ယေဟောဝါကိုမျှော်လင့်လျက် ရဲရင့်လော့

ဖွင့်ပါ

ယေဟောဝါကိုမျှော်လင့်လျက် ရဲရင့်လော့

‘ထာဝရဘုရားသခင်ကိုမျှော်လင့်လော့။ အားယူ၍ ရဲရင့်သောစိတ်နှလုံးရှိလော့။ ထာဝရဘုရားသခင်ကို မျှော်လင့်လျက်နေလော့။’—ဆာလံ ၂၇:၁၄။

၁။ မျှော်လင့်ခြင်းသည် မည်မျှအရေးပါသနည်း။ ယင်းအသုံးအနှုန်းကို ကျမ်းစာတွင် မည်သို့အသုံးပြုထားသနည်း။

စစ်မှန်သောမျှော်လင့်ချက်သည် လင်းရောင်ခြည်နှင့်တူ၏။ ယင်းသည် လက်ရှိအခက်အခဲများကိုကျော်၍ရှုမြင်စေပြီး အနာဂတ်ကို ရဲရင့်စွာ၊ ပျော်ရွှင်စွာ ရင်ဆိုင်နိုင်စေသည်။ ယေဟောဝါသာလျှင် စစ်မှန်သောမျှော်လင့်ချက်၏ရင်းမြစ်ဖြစ်ပြီး မိမိ၏မှုတ်သွင်းခံစကားတော်အားဖြင့် ယင်းကိုပေးထားသည်။ (၂ တိမောသေ ၃:၁၆) အမှန်မှာ “မျှော်လင့်ခြင်း၊” “မျှော်လင့်ခဲ့သည်” နှင့် “မျှော်လင့်နေခြင်း” ဟူသောစကားလုံးများသည် သမ္မာကျမ်းစာတွင် အကြိမ်ပေါင်းများစွာပါရှိပြီး ကောင်းသောအရာတစ်ခုခုကို ထက်သန်စွာ၊ ယုံကြည်စိတ်ချစွာ မျှော်လင့်ခြင်းနှင့် မျှော်လင့်နေသည့်အရာ နှစ်ခုစလုံးကို ရည်ညွှန်းသည်။ * ယင်းမျှော်လင့်ခြင်းသည် အခြေအမြစ်မရှိသော၊ ပြည့်စုံနိုင်ခြေမရှိသော အလိုဆန္ဒမျှသာမဟုတ်ပါ။

၂။ မျှော်လင့်ခြင်းက ယေရှု၏အသက်တာကို မည်သို့အကျိုးသက်ရောက်ခဲ့သနည်း။

^၂ယေရှုသည် စမ်းသပ်မှုများနှင့် အခက်အခဲများ ကြုံရသောအခါ လက်ရှိအခြေအနေကိုကျော်၍ရှုမြင်ခဲ့ပြီး ယေဟောဝါအား မျှော်လင့်ခဲ့သည်။ “ထိုသခင်သည် မိမိရှေ့၌ထားသောဝမ်းမြောက်ခြင်းအကြောင်းကြောင့် ရှက်ကြောက်သောအရာကိုမမှတ်ဘဲ လက်ဝါးကပ်တိုင်၌ခံပြီးမှ ဘုရားသခင်၏ပလ္လင်တော်လက်ယာဘက်၌ ထိုင်နေတော်မူ၏။” (ဟေဗြဲ ၁၂:၂) ယေရှုသည် ယေဟောဝါ၏အကြွင်းမဲ့ပိုင်သအုပ်စိုးမှု သင်္ကာယနကင်းရှင်းရေးနှင့် ဘုရားသခင့်နာမတော် သန့်ရှင်းမြင့်မြတ်ရေးတို့ကိုသာ အဓိကအာရုံစိုက်သောကြောင့် မည်သည့်အရာပင်ကြုံရပါစေ ဘုရားသခင်ကိုနာခံသည့်လမ်းစဉ်မှ သွေဖည်မသွားခဲ့ပါ။

၃။ မျှော်လင့်ခြင်းသည် ဘုရားသခင့်ကျေးကျွန်များ၏ အသက်တာတွင် အဘယ်အခန်းကဏ္ဍမှ ပါဝင်သနည်း။

^၃ဘုရင်ဒါဝိဒ်သည် မျှော်လင့်ခြင်းနှင့်ရဲရင့်ခြင်း၏ ဆက်စပ်မှုကို ဤသို့ဖော်ပြခဲ့သည်– ‘ထာဝရဘုရားသခင်ကိုမျှော်လင့်လော့။ အားယူ၍ ရဲရင့်သောစိတ်နှလုံးရှိလော့။ ထာဝရဘုရားသခင်ကို မျှော်လင့်လျက်နေလော့။’ (ဆာလံ ၂၇:၁၄) ရဲရင့်သောနှလုံးသားပိုင်ဆိုင်လိုပါက ကျွန်ုပ်တို့၏မျှော်လင့်ခြင်းကို မသေချာမရေရာဖြစ်ခွင့်၊ မှုန်ဝါးသွားခွင့်မပြုရပေ။ ယင်းကို စိတ်တွင် ရှင်းရှင်းလင်းလင်းရှိနေစေပြီး လေးမြတ်တန်ဖိုးထားရမည်။ သို့ဖြင့် တပည့်များကို ယေရှုမိန့်မှာခဲ့သောလုပ်ငန်း၌ ပါဝင်သောအခါ ကိုယ်တော့်နည်းတူ ရဲရင့်ခြင်းနှင့်ဇွဲတင်ပြနိုင်မည်ဖြစ်သည်။ (မဿဲ ၂၄:၁၄; ၂၈:၁၉၊ ၂၀) မျှော်လင့်ခြင်းသည် ယုံကြည်ခြင်းနှင့်မေတ္တာတို့ကဲ့သို့ပင် အရေးပါပြီး တည်ကြည်မြဲမြံစေသော အရည်အသွေးဖြစ်ကာ ဘုရားသခင့်ကျေးကျွန်များ၏ အသက်တာတွင် ထင်ရှားသောလက္ခဏာတစ်ခုဖြစ်သည်။—၁ ကောရိန္သု ၁၃:၁၃။

‘မျှော်လင့်ခြင်းနှင့်ကြွယ်ဝ’ နေသလော

၄။ ဝိညာဉ်တော်ဖွားခရစ်ယာန်များနှင့် သူတို့၏အပေါင်းအပါ “အခြားသိုး” သည် အဘယ်အရာကို ထက်သန်စွာ စောင့်မျှော်နေကြသနည်း။

^၄ဘုရားသခင့်လူမျိုးတွင် အံ့ချီးဖွယ်အနာဂတ်ရှိသည်။ ဝိညာဉ်တော်ဖွားခရစ်ယာန်များသည် ခရစ်တော်နှင့်အတူ ကောင်းကင်တွင်အမှုဆောင်ရန် ထက်သန်စွာ စောင့်မျှော်လျက်ရှိသည်။ “အခြားသိုး” များမူ “ဘုရားသခင် [မြေကြီးဆိုင်ရာ] သားတို့၏ ထူးမြတ်သောလွတ်ခြင်းချမ်းသာတည်းဟူသော ဖောက်ပြန်ပျက်စီးခြင်းအနှောင်အဖွဲ့မှ ကယ်လွှတ်ခြင်းချမ်းသာကိုဝင်စား” ရန် မျှော်လင့်စောင့်စားနေကြသည်။ (ယောဟန် ၁၀:၁၆; ရောမ ၈:၁၉-၂၁; ဖိလိပ္ပိ ၃:၂၀) ထို “ထူးမြတ်သောလွတ်ခြင်းချမ်းသာ” တွင် အပြစ်နှင့် ယင်း၏ကြောက်မက်ဖွယ်ဆိုးကျိုးများမှ လွတ်မြောက်ခြင်းပါဝင်သည်။ “ကောင်းမြတ်စုံလင်သောဆုကျေးဇူးရှိသမျှ” ကိုပေးသနားတော်မူရှင် ယေဟောဝါသည် မိမိအပေါ်သစ္စာရှိသူများအား အကောင်းဆုံးဆုကျေးဇူးကိုသာ ပေးမည်မှာသေချာသည်။—ယာကုပ် ၁:၁၇; ဟေရှာယ ၂၅:၈။

၅။ ကျွန်ုပ်တို့သည် မည်သို့အားဖြင့် ‘မျှော်လင့်ခြင်းနှင့်ကြွယ်ဝ’ လာမည်နည်း။

^၅ခရစ်ယာန်မျှော်လင့်ခြင်းသည် ကျွန်ုပ်တို့၏အသက်တာတွင် မည်မျှအရေးပါသင့်သနည်း။ ရောမ ၁၅:၁၃ တွင် ဤသို့ဖတ်ရ၏– ‘သင်တို့သည် သန့်ရှင်းသောဝိညာဉ်တော်၏တန်ခိုးအားဖြင့် မျှော်လင့်ခြင်းနှင့်ကြွယ်ဝစေခြင်းငှာ ယုံကြည်သောစိတ်ရှိ၍ ဝမ်းမြောက်သက်သာခြင်းအမျိုးမျိုးတို့နှင့် ပြည့်စုံမည်အကြောင်း မျှော်လင့်ခြင်း၏အရှင် ဘုရားသခင်သည် ကယ်မသနားတော်မူပါစေသော။’ မှန်ပါသည်။ မျှော်လင့်ခြင်းသည် အမှောင်ထဲမှ ဖယောင်းတိုင်ငယ်နှင့်မတူဘဲ တောက်ပသောအရုဏ်ဦးအလင်းတန်းကဲ့သို့ လူတစ်ဦး၏ဘဝကို ငြိမ်သက်ခြင်း၊ ဝမ်းမြောက်ခြင်း၊ ရည်ရွယ်ချက်၊ ရဲစွမ်းသတ္တိတို့နှင့် ကြွယ်ဝစေသည်။ ဘုရားသခင့်နှုတ်မြွက်တော်ကို ယုံကြည်ပြီး သန့်ရှင်းသောဝိညာဉ်တော်ရရှိသောအခါ ‘မျှော်လင့်ခြင်းနှင့်ကြွယ်ဝ’ ကြောင်း သတိပြုပါ။ ရောမ ၁၅:၄ က ဤသို့ဆိုသည်– ‘ငါတို့သည် ကျမ်းစာ၌ပါသော သည်းခံခြင်း၊ သက်သာခြင်းအကြောင်းများကိုအမှီပြု၍ မျှော်လင့်ရသောအခွင့်ရှိစေခြင်းငှာ ကျမ်းစာ၌ အထက်ကရေးထားသမျှသည် ငါတို့ကို ဆုံးမလို၍ ရေးထားသတည်း။’ ထို့ကြောင့် သင့်ကိုယ်သင် ဤသို့မေးပါ– ‘ငါ့ရဲ့မျှော်လင့်ချက် တောက်ပနေအောင် ကျမ်းစာကိုနေ့တိုင်းဖတ်သလား။ ဘုရားသခင့်သန့်ရှင်းသောဝိညာဉ်တော်ရဖို့ မကြာခဏဆုတောင်းရဲ့လား။’—လုကာ ၁၁:၁၃။

၆။ မျှော်လင့်ချက်တောက်ပနေစေရန် အဘယ်အရာများကို သတိနှင့်ရှောင်ရမည်နည်း။

^၆ကျွန်ုပ်တို့၏စံနမူနာရှင် ယေရှုသည် ဘုရားသခင့်နှုတ်မြွက်တော်မှ ခွန်အားရရှိခဲ့သည်။ ကိုယ်တော့်အကြောင်း လေးလေးနက်နက်တွေးတောခြင်းဖြင့် “အားလျော့စိတ်ပျက်ခြင်းနှင့်ကင်းလွတ်” နိုင်မည်ဖြစ်သည်။ (ဟေဗြဲ ၁၂:၃) ကျွန်ုပ်တို့၏စိတ်တွင် ဘုရားပေးမျှော်လင့်ချက် မှေးမှိန်လာပါက သို့မဟုတ် ရုပ်ပစ္စည်းများ၊ လောကပန်းတိုင်များဘက်သို့ အာရုံပြောင်းသွားပါက အနှေးနှင့်အမြန် ဝိညာဉ်ရေးမောပန်းနွမ်းလျလာပြီး ကိုယ်ကျင့်တရားစံနှုန်းများအတိုင်းနေထိုင်ရန် ရဲစွမ်းသတ္တိရှိတော့မည်မဟုတ်ပေ။ နောက်ဆုံး “ယုံကြည်ခြင်းသင်္ဘောပျက်” သွားနိုင်သည်။ (၁ တိမောသေ ၁:၁၉) စစ်မှန်သောမျှော်လင့်ချက်မှာမူ ကျွန်ုပ်တို့၏ယုံကြည်ခြင်းကို ခိုင်မာစေသည်။

မျှော်လင့်ခြင်း—ယုံကြည်ခြင်းအတွက် အရေးပါ

၇။ မျှော်လင့်ခြင်းသည် ယုံကြည်ခြင်းအတွက် မည်သည့်နည်းဖြင့် အရေးပါသနည်း။

^၇သမ္မာကျမ်းစာက “ယုံကြည်ခြင်းသည် မျှော်လင့်သောအရာတို့ကို မျက်မှောက်ပြုခြင်းဖြစ်၏။ မမြင်သေးသောအရာတို့ကို သိမှတ်စွဲလမ်းခြင်းအကြောင်းဖြစ်၏” ဟုဆိုသည်။ (ဟေဗြဲ ၁၁:၁) ထို့ကြောင့် မျှော်လင့်ခြင်းသည် ယုံကြည်ခြင်းအပေါ် ထပ်ဖြည့်စွက်ရသောအရည်အသွေးတစ်ခုမျှမဟုတ်ဘဲ ယုံကြည်ခြင်းနှင့်တစ်ပေါင်းတစ်စည်းတည်းဖြစ်နေသော အရေးပါသည့်အစိတ်အပိုင်းဖြစ်သည်။ အာဗြဟံ၏အဖြစ်ကို သုံးသပ်ကြည့်ပါ။ လူ့ရှုထောင့်မှဆိုလျှင် ယေဟောဝါသည် သူနှင့်သူ့ဇနီးစာရာကို သားတစ်ဦးမွေးဖွားစေမည်ဟု ကတိပြုစဉ်က သူတို့သည် သားသမီးရနိုင်သည့်အရွယ်လွန်နေပြီဖြစ်သည်။ (ကမ္ဘာဦး ၁၇:၁၅-၁၇) အာဗြဟံ မည်သို့တုံ့ပြန်သနည်း။ “မိမိသည် လူမျိုးအများတို့၏အဘဖြစ်မည်ဟု မျှော်လင့်စရာအကြောင်းမရှိဘဲလျက် ယုံကြည်၍မျှော်လင့်လေ၏။” (ရောမ ၄:၁၈) ထိုမျှော်လင့်ချက်ကြောင့် အာဗြဟံသည် သားတစ်ဦးရရှိမည်ဟု အခိုင်အမာယုံကြည်ခဲ့သည်။ သူ၏ယုံကြည်ခြင်းကြောင့် မျှော်လင့်ခြင်း တောက်ပခိုင်မာလာသည်။ အာဗြဟံနှင့်စာရာသည် နေအိမ်နှင့်ဆွေမျိုးများကိုပင်စွန့်ပြီး တိုင်းတစ်ပါးတွင် တဲဖြင့်နေထိုင်သည်အထိ ရဲစွမ်းသတ္တိရှိခဲ့သည်။

၈။ သစ္စာရှိရှိခံနိုင်ရည်တင်ပြခြင်းသည် မျှော်လင့်ခြင်းကို မည်သို့အားဖြည့်ပေးသနည်း။

^၈အာဗြဟံသည် ယေဟောဝါအား နာခံဖို့ခက်ခဲသည့်အချိန်များတွင်ပင် အကြွင်းမဲ့နာခံခြင်းဖြင့် သူ၏မျှော်လင့်ချက်ကို တောက်ပစေခဲ့သည်။ (ကမ္ဘာဦး ၂၂:၂၊ ၁၂) ထိုနည်းတူ ယေဟောဝါ၏လုပ်ငန်းတွင် နာခံမှုနှင့်ခံနိုင်ရည်ရှိခြင်းဖြင့် ကောင်းချီးရမည်ကို ယုံကြည်စိတ်ချနိုင်သည်။ “ခံနိုင်ရည်သည် ဘုရားသခင်၏နှစ်သက်မှုကို” ရရှိစေပြီး ယင်းကတစ်ဖန် “မျှော်လင့်ခြင်း” ကိုပြုစုတတ်၏။ ထိုမျှော်လင့်ခြင်းသည် ကျွန်ုပ်တို့အား “စိတ်ပျက်စေလိမ့်မည်မဟုတ်” ဟုပေါလုရေးသားခဲ့သည်။ (ရောမ ၅:၄၊ ၅၊ ခမ) ထို့ကြောင့် “သင်တို့ရှိသမျှသည် . . . ထိုသို့သောလုံ့လဝီရိယကိုထုတ်၍ အဆုံးတိုင်အောင် ယုံမှားခြင်းနှင့်ကင်းသောမျှော်လင့်ခြင်းနှင့် ပြည့်စုံစေခြင်းငှာ ငါတို့သည်အလိုရှိကြ၏” ဟု သူရေးခဲ့သည်။ (ဟေဗြဲ ၆:၁၁၊ ၁၂) ယေဟောဝါနှင့်ရင်းနှီးသောဆက်ဆံရေးကို အခြေပြုသည့် ထိုသို့သောအပြုသဘောသည် မည်သည့်ခက်ခဲမှုကိုမဆို ရဲစွမ်းသတ္တိရှိရှိ၊ ပျော်ပျော်ကြီးပင်ရင်ဆိုင်နိုင်စေသည်။

“မျှော်လင့်လျက်ဝမ်းမြောက်ကြလော့”

၉။ အဘယ်အရာကို မှန်မှန်ပြုလုပ်ခြင်းက “မျှော်လင့်လျက်ဝမ်းမြောက်” စေနိုင်သနည်း။

^၉ဘုရားသခင်ပေးသောမျှော်လင့်ချက်သည် လောကကမ်းလှမ်းသည့် မည်သည့်အရာထက်မဆို လုံးဝသာလွန်သည်။ ဆာလံ ၃၇:၃၄ က ဤသို့ဆို၏– ‘ထာဝရဘုရားသခင်ကိုမျှော်လင့်၍ လမ်းတော်ကိုလျှောက်သွားလော့။ ပြည်တော်ကိုအမွေခံရသောအခွင့်နှင့် ချီးမြှောက်တော်မူမည်။ မတရားသောသူတို့ဆုံးရှုံးခြင်းကို သင်သည် ကြည့်မြင်ရလိမ့်မည်။’ မှန်ပါသည်။ ကျွန်ုပ်တို့သည် “မျှော်လင့်လျက် ဝမ်းမြောက်” သင့်သည်။ (ရောမ ၁၂:၁၂) သို့သော် ထိုသို့ဝမ်းမြောက်နိုင်ရန် မျှော်လင့်ခြင်းအကြောင်း အဆက်မပြတ်တွေးတောနေရမည်။ ဘုရားပေးမျှော်လင့်ချက်အကြောင်း သင်မှန်မှန်တွေးတောပါသလော။ ကျန်းမာရေးကောင်းပြီး သောကကင်းဝေးကာ သင်ချစ်မြတ်နိုးရသူများနှင့်အတူနေထိုင်၍ ကျေနပ်ဖွယ်လုပ်ငန်းရှိသည့် ပရဒိသုတွင် သင်ရှိနေသည်ဟု မြင်ယောင်ကြည့်နိုင်သလော။ ကျွန်ုပ်တို့၏စာပေစာတမ်းများတွင်ပါသော ပရဒိသုမြင်ကွင်းများကို တွေးတောပါသလော။ ထိုသို့တွေးတောခြင်းသည် ခမ်းနားလှပသောရှုခင်းကိုမြင်နိုင်ရန် ပြတင်းပေါက်ကို ဆေးကြောသန့်စင်ခြင်းနှင့်တူပေမည်။ မှန်ကိုမဆေးကြောပါက ဖုန်များတက်လာပြီး လှပသောရှုခင်းမှာ မသဲကွဲတော့ပေ။ ထိုအခါ အခြားအရာများဘက်သို့ အာရုံပြောင်းသွားနိုင်သည်။ ဘယ်သောအခါမျှ ကျွန်ုပ်တို့ထိုသို့မဖြစ်ပါစေနှင့်။

၁၀။ ဆုလာဘ်ကို မျှော်လင့်နေခြင်းက ယေဟောဝါနှင့်ကျွန်ုပ်တို့၏ဆက်ဆံရေးကို အဘယ်ကြောင့် ကောင်းစွာဖော်ပြသနည်း။

^၁၀ယေဟောဝါကိုဝတ်ပြုရသည့် အဓိကအကြောင်းရင်းမှာ ကိုယ်တော်ကိုချစ်၍ဖြစ်သည်။ (မာကု ၁၂:၃၀) သို့သော် ရရှိမည့်ဆုလာဘ်ကိုလည်း စိတ်ထက်သန်စွာ စောင့်မျှော်သင့်သည်။ အမှန်မှာ၊ ယေဟောဝါကိုယ်တိုင် ကျွန်ုပ်တို့ကို ထိုသို့ဖြစ်စေလိုသည်။ ဟေဗြဲ ၁၁:၆ က ဤသို့ဆို၏– “ယုံကြည်ခြင်းမရှိလျှင် ဘုရားသခင်၏စိတ်တော်နှင့်မတွေ့နိုင်။ အကြောင်းမူကား ဘုရားသခင့်အထံတော်သို့ချဉ်းကပ်သောသူသည် ဘုရားသခင်ရှိတော်မူသည်ကိုလည်းကောင်း၊ ကိုယ်တော်ကိုရှာသောသူအား အကျိုးပေးတော်မူသည်ကိုလည်းကောင်း ယုံကြည်ရမည်။” မိမိကို ဆုကျေးဇူးပေးသနားရှင်အဖြစ် ယေဟောဝါ အဘယ်ကြောင့် ရှုမြင်စေလိုတော်မူသနည်း။ အကြောင်းမှာ ယင်းက ကောင်းကင်ခမည်းတော်ကို ကျွန်ုပ်တို့ကောင်းစွာသိကျွမ်းကြောင်း ဖော်ပြသောကြောင့်ဖြစ်သည်။ ကိုယ်တော်သည် ရက်ရောပြီး မိမိသားသမီးများကို ချစ်မြတ်နိုးတော်မူသည်။ ကျွန်ုပ်တို့တွင် “အနာဂတ်နှင့် မျှော်လင့်ချက်” သာမရှိပါက မည်မျှစိတ်ညစ်ပြီး အလွယ်တကူစိတ်ဓာတ်ကျမည်ကို စဉ်းစားကြည့်ပါ။—ယေရမိ ၂၉:၁၀-၁၂၊ ကဘ။

၁၁။ ဘုရားသခင်ပေးသောမျှော်လင့်ချက်က ပညာရှိဆုံးဖြတ်ချက်များချရန် မောရှေကို မည်သို့ထောက်ကူသနည်း။

^၁၁ဘုရားသခင်ပေးသော မျှော်လင့်ခြင်းကို အာရုံစိုက်ခြင်းနှင့်ပတ်သက်သော စံနမူနာရှင်တစ်ဦးမှာ မောရှေဖြစ်သည်။ “ဖာရောဘုရင်သမီး၏သား” အနေနှင့် မောရှေတွင် အာဏာ၊ ဂုဏ်ဓနရှိပြီး ယင်းတို့ကိုစိတ်ကြိုက်အသုံးပြုနိုင်သည်။ သူသည် ထိုအရာများကို လိုက်စားမည်လော၊ ယေဟောဝါ အမှုဆောင်မည်လော။ ယေဟောဝါအမှုဆောင်ရန် သူရွေးချယ်ခဲ့သည်။ အဘယ်ကြောင့်နည်း။ အကြောင်းမှာ “အနာဂတ်ကာလတွင်ရရှိမည့်အကျိုးကို အာရုံစူးစိုက်လျက်နေသောကြောင့်” ဖြစ်၏။ (ဟေဗြဲ ၁၁:၂၄-၂၆၊ ခမ) မှန်ပါသည်။ မောရှေသည် ယေဟောဝါပေးသောမျှော်လင့်ခြင်းကိုသာ အာရုံစိုက်ခဲ့သည်မှာ သေချာသည်။

၁၂။ ခရစ်ယာန်မျှော်လင့်ခြင်းသည် အဘယ်ကြောင့် သံခမောက်နှင့်တူသနည်း။

^၁၂တမန်တော်ပေါလုသည် မျှော်လင့်ခြင်းကို သံခမောက်နှင့်နှိုင်းယှဉ်ခဲ့သည်။ အကြောင်းမှာ ပုံဆောင်သံခမောက်သည် ကျွန်ုပ်တို့၏စိတ်နှလုံးကို ကာကွယ်ပေးသည်၊ ပညာရှိဆုံးဖြတ်ချက်များ ချစေနိုင်သည်၊ ဦးစားပေးရာများချမှတ်စေပြီး သမာဓိစောင့်သိစေနိုင်သောကြောင့်ဖြစ်သည်။ (၁ သက်သာလောနိတ် ၅:၈) သင်၏ ပုံဆောင်သံခမောက်ကို အချိန်ပြည့်ဆောင်းထားပါသလော။ ထိုသို့ဆောင်းထားပါက မောရှေနှင့်ပေါလုတို့ကဲ့သို့ “မမြဲသောစည်းစိမ်ကိုမကိုးစားဘဲ ငါတို့ခံစားဖို့ရာအလုံးစုံတို့ကို ကြွယ်ဝစွာပေးသနားတော်မူသော အသက်ရှင်တော်မူသောဘုရားသခင်ကို ကိုးစား” ပေလိမ့်မည်။ ခေတ်ရေစီးကြောင်းကိုဆန်တက်ပြီး ကိုယ်ကျိုးရှာလမ်းစဉ်များကို ကျောခိုင်းရန် ရဲစွမ်းသတ္တိလိုသည်မှာ မှန်ပါသည်။ သို့သော် အားစိုက်ထုတ်ရကျိုးနပ်ပါသည်။ အမှန်ဆိုလျှင် ယေဟောဝါအား မျှော်လင့်ပြီးချစ်မြတ်နိုးသူများ ရရှိမည့် “မှန်သောအသက်” တမျှ တန်ဖိုးမရှိသောအရာများကို အဘယ်ကြောင့်လိုက်စားနေမည်နည်း။—၁ တိမောသေ ၆:၁၇၊ ၁၉။

“ငါသည် သင့်ကိုမစွန့်”

၁၃။ ယေဟောဝါသည် မိမိ၏သစ္စာရှိကျေးကျွန်များကို မည်သို့အာမခံတော်မူသနည်း။

^၁၃ဤလောကသည် “ဆင်းရဲခြင်း” ဝေဒနာများကို တိုး၍ခံစားလာရသောကြောင့် လက်ရှိအစီအစဉ်စနစ်ကို မျှော်လင့်အားထားသူများသည် သူတို့ရင်ဆိုင်နေရသော အဖြစ်ဆိုးများကို လေးလေးနက်နက်စဉ်းစားရမည်။ (မဿဲ ၂၄:၈) သို့သော် ယေဟောဝါကိုမျှော်လင့်သူများမူ မကြောက်ရွံ့ကြပါ။ သူတို့သည် “လုံခြုံစွာနေ၍ ဘေးကိုမကြောက်ဘဲ ငြိမ်ဝပ်လိမ့်မည်။” (သု. ၁:၃၃) အကြောင်းမှာ သူတို့သည် လက်ရှိအစီအစဉ်စနစ်ကို အားမကိုးဘဲ ပေါလု၏ ဤအကြံပြုချက်ကို ဝမ်းမြောက်ဝမ်းသာလိုက်နာကြသောကြောင့်ဖြစ်၏– “သင်တို့၏ကျင့်ကြံပြုမူခြင်းသည် ငွေကိုတပ်မက်ခြင်းနှင့်ကင်းလွတ်၍ ကိုယ်၌ရှိသောဥစ္စာနှင့် ရောင့်ရဲခြင်းရှိကြလော့။ အကြောင်းမူကား ‘ငါသည်သင့်ကိုမစွန့်၊ သင့်ကိုအလျှင်းပစ်၍မထား’ ဟုကတိတော်ရှိ၏။”—ဟေဗြဲ ၁၃:၅။

၁၄။ ခရစ်ယာန်များသည် ရုပ်ပစ္စည်းလိုအပ်ရာများအတွက် အဘယ်ကြောင့် အလွန်အမင်းစိုးရိမ်စရာ မလိုသနည်း။

^၁၄ထိုကတိတော်အရ ကျွန်ုပ်တို့အား ဘုရားသခင် ဂရုစိုက်စောင့်ရှောက်မည်ကို သံသယဖြစ်စရာမလိုပါ။ ဘုရားသခင့်မေတ္တာပါစောင့်ရှောက်မှုကို ယေရှုလည်း ဤသို့အာမခံသည်– “ဘုရားသခင်၏ နိုင်ငံတော်နှင့်ဖြောင့်မတ်ခြင်းတရားတော်ကို ရှေးဦးစွာရှာကြလော့။ နောက်မှ ထိုအရာများ [ဘဝတွင် ရုပ်ပစ္စည်းလိုအပ်ရာများ] ကိုထပ်၍ ပေးတော်မူလတ္တံ့။ ထို့ကြောင့် နက်ဖြန်အဖို့ မစိုးရိမ်ကြနှင့်။ နက်ဖြန်နေ့သည် မိမိအဖို့စိုးရိမ်လိမ့်မည်။” (မဿဲ ၆:၃၃၊ ၃၄) ယေဟောဝါ၏နိုင်ငံတော်အတွက် ဇွဲရှိပြီး တစ်ချိန်တည်းတွင် ကျွန်ုပ်တို့၏ ကာယရေးလိုအပ်ရာများကို အပြည့်အဝတာဝန်ယူရသည်မှာ မလွယ်ကြောင်း ယေဟောဝါသိတော်မူသည်။ ထို့ကြောင့် ယေဟောဝါသည် ကျွန်ုပ်တို့၏လိုအပ်ရာများကို ဂရုစိုက်စောင့်ရှောက်နိုင်စွမ်းရှိကြောင်းနှင့် ထိုသို့ပြုလုပ်ပေးလိုကြောင်း အပြည့်အဝယုံကြည်စိတ်ချကြပါစို့။—မဿဲ ၆:၂၅-၃၂; ၁၁:၂၈-၃၀။

၁၅။ ခရစ်ယာန်များသည် မျက်စိကို မည်သို့ရိုးရှင်းစွာထားကြသနည်း။

^၁၅ကျွန်ုပ်တို့၏မျက်စိကို ရိုးရှင်းစွာထားခြင်းဖြင့် ယေဟောဝါကို မှီခိုအားထားကြောင်း တင်ပြကြသည်။ (မဿဲ ၆:၂၂၊ ၂၃) ရိုးရှင်းသောမျက်စိသည် ရိုးသားဖြောင့်မတ်ပြီး ရည်ရွယ်ချက်မှန်ရှိသည်။ လိုဘမကြီး၊ ကိုယ်ကျိုးရှာသောရည်မှန်းချက်လည်းမရှိပေ။ ရိုးရှင်းသောမျက်စိရှိခြင်းဟူသည် ဆင်းရဲစုတ်ပြတ်စွာနေထိုင်ခြင်း၊ ရုပ်ပိုင်းလိုအပ်ရာများကို တာဝန်မယူခြင်းကို မဆိုလိုပေ။ ယင်းအစား ယေဟောဝါ၏အမှုတော်ကို ပထမနေရာတွင်ထားခြင်းဖြင့် “ရှင်းလင်းသောစိတ်သဘော” တင်ပြခြင်းကိုဆိုလိုသည်။—၂ တိမောသေ ၁:၇။

၁၆။ မျက်စိကိုရိုးရှင်းစွာထားနိုင်ရန် ယုံကြည်ခြင်းနှင့်ရဲရင့်ခြင်း အဘယ်ကြောင့် လိုအပ်သနည်း။

^၁၆မျက်စိကိုရိုးရှင်းစွာထားရန် ယုံကြည်ခြင်းနှင့် ရဲရင့်ခြင်းလိုသည်။ ဥပမာ၊ အလုပ်ရှင်တစ်ဦးသည် ခရစ်ယာန်အစည်းအဝေးများရှိသည့်အချိန်တွင် ပုံမှန်အလုပ်ဆင်းခိုင်းပါက သင့်ဝိညာဉ်ရေးကို ရဲရင့်စွာ ဆက်ဦးစားထားနေမည်လော။ မိမိကျေးကျွန်များကို ဂရုစိုက်စောင့်ရှောက်ပေးမည်ဟူသော ယေဟောဝါ၏ကတိတော်ကို လူတစ်ဦး သံသယဖြစ်နေမည်ဆိုလျှင် သူ့ကို စာတန် ဖိအားပိုပေးရုံဖြင့် အစည်းအဝေးအားလုံးကို တက်ရောက်တော့မည်မဟုတ်ပေ။ မှန်ပါသည်၊ ကျွန်ုပ်တို့သာ ယုံကြည်ခြင်းကင်းမဲ့ပါက စာတန်သည် ကျွန်ုပ်တို့ကို ချုပ်ကိုင်နိုင်မည်ဖြစ်ပြီး ယေဟောဝါမဟုတ်ဘဲ သူသာလျှင် ကျွန်ုပ်တို့၏ဦးစားထားရာများကို ချမှတ်ပေးမည်ဖြစ်သည်။ ဝမ်းနည်းဖွယ်ကောင်းလိုက်လေခြင်း!—၂ ကောရိန္သု ၁၃:၅။

‘ယေဟောဝါကိုမျှော်လင့်လော့’

၁၇။ ယေဟောဝါကို ယုံကြည်ကိုးစားသူတို့သည် ယခုပင် မည်သို့ကောင်းချီးခံစားရသနည်း။

^၁၇ယေဟောဝါကို ယုံကြည်မျှော်လင့်သူတို့သည် မည်သည့်အခါမျှ ရှုံးနိမ့်မည်မဟုတ်ကြောင်း ကျမ်းစာက အကြိမ်ကြိမ်ဖော်ပြသည်။ (သု. ၃:၅၊ ၆; ယေရမိ ၁၇:၇) မှန်ပါသည်။ တစ်ခါတစ်ရံ သူတို့သည် ရုပ်ပစ္စည်းအနည်းငယ်နှင့် ရောင့်ရဲရမည်ဖြစ်သော်လည်း ရှေ့တွင်ရရှိမည့် ကောင်းချီးများနှင့်ယှဉ်လျှင် ယင်းသည် သေးငယ်သောပေးဆပ်မှုသာဖြစ်သည်ဟု ယူမှတ်ကြသည်။ သူတို့သည် ယေဟောဝါကိုမျှော်လင့်ကြောင်းနှင့် ကိုယ်တော့်အပေါ် သစ္စာရှိသူများ၏စိတ်နှလုံးအလိုရှိရာအားလုံး ပြည့်စုံမည်ကို ယုံကြည်ကြောင်း တင်ပြကြသည်။ (ဆာလံ ၃၇:၄၊ ၃၄) ထို့ကြောင့် ယခုအချိန်တွင်ပင် သူတို့ပျော်ရွှင်ကြသည်။ “ဖြောင့်မတ်သောသူ၏မျှော်လင့်ခြင်းသည် ဝမ်းမြောက်စရာအကြောင်းဖြစ်၏။ ဆိုးသောသူ၏မျှော်လင့်ခြင်းမူကား ပျောက်ပျက်လိမ့်မည်။”—သု. ၁၀:၂၈။

၁၈၊ ၁၉။ (က) အဘယ်မေတ္တာပါသောအာမခံချက်ကို ယေဟောဝါပေးသနားတော်မူသနည်း။ (ခ) ယေဟောဝါကို ကျွန်ုပ်တို့၏ “လက်ယာဘက်” တွင် မည်သို့ရှိစေနိုင်သနည်း။

^၁၈ကလေးငယ်တစ်ဦးသည် မိမိဖခင်နှင့်လက်တွဲပြီးလျှောက်သောအခါ လုံခြုံသည်ဟုခံစားရသည်။ ကောင်းကင်ခမည်းတော်နှင့်အတူ လျှောက်လှမ်းသောအခါ ကျွန်ုပ်တို့လည်း အလားတူခံစားရသည်။ ‘မစိုးရိမ်နှင့်။ ငါသည် သင့်ဘက်မှာရှိ၏။ သင့်ကိုစောင့်မမည်။ အကြောင်းမူကား သင်၏ဘုရားသခင်က မစိုးရိမ်နှင့်။ ငါမစမည်ဟု သင့်အားဆိုလျက် သင်၏လက်ယာလက်ကိုကိုင်မည်’ ဟု ဣသရေလူတို့ကို ယေဟောဝါ မိန့်ဆိုတော်မူသည်။—ဟေရှာယ ၄၁:၁၀၊ ၁၃။

^၁၉ယေဟောဝါသည် ကျွန်ုပ်တို့လက်ကိုကိုင်ထားသည်! အလွန်စိတ်နွေးထွေးဖွယ် မြင်ကွင်းပါတကား။ ဒါဝိဒ် ဤသို့ရေးသားခဲ့သည်– ‘ငါသည် ထာဝရဘုရားသခင်ကို အစဉ်မပြတ်မျက်မှောက်ပြု၏။ အကြောင်းမူကား ငါ့လက်ယာဘက်၌တည်ရှိတော်မူသည်ဖြစ်၍ ငါသည် လှုပ်ရှားခြင်းမရှိရ။’ (ဆာလံ ၁၆:၈) ယေဟောဝါကို ကျွန်ုပ်တို့၏ “လက်ယာဘက်” တွင် မည်သို့ရှိစေနိုင်သနည်း။ နည်းနှစ်နည်းဖြင့်ဖြစ်သည်။ ပထမနည်းမှာ ကျွန်ုပ်တို့၏ဘဝကဏ္ဍတိုင်းတွင် ကိုယ်တော့်နှုတ်မြွက်တော်၏ လမ်းညွှန်မှုကို ခံယူခြင်းဖြင့်ဖြစ်သည်။ ဒုတိယ၊ ကျွန်ုပ်တို့ရှေ့တွင် ကိုယ်တော်ချပေးထားသည့် အံ့ချီးဖွယ်ဆုကျေးဇူးကို အာရုံစိုက်ခြင်းဖြင့်ဖြစ်သည်။ ဆာလံဆရာအာသ ဤသို့စပ်ဆိုသည်– “အကျွန်ုပ်သည် ကိုယ်တော်ထံမှာအစဉ်ရှိ၍ အကျွန်ုပ်၏လက်ယာလက်ကို ဆွဲကိုင်တော်မူ၏။ အကျွန်ုပ်ကိုဉာဏ်ပေး၍ ပဲ့ပြင်တော်မူမည်။ နောက်တစ်ဖန် ဘုန်းအသရေ၌ သိမ်းယူတော်မူမည်။” (ဆာလံ ၇၃:၂၃၊ ၂၄) ထိုသို့သောယုံကြည်စိတ်ချမှုဖြင့် အနာဂတ်ကို ရင်ဆိုင်နိုင်ပါသည်။

‘သင်တို့ကိုရွေးနုတ်သောအချိန်ကာလ ရောက်လုနီးပြီ’

၂၀၊ ၂၁။ ယေဟောဝါကိုမျှော်လင့်သောသူတို့ကို အဘယ်အနာဂတ်စောင့်ကြိုနေသနည်း။

^၂၀နေ့ရက်တစ်ရက်ကုန်လွန်သွားလေ ယေဟောဝါကို ကျွန်ုပ်တို့၏လက်ယာဘက်တွင် ရှိနေစေရန် ပို၍အရေးကြီးလာလေဖြစ်သည်။ မကြာမီ အယူမှားဘာသာရေး ဖျက်ဆီးခံရသည်နှင့် စာတန့်စနစ်သည် တစ်ကြိမ်တစ်ခါမျှ မကြုံဖူးသော ကြီးစွာသောဆင်းရဲခြင်းကို ရင်ဆိုင်ရပေလိမ့်မည်။ (မဿဲ ၂၄:၂၁) ယုံကြည်ခြင်းကင်းမဲ့သော လူသားထုမှာ ကြောက်ရွံ့နေကြမည်။ သို့သော် ထိုယောက်ယက်ခတ်ချိန်အတွင်း ယေဟောဝါ၏ရဲရင့်သောကျေးကျွန်များသည် မျှော်လင့်လျက် ဝမ်းမြောက်ကြပေလိမ့်မည်။ “ထိုအမှုအရာတို့သည် ဖြစ်စရှိသောအခါ သင်တို့ကိုရွေးနုတ်သောအချိန်ကာလ ရောက်လုနီးသည်ကိုထောက်သဖြင့် မျှော်ကြည့်၍ခေါင်းကိုကြွကြလော့” ဟု ယေရှုမိန့်ဆိုတော်မူ၏။—လုကာ ၂၁:၂၈။

^၂၁ထို့ကြောင့် ဘုရားသခင်ပေးသော မျှော်လင့်ခြင်းတွင် ဝမ်းမြောက်ကြပါစို့။ စာတန်၏စဉ်းလဲသောဉာဏ်နီဉာဏ်နက်များ၏ လှည့်စားဖြားယောင်းမှု မခံကြစို့နှင့်။ တစ်ချိန်တည်းတွင် ယုံကြည်ခြင်း၊ ချစ်ခြင်းနှင့် ဘုရားသခင်အားကြောက်ရွံ့ခြင်းတို့ကို ကြိုးစားပြုစုပျိုးထောင်ကြပါစို့။ ထိုသို့ပြုလုပ်ခြင်းဖြင့် အခြေအနေတိုင်းတွင် ယေဟောဝါကိုနာခံရန်နှင့် စာတန်ကိုတွန်းလှန်ရန် ရဲရင့်ခြင်းရှိမည်ဖြစ်သည်။ (ယာကုပ် ၄:၇၊ ၈) မှန်ပါသည်။ ‘ထာဝရဘုရားသခင်ကို ကိုးစားသောသူအပေါင်းတို့၊ အားယူ၍ ရဲရင့်သောစိတ်နှလုံးရှိကြလော့။’—ဆာလံ ၃၁:၂၄။

[အောက်ခြေမှတ်ချက်]

^ အပိုဒ်၊ 1 ခရစ်ယာန်ဂရိကျမ်းစာတွင် “မျှော်လင့်ခြင်း” ဟူသောစကားလုံးသည် ဝိညာဉ်တော်ဖွားခရစ်ယာန်များ၏ ကောင်းကင်ဆုကျေးဇူးကိုဆိုလိုသော်လည်း ဤဆောင်းပါးတွင် မျှော်လင့်ခြင်းနှင့်ပတ်သက်သော ယေဘုယျအသုံးအနှုန်းကို ဆွေးနွေးပါမည်။

သင်ဖြေဆိုနိုင်သလော

• ယေရှုသည် မျှော်လင့်ခြင်းကြောင့် မည်သို့ရဲရင့်ခဲ့သနည်း။

• ယုံကြည်ခြင်းနှင့်မျှော်လင့်ခြင်းသည် မည်သို့ဆက်စပ်နေသနည်း။

• ခရစ်ယာန်တစ်ဦး ဘဝဦးစားထားရာများချမှတ်ရာတွင် ယုံကြည်ခြင်းနှင့်မျှော်လင့်ခြင်းက မည်သို့ရဲစွမ်းသတ္တိရှိစေနိုင်သနည်း။

• ‘ထာဝရဘုရားသခင်ကိုမျှော်လင့်’ သောသူတို့သည် အနာဂတ်ကို အဘယ်ကြောင့် ယုံကြည်စိတ်ချမှုအပြည့်ဖြင့် မျှော်ကြည့်နိုင်သနည်း။

[လေ့လာရန်မေးခွန်းများ]

[စာမျက်နှာ ၂၈ ပါ ရုပ်ပုံ]

သင်သည် လူကြီးဖြစ်စေ၊ လူငယ်ဖြစ်စေ ပရဒိသုတွင်ရှိနေသည်ဟု မြင်ယောင်ကြည့်နိုင်ပါသလော

ကင်းမျှော်စင်—လေ့လာရန် စာစောင်