၊ ခမ) “အစွန့်အကြဲခံခြင်းအရာထက် စွန့်ကြဲခြင်းအရာသည် သာ၍မင်္ဂလာရှိသည်” ဟု ယေရှုမိန့်တော်မူရာ၌ ကိုယ်တော်သည် လူ့သဘောသဘာဝနှင့်ပတ်သက်၍ အခြေခံအမှန်တရားကို ဖော်ပြနေခြင်းဖြစ်သည်။ (တမန်တော် ၂၀:၃၅) ယင်းကြောင့်ပင် ကျွန်ုပ်တို့သည် မိတ်ဆွေများ၊ မိသားစုများအတွက် တစ်စုံတစ်ရာပြုလုပ်ပေးသောအခါ ပျော်ရွှင်ကြခြင်းဖြစ်၏။ သို့သော် အကြီးမားဆုံးသောပျော်ရွှင်မှုမှာ ဘုရားသခင်အတွက် တစ်စုံတစ်ရာပြုလုပ်ပေးခြင်းမှ ထွက်ပေါ်လာသည်။ ကိုယ်တော်သည် အခြားမည်သူထက်မဆို ကျွန်ုပ်တို့၏ချစ်ခြင်းမေတ္တာကို ခံထိုက်သောပုဂ္ဂိုလ်ဖြစ်သည်။ ဘဝနောက်ခံအသီးသီးမှလာသော သန်းပေါင်းများစွာသောသူတို့သည် ဘုရားသခင်တောင်းဆိုထားသည့်အတိုင်း ကိုယ်တော်အား ဝတ်ပြုကိုးကွယ်ခြင်းမှ အလွန်စိတ်ကျေနပ်မှုရရှိကြောင်း တွေ့ရှိခဲ့ကြပြီ။—၁ ယောဟန် ၅:၃။
ဘဝတွင် ရည်ရွယ်ချက်တစ်ခုရှိစေ
စစ်မှန်သောဝတ်ပြုကိုးကွယ်ခြင်းက ဘဝတွင် ရည်ရွယ်ချက်တစ်ခုရှိစေသောကြောင့် အကျိုးပြု၏။ ပျော်ရွှင်မှုသည် တစ်စုံတစ်ခုကို အကျိုးရှိရှိအောင်မြင်ရာမှ ထွက်ပေါ်လာသည့်ခံစားချက်နှင့် မကြာခဏဆက်စပ်ထားသည်ကို သင်သတိပြုမိသလော။ လူအများစုသည် မိမိတို့မိသားစု၊ မိတ်ဆွေများ၊ စီးပွားရေး သို့မဟုတ် ပျော်ရွှင်မှုနှင့်ပတ်သက်၍ ဘဝတွင် ရည်ရွယ်ချက်တစ်ခုခု ထားကြသည်။ ဘဝ၏မသေချာမှုများကြောင့် ထိုအရာများက သူတို့ကို ကြိမ်ဖန်များစွာ ပျော်ရွှင်မှုဆုံးရှုံးစေခဲ့သည်။ (ဒေ. ၉:၁၁) သို့သော် စစ်မှန်သောဝတ်ပြုကိုးကွယ်မှုသည် ဘဝ၏အခြားကဏ္ဍအသီးသီးတွင် စိတ်ပျက်စရာများရှိလာသည့်တိုင် ဆက်၍ကျေနပ်မှုဖြစ်စေသော သာ၍မြင့်မားသည့်ရည်ရွယ်ချက်တစ်ခုကို ရှာတွေ့ရန် ကူညီပေးနိုင်သည်။
စစ်မှန်သောဝတ်ပြုကိုးကွယ်ခြင်းတွင် ယေဟောဝါကို သိကျွမ်းခြင်းနှင့် ကိုယ်တော့်အမှုတော်ကို သစ္စာရှိစွာထမ်းဆောင်ခြင်းတို့ ပါဝင်သည်။ ယင်းသို့လုပ်ဆောင်ခြင်းက ဘုရားသခင်နှင့် အလွန်နီးကပ်စေနိုင်သည်။ (ဒေ. ၁၂:၁၃; ယောဟန် ၄:၂၃; ယာကုပ် ၄:၈) ဘုရားသခင်သည် သင့်မိတ်ဆွေဖြစ်လာသည်အထိ ကိုယ်တော့်အကြောင်း သိကျွမ်းရမည်ဆိုသည်မှာ စဉ်းစားရအလွန်ခက်ပေမည်။ သို့သော် လူတို့နှင့် ကိုယ်တော်ဆက်ဆံခဲ့သည့်မှတ်တမ်းများကို တွေးတောခြင်းအားဖြင့်၊ ကိုယ်တော်ဖန်ဆင်းခဲ့သည့်အရာတို့ကို သုံးသပ်ခြင်းအားဖြင့် ကိုယ်တော့်ဥပဓိရုပ်တော်ဆိုင်ရာ အသွင်အပြင်များကို အမှန်ပင်သိကျွမ်းလာနိုင်သည်။ (ရောမ ၁:၂၀) ထို့ပြင် ဘုရားသခင့်နှုတ်မြွက်စကားတော်ကို ဖတ်ရှုခြင်းအားဖြင့် ကျွန်ုပ်တို့ အဘယ်ကြောင့် ဤနေရာတွင်ရောက်ရှိနေကြောင်း၊ ဆင်းရဲခက်ခဲမှုများကို ဘုရားသခင် အဘယ့်ကြောင့် ခွင့်ပြုထားကြောင်း၊ မည်သည့်အချိန်တွင် ယင်းတို့ကို အဆုံးတိုင်စေမည်ဖြစ်ကြောင်းနှင့် ထိုထက်အရေးကြီးသည်ကား ဘုရားသခင့်ရည်ရွယ်ချက်တွင် အရေးကြီးသောအဘယ်အခန်းကဏ္ဍ၌ သင်ပါဝင်နိုင်ကြောင်း စသည်တို့ကို နားလည်လာနိုင်သည်။ (ဟေရှာယ ၄၃:၁၀; ၁ ကောရိန္သု ၃:၉) ထိုသို့သောနားလည်မှုက အသက်ရှင်ရခြင်း၏အကြောင်းရင်းအသစ်ကို ပေးနိုင်သည်!
ပိုကောင်းသူတစ်ဦးဖြစ်လာစေ
စစ်မှန်သောဝတ်ပြုကိုးကွယ်မှုက သင့်ကို ပိုကောင်းသူတစ်ယောက် ဖြစ်လာစေရန် ကူညီပေးသောကြောင့် အကျိုးပြု၏။ စစ်မှန်သောဝတ်ပြုကိုးကွယ်မှုကို ကျင့်သုံးလာသည်နှင့်အမျှ သင်သည် အခြားသူများနှင့် ပို၍ပျော်ပျော်ရွှင်ရွှင်ဆက်ဆံစေနိုင်သော အရည်အသွေးတစ်ခုကို ပြုစုပျိုးထောင်နေခြင်းဖြစ်သည်။ ဘုရားသခင်နှင့် ကိုယ်တော့်သားတော်တို့ထံမှ ရိုးသားစွာပြုမူခြင်း၊ ယဉ်ကျေးစွာပြောဆိုခြင်းနှင့် အားကိုးအားထားနိုင်လောက်အောင် အသက်ရှင်နေထိုင်ခြင်းတို့ကို သင်ယူနေသည်။ (ဧဖက် ၄:၂၀–၅:၅) ထိုသို့ ဘုရားသခင်ကို ကောင်းစွာသိကျွမ်းလာသောအခါ ကိုယ်တော်ကို ချစ်တတ်လာပြီး ကိုယ်တော့်ကို တုပရန် လှုံ့ဆော်ခံရလိမ့်မည်။ သမ္မာကျမ်းစာက ဤသို့ဆိုသည်– “ဘုရားသခင်၏ချစ်သားဖြစ်ကြသည်နှင့်အညီ ဘုရားသခင်ကျင့်တော်မူသည်နည်းတူ ကျင့်ကြလော့။”—ဧဖက် ၅:၁၊ ၂။
ဘုရားသခင့်မေတ္တာတော်ကို တုပနေသူတို့နှင့် ဝန်းရံခံနေရခြင်းသည် ပျော်ရွှင်စရာမဟုတ်ပေလော။ ဝမ်းသာစရာမှာ၊ စစ်မှန်သောဘုရားသခင်ကို ကိုးကွယ်ခြင်းသည် တစ်ဦးတည်းလုပ်ဆောင်ရသည့်အရာ မဟုတ်ချေ။ ယင်းသည် သင့်ကို မှန်ကန်ရာ၊ ကောင်းမွန်ရာကို ချစ်မြတ်နိုးသူတို့နှင့် ပေါင်းသင်းဆက်ဆံမှုရရှိစေနိုင်သည်။ မှန်ပါသည်၊ ဖွဲ့စည်းထားသည့်ဝတ်ပြုရေးအကြောင်း တွေးလိုက်သည့်အခါ သင်စိတ်မသက်မသာဖြစ်ပေမည်။ သို့သော် ရှေ့ဆောင်းပါးတွင် ကျွန်ုပ်တို့တွေ့ရှိခဲ့သည့်အတိုင်း ဝတ်ပြုရေးအများစု၏ ပြဿနာမှာ ယင်းတို့သည် ဖွဲ့စည်းထားခြင်းကြောင့်မဟုတ်ဘဲ နည်းမှန်လမ်းမှန်၊ ရည်ရွယ်ချက်မှန်ဖြင့် မဖွဲ့စည်းထားသောကြောင့်ဖြစ်သည်။ ဖွဲ့စည်းထားသည့်ဝတ်ပြုရေး အမြောက်အမြားသည် ခရစ်ယာန်ဘာသာနှင့်မအပ်စပ်သည့်ရည်ရွယ်ချက်များကို လုပ်ဆောင်ကြသည်။ ဘုရားသခင့်လူမျိုးတော်ကို မြင့်မြတ်သောရည်ရွယ်ချက်တစ်ခုအတွက် ယေဟောဝါကိုယ်တော်တိုင် ဖွဲ့စည်းခဲ့သည်။ သမ္မာကျမ်းစာက ဤသို့ဆိုထားသည်– “ဘုရားသခင်သည် ရုန်းရင်းခတ်သောအမှုကို ပြုစုတော်မမူ။ . . . အသင့်အတင့်ငြိမ်ဝပ်ခြင်းကို ပြုစုတော်မူ၏။” (၁ ကောရိန္သု ၁၄:၃၃) အခြားသန်းနှင့်ချီသောသူတို့ကဲ့သို့ သင်သည် ကောင်းစွာဖွဲ့စည်းထားသော ခရစ်ယာန်အုပ်စုတစ်စုနှင့် ပေါင်းသင်းခြင်းက သင့်အမြင်ပေါ် ကောင်းသောသြဇာလွှမ်းမိုးမှုရှိကြောင်း တွေ့ရပေလိမ့်မည်။
အနာဂတ်အတွက် မျှော်လင့်ချက်
ဘုရားသခင်သည် စစ်မှန်သောကိုးကွယ်သူများ ဤအစီအစဉ်စနစ်၏အဆုံးကို ကပ်ကျော်ပြီး “ဖြောင့်မတ်ခြင်းတရားတည်နေရာ” မြေကြီးသစ်တွင် နေထိုင်နိုင်ရန် သူတို့ကို ဖွဲ့စည်းထားခြင်းဖြစ်သည်ဟု သမ္မာကျမ်းစာက ဖော်ပြသည်။ (၂ ပေတရု ၃:၁၃; ဗျာ. ၇:၉-၁၇) ထို့ကြောင့် သင့်ကိုအကျိုးပြုသော ဝတ်ပြုကိုးကွယ်မှုက ပျော်ရွှင်မှုအတွက် မရှိမဖြစ်လိုအပ်သောအရာဖြစ်သည့် မျှော်လင့်ချက်ကိုပေးသည်။ အချို့တို့သည် အနာဂတ်နှင့်ပတ်သက်သော မိမိတို့၏မျှော်လင့်ချက်များကို အစိုးရတည်မြဲခြင်း၊ စီးပွားရေးအလားအလာကောင်းခြင်း သို့မဟုတ် ကျန်းမာရေးကောင်းရှိခြင်းနှင့် ကျေနပ်ဖွယ်အငြိမ်းစားဘဝတို့အပေါ် အခြေခံထားကြသည်။ သို့သော် ထိုအရာများထဲမှ အနည်းငယ်သာလျှင် ပျော်ရွှင်ဖွယ်အနာဂတ်ကို မျှော်လင့်စေရန် ခိုင်လုံသောအကြောင်းရင်းပေးနိုင်သည်။ တစ်ဖက်တွင်မူ တမန်တော်ပေါလုက ဤသို့ရေးသားခဲ့သည်– ‘အသက်ရှင်တော်မူထသော ဘုရားသခင်၌ ငါတို့သည် ကိုးစား၏။’—၁ တိမောသေ ၄:၁၀။
သင်သည် လုံ့လဝီရိယရှိရှိ ရှာဖွေမည်ဆိုလျှင် စစ်မှန်သောဝတ်ပြုကိုးကွယ်သူများကို ရှာတွေ့နိုင်သည်။ ကွဲပြားနေသော ယနေ့လောကတွင် ချစ်ခြင်းမေတ္တာနှင့် စည်းလုံးမှုက ယေဟောဝါသက်သေများကို ထင်ရှားစွာ ခွဲခြားဖော်ပြပေသည်။ သူတို့သည် လူမျိုးတိုင်း၊ နောက်ခံမျိုးစုံနီးပါးမှ လာကြသူများဖြစ်သော်လည်း တစ်ယောက်နှင့်တစ်ယောက် ချစ်ကြသည့်အပြင် ယေဟောဝါကိုချစ်သည့်အတွက် စည်းလုံးနေကြခြင်းဖြစ်သည်။ (ယောဟန် ၁၃:၃၅) သူတို့တွေ့ကြုံခံစားနေသည့်အရာကို သင်ကိုယ်တိုင်လက်တွေ့ခံစားရန် သင့်အားဖိတ်ခေါ်ပါသည်။ အာသပ် ဤသို့ရေးသားခဲ့သည်– “အကျွန်ုပ်မူကား ဘုရားသခင့်ထံတော်သို့ချဉ်းကပ်၍ အကျိုးရှိပါ၏။”—ဆာလံ ၇၃:၂၈။
[စာမျက်နှာ ၇ ပါ ရုပ်ပုံ]
သင်သည် ဘုရားသခင့်မိတ်ဆွေဖြစ်နိုင်