“ကိုယ်တော်၏တရားကို အကျွန်ုပ်သည် အလွန် နှစ်သက်ပါ၏!”
“ကိုယ်တော်၏တရားကို အကျွန်ုပ်သည် အလွန် နှစ်သက်ပါ၏!”
ဆာလံ ၁၁၉ သည် ဘုရားသခင့်နှုတ်မြွက်တော်အပေါ် ဆာလံဆရာ၏ခံစားချက်ကို ရေးဖွဲ့ထားသော သီချင်းတစ်ပုဒ်ဖြစ်သည်။ သူဤသို့သီဆိုခဲ့၏– ‘ကိုယ်တော်၏ နှုတ်မြွက်တော်ကို နှလုံးထဲမှာသိုထားပါပြီ။’ “အထုံးအဖွဲ့တော်တို့၌ မွေ့လျော်ပါ၏။” “စီရင်တော်မူချက်တို့ကို အစဉ်မပြတ်တောင့်တသောအားဖြင့် အကျွန်ုပ်၏စိတ်နှလုံးကြေကွဲလျက်ရှိပါ၏။” ‘သက်သေခံတော်မူချက်တို့သည် အကျွန်ုပ်မွေ့လျော်ရာဖြစ်ကြပါ၏။’ ‘ပေးတော်မူသော ဆုံးမစကားများကို တောင့်တပါ၏။’ “အကျွန်ုပ်သည် နှစ်သက်သောပညတ်တော်တို့၌ မွေ့လျော်ပါမည်။” “အထုံးအဖွဲ့တော်တို့ကို ဆင်ခြင်အောက်မေ့ပါမည်။” “ကိုယ်တော်၏တရားကို အကျွန်ုပ်သည်အလွန်နှစ်သက်ပါ၏။ တစ်နေ့လုံး ဆင်ခြင်အောက်မေ့လျက်နေပါ၏။”—ဆာလံ ၁၁၉:၁၁၊ ၁၆၊ ၂၀၊ ၂၄၊ ၄၀၊ ၄၇၊ ၄၈၊ ၉၇။
ဘုရားသခင့် နှုတ်မြွက်စကားတော်ကို ဆာလံဆရာ အလွန်တန်ဖိုးထားလေးမြတ်ခဲ့သည်တကား! ဘုရားသခင့်နှုတ်မြွက်စကားတော်၊ သမ္မာကျမ်းစာပါ သတင်းစကားနှင့်ပတ်သက်၍ သင်လည်း ထပ်တူခံစားရသလော။ ယင်းနှင့်ပတ်သက်၍ အလားတူ နှစ်သက်မွေ့လျော်မှုမျိုးကို ပြုစုပျိုးထောင်လိုသလော။ သို့ဆိုပါက ဦးဆုံးအနေဖြင့် သမ္မာကျမ်းစာ မှန်မှန်ဖတ်သည့်အကျင့်၊ ဖြစ်နိုင်လျှင် နေ့စဉ်ဖတ်သည့်အကျင့် ရှိလာစေဖို့လိုသည်။ ယေရှုခရစ်ဤသို့ဆို၏– “လူသည် မုန့်အားဖြင့်သာ အသက်ကိုမွေးရမည်မဟုတ်။ ဘုရားသခင်မိန့်တော်မူသမျှအားဖြင့် အသက်ကိုမွေးရမည်။” (မဿဲ ၄:၄) ဒုတိယအနေနှင့် ဖတ်ရှုသည့်အရာကို တွေးတောဆင်ခြင်ရမည်။ ဘုရားသခင်၊ ကိုယ်တော့်ဂုဏ်ရည်တော်များ၊ ကိုယ်တော့်အလိုတော်နှင့် ရည်ရွယ်ချက်တို့အကြောင်း အမှန်တရားကို တွေးတောဆင်ခြင်ခြင်းဖြင့် ကျမ်းစာကို လေးမြတ်စိတ်တိုးပွားလာမည်။ (ဆာလံ ၁၄၃:၅) အရေးကြီးဆုံးမှာ နေ့စဉ်အသက်တာတွင် ကျမ်းစာသွန်သင်ချက်များကို လိုက်လျှောက်ခြင်းဖြစ်သည်။—လုကာ ၁၁:၂၈; ယောဟန် ၁၃:၁၇။
သမ္မာကျမ်းစာကို နှစ်သက်မွေ့လျော်စိတ် ပျိုးထောင်ပေးခြင်းက သင့်ကို မည်သို့အကျိုးပြုသနည်း။ ‘ဘုရားသခင့်သတိပေးချက်များကို စောင့်ရှောက်သောသူတို့သည် ပျော်ရွှင်ကြ၏’ ဟု ဆာလံ ၁၁၉:၂၊ [ကဘ] ကဆိုသည်။ သမ္မာကျမ်းစာတွင် တွေ့ရသော သတိပေးချက်များက ဘဝပြဿနာများကို အောင်မြင်စွာဖြေရှင်းနိုင်စေသည်။ (ဆာလံ ၁:၁-၃) “မကောင်းသောလမ်းရှိသမျှတို့ကို လွှဲရှောင်” နိုင်စေသည့် ဉာဏ်ပညာ၊ ထိုးထွင်းသိမြင်မှုနှင့် သိနားလည်မှုတို့ကို သင်ရရှိပေလိမ့်မည်။ (ဆာလံ ၁၁၉:၉၈-၁၀၁) ဘုရားသခင်အကြောင်း၊ ကမ္ဘာမြေအတွက် ကိုယ်တော့်ရည်ရွယ်ချက်အကြောင်း အမှန်တရားကိုသိရှိခြင်းက သင့်ဘဝကို ပိုအဓိပ္ပာယ်ရှိစေပြီး အနာဂတ်တွင် တောက်ပသောမျှော်လင့်ချက်ရှိစေသည်။—ဟေရှာယ ၄၅:၁၈; ယောဟန် ၁၇:၃; ဗျာ. ၂၁:၃၊ ၄။
ယေဟောဝါသက်သေများသည် အခြားသူတို့ သမ္မာကျမ်းစာအကြောင်း သိရှိလာပြီး ယင်း၏သတင်းစကားကို နှစ်သက်မြတ်နိုးစိတ် တိုးပွားလာရန် အလွန်ကူညီပေးလိုကြပါသည်။ အောက်ပါကမ်းလှမ်းချက်ကို လက်ခံဖို့ သင့်ကို ကျွန်ုပ်တို့ လှိုက်လှဲစွာဖိတ်ခေါ်ပါသည်။