သင် ထာဝစဉ် အသက်ရှင်နိုင်
သင် ထာဝစဉ် အသက်ရှင်နိုင်
ကမ္ဘာ့ဘာသာတရားများမှ ဘာသာဝင်များစွာသည် ထာဝစဉ်အသက်ရှင်ခြင်း မျှော်လင့်ချက်အမျိုးမျိုးကို ရင်ဝယ်ပိုက်ထားကြသည်။ ဘာသာတစ်ခုနှင့်တစ်ခု အသေးစိတ်အချက်အလက်များ ကွဲပြားသော်လည်း အခြေခံအားဖြင့် တူညီသည်။ ယင်းမှာ သေခြင်းကင်းပြီး သုခချမ်းသာနှင့်ပြည့်စုံသောအသက်တာဖြင့် နေထိုင်သွားရန်ဖြစ်၏။ သင်လည်း ထိုသို့ပင် လိုလားတောင့်တသည် မဟုတ်လော။ ဘာသာတရားများစွာသည် အဘယ်ကြောင့် ထိုသို့တစ်ပုံစံတည်းယုံကြည်ကြသနည်း။ ထာဝရအသက်မျှော်လင့်ချက်သည် အမှန်ပြည့်ဝလာမည်လော။
ဖန်ဆင်းရှင်သည် ပထမလူသားမောင်နှံကို ဖန်ဆင်းချိန်မှစ၍ လူတို့၏စိတ်တွင် ထာဝစဉ်အသက်ရှင်လိုသည့် ပြင်းပြသောဆန္ဒထည့်သွင်းပေးခဲ့ကြောင်း သမ္မာကျမ်းစာက ဤသို့ဖော်ပြသည်– ‘[ဘုရားသခင်သည်] လူ့စိတ်နှလုံးကိုလည်း အဆုံးမဲ့ကာလ၌ စွဲလမ်းစေတော်မူပြီ။’—ဒေ. ၃:၁၁။
သို့သော် ထာဝစဉ်အသက်ရှင်လိုသည့်ဆန္ဒ ပြည့်ဝနိုင်ရန် ပထမလူသားမောင်နှံသည် ဘုရားသခင်၌ အမှားအမှန်ဆုံးဖြတ်ပိုင်ခွင့်ရှိကြောင်း လက်ခံရမည်။ သို့ဆိုလျှင် သူတို့သည် ဘုရားသခင်ပြင်ဆင်ပေးထားသော ဧဒင်ဥယျာဉ်၌ အဆုံးမဲ့အသက်တာဖြင့် နေထိုင်ထိုက်သည်ဟု ဘုရားသခင်သတ်မှတ်လိမ့်မည်။—ကမ္ဘာဦး ၂:၈; ၃:၂၂။
ထာဝရအသက်ပျောက်ဆုံး
ဘုရားသခင်သည် ဥယျာဉ်ထဲရှိ “ကောင်းမကောင်းကိုသိကျွမ်းရာအပင်” ၏အသီးကိုမစားရန် အာဒံနှင့်ဧဝကို တားမြစ်ခဲ့ပြီး စားပါက သေရမည်ဖြစ်သည်။ (ကမ္ဘာဦး ၂:၉၊ ၁၇) ထိုအသီးကို မစားခြင်းက ဘုရားသခင့်အခွင့်အာဏာကို အသိအမှတ်ပြုကြောင်း ဖော်ပြရာရောက်မည်။ စားခြင်းက ဘုရားသခင့်အခွင့်အာဏာကို ငြင်းပယ်ကြောင်း ဖော်ပြရာရောက်မည်။ အာဒံနှင့်ဧဝသည် ယေဟောဝါ၏အမိန့်တော်များကို မနာခံဘဲ ဘုရားသခင့်အခွင့်အာဏာကို ဆန့်ကျင်ပုန်ကန်သော ဝိညာဉ်သတ္တဝါစာတန်ဘက် ပါသွားခဲ့ကြသည်။ ရလဒ်အနေဖြင့် သူတို့သည် ထာဝရအသက်မရထိုက်ဟု ဘုရားသခင် မှန်ကန်စွာဆုံးဖြတ်ခဲ့သည်။—ကမ္ဘာဦး ၃:၁-၆။
အသက်ရှင်ခြင်းနှင့် သေခြင်း၊ တည်ရှိခြင်းနှင့် မတည်ရှိခြင်းကို ဘုရားသခင်ကမ်းလှမ်းခဲ့၏။ မနာခံမှု၏ရလဒ်မှာ သေခြင်းဖြစ်ပြီး သူတို့သည် လုံးဝမတည်ရှိသည့်အဖြစ်သို့ ရောက်ရှိသွားသည်။ အာဒံနှင့်ဧဝဖြစ်စေ၊ သူတို့၏သားမြေးများဖြစ်စေ ဆန်းကြယ်သောဆေးရည်တစ်မျိုးကြောင့် သို့မဟုတ် မသေနိုင်သောဝိညာဉ်စိုးလ်ကြောင့် ဆက်အသက်ရှင်နိုင်မည်မဟုတ်ပါ။ *
အာဒံ၏ပုန်ကန်မှုကြောင့် သူ၏သားမြေးအားလုံး ဝေဒနာခံစားခဲ့ရသည်။ ထိုအကျိုးဆက်များကို တမန်တော်ပေါလု ဤသို့ရှင်းပြသည်– “အပြစ်တရားသည် တစ်ယောက်သောသူအားဖြင့် ဤလောကသို့ဝင်၍ အပြစ်တရားအားဖြင့် သေခြင်းတရားဝင်သည်နှင့်အညီ လူအပေါင်းတို့သည် အပြစ်ရှိသောကြောင့် သေခြင်းသို့ရောက်ရကြ၏။”—ရောမ ၅:၁၂။
ထာဝရအသက်ပြန်ရ
တမန်တော်ပေါလုက အာဒံ့သားမြေးများ၏ အခြေအနေကို ပထမရာစုမှကျွန်တစ်ဦး၏ အခြေအနေနှင့် နှိုင်းယှဉ်ပုံဖော်ခဲ့သည်။ အမွေခံရသောအပြစ်ကြောင့် အာဒံနှင့်ဧဝတို့၏ သားသမီးများသည် “အပြစ်တရား၏ကျွန်” အဖြစ်မွေးဖွားလာကြပြီး သေရကြမည်ဖြစ်သည်။ (ရောမ ၅:၁၂; ၆:၁၆၊ ၁၇) ထိုသို့သောကျွန်ဘဝမှ လွတ်မြောက်စေရန် တရားဝင်ဖြေရှင်းနည်းကို ယေဟောဝါမစီမံပေးပါက သူတို့ လွတ်မြောက်နိုင်မည်မဟုတ်ပေ။ ပေါလုဤသို့ရှင်းပြ၏– “တစ်ယောက်သောသူ [အာဒံ] ၏ပြစ်မှားခြင်းအားဖြင့် လူအပေါင်းတို့သည် အပြစ်စီရင်ခြင်းနှင့် တွေ့ ကြုံရကြသည်နည်းတူ တစ်ယောက်သောသူ၏ဖြောင့်မတ်ခြင်းအားဖြင့် လူအပေါင်းတို့သည် အသက်နှင့်ယှဉ်သောဖြောင့်မတ်ရာသို့ ရောက်ခြင်းအခွင့်ကိုရကြ၏။” ထို “ဖြောင့်မတ်ခြင်း” ကြောင့် ယေရှုသည် “လူအပေါင်းတို့ကိုရွေး” ရန် မိမိ၏စုံလင်သောလူ့အသက်ကို ပူဇော်ခဲ့သည်။ ရွေးနုတ်ဖိုးသည် လူသားတို့ကို “ဒဏ်ခံစေ” သော “တရားစီရင်” ချက်မှ လွတ်မြောက်ပေးနိုင်စွမ်းရှိကြောင်း ယေဟောဝါအသိအမှတ်ပြုတော်မူသည်။—ရောမ ၅:၁၆၊ ၁၈၊ ၁၉; ၁ တိမောသေ ၂:၅၊ ၆။
ထို့ကြောင့် သိပ္ပံပညာရှင်များသည် ထာဝရအသက်၏သော့ချက်ကို လူ့မျိုးရိုးဗီဇသင်္ကေတတွင် လုံးဝတွေ့ရှိမည်မဟုတ်ပေ။ ယင်းကို အခြားတစ်နေရာတွင် တွေ့ရှိရသည်။ သမ္မာကျမ်းစာအရ လူ့သေခြင်း၏ အခြေခံအကြောင်းရင်းသည် ကိုယ်ကျင့်တရား၊ တရားမျှတမှုတို့နှင့်ဆိုင်ပြီး မျိုးရိုးဗီဇနှင့်မဆိုင်ပေ။ ထာဝရအသက်ပြန်ရရှိစေသည့် နည်းလမ်းဖြစ်သော ယေရှု၏ရွေးဖိုးပူဇော်သကာသည်လည်း တရားမျှတသော တောင်းဆိုချက်တစ်ခုဖြစ်သည်။ ရွေးနုတ်ဖိုးက ဘုရားသခင်၏ဖြောင့်မတ်မှုနှင့် ချစ်ခင်ကြင်နာမှုတို့ကိုလည်း ဖော်ပြသည်။ သို့ဆိုလျှင် မည်သူတို့သည် ရွေးနုတ်ဖိုးမှအကျိုးခံစားရပြီး ထာဝရအသက်ရရှိမည်နည်း။
မသေနိုင်သောဆုကျေးဇူး
ယေဟောဝါဘုရားသခင်သည် “ရှေးကမ္ဘာအဆက်ဆက်မှစ၍ နောက်ကမ္ဘာအဆက်ဆက်တိုင်အောင်” တည်ရှိတော်မူ၏။ ကိုယ်တော်သည် မသေနိုင်ပါ။ (ဆာလံ ၉၀:၂) ယေဟောဝါသည် မသေနိုင်သောဆုကျေးဇူးကို ယေရှုခရစ်အား ဦးဆုံးပေးသနားခဲ့သည်။ တမန်တော်ပေါလု ဤသို့ရှင်းပြ၏– “ခရစ်တော်သည် သေခြင်းမှထမြောက်သောအခါ သေခြင်းနှင့်အစဉ်ကင်းလွတ်တော်မူ၏။ သေခြင်းတရားသည် နောက်တစ်ဖန် ကိုယ်တော်ကိုမအုပ်စိုးရ။” (ရောမ ၆:၈၊ ၉) ပေါလုက ရှင်ပြန်ထမြောက်ပြီးသောယေရှုနှင့် မြေကြီးအုပ်စိုးရှင်များ၏ ခြားနားချက်ကို နှိုင်းယှဉ်လျက် ကိုယ်တော်တစ်ပါးတည်းသာလျှင် မသေနိုင်သောအဖြစ်ကိုရရှိသူဖြစ်ကြောင်း ဖော်ပြခဲ့သည်။ ယေရှုသည် “ထာဝရတည်” မည်ဖြစ်သည်။ ကိုယ်တော်၏အသက်သည် မပျက်စီးနိုင်သောအသက်ဖြစ်၏။—ဟေဗြဲ ၇:၁၅-၁၇၊ ၂၃-၂၅; ၁ တိမောသေ ၆:၁၅၊ ၁၆။
ထိုသို့သောဆုကျေးဇူးရရှိသူမှာ ယေရှုတစ်ဦးတည်းမဟုတ်ပါ။ ကောင်းကင်တွင် ဘုရင်များအဖြစ်အုပ်ချုပ်ရန် ရွေးချယ်ခံရသူ ဝိညာဉ်တော်ဖွားခရစ်ယာန်များလည်း ယေရှုကဲ့သို့သော ရှင်ပြန်ထမြောက်ခြင်းမျိုးကိုရရှိကြသည်။ (ရောမ ၆:၅) တမန်တော်ယောဟန်က ထိုဆုကျေးဇူးကို ၁၄၄,၀၀၀ တို့ ရရှိကြသည်ဟုဖော်ပြသည်။ (ဗျာ. ၁၄:၁) သူတို့သည် မသေနိုင်သောအဖြစ်ကိုလည်း ရရှိကြသည်။ သူတို့၏ထမြောက်ခြင်းနှင့်ပတ်သက်၍ ပေါလု ဤသို့ဆို၏– “လူအသွေးအသားသည် ဘုရားသခင်၏နိုင်ငံတော်ကို အမွေမခံနိုင်။ . . . တံပိုးမှုတ်ချိန်ရောက်သောအခါ သေလွန်သောသူတို့သည် မပုပ်နိုင်သောအဖြစ်၌တည်လျက် ထမြောက်၍ ငါတို့ရှိသမျှသည် ပြောင်းလဲခြင်းသို့ရောက်ရကြမည်။ ယခုမျက်မှောက်ပုပ်တတ်သောအရာသည် မပုပ်နိုင်သောအဖြစ်သို့ ဝင်စားရမည်။ ယခုမျက်မှောက်သေတတ်သောအရာသည် မသေနိုင်သောအဖြစ်သို့ဝင်စားရမည်။” ထိုသို့သောထမြောက်ခြင်းကို ဝင်စားသူတို့အား သေခြင်းတရားက မတားဆီးနိုင်ပါ။—၁ ကောရိန္သု ၁၅:၅၀-၅၃; ဗျာ. ၂၀:၆။
ဘုရားသခင်ထံမှ ထိုဖွင့်ပြချက်သည် အမှန်ပင်အံ့သြဖွယ်ဖြစ်၏။ ဝိညာဉ်သတ္တဝါများဖြစ်သော ကောင်းကင်တမန်များပင် မသေနိုင်သောအဖြစ်မျိုးနှင့် ဖန်ဆင်းမခံရပါ။ စာတန်၏ပုန်ကန်မှုတွင် ပူးပေါင်းခဲ့ကြသော ဝိညာဉ်သတ္တဝါများ ဖျက်ဆီးခံရမည်ဟူသောအချက်က ယင်းကိုဖော်ပြသည်။ (မဿဲ ၂၅:၄၁) သို့သော် ယေရှုနှင့်တွဲဖက်အုပ်ချုပ်သူများမူ မသေနိုင်သောဆုကျေးဇူးရရှိထားရာ သူတို့၏သစ္စာရှိမှုကို ယေဟောဝါ လုံးဝယုံကြည်စိတ်ချကြောင်း ထင်ရှားသည်။
ယင်းက သန်းထောင်ချီရှိသော လူသားများထဲတွင် ၁၄၄,၀၀၀ သာ ထာဝစဉ်အသက်ရှင်မည်ဟု ဆိုလိုသလော။ မဆိုလိုပါ။ အကြောင်းရင်းကို ကြည့်ကြစို့။
မြေကြီးပရဒိသုတွင် ထာဝစဉ်အသက်ရှင်ခြင်း
မြေကြီးပရဒိသုတွင် ထာဝစဉ်အသက်ရှင်ခွင့်ရသော မရေမတွက်နိုင်သည့်လူအုပ်ကြီးနှင့်ပတ်သက်၍ ဗျာ.ကျမ်းက လှပစွာပုံဖော်ထားသည်။ သေရာမှ ရှင်ပြန်ထမြောက်လာကြသူများသည် ပြန်လည်နုပျိုကျန်းမာလာကာ ထိုလူအုပ်ကြီးနှင့်အတူ ပူးပေါင်းကြသည်။ (ဗျာ. ၇:၉; ၂၀:၁၂၊ ၁၃; ၂၁:၃၊ ၄) “ကျောက်သလင်းကဲ့သို့ ကြည်လင်၍ ဘုရားသခင်နှင့် သိုးသငယ်၏ပလ္လင်တော်ထဲကထွက်သော အသက်ရေစီးရာမြစ်” သို့ သူတို့ပို့ဆောင်ခံရသည်။ ထိုမြစ်နှစ်ဖက်၌ “အသက်ပင်ရှိ၏။ . . . အရွက်သည်လည်း လူအမျိုးမျိုးတို့၏ အနာရောဂါငြိမ်းစရာဖို့ဖြစ်၏။” ယေဟောဝါဘုရားသခင် ဤသို့ကြင်နာစွာ ဖိတ်ခေါ်လေသည်– “ရေငတ်သောသူသည် လာပါစေ။ အလိုရှိသောသူသည် အဖိုးကိုမပေးဘဲ အသက်ရေကိုယူပါစေ။”—ဗျာ. ၂၂:၁၊ ၂၊ ၁၇။
ထိုအပင်များနှင့် ရေတို့သည် အဂ္ဂိရတ်ပညာရှင်များနှင့် စူးစမ်းရှာဖွေရေးသမားများ ရာစုနှစ်များစွာရှာဖွေခဲ့သော အသက်ရှည်ဆေး သို့မဟုတ် နုပျိုဆေး မဟုတ်ပါ။ ယင်းအစား မူလစုံလင်သည့်အခြေအနေသို့ လူသားများရောက်ရှိစေရန် ယေရှုခရစ်မှတစ်ဆင့် ဘုရားသခင့်ပြင်ဆင်ပေးချက်များကို ပုံဆောင်သည်။
နာခံမှုရှိသောလူသားများကို ကမ္ဘာပေါ် ထာဝရအသက်ပေးမည်ဟူသော ဘုရားသခင့်ရည်ရွယ်ချက်သည် မပြောင်းလဲခဲ့ပေ။ ယေဟောဝါသည် သစ္စာစောင့်သိသောကြောင့် ထိုရည်ရွယ်ချက် ပြည့်စုံလာလိမ့်မည်။ ဆာလံ ၃၇:၂၉ ကဤသို့ဆို၏– “ဖြောင့်မတ်သောသူတို့သည် ပြည်တော်ကိုအမွေခံ၍ အစဉ်အမြဲနေရကြလိမ့်မည်။” ထိုကတိတော်က မသေနိုင်သောကောင်းကင်အသက်တာ ရရှိသူတို့နှင့်အတူ ဤသို့ကြွေးကြော်ရန် ကျွန်ုပ်တို့ကို လှုံ့ဆော်ပေးသည်– ‘အတိုင်းအဆမဲ့တန်ခိုးနှင့်ပြည့်စုံတော်မူသော ထာဝရအရှင်ဘုရားသခင်၊ ကိုယ်တော်၏အပြုအမူတို့သည် ကောင်းမြတ်၍အံ့သြဖွယ်ဖြစ်ကြပါ၏။ လူမျိုးတို့၏ဘုရင်၊ ကိုယ်တော်၏အကျင့်ဓလေ့တို့သည် ဖြောင့်မတ်ဟုတ်မှန်ကြပါ၏။ အို ထာဝရဘုရားသခင် ကိုယ်တော်ကိုမကြောက်ရွံ့ဘဲ၊ နာမတော်ကိုမချီးမွမ်းဘဲ အဘယ်သူနေရပါအံ့နည်း။ ကိုယ်တော်တစ်ပါးတည်းသာလျှင် သန့်ရှင်း [“သစ္စာစောင့်သိ၊” ကဘ] တော်မူ၏။’—ဗျာ. ၁၅:၃၊ ၄။
အဖိုးထိုက်လှသော ထာဝရအသက်ဆုကျေးဇူးကို သင်ရယူလိုသလော။ သို့ဆိုလျှင် သင်သည် “လူမျိုးတို့၏ဘုရင်” ကိုသစ္စာစောင့်သိပြီး နာခံရမည်။ ယေဟောဝါအကြောင်း သင်ယူဖို့လိုသည်။ ထို့ပြင် ယေရှုခရစ်အားဖြင့် ထာဝရအသက်ရနိုင်သောကြောင့် ကိုယ်တော့်အကြောင်းကိုလည်း သင်ယူရမည်။ အမှားအမှန်နှင့်ပတ်သက်၍ ဘုရားသခင့်စံနှုန်းများကို လက်ခံလိုသူအားလုံးသည် “ထာဝရအသက်” ဆုကျေးဇူးရရှိကြပါလိမ့်မည်။
[အောက်ခြေမှတ်ချက်]
^ အပိုဒ်၊ 7 မသေနိုင်သောဝိညာဉ်စိုးလ် သွန်သင်ချက်အကြောင်း ဆွေးနွေးချက်ကို သမ္မာကျမ်းစာအမှန်တကယ် သွန်သင်ရာမှာအဘယ်နည်း စာအုပ်၊ အခန်း ၆ တွင်ရှု။
[စာမျက်နှာ ၅ ပါ လေးထောင့်ကွက်/ရုပ်ပုံ]
ကြာရှည်တည်တံ့ခဲ့သောဆန္ဒ
ဘီစီနှစ်ထောင်ခန့်က ရေးခဲ့သည်ဟုယူဆရသော မက်ဆိုပိုတေးမီးယားလင်္ကာဖြစ်သည့် ဂီလ်ဂါမဲ့ရှ်မော်ကွန်းတင်ကဗျာတွင် ထာဝစဉ်နုပျိုသည့်အသက်တာရရန် သူရဲကောင်းတစ်ဦး ရှာပုံတော်ဖွင့်ခဲ့ကြောင်းဖော်ပြထားသည်။ ရှေးအီဂျစ်လူမျိုးများသည် ဝိညာဉ်စိုးလ်မသေနိုင်ဟု ယုံကြည်ကြရာ သေသူ၏ရုပ်ကလာပ်ကိုဆေးစိမ်ထားခြင်းဖြင့် တစ်နေ့တွင် ဝိညာဉ်စိုးလ်ပြန်ဝင်လာနိုင်မည်ဟု ယုံကြည်ကြသည်။ သို့ဖြစ်၍ အီဂျစ်လူမျိုးတို့၏ အုတ်ဂူအချို့၌ သေဆုံးသူ တမလွန်ဘဝတွင် အသုံးလိုမည့်ပစ္စည်းများကို ထည့်ထားပေးကြသည်။
ဘီစီရှစ်ရာစုခန့်တွင် တရုတ်အဂ္ဂိရတ်ပညာရှင်များက ခန္ဓာကိုယ်မသေနိုင်ဟု ယုံကြည်ခဲ့ပုံရပြီး ဆန်းကြယ်သောဆေးရည်များဖြင့် ယင်းသို့ပြုလုပ်နိုင်သည်ဟု ဘီစီလေးရာစုတွင် ယုံကြည်ခဲ့ကြသည်။ အလယ်ခေတ်ဥရောပနှင့် အာရဘီအဂ္ဂိရတ်ပညာရှင်များက အသက်ရှည်ဆေးများ ရှာဖွေကြပြီး ကိုယ်တိုင်ဖော်စပ်ခဲ့ကြသည်။ ထိုဆေးရည်အချို့တွင် စိန်ဓာတ်ပါသောဆား၊ ပြဒါးနှင့် ကန့်တို့ပါဝင်သည်။ ယင်းသို့ဖော်စပ်ရင်း လူမည်မျှ အဆိပ်သင့်ခဲ့သည်ကို မသိနိုင်ပေ။
နုပျိုစေသောစမ်းရေမှ ရေကိုသောက်သူအားလုံး ပြန်လည်နုပျိုလာမည်ဟူသည့် ဒဏ္ဍာရီများလည်း တစ်ချိန်ကပျံ့နှံ့ခဲ့၏။
[စာမျက်နှာ ၇ ပါ လေးထောင့်ကွက်/ရုပ်ပုံများ]
ထာဝရအသက်သည် ငြီးငွေ့စရာလော
ထာဝရအသက်သည် ငြီးငွေ့စရာဖြစ်မည်၊ အဓိပ္ပာယ်မဲ့သော အလုပ်များကို ထပ်တလဲလဲလုပ်ဆောင်ခြင်းဖြင့် မဆုံးနိုင်သည့်အချိန်ကို ဖြုန်းတီးနေခြင်းသာဖြစ်မည်ဟု အချို့ကန့်ကွက်ပြောဆိုကြသည်။ ထာဝရကာလဟုဆိုရာတွင် လူများစွာအတွက် ငြီးငွေ့ ဖွယ်ဖြစ်ပြီး အဓိပ္ပာယ်မဲ့သည့် လက်ရှိဘဝပုံစံနှင့် အခြေအနေများ ထာဝစဉ်ရှိနေမည်ဟု သူတို့တွေးထင်ပုံရသည်။ သို့သော် ဘုရားသခင်တည်ထောင်မည့် ပရဒိသုတွင် လူတို့သည် “များပြားသောငြိမ်သက်ခြင်း၌ မွေ့လျော်ကြလိမ့်မည်” ဟုကိုယ်တော်ကတိပေးထား၏။ (ဆာလံ ၃၇:၁၁) ထိုသို့သောအသက်တာက ယေဟောဝါ၏ ဖန်ဆင်းခြင်းလက်ရာများအကြောင်း လူသားတို့ သင်ယူခွင့်ရစေသည်။ ထို့ပြင် ယခုအချိန်တွင် ကျွန်ုပ်တို့စိတ်ကူးသာယဉ်နိုင်သော စိတ်ဝင်စားဖွယ် ကျွမ်းကျင်မှုများ၊ လေ့လာမှုများနှင့် အလုပ်အကိုင်များအတွက် အချိန်ပို၍ရရှိစေနိုင်သည်။
အသက်ပိုရှည်နိုင်ပုံကိုသုတေသနပြုသူ ကဲမ်ဘရစ်ခ်ျ တက္ကသိုလ်မှ မျိုးရိုးဗီဇပညာရှင် ဩဘရီဒဂရေးက ဤသို့လေ့လာတွေ့ရှိခဲ့၏– “အခုအချိန်မှာပညာကောင်းကောင်းတတ်ထားပြီး အဲဒါကိုအသုံးချသူတွေက ဘယ်တော့မှမငြီးငွေ့ ကြဘူး။ သူတို့လုပ်ချင်တဲ့အရာ အသစ်အဆန်းတွေ မရှိတော့ဘူးလို့လည်း ဘယ်တော့မှမတွေးကြဘူး။” သို့တိုင် ဘုရားသခင့်မှုတ်သွင်းခံကျမ်းစာက “ဘုရားသခင်စီရင်တော်မူသောအမှုကို အစမှအဆုံးတိုင်အောင် လူသည် စစ်၍မကုန်နိုင်” ဟုဆိုထားပေသည်။—ဒေ. ၃:၁၁။