လူသား​တို့၏ ထာဝရ​အသက် ရှာပုံတော်

ရှေး​အချိန်​ကတည်းက လူတို့သည် ထာဝစဉ်​အသက်ရှင်​ရန် မျှော်လင့်​ခဲ့​ကြသည်။ သို့သော် မျှော်လင့်သည့်​အတိုင်း မဖြစ်ခဲ့​ပေ။ မည်သူမျှ သေခြင်း​တရားကို မအောင်​နိုင်​ခဲ့​ကြ​ချေ။ သို့​တိုင် မကြာသေးမီ​က ဆေး​သုတေသန​ပြုချက်​အရ လူ့​သက်တမ်း ထူးထူးခြားခြား​ပို​ရှည်​လာနိုင်​သည်​ဟူသော မျှော်လင့်ချက် ပြန်ရှင်​သန်​လာ​၏။ သိပ္ပံ​လေ့လာမှု​နယ်ပယ်​အသီးသီး​တွင် ရှာဖွေ​တွေ့ရှိ​ခဲ့​ရာ​ကို သုံးသပ်ကြည့်​ပါ။

ဇီဝ​ဗေဒ​ပညာရှင်​များသည် ဆဲလ်​အသစ်​ပွား​နှုန်း​တိုးများ​စေရန် တယ်​လို​မာ​ရေး​စ်​အင်ဇိုင်း (enzyme telomerase) များ​ကို စမ်းသပ်​လေ့လာ​နေကြ​သည်။ အိုမင်း​ပျက်စီး​သွားသော​ဆဲလ်​များသည် ဖယ်ရှားခံ​ရ​၍ အသစ်​အစားထိုး​ခံရ​ကြောင်း သိပ္ပံ​ပညာရှင်​များ သိ​ကြ​၏။ အမှန်​မှာ လူတစ်ဦး​၏​သက်တမ်း​တစ်လျှောက်​တွင် ခန္ဓာကိုယ်​အစိတ်အပိုင်း​အများစု​သည် ဆဲလ်​အသစ်များ​ဖြင့် အကြိမ်ပေါင်း​များစွာ အစားထိုး​ခံရ​သည်။ အသစ်​အစားထိုး​သော​ဖြစ်​စဉ်​ကို​သာ ဆက်​ထိန်းထား​နိုင်​မည်​ဆိုပါ​က “လူ့​ခန္ဓာကိုယ်​သည် အလွန်​ကြာမြင့်စွာ၊ ထာဝစဉ်​ပင် မိမိကိုယ်ကို​အသစ်​ဆင် ပြုပြင်​နိုင်​မည်” ဟု​သုတေသီ​များ ယူဆကြ​သည်။

သုတေသန​နယ်ပယ်​တွင် အငြင်းပွား​စ​ရာ​ဖြစ်သော ပုံတူ​မျိုးပွားခြင်း​ကုထုံး​သည် ကိုယ်​အင်္ဂါ​အစားထိုး​ကုသ​နိုင်​ရန် လူနာများ​နှင့်​အထူး​သင့်လျော်​သည့် အသည်း၊ ကျောက်ကပ်၊ နှလုံး​တို့ကို အသစ်​ရရှိ​စေနိုင်​ပုံ​ပေါ်​သည်။ ထိုသို့​သော​အင်္ဂါများ​ကို ပုံတူ​ပွား​ရာ​တွင် လူနာ​၏​ပင်မ​ဆဲလ်​များ​ကို အသုံးပြု​ကြသည်။

ဆရာဝန်​များသည် ကင်ဆာ​ဆဲလ်​များနှင့် သေစေနိုင်​သော​ဗက်တီးရီးယား​များ​အား ရှာဖွေ​တိုက်ဖျက်​နိုင်​ရန် ဆဲလ်​အရွယ်​ရှိ စက်​များ​ကို သွေးကြော​ထဲ​ထည့်သွင်း​နိုင်​မည်​ဟု နာ​နို​နည်း​ပညာ​နယ်ပယ်​မှ သုတေသီ​များ မျှော်လင့်​ကြသည်။ ထို​သိပ္ပံ​နည်း​ပညာ​နှင့်အတူ မျိုးရိုး​ဗီဇ​ကုထုံး​များ​ကြောင့် နောက်ဆုံး​တွင် လူ့​ခန္ဓာကိုယ်​သည် မိမိကိုယ်ကို ထာဝစဉ်​ထောက်​မပေးနိုင်​လိမ့်​မည်​ဟု အချို့​ယူဆကြ​သည်။

ခရိုင်​ယို​နစ်​နည်းကို ထောက်ခံသူ​များ​က သေဆုံး​သွား​သူတို့၏ ရုပ်ကလာပ်​များ​ကို အေးခဲ​စေ​ကြသည်။ ရည်ရွယ်ချက်မှာ ဆေးပညာ​တိုးတက်​အောင်မြင်မှု​များ​ကြောင့် ဆရာဝန်​များသည် ရောဂါ​များ​ကုသ​နိုင်​ပြီး အိုမင်း​ခြင်း​၏​ဆိုးကျိုး​များ​ကို ပပျောက်​စေ​ကာ သေ​သူကို​ပြန်ရှင်​လာ​စေ​၍ ပြန်​ကျန်းမာ​လာ​စေနိုင်​မည့်​အချိန်အထိ ရုပ်ကလာပ်​များ​ကို ထိန်းသိမ်း​ထား​ရန်ဖြစ်​သည်။ ထို​အယူအဆကို “ရှေး​အီဂျစ်​လူမျိုး​တို့၏ ရုပ်​အလောင်း​ဆေး​စိမ်​နည်း​နှင့်​ဆင်တူ​သော မျက်မှောက်ခေတ်​နည်း​ပညာ” ဟု American Journal of Geriatric Psychiatry (အမေရိကန် သက်ကြီးရွယ်အို​စိတ်ဝေဒနာ​ဆိုင်ရာ​ဂျာနယ်) က​ခေါ်ဆို​ထား​သည်။

ထာဝရ​အသက်​ရှာပုံတော်ဖွင့်​ခြင်း​က သေခြင်း​တရားကို လက်ခံရန် မည်မျှ​ခက်ခဲ​ကြောင်း ဖော်ပြ​နေသည်။ လူသား​တို့ အမှန်ပင် ထာဝစဉ်​အသက်ရှင်​နိုင်​မည်​လော။ ယင်း​နှင့်​ပတ်သက်​၍ သမ္မာကျမ်းစာ မည်သို့​ဆို​သနည်း။ နောက်​ဆောင်းပါး​က အဖြေပေး​ပါ​လိမ့်​မည်။